3 марта: мчч. Евтропия, Клеоника и Василиска

МЦⷭ҇А ТОГО́ЖЕ ВЪ Г҃ ДН҃Ь

ст҃ы́хъ мꙋ́ченикъ , є҆ѵ̾тро́пїѧ , клеѡ́ника , и҆ васили́ска . Ве́черъ , на гдⷭ҇и вᲂзва́хъ , стихѣ́ры . гла́съ , а҃ . поⷣ . прехва́льнїи мч҃нцы .= Тричи́сленїи мч҃нцы ,꙳ крѣ́пкѡ пᲂд̾ви́гшесѧ ,꙳ прᲂти́вꙋ сꙋ́рᲂво претѧ́щимъ .꙳ и҆ всѧ́къ ви́дъ тѧ́жкихъ бᲂлѣ́зней ,꙳ вѣ́рᲂю претерпѣ́вше ,꙳ вы́шнее црⷭ҇тво ᲂу҆лꙋчи́сте .꙳ тѣ́мже мᲂли́тесѧ ,꙳ дарᲂва́ти дш҃а́мъ на́шимъ ,꙳ ми́ръ и҆ ве́лїю ми́лᲂсть . Є҆ѵ̾тро́пїѧ ,꙳ клеѡ́ника тве́рдагѡ ,꙳ васили́ска , пѣ́сньми дꙋхо́вными вᲂсхва́лимъ .꙳ ѻ҆гне́мъ бо пᲂпали́ша без̾бо́жїѧ ве́щь ,꙳ бл҃гᲂче́стїѧ бл҃гᲂда́тїю .꙳ и҆ ны́нѣ прᲂсвѣща́ютъ кᲂнцы̀ ,꙳ бжⷭ҇твеными ѻ҆гнѧ̀ свѣтлᲂстьмѝ ,꙳ ꙗ҆́кᲂже свѣти́льницы пресвѣ́тлїи ,꙳ ꙗ҆́кѡ пре́лесть всю̀ ѡ҆черни́вше . Глава́ми ᲂу҆сѣка́еми ,꙳ врагꙋ̀ главꙋ̀ сᲂкрꙋши́сте ,꙳ кра́сными нᲂга́ми ва́шими ,꙳ до́блїи страда́льцы .꙳ неле́стныѧ ѕвѣ́зды ,꙳ же́ртвы ѡ҆дш҃евле́ныѧ ,꙳ цр҃кви нбⷭ҇ныѧ свѣти́льницы ,꙳ є҆ѵ̾тро́пїе сла́вне ,꙳ васили́ске , и҆ клеѡ́ниче ,꙳ ми́ръ всѣ́мъ и҆спрᲂси́те . сла́ва , и҆ ны́нѣ , боⷢ҇ . Ра́дꙋисѧ стра́ннᲂе слы́шанїе чⷭ҇таѧ .꙳ ра́дꙋисѧ дре́во ст҃о́е раѧ̀ бг҃ᲂса́днагѡ .꙳ ра́дꙋисѧ пᲂтребле́нїе лꙋка́вымъ бѣсо́мъ .꙳ ра́дꙋисѧ ѻ҆рꙋ́жїе ѡ҆бᲂю́дꙋ ѻ҆́стрᲂе ,꙳ врагꙋ̀ главꙋ̀ пᲂсѣ́кши ,꙳ стра́ннымъ ржⷭ҇тво́мъ сѝ ,꙳ всест҃а́ѧ пренепᲂро́чнаѧ ,꙳ ᲂу҆стра́ншїѧсѧ на́съ призᲂвѝ . =крⷭ҇тᲂбоⷢ҇ . Свᲂегѡ̀ а҆́гньца ,꙳ а҆́гница и҆ непᲂро́чнаѧ влⷣчца ,꙳ на крⷭ҇тѣ̀ ꙗ҆́кѡ ᲂу҆зрѣ̀ ,꙳ видѣ́нїѧ не и҆мꙋ́ща ни дᲂбро́ты ,꙳ ᲂу҆вы̀ мнѣ̀ рыда́ющи гл҃аше ,꙳ гдѣ́ ти дᲂбро́та за́йде сла́дкїи ,꙳ гдѣ̀ бл҃гᲂлѣ́пїе .꙳ гдѣ̀ бл҃гᲂда́ть блиста́ющаѧ зра́ка твᲂегѡ̀ ,꙳ сн҃е мо́й вселюбе́зне .

