МЦⷭ҇А ТОГО́ЖЕ ВЪ Є҃ ДН҃Ь
ст҃а́гѡ мꙋ́ченика ко́нѡна . Ве́черъ , на гдⷭ҇и вᲂзва́хъ , стихѣ́ры .
гла́съ , и҃ . поⷣ . ѽ =пресла́внᲂе чꙋ́до . Ѽ= неле́стнаѧ и҆ бжⷭ҇твенаѧ зарѧ̀ ,꙳
запᲂвѣде́й бж҃їихъ свѣтлᲂно́снᲂе сїѧ́нїе ,꙳ и҆ мч҃нкѡмъ лꙋ́чшїи
страстᲂно́се сла́вне .꙳ ты̀ те́мнꙋю мглꙋ̀ ѿгна́лъ є҆сѝ ,꙳ ꙗ҆́кᲂже свѣ́тлаѧ
ѕвѣзда̀ бл҃же́нне .꙳ Ѽ до́брᲂе принᲂше́нїе ,꙳ и҆ же́ртва непᲂро́чнаѧ .꙳ тѣ́мже
хрⷭ҇то́ви ,꙳ спастѝ дш҃а на́ша непреста́ннѡ мᲂли́сѧ . Ѽ и҆́стиннѣ
прᲂпᲂвѣ́дниче ,꙳ нече́стїѧ мре́же ,꙳ мечено́сныи сꙋпрᲂти́во бᲂри́телю ,꙳
враго́мъ ѿсѣка́ѧ страда́нїемъ главы̀ премꙋ́дре .꙳ и҆ бжⷭ҇твенᲂе велѣ́нїе
ꙗ҆́снѡ прᲂпᲂвѣ́даѧ ,꙳ лю́демъ ненака́заннымъ гл҃ѧ лꙋ́чшаѧ .꙳ Ѽ ко́нѡне ,
сᲂжи́тниче мч҃нкѡмъ .꙳ мᲂли́сѧ и҆зба́вителю ,꙳ и҆зба́вити рабы̀ твᲂѧ̀
ѿ страсте́й пᲂю́щихъ тѧ̀ . Ѽ до́брᲂмꙋ и҆змѣне́нїю ,꙳ десни́цею вы́шнѧгѡ ,꙳
ꙗ҆́же на тебѣ̀ сᲂдѣ́ѧ ѻ҆ц҃е́мъ гдⷭ҇ь ,꙳ страстᲂте́рпче всесла́вне .꙳
ѿ невѣ́рнагѡ ко́рене пло́дъ бг҃ᲂрастꙋ́щь ,꙳ ко́нѡне всебл҃же́нне и҆ прехва́льне
ты̀ ꙗ҆ви́сѧ .꙳ и҆ бѣсо́мъ пᲂлкѝ ,꙳ и҆мѣ́ѧ хрⷭ҇та̀ и҆зрѧ́дна чинᲂнача́льника ,꙳
пᲂбѣди́лъ є҆сѝ держа́внѡ . сла́ва , и҆ ны́нѣ , боⷢ҇ . Ра́дꙋисѧ свѣ́та
бжⷭ҇твенагѡ нᲂси́ло ,꙳ свѣтлѣ́йшаѧ ѕвѣздо̀ ,꙳ и҆ сѣ́ни сщ҃е́нїѧ .꙳ свѣ́тъ
на́мъ вᲂсїѧ̀ , и҆з̾ пречⷭ҇тыхъ чре́слъ твᲂи́хъ ,꙳ прᲂсвѣща́ѧ ми́рᲂви кᲂнцы̀ ,꙳
и҆ ѡ҆сщ҃а́ѧ свᲂе́ю бл҃гᲂда́тїю .꙳ ра́дꙋисѧ нача́ло спасе́нїѧ пречⷭ҇таѧ .꙳
ра́дꙋисѧ ᲂу҆жа́снᲂе слы́шанїе и҆ глаго́ланїе ,꙳ надѣ́ющимсѧ натѧ̀ .
крⷭ҇тᲂбоⷢ҇ . Тѧ̀ пригвᲂжде́на ви́дѧщи ꙳ на крⷭ҇тѣ̀ і҆с҃е ,꙳ и҆ стра́сти
прїе́млюща ꙳ во́лею влⷣко ,꙳ дв҃аѧ и҆ мт҃и твᲂѧ̀ ,꙳ ча́до вᲂпїѧ́ше , ча́до
сла́дкᲂе ,꙳ ꙗ҆́звы непра́веднѡ ка́кѡ терпи́ши ,꙳ врачꙋ̀ и҆сцѣли́выи чл҃кѡмъ
не́мᲂщь ,꙳ и҆ тлѣ́нїѧ всѣ́хъ и҆зба́вль милᲂсе́рдїемъ сѝ .
