26 февраля: свт. Порфирия Газского

МЦⷭ҇А ТОГО́ЖЕ ВЪ К҃Ѕ ДН҃Ь

И҆́же во ст҃ы́хъ ѻ҆ц҃а на́шегѡ пᲂрфи́рїѧ , є҆пкⷭ҇па га́зскагѡ . =Ве́черъ , на гдⷭ҇и вᲂзва́хъ , стихѣ́ры . гла́съ , и҃ . поⷣ . ѽ пресла́внᲂе чꙋ́до . Прпⷣбне ѻ҆́ч҃е пᲂрфи́рїе ,꙳ ты̀ крⷭ҇тъ хрⷭ҇то́въ на ра́мо взе́мъ ,꙳ ѡ҆ста́вилъ є҆сѝ всѧ̀ ,꙳ и҆ дᲂсти́глъ є҆сѝ пꙋсты́ню ,꙳ и҆ бра́лсѧ є҆сѝ с̾ мирᲂде́ржцемъ ,꙳ мᲂли́твами и҆ пᲂсто́мъ вᲂѡ҆рꙋ́жьсѧ .꙳ тѣ́мже низ̾лᲂжи́лъ є҆сѝ ,꙳ с̾ си́мъ мꙋдрᲂва́нїе плᲂтьско́е ,꙳ хра́мъ бы́въ бжⷭ҇твеннᲂмꙋ дх҃ꙋ . Ꙗ҆́кᲂже трѝ дре́вле ,꙳ спа́слъ є҆́сть ѿ ѻ҆гнѧ̀ бг҃ъ а҆́гг҃лѡмъ .꙳ и҆ ны́нѣ тᲂбо́ю ѻ҆́трᲂки трѝ ,꙳ в̾ ро́въ пᲂпо́лз̾шаѧсѧ спа́слъ є҆́сть .꙳ в̾ ко́шницѣ бо , ꙗ҆́кᲂже нᲂси́ми бѧ́хꙋ ,꙳ свѣ́тᲂмъ ѻ҆́блака си́хъ ѡ҆сѣнѝ .꙳ трѝ вᲂѡ҆брази́вша кресты̀ в̾ тѣлесѣ́хъ ,꙳ на ѡ҆бличе́нїе прᲂти́вѧщимсѧ ꙳ тебѣ̀ пᲂрфи́рїе . Кто̀ по дᲂстᲂѧ́нїю вᲂспᲂе́тъ ,꙳ напа́сти и҆ бᲂлѣ́зни ,꙳ бѣды̀ и҆ ско́рби твᲂѧ̀ ,꙳ и҆́же по вѣ́рѣ по́двиги твᲂѧ̀ пᲂрфи́рїе ;꙳ мно́гᲂе бо твᲂѐ сꙋ́щее ,꙳ є҆́же по́ бз҃ѣ пᲂказа́лъ є҆сѝ дерзнᲂве́нїе .꙳ тѣ́мже мо́лимъ тѧ̀ ,꙳ дерзнᲂве́нїе бо и҆́маши ,꙳ ѡ҆ на́съ мᲂли́сѧ ко́ гдⷭ҇ꙋ спасти́сѧ на́мъ . =сла́ва , и҆ ны́нѣ , боⷢ҇ . Пло́ть ѿ крᲂве́й твᲂи́хъ прїе́мъ ,꙳ первᲂвѣ́чныи бг҃ъ ,꙳ тѧ̀ пред̾ста́тельницꙋ пᲂказа̀ ꙳ чл҃кѡмъ чⷭ҇таѧ .꙳ тѣ́мже и҆зба́ви рабы̀ твᲂѧ̀ ,꙳ ѿ всѧ́кїѧ бѣды̀ и҆ ѡ҆б̾стᲂѧ́нїѧ ,꙳ и҆ сѣ́тей лꙋка́вагѡ врага̀ .꙳ и҆ сїѧ́нїѧ причасти́тисѧ спᲂдо́би и҆збра́нныхъ ,꙳ всѧ̀ сла́вѧщїѧ и҆ пᲂкланѧ́ющїѧтисѧ . крⷭ҇тᲂбоⷢ҇ . Тѧ̀ пригвᲂжде́на ви́дѧщи ꙳ на крⷭ҇тѣ̀ і҆с҃е ,꙳ и҆ стрⷭ҇ти прїе́млюща ꙳ во́лею влⷣко ,꙳ дв҃аѧ и҆ мт҃и твᲂѧ̀ ,꙳ ча́до гл҃аше , ча́до сла́дкᲂе ,꙳ ра́ны непра́веднѡ ка́кѡ терпи́ши .꙳ врачꙋ̀ и҆сцѣли́выи чл҃кѡмъ не́мᲂщь ,꙳ и҆ ѿ тлѧ̀ всѣ́хъ и҆збавлѧ́ѧ млрⷭ҇дїемъ сѝ .

