Въ четверто́къ , ве́черъ . на гдⷭ҇и вᲂзва́хъ , стихѣ́ры , крⷭ҇тны . гла́съ , є҃ . =запѣ́въ : ꙗ҆́кѡ ѿ тебѐ ѡ҆чище́нїе є҆́сть . В=сѧ̀ древа̀ дꙋбра́внаѧ да вᲂзра́дꙋютсѧ , дре́во ви́дѧще всечⷭ҇тно́е , стрⷭ҇тїю влⷣчнею ѡ҆бра́дᲂванно . бл҃гᲂда́ть ѡ҆блистава́ющее ꙗ҆́кѡ пла́мень ѻ҆гнѧ̀ , и҆стᲂча́ющее ꙗ҆́кᲂже во́ды дарᲂва́нїѧ , всѣ́мъ , дш҃а прᲂсвѣща́ющее и҆ пᲂмышле́нїѧ . недꙋ́ги ѡ҆чища́юще , и҆ стра́сти ѿгᲂнѧ́юще . бѣ́сы далечѐ прᲂгᲂнѧ́юще неви́димыѧ , и҆ ꙗ҆зы́ки и҆нᲂплеме́нныѧ пᲂбѣжда́ющее ꙗ҆́вѣ . пᲂбѣ́ды пᲂдаю́що всегда̀ вѣ́рнымъ , бл҃гᲂслᲂве́нїе и҆ ве́лїю млⷭ҇ть .

ᲂу҆пᲂва̀ дш҃а мᲂѧ̀ на́ гдⷭ҇а . Мѣ́стꙋ и҆дѣ́же стᲂѧ́стѣ но́зѣ гдⷭ҇ни , вѣ́рᲂю пᲂклᲂнѧ́ющесѧ , ꙗ҆́кᲂже прᲂро́къ речѐ . хрⷭ҇та̀ славᲂсло́вимъ распе́ншагᲂсѧ , и҆ сраспе́нша прегрѣше́нїѧ на́ша , и҆́же ѿ́ древа разᲂри́вшаго клѧ́твꙋ , и҆ примири́вша ѻ҆ц҃ꙋ ѿстᲂѧ́щїѧ ѿ ню́дъ пᲂмышле́ньми , рꙋчны́ѧ же є҆гѡ̀ и҆ нᲂжны́ѧ гво́здїѧ , кᲂпїѐ и҆ тро́сть , гꙋ́бꙋ и҆ вѣне́цъ лᲂбыза́юще , дᲂсажде́нїѧ и҆ нарꙋга́нїѧ , и҆ и҆́на є҆ли́ка пᲂдъѧ́тъ , че́стнѣ пᲂчита́емъ , и҆́миже спасо́хᲂмсѧ .

да ᲂу҆пᲂва́етъ і҆и҃ль на́ гдⷭ҇а . Всѧ̀ ᲂу҆́ды хрⷭ҇то́ви сра́спнемъ , и҆ ми́рᲂви ᲂу҆мертви́мсѧ , и҆ мирᲂде́ржцꙋ , хрⷭ҇тꙋ̀ пᲂстᲂпа́мъ хᲂди́ти вᲂжделѣ́вше , тᲂго́же на ра́мѣхъ бжⷭ҇твеныи крⷭ҇тъ но́симъ , ѿверже́нїемъ плᲂтьска́гѡ взыгра́нїѧ , и҆ пᲂхᲂте́й злы́хъ , ꙗ҆́кѡ дш҃ꙋ влекꙋ́тъ ко грѣхꙋ̀ . тᲂмꙋ̀ мнѧ́ще пред̾ста́ти , и҆ зрѣ́ти тᲂгѡ̀ на крⷭ҇тѣ̀ пригвᲂжде́на , и҆ дш҃ꙋ свᲂю̀ в̾ рꙋ́цѣ рᲂди́телю со и҆здыха́нїемъ преда́вша , ꙗ҆́кѡ да всегда̀ с̾ ни́мъ бꙋ́демъ неразлꙋ́чни .

та́же , в̾ минѣ́и , стⷯры , ст҃о́мꙋ . а҆́ще ли нѣ́сть минѣ́и . и҆́ны , стихѣ́ры , прест҃ѣ́й бцⷣѣ . гла́съ , то́йже . запѣ́въ : ѿ всѣ́хъ без̾зако́нїи є҆гѡ̀ . Є҆гда̀ гро́здъ ненасажде́нъ сꙋ́щъ , ꙗ҆́кѡ лᲂза̀ ѿрасти́ла є҆сѝ , ᲂу҆зрѣ́вши на́ древѣ пᲂвѣ́шена , прᲂбᲂде́на же кᲂпїе́мъ в̾ бжⷭ҇твенаѧ ре́бра . что̀ сїѐ гл҃аше сн҃е и҆ бж҃е мо́й ; ка́кѡ и҆́же недꙋ́ги всѧ̀ и҆ стра́сти и҆сцѣлѧ́ѧ , стра́сти терпи́ши , без̾стра́стенъ сы́и по є҆стествꙋ̀ бжⷭ҇твенᲂмꙋ . что́ ти без̾бл҃гᲂда́тнїи лю́дїе , бл҃гᲂда́телю сїѧ̀ вᲂзда́ша , в̾мѣ́стѡ бл҃гᲂдѣѧ́нїи ; вᲂпїѧ́ше пречⷭ҇таѧ . но тᲂгѡ̀ стрⷭ҇тьмѝ , страсте́й мѧ свᲂбᲂди́ти мᲂлѝ непреста́ннѡ , ꙗ҆́кѡ да сла́влю тѧ̀ .

пᲂхвали́те є҆гѡ̀ всѝ лю́дїе . Пла́чемъ всѝ , и҆ рꙋ́цѣ распро́стремъ , и҆ бїе́мъ в̾ пе́рси те́плѣ слезѧ́ще , и҆ прекло́ньше кᲂлѣ́ни лице́мъ бїю́ще въ зе́млю прилѣ́жнѡ . и҆ вᲂз̾дыха́нїѧ вᲂспꙋ́стимъ къ высᲂтѣ̀ и҆́же без̾мѣ́стными дѣ́лы прᲂгнѣ́вавшїи тѧ̀ бг҃а , запᲂвѣде́й ѿверже́нїемъ . и҆зба́ви зᲂвꙋ́ще в̾ бꙋ́дꙋщемъ сꙋдѣ̀ всѧ́кᲂго мꙋче́нїѧ , и҆́же тебѐ ѡ҆печа́ливша , и҆ ѡ҆браща́ющихсѧ мᲂльба́ми мт҃ре твᲂеѧ̀ , за ни́хже крⷭ҇тъ претерпѣ́лъ є҆сѝ вᲂпло́щьсѧ , и҆ твᲂегѡ̀ црⷭ҇твїѧ прича́стники сᲂтвᲂрѝ .

и҆ и҆́стина гдⷭ҇нѧ пребыва́етъ во́ вѣки . Кᲂмꙋ̀ ᲂу҆пᲂдо́биласѧ є҆сѝ дш҃е , ᲂу҆спѣва́ющи в̾ го́ршаѧ всегда̀ , и҆ прилага́ющи безꙋ́мно к̾ свᲂи́мъ ꙗ҆́звамъ стрꙋ́пы мно́жайшїѧ , ꙗ҆́кѡ всетѣле́снѣй бы́ти ꙗ҆́звѣ , непᲂмышлѧ́ющи ꙗ҆́кѡ сꙋдїѧ̀ приближа́етсѧ , є҆мꙋ́же пред̾ста́неши вᲂспрїѧ́ти по дѣѧ́нїемъ вины̀ и҆ тᲂмле́нїѧ . но ѡ҆брати́всѧ припадѝ к̾ дв҃ѣй зᲂвꙋ́щи , влⷣчце влⷣчце , непре́зри мѧ прᲂгнѣ́вавшаго бг҃а бл҃гᲂмлⷭ҇тиваго , и҆́же и҆з̾ тебѐ на спасе́нїе чл҃кѡмъ ро́ждьшагᲂсѧ , и҆ распе́ншагᲂсѧ пло́тїю .

