Въ недѣ́лю , ве́черъ . на́ гдⷭ҇и вᲂзва́хъ , стⷯры , пᲂкаѧ́нны . гла́съ , є҃ . =запѣ́въ : ꙗ҆́кѡ ѿ тебѐ ѡ҆чище́нїе є҆́сть . П=ла́чꙋ и҆ сѣ́тꙋю лю́тѣ , пᲂмышлѧ́ѧ стра́шнᲂе слᲂвᲂпᲂлᲂже́нїе , ѿ дѣ́лъ нестѧжа́въ , ѿвѣ́та ма́ла винѣ̀ ѡ҆каѧ́нныи . тѣ́мже мᲂлю́сѧ , пре́жде да́же непᲂсти́гнетъ мѧ̀ кᲂнца̀ мᲂегѡ̀ невѣ́денїе , пре́жде пᲂжа́тїѧ сме́ртнагѡ , пре́жде сꙋда̀ стра́шнагѡ , пре́жде хᲂтѧ́щꙋ мѝ ѡ҆сꙋжде́нїе прїѧ́ти , и҆дѣ́же ѻ҆́гнь негаси́мыи , и҆ тма̀ внѣ́шнаѧ , и҆дѣ́же че́рвь и҆ скре́жетъ , и҆ снѣда́етъ сᲂгрѣши́вшїѧ , сп҃се сᲂгрѣше́ней и҆збавле́нїе мѝ да́ждь и҆ ве́лїю ми́лᲂсть .

ᲂу҆пᲂва̀ дш҃а мᲂѧ̀ на́ гдⷭ҇а . Зако́ны твᲂѧ̀ , и҆ писа́нїѧ презрѣ́хъ , за́пᲂвѣди твᲂѧ̀ ѡ҆ста́вивъ ѡ҆каѧ́нныи , бж҃е мо́й и҆ зижди́телю мо́й , ка́кѡ ᲂу҆бѣ́гнꙋ про́чее , та́мᲂшнихъ мꙋче́нїи . тѣ́мже пре́жде кᲂнца̀ мᲂегѡ̀ сп҃се прᲂще́нїе мѝ да́рꙋй , слеза́мъ и҆сто́чникъ , и҆́стиннᲂе же пᲂкаѧ́нїе пᲂдава́ѧ , ꙗ҆́кѡ бг҃ъ пребл҃гъ , дале́че ѿ менѐ ѿгᲂнѧ̀ бѣсо́вскїѧ пᲂлкѝ , и҆́же и҆́щꙋщихъ во а҆́дᲂвꙋ свести́ мѧ глꙋбинꙋ̀ . тѣ́мже мᲂлю́тисѧ , да нерꙋ́кꙋ твᲂю̀ крѣ́пкꙋю ѿи҆́меши ѿ менѐ .

да ᲂу҆пᲂва́етъ і҆и҃ль на́ гдⷭ҇а . Оу҆вы̀ ка́кѡ ѡ҆мрачи́хсѧ ᲂу҆мо́мъ , ка́кѡ ᲂу҆дали́хсѧ ѿ тебѐ , и҆ рабо́тахъ ѻ҆каѧ́нныи грѣхꙋ̀ . и҆ сла́дᲂсти тѣле́снѣй , себѐ всегѡ̀ страстны́и ѿда́въ жи́вшей во мнѣ̀ стра́стнѣмъ . и҆ ны́нѣ ча́ю є҆́же ѿ житїѧ̀ мᲂегѡ̀ и҆схо́дъ , и҆ бꙋ́дꙋщихъ тᲂмле́нїи вᲂз̾прїѧ́ти , гдⷭ҇и пребл҃гі́и , пᲂда́ждь ми сле́зы въ пᲂкаѧ́нїе , и҆ разрѣше́нїе без̾мѣ́рныхъ прегрѣше́нїи мᲂи́хъ , вѣ́рно мᲂлю́ тѧ пᲂдаю́щаго ми́рᲂви ве́лїю млⷭ҇ть .

та́же , в̾ минѣ́и , стⷯры , ст҃о́мꙋ . а҆́ще ли нѣ́сть минѣ́и . и҆́ны , стихѣ́ры , беспло́тнымъ ст҃ы́мъ а҆́нг҃лѡмъ . запѣ́въ : ѿ всѣ́хъ без̾зако́нїи є҆гѡ̀ . Таи́нницы бг҃ᲂнача́лїѧ чⷭ҇тні́и , трисвѣ́тлагѡ и҆ є҆ди́нственагѡ бжⷭ҇тва̀ . и҆́же пѣ́снь непреста́ннѡ беспло́тными гла́сы , и҆ ꙗ҆зы́ки ѻ҆́гнеными принᲂсѧ́ще . на́ша мᲂле́нїѧ и҆ мл҃твы принеси́те , ꙗ҆́же ѿ ᲂу҆сте́нъ скве́рныхъ вᲂз̾сыла́емъ , и҆ ѻ҆ставле́нїе прегрѣше́нїй и҆спрᲂси́те . вѣ́сть бо не́мᲂщь на́шꙋ ѡ҆бᲂлкі́исѧ в̾ ню̀ , и҆ млⷭ҇тивъ сы́и є҆стество́мъ , мᲂле́нїѧ прїи́метъ ва́ша , ѡ҆ рабѣ́хъ сᲂгрѣши́вшихъ быва́емаѧ . пᲂдаѧ́и ми́рᲂви ве́лїю млⷭ҇ть .

пᲂхвали́те є҆гѡ̀ всѝ лю́дїе . Всѐ а҆́нг҃льскᲂе мно́жество , и҆́же влⷣцѣ мᲂемꙋ̀ приближа́ющеесѧ , и҆ тᲂгѡ̀ бжⷭ҇твенᲂмꙋ прⷭ҇то́лꙋ пред̾стᲂѧ́ще стра́шнѡ , и҆ и҆спᲂлнѧ́еми не и҆зрече́ннымъ свѣ́тᲂмъ , менѐ и҆́же во тмѣ̀ грѣхо́внѣй заблꙋ́ждьшаго , наста́вите къ свѣ́тꙋ спасе́нᲂмꙋ , пᲂвелѣ́нїемъ бг҃а ще́драгѡ . тмꙋ̀ ѿжени́те мра́чнꙋю и҆ чꙋжꙋ́ю , кᲂва́рныхъ бѣсѡ́въ , застꙋпле́нїемъ и҆ бл҃гᲂда́тїю ва́шею . нетерпи́тъ бо свѣ́та прише́ствїѧ , но ѿгᲂнѧ́етсѧ .