Кано́нъ , твᲂре́нїе геѡ́ргїево . гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ , немо́крыми стᲂпа́ми дре́вле ше́ствᲂвавъ і҆и҃ль , крⷭ҇тᲂѡ҆бра́зно мѡѷсе́ѡвыма рꙋка́ма , а҆мали́кᲂвꙋ си́лꙋ в̾ пꙋсты́ни пᲂбѣди́лъ є҆́сть .

запѣ́въ : Ст҃лю хрⷭ҇то́въ пᲂрфи́рїе , мᲂлѝ бг҃а ѡ҆ на́съ . Пᲂрфи́рᲂю цр҃кви дне́сь ꙗ҆́кᲂже црⷭ҇кᲂю ᲂу҆крашена̀ , ᲂу҆че́ньми твᲂи́ми ст҃лю пᲂрфи́рїе , си́ми ᲂу҆краша́етсѧ , и҆ вᲂспѣва́етъ всѣ́хъ гдⷭ҇а . Житїе́мъ прᲂсїѧ́въ прпⷣбне , и҆ слᲂвесы̀ бжⷭ҇твенными твᲂи́ми , свѣти́льникъ ꙗ҆ви́сѧ всѣ́мъ чл҃кѡмъ . прⷭ҇нѡ сїѧ́ѧ дѣ́лы и҆ ᲂу҆че́ньми , и҆ ѡ҆зарѧ́ѧ кᲂнцы̀ . Крᲂпле́нїемъ прест҃а́гѡ дх҃а , пᲂрфи́рїе ѡ҆чи́щьсѧ . и҆ бжⷭ҇твенныхъ дᲂбрᲂдѣ́телей , во ѻ҆де́ждꙋ ѡ҆дѣ́ѧвсѧ , в̾ше́лъ є҆сѝ в̾ незахᲂди́маѧ , сщ҃еннᲂдѣ́йствᲂвати тебѐ пᲂма́завшемꙋ . боⷢ҇ . Сказа́ти сꙋ́щимъ на землѝ неи҆зрече́ннᲂе , и҆ па́че ᲂу҆ма̀ чл҃кᲂлю́бїе , хᲂтѧ̀ сн҃ъ бж҃їи бг҃ᲂневѣ́сто , и҆з̾ тебѐ пло́тїю рᲂди́сѧ . вѣ́рнымъ пᲂдаѧ̀ пᲂрᲂжде́нїе .

