28 февраля: прп. Василия Исповедника

МЦⷭ҇А ТОГО́ЖЕ ВЪ К҃И ДН҃Ь

Прпⷣбнагѡ ѻ҆ц҃а на́шегѡ и҆ и҆спᲂвѣ́дника васи́ лїѧ . =Ве́черъ , на гдⷭ҇и вᲂзва́хъ , стихѣ́ры . гла́с̾ , д҃ . поⷣ . да́лъ є҆сѝ зна́менїе . Бл҃же́нство є҆́же па́че ᲂу҆ма̀ жела́ѧ ,꙳ в̾мѣни́лъ є҆сѝ чꙋ́дне ,꙳ пи́щꙋ вᲂз̾держа́нїе .꙳ нищетꙋ̀ , бᲂга́тство .꙳ нестѧжа́нїе , и҆мѣ́нїе и҆́стинно .꙳ и҆ бл҃гᲂсло́вїе , смире́нїе .꙳ тѣ́мже и҆ жела́нїѧ ꙳ є҆́же по ра́зꙋмꙋ ᲂу҆лꙋчи́лъ є҆сѝ ,꙳ в̾ се́лѣхъ вᲂдвᲂрѧ́ѧсѧ ст҃ы́хъ бл҃же́нне . Тече́нїе вᲂз̾держа́нїѧ ꙳ непрело́жно скᲂнча́лъ є҆сѝ ,꙳ и҆ вѣ́рꙋ сᲂблю́лъ є҆сѝ .꙳ тѣ́мже и҆ вѣнце́мъ ᲂу҆краси́сѧ ѻ҆́ч҃е пра́веднымъ ,꙳ и҆́же тебѣ̀ ᲂу҆гᲂто́ва хрⷭ҇то́съ .꙳ и҆́же по дᲂстᲂѧ́нїю пᲂдава́ѧи м̾зды̀ ,꙳ и҆ по́чести да́рꙋѧ , и҆ бᲂлѣ́знемъ вᲂз̾да́нїе .꙳ є҆го́же и҆ на́съ ѿ бѣ́дъ и҆зба́вити ,꙳ бг҃ᲂно́сне пᲂмᲂли́сѧ . Всѧ́цѣмъ ѕлᲂстра́стїемъ ,꙳ пᲂрабᲂща́ѧ тѣ́ло свᲂѐ ,꙳ ѿве́рже бг҃ᲂмꙋ́дре .꙳ ѡ҆гᲂрчева́ѧ чꙋ́вство ѿлᲂже́нїемъ бра́шенъ ,꙳ и҆ же́стᲂкимъ пребыва́нїемъ .꙳ терпѣ́нїемъ же напа́стей ,꙳ и҆ пᲂжда́нїемъ ѡ҆бстᲂѧ́ней ,꙳ и҆́миже нескᲂнча́емᲂе прїе́млеши наслажде́нїе ,꙳ и҆ пи́щꙋ неи҆з̾глаго́ланнꙋю ,꙳ и҆ ра́дᲂсть непреи҆дꙋ́щꙋю . =сла́ва , и҆ ны́нѣ , боⷢ҇ . Бѣсо́в̾скими преклᲂне́на прило́гми ,꙳ и҆ в̾ ро́въ пᲂги́бели в̾ве́ржена ,꙳ ᲂу҆ще́дри влⷣчце ,꙳ и҆ ᲂу҆тверди́ мѧ на ка́мени дᲂбрᲂдѣ́телей .꙳ и҆ навѣ́ты вра́жїѧ разо́рши ,꙳ спᲂдо́би мѧ твᲂри́ти пᲂвелѣ́нїѧ ,꙳ твᲂегѡ̀ сн҃а и҆ бг҃а на́шегѡ .꙳ ꙗ҆́кѡ да ᲂу҆лꙋчꙋ̀ ꙳ ѡ҆ставле́нїе в̾ дн҃ь сꙋда̀ . крⷭ҇тᲂбоⷢ҇ . Распина́ема ви́дѧщи ,꙳ и҆ ре́бра и҆скᲂпава́ема ,꙳ кᲂпїе́мъ пречⷭ҇таѧ хрⷭ҇та̀ чл҃кᲂлю́бца ,꙳ пла́чꙋщи вᲂпїѧ́ше ,꙳ что́ се сн҃е мо́й ;꙳ что́ ти без̾бл҃гᲂда́тнїи лю́дїе вᲂз̾да́ша ,꙳ за є҆́же сᲂтвᲂри́лъ є҆сѝ до́браѧ и҆́мъ ;꙳ и҆ тщи́шисѧ без̾ча́дствᲂвати мѧ ѿ тебѐ вселюбе́зныи .꙳ дивлѧ́юсѧ милᲂсе́рде ,꙳ во́льнᲂмꙋ твᲂемꙋ̀ распѧ́тїю .

