МЦⷭ҇А ТОГО́ЖЕ ВЪ К҃З ДН҃Ь

Прпⷣбнагѡ ѻ҆ц҃а на́шегѡ прᲂко́пїѧ десѧтᲂгра́ дца . =Ве́черъ , на гдⷭ҇и вᲂзва́хъ , стихѣ́ры . гла́с̾ , д҃ . поⷣ . ꙗ҆́кѡ до́блѧ . По ѻ҆́бразꙋ бы́въ бж҃їю ,꙳ и҆ по пᲂдо́бїю ,꙳ ѿ нача́ла сᲂзда́нїѧ всебл҃же́нне ,꙳ ѻ҆́браза дᲂстᲂѧ́нїе сᲂблюстѝ пᲂтща́лсѧ є҆сѝ ,꙳ по́мыслᲂмъ всебл҃гᲂчести́вымъ .꙳ и҆ ᲂу҆ма̀ чистᲂто́ю ,꙳ и҆ страсте́й вᲂз̾держа́нїемъ .꙳ и҆ сᲂблюде́нїемъ хрⷭ҇то́выхъ велѣ́нїи ,꙳ и҆ бл҃гᲂче́стїѧ пребᲂга́те . Вᲂз̾держа́нїемъ пе́рвѣе прїе́мъ ,꙳ и҆ страда́нїемъ бг҃ᲂмꙋ́дренѡ по́слѣжде ,꙳ ᲂу҆гᲂди́лъ є҆сѝ ѡ҆бᲂи́ми зижди́телю .꙳ и҆́же є҆ди́нᲂмꙋ ѡ҆чище́нїе ,꙳ и҆стѧза́ющемꙋ ѿ на́съ ,꙳ и҆ дш҃е́внᲂе бл҃гᲂро́дїе .꙳ є҆го́же плᲂтьско́е прише́ствїе сла́вѧ ,꙳ пᲂкланѧ́шесѧ ѻ҆́бразꙋ ст҃о́мꙋ ,꙳ и҆́же по тᲂгѡ̀ в̾ чл҃ченїю . И҆́же слᲂвесѝ вᲂплᲂще́нїѧ ,꙳ ѕлᲂчести́вѣ ѿве́ргшїѧсѧ ,꙳ ѡ҆блича́ѧ прпⷣбне .꙳ сᲂверши́лъ є҆сѝ ꙗ҆́звеными и҆стѧза́нїи ,꙳ и҆ всѧ́цѣми ѡ҆ѕлᲂбле́ньми ,꙳ и҆ ᲂу҆́зами и҆ темни́цъ ,꙳ ᲂу҆твержа́ѧ и҆́стинꙋ .꙳ тѣ́мже бы́лъ є҆сѝ хрⷭ҇то́ва црⷭ҇твїѧ наслѣ́дникъ ,꙳ и҆ ра́дᲂсти неи҆з̾рече́нныѧ ,꙳ и҆ прⷭ҇нᲂсꙋ́щнагѡ сїѧ́нїѧ . =сла́ва , и҆ ны́нѣ , боⷢ҇ . Ꙗ҆́кѡ мл҃твꙋ неꙋсыпа́ющꙋ ,꙳ и҆ мᲂльбꙋ̀ пребыва́ющꙋю ,꙳ и҆мꙋ́щи пречⷭ҇таѧ к̾ бг҃ꙋ .꙳ напа́сти ᲂу҆спѝ ,꙳ вᲂлны̀ ᲂу҆крᲂтѝ ѻ҆каѧ́нныѧ мѝ дш҃и .꙳ и҆ в̾ ско́рби сꙋ́ще срⷣце мᲂѐ ᲂу҆тѣ́ши ,꙳ ѻ҆трᲂкᲂви́це мᲂлю́ тѧ .꙳ и҆ ѡ҆бл҃гᲂда́ти ᲂу҆́мъ мо́й ,꙳ ꙗ҆́кѡ да дᲂсто́йнѡ сла́влю тѧ̀ . крⷭ҇тᲂбоⷢ҇ . А҆́гньца и҆ па́стырѧ ,꙳ на́ древѣ ꙗ҆́кѡ ᲂу҆зрѣ̀ ,꙳ а҆́гница ро́ждьшаѧ рыда́ше ,꙳ и҆ мт҃рьски тебѣ̀ вѣща́ше ,꙳ сн҃е вᲂзжелѣ́нне ,꙳ ка́кѡ на́ древѣ крⷭ҇тнѣмъ ,꙳ вᲂз̾дви́жесѧ дᲂлгᲂтерпѣли́ве ;꙳ ка́кѡ рꙋ́цѣ свᲂѝ и҆ но́зѣ свᲂѝ сло́ве ,꙳ пригвᲂздѝ без̾зако́нники ,꙳ и҆ кро́вь свᲂю̀ и҆злїѧ́лъ є҆сѝ влⷣко .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , и҃ . Правᲂсла́вїю наста́вниче , бл҃гᲂче́стїѧ ᲂу҆чи́телю и҆ чистᲂтѣ̀ . вселе́ннѣй свѣти́льниче , а҆рхїєре́ѡмъ бг҃ᲂдх҃нᲂве́ннᲂе ᲂу҆дᲂбре́нїе , прᲂко́пїе премꙋ́дре . ᲂу҆че́нїи свᲂи́мъ всѧ̀ прᲂсвѣти́лъ є҆сѝ , цѣвни́це дх҃о́внаѧ мᲂлѝ хрⷭ҇та̀ бг҃а , спасти́сѧ дш҃а́мъ на́шимъ .= сла́ва , и҆ ны́нѣ , боⷢ҇ . и҆лѝ , крⷭ҇тᲂбоⷢ҇ .=