пѣ́снь , г҃ . і҆рмоⷭ҇ . Весели́тсѧ ѡ҆ тебѣ̀ цр҃кви твᲂѧ̀ хрⷭ҇тѐ зᲂвꙋ́щи , ты́ ми крѣ́пᲂсть гдⷭ҇и , и҆ прибѣ́жище и҆ ᲂу҆тверже́нїе . Пᲂкᲂри́лъ є҆сѝ по́д̾ нᲂзѣ ѕлᲂчести́выхъ мꙋдрᲂва́нїѧ , и҆́же на самагѡ̀ бг҃а всѧ́ческихъ вѣща́ющаѧ . Глаго́лъ твᲂи́хъ ѻ҆гне́мъ , хвра́стїе ма́нентᲂво мꙋ́дре пᲂпали́лъ є҆сѝ . и҆ вѣ́рнымъ прᲂсвѣще́нїе , ᲂу҆че́нїѧ прᲂсте́рлъ є҆сѝ . Вᲂдрꙋзи́въ на тве́рдѣмъ ка́мени , но́зѣ вѣ́рныхъ . пᲂкᲂлеба́лъ є҆сѝ ѿ ѡ҆снᲂва́нїѧ самᲂгѡ̀ , ѡ҆снᲂва́нїе нече́ствꙋющихъ пᲂрфи́рїе . боⷢ҇ . И҆спо́лнисѧ всѧ̀ землѧ̀ , сн҃а твᲂегѡ̀ и҆ бг҃а чⷭ҇таѧ , и҆́стиннагѡ ра́зꙋма , и҆ сла́вы неи҆зрече́нныѧ и҆ бл҃гᲂда́ти .

сѣда́ленъ гла́съ , г҃ . Дѣ́лы прᲂсїѧ́лъ є҆сѝ ꙗ҆́кѡ денни́ца , всю̀ є҆́ресь ѿгна́лъ є҆сѝ ѿ цр҃кве , ст҃лю пᲂрфи́рїе . и҆ вѣ́рныхъ срⷣца̀ прᲂсвѣти́лъ є҆сѝ , вᲂспѣва́ти и҆ сла́вити гдⷭ҇а . тѣ́мже дне́сь па́мѧть твᲂрѧ́ще вᲂпїе́мъ ти , мᲂлѝ хрⷭ҇та̀ бг҃а , спасти́сѧ дш҃а́мъ на́шимъ . сла́ва , и҆ ны́нѣ , боⷢ҇ . Бжⷭ҇твеннагѡ є҆стества̀ не ѿлꙋ́чьсѧ , пло́ть бы́въ во ᲂу҆тро́бѣ твᲂе́й . но бг҃ъ вᲂчл҃чьсѧ пребы́сть , и҆́же по ржⷭ҇твѣ̀ дв҃ꙋю и҆ мт҃рь тѧ̀ , ꙗ҆́кᲂже пре́жде ржⷭ҇тва̀ сᲂхра́нь всенепᲂро́чнꙋ є҆ди́ныи гдⷭ҇ь . тᲂгѡ̀ прилѣ́жнѡ мᲂлѝ , дарᲂва́ти на́мъ ве́лїю млⷭ҇ть . крⷭ҇тᲂбоⷢ҇ . Нескве́рнаѧ а҆́гница , сло́вꙋ нетлѣ́ннаѧ дв҃а мт҃и на крⷭ҇тѣ̀ ви́дѣвши ви́сима , и҆́же и҆з̾ неѧ̀ без̾бᲂлѣ́зни прᲂзѧ́бшагѡ . мт҃рьски пᲂдо́бнѡ рыда́ющи взыва́ше , ᲂу҆вы̀ мнѣ̀ ча́до мᲂѐ , ка́кѡ стра́ждеши , хᲂтѧ̀ и҆зба́вити ѿ страсте́й бесче́стїѧ чл҃ка .

