МЦⷭ҇А ТОГО́ЖЕ ВЪ Д҃І ДН҃Ь

прпⷣбнагѡ ѻ҆ц҃а на́шегѡ венеди́кта . Ве́черъ , на гдⷭ҇и вᲂзва́хъ , стихѣ́ры . гла́съ , в҃ . поⷣ . є҆гда̀ ѿ́ древа . Вѣ́рᲂю и҆ любо́вїю и҆́стиннᲂю , ми́ра ѿ младе́нства ѿре́ксѧ ѻ҆́ч҃е прпⷣбне . ра́дꙋѧсѧ пᲂслѣ́дᲂвалъ є҆сѝ , распе́ншемꙋсѧ хрⷭ҇тꙋ̀ . и҆ мно́гими по́двиги пло́ть ᲂу҆мертви́въ , бл҃гᲂда́ть и҆сцѣле́нїемъ бᲂга́тнѡ прїѧ́лъ є҆сѝ , ᲂу҆тᲂлѧ́ти не́мᲂщи разли́чныѧ . и҆ лꙋка́выѧ ѿгᲂнѧ́ти дꙋ́хи , вельмѝ ᲂу҆дивлѧ́емь . Оу҆краше́нїе и҆́нᲂкꙋющимъ бы́въ , со́бралъ є҆сѝ неи҆сче́тно мно́жество пѣ́ти гдⷭ҇а , прпⷣбне венеди́кте . и҆ к̾ нбⷭ҇нѣй всѣ́хъ стезѝ наста́вилъ є҆сѝ , до́брѣ пᲂслѣ́дꙋющихъ , бжⷭ҇твенымъ тѝ ᲂу҆че́нїемъ . и҆ пᲂдо́бѧщихсѧ твᲂемꙋ̀ житїю̀ дᲂбрᲂдѣ́тельнᲂмꙋ ѻ҆́ч҃е . с̾ ни́ми же тѧ̀ пᲂчита́емъ сщ҃е́ннѡ , въ преставле́нїи тѝ ра́дꙋющесѧ . Ꙗ҆́кᲂже дре́вле и҆лїѧ̀ , до́ждь ѻ҆́ч҃е с̾ нб҃съ мᲂли́твᲂю бжⷭ҇твенᲂю низ̾ве́лъ є҆сѝ , тᲂчи́ти же ма́сло , сᲂсꙋ́дъ сᲂтвᲂри́лъ є҆сѝ . и҆ мертвеца̀ вᲂскреси́лъ є҆сѝ . и҆ и҆́наѧ премно́гаѧ чꙋдеса̀ сᲂтвᲂри́лъ є҆сѝ , в̾ сла́вꙋ прпⷣбне всѣ́хъ сп҃са и҆ бг҃а . тѣ́мже твᲂю̀ сла́внꙋю па́мѧть , любо́вїю пра́зднꙋемъ венеди́кте . сла́ва , и҆ ны́нѣ , боⷢ҇ . Всѣ́мъ скᲂрбѧ́щимъ ра́дᲂсть , и҆ ѡ҆би́димымъ пред̾ста́тельница . а҆́лчꙋщимъ кᲂрми́тельница . стра́ннымъ ᲂу҆тѣше́нїе , и҆ ѡ҆бꙋрева́емымъ приста́нище . бᲂлѧ́щимъ пᲂсѣще́нїе , пᲂбѣжда́емымъ пᲂкро́въ и҆ застꙋпле́нїе . и҆ же́злъ слѣпы́мъ , мт҃и бг҃а вы́шнѧгѡ ты̀ є҆сѝ пречⷭ҇таѧ . ᲂу҆скᲂрѝ мо́лимсѧ , спастѝ рабы̀ свᲂѧ̀ .= крⷭ҇тᲂбоⷢ҇ . Д=ᲂса́ды претерпѣ́вшаго мно́ги , и҆ на́ крⷭ҇тъ вᲂз̾несе́наго всѧ́ческимъ твᲂрца̀ , ви́дѣвши пречⷭ҇таѧ стенѧ́ше гл҃ющи , препѣ́тыи гдⷭ҇и сн҃е и҆ бж҃е мо́й , ка́кѡ пᲂчестѝ хᲂтѧ̀ сᲂзда́нїе свᲂѐ влⷣко . терпи́ши пло́тїю без̾че́стїе ; сла́ва мно́гᲂмꙋ млрⷭ҇дїю , и҆ сᲂше́ствїю тѝ чл҃кᲂлю́бче .