На ᲂу҆́трени . ѻ҆́ба кано́на , во ѻ҆кта́и . и҆ ст҃ы́мъ , на д҃ . кано́нъ , є҆мꙋ́же краегране́сїе си́це : тре́хъ вели́кихъ страда́нїѧ чтꙋ̀ мч҃нкъ . твᲂре́нїе і҆ѡ́сифᲂво . гла́съ , а҃ . пѣ́снь , а҃ . і҆рмо́съ . Твᲂѧ̀ пᲂбѣди́тельнаѧ десни́ца , бг҃ᲂлѣ́пнѡ в̾ крѣ́пᲂсти прᲂсла́висѧ . та́ бо без̾сме́ртне всемᲂгꙋ́щаѧ прᲂти́вныѧ сᲂтрѐ , і҆и҃льтѧнѡмъ пꙋ́ть глꙋбины̀ ѡ҆бно́вльши .

запѣ́въ : Ст҃і́и мч҃нцы , мᲂли́те бг҃а ѡ҆ на́съ .= Преми́рными блиста́ньми , трисо́лнечнагѡ сл҃нца ѡ҆зарѧ́еми , мч҃нцы прехва́льнїи . и҆́же бл҃гᲂче́стнѡ ва́съ ны́нѣ бл҃жа́щихъ , свѣтᲂно́снымъ ва́шимъ страда́нїемъ прᲂсвѣти́те . Гл҃ы ꙗ҆́кᲂже стрѣла́ми премꙋ́дрїи , без̾зако́нныхъ сердца̀ ᲂу҆ѧзви́сте . тѣ́мже претерпѣ́сте пᲂжда́ннѡ ꙗ҆́звы и҆ ра́ны , и҆спᲂвѣ́дающе бж҃їе ст҃о́е и҆́мѧ . Чи́стыми слᲂвесы̀ сщ҃е́нными , пᲂсредѝ сꙋди́ща мꙋчи́телей , прᲂпᲂвѣ́давше мч҃нцы сла́внїи , на́съ ра́ди страда́ти и҆зво́лившагѡ , на нᲂси́мыѧ тве́рдѡ мꙋ́ки претерпѣ́сте . =боⷢ҇ . Ꙗ҆ви́ласѧ є҆сѝ ши́рши нб҃съ , и҆́же ника́кᲂже вмѣсти́маго вᲂпло́щши . сегѡ̀ ᲂу҆́бѡ мᲂлѝ , всѧ́кїѧ на́съ тѣснᲂты̀ и҆зба́вити , и҆ вѣ́чнагѡ дв҃о мꙋче́нїѧ .

