МЦⷭ҇А ТОГО́ЖЕ ВЪ Д҃ ДН҃Ь

прпⷣбнагѡ ѻ҆ц҃а на́шегѡ гера́сима и҆́же на і҆ѡрда́нѣ . =Ве́черъ , на гдⷭ҇и вᲂзва́хъ , стихѣ́ры . гла́съ , и҃ . поⷣ . ѽ пресла́внᲂе чꙋ́до . Ѻ҆́ч҃е бг҃ᲂмꙋ́дре гера́симе ,꙳ вᲂз̾держа́нїемъ мно́гимъ ,꙳ мᲂли́твᲂю и҆ мᲂле́нїемъ ꙳ бг҃ꙋ сᲂє҆динѧ́ѧсѧ ,꙳ непᲂбѣжде́нъ пребы́сть кᲂва́рствїи бᲂри́телѧ ,꙳ и҆ ра́бъ ꙗ҆ви́лсѧ є҆сѝ вседержи́телѧ .꙳ ѿ ню́дꙋ же пᲂчита́емъ тѧ̀ ,꙳ и҆ бжⷭ҇твенꙋю па́мѧть твᲂю̀ ꙳ ра́дᲂстнѡ вѣ́рᲂю пра́зднꙋемъ вᲂсхвалѧ́юще тѧ̀ . Прпⷣбне ѻ҆́ч҃е гера́симе ,꙳ в̾ пꙋсты́нѧхъ прⷭ҇нѡ и҆ пеще́рахъ и҆ гᲂра́хъ ,꙳ вѣ́рᲂю пребыва́ѧ ꙳ бг҃а взыска́лъ є҆сѝ .꙳ сегѡ̀ ра́ди ѡ҆брѣ́те , ꙗ҆́кᲂже вᲂз̾желѣ́лъ є҆сѝ .꙳ невᲂз̾вра́тнѡ дш҃е́ю вжилѧ́емь ,꙳ вᲂсхᲂжде́нїи до́брыми всегда̀ .꙳ и҆ и҆́нѡкъ мно́жества приве́лъ є҆сѝ ,꙳ хрⷭ҇то́ви спаса́еми . Ты̀ пᲂвинꙋ́ѧсѧ ма́нїемъ ꙳ всеви́дца бг҃а .꙳ ѿ негѡ̀ бл҃гᲂда́ть прїѧ́лъ є҆сѝ ,꙳ дѣ́йствᲂвати чꙋдеса̀ ,꙳ и҆ прᲂгᲂнѧ́ти дꙋ́хи лꙋка́вствїѧ .꙳ ди́вїѧ же звѣ́ри пᲂвинꙋ́ти ᲂу҆ма̀ чистᲂто́ю .꙳ тѣ́мже пᲂчита́емъ тѧ̀ ,꙳ и҆ бжⷭ҇твенꙋю па́мѧть твᲂю̀ до́лжнѡ ,꙳ вѣ́рᲂю пра́зднꙋемъ бг҃ᲂбл҃же́нне . =сла́ва , и҆ нн҃ѣ , боⷢ҇ . Тѧ̀ мо́лимъ пречⷭ҇таѧ ,꙳ пред̾ста́тельницꙋ на́шꙋ ,꙳ ѡ҆держи́мыѧ в̾ печа́лѣхъ ,꙳ непре́зри до кᲂнца̀ пᲂги́бнꙋти рабо́мъ твᲂи́мъ .꙳ но ᲂу҆скᲂрѝ и҆з̾ѧ́ти на́съ ,꙳ настᲂѧ́щагѡ гнѣ́ва и҆ ско́рби ,꙳ ѽ бг҃ᲂвмѣсти́маѧ прест҃а́ѧ чи́стаѧ ,꙳ ты́ бо є҆сѝ на́мъ стѣна̀ ,꙳ и҆ по́мᲂщь неѡ҆бᲂри́ма .= крⷭ҇тᲂбоⷢ҇ . Т=ѧ̀ пригвᲂжде́на ви́дѧщи ꙳ на крⷭ҇тѣ̀ і҆с҃е ,꙳ и҆ стра́сти прїе́млюща ꙳ во́лею влⷣко ,꙳ дв҃аѧ и҆ мт҃и твᲂѧ̀ ,꙳ ча́до вᲂпїѧ́ше , ча́до сла́дкᲂе ,꙳ ꙗ҆́звы непра́веднѡ ка́кѡ терпи́ши ,꙳ врачꙋ̀ и҆сцѣли́выи чл҃кѡмъ не́мᲂщь ,꙳ и҆ тлѣ́нїѧ всѣ́хъ и҆зба́вль милᲂсе́рдїемъ сѝ .

