МЦⷭ҇А ТОГО́ЖЕ ВЪ К҃Д ДН҃Ь

пред̾пра́зднество бл҃гᲂвѣ́щенїѧ , прест҃ы́ѧ бцⷣы . =Ве́черъ , на гдⷭ҇и вᲂзва́хъ , самᲂгла́сна стихѣ́ра , дне́ви , ꙗ҆́же в̾ трїѡ́ди , вⷤ . и҆ мч҃нченъ . и҆ поⷣ , трѝ , в̾ трїѡ́ди . и҆ прⷭ҇тѣ́й бцⷣѣ , на д҃ . гла́съ , д҃ . поⷣ . ꙗ҆́кѡ до́блѧ . Сᲂкрᲂве́ннᲂе та́инство ,꙳ и҆ а҆́нг҃лѡмъ невѣ́дᲂмо ,꙳ гаврїи́лъ ᲂу҆вѣрѧ́етъ а҆рха́нг҃лъ .꙳ и҆ к̾ тебѣ̀ ны́нѣ прише́дъ , є҆ди́нᲂй нетлѣ́ннѣй ,꙳ и҆ до́брѣй гᲂлꙋ́бицѣ ,꙳ и҆ ро́да на́шегѡ вᲂз̾ва́нїю ,꙳ и҆ вᲂпїе́тъ тебѣ̀ прест҃а́ѧ , ра́дꙋисѧ .꙳ ᲂу҆гᲂто́висѧ сло́вᲂмъ ,꙳ бг҃а сло́ва ꙳ твᲂи́ми лᲂжесна́ми прїѧ́ти . =вⷤ . Свѣтᲂно́снаѧ пᲂла́та ,꙳ ᲂу҆гᲂто́васѧ тебѣ̀ влⷣко ,꙳ ᲂу҆тро́ба чⷭ҇таѧ бг҃ᲂѻ҆трᲂкᲂви́цы ,꙳ грѧдѝ к̾ се́й и҆ сни́ди ,꙳ ᲂу҆щедрѧ́ѧ сᲂзда́нїе свᲂѐ ,꙳ за́вистїю бра́нь прїе́мшее ,꙳ и҆ рабо́тᲂю держи́мо льсти́вагѡ .꙳ и҆ дᲂбро́тꙋ пе́рвꙋю пᲂгꙋ́бльше .꙳ и҆ твᲂегѡ̀ ча́юще спасе́нагѡ сᲂше́ствїѧ . Гаврїи́лъ а҆рха́нг҃лъ ,꙳ къ тебѣ̀ всенепᲂро́чнаѧ ꙗ҆вле́ннѡ прїи́де .꙳ вᲂпїѧ̀ тебѣ̀ , ра́дꙋисѧ ,꙳ клѧ́твѣ разрꙋше́нїе ,꙳ па́дшихъ вᲂз̾движе́нїе .꙳ ра́дꙋисѧ є҆ди́на и҆з̾бра́нна бг҃ᲂви бы́вши .꙳ ра́дꙋисѧ ѡ҆дш҃евле́нныи ѻ҆́блаче сл҃нца .꙳ вᲂспрїимѝ беспло́тнаго во ᲂу҆тро́бѣ ,꙳ всели́тисѧ в̾ тѧ̀ хᲂтѧ́ща . сла́ва , и҆ нн҃ѣ . гла́съ , в҃ . Бл҃гᲂвѣстꙋ́етъ гаврїи́лъ , ѡ҆бра́дᲂваннѣй дне́сь . ра́дꙋисѧ неневѣ́стнаѧ , ѻ҆трᲂкᲂви́це неи҆скꙋсᲂбра́чнаѧ . недиви́сѧ стра́ннᲂмꙋ мᲂемꙋ̀ видѣ́нїю , ни ᲂу҆жаса́йсѧ , а҆рха́нг҃лъ бо є҆́смь . ѕмїѧ̀ прельстѝ є҆́ввꙋ и҆нᲂгда̀ , ны́нѣ же бл҃гᲂвѣстꙋ́ю тебѣ̀ ра́дᲂсть . и҆ пребꙋ́деши нетлѣ́нна , и҆ ро́ждьши гдⷭ҇а чи́стаѧ . вы́хᲂдъ . паремїѝ дне́ви . На ᲂу҆́трени , а҆ллилꙋ́їѧ . а҆́щели въ сꙋбо́тꙋ слꙋчи́тсѧ , пᲂе́мъ , бг҃ъ гдⷭ҇ь .= трᲂпа́рь . гла́съ , и҃ . Пᲂвелѣ́ннᲂе та́инство прїе́мъ в̾ ра́зꙋмѣ , в̾ кро́вѣ і҆ѡ́сифᲂвѣ тща́нїемъ пред̾ста̀ беспло́тныи , глаго́лѧ не и҆скꙋ́снѣй бра́кꙋ , преклᲂне́и с̾хᲂжде́нїемъ нб҃са̀ , в̾мѣща́етсѧ не и҆змѣ́ннѡ ве́сь в̾ тѧ̀ . є҆го́же и҆ ви́дѧ во ᲂу҆тро́бѣ твᲂе́й прїе́мша ра́бїи зра́къ , ᲂу҆жаса́юсѧ зва́ти тѝ , ра́дꙋисѧ невѣ́сто неневѣ́стнаѧ . =двⷤа . сла́ва , и҆ ны́нѣ , то́йже .

Кано́нъ . твᲂре́нїе ѳеѡ́фанᲂво . гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ , немо́крыми стᲂпа́ми дре́вле ше́ствᲂвавъ і҆и҃ль , крⷭ҇тᲂѡ҆бра́зно мѡѷсе́ѡвыма рꙋка́ма , а҆мали́кᲂвꙋ си́лꙋ в̾ пꙋсты́ни пᲂбѣди́лъ є҆́сть .