сла́ва , и҆ нн҃ѣ , крⷭ҇тᲂбоⷢ҇ . И҆збавле́нїе на́съ ра́ди , и҆ цѣ́нꙋ вели́кꙋю пречⷭ҇тꙋю кро́вь свᲂю̀ , и҆зво́лилъ є҆сѝ да́ти без̾грѣ́шне хрⷭ҇тѐ мо́й , всѣ́мъ хᲂтѧ́и спасе́нїе пᲂлꙋчи́ти . тѣ́мже тѧ̀ зрѧ́щи пригвᲂжде́на мт҃и твᲂѧ̀ . рыда́ющи вла́сы терза́ше си , гл҃ющи , ча́до , а҆́гньче всенепᲂро́чныи , ми́ра хᲂтѧ̀ и҆зба́вити чⷭ҇тно́ю си кро́вїю , ѿ ѻ҆́чїю мᲂе́ю ка́кѡ за́йде сп҃се , незахᲂди́мᲂе сл҃нце , и҆́же всѣ́мъ пᲂдаѧ́и прᲂсвѣще́нїе и҆ ми́ръ и҆ ве́лїю млⷭ҇ть .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стихѣ́ры . гла́съ , є҃ . Гдⷭ҇и , при мѡѷсе́и и҆нᲂгда̀ прᲂро́цѣ , то́чїю вᲂѡ҆браже́нїе крⷭ҇та̀ твᲂегѡ̀ ꙗ҆влѧ́ѧсѧ , пᲂбѣжда́ше врагѝ твᲂѧ̀ , ны́нѣ же са́мыи крⷭ҇тъ тво́й держа́ще , по́мᲂщи про́симъ . ᲂу҆твердѝ цр҃кᲂвь свᲂю̀ , мно́гїѧ ра́ди млⷭ҇ти чл҃кᲂлю́бче .

сти́хъ : к̾ тебѣ̀ вᲂз̾ведо́хъ ѻ҆́чи . Крⷭ҇тъ тво́й хрⷭ҇тѐ , а҆́ще и҆ дре́во ви́димо є҆́сть сꙋщество́мъ , но бжⷭ҇твенᲂю ѡ҆дѣ́ѧно є҆́сть си́лᲂю . и҆ чꙋ́вствено ми́рᲂви ꙗ҆влѧ́ѧсѧ , мы́слено на́ше чꙋ́до твᲂри́тъ спасе́нїе , є҆мꙋ́же пᲂкланѧ́ющесѧ , сла́вимъ тѧ̀ сп҃се , пᲂми́лꙋй на́съ .

сти́хъ : пᲂми́лꙋй на́съ гдⷭ҇и . мⷱ҇ꙋ . Ѡ҆ земны́хъ всѣ́хъ неради́вше и҆ на мꙋ́ки мꙋ́жески дерзнꙋ́вше , блаже́нныхъ наде́ждь непᲂгрѣши́сте . но нбⷭ҇нᲂмꙋ црⷭ҇твїю наслѣ́дницы бы́сте , всехва́льнїи мꙋ́ченицы . и҆мꙋ́ще дерзнᲂве́нїе к̾ чл҃кᲂлю́бцꙋ бг҃ꙋ , смире́нїе ми́рꙋ и҆спрᲂси́те , и҆ дш҃а́мъ на́шимъ ве́лїю млⷭ҇ть .

сла́ва , и҆ нн҃ѣ , крⷭ҇тᲂбоⷢ҇ . Зрѧ́щи дре́вле а҆́гньца и҆ сн҃а свᲂегѡ̀ , дв҃аѧ мт҃и всебл҃же́ннаѧ ѻ҆трᲂкᲂви́ца , на крⷭ҇тѣ̀ вᲂз̾вы́шена , вᲂпїѧ́ше слезѧ́щи , ᲂу҆вы̀ мнѣ̀ сн҃е мо́й , ка́кѡ ᲂу҆мира́еши , бг҃ъ є҆стество́мъ сы́и без̾сме́ртенъ ;

таⷤ , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , крⷭ҇тᲂбоⷢ҇ . =во́ =гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Въ четверто́къ , на па́вечерницѣ . кано́нъ , прест҃ѣ́й бцⷣѣ . гла́съ , є҃ . пѣ́снь , а҃ . і҆рмо́съ . Кᲂнѧ̀ и҆ вса́дники в̾ мо́ри чермнѣ́мъ , сᲂкрꙋша́ѧи бра́ни мы́шцею высо́кᲂю , хрⷭ҇то́съ и҆стрѧ́слъ є҆́сть , і҆и҃лѧ же спасѐ , пᲂбѣ́днꙋю пѣ́снь пᲂю́ща . запѣ́въ : прест҃а́ѧ гжⷭ҇е бцⷣе спасѝ на́съ . Дрꙋгі́и ра́й зна́емъ тѧ мы́сленыи без̾разсꙋжде́нїѧ , дв҃о бг҃ᲂневѣ́сто , ѡ҆дᲂлѣ́вши и҆́же во є҆де́мѣ раю̀ бг҃ᲂмт҃и . ты́ бо нетлѣ́нїе чл҃кѡмъ прᲂзѧбла̀ є҆сѝ . Дре́во жи́зни ѡ҆бъѧ́ти в̾ раѝ а҆да́мъ вᲂзбране́нъ бы́сть , ѿ́древа причасти́сѧ разꙋ́мнагѡ . без̾сме́ртїе же пᲂдадѐ , и҆́же пло́ть ѿ тебѐ дв҃о прїе́мыи . сла́ва . Пе́рвѣе ѿ землѝ со́зданъ бы́сть а҆да́мъ , пречⷭ҇тыма рꙋка́ма вседержи́телѧ . ѿ тебе́ же бцⷣы дв҃ы рᲂди́сѧ без̾ сѣ́мене но́выи а҆да́мъ , зижди́тель чл҃чествꙋ . и҆ ны́нѣ . Бе́здна пᲂслѣ́днѧѧ ѡ҆бы́де мѧ без̾мѣ́рныхъ прегрѣше́нїи , и҆ во глꙋбинꙋ̀ низво́дитъ мѧ̀ лю́тагѡ ѿча́ѧнїѧ , ро́ждьшаѧ бе́зднꙋ милᲂсе́рдїѧ , ᲂу҆скᲂрѝ и҆ спаси́ мѧ .

пѣ́снь , г҃ . і҆рмо́съ . Оу҆тверже́и ни наче́мъ же зе́млю пᲂвелѣ́нїемъ сѝ , и҆ распрᲂстранѝ не ѡ҆держи́мꙋю тѧгᲂтꙋ̀ , на недви́жимᲂмъ хрⷭ҇тѐ ка́мени запᲂвѣде́й тѝ , цр҃квь свᲂю̀ ᲂу҆твердѝ , є҆ди́не бл҃же и҆ чл҃кᲂлю́бче . И҆́же живо́тнымъ садо́мъ зе́млю сᲂтвᲂри́въ рᲂди́тельницꙋ , не сꙋ́щимъ на не́й пе́рвѣе , ѿ не и҆скꙋсᲂмꙋ́жныѧ жены̀ а҆́бїе , ꙗ҆́кѡ ѿ землѝ без̾сѣ́менныи вᲂплᲂща́емь прише́лъ є҆сѝ , сло́ве бж҃їи не и҆змѣ́нныи . Ты̀ є҆сѝ земленᲂро́днымъ наде́жа и҆ по́мᲂщь , и҆ ра́дᲂсть и҆ пᲂкро́въ и҆ прибѣ́жище , влⷣчце мт҃и живᲂтꙋ̀ . тѣ́мже мо́лимъ твᲂю̀ по́мᲂщь , низ̾пᲂслѝ всѣ́мъ пᲂю́щимъ тѧ̀ . сла́ва . Недꙋ́гꙋющїи напа́стьми лю́тыми ѡ҆держи́ми , вседѣ́телю ще́дре и҆́же всѧ́ческихъ бж҃е , трист҃ꙋ́ю твᲂю̀ ски́нїю , приво́димъ тѝ всѝ в̾ мл҃твꙋ , и҆ вᲂпїе́мъ тѝ , разрѣшѝ ѡ҆держа́нїѧ ра́бъ твᲂи́хъ . и҆ ны́нѣ . Смꙋща́етъ мѧ̀ лю́тѣ грѣхо́внаѧ вᲂлна̀ , во глꙋбинꙋ̀ прегрѣше́нїи низвлечѐ пречⷭ҇таѧ . бꙋ́рѧ сᲂпрᲂти́вныхъ пᲂмышле́нїи ѡ҆бꙋрева́етъ дш҃ꙋ мᲂю̀ , ѡ҆кᲂрми́телѧ ро́ждьшаѧ , ᲂу҆скᲂрѝ и҆зъѧ́ти раба̀ твᲂегѡ̀ .

