Во вто́рникъ , ве́черъ . на гдⷭ҇и вᲂзва́хъ , стⷯры крⷭ҇тны . гла́съ , в҃ . пᲂдо́бенъ . є҆гда̀ ѿ́ древа . запѣ́в̾ : ꙗ҆́кѡ ѿ тебѐ ѡ҆чище́нїе є҆́сть . Свѣти́ти свѣти́ла , нетерпѧ́ще ѡ҆мрачи́шасѧ , на крⷭ҇тѣ̀ заше́дшꙋ тебѣ̀ сло́ве , землѧ́ же пᲂдвиза́шесѧ , и҆ ка́менїе раз̾сѣда́шесѧ . цр҃ко́внᲂе бл҃гᲂлѣ́пїе раз̾дира́шесѧ пᲂсредѣ̀ . гро́бы ѿверза́хꙋсѧ , ме́ртвїи вᲂста́хꙋ . а҆́дъ и҆з̾даѧ́ше всѧ̀ сꙋ́щїѧ до́лꙋ . бѣ́си пᲂбѣжда́хꙋсѧ , и҆ со́нъ всѣ́мъ вмѣнѧ́шесѧ сме́рть .

ᲂу҆пᲂва̀ дш҃а мᲂѧ̀ на́ гдⷭ҇а . Є҆гда̀ плᲂдᲂви́тыи тѧ̀ хрⷭ҇тѐ винᲂгра́дъ , разбо́йникъ бл҃гᲂнра́вныи ви́дѣвъ , лꙋ́чшихъ бы́сть разбо́йникъ бл҃гᲂи҆скꙋ́сенъ . и҆ ᲂу҆кра́даетъ прᲂще́нїе дре́внимъ сᲂгрѣше́нїемъ , ѕѣлѡ̀ бл҃гᲂєсте́ственѣ ма́лѣмъ гла́сᲂмъ . тᲂмꙋ̀ ревни́тели бы́ти пᲂтщи́мсѧ , є҆́же пᲂмѧнѝ и҆ на́съ чл҃кᲂлю́бче , всѝ зᲂвꙋ́ще .

да ᲂу҆пᲂва́етъ і҆и҃ль на́ гдⷭ҇а . Сїѧ́етъ ꙗ҆́кѡ ѕвѣзда̀ на́ нб҃си , в̾ цр҃кви бжⷭ҇твеныи вᲂи́стинꙋ крⷭ҇тъ тво́й хрⷭ҇тѐ . ѡ҆палѧ́ѧ ᲂу҆́бѡ бѣ́сы , вѣ́рныѧ же прᲂсвѣща́ѧ , и҆ пᲂсрамлѧ́ѧ ли́ца и҆́же тебѐ распе́ншимъ , и҆́хже прарᲂди́тели дре́вᲂмъ вᲂѡбража́ющимъ крⷭ҇та̀ , пре́жде ѿ рабо́ты и҆зведѐ , и҆ ѿ ка́мене ме́дъ с̾са́ти в̾ пꙋсты́ни сᲂтвᲂри́лъ є҆сѝ .

та́же , в̾ минѣ́и , стⷯры , ст҃о́мꙋ , а҆́ще и҆́мать . а҆́ще нѣ́сть минѣ́и . и҆́ны , стихѣ́ры , прест҃ѣ́й бцⷣѣ . гла́съ , и҆ пᲂдо́бенъ , то́йже . =запѣ́въ : ѿ всѣ́хъ без̾зако́нїи є҆гѡ̀ . В=сѣ́мъ пред̾ста́тельницꙋ тѧ̀ чл҃кѡмъ , всѣ́мъ прибѣ́жище вели́кᲂе , всѣ́мъ застꙋ́пницꙋ тѧ̀ пᲂказа̀ , влⷣчце , хрⷭ҇тїа́нѡмъ , и҆́же и҆з̾ тебѐ в̾ на́ше смѣше́нїе ѡ҆бо́лксѧ бл҃гᲂꙋтро́бныи , и҆ распѧ́тїе и҆ сме́рть на́съ ра́ди пᲂдъѧ́тъ . тᲂго̀ ᲂу҆́бѡ мᲂлѝ непреста́нно , всѣ́мъ ѡ҆чище́нїе низ̾пᲂсла́ти прегрѣше́нїемъ , бг҃ᲂневѣ́стнаѧ .

пᲂхвали́те є҆гѡ̀ всѝ лю́дїє . Дре́вле дв҃аѧ и҆ а҆́гница , зрѧ́щи и҆́ще и҆́з̾ чрева є҆ѧ̀ , на́ древѣ пᲂвѣ́шена , ꙗ҆́кѡ ѡ҆сꙋжде́на , со двѣма̀ ѡ҆сꙋжде́ннᲂма , вᲂсклица́ющи гл҃аше , сн҃е и҆ бж҃е мо́й , стра́нно ви́димᲂе , стра́шнᲂе та́инство . ѻ҆ба́че мꙋ́дрᲂсти твᲂеѧ̀ бе́зднꙋ , и҆спыта́ти никто́же мо́жетъ , пᲂю̀ твᲂѐ дᲂлгᲂтерпѣ́нїе .

и҆ и҆́стина гдⷭ҇нѧ пребыва́етъ во́ вѣки . Гдѣ̀ твᲂегѡ̀ видѣ́нїѧ бл҃гᲂлѣ́пїе ; гдѣ̀ красᲂта̀ скры́сѧ дᲂбро́ты твᲂеѧ̀ сн҃е , ка́ко и҆́же дᲂбро́тᲂю неи҆зрече́ннаѧ сᲂтвᲂри́выи бж҃е , кра́сныи в̾ дᲂбро́тахъ , за всѧ̀ чл҃ки , без̾сла́венъ и҆ без̾че́стенъ на́ древѣ ви́сиши , видѣ́нїѧ ни дᲂбро́ты не и҆мѣ́ѧ ча́до . предо́браѧ дв҃аѧ вᲂпїѧ́ше , стᲂнѧ́щи и҆ пла́чꙋщи .

сла́ва , и҆ ны́нѣ , крⷭ҇тᲂбоⷢ҇ . За́йде свѣти́лᲂмъ зарѧ̀ , ᲂу҆́мнымъ свѣ́тᲂмъ пᲂбѣ́ждьшисѧ , ѡ҆бна́жшимсѧ на крⷭ҇тѣ̀ , пᲂбѣжда́етсѧ ᲂу҆́бѡ при́снѡ хꙋ́ждьшеє бо́льшимъ , и҆ лꙋ́чшемꙋ ме́ньшеє дае́тъ мѣ́сто . ка́ко ᲂу҆́бѡ непᲂдᲂба́ше свѣтѧ́щꙋ хрⷭ҇тꙋ̀ , сᲂкры́тисѧ зарѝ мы́сленѣй . дᲂсто́йнымъ гл҃аше , тѧ̀ зрѧ́щи пречⷭ҇таѧ свѣти́лᲂмъ свѣ́та .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стⷯры , крⷭ҇тны . гла́съ , в҃ . Спаси́ мѧ хрⷭ҇тѐ сп҃се , си́лᲂю крⷭ҇тнᲂю спасы́и петра̀ в̾ мо́ри , и҆ пᲂми́лꙋй мѧ бж҃е .

сти́хъ : к̾ тебѣ̀ вᲂзведо́хъ . Да ра́спнетсѧ вᲂпїѧ́хꙋ , и҆́же твᲂи́хъ дарᲂва́нїи при́снѡ наслажа́ющїисѧ . и҆ ѕлᲂдѣ́ѧ во бл҃гᲂда́телѧ мѣ́стѡ прᲂша́хꙋ прїѧ́ти , и҆́же пра́ведникѡмъ ᲂу҆бі́ица . мᲂлча́ше же хрⷭ҇тѐ терпѧ̀ и҆́хъ сꙋро́вство , пᲂстрада́ти хᲂтѧ̀ , и҆ спастѝ на́съ , ꙗ҆́кѡ чл҃кᲂлю́бецъ .

сти́хъ : пᲂми́лꙋй на́съ . мⷱ҇ꙋ . Ли́цы мч҃нчестїи , прᲂти́вишасѧ мꙋчи́телемъ глаго́люще , мы̀ во́инствꙋемъ цр҃ю си́ламъ . а҆́ще и҆ ѻ҆гню̀ и҆ мꙋ́камъ преда́сте на́съ , но не ѿмета́емсѧ тро́ическїѧ си́лы .= сла́ва , и҆ ны́нѣ , крⷭ҇тᲂбоⷢ҇ . Б=ᲂлѣ́зни претерпѣ́вши мно́ги в̾ распѧ́тїи сн҃а и҆ бг҃а твᲂегѡ̀ пречⷭ҇таѧ , стᲂнѧ́ше слезѧ́щи вᲂсклица́ше , ᲂу҆вы̀ мнѣ̀ ча́до сла́дкᲂе , без̾ пра́вды ка́кѡ стра́ждеши , хᲂтѧ̀ и҆зба́вити , ꙗ҆́же ѿ а҆да́ма земнᲂро́дныѧ ; тѣ́мже пречⷭ҇таѧ дв҃о тебѐ мо́лимъ вѣ́рᲂю , млⷭ҇тива на́мъ тᲂго̀ сᲂдѣ́лай .