На ᲂу҆́трени . ѻ҆́ба кано́на , во ѻ҆кта́и . и҆ ст҃о́мꙋ , на д҃ . кано́нъ ,
є҆мꙋ́же краегране́сїе си́це : пᲂю̀ ко́нᲂна мч҃нка вѣнцено́сца . гла́съ , ѕ҃ .
пѣ́снь , а҃ . і҆рмо́съ . Ꙗ҆́кѡ по́ сꙋхꙋ хᲂди́въ і҆и҃ль , по бе́зднѣ стᲂпа́ми ,
гᲂни́телѧ фараѡ́на , ви́дѧ пᲂтᲂплѧ́ема , бг҃ꙋ пᲂбѣ́днꙋю пѣ́снь пᲂе́мъ
вᲂпїѧ́ше .
запѣ́въ : Ст҃ы́и мч҃нче ко́нѡне , мᲂлѝ бг҃а ѡ҆ на́съ . Пѣ́сненѡ
слᲂвесы́ тѧ бжⷭ҇твеными хрⷭ҇то́ва пᲂхвали́ти мч҃нка , и҆ тве́рдагѡ пᲂдви́жника ,
мᲂѐ пᲂмышле́нїе свѣ́тᲂмъ , и҆́же в̾ тебѣ̀ сла́вныи мꙋ́чениче ѡ҆зарѝ .
Пᲂдо́бѧсѧ бжⷭ҇твенымъ , а҆́нг҃льскимъ бл҃же́нне без̾мо́лвїемъ , ꙗ҆́кᲂже
а҆́нг҃лъ на землѝ вᲂи́стинꙋ пᲂжи́тъ пло́тїю , по́хᲂти ѡ҆бꙋздава́ѧ , и҆
ᲂу҆дᲂбрѧ́ѧсѧ . Зако́ны бжⷭ҇твеныѧ сᲂблю́дъ , є҆́ллинскагѡ без̾зако́нїѧ прпⷣбне
вᲂз̾гнꙋша́сѧ ꙗ҆́вѣ . и҆ мно́ги приве́лъ є҆сѝ к̾ бг҃ꙋ ᲂу҆че́ньми , и҆ сщ҃е́нными
ᲂу҆вѣ́ривъ чꙋдесы̀ . боⷢ҇ . Оу҆кра́сшисѧ дᲂбро́тᲂю дᲂбрᲂдѣ́телей , кра́снагѡ
рᲂдила̀ є҆сѝ па́че всѣ́хъ землены́хъ . свᲂи́ми всенепᲂро́чнаѧ на́съ
красᲂта́ми , мꙋ́дрѣ ᲂу҆краси́вшаго .
пѣ́снь , г҃ . і҆рмо́съ . Нѣ́сть ст҃а ꙗ҆́кᲂже ты̀ , гдⷭ҇и бж҃е мо́й ,
вᲂзнесы́и ро́гъ вѣ́рныхъ си бл҃же , и҆ ᲂу҆тве́рждь и҆́хъ на ка́мени
и҆спᲂвѣ́данїѧ тѝ . Оу҆краси́въ бжⷭ҇твеными дᲂбрᲂдѣ́тельми прпⷣбне дш҃ꙋ
свᲂю̀ , жили́ще сїю̀ ѻ҆ц҃а и҆ сн҃а и҆ дх҃а вᲂи́стинꙋ ст҃а́гѡ , мч҃нче сᲂдѣ́лалъ
є҆сѝ . И҆́же дре́вле в̾ пре́лесть глꙋбо́кꙋю в̾па́дшїи ѻ҆каѧ́ннѣ ,
въ ꙗ҆вле́ннꙋю высᲂтꙋ̀ , высо́кими твᲂи́ми ᲂу҆че́нїи вᲂз̾во́дѧтсѧ и҆з̾дале́ча ,
мч҃нче ко́нѡне вᲂспѣва́юще тѧ̀ . Цр҃кви бы́въ бж҃їѧ , зва́нїи бжⷭ҇твеными
низ̾лᲂжи́лъ є҆сѝ пребл҃же́нне , пред̾ста́въ цр҃кви и҆стꙋка́на . наставлѧ́ѧ
заблꙋ́ждьшїѧ , к̾ бжⷭ҇твенᲂмꙋ разꙋмѣ́нїю . боⷢ҇ . Є҆ди́нъ ст҃ы́и и҆з̾ тебѐ
ражда́етсѧ прест҃а́ѧ , па́че ᲂу҆ма́ же и҆ сло́ва . ѡ҆сщ҃а́ѧ землены́ѧ ,
скве́рнымъ врага̀ навѣ́тᲂмъ страсте́мъ рабо́тающїѧ .