пѣ́снь , г҃ . і҆рмо́съ . Є҆ди́не свѣ́дыи земны́хъ сꙋщество̀ немᲂщно́е , и҆ млⷭ҇тивно внѐ ѡ҆бᲂлкі́исѧ , препᲂѧ́ши мѧ с̾вы́ше си́лᲂю , вᲂспѣва́ти ти ст҃ы́и , цр҃кви дш҃е́внаѧ , неи҆зрече́нныѧ сла́вы ти чл҃кᲂлю́бче . Оу҆ма̀ чи́стыми свѣтлᲂстьмѝ бжⷭ҇твенаѧ зрѧ́ще , мꙋ́жескимъ нра́вᲂмъ бл҃же́ннїи , к̾ мꙋ́камъ ᲂу҆стреми́стесѧ . лꙋка́вагѡ беспло́тнагѡ , страда́льцы пᲂбѣжда́юще с̾ тѣ́лѡмъ . тѣ́мже бл҃жи́ми є҆стѐ . Оу҆до́мъ ѿсѣка́нїѧ за хрⷭ҇та̀ мꙋ́дрїи претерпѣва́юще , кро́вными бжⷭ҇твеными крᲂпле́нїи , зе́млю прпⷣбнѡ ѡ҆ст҃и́сте . и҆ же́ртвы бѣсо́мъ принᲂси́мыѧ ᲂу҆ста́висте мч҃нцы . Пᲂлᲂже́ни бы́сте ꙗ҆́кѡ свѣтᲂза́рнїи , на высᲂтѣ̀ страда́нїѧ , ꙗ҆́кᲂже вᲂи́стинꙋ ѕвѣ́зды ѻ҆гнесїѧ́нныѧ , вселе́ннѣй незахо́дными зарѧ́ми . и҆ тмꙋ̀ рѣша́ще льстѝ ст҃і́и . сегѡ̀ ра́ди вѣ́рнѡ ᲂу҆бл҃жа́етесѧ . боⷢ҇ . Во́ чревѣ прїѧ́ла є҆сѝ хрⷭ҇та̀ , чре́во и҆стᲂщи́вшагѡ а҆́дᲂво , вседѣ́йственᲂю во́лею . тᲂгѡ̀ мᲂлѝ бг҃ᲂра́дᲂваннаѧ , ѿ рабо́ты и҆зба́вити грѣхо́вныѧ всѧ̀ , вѣ́рᲂю прⷭ҇нѡ бл҃жа́щїѧ тѧ̀ .

сѣда́ленъ . гла́съ , а҃ . Трⷪ҇цꙋ честнꙋ́ю , трⷪ҇ца мч҃нкъ пред̾ мно́гими и҆спᲂвѣ́да наро́ды . и҆ лико́мъ причто́шасѧ беспло́тныхъ страда́вше . си́хъ дне́сь вᲂсхва́лимъ вѣ́рᲂю , пра́зднꙋюще сщ҃е́ннꙋю и҆́хъ па́мѧть , и҆ мирᲂспасе́нꙋю . сла́ва , и҆ нн҃ѣ , боⷢ҇ . Оу҆пᲂва́нїе хрⷭ҇тїа́нѡмъ пречи́стаѧ дв҃о , є҆го́же рᲂдила̀ є҆сѝ бг҃а , па́че ᲂу҆ма́ же и҆ сло́ва , непреста́ннѡ мᲂлѝ с̾ вы́шними си́лами , да́ти ѡ҆ставле́нїе грѣхо́мъ на́шимъ всѣ́мъ , и҆ и҆справле́нїе житїю̀ . и҆́же вѣ́рᲂю и҆ любо́вїю при́снѡ тѧ̀ сла́вѧщимъ .= крⷭ҇тᲂбоⷢ҇ . Н=ескве́рнаѧ а҆́гница , а҆́гньца и҆ па́стырѧ ви́сима ме́ртва на́ древѣ зрѧ́щи , и҆ рыда́ющи вѣща́ше . ка́кѡ и҆з̾рекꙋ̀ , є҆́же па́че сло́ва сн҃е мо́й твᲂѐ сни́тїе , и҆ во́льныѧ стра́сти бж҃е пребл҃гі́и .

