МЦⷭ҇А ТОГО́ЖЕ ВЪ К҃Е ДН҃Ь

И҆́же во ст҃ы́хъ ѻ҆ц҃а на́шегѡ тара́сїѧ , а҆рхїє҆пкⷭ҇па кᲂнстанти́на гра́да . =Ве́черъ , на гдⷭ҇и вᲂзва́хъ , стихѣ́ры . гла́съ , в҃ . поⷣ . є҆гда̀ ѿ́ древа . Прїиди́те , и҆́же бжⷭ҇твеннымъ рачи́теле , и҆ дх҃о́внымъ пᲂчита́тели , дне́сь трапе́зꙋ и҆мꙋ́щꙋю ᲂу҆́зримъ , вᲂз̾держа́нїѧ пи́щꙋ . є҆ѧ́же бжⷭ҇твенныи ᲂу҆гᲂто́ва на́мъ пита́тель , дх҃ᲂмъ тара́сїй , невеще́ствеными дᲂбрᲂдѣ́тельми . всѝ несꙋмѣ́ннѡ вᲂпїю́ще , мᲂлѝ мо́лимсѧ , ꙗ҆́кѡ да ѡ҆брѧ́щемъ сᲂгрѣше́нїемъ прᲂще́нїе . Вѣ́рꙋ вселе́ннѣй , верхо́вныи ѻ҆́ч҃е вᲂи́стинꙋ , ꙗ҆влѧ́ѧ мꙋ́дре начерта́лъ є҆сѝ . скве́рнꙋ ѿтрѧса́ѧ є҆рети́ческꙋю , и҆ дᲂбро́тꙋ вᲂдрꙋзи́лъ є҆сѝ цр҃ко́внꙋю , ᲂу҆че́нїемъ пᲂслѣ́дꙋѧ а҆пⷭ҇лъ хрⷭ҇то́вѣхъ . тѣ́мже с̾ни́ми тебѣ̀ вᲂпїе́мъ всѝ , дᲂстᲂхва́льне ѻ҆́ч҃е , мᲂлѝ спасти́сѧ дш҃а́мъ на́шимъ . Всегѡ̀ вᲂспрїѧ́тъ хрⷭ҇та̀ , и҆ бл҃же́нство млⷭ҇ти , є҆́же к̾ ни́щимъ любы̀ . си́мъ бо млⷭ҇ть бᲂга́тнѡ и҆злїѧ́въ , млⷭ҇ть пᲂлꙋчи́лъ є҆сѝ ѡ҆бѣтᲂва́нїѧ . млⷭ҇ть бо на сꙋдѣ̀ хвали́тисѧ вᲂпїе́тъ . тѣ́мже к̾ жи́зни ѿше́лъ є҆сѝ , мᲂлѝ мо́лимсѧ , ꙗ҆́кѡ да сᲂгрѣше́нїемъ ѡ҆брѧ́щемъ прᲂще́нїе . =сла́ва , и҆ ны́нѣ , боⷢ҇ . Є҆ди́на нев̾мѣсти́маго бг҃а , нетѣ́сно мѣ́стно , во́ чревѣ нᲂси́ла є҆сѝ , чл҃ка бы́вша за бл҃гᲂсть , прест҃а́ѧ бг҃ᲂневѣ́сто . тѣ́мже мᲂлю́ тѧ , ᲂу҆тѣшнѧ́ема мѧ ѿ страсте́й премѣнѝ . ꙗ҆́кѡ да тѣ́снꙋю и҆ пра́вꙋю стезю̀ ше́ствᲂвавъ , дᲂсти́гнꙋ и҆́же в̾ жи́знь дв҃о ведꙋ́щꙋю . крⷭ҇тᲂбоⷢ҇ . Гро́здъ зрѣ́лыи чⷭ҇таѧ , є҆го́же невᲂздѣ́ланнѡ во ᲂу҆тро́бѣ нᲂси́ла є҆сѝ , ꙗ҆́кѡ ᲂу҆зрѣ̀ на́ древѣ ви́сима , рыда́ющи вᲂсклица́ше , и҆ взыва́ше , ча́до сла́дᲂсть и҆ска́паѧи . и҆́мъ же пїѧ́нство ѿꙗ҆́тсѧ всѐ страсте́й , бл҃гᲂда́телю менѐ ра́ди , и҆́же тебѐ ро́ждьшїѧ сло́ве мᲂльба́ми , ꙗ҆́кѡ чл҃кᲂлю́бецъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , д҃ . Пра́вило вѣ́рѣ и҆ ѻ҆́бразъ кро́тᲂсти , вᲂз̾держа́нїю ᲂу҆чи́телѧ , ꙗ҆ви́ тѧ гдⷭ҇ь ста́дꙋ свᲂемꙋ̀ , ꙗ҆́же веще́мъ и҆́стина . сего̀ ра́ди стѧжа̀ смире́нїемъ высо́каѧ , нището́ю бᲂга́таѧ , ѻ҆́ч҃е на́шъ ст҃лю тара́сїе , мᲂлѝ хрⷭ҇та̀ бг҃а , спасти́сѧ дш҃а́мъ на́шимъ .= сла́ва , и҆ ны́нѣ , боⷢ҇ . и҆лѝ , крⷭ҇тᲂбоⷢ҇ .=

Кано́нъ . гла́съ , в҃ . пѣ́снь , а҃ . і҆рмо́съ . Грѧди́те лю́дїе , пᲂе́мъ пѣ́снь хрⷭ҇тꙋ̀ бг҃ꙋ , раз̾дѣ́льшемꙋ мо́ре , и҆ прᲂве́дшꙋ лю́ди ꙗ҆́же и҆спꙋстѝ и҆з̾ рабо́ты є҆ги́петскїѧ , ꙗ҆́кѡ прᲂсла́висѧ .

запѣ́в̾ : Ст҃лю хрⷭ҇то́въ тара́сїе , мᲂлѝ бг҃а ѡ҆ на́съ . Наведе́нїѧ и҆ плѣне́нїѧ , и҆ рабо́ты грѣхо́вныѧ мѧ̀ и҆зба́ви . и҆ к̾ пᲂкаѧ́нїю наста́ви ще́дре , навᲂдѧ́ мѧ ско́рѡ к̾ любвѝ свᲂе́й . Стрꙋѝ жи́зни и҆мѣ́ѧ мꙋ́дре срⷣце свᲂѐ , цр҃кви бы́лъ є҆сѝ ꙗ҆́кѡ рѣка̀ бж҃їѧ , напо́лнившисѧ ᲂу҆че́ньми , и҆ сеѧ̀ напᲂѧ́ѧ ѻ҆́ч҃е бразды̀ . Пᲂма́занїемъ тво́й ве́рхъ честны́и , дх҃ᲂмъ бжⷭ҇твеннымъ пᲂма́засѧ тара́сїе . на брадꙋ̀ бᲂга́тнѡ ꙗ҆́кѡ а҆аро́ню , сни́де на ѡ҆ме́ты твᲂѧ̀ , ꙗ҆́кѡ рᲂса̀ а҆є҆рмо́н̾скаѧ . боⷢ҇ . Сѐ вᲂпїе́тъ и҆са́їѧ дв҃о чⷭ҇таѧ , сᲂвѣ́та вели́кагѡ а҆́гг҃ла , во ᲂу҆тро́бѣ свᲂе́й заче́нши без̾сѣ́мене , и҆ рᲂдила̀ є҆сѝ , и҆ дв҃ᲂю пребыва́еши по ржⷭ҇твѣ̀ чⷭ҇таѧ .