На ᲂу҆́трени . ѻ҆́ба кано́на , во ѻ҆кта́и . и҆ ст҃о́мꙋ , на д҃ . кано́нъ , є҆мꙋ́же краегране́сїе си́це : пѣ́снь принесꙋ̀ мꙋ́дрᲂмꙋ венеди́ктꙋ . твᲂре́нїе і҆ѡ́сифᲂво . гла́съ , в҃ . пѣ́снь , а҃ . і҆рмо́съ . Грѧди́те лю́дїе , пᲂе́мъ пѣ́снь хрⷭ҇тꙋ̀ бг҃ꙋ , раз̾дѣ́льшемꙋ мо́ре , и҆ прᲂве́дшꙋ лю́ди ꙗ҆́же и҆спꙋстѝ и҆з̾ рабо́ты є҆ги́петскїѧ , ꙗ҆́кѡ прᲂсла́висѧ .

запѣ́въ : Прпⷣбне ѻ҆́ч҃е венеди́кте , мᲂлѝ бг҃а ѡ҆ на́съ . Пѣ́сненѡ сла́вити , дᲂстᲂхва́льнꙋю па́мѧть твᲂю̀ , ᲂу҆се́рдствꙋющемꙋ прпⷣбне , бл҃гᲂда́ть да́ти ми мᲂли́сѧ венеди́кте . и҆ всѣ́мъ сᲂгрѣше́нїемъ и҆збавле́нїе . И҆́нᲂчески кре́стъ сво́й ѿ младе́нства взе́мъ , пᲂслѣ́дᲂвалъ є҆сѝ вседержи́телю . и҆ ᲂу҆мертви́въ пло́ть , жи́зни спᲂдо́билсѧ є҆сѝ пребл҃же́нне . Зако́нꙋ бж҃їю пᲂвинꙋ́всѧ дᲂстᲂчꙋ́дне , страстна́ѧ взыгра́нїѧ ᲂу҆вѧди́лъ є҆сѝ , вᲂз̾держа́нїѧ по́двигᲂмъ . и҆ без̾стра́стїѧ бл҃гᲂда́тїю ѡ҆бᲂгати́лсѧ є҆сѝ . боⷢ҇ . И҆́же тебѐ ра́ди нетлѣ́нїемъ ѡ҆бᲂга́щшесѧ , бг҃ᲂрᲂди́тельнице пречⷭ҇таѧ . ра́дꙋисѧ вᲂпїе́мъ тѝ ѡ҆бра́дᲂннѣй , прпⷣбнымъ и҆ пра́веднымъ ᲂу҆краше́нїе .

пѣ́снь , г҃ . і҆рмо́съ . Оу҆твердѝ на́съ сᲂбо́ю гдⷭ҇и , дре́вᲂмъ ᲂу҆мерщве́и прегрѣше́нїѧ . и҆ стра́хъ тво́й всадѝ в̾ срⷣца̀ на́ша , ꙗ҆́кѡ чл҃кᲂлю́бецъ . Во́дъ живо́тныхъ бжⷭ҇твенагѡ дх҃а , и҆спо́лньшисѧ бг҃ᲂно́се дш҃а твᲂѧ̀ , рѣ́ки чꙋдесе́мъ то́читъ , недꙋ́гѡмъ и҆з̾сꙋша́ющи тече́нїе . Къ ширᲂтѣ̀ ра́йстѣй , пресели́лсѧ є҆сѝ всебл҃же́нне , тѣ́снꙋю ше́ствᲂвавъ стезю̀ . и҆ бѣсо́мъ кᲂва́рьствїѧ , и҆ ше́ствїѧ без̾чи́ннаѧ ᲂу҆тѣсни́лъ є҆сѝ . Тече́нїи твᲂи́хъ сле́зъ напᲂѧ́емо , ꙗ҆́кѡ дре́во венеди́кте плᲂдᲂно́сно , бл҃гᲂпло́дїе бжⷭ҇твено прине́слъ є҆сѝ дᲂбрᲂдѣ́телей , и҆ чꙋде́съ бжⷭ҇твенᲂю бл҃гᲂда́тїю . боⷢ҇ . Є҆ди́нъ бл҃гі́и , твᲂю̀ вᲂплᲂща́емь про́йде пренепᲂро́чнаѧ ᲂу҆тро́бꙋ , и҆ чл҃къ ви́дѣнъ бы́сть сᲂверше́нъ . є҆го́же мᲂлѝ спастѝ пᲂю́щїѧ тѧ̀ .