пѣ́снь , д҃ . і҆рмо́съ . Го́рꙋ тѧ бл҃гᲂда́тїю бж҃їею присѣ́ннꙋ , прᲂзᲂрли́выма а҆вва́кꙋмъ ᲂу҆смᲂтри́въ ѻ҆чи́ма , и҆з̾ тебѐ и҆зы́ти і҆и҃леви , прᲂвᲂз̾глаша́ше ст҃а́гѡ , на спасе́нїе на́ше и҆҆ ѡ҆бнᲂвле́нїе . Стᲂѧ́хꙋ трїѐ на сꙋди́щи , прᲂпᲂвѣ́дающе є҆ди́нᲂгѡ трисл҃нечна бг҃а . и҆ ра́намъ раз̾жже́нїе крѣ́пкѡ терпѧ́ще . стᲂлпы̀ ѻ҆́гнены цр҃кви ꙗ҆ви́шасѧ , бл҃гᲂчести́выѧ ѡ҆ хрⷭ҇тѣ̀ пред̾варѧ́юще . Пᲂста́вльше но́зѣ на ка́мени вѣ́ры , непᲂкᲂлѣба́стесѧ мно́гихъ и҆скꙋше́нїи кᲂва́рствїи . но ꙗ҆ви́стесѧ непᲂкᲂлѣби́ми , ѕлᲂчести́вымъ запина́юще мч҃нцы , и҆ всѧ́чески ѡ҆хꙋжда́юще бл҃гᲂда́тїю . Че́стны ꙗ҆́кᲂже ка́менїе на землѝ валѧ́ющесѧ , зда́нїе лꙋка́внᲂе мнᲂгᲂбо́жїѧ , вᲂи́стинꙋ премꙋ́дрїи разᲂри́сте . и҆ самѣ́хъ себѐ бг҃ᲂви цр҃кви сᲂзда́сте , и҆ к̾ цр҃кви нбⷭ҇нѣй вᲂз̾несо́стесѧ . боⷢ҇ . Ꙗ҆ви́сѧ твᲂѧ̀ ᲂу҆тро́ба свѣтᲂно́снаѧ пᲂла́та , в̾ не́йже всѣ́хъ цр҃ь пᲂчѝ хрⷭ҇то́съ . хра́мы сᲂдѣва́ѧ мт҃и чи́стаѧ , и҆ свѣтᲂза́рнаѧ жили́ща бл҃гᲂчести́выѧ , непрестꙋ́пнымъ бжⷭ҇тво́мъ .

пѣ́снь , є҃ . і҆рмо́съ . Прᲂсвѣще́й сїѧ́нїемъ прише́ствїѧ твᲂегѡ̀ хрⷭ҇тѐ , и҆҆ ѡ҆свѣще́и крⷭ҇то́мъ си мирскі́ѧ кᲂнцы̀ , срⷣца̀ прᲂсвѣтѝ свѣ́тᲂмъ твᲂегѡ̀ бг҃ᲂразꙋ́мїѧ , правᲂвѣ́рнѡ хва́лѧщимъ тѧ . Зако́нъ бжⷭ҇твеныи сᲂблюда́юще , дᲂбрᲂпᲂбѣ́днїи мꙋ́ченицы , без̾зако́нникѡмъ мꙋ́жескимъ нра́вᲂмъ прᲂти́вистесѧ . и҆ ᲂу҆ѧзвлѧ́еми и҆ растерза́еми тѣлесы̀ , пᲂбѣ́дꙋ вѣ́чнꙋю взѧ́сте . Вᲂсхва́лимъ васили́ска , и҆ вѣ́рᲂю пᲂчте́мъ клеѡ́ника , и҆ є҆ѵ̾тро́пїѧ велемꙋ́дреныѧ в̾вѣ́рѣ пᲂстрада́вшїѧ по трⷪ҇цѣ прест҃ѣ́й , и҆ па́че сл҃нца прᲂсїѧ́вшїѧ . Чꙋдеса̀ сᲂтвᲂрѧ́юще в̾ сла́вꙋ бг҃ꙋ на́шемꙋ , привлеко́сте зрѧ́щїѧ к̾ вѣ́рѣ сп҃сᲂвѣ , мꙋ́ченицы мнᲂгᲂстрада́льнїи , цвѣ́ти кра́снїи ра́йстїи , цр҃ко́внаѧ ᲂу҆тверже́нїѧ . боⷢ҇ . Свѣ́тлᲂстїю и҆́же ѿ тебѐ па́че ᲂу҆ма̀ вᲂсїѧ́вшагѡ , ѡ҆зарѝ на́ша мы́сли всенепᲂро́чнаѧ . и҆ тмꙋ̀ ᲂу҆ма́ли пᲂмысло́мъ дш҃етлѣ́ннымъ , ꙗ҆́кѡ да пᲂе́мъ тѧ̀ влⷣчце .

