МЦⷭ҇А ТОГО́ЖЕ ВЪ Ѳ҃ ДН҃Ь

Ст҃а́гѡ мч҃нка ники́фᲂра . =Въ сі́и де́нь а҆́ще нѣ́сть по́стъ , ѿдава́емъ пра́здникъ . тᲂгда̀ слꙋ́жба мч҃нкꙋ пᲂе́тсѧ на па́вечерницѣ . Ве́черъ , на гдⷭ҇и вᲂзва́хъ , стихѣ́ры . гла́съ , в҃ . поⷣ . є҆гда̀ ѿ́ древа . Зако́нᲂмъ пᲂвинꙋ́ѧсѧ , и҆́же на́съ ра́ди пло́ть на землѝ прїе́мшагѡ , и҆ стра́сть честнꙋ́ю мч҃нче претерпѣ́вшагѡ , бг҃ᲂбл҃же́нне . любо́вь сᲂблю́лъ є҆сѝ , є҆́же ко и҆́скренемꙋ , зако́на глави́знꙋ сꙋ́щꙋ и҆ прᲂро́кᲂмъ . тѣ́мже и҆ бл҃же́ннꙋю кᲂнчи́нꙋ прїѧ́лъ є҆сѝ , и҆сто́чникꙋ любвѝ ны́нѣ , ѽ ники́фᲂре пред̾стᲂѧ̀ . Прекланѧ́еши вы́ю бг҃ᲂви , є҆мꙋ́же всѧ̀ прекланѧ́ютсѧ кᲂлѣ́на , мч҃нче чꙋ́дне . во главꙋ̀ пᲂсѣка́емь , и҆ разлꙋча́емь ѿ до́блѧгѡ твᲂегѡ̀ тѣлесѐ . хрⷭ҇то́ви же всѣ́хъ главѣ̀ сᲂвᲂкꙋплѧ́емь , чистѣ́йшимъ ᲂу҆мо́мъ . є҆мꙋ́же ны́нѣ приближа́ѧсѧ , и҆спрᲂсѝ на́мъ ники́фᲂре , всѣ́мъ прᲂсвѣще́нїе хва́лѧщимъ тѧ̀ . Стрꙋѧ́ми крᲂве́й твᲂи́хъ мꙋ́дре , и҆́же по хрⷭ҇тѣ̀ и҆злїѧ́нᲂмъ , зе́млю ѡ҆ст҃и́лъ є҆сѝ . дх҃ᲂмъ же , дх҃и вᲂз̾весели́лъ є҆сѝ беспло́тныхъ си́лъ . и҆ мч҃нкъ стада̀ ᲂу҆ѧсни́лъ є҆сѝ . с̾ си́ми сᲂє҆динѧ́ѧсѧ бл҃же́нне , ꙗ҆́кѡ до́бль ѻ҆рꙋ́жникъ , ꙗ҆́кѡ пᲂдви́жныи мч҃нкъ , и҆ ѡ҆ на́съ бг҃ᲂви мᲂли́сѧ . =сла́ва . гла́съ , ѕ҃ . Пᲂказа́лъ є҆сѝ всѣ́мъ ꙗ҆́вѣ страда́льче ники́фᲂре , ꙗ҆́кѡ и҆́скреннѧгѡ нелюбѧ́и , ни влⷣкꙋ вᲂз̾люби́ти мо́жетъ . тѣ́мже ᲂу҆́бѡ самᲂгѡ̀ чи́стѣ вᲂз̾люби́лъ є҆сѝ , саприкі́ѧ бли́жнѧго . ѿ сю́дꙋ и҆ к̾бжⷭ҇твеннᲂмꙋ в̾пери́лсѧ є҆сѝ жела́нїю , и҆ дш҃ꙋ свᲂю̀ пᲂлᲂжи́лъ є҆сѝ по хрⷭ҇то́вѣ и҆спᲂвѣ́данїи и҆ вѣ́рѣ . саприкі́й же ѕлᲂимени́тыи , нечи́стꙋ к̾ тебѣ̀ не́нависть стѧжа́въ , ѿмета́тель ꙗ҆ви́сѧ влⷣки хрⷭ҇та̀ . є҆мꙋ́же ны́нѣ ты̀ пред̾стᲂѧ̀ , мᲂлѝ спасти́сѧ дш҃а́мъ на́шимъ . и҆ ны́нѣ , боⷢ҇ . и҆лѝ , крⷭ҇тᲂбоⷢ҇ . поⷣ . всѐ ᲂу҆пᲂва́нїе .= Ѻ҆=рꙋ́жїе ꙗ҆́кᲂже речѐ сѷмеѡ́нъ ,꙳ срⷣце твᲂѐ про́йде пречⷭ҇таѧ влⷣчце .꙳ є҆гда̀ ви́дѣ и҆з̾ тебѐ вᲂз̾сїѧ́вшаго ,꙳ не и҆зрече́ннымъ сло́вᲂмъ ,꙳ без̾зако́нными ꙗ҆́кѡ ѡ҆сꙋжде́нна ,꙳ и҆ на́ крⷭ҇тъ вᲂз̾несе́нна ,꙳ ѻ҆цта́ же и҆ же́лчи вкꙋша́юща ,꙳ ре́бра же и҆скᲂпава́ема ,꙳ рꙋка́ма же и҆ нᲂга́ма пригвᲂжде́на ,꙳ и҆ рыда́ющи вᲂсклица́ше ,꙳ вᲂпїю́щи мт҃рьски .꙳ что́ се ча́до сла́дкᲂе , но́вᲂе та́инство .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , д҃ . Мч҃нкъ тво́й гдⷭ҇и ники́фᲂръ , во страда́нїи свᲂе́мъ вѣне́цъ прїѧ́тъ нетлѣ́нныи , ѿ тебѐ бг҃а на́шегѡ . и҆мѣ́ѧ бо крѣ́пᲂсть твᲂю̀ непᲂбѣди́мꙋю , мꙋ́чащихъ ᲂу҆празднѝ , и҆ разрꙋшѝ бѣсо́мъ немᲂщна́ѧ шата́нїѧ . тᲂгѡ̀ мл҃твами хрⷭ҇тѐ бж҃е , спасѝ дш҃а на́ша .= сла́ва , и҆ ны́нѣ , боⷢ҇ . и҆лѝ , крⷭ҇тᲂбоⷢ҇ .=

Кано́нъ . твᲂре́нїе ѳеѡ́фанᲂво . гла́съ , и҃ . пѣ́снь , а҃ . і҆рмо́съ . Вᲂѡ҆рꙋже́на фараѡ́на пᲂгрꙋзѝ , чꙋдᲂтвᲂрѧ́й дре́вле , мѡѷсе́йскїи же́ѕлъ крⷭ҇тᲂѡ҆бра́знѡ прᲂразѝ , и҆ раздѣлѝ мо́ре . і҆и҃лѧ же бѣжа́ща , пѣ́ша хᲂдѧ́ща спасѐ , пѣ́снь бг҃ᲂви вᲂз̾сыла́юща .

запѣ́въ : Ст҃ы́и мч҃нче ники́фᲂре , мᲂлѝ бг҃а ѡ҆ на́съ . Вᲂз̾двиза́ема жите́йскагѡ мо́рѧ , вᲂлнꙋ́ющьсѧ лю́тѣ , дш҃е́вныи кᲂра́бль , напа́стьми и҆ страстьмѝ , и҆́же смире́нїю вино́вниче , к̾ тишинѣ̀ глꙋбо́цѣй , ꙗ҆́кѡ бл҃гᲂда́тель прелᲂжѝ мч҃нка хрⷭ҇тѐ мᲂльба́ми . Разꙋ́мнᲂю мы́слїю премꙋ́дре , мы́сленѣй дш҃и , гнѣ́ва стра́сть бл҃гᲂче́стнѡ пᲂкᲂри́лъ є҆сѝ . и҆ к̾ бли́жнемꙋ прите́клъ є҆сѝ саприкі́ю , тща́сѧ премѣни́ти чꙋ́дне , зако́нᲂмъ сп҃са пᲂвинꙋ́ѧсѧ . трⷪ҇ченъ . Равнᲂмо́щнꙋю , и҆ є҆динᲂра́сленꙋю и҆ сᲂпрⷭ҇то́льнꙋю , и҆ є҆динᲂсꙋ́щнꙋю , трисїѧ́ннꙋю зарю̀ є҆ди́нᲂгѡ бжⷭ҇тва̀ , и҆спᲂвѣ́дающе чте́мъ в̾ трїе́хъ ли́цѣхъ , нераздѣ́льнѡ прᲂпᲂвѣ́дающе сло́ва со ѻ҆ц҃е́мъ и҆ дх҃ᲂмъ . боⷢ҇ . Оу҆́мъ нбⷭ҇ныи твᲂѐ та́инство непᲂсти́жимᲂе , разꙋмѣ́ти вᲂи́стинꙋ немо́жетъ препѣ́таѧ . ѻ҆ц҃ꙋ бо сᲂпрⷭ҇то́льныи во́ чрево твᲂѐ всели́всѧ , и҆з̾ тебѐ рᲂди́тисѧ бл҃гᲂи҆зво́ли , во двᲂю̀ є҆стествꙋ̀ пᲂзнава́емь .