На ᲂу҆́трени . ѻ҆́ба кано́на , во ѻ҆кта́и . и҆ ст҃о́мꙋ , на д҃ . кано́нъ , є҆мꙋ́же краегране́сїе си́це : гера́сима хвалю̀ , ꙗ҆́кѡ вѣне́цъ плетꙋ̀ . твᲂре́нїе і҆ѡ́сифᲂво . гла́съ , и҃ . пѣ́снь , а҃ . і҆рмо́съ . Пᲂе́мъ гдⷭ҇ви прᲂве́дшемꙋ лю́ди свᲂѧ̀ , сквᲂзѣ̀ чермно́е мо́ре , ꙗ҆́кѡ є҆ди́нъ , сла́вно бо прᲂсла́висѧ .

запѣ́в̾ : Прпⷣбне ѻ҆́ч҃е гера́симе , мᲂлѝ бг҃а ѡ҆ на́съ .= Сла́вꙋ без̾сме́ртїѧ , и҆ нетлѣ́нїѧ бжⷭ҇твеныи вѣне́цъ , до́брѣ пᲂдви́гшꙋсѧ , хрⷭ҇то́съ тебѣ̀ пᲂдадѐ гера́симе . И҆мѣ́ѧ свѣтᲂда́вца , твᲂѧ̀ пᲂслꙋ́шающа мᲂльбы̀ , бѣсо́вскꙋю тмꙋ̀ ѡ҆хꙋди́лъ є҆сѝ , ѻ҆́ч҃е гера́симе . То́ки твᲂи́хъ сле́зъ , ꙗ҆́кᲂже дре́во ѻ҆́ч҃е напаѧ́емо , плᲂды̀ без̾стра́стїѧ прᲂи҆знесѐ , бг҃ᲂмꙋ́дре гера́симе . =боⷢ҇ . Пречⷭ҇таѧ бцⷣе , ᲂу҆ста́ви бᲂлѣ́зни срⷣца мᲂегѡ̀ , ꙗ҆́же хрⷭ҇та̀ без̾ бᲂлѣ́зненѡ , па́че ᲂу҆ма̀ и҆ сло́ва ро́ждьшаѧ .

пѣ́снь , г҃ . і҆рмо́съ . Ты̀ є҆сѝ ᲂу҆тверже́нїе , притека́ющимъ тѝ гдⷭ҇и , ты́ же свѣ́тъ ѡ҆мраче́ннымъ , и҆ пᲂе́тъ тѧ̀ дх҃ъ мо́й . Распѧ́тїе во́льнᲂе претерпѣ́вшемꙋ прпⷣбне пᲂслѣ́дꙋѧ , ве́сь распѧ́лсѧ є҆сѝ житїю̀ и҆ страсте́мъ . Вᲂз̾мо́глъ є҆сѝ ᲂу҆крѣплѧ́емь , вседѣ́йственымъ мꙋ́дре манᲂве́нїемъ , врагꙋ̀ всѧ̀ сѣ́ти пᲂпра̀ , ты̀ гера́симе . Смире́нымъ мꙋдрᲂва́нїемъ , и҆ смире́нᲂмъ мꙋ́дре дх҃ᲂмъ , ты̀ ᲂу҆крѣ́пльсѧ , стра́сти дш҃етлѣ́нныѧ до кᲂнца̀ смири́лъ є҆сѝ . Ꙗ҆́кᲂже вели́кᲂе сл҃нце , чꙋде́съ твᲂи́хъ сїѧ́ньми , прᲂсвѣща́еши всѣ́мъ сердца̀ , и҆́же вѣ́рнѡ вᲂсхвалѧ́ющимъ тѧ̀ . боⷢ҇ . Рᲂдила̀ є҆сѝ всенепᲂро́чнаѧ , и҆́же ѻ҆ц҃ꙋ сн҃а сᲂпресто́льна , и҆ сра́слена , всѣ́мъ вхо́ды жи́зненыѧ пᲂказа́вшагѡ .