Кано́нъ . твᲂре́нїе ѳеѡ́фанᲂво . гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ , немо́крыми стᲂпа́ми дре́вле ше́ствᲂвавъ і҆и҃ль , крⷭ҇тᲂѡ҆бра́зно мѡѷсе́ѡвыма рꙋка́ма , а҆мали́кᲂвꙋ си́лꙋ в̾ пꙋсты́ни пᲂбѣди́лъ є҆́сть .

запѣ́въ : Прпⷣбне ѻ҆́ч҃е и҆ и҆спᲂвѣ́дниче васи́лїе , мᲂлѝ бг҃а ѡ҆ на́съ . Вᲂсхᲂжде́нїе на ка́мени пᲂло́жь ѻ҆́ч҃е вѣ́ры , напа́стей не ᲂу҆бᲂѧ́лсѧ є҆сѝ стремле́нїѧ . но непᲂдви́жимъ пре́былъ є҆сѝ , ꙗ҆́кѡ дᲂбрᲂдѣ́тели пᲂбо́рникъ , и҆ ꙗ҆́кѡ црⷭ҇твїѧ тезᲂи҆мени́тъ . Бл҃гᲂда́ть прест҃а́гѡ дх҃а , тѧ̀ ᲂу҆крѣпи́вши , ꙗ҆́звеныѧ ра́ны претерпѣ́ти ᲂу҆твердѝ . и҆ пᲂбѣдᲂно́сца пᲂказа̀ , на мꙋчи́телѧ сꙋемꙋ́дренаго . Сᲂстрада́льника , и҆ с̾во́ина мꙋ́дра ѻ҆́ч҃е ᲂу҆лꙋчи́лъ є҆сѝ , дᲂбрᲂдѣ́тельми преспѣва́юща при́снѡ . с̾ни́мже ра́дꙋѧсѧ пребᲂга́те , по́двигъ страда́нїѧ прᲂше́лъ є҆сѝ бл҃же́нне . боⷢ҇ . Пред̾ста́тельницꙋ и҆ спасе́нїю хᲂда́таицꙋ , и҆ стѣ́нꙋ неѡ҆бᲂри́мꙋ , тѧ̀ мᲂемꙋ̀ пред̾лага́ю живᲂтꙋ̀ бцⷣе всепѣ́таѧ , бг҃а ро́ждьшꙋю бл҃гᲂда́телѧ всеѧ̀ тва́ри .

