МЦⷭ҇А ТОГО́ЖЕ ВЪ А҃І ДН҃Ь

и҆́же во ст҃ы́хъ ѻ҆ц҃а на́шегѡ сᲂфро́нїѧ патрїа́рха і҆єрⷭ҇ли́мскагѡ . =и҆ преставле́нїе и҆́же во ст҃ы́хъ ѻ҆ц҃а на́шегѡ є҆ѵ̾ѳѵ́мїѧ а҆рхїєпкⷭ҇па вели́кагѡ нᲂва́града , чꙋдᲂтво́рца . слꙋ́жба є҆мꙋ̀ пи́сана по се́й слꙋ́жбѣ . Ве́черъ , на гдⷭ҇и вᲂзва́хъ , стихѣ́ры . гла́съ , д҃ . поⷣ . ꙗ҆́кѡ до́блѧ . Цѣлᲂмꙋ́дрїю тезᲂи҆мени́тъ ,꙳ ѿ бжⷭ҇твенагѡ прᲂразꙋмѣ́нїѧ ,꙳ про́званъ бы́въ сᲂфро́нїе .꙳ цѣлᲂмꙋ́дръ бы́лъ є҆сѝ .꙳ дѣ́теленъ и҆ пра́веденъ .꙳ мꙋ́жественъ и҆ разꙋ́менъ .꙳ дᲂбрᲂдѣ́тельми кᲂне́чными , до́бле вѣнча́емь .꙳ и҆ пребы́сть прᲂцвѣта́ѧ во ѡ҆бᲂи́хъ ,꙳ дш҃е́ю же и҆ тѣ́лᲂмъ ,꙳ ꙗ҆́кѡ стрᲂи́тель и҆зрѧ́денъ . И҆з̾ ᲂу҆́стъ бг҃ᲂслᲂве́сныхъ ,꙳ бг҃ᲂсло́вна вᲂз̾гремѣ́лъ є҆сѝ ᲂу҆че́нїѧ ,꙳ сᲂфро́нїе всебл҃же́нне .꙳ бг҃ᲂсло́вивъ ꙗ҆́снѡ ѻ҆ц҃а без̾нача́льна ,꙳ и҆ сᲂбез̾нача́льна сн҃а ,꙳ и҆ дх҃а ст҃а́гѡ сᲂприснѡсꙋ́щна ,꙳ во є҆ди́нствѣ трⷪ҇цꙋ ,꙳ и҆ є҆ди́ницꙋ въ трⷪ҇цѣ ,꙳ бг҃а є҆ди́нагѡ сꙋщество́мъ тацѣ́мже . Пло́тїю по сᲂста́вꙋ ,꙳ сᲂвᲂкꙋпле́на беспло́тнаго ,꙳ и҆ ѻ҆ц҃ꙋ сᲂбез̾нача́льна сло́ва премꙋ́дре ,꙳ крᲂмѣ̀ и҆змѣне́нїѧ и҆ сли́тїѧ мꙋ́дрѣ наꙋчи́лъ є҆сѝ .꙳ дѣ́йствꙋюща же сꙋгꙋ́бѡ ,꙳ по ѡ҆бᲂю̀ є҆стествꙋ̀ .꙳ и҆́мже слага́етсѧ ,꙳ и҆ в̾ ни́хже ви́дитсѧ .꙳ є҆ди́нъ сы́и нераздѣ́ленъ сꙋ́щемꙋ ,꙳ семꙋ̀ и҆ ѻ҆́нᲂмꙋ разꙋмѣва́емь . =сла́ва , и҆ нн҃ѣ , боⷢ҇ . Ѻ҆дᲂжде́ньми пречⷭ҇таѧ ,꙳ дх҃а бл҃гᲂда́тїю ,꙳ мᲂю̀ мы́сль ᲂу҆ѧснѝ ,꙳ ꙗ҆́же ка́плю ро́ждьшаѧ хрⷭ҇та̀ не и҆змѣ́рнꙋю ,꙳ без̾зако́нїѧ чл҃кѡмъ ,꙳ щедро́тами ѡ҆мы́вшꙋю .꙳ и҆ затвᲂрѝ и҆сто́чникъ страсте́й мᲂи́хъ .꙳ и҆ пᲂто́кꙋ спᲂдо́би мѧ пи́щи ,꙳ приснѡживо́тнᲂмꙋ мл҃твами сѝ .= крⷭ҇тᲂбоⷢ҇ . Н=а крⷭ҇тѣ̀ ꙗ҆́кѡ ᲂу҆зрѣ̀ ,꙳ пригвᲂжде́на гдⷭ҇и ,꙳ а҆́гница и҆ мт҃и твᲂѧ̀ дивлѧ́шесѧ .꙳ и҆ что̀ видѣ́нїе взыва́ше ,꙳ сн҃е вᲂз̾желѣ́нне ,꙳ сїѧ̀ тебѣ̀ непᲂкᲂри́выи сᲂбо́ръ вᲂз̾дадѐ без̾зако́нныи ,꙳ и҆́же мно́гихъ твᲂи́хъ чꙋде́съ наслажде́исѧ .꙳ но сла́ва неи҆з̾гл҃аннᲂмꙋ ,꙳ сᲂше́ствїю тѝ влⷣко .

На ᲂу҆́трени . ѻ҆́ба кано́на , во ѻ҆кта́и . и҆ ст҃лю , на д҃ . кано́нъ , є҆мꙋ́же краегране́сїе си́це : цѣлᲂмꙋ́дрїѧ пᲂю̀ тезᲂи҆мени́тагѡ , и҆́скреню же́ртвꙋ . твᲂре́нїе ѳеѡ́фанᲂво . гла́съ , д҃ . пѣ́снь , а҃ . і҆рмо́съ . Ѿве́рзꙋ ᲂу҆ста̀ мᲂѧ̀ , и҆ напо́лнѧтсѧ дх҃а , и҆ сло́во ѿры́гнꙋ цр҃цѣ мт҃ри , и҆ ꙗ҆влю́сѧ свѣ́тлѡ тᲂржествꙋ́ѧ , и҆ вᲂспᲂю̀ ра́дꙋѧсѧ тᲂѧ̀ чꙋдеса̀ .

запѣ́въ : Ст҃лю хрⷭ҇то́въ сᲂфро́нїе , мᲂлѝ бг҃а ѡ҆ на́съ . Цѣлᲂмꙋ́дренѡ преплы́лъ є҆сѝ , цѣлᲂмꙋ́дрїѧ пꙋчи́нꙋ , вѣ́тры дх҃о́вными направлѧ́емь . и҆ со́бралъ є҆сѝ мно́га бᲂга́тства , мꙋ́дрᲂсти дарᲂва́нїѧ , ѻ҆́ч҃е сᲂфро́нїе . Ꙗ҆́кѡ свѣти́льникъ бы́сть хрⷭ҇то́вꙋ вᲂскрⷭ҇нїю , и҆ первᲂпресто́льникъ бжⷭ҇твенъ , бжⷭ҇твенᲂмꙋ гро́бꙋ , ѡ҆бᲂгати́вшемꙋ и҆сто́чникъ без̾сме́ртїѧ , хрⷭ҇та̀ вᲂз̾дви́гшагѡ паде́нїе ро́да на́шегѡ . Свѣ́тлᲂстїю слᲂве́съ , и҆ ᲂу҆ма̀ ѻ҆стрᲂто́ю ми́ръ ᲂу҆ѧсни́лъ є҆сѝ . бг҃ᲂсло́вивъ ꙗ҆́снѡ , трисᲂста́внагѡ бжⷭ҇тва̀ сꙋщество̀ , є҆ди́ницꙋ тричи́сленꙋю , ѻ҆́ч҃е сᲂфро́нїе . Глаго́лᲂмъ вѣща́нїе твᲂѐ , и҆ ᲂу҆че́нїемъ наро́читыѧ гꙋ́сли , про́йде землены́ѧ кᲂнцы̀ . та́инствꙋ смᲂтре́нїѧ сло́ва ᲂу҆ча́ще , ѻ҆́ч҃е бг҃ᲂпᲂсти́жне . боⷢ҇ . Сы́и є҆стество́мъ несᲂзда́ненъ , и҆ ѻ҆ц҃ꙋ сᲂпрⷭ҇нᲂсꙋ́щенъ , и҆ време́нъ превы́ш̾шїи , и҆ превѣ́чныи , и҆з̾ тебѐ влⷣчце зи́ждемь , и҆ пᲂд̾ лѣ́тᲂмъ ꙗ҆́кѡ чл҃къ быва́етъ , спаса́ѧ чл҃ка .

пѣ́снь , г҃ . і҆рмо́съ . Немꙋ́дрᲂстїю ни си́лᲂю , ни бᲂга́тствᲂмъ хва́лимсѧ , но твᲂе́ю ѻ҆́ч҃ею сᲂста́внᲂю мꙋ́дрᲂстїю бж҃їею . ꙗ҆́кѡ нѣ́сть ст҃а па́че тебѐ чл҃кᲂлю́бче . Оу҆твержа́ема па́лицею слᲂве́съ твᲂи́хъ прпⷣбне , стремле́нїѧ ѕлᲂчести́выхъ , и҆ бг҃ᲂбо́рныхъ є҆ресе́й , вᲂз̾ража́етъ ѿгᲂнѧ́щи цр҃кви хрⷭ҇то́ва . Пᲂбᲂри́въ по чⷭ҇тнѣ́мъ бг҃ᲂно́се прᲂпᲂвѣ́данїи . пᲂказа́сѧ пᲂбѣди́тель по́мᲂщїю дх҃а , мꙋ́дрѣ ᲂу҆крѣплѧ́емь , ѻ҆́ч҃е сᲂфро́нїе . Оу҆мертви́въ всѐ тлѣ́емᲂе пло́ти сладᲂстра́стїе , нетлѣ́ннꙋю дш҃ꙋ за бл҃гᲂче́стїе ѡ҆живи́лъ є҆сѝ . и҆ сїю̀ пᲂказа́лъ є҆сѝ бжⷭ҇твеныи ѻ҆рга́нъ . Бг҃ᲂслᲂве́сныи и҆ кра́сныи и҆ медᲂто́чныи ꙗ҆зы́къ тво́й , сло́ва рѣ́ки и҆стᲂча́етъ бг҃ᲂпᲂсти́жне . бжⷭ҇твена ᲂу҆че́нїѧ всѣ́мъ и҆злива́ѧ . боⷢ҇ . Тѧ̀ ро́ждьшꙋю бг҃а , бцⷣе сла́вимъ . пᲂрᲂжде́нїемъ твᲂи́мъ , и҆менᲂва́нїе пᲂдо́бнѡ прїе́мше и҆ зва́нїѧ на себѣ̀ пречⷭ҇таѧ влⷣчце .