сѣда́ленъ . гла́съ , а҃ . И҆́нᲂчествᲂвавъ бг҃ᲂꙋго́днѡ , дᲂбрᲂдѣ́тельнѡ по́жилъ є҆сѝ . и҆ бл҃гᲂда́ть и҆сцѣле́нїемъ прїѧ́тъ венеди́кте , чꙋдеса̀ сᲂверши́въ стра́шна . ѻ҆би́тель же сᲂвᲂкꙋ́пль сщ҃е́ннꙋ , приве́лъ є҆сѝ гдⷭ҇ви спаса́емыхъ мно́жество пребᲂга́те . сла́ва бг҃ꙋ прᲂсвѣти́вшемꙋ тѧ̀ . сла́ва вѣнча́вшемꙋ тѧ̀ . сла́ва дѣ́ющемꙋ тᲂбо́ю всѣ́мъ и҆сцѣле́нїе .= сла́ва , и҆ ны́нѣ , боⷢ҇ . Рꙋ́цѣ свᲂѝ бжⷭ҇твеныи , и҆́миже зижди́телѧ пᲂнесла̀ є҆сѝ дв҃о прест҃а́ѧ , вᲂплᲂще́ннаго бл҃гᲂда́тїю , прᲂсте́рши мᲂлѝ є҆гѡ̀ , и҆зба́вити на́съ ѿ напа́стей , и҆ страсте́й и҆ бѣ́дъ , вᲂсхвалѧ́ющихъ тѧ̀ любо́вїю , и҆ вᲂпїю́щихъ тѝ . сла́ва все́льшемꙋсѧ в̾ тѧ̀ . сла́ва прᲂше́дшемꙋ и҆з̾ тебѐ . сла́ва свᲂбо́ждьшемꙋ на́съ ржⷭ҇тво́мъ свᲂи́мъ . =крⷭ҇тᲂбоⷢ҇ . На крⷭ҇тѣ̀ тебѣ̀ распе́ньшꙋсѧ ѿ без̾зако́нникъ , и҆ во́инѡмъ тѝ кᲂпїе́мъ ре́бра сп҃се прᲂбо́дшимъ , пречⷭ҇таѧ рыда́ше го́рькѡ , мно́гᲂмꙋ ти и҆ ᲂу҆жа́снᲂмꙋ терпѣ́нїю дивѧ́щисѧ вᲂпїѧ́ше . сла́ва и҆́же к̾ чл҃кѡмъ твᲂе́й любвѝ . сла́ва твᲂе́й бл҃гᲂсти . сла́ва и҆́же сме́ртїю свᲂе́ю чл҃ки ѡ҆живлѧ́ющемꙋ .

пѣ́снь , д҃ . і҆рмо́съ . Пᲂю́ тѧ слꙋ́хᲂмъ бо гдⷭ҇и , ᲂу҆слы́шахъ и҆ ᲂу҆бᲂѧ́хсѧ . до мене́ бо прїи́де , менѐ и҆ща̀ заблꙋ́ждьшаго . тѣ́мже мно́гᲂе твᲂѐ сᲂше́ствїе є҆́же на мѧ̀ прᲂславлѧ́ю ѡ҆бнᲂвле́нїе . Распе́нъ себѐ страсте́мъ , и҆ ми́рᲂви бг҃ᲂмꙋ́дре ѻ҆́ч҃е . на крⷭ҇тѣ̀ прᲂсте́ршемꙋ во́лею дла́ни хрⷭ҇тꙋ̀ , ᲂу҆гᲂди́лъ є҆сѝ венеди́кте . є҆го́же мᲂлѝ , спастѝ дш҃а на́ша . По́двигᲂмъ вᲂз̾держа́нїѧ прпⷣбне , плᲂтьскі́ѧ ᲂу҆мертви́лъ є҆сѝ ᲂу҆́ды . ме́ртвыѧ же мл҃твᲂю вᲂз̾ста́вилъ є҆сѝ . и҆ прихᲂдѧ́щїѧ ᲂу҆се́рднѡ вѣ́рᲂю , чꙋ́днѡ ѡ҆правда́лъ є҆сѝ . и҆ всѧ́къ недꙋ́гъ ѻ҆́ч҃е и҆сцѣли́лъ є҆сѝ . Сꙋ́хи ᲂу҆́бѡ и҆ немᲂкры̀ сᲂдѣ́лалъ є҆сѝ дꙋ́ши и҆́скренимъ , живы́мъ сло́вᲂмъ свᲂи́мъ напᲂи́въ ѻ҆́ч҃е бг҃ᲂмꙋ́дре . па́стырь бг҃ᲂи҆зрѧ́денъ бы́въ , и҆́нᲂкꙋющимъ ᲂу҆краше́нїе прекрасно̀ . боⷢ҇ . Ꙗ҆́кѡ до́ждь на рꙋно̀ чи́стаѧ , в̾ честно́е чре́во твᲂѐ сло́во сни́де вᲂплᲂща́емо , и҆ ᲂу҆ста́ви мнᲂгᲂбо́жїѧ ꙗ҆́вѣ ѡ҆дᲂжде́нїе всенепᲂро́чнаѧ , и҆ го́рькꙋю зи́мꙋ разᲂри́ло є҆́сть .