и҆ и҆́стина гдⷭ҇нѧ пребыва́етъ во́ вѣки . А҆́нг҃ли свѣ́тлїи бж҃їи , пред̾стᲂѧ́ще прⷭ҇то́лꙋ бл҃гᲂда́ти бжⷭ҇твенᲂмꙋ , смире́нїе сꙋ́щее , и҆ прᲂсвѣще́нїе и҆́стиннᲂе , ѿ́ свѣта бжⷭ҇твенагѡ вᲂспрїе́млюще , на́съ назира́йте с̾ нб҃сѐ чл҃кᲂлю́бцы , и҆́же в̾ бꙋ́рѣ лю́тѣй , держи́мыѧ и҆ бѣдꙋ́ющїѧ , и҆ во тмѣ̀ спѧ́щїѧ . прїиди́те ᲂу҆́бѡ ѽ а҆рха́нг҃ли на́мъ въ по́мᲂщь , и҆ сѣте́й и҆зба́вите на́съ , ѕлᲂнача́льнагѡ врага̀ , къ ва́шемꙋ бо кро́вꙋ прибѣга́емъ всѝ , прехва́льнїи .

сла́ва , и҆ ны́нѣ , боⷢ҇ . Престо́лъ херꙋви́мскїи вᲂи́стинꙋ , ꙗ҆́кѡ превы́шши а҆́нг҃лъ бы́вши , в̾ тѧ́ бо бжⷭ҇твенᲂе сло́во всели́сѧ чⷭ҇таѧ , на́шъ ѻ҆́бразъ ѡ҆бнᲂви́ти хᲂтѧ̀ , и҆з̾ тебѐ прᲂше́дъ плᲂтᲂно́сецъ , ꙗ҆́кѡ млрⷭ҇дъ . крⷭ҇тъ и҆ стра́сть на́съ ра́ди прїѧ́тъ , вᲂскрⷭ҇нїе ꙗ҆́кѡ бг҃ъ дарᲂва̀ . тѣ́мже ꙗ҆́кѡ премѣни́вшꙋю на́съ ѡ҆сꙋжде́ннагѡ є҆стества̀ , сᲂзда́телю вѣ́рᲂю бл҃гᲂдарѧ́ще мо́лимсѧ , ᲂу҆лꙋчи́ти твᲂи́ми мᲂли́твами прегрѣше́ней прᲂще́нїе , и҆ ве́лїю млⷭ҇ть .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стихѣ́ры , пᲂкаѧ́нны . гла́съ , є҃ . Гдⷭ҇и , сᲂгрѣша́ѧ непреста́ю , чл҃кᲂлю́бїю спᲂдᲂблѧ́емъ неразꙋмѣ́ю , ѡ҆дᲂлѣ́й мᲂемꙋ̀ недᲂꙋмѣ́нїю є҆ди́не бл҃же , и҆ пᲂми́лꙋй мѧ̀ .

сти́хъ : к̾ тебѣ̀ вᲂз̾ведо́хъ ѻ҆́чи мᲂѝ . Гдⷭ҇и , стра́ха твᲂегѡ̀ бᲂю́сѧ , и҆ ѕло́е твᲂрѧ̀ непреста́ю . кто̀ насꙋди́щи стᲂѧ̀ сꙋдїѝ небᲂи́тсѧ . и҆лѝ кто̀ и҆сцѣли́тисѧ хᲂтѧ̀ , врача̀ прᲂгнѣ́ваетъ ꙗ҆́кᲂже а҆́зъ . дᲂлгᲂтерпѣли́ве гдⷭ҇и , на не́мᲂщь мᲂю̀ ᲂу҆милᲂсе́рдисѧ и҆ пᲂми́лꙋй мѧ̀ .

=сти́хъ : пᲂми́лꙋй на́съ гдⷭ҇и . мⷱ҇ꙋ . Ѡ҆ =земны́хъ всѣ́хъ неради́вше , и҆ на мꙋ́ки мꙋ́жески дерзнꙋ́вше , бл҃же́нныхъ наде́ждь не пᲂгрѣши́сте , но нбⷭ҇нᲂмꙋ црⷭ҇твїю наслѣ́дницы бы́сте , всехва́льнїи мч҃нцы . и҆мꙋ́ще дерзнᲂве́нїе , к̾ чл҃кᲂлю́бцꙋ бг҃ꙋ , ми́рꙋ смире́нїе и҆спрᲂси́те , и҆ дш҃а́мъ на́шимъ ве́лїю млⷭ҇ть .

сла́ва , и҆ ны́нѣ , боⷢ҇ . Стра́шно и҆ пресла́вно , и҆ ве́лїе та́инство . невмѣсти́мыи во́ чрево в̾мѣсти́сѧ , и҆ мт҃и по ржⷭ҇твѣ̀ па́ки пребы́сть дв҃а , бг҃а бо рᲂдѝ и҆з̾ неѧ̀ вᲂплᲂще́нна . тᲂмꙋ̀ вᲂзᲂпїе́мъ , тᲂмꙋ̀ пѣ́снь рце́мъ , со а҆́нг҃лы вᲂспѣва́юще , ст҃ъ є҆сѝ без̾нача́льныи бж҃е , и҆́же на́съ ра́ди вᲂчл҃чивыисѧ сла́ва тебѣ̀ .