сѣда́ленъ . гла́съ , д҃ . Слᲂвесы̀ ᲂу҆краси́лъ є҆сѝ цр҃кᲂвь хрⷭ҇то́вꙋ , дѣ́лы сᲂблю́дъ є҆́же по ѻ҆́бразꙋ бж҃їю , сᲂфро́нїе прпⷣбне . прᲂсїѧ́ бо в̾ ми́рѣ , є҆́же въ тебѣ̀ цѣлᲂмꙋ́дрїе , дарᲂва́нїѧ ᲂу҆че́нїи ѡ҆блиста́ющи всѣ́мъ , с̾ любо́вїю пра́зднꙋющимъ ѻ҆́ч҃е па́мѧть твᲂю̀ .= сла́ва , и҆ ны́нѣ , боⷢ҇ . Ѻ҆бнᲂви́ла є҆сѝ чⷭ҇таѧ , бжⷭ҇твенымъ ржⷭ҇тво́мъ сѝ , и҆стлѣ́вшее страстьмѝ , земленᲂро́дныхъ ме́ртвенᲂе сꙋщество̀ . и҆ вᲂста́вила є҆сѝ всѣ́хъ , ѿ сме́рти к̾ жи́зни нетлѣ́нїѧ . тѣ́мже тѧ̀ по́дᲂлгꙋ ᲂу҆бл҃жа́емъ всѝ , дв҃о препрᲂсла́вленаѧ , ꙗ҆́кᲂже прᲂрекла̀ є҆сѝ . крⷭ҇тᲂбоⷢ҇ . Н=а крⷭ҇тѣ̀ тѧ̀ вᲂз̾несе́на ꙗ҆́кѡ ᲂу҆зрѣ̀ , чⷭ҇таѧ мт҃и твᲂѧ̀ сло́ве бж҃їи , мт҃рьски рыда́ющи вѣща́ше , что̀ но́вᲂе и҆ стра́ннᲂе сѐ сн҃е чꙋ́до , ка́кѡ жи́знь всѣ́хъ вкꙋша́еши сме́рти , ѡ҆живи́ти ᲂу҆ме́ршїѧ хᲂтѧ̀ ꙗ҆́кѡ млрⷭ҇дъ .

пѣ́снь , д҃ . і҆рмо́съ . Сѣдѧ́и во сла́вѣ , на прⷭ҇то́лѣ бжⷭ҇твеннѣ , на ѻ҆́блацѣ ле́гцѣ , прїи́де і҆с҃ъ пребжⷭ҇твенныи , ѿ пречⷭ҇тыѧ дв҃ы , спасе́ же вᲂпїю́щїѧ , сла́ва хрⷭ҇тѐ си́лѣ твᲂе́й . Є҆ди́нѡ без̾нача́льно сꙋщество̀ в̾ тре́хъ и҆пᲂста́сѣхъ , сво́йствы сᲂверше́ными , ты̀ ѻ҆́ч҃е мꙋ́дрѣ прᲂпᲂвѣ́далъ є҆сѝ . раздѣлѧ́емᲂе непресѣко́мо , сᲂвᲂкꙋплѧ́емо же неслїѧ́ннѡ , хᲂтѣ́нїемъ є҆ди́нѣмъ и҆ бжⷭ҇тво́мъ . И҆мѣ́ѧ цѣлᲂмꙋ́дренꙋ мы́сль , и҆ ᲂу҆́мъ цѣлᲂмꙋ́дрѣйшїи , несмꙋще́нїе мꙋдрᲂва́лъ є҆сѝ ѻ҆́ч҃е , ни прелᲂже́нїе ни слїѧ́нїе , сᲂвᲂкꙋплѧе́мᲂмъ непрело́жнѡ , двѣма̀ є҆стество́ма во є҆ди́нᲂмъ хрⷭ҇тѣ̀ , є҆динᲂро́днѣмъ пребл҃же́нне . Прᲂсвѣща́емь бжⷭ҇твенѣ , прᲂсвѣще́нїемъ дх҃а , лю́тꙋю враждꙋ̀ нестѡ́рїевꙋ разᲂри́лъ є҆сѝ , то́южде во́лею и҆ ра́зꙋмᲂмъ , и҆́же сᲂє҆дине́нїе прᲂпᲂвѣ́давшаго , хрⷭ҇то́вꙋ ѡ҆бᲂю̀ є҆стествꙋ̀ . Запале́нїе пᲂпали́лъ є҆сѝ бг҃ᲂмꙋ́дре , ѻ҆гне́мъ ᲂу҆че́нїи свᲂи́хъ , ѿмета́ющагᲂсѧ двѣ̀ бы́ти хрⷭ҇то́вѣ во́ли . разли́чныхъ сꙋще́ствъ ꙗ҆́же к̾ себѣ̀ , дѣ́йствїи в̾кꙋ́пѣ сꙋгꙋ́быми , ѻ҆́ч҃е прпⷣбне . боⷢ҇ . Оу҆краси́сѧ па́че всеѧ̀ а҆́нг҃льскїѧ красᲂты̀ . ꙗ҆́кѡ ро́ждьши си́мъ ѻ҆трᲂкᲂви́це твᲂрца̀ и҆ гдⷭ҇а , ѿ твᲂи́хъ пречⷭ҇тыхъ крᲂве́й вᲂплᲂща́ема и҆збавлѧ́ющаго всѧ̀ тᲂгѡ̀ сла́вѧщїѧ .

пѣ́снь , є҃ . і҆рмо́съ . Нечести́вїи не ᲂу҆́зрѧтъ сла́вы твᲂеѧ̀ хрⷭ҇тѐ , но мы́ тѧ є҆динᲂро́дне ѻ҆́ч҃ее заре́нїе сла́вы бж҃їѧ . ѿ́ нᲂщи ᲂу҆́треннююще , вᲂспѣва́емъ тѧ милᲂсе́рде . Честно́е вᲂскрⷭ҇нїе , и҆ гро́бъ живо́тныи , неᲂу҆кло́ннᲂю любо́вїю зрѧ̀ , бг҃ᲂвидѣ́нїѧ пᲂче́рплъ є҆сѝ та́йна ᲂу҆че́нїѧ . и҆ вѣ́рнымъ пре́далъ є҆сѝ ст҃лю сїѧ́нїѧ . До кᲂнца̀ вᲂзлюби́лъ є҆сѝ є҆ди́нᲂгѡ бл҃га́гѡ , раз̾жже́гсѧ заре́ю мы́сленᲂю . и҆ и҆сто́чникъ и҆стᲂчи́лъ є҆сѝ нетлѣ́нїѧ , видѣ́нїи премꙋ́дре к̾ немꙋ̀ прᲂстира́ѧсѧ . Цр҃кви жива̀ и҆ ѡ҆дш҃евле́на бы́сть бж҃їѧ , ᲂу҆мертви́всѧ всѣ́мъ и҆́же на землѝ . сло́ва трапе́зꙋ ѡ҆би́льнꙋю стѧжа̀ прпⷣбне , и҆ свѣти́льникъ вѣ́ры . боⷢ҇ . Во двᲂю̀ разꙋмѣва́ема сꙋществꙋ̀ хрⷭ҇та̀ , сн҃а є҆динᲂро́днаго бж҃їѧ , без̾нача́льнагѡ пло́ть бы́вша , па́че сло́ва рᲂдила̀ є҆сѝ , бг҃ᲂмт҃и прⷭ҇нѡ дв҃о .

пѣ́снь , ѕ҃ . і҆рмо́съ . Пᲂжрꙋ́ти со́ гласᲂмъ хвале́нїѧ гдⷭ҇и , цр҃кви вᲂпїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Бᲂга́тнѡ и҆злїѧ́сѧ бл҃гᲂда́ть дх҃а прест҃а́гѡ , бг҃ᲂмꙋ́дре во ᲂу҆стнꙋ̀ твᲂе́ю . тѣ́мже вѣща́нїе твᲂи́хъ слᲂве́съ , рѣ́чнымъ пᲂдо́битсѧ быстрина́мъ . Ꙗ҆́кѡ фи́никъ в̾ дᲂмꙋ̀ гдⷭ҇ни прᲂцвѣ́лъ є҆сѝ . бл҃гᲂпло́дїемъ слᲂве́съ , и҆ чи́стымъ житїе́мъ наслажда́ѧ срⷣца̀ , ст҃лю вѣ́рнѡ чтꙋ́щимъ тѧ̀ . Оу҆мерщвѧ́етсѧ живо́тнымъ ѻ҆рꙋ́жїемъ , слᲂве́съ твᲂи́хъ , є҆рети́ческїи сᲂбо́ръ . и҆ сꙋро́вᲂе ѡ҆пᲂлче́нїе , бг҃ᲂбо́рецъ закала́емѡ ᲂу҆мерщвѧ́етсѧ , ᲂу҆че́нїи твᲂи́хъ мече́мъ . боⷢ҇ . Пᲂе́мъ бцⷣе чⷭ҇тᲂе ржⷭ҇тво̀ твᲂѐ , и҆́мже спаса́емсѧ всѝ , сме́рти ᲂу҆лᲂвле́нїѧ , и҆ лю́тагѡ грѣха̀ , и҆ ᲂу҆́зъ а҆́дᲂвыхъ и҆збавлѧ́емсѧ .

пѣ́снь , з҃ . і҆рмо́съ . Спасы́и во ѻ҆гнѝ а҆враа́мскїѧ сѝ дѣ́ти , и҆ халдѣ́и ᲂу҆би́въ , ꙗ҆́же без̾ пра́вды пра́ведныѧ ᲂу҆лᲂвлѧ́хꙋ , препѣ́тыи гдⷭ҇и бж҃е ѻ҆ц҃ъ бл҃гᲂслᲂве́нъ є҆сѝ . Свы́ше си́лᲂю , є҆рети́ческимъ ꙗ҆зыкᲂвре́дїемъ прᲂтивлѧ́ѧсѧ мꙋ́дре . пᲂбѣдᲂно́сецъ бы́въ , вᲂпїѧ́ше , препѣ́тыи гдⷭ҇и бж҃е ѻ҆ц҃ъ бл҃гᲂслᲂве́нъ є҆сѝ . Ве́сь вᲂзлᲂже́нъ бг҃ᲂви , по́стническими наслажде́нїи прелѣта́ѧ мꙋ́дре . са́дъ сво́й насади́лъ є҆сѝ , дᲂбрᲂдѣ́телей пᲂꙋче́нїе , бг҃ᲂви и҆́же в̾ вы́шнихъ ѡ҆ст҃и́сѧ . Зако́нꙋ пᲂвинꙋ́ѧсѧ хрⷭ҇то́вꙋ , свᲂеѧ̀ хи́трᲂсти бᲂга́тство тре́бꙋющимъ бл҃гᲂче́стнѡ , бг҃ᲂмꙋ́дре раз̾да́лъ є҆сѝ . вᲂспѣва́ѧ препѣ́тыи гдⷭ҇и бж҃е ѻ҆ц҃ъ бл҃гᲂслᲂве́нъ є҆сѝ . боⷢ҇ . Ѡ҆ст҃и́вши дш҃ꙋ , преѡ҆чи́стивши тѣ́ло , наи́тїемъ натѧ̀ ст҃а́гѡ дх҃а пренепᲂро́чнаѧ , вы́шнѧгѡ си́лꙋ во ᲂу҆тро́бѣ свᲂе́й заче́нши , рᲂдила̀ є҆сѝ без̾ сѣ́мене .

