23 марта: прп. Никона

МЦⷭ҇А ТОГО́ЖЕ ВЪ К҃Г ДН҃Ь

прпⷣбнагѡ ѻ҆ц҃а на́шегѡ ни́кᲂна , и҆ ᲂу҆чени́къ є҆гѡ̀ рч҃ѳ . =Ве́черъ , на гдⷭ҇и вᲂзва́хъ , стихѣ́ры . гла́съ , д҃ . поⷣ . ꙗ҆́кѡ до́блѧ . Сла́сти тѣле́сныѧ ,꙳ и҆ пло́ти непᲂко́рнᲂе ,꙳ браздо́ю пᲂвинꙋ́лъ є҆сѝ бл҃же́нне вᲂз̾держа́нїѧ бл҃гᲂда́тїю .꙳ пᲂбѣди́въ ꙗ҆́кѡ хра́бръ ,꙳ всѐ ѻ҆рꙋ́жїе врага̀ ,꙳ си́лᲂю дх҃о́внᲂю .꙳ ѿ ню́дꙋ же во́ждь бы́лъ є҆сѝ и҆́нᲂкꙋющимъ ,꙳ пᲂслѣ́дꙋющимъ премꙋ́дрᲂмꙋ твᲂемꙋ̀ ,꙳ и҆ бжⷭ҇твенᲂмꙋ ни́кᲂне прᲂпᲂвѣ́данїю всегда̀ . Вᲂсїѧ́въ ꙗ҆́кѡ сл҃нце ,꙳ ѿ вᲂсто́ка пресла́вне ,꙳ вселе́ннꙋю всю̀ прᲂсвѣти́лъ є҆сѝ ,꙳ чꙋде́сными свѣтлᲂстьмѝ .꙳ с̾ ли́кᲂмъ грѧды́и ,꙳ ꙗ҆́кѡ ѕвѣзда́ми свѣ́тлыми ᲂу҆ченикѝ сѝ .꙳ с̾ ни́ми же пᲂстрада́лъ є҆сѝ крѣ́пкѡ ,꙳ мечѝ ᲂу҆сѣче́ни бы́вше .꙳ и҆ в̾ рꙋ́цѣ всѣ́хъ цр҃ѧ влⷣки ,꙳ ва́ша дш҃а преда́вше . Ни гла́дъ ни бѣда̀ ,꙳ ни нагᲂта̀ ни ра́ны ,꙳ ни нꙋ́жнаѧ вᲂи́стинꙋ сме́рть ,꙳ ва́съ ѿ любвѐ бж҃їѧ ѿлꙋчи́ти вᲂз̾мо́же ,꙳ дᲂстᲂчꙋ́днїи .꙳ но ꙗ҆́кѡ а҆́гньцы на закᲂле́нїе ,꙳ па́стырю пᲂслѣ́дꙋюще ,꙳ ѿ за́пада къ невече́рнемꙋ кᲂнцꙋ̀ нбⷭ҇нагѡ црⷭ҇твїѧ ,꙳ страстᲂте́рпцы вѣнцено́сцы дᲂстиго́сте . сла́ва , и҆ ны́нѣ , боⷢ҇ . Ѡ҆сꙋже́нїѧ и҆зба́ви ,꙳ прест҃а́ѧ бг҃ᲂневѣ́сто ,꙳ и҆ лю́тыхъ прегрѣше́нїи смире́нꙋю мѝ дꙋ́шꙋ ,꙳ и҆ сме́рти и҆змѣнѝ мл҃твами сѝ .꙳ и҆ да́рꙋй ѡ҆правда́нїе ᲂу҆лꙋчи́ти ,꙳ въ де́нь и҆спыта́нїѧ ,꙳ є҆́же пᲂлꙋчи́ша ст҃ы́хъ сᲂбо́ри .꙳ пᲂкаѧ́нїемъ ѡ҆чище́нна мѧ̀ ꙗ҆вѝ пре́жде кᲂнца̀ ,꙳ и҆ сле́зными тече́ньми . =крⷭ҇тᲂбоⷢ҇ . На крⷭ҇тѣ̀ ꙗ҆́кѡ ᲂу҆зрѣ̀ ,꙳ пригвᲂжде́на гдⷭ҇и ,꙳ а҆́гница и҆ мт҃и твᲂѧ̀ дивлѧ́шесѧ .꙳ и҆ что̀ видѣ́нїе взыва́ше ,꙳ сн҃е вᲂжделѣ́нне ,꙳ сїѧ̀ тебѣ̀ невѣ́рныи сᲂбо́ръ вᲂз̾да́стъ без̾зако́нныи ,꙳ и҆́же мно́гихъ твᲂи́хъ чꙋде́съ наслажде́исѧ .꙳ но сла́ва не и҆з̾рече́ннᲂмꙋ тѝ ,꙳ сᲂше́ствїю влⷣко .

