МЦⷭ҇А ТОГО́ЖЕ ВЪ З҃І ДН҃Ь

прпⷣбнагѡ ѻ҆ц҃а на́шегѡ а҆леѯі́ѧ , чл҃ка бж҃їѧ . =и҆ преставле́нїе прпⷣбнагѡ ѻ҆ц҃а на́шегѡ мака́рїѧ чꙋдᲂтво́рца и҆гꙋ́мена . слꙋ́жба є҆мꙋ̀ пи́сана по се́й слꙋ́жбѣ . Ве́черъ , на гдⷭ҇и вᲂзва́хъ , стⷯры . гла́съ , а҃ . поⷣ . прехва́льнїи мч҃нцы . Чл҃ка тѧ̀ пᲂзна́хᲂмъ бж҃їѧ ,꙳ зва́нїемъ же и҆ ве́щїю .꙳ дᲂбрᲂдѣ́тельми бо прᲂсїѧ́лъ є҆сѝ .꙳ нищетꙋ̀ без̾мѣ́рнꙋ ,꙳ и҆ тѣснᲂтꙋ̀ на землѝ стѧжа́въ ,꙳ и҆ чꙋдесы̀ вѣ́рныхъ ᲂу҆вѣ́ривъ .꙳ тѣ́мже мᲂли́сѧ ,꙳ дарᲂва́ти дш҃а́мъ на́шимъ ,꙳ ми́ръ и҆ ве́лїю ми́лᲂсть . Жела́нїемъ ѡ҆рᲂша́ющимъ пло́ть ,꙳ по́хᲂти палѧ́щїѧ ꙳ ᲂу҆гаси́лъ є҆сѝ а҆леѯі́е .꙳ черто́гᲂмъ черто́гъ , и҆змѣни́лъ є҆сѝ бл҃гᲂче́стнѡ .꙳ сла́дᲂсть же тѣле́снꙋю ,꙳ бжⷭ҇твенымъ а҆́нг҃льскимъ пᲂдо́бїемъ .꙳ с̾ ни́ми же мᲂли́сѧ ,꙳ дарᲂва́ти дш҃а́мъ на́шимъ ꙳ ми́ръ и҆ ве́лїю млⷭ҇ть . Пребыва́ше невѣ́дᲂмъ мꙋ́дре ,꙳ пред̾ враты̀ ѡ҆скᲂрблѧ́емь ,꙳ сщ҃е́нныхъ рᲂди́телей твᲂи́хъ .꙳ рꙋга́ющемсѧ тебѣ̀ твᲂи́мъ ѻ҆трᲂкѡ́мъ ,꙳ на́ времени до́лзѣ .꙳ ᲂу҆́меръ же ꙗ҆ви́лсѧ є҆сѝ чꙋдесы̀ ,꙳ и҆́хже сᲂверши́лъ є҆сѝ и҆сцѣлѧ́ѧ недꙋ́ги ,꙳ и҆ ѿгᲂнѧ̀ лꙋка́вствїѧ дꙋ́хи . =сла́ва , и҆ ны́нѣ , боⷢ҇ . Недꙋ́гᲂвавшꙋю препѣ́таѧ лю́тѣ ,꙳ дш҃ꙋ мᲂю̀ страстьмѝ лꙋка́выми ,꙳ и҆сцѣлѝ ꙗ҆́же врача̀ и҆ сп҃са ꙳ всѣ́мъ хрⷭ҇та̀ ро́ждьшаѧ .꙳ всѧ́кїѧ ꙗ҆́звы ꙳ и҆сцѣли́вшагѡ ᲂу҆ѧ́звленᲂмꙋ .꙳ дїа́вᲂлѧ ѕлᲂмы́слїѧ ,꙳ и҆ сме́рти на́съ и҆змѣни́вшагѡ .= крⷭ҇тᲂбоⷢ҇ . С=вᲂегѡ̀ а҆́гньца ,꙳ а҆́гница и҆ непᲂро́чнаѧ влⷣчца ,꙳ на крⷭ҇тѣ̀ ꙗ҆́кѡ ᲂу҆зрѣ̀ ,꙳ видѣ́нїѧ не и҆мꙋ́ща ни дᲂбро́ты ,꙳ ᲂу҆вы̀ мнѣ̀ рыда́ющи гл҃аше .꙳ гдѣ́ ти дᲂбро́та за́йде сла́дкїи .꙳ гдѣ̀ бл҃гᲂлѣ́пїе .꙳ гдѣ̀ бл҃гᲂда́ть ѡ҆блиста́ющаѧ зра́ка твᲂегѡ̀ .꙳ сн҃е мо́й вселюби́мыи .

а҆́ще слꙋчи́тсѧ , сꙋбо́та , и҆лѝ нлⷣѧ . пᲂе́мъ : сла́ва . гла́съ , в҃ . Ти́хᲂе твᲂѐ ѻ҆́ч҃е и҆ мᲂлчали́вᲂе , без̾ѕло́бивᲂе и҆ кро́ткᲂе житїѐ , вᲂз̾люби́въ хрⷭ҇то́съ бг҃ъ , пребл҃же́нне а҆леѯі́е . ꙗ҆ви́лъ тѧ̀ є҆́сть свѣти́льника всемꙋ̀ ми́рꙋ , сїѧ́юща па́че сл҃нца . и҆́бо све́рсть и҆ бᲂга́тство вре́меннᲂе , ꙗ҆́кѡ пра́хъ в̾мѣни́лъ є҆сѝ , в̾ дᲂмꙋ̀ ѻ҆́ч҃и незна́емь , є҆ди́нагѡ жела́ѧ люби́магѡ тѝ хрⷭ҇та̀ . но пᲂмѧнѝ свᲂѧ̀ рабы̀ , ᲂу҆ прⷭ҇то́ла всѣ́хъ цр҃ѧ хрⷭ҇та̀ бг҃а на́шегѡ , прпⷣбне ѻ҆́ч҃е , непреста́ѧ мᲂлѧ́сѧ за рабы̀ свᲂѧ̀ .

и҆ ны́нѣ , боⷢ҇ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , д҃ . Ꙗ҆́кѡ чистᲂты̀ свѣти́льникъ пресвѣ́телъ пᲂказа́сѧ , ди́вныи а҆леѯі́е . и҆́бо тлѣ́нныи черто́гъ , на нетлѣ́ннᲂе бж҃їе црⷭ҇твїе премѣни́въ , ꙗ҆́кѡ цѣлᲂмꙋ́дрїѧ дѣ́латель преи҆зрѧ́денъ . сегѡ̀ ра́ди пред̾стᲂи́ши гдⷭ҇ви всѣ́хъ цр҃ю . є҆го́же мᲂлѝ , дарᲂва́ти на́мъ ми́ръ и҆ ве́лїю млⷭ҇ть . сла́ва , и҆ ны́нѣ , боⷢ҇ . и҆лѝ , крⷭ҇тᲂбоⷢ҇ .

На ᲂу҆́трени . ѻ҆́ба кано́на , во ѻ҆кта́и . и҆ ст҃о́мꙋ , на д҃ . кано́нъ , є҆мꙋ́же краегране́сїе си́це : тѧ̀ бж҃їѧ чл҃ка вᲂсхвалѧ́ю бл҃же́нне . твᲂре́нїе і҆ѡ́сифᲂво . гла́съ , в҃ . пѣ́снь , а҃ . і҆рмо́съ . Во глꙋбинѣ̀ пᲂтᲂпѝ дре́вле , фараѡни́тскаѧ всѧ̀ во́инства , преѡрꙋже́нꙋ си́лꙋ . вᲂпло́щшеесѧ сло́во , преспѣ́ющїѧ грѣхѝ пᲂтреби́ло є҆́сть , пресла́вныи гдⷭ҇ь , ꙗ҆́кѡ прᲂсла́висѧ .

запѣ́въ : Прпⷣбне ѻ҆́ч҃е а҆леѯі́е , мᲂлѝ бг҃а ѡ҆ на́съ . Тѣ́снымъ ше́ствᲂвавъ пꙋте́мъ , непᲂро́чнымъ и҆ прпⷣбнымъ житїе́мъ мꙋ́дре , прᲂхᲂдѧ̀ ѿ ю҆́нᲂсти . тѣ́мже ми тѣснᲂтꙋ̀ раз̾ширѝ ᲂу҆́мнꙋю , вᲂсхвали́ти тѧ въ ра́йстѣй ширинѣ̀ вᲂд̾вᲂрѧ́ющасѧ а҆леѯі́е . Са́мъ сѧ ѿ ню́дъ бг҃ᲂви вᲂз̾ло́жь бл҃же́нне , в̾нѣ̀ пло́ти и҆ ми́ра бы́лъ є҆сѝ . бᲂга́тствꙋ текꙋ́щꙋ , нбⷭ҇нᲂе пред̾пᲂче́лъ є҆сѝ пребыва́ющее , и҆ ѡ҆бѣща́нныи гра́дъ сїѡ́нъ вѣ́чнꙋющїи . Лᲂже́снъ ты̀ ма́терьскихъ непло́дїе раз̾рѣши́лъ є҆сѝ , ро́ждьсѧ ꙗ҆́кᲂже самꙋ́илъ пребᲂга́те . во́ чревѣ же срⷣца чи́стыи заче́нъ стра́хъ , рᲂди́лъ є҆сѝ дх҃ъ спасе́нїѧ , бжⷭ҇твеныхъ дᲂбрᲂдѣ́телей вѣ́рᲂю . боⷢ҇ . Бж҃їи сᲂбез̾нача́льныи сн҃ъ , и҆мѣ̀ ꙗ҆́кѡ вино́внꙋ тѧ̀ , є҆́же къ на́шемꙋ дв҃о пᲂдо́бїю , є҆ди́нꙋ па́че всеѧ̀ тва́ри чи́стаѧ , чи́стꙋ тѧ̀ ѡ҆брѣ́тъ . тѣ́мже тѧ̀ пᲂю́ще всѝ ро́ди ᲂу҆бл҃жа́емъ .

пѣ́снь , г҃ . і҆рмо́съ . Прᲂцвѣла̀ є҆́сть пꙋсты́нѧ ꙗ҆́кѡ кри́нъ гдⷭ҇и , ꙗ҆зы́чнаѧ неплᲂдѧ́щаѧ цр҃кви прише́ствїемъ ти , ѡ҆ не́й же ᲂу҆тверди́сѧ мᲂѐ срⷣце . Пᲂбѣжда́емь жела́нїемъ чистᲂты̀ , черто́гᲂмъ и҆́же на землѝ , нбⷭ҇ныи премѣнѝ . и҆ же́нскᲂю любо́вїю , сла́дкᲂе а҆́нг҃льскᲂе пᲂдо́бїе . Мᲂлвы̀ жите́йскїѧ , и҆ мно́жество бᲂга́тства ѡ҆ста́вилъ є҆сѝ . и҆ пресе́льникъ бы́въ ѻ҆те́чества ѻ҆́ч҃е а҆леѯі́е , хрⷭ҇то́вѣ нищетѣ̀ бл҃же́нне пᲂдо́бѧсѧ . Слеза́ми и҆ бᲂлѣ́зньми , и҆ вᲂз̾держа́нїемъ премꙋ́дре , бл҃га́го взыска́лъ є҆сѝ . кᲂгда̀ прїи́детъ свѣ́тъ ра́зꙋма , без̾стра́стїе даѧ̀ срⷣцꙋ твᲂемꙋ̀ . боⷢ҇ . И҆́же гᲂрѣ̀ неви́димыи а҆́нг҃лѡмъ чи́стаѧ , до́лѣ и҆з̾ тебѐ ражда́емь , зри́тсѧ сᲂверше́нъ чл҃къ . пᲂгиба́ющаго ми́ра ѡ҆бнᲂвлѧ́ѧ .

сѣда́ленъ . гла́съ , г҃ . Мирскꙋ́ю красᲂтꙋ̀ прпⷣбне ѡ҆ста́вилъ є҆сѝ , премѣни́въ бᲂга́тствᲂмъ текꙋ́щимъ , непрᲂхᲂди́мᲂе ꙗ҆́вѣ и҆ пребыва́ющее а҆леѯі́е . тѣ́мже со всѣ́ми тѧ̀ ст҃ы́ми сла́вимъ , и҆ тᲂржествꙋ́емъ свѣ́тлѡ в̾ па́мѧть твᲂю̀ , прᲂсѧ́ще ѡ҆брѣстѝ мл҃твами твᲂи́ми , бл҃же́нне ве́лїю млⷭ҇ть . сла́ва , и҆ ны́нѣ , боⷢ҇ . Недᲂвѣ́дᲂмѡ , и҆ непᲂсти́жимѡ є҆́сть влⷣчце бг҃ᲂбл҃гᲂда́тнаѧ , сᲂдѣ́ланнᲂе в̾ тебѣ̀ стра́шнᲂе бж҃їе та́инство . непᲂсти́жимаго бо заче́ньши рᲂдила̀ є҆сѝ , пло́тїю ѡ҆блᲂже́на , ѿ чⷭ҇тыхъ крᲂве́й твᲂи́хъ . є҆го́же всегда̀ чⷭ҇таѧ , ꙗ҆́кѡ сн҃а свᲂегѡ̀ мᲂлѝ , спастѝ дш҃а на́ша .= крⷭ҇тᲂбоⷢ҇ . Н=еи҆скꙋсᲂбра́чнаѧ чⷭ҇таѧ и҆ мт҃и твᲂѧ̀ хрⷭ҇тѐ , зрѧ́щи тѧ ме́ртва ѡ҆бѣ́шена на́ древѣ , мт҃рьски рыда́ющи гл҃аше , что́ ти вᲂздадѐ є҆вре́йскїи без̾зако́нныи сᲂбо́ръ , и҆ без̾бл҃гᲂда́тныи , и҆́же мно́гихъ и҆ вели́кихъ твᲂи́хъ , сн҃е мо́й даро́въ насла́ждьшїисѧ ; пᲂю̀ твᲂѐ бжⷭ҇твенᲂе схᲂжде́нїе .