та́же , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , крⷭ҇тᲂбоⷢ҇ . во́ гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Во вто́рникъ , на па́вечерницѣ . кано́нъ , прест҃ѣ́й бцⷣѣ . гла́съ , в҃ . пѣ́снь , а҃ . і҆рмо́съ . Грѧди́те лю́дїє , пᲂе́мъ пѣ́снь хрⷭ҇тꙋ̀ бг҃ꙋ , раз̾дѣ́льшемꙋ мо́ре , и҆ прᲂве́дшꙋ лю́ди ꙗ҆́же и҆спꙋстѝ и҆з̾ рабо́ты є҆ги́петскїѧ , ꙗ҆́кѡ прᲂсла́висѧ . запѣ́в̾ : прⷭ҇та́ѧ гжⷭ҇е бцⷣе спасѝ на́съ . Сло́во мᲂегѡ̀ прїѡбрѣ́тенїѧ ѿ ню́дъ нѣ́сть к̾ пѣснᲂсло́вїю всечⷭ҇таѧ , ꙗ҆́кѡ пᲂкрыва́етъ мѧ грѣхо́въ мᲂи́хъ тма̀ . но ѽ бг҃ᲂрᲂди́тельнице , ᲂу҆тѣснѧ́ема прїими́ мѧ . Пᲂд̾ тво́й пᲂкро́въ прибѣга́ю пречⷭ҇таѧ , ѿ грѣ́хъ без̾чи́сленыхъ в̾ кᲂне́цъ , и҆ бг҃а и҆ влⷣкꙋ бл҃гᲂпремѣ́нна сᲂтвᲂрѝ чи́стаѧ , и҆ спаси́ мѧ . сла́ва . Ты̀ мнѣ̀ влⷣчце те́плᲂе ѡ҆чисти́лище , к̾ тебѣ̀ прири́ща спаса́юсѧ , и҆ прїѡбрѧ́щꙋ дш҃е́внᲂе спасе́нїе , мо́жеши бо всѣ́хъ , ꙗ҆́кѡ сꙋ́щи мт҃и бг҃ꙋ . и҆ нн҃ѣ . И҆́же дш҃а́мъ лсте́цъ , привлече́ мѧ в̾ пᲂги́бельныи ро́въ , но мнѣ̀ прᲂстрѝ держа́внꙋю свᲂю̀ рꙋ́кꙋ , и҆ ско́рѡ бцⷣе к̾ свѣ́тꙋ вᲂзведѝ .

пѣ́снь , г҃ . і҆рмо́съ . Оу҆твердѝ на́съ сᲂбо́ю гдⷭ҇и , дре́вᲂмъ ᲂу҆мерщве́и прегрѣше́нїѧ . и҆ стра́хъ тво́й всадѝ в̾ срⷣца̀ на́ша , ꙗ҆́кѡ чл҃кᲂлю́бецъ . Во мно́ги впа́дъ разбо́йники ѡ҆каѧ́нныи , ѡ҆бнаже́нъ бы́хъ , ᲂу҆ѧ́звленъ же и҆ ѡ҆ста́вленъ . но ты̀ бцⷣе чⷭ҇таѧ непре́зри менѐ . Ѻ҆бнажи́выи а҆да́ма пре́же ѕмі́й , пре́лести дре́вᲂмъ , ꙗ҆́вѣ ᲂу҆до́бнѡ плѣнѝ дш҃ꙋ мᲂю̀ , мᲂлю́тисѧ влⷣчце ᲂу҆ще́дри мѧ . сла́ва . Нн҃ѣ тебѣ̀ мᲂѧ̀ принᲂша́ю та́йнаѧ , и҆́стиннѣй пред̾ста́тельницѣ мᲂе́й и҆ пᲂкро́вꙋ . ꙗ҆́кѡ да сїѧ̀ мнѣ̀ не ѡ҆бличи́тъ сн҃ъ тво́й , на сꙋдѣ̀ пра́веднѣмъ свᲂе́мъ . и҆ ны́нѣ . Пᲂми́лꙋй на́съ чⷭ҇таѧ пᲂми́лꙋй , и҆́бо ѿ дѣ́лъ спасе́нїѧ ѿ ню́дъ нѣ́сть на́мъ . тѣ́мже вѣ́рᲂю те́плᲂю тебѣ̀ вᲂпїе́мъ , пᲂми́лꙋй рабы̀ свᲂѧ̀ .

пѣ́снь , д҃ . і҆рмо́съ . Пᲂю́ тѧ слꙋ́хᲂмъ бо гдⷭ҇и , ᲂу҆слы́шахъ и҆ ᲂу҆бᲂѧ́хсѧ . до мене́ бо прїи́де , менѐ и҆ща̀ заблꙋ́ждьшаго . тѣ́мже мно́гᲂе твᲂѐ сᲂше́ствїе є҆́же на мѧ̀ прᲂславлѧ́ю ѡ҆бнᲂвле́нїе . Бᲂлѧ́щаго неи҆сцѣ́льнѡ влⷣчце , и҆ ѡ҆бнища́вша не ѡ҆мерзѝ , но да́ждь ми ма́сло бл҃гᲂсти твᲂеѧ̀ дв҃о , и҆ твᲂи́ми прᲂмышле́ньми ѡ҆бᲂгати́ мѧ , и҆́же ѿ́ бг҃а зла́тᲂмъ нетлѣ́ннымъ . Ѿ до́брыхъ всѣ́хъ ѡ҆бнажи́хсѧ , и҆ лежꙋ̀ в̾ ѕло́бѣ , ѡ҆бᲂлкі́и всѣ́хъ и҆́же дре́вле па́дшихъ . и҆ нн҃ѣ пре́жними ᲂу҆краси́ мѧ , и҆ втᲂры́хъ и҆зба́ви бг҃ᲂневѣ́сто . сла́ва . Блꙋдни́цꙋ превзыдо́хъ в̾ блꙋдѣ́хъ , и҆ мытарѧ̀ лихᲂи́мьствᲂмъ всегда̀ , сло́вᲂмъ , и҆ и҆звᲂле́нїемъ . но ᲂу҆́бѡ ѻ҆бᲂю̀ пᲂкаѧ́нїе , пре́же кᲂнца̀ стѧжа́ти ми влⷣчце спᲂдо́би . и҆ ны́нѣ . Вᲂдвᲂри́хсѧ в̾ пꙋсты́ни печа́льнѣй , ᲂу҆дали́хсѧ ѿ тебѐ бг҃ᲂрᲂди́тельнице . кто̀ да́стъ ми крилѣ̀ и҆ пᲂлещꙋ̀ , и҆ прїидꙋ̀ к̾ тебѣ̀ наде́ждѣ мᲂе́й , спаса́ющѣй малᲂдꙋ́шїе мᲂѐ ѡ҆каѧ́ннаго .

пѣ́снь , є҃ . і҆рмо́съ . Свѣ́та пᲂда́телю , и҆ вѣко́мъ тво́рче гдⷭ҇и , во́ свѣтѣ твᲂи́хъ пᲂвелѣ́нїи наста́ви на́съ , ра́звѣ бо тебѐ и҆но́гѡ бг҃а незна́емъ . Ꙗ҆́кѡ невече́рнїи свѣ́тъ , ѿ́ чрева тѝ влⷣчце сꙋ́щимъ на землѝ вᲂсїѧ́вши , смра́днꙋю дш҃ꙋ мᲂю̀ ѡ҆зарѝ чⷭ҇таѧ , и҆ ѿженѝ всѧ́кꙋ мглꙋ̀ срⷣца мᲂегѡ̀ . Но́щь мѧ пᲂкрыва́етъ люта̀ , лꙋка́выхъ мᲂи́хъ и҆ ѕлы́хъ дѣѧ́нїи . но вᲂпїю̀ влⷣчце , наста́ви мѧ къ свѣ́тꙋ бжⷭ҇твенᲂмꙋ , твᲂегѡ̀ сн҃а и҆ влⷣки всепѣ́таѧ . сла́ва . И҆ менѐ прїимѝ чⷭ҇таѧ , ꙗ҆́кᲂже блꙋ́днаго сы́на прїѧ́тъ тво́й сн҃ъ , и҆ зижди́тель всѧ́ческимъ . вᲂпїю́ бо с̾ни́мъ , сᲂгрѣши́хъ вᲂи́стинꙋ , и҆ спаси́ мѧ влⷣчце . и҆ ны́нѣ . Оу҆ѧзви́вшеєсѧ мᲂѐ се́рдце , прило́ги лꙋка́вагѡ пречⷭ҇таѧ , ꙗ҆́кѡ млⷭ҇тива и҆сцѣлѝ , ꙗ҆́же на крⷭ҇тѣ̀ пло́тїю ᲂу҆ѧ́звленаго , неи҆з̾глаго́ланно ро́ждьши .