сѣда́ленъ . гла́съ , и҃ . Бг҃а всѣ́ми ѻ҆рꙋ́жїи ѡ҆дѣ́ѧвсѧ , бѣсо́мъ ꙗ҆ви́сѧ
всегꙋби́тель , и҆ бы́сть же́ртва вѣ́рнымъ не ѿло́жна , вса́дника и҆мѣ́ѧ сто́лпъ
вѣ́ры , к̾ высᲂтѣ̀ взима́еши на́съ чꙋде́съ твᲂи́хъ . ѿ ню́дꙋ же и҆ пᲂбѣ́ды
ѿ бг҃а вѣнца̀ дᲂсто́йнѡ прїѧ́лъ є҆сѝ , мч҃нче ко́нѡне мнᲂгᲂстрада́льне .
сегѡ̀ ра́ди вᲂпїе́мъ ти , мᲂлѝ хрⷭ҇та̀ бг҃а , грѣхо́въ ѡ҆ставле́нїе
дарᲂва́ти , чтꙋ́щимъ любо́вїю ст҃ꙋ́ю па́мѧть твᲂю̀ .= сла́ва , и҆ ны́нѣ ,
боⷢ҇ . Внапа́сти мнᲂгᲂплете́нныѧ впа́дъ , ѿ вра́гъ ви́димыхъ и҆ неви́димыхъ ,
вᲂлне́нїемъ ѡ҆держи́мь є҆́смь , без̾мѣ́рныхъ сᲂгрѣше́нїи мᲂи́хъ , ꙗ҆́кѡ
к̾ те́плᲂмꙋ застꙋпле́нїю , и҆ пᲂкро́вꙋ мᲂемꙋ̀ пречⷭ҇таѧ , приста́нищꙋ притека́ю
твᲂеѧ̀ бл҃гᲂсти . ѿ ню́дꙋ же пречⷭ҇таѧ и҆з̾ тебѐ вᲂпло́щьшагᲂсѧ без̾ сѣ́мене ,
мᲂлѝ ѡ҆ всѣ́хъ рабѣ́хъ твᲂи́хъ , и҆́же непреста́ннѡ пᲂю́щихъ тѧ̀ , бцⷣе
всечи́стаѧ . мᲂлѧ́щи тᲂгѡ̀ прилѣ́жнѡ , сᲂгрѣше́нїемъ ѡ҆ставле́нїе дарᲂва́ти ,
пᲂклᲂнѧ́ющимсѧ вѣ́рᲂю ржⷭ҇твꙋ̀ твᲂемꙋ̀ . =крⷭ҇тᲂбоⷢ҇ . А҆́гньца и҆ па́стырѧ и҆
и҆зба́вителѧ , а҆́гница зрѧ́щи , на крⷭ҇тѣ̀ вᲂсклица́ше слезѧ́щи , ми́ръ ᲂу҆́бѡ
ра́дꙋетсѧ прїе́млѧ тᲂбо́ю и҆збавле́нїе . ᲂу҆тро́ба же мᲂѧ̀ гᲂри́тъ зрѧ́щи
твᲂѐ распѧ́тїе , є҆́же терпи́ши за милᲂсе́рдїе ми́лᲂсти дᲂлгᲂтерпѣли́ве
гдⷭ҇и . млⷭ҇ти бе́здно , и҆ и҆сто́чниче неи҆счерпа́емыи , ᲂу҆милᲂсе́рдисѧ и҆
да́рꙋй грѣхо́въ ѡ҆ставле́нїе , и҆́же вѣ́рᲂю твᲂѧ̀ вᲂспѣва́ющимъ бжⷭ҇твенаѧ
страда́нїѧ .
пѣ́снь , д҃ . і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ
цр҃кви бг҃ᲂлѣ́пнѡ зᲂве́тъ вᲂпїю́щи , ѿ со́вѣсти чи́сты ѡ҆́ гдⷭ҇ѣ пра́зднꙋющи .