пѣ́снь , г҃ . і҆рмо́съ . Оу҆тверже́и нб҃са̀ в̾ нача́тцѣ ра́зꙋмᲂмъ , и҆ зе́млю на вᲂда́хъ ѡ҆снᲂва́выи . на ка́мени мѧ хрⷭ҇тѐ цр҃ко́внѣмъ ᲂу҆твердѝ , ꙗ҆́кѡ нѣ́сть ст҃а , па́че тебѐ чл҃кᲂлю́бче . И҆́же вѣнцено́сецъ про́званъ бы́въ , при дѣ́лѣхъ ꙗ҆ви́сѧ пᲂбѣдᲂно́сецъ . пре́лести бо мра́къ , бл҃гᲂда́ти свѣ́тᲂмъ разо́рь ѿгна́лъ є҆́сть зᲂвы̀ , нѣ́сть ст҃ъ па́че тебѐ гдⷭ҇и . Оу҆мерщве́нᲂмꙋ тебѐ ра́ди вѣ́рᲂвавъ влⷣцѣ , свᲂе́ю во́лею к̾ сме́рти притека́еши , самᲂво́льнꙋю є҆гѡ̀ в̾желѣ́въ ме́ртвᲂсть . ꙗ҆́кѡ пᲂбѣдᲂно́сецъ мч҃нкъ , бжⷭ҇твеннᲂю си́лᲂю ᲂу҆крѣплѧ́емь . На землѝ пᲂдви́жникъ , на́ нб҃сѣхъ вѣне́чникъ , ᲂу҆го́дникъ хрⷭ҇то́въ ники́фᲂръ пᲂказа́сѧ ꙗ҆́вѣ . съ беспло́тными чи́нми зᲂвы̀ , нѣ́сть ст҃ъ па́че тебѐ гдⷭ҇и . трⷪ҇ченъ . Ѿ ᲂу҆ма̀ ве́лїѧ , ѻ҆́ч҃ее ᲂу҆стре́мльшеесѧ сло́во , и҆схᲂдѧ́ща же и҆ ст҃а́гѡ дх҃а , прᲂсвѣща́еми вѣ́рнѡ , бг҃ᲂдх҃нᲂве́нными пᲂвелѣ́нїи , и҆спᲂвѣ́даемъ всѝ несᲂзда́ннᲂе є҆ди́но бжⷭ҇тво̀ . боⷢ҇ . Неи҆скꙋсᲂбра́чнѡ ѿ ѻ҆ц҃а первᲂвѣ́чно ро́ждьшасѧ , во́ чревѣ твᲂе́мъ заче́нши дв҃о , пᲂрᲂдила̀ є҆сѝ на́мъ бг҃а в̾кꙋ́пѣ и҆ чл҃ка , в̾ ко́ем̾ждо є҆стествѣ̀ сᲂверше́на нераздѣ́льна .

сѣда́ленъ . гла́съ , а҃ . Багрѧни́цꙋ свᲂи́ми крᲂвьмѝ ѡ҆мᲂчи́лъ є҆сѝ , и҆ се́ю ꙗ҆́кѡ во́инъ ѡ҆дѣ́ѧвсѧ непᲂбѣди́мь . и҆ ꙗ҆́кᲂже ски́петро крⷭ҇тъ держа̀ , вᲂсте́клъ є҆сѝ ѿ землѝ къ нб҃се́мъ ники́фᲂре бл҃же́нне , цр҃ю всѧ́ческихъ пред̾стᲂи́ши . сла́ва да́вшемꙋ тѝ крѣ́пᲂсть . сла́ва вѣнча́вшемꙋ тѧ̀ . сла́ва дѣ́йствꙋющемꙋ тᲂбо́ю всѣ́мъ и҆сцѣле́нїѧ . сла́ва , и҆ ны́нѣ , боⷢ҇ . Рꙋ́цѣ твᲂѝ бжⷭ҇твеннїи , и҆́миже зижди́телѧ нᲂси́ла є҆сѝ дв҃о прест҃а́ѧ , вᲂплᲂще́на бл҃гᲂстїю , прᲂсте́рши ᲂу҆мᲂлѝ є҆гѡ̀ , и҆зба́вити на́съ ѿ напа́стей , и҆ страсте́й и҆ бѣ́дъ , вᲂсхвалѧ́ющїѧ любо́вїю , и҆ вᲂпїю́щїѧ тѝ , сла́ва все́льшемꙋсѧ в̾ тѧ̀ . сла́ва прᲂше́дшемꙋ и҆з̾ тебѐ . сла́ва свᲂбо́ждьшемꙋ на́съ ржⷭ҇тво́мъ твᲂи́мъ . крⷭ҇тᲂбоⷢ҇ . Оу҆зрѣ́вши тѧ̀ хрⷭ҇тѐ , всенепᲂро́чнаѧ мт҃и , ме́ртва на́ древѣ прᲂсте́рта , вᲂпїѧ́ше , сн҃е мо́й сᲂбезнача́льне ѻ҆ц҃ꙋ и҆ дх҃ꙋ , что̀ неи҆згл҃аннᲂе смᲂтре́нїе твᲂѐ сїѐ , и҆́мже спа́слъ є҆сѝ пречⷭ҇тᲂю рꙋ́кꙋ твᲂе́ю ще́дре сᲂзда́нїе .

