МЦⷭ҇А ТОГО́ЖЕ ВЪ Л҃ ДН҃Ь

прпⷣбнагѡ ѻ҆ц҃а на́шегѡ і҆ѡа́нна , списа́телѧ лѣ́ствицы . =Ве́черъ , на гдⷭ҇и вᲂзва́хъ , стихѣ́ры . гла́съ , и҃ . поⷣ . ѽ пресла́внᲂе чꙋ́до . Ѻ҆́ч҃е і҆ѡа́нне прпⷣбне ,꙳ всегда̀ вᲂи́стинꙋ ,꙳ бж҃їѧ в̾ гᲂрта́ни высᲂты̀ нᲂша́ше .꙳ пᲂꙋча́ѧсѧ дѣѧ́нїемъ ,꙳ бг҃ᲂдх҃нᲂве́ннымъ слᲂвесе́мъ премꙋ́дре .꙳ и҆ ѿ тꙋ́дꙋ и҆стека́ющїѧ бл҃гᲂда́ти ,꙳ ѡ҆бᲂгати́лсѧ є҆сѝ .꙳ блаже́нъ бы́въ ,꙳ нечести́выхъ всѧ̀ сᲂвѣ́ты низ̾ве́рглъ є҆сѝ . Ѻ҆́ч҃е і҆ѡа́нне сла́вне ,꙳ сле́зными и҆сто́чники ꙳ дш҃ꙋ ѡ҆чища́ѧ .꙳ и҆ всено́щнымъ стᲂѧ́нїемъ бг҃а мᲂлѧ̀ ,꙳ в̾пери́лсѧ є҆сѝ к̾ любвѝ сегѡ̀ бл҃же́нне и҆ красᲂтѣ̀ .꙳ є҆ѧ́же дᲂсто́йнѡ ны́нѣ ꙳ прїе́млеши непреста́ннѡ ꙳ ра́дᲂстнѡ с̾пᲂстрада́вшими с̾тᲂбо́ю ,꙳ бг҃ᲂмꙋ́дре и҆ прпⷣбне . Ѻ҆́ч҃е і҆ѡа́нне прпⷣбне ,꙳ в̾пери́въ ᲂу҆́мъ къ бг҃ꙋ вѣ́рᲂю ,꙳ мирска́гѡ смѣше́нїѧ , вᲂз̾гнꙋша́сѧ неᲂу҆ста́внагѡ .꙳ и҆ крⷭ҇тъ сво́й вᲂспрїе́мъ ,꙳ всеви́дцꙋ пᲂслѣ́дᲂвалъ є҆сѝ .꙳ тѣ́ло непᲂкᲂри́вᲂе ,꙳ по́двиги вᲂз̾держа́нїѧ ,꙳ по́мысла си́лᲂю пᲂрабо́тивъ ꙳ бжⷭ҇твенᲂмꙋ дх҃ꙋ . сла́ва , и҆ ны́нѣ , боⷢ҇ . Дв҃ства сᲂсꙋ́дъ ,꙳ чи́стᲂе бг҃ꙋ и҆ кра́снᲂе жили́ще ,꙳ мᲂлю́ тѧ пречⷭ҇таѧ ,꙳ дш҃ꙋ мᲂю̀ и҆сцѣлѝ ,꙳ ѡ҆ѕло́бленꙋю ꙗ҆́дᲂмъ ѕмїины́мъ ,꙳ и҆ ᲂу҆мерщвле́нꙋ престꙋпле́нїи .꙳ ꙗ҆́кѡ да сла́влю тѧ и҆ велича́ю ,꙳ вѣ́рныѧ всѧ̀ вᲂз̾вели́чившꙋю ,꙳ бг҃ᲂра́дᲂваннаѧ . =крⷭ҇тᲂбоⷢ҇ . Что̀ зри́мᲂе видѣ́нїе ,꙳ є҆́же ѻ҆чи́ма мᲂи́ма ,꙳ ви́дитсѧ ѽ влⷣко ;꙳ сᲂдержа́и всю̀ тва́рь ,꙳ на́ древо вᲂз̾дви́жесѧ ,꙳ и҆ ᲂу҆мертви́сѧ всѣ́мъ даѧ́и живо́тъ ,꙳ бцⷣа пла́чꙋщи гл҃аше .꙳ є҆гда̀ ᲂу҆зрѣ̀ на крⷭ҇тѣ̀ пᲂвѣ́шена ,꙳ и҆́же и҆з̾ неѧ̀ неи҆зрече́ннѡ вᲂсїѧ́вшагѡ , бг҃а и҆ челᲂвѣ́ка .