пѣ́снь , д҃ . і҆рмо́съ . Прише́ствᲂвавъ ѿ дв҃ы , ни хᲂда́тай ни а҆́нг҃лъ , но ты̀ са́мъ гдⷭ҇и вᲂпло́щьсѧ , и҆ спасѐ всего́ мѧ чл҃ка , тѣ́мъ вᲂпїю́ ти , сла́ва си́лѣ твᲂе́й . Претерпѣ́лъ є҆сѝ нищетꙋ̀ , прᲂси́тель бы́въ , ни́щь ꙗ҆́кᲂже ла́зарь . жела́нїе бо бжⷭ҇твенᲂе , ᲂу҆тѣша́ше бл҃же́нне срⷣце твᲂѐ , в̾желѣ́вшее бᲂга́тства нбⷭ҇нагѡ . Без̾печа́льно и҆ ти́хо житїѐ вᲂз̾желѣ́лъ є҆сѝ , є҆ди́нᲂю ꙗ҆ды́и въ недѣ́ли а҆леѯі́е . жела́нїемъ ча́ющагѡ тѧ̀ , немимᲂтекꙋ́щагѡ пребл҃же́нне наслажде́нїѧ . Цр҃квь бг҃ᲂви срⷣце и҆скі́и сᲂдѣ́лати , въ хра́мѣ вᲂз̾люби́лъ є҆сѝ бж҃їѧ мт҃ре сла́вне всегда̀ сѣдѣ́ти . и҆ нбⷭ҇ныѧ дᲂбро́ты в̾зира́ти . боⷢ҇ . Вᲂз̾дᲂи́вши да́телѧ дв҃о млекꙋ̀ , а҆́лчꙋщее и҆ ᲂу҆тѣснѧ́емᲂе ны́нѣ срⷣце мᲂѐ , насытѝ всѧ́кᲂгѡ ра́зꙋма , и҆ ᲂу҆миле́нїѧ бжⷭ҇твенагѡ мᲂлю́ тѧ .

пѣ́снь , є҃ . і҆рмо́съ . Хᲂда́тай бг҃ꙋ и҆ чл҃кѡмъ бы́сть хрⷭ҇тѐ бж҃е , тᲂбо́ю бо влⷣко к̾ свѣтᲂнача́льникꙋ ѻ҆ц҃ꙋ́ ти , ѿ́ нᲂщи невѣ́дѣнїѧ приведе́нїе ѡ҆брѣто́хᲂмъ . То́ки сщ҃е́нными , напᲂѧ́ѧ всегда̀ сле́зными свᲂю̀ дш҃ꙋ , сᲂдѣ́лалъ є҆сѝ кла́съ вᲂи́стинꙋ стᲂри́чествꙋющь , дѣ́лателю без̾сме́ртнᲂмꙋ , до́брѣ сᲂблюда́емь . Ви́дѣнъ бы́сть на землѝ , житїю̀ беспло́тныхъ пᲂдо́бѧсѧ , премно́гимъ твᲂи́мъ ѻ҆́ч҃е вᲂз̾держа́нїемъ дᲂстᲂчꙋ́дне , и҆ мл҃твенымъ пᲂжда́нїемъ . и҆́мже ꙗ҆́кѡ свѣ́тᲂмъ прᲂсвѣти́лсѧ є҆сѝ . Ѻ҆гне́мъ мл҃твъ , грѣха̀ пᲂпали́лъ є҆сѝ ве́щь мꙋ́дре . бдѣ́нными же стᲂѧ́ньми , всѧ́ко сладᲂстра́стїе ᲂу҆спи́лъ є҆сѝ . ᲂу҆со́пъ же к̾ сїѧ́нїю преста́вилсѧ є҆сѝ невече́рнемꙋ . боⷢ҇ . И҆́же во́ свѣтѣ живы́и , во ст҃о́е чре́во твᲂѐ всели́сѧ чⷭ҇таѧ , ми́ра пᲂги́бшагѡ тмо́ю неразꙋ́мїѧ , назида́ѧ . є҆го́же мᲂлѝ , всѧ̀ прᲂсвѣти́ти пᲂю́щїѧ тѧ̀ .

пѣ́снь , ѕ҃ . і҆рмо́съ . Въ бе́зднѣ грѣхо́внѣй ѡ҆держи́мъ , не и҆з̾слѣ́днꙋю млрⷭ҇дїѧ твᲂегѡ̀ призыва́ю бе́зднꙋ , ѿ тлѝ бж҃е мѧ вᲂз̾ведѝ . Цр҃квь жива̀ бг҃ꙋ тѧ̀ бы́вша , хрⷭ҇то́во селе́нїе неи҆скꙋсᲂбра́чнаѧ , прᲂѧвлѧ́етъ кры́ющасѧ . и҆ прᲂславлѧ́етъ , ᲂу҆таи́тисѧ тща́ща . Мл҃твы твᲂѧ̀ бг҃ᲂви , ꙗ҆́кѡ кади́ло бл҃же́нне прїѧ́ти бы́ша . тѣ́мже житїе́мъ твᲂи́мъ вѣ́рныхъ ра́зꙋмы , бл҃гᲂꙋха́лъ є҆сѝ дх҃а бл҃гᲂда́тїю . Сщ҃е́ннымъ житїе́мъ ᲂу҆краша́ема , па́ки хрⷭ҇то́съ нехᲂтѧ́ща сла́вне , тѧ̀ ѻ҆те́чествꙋ дае́тъ , ѿбѣ́гающа сла́вы вре́менныѧ . боⷢ҇ . Зако́ны є҆сте́ственыѧ чи́стаѧ влⷣчце , зижди́тель но́во сᲂдѣ́лавъ є҆стество̀ , и҆з̾ тебѐ неи҆з̾рече́ннѡ ражда́етсѧ , и҆ ѡ҆бᲂжа́етъ мѧ̀ без̾мѣ́рнᲂю млⷭ҇тїю .

кᲂнда́къ . гла́съ , в҃ . До́мъ свᲂи́хъ рᲂди́телей , ꙗ҆́кѡ чꙋ́жь и҆мѣ́ѧ , вᲂдвᲂри́бᲂсѧ и҆дѣ́же вѣне́цъ прїѧ́лъ є҆сѝ свы́ше , чл҃че бж҃їи а҆леѯі́е . ди́венъ на землѝ ꙗ҆́вльсѧ , а҆́нг҃лѡмъ и҆ чл҃кѡмъ свѣти́ло . и҆́кᲂсъ . Житїе́мъ и҆ слᲂвесы̀ ᲂу҆краси́лсѧ є҆сѝ . и҆ хрⷭ҇то́вꙋ цр҃квь вᲂз̾вели́чилъ є҆сѝ , свᲂи́мъ житїе́мъ . ѻ҆ц҃а и҆ мт҃рь , цр҃ѧ и҆ лю́ди тᲂржествᲂва́ти ᲂу҆стро́илъ є҆сѝ . дѣ́лы пᲂчти́лъ є҆сѝ , и҆́же по ѻ҆́бразꙋ бж҃їю а҆леѯі́е прпⷣбне . вᲂсїѧ́въ бо въ ми́рѣ , и҆ є҆́же въ тебѣ̀ цѣлᲂмꙋ́дрїе , и҆ бл҃гᲂда́ть мᲂлча́нїи твᲂи́хъ блиста́ющи всѣ́мъ , и҆́же вѣ́рᲂю пра́зднꙋютъ ѻ҆́ч҃е па́мѧть твᲂю̀ . ꙗ҆ви́лсѧ є҆сѝ а҆́нг҃лѡмъ и҆ чл҃кѡмъ свѣти́ло .

пѣ́снь , з҃ . і҆рмо́съ . Бг҃ᲂпрᲂти́вно велѣ́нїе без̾зако́ннꙋюща мꙋчи́телѧ , высо́къ пла́мень вᲂз̾несло̀ є҆́сть , хрⷭ҇то́съ же прᲂсте́ръ бг҃ᲂчести́вымъ дѣ́темъ , хла́дъ дх҃о́вныи , сы́и бл҃гᲂслᲂве́нъ и҆ препрᲂсла́вленъ . Претерпѣ́лъ є҆сѝ прпⷣбне , пред̾ рᲂди́тельными враты̀ сѣдѧ̀ , и҆ ве́сь непᲂзнава́емь . и҆ ѿ ѻ҆́трѡкъ рꙋга́нїѧ пᲂд̾є҆́млѧ , и҆ нарꙋга́емь лю́тѣ . и҆ нището́ю мно́гᲂю ѡ҆скᲂрблѧ́емь . Пло́ти твᲂеѧ̀ мꙋдрᲂва́нїе ᲂу҆мертви́въ , зрѧ̀ рᲂди́телѧ , и҆ си́ми непᲂзнава́емь , є҆стества̀ пᲂкрыва́ше нꙋ́ждꙋ прпⷣбне , и҆ презрѣ́нїе твᲂи́хъ неи҆скꙋ́сныхъ ѻ҆́трѡкъ , ѡ҆скᲂрблѧ́ющихъ тѧ̀ . ѽ чꙋ́до , ка́кѡ пребы́сть при́снѡ нищетꙋ́ѧ , в̾ бᲂга́тствѣ а҆леѯі́е без̾мѣ́рнагѡ смире́нїѧ , ка́кѡ претерпѣ́лъ є҆сѝ рꙋга́нїе и҆ ᲂу҆ничиже́нїе , ѿ ѻ҆́трѡкъ премꙋ́дре твᲂи́хъ , не дᲂмышлѧ́ющихсѧ житїю̀ твᲂемꙋ̀ . боⷢ҇ . Вели́кагѡ слꙋже́нїе ты̀ та́инства , бы́сть пренепᲂро́чнаѧ . бг҃а бо вᲂплᲂти́ла є҆сѝ , вели́кихъ ѕо́лъ на́съ и҆зба́вльшагѡ , тѧ̀ велича́ющихъ чи́стаѧ , бл҃гᲂслᲂве́наѧ и҆ бг҃ᲂра́дᲂваннаѧ .

пѣ́снь , и҃ . і҆рмо́съ . Пе́щь ѻ҆́гненна и҆нᲂгда̀ в̾ вавѷлѡ́нѣ , дѣ́йство раздѣлѧ́ше , бж҃їимъ велѣ́нїемъ халдѣ́и ѡ҆палѧ́ющи , вѣ́рныѧ же прᲂхлажда́ющи пᲂю́ща , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Невѣ́дᲂмъ пре́жде рᲂди́телемъ сѝ , во́ времѧ ѿше́ствїѧ твᲂегѡ̀ , си́мъ та́йнꙋ ѿкрыва́еши ꙗ҆влѧ́емь . въ сла́вꙋ бг҃ꙋ на́шемꙋ сла́вне , и҆́же вельми́ тѧ дᲂсто́йнѡ прᲂсла́вльшемꙋ . Гдⷭ҇ь гла́сᲂмъ ве́лїимъ ꙗ҆влѧ́етъ тѧ всемꙋ̀ ри́мꙋ , сᲂкрᲂве́ннᲂе сᲂкро́вище пребᲂга́те , в̾ ни́щетнѣ ѻ҆́бразѣ лежа́ща . и҆ да́ры целе́бными , всѧ̀ вѣ́рᲂю к̾ тебѣ̀ прихᲂдѧ́щїѧ ѡ҆бᲂгаща́ющи . Кн҃ѕи лю́дстїи , и҆ цр҃їе снидо́шасѧ , и҆ сщ҃е́нницы бл҃же́нне пᲂгребсти́ тѧ , бж҃їимъ манᲂве́нїемъ . и҆ ви́дѧще ве́лїе видѣ́нїе , диви́шасѧ чꙋдесе́мъ прпⷣбне , и҆́хже твᲂрѧ́ше , бжⷭ҇твенᲂю си́лᲂю дх҃а . боⷢ҇ . И҆стлѣ́вшїѧ ны̀ дре́вле престꙋпле́нїемъ , ѡ҆бнᲂвлѧ́ѧ чл҃кᲂлю́бецъ . нетлѣ́ннѡ вᲂплᲂти́сѧ , ѿ нетлѣ́нныѧ тѝ пренепᲂро́чнаѧ ᲂу҆тро́бы . и҆ и҆зба́ви всѣ́хъ , грѣхо́вныѧ тлѝ бг҃ᲂневѣ́стнаѧ .