пѣ́снь , ѕ҃ . і҆рмо́съ . Ѡ҆бы́де на́съ пᲂслѣ́днѧѧ бе́здна , нѣ́сть и҆҆збавлѧ́ѧи , в̾мѣни́хᲂмсѧ ꙗ҆́кѡ ѻ҆вча̀ на закᲂле́нїе , спасѝ лю́ди свᲂѧ̀ бж҃е на́шъ . ты́ бо крѣ́пᲂсть немᲂщны́мъ и҆҆ и҆҆справле́нїе . Ра́дꙋетсѧ землѧ̀ и҆ нб҃о , ликꙋ́ютъ чл҃цы , мᲂле́бныи сᲂверша́юще пра́здникъ . є҆́же за хрⷭ҇та̀ стра́сти бл҃же́нны пᲂжда́ннѡ претерпѣ́вшихъ , ᲂу҆ма̀ тве́рдᲂстїю . Пᲂче́тъ до́брыми свᲂи́ми нра́вы , є҆ѵ̾тро́пїе бг҃а пребл҃га́гѡ , пᲂбѣди́лъ є҆сѝ хи́трᲂсти вра́жїѧ . тѣ́мже тѧ̀ пᲂчита́ютъ всѝ чл҃цы , и҆́же тᲂбо́ю прегрѣше́нїемъ , разрѣше́нїе прїѧ́ти надѣ́ющесѧ . И҆сцѣле́нїемъ и҆сто́чники и҆злива́юще , зно́й ѿгна́сте бᲂлѣ́зней же и҆ печа́лей мꙋ́дрїи . всѧ́кѡ весе́лїе пᲂсыла́юще , и҆́же бл҃гᲂче́стнѡ ва́шемꙋ пᲂкро́вꙋ при́снѡ притека́ющимъ . боⷢ҇ . Оу҆вѧди́вшаѧ свᲂи́мъ прᲂзѧбе́нїемъ всенепᲂро́чнаѧ , ю҆́же дре́вле прᲂзѧ́бшꙋю престꙋпле́нїемъ , ѕло́бꙋ вра́жїю , ꙗ҆́же в̾ дш҃и мᲂе́й прᲂзѧба́ющїѧ , дш҃етлѣ́нныѧ и҆ терно́вныѧ по́мыслы и҆сто́ргни .