пѣ́снь , и҃ . і҆рмо́съ . Ѻ҆́трᲂки бл҃гᲂчести́выѧ в̾ пещѝ , ржⷭ҇тво̀ бг҃ᲂро́диче спасло̀ є҆́сть . тᲂгда̀ ᲂу҆́бѡ ѡ҆бразꙋ́емо , ны́нѣ же дѣ́йствꙋемо , вселе́ннꙋю всю̀ вᲂз̾дви́же пѣ́ти , гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки . Ст҃льскимъ сщ҃еннᲂдѣ́йствᲂмъ , мѵ́рѡмъ ѡ҆ст҃и́сѧ бл҃гᲂда́тнымъ . и҆дѣ́же ꙗ҆ви́сѧ ми́рᲂви спасе́нїе , сщ҃е́нствᲂвавъ премꙋ́дре ѻ҆́ч҃е сᲂфро́нїе . гдⷭ҇а по́йте зᲂвы́и , и҆ превᲂзнᲂси́те є҆гѡ̀ во́ вѣки . Премꙋ́дрᲂсть пᲂчита́ѧ лꙋ́чшꙋю , вѣнце́мъ бл҃гᲂда́ти вѣнча́сѧ . сла́вꙋ неꙋвѧда́емꙋ , и҆ бᲂга́тство неѿє́млемо , премꙋ́дрᲂсти сла́вне да́ръ прїе́мъ . гдⷭ҇а по́йте зᲂвы́и , и҆ превᲂзнᲂси́те є҆гѡ̀ во́ вѣки . Сщ҃еннᲂлѣ́пнѡ сщ҃е́нныи ᲂу҆чи́телю , въ бжⷭ҇твенꙋю пра́вдꙋ ѡ҆дѣ́ѧвсѧ . ᲂу҆пра́вилъ є҆сѝ пребᲂга́те ѻ҆́ч҃е , пра́веднѣйшими влⷣчне ста́до , слᲂвесы̀ и҆ дѣѧ́нїи . гдⷭ҇а по́йте зᲂвы́и , и҆ превᲂзнᲂси́те є҆гѡ̀ во́ вѣки . Великᲂлѣ́пнѡ и҆ па́че сло́ва , сло́во ѻ҆ц҃ꙋ ѻ҆́ч҃е сᲂбез̾нача́льно , сло́во тебѣ̀ дарᲂва̀ , слᲂвеса̀ и҆злага́юще . и҆ ꙗ҆зыкᲂбо́лїѧ рѣша́ще є҆ресе́мъ . гдⷭ҇а по́йте вᲂпїѧ̀ , и҆ превᲂзнᲂси́те є҆гѡ̀ во́ вѣки . боⷢ҇ . Ст҃ᲂлѣ́пна пᲂказа́сѧ цр҃кᲂвь сло́ва , и҆́же всѧ́кѡ зда́нїе ѡ҆ст҃и́вшагѡ . гᲂра̀ тꙋчна́ѧ ст҃а́ѧ . гᲂра̀ пресвѣ́тлаѧ , блгⷭ҇ве́наѧ влⷣчце всепѣ́таѧ є҆ди́на . тѣ́мже тѧ̀ бг҃ᲂмт҃и пᲂе́мъ , и҆ превᲂзно́симъ во́ вѣки .

пѣ́снь , ѳ҃ . і҆рмо́с̾ . Ка́мень нерꙋкᲂсѣ́чныѧ гᲂры̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , сᲂвᲂкꙋпи́въ раз̾стᲂѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Рече́нїѧ и҆з̾ ᲂу҆стнꙋ̀ твᲂе́ю бжⷭ҇твенᲂю , пред̾грѧдꙋ́ща бг҃ᲂгл҃ива , бл҃гᲂчести́выхъ мы́сли ᲂу҆слажда́ютъ бл҃гᲂда́тїю . ꙗ҆́кᲂже со́тъ ка́плющїи , разꙋ́мнᲂе бл҃гᲂлѣ́пїе . Внꙋ́трь нбⷭ҇ныхъ незахᲂди́мыхъ живе́ши бг҃ᲂгла́се , ᲂу҆ всѣ́хъ влⷣки и҆ цр҃ѧ . и҆дѣ́же ликꙋ́ютъ а҆́нг҃льскїѧ свѣ́тлᲂсти , и҆ ст҃ы́хъ во́инства . Жи́знь прᲂхᲂдѧ̀ ѻ҆́ч҃е на землѝ а҆́нг҃льскꙋю , а҆́нг҃льскᲂмꙋ на́ нб҃сѣхъ спᲂдо́билсѧ є҆сѝ бл҃же́нствꙋ . и҆дѣ́же хрⷭ҇та̀ мо́лиши , спасти́сѧ всѣ́мъ пᲂю́щимъ тѧ̀ . Ꙗ҆́кᲂже а҆рама́тнїи сᲂсꙋ́ди , лани́тѣ твᲂѝ бг҃ᲂмꙋ́дре , нардапистикі́ѧ мнᲂгᲂцѣ́нны , премꙋ́дрᲂсти и҆спо́лнь ꙗ҆ви́сѧ а҆лава́стръ . тѣ́ло хрⷭ҇то́во честно́е , пᲂма́заѧ твᲂи́ми ᲂу҆че́нїи . боⷢ҇ . Ѻ҆́блакъ тѧ̀ лего́къ дв҃о , и҆са́їа зрѧ́ше . на тѧ́ бо гдⷭ҇ь наше́дъ , низ̾лᲂжѝ всѧ̀ рꙋкᲂтвᲂре́нїѧ . и҆ свᲂѐ разꙋмѣ́нїе тѧ̀ пᲂю́щимъ ꙗ҆ви́лъ є҆́сть .

И҆́же во ст҃ы́хъ ѻ҆ц҃а на́шегѡ є҆ѵ̾ѳѵ́мїѧ а҆рхїєпкⷭ҇па вели́кагѡ нᲂва́града , чꙋдᲂтво́рца . =На гдⷭ҇и вᲂзва́хъ , стихѣ́ры . гла́съ , и҃ . поⷣ . ѽ пресла́внᲂе чꙋ́до . Ѿ= ю҆́нᲂсти мꙋ́дрᲂсти прилѣжа́въ ,꙳ ст҃лю є҆ѵ̾ѳѵ́мїе .꙳ и҆ бжⷭ҇твенᲂе писа́нїе ꙗ҆́кѡ и҆з̾вы́къ прпⷣбне .꙳ ѿлᲂжи́лъ є҆сѝ всѧ̀ , и҆́же ю҆́нᲂсти ведꙋ́щїѧ сла́сти ,꙳ хрⷭ҇то́ва ꙗ҆́рма и҆́го нᲂси́ти и҆зво́лилъ є҆сѝ .꙳ ѿ ню́дꙋ же пᲂказа́сѧ сᲂсꙋ́дъ и҆з̾бра́нъ .꙳ и҆ сегѡ̀ ра́ди сꙋ́дъ бж҃їи ,꙳ тѧ̀ ст҃лѧ лю́демъ свᲂи́мъ пᲂставлѧ́етъ .꙳ въ правᲂсла́вїи наставлѧ́юща , ста́до свᲂѐ преѡ҆сщ҃е́нне . Премꙋ́дрᲂсти и҆ ра́зꙋма , ꙗ҆́кѡ и҆спо́лненъ бы́въ бг҃ᲂбл҃же́нне ,꙳ хрⷭ҇тᲂи҆мени́тымъ лю́демъ ,꙳ и҆зрѧ́дныи па́стырь бы́лъ є҆сѝ ,꙳ тѣ́хъ на па́жити бл҃гᲂче́стїѧ наставлѧ́ѧ .꙳ непᲂкарѧ́ющихжесѧ премꙋ́дрѣ и҆справлѧ́ѧ .꙳ тѣ́мже ны́нѣ ча́да твᲂѧ̀ ст҃лю є҆ѵ̾ѳѵ́мїе ,꙳ па́мѧть твᲂю̀ пра́зднꙋюще ,꙳ вᲂспѣва́емъ хрⷭ҇та̀ бг҃а на́шегѡ ,꙳ и҆́же тебѐ прᲂсла́вльшагѡ . Бл҃гᲂче́стнѡ житїѐ на землѝ ,꙳ ꙗ҆́кѡ а҆́нг҃лъ по́живъ ст҃лю ,꙳ цр҃кᲂвь бжⷭ҇твенꙋю ᲂу҆краси́лъ є҆сѝ ,꙳ твᲂи́ми честны́ми ᲂу҆че́нїи ,꙳ лю́ди и҆́же тебѣ̀ бг҃ᲂмъ врꙋче́нныѧ ,꙳ мꙋ́дрѣ наставлѧ́еши к̾ тᲂгѡ̀ разꙋмѣ́нїю .꙳ тѣ́мже и҆ хрⷭ҇то́съ тебѐ , нето́кмѡ в̾ живᲂтѣ̀ ,꙳ но и҆ по преставле́нїи прᲂславлѧ́етъ .꙳ и҆ даро́въ чꙋдесе́мъ спᲂдᲂблѧ́етъ , є҆ди́нъ чл҃кᲂлю́бецъ .

сла́ва . гла́съ , ѕ҃ . Сто́лпъ непᲂкᲂлѣби́мъ , цр҃кви хрⷭ҇то́вѣ ѻ҆́ч҃е бы́лъ є҆сѝ . тѣ́мже бжⷭ҇твенᲂю ре́внᲂстїю раз̾жже́гсѧ , дерзнᲂве́ннѡ непра́веднᲂе сᲂчета́нїе , пра́веднѡ разᲂрѧ́еши . и҆ наꙋча́еши всѣ́хъ , а҆пⷭ҇льскимъ и҆ ѻ҆те́ческимъ преда́нїемъ пᲂслѣ́дᲂвати . и҆ ѿ любᲂдѣ́йствїѧ , ꙗ҆́кѡ ѿ ѕмїѧ̀ ѿбѣ́гᲂвати . непᲂкарѧ́ющїѧжесѧ твᲂемꙋ̀ ст҃о́мꙋ ᲂу҆че́нїю , сꙋдꙋ̀ бж҃їю тѣ́хъ предае́ши . є҆го́же мᲂлѝ а҆рхїєре́ю є҆ѵ̾ѳѵ́мїе , спасти́сѧ всѣ́мъ , и҆́же любо́вїю пᲂчита́ющимъ сщ҃е́ннꙋю па́мѧть твᲂю̀ .

и҆ нн҃ѣ , боⷢ҇ . Кто̀ тебѐ небл҃жи́тъ прест҃а́ѧ дв҃це ; и҆лѝ кто̀ невᲂспѣва́етъ твᲂегѡ̀ пречи́стагѡ ржⷭ҇тва̀ ; без̾лѣ́тныи бо ѿ ѻ҆ц҃а вᲂз̾сїѧ́въ сн҃ъ є҆динᲂро́дныи , то́й же ѿ тебѐ чи́стыѧ про́йде , несказа́ннѡ вᲂпло́щьсѧ . є҆стество́мъ бг҃ъ сы́и , и҆ є҆стество́мъ бы́въ чл҃къ на́съ ра́ди . не во двᲂю̀ лицꙋ̀ раздѣлѧ́емъ . но во двᲂю̀ є҆стествꙋ̀ несмѣ́сно пᲂзнава́емъ . тᲂгѡ̀ мᲂлѝ чи́стаѧ и҆ всебл҃же́ннаѧ , пᲂми́лᲂватисѧ дш҃а́мъ на́шимъ . та́же , вы́хᲂдъ . прᲂки́менъ , и҆ чте́нїѧ , дне́ви . и ст҃о́мꙋ .

Ѿ при́тчей , чте́нїе .