пѣ́снь , ѕ҃ . і҆рмо́съ . Въ бе́зднѣ грѣхо́внѣй ѡ҆держи́мъ , неи҆зслѣ́днꙋю млрⷭ҇дїѧ твᲂегѡ̀ призыва́ю бе́зднꙋ , ѿ тлѝ бж҃е мѧ вᲂз̾ведѝ . Въ ро́въ грѣхо́вныи впадо́хъ , и҆ къ не забыва́ющемꙋ не взира́ю бг҃ꙋ , стра́хᲂмъ ѡ҆держи́мъ . но к̾ тебѣ̀ примѣта́юсѧ бг҃ᲂневѣ́сто . Пᲂкры́вшеєсѧ лю́тѣ се́рдце мᲂѐ , недᲂвѣ́дᲂмыхъ прегрѣше́нїи вᲂлно́ю . всеси́льнᲂю ти мл҃твᲂю бцⷣе дв҃о ѡ҆кᲂрмѝ . сла́ва . Красᲂтꙋ́ ми ви́дѣти сла́вы твᲂеѧ̀ спᲂдо́би , є҆гда̀ ѿ́ плᲂти мᲂеѧ̀ хᲂщꙋ̀ разлꙋчи́тисѧ . ꙗ҆́кѡ ᲂу҆тверже́нїе мᲂѐ влⷣчце , да ѿ сю́дꙋ ᲂу҆вѣ́мъ ѡ҆ставле́нїе . и҆ ны́нѣ . Напа́стей и҆ бѣ́дъ и҆ скᲂрбе́й , и҆зба́ви рабы̀ свᲂѧ̀ ст҃а́ѧ влⷣчце . и҆́же к̾ бг҃ꙋ твᲂи́ми мᲂли́твами , вѣ́рᲂю к̾ тебѣ̀ прибѣга́ющихъ .

Гдⷭ҇и пᲂми́лꙋй , гⷤ . сла́ва , и҆ ны́нѣ . сѣда́ленъ , гла́съ , в҃ . Тебѐ велича́емъ бцⷣе вᲂпїю́ще , ра́дꙋисѧ же́зле , и҆з̾ него́ же без̾ сѣ́мене бг҃ъ прᲂзѧбѐ , ᲂу҆би́въ дре́вᲂмъ сме́рть .

пѣ́снь , з҃ . і҆рмо́съ . Тѣ́лꙋ злато́мꙋ премꙋ́дрыѧ дѣ́ти непᲂслꙋжи́ша , и҆ в̾ пла́мень са́ми пᲂидо́ша , и҆ бо́ги и҆́хъ ѡ҆брꙋга́ша . средѝ пла́мене вᲂзᲂпи́ша , и҆ ѡ҆брᲂсѝ и҆́хъ а҆́нг҃лъ , ᲂу҆слы́шасѧ ᲂу҆́же ᲂу҆́стъ ва́шихъ мл҃тва . Ны́нѣ тщи́тсѧ зїѧ́ѧ вра́гъ , прїѧ́ти мѧ во ᲂу҆тро́бꙋ свᲂю̀ , и҆́бо принᲂша́етъ ми ѿ всю́дꙋ и҆скꙋше́нїѧ и҆ сѣ́ти , ве́сь пресѣка́ѧ спѣ́хъ мо́й . но пред̾вари́вши и҆зба́ви мѧ дв҃о мт҃и , ѿ тᲂго̀ навѣ́та лꙋка́вагѡ . Ѡ҆сквернѧ́етъ и҆ смꙋща́етъ чꙋ́вствїѧ и҆ ᲂу҆́мъ , сᲂпᲂста́тъ , и҆ в̾ ро́въ ѿча́ѧнїѧ свестѝ тщи́тсѧ . тѣ́мже вᲂпїю́ ти є҆ди́нѣй , прибѣ́жище мᲂѐ бг҃ᲂневѣ́сто , и҆зба́ви мѧ , ѿ рꙋкѝ сегѡ̀ льсти́вагѡ . сла́ва . И҆́же дре́вле трѝ ю҆́нᲂшы ѿ пе́щи гᲂрѧ́щїѧ , хрⷭ҇тѐ мо́й и҆збавле́и , са́мъ сло́ве и҆ менѐ мᲂльба́ми неи҆скꙋсᲂбра́чныѧ мт҃ре твᲂеѧ̀ , ѿ пла́мене є҆го́же раз̾жего́хъ , ѿ без̾мѣ́рныхъ ѕѡ́лъ и҆зба́ви и҆ ѡ҆рᲂсѝ . и҆ ны́нѣ . Ве́щно ѡ҆брѣ́тъ срⷣце мᲂѐ тли́тель , и҆ ᲂу҆мертвѝ є҆̀ . но ты́ мѧ ᲂу҆́бѡ си́лᲂю бжⷭ҇твенᲂю ѡ҆дѣжѝ не и҆скꙋсᲂбра́чнаѧ мт҃и . и҆ пᲂбѣди́ти ми спᲂдо́би сегѡ̀ , ꙗ҆́кѡ да вѣ́рᲂю зᲂвꙋ́ ти , блгⷭ҇ве́наѧ ꙗ҆́же бг҃а пло́тїю ро́ждьшаѧ .

пѣ́снь , и҃ . і҆рмо́съ . Впе́щь ѻ҆́гненнꙋю , к̾ дѣ́темъ є҆вре́йскимъ сᲂше́дшагѡ , и҆ пла́мень на хла́дъ прело́жшагѡ бг҃а , по́йте всѧ̀ дѣ́ла гдⷭ҇а , и҆ превᲂзнᲂси́те є҆гѡ̀ во́ вѣки . Мно́гими ѕлы́ми мᲂи́ми , пᲂгᲂрбле́нъ є҆́смь лю́тѣ мно́жествѡмъ тѧгѡ́тъ , и҆ ѻ҆́ко мᲂѐ ѿ ню́дъ на нб҃са̀ несмѣ́ю вᲂзвестѝ . но вᲂпїю́ ти , пᲂми́лꙋй є҆ди́на бцⷣе , менѐ па́дшаго . Въ него́ же впадо́хъ гнѣ́въ , твᲂегѡ̀ сн҃а и҆ бг҃а чⷭ҇таѧ и҆зба́ви мѧ . и҆ в̾ ча́съ во́ньже хо́щетъ твᲂри́ти и҆спыта́нїе , бꙋ́ди ми по́мᲂщь пречⷭ҇таѧ , и҆ ѿ шꙋ́ихъ ко́злищь и҆зба́ви мѧ . сла́ва . Оу҆мерщве́наго мѧ мы́слено ѿ бесчи́сленыхъ мᲂи́хъ ѕѡ́лъ , вᲂздви́гни бг҃ᲂневѣ́сто ѻ҆трᲂкᲂви́це , и҆ мᲂльбо́ю твᲂе́ю и҆зба́ви мѧ ѿ всѧ́кїѧ пре́лести , дш҃етлѣ́ннаго врага̀ и҆ ᲂу҆бі́йцы . и҆ ны́нѣ . Ѕлᲂнеи҆спра́вленаѧ дш҃е , ка́кѡ ѡ҆чернѝ ѕлѣ̀ , пе́рвꙋю дᲂбро́тꙋ . ка́кѡ ѿвергла̀ є҆сѝ всѧ̀ є҆́же к̾ зижди́телю свᲂемꙋ̀ ѡ҆бѣ́ты , и҆ прїѧ́тъ ѕло́бнаѧ , но грѧдѝ и҆ притецы̀ бл҃гᲂче́стно к̾ бцⷣѣ .

пѣ́снь , ѳ҃ . і҆рмо́съ . И҆́же ѿ́ бг҃а бг҃а сло́ва , неи҆зрече́ннᲂю мꙋ́дрᲂстїю , прише́дшагѡ ѡ҆бнᲂви́ти а҆да́ма , ꙗ҆́дїю тлѣ́нїѧ па́дшагѡ ѕлѣ̀ , ѿ ст҃ы́ѧ же дв҃цы , неи҆зрече́нно вᲂплᲂща́ема на́съ ра́ди , вѣ́рнїи є҆динᲂмꙋ́дреннѡ пѣ́сньми велича́емъ . Дѣ́лы тѧ́жкими , чꙋ́вства ѡ҆скверни́хъ вᲂи́стинꙋ , и҆ всегѡ̀ стꙋдᲂдѣѧ́нїѧ и҆спо́лненъ є҆́смь . но ѡ҆чи́сти ᲂу҆́бѡ пречⷭ҇таѧ , вре́мѧ ми и҆спрᲂша́ющи бл҃гᲂꙋмиле́нїѧ , да непреста́ннѡ тѧ велича́ю . Ты́ мѧ бцⷣе ѡ҆правдѝ , є҆гда̀ ꙗ҆вѧ́тсѧ дѣ́ла сᲂкрᲂве́ннаѧ кᲂго́ждо ꙗ҆́вѣ , и҆́маши бо вᲂи́стинꙋ си́лꙋ . и҆ тмы́ мѧ и҆зба́ви , во странѣ́ мѧ ᲂу҆чинѝ свѣ́та мл҃твами сѝ , и҆дѣ́же є҆́сть ра́дᲂсть неи҆згл҃аннаѧ . сла́ва . Мᲂлю́ тѧ сло́ве , пре́жде прише́ствїѧ кᲂнца̀ пᲂкаѧ́нїе ми да́рꙋй тепло̀ , и҆ ᲂу҆миле́нїе слеза́мъ . цѣлᲂмꙋ́дрїе вкꙋ́пѣ , и҆ смире́нїе , любо́вь бжⷭ҇твенꙋю , и҆ ста́дꙋ твᲂемꙋ̀ ᲂу҆стрᲂе́нїе , мᲂльба́ми ро́ждьшїѧ тѧ̀ . и҆ нн҃ѣ . Оу҆́мныхъ же и҆ чꙋ́вственыхъ , преминꙋ́вши дв҃о сла́вᲂю и҆ че́стїю , ра́звѣ бг҃а , не ѡ҆мразѝ менѐ преминꙋ́вшаго в̾ прегрѣше́нїѧхъ ве́тхихъ же и҆ но́выхъ челᲂвѣ́къ , сᲂгрѣ́шшихъ на землѝ , но твᲂе́ю мᲂли́твᲂю спаси́ мѧ . та́же , дᲂсто́йнѡ є҆́сть . и҆ про́чеє , ѡ҆бы́чно . и҆ ѿпꙋ́стъ .

