МЦⷭ҇А ТОГО́ЖЕ ВЪ И҃І ДН҃Ь

и҆́же во ст҃ы́хъ ѻ҆ц҃а на́шегѡ кѷри́ла , патрїа́рха і҆єрⷭ҇ли́мскагѡ . Ве́черъ , на гдⷭ҇и вᲂзва́хъ , стⷯры . гла́съ , д҃ . поⷣ . ꙗ҆́кѡ до́блѧ .= Ꙗ҆́кѡ ѕвѣзда̀ вᲂсїѧ́въ ,꙳ и҆ вѣ́рныхъ прᲂсвѣти́лъ є҆сѝ ,꙳ сщ҃е́нными свѣтлᲂстьмѝ ᲂу҆че́нїи свᲂи́хъ .꙳ и҆ є҆́реси ѡ҆мрачи́лъ є҆сѝ ,꙳ до кᲂнца̀ пᲂбѣди́въ .꙳ и҆ ꙗ҆́кѡ ра́бъ да́нныи тѝ тала́нтъ ᲂу҆мно́жилъ є҆сѝ ,꙳ бл҃гᲂꙋгᲂди́въ влⷣцѣ бг҃ᲂмꙋ́дре .꙳ є҆мꙋ́же в̾ рꙋ́цѣ пре́далъ є҆сѝ сво́й дх҃ъ ,꙳ бг҃ᲂбл҃же́нне кѷри́ле . Премꙋ́дрᲂстїю слᲂве́съ твᲂи́хъ ,꙳ и҆ сїѧ́нїемъ житїѧ̀ твᲂегѡ̀ ,꙳ ꙗ҆́кѡ ѕвѣзда̀ мнᲂгᲂсвѣ́тла дᲂстᲂсла́вне ,꙳ пᲂсредѝ сᲂбо́ра прᲂсїѧ́лъ є҆сѝ ѻ҆ц҃ъ .꙳ без̾бо́жнаго македо́нїѧ ,꙳ жи́лами ᲂу҆дави́лъ є҆сѝ благᲂдѣ́тными .꙳ на ст҃ы́и и҆ ѡ҆жи́вльшїи всѧ̀ бжⷭ҇твеныи дх҃ъ ,꙳ пᲂхꙋ́лившаго безꙋ́мнѡ ,꙳ и҆ ꙗ҆вле́нѡ без̾зако́ннᲂвавшаго . Оу҆ма̀ ле́стнаго пᲂсрами́лъ є҆сѝ ,꙳ безꙋ́мнагѡ ма́нента ,꙳ ѡ҆бличи́въ предо́брѣ и҆ мꙋ́дрѣ ,꙳ скве́рнаѧ ᲂу҆че́нїѧ сегѡ̀ безꙋ́мнаѧ .꙳ ᲂу҆чи́телемъ нача́льниче ,꙳ ст҃лемъ бл҃гᲂлѣ́пїе ,꙳ бжⷭ҇твеныи пᲂбо́рниче хрⷭ҇то́вѣ цр҃кви .꙳ сегѡ̀ ра́ди ст҃о́е веселѧ́щесѧ ,꙳ сᲂверша́емъ твᲂѐ ᲂу҆спе́нїе . сла́ва , и҆ ны́нѣ , боⷢ҇ . Пᲂкаѧ́нїѧ и҆зрѧ́днᲂе ,꙳ и҆ спасе́нᲂе врачевство̀ ,꙳ ꙗ҆́же бг҃а ро́ждьшїѧ сп҃са мᲂегѡ̀ ,꙳ и҆ слеза́мъ то́ки ,꙳ и҆ часа̀ по́мыслъ гро́знагѡ и҆ стра́шнагѡ .꙳ и҆ сꙋда̀ неꙋмы́тнагѡ ,꙳ ты́ ми да́рꙋй и҆збѣжа́ти мл҃твами твᲂи́ми ,꙳ ѽ дв҃о мꙋ́ченнагѡ тре́пета ,꙳ и҆ бжⷭ҇твенꙋю ᲂу҆лꙋчи́ти бл҃гᲂда́ть . крⷭ҇тᲂбоⷢ҇ . Н=а крⷭ҇тѣ̀ ꙗ҆́кѡ ᲂу҆зрѣ̀ ,꙳ пригвᲂжде́на гдⷭ҇и ,꙳ а҆́гница и҆ мт҃и твᲂѧ̀ дивлѧ́шесѧ .꙳ и҆ что̀ видѣ́нїе взыва́ше ,꙳ сн҃е вᲂжделѣ́нне ,꙳ сїѧ̀ тебѣ̀ невѣ́рныи сᲂбо́ръ вᲂз̾да́стъ без̾зако́нныи ,꙳ и҆́же мно́гихъ твᲂи́хъ чꙋде́съ наслажде́исѧ .꙳ но сла́ва не и҆з̾рече́ннᲂмꙋ тѝ ,꙳ сᲂше́ствїю влⷣко .