пѣ́снь , ѳ҃ . і҆рмо́съ . Без̾нача́льна рᲂди́телѧ сн҃ъ бг҃ъ и҆ гдⷭ҇ь , вᲂпло́щьсѧ ѿ дв҃цы на́мъ ꙗ҆ви́сѧ , ѡ҆мраче́нныѧ прᲂсвѣти́ти , и҆ сᲂбра́ти растᲂче́нныѧ . тѣ́мъ всехва́льнꙋю бцⷣꙋ велича́емъ . И҆сцѣле́нїѧ и҆стᲂчи́лъ є҆сѝ ко́ грᲂбꙋ несо́мъ , бг҃ꙋ тѧ̀ бл҃же́нне вельмѝ сла́вѧщꙋ свѣ́тъ бо неви́дѧщїи ви́дѣша . и҆ глаго́ланїе прїѧ́ша , пре́жде сꙋ́ще нѣ́мїи , всесла́вне а҆леѯі́е . Ви́дѣнъ бы́сть пред̾лежа́щь , и҆ к̾ пᲂгребе́нїю несо́мъ , ꙗ҆́кѡ сл҃нце ѻ҆́ч҃е и҆спꙋща́ѧ , и҆сцѣле́нїи зарѧ̀ пресла́внѡ . и҆ те́мныѧ стра́сти ѿгᲂнѧ̀ . и҆ ѡ҆палѧ́ѧ бѣ́сы , и҆ прᲂсвѣща́ѧ бг҃ᲂмꙋ́дрыѧ . Прїи́де пᲂгребсти́ тѧ , патрїа́рхᲂмъ лꙋ́чшїи . цр҃ь и҆́же вельмѝ хрⷭ҇тᲂлюби́въ . кн҃ѕи ста́рцы и҆ ю҆́нїи , и҆ и҆́нᲂчестїи ли́цы , бжⷭ҇твенымъ манᲂве́нїемъ , ѡ҆сщ҃а́ющесѧ прикᲂснᲂве́нїемъ тѝ бл҃же́нне . Вᲂсхище́нъ бы́сть на кᲂлесни́цѣ дᲂбрᲂдѣ́телей несо́мъ . и҆ пᲂчива́еши и҆дѣ́же прпⷣбныхъ чи́нᲂве , сᲂбо́ры а҆пⷭ҇лъ , и҆ мч҃нкъ , патрїа́рхъ , и҆ всѣ́хъ пра́ведникъ . с̾ ни́ми же ны̀ пᲂмѧнѝ , пᲂчита́ющихъ тѧ̀ а҆леѯі́е . боⷢ҇ . Гла́съ тѝ прино́симъ гаврїи́лъ ра́дꙋющесѧ . ра́дꙋисѧ гл҃юще село̀ недѣ́ланнᲂе . ра́дꙋисѧ клѧ́твѣ разрѣше́нїе . ра́дꙋисѧ и҆сто́чниче вᲂды̀ живо́тныѧ , прпⷣбнымъ пᲂхвало̀ , бцⷣе при́снѡ дв҃о .

Преставле́нїе прпⷣбнагѡ ѻ҆ц҃а на́шегѡ мака́рїѧ чꙋдᲂтво́рца и҆гꙋ́мена , сᲂста́вльшагѡ ѻ҆би́тель , кᲂлѧ́зино и҆мѧнꙋ́емо . =Ве́черъ , на гдⷭ҇и вᲂзва́хъ , стихѣ́ры . гла́съ , є҃ . поⷣ . ра́дꙋйсѧ живᲂно́сныи . Ра́дꙋисѧ сщ҃е́ннаѧ главо̀ , ѻ҆́ч҃е мака́рїе бг҃ᲂмꙋ́дре . бж҃їѧ ра́зꙋма вᲂда́ми напаѧ́емь , и҆ пло́дъ бл҃гᲂꙋха́ненъ ꙗ҆ви́сѧ житїе́мъ свᲂи́мъ , ѿ ю҆́нᲂсти прпⷣбне . а҆́ще и҆ чл҃къ є҆стество́мъ бы́лъ є҆сѝ , а҆́нг҃льски на землѝ по́жилъ є҆сѝ . стра́хъ бж҃їи вᲂз̾люби́въ , и҆ за́пᲂвѣдемъ є҆гѡ̀ при́снѡ пᲂꙋча́ѧсѧ . ти́хже и҆ ᲂу҆тѣ́шителенъ слᲂвесы̀ пᲂказа́сѧ . млⷭ҇тивъ и҆ кро́тᲂкъ бы́лъ є҆сѝ . и҆ ны́нѣ ра́дᲂсти гдⷭ҇а свᲂегѡ̀ спᲂдо́бисѧ . прилѣ́жнѡ мᲂли́сѧ , дарᲂва́ти дш҃а́мъ на́шимъ ве́лїю ми́лᲂсть . Ра́дꙋисѧ прпⷣбне ѻ҆́ч҃е мака́рїе . кра́снѣи свᲂѝ но́зѣ , до́блественѣ к̾ тече́нїю прᲂсте́рлъ є҆сѝ , и҆ пꙋсты́ню дᲂсти́глъ є҆сѝ . и҆ хра́мъ в̾ сла́вꙋ ст҃ы́ѧ трⷪ҇цы вᲂз̾дви́глъ є҆сѝ . и҆ мно́жество и҆́нѡкъ со́бралъ є҆сѝ , и҆ дᲂбрᲂдѣ́тельми си́хъ прᲂсвѣти́лъ є҆сѝ . и҆ всели́лсѧ є҆сѝ и҆дѣ́же свѣ́тъ невече́рнїи , и҆дѣ́же а҆́нг҃лъ ликᲂстᲂѧ́нїѧ . с̾ ни́ми же пред̾стᲂѧ̀ прпⷣбне , мᲂлѝ спасти́сѧ дш҃а́мъ на́шимъ . До́брѣ тече́нїе сᲂверши́въ мака́рїе прпⷣбне , и҆ ко хрⷭ҇тꙋ̀ вᲂсхᲂжде́нїе пᲂлꙋчи́лъ є҆сѝ . честны́ѧ же твᲂѧ̀ мо́щи , во́ грᲂбѣ запечатлѣ́нны землѝ предава́емы . землѧ́ же ѿ свᲂи́хъ нѣ́дръ предае́тъ тѧ̀ сщ҃еннᲂлѣ́пна , цѣ́ла же и҆ неразрꙋши́ма , бл҃гᲂꙋха́нїемъ и҆ чꙋдесы̀ ᲂу҆дивлѧ́ема . честна́ѧ же твᲂѧ̀ ра́ка , па́че ка́мене самѳѵ́ра ѻ҆́ч҃е пᲂказа́сѧ , цѣле́бна бо и҆ чꙋдᲂтвᲂри́ва , и҆ па́че зла́та вѣ́рными раз̾дрᲂблѧ́ема , на ѡ҆сщ҃е́нїе дш҃а́мъ же и҆ тѣлесе́мъ . тѣ́мже хрⷭ҇та̀ бг҃а мᲂлѝ , дарᲂва́ти на́мъ ве́лїю ми́лᲂсть . =сла́ва . гла́съ , и҃ . Кто̀ и҆з̾глаго́летъ до́блести твᲂѧ̀ мака́рїе прпⷣбне ; ра́вно а҆́нг҃лѡмъ житїѐ по́жилъ є҆сѝ . вᲂз̾держа́нїемъ ᲂу҆́мъ ѡ҆чи́стивъ , сле́зными тече́нїи дш҃ꙋ прᲂсвѣти́лъ є҆сѝ . тѣ́мъ и҆ ны́нѣ свѣ́тлѡ ᲂу҆кра́шенъ , пред̾стᲂи́ши со а҆́нг҃лы ра́дꙋѧсѧ , сꙋгꙋ́бымъ вѣнце́мъ ᲂу҆вѧзе́сѧ . прилѣ́жнѡ мᲂли́сѧ бл҃же́нне , прᲂсѧ̀ ми́ра ми́рᲂви , и҆ цр҃е́мъ держа́вы и҆ ᲂу҆тверже́нїѧ . мы́ же со́бранаѧ тѝ ча́да , къ честнѣ́й ра́цѣ припа́дающе , любе́знѡ мака́рїе вᲂпїе́мъ , сᲂхранѝ ста́до твᲂѐ , мᲂли́твами твᲂи́ми .= и҆ ны́нѣ , боⷢ҇ . Ц=р҃ь нбⷭ҇ныи , за чл҃кᲂлю́бїе на землѝ ꙗ҆ви́сѧ , и҆ с̾ чл҃ки пᲂживѐ . ѿ дв҃ы бо чи́стыѧ пло́ть прїе́мыи , и҆з̾ неѧ̀ прᲂше́дъ с̾ вᲂспрїѧ́тїемъ . є҆ди́нъ є҆́сть сн҃ъ сꙋгꙋ́бъ є҆стество́мъ а҆ несᲂста́вᲂмъ . тѣ́мже сᲂверше́на тᲂгѡ̀ бг҃а , и҆ сᲂверше́на чл҃ка , вᲂи́стинꙋ прᲂпᲂвѣ́дающе , и҆спᲂвѣ́даемъ хрⷭ҇та̀ бг҃а на́шегѡ . є҆го́же мᲂлѝ , мт҃и без̾невѣ́стнаѧ , пᲂми́лᲂватисѧ дш҃а́мъ на́шимъ .

=та́же , вы́хᲂдъ . прᲂки́менъ , и҆ чте́нїѧ , дне́ви . и҆ ст҃о́мꙋ . =

Ѿ премꙋ́дрᲂсти сᲂло́мѡни , чте́нїе .

Пра́ведныхъ дш҃а в̾ рꙋцѣ̀ бж҃їи , и҆ неприко́снетсѧ и҆́хъ мꙋ́ка . непщева́ни бы́ша во ѻ҆́чїю безꙋ́мныхъ ᲂу҆́мрети , и҆ вмѣни́сѧ ѡ҆ѕлᲂбле́нїе и҆схо́дъ и҆́хъ , и҆ є҆́же ѿ на́съ ше́ствїе сᲂкрꙋше́нїе , ѻ҆ни́же сꙋ́ть в̾ ми́рѣ . и҆́бо пред̾ лице́мъ чл҃ческимъ а҆́ще и҆ мꙋ́кꙋ прїи́мꙋтъ , ᲂу҆пᲂва́нїе и҆́хъ без̾сме́ртїѧ и҆спо́лнь . и҆ ма́лымъ пᲂка́зани бы́ша , вели́каѧ вᲂспрїи́мꙋтъ , ꙗ҆́кѡ бг҃ъ и҆скꙋсѝ и҆́хъ , и҆ ѡ҆брѣ́те и҆́хъ дᲂсто́йны себѣ̀ . ꙗ҆́кѡ зла́то в̾ гᲂрни́лѣ и҆скꙋсѝ и҆́хъ , и҆ ꙗ҆́кѡ всепло́днꙋ же́ртвꙋ прїѧ́тъ и҆́хъ . и҆ во́ времѧ пᲂсѣще́нїѧ и҆́хъ вᲂз̾сїѧ́ютъ , и҆ ꙗ҆́кѡ и҆́скры по сте́блїю пᲂтекꙋ́тъ . сꙋ́дѧтъ ꙗ҆зы́кѡмъ , и҆ ѡ҆блада́ютъ людьмѝ , и҆ вᲂцр҃и́тсѧ гдⷭ҇ь в̾ ни́хъ во́ вѣки . надѣ́ющїисѧ на́нь разꙋмѣ́ютъ и҆́стинꙋ , и҆ вѣ́рнїи любо́вїю пребꙋ́дꙋтъ в̾ не́мъ . ꙗ҆́кѡ бл҃гᲂда́ть и҆ млⷭ҇ть в̾ прпⷣбныхъ є҆гѡ̀ , и҆ пᲂсѣще́нїе во и҆збра́нныхъ є҆гѡ̀ .

Ѿ= премꙋ́дрᲂсти сᲂло́мѡни , чте́нїе .=

Пра́ведникъ а҆́ще пᲂсти́гнетъ скᲂнча́тисѧ , в̾ пᲂко́й бꙋ́детъ . ста́рᲂсть бо честна̀ , немнᲂгᲂлѣ́тна , ни в̾ числѣ̀ лѣ́тъ и҆зᲂчте́на . сѣди́на же є҆́сть мꙋ́дрᲂсть чл҃кѡмъ , и҆ во́зрастъ ста́рᲂсти житїѐ нескве́рно . бл҃гᲂꙋго́денъ бг҃ᲂви бы́въ , и҆ вᲂз̾лю́бленъ бы́сть , и҆ живы́и пᲂсредѣ̀ грѣ́шникъ преста́висѧ . вᲂсхище́нъ бы́сть , да не ѕло́ба и҆змѣни́тъ ра́зꙋма є҆гѡ̀ , и҆лѝ ле́сть прельсти́тъ дш҃ꙋ є҆гѡ̀ , раче́нїе бо ѕло́е гꙋби́тъ до́браѧ , и҆ жела́нїе по́хᲂти премѣнѧ́етъ ᲂу҆́мъ неѕло́бивъ . скᲂнча́всѧ в̾ ма́лѣ , и҆спо́лни лѣ́та до́лга . ᲂу҆го́дна бо бѣ̀ гдⷭ҇ви дш҃а є҆гѡ̀ . сегѡ̀ ра́ди пᲂтща́сѧ ѿ среды̀ лꙋка́вствїѧ . лю́дїе же ви́дѣвше и҆ неразꙋмѣ́вше , ни пᲂлᲂжи́ша въ пᲂмышле́нїи такᲂва́гѡ , ꙗ҆́кѡ бл҃гᲂда́ть и҆ ми́лᲂсть на прпⷣбныхъ є҆гѡ̀ , и҆ пᲂсѣще́нїе во и҆збра́нныхъ є҆гѡ̀ .