Па́мѧть пра́веднагѡ с̾ пᲂхвала́ми , и҆ блгⷭ҇ве́нїе гдⷭ҇не на главѣ̀ є҆гѡ̀ . бл҃же́нъ чл҃къ , и҆́же ѡ҆брѣ́те мꙋ́дрᲂсть , и҆ сме́ртенъ и҆́же ᲂу҆вѣ́дѣ ра́зꙋмъ . лꙋ́чше бо сїю̀ кꙋпᲂва́ти , не́жели зла́та и҆ сребра̀ сᲂкро́вища . честнѣ́йши бо є҆́сть ка́менїѧ мнᲂгᲂцѣ́нна , все́же чⷭ҇тно́е , недᲂсто́йнѡ є҆́сть є҆́й . дᲂлгᲂта́ бо дні́й , и҆ лѣ́та живᲂта̀ , в̾ десни́цѣ є҆ѧ̀ , и҆ в̾ шꙋ́ицѣ є҆ѧ̀ бᲂга́тство и҆ сла́ва . ѿ ᲂу҆́стъ бо є҆ѧ̀ и҆схо́дитъ пра́вда , зако́нъ же и҆ млⷭ҇ть , на ꙗ҆зы́цѣ но́ситъ . пᲂслꙋ́шайте ᲂу҆́бѡ менѐ , ѽ ча́да , честна́ѧ бо рекꙋ̀ , и҆ бл҃же́нъ чл҃къ , и҆́же пꙋтѝ мᲂѧ̀ храни́тъ . и҆схо́ди бо мᲂѝ , и҆схо́ди живᲂта̀ , и҆ ᲂу҆гᲂто́ваетсѧ хᲂтѣ́нїе ѿ́ гдⷭ҇а . сегѡ̀ ра́ди мᲂлю̀ ва́съ , и҆ пред̾лага́ю мо́й гла́съ сн҃ᲂво́мъ чл҃ческимъ . ꙗ҆́кѡ а҆́зъ премꙋ́дрᲂсть всели́хъ , сᲂвѣ́тъ и҆ ра́зꙋмъ , и҆ смы́слъ а҆́зъ призва́хъ . мо́й сᲂвѣ́тъ и҆ ᲂу҆тверже́нїе , мо́й ра́зꙋмъ , мᲂѧ́ же крѣ́пᲂсть . а҆́зъ менѐ лю́бѧщїѧ люблю̀ , и҆ взыска́ющїи менѐ ѡ҆брѧ́щꙋтъ бл҃гᲂда́ть . разꙋмѣ́йте ᲂу҆́бѡ неѕло́бивїи кᲂва́рство , ненака́занїи же прилага́йте срⷣца̀ . пᲂслꙋ́шайте менѐ и҆ па́ки , честна́ѧ бо рекꙋ̀ , и҆ ѿве́рзꙋ ѿ ᲂу҆сте́нъ мᲂи́хъ пра́вдꙋ . ꙗ҆́кѡ и҆́стинѣ пᲂꙋча́етсѧ гᲂрта́нь мо́й , ме́рзски же предо мно́ю ᲂу҆стны̀ лжи́выхъ . с̾ пра́вдᲂю всѝ глаго́лы ᲂу҆́стъ мᲂи́хъ , ни что́же в̾ ни́хъ стро́пᲂтно ни развращено̀ . всѧ̀ пра́ва сꙋ́ть разꙋмѣва́ющимъ и҆́стинꙋ , и҆ здра́ва ѡ҆брѣта́ющимъ ра́зꙋмъ . наꙋчꙋ́ бо ва́съ и҆́стинѣ , да бꙋ́детъ ѡ҆́ гдⷭ҇ѣ наде́жа ва́ша , и҆ и҆спо́лнитесѧ дх҃а .

Ѿ= при́тчей , чте́нїе .=

=Ѿ =ᲂу҆́стъ пра́веднагѡ ка́плетъ премꙋ́дрᲂсть , ꙗ҆зы́къ же непра́веднагѡ пᲂтреби́тсѧ . ᲂу҆сты̀ мꙋже́й пра́ведныхъ свѣ́дѧтъ бл҃гᲂда́ть , ᲂу҆ста́ же нечести́выхъ разᲂрѧ́тсѧ . мѣ́рила ле́стна ме́рзᲂсть пре́д̾ гдⷭ҇емъ , мѣ́рило же пра́ведно прїѧ́тнѡ є҆мꙋ̀ є҆́сть . и҆дѣ́же а҆́ще вни́детъ дᲂсажде́нїе , тꙋ̀ и҆ бесче́стїе . ᲂу҆ста̀ смире́ныхъ пᲂꙋча́тсѧ премꙋ́дрᲂсти , кᲂнчи́на же пра́ведныхъ наста́витъ и҆́хъ . и҆ пᲂпᲂлзнᲂве́нїе закᲂнᲂпрестꙋ́пникъ плѣни́тъ ѧ҆̀ . непо́льзꙋетъ и҆мѣ́нїе в̾ дн҃ь ꙗ҆́рᲂсти , пра́вда же и҆збавлѧ́етъ ѿ сме́рти . ᲂу҆мира́ѧ пра́ведныи , ѡ҆ставлѧ́етъ пᲂпече́нїе . ме́рзᲂстна же быва́етъ и҆ на́гла нечести́выхъ пᲂги́бель . пра́вда непᲂро́чнагѡ и҆справлѧ́етъ пꙋтѝ , нече́стїемъ же свᲂи́мъ па́даетъ без̾зако́нныи . пра́вда мꙋже́й пра́ведныхъ и҆збавлѧ́етъ и҆́хъ , без̾сᲂвѣ́тїемъ же ᲂу҆лᲂвлѧ́ютсѧ закᲂнᲂпрестꙋ́пнїи . скᲂнча́вшꙋсѧ мꙋ́жꙋ пра́веднꙋ , не ѡ҆скꙋдѣ́етъ наде́жа , хвала́ же нечести́выхъ пᲂтреби́тсѧ . пра́ведникъ ѿ лᲂви́твы и҆збѣ́гнетъ , вмѣ́сто же є҆гѡ̀ предае́тсѧ нечести́выи . во ᲂу҆стѣ́хъ закᲂнᲂпрестꙋ́пныхъ сѣ́ть гражда́нѡмъ , чꙋ́вство же пра́ведныхъ бл҃гᲂспѣ́шнѡ . во бл҃гᲂсти пра́ведныхъ и҆спра́витсѧ гра́дъ , и҆ въ пᲂги́бели нечести́выхъ ра́дᲂванїе . во бл҃гᲂслᲂве́нїи пра́ведныхъ вᲂз̾вы́ситсѧ гра́дъ , ᲂу҆сты́ же нечести́выхъ раскᲂпа́етсѧ . рꙋга́етсѧ гражда́нѡмъ лише́ныи ра́зꙋма . мꙋ́жь же мꙋ́дръ без̾мо́лвїе во́дитъ .

Ѿ= премꙋ́дрᲂсти сᲂло́мѡни , чте́нїе .=

Пра́ведникъ а҆́ще пᲂсти́гнетъ скᲂнча́тисѧ , въ пᲂко́й бꙋ́детъ . ста́рᲂсть бо честна̀ , немнᲂгᲂлѣ́тна , ни в̾ числѣ̀ лѣ́тъ и҆зᲂчте́на . сѣди́на же є҆́сть мꙋ́дрᲂсть чл҃кѡмъ , и҆ во́зрастъ ста́рᲂсти житїѐ нескве́рно . бл҃гᲂꙋго́денъ бг҃ᲂви бы́въ , и҆ вᲂз̾лю́бленъ бы́сть , и҆ живы́и пᲂсредѣ̀ грѣ́шникъ преста́висѧ . вᲂсхище́нъ бы́сть , да не ѕло́ба и҆змѣни́тъ ра́зꙋма є҆гѡ̀ , и҆лѝ ле́сть прельсти́тъ дш҃ꙋ є҆гѡ̀ , раче́нїе бо ѕло́е гꙋби́тъ до́браѧ , и҆ жела́нїе по́хᲂти премѣнѧ́етъ ᲂу҆́мъ неѕло́бивъ . скᲂнча́всѧ в̾ ма́лѣ , и҆спо́лни лѣ́та до́лга . ᲂу҆го́дна бо бѣ̀ гдⷭ҇ви дш҃а є҆гѡ̀ . сегѡ̀ ра́ди пᲂтща́сѧ ѿ среды̀ лꙋка́вствїѧ . лю́дїе же ви́дѣвше и҆ неразꙋмѣ́вше , ни пᲂлᲂжи́ша въ пᲂмышле́нїи такᲂва́гѡ , ꙗ҆́кѡ бл҃гᲂда́ть и҆ млⷭ҇ть на прпⷣбныхъ є҆гѡ̀ , и҆ пᲂсѣще́нїе во и҆збра́нныхъ є҆гѡ̀ .

а҆́ще ли прилꙋчи́тсѧ въ нлⷣю . на литі́и . сла́ва . гла́съ , и҃ . Прїидѣ́те празднᲂлю́бцы , въ наро́читᲂмъ пра́здницѣ , до́брагѡ па́стырѧ и҆ ᲂу҆чи́телѧ дх҃о́внѣ тᲂржествꙋ́емъ . честны́ѧ є҆гѡ̀ мо́щи любе́знѡ зрѧ́ще , и҆ те́плᲂю вѣ́рᲂю взыва́юще , пребл҃же́нне ст҃лю є҆ѵ̾ѳѵ́мїе , мᲂлѝ хрⷭ҇та̀ бг҃а , ѡ҆ твᲂрѧ́щихъ ст҃ꙋ́ю па́мѧть твᲂю̀ .

и҆ ны́нѣ , боⷢ҇ . Без̾невѣ́стнаѧ дв҃о , ꙗ҆́же бг҃а без̾ сѣ́мени заче́ньши пло́тїю , мт҃и бг҃а вы́шнѧгѡ , твᲂи́хъ ра́бъ мᲂльбы̀ прїимѝ всенепᲂро́чнаѧ , всѣ́мъ пᲂдаю́щи ѡ҆чище́нїе прегрѣше́нїемъ . ны́нѣ на́ша мᲂле́нїѧ прїе́мши , мᲂлѝ спасти́сѧ всѣ́мъ на́мъ .

На стихо́внѣ , стихѣ́ры . гла́съ , а҃ . поⷣ . нбⷭ҇нымъ чино́мъ .= Б=г҃ᲂмꙋ́дре ст҃лю є҆ѵ̾ѳѵ́мїе ,꙳ ты̀ свᲂи́ми мᲂли́твами и҆ пᲂсто́мъ ,꙳ бдѣ́нїемъ же и҆ ми́лᲂстынею бг҃ᲂви сᲂедини́сѧ .꙳ тѣ́мже дх҃ꙋ прест҃о́мꙋ до́мъ и҆ жили́ще пᲂказа́сѧ .꙳ ѿ ню́дꙋ же а҆рхїє҆ре́й цр҃кви хрⷭ҇то́вѣ ѻ҆́ч҃е бы́лъ є҆сѝ ,꙳ мᲂлѝ спасти́сѧ дш҃а́мъ на́шимъ .

сти́хъ : ᲂу҆ста̀ мᲂѧ̀ вᲂз̾гл҃ютъ премꙋ́дрᲂсть ,꙳ и҆ пᲂꙋче́нїе срⷣца мᲂегѡ̀ ра́зꙋмъ . Пᲂвинꙋ́ѧсѧ за́пᲂвѣди бг҃а вседержи́телѧ ѿ ю҆́нᲂсти свᲂеѧ̀ ,꙳ тᲂгѡ̀ стᲂпа́мъ ст҃лю пᲂслѣ́дᲂвалъ є҆сѝ .꙳ тѣ́мже ѿ негѡ̀ бл҃гᲂда́ть прїѧ́лъ є҆сѝ ,꙳ дѣ́йствᲂвати пресла́внаѧ чꙋдеса̀ .꙳ и҆ дꙋ́хи прᲂгᲂни́ти лꙋка́выѧ ,꙳ ѿ всѣ́хъ и҆́же любо́вїю чтꙋ́щихъ тѧ̀ .

сти́хъ : ᲂу҆слы́шите сїѧ̀ всѝ ꙗ҆зы́цы ,꙳ внꙋши́те всѝ живꙋ́щїи по вселе́ннѣй . Кро́тᲂкъ и҆ неѕло́бивъ ,꙳ во все́й жи́зни свᲂе́й бы́лъ є҆сѝ ст҃лю є҆ѵ̾ѳѵ́мїе .꙳ сегѡ̀ ра́ди ѡ҆брѣ́те ꙗ҆́кᲂже в̾желѣ́лъ є҆сѝ ,꙳ на́ нб҃сѣхъ со ст҃ы́ми пᲂко́й .꙳ тѣ́мже пᲂчита́емъ ст҃ꙋ́ю па́мѧть твᲂю̀ ,꙳ вѣ́рᲂю пра́зднꙋюще бг҃ᲂбл҃же́нне и҆ всече́стне .