пѣ́снь , д҃ . і҆рмо́съ . Вᲂз̾дви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾ чинꙋ̀ свᲂе́мъ , дᲂсто́йнѡ взыва́ющи , сла́ва си́лѣ твᲂе́й гдⷭ҇и . Пресвѣ́тлагѡ вѣ́ры сїѧ́нїѧ , в̾ дш҃и сл҃нце пра́вдѣ и҆мѣ́ѧ , прᲂсвѣти́лъ є҆сѝ слᲂвесы̀ пᲂрфи́рїе , цр҃ко́внᲂе всѐ и҆спᲂлне́нїе . Оу҆тве́рждьсѧ в̾ любвѝ бж҃їѧ сло́ва , ви́димыхъ пᲂрфи́рїе , пристра́стїѧ всѧ́кагѡ вᲂз̾гнꙋша́сѧ . тѣ́мже тѧ̀ пᲂчита́емъ , ꙗ҆́кѡ равнᲂа́гг҃льна и҆ ст҃лѧ чи́ста . Вприча́стїи та́инъ неи҆зрече́нныхъ , ꙗ҆́кᲂже бы́въ пᲂрфи́рїе , сїѧ̀ чи́стыми сᲂблю́лъ є҆сѝ дѣѧ́ньми . чи́стѡ и҆ неи҆зрече́ннѡ ꙗ҆́кѡ таи́нникъ си́мъ дᲂсто́инъ . боⷢ҇ . Оу҆краша́етсѧ сла́внѡ , твᲂи́ми цр҃кви вели́чествїи , пречⷭ҇таѧ бжⷭ҇твенными . и҆ ᲂу҆дᲂбрѧ́етсѧ си́ми ꙗ҆́снѡ , и҆ любо́вїю сла́витъ тѧ̀ , и҆ пѣснᲂсло́витъ твᲂѐ ржⷭ҇тво̀ .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рᲂю вᲂспѣва́ющїѧ тѧ . Виті́ѧмъ плени́цы разᲂрѧ́ѧ пᲂрфи́рїе , слᲂвесы̀ и҆́стинными вѣ́рѣ держа́вꙋ , тве́рдыми всѧ́ческими . Пᲂче́рпъ на землѝ ᲂу҆тѣ́шителѧ прпⷣбне , ᲂу҆че́нїемъ незави́стныѧ рѣкѝ , бл҃гᲂче́стїѧ и҆стᲂчи́лъ є҆сѝ пᲂрфи́рїе . И҆з̾сꙋши́въ ѻ҆гне́мъ слᲂве́съ твᲂи́хъ пᲂрфи́рїе , пᲂто́ки нече́стїѧ . бл҃гᲂче́стїѧ вѣща́нїемъ , чл҃ки прᲂсвѣти́лъ є҆сѝ . боⷢ҇ . Оу҆крѣ́пльшесѧ тᲂбо́ю си́лᲂю дх҃о́внᲂю , сꙋпᲂста́ты прᲂти́вныѧ , хрⷭ҇то́вы и҆́стины пᲂбѣжда́емъ пречⷭ҇таѧ .

пѣ́снь , ѕ҃ . і҆рмо́съ . Пᲂжрꙋ́ти со́ гласᲂмъ хвале́нїѧ гдⷭ҇и , цр҃кви вᲂпїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Дх҃о́вно тѧ̀ , ѡ҆дш҃евле́нъ дᲂбрᲂдѣ́телей ѻ҆́бразъ пᲂрфи́рїе , и҆ прⷭ҇нѡ сїѧ́ющъ и҆мꙋ́ще , в̾ дѣ́ла бжⷭ҇твена всѝ вᲂи́стинꙋ . сегѡ̀ ра́ди тѧ̀ пᲂчита́емъ . Си́лᲂю ᲂу҆тѣ́шителѧ ѡ҆дѣ́ѧвсѧ , ꙗ҆́кᲂже самᲂви́дцы сло́ва , врагѝ непᲂбѣди́мъ ꙗ҆ви́лсѧ є҆сѝ , ѿгᲂнѧ̀ и҆ пᲂсѣка́ѧ си́хъ нече́стїѧ . Вᲂдо́ю сн҃ᲂпᲂлᲂже́нїѧ кр҃ще́нїѧ , ѡ҆бнᲂвлѧ́ѧ чл҃ки , сн҃ы твᲂрѧ́щаго си́хъ приве́лъ є҆сѝ . и҆ пре́далъ є҆сѝ чи́сты непᲂро́чны пᲂрфи́рїе . боⷢ҇ . Разꙋмѣ́вше твᲂѧ̀ , є҆́же па́че сло́ва бжⷭ҇твеннаѧ та́инства , и҆ неи҆зрече́ннꙋ сла́вꙋ , и҆́же ѡ҆ тебѣ̀ хва́лѧщїисѧ пречⷭ҇таѧ , вᲂи́стинꙋ тѧ̀ бцⷣꙋ непреста́ннѡ сла́вимъ .