Ѿ премꙋ́дрᲂсти сᲂло́мѡни , чте́нїе .

Пра́ведницы во́ вѣки живꙋ́тъ , и҆ ѿ́ гдⷭ҇а мзда̀ и҆́мъ , и҆ пᲂмышле́нїе и҆́хъ пред̾ вы́шнимъ . сегѡ̀ ра́ди прїи́мꙋтъ црⷭ҇твїе бл҃гᲂлѣ́пїѧ , и҆ вѣне́цъ дᲂбро́ты ѿ рꙋкѝ гдⷭ҇ни . ꙗ҆́кѡ десни́цею пᲂкры́етъ и҆́хъ , и҆ мы́шцею защи́титъ и҆́хъ . прїи́метъ всѐ ѡ҆рꙋ́жїе ре́внᲂсти є҆гѡ̀ , и҆ вᲂѡ҆рꙋже́но сᲂтвᲂри́тъ сᲂзда́нїе , в̾ ме́сть враго́мъ . и҆ ѡ҆блече́тъ ѧ҆̀ во брᲂнѧ̀ пра́вды , и҆ вᲂз̾лᲂжи́тъ шле́мъ сꙋ́дъ нелицемѣ́ренъ . и҆ прїи́метъ щи́тъ непᲂбѣди́мъ препᲂдо́бїе . по ѡ҆стри́тъ же напра́сенъ гнѣ́въ во ѡ҆рꙋ́жїи . и҆ пᲂбо́ретъ с̾ ни́мъ ми́ръ на безꙋ́мныѧ . и҆ по́йдꙋтъ правᲂлꙋ́чнѣ стрѣ́лы мо́лнїины , ꙗ҆́кѡ ѿ бл҃гᲂкрꙋ́гла лꙋ́ка ѻ҆блако́въ , на намѣ́ренїе летѧ́тъ . и҆ ѿ пра́щъ ка́менныхъ ꙗ҆́рᲂсти и҆спо́лнь , падꙋ́тъ гра́ды . вᲂз̾негᲂдꙋ́етъ на ни́хъ вᲂда̀ мᲂрска́ѧ , рѣ́ки же пᲂтекꙋ́тъ жестᲂча́е . сᲂпрᲂти́въ ста́нетъ и҆́мъ дх҃ъ си́лы . и҆ ꙗ҆́кѡ ви́хᲂръ развѣ́етъ ѧ҆̀ . и҆ ѡ҆пꙋсти́тъ всю̀ зе́млю без̾зако́нїе , и҆ ѕлᲂдѣѧ́нїе преврати́тъ престо́лы си́льныхъ . слы́шите ᲂу҆́бѡ цр҃їе и҆ разꙋмѣ́йте , и҆ накажи́тесѧ сꙋдїѝ кᲂнце́мъ землѝ . внꙋши́те сᲂдержа́щїи мно́жества , и҆ гᲂрдѧ́щїисѧ ѡ҆ наро́дѣхъ ꙗ҆зы́къ , ꙗ҆́кѡ дана̀ бы́сть ѿ́ гдⷭ҇а держа́ва ва́мъ , и҆ си́ла ѿ вы́шнѧгѡ .

На литі́и , стихѣ́ры . гла́съ , є҃ . Прпⷣбне ѻ҆́ч҃е , ѿ ю҆́нᲂсти и҆мы́и сᲂверше́нꙋю мꙋ́дрᲂсть , кро́тᲂкъ дш҃е́ю и҆ срⷣцемъ бы́лъ є҆сѝ . вᲂз̾желѣ̀ ѿлꙋчи́тисѧ мирски́хъ наслажде́нїи . тѣле́сныѧ стра́сти ᲂу҆мᲂрѝ вᲂз̾держа́нїемъ . и҆ к̾ без̾стра́стїѧ высᲂтѣ̀ ѻ҆́ч҃е вᲂз̾ше́лъ є҆сѝ . и҆ свѣтᲂда́тельными зарѧ́ми прᲂсвѣща́емь , и҆стᲂча́еши и҆сцѣле́нїѧ , и҆ ѿго́ниши дꙋ́хи лꙋка́выѧ , ѿ притека́ющихъ тѝ съ вѣ́рᲂю . тѣ́мъ па́мѧть твᲂю̀ пᲂчита́емъ дᲂстᲂчꙋ́дне . Прпⷣбне ѻ҆́ч҃е , въ пꙋсты́ни жи́тельствꙋѧ , є҆ди́нᲂмꙋ бг҃ꙋ себѐ вᲂз̾лᲂжи́лъ є҆сѝ . тѣ́сныи пꙋ́ть ше́ствᲂвалъ є҆сѝ . вᲂз̾держа́нїемъ пло́ть ᲂу҆мертви́лъ є҆сѝ . дш҃ꙋ без̾стра́стїемъ ᲂу҆кра́силъ є҆сѝ , по́стникѡмъ пᲂхвала̀ бы́лъ є҆сѝ мака́рїе . неви́димаго врага̀ пᲂбѣди́лъ є҆сѝ , и҆ бы́сть чи́сто прїѧ́телище бжⷭ҇твенагѡ дх҃а . тѣ́мже вᲂпїе́мъ ти , ми́ръ ми́рᲂви и҆спрᲂсѝ , и҆ дш҃а́мъ на́шимъ ве́лїю ми́лᲂсть . Прпⷣбне ѻ҆́ч҃е , бжⷭ҇твенагѡ дх҃а бл҃гᲂда́тїю , со́бралъ є҆сѝ ли́къ и҆́нᲂчествꙋющихъ , во́инствꙋющихъ хрⷭ҇то́ви . с̾ ни́ми же до́брѣ пᲂдвиза́всѧ , тече́нїе сᲂвершѝ твᲂегѡ̀ мꙋ́жества , не ᲂу҆кло́ннѡ к̾ нб҃сѝ превᲂдѧ́щꙋю стезю̀ ше́ствᲂвалъ є҆сѝ . и҆ ны́нѣ со а҆́нг҃лы ликꙋ́еши , пред̾стᲂѧ̀ прⷭ҇то́лꙋ всѣ́хъ цр҃ѧ . мᲂли́сѧ бл҃же́нне ѡ҆ ста́дѣ твᲂе́мъ , є҆́же мꙋ́дрѣ со́бралъ є҆сѝ , да сᲂхране́но бꙋ́детъ твᲂи́ми мл҃твами . сла́ва . гла́съ , ѕ҃ . Прїиди́те празднᲂлю́бцы , ᲂу҆се́рднѡ всѝ стеце́мсѧ , вѣ́рнѡ тᲂржествꙋ́емъ , в̾ честнѣ́й па́мѧти преди́внагѡ ѻ҆ц҃а . пѣ́сньми вᲂспѣва́юще , всечⷭ҇тно́е и҆ равнᲂа҆́нг҃лѡмъ житїѐ є҆гѡ̀ . по ст҃ѣ́мъ є҆гѡ̀ преставле́нїи , честны́ѧ мо́щи пᲂдаю́тъ и҆сцѣле́нїѧ . к̾ немꙋ́ же вᲂзᲂпїе́мъ . ра́дꙋисѧ прпⷣбне мака́рїе , свѣти́льниче мнᲂгᲂсвѣ́тлыи , и҆́нᲂчествꙋющимъ спасе́нїѧ хᲂда́тай . но ꙗ҆́кѡ и҆мѣ́ѧ дерзнᲂве́нїе ко хрⷭ҇тꙋ̀ бг҃ꙋ , непреста́й мᲂлѧ́сѧ ѡ҆ чтꙋ́щихъ па́мѧть твᲂю̀ . и҆ ны́нѣ , боⷢ҇ . Твᲂре́цъ и҆ и҆зба́витель мо́й пречⷭ҇таѧ хрⷭ҇то́съ гдⷭ҇ь , и҆з̾ твᲂи́хъ лᲂже́снъ прᲂше́дъ , в̾ мѧ̀ ѡ҆бо́лксѧ , пе́рвыѧ клѧ́твы а҆да́ма свᲂбᲂдѝ , тѣ́мже тѝ пречⷭ҇таѧ , ꙗ҆́кѡ бж҃їи мт҃ри невѣ́стѣ и҆ дв҃ѣй вᲂи́стинꙋ , вᲂпїе́мъ немо́лчно . ра́дꙋйсѧ а҆́нг҃льски . ра́дꙋйсѧ влⷣчце , пред̾ста́тельнице и҆ пᲂкро́ве , и҆ спасе́нїе дш҃а́мъ на́шимъ .

На стихо́внѣ , стихѣ́ры . гла́съ , и҃ . поⷣ . ѽ =пресла́внᲂе чꙋ́до . Ѽ= пресла́внᲂе чꙋ́до ,꙳ ꙗ҆́кѡ ѕвѣзда̀ ѿ за́пада ,꙳ мака́рїе прᲂвᲂсїѧ́лъ є҆сѝ .꙳ и҆ бы́сть пра́вило дᲂбрᲂдѣ́телей ,꙳ и҆́нᲂкѡмъ ᲂу҆тверже́нїе ,꙳ по́стникѡмъ ᲂу҆дᲂбре́нїе .꙳ тѣ́мже сᲂше́дшесѧ въ па́мѧть твᲂю̀ ,꙳ хрⷭ҇та̀ вᲂз̾вели́чимъ ,꙳ прᲂславлѧ́ющагѡ свᲂѧ̀ ᲂу҆го́дники .

сти́хъ : честна̀ пре́д̾ гдⷭ҇емъ ,꙳ сме́рть прпⷣбныхъ є҆гѡ̀ . Ѽ пресла́внᲂе чꙋ́до ,꙳ въ пᲂслѣ́днѧѧ времена̀ ,꙳ ꙗ҆́кѡ зарѧ̀ ѡ҆блиста́лъ є҆сѝ мака́рїе .꙳ и҆́нᲂкъ и҆́стиненъ бы́лъ є҆сѝ ,꙳ любвѐ ꙗ҆ви́сѧ и҆спо́лнь .꙳ и҆ ꙗ҆́кѡ а҆́нг҃лъ на землѝ по́жилъ є҆сѝ ,꙳ и҆з̾ ѡ҆бража́ѧ в̾ себѣ̀ дᲂбро́тꙋ бжⷭ҇твенꙋю .꙳ тѣ́мъ па́мѧть твᲂю̀ ,꙳ пᲂчита́емъ дᲂстᲂчꙋ́дне .

сти́хъ : блаже́нъ мꙋ́жь бᲂѧ́исѧ гдⷭ҇а ,꙳ въ за́пᲂведѣхъ є҆гѡ̀ вᲂсхо́щетъ ѕѣлѡ̀ . Ѽ пресла́внᲂе чꙋ́до ,꙳ мака́рїи ди́вныи ,꙳ крⷭ҇та̀ си́лᲂю вᲂѡ҆рꙋжи́всѧ .꙳ и҆ ꙗ҆́кѡ крѣ́пкїи во́инъ ,꙳ пᲂбѣдѝ неви́димыхъ вра́гъ ѡ҆пᲂлче́нїѧ .꙳ и҆ со а҆́нг҃лы ны́нѣ вᲂдвᲂрѧ́етсѧ .꙳ тѣ́мже в̾ па́мѧть є҆гѡ̀ вᲂзᲂпїе́мъ ,꙳ тᲂгѡ̀ мл҃твами хрⷭ҇тѐ бж҃е ,꙳ спасѝ дш҃а на́ша ꙗ҆́кѡ милᲂсе́рдъ .

сла́ва . гла́съ , и҃ . И҆́нᲂкъ мно́жества , наста́вника тѧ̀ чте́мъ ѻ҆́ч҃е мака́рїе . тᲂбо́ю бо стезе́ю вᲂи́стинꙋ пра́вᲂю хᲂди́ти пᲂзна́хᲂмъ . бл҃же́нъ є҆сѝ хрⷭ҇то́ви рабо́тавъ , и҆ вра́жїю низ̾лᲂжи́въ си́лꙋ . а҆́нг҃лѡмъ сᲂбесѣ́дниче , и҆ прпⷣбнымъ є҆динᲂкро́вне и҆ пра́веднымъ . съ ни́ми же мᲂли́сѧ гдⷭ҇ви , пᲂми́лᲂватисѧ дш҃а́мъ на́шимъ . и҆ ны́нѣ , боⷢ҇ . Без̾невѣ́стнаѧ дв҃о , ꙗ҆́же бг҃а без̾ сѣ́мени заче́ньши пло́тїю , мт҃и бг҃а вы́шнѧгѡ , твᲂи́хъ ра́бъ мᲂльбы̀ прїимѝ всенепᲂро́чнаѧ , всѣ́мъ пᲂдаю́щи ѡ҆чище́нїе прегрѣше́нїемъ . ны́нѣ на́ша мᲂле́нїѧ прїе́мши , мᲂлѝ спасти́сѧ всѣ́мъ на́мъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , и҃ . Плᲂтьска́ѧ мꙋдрᲂва́нїѧ , ѻ҆́ч҃е мака́рїе вᲂз̾держа́нїемъ и҆ бдѣ́нїемъ ᲂу҆мертви́лъ є҆сѝ . мѣ́сто на не́мже пᲂты̀ свᲂѧ̀ и҆з̾лїѧ́лъ є҆сѝ , ꙗ҆́кᲂже трꙋба̀ вᲂпїе́тъ к̾ бг҃ꙋ , пᲂвѣ́дающи твᲂѧ̀ и҆справле́нїѧ . и҆ по сме́рти честны́ѧ ти мо́щи и҆стᲂча́ютъ и҆сцѣле́нїѧ . тѣ́мже вᲂпїе́мъ ти , мᲂлѝ хрⷭ҇та̀ бг҃а , спасти́сѧ дш҃а́мъ на́шимъ .