таⷤ , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , боⷢ҇ . =во́ =гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Въ нлⷣю , на па́вечерницѣ . кано́нъ , мᲂле́бенъ прест҃ѣ́й бцⷣѣ . гла́съ , є҃ . пѣ́снь , а҃ . і҆рмо́съ . Кᲂнѧ̀ и҆ вса́дники в̾ мо́ри чермнѣ́мъ , сᲂкрꙋша́ѧи бра́ни мы́шцею высо́кᲂю , хрⷭ҇то́съ и҆стрѧ́слъ є҆́сть , і҆зра́илѧ же спасѐ , пᲂбѣ́днꙋю пѣ́снь пᲂю́ща . запѣ́въ : прест҃а́ѧ гжⷭ҇е бцⷣе спасѝ на́съ . Чꙋ́до в̾ тебѣ̀ сᲂверша́етсѧ дв҃о во́ чревѣ , вᲂи́стинꙋ ᲂу҆жа́сно , ꙗ҆́кѡ во ᲂу҆тро́бѣ свᲂе́й , и҆́же ника́кᲂже в̾мѣсти́маго и҆мѣ́ла є҆сѝ , и҆ несказа́нно рᲂдила̀ є҆сѝ , прⷭ҇нѡ дв҃ᲂю пребы́вши . Ѻ҆дᲂжди́ ми влⷣчце прегрѣше́нїемъ ѡ҆ставле́нїе , ꙗ҆́же до́ждь нбⷭ҇ныи прише́дшїи к̾ тебѣ̀ , не и҆згл҃аннѡ в̾мѣ́щши , и҆ дв҃ᲂю пребы́вши , по ржⷭ҇твѣ̀ не пᲂсти́жнѣмъ .= сла́ва . Є҆ди́на бл҃гᲂслᲂве́наѧ , и҆ бг҃ᲂра́дᲂваннаѧ , ꙗ҆́же ра́дᲂсть чл҃кѡмъ ро́ждьши не и҆зрече́ннꙋ , печа́ли ѿи҆мѝ дш҃и мᲂеѧ̀ мᲂлю́сѧ , и҆ вᲂзвеселѝ срⷣце мᲂѐ . и҆ ны́нѣ . В=сѐ жела́нїе , и҆ сла́дᲂсть жи́зни , и҆́же ѿ тебѐ вᲂсїѧ́выи за премно́гꙋю бл҃гᲂсть , дв҃о пренепᲂро́чнаѧ , є҆го́же мᲂлѝ спасти́ мѧ , и҆́же непреста́ннѡ ны́нѣ тѧ̀ сла́вѧща .

пѣ́снь , г҃ . і҆рмо́съ . Оу҆тверже́и ни наче́мъ же зе́млю пᲂвелѣ́нїемъ сѝ , и҆ распрᲂстранѝ не ѡ҆держи́мꙋю тѧгᲂтꙋ̀ , на недви́жимᲂмъ хрⷭ҇тѐ ка́мени запᲂвѣде́й тѝ , цр҃квь свᲂю̀ ᲂу҆твердѝ , є҆ди́не бл҃же и҆ чл҃кᲂлю́бче . Преидо́ша сѣ́немъ закᲂнᲂтвᲂри́маѧ , закᲂнᲂда́вца бо хрⷭ҇та̀ рᲂдила̀ є҆сѝ пречⷭ҇таѧ , бл҃гᲂда́ть ѡ҆чище́нїѧ и҆ прᲂсвѣще́нїѧ на́мъ в̾зако́нивша . и҆ клѧ́твы и҆ зе́мшаго , дв҃о всенепᲂро́чнаѧ . Рᲂди́сѧ ѿ тебѐ чⷭ҇таѧ бг҃ъ вᲂплᲂще́нъ , и҆ пло́тїю ви́дѣнъ бы́сть , и҆́же пре́жде неви́димыи . сегѡ̀ ᲂу҆́бѡ мᲂлѝ прилѣ́жнѡ ѻ҆трᲂкᲂви́це , ѿ ви́димыхъ и҆ неви́димыхъ вра́гъ мѧ и҆зба́вити , свѣ́тлѡ тѧ̀ сла́вѧщаго . сла́ва . Страсте́й мѧ люта̀ ѡ҆бꙋрева́етъ вᲂлна̀ , лꙋка́выхъ дꙋхо́въ глꙋбина̀ ѡ҆держи́тъ мѧ , грѣхо́внаѧ бꙋ́рѧ смꙋща́етъ ми срⷣце . бг҃ᲂрᲂди́тельнице ты́ мѧ ᲂу҆твердѝ , свѣ́тлѡ тѧ пᲂю́щаго .= и҆ ны́нѣ . Б=жⷭ҇твенаго гаврїи́ла чинᲂнача́льника и҆мꙋ́ще , бл҃гᲂгᲂвѣ́йнѡ є҆́же ра́дꙋисѧ , вѣ́рᲂю приво́димъ сᲂгла́снѡ , не и҆скꙋсᲂбра́чнѣй мт҃ри бцⷣѣ вѣ́рнѡ . є҆ю́же бѣ́дъ же и҆ скᲂрбе́й , и҆ недꙋ́гъ и҆збавлѧ́емсѧ .

пѣ́снь , д҃ . і҆рмо́съ . Бжⷭ҇твеннᲂе твᲂѐ разꙋмѣ́въ смᲂтре́нїе , дивѧ́сѧ а҆вва́кꙋмъ хрⷭ҇тѐ тре́петнѡ вᲂпїѧ́ше тѝ , на спасе́нїе лю́демъ сѝ , спастѝ бл҃гі́ѧ свᲂѧ̀ прише́лъ є҆сѝ . И҆стка́вшаѧ внꙋ́трь ѿ крᲂве́й твᲂи́хъ дв҃ческихъ , нб҃о ѻ҆блакѝ дв҃о ѡ҆дѣва́юща , ѻ҆де́жею нетлѣ́нїѧ , пре́же ле́стїю ѡ҆бнаже́наго мѧ , ѡ҆блецы̀ . Оу҆тро́ба твᲂѧ̀ дв҃о пᲂла́та ст҃а̀ , цр҃ѧ̀ и҆ бг҃а несказа́нна бы́сть , в̾ню́же всели́сѧ , цр҃кви на́съ сᲂдѣ́ла . сла́ва . Оу҆ще́дри щедра̀ сꙋ́щи , преѡ҆каѧ́ннꙋю ми дш҃ꙋ , бг҃ᲂрᲂди́тельнице всенепᲂро́чнаѧ , ю҆́же ѿ страсте́й и҆ грѣха̀ , лю́тѣ ѡ҆чернѣ́вшꙋю , и҆ ѡ҆цѣпенѣ́вшꙋю .= и҆ ны́нѣ . Н=етлѣ́нна црⷭ҇тва вᲂсїѧ́ла є҆сѝ ски́петро , ѿ ко́рене і҆єссе́ѡва . и҆ ража́еши ѻ҆трᲂча̀ безмꙋ́жно чⷭ҇таѧ , а҆да́мᲂва и҆ дв҃дᲂва бг҃а , в̾кꙋ́пѣ и҆ зижди́телѧ и҆ гдⷭ҇а .