пѣ́снь , д҃ . і҆рмо́съ . Ты́ ми хрⷭ҇тѐ гдⷭ҇ь , ты́ же и҆ си́ла ми , ты́ ми бг҃ъ , ты́ ми ра́дᲂванїе . не ѡ҆ста́вль нѣ́дра ѻ҆́ч҃а , но ми́лᲂстїю си на́шꙋ нищетꙋ̀ пᲂсѣти́въ . тѣ́мъ съ прᲂро́кѡмъ а҆вва́кꙋмᲂмъ зᲂвꙋ̀ , си́лѣ твᲂе́й сла́ва чл҃кᲂлю́бче . Бжⷭ҇твеннꙋю жи́знь ѽ ники́фᲂре ᲂу҆лꙋчи́лъ є҆сѝ , бжⷭ҇твеннѣй зарѝ бл҃же́нне спᲂдо́бисѧ . бжⷭ҇твеннагѡ свѣ́та свѣтᲂви́днѡ ны́нѣ ѡ҆зарѧ́еши , твᲂрѧ́щимъ па́мѧть твᲂю̀ бг҃ᲂмꙋ́дре , вѣ́рᲂю вᲂпїю́щимъ , си́лѣ твᲂе́й сла́ва чл҃кᲂлю́бче . Сїѧ́еши хрⷭ҇то́вѣмъ мч҃нкѡмъ сᲂвᲂкꙋ́пльсѧ , разᲂри́лъ бо є҆сѝ ле́сть мнᲂгᲂбо́жнꙋю . мече́мъ ᲂу҆сѣ́ченъ бы́въ во главꙋ̀ твᲂю̀ , и҆ кро́вьными тече́нїи твᲂи́ми , всю̀ пᲂтᲂпи́лъ є҆сѝ и҆́дᲂльскꙋю пре́лесть . влⷣцѣ зᲂвѧ̀ , си́лѣ твᲂе́й сла́ва чл҃кᲂлю́бче . И҆́же завѣ́ты твᲂѧ̀ несᲂхра́нь саприкі́й , твᲂеѧ̀ ѡ҆бнажа́етсѧ сп҃се бжⷭ҇твенныѧ бл҃гᲂда́ти . и҆ враго́мъ плещѝ пᲂда́въ , твᲂи́хъ мч҃нкъ лиша́етсѧ сла́вы ѻ҆каѧ́нныи . тѣ́мже твᲂемꙋ̀ пра́веднᲂмꙋ ᲂу҆ди́вльшесѧ прᲂмышле́нїю , зᲂве́мъ , сла́ва си́лѣ твᲂе́й чл҃кᲂлю́бче . трⷪ҇ченъ . Свѣ́тъ ѻ҆ц҃ъ без̾нача́льныи , и҆ всѣ́хъ вино́вникъ . свѣ́тъ сло́во , свѣ́тъ дх҃ъ ст҃ы́и , ѿ ѻ҆ц҃а ꙗ҆́кᲂже ѿ и҆сто́чника , пре́жде всѣ́хъ вѣ́къ ѡ҆зарѧ́ема ли́ца . трисо́лнечнᲂе бжⷭ҇тво̀ , во є҆ди́нᲂмъ сꙋществѣ̀ , и҆ си́лѣ и҆ сла́вѣ пᲂзнава́етсѧ . боⷢ҇ . Всего̀ в̾ тебѣ̀ ѡ҆бнᲂвлѧ́етъ чл҃ка , ве́сь всего̀ пречⷭ҇таѧ сᲂєдинѧ́емь . и҆́же во ѻ҆ч҃ескихъ нѣ́дрѣхъ живы́и , и҆ в̾ твᲂю̀ ᲂу҆тро́бꙋ в̾сели́тисѧ вᲂсхᲂтѣ́въ . и҆́же бᲂга́тствᲂмъ млрⷭ҇дїѧ во́лею ѡ҆бнища́въ , и҆ ѡ҆бᲂга́щь ми́ра бжⷭ҇тво́мъ .

пѣ́снь , є҃ . і҆рмо́съ . Вскꙋ́ю мѧ ѿри́нꙋ , ѿ лица̀ твᲂегѡ̀ свѣ́те незахᲂдѧ́и , пᲂкры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ запᲂвѣде́й ти пꙋтѝ мᲂѧ̀ напра́ви мᲂлю́тисѧ . Тече́нїе твᲂи́хъ крᲂве́й , цр҃ко́вныи ра́й напᲂѝ . ѿлꙋча́емо в̾ нача́ла четверᲂчи́слена бл҃же́нне , дᲂбрᲂдѣ́телей бжⷭ҇твенныхъ . ѿ ни́хже дш҃а́мъ ѽ ники́фᲂре , пᲂчерпа́емъ бжⷭ҇твеннаѧ дарᲂва́нїѧ . Сѣ́ѧтель ѕло́бѣ , ѕлᲂпᲂмнѣ́нїемъ ѻ҆каѧ́ннаго вᲂсхитѝ . бл҃гᲂсти же и҆ ми́рꙋ вино́вникъ , привлечѐ в̾мѣ́стѡ ѻ҆́нᲂгѡ , бжⷭ҇твеннымъ свѣтᲂвидѣ́нїемъ ᲂу҆кра́шена , ники́фᲂра бг҃ᲂмꙋ́драго мч҃нка . Ѡ҆сщ҃а́етсѧ сп҃се . твᲂе́й во́льнѣй стрⷭ҇ти пᲂдо́бѧсѧ . и҆́же бо ѿ ре́бръ твᲂи́хъ бг҃ᲂмꙋ́дрыи ка́плѧми ѡ҆крᲂпле́нъ , свᲂи́хъ крᲂве́й тебѣ̀ ка́пли принᲂша́етъ , мече́мъ пᲂсѣка́емь , к̾ тебѣ̀ грѧды́и . трⷪ҇ченъ . Спасе́нїѧ ѡ҆снᲂва́нїе правᲂсла́вїе вѣ́дꙋще , сᲂбезнача́льна ѻ҆ц҃ꙋ сло́ва , и҆ ст҃а́гѡ дх҃а , прᲂпᲂвѣ́даемъ в̾ трїе́хъ ли́цѣхъ , є҆ди́но нача́ло , є҆ди́но сꙋщество̀ , є҆ди́нꙋ во́лю , є҆ди́но дѣ́йство . боⷢ҇ . Мы́слено наꙋчи́сѧ прⷪ҇ркъ сᲂсло́вїе , твᲂи́мъ та́йнамъ . нб҃се́ бо две́рь на землѝ влⷣка тѧ̀ пᲂказа̀ . и҆ и҆з̾ тебѐ дв҃о вᲂпло́щьсѧ пра́веднᲂе сл҃нце , сꙋ́щимъ во тмѣ̀ вᲂсїѧ̀ .

пѣ́снь , ѕ҃ . і҆рмо́съ . Бе́здна грѣхо́внаѧ и҆ прегрѣше́нїи бꙋ́рѧ мѧ смꙋща́етъ , и҆ во глꙋбинꙋ̀ нꙋ́жнꙋю рѣ́етъ ѿча́ѧнїѧ , но са́мъ крѣ́пкꙋю рꙋ́кꙋ ми прᲂстрѝ ꙗ҆́кѡ петро́ви , и҆ ѿ тлѝ бж҃е мо́й вᲂз̾веди́ мѧ . И҆сцѣлѝ сᲂкрꙋше́нїе дш҃и мᲂеѧ̀ , ники́фᲂре бг҃ᲂмꙋ́дре , и҆ страсте́й ѡ҆мраче́нїе разо́рь , ѿженѝ зарѧ́ми и҆́же в̾ тебѣ̀ бжⷭ҇твенныѧ свѣ́тлᲂсти , мᲂлѧ̀ и҆зба́вителѧ хрⷭ҇та̀ бл҃же́нне . Бꙋ́рю и҆́дᲂльскагѡ тревᲂлне́нїѧ страда́льче ники́фᲂре , крⷭ҇тнымъ вѣ́трилᲂмъ и҆ дыха́нїи дх҃о́вными , ти́хо преплꙋ́въ мч҃нче непᲂбѣди́ме , в̾ приста́нище ти́хᲂе хрⷭ҇то́во дᲂсти́глъ є҆сѝ . Пᲂстрада̀ мч҃нчески , и҆ вᲂи́стинꙋ пᲂбѣдᲂно́сецъ бы́сть . кᲂва́рствїѧ бл҃гᲂмо́щнѡ разо́рь ѕмі́ева , и҆ страсте́мъ ꙗ҆́кѡ ѻ҆́бщникъ бл҃же́нне бы́въ влⷣки . ны́нѣ по дᲂстᲂѧ́нїю с̾прᲂсла́висѧ . боⷢ҇ . Оу҆жаса́ютсѧ мы́сленїи а҆́гг҃льстїи чи́ни дивѧ́щесѧ , и҆́же со ѻ҆ц҃е́мъ сꙋ́щаго пре́жде вѣ́къ и҆ дх҃ᲂмъ , ѿ ᲂу҆тро́бы твᲂеѧ̀ пло́тїю младе́нца ражда́ема зрѧ́ще , бг҃ᲂрᲂди́тельнице пречⷭ҇таѧ .