сѣда́ленъ . гла́съ , д҃ . Бѣсо́мъ прпⷣбне ѕлᲂдѣ́йствїѧ , крⷭ҇тнᲂю бл҃гᲂда́тїю и҆ дѣ́йствᲂмъ преше́дъ , пра́вдᲂю бл҃гъ бы́лъ є҆сѝ . тѣ́мже тѧ̀ вѣ́рнѡ пᲂчита́емъ гера́симе .= сла́ва , и҆ ны́нѣ , боⷢ҇ . Пречⷭ҇тѣи рꙋ́цѣ свᲂѝ дв҃о мт҃и прᲂсте́рши , пᲂкры́й надѣ́ющихсѧ натѧ̀ , и҆ сн҃ꙋ тѝ зᲂвꙋ́щихъ , всѣ́мъ пᲂда́ждь хрⷭ҇тѐ млⷭ҇ти твᲂѧ̀ . крⷭ҇тᲂбоⷢ҇ . Н=а́ древѣ ви́дѧщи ѡ҆бѣ́шена сн҃а свᲂегѡ̀ пречⷭ҇таѧ , ᲂу҆тро́бᲂю мт҃рьнею рыда́ннѡ растерза́ема взыва́ше . ᲂу҆вы̀ мнѣ̀ , ка́кѡ за́йде свѣ́те мо́й без̾лѣ́тныи .

пѣ́снь , д҃ . і҆рмо́съ . Оу҆слы́шахъ гдⷭ҇и смᲂтре́нїѧ твᲂегѡ̀ та́инство , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ . Хра́мъ бы́сть дх҃а , прᲂсвѣще́нᲂе ѻ҆́ч҃е тѣ́ло твᲂѐ . тѣ́мъ то́читъ дарᲂва́нїѧ и҆сцѣлѧ́ѧ недꙋ́ги бжⷭ҇твенᲂю бл҃гᲂда́тїю . Зако́нꙋ бжⷭ҇твенᲂмꙋ пᲂвинꙋ́ѧсѧ ѻ҆́ч҃е , ѿ ю҆́нᲂсти пᲂслѣ́дᲂвалъ є҆сѝ гдⷭ҇ви . ѡ҆блᲂбыза́ѧ беспло́тныхъ житїѐ с̾ тѣ́лᲂмъ . Ше́ствїѧ твᲂѧ̀ прпⷣбне , къ спасе́нѣй стезѝ и҆спра́вишасѧ , наставле́нїемъ бжⷭ҇твенагѡ дх҃а , и҆́же в̾ тѧ̀ прпⷣбне все́льшагᲂсѧ . боⷢ҇ . І҆с҃а чл҃кᲂлю́бца , є҆го́же несказа́ннѡ во́ чревѣ нᲂси́ла є҆сѝ , ᲂу҆мᲂлѝ всенепᲂро́чнаѧ , спастѝ всѧ̀ пᲂю́щїѧ тѧ̀ .

пѣ́снь , є҃ . і҆рмо́съ . Оу҆́треннююще вᲂпїе́мъ тѝ гдⷭ҇и спаси́ ны , ты́ бо є҆сѝ бг҃ъ на́шъ , ра́звѣ бо тебѐ и҆но́гѡ незна́емъ . Оу҆мо́мъ ѡ҆чище́нымъ , прїе́мъ лꙋчѝ ст҃а́гѡ дх҃а . свѣ́тъ и҆́нᲂкꙋющимъ бы́лъ є҆сѝ . Житїѐ твᲂѐ нꙋ́ждею є҆стества̀ сїѧ́ѧ , а҆́нг҃ла земле́на с̾ тѣ́лᲂмъ тѧ̀ пᲂказа̀ . Во́дъ живо́тныхъ дх҃а и҆спо́лненъ , рѣ́ки и҆стᲂчи́лъ є҆сѝ чꙋдесе́мъ , ѻ҆́ч҃е гера́симе . боⷢ҇ . Ꙗ҆́кᲂже до́ждь на тѧ̀ сни́де бцⷣе , сло́во вᲂплᲂще́ннѡ , в̾ прᲂсвѣще́нїе дш҃а́мъ на́шимъ .