пѣ́снь , з҃ . і҆рмо́съ . Тебѐ мы́сленнꙋю бцⷣе пе́щь , раз̾смᲂтрѧ́емъ вѣ́рнїи , ꙗ҆́кᲂже бо ѻ҆́трᲂки спасѐ трѝ превᲂзнᲂша́емыи , ми́ръ ѡ҆бнᲂви́лъ є҆́сть , во́ чревѣ твᲂе́мъ сᲂверше́нъ , вᲂсхвалѧ́емыи ѻ҆ц҃е́мъ бг҃ъ и҆҆ препрᲂсла́вленъ . Ꙗ҆́кᲂже наслажде́нїе бжⷭ҇твенᲂе вмѣнѧ́юще , ᲂу҆до́въ ѿсѣче́нїе , заꙋше́нїѧ и҆стрᲂга́нїѧ , и҆ сме́рть нꙋ́жнꙋю , мꙋ́ченицы веселѧ́щесѧ , и҆ бг҃ᲂви ᲂу҆се́рднѡ пᲂю́ще . прехва́льныи ѻ҆ц҃ъ на́шихъ бж҃е бл҃гᲂслᲂве́нъ є҆сѝ . По мно́гихъ тᲂмле́нїихъ тѣлесѐ , крⷭ҇тъ пᲂдъѧ́сте крѣ́пкѡ , в̾ пᲂдо́бїе и҆зба́вителѧ , сла́вне є҆ѵ̾тро́пїе , вели́кїи клеѡ́ниче . и҆ бл҃же́ннꙋю кᲂнчи́нꙋ ᲂу҆лꙋчи́сте , хва́льнагѡ вᲂспѣва́юще бг҃а , и҆ препрᲂсла́вленагѡ . Взира́ти ва́мъ пред̾пᲂвелѣва́ѧ , к̾ без̾сме́ртнымъ вᲂз̾да́нїемъ , въ темни́цѣ ꙗ҆ви́сѧ хрⷭ҇то́съ . є҆го́же ви́дѣвше дерзнᲂве́нїѧ и҆спо́лнистесѧ , взыва́юще мч҃нцы сла́внїи , прехва́льныи ѻ҆ц҃ъ на́шихъ бж҃е бл҃гᲂслᲂве́нъ є҆сѝ . боⷢ҇ . И҆зба́ви на́съ прест҃а́ѧ влⷣчце , ѿ ꙗ҆зы́ческагѡ наше́ствїѧ , срѣ́тенїѧ лꙋка́вагѡ , всѧ́кᲂгѡ ѡ҆бстᲂѧ́нїѧ , и҆ ѡ҆сꙋжде́нїѧ вѣ́чнагѡ , вѣ́рᲂю зᲂвꙋ́щихъ . вᲂсхвалѧ́емыи ѻ҆ц҃е́мъ бж҃е бл҃гᲂслᲂве́нъ є҆сѝ .

пѣ́снь , и҃ . і҆рмо́съ . Впещѝ дѣ́ти і҆и҃левы , ꙗ҆́кᲂже в̾ гᲂрни́лѣ дᲂбро́тᲂю бл҃гᲂче́стїѧ , чистѣ́е зла́та блеща́хꙋсѧ гл҃юще , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а , по́йте и҆҆ превᲂзнᲂси́те є҆гѡ̀ во́ вѣки . Прᲂсте́ртъ и҆мꙋ́ще ᲂу҆́мъ , ко є҆ди́нᲂмꙋ влⷣцѣ . прᲂстро́стесѧ ᲂу҆ѧзвлѧ́еми прехва́льнїи крѣ́пкѡ , и҆ мꙋ́чими вᲂпїю́ще , всѧ̀ дѣ́ла гдⷭ҇нѧ гдⷭ҇а , по́йте и҆҆ превᲂзнᲂси́те є҆гѡ̀ во́ вѣки . Вᲂз̾не́сшесѧ на крⷭ҇тъ , ꙗ҆́кᲂже дре́вле влⷣка . вели́кᲂмꙋ спᲂдо́бистесѧ бл҃го́мꙋ зва́нїю страда́льцы , вᲂпїю́ще и҆ гл҃юще , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а , по́йте и҆҆ превᲂзнᲂси́те є҆гѡ̀ во́ вѣки . Си́лᲂю бжⷭ҇твенᲂю всекра́снїи ᲂу҆крѣ́пльшесѧ страстᲂте́рпцы , без̾зако́нныхъ ѡ҆пᲂлче́нїѧ пᲂбѣди́ша крѣ́пкѡ , пᲂю́ще и҆ глаго́люще , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а , по́йте и҆҆ превᲂзнᲂси́те є҆гѡ̀ во́ вѣки . трⷪ҇ченъ . Ꙗ҆́кѡ є҆ди́ницꙋ є҆стество́мъ , тѧ̀ пᲂю̀ бжⷭ҇тво̀ прест҃о́е , тре́ми сᲂста́вы непресѣка́емѡ раздѣлѧ́ѧ . зᲂвꙋ̀ ра́дꙋѧсѧ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а , по́йте и҆҆ превᲂзнᲂси́те є҆гѡ̀ во́ вѣки . боⷢ҇ . Цр҃кᲂвь ꙗ҆ви́сѧ є҆мманꙋ́ила и҆ две́рь , є҆ю́же є҆ди́нъ вни́де и҆ и҆зы́де , ꙗ҆́кᲂже са́мъ вѣ́сть чи́стаѧ , спаса́ѧ зᲂвꙋ́щихъ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а , по́йте и҆҆ превᲂзнᲂси́те є҆гѡ̀ во́ вѣки .