кᲂнда́къ . гла́съ , г҃ . Вᲂз̾вы́сивсѧ сла́вне гдⷭ҇нею любо́вїю , и҆ тᲂгѡ̀ чⷭ҇тны́и крⷭ҇тъ на ра́мо взе́мъ , пᲂсрами́лъ є҆сѝ ко́зни дїѧ́вᲂлѧ , пᲂстрада́лъ є҆сѝ да́же до сме́рти , и҆ и҆́стинныи ꙗ҆ви́сѧ пᲂбѣдᲂно́сецъ ники́фᲂре . и҆ ѻ҆рꙋ́жникъ хра́бръ , и҆ таи́нникъ бж҃їѧ бл҃гᲂда́ти . и҆́кᲂсъ . Па́влᲂво ꙗ҆́вѣ ᲂу҆че́нїе вᲂз̾люби́лъ є҆сѝ , и҆ в̾ пе́рсехъ твᲂи́хъ сла́вне насади́лъ є҆сѝ вᲂпїѧ̀ , любо́вь не ѕлᲂѡ҆бразꙋ́етсѧ . сїѧ̀ зижди́телѧ чл҃ка съверше́на на́мъ дарᲂва̀ . любвѐ ра́ди всѐ претерпѣ̀ , гво́здїе и҆ крⷭ҇тъ , ѻ҆це́тъ и҆ ѡ҆плева́нїѧ . кᲂпїе́мъ прᲂбᲂде́нъ бы́сть в̾ ре́бра ст҃а́ѧ , и҆́миже и҆стᲂчѝ на́мъ кро́вь и҆ во́дꙋ бг҃ᲂдѣ́льно . є҆го́же в̾желѣ́въ , ꙗ҆ви́лсѧ є҆сѝ пᲂбѣдᲂно́сецъ зва́нїемъ , ѻ҆рꙋ́жникъ и҆ таи́нникъ бж҃їѧ бл҃гᲂда́ти .

пѣ́снь , з҃ . і҆рмо́съ . Бж҃їѧ схᲂжде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ дре́вле . сего̀ ра́ди ѻ҆́трᲂцы , в̾ пещѝ ра́дᲂваннᲂю нᲂго́ю , ꙗ҆́кѡ во́ свѣтѣ ликᲂва́хꙋ пᲂю́ще , бл҃гᲂслᲂве́нъ бг҃ъ ѻ҆ц҃ъ на́шихъ . Без̾сме́ртно бы́сть тебѣ̀ ники́фᲂре ѿше́ствїе , є҆́же ѿ сꙋ́щихъ здѣ̀ бл҃же́нне . к̾ нб҃си́ же и҆ на нбⷭ҇наѧ вᲂз̾ше́лъ є҆сѝ ны́нѣ ликꙋ́ѧ , со а҆́гг҃лы пᲂе́ши , бл҃гᲂслᲂве́нъ бг҃ъ ѻ҆ц҃ъ на́шихъ . Оу҆крѣплѧ́емь страстьмѝ вседержи́телѧ , не́мᲂщи превᲂз̾выше́нᲂе ѻ҆́ко , и҆ превзѧ́тꙋю кро́вь низ̾ве́рглъ є҆сѝ на́ землю бг҃ᲂмꙋ́дре . в̾зыва́ѧ сᲂзда́вшемꙋ , бл҃гᲂслᲂве́нъ бг҃ъ ѻ҆ц҃ъ на́шихъ . Въ пꙋ́ть свидѣ́нїи твᲂи́хъ ники́фᲂръ текі́и про́йде , разши́ривъ срⷣце , дѣ́йствᲂмъ бжⷭ҇твеннагѡ дх҃а . нн҃ѣ ᲂу҆се́рднѡ в̾зыва́етъ тѝ влⷣко , бл҃гᲂслᲂве́нъ бг҃ъ ѻ҆ц҃ъ на́шихъ . трⷪ҇ченъ . Оу҆ма̀ пе́рваго и҆ без̾нача́льнаго , ро́ждьшаго сло́во сᲂбезнача́льнᲂе , без̾стра́стно и҆ без̾лѣ́тно , и҆ прᲂизве́дша ст҃а́го дх҃а , тѧ̀ ѻ҆ц҃а вѣ́дꙋще в̾зыва́емъ , бл҃гᲂслᲂве́нъ бг҃ъ ѻ҆ц҃ъ на́шихъ . боⷢ҇ . Во ѡ҆бᲂи́хъ бы́сть , дв҃а и҆ мт҃и бг҃ᲂрᲂди́тельнице чⷭ҇таѧ , во ᲂу҆тро́бѣ заче́нши бг҃а несказа́ннѡ , и҆з̾ тебѐ вᲂплᲂща́ема . в̾ кᲂе́мъждо зра́цѣ пᲂзнава́ема , бг҃ᲂмꙋ́жно на землѝ пᲂжи́вша .

пѣ́снь , и҃ . і҆рмо́съ . Се́дмь седми́цею пе́щь , халдѣ́йскїи мꙋчи́тель , бг҃ᲂчести́вымъ лю́тѣ раз̾жжѐ . си́лᲂю же лꙋ́чшею спасе́ныхъ ви́дѣвъ , твᲂрцꙋ̀ и҆ и҆зба́вителю вᲂпїѧ́ше , дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки . Зна́менавсѧ бл҃гᲂда́тїю сп҃са , самᲂзва́нъ ты̀ к̾ пᲂдвиго́мъ мꙋ́жески ѿлꙋчи́сѧ . и҆ пᲂбѣ́дꙋ взе́мъ на сꙋпрᲂти́вныѧ мч҃нче хрⷭ҇то́въ , пᲂбѣ́дными ᲂу҆краси́сѧ вѣнцы̀ . бжⷭ҇твенѣ вᲂспѣва́ѧ , сщ҃е́ннїи бл҃гᲂслᲂви́те , лю́дїе превᲂзнᲂси́те є҆гѡ̀ во́ вѣки . Ѡ҆сщ҃ьсѧ вᲂдо́ю ники́фᲂре и҆ дх҃ᲂмъ , и҆ мч҃нческими ѡ҆багре́нъ крᲂвьмѝ , стѧжа̀ ꙗ҆́кѡ мч҃нкъ и҆́стинныи хрⷭ҇та̀ бг҃а , свѣтᲂви́днꙋю свѣ́тлᲂсть пребл҃же́нне . в̾не́й же ны́нѣ в̾зыва́еши , сщ҃е́ннїи бл҃гᲂслᲂви́те , лю́дїе превᲂзнᲂси́те є҆гѡ̀ во́ вѣки . трⷪ҇ченъ . Со беспло́тными чи́нми , въ трїе́хъ сᲂста́вѣхъ , є҆ди́нъ бл҃гᲂсти и҆сто́чникъ непреста́нныи , нерᲂжде́но без̾нача́льно , вы́ше кᲂнца̀ бжⷭ҇тво̀ , и҆ сᲂдѣ́тельнᲂе и҆ цр҃ѧ всѣ́мъ , дѣ́ти бл҃гᲂслᲂви́те , сщ҃е́ннїи вᲂспо́йте , лю́дїе превᲂзнᲂси́те є҆гѡ̀ во́ вѣки . боⷢ҇ . Ст҃ѣ́йши бы́сть бцⷣе всепѣ́таѧ , преми́рныхъ а҆́гг҃льскихъ чино́въ . си́хъ бо рᲂдила̀ є҆сѝ сᲂдѣ́телѧ и҆ бг҃а , ѿ дв҃ьствена неи҆скꙋсᲂбра́чна чре́ва , во двᲂю̀ сꙋществꙋ̀ неслїѧ́нно непрело́жно , во є҆ди́нъ сᲂста́въ бг҃а вᲂплᲂще́на .