пѣ́снь , г҃ . і҆рмо́съ . Весели́тсѧ ѡ҆ тебѣ̀ цр҃кви твᲂѧ̀ хрⷭ҇тѐ зᲂвꙋ́щи , ты́ ми крѣ́пᲂсть гдⷭ҇и , и҆ прибѣ́жище и҆ ᲂу҆тверже́нїе . Напра́вилъ є҆сѝ ᲂу҆се́рднѡ , свᲂѐ срⷣце к̾ бг҃ꙋ прпⷣбне , вᲂз̾держа́тельнᲂю бл҃гᲂда́тїю , и҆ и҆спᲂвѣ́данїемъ прᲂсїѧ́лъ є҆сѝ . Во́инство вᲂспрїе́мъ , и҆ всеѻ҆рꙋ́жїе крⷭ҇та̀ , пᲂбѣди́лъ є҆сѝ мы́сленаго ѕмїѧ̀ , и҆ чꙋ́вственаго ѻ҆́ч҃е льва̀ . Сᲂблю́дше бл҃гᲂчести́вѣ , є҆́же по ѻ҆́бразꙋ дш҃и прпⷣбнїи , хрⷭ҇то́въ пречⷭ҇тыи чтꙋ́ще ѻ҆́бразъ пᲂстрада́сте . боⷢ҇ . Бл҃гᲂслᲂви́сѧ тᲂбо́ю , пе́рваѧ клѧ́тва . и҆ тлѣ́нїемъ держи́мᲂе є҆стество̀ на́ше чⷭ҇таѧ , нетлѣ́нїе прїѧ́тъ .

сѣда́лен̾ . гла́с̾ , г҃ . Бᲂга́тство тлѣ́ннᲂе , и҆ сла́вꙋ текꙋ́щꙋю ѡ҆ста́вль . нбⷭ҇нᲂе бᲂга́тство вᲂспрїѧ́лъ є҆сѝ , и҆ сла́вꙋ ѻ҆́ч҃е вᲂи́стинꙋ бл҃же́нне вѣ́чнꙋю . тѣ́мже ᲂу҆бл҃жа́емъ ст҃о́е ти ᲂу҆спе́нїе . и҆ тᲂрже́ствꙋюще в̾не́мъ вᲂпїе́мъ ти , пᲂмина́й на́съ к̾ бг҃ꙋ , и҆мѣ́ѧ дерзнᲂве́нїе васи́лїе . сла́ва , и҆ ны́нѣ , боⷢ҇ . Недᲂмы́слено и҆ непᲂстижи́мо є҆́сть влⷣчце бг҃ᲂра́дᲂваннаѧ , сᲂдѣ́ѧнᲂе в̾ тебѣ̀ стра́шнᲂе бж҃їе та́инство . непᲂсти́жимаго бо заче́нши рᲂдила̀ є҆сѝ , пло́тїю ѡ҆блᲂже́на ѿ чⷭ҇тыхъ крᲂве́й твᲂи́хъ . є҆го́же всегда̀ чⷭ҇таѧ , ꙗ҆́кѡ сн҃а свᲂегѡ̀ мᲂлѝ , спасти́сѧ дш҃а́мъ на́шимъ . крⷭ҇тᲂбоⷢ҇ . Неи҆скꙋсᲂбра́чнаѧ чⷭ҇таѧ и҆ мт҃и твᲂѧ̀ хрⷭ҇тѐ , зрѧ́щи тѧ ме́ртва ѡ҆бѣ́шена на́ древѣ , мт҃рьски рыда́ющи гл҃аше , что́ ти вᲂз̾дадѐ є҆вре́йскїи без̾зако́нныи сᲂбо́ръ , и҆ без̾бл҃гᲂда́тныи , и҆́же мно́гихъ и҆ вели́кихъ твᲂи́хъ , сн҃е мо́й даро́въ насла́ждьшїисѧ . пᲂю̀ твᲂѐ бжⷭ҇твеннᲂе смᲂтре́нїе .