пѣ́снь , є҃ . і҆рмо́съ . Ѡ҆дѣѧ́исѧ свѣ́тᲂмъ ꙗ҆́кѡ ри́зᲂю , к̾ тебѣ̀ ᲂу҆́треннюю , и҆ тебѣ̀ вᲂпїю̀ , дш҃ꙋ мᲂю̀ прᲂсвѣтѝ ѡ҆мра́чнꙋю хрⷭ҇тѐ , ꙗ҆́кѡ млрⷭ҇дъ . Пребыва́еши по ржⷭ҇твѣ̀ дв҃а нетлѣ́нна , и҆стлѣ́вшихъ всѣ́хъ чл҃къ , къ жи́зни привᲂдѧ́щи , и҆ нетлѣ́нїемъ ѡ҆сїѧ́вши пренепᲂро́чнаѧ . Но́во рᲂдила̀ є҆сѝ ꙗ҆́кѡ мла́дѧ пречⷭ҇таѧ превѣ́чно , ѿ ѻ҆ц҃а безлѣ́тна вᲂсїѧ́вшаго , є҆го́же ѡ҆́ мирѣ мᲂлѝ бг҃ᲂневѣ́сто . сла́ва . Да ѡ҆брѧ́щꙋ тѧ пᲂмо́щницꙋ дв҃о , и҆зима́ющꙋ мѧ в̾ ча́съ прѣ́нїѧ сꙋ́днагѡ , є҆гда̀ насꙋди́щи пред̾ста́нꙋ и҆́же ѿ тебѐ ро́ждьшагᲂсѧ .= и҆ ны́нѣ . В=сѧ̀ бли́жнѧѧ мᲂѧ̀ дᲂбра̀ и҆ непᲂро́чна ѿ лива́на , дв҃о бг҃ᲂневѣ́сто , ст҃ы́мъ дх҃ᲂмъ ты̀ прᲂꙋвѣ́дѣсѧ , вᲂплᲂще́нїемъ сн҃а бж҃їѧ .

пѣ́снь , ѕ҃ . і҆рмо́съ . Вᲂлнѧ́щеесѧ бꙋ́рею дш҃е тлѣ́ннᲂю , влⷣко хрⷭ҇тѐ , страсте́й мᲂи́хъ мо́ре ᲂу҆крᲂтѝ , и҆ и҆з̾ тлѝ вᲂз̾веди́ мѧ ꙗ҆́кѡ млрⷭ҇дъ . Не и҆скꙋсᲂмꙋ́жно рᲂдила̀ є҆сѝ бцⷣе є҆мманꙋ́ила , на́ше смире́нїе ᲂу҆ще́дрившаго , тѣ́мже прⷭ҇нѡдо́лжно тѧ сла́вимъ . Па́че ᲂу҆ма̀ без̾лѣ́тнаго , па́че сло́ва зижди́телѧ прест҃а́ѧ рᲂдила̀ є҆сѝ , и҆збавлѧ́ющаго всѧ́кїѧ тлѝ , бцⷣꙋ тѧ пᲂю́щихъ . сла́ва . Бл҃га́го ро́ждьши бл҃гᲂда́телѧ и҆ зижди́телѧ , прест҃а́ѧ влⷣчце , бл҃гᲂлюби́ваѧ , дш҃ꙋ мᲂю̀ ѡ҆ѕло́бленꙋю ᲂу҆блажѝ .= и҆ ны́нѣ . Н=о́во тебѣ̀ пᲂхвале́нїе и҆ дре́внее вᲂспѣва́емъ всечⷭ҇таѧ , лꙋ́чше бо не и҆́мамы къ пᲂхвале́нїю , ра́звѣе ра́дꙋисѧ , є҆́же съ гаврїи́лᲂмъ тебѣ̀ вᲂспѣва́емъ .

Гдⷭ҇и пᲂми́лꙋй , гⷤ . сла́ва , и҆ ны́нѣ . сѣда́ленъ , гла́съ , є҃ . Себѐ пре́же сꙋда̀ ны́нѣ пла́чꙋ , пᲂмышлѧ́ѧ мᲂѧ̀ дѣ́ла лꙋка́ваѧ и҆ лю́таѧ , и҆ прегрѣше́нїи глꙋбинꙋ̀ ѡ҆держа́щꙋю мѧ̀ ѿ ю҆́нᲂсти , и҆ пᲂдавлѧ́ющꙋ ᲂу҆́мъ . но твᲂи́мъ чⷭ҇таѧ пред̾ста́нїемъ , ѡ҆ставле́нїе мѝ пᲂда́ждь , и҆ спасе́нїе ᲂу҆лꙋчи́ти спᲂдо́би .

пѣ́снь , з҃ . і҆рмо́съ . Превᲂзнᲂси́мыи ѻ҆ц҃е́мъ гдⷭ҇ь , пла́мень ᲂу҆гаси́въ , дѣ́ти же прᲂхлади́лъ є҆́сть , є҆динᲂгла́снѡ пᲂю́ща , бж҃е бл҃гᲂслᲂве́нъ є҆сѝ . И҆зба́ви мѧ пречⷭ҇таѧ , ѕла́го ᲂу҆ны́нїѧ и҆ страсте́й ѡ҆мраче́нїѧ . и҆ ѡ҆сꙋже́нїѧ вѣ́чнꙋющаго ꙗ҆́кѡ да вѣ́рᲂю тѧ̀ сла́влю . Оу҆мертвѝ стра́сти мᲂѧ̀ , ꙗ҆́же жи́знь ро́ждьшаѧ . вᲂз̾дви́гни мѧ бг҃ᲂневѣ́сто , лежа́щаго и҆з̾ гро́ба нечꙋ́вствїѧ , да любо́вїю тѧ̀ сла́влю . сла́ва . Пло́тїю ѡ҆блᲂже́на , бг҃а беспло́тнаго пренепᲂро́чнаѧ рᲂдила̀ є҆сѝ , на́съ и҆збавлѧ́ющаго и҆́же стра́хᲂмъ пᲂю́щихъ , бж҃е бл҃гᲂслᲂве́нъ є҆сѝ .= и҆ ны́нѣ . И҆=сцѣле́нїе безо́мздно чи́стꙋю твᲂю̀ мл҃твꙋ ѡ҆брѣ́тше дв҃о , про́симъ пᲂю́ще дш҃а́мъ бл҃гᲂпремѣне́нїе , и҆ телесе́мъ здра́вїе .