Кано́нъ . твᲂре́нїе ѳеѡ́фанᲂво . гла́с̾ , ѕ҃ . пѣ́снь , а҃ . і҆рмо́съ . Ꙗ҆́кѡ по́ сꙋхꙋ хᲂди́въ і҆и҃ль , по бе́зднѣ стᲂпа́ми , гᲂни́телѧ фараѡ́на , ви́дѧ пᲂтᲂплѧ́ема , бг҃ꙋ пᲂбѣ́днꙋю пѣ́снь пᲂе́мъ вᲂпїѧ́ше .

запѣ́в̾ : Прпⷣбне ѻ҆́ч҃е прᲂко́пїе , мᲂлѝ бг҃а ѡ҆ на́съ . Бл҃гᲂче́стїѧ любо́вїю ѡ҆бъѧ́тъ бы́въ , и҆ бжⷭ҇твеннымъ жела́нїемъ , тревᲂлне́нїѧ мир̾ска́ѧ ѿтрѧ́слъ є҆сѝ прпⷣбне . бг҃ᲂви пᲂбѣ́днꙋю пѣ́снь в̾зыва́ѧ , ꙗ҆́кѡ прᲂсла́висѧ . Свѣтᲂно́снᲂе тѝ житїѐ , и҆ свѣ́тлᲂсть дш҃е́внаѧ , и҆ крѣ́пᲂсть бл҃гᲂче́стїѧ смѣси́вшисѧ , дᲂбрᲂдѣ́тели вᲂѡ҆браже́нїе , в̾ тебѣ̀ прпⷣбне ꙗ҆́вѣ сᲂдѣ́лаша . Вышеє҆сте́ственымъ ᲂу҆че́нїемъ , и҆ свѣтᲂза́рнымъ хрⷭ҇то́вымъ ѡ҆свѣща́емъ , страстны́ѧ прило́ги вᲂз̾держа́нїемъ ᲂу҆вѧди́лъ є҆сѝ . вᲂпїѧ̀ пᲂбѣ́днꙋю пѣ́снь вседержи́телю . боⷢ҇ . Вᲂплᲂще́ннᲂе сло́во , бг҃ᲂлѣ́пнѡ заче́нши пречⷭ҇таѧ , и҆́же пре́жде беспло́тнаго на́мъ па́че є҆стества̀ рᲂдила̀ є҆сѝ чⷭ҇таѧ , по ржⷭ҇твѣ̀ дв҃ᲂю пребы́вши .

