МЦⷭ҇А ТОГО́ЖЕ ВЪ К҃Г ДН҃Ь

Ст҃а́гѡ сщ҃еннᲂмч҃нка пᲂлика́рпа . =Ве́черъ , на гдⷭ҇и вᲂзва́хъ , стихѣ́ры . гла́съ , а҃ . поⷣ . нбⷭ҇нымъ чино́мъ . Со беспло́тными сᲂвᲂкꙋпи́сѧ ,꙳ на землѝ живы́и ,꙳ и҆ с̾ ни́ми непреста́ннѡ слꙋ́жиши трⷪ҇цѣ , ѻ҆́ч҃е бг҃ᲂбл҃же́нне .꙳ тѣ́мже прⷭ҇нѡ , ꙗ҆́кѡ нбⷭ҇ныи чл҃къ живы́и в̾вы́шнихъ ,꙳ та́йнѡ наꙋча́еши сꙋ́щїѧ на землѝ ,꙳ бжⷭ҇твеннымъ та́йнамъ . Хрⷭ҇то́ва дѣ́ланїѧ лᲂза̀ бг҃ᲂнасажде́на ,꙳ слᲂве́снымъ бжⷭ҇твенѣ пред̾лᲂже́нъ ꙗ҆ви́лсѧ є҆сѝ ,꙳ гро́здїемъ пребл҃же́нне .꙳ ѿ ни́хже честнꙋ́ю пᲂчерпа́емъ сла́дᲂсть вѣ́рнѡ ,꙳ и҆ в̾ срⷣцахъ весе́лїѧ сла́дᲂсть ꙳ ᲂу҆че́нїи твᲂи́хъ принᲂша́емъ . Бжⷭ҇твеннымъ сїѧ́нїемъ ѡ҆зарѧ́емъ ,꙳ ѻ҆гне́мъ веще́ственымъ снѣда́емо тѣ́ло ,꙳ к̾ невеще́ственѣй преста́висѧ ѻ҆́ч҃е зарѝ .꙳ в̾не́й же разᲂрѝ мᲂли́твами сѝ ,꙳ страсте́й мра́чнꙋю но́щь мꙋ́дре ,꙳ ѡ҆зарѧ́ѧ дш҃а на́ша . =сла́ва , и҆ ны́нѣ , боⷢ҇ . Прегрѣше́ньми пꙋчи́нᲂю ѡ҆бꙋрева́емъ ,꙳ к̾ ти́хᲂмꙋ приста́нищꙋ пречⷭ҇тыѧ тѝ мᲂли́твы ,꙳ бг҃ᲂрᲂди́тельнице прибѣ́гъ ,꙳ в̾зыва́ю тѝ спаси́ мѧ ,꙳ держа́внꙋю сѝ прᲂсте́рши десни́цꙋ рабꙋ̀ твᲂемꙋ̀ ,꙳ всенепᲂро́чнаѧ . крⷭ҇тᲂбоⷢ҇ . Вᲂз̾дви́жена ꙗ҆́кѡ ви́дѣ на крⷭ҇тѣ̀ ,꙳ а҆́гньца непᲂро́чнаѧ дв҃а ,꙳ рыда́ющи вᲂпїѧ́ше , сла́дкᲂе мᲂѐ ча́до ,꙳ что̀ но́вᲂе и҆ пресла́внᲂе видѣ́нїе ,꙳ ка́кѡ сᲂдержа́и всѧ̀ го́рстїю ,꙳ на́ древѣ пригвᲂзди́сѧ пло́тїю .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , д҃ . И҆ нра́вᲂмъ прича́стникъ , и҆ престо́лѡмъ намѣ́стникъ а҆пⷭ҇лѡмъ бы́въ . дѣѧ́нїемъ ѡ҆брѣ́те бг҃ᲂдх҃нᲂве́нне , в̾видѣ́нїихъ вᲂсхо́дъ . сего̀ ра́ди сло́во и҆́стины и҆справлѧ́ѧ , за вѣ́рꙋ пᲂстрада́лъ є҆сѝ до́ крᲂве , сщ҃еннᲂмч҃нче пᲂлика́рпе , мᲂлѝ хрⷭ҇та̀ бг҃а , спасти́сѧ дш҃а́мъ на́шимъ .= сла́ва , и҆ ны́нѣ , боⷢ҇ . и҆лѝ , крⷭ҇тᲂбоⷢ҇ .=