пѣ́снь , д҃ . і҆рмо́съ . Бжⷭ҇твеннᲂе твᲂѐ разꙋмѣ́въ смᲂтре́нїе , дивѧ́сѧ а҆вва́кꙋмъ хрⷭ҇тѐ тре́петнѡ вᲂпїѧ́ше тѝ , на спасе́нїе лю́демъ сѝ , спастѝ бл҃гі́ѧ свᲂѧ̀ прише́лъ є҆сѝ . Є҆́вва пᲂвинꙋ́вшисѧ ѕмїѝ , рᲂдѝ печа́ль жена́мъ , ты́ же дв҃це вѣ́рᲂвавши бж҃їимъ вѣща́нїемъ , всемꙋ̀ ми́рꙋ ра́дᲂсть прᲂцвѣла̀ є҆сѝ . Пе́рвѣе ѿ ре́бръ а҆да́мᲂвыхъ рᲂжде́на є҆́вва . бг҃ъ ѿ мт҃ре бг҃ᲂневѣ́сты , ѿ неѧ́же вᲂплᲂще́нна , дв҃ᲂю без̾ ѻ҆ц҃а рᲂдила̀ є҆́сть . сла́ва . Є҆́вва ра́дꙋетсѧ , ѡ҆сꙋжде́нїѧ свᲂбᲂждена̀ дре́внѧгѡ прамт҃рьнѧ . ѻ҆трᲂкᲂви́ца бо пᲂказа̀ , ꙗ҆́же сꙋдїю̀ заче́нши нетлѣ́ннѡ , и҆ ро́ждьши милᲂсе́рдаго . и҆ ны́нѣ . Житїѐ мᲂѐ прегрѣше́нїи и҆спо́лнисѧ , по́мыслъ же стра́стенъ , и҆ дш҃а мᲂѧ̀ ѡ҆сꙋжена̀ . тѣ́мже твᲂи́мъ бл҃гᲂꙋтро́бїемъ пᲂми́лꙋй и҆ спаси́ мѧ влⷣчце .

пѣ́снь , є҃ . і҆рмо́съ . Ѡ҆дѣѧ́исѧ свѣ́тᲂмъ ꙗ҆́кѡ ри́зᲂю , к̾ тебѣ̀ ᲂу҆́треннюю , и҆ тебѣ̀ вᲂпїю̀ , дш҃ꙋ мᲂю̀ прᲂсвѣтѝ ѡ҆мра́чнꙋю хрⷭ҇тѐ , ꙗ҆́кѡ млрⷭ҇дъ . Сто́лпъ и҆ ѻ҆́блакъ свѣ́та тѧ ѡ҆брѣ́тше , дв҃о мт҃и свѣтᲂда́вца , ꙗ҆́же по пꙋсты́ни ле́стнѣй хᲂдѧ́щїи , ѿ лю́тъ и҆з̾бѣ́гаемъ . Ра́дꙋисѧ ро́ждьшаѧ бг҃а в̾ тѣлесѝ , и҆́же пре́жде вѣ́къ рᲂжде́наго ѿ ѻ҆ц҃а беспло́тна , ꙗ҆ви́тижесѧ а҆́бїе на́мъ спᲂдо́бльшасѧ . сла́ва . Сл҃нце пᲂбѣди́сѧ , твᲂе́ю свѣ́тлᲂстїю мр҃і́е . ты́ бо и҆́же свѣти́лы нб҃о ᲂу҆краси́вшаго , рꙋка́ма ѡ҆бъѧ́ла є҆сѝ , и҆ ѿ свᲂе́ю сᲂсцꙋ̀ пита́ла є҆сѝ . и҆ ны́нѣ . Да не ѡ҆сꙋди́ши менѐ во ѻ҆́гнь негаси́мыи , хрⷭ҇тѐ сп҃се мо́й , мᲂльба́ми чⷭ҇тыѧ ро́ждьшїѧ тѧ̀ .

пѣ́снь , ѕ҃ . і҆рмо́съ . Вᲂлнѧ́щеесѧ бꙋ́рею дш҃е тлѣ́ннᲂю , влⷣко хрⷭ҇тѐ , страсте́й мᲂи́хъ мо́ре ᲂу҆крᲂтѝ , и҆ и҆з̾ тлѝ вᲂз̾веди́ мѧ ꙗ҆́кѡ млрⷭ҇дъ . И҆́же в̾ ки́тѣ спа́сшаго пррⷪ҇ка дре́вле і҆ѡ́нꙋ , невре́днѡ нᲂси́ла є҆сѝ во ᲂу҆тро́бѣ свᲂе́й чꙋ́днаго бг҃а , чⷭ҇таѧ прⷭ҇нѡ дв҃о . Держа́щаго гдⷭ҇а мᲂрѧ̀ , пречⷭ҇таѧ дв҃о бг҃а небꙋ́рнѡ , ꙗ҆́кᲂже си́лы нᲂсѧ́щи сла́внᲂе вᲂзмꙋще́нїѧ льстѝ ᲂу҆спи́ла є҆сѝ . сла́ва . Всѧ́ческихъ тишинꙋ̀ , ро́ждьши пречⷭ҇таѧ хрⷭ҇та̀ , и҆́же к̾ семꙋ̀ бл҃гᲂꙋкрᲂтѝ мл҃твами сѝ , ю҆́же на мѧ̀ страсте́й непᲂстᲂѧ́ннꙋю бꙋ́рю . и҆ ны́нѣ . Въ дн҃ь печа́ли , є҆гда̀ хᲂщꙋ̀ тѣле́сныхъ сᲂꙋ́зъ разрѣши́тисѧ , пред̾ста́ни мѝ , и҆ ѡ҆держа́нїѧ бѣсо́вскаго и҆схи́ти .

Гдⷭ҇и пᲂми́лꙋй ,= гⷤ . сла́ва , и҆ ны́нѣ . сѣда́ленъ , гла́съ , є҃ . Н=а крⷭ҇тѣ̀ зрѧ́щи тѧ̀ хрⷭ҇тѐ мт҃и твᲂѧ̀ , во́лею пᲂсредѣ̀ разбо́йникꙋ ви́сѧща , пресѣка́ема мт҃рьски ᲂу҆тро́бᲂю , глаго́лаше без̾грѣ́шне сн҃е , ка́кѡ непра́веднѡ на крⷭ҇тѣ̀ ꙗ҆́кᲂже злᲂдѣ́й распѧ́тсѧ и҆́же чл҃ческїи ро́дъ ѡ҆живи́ти хᲂтѧ̀ ꙗ҆́кѡ пребл҃гі́и ;

пѣ́снь , з҃ . і҆рмо́съ . Превᲂзнᲂси́мыи ѻ҆ц҃е́мъ гдⷭ҇ь , пла́мень ᲂу҆гаси́въ , дѣ́ти же прᲂхлади́лъ є҆́сть , є҆динᲂгла́снѡ пᲂю́ща , бж҃е бл҃гᲂслᲂве́нъ є҆сѝ . И҆́же къ пра́ѻ҆ц҃ꙋ а҆враа́мꙋ прише́ствїемъ бг҃ъ сᲂвершѝ , сн҃ъ тво́й бы́въ , и҆ сѣ́мѧ є҆гѡ̀ ꙗ҆зы́ки бл҃гᲂслᲂвѧ̀ бл҃гᲂслᲂве́наѧ . Ты̀ лѣ́ствица є҆сѝ і҆а́кѡвлѧ нескве́рнаѧ . мт҃рь бо є҆ди́нꙋ тѧ̀ бг҃ъ написа̀ . є҆ѧ́же ра́ди бг҃ъ сᲂвᲂкꙋпѝ , ѻ҆́нᲂгѡ и҆сча́дїѧ . сла́ва . Превᲂзнᲂси́мыи со ѻ҆ц҃е́мъ и҆ дх҃ᲂмъ сн҃ъ , и҆збра́въ тебѐ чи́стаѧ , ѕѣлѡ̀ вᲂз̾любѝ в̾ жили́ще себѣ̀ вᲂплᲂща́емъ . и҆ ны́нѣ . Бг҃а є҆го́же рᲂдила̀ є҆сѝ всегда̀ мᲂлѝ , ѿча́ѧннаго мѧ спастѝ , и҆ ᲂу҆лꙋчи́ти прᲂсты́ню , вѣ́рᲂю вᲂпїю́ща , бж҃е бл҃гᲂслᲂве́нъ є҆сѝ .

пѣ́снь , и҃ . і҆рмо́съ . Тебѣ̀ вседѣ́телю , в̾ пещѝ ѻ҆́трᲂцы , всеми́рныи ли́къ сᲂста́вльше пᲂѧ́хꙋ , дѣ́ла всѧ́каѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . И҆спыта́нїѧ твᲂегѡ̀ ᲂу҆бѣга́етъ ржⷭ҇тво̀ дв҃о , вѣ́рᲂю же ꙗ҆влѧ́етсѧ вᲂпїю́щимъ , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . Всѧ́кѡ дв҃ческїѧ не ѿпа́дши сла́вы , мт҃рьскᲂю ѡ҆бᲂгати́ласѧ че́стїю без̾невѣ́стнаѧ . вѣ́сть и҆́же сїѧ̀ ꙗ҆́вѣ чꙋдᲂдѣ́йствᲂвавыи , є҆го́же превᲂзно́симъ во́ вѣки . сла́ва . Ви́ждь бл҃га́ѧ пречⷭ҇таѧ , смире́нныѧ ми дш҃и ѡ҆ѕлᲂбле́нїе и҆ ᲂу҆миле́нїе , и҆ бᲂлѣ́знь премѣнѝ в̾ско́рѣ , да тѧ̀ сла́влю во́ вѣки . и҆ ны́нѣ . Прїимѝ млⷭ҇тивно твᲂю̀ мт҃рь сло́ве , мᲂлѧ́щꙋюсѧ спастѝ твᲂѧ̀ лю́ди бл҃же , ꙗ҆́же стѧжа̀ чⷭ҇тно́ю сѝ кро́вїю , тебѐ бл҃гᲂслᲂви́мъ во всѧ̀ вѣ́ки .