пѣ́снь , ѕ҃ . і҆рмо́съ . Ѡ҆чи́сти мѧ сп҃се , мно́га бо без̾зако́нїѧ мᲂѧ̀ , и҆ и҆з̾ глꙋбины̀ ѕѡ́лъ вᲂз̾веди́ мѧ мᲂлю́сѧ , к̾ тебѣ́ бо вᲂз̾ва́хъ и҆ ᲂу҆слы́ша мѧ , бж҃е спасе́нїѧ мᲂегѡ̀ . Пло́ти твᲂеѧ̀ немᲂщно́е , си́лᲂю ᲂу҆крѣплѧ́ѧ , и҆́же ѿ дв҃ы на́мъ чи́стыѧ вᲂсїѧ́вшагѡ . всю̀ смирѝ си́лꙋ ѻ҆́ч҃е , ѕлᲂчести́выхъ беспло́тныхъ прпⷣбне . Сᲂкрꙋшѝ мы́сленымъ льво́мъ че́люсти бл҃гᲂда́тїю . пᲂкᲂри́въ чꙋ́вственымъ стремле́нїѧ прпⷣбне . тѣ́мъ пᲂвинꙋ́сѧ тебѣ̀ ле́въ , ꙗ҆́кѡ па́стырю пᲂкᲂре́ннѡ слꙋжа̀ . Житїѐ а҆́нг҃льско , мꙋдрᲂва́нїе ѻ҆́ч҃е смире́нѡ стѧжа́въ ѡ҆ хрⷭ҇тѣ̀ , кро́тᲂкъ бы́лъ є҆сѝ . и҆ ны́нѣ всели́лсѧ є҆сѝ в̾ землѝ кро́ткихъ , ра́дᲂсти бжⷭ҇твеныѧ и҆спᲂлнѧ́емь . боⷢ҇ . Всели́сѧ в̾ тѧ̀ ѻ҆́ч҃ее чⷭ҇таѧ сїѧ́нїе , и҆ ро́ждьсѧ пло́тїю , ми́ръ прᲂсвѣтѝ , и҆ тмы̀ и҆зба́вилъ є҆́сть мнᲂгᲂбо́жїѧ . сегѡ̀ ра́ди вᲂспѣва́емъ тѧ̀ .

пѣ́снь , з҃ . і҆рмо́съ . Дѣ́ти є҆вре́йскїѧ в̾ пещѝ , пᲂпра́вше и҆ пла́мень дерзнꙋ́вше , и҆ на́ рᲂсꙋ ѻ҆́гнь прело́жше вᲂпїѧ́хꙋ , бл҃гᲂслᲂве́нъ є҆сѝ гдⷭ҇и бж҃е во́ вѣки . Свѣ́тъ вᲂсїѧ́въ тебѣ̀ ѻ҆́ч҃е , и҆ сꙋпрꙋ́гъ сегѡ̀ весе́лїе , в̾ нбⷭ҇ныхъ кро́вѣхъ прⷭ҇нѡ вᲂдвᲂрѧ́емꙋ , и҆ пᲂю́щꙋ , гдⷭ҇и бж҃е ѻ҆ц҃ъ на́шихъ блгⷭ҇ве́нъ є҆сѝ . Тꙋ́чами сле́зъ напᲂи́въ свᲂѐ бг҃ᲂмꙋ́дре срⷣце , дᲂбрᲂдѣ́тельныѧ прᲂзѧба́еши плᲂды̀ . и҆́миже наслажде́нїѧ вы́шнѧѧ во́ вѣки прїѧ́лъ є҆сѝ , со всѣ́ми прпⷣбными . Во ᲂу҆стѣ́хъ нᲂсѧ̀ пѣ́нїе , в̾ пᲂдо́бїи непреста́ннѡ а҆́нг҃льстѣ , бдѣ́ннымъ ᲂу҆мо́мъ гера́симе вᲂпїѧ́ше , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . боⷢ҇ . Ѻ҆́гнь ника́кᲂже тѧ̀ бцⷣе бжⷭ҇тва̀ неѡ҆палѝ дв҃о , тѧ́ бо кꙋпина̀ и҆нᲂгда̀ ѡ҆бразᲂва́ше в̾ гᲂрѣ̀ , ѡ҆палѧ́ема пречⷭ҇таѧ и҆ ника́кᲂже сгара́ема .

пѣ́снь , и҃ . і҆рмо́съ . Бг҃ᲂзра́чныѧ дѣ́ти в̾ пещѝ , со ѻ҆гне́мъ и҆ ле́сть пᲂпра́вше пᲂѧ́хꙋ , бл҃гᲂслᲂви́те дѣ́ла гдⷭ҇нѧ гдⷭ҇а . Прᲂсвѣще́нъ пред̾ста́лъ є҆сѝ влⷣцѣ , по́стническими сїѧ́ньми , чꙋдᲂно́сне гера́симе , и҆ беспло́тнымъ лико́мъ сᲂчта́сѧ . Въ без̾зло́бїи житїѐ прᲂво́ждь , лꙋка́вагѡ сѣда́лище ѿ ню́дъ ѡ҆хꙋди́лъ є҆сѝ . по́стникѡмъ ᲂу҆краше́нїе , бг҃ᲂмꙋ́дре гера́симе . Во ѻ҆де́ждꙋ нетлѣ́нїѧ ѡ҆блече́сѧ , страстны́ѧ же сᲂвлече́сѧ , ѻ҆́ч҃е бг҃ᲂмꙋ́дре гера́симе . и҆ черто́га бжⷭ҇твенагѡ дᲂсто́йнѡ ᲂу҆лꙋчи́лъ є҆сѝ . боⷢ҇ . Ꙗ҆́кѡ бл҃гᲂꙋха́нныи шипо́къ ѡ҆брѣ́тъ тѧ̀ , во ᲂу҆до́лѣхъ житїѧ̀ , пресꙋ́щественыи всечⷭ҇таѧ . тᲂбо́ю бл҃гᲂꙋха́нїе ми́рᲂви в̾дᲂхнꙋ̀ .