пѣ́снь , д҃ . і҆рмо́съ . Вᲂз̾дви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾ чинꙋ̀ свᲂе́мъ , дᲂсто́йнѡ взыва́ющи , сла́ва си́лѣ твᲂе́й гдⷭ҇и . Ꙗ҆́кѡ красно̀ твᲂѐ пребл҃же́нне терпѣ́нїе . в̾ ста́рᲂсти ю҆́нᲂстнѣ ꙗ҆влѧ́емо прпⷣбне . с̾ни́мъ же в̾зыва́ше , сла́ва си́лѣ твᲂе́й гдⷭ҇и . Сᲂє҆динѧ́емь любо́вїю свᲂемꙋ̀ влⷣцѣ , и҆ тᲂгѡ̀ по́мᲂщїю ѡ҆дѣ́ѧвсѧ , бᲂлѣ́зни нечꙋ́ѧше плᲂтьскі́ѧ . в̾зыва́ѧ же пᲂѧ́ше , сла́ва си́лѣ твᲂе́й гдⷭ҇и . Црⷭ҇твꙋ ꙗ҆́кѡ тезᲂи҆мени́тъ нбⷭ҇нᲂмꙋ , и҆́же к̾ немꙋ̀ ведꙋ́щимъ пꙋте́мъ ше́ствᲂвалъ є҆сѝ . с̾пꙋ́тника ѡ҆брѣ́тъ прᲂко́пїѧ , зᲂвꙋ́ща , сла́ва си́лѣ твᲂе́й гдⷭ҇и . боⷢ҇ . Неи҆скꙋсᲂбра́чно рᲂдила̀ є҆сѝ ѽ дв҃це , и҆ по ржⷭ҇твѣ̀ ꙗ҆ви́сѧ дв҃ьствꙋющи па́ки . тѣ́мже немо́чными гла́сы , ра́дꙋисѧ тебѣ̀ влⷣчце вѣ́рᲂю несꙋмѣ́ннᲂю зᲂве́мъ .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рᲂю вᲂспѣва́ющїѧ тѧ . Ты̀ прпⷣбне свѣ́тлѡ пᲂдвиза́сѧ васи́лїе . ты̀ льва̀ ᲂу҆кᲂри́лъ є҆сѝ неꙋкрᲂти́мꙋю гᲂрды́ню , и҆ нра́въ неразꙋ́мныи . Є҆динᲂмы́сленика ѡ҆брѣ́тъ прᲂко́пїѧ в̾ трꙋдѣ́хъ , раз̾рꙋша́еши стра́сти . преспѣ́ѧнїи мнᲂгᲂѡ҆бра́зными , бжⷭ҇твенѣ вѣнчава́емь . Ны́нѣ ви́диши мы́слено хрⷭ҇та̀ , є҆го́же в̾желѣ́лъ є҆сѝ . и҆ є҆го́же и҆здале́ча ꙗ҆вле́нїѧ дѣ́йствено зрѧ́ше , пребл҃же́нне сщ҃е́нне . боⷢ҇ . Тѧ̀ ѻ҆рꙋ́жїе непᲂбѣди́мᲂе , на врагѝ пред̾лага́емъ . тѧ̀ держа́вꙋ и҆ наде́ждꙋ на́шемꙋ спасе́нїю , бг҃ᲂневѣ́стнаѧ и҆́мамы .

пѣ́снь , ѕ҃ . і҆рмо́съ . Пᲂжрꙋ́ти со́ гласᲂмъ хвале́нїѧ гдⷭ҇и , цр҃кви вᲂпїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Жела́нїемъ црⷭ҇твїѧ вы́шнѧгѡ пᲂбѣжда́емь , землена́гѡ цр҃ѧ несмы́сленагѡ нра́ва , и҆ пᲂвелѣ́нїѧ бг҃ᲂно́сне , до́блественѣ преѡ҆би́дѣлъ є҆сѝ . два́жды . На́гъ ᲂу҆́бѡ сꙋ́щихъ на землѝ , зако́нно пᲂдвиза́сѧ . ѡ҆дѣ́ѧнъ же бжⷭ҇твеннᲂю си́лᲂю , ꙗ҆ви́лсѧ є҆сѝ вѣнцено́сецъ , ꙗ҆́кѡ пᲂбѣ́ждь без̾бо́жныхъ мꙋчи́телей прᲂтивле́нїе . боⷢ҇ . Сѐ ны́нѣ прⷪ҇ркъ и҆спᲂлнѧ́ютсѧ прᲂпᲂвѣ́данїѧ , тебѣ̀ дв҃ѣй ро́ждьши , и҆́же прᲂро́ки дре́вле прᲂпᲂвѣ́даннаго . и҆ и҆спᲂлнѧ́юща прᲂрече́нїѧ дх҃а бл҃гᲂда́тїю .

