ВЪ НА́ВЕЧЕРІЕ БЛ҃ГОВѢ́ЩЕНІѦ ,

а҆́ще слꙋчи́тсѧ в̾ сꙋбо́тꙋ ве́черъ , и҆лѝ в̾ нлⷣю . пᲂе́мъ на ма́лѣй вече́рни , сїю̀ слꙋ́жбꙋ . на гдⷭ҇и вᲂзва́хъ , стⷯры . гла́съ , д҃ . поⷣ . и҆́же зва́нныи .= Оу҆ще́дривъ тва́рь зижди́тель ,꙳ милᲂсе́рдїемъ же свᲂи́мъ прекланѧ́емь ,꙳ во ᲂу҆тро́бꙋ дв҃ы бг҃ᲂѻ҆трᲂкᲂви́цы ,꙳ всели́тисѧ спѣши́тъ .꙳ к̾ не́йже вели́кїи прїи́де а҆рха́нг҃лъ , ра́дꙋисѧ прᲂвѣщава́ѧ бг҃ᲂра́дᲂваннаѧ ,꙳ ны́нѣ с̾ тᲂбо́ю бг҃ъ на́шъ .꙳ не ᲂу҆жаса́йсѧ менѐ царе́ва а҆рхистрати́га .꙳ ѡ҆брѣ́те бо бл҃гᲂда́ть ,꙳ ю҆́же пᲂгꙋбѝ є҆́вва пе́рвїе пра́мт҃и твᲂѧ̀ .꙳ и҆ за́чнеши и҆ рᲂди́ши ,꙳ ѻ҆ц҃ꙋ є҆динᲂсꙋ́щнаго . =двⷤа . Стра́нно є҆́сть сло́во твᲂѐ и҆ вᲂз̾рѣ́нїе ,꙳ стра́нны твᲂѝ гл҃ы и҆ вᲂз̾вѣще́нїѧ , мр҃і́ѧ ко а҆́нг҃лꙋ .꙳ непрельстѝ менѐ ,꙳ дв҃ца є҆́смь , бра́ка незна́ющи .꙳ гл҃еши ꙗ҆́кѡ зачнꙋ̀ не ѡ҆бъи҆ме́ннаго ,꙳ и҆ ка́кѡ вмѣсти́тъ ᲂу҆тро́ба мᲂѧ̀ ,꙳ є҆го́же нб҃са̀ немо́гꙋтъ в̾мѣсти́ти .꙳ а҆враа́мᲂвъ кро́въ да наꙋчи́тъ тѧ̀ ны́нѣ ,꙳ бг҃а в̾мѣсти́выи ,꙳ прᲂѡ҆бразꙋ́ѧи и҆з̾дале́ча ,꙳ бг҃ᲂпрїѧ́тнꙋю твᲂю̀ ᲂу҆тро́бꙋ . Въ назаре́тъ ны́нѣ гра́дъ прише́дъ ,꙳ гра́дъ тѧ̀ ѡ҆дш҃евле́нъ цр҃ѧ хрⷭ҇та̀ , гаврїи́лъ лᲂбыза́етъ ,꙳ вᲂпїѧ̀ тебѣ̀ ра́дꙋисѧ ,꙳ бл҃гᲂслᲂве́наѧ бг҃ᲂра́дᲂваннаѧ ,꙳ прїи́меши во ᲂу҆тро́бѣ свᲂе́й бг҃а вᲂплᲂща́ема .꙳ и҆ тᲂбо́ю чл҃чество ,꙳ на дре́внее бл҃же́нство призыва́юща .꙳ бл҃гᲂслᲂве́нъ чре́ва твᲂегѡ̀ ,꙳ бжⷭ҇твеныи пло́дъ без̾сме́ртныи ,꙳ пᲂдаѧ́и ми́рᲂви ѡ҆чище́нїе ,꙳ и҆ ве́лїю млⷭ҇ть . сла́ва , и҆ ны́нѣ . гла́съ , а҃ . Вшесты́и мцⷭ҇ъ а҆рхистрати́гъ по́сланъ бы́сть , к̾ тебѣ̀ дв҃ѣй и҆ чⷭ҇тѣй , вᲂз̾вѣсти́ти сло́во и҆́стиннᲂе , в̾кꙋ́пѣ же и҆ зва́ти ти . ра́дꙋисѧ ѡ҆бра́дᲂваннаѧ гдⷭ҇ь с̾ тᲂбо́ю , рᲂди́ши сн҃а превѣ́чнаго и҆з̾ ѻ҆ц҃а , и҆ спасе́тъ лю́ди свᲂѧ̀ ѿ грѣ́хъ и҆́хъ .