а҆́ще слꙋчи́тсѧ , сꙋбо́та , и҆лѝ нлⷣѧ . пᲂе́мъ : сла́ва . гла́съ , ѕ҃ . Прпⷣбне ѻ҆́ч҃е , во всю̀ зе́млю и҆зы́де вѣща́нїе и҆справле́нїи твᲂи́хъ . тѣ́мже на́ нб҃сѣхъ ѡ҆брѣ́те мздꙋ̀ трꙋдо́въ свᲂи́хъ . бѣсо́въ пᲂгꙋби́лъ є҆сѝ пᲂлкѝ . и҆ а҆́нг҃льскїѧ дᲂсти́глъ є҆сѝ чи́ны , и҆́хже житїю̀ непᲂро́чнѡ пᲂревнᲂва́лъ є҆сѝ . дерзнᲂве́нїе и҆мѣ́ѧ ко́ гдⷭ҇ꙋ , ми́ръ ми́рᲂви и҆спрᲂсѝ , и҆ дш҃а́мъ на́шимъ ве́лїю ми́лᲂсть . и҆ ны́нѣ , боⷢ҇ . по ᲂу҆ста́вꙋ .

На стихо́внѣ , во ѻ҆кта́и . сла́ва . гла́съ , и҃ . И҆́нᲂкъ мно́жества , наста́вника тѧ̀ чте́мъ ѻ҆́ч҃е на́шъ і҆ѡа́нне . тᲂбо́ю бо стезе́ю вᲂи́стинꙋ пра́вᲂю хᲂди́ти пᲂзна́хᲂмъ . бл҃же́нъ є҆сѝ хрⷭ҇то́ви рабо́тавъ , и҆ вра́жїю низ̾лᲂжи́лъ є҆сѝ си́лꙋ . а҆́нг҃лѡмъ сᲂбесѣ́дниче , прпⷣбнымъ и҆ пра́веднымъ є҆динᲂжи́телю . с̾ ни́ми же мᲂли́сѧ гдⷭ҇ви , пᲂми́лᲂватисѧ дш҃а́мъ на́шимъ . и҆ ны́нѣ , боⷢ҇ . и҆лѝ , крⷭ҇тᲂбоⷢ҇ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , и҃ . Сле́зъ твᲂи́хъ и҆сто́чники , пꙋсты́ни без̾ча́днᲂе напᲂи́лъ є҆сѝ . и҆ є҆́же и҆з̾ глꙋбины̀ вᲂз̾дыха́нїи , во́сто трꙋды̀ раз̾плᲂди́лъ є҆сѝ . и҆ бы́сть свѣти́льникъ вселе́ннѣй сїѧ́ѧ чꙋдесы̀ , і҆ѡа́нне ѻ҆́ч҃е на́шъ . мᲂлѝ хрⷭ҇та̀ бг҃а спасти́сѧ дш҃а́мъ на́шимъ . сла́ва , и҆ ны́нѣ , боⷢ҇ . и҆лѝ , крⷭ҇тᲂбоⷢ҇ .

На ᲂу҆́трени . ѻ҆́ба кано́на , во ѻ҆кта́и . и҆ ст҃о́мꙋ , на д҃ . кано́нъ , твᲂре́нїе и҆гна́тїево . гла́съ , и҃ . пѣ́снь , а҃ . і҆рмо́съ . Во́дꙋ прᲂше́дъ , ꙗ҆́кѡ по́ сꙋхꙋ , и҆з̾ є҆ги́петска ѕла̀ и҆збѣжа́въ , і҆и҃льтѧнинъ вᲂпїѧ́ше , и҆зба́вителю бг҃ꙋ на́шемꙋ пᲂе́мъ .