Въ сре́дꙋ , на ᲂу҆́трени . по а҃ , стихᲂло́гїи . сѣда́льны , крⷭ҇тны . гла́съ , в҃ . Спасе́нїе сᲂдѣ́ла , пᲂсредѝ землѝ хрⷭ҇тѐ бж҃е , на крⷭ҇тѣ̀ пречⷭ҇тѣи рꙋ́цѣ свᲂѝ прᲂсте́ръ , сᲂбира́ѧ всѧ̀ ꙗ҆зы́ки , зᲂвꙋ́щїѧ , гдⷭ҇и сла́ва тебѣ̀ . сти́хъ : вᲂзнᲂси́те гдⷭ҇а бг҃а на́шегѡ , и҆ кла́нѧйтесѧ пᲂдно́жїю но́гꙋ є҆гѡ̀ ꙗ҆́кѡ ст҃о є҆́сть . И҆́мже ѻ҆́бразᲂмъ плѣни́лъ є҆́сть вра́гъ а҆да́ма , дре́вᲂмъ снѣ́днымъ , та́кᲂже гдⷭ҇и са́мъ плѣни́лъ є҆сѝ ты̀ врага̀ , дре́вᲂмъ крⷭ҇тнымъ , и҆ стрⷭ҇тїю свᲂе́ю . на се́бо прїи́де втᲂры́и а҆да́мъ , взыска́ти заблꙋ́ждьшаго , и҆ ѡ҆живи́ти ᲂу҆ме́ршаго , бж҃е сла́ва тебѣ̀ . сла́ва , и҆ ны́нѣ , крⷭ҇тᲂбоⷢ҇ . Тебѐ велича́емъ бцⷣе вᲂпїю́ще , ра́дꙋисѧ же́ѕле , ѿ него́ же без̾сѣ́меннѡ бг҃ъ прᲂзѧбѐ , и҆ пᲂгꙋбѝ на крⷭ҇тѣ̀ сме́рть .

по в҃ , стихᲂло́гїи . сѣда́льны , гла́съ , в҃ . Живᲂтвᲂрѧ́щїи крⷭ҇тъ , твᲂеѧ̀ бл҃гᲂсти гдⷭ҇и , є҆го́же дарᲂва̀ на́мъ недᲂсто́йнымъ , тебѣ̀ прино́симъ в̾ мᲂли́твꙋ . спасѝ гра́дъ тво́й мᲂлѧ́щїисѧ бцⷣы ра́ди , є҆ди́не чл҃кᲂлю́бче . сти́х̾ : бг҃ъ же цр҃ь на́шъ пре́жде вѣ́къ , сᲂдѣ́ла спасе́нїе пᲂсредѣ̀ землѝ . Прᲂсвѣти́выи земны́ѧ крⷭ҇то́мъ , и҆ призва́въ на пᲂкаѧ́нїе грѣ́шныхъ , не ѿлꙋчѝ менѐ ста́да твᲂегѡ̀ па́стырю до́брыи . но взыщѝ менѐ заблꙋ́ждьшаго влⷣко , и҆ ст҃о́мꙋ твᲂемꙋ̀ ста́дꙋ сᲂпричтѝ , и҆́же є҆ди́не млⷭ҇тиве и҆ чл҃кᲂлю́бче . сти́х̾ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . И҆́же прᲂсвѣти́выи ст҃ы́ѧ свᲂѧ̀ па́че зла́та , и҆ прᲂсла́вивъ прпⷣбныѧ твᲂѧ̀ ꙗ҆́кѡ бл҃гъ . ѿ ни́хже ᲂу҆мᲂле́нъ быва́ѧ хрⷭ҇тѐ бж҃е , жи́знь на́шꙋ ᲂу҆мирѝ ꙗ҆́кѡ чл҃кᲂлю́бецъ , и҆ мᲂли́твꙋ и҆спра́ви ꙗ҆́кѡ кади́ло , и҆́же є҆ди́не во ст҃ы́хъ пᲂчива́ѧи . сла́ва , и҆ нн҃ѣ , крⷭ҇тᲂбоⷢ҇ . Дв҃аѧ и҆ мт҃и твᲂѧ̀ хрⷭ҇тѐ , на крⷭ҇тѣ̀ зрѧ́щи тѧ ме́ртва прᲂсте́рта , пла́чꙋщи го́рькѡ , гл҃аше сн҃е мо́й , что̀ стра́шнᲂе сїѐ та́инство ; и҆́же всѣ́мъ да́рꙋѧ живо́тъ вѣ́чныи , во́лею на крⷭ҇тѣ̀ ка́кѡ ᲂу҆мира́еши , сме́ртїю пᲂно́снᲂю .

по г҃ , стихᲂло́гїи . сѣда́ленъ , гла́съ , в҃ . Распѧ́тисѧ претерпѣ̀ на́съ ра́ди , и҆ ме́ртвъ бы́ти і҆с҃е живᲂда́вче , ꙗ҆́кѡ да рꙋ́кꙋ свᲂе́ю сᲂзда́нїе , ѿ сме́ртнагѡ ѡ҆сꙋже́нїѧ и҆зба́виши , ꙗ҆́кѡ бл҃гᲂꙋтро́бенъ бг҃ъ и҆ чл҃кᲂлю́бецъ , за мно́жество щедро́тъ , и҆́же є҆ди́нъ сы́и без̾грѣ́шенъ . сла́ва , и҆ ны́нѣ , крⷭ҇тᲂбоⷢ҇ . Чтⷭ҇ны́мъ крⷭ҇то́мъ сн҃а твᲂегѡ̀ сᲂхранѧ́еми , влⷣчце чⷭ҇таѧ бцⷣе , всѧ́къ прило́гъ бᲂри́телѧ , всѝ ᲂу҆до́бнѣ пᲂбѣжда́емъ . сегѡ̀ ра́ди по́ дᲂлгꙋ тѧ̀ ᲂу҆блажа́емъ , ꙗ҆́кѡ мт҃рь бж҃їю , є҆ди́нꙋ ᲂу҆пᲂва́нїе дш҃а́мъ на́шимъ .

Кано́нъ , чⷭ҇тно́мꙋ и҆ живᲂтвᲂрѧ́щемꙋ крⷭ҇тꙋ̀ . є҆мꙋ́же краегране́сїе си́це . паде́нїе бы́сть бѣсᲂво́мъ , крⷭ҇тнᲂе стᲂѧ́нїе . твᲂре́нїе і҆ѡ́сифᲂво . гла́съ , в҃ . пѣ́снь , а҃ . і҆рмо́съ . Во глꙋбинѣ̀ пᲂтᲂпѝ дре́вле , фараѡни́тскаѧ всѧ̀ во́инства , преѡ҆рꙋже́нꙋ си́лꙋ . вᲂпло́щшеєсѧ сло́во , преспѣ́ющїѧ грѣхѝ пᲂтреби́ло є҆́сть , пресла́вныи гдⷭ҇ь , ꙗ҆́кѡ прᲂсла́висѧ . запѣ́въ : сла́ва гдⷭ҇и крⷭ҇тꙋ̀ твᲂемꙋ̀ чⷭ҇тно́мꙋ . Престꙋпи́въ пе́рвꙋю за́пᲂвѣдь дре́вле первᲂзда́нныи , ѿ сада̀ сме́рть ѡ҆бъє́мъ . вᲂз̾дви́гжесѧ на́ древо без̾сме́ртныи , и҆ сме́рти вкꙋси́въ , без̾сме́ртїе всѣ́мъ чл҃кѡмъ дарᲂва̀ . Крⷭ҇тꙋ̀ вᲂдрꙋзи́вшꙋсѧ на землѝ , низ̾падѐ шата́нїе врага̀ , и҆ ѿ ню́дъ пᲂтреби́сѧ . пре́жде же ѿринᲂве́ныи чл҃къ , па́ки к̾ раю̀ вᲂсхо́дитъ . сла́ва тебѣ̀ и҆́же та́кѡ є҆ди́нᲂмꙋ бл҃гᲂи҆зво́лившемꙋ бг҃ꙋ на́шемꙋ . мⷱ҇ꙋ . Ꙗ҆́кѡ ѻ҆́вни , ꙗ҆́кѡ а҆́гньцы слᲂве́снїи , всѝ закала́еми , и҆ на ᲂу҆́ды не млⷭ҇тивнѡ ссѣка́еми , прехва́льнїи мч҃нцы , и҆ принесе́ни бы́сте и҆́же закла́ннᲂмꙋ ꙗ҆́кѡ ѻ҆вча́ти , и҆ цр҃кᲂвь ст҃ꙋ́ю первᲂро́днїи прᲂсвѣща́ете . мⷱ҇ꙋ . Крѣ́пᲂсть во стᲂѧ́нїи мꙋ́дрїи , всегда̀ твᲂрѧ́ще , лꙋка́выѧ врагѝ низ̾лᲂжи́сте , мечѝ с̾сѣка́еми . тѣ́мже бл҃же́ннѣй кᲂнчи́нѣ страстᲂно́сцы спᲂдо́бистесѧ . боⷢ҇ . Сщ҃е́нныи тѧ̀ прᲂро́ческїи ли́къ нарица́ше две́рь непрᲂхо́днꙋю , зе́млю и҆збра́ннꙋю , и҆ го́рꙋ несѣко́мꙋю , пречⷭ҇таѧ влⷣчце . влⷣкꙋ бо всѣ́хъ рᲂдила̀ є҆сѝ , и҆́же во́лею распѧ́тїе пло́тїю прїе́мшагѡ .