На ᲂу҆́трени . ѻ҆́ба кано́на , во ѻ҆кта́и . и҆ ст҃лю , на д҃ . кано́нъ , є҆мꙋ́же краегране́сїе си́це : кѷри́ла пᲂю̀ , нача́льника сᲂбо́рꙋ . твᲂре́нїе ѳеѡ́фанᲂво . гла́съ , д҃ . пѣ́снь , а҃ . і҆рмо́съ . Тристᲂѧ́ща крѣ́пкїи , рᲂжде́исѧ ѿ дв҃ы , без̾стра́стїе во глꙋбинѣ̀ , дш҃и трича́стнᲂе пᲂтᲂпѝ мᲂлю́сѧ . да тѝ ꙗ҆́кѡ в̾ тимпа́нѣ , во ᲂу҆мерщве́ннѣмъ тѣлесѝ , пᲂбѣ́днᲂе пᲂю̀ вᲂспѣва́нїе .

запѣ́в̾ : Ст҃лю хрⷭ҇то́въ кѷри́ле , мᲂлѝ бг҃а ѡ҆ на́съ . Оу҆краси́въ дш҃ꙋ дᲂбрᲂдѣ́тельными ви́ды , бл҃гᲂда́темъ прїе́мницꙋ дх҃а ст҃а́гѡ сᲂдѣ́лалъ є҆сѝ . ѿ ню́дꙋ же бе́зднꙋ премꙋ́дрᲂсти ѿры́гнꙋ , є҆ресе́мъ пꙋчи́ны и҆з̾сꙋша́ющꙋ кѷри́ле . Превы́ш̾ши ᲂу҆́мъ веще́й сᲂдѣ́лалъ є҆сѝ . невеще́ственымъ слꙋжи́телемъ , сᲂбесѣ́дникъ пᲂказа́всѧ . ѻ҆гне́мъ же слᲂве́съ твᲂи́хъ , всю̀ пᲂпали́лъ є҆сѝ ве́щь є҆ресе́мъ кѷри́ле . цр҃ко́внᲂе свѣти́ло неꙋсыпа́ющее . Глаго́лъ твᲂи́хъ бл҃гᲂꙋха́ньми , вражды̀ тезᲂи҆мени́тагѡ премꙋ́дре , є҆ресе́мъ всѣ́мъ нестерпи́маго смра́да ѿри́нꙋлъ є҆сѝ , далечѐ сᲂтво́рь . ꙗ҆́кѡ па́стырь и҆́стиненъ . ꙗ҆́кѡ хрⷭ҇то́во бл҃гᲂꙋха́нїе бы́сть . боⷢ҇ . Ѿ тимѣ́нїѧ стрⷭ҇те́й , пᲂмышле́нїи тревᲂлне́нїѧ , ѿ стрѣ́лъ лꙋка́вагѡ , ѿ всѧ́кагѡ прило́га сᲂпрᲂти́внагѡ спасѝ чи́стаѧ бг҃ᲂрᲂди́тельнице , дꙋ́ши вᲂспѣва́ющихъ , твᲂѐ несказа́ннᲂе ржⷭ҇тво̀ всенепᲂро́чнаѧ .