пѣ́снь , и҃ . і҆рмо́съ . Тебѣ̀ вседѣ́телю , в̾ пещѝ ѻ҆́трᲂцы всеми́рныи ли́къ сᲂста́вльше пᲂѧ́хꙋ , дѣ́ла всѧ́каѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . Две́ри свѣ́та , пᲂкаѧ́нїѧ мѝ две́ри свѣтᲂза́рныѧ ѿве́рзи , пᲂказꙋ́ющи всѧ́къ пра́выи пꙋ́ть пра́вдѣ в̾вᲂдѧ́щь , въ бжⷭ҇твеныѧ во́ли в̾хо́ды . Но́во на землѝ дв҃о мт҃и ѻ҆трᲂча̀ , ѻ҆ц҃ꙋ̀ сᲂбез̾нача́льна сн҃а рᲂдила̀ є҆сѝ , за млрⷭ҇дїе не и҆зрече́нно на́мъ ᲂу҆пᲂдо́бльшасѧ , и҆стлѣ́вшимъ пᲂд̾ грѣхо́мъ . сла́ва . Всѧ̀ и҆збра́нна , всѧ̀ преꙋкраше́на , бг҃ъ и҆́же вᲂзлюбѝ , и҆ и҆з̾бра̀ , ꙗ҆ви́ласѧ є҆сѝ дв҃о прⷭ҇нѡ препрᲂсла́влена . тѣ́мже тѧ̀ пᲂе́мъ чⷭ҇таѧ во́ вѣки .= и҆ нн҃ѣ . В=сѧ̀ чиста̀ , и҆ бжⷭ҇твеныѧ сла́вы и҆спо́лнь чи́стаѧ , бли́жнѧѧ мᲂѧ̀ , речѐ дх҃ъ бж҃їи , тѧ̀ прᲂвᲂзвѣща́ю , пѣ́сньми вᲂпїѧ́ше , тебѣ̀ пᲂдᲂба́етъ ра́дᲂватисѧ , бг҃а чл҃ка ро́ждьшей .

пѣ́снь , ѳ҃ . і҆рмо́съ . І҆са́їе ликꙋ́й , дв҃аѧ бо и҆мѣ̀ во́ чревѣ , и҆ пᲂрᲂдѝ сн҃а є҆мманꙋ́ила , бг҃а же и҆ чл҃ка , вᲂсто́къ и҆́мѧ є҆мꙋ̀ . є҆го́же велича́юще , тебѐ дв҃о ᲂу҆бл҃жа́емъ . Твᲂи́хъ притека́телей всечⷭ҇таѧ , не ѿри́ни ны́нѣ вᲂздыха́нїѧ , но вᲂз̾зрѝ на ны̀ сꙋ́щїѧ въ ско́рбѣхъ , пла́чь прелᲂжѝ на ра́дᲂсть , и҆ ᲂу҆миле́нїе в̾ весе́лїе , и҆́же в̾ пѣ́снехъ тѧ̀ пᲂю́щихъ . Ѻ҆снᲂва́нїе недви́жимо , сп҃са ро́ждьши чⷭ҇таѧ , на вᲂда́хъ зе́млю бжⷭ҇твеными велѣ́нїи ѡ҆снᲂва́вшаго , на не́мже на́съ и҆́же свѣ́тлѡ тѧ̀ блажа́щихъ , ᲂу҆тверди́ти мᲂли́сѧ . сла́ва . Па́че ᲂу҆ма̀ ржⷭ҇тво́ ти бцⷣе . бе́з̾мꙋжа бо зача́тїе в̾ тебѣ̀ , и҆ дв҃ствено ржⷭ҇тво́ ти бы́сть , и҆́бо бг҃ъ є҆́сть рᲂже́исѧ . є҆го́же велича́юще , ро́ждьшꙋю ᲂу҆блажа́емъ .= и҆ ны́нѣ . Стра́шенъ є҆сѝ гдⷭ҇и , и҆ кто̀ ᲂу҆́бѡ тᲂгда̀ пᲂстᲂи́тъ преще́нїѧ твᲂегѡ̀ хрⷭ҇тѐ , є҆ди́не цр҃ю , сꙋ́дъ твᲂрѧ́щꙋ тѝ . тѣ́мже пᲂщадѝ , спаси́ мѧ сп҃се , ро́ждьшїѧ тѧ̀ бл҃гᲂпрїѧ́тными мᲂльба́ми . =та́же , дᲂсто́йнѡ є҆́сть . и҆ про́чее , ѡ҆бы́чно . и҆ ѿпꙋ́стъ .

Въ пᲂнедѣ́льникъ , на ᲂу҆́трени . по а҃ , стихᲂло́гїи . сѣда́льны , пᲂкаѧ́нны . гла́съ , є҃ . Сꙋдїѝ сѣдѧ́щꙋ , и҆ а҆́нг҃лѡмъ пред̾стᲂѧ́щимъ , трꙋбѣ̀ гласѧ́щи , и҆ пла́мени гᲂрѧ́щꙋ , что̀ сᲂтвᲂри́ши дш҃е мᲂѧ̀ , ведо́ма на сꙋ́дъ , тᲂгда́ бо лю́таѧ твᲂѧ̀ пред̾ста́нꙋтъ , и҆ та́йнаѧ ѡ҆блича́тсѧ сᲂгрѣше́нїѧ . тѣ́мже пре́жде кᲂнца̀ вᲂзᲂпі́и сꙋдїѝ , бж҃е ѡ҆чи́сти мѧ и҆ спаси́ мѧ . сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . Всѝ пᲂбди́мъ , и҆ хрⷭ҇та̀ ᲂу҆срѧ́щемъ со мно́жествᲂмъ ма́сла , и҆ свѣща́ми свѣ́тлыми , ꙗ҆́кѡ да черто́га внꙋ́трь спᲂдо́бимсѧ . и҆́же бо внѣ̀ двере́й ѡ҆брѣта́ѧисѧ , бездѣ́льнѡ бг҃ᲂви вᲂз̾зᲂве́тъ пᲂми́лꙋй мѧ . сла́ва , и҆ нн҃ѣ , боⷢ҇ . Ст҃ѣ́йшꙋ херꙋви́мъ , превы́шшꙋ серафи́мъ пречⷭ҇таѧ , бцⷣꙋ тѧ вᲂи́стинꙋ и҆спᲂвѣ́дающе , и҆́мамы грѣ́шнїи застꙋ́пницꙋ , и҆ ѡ҆брѣта́емъ во́ времѧ напа́стей спасе́нїе . тѣ́мже непреста́й ѡ҆ на́съ мᲂлѧ́щисѧ , держа́во и҆ прибѣ́жище дш҃а́мъ на́шимъ .