Кано́нъ . гла́съ , в҃ . пѣ́снь , а҃ . і҆рмо́съ . Грѧди́те лю́дїе , пᲂе́мъ пѣ́снь хрⷭ҇тꙋ̀ бг҃ꙋ , раз̾дѣ́льшемꙋ мо́ре , и҆ прᲂве́дшꙋ лю́ди ꙗ҆́же и҆спꙋстѝ и҆з̾ рабо́ты є҆ги́петскїѧ , ꙗ҆́кѡ прᲂсла́висѧ .

запѣ́в̾ : Ст҃ы́и сщ҃еннᲂмч҃нче пᲂлика́рпе , мᲂлѝ бг҃а ѡ҆ на́съ . Хрⷭ҇то́вѣмъ свѣтᲂли́тїемъ сїѧ́ѧ , и҆ тᲂгѡ̀ прᲂсвѣще́нїемъ ѻ҆́ч҃е напᲂлнѧ́емь , ѡ҆мраче́ннꙋю дш҃ꙋ мᲂю̀ ѡ҆зарѝ , бг҃ᲂмꙋ́дре мл҃твами сѝ . Прᲂсвѣще́нїе спасе́нагѡ прᲂпᲂвѣ́данїѧ , чи́стᲂе срⷣце твᲂѐ ꙗ҆́кᲂже зерца́ло нескве́рно ѻ҆́ч҃е , ѡ҆блиста́въ зарю̀ всѣ́мъ прᲂсїѧ̀ . Зако́нꙋ но́вᲂмꙋ стᲂлпᲂписа́нїе ты̀ бы́лъ є҆сѝ . написа́нїе и҆мѣ́ѧ ѻ҆́ч҃е , не черни́лᲂмъ , но дх҃ᲂмъ бжⷭ҇твеннымъ , бл҃гᲂда́ти бжⷭ҇твеннᲂе є҆ѵⷢ҇а́лїе . боⷢ҇ . Бг҃а и҆з̾ тебѐ вᲂплᲂще́на вѣ́дꙋще , без̾ хᲂтѣ́нїѧ плᲂтьска́гѡ , и҆́же пре́жде тва́ри , и҆ пре́жде всѣ́хъ вѣ́къ , вᲂи́стинꙋ бцⷣꙋ тѧ̀ и҆спᲂвѣ́даемъ .

пѣ́снь , г҃ . і҆рмо́съ . Оу҆твердѝ на́съ сᲂбо́ю гдⷭ҇и , дре́вᲂмъ ᲂу҆мерщве́и прегрѣше́нїѧ . и҆ стра́хъ тво́й всадѝ в̾ срⷣца̀ на́ша , ꙗ҆́кѡ чл҃кᲂлю́бецъ . Ма́слина ѱало́мски рещѝ , плᲂдᲂви́та бы́лъ є҆сѝ пᲂлика́рпе бг҃ᲂѧвле́нне , в̾ дᲂмꙋ̀ гдⷭ҇а свᲂегѡ̀ . тꙋ́къ нᲂсѧ̀ прᲂпᲂвѣ́данїѧ . Напра́вилъ є҆сѝ ᲂу҆се́рднѡ бг҃ᲂбл҃же́нне , ᲂу҆́мъ сво́й пᲂвелѣ́нїемъ сп҃сᲂвѣмъ . по дᲂстᲂѧ́нїю бы́лъ є҆сѝ , тᲂгѡ̀ цр҃кве па́стырь и҆зрѧ́денъ . Всецѣ́лꙋ себѐ хрⷭ҇то́ви принесѐ , ꙗ҆́кѡ жи́вꙋ же́ртвꙋ . свидѣ́нїемъ со́вѣсти пре́жде пᲂстрада́въ , пребл҃же́нне вѣ́рᲂю . боⷢ҇ . Оу҆мерщве́нїѧ на́съ ѿпе́рсти ѿтрѧсла̀ є҆сѝ , ро́ждьши и҆́стиннᲂе без̾сме́ртїе . и҆ ѻ҆де́ждꙋ на́мъ и҆стка́ла є҆сѝ нетлѣ́нїѧ дв҃о , ржⷭ҇тво́мъ твᲂи́мъ .