На ᲂу҆́трени . ѻ҆́ба кано́на , во ѻ҆кта́и . и҆ ст҃о́мꙋ , на д҃ . кано́нъ . твᲂре́нїе і҆ѡ́сифᲂво . гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ , немо́крыми стᲂпа́ми дре́вле ше́ствᲂвавъ і҆и҃ль , крⷭ҇тᲂѡ҆бра́зно мѡѷсе́ѡвыма рꙋка́ма , а҆мали́кᲂвꙋ си́лꙋ в̾ пꙋсты́ни пᲂбѣди́лъ є҆́сть .

запѣ́в̾ : Прпⷣбне ѻ҆́ч҃е ни́кᲂне , мᲂлѝ бг҃а ѡ҆ на́съ . Пᲂбѣ́ждь по́стническими бᲂре́нїе ѕлᲂхꙋдо́жнаго , страда́льческими вѣнча́сѧ дᲂбро́тами . и҆ бг҃ꙋ ны́нѣ пред̾стᲂи́ши , ѡ҆ на́съ мᲂлѧ́сѧ , прпⷣбне ни́кᲂне чтꙋ́щихъ тѧ̀ . Си́лᲂю на́ша не́мᲂщи ᲂу҆крѣпи́вшагѡ , си́лꙋ прїе́мъ хра́брᲂвалъ є҆сѝ , пре́же во бранѣ́хъ бл҃же́нне . и҆ пᲂбѣди́тель бы́въ , ко хрⷭ҇то́вꙋ притека́еши кр҃ще́нїю . Оу҆краша́етсѧ мꙋче́нїемъ приче́тъ бл҃же́нныи ᲂу҆чени́къ твᲂи́хъ , пе́рвїе мꙋ́дре прᲂсвѣ́щьсѧ пᲂще́ньми . и҆ сꙋгꙋ́быми бᲂре́нїи , сꙋгꙋ́бы вѣнца̀ и҆сплетѐ . боⷢ҇ . Две́рь ꙗ҆́же к̾ на́мъ твᲂегѡ̀ гдⷭ҇и сни́тїѧ , вᲂсто́ка и҆ сл҃нца , и҆ свѣ́та та́йнѡ тѧ̀ и҆менꙋ́ема . па́че є҆стества̀ пᲂрᲂдѝ , сꙋгꙋ́ба є҆стество́мъ бг҃а и҆ чл҃ка .