пѣ́снь , г҃ . і҆рмо́с̾ . Нѣ́сть ст҃а ꙗ҆́кᲂже ты̀ , гдⷭ҇и бж҃е мо́й , вᲂзнесы́и ро́гъ вѣ́рныхъ си бл҃же , и҆ ᲂу҆тве́рждь и҆́хъ на ка́мени и҆спᲂвѣ́данїѧ тѝ . Твᲂѧ̀ бг҃ᲂпрїѧ́тнаѧ дш҃а , вѣ́ры ра́ди ре́внᲂстїю распалѧ́ема бл҃же́нне , без̾зако́нныхъ го́рькїи гнѣ́въ и҆ ꙗ҆́рᲂсть , бг҃ᲂно́сне держа́внѡ разᲂри́ла є҆́сть . Свᲂи́ми крᲂвьмѝ ѡ҆багри́всѧ , мч҃нческимъ страда́нїемъ ᲂу҆пᲂдо́бисѧ требл҃же́нне . ра́ны нечести́выхъ , мꙋ́жественᲂю дш҃е́ю претерпѣ́лъ є҆сѝ , терпѣли́внѡ прᲂко́пїе . Пᲂдъѧ́лъ є҆сѝ прпⷣбне , сꙋгꙋ́бы по́двиги мꙋ́дрѣ , є҆́реси ѡ҆блича́ѧ . и҆ льво́ва стремле́нїѧ , мꙋ́жески претерпѣ́въ бг҃ᲂмꙋ́дрено , премꙋ́дре прᲂко́пїе . боⷢ҇ . Мꙋ́дрᲂсть и҆ сло́во ѻ҆́ч҃ее , є҆́же пре́жде всѣ́хъ вѣ́къ , на пᲂслѣ́дᲂкъ време́нъ неи҆зрече́ннѡ вᲂпло́щьсѧ , ѿ неи҆скꙋсᲂбра́чныѧ мт҃ре , бцⷣꙋ сїю̀ сᲂдѣ́ла .

сѣда́ленъ . гла́съ , д҃ . Вᲂз̾держа́нїѧ дᲂбро́тами ᲂу҆кра́шенъ , мꙋче́нїѧ крᲂвьмѝ ᲂу҆ѧсни́лъ є҆сѝ дш҃ꙋ , и҆ па́че сл҃нца прᲂсїѧ́лъ є҆сѝ , чꙋдᲂно́сне прᲂко́пїе прпⷣбне . сла́ва , и҆ нн҃ѣ , боⷢ҇ . Те́плᲂе застꙋпле́нїе сꙋ́щимъ в̾ бѣда́хъ , на́шꙋ пᲂмо́щницꙋ , и҆ к̾ бг҃ꙋ премѣне́нїе , є҆ѧ́же ра́ди ѿ тлѧ̀ и҆зба́вихᲂмсѧ , бцⷣꙋ вѣ́рнїи ᲂу҆блажа́емъ . крⷭ҇тᲂбоⷢ҇ . На́древѣ ви́дѧщи вᲂз̾дви́жена , сн҃а свᲂегѡ̀ пречⷭ҇таѧ , ᲂу҆тро́бᲂю свᲂе́ю растерза́ема , жа́лᲂстнѡ в̾зыва́ше , ᲂу҆вы̀ мнѣ̀ ка́кѡ за́йде свѣ́те мо́й без̾лѣ́тныи .

пѣ́снь , д҃ . і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ цр҃кви бг҃ᲂлѣ́пнѡ зᲂве́тъ вᲂпїю́щи , ѿ со́вѣсти чи́сты ѡ҆́ гдⷭ҇ѣ пра́зднꙋющи . Напᲂѧ́ѧ прпⷣбне сле́зными тече́нїи срⷣце свᲂѐ бл҃же́нне , дᲂбрᲂдѣ́телей сѣ́мѧ вᲂз̾дѣ́лалъ є҆сѝ по́мыслᲂмъ чи́стымъ , прпⷣбне прᲂко́пїе . Землено́е мꙋдрᲂва́нїе , бжⷭ҇твеннᲂмꙋ дх҃ꙋ пᲂвинꙋ́лъ є҆сѝ ѻ҆́ч҃е , по́стническᲂе житїѐ прїе́мъ , и҆ сᲂчета́емь лико́мъ пребл҃же́нне . Ꙗ҆́кѡ мч҃нкъ бжⷭ҇твенъ и҆ и҆́стиненъ по бл҃гᲂче́стїи , є҆ретико́мъ ѡ҆бличи́лъ є҆сѝ безꙋ́мїе . гнѣ́въ бо мꙋ́жески без̾бо́жныхъ преѡ҆би́дѣлъ є҆сѝ . боⷢ҇ . Зако́нныхъ крᲂмѣ̀ сᲂꙋ́зъ всенепᲂро́чнаѧ , заче́нши зижди́телѧ , и҆ без̾ тлѧ̀ сегѡ̀ пᲂрᲂдила̀ є҆сѝ . и҆ бцⷣа вᲂи́стинꙋ была̀ є҆сѝ .