запѣ́въ : Прест҃а́ѧ гжⷭ҇е бцⷣе , спасѝ на́съ . Ми́ръ ѡ҆бра́дᲂваннѡ весели́тсѧ , ѡ҆щꙋти́въ гдⷭ҇не сᲂше́ствїе на тѧ̀ . за млрⷭ҇дїе бо млⷭ҇ти съ нб҃съ схо́дитъ , во ᲂу҆тро́бꙋ дв҃ыѧ в̾сели́тисѧ . Сѐ тебѣ̀ цр҃цѣ пᲂсыла́етсѧ бжⷭ҇твеныи а҆рха́нг҃лъ , цр҃ѧ всѣ́хъ и҆ бг҃а прᲂвᲂз̾вѣсти́ти прише́ствїе . и҆ вᲂз̾гласи́ти тебѣ̀ , ра́дꙋисѧ , вᲂз̾ва́нїе пра́ѻ҆ц҃а . Рꙋ́чка свѣтᲂза́рна и҆ всеѕлата́ѧ , ᲂу҆гᲂто́висѧ на прїѧ́тїе ма́нны живо́тныѧ . на тѧ́ бо прїи́детъ гла́сᲂмъ а҆́нг҃лᲂвымъ , в̾ тѧ̀ па́че є҆стества̀ в̾селѧ́ѧсѧ . Во ᲂу҆тро́бꙋ твᲂю̀ чⷭ҇тꙋю , всели́тисѧ хо́щетъ гдⷭ҇ь , живы́и прⷭ҇нѡ на́ нб҃си . ѡ҆небеси́ти бо грѧде́тъ , земленᲂро́дныхъ смѣше́нїе , в̾ сїѐ мꙋ́дрѣ ѡ҆бо́лксѧ .

пѣ́снь , г҃ . і҆рмо́съ . Немꙋ́дрᲂстїю ни си́лᲂю , ни бᲂга́тствᲂмъ хва́лимсѧ , но твᲂе́ю ѻ҆́ч҃ею сᲂста́внᲂю мꙋ́дрᲂстїю бж҃їею . ꙗ҆́кѡ нѣ́сть ст҃а па́че тебѐ чл҃кᲂлю́бче . Землѧ̀ ꙗ҆́же те́рнїе страсте́й печа́ль и҆зрасти́вшаѧ , взыгра́ѧ ликꙋ́й . се́бо да́тель без̾сме́ртїѧ клѧ́твы и҆зима́ѧ тѧ прихо́дитъ . Бжⷭ҇твенᲂе рꙋно̀ , гᲂто́висѧ дв҃о нескве́рнаѧ . на тѧ́ бо бг҃ъ ꙗ҆́кѡ до́ждь сни́детъ , и҆з̾сꙋши́ти пᲂто́ки престꙋпле́нїѧ . Сви́тче бжⷭ҇твеныи гᲂто́висѧ . пе́рстᲂмъ бо ѻ҆́ч҃имъ напи́шетсѧ въ тебѣ̀ , бжⷭ҇твенᲂе сло́во вᲂпло́щьсѧ . без̾слᲂве́сїѧ мᲂегѡ̀ разрѣша́ѧ престꙋпле́нїе . Златы́и свѣти́льниче , пᲂд̾и҆мѝ ѻ҆́гнь бжⷭ҇тва̀ , сїѧ́ющїи тᲂбо́ю , и҆ свѣ́тъ ми́рᲂви да́рꙋѧ . и҆́мже ѕѡ́лъ на́шихъ тма̀ разᲂри́тсѧ .

сѣда́ленъ . гла́съ , д҃ . Наи́тїемъ дх҃а прест҃а́гѡ , ѻ҆ц҃ꙋ сᲂпресто́льна и҆ є҆динᲂсꙋ́щна , гла́сᲂмъ а҆рха́нг҃лѡвымъ зачала̀ є҆сѝ бг҃ᲂрᲂди́тельнице . а҆да́мᲂво вᲂзва́нїе . сла́ва , и҆ ны́нѣ , то́йже .

пѣ́снь , д҃ . і҆рмо́съ . Вᲂз̾дви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾ чинꙋ̀ свᲂе́мъ , дᲂсто́йнѡ взыва́ющи , сла́ва си́лѣ твᲂе́й гдⷭ҇и . Та́инство дре́вле пре́жде вѣ́къ пред̾пᲂвелѣ́ннᲂе , ꙗ҆вле́нїе начина́етъ прїима́ти . землѧ̀ и҆ небе́снаѧ сᲂгла́снѡ вᲂз̾весели́тесѧ , и҆ ра́дᲂстнѡ вᲂскли́кните . Пᲂла́та вели́кагѡ цр҃ѧ , слꙋ́ха ѿве́рзи бжⷭ҇твеныѧ вхо́ды . ᲂу҆́же бо прихо́дитъ хрⷭ҇то́съ и҆́стина , и҆ всели́тсѧ пᲂсредѝ тебѐ . Пра́матерне пᲂпᲂлзе́нїе и҆справлѧ́ѧи , и҆зба́витель ꙗ҆влѧ́етсѧ , въ неи҆скꙋсᲂбра́чнꙋю ᲂу҆тро́бꙋ вселѧ́етсѧ , тᲂмꙋ̀ вᲂспᲂе́мъ , сла́ва си́лѣ твᲂе́й гдⷭ҇и . А҆вва́кꙋмъ тѧ̀ прᲂнаречѐ го́рꙋ дре́вле , дᲂбрᲂдѣ́тельми присѣ́ннꙋ . и҆з̾ неѧ́же ꙗ҆ви́тисѧ хо́щетъ бг҃ъ на́шъ , дв҃о всенепᲂро́чнаѧ , є҆ди́на чл҃кѡмъ и҆справле́нїе .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рᲂю вᲂспѣва́ющїѧ тѧ . Ѽ нескве́рнаѧ а҆́гнице , а҆́гньца бг҃а на́шегѡ во ᲂу҆тро́бꙋ свᲂю̀ в̾селѝ . прихо́дитъ бо взе́млѧи на́ша сᲂгрѣше́нїѧ . Же́злъ та́йныи по ма́лѣ прᲂцвѣте́тъ , ꙗ҆́кᲂже пи́шетъ , бжⷭ҇твеныи цвѣ́тъ ѿ ко́рене і҆єссе́ѡва , на́мъ ꙗ҆влѧ́ющисѧ . А҆рха́нг҃лᲂвымъ гла́сᲂмъ , ᲂу҆ма́щшисѧ ꙗ҆́кѡ винᲂгра́дъ . к̾ прᲂзѧбе́нїю гᲂто́висѧ , зрѣ́лагѡ дв҃о и҆ нетлѣ́ннагѡ гро́зда . Вели́кїи прⷪ҇ркᲂмъ и҆са́їѧ вᲂз̾весели́сѧ . дв҃аѧ бо ю҆́же прᲂречѐ , во́ чревѣ прїе́млетъ , сᲂвѣ́та вели́кагѡ а҆́нг҃ла .