сѣда́лен̾ . гла́съ , и҃ . Бл҃гᲂда́тныи гро́здъ в̾ дш҃и , вᲂи́стинꙋ вᲂз̾дѣ́лавъ ѻ҆́ч҃е мꙋ́дре . ꙗ҆́кѡ вино̀ и҆стᲂчи́лъ є҆сѝ , вѣ́рнᲂе сло́во , и҆ весели́ши всѣ́мъ вѣ́рнымъ мы́сли . и҆ чꙋдесе́мъ ꙗ҆ви́сѧ непрехᲂди́ма пꙋчи́на . тѣ́мже и҆ мч҃нкѡмъ ꙗ҆ви́лсѧ є҆сѝ ᲂу҆дᲂбре́нїе ; ѻ҆гне́мъ скᲂнчава́емь , и҆ свѣ́та спᲂдᲂблѧ́емь прⷭ҇нᲂсꙋ́щнагѡ пᲂлика́рпе . мᲂлѝ хрⷭ҇та̀ бг҃а , сᲂгрѣше́нїемъ ѡ҆ставле́нїе дарᲂва́ти , чтꙋ́щимъ любо́вїю ст҃ꙋ́ю па́мѧть твᲂю̀ . сла́ва , и҆ ны́нѣ , боⷢ҇ . Пᲂмышле́нїи пᲂпᲂлзо́хсѧ лꙋка́выми , в̾ глꙋбинꙋ̀ снидо́хъ грѣхо́внꙋю , и҆ стᲂнѧ̀ в̾зыва́ю ти ѿ́ срⷣца пречⷭ҇таѧ , на мнѣ̀ ᲂу҆дивѝ бᲂга́тꙋю млⷭ҇ть . и҆ твᲂегѡ̀ бл҃гᲂсе́рдїѧ без̾мѣ́рнꙋю пꙋчи́нꙋ , и҆ щедро́тъ твᲂи́хъ неи҆з̾че́тнᲂе бᲂга́тство . и҆ да́ждь мѝ пᲂкаѧ́нїе , и҆ сᲂгрѣше́нїемъ прᲂще́нїе , да с̾любо́вїю в̾зыва́ю ти , мᲂлѝ хрⷭ҇та̀ бг҃а , сᲂгрѣше́нїемъ ѡ҆ставле́нїе дарᲂва́ти мѝ . тѧ́ бо и҆́мамъ наде́ждꙋ ра́бъ тво́й . крⷭ҇тᲂбоⷢ҇ . А҆́гньца и҆ па́стырѧ и҆ и҆зба́вителѧ , а҆́гница зрѧ́щи , на крⷭ҇тѣ̀ вᲂсклица́ше слезѧ́щи . ми́ръ ᲂу҆́бѡ ра́дꙋетсѧ прїе́млѧ тᲂбо́ю и҆збавле́нїе . ᲂу҆тро́ба же мᲂѧ̀ гᲂри́тъ зрѧ́щи твᲂѐ распѧ́тїе , є҆́же терпи́ши за милᲂсе́рдїе млⷭ҇ти дᲂлгᲂтерпѣли́ве гдⷭ҇и . млⷭ҇ти бе́здно , и҆ и҆сто́чниче неи҆счерпа́емыи , ᲂу҆милᲂсе́рдисѧ и҆ да́рꙋй грѣхо́въ ѡ҆ставле́нїе , вѣ́рᲂю вᲂспѣва́ющимъ бжⷭ҇твеннаѧ твᲂѧ̀ страда́нїѧ .