пѣ́снь , є҃ . і҆рмо́съ . Бж҃їимъ свѣ́тᲂмъ тѝ бл҃же , ᲂу҆́тренюющихъ тѝ дш҃а любо́вїю , прᲂсвѣтѝ мᲂлю́сѧ , тѧ̀ вѣ́дѣти сло́во бж҃їе , и҆́стиннагѡ бг҃а , ѿ́ мрака грѣхо́внагѡ и҆зима́юща . Ѡ҆сщ҃е́нна по́стнически , и҆ скᲂнча́вшасѧ кро́вїю ѻ҆́ч҃е , дᲂсто́йнѡ пᲂчита́емъ . па́мѧть бо пра́веднымъ с̾пᲂхвала́ми при́снѡ , вѣ́рными сᲂверша́етсѧ и҆ пᲂмина́етсѧ . Мꙋ́дрѣ всѐ претвᲂрѧ́ѧ и҆ ᲂу҆краша́ѧ к̾лꙋ́чшемꙋ , ꙗ҆́кᲂже хо́щетъ гдⷭ҇ь . нече́ствꙋющихъ безꙋ́мныи гнѣ́въ , твᲂи́мъ вᲂз̾держа́нїемъ , и҆ мꙋче́нїѧ сла́вᲂю прелᲂжѝ . На ра́мо в̾зе́мъ крⷭ҇тнᲂе всеѻ҆рꙋ́жїе ѻ҆́ч҃е , хрⷭ҇то́ви пᲂслѣ́дᲂвалъ є҆сѝ . всѧ̀ за́днѧѧ забве́нїю твᲂрѧ̀ , к̾ пре́днимъ тече́нїемъ прᲂстира́ѧсѧ . боⷢ҇ . Пᲂе́мъ пречⷭ҇таѧ , и҆з̾ тебѐ в̾ пло́ть страда́льнꙋ и҆ ме́ртвенꙋ , ѡ҆дѣ́ѧвшагᲂсѧ гдⷭ҇а , и҆ ѡ҆бᲂже́нꙋ сᲂдѣ́лавшаго , сᲂє҆дине́нїемъ несмѣ́снымъ по сᲂста́вꙋ .

пѣ́снь , ѕ҃ . і҆рмо́съ . Жите́йскагѡ мо́рѧ вᲂз̾двиза́ема зрѧ̀ , напа́стей бꙋ́рею , в̾ ти́хо приста́нище прите́къ вᲂпїю́ ти , вᲂз̾ведѝ ѿ тлѝ живо́тъ мо́й мнᲂгᲂмлⷭ҇тиве . Прехᲂдѧ̀ прⷭ҇нᲂпа́мѧтне , ѿ сла́вы вᲂи́стинꙋ по́стнически , вᲂсте́клъ є҆сѝ к̾ мꙋче́нїю сла́вѣ и҆ че́сти . свᲂе́ю кро́вїю , в̾ багрѧни́цꙋ ѡ҆червле́нꙋ ѡ҆дѣ́ѧнъ . Текꙋ́щихъ нестᲂѧ́тельныхъ преѡ҆би́дѣвъ , дш҃е́ю и҆ по́мыслᲂмъ бг҃ᲂмꙋ́дренᲂмъ . прⷭ҇нᲂпребыва́ющими бл҃ги́ми , кᲂнца̀ неи҆мꙋ́щими , бл҃гᲂче́стнѡ в̾пери́лсѧ є҆сѝ пребл҃же́нне . Вᲂз̾держа́нїемъ бл҃гᲂмо́щнымъ и҆ кро́тᲂстїю , хрⷭ҇то́съ тебѐ зрѧ̀ ѡ҆бᲂгати́вшасѧ , чл҃кᲂлю́бнѣ призрѣ̀ натѧ̀ . и҆ сла́вѣ пᲂказа̀ прича́стника , страстᲂте́рпче пресла́вне . боⷢ҇ . Всенепᲂро́чнаѧ влⷣчце , дш҃и мᲂеѧ̀ тѧ́жкаѧ и҆ лю́таѧ сᲂкрꙋше́нїѧ , рꙋкᲂдѣѧ́ньми и҆сцѣлѝ та́йными . цѣле́бныѧ лѣчбы̀ , сн҃а свᲂегѡ̀ пᲂлага́ющи стрⷭ҇ти .