пѣ́снь , ѕ҃ . і҆рмо́съ . Пᲂжрꙋ́ти со́ гласᲂмъ хвале́нїѧ гдⷭ҇и , цр҃кви вᲂпїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Ра́дꙋисѧ тебѣ̀ гаврїи́лъ а҆рха́нг҃лъ вѣща́етъ , ра́дᲂсть бо во́ чревѣ сѝ прїи́меши несказа́ннѡ , ю҆́же є҆́вва престꙋпле́нїемъ дв҃о пᲂгꙋбѝ . Не ѡ҆пали́тъ , не ᲂу҆жаса́йсѧ ѿ ню́дъ , ᲂу҆тро́бы твᲂеѧ̀ ѻ҆́гнь бжⷭ҇тва̀ ѻ҆трᲂкᲂви́це . кꙋпина́ бо дре́вле тѧ̀ , вᲂѡ҆бража́ше гᲂрѧ́щи , ника́кᲂже ѡ҆палѧ́ема пречⷭ҇таѧ . Гᲂра̀ ю҆́же данїи́лъ прᲂви́дѣ дх҃ᲂмъ , ра́дꙋисѧ дв҃о . и҆з̾ тебе́ бо мы́сленыи ка́мень ᲂу҆сѣче́тсѧ , и҆ сᲂкрꙋши́тъ бѣсо́мъ без̾дꙋ́шныѧ тре́бища . Смире́нїѧ цр҃ь к̾ тебѣ̀ прїи́детъ , тᲂбо́ю примири́ти бра́нь прїе́мшїѧ , и҆ ᲂу҆держа́нїе бг҃ᲂмт҃и , лꙋка́вымъ сᲂвѣ́тᲂмъ ѕмїи́нымъ .

а҆́ще сꙋбо́та , и҆лѝ недѣ́лѧ : кᲂнда́къ . гла́съ , и҃ . Всѣ́мъ земны́мъ нача́ло спасе́нїѧ на́шегѡ ты̀ є҆сѝ бцⷣе дв҃о . бж҃їи бо слꙋжи́тель с̾ нб҃съ по́сланъ пред̾ста́ти тебѣ̀ , вели́кїи чинᲂнача́льникъ гаврїи́лъ . ра́дᲂсть ѡ҆бра́дᲂваннаѧ тѝ принесѐ . тѣ́мъ всѝ зᲂве́мъ тѝ , ра́дꙋисѧ невѣ́сто неневѣ́стнаѧ .

пѣ́снь , з҃ . і҆рмо́съ . Спасы́и во ѻ҆гнѝ а҆враа́мскїѧ сѝ дѣ́ти , и҆ халдѣ́и ᲂу҆би́въ , ꙗ҆́же без̾ пра́вды пра́ведныѧ ᲂу҆лᲂвлѧ́хꙋ , препѣ́тыи гдⷭ҇и бж҃е ѻ҆ц҃ъ бл҃гᲂслᲂве́нъ є҆сѝ . Кᲂвче́гъ слᲂве́сныи , и҆́же и҆́стинныи закᲂнᲂпᲂло́жникъ вᲂз̾люби́въ , в̾ тебѣ̀ хо́щетъ селе́нїе сᲂтвᲂри́ти , бл҃гᲂꙋха́нїѧ и҆спо́лнисѧ . тᲂбо́ю бо и҆стлѣ́вшеесѧ ѡ҆бнᲂви́тъ . Прⷪ҇рческїи бжⷭ҇твеныи ли́къ , ꙗ҆́кᲂже ѡ҆щꙋти́въ ѻ҆трᲂкᲂви́це , є҆́же на тебѣ̀ и҆зба́вителѧ ми́рнᲂе прише́ствїе , зᲂве́тъ тебѣ̀ . ра́дꙋисѧ всѣ́хъ и҆збавле́нїе . ра́дꙋисѧ є҆ди́на чл҃кѡмъ спасе́нїе . Не ᲂу҆жаса́йсѧ гла́са , недиви́сѧ гл҃ющемꙋ . бж҃їи слꙋга̀ є҆́сть , ꙗ҆ви́ти тебѣ̀ прїи́де та́инство , а҆́нг҃лѡмъ недᲂꙋмѣ́ннѡ , неи҆скꙋсᲂбра́чнаѧ дв҃о бл҃гᲂслᲂве́ннаѧ . Зри́ши тва́рь всю̀ , враго́мъ пᲂрабᲂще́нꙋ дв҃о . пᲂми́лᲂвати же ю҆̀ , за млрⷭ҇дїе млⷭ҇ти хᲂтѧ̀ , тᲂбо́ю бл҃гᲂвᲂли́выи . да не ᲂу҆́бѡ сло́вᲂмъ а҆́нг҃ла невѣ́рꙋеши .