пѣ́снь , г҃ . і҆рмо́съ . Ꙗ҆́кѡ непло́ды рᲂдѝ , ѿ ꙗ҆зы́къ цр҃кви . и҆ мно́гѡ ѡ҆ ча́дѣхъ и҆знемо́же со́нмище . чꙋ́днᲂмꙋ бг҃ꙋ на́шемꙋ вᲂзᲂпїе́мъ , ст҃ъ є҆сѝ гдⷭ҇и . Сїѧ́ѧ свѣ́тлᲂстьми дх҃о́вныѧ премꙋ́дрᲂсти , трисїѧ́ннᲂе бжⷭ҇тво̀ трⷪ҇цы , ѻ҆́ч҃е и҆з̾ дале́ча сꙋ́щимъ на землѝ ᲂу҆ѧсни́лъ є҆сѝ . и҆́мже тмы̀ пре́лести и҆зба́вихᲂмсѧ . Цѣвни́ца дх҃а ст҃а́гѡ ꙗ҆ви́сѧ бг҃ᲂмꙋ́дре вᲂз̾глаша́ющи гла́съ ꙗ҆вле́нїѧ хрⷭ҇то́ва . є҆го́же во двꙋ̀ є҆стествꙋ̀ прᲂпᲂвѣ́далъ є҆сѝ , прᲂсвѣща́ѧ дш҃а на́ша . Хра́мъ сщ҃е́нїѧ , твᲂѧ̀ дш҃а пᲂказа́сѧ . во́ньже ѻ҆ц҃ъ и҆ сн҃ъ и҆ дх҃ъ живᲂнача́льныи , па́че є҆стества̀ всели́сѧ . є҆мꙋ́же пᲂе́мъ , ст҃ъ є҆сѝ гдⷭ҇и . боⷢ҇ . Ни ᲂу҆́мъ нбⷭ҇ныи , и҆́же па́че ᲂу҆ма̀ твᲂѐ ржⷭ҇тво̀ , немо́жетъ сказа́ти ѻ҆трᲂкᲂви́це . ᲂу҆ма́ бо пе́рваго , во ᲂу҆тро́бѣ сло́во зачала̀ є҆сѝ чи́стаѧ , всѧ́ческаѧ сло́вᲂмъ сᲂста́вльшагѡ .

сѣда́ленъ . гла́съ , и҃ . Премꙋ́дрᲂстїю сло́ва ѡ҆бᲂгатѣ́въ , ѿры́гнꙋлъ є҆сѝ ᲂу҆че́нїи рѣ́ки живо́тныѧ . и҆ всѧ́кꙋ напᲂи́лъ є҆сѝ бл҃гᲂчести́выхъ мы́сль . и҆ па́лицею бжⷭ҇твенᲂю ᲂу҆па́слъ є҆сѝ ста́до в̾зла́цѣ , бжⷭ҇твенагѡ напита́лъ є҆сѝ ра́зꙋма . тѣ́мже ꙗ҆́кѡ па́стырѧ и҆ ᲂу҆чи́телѧ вели́ка , и҆ вѣ́рнымъ застꙋ́пника , вᲂсхвалѧ́емъ тѧ кѷри́ле ст҃лю зᲂвꙋ́ще . мᲂлѝ хрⷭ҇та̀ бг҃а , грѣхо́въ ѡ҆ставле́нїе пᲂда́ти , чтꙋ́щимъ любо́вїю ст҃ꙋ́ю па́мѧть твᲂю̀ . сла́ва , и҆ ны́нѣ , боⷢ҇ . Ꙗ҆́кѡ дв҃ꙋ є҆ди́нꙋ в̾ жена́хъ , тѧ̀ без̾ сѣ́мене ро́ждьшꙋю бг҃а пло́тїю , всѝ ᲂу҆блажа́емъ ро́ди чл҃честїи . ѻ҆́гнь бо всели́сѧ в̾ тѧ̀ бжⷭ҇твеныи . и҆ ꙗ҆́кѡ младе́нца дᲂи́ши зижди́телѧ и҆ гдⷭ҇а . тѣ́мже а҆́нг҃льскїи и҆ чл҃ческїи ро́дъ , дᲂсто́йнѡ сла́вимъ прест҃о́е ржⷭ҇тво̀ твᲂѐ . и҆ сᲂгла́снѡ вᲂпїе́мъ тѝ , мᲂлѝ хрⷭ҇та̀ бг҃а , сᲂгрѣше́нїемъ ѡ҆ставле́нїе дарᲂва́ти , вᲂспѣва́ющимъ дᲂсто́йнѡ сла́вꙋ твᲂю̀ . крⷭ҇тᲂбоⷢ҇ . А҆́гньца и҆ па́стырѧ и҆ и҆зба́вителѧ , а҆́гница зрѧ́щи , на крⷭ҇тѣ̀ вᲂсклица́ше слезѧ́щи , ми́ръ ᲂу҆́бѡ ра́дꙋетсѧ прїе́млѧ тᲂбо́ю и҆збавле́нїе . ᲂу҆тро́ба же мᲂѧ̀ гᲂри́тъ зрѧ́щи твᲂѐ распѧ́тїе , є҆́же терпи́ши за милᲂсе́рдїе млⷭ҇ти дᲂлгᲂтерпѣли́ве гдⷭ҇и . млⷭ҇ти бе́здно , и҆ и҆сто́чниче неи҆счерпа́емыи , ᲂу҆милᲂсе́рдисѧ и҆ да́рꙋй грѣхо́въ ѡ҆ставле́нїе , и҆́же вѣ́рᲂю твᲂѧ̀ вᲂспѣва́ющимъ бжⷭ҇твенаѧ страда́нїѧ .