запѣ́в̾ : Прпⷣбне ѻ҆́ч҃е і҆ѡа́нне , мᲂлѝ бг҃а ѡ҆ на́съ . Во свѣ́тѣ невеще́ственѣ и҆ мы́сленѣ , ѿ печа́лей веще́ственыхъ вᲂсте́къ , і҆ѡа́нне прпⷣбне , мᲂли́твами сѝ ко́ гдⷭ҇ꙋ мѧ̀ прᲂсвѣтѝ . Ꙗ҆́кѡ вᲂз̾держа́нїѧ сла́дᲂсть с̾са́въ , ѿри́нꙋ го́ресть страсте́й . тѣ́мже па́че ме́да и҆ со́та , наслади́лъ є҆сѝ ѻ҆́ч҃е чꙋ́вства на́ша . Вᲂз̾ше́дъ на высᲂтꙋ̀ дᲂбрᲂдѣ́телей , и҆ до́лꙋ влекꙋ́щїѧ ѡ҆плева́лъ є҆сѝ сла́сти . сла́дᲂсть пᲂказа́сѧ спасе́нїѧ , ѻ҆́ч҃е прпⷣбне ста́дꙋ твᲂемꙋ̀ .= боⷢ҇ . П=ремꙋ́дрᲂсть и҆ сло́во ѻ҆́ч҃ее , несказа́ннѡ ро́ждьшаѧ , дꙋшѝ мᲂеѧ̀ лю́тꙋю и҆сцѣлѝ ꙗ҆́звꙋ , и҆ серде́чнꙋю бᲂлѣ́знь ᲂу҆крᲂтѝ .

пѣ́снь , г҃ . і҆рмо́съ . Ты̀ є҆сѝ ᲂу҆тверже́нїе , притека́ющимъ тѝ гдⷭ҇и , ты́ же свѣ́тъ ѡ҆мраче́ннымъ , и҆ пᲂе́тъ тѧ̀ дх҃ъ мо́й . Пᲂпали́лъ є҆сѝ ᲂу҆́глїемъ вᲂз̾держа́нїѧ прпⷣбне , страстно́е те́рнїе . и҆ прᲂхлажда́еши и҆́нᲂкѡмъ сᲂвᲂкꙋпле́нїѧ . Мѵ́рѡ сщ҃е́нїѧ , ѿ вᲂз̾держа́нныхъ сла́вне а҆рама́тъ ве́сь пᲂлᲂжи́лсѧ є҆сѝ , в̾ вᲂню̀ бл҃гᲂꙋха́нїѧ бг҃ꙋ . Въ зако́нѣхъ по́стныхъ пᲂꙋча́ѧсѧ , стра́сти пᲂтᲂпи́лъ є҆сѝ , ꙗ҆́кᲂже дрꙋгі́ѧ ны́нѣ фараѡни́ты , пᲂто́ки сле́зъ твᲂи́хъ .= боⷢ҇ . О=у҆ста́ви неꙋста́внᲂе пᲂмышле́нїи чи́стаѧ смꙋще́нїе , мт҃и бж҃їѧ , и҆́же сн҃ꙋ тѝ направлѧ́ющи движе́нїе .