пѣ́снь , и҃ . і҆рмо́съ . Рꙋ́цѣ распрᲂсте́ръ данїи́лъ , льво́ва зїѧ́нїѧ в̾ ро́вѣ затчѐ , ѻ҆́гненꙋю же си́лꙋ ᲂу҆гаси́ша дᲂбрᲂдѣ́телїю пᲂѧ́савшесѧ , и҆́же бл҃гᲂче́стїѧ люби́тели ѻ҆́трᲂцы взыва́юще , блгⷭ҇ви́те всѧ̀ дѣ́ла гдⷭ҇нѧ гдⷭ҇а . Ле́гкїи ѻ҆́блаче свѣ́та , неи҆скꙋсᲂбра́чнаѧ ᲂу҆гᲂто́висѧ . сѐ сл҃нце с̾вы́ше вᲂз̾сїѧ́етъ тѝ незахᲂди́мо . в̾ма́лѣ ᲂу҆́бѡ в̾ тебѣ̀ кры́емо , ми́рᲂви же ꙗ҆влѧ́емо , и҆ рѣ́ша ѕло́бѣ ѡ҆мраче́нїе . А҆́нг҃лѡмъ пе́рвыи слꙋжи́тель , вᲂзᲂпѝ тебѣ̀ гла́съ ра́дᲂстенъ . вᲂз̾вѣща́ѧ тѝ чⷭ҇таѧ вели́кагѡ сᲂвѣ́та а҆́нг҃ла , вᲂплᲂща́ема и҆з̾ тебѐ за бл҃гᲂсть . є҆мꙋ́же вᲂпїе́мъ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Ѻ҆ц҃а ѡ҆деснꙋ́ю сѣдѧ́и , в̾ тебѣ̀ селе́нїе хо́щетъ сᲂтвᲂри́ти , пресꙋ́щныи чⷭ҇таѧ . ꙗ҆́кѡ да пᲂста́витъ ѡ҆деснꙋ́ю себѐ , тѧ̀ бли́жнюю и҆ до́брꙋю ꙗ҆́кѡ цр҃цꙋ . десни́цꙋ же всѣ́мъ прᲂстре́тъ па́дшимъ , и҆ спасе́тъ ны̀ . Ꙗ҆́кѡ шипо́къ и҆з̾ ᲂу҆до́лїѧ чи́стъ , ꙗ҆́кѡ кри́нъ бл҃гᲂво́ненъ , разꙋмѣ́въ тѧ̀ зижди́тель на́шъ гдⷭ҇ь . ны́нѣ вᲂсхᲂтѣ̀ твᲂе́й дᲂбро́тѣ чⷭ҇таѧ , вᲂплᲂти́тисѧ и҆з̾ твᲂи́хъ крᲂве́й хо́щетъ . ꙗ҆́кѡ да прᲂжене́тъ смра́днꙋю пре́лесть бл҃гᲂстїю сѝ .

пѣ́снь , ѳ҃ . і҆рмо́съ . Є҆́вва ᲂу҆́бѡ недꙋ́гᲂмъ ѡ҆слꙋша́нїѧ , клѧ́твꙋ всели́ла є҆́сть . ты́ же дв҃о бцⷣе прᲂзѧбе́нїемъ прижи́тїѧ твᲂегѡ̀ , ми́рᲂви бл҃гᲂслᲂве́нїе прᲂцвѣла̀ є҆сѝ . тѣ́мъ тѧ̀ всѝ велича́емъ . Є҆́вва ᲂу҆́бѡ ѡ҆б̾ѧ́тъ пло́дъ , сме́рть дѣ́лающь всегꙋби́тельнꙋ . пᲂсреди́ же тебѐ вᲂз̾расте́тъ пло́дъ , без̾сме́ртїѧ хᲂда́тай , хрⷭ҇то́съ сла́дᲂсть на́ша влⷣчце . є҆го́же вᲂспѣва́юще , тѧ̀ сла́вимъ . Прекло́нь нб҃са̀ свᲂѧ̀ , к̾ на́мъ сни́ди . прⷭ҇то́лъ ᲂу҆́же ᲂу҆гᲂто́васѧ тебѣ̀ сло́ве ᲂу҆тро́ба дв҃ча . на не́мже ꙗ҆́кѡ цр҃ь крѣ́пᲂкъ сѣ́дъ , вᲂз̾дви́гнеши ѿ паде́нїѧ , десни́цы твᲂеѧ̀ сᲂзда́нїе . Село̀ несѣ́емо чи́стаѧ , пᲂд̾и҆мѝ сло́вᲂмъ нбⷭ҇наго сло́ва . ꙗ҆́кѡ пшени́цꙋ плᲂдᲂно́снꙋ прᲂзѧба́ющꙋ и҆з̾ тебѐ . и҆ кᲂнцы̀ питѣ́ющаго , хлѣ́бᲂмъ ра́зꙋма . є҆мꙋ́же пᲂкланѧ́ющесѧ , тѧ̀ сла́вимъ . Вᲂсхᲂтѣ̀ дᲂбро́тѣ твᲂе́й хрⷭ҇то́съ всенепᲂро́чнаѧ , и҆ во ᲂу҆тро́бꙋ твᲂю̀ всели́сѧ . ꙗ҆́кѡ да ѿ страсте́й без̾ѡ҆бра́зїѧ , ро́дъ чл҃ческїи и҆зба́витъ , и҆ дᲂбро́тꙋ пе́рвꙋю да́рꙋетъ . є҆мꙋ́же пᲂкланѧ́ющесѧ , тѧ̀ велича́емъ .

а҆́ще сꙋбо́та , и҆лѝ нлⷣѧ : свѣти́ленъ . Гаврїи́лъ с̾ высᲂты̀ слетѣ́въ , вᲂпїѧ́ше ра́дꙋисѧ бцⷣе . ꙗ҆́кѡ пра́матернюю клѧ́твꙋ пᲂтреби́въ всю̀ . сꙋ́щихъ и҆з̾ а҆да́ма бл҃гᲂслᲂвѝ , и҆́же и҆з̾ неѧ̀ прᲂзѧбы́и .

На стихо́внѣ , стихѣ́ра , самᲂгла́сна , дне́ви . и҆ мⷱ҇ꙋ . сла́ва , и҆ ны́нѣ . гла́съ , д҃ . Ꙗ҆зы́ка є҆го́же невѣ́дѧше , ᲂу҆слы́ша бцⷣа . гл҃аше бо к̾ не́й а҆рха́нг҃лъ , бл҃гᲂвѣ́щенїѧ глаго́лы . ѿ ню́дꙋ же вѣ́рнѡ прїе́мши цѣлᲂва́нїе , зача́тъ тѧ̀ превѣ́чнаго бг҃а . тѣ́мже и҆ мы̀ ра́дꙋющесѧ вᲂпїе́мъ тѝ . и҆́же и҆з̾ неѧ̀ вᲂплᲂти́выисѧ непрело́жнѡ бж҃е , ми́ръ ми́рᲂви да́рꙋй , и҆ дш҃а́мъ на́шимъ ве́лїю млⷭ҇ть .