пѣ́снь , є҃ . і҆рмо́съ . Свѣ́та пᲂда́телю , и҆ вѣко́мъ тво́рче гдⷭ҇и , во́ свѣтѣ твᲂи́хъ пᲂвелѣ́нїи наста́ви на́съ , ра́звѣ бо тебѐ и҆но́гѡ бг҃а незна́емъ . И҆́же в̾ млⷭ҇ти бг҃а мᲂлѧ̀ ѻ҆́ч҃е прпⷣбне , напо́лнилъ є҆сѝ ꙗ҆́кᲂже и҆лїѧ̀ чва́нецъ є҆ле́ѧ , сᲂсꙋ́дъ вели́къ , ѿ зрѧ́щихъ вѣ́рнѡ ᲂу҆дивлѧ́емь . Ꙗ҆́кѡ чи́стъ дш҃е́ю , ты̀ во и҆з̾стꙋпле́нїи бы́въ , ви́дѣлъ є҆сѝ всю̀ зе́млю , ꙗ҆́кѡ пᲂд̾ заре́ю сїѧ́ющꙋ є҆ди́нᲂю . бг҃ꙋ тѧ̀ пᲂчита́ющꙋ , всебл҃же́нне венеди́кте . Чꙋдᲂдѣ́йствꙋѧ ѡ҆ хрⷭ҇тѣ̀ , вᲂдѣ̀ и҆стещѝ мл҃твᲂю прпⷣбне , мо́лиши пᲂдвигᲂпᲂло́жника . ꙗ҆́же пребыва́етъ , прᲂпᲂвѣ́дающи чꙋдеса̀ венеди́кте . боⷢ҇ . Живы́и на́ нб҃сѣхъ , хᲂтѧ̀ всели́сѧ в̾ лᲂжесна̀ твᲂѧ̀ чⷭ҇таѧ . ꙗ҆́кѡ да на́съ хра́мы трⷪ҇цѣ сᲂтвᲂри́тъ , и҆́же тѧ̀ бцⷣꙋ прᲂпᲂвѣ́дающихъ чⷭ҇таѧ .

пѣ́снь , ѕ҃ . і҆рмо́съ . Въ бе́зднѣ грѣхо́внѣй ѡ҆держи́мъ , не и҆з̾слѣ́днꙋю млрⷭ҇дїѧ твᲂегѡ̀ призыва́ю бе́зднꙋ , ѿ тлѝ бж҃е мѧ вᲂз̾ведѝ . Свѣтᲂсїѧ́ньми прᲂсвѣща́емь дх҃а , тмꙋ̀ ѕлꙋ́ю бѣсо́вскꙋю ѿгна́лъ є҆сѝ , чꙋдᲂтво́рче венеди́кте . и҆́нᲂкꙋющимъ свѣти́льникъ свѣ́телъ . Ꙗ҆́кѡ пресла́вно житїѐ твᲂѐ , и҆ пресвѣ́тло пребыва́нїе твᲂѐ . и҆́же стада̀ привле́клъ є҆сѝ и҆́нᲂческаѧ , к̾ ра́зꙋмꙋ спаси́тельнᲂмꙋ . Црⷭ҇твїѧ жи́тель бы́въ нбⷭ҇нагѡ , бг҃ᲂмꙋ́дре венеди́кте . сегѡ̀ ᲂу҆лꙋчи́ти мᲂлѝ , вѣ́рᲂю тѧ̀ при́снѡ бл҃жа́щимъ . боⷢ҇ . И҆з̾ ᲂу҆тро́бы твᲂеѧ̀ ст҃ы́ѧ , вᲂсїѧ̀ пра́вдѣ невече́рнее со́лнце . и҆ вѣ́рныхъ прᲂсвѣтѝ , бцⷣе дв҃о всепѣ́таѧ .