пѣ́снь , д҃ . і҆рмо́съ . Нб҃са̀ дᲂбрᲂдѣ́тель твᲂѧ̀ пᲂкры́ла є҆́сть , и҆ землѧ̀ и҆спо́лнисѧ сла́вы твᲂеѧ̀ хрⷭ҇тѐ . тѣ́мже вѣ́рнѡ вᲂпїе́мъ , сла́ва си́лѣ твᲂе́й гдⷭ҇и . Преми́рныѧ мꙋ́дрᲂсти , и҆сто́чникъ прпⷣбне твᲂѐ срⷣце прїе́мъ ѿры́гнꙋ ᲂу҆че́нїѧ бе́зднꙋ , ᲂу҆мы̀ нече́ствꙋющихъ пᲂгрꙋжа́ющꙋ . Є҆ди́нꙋ крѣ́пᲂсть , є҆ди́но сꙋщество̀ , и҆ є҆ди́нꙋ во́лю , трисᲂста́внаго бжⷭ҇тва̀ прᲂпᲂвѣ́далъ є҆сѝ . и҆ мнᲂгᲂбо́жїѧ кѷри́ле , пре́лести пᲂто́ки и҆з̾сꙋши́лъ є҆сѝ . Оу҆́мъ ѡ҆калѧ́нныи , и҆ несмы́сленыи ма́нентᲂвъ , ꙗ҆́кѡ ᲂу҆́мъ и҆мы́и , и҆ бг҃ᲂнаꙋче́нъ бл҃же́нне . блиста́нїи слᲂве́съ твᲂи́хъ , пᲂпали́въ ꙗ҆́вѣ ѡ҆бличи́лъ є҆сѝ . боⷢ҇ . Ꙗ҆́кѡ вы́ш̾ши всѣ́хъ тваре́й чⷭ҇таѧ , твᲂрца̀ тва́ри зачала̀ є҆сѝ . и҆ па́че ᲂу҆ма̀ ро́ждьши , є҆стество̀ на́ше ѡ҆бно́вльшаго .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рᲂю вᲂспѣва́ющїѧ тѧ . Жезло́мъ честны́ѧ ст҃лю премꙋ́дрᲂсти твᲂеѧ̀ , ᲂу҆па́слъ є҆сѝ на вᲂдѣ̀ правᲂсла́вныѧ слꙋ́жбы , ста́до твᲂѐ бл҃же́нне . Сло́во твᲂѐ свѣ́тᲂмъ бжⷭ҇твенымъ ѡ҆блиста́емо , ѽ кѷри́ле прᲂсвѣще́нїемъ во і҆єрⷭ҇ли́мѣ , мглꙋ̀ неразꙋ́мїѧ разрꙋши́лъ є҆сѝ . боⷢ҇ . Но́щь пречⷭ҇таѧ страсте́й , и҆ ѕлы́хъ ѡ҆черне́нїѧ пᲂкрыва́етъ дш҃ꙋ мᲂю̀ . свѣтᲂда́вца пᲂро́ждьшаѧ , ѡ҆зари́ мѧ мᲂлю́сѧ .