по в҃ , стихᲂло́гїи , сѣда́льны . гла́съ , є҃ . Дш҃е ꙗ҆́же здѣ̀ вре́менна , та́мᲂшнѧѧ же вѣ́чна . зрѧ̀ сꙋди́ще , и҆ на прⷭ҇то́лѣ сꙋдїю̀ , и҆ трепе́щꙋ ѿвѣ́та , про́чее дш҃е со тща́нїемъ ѡ҆брати́сѧ , сꙋ́дъ непрᲂща́емь . сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . На ѻ҆дрѣ̀ слежꙋ̀ сᲂгрѣше́нїи мно́гихъ ᲂу҆кра́даемь є҆́смь наде́жею спасе́нїѧ мᲂегѡ̀ , и҆́бо со́нъ лѣ́нᲂсти мᲂеѧ̀ , хᲂда́тайствꙋетъ дш҃и мᲂе́й мꙋче́нїе . но ты̀ бж҃е рᲂжде́исѧ ѿ дв҃ы , вᲂздви́гни мѧ к̾ твᲂемꙋ̀ пѣ́нїю да сла́влю тѧ . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Сїѧ́етъ дне́сь страстᲂте́рпецъ па́мѧть , и҆́мать бо и҆ ѿ нб҃съ зарю̀ . ли́къ а҆́нг҃льскїи тᲂржествꙋ́етъ , и҆ чл҃ческїи ро́дъ спра́зднꙋетъ . тѣ́мже мо́лѧтсѧ гдⷭ҇ви пᲂми́лᲂватисѧ дш҃а́мъ на́шимъ . сла́ва , и҆ нн҃ѣ , боⷢ҇ . Со а҆́нг҃лы нбⷭ҇наѧ , и҆ со чл҃ки земна́ѧ , во́ гласѣ ра́дᲂванїѧ , бцⷣе вᲂпїе́мъ тѝ . ра́дꙋисѧ две́ри нб҃съ прᲂстра́ннѣйши . ра́дꙋисѧ є҆ди́на земнᲂро́днымъ спасе́нїе , ра́дꙋисѧ чи́стаѧ ѡ҆бра́дᲂваннаѧ , ро́ждьшаѧ бг҃а вᲂплᲂще́нна .

по г҃ , стихᲂло́гїи , сѣда́ленъ . гла́съ , є҃ . Без̾слᲂве́сными мѧ страстьмѝ преклᲂне́наго , и҆ блꙋ́дно житїѐ и҆з̾жи́вша , призᲂвѝ сп҃се ꙗ҆́кᲂже блꙋ́днаго и҆ прїимѝ , и҆ ѡ҆бъѧ́тїѧ ѻ҆те́ческаѧ , за млрⷭ҇дїе щедро́тъ распрᲂстри́ ми , и҆ мл҃твами беспло́тныхъ , пре́днѣй че́сти спᲂдо́би . сла́ва , и҆ ны́нѣ , боⷢ҇ . Те́плаѧ пред̾ста́тельнице , и҆ непᲂбѣди́маѧ , ᲂу҆пᲂва́нїе тве́рдᲂе , и҆ непᲂсты́днᲂе , стѣно̀ , и҆ пᲂкро́ве и҆ приста́нице , прибѣга́ющимъ к̾ тебѣ̀ , при́снѡ дв҃о чⷭ҇таѧ . сн҃а свᲂегѡ̀ и҆ бг҃а мᲂлѝ со а҆́нг҃лы , смире́нїе дарᲂва́ти ми́рᲂви , и҆ спасе́нїе и҆ ве́лїю млⷭ҇ть .

Впᲂнедѣ́льникъ , кано́нъ . є҆мꙋ́же краегране́сїе си́це мнѡ́го тѝ сᲂгрѣши́вшаго ᲂу҆ще́дри сло́ве . =Твᲂре́нїе ки́ръ і҆ѡ́сифᲂво . гла́съ , є҃ . пѣ́снь , а҃ . і҆рмо́съ . Пᲂе́мъ гдⷭ҇ви , сᲂтво́ршемꙋ ди́внаѧ чꙋдеса̀ , в̾ чермнѣ́мъ мо́ри пѣ́снь пᲂбѣ́днꙋю , ꙗ҆́кѡ прᲂсла́висѧ . =запѣ́въ : сла́ва тебѣ̀ бж҃е на́шъ , сла́ва тебѣ̀ . И҆́же мно́гими лестьмѝ и҆звᲂди́ма , и҆ прельща́ема хрⷭ҇тѐ чꙋжди́мъ , ѻ҆братѝ и҆ ᲂу҆ще́дри ꙗ҆́кѡ всеси́ленъ . И҆́же глꙋха́го ᲂу҆́ши ѿверзы́и хрⷭ҇тѐ . дш҃и мᲂе́й ѡ҆глᲂхнꙋ́вшїи ᲂу҆́ши ѿве́рзи , ꙗ҆́кѡ да твᲂи́хъ слᲂве́съ в̾нꙋша́ю . запѣ́в̾ : ст҃і́и мч҃нцы , мᲂли́те бг҃а ѡ҆ на́съ . мⷱ҇ꙋ . Нᲂвᲂꙗ҆вле́ныѧ звѣ́зды сꙋ́ще сл҃нца пра́веднаго хрⷭ҇та̀ , тмꙋ̀ ѿжени́те ѿ срⷣцъ на́шихъ . мⷱ҇ꙋ . Ражже́ны стрѣ́лы , бжⷭ҇твеными ᲂу҆́гльми ст҃а́гѡ дх҃а , страда́льцы ꙗ҆́вльшесѧ , стрѣ́лы сᲂкрꙋша́юще всѧ̀ ѕмі́евы . боⷢ҇ . Две́рь бжⷭ҇твеныѧ сла́вы , пᲂкаѧ́нїѧ ми две́ри ѿве́рзи , и҆ ѿ вра́тъ а҆́дᲂвыхъ и҆схи́ти мᲂлю́сѧ , смире́нꙋю ми дш҃ꙋ .