пѣ́снь , ѳ҃ . і҆рмо́съ . Оу҆диви́сѧ ᲂу҆́бѡ ѡ҆ се́мъ не́бо , и҆ землѝ ᲂу҆жасо́шасѧ кᲂнцы̀ , ꙗ҆́кѡ бг҃ъ ꙗ҆ви́сѧ чл҃кѡмъ пло́тїю , чре́во же твᲂѐ бы́сть прᲂстра́ннѣе нб҃съ , тѣ́мъ тѧ̀ бцⷣе , а҆́гг҃лъ и҆ чл҃къ чинᲂнача́лїѧ велича́емъ . Преста́висѧ ꙗ҆́кѡ жени́хъ ᲂу҆кра́шьсѧ , ѻ҆де́ждами и҆стка́нными ѿ кро́ве мꙋче́нїѧ , ко прїѧ́тїю ᲂу҆кра́ш̾шагᲂсѧ кро́вїю . и҆ ᲂу҆до́брившасѧ на крⷭ҇тѣ̀ стра́стїю честно́ю всѣ́хъ бл҃гᲂда́телѧ , ѽ ники́фᲂре пребл҃же́нне . Привлече́сѧ влⷣки дᲂбро́тами , и҆́хже ничто́же краснѣ́е сла́вне . и҆ тᲂгѡ̀ тща́сѧ наслади́тисѧ , непреста́нныѧ и҆ бг҃ᲂлѣ́пныѧ свѣ́тлᲂсти , мече́мъ во главꙋ̀ ᲂу҆сѣ́ченъ бы́въ . пᲂсрами́лъ є҆сѝ мꙋчи́телѧ , раз̾жига́емь любо́вїю , ѽ ники́фᲂре гдⷭ҇а свᲂегѡ̀ . Свѣ́тлѡ на́лесть мч҃нче хрⷭ҇то́въ до́блествᲂвавъ . и҆ сїю̀ пᲂбѣ́ждь , ꙗ҆́кѡ пᲂбѣди́тель вѣне́цъ прїѧ́тъ свᲂе́й главѣ̀ , дарᲂва́нїемъ сла́вне . и҆ нн҃ѣ ликꙋ́еши мч҃нчески , съ мч҃нческими ли́ки , пребл҃же́нне ники́фᲂре , ᲂу҆ прⷭ҇то́ла всѣ́хъ цр҃ѧ . трⷪ҇ченъ . Ѻ҆ц҃а нерᲂжде́нна , бг҃ᲂлѣ́пно сн҃а рᲂжде́нна сла́вѧще , и҆ пра́выи дх҃ъ пре́жде вѣ́къ и҆схо́дныи . трѝ сᲂста́вы чте́мъ , пресꙋ́щныѧ и҆ нача́льныѧ трⷪ҇цы , сᲂєдине́нїемъ неслїѧ́ннᲂмъ , бг҃ᲂсло́вѧще велича́емъ . боⷢ҇ . Ꙗ҆ви́сѧ ѽ дв҃о мт҃и бж҃їѧ , вы́ше є҆стества̀ ро́ждьши пло́тїю бл҃го́е сло́во . є҆го́же ѻ҆ц҃ъ ѿры́гнꙋ ѿ́ срⷣца свᲂегѡ̀ , пре́жде всѣ́хъ вѣ́къ ꙗ҆́кѡ бл҃гъ . є҆го́же ны́нѣ и҆ тѣле́съ превы́шша разꙋмѣва́емъ , а҆́ще и҆ в̾ пло́ть ѡ҆дѣ́ѧсѧ .

свѣти́лен̾ . Тезᲂи҆мени́тъ пᲂказа́сѧ пᲂбѣ́дѣ ѽ ники́фᲂре , любо́вїю и҆ мꙋче́нїемъ пᲂбѣ́ждь мꙋчи́телѧ . тѣ́мже и҆ пᲂбѣ́дѣ вѣне́цъ прїѧ́тъ ѿ гдⷭ҇а . боⷢ҇ . Держа́внымъ сѝ пᲂкро́вᲂмъ , ѿ враго́въ навѣ́та , на́съ чⷭ҇таѧ твᲂѧ̀ рабы̀ сᲂхранѧ́й всѧ̀ невреди́мы . тѧ́бо стѧжа́хᲂмъ , є҆ди́нꙋ прибѣ́жище в̾ нꙋ́ждахъ .

Оу҆ка́зъ ѡ҆ ѿда́нїи пра́здника срѣ́тенїѧ гдⷭ҇нѧ , кᲂгда̀ прилꙋчи́тсѧ ѿда́нїе є҆гѡ̀ . пᲂдᲂба́етъ вѣ́дати . А҆́ще прилꙋчи́тсѧ ѿда́нїе срѣ́тенїѧ пре́жде нлⷣи мытарѧ̀ и҆ фарисе́ѧ в̾ седми́цѣ в̾ ко́й ли́бо де́нь , крᲂмѣ̀ нлⷣи . ве́черъ , по ѻ҆бы́чнᲂй каѳи́смѣ , на гдⷭ҇и вᲂзва́хъ , стⷯры , пра́здникꙋ , на́ ѕ҃ , и҆́хже пѣ́хᲂмъ на са́мыи пра́здникъ . сла́ва , и҆ ны́нѣ , пра́здникꙋ , самᲂгла́сенъ . Прᲂки́менъ дню̀ . вы́хᲂда , и҆ чте́нїѧ нѣ́сть . На стихо́внѣ , стⷯры , пра́здникꙋ , со стихѝ и҆́хъ . сла́ва , и҆ ны́нѣ , пра́здникꙋ . По трⷭ҇то́мъ , трᲂпа́рь пра́здникꙋ . та́же , є҆ктенїѧ̀ . и҆ ѿпꙋ́стъ . На па́вечерницѣ по трⷭ҇то́мъ , кᲂнда́къ пра́здникꙋ . пᲂлꙋ́нᲂщницꙋ пᲂе́мъ по ѻ҆бы́чаю , с̾ каѳи́смᲂю , и҆ с̾ трᲂпарѝ ѻ҆бы́чными . на ᲂу҆́трени на бг҃ъ гдⷭ҇ь , трᲂпа́рь , пра́здникꙋ , три́жды . по ѻ҆бᲂи́хъ , каѳи́смахъ , сѣда́льны , пра́здникꙋ . кано́нъ пра́здникꙋ , со і҆рмᲂсо́мъ на д҃і . і҆рмо́съ , по два́жды . Катава́сїѧ , то́йже і҆рмо́съ . по г҃ й , пѣ́сни : сѣда́ленъ , пра́здникꙋ , два́жды . по ѕ҃ й , пѣ́сни : кᲂнда́къ , и҆ и҆́кᲂсъ , пра́здникꙋ . на ѳ҃ й , пѣ́сни : чⷭ҇тнѣ́йшꙋ не пᲂе́мъ . но пᲂе́мъ припѣ́вы пра́здникꙋ , ꙗ҆́кᲂже и҆ на са́мыи пра́здникъ . Свѣти́ленъ , пра́здникꙋ , два́жды . На хвали́тѣхъ , стихѣ́ры , пра́здникꙋ , на д҃ . сла́ва , и҆ ны́нѣ , пра́здникꙋ . Славᲂсло́вїе вели́кᲂе . по трⷭ҇то́мъ , трᲂпа́рь пра́здникꙋ , аⷤ . та́же , ѻ҆́бѣ є҆ктенїѝ . и҆ ѿпꙋ́стъ . и҆ ча́съ , а҃ й . на часѣ́хъ : трᲂпа́рь , и҆ кᲂнда́къ , пра́здникꙋ . на литꙋргі́и , бл҃же́нна , пѣ́снь , ѳ҃ ѧ . со і҆рмᲂсо́мъ на́ ѕ҃ . по вхо́дѣ : трᲂпа́рь пра́здникꙋ . сла́ва , и҆ ны́нѣ . кᲂнда́къ , пра́здникꙋ . прᲂки́менъ , и҆ а҆ллилꙋ́їѧ , и҆ прича́стенъ , пра́здникꙋ . а҆пⷭ҇лъ , и҆ є҆ѵⷢ҇а́лїе дню̀ . Ст҃а́гѡ же прилꙋчи́вшагᲂсѧ пᲂе́мъ слꙋ́жбꙋ на па́вечерницѣ . и҆лѝ ка́кѡ настᲂѧ́тель и҆зво́литъ .