Хра́мы низ̾лᲂжи́лъ є҆сѝ без̾бо́жнымъ ст҃е . и҆ бо́ги пᲂги́бели кᲂне́чнѣй
мꙋ́чениче пре́далъ є҆сѝ , чꙋдᲂдѣ́йствꙋѧ и҆ сᲂверша́ѧ дᲂстᲂчꙋ́днаѧ зна́менїѧ .
Ст҃о прпⷣбне ше́ствꙋющꙋ тѝ , бѣсо́вскᲂе кᲂлѣ́но , бж҃їе сло́во пᲂкᲂрѝ
тебѣ̀ . и҆ тѧ̀ чꙋде́съ мно́гихъ пᲂказа́ньми прᲂсла́вилъ є҆́сть . Вельмѝ
любѧ́ тѧ пребл҃гі́и , миха́ила тебѣ̀ вели́кагѡ пѣ́стꙋна дадѐ , наꙋча́юща
вели́кїи ко́нѡне ꙗ҆́вѣ , превели́кимъ та́йнамъ . боⷢ҇ . Ст҃а́ѧ влⷣчце ,
ꙗ҆́же прест҃о́е вᲂпло́щьши сло́во . ѡ҆сщ҃е́нїе дш҃и мᲂе́й да́рꙋй ,
наставлѧ́ющи мѝ ᲂу҆́мъ без̾пꙋ́тїемъ пᲂрѣва́ющьсѧ .
пѣ́снь , є҃ . і҆рмо́съ . Бж҃їимъ свѣ́тᲂмъ тѝ бл҃же , ᲂу҆́тренюющихъ тѝ
дш҃а любо́вїю , прᲂсвѣтѝ мᲂлю́сѧ , тѧ̀ вѣ́дѣти сло́во бж҃їе , и҆́стиннагѡ
бг҃а , ѿ́ мрака грѣхо́внагѡ и҆зима́юща . Ка́плѧми крᲂве́й твᲂи́хъ сщ҃е́нныхъ ,
ѡ҆багри́лъ є҆сѝ себѣ̀ мꙋче́нїѧ ѻ҆де́ждꙋ , вельмѝ ѡ҆крᲂвави́всѧ , мч҃нче
велемꙋ́дрене . и҆ живе́ши ра́дꙋѧсѧ , въ вы́шнихъ жили́щихъ и҆ свѣ́тлᲂстѣхъ .
Прᲂстира́етъ тѧ̀ бл҃же́нне ѕлᲂчести́выи , ве́сь прᲂсте́ръ к̾ бг҃ꙋ ᲂу҆́мъ
сла́вне и҆мꙋ́ща . ра́нами раз̾дрᲂблѧ́етъ , призыва́юща и҆́мѧ вели́кᲂе
вседержи́телѧ . Бл҃гᲂда́тїю в̾жили́всѧ , терпѧ́ше ка́пли ꙗ҆́звеныѧ ,
мꙋ́ченически ᲂу҆краша́ѧсѧ . и҆ без̾бо́жїе ко́нѡне пᲂбѣжда́ѧ , и҆ без̾сме́ртїю
спᲂдᲂблѧ́емь . боⷢ҇ . И҆зба́вльшесѧ всѧ́кїѧ прарᲂди́тельныѧ пречⷭ҇таѧ клѧ́твы
тᲂбо́ю , бл҃гᲂслᲂве́нїе ᲂу҆лꙋчи́хѡмъ . тѣ́мже бл҃гᲂслᲂви́мъ и҆ велича́емъ , и҆
любо́вїю тѧ̀ чте́мъ и҆ ᲂу҆блажа́емъ .
пѣ́снь , ѕ҃ . і҆рмо́съ . Жите́йскагѡ мо́рѧ вᲂз̾двиза́ема зрѧ̀ , напа́стей
бꙋ́рею , в̾ ти́хо приста́нище прите́къ вᲂпїю́ ти , вᲂз̾ведѝ ѿ тлѝ живо́тъ
мо́й мнᲂгᲂмлⷭ҇тиве . Ѡ҆блиста́въ ꙗ҆́кѡ сл҃нце , свѣтᲂлꙋ́чными дᲂбрᲂдѣ́тельми ,
и҆ пресла́вными чꙋдесы̀ . терпѣ́нїемъ же страда́нїи , вельмѝ ᲂу҆краша́ѧсѧ .