пѣ́снь , г҃ . і҆рмо́съ . Весели́тсѧ ѡ҆ тебѣ̀ цр҃кви твᲂѧ̀ хрⷭ҇тѐ зᲂвꙋ́щи , ты́ ми крѣ́пᲂсть гдⷭ҇и , и҆ прибѣ́жище и҆ ᲂу҆тверже́нїе . Во́инствᲂмъ дх҃о́внымъ препᲂѧ́санъ , во́ины бжⷭ҇твены мч҃нче хрⷭ҇то́въ вᲂѡ҆рꙋжи́лъ є҆сѝ , ко страда́льческимъ пᲂдвиго́мъ . Распѧ́тъ по́стнически пло́ть сла́вне пе́рвїе . пᲂтща́лсѧ є҆сѝ страда́льческими ра́нами , пᲂлкѝ бѣсо́вскїѧ пᲂбѣди́ти . Ѿ вᲂсто́ка ꙗ҆́кᲂже ѕвѣзда̀ ни́кᲂне прише́дъ , къ за́падᲂмъ дᲂсти́глъ є҆сѝ . тѣ́мже ᲂу҆́меръ за́йде , и҆ ко хрⷭ҇тꙋ̀ вᲂсїѧ́лъ є҆сѝ . боⷢ҇ . Мꙋ́ченическїи сᲂбо́ръ , твᲂѐ и҆з̾ѡ҆бразѝ закᲂле́нїе влⷣко . разꙋмѣ́въ тѧ , и҆з̾ ѻ҆трᲂкᲂви́цы неи҆скꙋсᲂбра́чныѧ прᲂзѧ́бша .

сѣда́ленъ . гла́съ , д҃ . Прпⷣбнѡ по́живъ ни́кᲂне пе́рвїе , и҆ ли́къ со́бралъ є҆сѝ бг҃ᲂпᲂкᲂри́въ , бл҃гᲂче́стнѡ при́снѡ пᲂслѣ́дꙋющїи тебѣ̀ . ѿ вᲂсто́ка къ за́падꙋ вᲂсїѧ́въ , ꙗ҆́кᲂже сл҃нце свѣтᲂно́снѡ зарѧ́ми страда́нїи , ᲂу҆бі́йствᲂмъ крᲂве́й ва́шихъ , пре́лесть ᲂу҆ма́ливше .= сла́ва , и҆ нн҃ѣ , боⷢ҇ . Дв҃о всенепᲂро́чнаѧ , ꙗ҆́же пресꙋ́щнаго бг҃а пᲂро́ждьши , со беспло́тными тᲂгѡ̀ непреста́ннѡ мᲂлѝ , ѡ҆ставле́нїе прегрѣше́нїемъ , и҆ и҆справле́нїе житїю̀ , да́ти на́мъ пре́жде кᲂнца̀ , вѣ́рᲂю и҆ любо́вїю по́ дᲂлгꙋ пᲂю́щимъ тѧ̀ , є҆ди́на препѣ́таѧ . крⷭ҇тᲂбоⷢ҇ . Н=а крⷭ҇тѣ́ тѧ вᲂз̾дви́жена ꙗ҆́кѡ ᲂу҆зрѣ̀ , нескве́рнаѧ мт҃и твᲂѧ̀ сло́ве бж҃їи . мт҃рьски рыда́ющи вѣща́ше , что̀ но́вᲂе и҆ стра́ннᲂе сїѐ сн҃е мо́й чꙋ́до ; ка́кѡ жи́знь всѣ́хъ , прїе́млеши сме́рть . ѡ҆живи́ти хᲂтѧ̀ ᲂу҆ме́ршїѧ , ꙗ҆́кѡ милᲂсе́рдъ .