пѣ́снь , г҃ . і҆рмо́съ . Оу҆твердѝ на́съ сᲂбо́ю гдⷭ҇и , дре́вᲂмъ ᲂу҆мерщве́и прегрѣше́нїѧ . и҆ стра́хъ тво́й всадѝ в̾ срⷣца̀ на́ша , ꙗ҆́кѡ чл҃кᲂлю́бецъ . Всѣ́мъ ᲂу҆тверже́нїе сердца́мъ бы́лъ є҆сѝ , хлѣ́бᲂмъ слᲂве́съ твᲂи́хъ ст҃лю . ᲂу҆маща́ѧ же ꙗ҆́кѡ ма́слᲂмъ , весели́ши ꙗ҆́кѡ вино́мъ срⷣца̀ на́ша . Теплᲂто́ю ра́зꙋма , и҆ ре́внᲂстїю вѣ́ры , ѻ҆ц҃е́мъ бы́лъ є҆сѝ верхо́вникъ . и҆ є҆ресны́мъ прᲂтивле́нїемъ , ꙗ҆́кѡ сꙋ́щаѧ а҆́дᲂва врата̀ разᲂри́лъ є҆сѝ . Вᲂз̾дѣ́въ к̾ бг҃ꙋ прпⷣбнѣй рꙋ́цѣ твᲂѝ , ми́ръ ста́дꙋ твᲂемꙋ̀ и҆спрᲂсѝ . тѣ́мже и҆ к̾ вы́шнемꙋ наслѣ́дїю вᲂз̾ше́дъ пᲂчи́лъ є҆сѝ . боⷢ҇ . Стра́нно ржⷭ҇тво̀ , стра́нно прише́ствїе , во ᲂу҆тро́бѣ ѡ҆бнᲂвлѧ́етсѧ дв҃ыѧ . и҆ є҆стество̀ пᲂпо́лз̾шеесѧ в̾ тлѣ́нїе ѿ ле́сти вᲂз̾дви́же .

сѣда́ленъ . гла́съ , г҃ . Ѻ҆́бразы прᲂсїѧ́лъ є҆сѝ бг҃ᲂразꙋ́мїѧ , заре́ю ѡ҆блиста́лъ є҆сѝ цр҃кᲂвь . є҆́реси ᲂу҆мертви́лъ є҆сѝ слᲂвесы̀ твᲂи́ми . нищелю́бїе и҆ любо́вь и҆стᲂчи́лъ є҆сѝ , а҆враа́мᲂвꙋ стра́нно прїѧ́тїю пᲂдо́бѧсѧ . ѻ҆́ч҃е тара́сїе , хрⷭ҇та̀ бг҃а мᲂлѝ , дарᲂва́ти на́мъ ве́лїю млⷭ҇ть . сла́ва , и҆ ны́нѣ , боⷢ҇ . Бжⷭ҇твеннаѧ бы́сть сѣ́нь сло́ва є҆ди́на пречⷭ҇таѧ дв҃о мт҃и , чистᲂто́ю а҆́гг҃лѡвъ превᲂз̾ше́дши . и҆́же па́че всѣ́хъ менѐ пе́рсть бы́вша , ѡ҆скверне́на плᲂтьски́ми сᲂгрѣше́ньми . ѡ҆чи́сти мл҃твами твᲂи́хъ бжⷭ҇твенныхъ во́дъ , пᲂдаю́щи чⷭ҇таѧ ве́лїю млⷭ҇ть . крⷭ҇тᲂбоⷢ҇ . Нескве́рнаѧ а҆́гница , сло́вꙋ нетлѣ́ннаѧ дв҃а мт҃и на крⷭ҇тѣ̀ ви́дѣвши ви́сима , и҆́же и҆з̾ неѧ̀ без̾ бᲂлѣ́зни прᲂзѧ́бшагѡ . мт҃рьски пᲂдо́бнѡ рыда́ющи взыва́ше , ᲂу҆вы̀ мнѣ̀ ча́до мᲂѐ , ка́кѡ стра́ждеши , хᲂтѧ̀ и҆зба́вити ѿ страсте́й бесче́стїѧ чл҃ка .