пѣ́снь , д҃ . і҆рмо́съ . Оу҆слы́шахъ гдⷭ҇и , слꙋ́хъ твᲂегѡ̀ смᲂтре́нїѧ , и҆ прᲂсла́вихъ тѧ є҆ди́не чл҃кᲂлю́бче . Мнᲂгᲂпло́дныи дᲂбрᲂдѣ́телей , принᲂсѧ̀ дᲂбрᲂпло́дныи са́дъ влⷣцѣ , ꙗ҆ви́лсѧ є҆сѝ ѻ҆́ч҃е пᲂлика́рпе . Всесᲂжже́нїе сᲂвершено̀ , и҆ чи́ста же́ртва принесе́сѧ сп҃сꙋ всѣ́хъ , ѻ҆́ч҃е пᲂлика́рпе . Пѣснᲂсло́вимъ сла́вне , дш҃и твᲂеѧ̀ крѣ́пкᲂе терпѣ́нїе , и҆ твᲂи́хъ по́двигъ до́блесть . боⷢ҇ . Прᲂсвѣтѝ чⷭ҇таѧ ѡ҆мраче́ннꙋю дш҃ꙋ мᲂю̀ , свѣ́тᲂмъ твᲂи́мъ , ꙗ҆́же свѣ́тъ ро́ждьшаѧ прⷭ҇нᲂсꙋ́щныи .

пѣ́снь , є҃ . і҆рмо́съ . Свѣ́та пᲂда́телю , и҆ вѣко́мъ тво́рче гдⷭ҇и , во́ свѣтѣ твᲂи́хъ пᲂвелѣ́нїи наста́ви на́съ , ра́звѣ бо тебѐ и҆но́гѡ бг҃а незна́емъ . Заре́ю дх҃о́внᲂю прᲂсвѣ́щь ᲂу҆́мъ прпⷣбне , ѡ҆бра́знѡ ѻ҆гне́мъ гᲂрѧ́щимъ ꙗ҆́вѣ наꙋчи́лсѧ є҆сѝ , и҆́же ѻ҆гне́мъ свᲂе́й бг҃ᲂмꙋ́дре кᲂнчи́нѣ . Стрꙋѝ прїѧ́тъ жи́зни , ꙗ҆́кѡ ѿ пᲂто́ка пи́щи премꙋ́дре . ᲂу҆ченико́мъ вᲂз̾лю́бленымъ наꙋче́нъ бы́въ , пᲂче́рпшемъ премꙋ́дрᲂсти бе́зднꙋ . Бᲂга́тство и҆ сла́вꙋ свѣ́тлꙋ и҆ мно́го вре́мѧ жи́зни , и҆ житїѐ нетлѣ́ннѡ , и҆́стиннаѧ мꙋ́дрᲂсть хрⷭ҇то́съ , тебѣ̀ дарᲂва̀ ѻ҆́ч҃е . ꙗ҆́кѡ вельмѝ тᲂгѡ̀ вᲂз̾лю́бльшемꙋ . боⷢ҇ . Ве́тхїи де́ньми ꙗ҆́кᲂже на рꙋно̀ до́ждь пречⷭ҇таѧ , в̾ твᲂѐ сни́де чре́во ѡ҆сщ҃е́ннᲂе . и҆ но́въ ꙗ҆ви́сѧ а҆да́мъ чл҃кᲂлю́бецъ .

пѣ́снь , ѕ҃ . і҆рмо́съ . Въ бе́зднѣ грѣхо́внѣй ѡ҆держи́мъ , не и҆з̾слѣ́днꙋю млрⷭ҇дїѧ твᲂегѡ̀ призыва́ю бе́зднꙋ , ѿ тлѝ бж҃е мѧ вᲂз̾ведѝ . Оу҆мертви́всѧ бг҃ᲂглаго́ливе ми́рꙋ всемꙋ̀ , є҆ди́нᲂмꙋ же хрⷭ҇то́ви живы́и пребыва́ѧ . и҆ к̾ немꙋ̀ преше́лъ є҆сѝ , жи́зненᲂе нетлѣ́нїе прїе́млѧ . Бл҃гᲂѡ҆бра́знѡ хᲂдѧ̀ бл҃же́нне , ча́до свѣ́тꙋ и҆ смире́нїю ꙗ҆влѧ́ѧсѧ . нᲂщна́гѡ пе́рвенца , и҆ бᲂри́телѧ пᲂзна́лъ є҆сѝ маркїѡ́на . Наꙋча́еми ѻ҆́ч҃е слᲂвесы̀ твᲂи́ми бл҃гᲂче́стнѡ , пᲂбѣжда́емъ стрѣ́лы вра́жїѧ . и҆ лꙋка́ваѧ со́нмища , и҆́же двѣ̀ нача́лѣ пᲂчита́ющаѧ ѕлᲂче́стнѣ . боⷢ҇ . Грѣ́хъ ми́рꙋ в̾зе́млющаго , чи́стаго а҆́гньца заче́нши всенепᲂро́чнаѧ . сᲂгрѣше́нїемъ прᲂще́нїе мᲂлѧ́щи непреста́й ѡ҆ рабѣ́хъ свᲂи́хъ .