сла́ва . гла́съ , д҃ . Вели́кагѡ а҆рхїєре́ѧ є҆ѵ̾ѳѵ́мїѧ бл҃же́ннагѡ , сщ҃е́ннꙋю па́мѧть дне́сь сᲂверша́юще , бжⷭ҇твеными пѣ́сньми прїиди́те всѝ пᲂчте́мъ , ѡ҆ на́съ всегда̀ мᲂлѧ́щасѧ , низ̾пᲂсла́ти мно́жество щедро́тъ , и҆ спасе́нїе дш҃а́мъ на́шимъ . и҆ ны́нѣ , боⷢ҇ . Пᲂда́ждь ᲂу҆тѣше́нїе , свᲂи́мъ рабо́мъ всенепᲂро́чнаѧ , ᲂу҆тᲂлѧ́ющи лю́таѧ на ны̀ ѡ҆бстᲂѧ́нїѧ , всѧ́кїѧ ско́рби на́съ и҆з̾мѣнѧ́ющи . тѧ́ бо є҆ди́нꙋ тве́рдо и҆ и҆звѣ́стнѡ ѡ҆снᲂва́нїе и҆́мамы , и҆ твᲂѐ застꙋпле́нїе стѧжа́хᲂмъ , да непᲂстыди́мсѧ влⷣчце , тебѐ призыва́юще . пᲂтщи́сѧ на мл҃твꙋ тебѣ̀ вᲂпїю́щихъ , ра́дꙋисѧ влⷣчце всѣ́мъ пᲂмо́щнице , ра́дᲂсте и҆ пᲂкро́ве дш҃а́мъ на́шимъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , д҃ . И҆збра́нъ ѿ ю҆́нᲂсти бг҃ᲂви бы́въ , ст҃лю є҆ѵ̾ѳѵ́мїе . и҆ сегѡ̀ ра́ди а҆рхїє҆ре́йства са́нᲂмъ пᲂчте́нъ бы́въ , ᲂу҆па́слъ є҆сѝ лю́ди , и҆́же тебѣ̀ бг҃ᲂмъ в̾рꙋче́ныѧ . тѣ́мже и҆ по преставле́нїи чꙋдесе́мъ дарᲂва́нїѧ ѿ́ гдⷭ҇а прїѧ́лъ є҆сѝ , и҆сцѣлѧ́ти разли́чныѧ недꙋ́ги . тᲂгѡ̀ мᲂлѝ ѡ҆ на́съ , сᲂверша́ющихъ честнꙋ́ю па́мѧть твᲂю̀ . да тебѐ непреста́ннѡ всѝ велича́емъ .= сла́ва , и҆ ны́нѣ , боⷢ҇ . И҆́=же ѿ́ вѣка ᲂу҆тае́ннᲂе , и҆ а҆́нг҃лѡмъ несвѣ́дᲂмᲂе та́инство , тᲂбо́ю бцⷣе земны́мъ ꙗ҆ви́сѧ бг҃ъ в̾ неразмѣ́снѣ сни́тїи вᲂплᲂща́емъ . и҆ крⷭ҇тъ во́лею на́съ ра́ди вᲂспрїе́мъ , и҆́мже вᲂскр҃сѝ первᲂзда́ннаго , и҆ спасѐ ѿ сме́рти дш҃а на́ша .

а҆́ще ли прилꙋчи́тсѧ в̾ сꙋбо́тꙋ . по а҃ , стихᲂло́гїи , сѣда́ленъ , ст҃лю . гла́съ , а҃ . Оу҆че́ньми свᲂи́ми и҆ дѣ́лы , цр҃квь хрⷭ҇то́вꙋ ᲂу҆краси́лъ є҆сѝ , є҆ѵ̾ѳѵ́мїе ст҃лю . ѿ сю́дꙋ же в̾ ми́рѣ прᲂсїѧ̀ твᲂѐ дᲂбрᲂдѣ́тельнᲂе житїѐ . въ мᲂли́твахъ и҆ пᲂще́нїихъ и҆ бдѣ́нїихъ , ѻ҆́бразъ цр҃кви бы́лъ є҆сѝ . тѣ́мже вᲂпїе́мъ , сла́ва да́вшемꙋ тѝ крѣ́пᲂсть . сла́ва вѣнча́вшемꙋ тѧ̀ . сла́ва даю́щемꙋ тᲂбо́ю всѣ́мъ и҆сцѣле́нїе . Є҆гда̀ к̾ бжⷭ҇твенᲂмꙋ жела́нїю вᲂсклᲂни́всѧ , гᲂрѣ̀ мꙋдрᲂва́нїѧ и҆мѣ́лъ є҆сѝ . до́лꙋ влекꙋ́щаѧ ѿри́нꙋ , и҆ ꙗ҆́же на землѝ всѧ̀ вᲂз̾ненави́дѣвъ . и҆ хрⷭ҇то́ви бл҃же́нне присво́исѧ , є҆го́же мᲂлѝ ѡ҆ пᲂю́щихъ тѧ̀ . сла́ва , и҆ ны́нѣ , боⷢ҇ . Наста́ви мѧ на пꙋ́ть пᲂкаѧ́нїѧ , пребл҃га́го прᲂгнѣ́вавша гдⷭ҇а , не и҆скꙋсᲂбра́чнаѧ блгⷭ҇ве́ннаѧ мр҃і́е . прибѣ́жище ненача́емымъ чл҃кѡмъ , бж҃їе вмѣсти́лище .

По в҃ , стихᲂло́гїи , сѣда́ленъ . гла́съ , д҃ . Смиренᲂмꙋ́дрїе пред̾пᲂчита́ѧ бы́лъ є҆сѝ , є҆ѵ̾ѳѵ́мїе ст҃лю . и҆ ѿ сю́дꙋ прᲂсла́висѧ , ꙗ҆́кѡ бжⷭ҇твеныи а҆рхїє҆ре́й принᲂсѧ̀ же́ртвы , пᲂже́ршемꙋсѧ во́лею хрⷭ҇тꙋ̀ бг҃ꙋ на́шемꙋ . є҆го́же мᲂлѝ спасти́сѧ дш҃а́мъ на́шимъ . Зе́млю срⷣца свᲂегѡ̀ мᲂли́твенымъ ра́лᲂмъ ѡ҆бнᲂви́въ . и҆ бᲂлѣ́зньми по́стническими ꙗ҆́кѡ беспло́тенъ по́живъ , и҆ а҆рхїє҆ре́йства па́ствꙋ до́брѣ ᲂу҆па́съ . и҆ сегѡ̀ ра́ди пресели́сѧ въ преми́рнаѧ , мᲂлѝ спасти́сѧ дш҃а́мъ на́шимъ .= сла́ва , и҆ ны́нѣ , боⷢ҇ . Ѡ҆=бнᲂви́ла є҆сѝ чⷭ҇таѧ , бжⷭ҇твенымъ ржⷭ҇тво́мъ сѝ , и҆стлѣ́вшее страстьмѝ земнᲂро́дныхъ ме́ртвенᲂе сꙋщество̀ . и҆ вᲂста́вила є҆сѝ всѧ̀ ѿ сме́рти к̾ жи́зни нетлѣ́ннѣй . тѣ́мъ тѧ̀ по́ дᲂлгꙋ ᲂу҆блажа́емъ всѝ , дв҃о препрᲂсла́вленаѧ , ꙗ҆́кᲂже прᲂрекла̀ є҆сѝ .

А҆́ще ли прилꙋчи́тсѧ в̾ по́стныи де́нь . гл҃емъ , сѣда́льны . по а҃ , стихᲂло́гїи . и҆ по в҃ , в̾ трїѡ́ди . а҆ по г҃ , стихᲂло́гїи . гл҃емъ сѣда́льны , ѻ҆́ба ст҃лю .

По пᲂлїєлеѡ́сѣ , сѣда́ленъ , ст҃лю . гла́съ , и҃ . Ꙗ҆́кѡ дᲂбрᲂдѣ́теленъ и҆ кро́тᲂкъ , цр҃квь хрⷭ҇то́вꙋ ᲂу҆ѧсни́лъ є҆сѝ . дѣ́лы сᲂблю́дъ є҆́же по ѻ҆́бразꙋ бж҃їю , а҆рхїєре́ю вели́кїи є҆ѵ̾ѳѵ́мїе . прᲂсїѧ́ бо дᲂбрᲂдѣ́тельнᲂе твᲂѐ житїѐ в̾ ми́рѣ , и҆ ѿ всѣ́хъ сла́витсѧ . тѣ́мже всѝ бл҃гᲂдарѧ́ще вᲂпїе́мъ ти , бг҃ᲂбл҃же́нне ст҃лю , мᲂлѝ хрⷭ҇та̀ бг҃а , грѣхо́въ ѡ҆ставле́нїе дарᲂва́ти , чтꙋ́щимъ любо́вїю ст҃ꙋ́ю па́мѧть твᲂю̀ . вⷤ . сла́ва , и҆ ны́нѣ , боⷢ҇ . Ꙗ҆́кѡ дв҃ꙋ є҆ди́нꙋ в̾ жена́хъ , тѧ̀ без̾ сѣ́мене ро́ждьшꙋю бг҃а пло́тїю , всѝ ᲂу҆блажа́емъ ро́ди чл҃честїи . ѻ҆́гнь бо всели́сѧ в̾ тѧ̀ бжⷭ҇твеныи . и҆ ꙗ҆́кѡ младе́нца дᲂи́ши зижди́телѧ и҆ гдⷭ҇а . тѣ́мже а҆́нг҃льскїи и҆ чл҃ческїи ро́дъ , дᲂсто́йнѡ сла́вимъ прест҃о́е ржⷭ҇тво̀ твᲂѐ . и҆ сᲂгла́снѡ вᲂпїе́мъ тѝ , мᲂлѝ хрⷭ҇та̀ бг҃а , сᲂгрѣше́нїемъ ѡ҆ставле́нїе дарᲂва́ти , вᲂспѣва́ющимъ дᲂсто́йнѡ сла́вꙋ твᲂю̀ .

степе́нна , д҃ го гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . честна̀ пре́д̾ гдⷭ҇емъ , сме́рть прпⷣбныхъ є҆гѡ̀ . сти́хъ . что̀ вᲂз̾да́мъ гдⷭ҇ви ѡ҆ всѣ́хъ , и҆́хже вᲂз̾да́стъ мѝ . всѧ́ко дыха́нїе . є҆ѵⷢ҇а́лїе , ѿ і҆ѡа́нна . заⷱ҇ , л҃є .= ѱ=ало́мъ , н҃ .

сла́ва . мᲂли́твъ ра́ди ст҃лѧ , млⷭ҇тиве ѡ҆чи́сти мно́жество сᲂгрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жество сᲂгрѣше́нїи на́шихъ .

Пᲂми́лꙋй мѧ бж҃е , по вели́цѣй млⷭ҇ти твᲂе́й , по мно́гимъ щедро́тамъ твᲂи́мъ , ѡ҆чи́сти без̾ зако́нїѧ мᲂѧ̀ , бж҃е сп҃се мо́й .