пѣ́снь , ѕ҃ . і҆рмо́съ . Вᲂзᲂпи́лъ прᲂѡ҆бразꙋ́ѧ пᲂгребе́нїе тридне́внᲂе , пррⷪ҇къ і҆ѡ́на в̾ ки́тѣ бг҃ꙋ мᲂлѧ́сѧ , ѿ тлѝ спаси́ мѧ , і҆с҃е цр҃ю сы́и си́ламъ . Рѣка̀ ты̀ , ꙗ҆́кѡ и҆з̾ и҆но́гѡ є҆де́ма и҆зы́де . живо́тныхъ и҆спо́лнена во́дъ дх҃а . и҆ цр҃ко́вныѧ ст҃лю напᲂѧ́еши бра́зды . Гл҃ъ твᲂи́хъ ѻ҆гне́мъ , ꙗ҆́кѡ ѿ бꙋ́ри мᲂрскі́ѧ нече́стїѧ , спаса́еши лю́ди ѡ҆сщ҃е́нне . к̾ ти́хᲂмꙋ приста́нищꙋ правᲂсла́вїѧ , тѣ́хъ призыва́ѧ . боⷢ҇ . Ѡ҆нб҃си́ла є҆сѝ , землено́е є҆стество̀ пренепᲂро́чнаѧ чл҃ческᲂе . и҆ и҆стлѣ́вшее то̀ но́во сᲂтвᲂри́ла є҆сѝ . сегѡ̀ ра́ди ѻ҆трᲂкᲂви́це , немо́лчными гла́сы тѧ̀ сла́вимъ .

пѣ́снь , з҃ . і҆рмо́съ . Ю҆́нᲂшы трѝ в̾ вавѷлѡ́нѣ , велѣ́нїе мꙋчи́телево на бꙋ́йство прелᲂжи́ша . и҆ пᲂсредѝ ѻ҆гнѧ̀ в̾ве́ржени , прᲂхлажда́еми вᲂпїѧ́хꙋ , блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ . И҆мѣ́ѧ ѻ҆́гнь въ ᲂу҆мѣ̀ ѻ҆́ч҃е , стра́ха бж҃їѧ , ве́щь пᲂже́глъ є҆сѝ льсте́й , вᲂспѣва́ѧ . бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . Слеза́ми страстны́и пла́мень , пᲂгаси́лъ є҆сѝ бл҃же́нне . свѣщꙋ̀ сᲂхрани́лъ є҆сѝ неꙋгаси́мꙋ твᲂеѧ̀ дш҃и , взыва́ѧ , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . И҆сто́чникъ жи́въ и҆мѣ́ѧ и҆з̾лїѧ́нїе дх҃а , в̾ дш҃и бг҃ᲂмꙋ́дре . и҆стᲂчи́лъ є҆сѝ ѻ҆́ч҃е рѣ́ки ᲂу҆че́нїѧ цр҃кᲂвь напᲂѧ́ющїѧ , бл҃гᲂче́стнѡ тѧ̀ сла́вѧщꙋю . боⷢ҇ . Всю́ тѧ ѡ҆сщ҃а́етъ ст҃ы́и , и҆́же ѿ твᲂеѧ̀ пло́ти заимᲂва́выи пло́ть себѣ̀ бцⷣе . и҆́же во ст҃ы́хъ гдⷭ҇ь живы́и бг҃ъ на́шъ .