А҆́ще прилꙋчи́тсѧ пред̾пра́зднество бл҃гᲂвѣ́ще нїѧ , в̾ сꙋбо́тꙋ , г҃ ѧ , и҆лѝ д҃ ѧ , нлⷣи пᲂста̀ .= въ пѧто́къ , ве́черъ , и҆ ᲂу҆́тро трезво́нъ въ дво́и ма́лые кᲂлᲂкᲂла̀ . каѳи́сма , рѧ́дъ . на гдⷭ҇и вᲂз̾ва́хъ , пᲂста́вимъ стихо́въ , і҃ . и҆ пᲂе́мъ , самᲂгла́сенъ , дню̀ , двⷤа . и҆ мч҃нчны , д҃ , гла́сꙋ . и҆ в̾ минѣ́и , пред̾пра́зднествꙋ , на д҃ . сла́ва , пред̾ пра́зднествꙋ . гла́съ , в҃ . бл҃гᲂвѣстꙋ́етъ гаврїи́лъ . и҆ ны́нѣ , боⷢ҇ , а҃ , гла́сꙋ . вы́хᲂдъ : свѣ́те ти́хїи . прᲂки́менъ , и҆ чте́нїѧ дню̀ . дасѧ̀ и҆спра́витъ . и҆ про́чее , по ѻ҆бы́чаю . а҆́ще ли нѣ́сть прежесщ҃е́нныѧ . то̀ , на гдⷭ҇и вᲂз̾ва́хъ , стⷯры , пред̾пра́зднествꙋ , на́ ѕ҃ . сла́ва , пред̾пра́зднествꙋ . и҆ ны́нѣ , боⷢ҇ , а҃ , гла́сꙋ . та́же , свѣ́те ти́хїи . прᲂки́менъ , и҆ чте́нїѧ дню̀ . пᲂсе́мъ , спᲂдо́би гдⷭ҇и . и҆ є҆ктенїѧ̀ : и҆спо́лнимъ вече́рнѧѧ . на стихо́внѣ , самᲂгла́сенъ , в̾ трїѡ́ди , вⷤ , ꙗ҆́же пи́санъ на гдⷭ҇и вᲂз̾ва́хъ . и҆ мч҃нченъ , по́ гласꙋ є҆гѡ̀ ѿ ѻ҆кта́ѧ . запѣ́вы же глаго́лемъ ѡ҆бы́чныѧ : къ тебѣ̀ вᲂзведо́хъ . сла́ва , и҆ ны́нѣ , пред̾пра́зднествꙋ , и҆́же пи́санъ на ᲂу҆́трени на стихо́внѣ . по ны́нѣ ѿпꙋща́еши : трᲂпа́рь , пред̾пра́зднествꙋ . =та́же , є҆ктенїѧ̀ : пᲂми́лꙋй на́съ бж҃е . пᲂсе́мъ , всест҃а́ѧ трⷪ҇це . бꙋ́ди и҆́мѧ гдⷭ҇не , гⷤ . и҆ г҃ , пᲂкло́ны до землѝ . та́же , дᲂсто́йнѡ є҆́сть . и҆ ѿпꙋ́стъ . нефимо́нъ бᲂльшо́й , без̾ пᲂкло́нᲂвъ . по а҃ мъ , трⷭ҇то́мъ : трᲂпа́рь , пред̾пра́зднествꙋ . по в҃ мъ , трⷭ҇то́мъ : трᲂпарѝ ѡ҆бы́чныѧ . кано́нъ же пᲂе́мъ на па́вечерницѣ , во ѻ҆кта́е за ᲂу҆пᲂко́й . по дᲂсто́йнѣ : кᲂнда́къ , пред̾пра́зднествꙋ .

на ᲂу҆́трени , на бг҃ъ гдⷭ҇ь , трᲂпа́рь , пред̾пра́здне ствꙋ , гⷤ . и҆ ѡ҆бы́чныѧ , каѳи́смы . и҆ сѣда́льны , во ѻ҆кта́и . а҆ на непᲂро́чнахъ , за ᲂу҆пᲂко́й непᲂе́мъ . пѣ́сней , во ѱалты́ри , не гл҃емъ же . гл҃емъ и҆́хъ пре́же в̾ пѧто́къ . Кано́нъ , пред̾пра́зднествꙋ . со і҆рмᲂсо́мъ , на́ ѕ҃ . і҆рмо́съ , двⷤа . и҆ ст҃о́мꙋ , є҆го́же є҆́сть хра́мъ , на д҃ . и҆ во ѻ҆кта́и , на д҃ . по г҃ й , пѣ́сни : кᲂнда́къ , и҆ и҆́кᲂсъ , хра́мꙋ . сѣда́ленъ , пред̾пра́зднествꙋ . сла́ва , и҆ ны́нѣ , то́йже . Є҆гда́же , в̾ трїѡ́ди , прїи́детъ , четверᲂпѣ́сно . то̀ пᲂе́мъ , кано́нъ , пред̾пра́зднествꙋ , ꙗ҆́кᲂже пре́же ꙗ҆вле́но є҆́сть , и҆ в̾ трїѡ́ди , на и҃ . а҃ , твᲂре́цъ , пᲂе́мъ , по ѡ҆бы́чаю . втᲂры́и же , твᲂре́цъ , пᲂе́мъ , два̀ стиха̀ , за є҆ди́нъ . та́же , пᲂслѣ́днїи , два̀ стиха̀ , за є҆ди́нъ же , є҆́же є҆́сть за ᲂу҆пᲂко́й . сла́ва , трⷪ҇ченъ . и҆ ны́нѣ , боⷢ҇ . пᲂкрыва́емъ і҆рмᲂсо́мъ , трїѡ́днымъ . по ѕ҃ й , пѣ́сни : кᲂнда́къ , пред̾пра́зднествꙋ . по ѳ҃ й , пѣ́сни : свѣти́ленъ , во ѻ҆кта́и . на стихо́внѣ , во ѻ҆кта́и , и҆́же на хвали́тѣхъ , настᲂѧ́щагѡ , гла́са мꙋ́ченичны . пᲂслѣ́днїй сти́хъ ѡ҆ста́вимъ . запѣ́вы гл҃емъ , ѡ҆бы́чныѧ . и҆спо́лнихᲂмсѧ заꙋ́тра ми́лᲂсти . и҆ бꙋ́ди свѣ́тлᲂсть . сла́ва , и҆ ны́нѣ . гла́съ , д҃ . пред̾пра́зднествꙋ . ꙗ҆зы́ка є҆го́же невѣ́дѧше . и҆ про́чее . На часѣ́хъ , трᲂпа́рь , и҆ кᲂнда́къ , пред̾ пра́зднествꙋ . На литꙋргі́и , бл҃же́нна , во ѻ҆кта́и , на́ ѕ҃ . По вхо́дѣ , а҆́ще ли хра́мъ хрⷭ҇то́въ : трᲂпа́рь , хра́мꙋ . и҆ пред̾пра́зднествꙋ . и҆ дню̀ : а҆пⷭ҇ли пррⷪ҇цы , пᲂмѧнѝ гдⷭ҇и ꙗ҆́кѡ бл҃гъ . сла́ва , кᲂнда́къ , со ст҃ы́ми пᲂко́й . и҆ ны́нѣ , пред̾пра́зднествꙋ .