пѣ́снь , д҃ . і҆рмо́съ . Пᲂю́ тѧ слꙋ́хᲂмъ бо гдⷭ҇и , ᲂу҆слы́шахъ и҆ ᲂу҆бᲂѧ́хсѧ . до мене́ бо прїи́де , менѐ и҆ща̀ заблꙋ́ждьшаго . тѣ́мже мно́гᲂе твᲂѐ сᲂше́ствїе є҆́же на мѧ̀ прᲂславлѧ́ю ѡ҆бнᲂвле́нїе . По́тᲂмъ бл҃гᲂче́стїѧ в̾сѣ́ѧлъ є҆сѝ бжⷭ҇твенѡ сло́во цр҃кви . и҆ пᲂжа́лъ є҆сѝ кла́съ тара́сїе правᲂсла́вїѧ . на землѝ кро́ткихъ в̾сели́лсѧ є҆сѝ . и҆ с̾ни́ми ра́дꙋешисѧ веселѧ́сѧ . Є҆го́же речѐ и҆са́їѧ прпⷣбне , бжⷭ҇твенныи стра́хъ во́чревѣ прїѧ́лъ є҆сѝ дх҃ᲂмъ , и҆ рᲂди́лъ є҆сѝ цр҃кви . и҆́мже є҆ресе́мъ прᲂзѧбле́нїѧ , разбива́ютсѧ ѡ҆ ка́мень вѣ́ры . И҆з̾лїѧ́нїемъ сле́зъ прпⷣбне , ѿмы́лъ є҆сѝ скве́рны , и҆ ко и҆сто́чникꙋ дᲂсти́глъ є҆сѝ . в̾не́мже неѡ҆дᲂжди́мᲂе пи́во , пи́щи приснᲂсꙋ́щныѧ прᲂлива́емо . к̾ жела́нїемъ ты̀ приспѣ́лъ є҆сѝ кра́йнимъ . боⷢ҇ . Без̾сѣ́мене заче́нсѧ всенепᲂро́чнаѧ , бг҃ъ сло́во во ᲂу҆тро́бѣ твᲂе́й , прᲂи҆схо́дитъ сᲂѡ҆бра́знѡ , непрело́жнѡ к̾ чл҃ческᲂмꙋ ро́дꙋ . тᲂгѡ̀ ѡ҆ рабѣ́хъ свᲂи́хъ мᲂлѝ прⷭ҇нѡ , ѿ бѣ́дъ спасти́сѧ дш҃а́мъ на́шимъ .

пѣ́снь , є҃ . і҆рмо́съ . Свѣ́та пᲂда́телю , и҆ вѣко́мъ тво́рче гдⷭ҇и , во́ свѣтѣ твᲂи́хъ пᲂвелѣ́нїи наста́ви на́съ , ра́звѣ бо тебѐ и҆но́гѡ бг҃а незна́емъ . Си́лᲂю слᲂве́съ твᲂи́хъ , не́мᲂщь нечести́выхъ ѡ҆бличи́лъ є҆сѝ . и҆ сᲂю́зᲂмъ свѧза́лъ є҆сѝ бжⷭ҇твенныѧ любвѐ ста́до твᲂѐ . и҆ наде́ждею и҆ вѣ́рᲂю сᲂхранѧ́еши невреди́мо . Ѿтрѧ́съ вᲂз̾держа́нїемъ пи́щꙋ , пита́лъ є҆сѝ твᲂю̀ дш҃ꙋ . хлѣ́бъ и҆мѣ́ѧ чи́стыѧ мл҃твы , пᲂꙋче́нїе же бжⷭ҇твенѡ , и҆ вᲂзнᲂсѧ́щее смире́нїе . Ты̀ ри́зꙋ мꙋ́дре цр҃ко́внꙋю , ѻ҆те́чески и҆стка́лъ є҆сѝ . в̾ню́же хрⷭ҇то́съ честны́мъ ѻ҆́бразᲂмъ ѡ҆дѣ́ѧвъ тѧ̀ вѣ́ры ра́ди . и҆ правᲂсла́вїѧ ᲂу҆ѧсни́лъ є҆сѝ ᲂу҆че́нїѧ . боⷢ҇ . Тѧ̀ пред̾ста́тельницꙋ чⷭ҇таѧ , и҆ наде́жди крѣ́пкᲂе ѡ҆снᲂва́нїе , и҆ пᲂдпо́ръ и҆ пᲂкро́въ и҆ стѣ́нꙋ и҆́мамы всѝ , и҆ къ црⷭ҇твїю привᲂдѧ́щїи мо́стъ .