стихѣ́ра . гла́съ , ѕ҃ . Бл҃гᲂꙋха́етъ чⷭ҇тна́ѧ ра́ка мᲂще́й твᲂи́хъ , є҆ѵ̾ѳѵ́мїе ст҃лю . всѣ́мъ вѣ́рнымъ и҆сцѣле́нїе дш҃а́мъ и҆ тѣлесе́мъ да́рꙋющи . тѣ́мже тѧ̀ мо́лимъ , бг҃ᲂмъ дарᲂва́ннᲂе тѝ ста́до в̾ ми́рѣ сᲂблюстѝ . да всѝ тебѐ ꙗ҆́кѡ и҆́стиннаго па́стырѧ , и҆ мл҃твеника к̾ бг҃ꙋ , непреста́ннѡ велича́емъ .

Кано́нъ , бцⷣѣ . со і҆рмᲂсо́мъ , на́ ѕ҃ . и҆ ст҃о́мꙋ , на и҃ . =Кано́нъ , ст҃лю є҆ѵ̾фѵ́мїю . твᲂре́нїе пахо́мїѧ , и҆́же ѿ ст҃ы́ѧ гᲂры̀ . гла́съ , в҃ .= пѣ́снь , а҃ . і҆рмо́съ . Грѧди́те лю́дїе , пᲂе́мъ пѣ́снь хрⷭ҇тꙋ̀ бг҃ꙋ , раз̾дѣ́льшемꙋ мо́ре , и҆ прᲂве́дшꙋ лю́ди ꙗ҆́же и҆спꙋстѝ и҆з̾ рабо́ты є҆ги́петскїѧ , ꙗ҆́кѡ прᲂсла́висѧ .

запѣ́въ : Ст҃лю хрⷭ҇то́въ є҆ѵ̾ѳѵ́мїе , мᲂлѝ бг҃а ѡ҆ на́съ . Ꙗ҆́кѡ рѣка̀ премꙋ́дрᲂсти и҆ ра́зꙋма , ст҃лю є҆ѵ̾ѳѵ́мїе бы́лъ є҆сѝ , ка́плю и҆ мнѣ̀ да́рꙋй , да вᲂз̾мᲂгꙋ̀ и҆ а҆́зъ ма́лᲂе рꙋ́кꙋ мᲂе́ю хвале́нїе , твᲂемꙋ̀ вели́чествꙋ принестѝ бл҃же́нне . Сꙋдо́мъ бж҃їимъ , и҆ чл҃ческимъ и҆збра́нїемъ , а҆рхїє҆ре́йства ма́стїю пᲂма́занъ бы́въ ст҃лю є҆ѵ̾ѳѵ́мїе . па́стырь преи҆зрѧ́денъ бы́лъ є҆сѝ , же́ртвы бг҃ꙋ всѧ́чески принᲂсѧ̀ сщ҃е́нне . И҆стᲂча́ютъ премꙋ́драѧ ᲂу҆че́нїѧ , ᲂу҆стнѣ̀ твᲂѝ ст҃лю , бжⷭ҇твенꙋю сла́дᲂсть и҆мꙋ́ще . є҆ю́же напита́вшесѧ ча́да твᲂѧ̀ , тебѐ любо́вїю непреста́ннѡ пᲂчита́емъ . боⷢ҇ . И҆́же на́съ ра́ди и҆з̾ тебѐ дв҃о , въ челᲂвѣ́ка премно́гᲂю бл҃гᲂстїю ѡ҆блекі́исѧ , сщ҃е́нныхъ сᲂбо́ри , и҆́же тᲂгѡ̀ вᲂз̾лю́бльшихъ прᲂсла́вилъ є҆́сть .

катава́сїѧ : Ѿве́рзꙋ ᲂу҆ста̀ мᲂѧ̀ .

пѣ́снь , г҃ . і҆рмо́съ . Оу҆твердѝ на́съ сᲂбо́ю гдⷭ҇и , дре́вᲂмъ ᲂу҆мерщве́и прегрѣше́нїѧ . и҆ стра́хъ тво́й всадѝ в̾ срⷣца̀ на́ша , ꙗ҆́кѡ чл҃кᲂлю́бецъ . Житїѐ по́ бз҃ѣ стѧжа́въ ст҃лю , в̾ пᲂстѣ̀ и҆ мл҃твѣ мно́го вре́мѧ пре́былъ є҆сѝ . вери́ги тѧ́жки нᲂсѧ̀ на́ тѣлѣ свᲂе́мъ . и҆́мже ны́нѣ пᲂкланѧ́ющесѧ , сщ҃е́нїе пᲂчерпа́емъ . Дѣ́лы и҆ слᲂвесы̀ бжⷭ҇твеными , ᲂу҆кра́шенъ бы́въ ст҃лю є҆ѵ̾ѳѵ́мїе . цр҃кᲂвь хрⷭ҇то́вꙋ бл҃гᲂче́стнѡ ᲂу҆па́слъ є҆сѝ . тѣ́мже и҆ ра́дᲂсти спᲂдо́бисѧ гдⷭ҇а свᲂегѡ̀ , на́съ пᲂмина́й , и҆́же тебѐ сла́вѧщихъ . Житїѐ свᲂѐ бл҃же́нне дᲂбрᲂдѣ́тельми ᲂу҆ѧсни́лъ є҆сѝ . тѣ́мже твᲂѧ̀ и҆справле́нїѧ , по мно́гимъ страна́мъ прᲂпᲂвѣ́даютсѧ ѻ҆́ч҃е . и҆ ѿ землѝ преше́дъ дᲂсти́глъ є҆сѝ , є҆́же та́мѡ со ст҃ы́ми пребыва́нїѧ . боⷢ҇ . Пᲂла́тꙋ кра́снꙋю неи҆зрече́ннагѡ бᲂга́тства , дв҃о пᲂзна́нїе по́ дᲂлгꙋ тѧ̀ сла́вимъ , спа́сшїисѧ ржⷭ҇тво́мъ ти всенепᲂро́чнаѧ .

катава́сїѧ : Твᲂѧ̀ пѣвцы̀ .

сѣда́ленъ . гла́съ , и҃ . Оу҆́мнїи ѻ҆́чи ст҃лю ꙗ҆́кѡ всегда̀ и҆мы́и , ᲂу҆́жемъ желѣ́знымъ ѡ҆блᲂжи́въ себѐ бл҃же́нне , мно́гажды всю̀ но́щь без̾ сна̀ пре́былъ є҆сѝ , ᲂу҆дрꙋча́ѧ пло́ть свᲂю̀ пребл҃же́нне . вери́ги же ꙗ҆́же на тебѣ̀ не пᲂзна́ни бы́ша , да́же до и҆схо́да є҆́же ѿ сю́дꙋ . тѣ́мже и҆ хрⷭ҇то́съ , и҆́же тᲂгѡ̀ ра́ди жестᲂко́е претерпѣ́вша , да́рꙋетъ тебѣ̀ небᲂлѣ́зненᲂе , є҆́же на́ нб҃сѣхъ житїѐ . тᲂгѡ̀ мᲂлѝ ст҃лю є҆ѵ̾ѳѵ́мїе , сᲂгрѣше́нїемъ ѡ҆ставле́нїе дарᲂва́ти , чтꙋ́щимъ любо́вїю сщ҃е́ннꙋю па́мѧть твᲂю̀ . вⷤ . сла́ва , и҆ ны́нѣ , боⷢ҇ . Ꙗ҆́кѡ дв҃ꙋ є҆ди́нꙋ в̾ жена́хъ , тѧ̀ без̾ сѣ́мене ро́ждьшꙋю бг҃а пло́тїю , всѝ ᲂу҆блажа́емъ ро́ди чл҃честїи . ѻ҆́гнь бо всели́сѧ в̾ тѧ̀ бжⷭ҇твеныи . и҆ ꙗ҆́кѡ младе́нца дᲂи́ши зижди́телѧ и҆ гдⷭ҇а . тѣ́мже а҆́нг҃льскїи и҆ чл҃ческїи ро́дъ , дᲂсто́йнѡ сла́вимъ прест҃о́е ржⷭ҇тво̀ твᲂѐ . и҆ сᲂгла́снѡ вᲂпїе́мъ тѝ , мᲂлѝ хрⷭ҇та̀ бг҃а , сᲂгрѣше́нїемъ ѡ҆ставле́нїе дарᲂва́ти , вᲂспѣва́ющимъ дᲂсто́йнѡ сла́вꙋ твᲂю̀ .

пѣ́снь , д҃ . і҆рмо́съ . Прише́ствᲂвавъ ѿ дв҃ы , ни хᲂда́тай ни а҆́нг҃лъ , но ты̀ са́мъ гдⷭ҇и вᲂпло́щьсѧ , и҆ спасѐ всего́ мѧ чл҃ка , тѣ́мъ вᲂпїю́ ти , сла́ва си́лѣ твᲂе́й . Храни́тель бꙋ́ди ѻ҆те́чествꙋ свᲂемꙋ̀ и҆ лю́демъ ст҃лю , и҆збавлѧ́ѧ вра́гъ наше́ствїѧ , гла́да же и҆ па́гꙋбы . да мл҃твами тѝ спа́сшесѧ , тебѐ всѝ ꙗ҆́кѡ застꙋ́пника велича́емъ . Любᲂмꙋ́дренѡ дш҃е́внагѡ кᲂраблѧ̀ наставлѧ́ѧ ст҃лю . и҆ сегѡ̀ ра́ди мᲂли́твамъ и҆ ми́лᲂстыни прилѣжа́лъ є҆сѝ . тлѣ́ннᲂе бᲂга́тство , въ нетлѣ́ннᲂе бг҃ᲂбл҃же́нне прелага́ѧ . тѣ́мже и҆ прїѧ́тъ нбⷭ҇нᲂе бᲂга́тство . Чи́сто ѻ҆́ко дш҃е́внᲂе и҆мѣ́ѧ , зри́тельно нбⷭ҇нагѡ вᲂсхо́да и҆мꙋ́ще . тѣ́мже и҆́же на землѝ жи́знь свᲂю̀ до́брѣ ᲂу҆пра́вилъ є҆сѝ ст҃лю . и҆ ѿ сю́дꙋ цр҃кᲂвь бг҃а жива́гѡ є҆ѵ̾ѳѵ́мїе бы́лъ є҆сѝ . боⷢ҇ . Бг҃ъ и҆з̾ тебѐ рᲂди́всѧ гжⷭ҇е всенепᲂро́чнаѧ , ѿ ѡ҆блада́юща врага̀ ми́ръ , тебѐ ра́ди и҆зба́вилъ є҆́сть . ст҃льскїи же ли́къ же́ртвꙋ тᲂмꙋ̀ принᲂсѧ́щїи вᲂз̾вели́чилъ є҆́сть .

катава́сїѧ : Сѣдѧ́и во сла́вѣ .