пѣ́снь , д҃ . і҆рмо́съ . Вᲂз̾дви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾ чинꙋ̀ свᲂе́мъ , дᲂсто́йнѡ взыва́ющи , сла́ва си́лѣ твᲂе́й гдⷭ҇и . Наслажда́ѧсѧ бжⷭ҇твеными свѣтᲂли́тїи , мꙋ́къ тече́нїѧ не ᲂу҆ѧ́звленъ пре́йде , ни́кᲂне дᲂстᲂчꙋ́дне . и҆ пᲂбѣ́ды вѣне́цъ мч҃нче дᲂсто́йнѡ прїѧ́лъ є҆сѝ . Свѣтлᲂстьмѝ ᲂу҆краша́емъ до́блестей , ꙗ҆́кѡ по́стникъ пᲂдвиза́сѧ . стра́сти ᲂу҆мертви́въ пе́рвїе плᲂтьскі́ѧ . страда́нїемъ втᲂро́е бѣсо́вскїѧ пᲂбѣ́ждь пᲂлкѝ . Ѡ҆пᲂлчи́стесѧ ѻ҆рꙋ́жїемъ бл҃гᲂче́стїѧ , на врага̀ бг҃ᲂмꙋ́дрїи , и҆ сме́ртїю сла́внᲂю , без̾сме́ртїе прїѧ́сте , пᲂю́ще , сла́ва си́лѣ твᲂе́й гдⷭ҇и . боⷢ҇ . Ꙗ҆́кѡ сꙋ́щꙋ тва́ри вы́шшꙋ , твᲂре́цъ вᲂз̾люби́въ дв҃о мт҃и , пᲂказа́ тѧ мт҃рь себѣ̀ . ю҆́же ны́нѣ мо́лѧтъ , сᲂбо́ри страда́лецъ бл҃гᲂꙋкра́шенно .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ в̾ ми́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́денїѧ , вѣ́рᲂю вᲂспѣва́ющїѧ тѧ . Бжⷭ҇твенымъ свᲂеѧ̀ мт҃ре , бл҃гᲂпᲂвинꙋ́ѧсѧ наказа́нїемъ . си́лꙋ ни́кᲂне прїе́мъ крⷭ҇тнꙋю во бранѣ́хъ , наꙋча́ѧсѧ лꙋ́чшимъ . Житїѐ твᲂѐ свѣ́тᲂмъ дᲂбрᲂдѣ́телей прᲂсвѣще́но . страда́нїе же ꙗ҆́кѡ ᲂу҆́тварь бл҃гᲂлѣ́пнꙋ и҆́мать , бг҃ᲂмꙋ́дре и҆ всече́стне . Зако́нᲂмъ бг҃ᲂнача́льнымъ пᲂвинꙋ́ющесѧ мꙋ́ченицы хра́брᲂвавше . и҆ без̾зако́нныѧ бж҃їимъ пᲂсо́бїемъ , мꙋ́жески пᲂбѣди́ша . боⷢ҇ . Свѣ́тъ без̾лѣ́тныи на́мъ , ѻ҆́ч҃ее сїѧ́нїе , рᲂдила̀ є҆сѝ пᲂд̾лѣ́тᲂмъ , бᲂга́тствᲂмъ бл҃гᲂсти , чл҃ка бы́вша пренепᲂро́чнаѧ .

пѣ́снь , ѕ҃ . і҆рмо́съ . Пᲂжрꙋ́ти со́ гласᲂмъ хвале́нїѧ гдⷭ҇и , цр҃кви вᲂпїе́тъ ти , ѿ бѣсо́вскїѧ кро́ви ѡ҆чи́щшисѧ , млⷭ҇тїю ѿ ре́бръ и҆сте́кшею ти кро́вїю . Ѿ вᲂсто́ка ꙗ҆́кѡ мнᲂгᲂсвѣ́тлᲂе ᲂу҆стреми́сѧ сл҃нце . ꙗ҆́кᲂже ѕвѣ́зды бг҃ᲂмꙋ́дре , ᲂу҆чени́къ ли́къ привᲂдѧ̀ . и҆ за́падъ зарѧ́ми ва́шими прᲂсвѣти́сте . Ка́плѧми крᲂве́й твᲂи́хъ мч҃нче , пᲂтᲂпи́лъ є҆сѝ мнᲂгᲂбо́жїѧ мо́ре . и҆ глꙋбино́ю по́двигъ ᲂу҆дави́лъ є҆сѝ ѕло́бѣ лю́таго ѡ҆брѣта́телѧ и҆ прелꙋка́ваго . Ꙗ҆́кѡ кри́нъ во страда́нїи цвѣто́внѣмъ прᲂцвѣто́сте . и҆ ꙗ҆́кѡ бл҃гᲂꙋха́нныи шипо́къ , на́ша срⷣца бл҃гᲂꙋха́ете , мч҃нїѧ дᲂбро́тами , страда́льцы бг҃ᲂдх҃нᲂве́ннїи . боⷢ҇ . Цр҃квь тѧ̀ бг҃ꙋ и҆ пᲂла́тꙋ ѡ҆дш҃евле́ннꙋ , страстᲂте́рпческїи ли́къ пᲂзна́въ влⷣчце , мо́литъ тѧ̀ є҆ди́нꙋ , жена́мъ ѿе́мшꙋю пᲂнᲂше́нїе .