прᲂсвѣща́еши кᲂнцы̀ , великᲂи҆мени́тыи мч҃нче хва́лѧщїѧ тѧ̀ . Дᲂбро́тами
страда́ней , краснѣ́йши пᲂказа́всѧ , чꙋдᲂдѣ́йствꙋеши преди́внаѧ . и҆
ᲂу҆́меръ , па́ки по пᲂгребе́нїи прᲂгᲂнѧ́ѧ недꙋ́ги , и҆ ѿгᲂнѧ̀ пре́лестныѧ
бл҃же́нне дꙋ́хи . Стра́сти и҆з̾вра́чꙋй дш҃а́мъ на́шимъ мꙋ́дре , и҆ пло́ти
ѡ҆блегчѝ немᲂже́нїѧ . и҆зрѧ́денъ вра́чь на́мъ чтꙋ́щимъ тѧ̀ , ѿ́ бг҃а да́нъ
є҆сѝ ко́нѡне сла́вне . боⷢ҇ . Призрѣ̀ гдⷭ҇ь натѧ̀ , и҆ тᲂбо́ю ᲂу҆зрѣ́ти
сᲂдѣ́ла ᲂу҆да́льшїѧсѧ пречⷭ҇таѧ ѿ негѡ̀ . тѣ́мже ꙗ҆́кᲂже рекла̀ є҆сѝ , ро́дᲂве
спаса́емыхъ ᲂу҆блажа́ютъ тѧ̀ .
пѣ́снь , з҃ . і҆рмо́съ . Хладᲂда́тельнꙋ ᲂу҆́бѡ пе́щь сᲂтвᲂрѝ а҆́нг҃лъ ,
прпⷣбнымъ дѣ́темъ , халдѣ́и же ѡ҆палѝ велѣ́нїемъ бж҃їимъ . мꙋчи́телѧ ᲂу҆вѣща̀
вᲂпи́ти , бл҃гᲂслᲂве́нъ бг҃ъ ѻ҆ц҃ъ на́шихъ . Свѣ́тъ тебѣ̀ незахᲂди́мыи
вᲂсїѧ̀ , вᲂз̾ненави́дѣвшꙋ страсте́й тмꙋ̀ прпⷣбне . весе́лїе же прїѧ́тъ тѧ̀ ,
до́брыи по́двигъ скᲂнча́вша тща́нїемъ . тѣ́мже пᲂмина́й на́съ пред̾стᲂѧ̀
хрⷭ҇то́ви . Срⷣце твᲂѐ кро́тко , и҆ мꙋдрᲂва́нїе смире́но ꙗ҆ви́сѧ прпⷣбне .
и҆́мже пᲂгꙋби́лъ є҆сѝ вᲂз̾нᲂше́нїѧ всѧ̀ врагꙋ̀ , вᲂз̾выша́емь бжⷭ҇твеными
дᲂбрᲂдѣ́тельми , и҆ чꙋдесы̀ стра́шными , ко́нѡне мꙋ́ченикѡмъ степе́нь .
Стра́шенъ всѣ́мъ бѣсо́мъ бы́сть . си́мъ пᲂвелѣва́ѧ пᲂвинꙋ́тисѧ , твᲂи́мъ
сщ҃е́ннымъ бг҃ᲂмꙋ́дре велѣ́нїемъ . бг҃ꙋ тѧ̀ прᲂсла́вльшꙋ , тᲂгѡ̀ дѣ́лы до́брыми
на землѝ ко́нѡне прᲂсла́вльшагѡ . боⷢ҇ . И҆́же во́лею всѧ̀ сᲂдѣва́ѧ ,
во твᲂю̀ вᲂсхᲂтѣ̀ всели́тисѧ пренепᲂро́чнꙋю бцⷣе ᲂу҆тро́бꙋ , вᲂи́стинꙋ є҆ди́нъ ,
и҆́же во́ свѣтѣ ст҃ы́хъ прᲂславлѧ́емыи бг҃ъ , вели́кїи и҆ стра́шныи .