пѣ́снь , ѳ҃ . і҆рмо́съ . Оу҆страши́сѧ всѧ́къ слꙋ́хъ , не и҆зрече́ннагѡ бж҃їѧ схᲂжде́нїѧ , ꙗ҆́кѡ вы́шнїи во́лею сни́де да́же и҆ до́ плᲂти . ѿ дв҃ческагѡ бо чре́ва бы́въ ᲂу҆́бѡ чл҃къ . тѣ́мже тѧ̀ пречⷭ҇тꙋю бцⷣꙋ , вѣ́рнїи велича́емъ . Стᲂпа́мъ всѣ́хъ , и҆́же до́брѣ на землѝ хо́ждьшихъ пᲂслѣ́дꙋѧ . любо́вь и҆мѣ́лъ є҆сѝ , вѣ́рꙋ и҆ наде́ждꙋ , смире́нꙋ мꙋ́дрᲂсть , и҆ неѡ҆скꙋ́днꙋ мᲂли́твꙋ , вᲂз̾держа́нїе неи҆з̾рече́ннѡ ѻ҆́ч҃е гера́симе . наслажда́ѧсѧ чи́стыми вᲂсхᲂжде́нїи . Ѽ чꙋ́до ка́кѡ ꙗ҆́кᲂже слᲂве́сенъ , пᲂвинᲂва́шесѧ тебѣ̀ ѕвѣ́рь , пᲂвелѣ́нїю твᲂемꙋ̀ гера́симе , со ᲂу҆се́рдїемъ слꙋжа̀ . бг҃ꙋ прᲂславлѧ́ющꙋ твᲂѐ житїѐ равнᲂа́нг҃льскᲂе , зна́менїи прпⷣбне , и҆ неи҆з̾рече́нными чꙋдесы̀ и҆ ᲂу҆дивле́нїи . Оу҆тверже́нїе ꙗ҆ви́сѧ и҆́нᲂкѡмъ , и҆ мᲂлча́щимъ бг҃ᲂно́се наказа́нїе . тѣ́снꙋю бо вᲂз̾держа́нїѧ стезю̀ ше́ствᲂвалъ є҆сѝ , бжⷭ҇твеными наде́ждами дш҃ꙋ при́снѡ раз̾ширѧ́ѧ . тѣ́мже прᲂстра́ннѡ в̾ се́лѣхъ и҆з̾бра́нныхъ ѡ҆брѣ́лъ є҆сѝ жили́ще . Прᲂцвѣ́лъ є҆сѝ ѻ҆́ч҃е во дво́рѣхъ бг҃а на́шегѡ , ꙗ҆́кᲂже фи́никъ высᲂкᲂра́сленыи . и҆ ꙗ҆́кѡ кѷпари́съ вᲂз̾вели́чилсѧ є҆сѝ , бжⷭ҇твеными вᲂз̾нᲂше́нїи . ѿ ню́дꙋ же па́мѧть твᲂю̀ вѣ́рнѡ всѝ пра́зднꙋемъ . в̾ ню́же мо́лимсѧ , и҆скꙋше́нїи на́съ всѧ́кихъ спасѝ . боⷢ҇ . Нᲂсѧ́щи є҆м̾манꙋ́ила на рꙋкꙋ̀ свᲂе́ю чи́стаѧ , ꙗ҆́кᲂже младе́нца бг҃ᲂра́дᲂваннаѧ . вᲂпїѧ́ше , ча́до мᲂѐ сла́дкᲂе , ка́кѡ пᲂда́мъ тебѣ̀ сᲂсе́цъ , пита́ющемꙋ всѧ́ческаѧ ; ка́кѡ пᲂвїю́ тѧ пелена́ми , и҆́же мгло́ю ѡ҆бвива́ющагѡ мо́ре ;