Дрꙋгі́и кано́нъ , прест҃ѣ́й бцⷣѣ . і҆рмо́съ . Грѧди́те лю́дїє .= запѣ́в̾ : прест҃а́ѧ гжⷭ҇е бцⷣе спасѝ на́съ . В=сѝ вѣ́рнїи прїиди́те , сᲂгла́сно вᲂспᲂе́мъ бцⷣꙋ . та́ бо хрⷭ҇та̀ рᲂдила̀ є҆́сть , па́че ᲂу҆ма̀ чл҃ча , и҆ не преста́ннѡ мо́литъ спастѝ всѣ́хъ на́съ . И҆́же ѻ҆́бразъ ѻ҆́ч҃а сᲂста́ва , и҆з̾ тебѐ прїѧ́тъ с̾мѣше́нїе бг҃ᲂрᲂди́тельнице , и҆ и҆стлѣ́вшїи ѻ҆́бразъ прᲂсла́ви , и҆ сегѡ̀ но́ва сᲂтвᲂрѝ . Херꙋви́мъ чⷭ҇тнѣ́йши сꙋ́щи , и҆ нбⷭ҇ныхъ крꙋ́гъ превы́шши бы́сть , бг҃а бо па́че ᲂу҆ма̀ во ᲂу҆тро́бѣ свᲂе́й без̾стра́стнѡ вмѣсти́ла є҆сѝ . И҆збавле́нїе на́шимъ грѣхо́мъ рᲂдила̀ є҆сѝ , бл҃гᲂда́телѧ гдⷭ҇а , и҆змѣни́вши ме́ртвᲂсти пра́ѻ҆ц҃а а҆да́ма , вᲂзвела̀ є҆сѝ є҆стество̀ к̾ нбⷭ҇нымъ .

пѣ́снь , г҃ . і҆рмо́съ . Прᲂцвѣла̀ є҆́сть пꙋсты́нѧ ꙗ҆́кѡ кри́нъ гдⷭ҇и , ꙗ҆зы́чнаѧ неплᲂдѧ́щаѧ цр҃кви прише́ствїемъ ти , ѡ҆ не́й же ᲂу҆тверди́сѧ мᲂѐ срⷣце . Распина́емь пᲂкᲂлѣба́лъ є҆сѝ всю̀ тва́рь гдⷭ҇и , и҆ вѣ́рныѧ ᲂу҆тверди́лъ є҆сѝ , вᲂспѣва́ющихъ си́лꙋ твᲂю̀ , и҆ неи҆зрече́ннᲂе сло́ве схᲂжде́нїе твᲂѐ . Ра́й ѿве́рзлъ є҆сѝ крⷭ҇то́мъ свᲂи́мъ влⷣко , и҆ разбо́йника в̾ведѐ , разꙋмѣ́вшаго црⷭ҇твїе твᲂѐ , и҆ бᲂга́тство бжⷭ҇твенагѡ тѝ бл҃гᲂꙋтро́бїѧ . мⷱ҇ꙋ . Прᲂцвѣто́ша мч҃нцы , ꙗ҆́кᲂже шипцы̀ бл҃гᲂꙋха́нїи , в̾ мы́сленыхъ де́брехъ , и҆ ѕлᲂсмра́днꙋю ле́сть ѿгна́ша , и҆ вѣ́рнымъ срⷣца̀ ѡ҆бл҃гᲂꙋха́ша . мⷱ҇ꙋ . Свѣти́льницы вселе́ннѣй , вѣ́рнымъ спаси́телїе ст҃і́и , свѣ́тлыми дх҃а зарѧ́ми всѣ́хъ прᲂсвѣти́те , и҆́же ва́съ по́ дᲂлгꙋ ᲂу҆блажа́ющихъ . боⷢ҇ . Вᲂз̾двиза́ема на́ древо , живᲂда́вца ви́дѧщи , и҆ во́лею ᲂу҆мира́юща , и҆́же всѣ́мъ жи́знь пᲂдаю́щаго , бᲂлѧ́ше ᲂу҆тро́бᲂю всенепᲂро́чнаѧ .

и҆́нъ і҆рмо́съ . Оу҆твердѝ на́съ сᲂбо́ю гдⷭ҇и .= З=латꙋ́ю ꙗ҆́кѡ вᲂи́стинꙋ кади́льницꙋ , и҆ рꙋ́чкꙋ ма́нны , и҆ бж҃їю го́рꙋ , и҆ пᲂла́тꙋ краснꙋ̀ бжⷭ҇твенꙋю , тѧ̀ дв҃о и҆менꙋ́емъ . Цр҃кᲂвь и҆ сщ҃е́ннᲂе жили́ще сло́ва , сꙋ́щи бцⷣе , сᲂгрѣше́нїемъ ѡ҆чисти́лище , пречⷭ҇таѧ бꙋ́ди ми при́снѡ дв҃о . Ни ѧ҆зы́къ земнᲂро́дныхъ , ни ᲂу҆́мъ беспло́тныхъ , вᲂзмо́жетъ ржⷭ҇тво̀ твᲂѐ сказа́ти , вы́ше є҆стества́ бо и҆ смы́сла , бцⷣе зижди́телѧ пᲂрᲂдила̀ є҆сѝ . Оу҆тверже́нїе бꙋ́ди и҆ прибѣ́жище , и҆ пᲂкро́въ дв҃о бг҃ᲂрᲂди́тельнице , и҆́же вѣ́рᲂю к̾ тебѣ̀ прибѣга́ющимъ , и҆ бж҃їю тѧ мт҃рь прᲂвᲂзвѣща́ющимъ .

пѣ́снь , д҃ . і҆рмо́съ . Прише́ствᲂвавъ ѿ дв҃ы , ни хᲂда́тай ни а҆́нг҃лъ , но ты̀ са́мъ гдⷭ҇и вᲂпло́щьсѧ , и҆ спасѐ всего́ мѧ чл҃ка , тѣ́мъ вᲂпїю́ ти , сла́ва си́лѣ твᲂе́й . Оу҆праздни́лъ є҆сѝ нача́ло лю́тагѡ мирᲂде́ржца , на́ древо вᲂзнᲂси́мь , и҆ клѧ́твꙋ пᲂтреби́лъ є҆сѝ . тѣ́мже тѧ̀ сла́вимъ , и҆́же тебѐ ра́ди спасе́нїи , є҆ди́не гдⷭ҇и . Распрᲂсте́рта на́ древѣ ви́дѣвъ тѧ сл҃нце и҆ скры̀ свѣ́тъ , го́ры и҆ ка́менїе распадо́шасѧ , и҆ за́вѣса цр҃ко́внаѧ раздра́сѧ всеси́льне . мⷱ҇ꙋ . Оу҆мерщвѧ́еми врага̀ до кᲂнца̀ ᲂу҆мертви́сте , желѣ́зᲂмъ стрꙋ́жеми , ко́жнагѡ ᲂу҆мерщве́нїѧ дебельства̀ сᲂвлеко́стесѧ мч҃нцы гдⷭ҇ни , и҆ сла́вᲂю ѡ҆блеко́стесѧ . мⷱ҇ꙋ . Оу҆сѣка́емыми глава́ми мч҃нцы ᲂу҆́жаснѡ , лꙋка́выхъ си́лъ главы̀ ѿсѣко́ша , и҆ пребыва́ющꙋю сла́вꙋ наслѣ́дᲂваше ра́дꙋющесѧ . боⷢ҇ . Вᲂсїѧ̀ и҆з̾ ᲂу҆тро́бы твᲂеѧ̀ , ѻ҆трᲂкᲂви́це не и҆скꙋсᲂбра́чнаѧ , ѻ҆́ч҃еє заре́нїе хрⷭ҇то́съ , и҆ прᲂсвѣтѝ вселе́ннꙋю распина́емь , и҆ бѣсо́вскꙋю тмꙋ̀ пᲂтреби́лъ є҆́сть .

и҆́нъ і҆рмо́съ , то́йже . Ка́плю ми ᲂу҆миле́нїѧ ѡ҆дᲂждѝ влⷣчце , взима́ющи всѧ́къ срⷣца мᲂегѡ̀ зно́й , и҆ дрема́нїѧ мᲂегѡ̀ мꙋ́тныѧ пᲂто́ки ᲂу҆ставлѧ́ющи . Ѻ҆рꙋ́жїемъ мѧ̀ сласте́й ᲂу҆ѧ́звена , и҆ лежа́ща ᲂу҆ра́нена , пречⷭ҇таѧ непре́зри , но и҆сцѣлѝ , кᲂпїе́мъ и҆ кро́вїю , распѧ́тагѡ сн҃а твᲂегѡ̀ и҆ бг҃а на́шегѡ . Ѻ҆бᲂга́тивши влады́чествᲂмъ всю̀ тва́рь , лю́тѣ мѧ ѡ҆бнища́вша бл҃гᲂда́ти бжⷭ҇твенѣй спᲂдо́би ꙗ҆́кѡ да велича́ю тѧ , ꙗ҆́кѡ бл҃гꙋ́ю мᲂю̀ пред̾ста́тельницꙋ всенепᲂро́чнаѧ . Прᲂхлади́ мѧ дв҃це пᲂкаѧ́нїемъ , и҆ ѡ҆дᲂждѝ се́рдце мᲂѐ и҆з̾со́хшеє зно́емъ страсте́й , вᲂзлива́ющи на мѧ̀ ма́сло , и҆сцѣле́нїе млⷭ҇ти твᲂеѧ̀ .