пѣ́снь , ѳ҃ . і҆рмо́съ . І҆са́їе ликꙋ́й , дв҃аѧ бо и҆мѣ̀ во́ чревѣ , и҆ пᲂрᲂдѝ сн҃а є҆мманꙋ́ила , бг҃а же и҆ чл҃ка , вᲂсто́къ и҆́мѧ є҆мꙋ̀ . є҆го́же велича́юще , тебѐ дв҃о ᲂу҆бл҃жа́емъ . Бцⷣе влⷣчце , ᲂу҆мᲂлѝ пᲂкланѧ́емꙋю трⷪ҇цꙋ , ѿ неѧ́же нестра́стнѡ є҆ди́нᲂгѡ пло́тїю на́мъ пᲂрᲂдила̀ є҆сѝ , ᲂу҆мири́ти сꙋ́щимъ на землѝ , разрѣше́нїе прегрѣше́нїемъ пᲂю́щимъ тѧ дарᲂва́тисѧ . А҆́ще и҆ є҆ди́нъ разꙋмѣ́етсѧ лице́мъ , є҆мманꙋ́илъ , но є҆стество́мъ сꙋгꙋ́бъ . се́же двѣ̀ вᲂз̾вѣща́ѧ во́ли , и҆́же в̾ не́мъ и҆ дѣ́йства . є҆го́же рᲂди́тельницꙋ бцⷣꙋ и҆спᲂвѣ́даемъ . сла́ва . Себѐ рыда́ю пᲂмышлѧ́ѧ мᲂи́хъ грѣхо́въ мно́жество , и҆ страсте́й в̾ше́ствїе , дш҃и мᲂеѧ̀ ᲂу҆ны́нїе , и҆ ᲂу҆ма̀ мᲂегѡ̀ и҆з̾стꙋпле́нїе , ѿча́ѧннаго мѧ̀ спасе́нїю спᲂдо́би . и҆ ны́нѣ . Вразѝ мᲂѝ наше́дше гдⷭ҇и , ꙗ҆́кᲂже раз̾бо́йницы , вы́шнюю свѣ́тлꙋю и҆ свѣтᲂви́днꙋю ѻ҆де́ждꙋ сᲂвле́кше , и҆ ра́ны ми налᲂжи́ша мно́ги , ты̀ пред̾ста́вши є҆́ле жи́ва вᲂста́ви . та́же , дᲂсто́йнѡ є҆́сть . и҆ про́чее , ѡ҆бы́чно . и҆ ѿпꙋ́стъ .

Въ пѧто́къ на ᲂу҆́трени . по а҃ , стихᲂло́гїи . сѣда́льны , крⷭ҇тны . гла́съ , є҃ . Мѣ́сто ло́бнᲂе ра́й бы́сть , то́чїю бо вᲂдрꙋзи́сѧ дре́во крⷭ҇тнᲂе , а҆́бїе и҆зрастѝ гро́здъ живо́тныи , тебѐ сп҃се в̾ на́ше весе́лїе , сла́ва тебѣ̀ . сти́хъ : вᲂзнᲂси́те гдⷭ҇а бг҃а на́шегѡ , и҆ кла́нѧйтесѧ пᲂд̾но́жїю но́гꙋ є҆гѡ̀ ꙗ҆́кѡ ст҃о є҆́сть . И҆́же распе́ньшагᲂсѧ сп҃са и҆ и҆зба́витель на́шегѡ во́лею , ꙗ҆́кѡ вѣ́сть , и҆ ꙗ҆́кᲂже бл҃гᲂи҆зво́ли , вᲂспᲂе́мъ вѣ́рнїи и҆ прᲂсла́вимъ , ꙗ҆́кѡ пригвᲂздѝ на крⷭ҇тѣ̀ грѣхѝ чл҃кѡмъ , и҆збавлѧ́ѧ ѿ ле́сти ро́дъ чл҃ческїи , и҆ црⷭ҇твїю спᲂдо́билъ є҆́сть . сла́ва , и҆ нн҃ѣ , крⷭ҇тᲂбоⷢ҇ . На крⷭ҇тѣ̀ тѧ̀ хрⷭ҇тѐ зрѧ́щи мт҃и твᲂѧ̀ , во́лею пᲂсредѝ раз̾бо́йникꙋ ви́сѧща , и҆ растерза́ющисѧ мт҃рьски ᲂу҆тро́бᲂю , гл҃аше без̾грѣ́шныи сн҃е , ка́кѡ без̾ пра́вды на крⷭ҇тѣ̀ ꙗ҆́кѡ ѕлᲂдѣ́й пригвᲂзди́сѧ ; ро́дъ чл҃ческїи ѡ҆живи́ти хᲂтѧ̀ ꙗ҆́кѡ пребл҃гъ .

по в҃ , стихᲂло́гїи . сѣда́льны , крⷭ҇тны . гла́съ , є҃ . Распѧ́тїе претерпѣ́въ свᲂе́ю во́лею , и҆ ѿ тлѝ чл҃ки свᲂбᲂди́лъ є҆сѝ сп҃се , вᲂспѣва́емъ вѣ́рнїи и҆ пᲂкланѧ́емсѧ ти , ꙗ҆́кѡ прᲂсвѣти́лъ є҆сѝ на́съ си́лᲂю крⷭ҇тнᲂю , и҆ всѝ прᲂславлѧ́емъ тѧ чл҃кᲂлю́бче ще́дрыи ꙗ҆́кѡ жизнᲂда́вца и҆ гдⷭ҇а . сти́хъ : бг҃ъ же цр҃ь на́шъ пре́жде вѣ́къ , сᲂдѣ́ла спасе́нїе пᲂсредѣ̀ землѝ . Во́лею ще́дрыи крⷭ҇тъ претерпѣ́лъ є҆сѝ , и҆ дре́внюю клѧ́твꙋ ꙗ҆́же снѣ́ди ра́ди , ꙗ҆́кѡ всеси́льныи бг҃ъ пᲂтреби́лъ є҆сѝ . тѣ́мже бжⷭ҇твеныѧ и҆ чⷭ҇тны́ѧ стрⷭ҇ти твᲂѧ̀ влⷣко хрⷭ҇тѐ , пᲂе́мъ и҆ пᲂклᲂнѧ́емсѧ , славᲂсло́вѧще непреста́ннѡ , є҆́же па́че сло́ва смᲂтре́нїе твᲂѐ . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆зра́илевъ . мⷱ҇ꙋ . Сїѧ́етъ дне́сь па́мѧть страстᲂте́рпецъ , и҆́мать бо и҆ с̾ нб҃съ ѡ҆заре́нїе . ли́къ а҆́нг҃льскїи тᲂржествꙋ́етъ , и҆ чл҃ческїи ро́дъ спра́зднꙋетъ . тѣ́мже мо́лѧтсѧ гдⷭ҇ви , пᲂми́лᲂватисѧ дш҃а́мъ на́шимъ . сла́ва , и҆ ны́нѣ , крⷭ҇тᲂбоⷢ҇ . Крⷭ҇то́мъ сн҃а твᲂегѡ̀ бг҃ᲂра́дᲂваннаѧ , и҆́дᲂльскаѧ пре́лесть всѧ̀ ᲂу҆праздни́сѧ , и҆ бѣсо́вскаѧ си́ла пᲂпра́на бы́сть . сегѡ̀ ра́ди вѣ́рнїи по́ дᲂлгꙋ тѧ̀ прⷭ҇нѡ пᲂе́мъ и҆ бл҃гᲂслᲂви́мъ , и҆ бцⷣꙋ вᲂи́стинꙋ и҆спᲂвѣ́дающе тѧ̀ велича́емъ .

по г҃ , стихᲂло́гїи , сѣда́ленъ . гла́съ , є҃ . На крⷭ҇тѣ́ тѧ пригвᲂжде́на и҆ ᲂу҆снꙋ́вша , а҆́нг҃льстїи чи́нᲂве ви́дѣвше ᲂу҆жасо́шасѧ , і҆с҃е всѣ́хъ цр҃ю . и҆ пᲂбѣжде́ни быва́хꙋ а҆́бїе бѣсо́встїи пᲂлцы̀ . и҆ сᲂкрꙋши́шасѧ вереѝ а҆́дᲂвы , и҆ сме́ртнᲂе мꙋчи́тельство низ̾лᲂжи́сѧ . и҆ сꙋ́щїи во́ грᲂбѣхъ ме́ртвїи вᲂскресо́ша . сла́ва , и҆ ны́нѣ , крⷭ҇тᲂбоⷢ҇ . Вᲂзнесе́на на́ древо ꙗ҆́кѡ ви́дѣ , ро́ждьшаѧ тѧ̀ сп҃се бᲂлѣ́зней крᲂмѣ̀ , рыда́ше с̾ пла́чемъ , и҆ взыва́ше . ᲂу҆вы̀ мнѣ̀ сладча́йшїи сн҃е . ᲂу҆ѧзвлѧ́юсѧ дш҃е́ю , на крⷭ҇тѣ̀ зрѧ́щи тѧ̀ пригвᲂжде́наго , пᲂсредѣ̀ двᲂю̀ ѕлᲂдѣ́ю , сꙋдо́мъ ѕлᲂдѣ́йственымъ .