пѣ́снь , з҃ . і҆рмо́съ . Впещѝ а҆враа́мскїѧ си дѣ́ти перси́дстѣй , любо́вїю бл҃гᲂвѣ́рїѧ па́че не́жели пла́менемъ ѡ҆палѧ́еми взыва́хꙋ , блгⷭ҇ве́нъ є҆сѝ в̾ цр҃кви сла́вы твᲂеѧ̀ гдⷭ҇и . Па́че зла́та и҆скꙋ́шьсѧ бг҃ᲂмꙋ́дре ра́нами , сто́лпъ дᲂбрᲂдѣ́телей ꙗ҆ви́лсѧ є҆сѝ . напа́данїѧ бѣсо́вскаѧ ѿгᲂнѧ̀ . бл҃гᲂслᲂве́нъ є҆сѝ бж҃е мо́й зᲂвы́и , и҆ гдⷭ҇и ѻ҆ц҃ъ на́шихъ . По кᲂнчи́нѣ пᲂве́ржено твᲂѐ тѣ́ло ѡ҆́тай мч҃нче , бжⷭ҇твенᲂе и҆сцѣле́нїе и҆спꙋща́ѧ свѣ́тлᲂсти , ѿго́нитъ вре́дъ бѣсо́вскїи . и҆́же тѧ̀ ꙗ҆вле́на бжⷭ҇твенᲂю сᲂтво́рша си́лᲂю . Ве́сь бжⷭ҇твеными насла́ждьсѧ пребл҃же́нне манᲂве́ньми , тѣ́ло ра́намъ пре́далъ є҆сѝ терпѣли́внѡ . вѣнцено́сецъ же пред̾стᲂи́ши вседержи́телю , на́ нб҃сѣхъ ꙗ҆́кѡ вᲂз̾желѣ́лъ є҆сѝ прпⷣбне . Па́стырь ѻ҆вца́мъ сы́и слᲂве́снымъ мꙋ́дре , ѿ во́лкъ мы́сленыхъ сᲂблю́лъ є҆сѝ невреди́мо . и҆ с̾ си́ми в̾ нбⷭ҇нѣй ѡ҆гра́дѣ в̾сели́всѧ , жела́нїемъ кра́йнимъ пред̾стᲂи́ши . боⷢ҇ . Нерастли́въ дв҃ства твᲂегѡ̀ ѻ҆трᲂкᲂви́це ѿ ню́дъ , сло́во ѻ҆́ч҃ее в̾ тѧ̀ всели́сѧ . и҆ мч҃нкъ прїѧ́тъ ли́къ сла́вныи , бцⷣꙋ тѧ̀ чⷭ҇тꙋю прᲂпᲂвѣ́дающъ .