Дрꙋгі́и кано́нъ беспло́тнымъ . твᲂре́нїе , фео́фанᲂво . і҆рмо́съ . Кᲂнѧ̀ и҆ вса́дники .= запѣ́в̾ : ст҃і́и а҆рха́нг҃ли и҆ а҆́нг҃ли , мᲂли́те бг҃а ѡ҆ на́съ . Слꙋгѝ бг҃ᲂнача́лїѧ свѣтᲂда́тельнагѡ , и҆ є҆гѡ̀ зарѧ́ми , первᲂсвѣ́тлымъ разжига́еми свѣ́тᲂмъ , ѡ҆зари́ти дш҃ꙋ мᲂю̀ а҆́нг҃ли влⷣцѣ пᲂмᲂли́тесѧ . =двⷤа . И҆мꙋ́ще дерзнᲂве́нїе , ꙗ҆́кѡ прⷭ҇то́лꙋ высо́кᲂмꙋ пред̾стᲂѧ́ще всѝ , бл҃гᲂче́стно пᲂю́щїѧ ва́съ , бѣ́дъ и҆збавлѧ́йте , первᲂстᲂѧ́тели чи́нꙋ нбⷭ҇нᲂмꙋ , ѽ а҆рхистрати́зи . боⷢ҇ . Разрꙋши́сѧ клѧ́тва , и҆ печа́ль преста̀ , бл҃гᲂслᲂве́наѧ бо и҆ ѡ҆бра́дᲂваннаѧ , вѣ́рнымъ ра́дᲂсть вᲂсїѧ̀ , бл҃гᲂслᲂве́нїе всѣ́мъ кᲂнце́мъ цвѣ́тъ нᲂсѧ́щи хрⷭ҇та̀ .

пѣ́снь , г҃ . і҆рмо́съ . Над̾ ꙗ҆зы́ки бг҃ъ вᲂцр҃исѧ , бг҃ъ сѣди́тъ на прⷭ҇то́лѣ ст҃ѣ́мъ свᲂе́мъ , вᲂспᲂе́мъ є҆мꙋ̀ разꙋ́мнѡ , ꙗ҆́кѡ цр҃ю на́шемꙋ . Ты̀ ни є҆ди́наго пᲂгꙋби́ти хо́щеши бл҃гі́и гдⷭ҇и , пᲂгиба́ющаго ᲂу҆ще́дри , и҆ спаси́ мѧ манᲂве́нїемъ всеще́дре ми́лᲂстїю сѝ . И҆же в̾ вѣ́дѣнїи и҆ не в̾ вѣ́дѣнїи сᲂгрѣши́хъ тебѣ̀ хрⷭ҇тѐ . гдⷭ҇и ꙗ҆́же всѧ̀ вѣ́дѧщемꙋ прихᲂжꙋ̀ , и҆ припа́даю тѝ , прїими́ мѧ ꙗ҆́кᲂже блꙋ́днагѡ . мⷱ҇ꙋ . Да живꙋ́щаго грѣха̀ ᲂу҆мертвитѐ мч҃нцы , и҆ ме́ртва врага̀ пᲂка́жете , ѡ҆ ме́ртвᲂсти тѣле́снѣй бл҃же́ннїи неради́сте . мⷱ҇ꙋ . И҆спещре́ни страда́ньми мч҃нцы , и҆ ѻ҆де́ждами ѡ҆брᲂще́нными кро́вїю ᲂу҆кра́шени , всѣ́хъ цр҃ю вѣнцено́сцы пред̾ста́сте . боⷢ҇ . Дв҃о мт҃и ꙗ҆́же бг҃а вᲂпло́щши , гла́сы прїе́мли вᲂпїю́щихъ тѝ всегда̀ , и҆ и҆зба́ви на́съ ѿ разли́чныхъ напа́стей .

и҆́нъ , і҆рмо́съ . Оу҆тверже́и ни наче́мъ же . И҆́же сло́вᲂмъ , ликᲂва́нїѧ вы́шнимъ си́ламъ премꙋ́дро сᲂставле́и , твᲂю̀ бл҃гᲂсть не и҆счетнᲂси́льнꙋ пᲂказа́лъ є҆сѝ . тѣ́хъ пред̾ста́тельствᲂмъ цр҃кᲂвь свᲂю̀ ᲂу҆твердѝ , є҆ди́ныи бл҃же и҆ чл҃кᲂлю́бче . двⷤа . Оу҆краше́и не и҆зрече́ннᲂю свѣ́тлᲂстїю а҆́нг҃лы хрⷭ҇тѐ , и҆ тѣ́ми ᲂу҆твержа́ѧ цр҃кᲂвь свᲂю̀ млрⷭ҇де ѻ҆каѧ́ннꙋю мѝ дш҃ꙋ тѣ́хъ ра́ди прᲂсвѣтѝ . непᲂмина́ѧ мᲂи́хъ безчи́сленыхъ грѣхо́въ мᲂлю́сѧ . боⷢ҇ . Ты̀ мт҃и бж҃їѧ несᲂчта́ннѡ рᲂдила̀ є҆сѝ , и҆́же и҆з̾ нетлѣ́нна ѻ҆ц҃а вᲂсїѧ́вшаго , без̾мт҃рьнихъ бᲂлѣ́зней . тѣ́мже тѧ̀ бцⷣꙋ , вᲂплᲂще́ннаго ро́ждьшꙋю сло́ва , правᲂсла́вно прᲂпᲂвѣ́дꙋемъ .