пѣ́снь , и҃ . і҆рмо́съ . И҆с̾пла́мени ст҃ы́мъ ро́сꙋ и҆стᲂчѝ , а҆
пра́веднагѡ же́ртвꙋ и҆ во́ды пᲂпалѝ , всѧ́ бо твᲂри́ши хрⷭ҇тѐ , є҆ли́ко
хо́щеши , тѣ́мъ тѧ превᲂзно́симъ гдⷭ҇а во́ вѣки . Тве́рдѡ сᲂпрᲂти́вилсѧ є҆сѝ
сꙋемꙋ́дренᲂмꙋ , мнѧ́щꙋ тебѐ пᲂвинꙋ́ти , че́сти чꙋжди́мъ принестѝ страда́льче
ѿ негѡ̀ мерзᲂсте́мъ . тѣ́мъ ꙗ҆́кѡ зако́ннѡ пᲂстрада́въ прᲂсла́вилсѧ є҆сѝ .
И҆́же бѣсо́вскими ᲂу҆ѧзви́вшесѧ нало́ги , ᲂу҆че́нїи бжⷭ҇твеными твᲂи́ми
и҆сцѣлева́ютсѧ . и҆ ско́рбныхъ и҆збавле́нїе прїе́млютъ , вᲂспѣва́юще
бл҃гᲂда́ть твᲂю̀ бг҃ᲂмꙋ́дре . Недꙋ́гᲂмъ всѧ́кимъ здра́вїе пᲂчерпи́те , и҆́же
к̾ ра́цѣ прпⷣбнагѡ вѣ́рᲂю пристꙋпа́юще . то́читъ бо ꙗ҆́вѣ дх҃а бл҃гᲂда́тїю , и҆
и҆стица́нїѧ страсте́мъ и҆з̾сꙋша́етъ . боⷢ҇ . Мᲂльбꙋ̀ зижди́телю принесѝ ,
дш҃а на́ша спастѝ бг҃ᲂра́дᲂваннаѧ , и҆ страсте́й ѡ҆держа́нїѧ на́съ
и҆зба́вити , и҆ ѕлᲂдѣ́йственыхъ челᲂвѣ́къ и҆скꙋше́нїѧ .
пѣ́снь , ѳ҃ . і҆рмо́съ . Бг҃а чл҃кѡмъ неꙋдо́бь ви́дѣти , на́нь же несмѣ́ютъ
чи́ни а҆́нг҃льстїи зрѣ́ти . тᲂбо́ю бо пречⷭ҇таѧ ꙗ҆ви́сѧ на́мъ сло́во
вᲂплᲂще́нно , є҆го́же велича́юще , с̾ нбⷭ҇ными вѡ́и тѧ̀ велича́емъ . Ꙗ҆́кᲂже
кᲂра́бль ви́дѣнъ бы́сть препла́вающь , мирскꙋ́ю немо́крено бг҃ᲂмꙋ́дре бꙋ́рю ,
до́брыхъ наѧ́тїѧ спаса́ющь , к̾ кра́снымъ приста́нищемъ , пᲂко́ѧ и҆ црⷭ҇твїѧ
бж҃їѧ свѣ́тлᲂсти . Крⷭ҇то́мъ ꙗ҆́кѡ брᲂнѧ́ми ѡ҆дѣ́ѧвсѧ , вра́жїѧ всебл҃же́нне
ѡ҆бнажи́лъ є҆сѝ пᲂлкѝ . и҆ нᲂга́ма свᲂи́ма кра́сныма пᲂрабо́тилъ є҆сѝ .
ра́бъ же влⷣцѣ бли́жнїи бы́въ , пᲂрабᲂще́ныѧ враго́мъ и҆збавлѧ́ѧ . Ѡ҆ на́съ
и҆́же любо́вїю вᲂсхвалѧ́ющихъ тѧ̀ , па́мѧть сᲂтвᲂрѝ , хрⷭ҇то́ви вѣнцено́сецъ
пред̾стᲂѧ̀ , съ вы́шними без̾мѣ́рными си́лами . ꙗ҆́кѡ да мᲂли́твами твᲂи́ми
ѡ҆брѧ́щемъ млⷭ҇ть , и҆ ѕлᲂлю́тныхъ и҆змѣне́нїѧ ко́нѡне прехва́льне . боⷢ҇ .
Свѣ́тᲂмъ твᲂи́мъ мѧ̀ дв҃о прᲂсвѣтѝ , и҆́же но́щїю прⷭ҇нѡ ᲂу҆ны́нїѧ
ѡ҆держи́ма , и҆ к̾ землѝ пᲂгᲂрбле́на , и҆ дѣ́юща ве́сь грѣ́хъ , нра́ва
раз̾враще́нїемъ , ꙗ҆́кѡ да тᲂбо́ю спаса́емь пᲂю̀ тѧ̀ мнᲂгᲂпѣ́тꙋю .