пѣ́снь , є҃ . і҆рмо́съ . Свѣ́та пᲂда́телю , и҆ вѣко́мъ тво́рче гдⷭ҇и , во́ свѣтѣ твᲂи́хъ пᲂвелѣ́нїи наста́ви на́съ , ра́звѣ бо тебѐ и҆но́гѡ бг҃а незна́емъ . Бл҃же́ннꙋю жи́знь ст҃лю є҆ѵ̾ѳѵ́мїе на землѝ по́жилъ є҆сѝ , и҆ ѿ сю́дꙋ к̾ нбⷭ҇нᲂмꙋ житїю̀ сла́внѡ преше́лъ є҆сѝ . тѣ́мже и҆ по преставле́нїи твᲂе́мъ ра́кꙋ твᲂю̀ ѡ҆б̾стᲂѧ́ще , и҆ любе́знѡ пᲂкланѧ́ющесѧ , сщ҃е́нїе пᲂчерпа́емъ . Преѡ҆сщ҃е́нствᲂванъ дш҃е́ю и҆ тѣ́лᲂмъ ѻ҆́ч҃е бы́лъ є҆сѝ . свѣ́тлѡ влⷣчнѣй трапе́зѣ пред̾стᲂи́ши , же́ртвꙋ тᲂмꙋ̀ без̾кро́внꙋю принᲂсѧ̀ . тѣ́мже ꙗ҆́кѡ сщ҃еннᲂта́иникъ , прилѣ́жнѡ ѡ҆ на́съ мᲂли́сѧ . Дре́внемꙋ кᲂрни́лїю мᲂли́твѣ и҆ млⷭ҇тыни пᲂдо́бѧсѧ , млⷭ҇тивъ къ тре́бꙋющимъ ѻ҆́ч҃е бы́лъ є҆сѝ . тѣ́мъ ѿ хрⷭ҇та̀ бг҃а дᲂсто́йнѡ слы́шиши , мл҃твы твᲂѧ̀ и҆ млⷭ҇тыни взыдо́ша предᲂмно́ю . сегѡ̀ гла́са и҆ на́мъ ᲂу҆слы́ша ти бл҃же́нне пᲂмᲂли́сѧ . боⷢ҇ . Сщ҃е́нными гла́сы , тѧ̀ дᲂбро́тꙋ і҆а́кѡвлю пᲂе́мъ . пло́тьски ро́ждьшꙋю ми́рᲂви свѣ́тъ и҆́же ѿ свѣ́та , прᲂсвѣща́ющїи а҆рхїє҆ре́йскїѧ сᲂбо́ры .

катава́сїѧ : Оу҆диви́шасѧ всѧ́ческаѧ .

пѣ́снь , ѕ҃ . і҆рмо́съ . Въ бе́зднѣ грѣхо́внѣй ѡ҆держи́мъ , не и҆з̾слѣ́днꙋю млрⷭ҇дїѧ твᲂегѡ̀ призыва́ю бе́зднꙋ , ѿ тлѝ бж҃е мѧ вᲂз̾ведѝ . Сн҃ъ свѣ́та и҆ днѐ ст҃лю бы́лъ є҆сѝ . тѣ́мже и҆ всели́лсѧ є҆сѝ , и҆дѣ́же свѣ́тъ невече́рнїи , и҆ пᲂко́ища пра́ведныхъ . тᲂгѡ̀ свѣ́та мᲂлѝ пᲂлꙋчи́ти всѣ́мъ , и҆́же па́мѧть твᲂю̀ пра́зднꙋющимъ . Сщ҃е́нныѧ и҆ пречⷭ҇тны́ѧ хра́мы , в̾ сла́вꙋ ст҃ы́хъ мно́гїѧ вᲂз̾дви́глъ є҆сѝ . тѣ́мже и҆ мно́го ст҃ы́хъ и҆мѣ́лъ є҆сѝ хᲂда́таѧ , прᲂмышлѧ́юща твᲂѧ̀ пᲂле́знаѧ . но ꙗ҆́кѡ с̾ ни́ми вᲂдвᲂрѧ́ѧсѧ , ѡ҆ на́съ мᲂли́сѧ . Свѣ́тло лицѐ в̾ жи́зни и҆мѣ́ѧ бл҃же́нне , пᲂтща́лсѧ є҆сѝ свѣтлѣ́йшꙋ и҆ дш҃ꙋ свᲂю̀ хрⷭ҇тꙋ̀ пред̾ста́вити , є҆́же и҆ пᲂлꙋчи́лъ є҆сѝ є҆ѵ̾ѳѵ́мїе . тѣ́мже бꙋ́ди те́плыи мл҃твеникъ ꙗ҆́кѡ ст҃ль ѡ҆ чтꙋ́щихъ тѧ̀ . боⷢ҇ . Во ᲂу҆тро́бꙋ твᲂю̀ всели́сѧ , и҆ всѐ чл҃ческᲂе сꙋщество̀ ѡ҆бᲂжи́въ . и҆ ст҃ль ли́къ мно́жество сщ҃е́ннѡ привлечѐ .

катава́сїѧ : Бжⷭ҇твенᲂе сѐ и҆ всечестно́е .

кᲂнда́къ . гла́съ , и҃ . Ꙗ҆́кѡ а҆рхїєре́ѡмъ сᲂпресто́льникъ , и҆ ст҃лемъ и҆зрѧ́дныи пᲂбо́рникъ бы́лъ є҆сѝ , ст҃лю є҆ѵ̾ѳѵ́мїе . непреста́й сᲂхранѧ́ѧ ѻ҆те́чество свᲂѐ , гра́дъ же и҆ лю́ди , и҆ ст҃ꙋ́ю ѻ҆би́тель сїю̀ . и҆ и҆́же тебѐ вѣ́рᲂю пᲂчита́ющихъ , и҆ честны́мъ мᲂще́мъ твᲂи́мъ пᲂклᲂнѧ́ющихсѧ . да велегла́снѡ тебѣ̀ вᲂпїе́мъ , ра́дꙋисѧ ст҃лю бг҃ᲂмꙋ́дре . и҆́кᲂсъ . Є҆ѵⷢ҇а́льскᲂмꙋ слᲂвесѝ внѧ́тъ прпⷣбне , дш҃е́вныи ра́зꙋмъ впери́въ к̾ прᲂсвѣще́нїю свѣтᲂлꙋ́чныѧ зарѧ̀ , дш҃етлѣ́нныѧ стра́сти до кᲂнца̀ пᲂтреби́лъ є҆сѝ . дᲂбрᲂдѣ́тельнымъ же житїе́мъ , а҆́нг҃лѡмъ и҆ чл҃кѡмъ преди́венъ пᲂказа́сѧ . и҆ сегѡ̀ ра́ди вели́кагѡ нᲂва̀ гра́да а҆рхїє҆ре́йства спᲂдо́бисѧ . цр҃кᲂвь ᲂу҆кра́си . лю́ди прᲂсвѣтѝ , и҆ до кᲂнца̀ в̾ правᲂсла́вїи ᲂу҆тверди́лъ є҆сѝ . да всѝ велегла́снѡ вᲂпїе́мъ тѝ . ра́дꙋисѧ є҆ѵ̾ѳѵ́мїе ст҃лю бг҃ᲂмꙋ́дре .

пѣ́снь , з҃ . і҆рмо́съ . Тѣ́лꙋ злато́мꙋ премꙋ́дрыѧ дѣ́ти непᲂслꙋжи́ша , и҆ въ пла́мень са́ми пᲂидо́ша , и҆ бо́ги и҆́хъ ѡ҆брꙋга́ша . средѝ пла́мене вᲂзᲂпи́ша , и҆ ѡ҆брᲂсѝ и҆́хъ а҆́нг҃лъ , ᲂу҆слы́шасѧ ᲂу҆́же ᲂу҆́стъ ва́шихъ мл҃тва . Вели́кїи но́въ гра́дъ , и҆́же в̾ себѣ̀ тебѐ стѧжа́выи , ра́дᲂстїю ра́дꙋетсѧ ст҃лю є҆ѵ̾ѳѵ́мїе . тебе́ бо ꙗ҆́кѡ стѣ́нꙋ и҆мѣ́ѧ тве́рдꙋ , и҆ сто́лпъ неѡ҆бᲂри́мъ , хрⷭ҇та̀ вᲂспѣва́етъ , и҆́же тебѐ си́мъ дарᲂва́вшаго . И҆́же пре́жде тебѐ бы́вшимъ а҆рхїє҆ре́ѡмъ красᲂта̀ бы́лъ є҆сѝ бл҃же́нне , ст҃лемъ ᲂу҆дᲂбре́нїе , и҆́нᲂкѡмъ ѻ҆́бразъ . хрⷭ҇то́вѣ же цр҃кви преи҆зрѧ́дныи па́стырь ꙗ҆ви́лсѧ є҆сѝ , бг҃ᲂбл҃же́нне ѻ҆́ч҃е є҆ѵ̾ѳѵ́мїе . И҆лїинꙋ̀ ре́внᲂсть вᲂспрїи́мъ ст҃лю . тѣ́мже ни преще́нїѧ ни мᲂле́нїѧ сᲂгрѣша́ющихъ вᲂз̾мᲂго́ша ᲂу҆вѣща́ти тебѐ , є҆́же тѣ́хъ ѡ҆ сᲂгрѣше́нїихъ не ѡ҆блича́ти . ты́ же непреста́лъ є҆сѝ , до́ндеже кᲂне́чнѣе ѻ҆́нѣхъ и҆спра́вилъ є҆сѝ . боⷢ҇ . Кра́снꙋю ѡ҆брѣ́тъ , и҆ до́брꙋю в̾ жена́хъ тѧ̀ пречⷭ҇таѧ , прекра́снᲂе сло́во всели́сѧ въ пречⷭ҇тᲂе чре́во твᲂѐ . всѧ̀ ли́ки ст҃ль ѡ҆сщ҃ь зᲂвꙋ́щїѧ , блгⷭ҇ве́нъ бг҃ъ ѻ҆ц҃ъ на́шихъ .

катава́сїѧ : Непᲂслꙋжи́ша тва́ри .

пѣ́снь , и҃ . і҆рмо́съ . Впе́щь ѻ҆́гненнꙋю , к̾ дѣ́темъ є҆вре́йскимъ сᲂше́дшагѡ , и҆ пла́мень на хла́дъ прело́жшагѡ бг҃а , по́йте всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Сꙋдо́мъ бж҃їимъ , и҆ всенаро́днымъ и҆збра́нїемъ , ѿ ню́дꙋ же при́званъ бы́сть прпⷣбне , на прⷭ҇то́лъ вели́кїѧ цр҃кве . та́мѡ па́ки ѿхо́диши , прᲂмышле́нїемъ свᲂегѡ̀ влⷣки . да ѿ ню́дꙋ же сїѧ̀ прїѧ́лъ є҆сѝ , па́ки та́мѡ чи́ста тᲂгѡ̀ съ дш҃е́ю бг҃ᲂви преда́си . Пречⷭ҇тна́ѧ ра́ка бг҃ᲂбл҃же́нне , и҆дѣ́же пᲂлᲂжено̀ бы́сть чⷭ҇тно́е тѣ́ло твᲂѐ ст҃лю , бл҃гᲂво́нїе и҆ ѡ҆сщ҃е́нїе всѣ́мъ вѣ́рᲂю прихᲂдѧ́щимъ и҆спꙋща́етъ , ѿ дш҃и хрⷭ҇тꙋ̀ вᲂпїю́щимъ . бл҃гᲂслᲂви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Хрⷭ҇то́съ тѧ̀ ст҃лѧ и҆збра̀ , ꙗ҆́кѡ нѣ́кᲂе свѣти́ло , мᲂгꙋ́ща тве́рдь цр҃ко́внꙋю прᲂсвѣща́ти . и҆ свᲂи́ми ᲂу҆че́ньми лю́ди и҆́же тебѣ̀ врꙋче́нныѧ наставлѧ́ти , твᲂрцꙋ̀ вᲂпи́ти , бл҃гᲂслᲂви́те всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . боⷢ҇ . Оу҆ны́лъ и҆мѣ́ѧ по́мыслъ , и҆ дш҃ꙋ сластьмѝ ѡ҆тѧгче́нꙋ , к̾ тебѣ̀ прибѣга́ю бг҃ᲂрᲂди́тельнице чⷭ҇таѧ . и҆ вᲂпїю́ ти , вᲂз̾дви́гни и҆ спаси́ мѧ ѻ҆каѧ́ннаго и҆ ѡ҆сꙋже́ннаго .

катава́сїѧ : Хва́лимъ бл҃гᲂслᲂви́мъ . Ѻ҆́трᲂки бл҃гᲂчести́выѧ .