кᲂнда́къ . гла́съ , д҃ . Цр҃кᲂвь хрⷭ҇то́ва дне́сь ликꙋ́етъ , ꙗ҆́кᲂже црⷭ҇кᲂю ᲂу҆кра́шена дїади́мᲂю , ᲂу҆че́ньми твᲂи́ми ст҃лю пᲂрфи́рїе , и҆ вᲂспѣва́етъ всѣ́хъ гдⷭ҇а .

пѣ́снь , з҃ . і҆рмо́съ . Впещѝ а҆враа́мскїѧ си дѣ́ти перси́дстѣй , любо́вїю бл҃гᲂвѣ́рїѧ па́че не́жели пла́менемъ ѡ҆палѧ́еми взыва́хꙋ , блгⷭ҇ве́нъ є҆сѝ в̾ цр҃кви сла́вы твᲂеѧ̀ гдⷭ҇и . Кᲂле́блемꙋю прᲂти́вными вѣ́тры , и҆ прило́гми ѻ҆́ч҃е , хрⷭ҇то́вꙋ вᲂдрꙋзи́лъ є҆сѝ держа́внѡ цр҃квь . семꙋ̀ пᲂю́щꙋю , бл҃гᲂслᲂве́нъ бг҃ъ ѻ҆ц҃ъ на́шихъ . Сᲂбо́ры до́блественѣ , є҆рети́ческїѧ пᲂбѣди́лъ є҆сѝ ѻ҆́ч҃е мꙋ́дре , ѻ҆рꙋ́жїи слᲂве́сными ѡ҆дѣ́ѧвсѧ . и҆ хрⷭ҇то́ви бл҃гᲂда́рнѡ в̾зыва́ше , бл҃гᲂслᲂве́нъ бг҃ъ ѻ҆ц҃ъ на́шихъ . Въ ра́й мы́сленыхъ в̾ше́лъ є҆сѝ дᲂбрᲂдѣ́телей . ѿ ни́хже цвѣ́ты пᲂжа́лъ є҆сѝ , и҆́стинныѧ и҆ кра́сныѧ ѻ҆́ч҃е пᲂрфи́рїе . и҆́миже в̾ ми́рѣ бл҃гᲂꙋха́лъ є҆сѝ . боⷢ҇ . Крѣ́пᲂсть и҆ держа́вꙋ , тѧ̀ немᲂщны́мъ всѣ́мъ , си́льнᲂе сло́во бж҃їе дв҃о и҆з̾ тебѐ рᲂжде́исѧ , дарᲂва̀ в̾зыва́ющимъ , бл҃гᲂслᲂве́нъ бг҃ъ ѻ҆ц҃ъ на́шихъ .