а҆́ще сꙋбо́та , и҆лѝ недѣ́лѧ : кᲂнда́къ . гла́съ , д҃ . Вᲂз̾гᲂрѣ́всѧ раче́нїемъ го́рнимъ , и҆ ст҃ы́мъ дх҃ᲂмъ , всѧ̀ прᲂсвѣти́лъ є҆сѝ , ѻ҆́ч҃е прпⷣбне венеди́кте сщ҃е́нне . непреста́ннѡ мᲂлѝ хрⷭ҇та̀ бг҃а пребл҃же́нне , ѡ҆ всѣ́хъ на́съ .

пѣ́снь , з҃ . і҆рмо́съ . Вѣті́и ꙗ҆ви́шасѧ ѻ҆́трᲂцы , премꙋ́дрїи дре́вле , бг҃ᲂпрїи́мцы дш҃е́ю бг҃ᲂслᲂве́сны ᲂу҆сты̀ пᲂѧ́хꙋ , пребжⷭ҇твенныи ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Ме́ртвᲂсть живᲂно́снꙋ стѧжа́въ , сласте́й ѿлᲂже́нїемъ . тѣ́мже ме́ртвыхъ вᲂз̾ставлѧ́ти спᲂдо́билсѧ є҆сѝ , бл҃же́нне венеди́кте . пребжⷭ҇твеныи ѻ҆ц҃е́мъ вᲂпїѧ̀ , бж҃е бл҃гᲂслᲂве́нъ є҆сѝ . Сᲂдѣ́ла прпⷣбными сѝ трꙋды̀ , ѻ҆гра́дꙋ бесчи́сленыхъ мни́хъ . ꙗ҆́же при́снѡ пребыва́етъ , ѡ҆сѣнѧ́ема мᲂли́твами твᲂи́ми дᲂстᲂчꙋ́дне . вᲂдрꙋжена̀ сꙋ́щими до́брыми ѿ тебѐ ѡ҆бразᲂва́нїи . Непщева́вше ᲂу҆мᲂри́ти безꙋма̀ , чарᲂдѣѧ́ньми ѻ҆́ч҃е лꙋка́вными , тебѐ блюдо́маго бжⷭ҇твенᲂю всѣ́хъ зижди́телѧ дла́нїю . несмы́сленїи пᲂстыдѣ́шасѧ ѡ҆бличе́ни бы́вше , сꙋ́щимъ в̾ тебѣ̀ венеди́кте прᲂразꙋмѣ́нїемъ . боⷢ҇ . И҆сцѣлѝ дш҃и мᲂеѧ̀ стра́сти , без̾стра́стїѧ и҆сто́чникъ ро́ждьши несказа́ннѡ дв҃о . и҆ ᲂу҆миле́нїѧ тꙋ́чꙋ пᲂда́ждь ми , хᲂда́тайствꙋющꙋю мѝ ᲂу҆тѣше́нїѧ та́мѡ , ст҃а́ѧ бцⷣе .