А҆́ще ли прилꙋчи́тсѧ ѿда́нїе пра́здника срѣ́тенїѧ гдⷭ҇нѧ в̾ нлⷣю , пре́жде нлⷣи мытарѧ̀ и҆ фарисе́ѧ . въ сꙋбо́тꙋ , ве́черъ , на ма́лѣй вече́рни , стихѣ́ры , вᲂскрⷭ҇ны , д҃ . На стихо́внѣ , стихѣ́ра , вᲂскрⷭ҇на є҆ди́на . и҆ пра́здникꙋ , стихо́вна вели́кїѧ вече́рни , со стихѝ свᲂи́ми . сла́ва , и҆ ны́нѣ , боⷢ҇ , ѿ стихо́вны ма́лыѧ вече́рни гла́сꙋ . трᲂпа́рь , вᲂскрⷭ҇нъ . сла́ва , и҆ ны́нѣ , пра́здникꙋ . На вели́цѣй вече́рни , по ѱалмѣ̀ пᲂе́мъ : бл҃же́нъ мꙋ́жь , каѳи́сма всѧ̀ . на гдⷭ҇и вᲂзва́хъ , стихѣ́ры вᲂскрⷭ҇ны , г҃ . и҆ вᲂсто́ченъ , є҆ди́нъ . и҆ пра́здникꙋ , ѕ҃ , и҆́хже пѣ́хᲂмъ на са́мыи пра́здникъ . сла́ва , пра́здникꙋ . и҆ ны́нѣ , боⷢ҇ , а҃ гла́сꙋ . На литі́и стихѣ́ры , пра́здникꙋ . сла́ва , и҆ ны́нѣ , пра́здникꙋ . На стихо́внѣ , стихѣ́ры , вᲂскрⷭ҇ны . сла́ва , и҆ ны́нѣ , пра́здникꙋ . На бл҃гᲂслᲂве́нїе хлѣ́бᲂмъ , трᲂпа́рь , бцⷣе дв҃о , двⷤа . и҆ пра́здникꙋ , аⷤ . на ᲂу҆́трени на бг҃ъ гдⷭ҇ь , трᲂпа́рь , вᲂскрⷭ҇нъ , двⷤа . сла́ва , и҆ ны́нѣ , пра́здникꙋ . каѳи́смы ѡ҆бы́чны и҆ по ни́хъ сѣда́льны вᲂскрⷭ҇ны , и҆ боⷢ҇ , и҆́хъ . по непᲂро́чнахъ , трᲂпарѝ и҆́хъ , и҆ ѵ҆пако́й , гла́сꙋ . степе́нна , гла́сꙋ . прᲂки́менъ . и҆ всѧ́ко дыха́нїе . є҆ѵⷢ҇а́лїе , вᲂскрⷭ҇но . и҆ вᲂскрⷭ҇нїе хрⷭ҇то́во . ѱл҃о́мъ , н҃ . и҆ стⷯра , вᲂскрⷭ҇на . кано́нъ вᲂскрⷭ҇нъ , со і҆рмᲂсо́мъ , на д҃ . и҆ бцⷣѣ , на́ в҃ . и҆ пра́здникꙋ , на и҃ . катава́сїѧ пра́здникꙋ . по г҃ й , пѣ́сни : кᲂнда́къ , и҆ и҆́кᲂсъ , пра́здникꙋ . сѣда́ленъ , пра́здникꙋ , два́жды . по ѕ҃ й , пѣ́сни : кᲂнда́къ , и҆ и҆́кᲂсъ , вᲂскрⷭ҇нъ . на ѳ҃ й , пѣ́сни : пᲂе́мъ чⷭ҇тнѣ́йшꙋ . Свѣти́ленъ , вᲂскрⷭ҇нъ . сла́ва , и҆ ны́нѣ , пра́здникꙋ . На хвали́тѣхъ , стихѣ́ры , вᲂскрⷭ҇ны д҃ . и҆ пра́здникꙋ , со сла́внымъ на д҃ , со стихѝ пра́здничными . Сла́ва , стⷯра , є҆ѵⷢ҇а́льскаѧ . и҆ ны́нѣ , пребл҃гᲂслᲂве́на є҆сѝ бцⷣе . Славᲂсло́вїе вели́кᲂе . трᲂпа́рь вᲂскрⷭ҇нъ , то́чїю . є҆ктенїѝ . и҆ ѿпꙋ́стъ . и҆ ча́съ , а҃ . на а҃ мъ часѣ̀ : трᲂпа́рь , вᲂскрⷭ҇нъ . сла́ва , пра́здникꙋ . кᲂнда́къ , вᲂскрⷭ҇нъ . и҆ кᲂне́чныи ѿпꙋ́стъ . на г҃ мъ часѣ̀ : трᲂпа́рь , вᲂскрⷭ҇нъ . сла́ва , пра́здникꙋ . кᲂнда́къ , пра́здникꙋ . на ѕ҃ мъ часѣ̀ : трᲂпа́рь , вᲂскрⷭ҇нъ . сла́ва , пра́здникꙋ . кᲂнда́къ , вᲂскрⷭ҇нъ . на ѳ҃ мъ часѣ̀ : трᲂпа́рь , вᲂскрⷭ҇нъ . сла́ва , пра́здникꙋ . кᲂнда́къ , пра́здникꙋ .

на литꙋргі́и , бл҃же́нна , гла́сꙋ , на́ ѕ҃ . и҆ пра́здникꙋ , пѣ́снь , ѳ҃ ѧ , на д҃ . по вхо́дѣ : трᲂпа́рь , вᲂскрⷭ҇нъ . и҆ пра́здникꙋ . сла́ва , кᲂнда́къ , вᲂскрⷭ҇нъ . и҆ ны́нѣ , кᲂнда́къ , пра́здникꙋ . прᲂки́менъ , гла́сꙋ , и҆ пра́здникꙋ . а҆пⷭ҇лъ , и҆ є҆ѵⷢ҇а́лїе , дню̀ . прича́стенъ , хвали́те гдⷭ҇а с̾ нб҃съ . дрꙋгі́и , пра́здникꙋ .

Прилꙋчи́вшагᲂжесѧ ст҃а́гѡ и҆́же на рѧдꙋ̀ в̾ сїю̀ нлⷣю слꙋ́жбꙋ , пᲂе́мъ на па́вечерницѣ . и҆лѝ ка́кѡ настᲂѧ́тель и҆зво́литъ .

Оу҆ка́зъ ѡ҆ пра́здницѣ срѣ́тенїѧ гдⷭ҇нѧ , а҆́ще в̾ ко́й де́нь срѣ́тенїе бꙋ́детъ , и҆лѝ в̾ ко́й де́нь прилꙋчи́тсѧ ѿда́нїе є҆гѡ̀ . А҆́ще ли пра́здникъ срѣ́тенїѧ прилꙋчи́тсѧ в̾ нлⷣю блꙋ́днагѡ , и҆лѝ в̾ пнⷣе , и҆лѝ вто́рник̾ , мѧсᲂпꙋ́стныѧ нлⷣи , и҆ ѿдае́тсѧ , пра́здникъ , в̾ пѧто́к̾ , тᲂѧ́же нлⷣи . А҆́ще ли срѣ́тенїе гдⷭ҇не в̾ сре́дꙋ , и҆лѝ в̾ четверто́к̾ , и҆лѝ в̾ пѧто́к̾ , и҆лѝ в̾ сꙋбо́тꙋ мѧсᲂпꙋ́стныѧ нлⷣи , и҆ ѿдае́тсѧ во вто́рникъ , сы́рныи . А҆́ще ли срѣ́тенїе гдⷭ҇не в̾ нлⷣю мѧсᲂпꙋ́стнꙋю , и҆лѝ в̾ пнⷣе , сы́рныи , и҆ ѿдае́тсѧ в̾ четверто́к̾ , тᲂѧ́же нлⷣи . А҆́ще ли срѣ́тенїе гдⷭ҇не во вто́рник̾ , и҆лѝ в̾ сре́дꙋ , сы́рныи . и҆ ѿдае́тсѧ , в̾ сꙋбо́тꙋ , тᲂѧ́же нлⷣи . А҆́ще ли срѣ́тенїе гдⷭ҇не в̾ четверто́к̾ , сы́рныи , и҆лѝ в̾ пѧто́к̾ , и҆лѝ в̾ сꙋбо́тꙋ , и҆ ѿдае́тсѧ в̾ нлⷣю сырᲂпꙋ́стнꙋю . А҆́ще ли срѣ́тенїе гдⷭ҇не бꙋ́детъ , в̾ нлⷣю сырᲂпꙋ́стнꙋю , и҆лѝ в̾ пнⷣе , а҃ ѧ , нлⷣи пᲂста̀ . то̀ пра́зднꙋемъ є҆ди́нъ де́нь .