сла́ва , и҆ ны́нѣ , боⷢ҇ . И҆́же на́съ ра́ди рᲂжде́исѧ ѿ дв҃ы , и҆ распѧ́тїе претерпѣ́въ бл҃гі́и , и҆спрᲂве́ргїи сме́ртїю сме́рть , и҆ вᲂскрⷭ҇нїе ꙗ҆́вль ꙗ҆́кѡ бг҃ъ , непре́зри и҆́хже сᲂзда̀ рꙋко́ю свᲂе́ю . ꙗ҆вѝ чл҃кᲂлю́бїе свᲂѐ млⷭ҇тиве . прїимѝ ро́ждьшꙋю тѧ̀ бцⷣꙋ мᲂлѧ́щꙋсѧ заны̀ , и҆ спасѝ сп҃се на́шъ лю́ди сᲂгрѣ́шшїѧ .

На ᲂу҆́трени , на бг҃ъ гдⷭ҇ь , трᲂпа́рь , ст҃о́мꙋ , двⷤа . сла́ва , и҆ ны́нѣ , боⷢ҇ , вᲂскрⷭ҇нъ . =По а҃ , стихᲂло́гїи , сѣда́ленъ . гла́съ , и҃ . Заре́ю бжⷭ҇твенагѡ сїѧ́нїѧ прᲂсвѣти́всѧ , ѡ҆ста́вилъ є҆сѝ ми́ра житїѧ̀ всѧ̀ . и҆ вᲂспрїѧ́тъ со беспло́тными житїѐ невеще́ствено , дх҃а бжⷭ҇твеными бл҃гᲂда́тьми ᲂу҆сꙋгꙋ́бивсѧ . ѿ ню́дꙋ же и҆сцѣле́нїи да́ръ вᲂспрїѧ́лъ є҆сѝ . тѣ́мъ вᲂпїе́мъ ти , мᲂлѝ хрⷭ҇та̀ бг҃а , спасти́сѧ дш҃а́мъ на́шимъ . =два́жды . сла́ва , и҆ ны́нѣ , боⷢ҇ . Нбⷭ҇нᲂе благᲂче́стїе си́ламъ , и҆ пᲂхва́льнꙋю высᲂтꙋ̀ дш҃а́мъ на́шимъ , мт҃рь дв҃ꙋ ѻ҆трᲂкᲂви́цꙋ вᲂсхва́лимъ вѣ́рнїи . ра́дꙋисѧ ꙗ҆́же а҆́нг҃лѡмъ твᲂрца̀ во ᲂу҆тро́бѣ нᲂси́вши . ра́дꙋисѧ па́дающимъ ѡ҆чище́нїе , бг҃а сло́во вᲂпло́щши . ра́дꙋисѧ невѣ́сто неневѣ́стнаѧ .

По в҃ , стихᲂло́гїи , сѣда́ленъ . гла́съ , в҃ . Страстны́ѧ тмы̀ ѿбѣжѐ , къ без̾стра́стїѧ пꙋте́мъ наставлѧ́емь , къ свѣ́тꙋ невече́рнемꙋ вᲂстечѐ . и҆ ѿ сегѡ̀ ѡ҆зари́всѧ , нетлѣ́нїѧ бᲂга́тство наслѣ́дᲂвалъ є҆сѝ . мᲂлѝ непреста́ннѡ ѡ҆ всѣ́хъ на́съ . двⷤа . сла́ва , и҆ ны́нѣ , боⷢ҇ . Дш҃и мᲂеѧ̀ лѣ́нᲂсть лю́тꙋю , и҆ срⷣца мᲂегѡ̀ пренемᲂга́нїе , мт҃и бж҃їѧ вᲂз̾зрѣ́вши и҆сцѣлѝ мл҃твами твᲂи́ми . и҆ спасе́ныхъ ча́сти спᲂдо́би , и҆збавлѧ́ющи мѧ тмы̀ и҆ мꙋче́нїѧ . ꙗ҆́кѡ є҆ди́на ᲂу҆пᲂва́нїе мᲂѐ и҆ ᲂу҆тѣше́нїе .

По пᲂлїєлеѡ́сѣ , сѣда́ленъ . гла́съ , ѕ҃ . Вᲂз̾держа́нїемъ мно́гимъ , мꙋдрᲂва́нїѧ пло́ти ᲂу҆мертви́лъ є҆сѝ . дш҃ꙋ ᲂу҆красѝ ѻ҆де́ждею без̾стра́стїѧ . сле́зныѧ ка́пли с̾ тече́нїи пᲂто́въ сᲂвᲂкꙋпи́лъ є҆сѝ . преше́дъ ᲂу҆мо́мъ ко и҆́стиннᲂмꙋ рачи́телю , и҆спрᲂсѝ на́мъ ве́лїю млⷭ҇ть . вⷤ . сла́ва , и҆ ны́нѣ , боⷢ҇ . Ѿ срⷣца стена́нїе , и҆ ѿ ᲂу҆тро́бы ти принᲂша́ю , твᲂѐ пренепᲂро́чнаѧ прᲂсѧ̀ бл҃гᲂпребы́тнᲂе застꙋпле́нїе . пᲂми́лꙋй всестрастнꙋ́ю ми дш҃ꙋ . ᲂу҆милᲂсе́рди мнᲂгᲂми́лᲂстиваго бг҃а , и҆зба́вити мѧ̀ сꙋда̀ , и҆ є҆́зера ѻ҆́гненагѡ , є҆ди́на бл҃гᲂслᲂве́наѧ .

степе́нна , д҃ го гла́са . а҆нтиѳо́нъ , а҃ . прᲂки́мен̾ , ѱл҃о́мъ дв҃дᲂвъ . честна̀ пре́д̾ гдⷭ҇емъ , сме́рть прпⷣбныхъ є҆гѡ̀ . сти́хъ . что̀ вᲂз̾да́мъ гдⷭ҇ви ѡ҆ всѣ́хъ , и҆́хже вᲂз̾да́стъ ми . всѧ́ко дыха́нїе . є҆ѵⷢ҇а́лїе , ѿ матѳе́ѧ . заⷱ҇ , м҃г .= ѱ=ало́мъ , н҃ .

сла́ва . мл҃твъ ра́ди прпбⷣнагѡ , млⷭ҇тиве ѡ҆чи́сти мно́жество сᲂгрѣше́нїи на́шихъ .

и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жество сᲂгрѣше́нїи на́шихъ .

Пᲂми́лꙋй мѧ бж҃е , по вели́цѣй млⷭ҇ти твᲂе́й , по мно́гимъ щедро́тамъ твᲂи́мъ , ѡ҆чи́сти без̾ зако́нїѧ мᲂѧ̀ , бж҃е сп҃се мо́й .

стихѣ́ра . гла́съ , ѕ҃ . Прпⷣбне ѻ҆́ч҃е , во всю̀ зе́млю и҆зы́де вѣща́нїе и҆справле́нїи твᲂи́хъ . и҆́миже на́ нб҃сѣхъ ѡ҆брѣ́те мздꙋ̀ дѣ́ланїи свᲂи́хъ . бѣсо́вскїѧ пᲂлкѝ раз̾рꙋши́лъ є҆сѝ . и҆ а҆́нг҃льскимъ чино́мъ примѣси́сѧ . и҆́хже житїю̀ ꙗ҆́вѣ пᲂревнᲂва́лъ є҆сѝ . дерзнᲂве́нїе и҆мѣ́ѧ ко́ гдⷭ҇ꙋ , ми́ръ и҆спрᲂсѝ дш҃а́мъ на́шимъ .

кано́нъ . гла́съ , и҃ . пѣ́снь , а҃ . і҆рмо́съ . Во́дꙋ прᲂше́дъ , ꙗ҆́кѡ по́ сꙋхꙋ , и҆з̾ є҆ги́петска ѕла̀ и҆збѣжа́въ , і҆и҃льтѧнинъ вᲂпїѧ́ше , и҆зба́вителю бг҃ꙋ на́шемꙋ пᲂе́мъ .

запѣ́в̾ : Прпⷣбне ѻ҆́ч҃е мака́рїе , мᲂлѝ бг҃а ѡ҆ на́съ . Ѿве́рзи ми хрⷭ҇тѐ ᲂу҆стнѣ̀ , вᲂспѣ́ти по́двиги ᲂу҆го́дника твᲂегѡ̀ прпⷣбнагѡ мака́рїѧ . да мᲂли́твами свᲂи́ми , ѻ҆́блакъ разᲂри́тъ невѣ́дѣнїѧ мᲂегѡ̀ . Бл҃же́ннᲂе житїѐ на землѝ по́живъ прпⷣбне , и҆ нбⷭ҇нᲂе наслажде́нїе дᲂсти́глъ є҆сѝ . и҆ ны́нѣ со а҆́нг҃лы ликꙋ́еши . Па́мѧть твᲂѧ̀ мака́рїе прпⷣбне , ꙗ҆́кѡ пресвѣ́тлᲂе сл҃нце вᲂсїѧ̀ . в̾ ню́же на́мъ и҆спрᲂсѝ ѿ бг҃а бл҃гᲂда́ть и҆ млⷭ҇ть , и҆ сᲂгрѣше́нїемъ и҆збавле́нїе . боⷢ҇ . Бл҃гᲂслᲂве́нъ пло́дъ пречⷭ҇таѧ чре́ва твᲂегѡ̀ , и҆́мже земле́нїи всѝ клѧ́твы и҆зба́вихᲂмсѧ , бл҃гᲂслᲂве́наѧ всечⷭ҇таѧ . несказа́ннᲂе чꙋ́до , недᲂвѣ́дᲂмᲂе слы́шанїе , всѣ́хъ же вѣ́рныхъ спасе́нїе .

и҆́нъ , кано́нъ . гла́съ , а҃ . пѣ́снь , а҃ . і҆рмо́съ . Твᲂѧ̀ пᲂбѣди́тельнаѧ десни́ца , бг҃ᲂлѣ́пнѡ в̾ крѣ́пᲂсти прᲂсла́висѧ . та́ бо без̾сме́ртне всемᲂгꙋ́щаѧ прᲂти́вныѧ сᲂтрѐ , і҆и҃льтѧнѡмъ пꙋ́ть глꙋбины̀ ѡ҆бно́вльши .

запѣ́в̾ : Прпⷣбне ѻ҆́ч҃е мака́рїе , мᲂлѝ бг҃а ѡ҆ на́съ . Оу҆ма̀ чи́стыми свѣтлᲂстьмѝ , бжⷭ҇твенаѧ зрѧ̀ , мꙋ́жескимъ нра́вᲂмъ бл҃же́нне , к̾ пᲂдвиго́мъ ᲂу҆стреми́лсѧ є҆сѝ . преми́рными блиста́нїи , трисо́лнечнагѡ свѣ́та ѡ҆зарѧ́емь . Пᲂста́вль но́зѣ на ка́мени вѣ́ры , непᲂкᲂлѣба́сѧ бл҃же́нне , ѿ и҆скꙋше́нїи и҆ навѣ́тъ вра́жїихъ . но ꙗ҆́кѡ ѻ҆гнепа́льна ѕвѣзда̀ пᲂпалѧ́ѧ всѣ́хъ , бл҃гᲂда́тїю прест҃а́гѡ дх҃а . Зако́ны бжⷭ҇твеныѧ сᲂблюда́ѧ , пᲂбѣ́дꙋ вѣ́чнꙋю взѧ́лъ є҆сѝ прпⷣбне , прᲂгᲂни́ти дꙋ́хи лꙋка́выѧ , и҆ си́хъ до кᲂнца̀ низ̾лᲂжи́лъ є҆сѝ . боⷢ҇ . Не и҆з̾гл҃аннѡ зачала̀ є҆сѝ бг҃а , и҆ па́че є҆стества̀ рᲂдила̀ є҆сѝ пречⷭ҇таѧ влⷣчце , землены́ѧ ѿ прегрѣше́нїи и҆змѣ́ньшаго . тѣ́мже мᲂлю́ тѧ , мно́гихъ мѧ̀ сᲂгрѣше́нїи и҆зба́ви .

катава́сїѧ : Ѿве́рзꙋ ᲂу҆ста̀ мᲂѧ̀ .

пѣ́снь , г҃ . і҆рмо́съ . Ты̀ є҆сѝ ᲂу҆тверже́нїе , притека́ющимъ тѝ гдⷭ҇и , ты́ же свѣ́тъ ѡ҆мраче́ннымъ , и҆ пᲂе́тъ тѧ̀ дх҃ъ мо́й . Крѣ́пкᲂю сѝ мл҃твᲂю ѻ҆́ч҃е , вᲂз̾ше́лъ є҆сѝ к̾ преми́рнᲂмꙋ наслажде́нїю . и҆ ѿ чⷭ҇тны́ѧ ра́ки , чꙋде́съ сїѧ́нїѧ и҆спꙋща́еши мака́рїе . Въ бжⷭ҇твенꙋю па́мѧть твᲂю̀ , дне́сь сᲂше́дшесѧ , вᲂспѣ́ти твᲂѧ̀ по́двиги и҆ бᲂлѣ́зни , и҆ и҆справле́нїѧ ѻ҆́ч҃е прпⷣбне . Чꙋ́дно житїѐ твᲂѐ ꙗ҆ви́сѧ прпⷣбне . бл҃гᲂда́тїю бжⷭ҇твенагѡ дх҃а ѡ҆блᲂже́нъ . бл҃же́ннꙋю кᲂнчи́нꙋ прїѧ́лъ є҆сѝ , ѻ҆́ч҃е ра́дꙋѧсѧ . боⷢ҇ . Ѿ лᲂже́снъ твᲂи́хъ пречⷭ҇таѧ , пра́вдѣ сл҃нце вᲂсїѧ̀ , и҆ ми́ръ прᲂсвѣтѝ . є҆го́же бжⷭ҇твеными зарѧ́ми , и҆ менѐ прᲂсвѣтѝ .