Впѧто́к̾ кано́нъ . чⷭ҇тно́мꙋ и҆ живᲂтвᲂрѧ́щемꙋ крⷭ҇тꙋ̀ . твᲂре́нїе ки́ръ і҆ѡ́сифа . гла́съ , є҃ . пѣ́снь , а҃ . і҆рмо́съ . Спаси́телю бг҃ꙋ , в̾ мо́ри лю́ди немо́крыми стᲂпа́ми наста́вльшꙋ , и҆ фараѡ́на с̾ во́и пᲂто́пльшꙋ , тᲂмꙋ̀ є҆ди́нᲂмꙋ вᲂспᲂе́мъ , ꙗ҆́кѡ прᲂсла́висѧ . запѣ́въ : сла́ва гдⷭ҇и крⷭ҇тꙋ̀ твᲂемꙋ̀ чⷭ҇тно́мꙋ . Страстᲂꙋбі́йственꙋю хрⷭ҇тѐ , хᲂтѣ́нїемъ свᲂи́мъ претерпѣ́лъ є҆сѝ стрⷭ҇ть , и҆ ᲂу҆би́лъ є҆сѝ и҆́же в̾ раѝ дре́вле , на́съ ᲂу҆би́вшаго . тѣ́мже твᲂю̀ сла́вимъ бл҃гᲂсты́ню . Вᲂздви́жесѧ на́ крⷭ҇тъ , и҆ низпаде́сѧ вра́гъ , и҆ па́дшїи вᲂздвиго́хᲂмсѧ , и҆ ра́йстїи жи́тели хрⷭ҇тѐ бы́хᲂмъ , держа́вꙋ сла́вѧще црⷭ҇твїѧ твᲂегѡ̀ . мⷱ҇ꙋ . Щито́мъ крⷭ҇тнымъ вᲂѡ҆рꙋжи́вшесѧ до́брѣ , к̾ бᲂре́нїю всѧ́кᲂмꙋ бѣсо́вскᲂмꙋ ѡ҆пᲂлчи́стесѧ премꙋ́дрїи великᲂмч҃нцы , и҆ тᲂгѡ̀ пᲂбѣди́вше , сла́вꙋ пᲂлꙋчи́сте . мⷱ҇ꙋ . Ꙗ҆́кѡ а҆́гньцы честні́и , и҆́же на́съ ра́ди а҆́гньцꙋ пᲂжре́нᲂмꙋ страда́льцы принесо́стесѧ , нечи́стыѧ же́ртвы ꙗ҆́вѣ ѡ҆ста́вльше . тѣ́мже ᲂу҆блажа́емъ ва́съ всехва́льнїи . боⷢ҇ . Но́во ѻ҆трᲂча̀ на́мъ ве́тхаго де́ньми чи́стаѧ дв҃о пᲂрᲂдила̀ є҆сѝ , и҆́же ѡ҆бѣтша́вшее є҆стество̀ чл҃ческᲂе ѡ҆бнᲂвлѧ́ющаго , всенепᲂро́чнаѧ бжⷭ҇твенᲂю стра́стїю свᲂе́ю .

Дрꙋгі́и кано́нъ , прест҃ѣ́й бцⷣѣ . і҆рмо́съ , то́йже . =запѣ́въ : прест҃а́ѧ гжⷭ҇е бцⷣе спасѝ на́съ . Б=л҃гᲂꙋтро́бїѧ и҆сто́чникъ . и҆ пред̾ста́тельницꙋ те́плꙋю вѣ́мъ тѧ̀ всенепᲂро́чнаѧ , дв҃о мт҃и мр҃і́е . и҆ взыва́ю тѝ , пᲂми́лꙋй и҆ ᲂу҆ще́дри смире́нꙋю мᲂю̀ дш҃ꙋ . Въ нѣ́дрехъ твᲂи́хъ сн҃ъ бж҃їи чⷭ҇таѧ всели́всѧ , и҆ вᲂспрїѧ́тъ чл҃ческᲂе сꙋщество̀ ꙗ҆́кѡ пребл҃гъ , и҆ всѣ́хъ и҆зба́ви ѿ тлѝ ѕмі́евы . Прᲂсвѣще́нїе мѝ бꙋ́ди , и҆ спасе́нїю наде́жда бг҃ᲂрᲂди́тельнице всенепᲂро́чнаѧ , прегрѣше́нїи разрѣша́ющи плени́цы , и҆збавлѧ́ющи мѧ бꙋ́дꙋщїѧ мꙋ́ки и҆ ѡ҆сꙋже́нїѧ . Пᲂмышле́нїи лꙋка́выхъ смире́нꙋю ми дш҃ꙋ свᲂбᲂдѝ бг҃ᲂрᲂди́тельнице , и҆ жили́ще бж҃їе тꙋ̀ сᲂдѣ́лай , да по́дᲂлгꙋ тѧ̀ сла́влю всегда̀ .

пѣ́снь , г҃ . і҆рмо́съ . Си́лᲂю крⷭ҇та̀ твᲂегѡ̀ хрⷭ҇тѐ , ᲂу҆твердѝ мᲂѐ пᲂмышле́нїе , ꙗ҆́кѡ пѣ́ти и҆ сла́вити , тридне́внᲂе твᲂѐ вᲂскрⷭ҇нїе . Оу҆вѧда́еши плᲂда̀ тлю̀ , на́ древо сп҃се вᲂздвиза́емъ , и҆ нетлѣ́нїѧ и҆сто́чники на́мъ ѿ ре́бръ и҆стᲂча́еши влⷣко . Закла́всѧ на крⷭ҇тѣ̀ ꙗ҆́кᲂже а҆́гнецъ , пра́ги назна́менꙋѧ дꙋ́шъ на́шихъ , бжⷭ҇твенᲂю сѝ кро́вїю влⷣко , тѣ́мже тѧ̀ со́ страхᲂмъ сла́вимъ . мⷱ҇ꙋ . Вѧ́жеми хрⷭ҇то́ви страда́льцы , и҆ мнᲂгᲂѡ҆бра́знѣ ᲂу҆ранѧ́еми , и҆ ѕвѣре́мъ пᲂмѣта́еми , непрело́жни пребы́сте . мⷱ҇ꙋ . Ꙗ҆́кᲂже гро́здїе винᲂгра́да живо́тнагѡ , мꙋче́нїѧ вино̀ и҆стᲂчи́ша , вѣ́рныхъ срⷣца̀ веселѧ́щее , бг҃а на́шегѡ мч҃нцы . боⷢ҇ . Живᲂтꙋ̀ на́шемꙋ хᲂда́тай чⷭ҇таѧ , ᲂу҆мира́ѧ на́ древѣ ꙗ҆ви́сѧ , тво́й сн҃ъ же и҆ гдⷭ҇ь , прᲂславлѧ́ѧи пᲂю́щїѧ тѧ .

и҆́нъ , і҆рмо́съ , то́йже . Въ ро́въ пᲂги́бельныи лю́тыхъ сᲂгрѣше́нїи впа́дша мѧ , бг҃ᲂрᲂди́тельнице и҆зведѝ , бл҃гᲂꙋтро́бнᲂю сѝ бл҃гᲂстїю . Къ ве́черꙋ житїѧ̀ прише́дъ , и҆ недᲂꙋмѣ́нїемъ ѡ҆держи́мъ є҆́смь , вᲂпїю́ ти всепѣ́таѧ ты̀ пᲂмо́щница ми ꙗ҆ви́сѧ . Ст҃а́ѧ бцⷣе чⷭ҇таѧ , пᲂда́ждь разрѣше́нїе прегрѣше́нїемъ мᲂи́мъ , и҆ спасе́нїе ми и҆спрᲂсѝ и҆ ра́дᲂванїе вѣ́чнᲂе . Ка́плю ми слеза́мъ чⷭ҇таѧ пᲂда́ждь ꙗ҆́кѡ да ѿ срⷣца мᲂегѡ̀ ѿженꙋ̀ недᲂꙋмѣ́нїе , и҆ и҆́скрено вᲂспᲂю́ тѧ .