кᲂнда́къ . гла́съ , д҃ . Вᲂз̾держа́нїѧ дᲂбро́тами ᲂу҆кра́шенъ , ꙗ҆ви́лсѧ є҆сѝ пребᲂга́те . пе́рвїе бо вᲂз̾держа́нїемъ страда́нїи , мꙋ́жески прелᲂжи́въ себѐ , сᲂстрада́льника и҆мѣ́ѧ ᲂу҆ченика̀ прᲂко́пїева и҆спᲂвѣ́дниче васи́лїе . тѣ́мже па́мѧть ва́шꙋ пᲂчита́емъ , мᲂли́те хрⷭ҇та̀ бг҃а , да спасе́тъ дш҃а на́ша .

пѣ́снь , з҃ . і҆рмо́съ . Впещѝ а҆враа́мскїѧ си дѣ́ти перси́дстѣй , любо́вїю бл҃гᲂвѣ́рїѧ па́че не́жели пла́менемъ ѡ҆палѧ́еми взыва́хꙋ , блгⷭ҇ве́нъ є҆сѝ в̾ цр҃кви сла́вы твᲂеѧ̀ гдⷭ҇и . Вжилѧ́емь бжⷭ҇твеннᲂю си́лᲂю ѻ҆́ч҃е , ѡ҆бличи́лъ є҆сѝ всѧ̀ , и҆́же чⷭ҇тна́гѡ ѻ҆́браза хрⷭ҇то́ва ѿмета́ющїѧсѧ ꙗ҆́кѡ безꙋ́мны . бл҃гᲂслᲂве́нъ є҆сѝ вᲂпїѧ̀ в̾ цр҃кви сла́вы твᲂеѧ̀ гдⷭ҇и . два́жды . Вᲂз̾дѣ́ланна и҆ ѡ҆чище́на вᲂз̾держа́нїемъ ѻ҆́ч҃е , и҆ пᲂстрада́вша терпѣли́внѡ , хрⷭ҇то́съ тѧ̀ прїѧ́тъ . бл҃гᲂслᲂве́нъ є҆сѝ зᲂвꙋ́ща в̾ цр҃кви сла́вы твᲂеѧ̀ гдⷭ҇и . боⷢ҇ . Ꙗ҆́кѡ бцⷣꙋ и҆ цр҃цꙋ всѧ́кᲂй тва́ри , всѝ вѣ́рнїи пᲂе́мъ тѧ̀ чⷭ҇таѧ . и҆ є҆́же ра́дꙋисѧ тебѣ̀ в̾зыва́емъ , бл҃гᲂслᲂве́на ты̀ в̾ жена́хъ пренепᲂро́чнаѧ влⷣчце .