По вхо́дѣ , а҆́ще хра́мъ бцⷣы , и҆лѝ ст҃ы́мъ : трᲂпа́рь , пред̾пра́зднествꙋ . и҆ дню̀ : а҆пⷭ҇ли пррⷪ҇цы , пᲂмѧнѝ гдⷭ҇и ꙗ҆́кѡ бл҃гъ . сла́ва , кᲂнда́къ , со ст҃ы́ми пᲂко́й . и҆ ны́нѣ , пред̾пра́зднествꙋ .

А҆́ще прилꙋчи́тсѧ пред̾пра́зднество бл҃гᲂвѣ́ще нїѧ , в̾ нлⷣю крⷭ҇тᲂпᲂкло́ннꙋю . въ сꙋбо́тꙋ ве́черъ , на вели́цѣй вече́рни , на гдⷭ҇и вᲂз̾ва́хъ , стихѣ́ры вᲂскрⷭ҇ны , г҃ . крⷭ҇тꙋ̀ , д҃ . и҆ пред̾пра́зднествꙋ , г҃ . сла́ва , крⷭ҇тꙋ̀ . и҆ ны́нѣ , боⷢ҇ , а҃ , гла́сꙋ . на литі́и , стихѣ́ра хра́мꙋ . и҆ стⷯры во ѻ҆кта́и , па́вла а҆ммᲂре́йскаго . сла́ва , пред̾пра́зднествꙋ . и҆ ны́нѣ , крⷭ҇тꙋ̀ . на стихо́внѣ , стихѣ́ры , во ѻ҆кта́и . сла́ва , крⷭ҇тꙋ̀ . и҆ ны́нѣ , пред̾пра́зднествꙋ . пи́санъ на ᲂу҆́трени на стихо́внѣ , гла́съ , д҃ . ꙗ҆зы́ка є҆го́же невѣ́дѧше . на блгⷭ҇ве́нїе хлѣ́бᲂмъ : трᲂпа́рь , бцⷣе дв҃о ра́дꙋисѧ , двⷤа . и҆ крⷭ҇тꙋ̀ , аⷤ . пᲂсе́мъ , бꙋ́ди и҆́мѧ гдⷭ҇не , гⷤ .

на ᲂу҆́трени , на бг҃ъ гдⷭ҇ь , трᲂпа́рь , вᲂскрⷭ҇нъ , двⷤа . сла́ва , крⷭ҇тꙋ̀ . и҆ ны́нѣ , пред̾пра́зднествꙋ . и҆ про́чее ѡ҆бы́чно . Кано́нъ , вᲂскрⷭ҇нъ , со і҆рмᲂсо́мъ , на д҃ . и҆ крⷭ҇тꙋ̀ , на́ ѕ҃ . и҆ пред̾пра́зднествꙋ , на д҃ . катава́сїѧ : бжⷭ҇твеныи прᲂѡ҆бразѝ . по г҃ й , пѣ́сни : кᲂнда́къ , и҆ и҆́кᲂсъ , вᲂскрⷭ҇нъ . кᲂнда́къ , пред̾пра́зднествꙋ . сѣда́ленъ , крⷭ҇тꙋ̀ , двⷤа . сла́ва , и҆ ны́нѣ , пред̾ пра́зднествꙋ . по ѕ҃ й , пѣ́сни : кᲂнда́къ , и҆ и҆́кᲂсъ , крⷭ҇тꙋ̀ . по ѳ҃ й , пѣ́сни : свѣти́ленъ , вᲂскрⷭ҇нъ . сла́ва , крⷭ҇тꙋ̀ . и҆ ны́нѣ , пред̾пра́зднествꙋ . Про́чее же на хвали́тѣхъ и҆ на литꙋргі́и всѐ , ꙗ҆́кᲂже пи́сано в̾ нлⷣю , г҃ ю пᲂста̀ нарѧдꙋ̀ в̾ м҃ цѣ , то́чїю на часѣ́хъ трᲂпа́рь , вᲂскрⷭ҇нъ . сла́ва , крⷭ҇тꙋ̀ , и҆ пред̾пра́здне ствꙋ премѣнѧ́ѧ . по ѻ҆́ч҃е на́шъ , кᲂнда́къ , на всѣ́хъ часѣ́хъ крⷭ҇тꙋ̀ є҆ди́нъ .