пѣ́снь , д҃ . і҆рмо́съ . Оу҆слы́шахъ слꙋ́хъ си́лы крⷭ҇та̀ , ꙗ҆́кѡ ра́й ѿве́рзесѧ и҆́мъ , и҆ вᲂзᲂпи́хъ , сла́ва си́лѣ твᲂе́й гдⷭ҇и . Є҆гда̀ за́йде на крⷭ҇тѣ̀ пра́веднᲂе сл҃нце хрⷭ҇тѐ , свѣ́тъ невече́рнїи вᲂсїѧ́лъ є҆сѝ на́мъ , пᲂю́щимъ твᲂѐ сло́ве стра́шнᲂе смᲂтре́нїе . Стᲂѧ́щꙋ ти сꙋдїѐ и҆нᲂгда̀ пред̾ сꙋди́щемъ хрⷭ҇тѐ , ѡ҆сꙋди́лъ є҆сѝ непра́веднаго врага̀ , и҆ распѧ́лсѧ є҆сѝ пᲂсредѣ̀ непра́веднꙋю , на́съ ѡ҆правдꙋ́ѧ . мⷱ҇ꙋ . Вѣнча́еми пᲂбѣди́тельно гдⷭ҇ни страда́льцы , неви́димаго пᲂсрами́ша врага̀ , и҆ взыва́хꙋ , сла́ва си́лѣ твᲂе́й гдⷭ҇и .= мⷱ҇ꙋ . Неᲂу҆вѧда́емыѧ цвѣ́ты мы́сленагѡ раѧ̀ , мнᲂгᲂцѣ́нныѧ сᲂсꙋ́ды хрⷭ҇то́вы стрⷭ҇тᲂте́рпцы , вѣ́рᲂю сше́дшесѧ пᲂчте́мъ . =боⷢ҇ . Є҆гда̀ ᲂу҆зрѣ̀ на крⷭ҇тѣ̀ хрⷭ҇та̀ , є҆го́же рᲂдила̀ є҆сѝ чи́стаѧ , дивѧ́щисѧ не и҆зрече́ннᲂмꙋ є҆гѡ̀ дᲂлгᲂтерпѣ́нїю . тѣ́мже тѧ̀ съ ни́мъ прᲂславлѧ́емъ .

и҆́нъ , і҆рмо́съ , то́йже . Ѡ҆ сᲂдѣ́ѧнїихъ мᲂи́хъ лꙋка́выхъ , и҆ прегрѣше́нїихъ мно́гихъ , кто̀ вᲂзмо́жетъ ᲂу҆мᲂли́ти сꙋдїю̀ , а҆́ще не ты̀ чⷭ҇таѧ , є҆ди́на сᲂгрѣша́ющихъ застꙋ́пница . Мно́гими мѧ̀ па́дша прегрѣше́нїи , и҆ грѣхмѝ пᲂрабо́тивша свᲂю̀ дш҃ꙋ , вᲂз̾дви́гни мѧ̀ си́льнᲂю твᲂе́ю мл҃твᲂю пречⷭ҇таѧ , и҆ разрѣшѝ ѿ рабо́ты . Ꙗ҆́кѡ ро́ждьшаѧ твᲂрца̀ и҆ цр҃ѧ всѧ́ческихъ , бцⷣе всенепᲂро́чнаѧ чⷭ҇таѧ , ты́ мѧ и҆зба́ви всѧ́кагѡ скве́рнагѡ сᲂгрѣше́нїѧ . Себѐ самᲂгѡ̀ пла́чꙋ , є҆гда̀ в̾ пᲂмышле́нїе прїидꙋ̀ мно́гихъ ми прегрѣше́нїи , и҆ ѻ҆гнѧ̀ негаси́маго . и҆ мᲂлю́сѧ , да́ждь ми вре́мѧ пᲂкаѧ́нїѧ пречⷭ҇таѧ .

пѣ́снь , є҃ . і҆рмо́съ . Оу҆́треннююще вᲂпїе́мъ ти гдⷭ҇и спаси́ ны , ты́ бо є҆сѝ бг҃ъ на́шъ , ра́звѣ бо тебѐ и҆но́гѡ незна́емъ . Ка́менїе тѧ̀ , на ка́мени ѡ҆щꙋти́вше хрⷭ҇тѐ вᲂздви́жена , распадо́шасѧ , и҆ землѝ пᲂтрѧсо́шасѧ ѡ҆снᲂва́нїѧ . Ѿлᲂжѝ свѣ́тлᲂсть сл҃нце , вᲂз̾дви́женꙋ тебѣ̀ на́древо , сл҃нце пра́веднᲂе дᲂлгᲂтерпѣли́ве . мⷱ҇ꙋ . Чꙋде́съ блиста́ете ст҃і́и свѣ́тлᲂстїю ; тмꙋ̀ ѿгᲂнѧ́юще бᲂлѣ́зней дх҃ᲂмъ . мⷱ҇ꙋ . Разсѣка́еми бѣ́ша тѣлеса̀ ва́ша мечѝ , дх҃ъ же бжⷭ҇твеныѧ любвѐ , не ѿсѣка́емъ и҆мѣ́сте мч҃нцы . боⷢ҇ . Ви́дѣвше на крⷭ҇тъ вᲂздви́жена сп҃са , рыда́ющи вᲂсклица́ше , дв҃о мт҃и всенепᲂро́чнаѧ .

и҆́нъ , і҆рмо́съ , то́йже . Всетѣле́снꙋю мѝ ꙗ҆́звꙋ прїе́мшꙋ грѣха̀ , бы́лїемъ ᲂу҆врачꙋ́й млрⷭ҇дїѧ твᲂегѡ̀ влⷣчце . Тече́нїе тлѣ́нїю дре́вле ᲂу҆ста́вила є҆сѝ бжⷭ҇твенымъ ржⷭ҇тво́мъ . и҆ ны́нѣ прегрѣше́нїи мᲂи́хъ ᲂу҆ста́ви тече́нїе , пренепᲂро́чнаѧ ; Пᲂми́лꙋй и҆ ᲂу҆ще́дри влⷣчце дш҃ꙋ мᲂю̀ , и҆ и҆зба́ви ѡ҆сꙋже́нїѧ , и҆ вѣ́чныѧ мꙋ́ки . При́зри и҆ ᲂу҆слы́ши влⷣчце гла́съ мо́й , и҆ мᲂлю́сѧ , и҆зба́ви мѧ вѣ́чнагѡ мꙋче́нїѧ .

пѣ́снь , ѕ҃ . і҆рмо́съ . Ѡ҆бы́де мѧ бе́здна , гро́бъ же ми ки́тъ бы́сть , а҆́зъ же вᲂзᲂпи́хъ к̾ тебѣ̀ чл҃кᲂлю́бче , и҆ спасе́ мѧ десни́ца твᲂѧ̀ гдⷭ҇и . Крⷭ҇тъ на землѝ вᲂдрꙋзи́сѧ и҆ паде́нїе бѣсо́мъ бы́сть , и҆ вѣ́ра ᲂу҆тверже́нїѧ нача́ло прїима́ше , и҆ ѕло́ба ѿ среды̀ ѿгᲂни́ма быва́ше . Сл҃нце ᲂу҆гасѐ , пло́ть свᲂю̀ ꙗ҆́кᲂже свѣщꙋ̀ вже́гшꙋ ти на́ древѣ гдⷭ҇и . дра́хма же ѡ҆брѣта́шесѧ , пᲂгребе́ннаѧ мра́чными страстьмѝ . мⷱ҇ꙋ . Вᲂздви́женꙋ тѝ чл҃кᲂлю́бче на́ древо , ли́къ мч҃нкъ пᲂслѣ́дꙋющь стᲂпа́мъ твᲂи́мъ и҆мѣ́лъ є҆сѝ . стра́сти твᲂе́й пᲂдо́бѧщасѧ , без̾стрⷭ҇тїю хᲂда́таицы . мⷱ҇ꙋ . Пᲂто́ки и҆з̾сꙋши́ли є҆стѐ преле́стныѧ , крᲂвны́мъ тече́нїемъ . и҆ ѻ҆́гнь ᲂу҆гаси́сте бѣсо́въ чꙋ́жихъ , бжⷭ҇твенᲂю рᲂсо́ю , вѣнчено́сцы мч҃нцы . боⷢ҇ . Ѻ҆рꙋ́жїе про́йде срⷣце твᲂѐ дв҃о всенепᲂро́чнаѧ . є҆гда̀ распина́ема зижди́телѧ ви́дѣвши , и҆ кᲂпїе́мъ бжⷭ҇твенаѧ ре́бра и҆скᲂпᲂва́ема .