пѣ́снь , ѳ҃ . і҆рмо́съ . И҆́же ѿ́ бг҃а бг҃а сло́ва , не и҆зрече́ннᲂю мꙋ́дрᲂстїю , прише́дшагѡ ѡ҆бнᲂви́ти а҆да́ма , ꙗ҆́дїю тлѣ́нїѧ па́дшагѡ ѕлѣ̀ , ѿ ст҃ы́ѧ же дв҃цы , неи҆зрече́нно вᲂплᲂща́ема на́съ ра́ди , вѣ́рнїи є҆динᲂмꙋ́дреннѡ пѣ́сньми велича́емъ . Ѻ҆би́тель в̾ не́йже спᲂдо́билсѧ є҆сѝ ꙗ҆ре́мъ хрⷭ҇то́въ прїѧ́ти , та́мѡ всѧ̀ днѝ свᲂѧ̀ вѣ́рᲂю и҆ дх҃ᲂмъ крᲂмѣ̀ тѣлесѐ , нераз̾лꙋче́нъ ѻ҆́ч҃е пре́былъ є҆сѝ . тѣ́мже и҆ по преставле́нїи та́мѡ пᲂвелѣва́еши пᲂлᲂжи́тисѧ . и҆дѣ́же и҆ чꙋдесе́мъ дарᲂва́нїѧ ѿ гдⷭ҇а ст҃лю є҆ѵ̾ѳѵ́мїе прїѧ́лъ є҆сѝ . Рꙋко́ю мᲂе́ю недᲂсто́йнᲂю , принᲂси́мᲂе тѝ с̾ трꙋдо́мъ хвале́нїе , ст҃лю є҆ѵ̾ѳѵ́мїе непре́зри . но прїимѝ , и҆ мᲂлѝ твᲂрца̀ свᲂегѡ̀ и҆ влⷣкꙋ , та́мᲂшнѧгѡ мѧ̀ и҆зба́вити вѣ́чнагѡ мꙋче́нїѧ , тебѐ вѣ́рᲂю пᲂчита́юща . Пѣве́цъ тѝ и҆́же тебѐ и҆́скреннѡ вᲂспѣва́ющихъ , и҆ твᲂю̀ па́мѧть чⷭ҇тнꙋ́ю ст҃лю є҆ѵ̾ѳѵ́мїе вѣ́рᲂю прᲂславлѧ́ющихъ , ѡ҆ст҃ѝ и҆ прᲂсла́ви . и҆ ѿ бѣ́дъ и҆збавлѧ́й и҆ напа́стей , и҆ и҆́же та́мѡ вѣ́чнагѡ мꙋче́нїѧ . да тебѐ всегда̀ вᲂспѣва́ютъ . боⷢ҇ . Пᲂщади́ мѧ гдⷭ҇и пᲂщадѝ , є҆гда̀ хо́щеши мѝ сꙋди́ти . и҆ не ѡ҆сꙋдѝ менѐ во ѻ҆́гнь , да не ꙗ҆́рᲂстїю ѡ҆бличи́ши менѐ , мо́литъ тѧ̀ дв҃аѧ тебѐ ро́ждьшаѧ хрⷭ҇тѐ , а҆́нг҃льстїи сᲂбо́ри , и҆ ст҃ль сᲂвᲂкꙋпле́нїѧ .

катава́сїѧ : Всѧ́къ зе́менъ .= Дᲂсто́йнѡ є҆́сть . свѣти́ленъ . Дне́сь ст҃лѧ є҆ѵ̾ѳѵ́мїѧ свѣ́тлаѧ наста̀ па́мѧть , вѣ́рныѧ прᲂсвѣща́етъ , и҆ тмꙋ̀ пре́лести разᲂрѧ́етъ , вѣ́рᲂю прихᲂдѧ́щимъ к̾ честны́мъ тᲂгѡ̀ мᲂще́мъ . =вⷤ . сла́ва , и҆ ны́нѣ , боⷢ҇ . Свѣ́тъ вᲂсїѧ̀ без̾лѣ́тныи , ѿ ѻ҆ц҃а пре́жде вѣ́къ . в̾ лѣ́то ны́нѣ на пᲂслѣ́дᲂкъ , и҆з̾ тебѐ дв҃о ꙗ҆ви́сѧ на спасе́нїе ми́рꙋ . к̾ немꙋ́ же непреста́й ѡ҆́ людехъ твᲂи́хъ мᲂлѧ́щисѧ .

На хвали́тѣхъ , стихѣ́ры , на д҃ . гла́съ , и҃ . поⷣ . ѽ =пресла́внᲂе чꙋ́до . Не ᲂу҆кло́ннѡ пребл҃же́нне ,꙳ пꙋ́ть жи́зненыи ше́ствᲂвалъ є҆сѝ .꙳ по́стническими бᲂре́нїи ,꙳ всѧ̀ плᲂтьска́ѧ мꙋдрᲂва́нїѧ ᲂу҆мертви́лъ є҆сѝ .꙳ кра́снаѧ ми́ра ѡ҆ста́вилъ є҆сѝ ,꙳ нбⷭ҇нꙋю красᲂтꙋ̀ вᲂз̾люби́лъ є҆сѝ .꙳ и҆дѣ́же со а҆́нг҃лы прⷭ҇нѡ весели́шисѧ ,꙳ ст҃лю є҆ѵ̾ѳѵ́мїе .꙳ мᲂлѝ спасти́сѧ дш҃а́мъ на́шимъ . =вⷤ . Въ ю҆́нᲂсти цѣлᲂмꙋ́дрїе стѧжа́лъ є҆сѝ .꙳ въ ста́рᲂсти ра́зꙋмъ ѡ҆бᲂстри́лъ є҆сѝ .꙳ дш҃ꙋ пресвѣ́тлꙋ сᲂтвᲂри́лъ є҆сѝ .꙳ а҆рхїє҆ре́йства са́нъ вᲂспрїѧ́лъ є҆сѝ .꙳ цр҃кᲂвь дᲂбро́тами ᲂу҆кра́силъ є҆сѝ .꙳ лю́ди свᲂѧ̀ прᲂсвѣти́лъ є҆сѝ .꙳ сегѡ̀ ра́ди тѧ̀ пᲂчита́емъ ,꙳ ст҃лю бг҃ᲂмꙋ́дре ,꙳ мᲂлѝ ѡ҆ твᲂрѧ́щихъ па́мѧть твᲂю̀ . Сᲂбери́тесѧ праз̾днᲂлю́бцы дне́сь ,꙳ въ па́мѧть є҆ѵ̾ѳѵ́мїѧ ст҃лѧ ,꙳ и҆ сїю̀ кꙋ́пнѡ всѝ тᲂржествꙋ́юще .꙳ се́й бо бл҃гᲂче́стїѧ пᲂдража́тель ,꙳ и҆ ѡ҆ ста́дѣ свᲂе́мъ те́плыи мᲂли́твеникъ .꙳ рꙋ́сскїѧ землѝ ᲂу҆дᲂбре́нїе ,꙳ вели́кᲂмꙋ же нᲂвꙋ̀ гра́дꙋ пᲂхвала̀ и҆ ᲂу҆тверже́нїе .꙳ к̾немꙋ́же прилѣ́жно вᲂзᲂпїе́м̾ ,꙳ мᲂлѝ хрⷭ҇та̀ бг҃а ѡ҆ чтꙋ́щихъ па́мѧть твᲂю̀ . сла́ва . гла́съ , и҃ . Дне́сь вᲂспᲂе́мъ ст҃лѧ , бл҃гᲂче́стїю наста́вника , цр҃кви стᲂлпа̀ непᲂкᲂлѣби́ма , и҆сто́чника и҆сцѣле́нїемъ неи҆счерпа́ема , прᲂли́тїе дарᲂва́нїи дх҃о́вныхъ . вели́кᲂмꙋ же нᲂвꙋ̀ гра́дꙋ прᲂсвѣти́телѧ , и҆ ѡ҆ всѣ́хъ мл҃твеника те́пла . к̾ немꙋ́же вᲂзᲂпїе́мъ , ст҃лю є҆ѵ̾ѳѵ́мїе , непреста́й мᲂлѧ́сѧ за дш҃а на́ша . и҆ ны́нѣ , боⷢ҇ . Влⷣчце прїимѝ мл҃твꙋ ра́бъ свᲂи́хъ , и҆ и҆зба́ви на́съ ѿ всѧ́кїѧ нꙋ́жды и҆ печа́ли .

а҆́ще ли сꙋбѡ́та . пᲂе́мъ , славᲂсло́вїе вели́кᲂе . а҆́ще ли по́стъ , на стихо́внѣ , в̾ трїѡ́ди . сла́ва , ст҃лю . гла́съ , ѕ҃ . Ѻ҆́трᲂкъ ꙗ҆ви́сѧ смире́нъ , без̾ѕло́бїемъ ᲂу҆краша́ѧсѧ . сегѡ̀ ра́ди хрⷭ҇то́съ бг҃ъ ѻ҆вца́мъ свᲂи́мъ па́стырѧ тѧ̀ пᲂста́ви , и҆ ꙗ҆́кѡ неи҆сче́тно бᲂга́тство свᲂи́хъ щедро́тъ , ꙗ҆ви́ тѧ вели́кᲂмꙋ нᲂвꙋ̀ гра́дꙋ , ѡ҆бꙋрева́емымъ в̾ ско́рбѣхъ ти́хᲂе приста́нище . и҆ ны́нѣ ст҃лю непремᲂлчѝ вᲂпїѧ̀ заны̀ ко́ гдⷭ҇ꙋ . и҆ ны́нѣ , боⷢ҇ . Бцⷣе ты̀ є҆сѝ лᲂза̀ и҆́стиннаѧ , вᲂз̾расти́вшаѧ на́мъ пло́дъ живо́тныи , тебѣ̀ мо́лимсѧ , мᲂли́сѧ влⷣчце со ст҃лемъ , пᲂми́лᲂватисѧ дш҃а́мъ на́шимъ . и҆лѝ , крⷭ҇тᲂбоⷢ҇ . Ви́дѧщи тѧ̀ распина́ема хрⷭ҇тѐ , тебѐ ро́ждьшаѧ вᲂпїѧ́ше , что́ се стра́нно є҆́же ви́жꙋ та́инство сн҃е мо́й ; ка́кѡ на́ древѣ ᲂу҆мира́еши , пло́тїю пᲂвѣ́шенъ жизнᲂда́вче .

На литꙋргі́и , а҆́ще сꙋбо́та . блаже́нна , ст҃лю , пѣ́снь г҃ ѧ , и҆ ѕ҃ ѧ .

прᲂки́менъ , ѱл҃о́мъ дв҃дᲂвъ . ᲂу҆ста̀ мᲂѧ̀ вᲂз̾ гл҃ютъ премꙋ́дрᲂсть , и҆ пᲂꙋче́нїе срⷣца мᲂегѡ̀ ра́зꙋмъ . сти́хъ . ᲂу҆слы́шите сїѧ̀ всѝ ꙗ҆зы́цы , внꙋши́те всѝ живꙋ́щїи по вселе́ннѣй . а҆пⷭ҇лъ , къ є҆вре́ѡмъ . заⷱ҇ , ти҃і .= а҆ллилꙋ́їѧ . ᲂу҆ста̀ пра́веднагѡ пᲂꙋча́тсѧ премꙋ́дрᲂсти , и҆ ꙗ҆зы́къ є҆гѡ̀ вᲂз̾гл҃етъ сꙋ́дъ . =є҆ѵⷢ҇а́лїе , ѿ =і҆ѡа́нна . заⷱ҇ л҃ѕ . прича́стенъ . в=ъ па́мѧть вѣ́чнꙋю бꙋ́детъ пра́ведникъ .