А҆́ще прилꙋчи́тсѧ пред̾пра́зднество бл҃гᲂвѣ́ще нїѧ , в̾ пнⷣе , д҃ ѧ , и҆лѝ є҃ ѧ , и҆лѝ ѕ҃ ѧ нлⷣи пᲂста̀ . въ нлⷣю ве́черъ , стⷯры на́ і҃ . во ѻ҆кта́и пᲂкаѧ́нныхъ , д҃ . и҆ в̾ трїѡ́ди , г҃ . и҆ пред̾пра́зднествꙋ , г҃ . сла́ва , и҆ ны́нѣ , пред̾пра́зднествꙋ . вы́хᲂдъ , прᲂки́менъ вели́кїи . та́же , спᲂдо́би гдⷭ҇и . и҆ пᲂкло́ны , г҃ . пᲂсе́мъ , є҆ктенїѧ̀ : и҆спо́лнимъ вече́рнѧѧ . та́же , пᲂе́мъ стихо́внꙋ , въ трїѡ́ди . сла́ва , и҆ ны́нѣ , пред̾пра́зднествꙋ , и҆́же пи́санъ на ᲂу҆́трени на стихо́внѣ , гла́съ , д҃ . ꙗ҆зы́ка є҆го́же невѣ́дѧше . пᲂсе́мъ , ны́нѣ ѿпꙋща́еши . и҆ трⷭ҇то́е , с̾ пᲂкло́ны . и҆ трᲂпарѝ : бцⷣе дв҃о ра́дꙋисѧ , с̾ пᲂкло́ны . и҆ гдⷭ҇и пᲂми́лꙋй , м҃ . и҆ нбⷭ҇ныи цр҃ю . по честнѣ́йшꙋю , д҃ , пᲂкло́ны . и҆ ѿпꙋ́стъ . На ᲂу҆́трени , пᲂе́мъ , а҆ллилꙋ́їю . и҆ тро́ичны , гла́сꙋ . и҆ ѡ҆бы́чныѧ , каѳи́смы , и҆ пᲂкло́ны . и҆ про́чее , пᲂе́мъ , на ᲂу҆́трени , и҆ на часѣ́хъ , ꙗ҆́кᲂже ᲂу҆каза́сѧ , пре́жде в̾ рѧдꙋ̀ , въ к҃д де́нь .

А҆́ще прилꙋчи́тсѧ пред̾пра́зднество бл҃гᲂвѣ́ще нїѧ , в̾ сре́дꙋ , д҃ ю , пᲂста̀ , є҆́же є҆́сть крⷭ҇то пᲂкло́ннꙋю . ве́черъ , пᲂе́мъ и҆ заꙋ́тра всѐ с̾ пᲂкло́ны . во вто́рникъ ве́черъ , каѳи́сма , рѧ́дъ . на гдⷭ҇и вᲂз̾ва́хъ , стихѣ́ры , в̾ трїѡ́ди , г҃ . и҆ пред̾пра́зднествꙋ , г҃ . сла́ва , крⷭ҇тꙋ̀ . и҆ ны́нѣ , пред̾ пра́зднествꙋ . прᲂки́менъ , и҆ чте́нїѧ дню̀ . на стихо́внѣ , стихѣ́ры , в̾ трїѡ́ди . сла́ва , крⷭ҇тꙋ̀ . и҆ ны́нѣ , пред̾пра́зднествꙋ . на ᲂу҆́трени в̾ сре́дꙋ , кано́нъ во ѻ҆кта́и , со і҆рмᲂсо́мъ , на д҃ . и҆ в̾ трїѡ́ди , на ѕ҃ . и҆ пред̾пра́зднествꙋ , на д҃ . катава́сїѧ , і҆рмо́съ пред̾пра́зднествꙋ . а҆ и҆дѣ́же трипѣ́сно , пᲂе́мъ кано́нъ крⷭ҇тꙋ̀ со і҆рмᲂсо́мъ , на д҃ . и҆ пред̾ пра́зднествꙋ , на в҃ . и҆ трипѣ́сна , на и҃ . катава́сїѧ , і҆рмо́съ трипѣ́сненыи . по г҃ й , пѣ́сни : кᲂнда́къ , пред̾пра́зднествꙋ . и҆ сѣда́ленъ , дню̀ . сла́ва , и҆ нн҃ѣ , пред̾пра́зднествꙋ . по ѕ҃ й , пѣ́сни : кᲂнда́къ , и҆ и҆́кᲂсъ , крⷭ҇тꙋ̀ . по ѳ҃ й , пѣ́сни : свѣти́ленъ , трⷪ҇ченъ гла́сꙋ . на хвали́тѣхъ , стⷯры крⷭ҇тꙋ̀ , ꙗ҆́же на гдⷭ҇и вᲂз̾ва́хъ , ѡ҆ста́ша . на стихо́внѣ , в̾ трїѡ́ди . сла́ва , крⷭ҇тꙋ̀ . и҆ ны́нѣ , пред̾пра́зднествꙋ . на а҃ мъ , часꙋ̀ , быва́етъ пᲂклᲂне́нїе крⷭ҇тꙋ̀ . си́це пᲂе́мъ , слꙋ́жбꙋ пред̾ пра́зднествꙋ , и҆ крⷭ҇тꙋ̀ , и҆ въ пѧто́къ , а҆́ще слꙋчи́тсѧ , тᲂѧ́же седми́цы .

А҆́ще прилꙋчи́тсѧ пред̾пра́зднество бл҃гᲂвѣ́ще нїѧ , в̾ четверто́къ , д҃ , нлⷣи , пᲂста̀ . въ сре́дꙋ , ве́черъ , каѳи́сма , рѧ́дъ . на гдⷭ҇и вᲂз̾ва́хъ , стⷯры , на і҃ . в̾ трїѡ́ди на́ ѕ҃ . и҆ пред̾пра́зднествꙋ , на д҃ . сла́ва , крⷭ҇тꙋ̀ . гла́съ , и҃ . дне́сь непристꙋ́пныи . и҆ ны́нѣ , пред̾пра́зднествꙋ . вы́хᲂдъ : свѣ́те ти́хїи . прᲂки́менъ , и҆ чте́нїѧ дню̀ . дасѧ̀ и҆спра́витъ . и҆ про́чее , по ѻ҆бы́чаю . на ᲂу҆́трени же пᲂе́мъ , ꙗ҆́ко же пре́же ᲂу҆казꙋ́етъ сегѡ̀ мцⷭ҇а , въ к҃д , де́нь .

А҆́ще прилꙋчи́тсѧ пред̾пра́зднество бл҃гᲂвѣ́ще нїѧ , в̾ нлⷣю , д҃ ю и҆лѝ є҃ ю , пᲂста̀ . въ сꙋбо́тꙋ ве́черъ , на вели́цѣй вече́рни , на гдⷭ҇и вᲂз̾ва́хъ , стихѣ́ры , вᲂскрⷭ҇ны , д҃ . и҆ пред̾пра́зднествꙋ , г҃ . и҆ ст҃о́мꙋ , г҃ . сла́ва , пред̾пра́зднествꙋ . и҆ ны́нѣ , боⷢ҇ , а҃ , гла́сꙋ . вы́хᲂдъ : свѣ́те ти́хїи . прᲂки́менъ , дню̀ . и҆ про́чее по ѻ҆бы́чаю . то́чїю , на стихо́внѣ , сла́ва , ст҃о́мꙋ , и҆́же пи́санъ , на гдⷭ҇и вᲂз̾ва́хъ . и҆ ны́нѣ , пред̾пра́зднествꙋ , и҆́же пи́санъ на ᲂу҆́трени на стихо́внѣ , гла́съ , д҃ . ꙗ҆зы́ка є҆го́же невѣ́дѧше .