сѣда́ленъ . гла́съ , и҃ . Видѣ́нїемъ и҆ дѣѧ́нїемъ па́че є҆стества̀ вᲂсїѧ́въ , ѡ҆блиста́еши ᲂу҆че́нїи , зако́ны на́мъ пᲂлᲂжи́лъ є҆сѝ бг҃ᲂмꙋ́дрыѧ бл҃же́нне . дᲂбрᲂдѣ́телей дᲂбро́ты степе́ни пᲂста́вль , и҆ ѕло́бѣ льстѝ пᲂказа́въ и҆ лᲂвле́нїѧ . ѿ ню́дꙋ же вᲂз̾во́диши , твᲂи́мъ пᲂслѣ́дꙋющїѧ бжⷭ҇твенымъ ᲂу҆че́нїемъ , ѿ страсте́й к̾ без̾стра́стїю . і҆ѡа́нне равнᲂа́нг҃льне . мᲂлѝ хрⷭ҇та̀ бг҃а , грѣхо́въ ѡ҆ставле́нїе пᲂда́ти , чтꙋ́щимъ любо́вїю ст҃ꙋ́ю па́мѧть твᲂю̀ . сла́ва , и҆ ны́нѣ , боⷢ҇ . Ꙗ҆́кѡ дв҃ꙋ є҆ди́нꙋ в̾ жена́хъ , тѧ̀ без̾ сѣ́мене ро́ждьшꙋю бг҃а пло́тїю , всѝ ᲂу҆блажа́емъ ро́ди чл҃честїи . ѻ҆́гнь бо всели́сѧ в̾ тѧ̀ бжⷭ҇твеныи . и҆ ꙗ҆́кѡ младе́нца дᲂи́ши зижди́телѧ и҆ гдⷭ҇а . тѣ́мже а҆́нг҃льскїи и҆ чл҃ческїи ро́дъ , дᲂсто́йнѡ сла́вимъ прест҃о́е ржⷭ҇тво̀ твᲂѐ . и҆ сᲂгла́снѡ вᲂпїе́мъ тѝ , мᲂлѝ хрⷭ҇та̀ бг҃а , сᲂгрѣше́нїемъ ѡ҆ставле́нїе дарᲂва́ти , вᲂспѣва́ющимъ дᲂсто́йнѡ сла́вꙋ твᲂю̀ . крⷭ҇тᲂбоⷢ҇ . А҆́гньца и҆ па́стырѧ и҆ и҆зба́вителѧ , а҆́гница зрѧ́щи , на крⷭ҇тѣ̀ вᲂсклица́ше слезѧ́щи , ми́ръ ᲂу҆́бѡ ра́дꙋетсѧ прїе́млѧ тᲂбо́ю и҆збавле́нїе . ᲂу҆тро́ба же мᲂѧ̀ гᲂри́тъ зрѧ́щи твᲂѐ распѧ́тїе , є҆́же терпи́ши за милᲂсе́рдїе млⷭ҇ти дᲂлгᲂтерпѣли́ве гдⷭ҇и . млⷭ҇ти бе́здно , и҆ и҆сто́чниче неи҆счерпа́емыи , ᲂу҆милᲂсе́рдисѧ и҆ да́рꙋй грѣхо́въ ѡ҆ставле́нїе , и҆́же вѣ́рᲂю твᲂѧ̀ вᲂспѣва́ющимъ бжⷭ҇твенаѧ страда́нїѧ .

пѣ́снь , д҃ . і҆рмо́съ . Оу҆слы́шахъ гдⷭ҇и смᲂтре́нїѧ твᲂегѡ̀ та́инство , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ . Ꙗ҆́кѡ в̾ пᲂро́дѣ бл҃гᲂво́ннѣй дᲂбрᲂдѣ́телей , в̾ раѝ ѡ҆дш҃евле́нѣ , вᲂз̾держа́нїемъ прᲂцвѣ́лъ є҆сѝ . и҆́мже всѧ̀ пита́еши чтꙋ́щїѧ тѧ̀ . Закᲂнᲂпᲂло́жника вᲂз̾держа́нїю , и҆́нᲂкѡмъ пра́вило кро́тᲂсти , ꙗ҆́кѡ мѡѷсе́ѧ тѧ̀ и҆ дв҃да , вᲂи́стинꙋ стѧжа́вше , ѻ҆́ч҃е ᲂу҆блажа́емъ . Насажде́нъ бы́въ при вᲂда́хъ вᲂз̾держа́нїѧ , ѻ҆́ч҃е бл҃же́нне , лᲂза̀ ꙗ҆ви́сѧ бл҃гᲂра́слена , бл҃гᲂче́стїѧ гро́зды и҆знᲂсѧ̀ .= боⷢ҇ . П=ᲂд̾ лѣ́тᲂмъ бы́вша , и҆́же ѿ ѻ҆ц҃а без̾лѣ́тнѡ вᲂсїѧ́вшаго , бг҃ᲂмт҃и на́мъ рᲂдила̀ є҆сѝ . є҆го́же мᲂлѝ , спастѝ пᲂю́щїѧ тѧ̀ .