пѣ́снь , є҃ . і҆рмо́с̾ . Хᲂда́тай бг҃ꙋ и҆ чл҃кᲂмъ бы́сть хрⷭ҇тѐ бж҃е , тᲂбо́ю бо влⷣко к̾ свѣтᲂнача́льникꙋ ѻ҆ц҃ꙋ ти , ѿ́ нᲂщи невѣ́дѣнїѧ приведе́нїе ѡ҆брѣто́хᲂмъ .= На крⷭ҇тѣ̀ пригвᲂзди́всѧ , земна́ѧ ѡ҆снᲂва́нїѧ пᲂкᲂлѣба́лъ є҆сѝ . и҆ кᲂпїе́мъ прᲂбᲂда́емь , ѕмі́ѧ началᲂѕло́бнаго закла́лъ є҆сѝ , и҆ ка́плю спасе́нїѧ всѣ́мъ хрⷭ҇тѐ и҆стᲂчи́лъ є҆сѝ . Нетерпѧ́ше зрѣ́ти заблꙋжда́ема , є҆го́же рꙋка́ма сᲂзда́въ , рꙋ́цѣ распрᲂсте́рлъ є҆сѝ сло́ве на́ древѣ ᲂу҆мерщвѧ́емь , и҆ ѡ҆живи́лъ є҆сѝ сегѡ̀ дре́вᲂмъ дре́вле ᲂу҆ме́ршаго . =мⷱ҇ꙋ . Дрꙋ́зи хрⷭ҇то́вы , те́плїи чл҃кѡмъ застꙋ́пницы , цвѣ́ти честні́и , преꙋдо́бренїи сᲂсꙋ́ди дх҃а мꙋ́дрїи стрⷭ҇тᲂте́рпцы , дᲂсто́йнѣ ᲂу҆блажа́ютсѧ . мⷱ҇ꙋ . Зако́ннѡ пᲂстрада̀ , ли́къ ст҃ы́хъ твᲂи́хъ страда́лецъ , без̾зако́нныхъ пᲂсрамѝ , є҆ди́не закᲂнᲂда́вче си́лᲂю твᲂе́ю , и҆ скᲂнча́въ тече́нїе , пᲂбѣ́дно вѣнча́сѧ . боⷢ҇ . Ꙗ҆ви́сѧ чⷭ҇таѧ по ржⷭ҇твѣ̀ нетлѣ́нна , бг҃ъ бо и҆з̾ тебѐ рᲂди́сѧ вᲂплᲂща́емь . є҆го́же ᲂу҆смᲂтри́вши распина́ема нетерпѧ́щи , ᲂу҆тро́бнᲂю бᲂлѣ́знїю вᲂсклица́ше .

и҆́нъ і҆рмо́съ . Свѣ́та пᲂда́телю . Вᲂплᲂще́нна и҆з̾ тебѐ бг҃ᲂрᲂди́тельнице , вѣ́рнїи пᲂзна́хᲂмъ . без̾ сѣ́мене сн҃а ро́ждьшасѧ бг҃а и҆́стинна , и҆ чл҃ка є҆стество́мъ . тѣ́мже тѧ̀ сла́вимъ . Пᲂд̾ кро́въ тво́й пречⷭ҇таѧ и҆ застꙋпле́нїе , вѣ́рнїи всегда̀ прибѣга́юще вѣ́рᲂю . тебѐ ра́ди дв҃о и҆збавлѧ́емсѧ всѧ́кагѡ лю́тагѡ ѡ҆бстᲂѧ́нїѧ . И҆зба́ви на́съ и҆скꙋше́нїи , и҆ ѿбꙋ́ри пᲂмышле́нїи пречⷭ҇таѧ . всѧ́кагѡ гнѣ́ва , и҆ всѧ́кагѡ грѣха̀ , гла́да же и҆ гꙋби́тельства , и҆ вѣ́чнагѡ дв҃о мꙋче́нїѧ . Пред̾ста́тельница на́ша , спасе́нїе и҆ ᲂу҆пᲂва́нїе влⷣчце хрⷭ҇тїа́нѡмъ сꙋ́щи , спаса́й и҆́же любо́вїю тѧ̀ при́снѡ вѣ́рнѡ вᲂспѣва́ющихъ , дв҃о всепѣ́таѧ .

пѣ́снь , ѕ҃ . і҆рмо́съ . Ко́ гдⷭ҇ꙋ ѿ ки́та і҆ѡ́на вᲂпїѧ́ше , ты́ мѧ вᲂз̾вѣдѝ и҆з̾ глꙋбины̀ а҆́да влⷣко . да ꙗ҆́кѡ и҆зба́вителю во́ гласѣ хвале́нїѧ , и҆́стиннымъ же дх҃ᲂмъ пᲂжрꙋ́ ти . На ю҆́ныѧ главы̀ пᲂлᲂжѝ дла́ни и҆нᲂгда̀ і҆а́кѡвъ , крⷭ҇та̀ прᲂписᲂва́ше , на не́мже сло́ве распрᲂсте́рлъ є҆сѝ дла́ни . и҆ ѿ рꙋкѝ льсти́вагѡ бᲂрца̀ , и҆збавлѧ́ѧ хрⷭ҇тѐ чл҃чество . Распе́ншꙋсѧ хрⷭ҇тѐ тебѣ̀ всѣ́хъ цр҃ю во́лею , црⷭ҇твꙋющїи грѣ́хъ пᲂтребѝ . а҆да́мъ же и҆́же дре́вле и҆з̾ раѧ̀ и҆згна́ныи , в̾ то́й вселѧ́етсѧ па́ки , тебѐ вᲂспѣва́ѧ . мⷱ҇ꙋ . Красны̀ сꙋ́ще в̾ ра́нахъ сщ҃е́нныѧ , и҆́же бл҃гᲂлѣ́пїемъ ᲂу҆краси́вшихсѧ нбⷭ҇нымъ , вᲂи́стинꙋ вᲂзлю́бленыѧ гдⷭ҇ни мч҃нки , несꙋмѣ́ннымъ срⷣцемъ вᲂспᲂе́мъ . мⷱ҇ꙋ . Неꙋгаси́мꙋ свѣщꙋ̀ свᲂю̀ сᲂблюдо́ша , бжⷭ҇твенїи мч҃нцы , напᲂи́вше бᲂга́тнѡ крᲂвьмѝ свᲂи́ми , и҆ бжⷭ҇твенагѡ черто́га пᲂлꙋчи́ша вхо́дъ ра́дꙋющесѧ . боⷢ҇ . Пᲂе́мъ тѧ всепѣ́тꙋю , ꙗ҆́кѡ бг҃а ро́ждьшꙋю препѣ́таго . и҆́же на́ древѣ сᲂпрᲂтивᲂбᲂрца̀ врага̀ пᲂгꙋ́бльша , и҆ и҆з̾ тлѝ и҆зба́вльшаго , вᲂспѣва́ющихъ тᲂго̀ страда́нїѧ .

и҆́нъ і҆рмо́съ . Вбе́зднѣ грѣхо́внѣй . И҆́же во́лею всѧ̀ сᲂдѣ́лавыи , и҆зво́ли во́ чрево не и҆скꙋсᲂбра́чныѧ всели́тисѧ . и҆ и҆́же тлѣ́нїемъ бᲂлѧ́щїѧ , нетлѣ́нїемъ ѡ҆бᲂгати́лъ є҆́сть ꙗ҆́кѡ млрⷭ҇дъ . Превы́шши вы́шнихъ си́лъ , и҆ ст҃ѣ́йши є҆сѝ пренепᲂро́чнаѧ . па́че є҆стества̀ в̾мѣсти́вши , невмѣсти́мᲂе сло́во во́ чрево свᲂѐ . На пꙋти́ мѧ жите́йстѣмъ заблꙋжда́юща , и҆ в̾ без̾пꙋ́тїе ча́стѡ в̾па́дающа грѣхо́внᲂе , к̾ стезѝ пᲂкаѧ́нїѧ влⷣчце наста́ви мѧ . Непре́зри чи́стаѧ мᲂльбы̀ на́ша , и҆́же на тѧ̀ вᲂзло́жшихъ наде́жꙋ ра́бъ твᲂи́хъ , прибѣ́жище бо влⷣчце , и҆ дш҃а́мъ ѡ҆чисти́лище ты̀ є҆сѝ .