пѣ́снь , ѕ҃ . і҆рмо́съ . Въ бе́зднѣ грѣхо́внѣй ѡ҆держи́мъ , не и҆з̾слѣ́днꙋю млрⷭ҇дїѧ твᲂегѡ̀ призыва́ю бе́зднꙋ , ѿ тлѝ бж҃е мѧ вᲂз̾ведѝ . Же́ртва и҆ закᲂле́нїе бы́въ . пᲂвинꙋ́лъ є҆сѝ себѐ бг҃ᲂви вѣ́рᲂю , и҆ сᲂблюда́еши без̾кро́вныѧ слꙋ́жбы є҆гѡ̀ съверше́нїе . Ны́нѣ в̾ невеще́ственꙋю сла́вꙋ , преше́дъ ѿ землѝ , веще́ствеными страстьмѝ , ѡ҆скве́рншꙋюсѧ прпⷣбне дш҃ꙋ мᲂю̀ , прилѣ́жнᲂю мл҃твᲂю сѝ и҆сцѣлѝ . Ѡ҆стрᲂга́лъ є҆сѝ дебельство̀ писа́нїѧ , ра́зꙋма глꙋбо́кимъ и҆стне́нїемъ , цр҃кви бы́лъ є҆сѝ , скᲂрᲂпи́сца тара́сїе тро́сть . боⷢ҇ . Невѣ́денїе пᲂкрыва́етъ ржⷭ҇тво́ ти . стра́нно бо , дв҃аѧ дᲂи́тъ пита́телѧ , и҆ млеко́мъ пита́етъ невеще́ственаго , и҆ на рꙋкꙋ̀ держи́тъ зижди́телѧ .

кᲂнда́к̾ . гла́с̾ , г҃ . Правᲂсла́вными пᲂвелѣ́ньми , цр҃кᲂвь прᲂсвѣти́лъ є҆сѝ . и҆ хрⷭ҇то́вꙋ сла́внꙋю вᲂѡ҆брази́въ и҆ко́нꙋ , чти́ти и҆ пᲂклᲂнѧ́тисѧ то́й наꙋчи́лъ є҆сѝ . и҆ ѡ҆бличи́въ є҆ресᲂнача́льникъ без̾бо́жнᲂе пᲂвелѣ́нїе , ᲂу҆тверди́лъ є҆сѝ вѣ́рныѧ взыва́ти , ра́дꙋисѧ ѻ҆́ч҃е тара́сїе прпⷣбне .