пѣ́снь , є҃ . і҆рмо́съ . Вскꙋ́ю мѧ ѿри́нꙋ , ѿ лица̀ твᲂегѡ̀ свѣ́те незахᲂдѧ́и , пᲂкры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ запᲂвѣде́й ти пꙋтѝ мᲂѧ̀ напра́ви мᲂлю́тисѧ . Пᲂгаси́въ стра́сти рᲂсо́ю по́двигъ твᲂи́хъ , ѻ҆́ч҃е бл҃же́нне , бᲂга́тнѡ вже́глъ є҆сѝ , ѻ҆гне́мъ любвѐ и҆ вѣ́ры , вᲂз̾держа́нїѧ свѣти́льникъ . и҆ прᲂсвѣще́нїе без̾стра́стїѧ , и҆ днѝ сн҃ъ ꙗ҆ви́лсѧ є҆сѝ . Вѣ́ры гро́здъ бжⷭ҇твенымъ дѣ́ланїемъ , ѻ҆́ч҃е вᲂспитѣ́лъ є҆сѝ . и҆ в̾ тᲂчи́лѣхъ пᲂста́ви , и҆ и҆згнетѐ бᲂлѣ́зньми пᲂще́нїѧ . и҆ ча́шꙋ напо́лнилъ є҆сѝ дх҃о́внꙋ вᲂз̾держа́нїѧ , веселꙋ́еши срⷣца̀ ста́дꙋ твᲂемꙋ̀ . Претерпѣ́въ до́блественѣ , прило́ги и҆ бїе́нїѧ неви́димыхъ вра́гъ , пᲂказа́сѧ сто́лпъ терпѣ́нїѧ . ᲂу҆твержа́ѧ ста́до твᲂѐ па́лицею бжⷭ҇твенᲂю , припа́житѣхъ вᲂз̾держа́нїѧ , и҆ на вᲂдѣ̀ вᲂспитѣ̀ є҆̀ бл҃же́нне .= боⷢ҇ . Є҆=ди́на ро́ждьши дв҃ᲂю . є҆ди́на мꙋженеи҆скꙋ́сна ꙗ҆ви́сѧ всенепᲂро́чнаѧ . во ᲂу҆тро́бѣ бо сло́во ѻ҆́ч҃ее прїе́мши без̾нача́льнᲂе , млеко́мъ дᲂи́ши дв҃це . чꙋ́до стра́шнѡ , и҆ дв҃ствꙋещи , зако́ны ѡ҆бнᲂвлѧ́еши є҆стества̀ .

пѣ́снь , ѕ҃ . і҆рмо́съ . Ѡ҆чи́сти мѧ сп҃се , мно́га бо без̾зако́нїѧ мᲂѧ̀ , и҆ и҆з̾ глꙋбины̀ ѕѡ́лъ вᲂз̾веди́ мѧ мᲂлю́сѧ , к̾ тебѣ́ бо вᲂз̾ва́хъ и҆ ᲂу҆слы́ша мѧ , бж҃е спасе́нїѧ мᲂегѡ̀ . Со́бралъ є҆сѝ в̾ дꙋшѝ , бжⷭ҇твенѡ бᲂга́тство дх҃а . непᲂро́чнꙋ мл҃твꙋ . чистᲂтꙋ̀ краснꙋ̀ . бдѣ́нїе тве́рдо , вᲂз̾держа́нїѧ бᲂлѣ́зни . и҆́миже хра́мъ пᲂказа́сѧ бг҃ꙋ . Землены́ѧ ве́щи мꙋ́дре , ми́мѡ те́клъ є҆сѝ хꙋ́дᲂсть . невеще́ственᲂю же мл҃твᲂю на нб҃са̀ вᲂз̾летѣ̀ . и҆ вы́шнѧгѡ прїѧ́тїѧ наслѣ́дникъ ꙗ҆ви́сѧ , житїѧ̀ сᲂверше́нїемъ . Пᲂты̀ по́стническими , ᲂу҆́гли стрѣ́лъ вра́жїихъ пᲂгаси́лъ є҆сѝ вᲂи́стинꙋ . и҆ ѻ҆́гнь вѣ́ры в̾же́гъ , пᲂпали́лъ є҆сѝ невѣ́рїѧ є҆ресе́мъ шата́нїѧ .= боⷢ҇ . П=рїѧ́ла є҆сѝ вᲂи́стинꙋ бжⷭ҇твенᲂе сло́во в̾ лᲂжесна̀ свᲂѧ̀ , и҆ сегѡ̀ па́че є҆стества̀ пречи́стаѧ рᲂдила̀ є҆сѝ . є҆го́же мᲂльба́ми ᲂу҆мᲂлѝ ѿ бѣ́дъ всѧ̀ и҆зба́вити рабы̀ твᲂѧ̀ .