пѣ́снь , з҃ . і҆рмо́съ . Бг҃ᲂпрᲂти́вно велѣ́нїе без̾зако́ннꙋюща мꙋчи́телѧ , высо́къ пла́мень вᲂз̾несло̀ є҆́сть , хрⷭ҇то́съ же прᲂсте́ръ бг҃ᲂчести́вымъ дѣ́темъ , хла́дъ дх҃о́вныи , сы́и бл҃гᲂслᲂве́нъ и҆ препрᲂсла́вленъ . Ѻ҆рꙋ́жїе и҆́же пре́жде ѡ҆браща́емᲂе , плещѝ мнѣ̀ дае́тъ , ѿ не́ли же кᲂпїе́мъ прᲂбᲂде́сѧ , на крⷭ҇тѣ̀ вᲂз̾дви́женыи , бл҃гᲂꙋтро́бне гдⷭ҇и . тѣ́мже велича́ю тѧ , твᲂе́ю чⷭ҇тно́ю стрⷭ҇тїю ѡ҆брѣ́тъ без̾сме́ртїе . И҆́же ѕмі́й вᲂз̾дви́женъ мѡѷсе́ᲂмъ на́ древо , бжⷭ҇твенᲂе вᲂз̾дви́женїе прᲂѡбража́ше хрⷭ҇то́во . и҆́же льсти́вагѡ ѕмі́ѧ ᲂу҆мертви́вша , всѣ́хъ же ѡ҆жи́вльша на́съ , ᲂу҆мертви́вшїѧсѧ престꙋпле́нїемъ . мⷱ҇ꙋ . Сы́нѡве быва́ете бжⷭ҇твенымъ прїѡбще́нїемъ , без̾нача́льна рᲂди́телѧ сн҃ꙋ сᲂбез̾нача́льнꙋ ст҃і́и , стра́сти пречⷭ҇тѣй ᲂу҆пᲂдо́бльшесѧ . тѣ́мже бра́тїю ва́съ нари́четъ , и҆ наслѣ́дники црⷭ҇твїѧ є҆гѡ̀ . мⷱ҇ꙋ . На́ крⷭ҇тъ вᲂз̾двиза́еми , ꙗ҆́кᲂже влⷣка , и҆ кᲂпїе́мъ прᲂбᲂда́еми , и҆ мечѝ с̾сѣка́еми , во ѻ҆гни́ же и҆ вᲂдѣ̀ раз̾дѣлѧ́еми , и҆ сдрᲂблѧ́еми кᲂлесы̀ , бг҃ᲂно́снїи ра́дᲂвахꙋсѧ мч҃нцы . боⷢ҇ . Гро́зда сᲂзрѣ́вша , є҆го́же невᲂз̾дѣ́ланно чи́стаѧ вᲂз̾расти́ла є҆сѝ , на́ древѣ ꙗ҆́кѡ ᲂу҆зрѣ̀ пᲂвѣ́шена в̾зыва́ше , ча́до сла́дкᲂе мсто̀ и҆ска́паѧи , и҆́мже страсте́й пїѧ́нство ѿѧ́тсѧ .

и҆́нъ і҆рмо́съ , то́йже . Крѣ́пᲂсть мᲂѧ̀ и҆ пѣ́нїе , и҆ стѣна̀ не ѡ҆бᲂри́маѧ , ты̀ є҆сѝ влⷣчце , и҆ и҆звѣ́стнᲂе застꙋпле́нїе , бᲂрю́щїѧ мѧ бѣ́сы пᲂбѣдѝ , при́снѡ и҆́щꙋщихъ дш҃ꙋ мᲂю̀ ᲂу҆мертви́ти . двⷤа . Бг҃а вᲂпло́щши ѿ дв҃ственыхъ свᲂи́хъ крᲂве́й , ѡ҆бᲂжи́вшаго дв҃о чл҃чество . тѣ́мже мѧ стрⷭ҇тьмѝ ѡ҆скверне́наго , и҆ и҆стлѣ́вша вра́жїими кᲂзньмѝ , и҆зба́ви мл҃твами сѝ . Пе́щь прᲂѡбража́ше твᲂѐ ржⷭ҇тво̀ всенепᲂро́чнаѧ , ѻ҆́трᲂки бо не ѡ҆палѝ , ꙗ҆́кᲂже ни ᲂу҆тро́бꙋ твᲂю̀ ѻ҆́гнь бжⷭ҇твеныи . тѣ́мже мᲂлѝ , рабы̀ свᲂѧ̀ ѻ҆гнѧ̀ вѣ́чнагѡ и҆зба́вити .

пѣ́снь , и҃ . і҆рмо́съ . Пе́щь ѻ҆́гненна и҆нᲂгда̀ в̾ вавилѡ́нѣ , дѣ́йство раздѣлѧ́ше , бж҃їимъ велѣ́нїемъ халдѣ́и ѡ҆палѧ́ющи , вѣ́рныѧ же прᲂхлажда́ющи пᲂю́ща , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Кро́вїю и҆з̾ твᲂи́хъ ре́бръ нетлѣ́нныхъ , и҆ска́павшею дᲂлгᲂтерпѣли́ве , тва́рь ѡ҆ст҃и́сѧ . рѣ́ки же мнᲂгᲂбо́жїѧ и҆з̾сꙋшены̀ бы́ша . тꙋ́чи же ꙗ҆ви́шасѧ бл҃гᲂче́стїѧ , пре́лести без̾до́ждїе пᲂтреблѧ́юще . Распѧ́тїѧ твᲂегѡ̀ со́лнце ᲂу҆стыдѣ́сѧ , и҆ лꙋчѝ сᲂкры́ло є҆́сть . ка́менїе же распаде́сѧ , и҆ а҆́дъ ни́зꙋ ᲂу҆страши́сѧ . пра́ведныхъ же дꙋ́си взыгра́шасѧ , ча́юще кᲂне́чнагѡ сло́ве и҆збавле́нїѧ . мⷱ҇ꙋ . И҆сцѣле́нїѧ вѣ́рнымъ то́чатъ , ѡ҆ста́нки мᲂще́й страстᲂте́рпецъ , и҆ всегда̀ вре́ды не ᲂу҆до́бь и҆сцѣ́льныхъ бᲂлѣ́зней и҆сцѣлева́ютъ . ꙗ҆́кѡ ди́венъ є҆сѝ гдⷭ҇и зᲂво́мъ бл҃гᲂда́рнѡ , в̾ ст҃ы́хъ свᲂи́хъ мꙋ́ченицѣхъ . мⷱ҇ꙋ . Оу҆ста̀ ѕвѣре́мъ и҆ врѣ́нїѧ кᲂно́бнаѧ , пᲂмерза́нїѧ же и҆ стꙋ́дени , тѧ́жесть зно́ѧ , нᲂгте́й и҆стерза́нїѧ , претерпѣ́сте крѣпча́йше , и҆ затвᲂре́нїѧ , и҆ нꙋ́жнꙋю сме́рть страстᲂте́рпцы . тѣ́мже со хрⷭ҇то́мъ прᲂславлѧ́етесѧ . боⷢ҇ . Пло́ть и҆з̾ твᲂегѡ̀ чре́ва прїе́млетъ хᲂтѧ́и , и҆ ви́димъ быва́етъ неви́димыи , и҆ распѧ́тїе претерпѣва́етъ , и҆ клѧ́тва нарица́етсѧ , ѿ клѧ́твы и҆зима́ѧ всѣ́хъ , сн҃ъ тво́й бг҃ᲂра́дᲂваннаѧ влⷣчце .

и҆́нъ і҆рмо́съ . Дре́вле прᲂхла́ждьшаго . Жи́во и҆ незави́стно спасе́нїе , на́мъ земнᲂро́днымъ , нескве́рнаѧ ю҆́нице , ꙗ҆́же пᲂрᲂдѝ а҆́гньца бж҃їѧ , непре́зри менѐ зᲂвꙋ́ща , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Бжⷭ҇твенᲂе твᲂѐ пречⷭ҇таѧ ржⷭ҇тво̀ ѡ҆бнᲂвѝ на́съ , и҆ всѣ́хъ пᲂказа̀ ча́да и҆ сы́ны дню̀ и҆ свѣ́тꙋ . и҆ спа́сшесѧ взыва́емъ , блгⷭ҇ви́те всѧ̀ дѣ́ла гдⷭ҇нѧ гдⷭ҇а . Живꙋ́ю во́дꙋ пᲂрᲂдила̀ є҆сѝ чⷭ҇таѧ , ѿ лᲂже́снъ дв҃ческихъ , и҆ ѡ҆ставле́нїе и҆стᲂчи́ла є҆сѝ , ѿ и҆сто́чникъ и҆сцѣле́нїи вѣ́рнымъ . тѣ́мже всѝ зᲂве́мъ , блгⷭ҇ви́те всѧ̀ дѣ́ла гдⷭ҇нѧ гдⷭ҇а . Гро́здъ зрѣ́лыи жи́зни , ты̀ вᲂзрасти́ла є҆сѝ чи́стаѧ , лᲂза́ бо є҆сѝ , ꙗ҆́же ᲂу҆слажда́ющи зе́млю бл҃ги́ми . ю҆́же пᲂю́ще зᲂве́мъ , блгⷭ҇ви́те всѧ̀ дѣ́ла гдⷭ҇нѧ гдⷭ҇а . та́же , пѣ́снь бцⷣѣ . вели́читъ дш҃а мᲂѧ̀ .= и҆ =пᲂкло́ны .