кᲂнда́къ . гла́съ , а҃ . Плᲂды̀ слᲂве́сныѧ гдⷭ҇ви принᲂсѧ̀ пᲂлика́рпе мꙋ́дре , дᲂбрᲂдѣ́телей же́ртвы . тѣ́мже дᲂсто́инъ ст҃ль дарᲂва́сѧ . сего̀ ра́ди дне́сь прᲂсвѣ́щьшесѧ твᲂи́ми слᲂвесы̀ , вᲂспѣва́емъ твᲂю̀ дᲂстᲂхва́льнꙋю па́мѧть сла́вѧще гдⷭ҇а . и҆́кᲂсъ . Премꙋ́дрᲂсти бл҃гᲂсть пᲂче́рпъ , ѿ тᲂѧ̀ ѻ҆́ч҃е напо́лнилъ є҆сѝ бг҃ᲂразꙋ́мїѧ ста́до свᲂѐ . и҆ прест҃а́гѡ и҆ неи҆зрече́ннагѡ бжⷭ҇тва̀ , трисо́лнечнᲂе ѡ҆блиста́лъ є҆сѝ , ѻ҆ц҃а нерᲂжде́нїе , сн҃а же рᲂжде́нїе , и҆ и҆схᲂжде́нїе дх҃а , є҆ди́но бжⷭ҇тво̀ , є҆ди́нꙋ сла́вꙋ , ꙗ҆́снѡ наꙋчи́лъ є҆сѝ . и҆ и҆́дᲂльскᲂе без̾бо́жїе и҆з̾ ко́рене пᲂсѣ́клъ є҆сѝ . плᲂды́ же зрѣ́лы дш҃а вѣ́рꙋющихъ , привᲂдѧ̀ є҆мꙋ̀ сла́вне . в̾не́же крⷭ҇ти́хᲂмсѧ , в̾не́же и҆ вѣ́рꙋемъ сла́вѧще гдⷭ҇а .