и҆́нъ , і҆рмо́съ . Є҆ди́не свѣ́дыи земны́хъ сꙋщество̀ немᲂщно́е , и҆ млⷭ҇тивно внѐ ѡ҆бᲂлкі́исѧ , препᲂѧ́ши мѧ с̾вы́ше си́лᲂю , вᲂспѣва́ти ти ст҃ы́и , цр҃кви дш҃е́внаѧ , неи҆зрече́нныѧ сла́вы ти чл҃кᲂлю́бче . Ꙗ҆́кᲂже чⷭ҇тны́и би́серъ , твᲂѧ̀ мо́щи прпⷣбне , всѣ́мъ ви́димы пред̾лежа́тъ разли́чнаѧ и҆сцѣле́нїѧ неѡ҆скꙋ́днѡ пᲂдаю́щи . Ликꙋ́ютъ сᲂбра́нїѧ и҆́нᲂчествꙋющихъ , мᲂле́бныи сᲂверша́юще пра́здникъ , въ честнѣ́мъ ти преставле́нїи . ѿ дш҃и вᲂпїю́ще , пᲂмина́й на́съ приснᲂпᲂмина́ющихъ тѧ̀ . Напра́висѧ прпⷣбне къ бжⷭ҇твенымъ приста́нищемъ , ѡ҆кᲂрмле́нїемъ хрⷭ҇та̀ бг҃а на́шегѡ , напа́сти преше́дъ свирѣ́пыхъ во́лнъ . боⷢ҇ . Дѣ́ло є҆́же сᲂдѣ́ла гдⷭ҇и , кто̀ ска́жетъ . ю҆́же бо про́клѧтъ в̾ печа́лѣхъ рᲂди́ти ча́да , сн҃ъ є҆ѧ̀ пᲂказа́сѧ . и҆ ра́дꙋетсѧ же́нскᲂе ѿпа́дшее є҆стество̀ , ѡ҆ тебѣ̀ бз҃ѣ , бцⷣы ра́ди .

катава́сїѧ : Твᲂѧ̀ пѣвцы̀ .

сѣда́ленъ . гла́съ , и҃ . Храни́тель сы́и бжⷭ҇твенымъ пᲂвелѣ́нїемъ влⷣки сла́вне , чи́стᲂе житїѐ твᲂѐ пᲂказа́ тѧ , сщ҃еннᲂдѣ́телѧ бжⷭ҇твена . ка́плѧми пᲂто́въ твᲂи́хъ , пре́лести лю́тᲂе ᲂу҆́глїе пᲂгаси́лъ є҆сѝ . и҆ в̾ ти́хᲂе приста́нище дᲂсти́глъ є҆сѝ , зри́ши бл҃же́нне є҆го́же вᲂз̾желѣ̀ . тѣ́мже вᲂпїе́мъ ти , мᲂлѝ хрⷭ҇та̀ бг҃а , грѣхо́въ ѡ҆ставле́нїе пᲂда́ти , чтꙋ́щимъ любо́вїю ст҃ꙋ́ю па́мѧть твᲂю̀ . двⷤа . сла́ва , и҆ ны́нѣ , боⷢ҇ . Ꙗ҆́кѡ дв҃ꙋ є҆ди́нꙋ в̾ жена́хъ , тѧ̀ без̾ сѣ́мене ро́ждьшꙋю бг҃а пло́тїю , всѝ ᲂу҆бл҃жа́емъ ро́ди чл҃честїи . ѻ҆́гнь бо всели́сѧ в̾тѧ̀ бжⷭ҇твеныи . и҆ ꙗ҆́кѡ младе́нца дᲂи́ши зижди́телѧ и҆ гдⷭ҇а . тѣ́мже а҆́нг҃льскїи и҆ чл҃ческїи ро́дъ , дᲂсто́йнѡ сла́вимъ прест҃о́е ржⷭ҇тво̀ твᲂѐ . и҆ сᲂгла́снѡ вᲂпїе́мъ тѝ , мᲂлѝ хрⷭ҇та̀ бг҃а , сᲂгрѣше́нїемъ ѡ҆ставле́нїе дарᲂва́ти , вᲂспѣва́ющимъ дᲂсто́йнѡ сла́вꙋ твᲂю̀ .

пѣ́снь , д҃ . і҆рмо́съ . Оу҆слы́шахъ гдⷭ҇и смᲂтре́нїѧ твᲂегѡ̀ та́инство , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ . Въ препро́стїи дш҃и , ꙗ҆́кѡ а҆́нг҃лъ по́жилъ є҆сѝ блаже́нне . страсте́й раз̾гна́лъ є҆сѝ дш҃етлѣ́ннꙋю пре́лесть , бжⷭ҇твенᲂю бл҃гᲂда́тїю . Че́стенъ сᲂсꙋ́дъ ꙗ҆ви́лсѧ є҆сѝ бжⷭ҇твенᲂмꙋ дх҃ꙋ , нᲂсѧ̀ в̾ срⷣцы свᲂе́мъ бл҃же́нне бжⷭ҇твеныѧ а҆рама́ты . наслажда́ѧ срⷣца̀ , вѣ́рнѡ па́мѧть твᲂю̀ пᲂчита́ющихъ . Пресвѣ́тлымъ вѣнце́мъ ѡ҆блᲂже́нъ , пред̾стᲂи́ши прⷭ҇то́лꙋ всѣ́хъ цр҃ѧ . мᲂли́сѧ пребл҃же́нне , ѡ҆ вѣ́рᲂю пра́зднꙋющихъ бжⷭ҇твенꙋю па́мѧть твᲂю̀ . боⷢ҇ . Зако́ны в̾ тебѣ̀ и҆спраздни́шасѧ є҆стества̀ , па́че є҆стества́ бо сло́во рᲂдила̀ є҆сѝ . тѣ́мже тѧ вѣ́рᲂю мᲂлю̀ , и҆́же па́че є҆стества̀ чл҃ча всенепᲂро́чнаѧ мно́гѡ сᲂгрѣ́шша , и҆ бг҃а ᲂу҆да́льшасѧ , ѡ҆бра́щшасѧ спаси́ мѧ мл҃твами твᲂи́ми .

и҆́нъ , і҆рмо́съ . Го́рꙋ тѧ бл҃гᲂда́тїю бж҃їею присѣ́ннꙋ , прᲂзᲂрли́выма а҆вва́кꙋмъ ᲂу҆смᲂтри́въ ѻ҆чи́ма , и҆з̾ тебѐ и҆зы́ти і҆и҃леви , прᲂвᲂз̾глаша́ше ст҃а́гѡ , на спасе́нїе на́ше и҆҆ ѡ҆бнᲂвле́нїе . Пᲂче́тъ до́брыми свᲂи́ми нра́вы бг҃а преблага́гѡ мака́рїе . тѣ́мже и҆сцѣле́нїемъ и҆сто́чникъ и҆злива́еши , зно́й ѿгᲂнѧ́ѧ бᲂлѣ́зней же и҆ печа́лей мꙋ́дре . Ны́нѣшнѧгѡ житїѧ̀ красᲂты̀ всѧ̀ , ᲂу҆ме́ты вмѣни́лъ є҆сѝ , да хрⷭ҇та̀ прїѡ҆брѧ́щеши . и҆ сегѡ̀ ра́ди до́брѣ пᲂтрꙋ́ждьсѧ , вѣнчено́сче великᲂи҆мени́тыи . Прᲂстрѐ ᲂу҆́мъ , ко є҆ди́нᲂмꙋ влⷣцѣ . вѣне́цъ нетлѣ́нїѧ ѿ негѡ̀ прїи́мъ , сїѧ́ющїи свѣ́тлыми свѣтᲂли́тїи , и҆ бᲂга́тными дарᲂва́нїи . и҆дѣ́же первᲂро́дныхъ жили́ща . боⷢ҇ . Влⷣчце ми́рꙋ бцⷣе пᲂмᲂзи́ми . прелꙋка́выи вра́гъ пᲂглᲂта́етъ мѧ ѕѣ́льнѣ , лю́тыми вᲂспᲂмина́нїи и҆ пᲂмышле́нїи , и҆́же ѿ бг҃а мѧ̀ разлꙋча́ютъ . не ѡ҆ста́ви ᲂу҆́бѡ менѐ , нижѐ пре́зри менѐ .

катава́сїѧ : Сѣдѧ́и во сла́вѣ .

пѣ́снь , є҃ . і҆рмо́съ . Оу҆́треннююще вᲂпїе́мъ тѝ гдⷭ҇и спаси́ ны , ты́ бо є҆сѝ бг҃ъ на́шъ , ра́звѣ бо тебѐ и҆но́гѡ незна́емъ . Є҆гда̀ бл҃гᲂда́тїю дх҃а , смире́нꙋю стѧжа́лъ є҆сѝ мꙋ́дрᲂсть . ражда́ющемꙋ сме́рть врагꙋ̀ , глꙋбᲂкꙋ̀ ꙗ҆́звꙋ да́лъ є҆сѝ . высᲂкᲂꙋ́мныи тᲂгѡ̀ нра́въ , до кᲂнца̀ низ̾лᲂжи́лъ є҆сѝ . Вᲂз̾ше́дъ ко ѡ҆би́телемъ вѣ́чнымъ , ли́кꙋ прпⷣбныхъ причте́сѧ мака́рїе . с̾ ни́ми же на́съ пᲂмина́й , и҆́же на землѝ тебѐ пᲂмина́ющихъ . Да ᲂу҆блажи́тсѧ дᲂсто́йнѡ мака́рїи . пᲂще́нїемъ бо и҆ мл҃твами и҆ слеза́ми , бг҃ᲂви сᲂединѧ́ѧсѧ . и҆ всѣ́хъ прᲂсвѣща́ѧ дх҃о́внᲂю бл҃гᲂда́тїю . боⷢ҇ . Ѽ мт҃и дв҃о ѻ҆трᲂкᲂви́це , ꙗ҆́же неѡ҆быме́ннаго бг҃а пло́тїю ро́ждьшаѧ , а҆́нг҃лѡмъ сла́ва , и҆ бѣсо́мъ ꙗ҆́зва бг҃ᲂневѣ́сто , мᲂѐ срⷣце ᲂу҆ѧзви́вшеесѧ грѣхо́мъ , цѣльбы̀ бжⷭ҇твеныѧ спᲂдо́би .

и҆́нъ , і҆рмо́съ . Тво́й ми́ръ да́ждь на́мъ сн҃е бж҃їи , и҆но́го бо ра́звѣ тебѐ бг҃а незна́емъ , и҆́мѧ твᲂѐ и҆мѧнꙋ́емъ , ꙗ҆́кѡ бг҃ъ живы́мъ и҆ ме́ртвымъ є҆сѝ . Стра́сти пᲂпали́лъ є҆сѝ ѻ҆гне́мъ вᲂз̾держа́нїѧ , дш҃ꙋ ѡ҆зари́въ бжⷭ҇твеными сїѧ́нїи . бѣсо́мъ прᲂгᲂни́тель ꙗ҆ви́сѧ , бжⷭ҇твенымъ дх҃ᲂмъ прᲂсвѣща́емь . До́блести твᲂѧ̀ мака́рїе , чл҃кᲂꙋбі́ица зрѣ́ти немᲂгі́и , и҆скꙋше́нїѧ тѝ прᲂстира́етъ . и҆ мꙋжемꙋ́дренѡ сᲂпрᲂтивлѧ́ѧсѧ , до кᲂнца̀ сегѡ̀ низ̾лᲂжи́лъ є҆сѝ . Мирска́гѡ смꙋще́нїѧ ѿбѣжѐ , дᲂбрᲂдѣ́тельми ᲂу҆дᲂбри́въ житїѐ свᲂѐ . и҆́нᲂкѡмъ ᲂу҆тверже́нїе бы́лъ є҆сѝ , ѻ҆́ч҃е мака́рїе прпⷣбне . боⷢ҇ . Ты̀ крѣ́пᲂсть мᲂѧ̀ . ты̀ пᲂхвала̀ и҆ ра́дᲂванїе . храни́тельница мѝ и҆ застꙋпле́нїе , и҆ прибѣ́жище и҆ пред̾ста́тельница непᲂбѣди́ма , прест҃а́ѧ бцⷣе . тѣ́мже спасѝ раба̀ твᲂегѡ̀ . катава́сїѧ : Оу҆диви́шасѧ всѧ́ческаѧ .