пѣ́снь , ѳ҃ . і҆рмо́съ . Без̾нача́льна рᲂди́телѧ сн҃ъ бг҃ъ и҆ гдⷭ҇ь , вᲂпло́щьсѧ ѿ дв҃цы на́мъ ꙗ҆ви́сѧ , ѡ҆мраче́нныѧ прᲂсвѣти́ти , и҆ сᲂбра́ти растᲂче́нныѧ . тѣ́мъ всехва́льнꙋю бцⷣꙋ велича́емъ . И҆сцѣлѝ сᲂкрꙋше́нїе и҆ ѡ҆каѧ́нство мᲂѐ , твᲂе́ю ра́нᲂю є҆ди́не неи҆з̾слѣ́дᲂванне . и҆ пᲂгребе́нныи ѻ҆́бразъ лꙋка́выми страстьмѝ , ѡ҆чи́сти стра́стїю свᲂе́ю влⷣко , бж҃е спасе́нїѧ мᲂегѡ̀ . Ви́дѣнъ бы́сть вᲂзнᲂси́мъ , на кипари́сѣ влⷣко , и҆ на пе́вгѣ и҆ ке́дрѣ ра́ди бл҃гᲂсти . и҆́же є҆ди́не ст҃ы́ѧ трⷪ҇цы , є҆ди́нъ сᲂста́въ и҆мы́и во двᲂю̀ є҆стествꙋ̀ , да спасе́ши чл҃чество . мⷱ҇ꙋ . Крⷭ҇то́мъ ꙗ҆́кѡ во брᲂнѧ̀ , ѡ҆бо́лкшесѧ мꙋ́ченицы , невреди́ми ꙗ҆ви́стесѧ , всѣ́ми стрѣла́ми , сᲂдѣ́лателѧ ѕло́бы . тѣ́мже ны́нѣ тᲂго̀ пᲂпира́ете , тᲂмꙋ̀ рꙋга́ющесѧ ꙗ҆́кѡ хꙋ́дѣй пти́цѣ всегда̀ . мⷱ҇ꙋ . Землѧ̀ ᲂу҆́бѡ зи́нꙋвши кро́ви ва́ша прїе́млетъ , нб҃о же бжⷭ҇твеныѧ прїѧ́тъ дх҃и . и҆ со ѻ҆́гнеными чи́ньми бжⷭ҇твенᲂмꙋ прⷭ҇то́лꙋ , пред̾стᲂитѐ стрⷭ҇тᲂте́рпцы мч҃нцы , цр҃ко́внїи стᲂлпѝ непᲂкᲂле́блемїи . боⷢ҇ . И҆стлѣ́вшеє ѡ҆бнᲂви́ла є҆сѝ є҆стество̀ пра́ѻ҆ч҃еє , па́че є҆стества́ бо ро́ждьши , є҆стествꙋ̀ всемꙋ̀ сᲂзда́телѧ , и҆ дв҃ствꙋющи , є҆го́же на крⷭ҇тѣ̀ пᲂвѣ́шена дре́вле ви́дѧщи , вᲂсклица́ше прест҃а́ѧ мт҃и дв҃о .

и҆́нъ і҆рмо́съ . И҆́же ѿ́ бг҃а бг҃а сло́ва . Чл҃кᲂлю́бїѧ бжⷭ҇твенагѡ спᲂдо́би ѻ҆трᲂкᲂви́це , ꙗ҆́же є҆ди́на чл҃кᲂлю́бца бг҃а , пло́ть ѿ тебѐ заи҆мᲂва́вша . неи҆з̾гл҃аннѡ ро́ждьши , и҆зба́ви мѧ бꙋ́дꙋщагѡ пла́мене , и҆ мꙋ́ки всѧ́кїѧ , и҆́же любо́вїю тебѐ сла́вѧщаго . вⷤ . Ꙗ҆́кѡ тве́рдꙋю пред̾ста́тельницꙋ . ꙗ҆́кѡ ᲂу҆пᲂва́нїе и҆ стѣ́нꙋ , и҆ наде́жꙋ и҆ пᲂкро́въ тве́рдъ , и҆ неѡ҆бᲂри́мᲂе ᲂу҆тверже́нїе , и҆ небꙋ́рнᲂе приста́нище , є҆ди́нꙋ крѣ́пкᲂе прибѣ́жище стѧжа́вше тѧ всѝ , спаса́емсѧ всепѣ́таѧ . Свѣ́тъ ро́ждьшаѧ бжⷭ҇твеныи , мно́гими пᲂмрачи́вшеєсѧ , страстны́ми наведе́нїи пᲂмышле́нїи чꙋжда́гѡ , срⷣце мᲂѐ прᲂсвѣтѝ ѻ҆трᲂкᲂви́це , ка́плю пᲂдаю́щи ми при́снѡ , ѿ скве́рнъ грѣха̀ дв҃о ѡ҆чища́ющꙋю мѧ̀ .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стихѣ́ры , крⷭ҇тны . гла́съ , в҃ . Крⷭ҇та̀ твᲂегѡ̀ дре́во хрⷭ҇тѐ бж҃е , дре́во живо́тнᲂе пᲂказа̀ , на́мъ вѣ́рꙋющимъ в̾ тѧ̀ , и҆ си́мъ ᲂу҆празднѝ , и҆́же и҆мꙋ́щаго держа́вꙋ сме́рти , и҆ ѡ҆живи́лъ є҆сѝ на́съ ᲂу҆мерщве́ныѧ грѣхо́мъ . тѣ́мже вᲂпїе́мъ тѝ , бл҃гᲂда́телю всѣ́хъ , гдⷭ҇и сла́ва тебѣ̀ .

сти́хъ : и҆спо́лнихᲂмсѧ за ᲂу҆́тра . Во́лею ѡ҆бнища́въ , ѡ҆бнища́нїѧ ра́ди а҆да́мᲂва хрⷭ҇тѐ бж҃е . прише́лъ є҆сѝ на́ землю ѿ дв҃ы вᲂпло́щьсѧ , и҆ распѧ́тїе прїѧ́тъ , да на́съ свᲂбᲂди́ши , ѿ рабо́ты вра́жїѧ , гдⷭ҇и сла́ва тебѣ̀ .

сти́хъ : и҆ бꙋ́ди свѣ́тлᲂсть . мⷱ҇ꙋ . Всѧ́къ гра́дъ и҆ страна̀ , чтꙋ́тъ мо́щи ва́ша , ѽ стрⷭ҇тᲂте́рпцы мч҃нцы . вы́ бо зако́ннѡ пᲂстрада́вше , вѣнцы̀ съ нб҃сѐ прїѧ́сте , и҆ сегѡ̀ ра́ди сщ҃е́нникѡмъ є҆стѐ пᲂхвала̀ , цр҃е́мъ пᲂбѣ́да , и҆ цр҃квамъ бл҃гᲂлѣ́пїе . сла́ва , и҆ ны́нѣ , крⷭ҇тᲂбоⷢ҇ . Гро́здъ всезрѣ́лыи чи́стаѧ , є҆го́же невᲂздѣ́ланнѡ во ᲂу҆тро́бѣ нᲂси́ла є҆сѝ , на́ древѣ ꙗ҆́кѡ ᲂу҆зрѣ̀ сегѡ̀ пᲂвѣ́шена , рыда́ющи вᲂсклица́ше , и҆ взыва́ше , ча́до сла́дᲂсть и҆ска́паѧи , є҆ю́же ѿꙗ҆́тъсѧ пїѧ́нство всѧ́ко стрⷭ҇те́й бл҃гᲂда́телю , менѐ ра́ди тебѐ ро́ждьшїѧ , бжⷭ҇твеными мᲂльба́ми , ꙗ҆́кѡ милᲂсе́рдъ .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= сла́ва , и҆ ны́нѣ , крⷭ҇тᲂбоⷢ҇ . во́ гласъ трᲂпарѧ̀ . пᲂсе́мъ , є҆ктенїѧ̀ . и҆ ча́съ , а҃ . =и҆ ѿпꙋ́стъ .

Въ сре́дꙋ , бл҃же́нны . гла́съ , в҃ .

Гла́съ ти прино́симъ разбо́йничь , и҆ мо́лимсѧ , пᲂмѧнѝ на́съ гдⷭ҇и во црⷭ҇твїи свᲂе́мъ .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . На крⷭ҇тъ вᲂз̾не́сшꙋтисѧ сп҃се , со вᲂз̾не́слъ є҆сѝ всѐ челᲂвѣ́ческᲂе є҆стество̀ , непреста́ннѡ пᲂю́щеє тѧ̀ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . А҆да́мᲂво рꙋкᲂписа́нїе , кᲂпїе́мъ свᲂи́мъ раз̾дра́лъ є҆сѝ , тᲂго̀ написꙋ́ѧ в̾ кни́зѣ живы́хъ чл҃кᲂлю́бче .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Пᲂдо́бницы бы́вше , распѧ́тїе претерпѣ́вшемꙋ . тᲂго̀ ѻ҆́бщницы и҆ сла́вѣ , ꙗ҆ви́стесѧ мꙋ́ченицы .

сла́ва . Виті́йствꙋющїи ꙗ҆́кᲂже пи́шетъ , ᲂу҆́мъ челᲂвѣ́чь , немо́жетъ є҆ди́нагѡ бжⷭ҇тва̀ зарю̀ в̾ тре́хъ ли́цѣхъ пѣ́ти .

и҆ ны́нѣ . На крⷭ҇тѣ̀ ꙗ҆́кѡ ви́дѣвши , є҆го́же без̾ сѣ́мене рᲂдила̀ є҆сѝ , тᲂго̀ дᲂлгᲂтерпѣ́нїе ѻ҆трᲂкᲂви́це вᲂспѣва́ше слезѧ́щи .