пѣ́снь , з҃ . і҆рмо́съ . Ѡ҆ тѣ́лѣ зла́тѣ на́ пᲂли деи́рѣ слꙋжи́мѣмъ , трїѐ ѻ҆́трᲂцы неради́ша ѡ҆ без̾бо́жнѣмъ велѣ́нїи , но пᲂсредѣ̀ пла́мени в̾ве́ржени , прᲂхлажда́еми пᲂѧ́хꙋ , бл҃гᲂслᲂве́нъ бг҃ъ ѻ҆ц҃ъ на́шихъ . Тве́рдымъ по́мыслᲂмъ , гᲂрѧ́щїи пла́мень преминꙋ́лъ є҆сѝ сла́вне , ꙗ҆́кᲂже трїѐ ѻ҆́трᲂцы пе́щь , ѻ҆гне́мъ невеще́ственымъ ѡ҆рᲂша́еми . пᲂсреди́ же ѻ҆гнѧ̀ в̾зыва́ѧ , неѡ҆па́льнѡ пре́былъ є҆сѝ , бл҃гᲂслᲂве́нъ бг҃ъ ѻ҆ц҃ъ на́шихъ . Бл҃же́нъ є҆сѝ и҆ дᲂбро̀ тебѣ̀ є҆́сть нн҃ѣ , все́льшемꙋсѧ , и҆дѣ́же пра́ведныхъ селе́нїѧ . и҆дѣ́же мч҃нкъ во́инства , и҆дѣ́же мꙋ́дрыхъ а҆пⷭ҇лъ ли́цы в̾зыва́ютъ , бл҃гᲂслᲂве́нъ бг҃ъ ѻ҆ц҃ъ на́шихъ . Непло́дныѧ пе́рвїе , мнᲂгᲂпло́дны хрⷭ҇то́ви дш҃а приве́лъ є҆сѝ , дѣ́ланїемъ дх҃о́внымъ прибли́жьсѧ . и҆ до́бръ кла́съ , си́мъ пред̾лага́ѧ сѣ́мѧ . и҆ наказꙋ́ѧ пᲂю́щїѧ с̾ тᲂбо́ю , бл҃гᲂслᲂве́нъ бг҃ъ ѻ҆ц҃ъ на́шихъ . боⷢ҇ . Ты̀ є҆ди́на бг҃ꙋ , и҆́же всѧ́ческаѧ мꙋ́дрѣ сᲂдѣ́лавшемꙋ , мт҃и ꙗ҆ви́ласѧ є҆сѝ , неи҆скꙋсᲂбра́чнаѧ дв҃о , мт҃и пречⷭ҇таѧ . тѣ́мже бл҃гᲂче́стнѡ , тебѣ̀ всенепᲂро́чнаѧ в̾зыва́юще пᲂе́мъ , бл҃гᲂслᲂве́на ꙗ҆́же бг҃а пло́тїю ро́ждьшаѧ .

пѣ́снь , и҃ . і҆рмо́съ . Впе́щь ѻ҆́гненнꙋю , к̾ дѣ́темъ є҆вре́йскимъ сᲂше́дшагѡ , и҆ пла́мень на хла́дъ прело́жшагѡ бг҃а , по́йте всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Сщ҃еннᲂдѣ́йствᲂвавъ сла́вне , хрⷭ҇то́вꙋ та́йнꙋю слꙋ́жбꙋ . слᲂве́сно ѻ҆вча̀ себѐ приве́лъ є҆сѝ бг҃ᲂви же́ртвꙋ прїѧ́тнꙋ , и҆ бл҃гᲂꙋго́днꙋ всепло́днꙋ , пᲂлика́рпе требл҃же́нне . Ю҆́нᲂшескᲂе в̾ сѣди́нѣ преглꙋбо́цѣ , мꙋ́жество пᲂказа́лъ є҆сѝ . крⷭ҇тнᲂю си́лᲂю вᲂз̾дви́глъ є҆сѝ себѐ , к̾ бжⷭ҇твеннымъ пᲂдвиго́мъ бг҃ᲂмꙋ́дре , сщ҃еннᲂмч҃нкѡмъ хрⷭ҇то́вымъ сла́ва прпⷣбне . Пᲂд̾пира́емъ крⷭ҇то́мъ , в̾ ст҃льскꙋю ᲂу҆́тварь , дᲂсто́йнѡ ѡ҆бᲂлче́нъ ѻ҆́ч҃е . в̾ цр҃кᲂвь бж҃їю в̾ни́де , свᲂе́ю сѝ кро́вїю , пастыренача́льникꙋ хрⷭ҇тꙋ̀ ꙗ҆ви́тисѧ . По хрⷭ҇тѣ̀ закла́нъ бы́въ , ꙗ҆́кᲂже наро́читъ ѻ҆́венъ сщ҃еннᲂѧвле́нне . пᲂдо́бникъ ꙗ҆ви́лсѧ є҆сѝ страда́нїемъ є҆гѡ̀ . и҆ сла́вѣ бы́лъ є҆сѝ прича́стникъ , и҆ црⷭ҇твїѧ є҆гѡ̀ наслѣ́дникъ . боⷢ҇ . Свѣтᲂви́дѣнъ сто́лпъ ѻ҆́гненъ , и҆ ѻ҆́блакъ свѣ́телъ пред̾вᲂдѧ́щь , к̾ нбⷭ҇нᲂмꙋ наслѣ́дїю , бг҃ᲂрᲂди́тельнице чⷭ҇таѧ , бꙋ́ди ми дв҃о всенепᲂро́чнаѧ , и҆́же в̾ пꙋсты́ни житїѧ̀ заблꙋже́ннᲂмꙋ .