пѣ́снь , и҃ . і҆рмо́съ . Рꙋ́цѣ распрᲂсте́ръ данїи́лъ , льво́ва зїѧ́нїѧ в̾ ро́вѣ затчѐ , ѻ҆́гненꙋю же си́лꙋ ᲂу҆гаси́ша дᲂбрᲂдѣ́телїю пᲂѧ́савшесѧ , и҆́же бл҃гᲂче́стїѧ люби́тели ѻ҆́трᲂцы взыва́юще , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Вᲂѡ҆рꙋжи́лъ є҆сѝ слᲂвесы̀ твᲂи́ми мꙋ́дре цр҃кᲂвь хрⷭ҇то́вꙋ , и҆ ᲂу҆тверди́лъ є҆сѝ . тѣ́мже пᲂбѣжда́етъ всегда̀ , наше́ствїе є҆ресе́мъ . и҆ пᲂбѣдᲂно́снѡ хрⷭ҇то́ви пᲂе́тъ в̾зыва́ющи , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Оу҆́мъ на нб҃са̀ вы́нꙋ и҆мѣ́ѧ пᲂрфи́рїе , бжⷭ҇твеннагѡ ᲂу҆лꙋчи́лъ є҆сѝ премѣне́нїѧ неи҆зрече́ннѡ . и҆ чꙋ́вствᲂмъ непᲂсти́жна , ви́дѧ та́инства хрⷭ҇то́ва . и҆ вѣ́рᲂю зᲂвы́и є҆мꙋ̀ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Оу҆ста̀ льво́мъ мы́сленымъ , ѕлѣ̀ хꙋ́лѧщимъ загради́лъ є҆сѝ , мᲂли́твами сѝ пᲂрфи́рїе . и҆ че́люсти сᲂкрꙋши́лъ є҆сѝ стрѣла́ми тве́рдыми , бжⷭ҇твенныхъ слᲂве́съ твᲂи́хъ . семꙋ̀ в̾зыва́ѧ прилѣ́жнѡ , ᲂу҆крѣплѧ́ющемꙋ тѧ̀ . бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . боⷢ҇ . И҆́же на прⷭ҇то́лѣ сла́вы ѻ҆ц҃а сѣдѧ́и , сн҃ъ и҆ сло́во є҆гѡ̀ , тѧ̀ бжⷭ҇твенѡ нᲂси́ло чⷭ҇таѧ , и҆ сѣда́лище пресла́вно , и҆з̾ тебѐ рᲂжде́исѧ пло́тїю , є҆ди́нꙋ сᲂдѣ́ла . є҆ѧ́же всѝ землені́и вᲂспѣва́ютъ , ꙗ҆́кѡ влⷣчцꙋ .

пѣ́снь , ѳ҃ . і҆рмо́съ . Ка́мень нерꙋкᲂсѣ́чныѧ гᲂры̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , сᲂвᲂкꙋпи́въ раз̾стᲂѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Чтⷭ҇ны́ѧ прине́слъ є҆сѝ да́ры , бл҃гᲂпрїѧ́тныѧ дᲂбрᲂдѣ́тели свᲂѧ̀ , великᲂдаро́внᲂмꙋ влⷣцѣ . и҆зба́вльшаѧсѧ ѿ́ лести є҆ресе́й , тᲂбо́ю ѻ҆́ч҃е прпⷣбне , зижди́телѧ всѣ́хъ велича́ющїѧ . Тꙋ́чами сле́зъ твᲂи́хъ , страсте́мъ ᲂу҆гаси́лъ є҆сѝ пла́мень , и҆ без̾стра́стїемъ зижди́телю пᲂслꙋжи́лъ є҆сѝ , и҆ сла́вѣ лꙋ́чшей спᲂдо́бисѧ пᲂрфи́рїе , сегѡ̀ пᲂѧ̀ и҆ велича́ѧ прⷭ҇нѡ . Съ вы́шними ликꙋ́ѧ а҆́гг҃лы , и҆ ст҃ы́ми и҆ прпⷣбными , ѡ҆ и҆́же вѣ́рᲂю чтꙋ́щихъ тѧ̀ , и҆ вᲂсхвалѧ́ющихъ ѻ҆́ч҃е пᲂрфи́рїе , бл҃гᲂда́телѧ гдⷭ҇а , непреста́нно мᲂлѝ . боⷢ҇ . Ѡ҆ на́шемъ спасе́нїи вᲂчл҃чьсѧ влⷣка , тѧ̀ хᲂда́таицꙋ всѣ́мъ и҆ пᲂкро́въ , и҆ врачева́нїе чⷭ҇таѧ дарᲂва̀ , вѣ́рнѡ тѧ̀ сла́вѧщимъ . и҆ сегѡ̀ любо́вїю велича́ющимъ .

<< Previous

Contents

Next >>