Н=а стихо́внѣ , стихѣ́ры , гла́съ , и҃ . поⷣ . ѽ =пресла́внᲂе чꙋ́до . Нача́льникъ вы́шнихъ си́лъ ,꙳ назаре́тꙋ пред̾ста́въ ,꙳ дв҃ꙋ лᲂбыза́етъ .꙳ ра́дꙋисѧ гл҃ѧ ,꙳ нᲂси́ло чⷭ҇тᲂе бжⷭ҇тва̀ .꙳ тѧ̀ ѿ́ вѣка бг҃ъ вᲂз̾любѝ , в̾ жили́ще и҆зво́ли .꙳ ра́бъ влады́чень , к̾ тебѣ̀ прише́ствꙋѧи є҆́смь вᲂпи́ти ,꙳ рᲂди́ши бо гдⷭ҇а ,꙳ и҆ нетлѣ́нна пребꙋ́деши .

сти́хъ : бл҃гᲂвѣсти́те дн҃ь ѿ́ дне ,꙳ спасе́нїе бг҃а на́шегѡ . Что̀ твᲂѐ видѣ́нїе ѻ҆́гнено ,꙳ гаврїи́лꙋ чи́стаѧ со ᲂу҆дивле́нїемъ речѐ ,꙳ что̀ твᲂѐ дᲂсто́инство ,꙳ и҆ слᲂвесе́мъ си́ла ,꙳ зача́ти сн҃а прᲂвᲂзвѣща́еши мѝ ,꙳ а҆́зъ же и҆скꙋ́са мꙋ́жеска невѣ́мъ ,꙳ ѿи҆дѝ далечѐ .꙳ непрельсти́ши чл҃че ,꙳ ꙗ҆́кᲂже пре́жде є҆́ввꙋ пра́мт҃рь ѕмі́й льсти́выи .

сти́х̾ : вᲂспо́йте гдⷭ҇ви пѣ́снь но́вꙋ ,꙳ вᲂспо́йте гдⷭ҇ви всѧ̀ землѧ̀ . Дх҃ъ бж҃їи прⷭ҇ты́и ,꙳ сни́детъ пречⷭ҇таѧ на тѧ̀ ,꙳ бг҃ᲂвмѣсти́маѧ влⷣчце ,꙳ и҆ си́ла вы́шнѧгѡ ѡ҆сѣ́нитъ тѧ̀ .꙳ и҆ рᲂди́ши сн҃а ,꙳ сᲂблю́дша твᲂѐ дв҃ство неврежде́ннѡ .꙳ се́й сн҃ъ є҆́сть , ро́дꙋ невмѣни́мъ .꙳ се́й ꙗ҆́вльсѧ спасе́тъ лю́ди свᲂѧ̀ ,꙳ ꙗ҆́кѡ бл҃гᲂи҆зво́ли .

сла́ва , и҆ ны́нѣ , гла́съ , д҃ . Въ шесты́и мцⷭ҇ъ , по́сланъ бы́сть а҆рха́нг҃лъ къ дв҃ѣ чи́стѣй . и҆ ра́дᲂватисѧ є҆́й прире́къ , бл҃гᲂвѣстѝ и҆з̾ неѧ̀ и҆зба́вителю прᲂитѝ . тѣ́мже прїе́мши цѣлᲂва́нїе , зача́тъ тѧ̀ превѣ́чнаго бг҃а , несказа́ннѡ бл҃гᲂвᲂли́вшаго вᲂчл҃читисѧ , во спасе́нїе дш҃а́мъ на́шимъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , д҃ . Дне́сь спасе́нїю на́шемꙋ нача́тᲂкъ , и҆ вѣ́чнѣй та́йнѣ ꙗ҆вле́нїе . сн҃ъ бж҃їи , сн҃ъ дв҃ыѧ быва́етъ . и҆ гаврїи́лъ ра́дᲂсть бл҃гᲂвѣствꙋ́етъ . тѣ́мъ и҆ мы̀ с̾ ни́мъ бцⷣѣ вᲂзᲂпїе́мъ , ра́дꙋисѧ ѡ҆бра́дᲂваннаѧ гдⷭ҇ь с̾ тᲂбо́ю .

та́же , є҆ктенїѧ̀ ма́лаѧ . и҆ ѿпꙋ́стъ .