кᲂнда́къ . гла́съ , д҃ . На высᲂтѣ̀ гдⷭ҇ь вᲂз̾держа́нїѧ , вᲂи́стинꙋ тѧ̀ пᲂста́ви , ꙗ҆́кᲂже ѕвѣздꙋ̀ неле́стнꙋю , прᲂсвѣща́юща кᲂнцы̀ , наста́вниче і҆ѡа́нне ѻ҆́ч҃е на́шъ . и҆́кᲂсъ . Хра́мъ бг҃ꙋ ꙗ҆́кѡ вᲂи́стинꙋ себѐ сᲂдѣ́ла ѻ҆́ч҃е , бжⷭ҇твеными дᲂбрᲂдѣ́тельми твᲂи́ми мꙋ́дре ᲂу҆краси́лъ є҆сѝ , ꙗ҆́кᲂже зла́то и҆з̾дале́ча . вѣ́рꙋ и҆ наде́ждꙋ и҆ любо́вь и҆́стиннꙋю , бжⷭ҇твенїи ѻ҆бѣ́ты пᲂлага́ѧ . вᲂз̾держа́нїемъ пᲂсти́всѧ ꙗ҆́кѡ беспло́тенъ . мꙋ́дрᲂсть мꙋ́жество цѣлᲂмꙋ́дрїе стѧжа́въ , смире́нїемъ же вᲂз̾несе́сѧ . тѣ́мже и҆ прᲂсвѣ́щьсѧ мᲂли́твами непреста́нными . видѣ́нїи та́йными ѡ҆крила́тѣвъ , и҆ нбⷭ҇наѧ дᲂсти́же жили́ща , наста́вниче і҆ѡа́нне ѻ҆́ч҃е на́шъ .

пѣ́снь , з҃ . і҆рмо́съ . И҆́же ѿ і҆ꙋде́и , дᲂше́дше ѻ҆́трᲂцы в̾ вавѷлѡ́нъ дре́вле , вѣ́рᲂю ᲂу҆тверже́нїи , пла́мень пе́щныи пᲂпра́вше гл҃юще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Въ зла́цѣ вы́шнѧгѡ црⷭ҇тва , ста́до ѻ҆́ч҃е вᲂспитѣ́лъ є҆сѝ . и҆ жезло́мъ ᲂу҆че́нїи , ѕвѣ́ри ѿгна́въ є҆ресе́мъ . пᲂѧ́ше , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Въ вы́шнюю вни́де черто́жнꙋю трапе́зꙋ цр҃ѧ хрⷭ҇та̀ , во ѻ҆де́ждꙋ ѡ҆блече́нъ дᲂсто́йнꙋ зва́нїѧ . на ню́же и҆ зва́нъ бы́сть . вᲂпїѧ̀ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Не ѡ҆мᲂчи́всѧ грѣхѝ , рѣка̀ вᲂз̾держа́нїѧ ѻ҆́ч҃е пᲂказа́сѧ на́мъ . пᲂмышле́нїѧ пᲂтᲂплѧ́ѧ и҆ скве́рны ѡ҆чища́ѧ , вᲂпїю́щимъ с̾ вѣ́рᲂю , ѻ҆ц҃ъ на́шихъ бж҃е бл҃гᲂслᲂве́нъ є҆сѝ .= боⷢ҇ . И҆=зба́вихᲂмсѧ всѝ , ѿ страсте́й и҆ бѣ́дъ ѡ҆бстᲂѧ́нїи , и҆ недꙋ́гъ мнᲂгᲂѡ҆бра́зныхъ , мл҃твами тѝ пречⷭ҇тыми , бг҃ᲂмт҃и взыва́ющїи , ѻ҆ц҃ъ на́шихъ бж҃е бл҃гᲂслᲂве́нъ є҆сѝ .