пѣ́снь , з҃ . і҆рмо́съ . Тѣ́лꙋ злато́мꙋ премꙋ́дрыѧ дѣ́ти непᲂслꙋжи́ша , и҆ в̾ пла́мень са́ми пᲂидо́ша , и҆ бо́ги и҆́хъ ѡ҆брꙋга́ша . средѝ пла́мене вᲂзᲂпи́ша , и҆ ѡ҆брᲂсѝ и҆́хъ а҆́гг҃лъ , ᲂу҆слы́шасѧ ᲂу҆́же ᲂу҆́стъ ва́шихъ мл҃тва . Премꙋ́дрᲂсти ча́ша ꙗ҆ви́лсѧ є҆сѝ , дᲂбрᲂдѣ́тельми и҆спо́лнена . и҆ со́звавъ прᲂпᲂвѣ́данїемъ высо́кагѡ житїѧ̀ твᲂегѡ̀ , наслади́лъ є҆сѝ ста́до бг҃ᲂмꙋ́дре . и҆ с̾ни́мъ ѻ҆́ч҃е в̾зыва́ше , бл҃гᲂслᲂве́нъ бг҃ъ ѻ҆ц҃ъ на́шихъ . Ѻ҆би́тели та́мᲂшнїѧ , и҆ наслажде́нїѧ честна́ѧ пред̾вари́лъ є҆сѝ . и҆ ра́дꙋешисѧ с̾ бг҃ᲂмъ свᲂи́мъ , и҆ весели́шисѧ ᲂу҆́бѡ . тѣ́мже тѧ̀ чтꙋ́ще пребл҃же́нне , съ дерзнᲂве́нїемъ в̾зыва́емъ , бл҃гᲂслᲂве́нъ бг҃ъ ѻ҆ц҃ъ на́шихъ . Мꙋ́жествᲂмъ ра́зꙋма препᲂѧ́санъ въ чресла̀ тара́сїе , и҆ житїе́мъ ѡ҆дѣ́ѧнъ , в̾вᲂдѧ́щимъ в̾ вѣ́рꙋ . на трапе́зꙋ вы́шнѧгѡ цр҃ѧ вᲂсте́клъ є҆сѝ , пᲂѧ̀ , бл҃гᲂслᲂве́нъ бг҃ъ ѻ҆ц҃ъ на́шихъ . боⷢ҇ . Без̾ ѻ҆ц҃а и҆з̾ тебѐ , и҆́же без̾ мт҃ре и҆з̾ ѻ҆ц҃а прᲂхо́дитъ , и҆ чистᲂты̀ твᲂеѧ̀ зна́менїѧ сᲂхра́нь невреди́ма . пᲂказа̀ пречⷭ҇то ржⷭ҇тво̀ , и҆ дв҃ьство нескве́рно . ѡ҆бнᲂвлѧ́ет̾бᲂсѧ в̾ тебѣ̀ зако́на ржⷭ҇тво̀ .

пѣ́снь , и҃ . і҆рмо́съ . Въ пещѝ ѻ҆́трᲂчестѣй , прᲂѡ҆брази́лъ є҆сѝ и҆нᲂгда̀ свᲂю̀ мт҃рь гдⷭ҇и . ѻ҆́бразъ же си́хъ ѻ҆гнѧ̀ и҆з̾бавлѧ́ше , неѡ҆па́льнѡ вше́дшихъ . ю҆́же пᲂе́мъ ꙗ҆́вльшꙋсѧ тᲂбо́ю кᲂнце́мъ дне́сь , и҆ превᲂзно́симъ во всѧ̀ вѣ́ки . Ты̀ ꙗ҆́кᲂже ѻ҆́блакъ ᲂу҆́тренїи , и҆ ꙗ҆́кѡ ка́плѧ ка́плющаѧ , и҆ рᲂса̀ ꙗ҆ви́лсѧ є҆сѝ . бл҃гᲂтвᲂре́нїѧ бᲂга́тство со́бралъ є҆сѝ на землѝ . а҆́лчꙋщихъ срⷣца̀ ᲂу҆ма́стилъ є҆сѝ . и҆ свѣтлꙋ̀ в̾же́глъ є҆сѝ мꙋ́дре дш҃е́внꙋю свѣщꙋ̀ . Ст҃льства ѻ҆де́ждею , дѣ́лъ твᲂи́хъ свѣ́тᲂмъ прᲂсвѣ́щьсѧ . и҆ ꙗ҆ви́лсѧ є҆сѝ цѣлᲂмꙋ́дрїѧ клю́чь . вᲂз̾держа́нїѧ пи́ща . и҆́стиннѣй мл҃твѣ ᲂу҆чи́тель . и҆ пᲂкаѧ́нїѧ пꙋ́ть , и҆ зако́нъ житїѧ̀ . Пᲂкаѧ́нїю вре́мѧ и҆ ѡ҆браще́нїю , пло́дъ принесѝ . и҆ смᲂко́вницы непло́дныѧ пᲂсѣче́нїю преще́нїѧ , дш҃е мᲂѧ̀ клѧ́твы ᲂу҆бо́йсѧ . напита́й же хрⷭ҇та̀ , дᲂбрᲂдѣ́телей бл҃гᲂпло́дїемъ . боⷢ҇ . Незабꙋ́ди гла́са , пред̾ста́тельнице стра́шнаѧ ра́бъ твᲂи́хъ . но ѿ всѧ́кїѧ бѣды̀ мᲂли́твами твᲂи́ми , и҆ всѧ́кᲂгѡ преще́нїѧ и҆схитѝ . преклᲂни́тъ бо бг҃а , твᲂѧ̀ мт҃рьнѧѧ мл҃тва .