и҆́нъ , і҆рмо́съ , то́йже . Ѡ҆бы́де мѧ бе́здна прегрѣше́нїи , и҆ глꙋбина̀ сᲂдержи́тъ мѧ грѣхо́внаѧ , и҆ ко ѿча́ѧнїю прино́ситъ пᲂги́бельнᲂмꙋ , ст҃а́ѧ влⷣчце ты́ мѧ ны́нѣ спасѝ . Вᲂздви́гни мѧ̀ лежа́ща на ѻ҆дрѣ̀ сᲂгрѣше́нїи прест҃а́ѧ влⷣчце , и҆ да́ждь мѝ ѡ҆сїѧ́нїе спаси́тельнᲂе пᲂкаѧ́нїемъ . Ѡ҆чи́сти чл҃кᲂлю́бче , мл҃твами чи́стѡ ро́ждьшїѧ тѧ̀ . и҆ и҆зба́ви ми́ръ сво́й ѿ всѧ́кїѧ ско́рби , и҆ вѣ́чнѣй сла́вѣ спᲂдо́би . При́снѡ ѻ҆бѣщава́юсѧ дѣ́лъ ѕлы́хъ ѿстꙋпа́ти , но всегда̀ лжꙋ̀ , и҆ ѡ҆скᲂрблѧ́ю влⷣкꙋ мᲂегѡ̀ , пречⷭ҇таѧ влⷣчце , ты́ ми да́ждь и҆справле́нїе .

пѣ́снь , з҃ . і҆рмо́съ . Въ пещѝ ѻ҆́гненнѣй , пѣвцы̀ спа́слъ дѣ́ти , бл҃гᲂслᲂве́нъ бг҃ъ ѻ҆ц҃ъ на́шихъ . Да и҆зба́вимсѧ мы̀ , сла́стнагѡ грѣха̀ , же́лчи вкꙋси́лъ є҆сѝ хрⷭ҇тѐ сла́дᲂсте жи́зненаѧ . Тебѣ̀ на́древѣ хрⷭ҇тѐ ᲂу҆ѧ́звленꙋ , и҆сцѣлѣ́ша ꙗ҆́звы а҆да́мᲂвы мнᲂгᲂлѣ́тныѧ . мⷱ҇ꙋ . Свᲂи́ми ᲂу҆стремле́ньми ѿлꙋ́чшесѧ ко страда́нїю , страстᲂте́рпцы и҆ пᲂбѣди́тели ꙗ҆ви́шасѧ . мⷱ҇ꙋ . Пᲂче́тше бг҃а бᲂлѣ́зненымъ бес̾че́стїемъ и҆ вы́шнюю по́честь пᲂлꙋчи́сте страда́льцы . боⷢ҇ . По ржⷭ҇твѣ̀ чи́стаѧ ꙗ҆́кᲂже и҆ пре́жде ржⷭ҇тва̀ пребыва́еши . бг҃ъ бо бѣ̀ рᲂжде́исѧ , да ѡ҆бᲂжи́тъ чл҃ка .

и҆́нъ , і҆рмо́съ , то́йже . Бг҃ᲂрᲂди́тельнице чⷭ҇таѧ непре́зри менѐ , и҆́же вѣ́рᲂю пᲂд̾ кро́въ тво́й прⷭ҇нѡ прибѣга́ющаго . Стрⷭ҇те́й мᲂи́хъ па́жить и҆зсꙋша́ющи , пᲂда́ждь тᲂчи́ти сле́зъ ка́пли бг҃ᲂрᲂди́тельнице . Свѧза́ема вери́гами грѣхо́вными , твᲂи́ми мл҃твами разрѣшѝ пренепᲂро́чнаѧ , всепѣ́таго бг҃а пᲂро́ждьшаѧ . Къ тебѣ̀ прибѣга́ю вѣ́рнѡ , и҆ тебѐ чи́стаѧ призыва́ю и҆зба́ви мѧ̀ ѻ҆гнѧ̀ вѣ́чнагѡ .

пѣ́снь , и҃ . і҆рмо́съ . и҆з̾ =ѻ҆ц҃а пре́жде вѣ́къ рᲂжде́ннагѡ сн҃а и҆ бг҃а , и҆ в̾ пᲂслѣ́днѧѧ лѣ́та вᲂплᲂще́нна ѿ дв҃ы мт҃ре , сщ҃е́ннїи по́йте , лю́дїе превᲂзнᲂси́те є҆гѡ̀ во́ вѣки . И҆́же клѧ́твꙋ дре́ва , дре́вᲂмъ и҆сцѣли́выи , и҆ бл҃гᲂслᲂве́нїе и҆стᲂчи́выи чл҃кѡмъ пребл҃гі́и . тебѐ сп҃се пᲂе́мъ , и҆ тебѐ славᲂсло́вимъ во́ вѣки . Превᲂзвыша́емаго ѕмі́ѧ , крⷭ҇то́мъ свᲂи́мъ смири́лъ є҆сѝ . и҆ лю́тѣ па́дшагᲂсѧ смирѧ́ѧсѧ вᲂз̾не́слъ є҆сѝ , тебѐ пᲂю́ща сп҃се , и҆ славᲂсло́вѧща во́ вѣки . =мⷱ҇ꙋ . Пᲂтреби́тели пре́лести , и҆ пᲂбо́рники бжⷭ҇твеныѧ вѣ́ры , цр҃ко́вныѧ стᲂлпы̀ , и҆ тве́рдыѧ вᲂи́стинꙋ а҆дама́нты , хрⷭ҇то́вы ѻ҆рꙋ́жники , вѣ́рᲂю страстᲂно́сцы да пᲂчте́мъ в̾ пѣ́снехъ . мⷱ҇ꙋ . Сла́внїи стрⷭ҇тᲂте́рпцы , ꙗ҆́кᲂже сл҃нце вᲂсїѧ́ша , бᲂлѣ́зней ѻ҆́блаки раз̾гна́вше бл҃гᲂда́тїю , и҆ нече́стїѧ мра́къ разᲂри́ша вѣ́рᲂю тро́йческᲂю . боⷢ҇ . Невѣстᲂвᲂди́тель к̾ тебѣ̀ дв҃о гаврїи́лъ по́сланъ бы́сть , ра́дꙋисѧ вᲂпїѧ́ше тѝ гл҃ѧ , свѣ́тлѣйшаѧ пᲂла́то всѣ́хъ цр҃ѧ хрⷭ҇та̀ . в̾ ню́же в̾сели́сѧ ѡ҆бᲂжѝ всѧ̀ чл҃ки .

и҆́нъ , і҆рмо́съ , то́йже . Въ недᲂꙋмѣ́нїи сꙋ́щи срⷣцемъ и҆ мы́слїю , преще́нїѧ гее́нскагѡ небᲂѧ́сѧ сᲂгрѣша́ю при́снѡ . но ты̀ дв҃о недᲂꙋмѣ́нїе мᲂѐ разрѣшѝ , и҆ ѻ҆гнѧ̀ и҆зба́ви мѧ . Сластьмѝ пло́ти мᲂеѧ̀ ча́сто привлачи́мь є҆́смь , и҆ ꙗ҆́кѡ плѣне́нъ прᲂдае́мь є҆́смь , бг҃а прᲂгнѣ́ваю при́снѡ , бцⷣе є҆ди́на наде́жде ненаде́жнымъ , сама̀ пᲂми́лꙋй мѧ̀ . Ꙗ҆́кѡ непᲂсты́дна є҆́сть мл҃тва твᲂѧ̀ всенепᲂро́чнаѧ , є҆ли́ка бо хо́щеши пᲂдае́ши , мᲂлѧ́щи свᲂегѡ̀ сн҃а и҆ бг҃а . тѣ́мжетисѧ мᲂлю̀ , пᲂми́лꙋй и҆ спасѝ смире́ннꙋю дш҃ꙋ мᲂю̀ . Тѣле́сными бᲂлѣ́зньми , и҆ страстны́ми вᲂздвиже́ньми , и҆ дш҃е́вными ра́нами лю́тѣ и҆стѧзꙋ́емь є҆́смь , ро́ждьшаѧ є҆ди́нагѡ бл҃гᲂда́телѧ , твᲂи́ми мᲂльба́ми здра́ва сᲂтвᲂри́ мѧ . та́же , пѣ́снь бцⷣѣ . вели́читъ дш҃а мᲂѧ̀ гдⷭ҇а .= и҆ =пᲂкло́ны до землѝ .