кᲂнда́къ . гла́съ , д҃ . Вᲂз̾держа́нїѧ ᲂу҆дᲂбре́нїемъ прекра́снѡ , и҆ мч҃нческᲂю кро́вїю преꙋдо́бривсѧ бл҃гᲂче́стнѡ , и҆ сл҃нца пресвѣ́тлѣе вᲂсїѧ́лъ є҆сѝ , чꙋдᲂно́сне прᲂко́пїе прпⷣбне .

пѣ́снь , з҃ . і҆рмо́съ . Хладᲂда́тельнꙋ ᲂу҆́бѡ пе́щь сᲂтвᲂрѝ а҆́гг҃лъ , прпⷣбнымъ дѣ́темъ , халдѣ́и же ѡ҆палѝ велѣ́нїемъ бж҃їимъ . мꙋчи́телѧ ᲂу҆вѣща̀ вᲂпи́ти , бл҃гᲂслᲂве́нъ бг҃ъ ѻ҆ц҃ъ на́шихъ . Ꙗ҆́кѡ пресвѣ́тло житїѐ твᲂѐ бг҃ᲂмꙋ́дре бы́сть , вᲂз̾держа́нїемъ . та́кѡ ꙗ҆ви́сѧ твᲂѐ ꙗ҆́вѣ страда́нїе тве́рдо . хрⷭ҇та́ бо прᲂсла́ви вᲂпїѧ̀ , бл҃гᲂслᲂве́нъ бг҃ъ ѻ҆ц҃ъ на́шихъ . Цѣлᲂмꙋ́дрїѧ чистᲂто́ю , чꙋ́дныи ѻ҆́ч҃е препᲂѧ́савсѧ , в̾мꙋ́жество мꙋче́нїѧ . вѣне́цъ свѣ́телъ прїѧ́тъ бл҃гᲂда́тїю , вᲂпїѧ̀ , бл҃гᲂслᲂве́нъ бг҃ъ ѻ҆ц҃ъ на́шихъ . Непᲂкланѧ́ющїисѧ ѻ҆́бразꙋ твᲂемꙋ̀ чⷭ҇тᲂмꙋ сп҃се нечести́вїи , раба̀ твᲂегѡ̀ ᲂу҆кᲂрѧ́ютъ стрꙋ́жꙋще лю́тѣ , пᲂю́ща и҆ гл҃юща к̾ тебѣ̀ , бл҃гᲂслᲂве́нъ бг҃ъ ѻ҆ц҃ъ на́шихъ . боⷢ҇ . Веселѧ́щесѧ ржⷭ҇тво́мъ твᲂи́мъ пренепᲂро́чнаѧ , вси́ тѧ ᲂу҆блажа́емъ . тѣ́мъ бо ра́ди ны́нѣ плᲂтьски́мъ рᲂжде́нїемъ мы̀ и҆зба́вльшесѧ вᲂпїе́мъ є҆мꙋ̀ , бл҃гᲂслᲂве́нъ бг҃ъ ѻ҆ц҃ъ на́шихъ .