А҆́ще прилꙋчи́тсѧ ѿда́нїе срѣ́тенїѧ гдⷭ҇нѧ , в̾ нлⷣю фарисе́ѡвꙋ , и҆лѝ блꙋ́днагѡ , и҆лѝ сырᲂпꙋ́стнꙋю . въ сꙋбо́тꙋ , ве́черъ , на ма́лѣй вече́рни , стихѣ́ры , вᲂскрⷭ҇ны , д҃ . На стихо́внѣ , стихѣ́ра , вᲂскрⷭ҇на є҆ди́на . и҆ пра́здникꙋ , стихо́вна вели́кїѧ вече́рни , со стихѝ свᲂи́ми . сла́ва , и҆ ны́нѣ , боⷢ҇ , ѿ стихо́вны ма́лыѧ вече́рни гла́сꙋ . трᲂпа́рь , вᲂскрⷭ҇нъ . сла́ва , и҆ ны́нѣ , пра́здникꙋ . На вели́цѣй вече́рни , по ѱалмѣ̀ пᲂе́мъ : бл҃же́нъ мꙋ́жь , каѳи́сма всѧ̀ . на гдⷭ҇и вᲂзва́хъ , стихѣ́ры вᲂскрⷭ҇ны , г҃ . и҆ в̾ трїѡ́ди , г҃ . и҆ пра́здникꙋ со сла́внымъ , д҃ . сла́ва , в̾ трїѡ́ди . и҆ ны́нѣ , боⷢ҇ , а҃ гла́сꙋ . На литі́и стихѣ́ры , пра́здникꙋ . и҆ в̾ трїѡ́ди , є҆́же на хвали́тѣхъ , крᲂмѣ̀ сла́вна . сла́ва , в̾ трїѡ́ди . и҆ ны́нѣ , пра́здникꙋ . На стихо́внѣ , стихѣ́ры , вᲂскрⷭ҇ны . сла́ва , в̾ трїѡ́ди . и҆ ны́нѣ , пра́здникꙋ . На бл҃гᲂслᲂве́нїе хлѣ́бᲂмъ , трᲂпа́рь , бцⷣе дв҃о , двⷤа . и҆ пра́здникꙋ , аⷤ . на ᲂу҆́трени на бг҃ъ гдⷭ҇ь , трᲂпа́рь , вᲂскрⷭ҇нъ , вⷤ . сла́ва , и҆ ны́нѣ , пра́здникꙋ . каѳи́смы ѡ҆бы́чны и҆ по ни́хъ сѣда́льны вᲂскрⷭ҇ны , и҆ боⷢ҇ , и҆́хъ . по непᲂро́чнахъ , трᲂпарѝ и҆́хъ , и҆ ѵ҆пако́й , гла́сꙋ . пᲂе́мъ ѱл҃о́мъ , хвали́те и҆́мѧ гдⷭ҇не . и҆ дрꙋгі́и ѱл҃о́мъ , и҆спᲂвѣ́дайтесѧ гдⷭ҇ви . а҆́ще ли нлⷣѧ блꙋ́днагѡ и҆ сырᲂпꙋ́стнаѧ , то̀ пᲂе́мъ , и҆ г҃ й , ѱл҃о́мъ , на рѣцѣ̀ вавилѡ́нстѣй , со а҆ллилꙋ́їею кра́снᲂю . степе́нна , гла́сꙋ . прᲂки́менъ . и҆ всѧ́ко дыха́нїе . є҆ѵⷢ҇а́лїе , вᲂскрⷭ҇но . и҆ про́чее вᲂскрⷭ҇но и҆ до кано́на . кано́нъ вᲂскрⷭ҇нъ , со і҆рмᲂсо́мъ , на д҃ . и҆ в̾ трїѡ́ди , на д҃ . и҆ пра́здникꙋ , на́ ѕ҃ . катава́сїѧ пра́здникꙋ . по г҃ й , пѣ́сни : кᲂнда́къ , и҆ и҆́кᲂсъ , в̾ трїѡ́ди . и҆ пра́здникꙋ . сѣда́ленъ , в̾ трїѡ́ди . сла́ва , и҆ ны́нѣ , пра́здникꙋ . по ѕ҃ й , пѣ́сни : кᲂнда́къ , и҆ и҆́кᲂсъ , вᲂскрⷭ҇нъ . на ѳ҃ й , пѣ́сни : пᲂе́мъ чⷭ҇тнѣ́йшꙋ . Свѣти́ленъ , вᲂскрⷭ҇нъ . сла́ва , в̾ трїѡ́ди . и҆ ны́нѣ , пра́здникꙋ . На хвали́тѣхъ , стⷯры , вᲂскрⷭ҇ны , д҃ . и҆ пра́здникꙋ , со сла́внымъ на д҃ , со стихѝ пра́здничными . сла́ва , в̾ трїѡ́ди . и҆ ны́нѣ , пребл҃гᲂслᲂве́на є҆сѝ бцⷣе . а҆́ще ли нлⷣѧ сырᲂпꙋ́стнаѧ , и҆ по внегда̀ рещѝ стихѝ пра́здникꙋ , гл҃емъ сти́хъ : вᲂскрⷭ҇нѝ гдⷭ҇и бж҃е мо́й . и҆ пᲂе́мъ , стⷯрꙋ , и҆́же в̾ трїѡ́ди дню̀ . сла́ва , тꙋ́же . и҆ ны́нѣ , пребл҃гᲂслᲂве́на є҆сѝ бцⷣе . Славᲂсло́вїе вели́кᲂе . трᲂпа́рь вᲂскрⷭ҇нъ , то́чїю . є҆ктенїѝ . и҆ ѿпꙋ́стъ . сла́ва , и҆ ны́нѣ . стихѣ́ра , є҆ѵⷢ҇а́льскаѧ . и҆ ча́съ , а҃ . на а҃ мъ часѣ̀ : трᲂпа́рь , вᲂскрⷭ҇нъ . сла́ва , пра́здникꙋ . кᲂнда́къ , вᲂскрⷭ҇нъ . и҆ кᲂне́чныи ѿпꙋ́стъ . на г҃ мъ часѣ̀ : трᲂпа́рь , вᲂскрⷭ҇нъ . сла́ва , пра́здникꙋ . кᲂнда́къ , пра́здникꙋ . на ѕ҃ мъ часѣ̀ : трᲂпа́рь , вᲂскрⷭ҇нъ . сла́ва , пра́здникꙋ . кᲂнда́къ , в̾ трїѡ́ди . на ѳ҃ мъ часѣ̀ : трᲂпа́рь , вᲂскрⷭ҇нъ . сла́ва , пра́здникꙋ . кᲂнда́къ , вᲂскрⷭ҇нъ .

на литꙋргі́и , бл҃же́нна , гла́сꙋ , на́ ѕ҃ . и҆ пра́здникꙋ , пѣ́снь ѳ҃ ѧ , на д҃ .= а҆́ще ли нлⷣѧ сырᲂпꙋ́стнаѧ , б=л҃же́нна , гла́сꙋ , на д҃ . и҆ в̾ трїѡ́ди , пѣ́снь , г҃ ѧ , на д҃ . и҆ пра́здникꙋ , пѣ́снь , ѳ҃ ѧ , на д҃ . по вхо́дѣ : трᲂпа́рь , вᲂскрⷭ҇нъ . и҆ пра́здникꙋ . кᲂнда́къ , вᲂскрⷭ҇нъ . сла́ва , в̾ трїѡ́ди . и҆ ны́нѣ , кᲂнда́къ , пра́здникꙋ . прᲂки́менъ , гла́сꙋ , и҆ пра́здникꙋ . а҆пⷭ҇лъ , и҆ є҆ѵⷢ҇а́лїе , дню̀ . прича́стенъ , хвали́те гдⷭ҇а с̾ нб҃съ . дрꙋгі́и , пра́здникꙋ .

=в̾ =сꙋбо́тꙋ ᲂу҆́бѡ мѧсᲂпꙋ́стнꙋю ѿда́нїе срѣ́тенїѧ небыва́етъ . та́кᲂже и҆ в̾ нлⷣю мѧсᲂпꙋ́стнꙋю .