пѣ́снь , и҃ . і҆рмо́съ . Впе́щь ѻ҆́гненнꙋю , к̾ дѣ́темъ є҆вре́йскимъ сᲂше́дшагѡ , и҆ пла́мень на хла́дъ прело́жшагѡ бг҃а , по́йте всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Над̾ страстьмѝ тлетво́рными црⷭ҇твᲂвавъ ѡ҆ хрⷭ҇тѣ̀ , бг҃ᲂмꙋ́дре ѻ҆́ч҃е . в̾ нбⷭ҇нѣмъ црⷭ҇твїи спᲂдо́бисѧ жи́ти , со всѣ́ми до́брѣ пᲂжи́вшими , и҆ всеви́дца бг҃а вᲂз̾лю́бльшими . Твᲂѧ̀ ст҃ы́ѧ мл҃твы прїе́млѧ бг҃ъ , сꙋ́щимъ во ѡ҆скꙋдѣ́нїи тᲂбо́ю пᲂдава́ше , ꙗ҆́же къ житїю̀ вины̀ . вельмѝ на землѝ прᲂславлѧ́ѧ тѧ̀ чꙋдᲂдѣ́йствы , венеди́кте требл҃же́нне . Оу҆кра́шьсѧ дᲂбро́тами бжⷭ҇твеныхъ дᲂбрᲂдѣ́телей , къ кра́снымъ черто́гѡмъ преста́висѧ ѻ҆́ч҃е , пребыва́ти с̾ бг҃ᲂмъ . и҆ сегѡ̀ бжⷭ҇твеныѧ красᲂты̀ , в̾ непрᲂхᲂди́мыѧ вѣ́ки наслажда́тисѧ . боⷢ҇ . Сѐ рᲂди́сѧ и҆з̾ тебѐ , ꙗ҆́кᲂже вᲂпїе́тъ и҆са́їѧ чⷭ҇таѧ , ѻ҆трᲂча̀ сн҃ъ вы́шнѧгѡ , и҆ тво́й зри́мь є҆́сть сн҃ъ дв҃о . сн҃ы сᲂтвᲂрѧ́ѧ нбⷭ҇нагѡ ѻ҆ц҃а , тебѐ пᲂчита́ющихъ .

пѣ́снь , ѳ҃ . і҆рмо́съ . И҆́же ѿ́ бг҃а бг҃а сло́ва , не и҆зрече́ннᲂю мꙋ́дрᲂстїю , прише́дшагѡ ѡ҆бнᲂви́ти а҆да́ма , ꙗ҆́дїю тлѣ́нїѧ па́дшагѡ ѕлѣ̀ , ѿ ст҃ы́ѧ же дв҃цы , неи҆зрече́нно вᲂплᲂща́ема на́съ ра́ди , вѣ́рнїи є҆динᲂмꙋ́дреннѡ пѣ́сньми велича́емъ . Ꙗ҆ви́лсѧ є҆сѝ ꙗ҆́кѡ сл҃нце вели́кᲂе , ѡ҆зарѧ́ѧ зда́нїе зна́меньми бг҃ᲂмꙋ́дре стра́шными , и҆ дᲂбрᲂдѣ́телей сїѧ́нїи . сегѡ̀ ра́ди сᲂверша́юще па́мѧть твᲂю̀ по и҆́стинѣ свѣтᲂза́рнꙋю , прᲂсвѣща́емсѧ ѻ҆́ч҃е серде́чными чꙋ́вствы . Тѧ̀ и҆́нᲂкꙋющихъ стада̀ тᲂбо́ю со́бранна , де́нь вᲂсхвалѧ́ютъ и҆ но́щь . пᲂсредѝ тѣ́ло твᲂѐ и҆мꙋ́ще , и҆стᲂча́ющее бᲂга́тнѡ чꙋдесе́мъ рѣ́ки , ѻ҆́ч҃е премꙋ́дре . и҆ прᲂсвѣтѧ́ще си́хъ непреста́ннѡ стᲂпы̀ . Па́че со́лнечныхъ лꙋ́чь ѡ҆блиста́лъ є҆сѝ ѻ҆́ч҃е , сᲂверши́въ бж҃їѧ за́пᲂвѣди , и҆ к̾ свѣ́тꙋ невече́рнемꙋ преста́висѧ . мᲂлѧ̀ пᲂда́тисѧ ѡ҆ставле́нїю грѣхо́въ , вѣ́рнѡ тѧ̀ чтꙋ́щимъ сла́вне венеди́кте . боⷢ҇ . Свѣтᲂрᲂди́тельнице дв҃о , дш҃и мᲂеѧ̀ ѻ҆́блакъ ѿженѝ . и҆ да́ждь чи́стѡ зрѣ́ти влⷣчце спасе́нꙋю дᲂбро́тꙋ , вᲂсїѧ́вшагѡ неи҆зрече́ннѡ ѿ твᲂеѧ̀ пречⷭ҇тыѧ ᲂу҆тро́бы , во свѣ́тъ ꙗ҆зы́кѡмъ препѣ́таѧ .