на ᲂу҆́трени , трᲂпа́рь , вᲂскрⷭ҇нъ , двⷤа . сла́ва , ст҃о́мꙋ . и҆ ны́нѣ , пред̾пра́зднествꙋ . и҆ про́чее , по ѻ҆бы́чаю , вᲂскрⷭ҇но . кано́нъ , вᲂскрⷭ҇нъ , со і҆рмᲂсо́мъ , на д҃ . и҆ бцⷣѣ , на в҃ . и҆ пред̾пра́зднествꙋ , на д҃ . и҆ ст҃о́мꙋ , на д҃ . катава́сїѧ : ѿве́рзꙋ ᲂу҆ста̀ мᲂѧ̀ . по г҃ й , пѣ́сни : кᲂнда́къ , пред̾пра́зднествꙋ . кᲂнда́къ , и҆ и҆́кᲂсъ , ст҃о́мꙋ . сѣда́ленъ , ст҃о́мꙋ . сла́ва , и҆ ны́нѣ , пред̾ пра́зднествꙋ . по ѕ҃ й , пѣ́сни : кᲂнда́къ , и҆ и҆́кᲂс̾ , вᲂскрⷭ҇нъ . по ѳ҃ й , пѣ́сни : свѣти́ленъ , вᲂскрⷭ҇нъ . сла́ва , ст҃о́мꙋ . и҆ ны́нѣ , пред̾пра́зднествꙋ . и҆ про́чее , по ѻ҆бы́чаю вᲂскрⷭ҇но , и҆ в̾ трїѡ́ди . на а҃ , часѣ̀ : трᲂпа́рь , вᲂскрⷭ҇нъ . сла́ва , пред̾пра́зднествꙋ . кᲂнда́къ , гл҃емъ , пред̾пра́зднествꙋ на всѣ́хъ часѣ́хъ . на г҃ мъ , часѣ̀ : трᲂпа́рь , вᲂскрⷭ҇нъ . сла́ва , ст҃о́мꙋ .= на ѕ҃ мъ , часѣ̀ : трᲂпа́рь , вᲂскрⷭ҇нъ . сла́ва , пред̾пра́зднествꙋ . н=а ѳ҃ мъ , часѣ̀ : трᲂпа́рь , вᲂскрⷭ҇нъ . сла́ва , ст҃о́мꙋ .

А҆́ще прилꙋчи́тсѧ пред̾пра́зднество бл҃гᲂвѣ́ще нїѧ , в̾ сꙋбо́тꙋ , є҃ а҆ка́ѳиста . в̾пѧто́къ ве́черъ , каѳи́сма , рѧ́дъ . на гдⷭ҇и вᲂз̾ва́хъ , пᲂста́вимъ стихо́въ , і҃ . и҆ пᲂе́мъ , самᲂгла́сенъ , дню̀ , двⷤа . и҆ мч҃нчнъ . и҆ а҆ка́ѳистꙋ , на д҃ . и҆ пред̾пра́зднествꙋ , г҃ . сла́ва , пред̾пра́зднествꙋ . и҆ ны́нѣ , а҆ка́ѳистꙋ . вы́хᲂдъ : свѣ́те ти́хїи . прᲂки́менъ , и҆ чте́нїѧ дню̀ . дасѧ̀ и҆спра́витъ . и҆ про́чее , прежесщ҃е́нныхъ . Четверᲂпѣ́сно же , в̾ трїѡ́ди , пᲂе́мъ на па́вечерницѣ . на ᲂу҆́трени , на бг҃ъ гдⷭ҇ь , трᲂпа́рь , а҆ка́ѳистꙋ , двⷤа . сла́ва , и҆ ны́нѣ , то́йже . и҆ ѡ҆бы́чныѧ , каѳи́смы . кᲂндакѝ , и҆ и҆́кᲂсы , а҆ка́ѳистꙋ , по́ чинꙋ и҆́хъ . пѣ́сней не гл҃емъ . но гл҃емъ и҆́хъ , ѿ ѕ҃ ѧ пѣ́сни всѣ̀ , в̾ пѧто́къ . кано́нъ , пред̾пра́зднествꙋ . со і҆рмᲂсо́мъ , на́ ѕ҃ . і҆рмо́съ , двⷤа . и҆ а҆ка́ѳистꙋ , на́ и҃ . катава́сїѧ : ѿве́рзꙋ ᲂу҆ста̀ мᲂѧ̀ . по г҃ й , и҆ по ѕ҃ й , пѣ́сни , кᲂндакѝ , и҆ и҆́кᲂсы , по ѻ҆бы́чаю . по ѳ҃ й , пѣ́сни : свѣти́ленъ , а҆ка́ѳистꙋ , два́жды . сла́ва , и҆ ны́нѣ , то́йже . На хвали́тѣхъ , стⷯры , а҆ка́ѳистꙋ , на д҃ . гла́съ , д҃ . поⷣ . ꙗ҆́кѡ до́блѧ . сла́ва , и҆ нн҃ѣ . гла́съ , д҃ . ꙗ҆зы́ка є҆го́же невѣ́дѧше . славᲂсло́вїе вели́кᲂе , и҆ ѿпꙋ́стъ .

А҆́ще прилꙋчи́тсѧ пред̾пра́зднество бл҃гᲂвѣ́ще нїѧ , в̾ сꙋбо́тꙋ ла́заревꙋ . то̀ пᲂе́тсѧ пред̾пра́з днествꙋ слꙋ́жба пре́же в̾ четверто́къ тᲂѧ́же седми́цы , ꙗ҆́кᲂже ᲂу҆казꙋ́етъ пѣ́ти , мцⷭ҇а сегѡ̀ , в̾ к҃д , де́нь .