пѣ́снь , ѳ҃ . і҆рмо́съ . Тѧ̀ па́че ᲂу҆ма̀ и҆ слᲂвесѐ мт҃рь бж҃їю , в̾ лѣ́то без̾лѣ́тнагѡ не и҆зрече́ннѡ ро́ждьшꙋю , вѣ́рнїи є҆динᲂмꙋ́дреннѡ , пѣ́сньми велича́емъ . Крѣ́пᲂсть вра́жїѧ и҆ держа́ва ѿѧ́та бы́сть , держа́вныи є҆ди́не гдⷭ҇и , на крⷭ҇тъ вᲂзнесе́нꙋ ти , и҆ пе́рсты на не́мъ ѡ҆крᲂвави́вшꙋ . И҆скᲂпа́ша хрⷭ҇тѐ мо́й , рꙋ́цѣ и҆ но́зѣ твᲂѝ , и҆ ко́сти твᲂѧ̀ и҆счето́ша , распе́ншїи без̾зако́нницы , и҆ же́лчи со ѻ҆цто́мъ тебѐ напᲂи́ша . мⷱ҇ꙋ . Оу҆сты̀ свѣ́тлѡ бг҃а прᲂпᲂвѣ́дасте , бы́вша чл҃ка , пред̾ мꙋчи́тели страстᲂте́рпцы , и҆ сла́вꙋ наслѣ́дᲂвасте . мⷱ҇ꙋ . Бᲂлѣ́знь прїѧ́ша ᲂу҆ѧзви́вшїи вразѝ ра́нами , и҆ разли́чными мꙋ́ками , бїю́ще ва́съ всечестні́и вра́чеве бᲂлѣ́знемъ , бжⷭ҇твенїи мꙋ́ченицы . боⷢ҇ . Свѣ́тъ на́мъ чи́стаѧ и҆з̾ тебѐ вᲂсїѧ̀ і҆с҃ъ , и҆ прᲂсвѣтѝ тва́рь всю̀ распѧ́тїемъ , и҆ бѣсо́вскꙋю тмꙋ̀ прᲂгна́лъ є҆́сть .

и҆́нъ , і҆рмо́съ , то́йже . Сле́зы ми пᲂда́ждь пᲂкаѧ́нїѧ пречⷭ҇таѧ , да пла́чꙋ дѣ́ла мᲂѧ̀ лю́таѧ и҆ непра́веднаѧ , пре́жде приспѣ́тїѧ кᲂнцꙋ̀ житїѧ̀ мᲂегѡ̀ . Вскꙋ́ю дш҃е ѡ҆скᲂрблѧ́еши влⷣкꙋ свᲂегѡ̀ , непра́веднаѧ дѣ́ющи , и҆ невᲂзни́чеши , пре́жде кᲂнца̀ ᲂу҆́бѡ пᲂтща́всѧ пᲂка́йсѧ . И҆зба́ви мѧ ѿ ѕлы́хъ прегрѣше́нїи и҆ скᲂрбе́й , и҆ пᲂда́ждь ми млⷭ҇ть дв҃о всечⷭ҇таѧ и҆ живᲂта̀ нетлѣ́ннагѡ , бжⷭ҇твенᲂе прича́стїе . Тебѐ бг҃а не и҆зрече́ннѡ ро́ждьшꙋю пред̾ста́тельницꙋ стѧжа́хᲂмъ , и҆ стѣ́нꙋ неѡ҆бᲂри́мꙋю , и҆ дш҃а́мъ спасе́нїе , и҆ чꙋде́съ и҆сто́чникъ .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стихѣ́ры , крⷭ҇тны . гла́съ , є҃ . То́чїю вᲂдрꙋзи́сѧ дре́во хрⷭ҇тѐ крⷭ҇та̀ твᲂегѡ̀ , пре́лесть прᲂгна́на бы́сть и҆́дᲂльскаѧ , и҆ бл҃гᲂда́ть прᲂцвѣтѐ , ᲂу҆́же бо к̾ тᲂмꙋ̀ нѣ́сть ѡ҆сꙋже́нїѧ мꙋчи́тельство , но пᲂбѣ́да ꙗ҆ви́сѧ на́мъ спасе́нїѧ . крⷭ҇тъ бо на́мъ є҆́сть пᲂхвала̀ , крⷭ҇тъ на́мъ ᲂу҆тверже́нїе , крⷭ҇тъ на́мъ ра́дᲂванїе .

сти́хъ : и҆спо́лнихᲂмсѧ за ᲂу҆́тра . Веде́нъ бы́сть на́съ ра́ди на же́ртвꙋ хрⷭ҇тѐ ꙗ҆́кѡ ѻ҆вча̀ , ꙗ҆́кѡ а҆́гнецъ неѕло́бивъ є҆мманꙋ́илъ , на закᲂле́нїе во́льнᲂе , и҆ с̾ без̾зако́нники вмѣне́нъ бы́сть . прїиди́те вᲂспо́йте ѻ҆те́чествїѧ ꙗ҆зы́къ , и҆ пᲂклᲂни́тесѧ на крⷭ҇тѣ̀ пᲂвѣ́шеннᲂмꙋ , живᲂтꙋ̀ без̾кᲂне́чнᲂмꙋ .

сти́хъ : и҆ бꙋ́ди свѣ́тлᲂсть . мⷱ҇ꙋ . Бл҃гᲂслᲂве́но во́инство цр҃ѧ нбⷭ҇нагѡ . а҆́ще бо и҆ земнᲂро́дни бѣ́ша стрⷭ҇тᲂте́рпцы , но а҆́нг҃льскᲂе дᲂстᲂѧ́нїе пᲂтща́шасѧ дᲂсти́гнꙋти , ѡ҆ тѣлесѣ́хъ небре́гше , и҆ страсте́й ра́ди , беспло́тныхъ спᲂдо́бишасѧ че́сти . мл҃твами и҆́хъ гдⷭ҇и спасѝ дш҃а на́ша .

сла́ва , и҆ ны́нѣ , крⷭ҇тᲂбоⷢ҇ . Ста́вши ᲂу҆ крⷭ҇та̀ і҆с҃е , тебѐ ро́ждьшаѧ , пла́чꙋщисѧ рыда́ше , вᲂпїю́щи , нетерплю̀ сїѧ̀ пригвᲂжде́на зрѧ́щи тѧ на́древѣ , є҆го́же пᲂрᲂди́хъ а҆́зъ , и҆ и҆збѣго́хъ бᲂлѣ́зни ꙗ҆́кѡ безмꙋ́жна , и҆ ка́кѡ ны́нѣ бᲂлѣ́знїю сᲂдержи́ма є҆́смь , и҆ ᲂу҆ѧзвлѧ́юсѧ срⷣцемъ , нн҃ѣ бо и҆спо́лнисѧ гл҃ъ и҆́же речѐ симеѡ́нъ , срⷣце твᲂѐ непᲂро́чнаѧ ѻ҆рꙋ́жїе про́йдетъ . но нн҃ѣ ѽ сн҃е мо́й , вᲂскрⷭ҇нѝ и҆ спасѝ пᲂю́щїѧ тѧ̀ .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= є҆ктенїѧ̀ . =та́же , ча́съ , а҃ . ѱалмы̀ , ѡ҆бы́чны . и҆ про́чее , и҆ кᲂне́чныи ѿпꙋ́стъ .

Въ пѧто́къ , бл҃же́нны . гла́съ , є҃ .

Разбо́йникъ на крⷭ҇тѣ̀ , бг҃а бы́ти вѣ́рᲂвавъ тѧ хрⷭ҇тѐ , и҆спᲂвѣ́да тѧ чи́стѡ ѿ́ срⷣца , пᲂмѧни́ мѧ гдⷭ҇и вᲂпїю́ща во црⷭ҇твїи си .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Оу҆мертви́всѧ на крⷭ҇тѣ̀ , и҆́же снѣ́ди ра́ди ᲂу҆ме́ршагѡ а҆да́ма , є҆го́же ѡ҆живи́лъ є҆сѝ живᲂда́вче ще́дрыи , и҆ жи́телѧ па́ки бл҃же ра́еви пᲂказа́лъ є҆сѝ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Пригвᲂзди́сѧ на крⷭ҇тѣ̀ хрⷭ҇тѐ , лᲂза̀ и҆́стиннаѧ , и҆ и҆стᲂчи́лъ є҆сѝ питїѐ спасе́нїѧ , напаѧ́ѧ всѣ́хъ вѣ́рныхъ срⷣца̀ бл҃гᲂда́тїю .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Бїе́ми мꙋ́дрїи , и҆ на ᲂу҆деса̀ разсѣка́еми , вᲂѡ҆брази́сте закᲂле́нїе влⷣчнее . сегѡ̀ ра́ди мч҃нцы хрⷭ҇то́вы прⷭ҇нѡ ᲂу҆блажа́еми є҆стѐ .

сла́ва . Пᲂкланѧ́емсѧ тѝ вѣ́рнѡ , в̾ трїе́хъ ли́цѣхъ є҆ди́нᲂмꙋ бг҃ꙋ , нераздѣ́льнꙋ и҆ пребжⷭ҇твенᲂмꙋ є҆стествꙋ̀ , вᲂпїю́ще тѝ , сла́ва тебѣ̀ трⷪ҇це є҆ди́нице бж҃е на́шъ .

и҆ ны́нѣ . Пла́чемъ бїѧ́ше себѐ влⷣчце зрѧ́щи на́древѣ крⷭ҇тнѣмъ , живᲂта̀ на́шегѡ во́лею ᲂу҆ме́рша . тѣ́мже всѝ бжⷭ҇твеными гла́сы тѧ̀ при́снѡ ᲂу҆блажа́емъ .