А҆́ще ли ѿда́нїе срѣ́тенїѧ гдⷭ҇нѧ , во вто́рник̾ , и҆лѝ в̾ четверто́к̾ , сы́рныѧ нлⷣи , и҆ пᲂе́мъ си́це : ве́чер̾ , по ѻ҆бы́чнᲂй каѳи́смѣ , на гдⷭ҇и вᲂзва́хъ , стⷯры , пра́здникꙋ , на́ ѕ҃ . сла́ва , и҆ ны́нѣ , пра́здникꙋ . прᲂки́менъ дню̀ . вы́хᲂда , и҆ чте́нїѧ нѣ́сть . на стихо́внѣ , в̾ трїѡ́ди , самᲂгла́сенъ дню̀ , вⷤ . и҆ мч҃нченъ со стихѝ и҆́хъ ѻ҆бы́чными . сла́ва , и҆ ны́нѣ , пра́здникꙋ . трᲂпа́рь пра́здникꙋ . та́же , є҆ктенїѧ̀ . и҆ ѿпꙋ́стъ . рѧдᲂво́мꙋ ст҃о́мꙋ пᲂе́мъ на па́вечерницѣ , и҆лѝ ка́кѡ настᲂѧ́тель и҆зво́лит̾ . на ᲂу҆́трени на бг҃ъ гдⷭ҇ь , трᲂпа́рь , пра́здникꙋ , три́жды . по ѻ҆бᲂи́хъ , каѳи́смахъ , сѣда́льны , пра́здникꙋ . кано́нъ пра́здникꙋ , со і҆рмᲂсо́мъ на д҃і . і҆рмо́съ , по два́жды . а҆ и҆дѣ́же трипѣ́сно , пᲂе́мъ , пра́здникꙋ , на́ і҃ . и҆ в̾ трїѡ́ди , на д҃ . по г҃ й , пѣ́сни : сѣда́ленъ , в̾ трїѡ́ди , и҆́же пи́санъ , по в҃ й , каѳи́смѣ . сла́ва , и҆ ны́нѣ , пра́здникꙋ . по ѕ҃ й , пѣ́сни : кᲂнда́къ , и҆ и҆́кᲂсъ , пра́здникꙋ . на ѳ҃ й , пѣ́сни , пᲂе́мъ чⷭ҇тнѣ́йшꙋю . свѣти́ленъ , пра́здникꙋ , вⷤ . на хвали́тѣх̾ , стⷯры , пра́здникꙋ , на д҃ . сла́ва , и҆ ны́нѣ , пра́здникꙋ .= на стихо́внѣ , в̾= трїѡ́ди , самᲂгла́сенъ дню̀ , вⷤ . и҆ мч҃нченъ со стихѝ и҆́хъ ѻ҆бы́чными . сла́ва , и҆ ны́нѣ , пра́здникꙋ . трᲂпа́рь пра́здникꙋ . є҆ктенїѧ̀ . и҆ ѿпꙋ́стъ . и҆ ча́съ , а҃ й . на часѣ́хъ : трᲂпа́рь , и҆ кᲂнда́къ , пра́здникꙋ . на литꙋргі́и , бл҃же́нна , пѣ́снь , ѳ҃ , на́ ѕ҃ . по вхо́дѣ : трᲂпа́рь пра́здникꙋ . сла́ва , и҆ ны́нѣ . кᲂнда́къ , пра́здникꙋ . прᲂки́менъ , и҆ а҆ллилꙋ́їѧ , и҆ прича́стенъ , пра́здникꙋ . а҆пⷭ҇лъ , и҆ є҆ѵⷢ҇а́лїе , дню̀ .

А҆́ще ли ѿда́нїе срѣ́тенїѧ гдⷭ҇нѧ , в̾ сꙋбо́тꙋ , сырᲂпꙋ́стнꙋю . в̾ =пѧто́къ , сы́рныи ве́черъ , на гдⷭ҇и вᲂзва́хъ , стⷯры , пра́здникꙋ , г҃ . и҆ ѻ҆ц҃е́мъ , г҃ . сла́ва , ѻ҆ц҃е́мъ . и҆ ны́нѣ , пра́здникꙋ . прᲂки́менъ дню̀ . и҆ паремїѧ̀ , и҆ по не́й прᲂки́менъ : да ᲂу҆пᲂва́етъ і҆и҃ль . =на стихо́внѣ , в̾ трїѡ́ди , самᲂгла́сенъ дню̀ , вⷤ . и҆ мч҃нченъ . сла́ва , ѻ҆ц҃е́мъ . и҆ ны́нѣ , пра́здникꙋ . трᲂпа́рь , ѻ҆ц҃е́мъ . сла́ва , и҆ ны́нѣ , пра́здникꙋ . є҆ктенїѧ̀ . и҆ ѿпꙋ́стъ . рѧдᲂво́мꙋ же ст҃о́мꙋ пᲂе́мъ на па́вечерницѣ , и҆лѝ ка́кѡ настᲂѧ́тель и҆зво́литъ . на ᲂу҆́трени на бг҃ъ гдⷭ҇ь , трᲂпа́рь , пра́здникꙋ , вⷤ . сла́ва , ѻ҆ц҃е́мъ . и҆ ны́нѣ , пра́здникꙋ . по ѻ҆бᲂи́хъ , каѳи́смахъ , сѣда́льны , пра́здникꙋ . кано́нъ пра́здникꙋ , со і҆рмᲂсо́мъ , на и҃ . і҆рмо́съ , по два́жды . и҆ ѻ҆ц҃е́мъ , на́ ѕ҃ . катава́сїѧ , пра́здникꙋ . пѣ́сни же , во ѱалты́ри гл҃емъ , пре́жде в̾ пѧто́к̾ . в҃ ю же , не гл҃емъ . по г҃ й , пѣ́сни : кᲂнда́къ , и҆ и҆́кᲂсъ , ѻ҆ц҃е́мъ . и҆ сѣда́ленъ , и҆́хъ , вⷤ . сла́ва , и҆ ны́нѣ , пра́здникꙋ . по ѕ҃ й , пѣ́сни : кᲂнда́къ , и҆ и҆́кᲂсъ , пра́здникꙋ . на ѳ҃ й , пѣ́сни , пᲂе́м̾ чⷭ҇тнѣ́йшꙋ . свѣти́лен̾ , пра́здникꙋ . сла́ва , ѻ҆ц҃е́мъ . и҆ ны́нѣ , пра́здникꙋ . на хвали́тѣхъ , стⷯры , пра́здникꙋ , г҃ . и҆ ѻ҆ц҃е́мъ , г҃ . сла́ва , ѻ҆ц҃е́мъ . и҆ нн҃ѣ , пра́здникꙋ . Славᲂсло́вїе вели́кᲂе . трᲂпа́рь , ѻ҆ц҃е́мъ . сла́ва , и҆ ны́нѣ , пра́здникꙋ . є҆ктенїѝ . и҆ ѿпꙋ́стъ . и҆ ча́съ , а҃ . на а҃ мъ часѣ̀ : трᲂпа́рь , пра́здникꙋ . сла́ва , ѻ҆ц҃е́мъ . кᲂнда́къ , пра́здникꙋ . и҆ кᲂне́чныи ѿпꙋ́стъ . на г҃ мъ часѣ̀ : трᲂпа́рь , пра́здникꙋ . сла́ва , ѻ҆ц҃е́мъ . кᲂнда́къ , ѻ҆ц҃е́мъ . на ѕ҃ мъ часѣ̀ : трᲂпа́рь , пра́здникꙋ . сла́ва , ѻ҆ц҃е́мъ . кᲂнда́къ , пра́здникꙋ . на ѳ҃ мъ часѣ̀ : трᲂпа́рь , пра́здникꙋ . сла́ва , ѻ҆ц҃е́мъ . кᲂнда́къ , ѻ҆ц҃е́мъ . на литꙋргі́и , бл҃же́нна , пра́здникꙋ , пѣ́снь , ѳ҃ ѧ , на д҃ .= =и҆ ѻ҆ц҃е́мъ , пѣ́снь , ѕ҃ ѧ , на д҃ . по вхо́дѣ : трᲂпа́рь , пра́здникꙋ , и҆ ѻ҆ц҃е́мъ . сла́ва , кᲂнда́къ , ѻ҆ц҃е́мъ . и҆ ны́нѣ , кᲂнда́къ , пра́здникꙋ . прᲂки́менъ , а҆ллилꙋ́їѧ , и҆ прича́стенъ , пра́здникꙋ , и҆ ѻ҆ц҃е́мъ . а҆пⷭ҇лъ , и҆ є҆ѵⷢ҇а́лїе , дню̀ , и҆ ѻ҆ц҃е́мъ .