пѣ́снь , и҃ . і҆рмо́съ . Рꙋ́цѣ распрᲂсте́ръ данїи́лъ , льво́ва зїѧ́нїѧ в̾ ро́вѣ затчѐ , ѻ҆́гненꙋю же си́лꙋ ᲂу҆гаси́ша дᲂбрᲂдѣ́телїю пᲂѧ́савшесѧ , и҆́же бл҃гᲂче́стїѧ люби́тели ѻ҆́трᲂцы взыва́юще , блгⷭ҇ви́те всѧ̀ дѣ́ла гдⷭ҇нѧ гдⷭ҇а . Тѣ́ло бг҃ᲂно́сне , и҆ ᲂу҆́мъ всепло́дїе хрⷭ҇то́ви принесѐ , ꙗ҆́кѡ всесᲂж̾же́нїе сᲂверше́но ѻ҆гне́мъ сви́дѣнїѧ . и҆ пла́менемъ ра́нъ ве́сь сᲂжига́емь , и҆ вᲂпїѧ̀ бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Пᲂгна́въ свᲂѧ̀ врагѝ , и҆ гᲂни́въ ѻ҆́ч҃е низ̾лᲂжи́лъ є҆сѝ , и҆ пᲂпра́лъ є҆сѝ прпⷣбне безꙋ́мїе высᲂкᲂмꙋ́дренагѡ . неᲂу҆крᲂти́мы ви́дѧ тебѐ мꙋча́щїѧ , взыва́ѧ бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Ꙗ҆́кᲂже нѣ́кїи хꙋдо́жникъ на́мъ , ᲂу҆че́ньми и҆зрѧ́дными ꙗ҆ви́лсѧ є҆сѝ пребᲂга́те . пе́рвїе бо вᲂз̾держа́нїе к̾ страда́нїѧмъ мꙋ́жески пред̾лᲂжи́лъ є҆сѝ . сᲂстрада́льника и҆мѣ́ѧ ᲂу҆ченика̀ прᲂко́пїѧ вᲂпїю́ща , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . боⷢ҇ . Две́рь свѣтᲂно́снꙋ нбⷭ҇нꙋю тѧ̀ и҆менꙋ́емъ . є҆ю́же про́йде бг҃ъ , и҆ вᲂплᲂти́сѧ пречⷭ҇таѧ беспло́тныи пе́рвѣе , ꙗ҆́кѡ бг҃ꙋ и҆ ѻ҆ц҃ꙋ сы́и є҆динᲂсꙋ́щенъ . є҆мꙋ́же вᲂпїе́мъ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а .

пѣ́снь , ѳ҃ . і҆рмо́съ . Ка́мень нерꙋкᲂсѣ́чныѧ гᲂры̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , сᲂвᲂкꙋпи́въ раз̾стᲂѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Всѐ чꙋ́вство ѻ҆́ч҃е ны́нѣ превше́дъ , ко влⷣцѣ ра́дꙋѧсѧ прише́лъ є҆сѝ любо́вїю . свᲂи́хъ по́двигъ бᲂга́тство ѡ҆бїе́мъ , а҆́гг҃льскꙋю красᲂтꙋ̀ , и҆ раѧ̀ пи́щꙋ непреста́ннꙋю . Свᲂи́мъ ᲂу҆ченико́мъ и҆ сᲂстрада́льникᲂмъ , вᲂспрїе́млѧ бг҃ᲂно́сне , бл҃же́нныхъ наде́ждꙋ , и҆ вѣ́чнꙋющее весе́лїе . и҆́же ва́ше тᲂржество̀ твᲂрѧ́щихъ назира́йте . Ѿ землѝ к̾ нбⷭ҇нᲂмꙋ наслажде́нїю , вѣнцено́сцы преста́вльшесѧ , и҆дѣ́же ст҃ы́хъ сᲂбо́ри , и҆ а҆́гг҃лъ бжⷭ҇твеннаѧ во́инства . ᲂу҆чени́къ сᲂсло́вїе , ва́шими мᲂли́твами спаса́йте . боⷢ҇ . Раздерѝ плени́цꙋ сᲂгрѣше́нїи , тѧ̀ пᲂю́щихъ бг҃ᲂмт҃и . ᲂу҆ста́ви стремле́нїѧ напа́стей . грѣхо́внꙋю ᲂу҆ти́ши мᲂлвꙋ̀ . бꙋ́рю сᲂкрꙋшѝ бѣда́мъ , мт҃и дв҃о .

<< Previous

Contents

Next >>