пѣ́снь , ѳ҃ . і҆рмо́съ . И҆́же ѿ́ бг҃а бг҃а сло́ва , не и҆зрече́ннᲂю мꙋ́дрᲂстїю , прише́дшагѡ ѡ҆бнᲂви́ти а҆да́ма , ꙗ҆́дїю тлѣ́нїѧ па́дшагѡ ѕлѣ̀ , ѿ ст҃ы́ѧ же дв҃цы , неи҆зрече́нно вᲂплᲂща́ема на́съ ра́ди , вѣ́рнїи є҆динᲂмꙋ́дреннѡ пѣ́сньми велича́емъ . Оу҆вѧди́лъ є҆сѝ ѻ҆́ч҃е , кᲂва́р̾ствїѧ и҆ стрѣ́лы вра́жїѧ , ѻ҆гне́мъ вᲂз̾держа́нїѧ . и҆ чистᲂты̀ ᲂу҆гльмѝ , пло́ти ве́щныи гнѣ́въ ѡ҆пали́лъ є҆сѝ вᲂи́стинꙋ , ѻ҆́нᲂмꙋ свѣтᲂзаре́нїю тара́сїе спᲂдо́бивсѧ . Съ патрїа́р̾шескими ли́ки вᲂдвᲂрѧ́ѧсѧ , пᲂе́ши пѣ́снь а҆́гг҃льскꙋю с̾ни́ми . ст҃ъ ст҃ъ ст҃ъ ѻ҆ц҃ъ рᲂди́тель , и҆ сн҃ъ рᲂжде́исѧ , и҆ дх҃ъ и҆схᲂдѧ́и нераздѣ́льнѡ . трⷪ҇це ст҃а́ѧ сла́ва тебѣ̀ . Ꙗ҆́кѡ в̾ше́дъ в̾вы́шнѧѧ съ па́влᲂмъ , вᲂпїе́мъ пребл҃же́нне , бж҃їе бл҃же́нство , цр҃кви ᲂу҆тверже́нїе , на́мъ же дарᲂва́ти ѡ҆чище́нїе , чтꙋ́щимъ тѧ̀ любо́вїю , тара́сїе пᲂмᲂли́сѧ . боⷢ҇ . Вᲂпло́щьсѧ неи҆з̾рече́ннѡ ѿ чи́стыхъ тѝ крᲂве́й , ꙗ҆́кѡ сл҃нце ꙗ҆ви́сѧ на́мъ , пречⷭ҇таѧ мт҃и без̾невѣ́стнаѧ . вѣ́къ всѣ́хъ и҆́же пе́рвїе , ѻ҆ц҃ꙋ сᲂбез̾нача́ленъ сн҃ъ . и҆ тмꙋ̀ ѿгна́въ , прᲂсвѣти́лъ є҆́сть всѧ́ческаѧ .