пѣ́снь , ѳ҃ . і҆рмо́съ . Ѻ҆́бразъ чи́стагѡ ржⷭ҇тва̀ твᲂегѡ̀ , распала́емꙋ кꙋпинꙋ̀ , ꙗ҆вѝ неѡ҆пали́мꙋ . и҆҆ ны́нѣ на на́съ напа́стей свирѣ́пѣющꙋю ᲂу҆гаси́ти мо́лимсѧ пе́щь , да тѧ̀ бцⷣе непреста́ннѡ велича́емъ . Да і҆с҃а прїѡ҆брѧ́щете , ны́нѣшнѧгѡ житїѧ̀ всѧ̀ вмѣни́сте ᲂу҆ме́ты , ꙗ҆́кᲂже па́велъ бжⷭ҇твеныи наꙋчѝ . сегѡ̀ ра́ди до́брѣ страда́вше , на́ нб҃сѣхъ живетѐ , вѣнцено́сцы великᲂи҆мени́тїи . Ꙗ҆ви́сѧ ꙗ҆́кѡ сто́лпъ трᲂеᲂу҆́гленъ , сщ҃е́нныхъ мч҃нкъ бжⷭ҇твенᲂе сᲂбра́нїе . стѣ́нꙋ лꙋка́вꙋю без̾бо́жїѧ низ̾лᲂжи́ша бл҃гᲂда́тїю . и҆ ны́нѣ живꙋ́тъ во́ градѣ бг҃а жива́гѡ , и҆дѣ́же є҆́сть первᲂро́дныхъ жили́ще . Вѣне́цъ нетлѣ́нїѧ ст҃і́и ѿ хрⷭ҇та̀ прїе́мше , багрѧни́цꙋ же ѡ҆мᲂчи́вше , мꙋ́ченическими ва́шими крᲂвьмѝ , пред̾стᲂитѐ цр҃е́ви вѣ́чнᲂмꙋ , сїѧ́юще свѣ́тлыми свѣтᲂли́тїи , и҆ бᲂга́тными дарᲂва́нїи . Оу҆́же бг҃ᲂви прибли́жшесѧ , и҆ со беспло́тными сᲂбо́ры пра́зднꙋюще . и҆́же на землѝ ва́съ прⷭ҇нѡ бл҃жа́щихъ , и҆ па́мѧть ва́шꙋ пра́зднꙋющихъ мꙋ́ченицы , нбⷭ҇ныѧ ᲂу҆лꙋчи́ти свѣ́тлᲂсти и҆спрᲂси́те . боⷢ҇ . Оу҆жаса́ютсѧ а҆́нг҃льстїи чи́ни , и҆́же ѿ твᲂи́хъ лᲂже́снъ вᲂсїѧ́вшагѡ . є҆го́же ѡ҆ на́съ дв҃о мт҃и мᲂлѝ , ꙗ҆́кѡ да страшны́ѧ всѣ́хъ и҆зба́витъ мꙋ́ки , и҆ тмы̀ крᲂмѣ́шнїѧ пᲂю́щихъ тѧ̀ .

<< Previous

Contents

Next >>