пѣ́снь , и҃ . і҆рмо́с̾ . И҆зба́вителю всѣ́хъ всеси́льне , пᲂсредѣ̀ пла́мене бл҃гᲂче́ствᲂвавшїѧ сше́дъ ѡ҆рᲂси́лъ є҆сѝ , и҆ наꙋчѝ пѣ́ти , всѧ́каѧ дѣ́ла бл҃гᲂслᲂви́те гдⷭ҇нѧ гдⷭ҇а . Дрема́нїе ᲂу҆ны́нїѧ бл҃же́нне , ѿвѣ́ждь дш҃е́вныхъ ѿри́нꙋвъ , пра́ведникѡмъ пᲂдо́бнымъ , ны́нѣ ᲂу҆снꙋ́лъ є҆сѝ сно́мъ . и҆ ко́ дни невече́рнѧгѡ свѣ́та преше́лъ є҆сѝ . Блиста́нїи слᲂве́съ твᲂи́хъ , пᲂпали́лъ є҆сѝ хвра́стнꙋю є҆́ресь сла́вне . и҆ вѣ́рныхъ прᲂсвѣти́лъ є҆сѝ , є҆ди́нꙋ честѝ , трⷪ҇цꙋ ѻ҆́бразᲂмъ , въ є҆ди́нствѣ сꙋ́щꙋ є҆стество́мъ . Ѡ҆ст҃и́въ себѐ вᲂз̾держа́ньми , ᲂу҆ме́ршагѡ тебѐ ра́ди , ты̀ без̾кро́внѡ пᲂже́рлъ є҆сѝ , ꙗ҆́кѡ ст҃ль бжⷭ҇твеныи . ꙗ҆́кѡ та́йнамъ неи҆зрече́ннымъ слꙋжи́тель кѷри́ле . боⷢ҇ . И҆зба́вльшесѧ клѧ́твы прама́тернїѧ , тᲂбо́ю чи́стᲂю бг҃ᲂма́терїю , бл҃гᲂслᲂве́наѧ влⷣчце . бл҃гᲂсло́вимъ дв҃це препрᲂсла́вленаѧ , прест҃о́е ржⷭ҇тво̀ твᲂѐ всечи́стаѧ .

пѣ́снь , ѳ҃ . і҆рмо́съ . Є҆́вва ᲂу҆́бѡ недꙋ́гᲂмъ ѡ҆слꙋша́нїѧ , клѧ́твꙋ всели́ла є҆́сть . ты́ же дв҃о бцⷣе прᲂзѧбе́нїемъ прижи́тїѧ твᲂегѡ̀ , ми́рᲂви бл҃гᲂслᲂве́нїе прᲂцвѣла̀ є҆сѝ . тѣ́мъ тѧ̀ всѝ велича́емъ . Ви́дѣти жела́ѧ хрⷭ҇то́вꙋ неи҆зрече́ннꙋю ст҃лю сла́вꙋ , пᲂтща́лсѧ є҆сѝ стра́сти ᲂу҆мертви́ти дш҃етлѣ́нныѧ . прїѧ́телище срⷣце сᲂтвᲂри́ти премꙋ́дрᲂсти бо́льшей и҆ лꙋ́чшей . тѣ́мже тѧ̀ вѣ́рᲂю ᲂу҆бл҃жа́емъ . Ѕвѣздꙋ̀ мнᲂгᲂсвѣ́тлꙋю , хрⷭ҇то́съ сл҃нце , на цр҃ко́внѣй высᲂтѣ̀ пᲂлᲂжѝ тѧ̀ кѷри́ле . заре́ю ᲂу҆че́нїи сщ҃е́нныхъ , прᲂсвѣща́юща срⷣца̀ , вѣ́рнѡ сᲂверша́ющихъ твᲂю̀ свѣтᲂно́снꙋю па́мѧть прпⷣбне . Сᲂбесѣ́дникъ и҆ сᲂслꙋже́бникъ бы́сть а҆́нг҃лѡмъ . ꙗ҆́кѡ бо беспло́тенъ ѻ҆́ч҃е на землѝ по́живъ . прпⷣбнымъ ꙗ҆ви́сѧ сᲂприча́стникъ , ст҃лемъ равнᲂстᲂѧ́тель . с̾ ни́ми же ликꙋ́ѧ на́съ пᲂмина́й . боⷢ҇ . Непло́ды нᲂсѧ́щее бжⷭ҇твеныхъ дᲂбрᲂдѣ́телей , пречⷭ҇таѧ бцⷣе , срⷣце мᲂѐ пᲂкажѝ дв҃о плᲂдᲂно́снѡ . ꙗ҆́же ѿ непло́дᲂве ро́ждьшаѧсѧ , во́лею всѧ̀ претвᲂрѧ́ющагѡ манᲂве́нїемъ , да тѧ̀ пᲂю̀ препѣ́тꙋю .