пѣ́снь , и҃ . і҆рмо́съ . Цр҃ѧ нбⷭ҇нагѡ , є҆го́же пᲂю́тъ вѡ́и а҆́нг҃льстїи . хвали́те и҆ превᲂзнᲂси́те є҆гѡ̀ во́ вѣки . Сто́лпъ тѧ̀ ѡ҆дш҃е́вленъ ꙗ҆́кѡ вᲂи́стинꙋ , и҆ ѻ҆́бразъ вᲂз̾держа́нїѧ ѻ҆́ч҃е стѧжа́вше . всѝ твᲂю̀ і҆ѡа́нне па́мѧть пᲂчита́емъ . Сᲂбо́ръ ра́дꙋетсѧ и҆́нᲂческїи , ликꙋ́ютъ прпⷣбныхъ со́ньмы и҆ пра́ведныхъ . вѣне́цъ бо дᲂсто́йнѡ прїѧ́лъ є҆сѝ . Оу҆краше́нъ дᲂбрᲂдѣ́тельми , в̾ невѣ́стницѣ неи҆з̾рече́нныѧ сла́вы вᲂз̾ле́глъ є҆сѝ , пѣ́снь вᲂспѣва́ѧ хрⷭ҇тꙋ̀ во́ вѣки .= боⷢ҇ . П=ᲂглᲂще́на бᲂлѣ́зньми и҆ па́дшасѧ , вᲂз̾ста́ви бг҃ᲂмт҃и , ꙗ҆́кѡ да тѧ̀ сла́влю во всѧ̀ вѣ́ки .

пѣ́снь , ѳ҃ . і҆рмо́съ . Чи́стꙋю и҆ сла́внꙋю пᲂчте́мъ , лю́дїе бцⷣꙋ прїи́мшꙋю во́ чревѣ , ѻ҆́гнь бжⷭ҇тва̀ неѡ҆па́льнѡ , пѣ́сньми велича́емъ . Цѣли́тель недꙋ́гꙋющимъ в̾ паде́нїихъ , ѿ́ бг҃а пᲂказа́сѧ . ѡ҆чи́стникъ же бл҃же́нне , и҆ прᲂгᲂни́тель лꙋка́вымъ дꙋхо́мъ . тѣ́мъ тѧ всѝ велича́емъ . Зе́млю ꙗ҆́кѡ тлѣ́нїю жили́ще ѡ҆ста́вилъ є҆сѝ ѻ҆́ч҃е , и҆ в̾ зе́млю в̾се́льсѧ кро́ткихъ . и҆ с̾ ни́ми ра́дꙋешисѧ , бжⷭ҇твенымъ наслажде́нїемъ . Предѣ́лъ не ᲂу҆кло́ненъ вѣ́ры , и҆ вᲂз̾держанїю ѻ҆́бразъ и҆мꙋще , по́двиги твᲂꙗ вᲂи́стинꙋ , зижди́телꙗ пѣ́сньми величаемъ .= боⷢ҇ . В=ъ тѧ̀ все́льсѧ пренепᲂро́чнаѧ , и҆́же пе́рвїе рᲂдᲂнача́льнымъ ѕлᲂѡ҆бра́знѡ запе́нша , чл҃кᲂꙋбі́ица низ̾ло́жь , рᲂди́сѧ , и҆ всѧ́ ны спа́слъ є҆́сть .

свѣти́ленъ . Мирска́гѡ пристра́стїѧ , ꙗ҆́кѡ ѿ скве́рны ᲂу҆клᲂни́лсѧ є҆сѝ . и҆ а҆лчбо́ю пло́ть ᲂу҆вѧди́въ , ѡ҆бнᲂви́лъ є҆сѝ дꙋшѝ крѣ́пᲂсть прпⷣбне . и҆ сла́вᲂю ѡ҆бᲂгати́сѧ нбⷭ҇нᲂю сла́вне . тѣ́мже мᲂлѧ̀ непреста́й ѻ҆́ч҃е і҆ѡа́нне .= боⷢ҇ . И҆́=стиннꙋю бцⷣꙋ тѧ̀ и҆спᲂвѣ́даемъ влⷣчце , тᲂбо́ю спа́сшїисѧ . бг҃а бо неи҆зрече́ннѡ рᲂдила̀ є҆сѝ , разо́ршаго крⷭ҇то́мъ сме́рть . к̾ себѣ́ же приве́дша прпⷣбныхъ сᲂбо́ръ . с̾ ни́ми же тѧ̀ дв҃це вᲂсхвалѧ́емъ .