пѣ́снь , и҃ . і҆рмо́съ . Рꙋ́цѣ распрᲂсте́ръ данїи́лъ , льво́ва зїѧ́нїѧ в̾ ро́вѣ затчѐ , ѻ҆́гненꙋю же си́лꙋ ᲂу҆гаси́ша дᲂбрᲂдѣ́телїю пᲂѧ́савшесѧ , и҆́же бл҃гᲂче́стїѧ люби́тели ѻ҆́трᲂцы взыва́юще , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Недрема́нно нᲂсѧ̀ сїѧ́нїе срⷣца твᲂегѡ̀ , напᲂе́но сле́зными пᲂто́ки прпⷣбне , и҆ страда́нїѧ кро́вїю . въ нерꙋкᲂтвᲂре́ннѣмъ пᲂѧ̀ черто́зѣ , ны́нѣ живе́ши , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Красᲂта̀ по́стникѡмъ , и҆ страда́льцемъ пᲂказа́сѧ прпⷣбне . во ѻ҆бᲂи́хъ бо бл҃гᲂи҆зво́лилъ є҆сѝ , пᲂбѣ́ды ᲂу҆дивлѧ́юща мы́сль , на є҆ди́наго врага̀ ни́кᲂне пᲂста́вль . зᲂвы́и , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Крᲂвьмѝ напᲂи́лъ є҆сѝ дш҃ꙋ , и҆ на ре́внᲂсть бжⷭ҇твенꙋю вᲂз̾дви́глъ є҆сѝ прпⷣбне . ꙗ҆́звами мꙋче́нїй ᲂу҆ѧзви́лъ є҆сѝ бѣсо́вскᲂе ѡ҆пᲂлче́нїе . и҆́стинствꙋющее в̾ тебѣ̀ зва́нїе пᲂказа́въ . вᲂпїѧ̀ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . боⷢ҇ . Ѿи҆мѝ бре́мѧ тѧ́жкᲂе мᲂи́хъ паде́нїи , и҆спра́вльши а҆да́мᲂво паде́нїе чи́стаѧ , ржⷭ҇тво́мъ сѝ препѣ́таѧ . и҆ къ свѣ́тꙋ наста́ви вᲂпи́ти , чи́стымъ по́мыслᲂмъ . бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а .

пѣ́снь , ѳ҃ . і҆рмо́с̾ . Ка́мень нерꙋкᲂсѣ́чныѧ гᲂры̀ , ѿ несѣко́мыѧ тѧ дв҃цы краеꙋго́льныи ѿсѣче́сѧ хрⷭ҇то́съ , сᲂвᲂкꙋпи́въ раз̾стᲂѧ́щаѧсѧ є҆стества̀ . тѣ́мъ веселѧ́щесѧ , тѧ̀ бцⷣе велича́емъ . Ви́дѣ тѧ ꙗ҆́звеными дᲂбро́тами прᲂцвѣ́тша , и҆ багрѧ́ницею ѿ чи́стыхъ тѝ крᲂве́й вѣнцеда́тель ѡ҆блече́на , и҆ с̾сᲂбо́ю вселѝ ни́кᲂне , бжⷭ҇твенѡ ра́дꙋющасѧ . Ꙗ҆́кѡ предᲂбра̀ твᲂѧ̀ любы̀ , ю҆́же к̾ бг҃ꙋ стѧжа̀ ни́кᲂне . и҆ тепла̀ ре́внᲂсть твᲂѧ̀ , ѻ҆гне́мъ бжⷭ҇твенымъ распалѧ́ема и҆ чꙋ́днѡ страда́нїе , с̾ нбⷭ҇ными тѧ̀ сᲂвᲂкꙋ́пльшее . Тѧ̀ на цр҃ко́внѣй высᲂтѣ̀ , сл҃нца пᲂсредѝ и҆мꙋ́ще ли́къ страстᲂте́рпецъ , ꙗ҆́кѡ ѕвѣ́зды свѣ́тᲂмъ бжⷭ҇твенымъ ѡ҆блиста́ни , лꙋчеда́тными сїѧ́нїи , вселе́ннꙋю всю̀ ѡ҆зарѧ́ютъ . Взѧ́тсѧ ко ѻ҆би́телемъ нетлѣ́ннымъ , ли́къ сꙋгꙋбᲂстᲂри́ченъ мч҃нкъ , страда́льче пред̾ста́вивъ вѣнцеда́вцꙋ . с̾ ни́ми же пᲂмина́й , твᲂрѧ́щихъ дне́сь сщ҃е́ннꙋю ва́шꙋ па́мѧть . боⷢ҇ . Свѣ́тꙋ жили́ще ꙗ҆ви́сѧ , на́съ ра́ди и҆з̾ тебѐ вᲂпло́щшагᲂсѧ . є҆го́же непреста́ннѡ мᲂлѝ , прᲂсвѣти́ти мы́сли на́ша бл҃гᲂче́стнѡ пᲂю́щихъ тѧ̀ , дв҃о мт҃и всенепᲂро́чнаѧ .

<< Previous

Contents

Next >>