пѣ́снь , ѕ҃ . і҆рмо́съ . Мᲂли́твꙋ прᲂлїю̀ ко́ гдⷭ҇ꙋ , и҆ тᲂмꙋ̀ вᲂз̾вѣщꙋ̀ печа́ль мᲂю̀ . ꙗ҆́кѡ ѕѡ́лъ дш҃а мᲂѧ̀ напо́лнисѧ , и҆ живо́тъ мо́й а҆́дꙋ прибли́жисѧ . и҆ мᲂлю́сѧ ꙗ҆́кѡ і҆ѡ́на , ѿ тлѝ бж҃е мо́й вᲂз̾веди́ мѧ . На землѝ до́брѣ по́жилъ є҆сѝ прпⷣбне . и҆ ст҃ы́хъ свѣ́тлᲂсти , и҆ вѣ́чныхъ наслажде́нїи бл҃же́нства , ви́дѣти спᲂдо́бисѧ . Честна̀ сме́рть ꙗ҆ви́сѧ бл҃же́ннагѡ мака́рїѧ , пред̾ тᲂбо́ю бж҃е всѧ́ческихъ . є҆го́же па́мѧть пᲂчита́ющимъ , врачевство̀ без̾ме́зднѡ ꙗ҆ви́лъ є҆сѝ . Дх҃а бл҃гᲂда́ть прїѧ́лъ є҆сѝ ѻ҆́ч҃е , недꙋ́ги ѿ чл҃къ прᲂгᲂнѧ́ти . и҆ вре́дъ бѣсо́вскїи пᲂтреблѧ́ѧ , вели́кїи ᲂу҆го́дникъ пᲂказа́сѧ хрⷭ҇та̀ бг҃а на́шегѡ . боⷢ҇ . На́йде на тѧ̀ вседѣ́тельныи дх҃ъ , всенепᲂро́чнаѧ , и҆ сло́во бж҃їе в̾ тѧ̀ всели́сѧ , и҆ пло́ть бы́сть несказа́ннѡ , пребы́въ не и҆змѣ́ненъ .

и҆́нъ , і҆рмо́съ . Ѡ҆бы́де на́съ пᲂслѣ́днѧѧ бе́здна , нѣ́сть и҆҆збавлѧ́ѧи , в̾мѣни́хᲂмсѧ ꙗ҆́кѡ ѻ҆вча̀ на закᲂле́нїе , спасѝ лю́ди свᲂѧ̀ бж҃е на́шъ . ты́ бо крѣ́пᲂсть немᲂщны́мъ и҆҆ и҆҆справле́нїе . Дх҃о́внᲂю си́лᲂю бл҃же́нне , мы́сленыхъ вᲂлко́въ че́люсти сᲂкрꙋши́лъ є҆сѝ . и҆ прᲂсвѣще́нымъ ра́зꙋмᲂмъ , нбⷭ҇ныѧ тишины̀ пᲂлꙋчи́лъ є҆сѝ . По́стническимъ ѻ҆гне́мъ и҆скꙋ́шьсѧ ѻ҆́ко срⷣца твᲂегѡ̀ преѡ҆чи́стивъ . и҆ дᲂбрᲂдѣ́тельнымъ нра́вᲂмъ , дш҃ꙋ прᲂсвѣти́лъ є҆сѝ . Вни́де в̾ тѧ̀ раче́нїе сᲂдѣ́телѧ бг҃ᲂмꙋ́дре , ѡ҆ста́вль землены́хъ пристра́стїе . є҆динᲂс̾се́льникъ пᲂказа́сѧ , вы́шнимъ слꙋжи́телемъ . боⷢ҇ . Без̾ сѣ́мене во́ чревѣ бг҃а зачала̀ є҆сѝ , дв҃ᲂю пребы́вши по ржⷭ҇твѣ̀ чи́стаѧ стра́шнѣмъ . тѣ́мже хвала́ми тѧ сла́вимъ , и҆́же тᲂбо́ю и҆зба́вльшесѧ клѧ́твы пречⷭ҇таѧ . катава́сїѧ : Бжⷭ҇твенᲂе сѐ и҆ всечестно́е .

кᲂнда́къ . гла́съ , в҃ . Вы́шнихъ жела́ѧ , вᲂз̾держа́нїи и҆ трꙋды̀ и҆ пᲂты̀ напита́всѧ . жела́нїе пло́ти твᲂеѧ̀ ѡ҆бꙋзда́въ , чꙋде́съ да́ръ прїе́мъ ѿ хрⷭ҇та̀ бг҃а , свѣти́льникъ ꙗ҆ви́сѧ пресвѣ́тлыи . тѣ́мже хрⷭ҇то́ва цр҃кви пѣ́сньми сла́витъ тѧ̀ , прпⷣбне мака́рїе ѻ҆́ч҃е на́шъ . и҆́кᲂсъ . А҆́нг҃лъ земны́и , и҆ чл҃къ нбⷭ҇ныи , прᲂсїѧ́лъ є҆сѝ в̾ вᲂз̾держа́нїи всѧ́цѣмъ , мл҃твᲂю и҆ пᲂсто́мъ и҆ чистᲂто́ю . и҆ бжⷭ҇твенᲂе тече́нїе скᲂнча́въ , вы́шнѧгѡ нетлѣ́нїѧ прича́стникъ бы́въ бг҃ᲂно́се . дерзнᲂве́нїе стѧжа́въ къ чл҃кᲂлю́бцꙋ бг҃ꙋ , и҆́же и҆сцѣле́нїемъ бл҃гᲂда́ть на недꙋ́зѣхъ разли́чныхъ тебѣ̀ дарᲂва̀ . тѣ́мже ти вѣ́рᲂю вᲂпїе́мъ , ра́дꙋисѧ всебл҃же́нне ѻ҆́ч҃е по́стникѡмъ пᲂхвала̀ . ра́дꙋисѧ цѣлᲂмꙋ́дрїѧ сто́лпе , и҆́мже бѣсо́вскаѧ шата́нїѧ и҆скᲂрени́шасѧ . ра́дꙋисѧ свѣти́льниче мнᲂгᲂсвѣ́тлыи , и҆́же чꙋде́съ сїѧ́нїи вселе́ннꙋю прᲂсвѣща́еши . ра́дꙋисѧ ꙗ҆́кѡ ста́дꙋ твᲂемꙋ̀ пᲂдава́еши , по́мᲂщь и҆ застꙋпле́нїе . ра́дꙋисѧ странѣ̀ на́шей ᲂу҆тверже́нїе , ю҆́же сᲂблюдѝ мᲂли́твами сѝ ѿ вра́гъ ненавѣ́тна . да всѝ вᲂпїе́мъ тѝ , ра́дꙋисѧ прпⷣбне мака́рїе ѻ҆́ч҃е на́шъ .

пѣ́снь , з҃ . і҆рмо́съ . Бж҃їѧ схᲂжде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ дре́вле . сегѡ̀ ра́ди ѻ҆́трᲂцы , в̾ пещѝ ра́дᲂваннᲂю нᲂго́ю , ꙗ҆́кѡ во́ свѣтѣ ликᲂва́хꙋ пᲂю́ще , блгⷭ҇ве́нъ бг҃ъ ѻ҆ц҃ъ на́шихъ . Къ свѣ́тꙋ незахᲂди́мᲂмꙋ вᲂз̾ше́дъ , и҆ ꙗ҆́кѡ сл҃нце прᲂсвѣща́еши вселе́ннꙋю . свѣ́тꙋ бо дѣ́ла сᲂверши́лъ є҆сѝ , мака́рїе прпⷣбне . и҆ ны́нѣ вᲂпїе́ши , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Плᲂтьска́ѧ движе́нїѧ прпⷣбне , вᲂз̾держа́нїемъ и҆ на землѝ лега́нїемъ ᲂу҆мертви́лъ є҆сѝ . и҆ дᲂбрᲂдѣ́телей прᲂсвѣще́нїемъ прᲂсїѧ́лъ є҆сѝ , вᲂпїѧ̀ хрⷭ҇то́ви , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Чꙋ́днѡ житїѐ твᲂѐ прпⷣбне ꙗ҆ви́сѧ бл҃гᲂда́тїю бжⷭ҇твенагѡ дх҃а ѡ҆блᲂже́нъ , бл҃же́ннꙋю кᲂнчи́нꙋ прїѧ́лъ є҆сѝ ѡ҆ хрⷭ҇тѣ̀ ра́дꙋѧсѧ . к̾ немꙋ́ же и҆ взыва́ше , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . боⷢ҇ . Ны́нѣ всѧ̀ и҆спо́лнишасѧ свѣ́та бжⷭ҇твенагѡ , тᲂбо́ю пречⷭ҇таѧ . ты́ бо две́рь ꙗ҆ви́сѧ , є҆ю́же ми́рᲂви бг҃ъ бесѣ́дᲂва , прᲂсвѣща́ѧ вѣ́рᲂю зᲂвꙋ́щихъ . ѻ҆ц҃ъ на́шихъ бж҃е бл҃гᲂслᲂве́нъ є҆сѝ .

и҆́нъ , і҆рмо́съ . Тебѐ мы́сленнꙋю бцⷣе пе́щь , раз̾смᲂтрѧ́емъ вѣ́рнїи , ꙗ҆́кᲂже бо ѻ҆́трᲂки спасѐ трѝ превᲂзнᲂша́емыи , ми́ръ ѡ҆бнᲂви́лъ є҆́сть , во́ чревѣ твᲂе́мъ сᲂверше́нъ , вᲂсхвалѧ́емыи ѻ҆ц҃е́мъ бг҃ъ и҆҆ препрᲂсла́вленъ . Вᲂз̾держа́нїѧ рᲂсо́ю до́блественѣ , страстнꙋ́ю пе́щь пᲂгаси́лъ є҆сѝ . сле́зными же ка́плѧми , вᲂз̾дꙋ́шныхъ кнѧ́ѕь написа́нїѧ растерза́лъ є҆сѝ . и҆ со дерзнᲂве́нїемъ вᲂпїѧ̀ хрⷭ҇то́ви , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . По́стникѡмъ ты̀ бы́лъ є҆сѝ пᲂхвала̀ мака́рїе , крѣ́пкѡ низ̾лᲂжи́въ дѣ́мᲂнскаѧ шата́нїѧ . и҆ ны́нѣ наслажда́ешисѧ неи҆зрече́нныѧ красᲂты̀ , вᲂпїѧ̀ хрⷭ҇то́ви , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Є҆ди́нᲂмꙋ бг҃ꙋ вᲂз̾лᲂжи́въ дш҃ꙋ и҆ пᲂмышле́нїе , тѣ́сныи пꙋ́ть ше́ствᲂвалъ є҆сѝ . тѣ́мъ пᲂлꙋчи́лъ є҆сѝ нбⷭ҇нагѡ црⷭ҇твїѧ наслажде́нїе . и҆ ны́нѣ взыва́еши , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . боⷢ҇ . Трⷪ҇цѣ во є҆ди́нствѣ правᲂсла́внѡ слꙋжа́ще , тѧ̀ мт҃и дв҃о чⷭ҇таѧ , ꙗ҆́кѡ бг҃а пло́тїю ро́ждьшꙋю , прᲂпᲂвѣ́дающе земні́и , бжⷭ҇твенѣ пᲂе́мъ . ѻ҆ц҃ъ на́шихъ бж҃е бл҃гᲂслᲂве́нъ є҆сѝ .

катава́сїѧ : Непᲂслꙋжи́ша тва́ри .

пѣ́снь , и҃ . і҆рмо́съ . Се́дмь седми́цею пе́щь , халдѣ́йскїи мꙋчи́тель , бг҃ᲂчести́вымъ лю́тѣ раз̾жжѐ . си́лᲂю же лꙋ́чшею спасе́ныхъ ви́дѣвъ , твᲂрцꙋ̀ и҆ и҆зба́вителю вᲂпїѧ́ше , дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки . Бжⷭ҇твеными дᲂбро́тами наслажда́ѧсѧ , чꙋде́съ сїѧ́нїи всѧ̀ прᲂсвѣща́еши . и҆ бѣсо́вскꙋю тмꙋ̀ разᲂрѧ́еши бж҃їею бл҃гᲂда́тїю . пᲂѧ̀ , дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , и҆ превᲂзнᲂси́те гдⷭ҇а во́ вѣки . Блиста́ѧсѧ бл҃гᲂда́тїю бжⷭ҇твенагѡ дх҃а , прпⷣбне мака́рїе . и҆́же честно́е твᲂѐ твᲂрѧ́щимъ ᲂу҆спе́нїе , свѣ́тлыми сѝ мᲂли́твами , и҆спрᲂсѝ грѣхо́въ ѿпꙋще́нїе пᲂю́щимъ . дѣ́ти блгⷭ҇ви́те , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки . Зарѧ́ми тве́рдыхъ по́двигъ твᲂи́хъ , ꙗ҆́кѡ сл҃нце вᲂсїѧ́лъ є҆сѝ . и҆сцѣле́нїѧ и҆стᲂча́еши , и҆ всѧ́кꙋ бᲂлѣ́знь ѡ҆блегча́еши , хрⷭ҇то́ви вᲂпїю́щимъ . дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки . боⷢ҇ . Ꙗ҆́кѡ разбо́йникъ взыва́ю ти , пᲂмѧни́ мѧ чл҃кᲂлю́бче . пла́чꙋ ꙗ҆́кѡ блꙋдни́ца . и҆ вᲂпїю̀ сᲂгрѣши́хъ ꙗ҆́кѡ дре́вле блꙋ́дныи , ка́ющасѧ прїими́ мѧ ѿчаѧ́ннаго , бцⷣы ра́ди . да ᲂу҆се́рднѡ вᲂпїю̀ . сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки .

и҆́нъ , і҆рмо́съ . Въ пещѝ дѣ́ти і҆и҃левы , ꙗ҆́кᲂже в̾ гᲂрни́лѣ дᲂбро́тᲂю бл҃гᲂче́стїѧ , чистѣ́е зла́та блеща́хꙋсѧ гл҃юще , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а , по́йте и҆҆ превᲂзнᲂси́те є҆гѡ̀ во́ вѣки . Дх҃о́внꙋю бл҃гᲂда́ть прїи́мъ ѻ҆́ч҃е мака́рїе , сᲂсꙋ́дъ и҆збра́нныи пᲂказа́сѧ . ст҃ы́ню прїи́мъ ѿ хрⷭ҇та̀ бг҃а , непреста́ннѡ вᲂпїѧ̀ , да бл҃гᲂслᲂви́тъ тва́рь всѧ̀ гдⷭ҇а , и҆ превᲂзно́ситъ є҆гѡ̀ во́ вѣки . Бжⷭ҇твенᲂю си́лᲂю ᲂу҆крѣплѧ́емъ , пᲂбѣди́лъ є҆сѝ неви́димыхъ вра́гъ ѡ҆пᲂлче́нїѧ . къ свѣ́тꙋ прибли́жисѧ невече́рнемꙋ , при́снѡ вᲂспѣва́ѧ , да бл҃гᲂслᲂви́тъ всѧ̀ тва́рь гдⷭ҇а , и҆ превᲂзно́ситъ є҆гѡ̀ во́ вѣки . И҆́нᲂчествꙋющимъ бы́лъ є҆сѝ пра́вило пра́вᲂсти , и҆ стра́сти всѧ̀ крѣ́пкѡ пᲂпра́лъ є҆сѝ . тѣ́мже взы́де на высᲂтꙋ̀ , и҆ наꙋчѝ вᲂспѣва́ти , да бл҃гᲂслᲂви́тъ тва́рь всѧ̀ гдⷭ҇а , и҆ превᲂзно́ситъ є҆гѡ̀ во́ вѣки . боⷢ҇ . Спасе́нїю хᲂда́таица на́мъ ꙗ҆ви́сѧ бцⷣе , ро́ждьшаѧ сп҃са и҆ влⷣкꙋ всѣ́хъ . тѣ́мже мᲂлю́ тѧ , спасе́нїю спᲂдо́би смире́ннꙋю ми дш҃ꙋ . пѣснᲂсло́вити тѧ̀ вѣ́рнѡ , во всѧ̀ вѣ́ки .= катава́сїѧ : Х=ва́лимъ блгⷭ҇ви́мъ . Ѻ҆́трᲂки бл҃гᲂчести́выѧ .

пѣ́снь , ѳ҃ . і҆рмо́съ . Оу҆диви́сѧ ᲂу҆́бѡ ѡ҆ се́мъ не́бо , и҆ землѝ ᲂу҆жасо́шасѧ кᲂнцы̀ , ꙗ҆́кѡ бг҃ъ ꙗ҆ви́сѧ чл҃кѡмъ пло́тїю , чре́во же твᲂѐ бы́сть прᲂстра́ннѣе нб҃съ , тѣ́мъ тѧ̀ бцⷣе , а҆́нг҃лъ и҆ чл҃къ чинᲂнача́лїѧ велича́емъ . Ра́ка и҆дѣ́же лежи́тъ честно́е тѣ́ло твᲂѐ , и҆сто́чникъ сᲂдѣва́етъ чꙋдесе́мъ . к̾ не́й же притека́юще , ѿ всѧ́кїѧ скве́рны и҆ страсте́й и҆збавлѧ́емсѧ . Ѻ҆гне́мъ бжⷭ҇твенагѡ стра́ха дш҃ꙋ распали́лъ є҆сѝ , и҆ к̾ сїѧ́нїю невече́рнемꙋ вᲂсте́клъ є҆сѝ . и҆ ны́нѣ бл҃же́нне , трисл҃нчнымъ свѣ́тᲂмъ ѡ҆зарѧ́емь . Мирскі́ѧ сла́дᲂсти вᲂз̾ненави́дѣвъ , мꙋ́жескимъ нра́вᲂмъ к̾ пᲂдвиго́мъ ᲂу҆стреми́сѧ . и҆ прпⷣбнымъ красᲂта̀ лѣ́пᲂтна бы́лъ є҆сѝ . тѣ́мъ па́мѧть твᲂю̀ пᲂчита́емъ дᲂстᲂчꙋ́дне . боⷢ҇ . Низ̾лᲂжѝ вᲂз̾несе́ныѧ . и҆ пᲂбѣдѝ пᲂлкѝ и҆нᲂплеме́нныхъ , дв҃о чⷭ҇таѧ , хᲂтѧ́щїѧ бра́немъ . и҆ свᲂѧ̀ рабы̀ , невре́дны ѿ ни́хъ сᲂхранѝ ѻ҆трᲂкᲂви́це .

и҆́нъ , і҆рмо́съ . Ѻ҆́бразъ чи́стагѡ ржⷭ҇тва̀ твᲂегѡ̀ , распала́емꙋ кꙋпинꙋ̀ , ꙗ҆вѝ неѡ҆пали́мꙋ . и҆҆ ны́нѣ на на́съ напа́стей свирѣ́пѣющꙋю ᲂу҆гаси́ти мо́лимсѧ пе́щь , да тѧ̀ бцⷣе непреста́ннѡ велича́емъ . Мра́зъ нᲂщны́и до́блественѣ претерпѣ́лъ є҆сѝ , и҆ ва́ръ дневны́и пᲂнесѐ , до́мъ премꙋ́дрᲂсти бж҃їѧ бы́лъ є҆сѝ . и҆ взы́де на́ гᲂрꙋ бжⷭ҇твенагѡ ра́зꙋма . А҆лчбо́ю и҆ мᲂли́твами непреста́нными , и҆ чистᲂто́ю бг҃ᲂви сᲂединѧ́ѧсѧ . мно́жества и҆́нᲂчествꙋющихъ наꙋчи́лъ є҆сѝ , веще́ственыхъ всѣ́хъ ѡ҆греба́тисѧ . Ста́до твᲂѐ ѻ҆́ч҃е вᲂзгна́лъ є҆сѝ , на па́жить чи́стꙋ вᲂз̾держа́нїѧ . и҆ приведѐ к̾ без̾стра́стїѧ и҆сто́чникꙋ . и҆ ны́нѣ пᲂтщи́сѧ па́стырю до́брыи , сᲂхрани́ти сїѐ невреди́мѡ . боⷢ҇ . Ѽ прест҃а́ѧ дв҃о мт҃и бг҃а вы́шнѧгѡ , твᲂѐ ржⷭ҇тво̀ на землѝ спасе́нїе ꙗ҆ви́сѧ , грѣ́шникѡмъ и҆ смире́нымъ . ѡ҆ тебѣ́ бо спасо́хᲂмсѧ вѣ́рᲂвавшїи . но спаса́еши мѧ ны́нѣ , и҆ во всѧ̀ вѣ́ки жи́зненыѧ .

катава́сїѧ : Всѧ́къ зе́менъ .= Дᲂсто́йнѡ є҆́сть . свѣти́ленъ . Мнᲂгᲂсвѣ́тлыи свѣти́льникъ , пꙋсты́ннᲂе вᲂспита́нїе . чистᲂты̀ сᲂкро́вище . а҆́нг҃лѡмъ сᲂбесѣ́дниче . до́мъ дх҃а прест҃а́гѡ мака́рїе прпⷣбне непреста́ннѡ мᲂли́сѧ , ѡ҆ вѣ́рᲂю пᲂчита́ющихъ пречⷭ҇тнꙋ́ю па́мѧть твᲂю̀ . =двⷤа . сла́ва , и҆ ны́нѣ , боⷢ҇ . Тѧ̀ пѣ́сньми немо́лчными ᲂу҆бл҃жа́емъ дв҃о , ꙗ҆́кѡ ѿ трⷪ҇цы є҆ди́наго рᲂдила̀ є҆сѝ бцⷣе . и҆ но́сиши на бжⷭ҇твенꙋю рꙋкꙋ̀ , пребᲂга́тᲂе сло́во . є҆го́же пѣ́сньми дᲂсто́йнѡ сла́вимъ .

На хвали́тѣхъ , стⷯры , на д҃ . гла́съ , д҃ . поⷣ . ꙗ҆́кѡ до́блѧ .= Ѿ= ю҆́нᲂсти вᲂз̾лᲂжи́сѧ влⷣцѣ всѣ́хъ ,꙳ сегѡ̀ вᲂз̾желѣ́лъ є҆сѝ ,꙳ крѣ́пкѡ к̾ пᲂдвиго́мъ мꙋ́жески ᲂу҆стреми́сѧ .꙳ и҆ ѡ҆бᲂгати́сѧ бжⷭ҇твенᲂю бл҃гᲂда́тїю ,꙳ твᲂри́ти и҆сцѣле́нїѧ ,꙳ и҆ чꙋдᲂдѣ́йствᲂвати пресла́внаѧ .꙳ и҆ вᲂз̾ше́ствїе къ нб҃сѝ ѡ҆брѣ́лъ є҆сѝ .꙳ и҆ со а҆́нг҃лы ликꙋ́ѧ , непреста́ннѡ мᲂли́сѧ ꙳ ѡ҆ ста́дѣ твᲂе́мъ бг҃ᲂбл҃же́нне . двⷤа . Сл҃нца свѣтлѣ́йши ,꙳ сщ҃е́ннаѧ па́мѧть твᲂѧ̀ прᲂвᲂсїѧ̀ ,꙳ всебл҃же́нне мака́рїе .꙳ пресвѣ́тлыми свѣтлᲂстьмѝ ѡ҆зарѧ́ѧ всѣ́хъ ,꙳ и҆́же по́двиги твᲂѧ̀ пᲂчита́ющихъ .꙳ непреста́й мᲂлѧ́сѧ бл҃же́нне ,꙳ прᲂсла́вльшемꙋ ст҃ꙋ́ю твᲂю̀ па́мѧть .꙳ и҆ чꙋде́съ сᲂкро́вище тѧ̀ сꙋ́щимъ в̾ ми́рѣ ,꙳ дарᲂва́вшемꙋ прпⷣбне . Мирскі́ѧ красᲂты̀ бл҃же́нне ,꙳ ра́дꙋѧсѧ и҆збѣ́глъ є҆сѝ .꙳ тᲂгда̀ пред̾пᲂче́лъ є҆сѝ ,꙳ тѣ́сныи и҆ бᲂлѣ́зненыи пꙋ́ть ,꙳ и҆ ѕѣлѡ̀ жесто́кїи .꙳ и҆ въ слеза́хъ препрᲂвᲂди́лъ є҆сѝ ,꙳ всѐ житїѐ свᲂѐ прпⷣбне .꙳ тѣ́мже ᲂу҆тѣше́нїѧ бжⷭ҇твенагѡ ,꙳ и҆ непреста́ннагѡ весе́лїѧ ,꙳ нн҃ѣ наслажда́ешисѧ мака́рїе . сла́ва . гла́съ , в҃ . Прпⷣбне ѻ҆́ч҃е , и҆́з̾ млада въ дᲂбрᲂдѣ́тели прилѣ́жнѡ пᲂд̾виза́всѧ , сᲂсꙋ́дъ бы́сть ст҃а́гѡ дх҃а . тѣ́мъ и҆ чꙋде́съ дарᲂва́нїѧ прїи́мъ , чл҃ки наꙋчи́лъ є҆сѝ , преѡ҆би́дѣти малᲂвре́менныхъ . ны́нѣ же не и҆зрече́ннымъ свѣ́тᲂмъ , свѣ́тлѡ сїѧ́еши . прᲂсвѣтѝ на́ша пᲂмышле́нїѧ , ѻ҆́ч҃е прпⷣбне мака́рїе . и҆ ны́нѣ , боⷢ҇ . =Славᲂсло́вїе вели́кᲂе , и҆ ѿпꙋ́стъ .=

На литꙋргі́и , бл҃же́нна , на и҃ . ѿ кано́на , пѣ́снь , г҃ ѧ , пе́рвагѡ кано́на . и҆ пѣ́снь , ѕ҃ ѧ , втᲂра́гѡ кано́на . прᲂки́мен̾ , ѱл҃о́мъ дв҃дᲂвъ . честна̀ пре́д̾ гдⷭ҇емъ , сме́рть прпⷣбныхъ є҆гѡ̀ . сти́хъ . что̀ вᲂз̾да́мъ гдⷭ҇ви ѡ҆ всѣ́хъ , и҆́хже вᲂз̾да́стъ ми . а҆пⷭ҇лъ , къ гала́тѡмъ . заⷱ҇ , сг҃і .= а҆ллилꙋ́їѧ . бл҃же́нъ мꙋ́жь бᲂѧ́исѧ гдⷭ҇а , въ за́пᲂвѣдехъ є҆гѡ̀ вᲂсхо́щетъ ѕѣлѡ̀ . =є҆ѵⷢ҇а́лїе , ѿ =лꙋкѝ . заⷱ҇ , к҃д . прича́стенъ . в=ъ па́мѧть вѣ́чнꙋю бꙋ́детъ пра́ведникъ .