пѣ́снь , ѳ҃ . і҆рмо́съ . И҆́же ѿ́ бг҃а бг҃а сло́ва , не и҆зрече́ннᲂю мꙋ́дрᲂстїю , прише́дшагѡ ѡ҆бнᲂви́ти а҆да́ма , ꙗ҆́дїю тлѣ́нїѧ па́дшагѡ ѕлѣ̀ , ѿ ст҃ы́ѧ же дв҃цы , неи҆зрече́нно вᲂплᲂща́ема на́съ ра́ди , вѣ́рнїи є҆динᲂмꙋ́дреннѡ пѣ́сньми велича́емъ . Свѣтᲂно́снаѧ твᲂѧ̀ ѻ҆́ч҃е вᲂсїѧ́вши па́мѧть , прᲂсвѣща́ѧ дш҃а бл҃гᲂче́стнѡ сїю̀ твᲂрѧ́щихъ чꙋ́дне . и҆ прича́стники бжⷭ҇твеннагѡ свѣтᲂѧвле́нїѧ сїѧ̀ сᲂверша́етъ . ю҆́же дᲂсто́йнѡ бг҃ᲂмꙋ́дре пѣ́сньми ᲂу҆бл҃жа́емъ . Съ вы́шними ли́ки ст҃ы́хъ а҆́гг҃лъ , прⷭ҇то́лꙋ влⷣчнемꙋ пред̾стᲂѧ̀ . сегѡ̀ мᲂлѝ дᲂсти́гнꙋти на́мъ спасе́нꙋю стрⷭ҇ть , и҆ тᲂгѡ̀ вᲂскрⷭ҇нїе свѣ́тлᲂе . дᲂбрᲂдѣ́тельми мнᲂгᲂѡ҆бра́зныхъ ви́дъ сᲂверша́юще . Вѣнцено́сца тѧ̀ ѻ҆́ч҃е , и҆ по́чести пᲂбѣ́дꙋ прїе́мша , бжⷭ҇твеннᲂю десни́цею , и҆ по́двиги скᲂнча́вша , и҆ свѣ́та и҆спᲂлнѧ́ема , вѣ́рꙋюще пᲂлика́рпе мꙋ́дре , мᲂли́твеника хрⷭ҇тꙋ̀ тѧ̀ ᲂу҆се́рднѡ пред̾лага́емъ . боⷢ҇ . Ꙗ҆́кѡ бцⷣꙋ тѧ̀ дв҃о и҆ мт҃рь сло́ва , и҆ хᲂда́таицꙋ сꙋ́щꙋю на́мъ , прⷭ҇нᲂсꙋ́щнагѡ и҆ бжⷭ҇твеннагѡ живᲂта̀ ; ꙗ҆́кѡ пра́вдѣ сл҃нце вᲂсїѧ́вшꙋю на́мъ , вѣ́рнїи є҆динᲂмꙋ́дрено пѣ́сньми велича́емъ .

свѣти́ленъ . Бг҃ᲂсло́внᲂмꙋ ᲂу҆ченикꙋ̀ , ᲂу҆чени́къ бы́въ пᲂлика́рпе , мно́гъ пло́дъ гдⷭ҇ви вѣ́рныхъ прине́слъ є҆сѝ . себе́ же самᲂгѡ̀ всепло́дїе прине́слъ є҆сѝ свᲂемꙋ̀ ста́дꙋ . и҆ ны́нѣ мᲂли́сѧ за всѧ̀ ны̀ . боⷢ҇ . Щедро́ты твᲂѧ̀ бж҃е , на́ люди и҆ ста́до твᲂѐ низ̾пᲂслѝ , мл҃твами пречⷭ҇тыѧ тѝ мт҃ре , и҆ всѣ́хъ ст҃ы́хъ твᲂи́хъ . и҆ на́мъ всѣ́мъ да́рꙋй , вели́кꙋю твᲂю̀ млⷭ҇ть .