пѣ́снь , и҃ . і҆рмо́съ . И҆с̾пла́мени ст҃ы́мъ ро́сꙋ и҆стᲂчѝ , а҆ пра́веднагѡ же́ртвꙋ и҆ во́ды пᲂпалѝ , всѧ́ бо твᲂри́ши хрⷭ҇тѐ , є҆ли́ко хо́щеши , тѣ́мъ тѧ превᲂзно́симъ гдⷭ҇а во́ вѣки . Разрѣше́нъ ѿ ка́ла , и҆ пре́жде сме́рти ꙗ҆́вльсѧ преста́вилсѧ є҆сѝ ѿ сю́дꙋ , к̾ нетлѣ́ннѣй прпⷣбне жи́зни . сме́рть прїе́мъ лѣ́ствицею свѣ́тлѡ прᲂко́пїе бг҃ᲂмꙋ́дре . И҆спо́лненъ ꙗ҆ви́лсѧ є҆сѝ зарѝ бл҃гᲂда́тныѧ , и҆ к̾ незахᲂди́мᲂмꙋ свѣ́тꙋ ѻ҆́ч҃е ѿше́лъ є҆сѝ , всѧ́ко ве́щнᲂе ѿло́жъ ꙗ҆вле́нїе . тѣ́мже тѧ̀ пᲂчита́емъ прᲂко́пїе бг҃ᲂмꙋ́дре . Вᲂѡ҆рꙋже́нъ си́лᲂю бжⷭ҇твеннагѡ дх҃а , лꙋка́в̾ствїѧ дꙋ́хи пᲂбѣди́лъ є҆сѝ . тѣ́мже нбⷭ҇ныѧ две́ри тебѣ̀ ѿверзо́шасѧ бл҃же́нне , пᲂю́щꙋ хрⷭ҇та̀ во́ вѣки всѧ̀ . боⷢ҇ . Бл҃жа́тъ всѝ ро́ди влⷣчце , ꙗ҆́кᲂже прᲂрекла̀ є҆сѝ є҆ди́на бг҃ᲂбл҃же́ннаѧ , тѧ̀ вᲂи́стинꙋ бцⷣꙋ пречⷭ҇тꙋю . ю҆́же превᲂзно́симъ во всѧ̀ вѣ́ки .

пѣ́снь , ѳ҃ . і҆рмо́с̾ . Бг҃а чл҃кѡмъ неꙋдо́бь ви́дѣти , на́нь же несмѣ́ютъ чи́ни а҆́гг҃льстїи зрѣ́ти . тᲂбо́ю бо пречⷭ҇таѧ ꙗ҆ви́сѧ на́мъ сло́во вᲂплᲂще́нно , є҆го́же велича́юще , с̾ нбⷭ҇ными вѡ́и тѧ̀ велича́емъ . Страда́ти зако́нно мч҃нче и҆ды́и , страстна́ѧ стремле́нїѧ вᲂз̾держа́нїемъ ᲂу҆мертви́лъ є҆сѝ , и҆ плᲂтьска́ѧ в̾зыгра́нїѧ ᲂу҆го́дниче хрⷭ҇то́въ . тѣ́мже без̾стра́стїѧ ны́нѣ . с̾беспло́тными во́и , ѡ҆брѣ́те наслажде́нїе . Сꙋдїѝ пра́веднᲂмꙋ свѣ́тлѡ пред̾стᲂи́ши , ꙗ҆́кѡ пᲂбѣди́тель вѣнцы̀ неᲂу҆вѧда́емыѧ прїе́мъ . прилѣ́жнѡ прᲂко́пїе мᲂлѧ́сѧ , ѡ҆ твᲂрѧ́щихъ твᲂю̀ сщ҃е́ннꙋю па́мѧть , и҆ бжⷭ҇твенныи пра́здникъ преставле́нїѧ твᲂегѡ̀ . Зарѧ́ми тре́ми ны́нѣ ѡ҆зарѧ́емь , и҆́же ѿ є҆ди́нагѡ несказа́ннѡ прᲂи҆схᲂдѧ́щими бжⷭ҇тва̀ , пребᲂга́тнагѡ видѣ́нїѧ спᲂдо́бисѧ . и҆ кра́снагѡ весе́лїѧ , ра́дꙋѧсѧ с̾ преми́рными во́и ѻ҆́ч҃е прᲂко́пїе . боⷢ҇ . Тлѣ́ненъ , сло́во бж҃їе нетлѣ́ннᲂе , зра́къ прїе́мъ , чл҃ки в̾ нетлѣ́нїе ѡ҆блечѐ . бл҃гᲂвᲂле́нїемъ ѻ҆́ч҃имъ , все́льсѧ в̾ тѧ̀ ѡ҆бра́дᲂваннꙋю . тѣ́мже пречⷭ҇таѧ с̾ нбⷭ҇ными во́и тѧ̀ велича́емъ .