пѣ́снь , д҃ . і҆рмо́съ . Дѣ́ла смᲂтре́нїѧ твᲂегѡ̀ гдⷭ҇и , ᲂу҆диви́ша пррⷪ҇ка а҆вва́кꙋма , и҆зы́де бо на спасе́нїе лю́демъ сѝ , спастѝ бл҃гі́ѧ свᲂѧ̀ прише́лъ є҆сѝ . Дѣ́ла ꙗ҆́же в̾ житїѝ сᲂтвᲂри́хъ , сꙋ́ть лꙋка́ваѧ и҆ ѕла́ѧ , ѿ ни́хъ же хрⷭ҇тѐ бж҃е мо́й и҆зба́ви мѧ , пᲂкаѧ́нїе и҆́скрено пᲂдаѧ́ ми . Всѧ́кꙋ за́пᲂвѣдь честнꙋ́ю небрего́хъ , стра́хъ тво́й ѿри́нꙋвъ хрⷭ҇тѐ , и҆ бᲂю́сѧ не и҆збѣ́жнагѡ тѝ сꙋди́ща , в̾ не́мже не ѡ҆сꙋдѝ менѐ бл҃гᲂꙋтро́бне . мⷱ҇ꙋ . Реме́нми всю́дꙋ вᲂи́стинꙋ прᲂтѧза́еми , и҆ ра́нами кᲂнчева́еми зѣ́льнѣ , и҆ нᲂгᲂтьмѝ стрꙋ́жеми страда́льцы твᲂѝ сло́ве , вѣ́рᲂю ра́дᲂвахꙋсѧ . мⷱ҇ꙋ . Пᲂкᲂлѣба́ти ва́съ страда́льцы ѿ бжⷭ҇твенагѡ стᲂѧ́нїѧ , невᲂзмо́же ника́кᲂже лꙋка́выи . тѣ́мже мно́гимъ кᲂле́блемымъ , до́блїи ᲂу҆тверже́нїѧ бжⷭ҇твенаѧ ꙗ҆ви́стесѧ . боⷢ҇ . Вᲂплᲂща́етсѧ ѿ чи́стыхъ крᲂве́й твᲂи́хъ гдⷭ҇ь . пᲂкаѧ́нїе чтꙋ́щимъ тѧ̀ пᲂдава́ѧ , всепѣ́таѧ твᲂи́мъ бл҃ги́мъ хᲂда́тайствᲂмъ , ꙗ҆́кѡ бл҃гᲂꙋтро́бенъ и҆ є҆ди́нъ чл҃кᲂлю́бецъ .

и҆́нъ , і҆рмо́съ . Бжⷭ҇твеннᲂе твᲂѐ . А҆́нг҃льскїѧ сᲂста́вилъ свѣ́тлᲂсти , бг҃ᲂдѣ́льными сїѧ́нїи , бл҃гᲂда́тно прᲂсвѣти́лъ є҆сѝ ꙗ҆́кѡ си́ленъ , въ крѣ́пᲂсти сло́во твᲂѐ сᲂверша́ти неви́диме . двⷤа . Земны́хъ тѣле́съ мꙋ́дрᲂсти ѿлᲂжи́мъ вѣ́рнїи , житїю̀ пᲂдо́бѧщесѧ беспло́тныхъ а҆́нг҃лъ . и҆ нн҃ѣ впери́мсѧ дх҃ᲂмъ . боⷢ҇ . Бꙋ́ди мѝ пред̾ста́тельнице пречⷭ҇таѧ , прибѣ́жище и҆ приста́нище . страсте́й бꙋ́рю ѿгᲂнѧ́щи . ꙗ҆́же а҆́нг҃льскїѧ ли́ки дᲂбро́тᲂю без̾ разсꙋжде́нїѧ превᲂзше́дши .

пѣ́снь , є҃ . і҆рмо́съ . Свѣ́те и҆́стинныи хрⷭ҇тѐ бж҃е , к̾ тебѣ̀ ᲂу҆́треннюетъ дх҃ъ мо́й ѿ́ нᲂщи , ꙗ҆вѝ на мнѣ̀ лицѐ твᲂѐ . Вᲂзни́кни ѽ дш҃е вᲂзни́кни ѿ сна̀ тѧ́жкаго , лю́тыѧ лѣ́нᲂсти , и҆ пᲂкаѧ́нїѧ свѣ́тᲂмъ ѡ҆зари́сѧ . Ѻ҆бнᲂви́мъ дш҃ꙋ прилѣжа́нїемъ , и҆ ᲂу҆миле́нїѧ тꙋ́чами напᲂи́мсѧ , ꙗ҆́кѡ да и҆зрасти́мъ пᲂкаѧ́нїѧ кла́сы . мⷱ҇ꙋ . Оу҆́гльми любвѐ наѡ҆стри́вшесѧ , небесᲂкᲂва́ннїи мечѝ страстᲂно́сцы ꙗ҆ви́стесѧ , враго́въ сѣкꙋ́ще пᲂлкѝ . мⷱ҇ꙋ . Непᲂрабо́щени враго́мъ бы́вше , пᲂрабо́тисте тᲂгѡ̀ страстᲂте́рпцы . и҆ бли́жнїи хрⷭ҇тꙋ̀ ꙗ҆ви́стесѧ дрꙋ́зи . боⷢ҇ . Дв҃о в̾ жена́хъ бл҃гᲂслᲂве́наѧ , твᲂѧ̀ млⷭ҇ти пᲂда́ждь лю́демъ свᲂи́мъ . млⷭ҇тиваго бо ꙗ҆ви́ласѧ є҆сѝ мт҃и .

и҆́нъ , і҆рмо́съ . Ѻ҆дѣѧ́исѧ свѣ́тᲂмъ . Ѻ҆бхᲂдѧ́ще все́й землѝ кᲂнцы̀ , влⷣчнѧѧ бл҃гᲂдѣѧ́нїѧ , вѣ́рнымъ прино́сите , и҆ сᲂхранѧ́ете всесла́внїи а҆рха́нг҃ли . двⷤа . Слᲂвесѝ твᲂемꙋ̀ пᲂвинꙋ́ющесѧ сло́ве бг҃а и҆ ѻ҆ц҃а , нбⷭ҇наго чинᲂнача́лїѧ сла́внаѧ ᲂу҆краше́нїѧ , твᲂеѧ̀ свѣ́тлᲂсти свѣ́тᲂмъ ѡ҆зарѧ́ютсѧ . боⷢ҇ . Всѐ мᲂѐ жела́нїе к̾ тебѣ̀ пред̾ста́ви , па́че сло́ва жела́нїѧ сла́дᲂсть рᲂди́вшаѧ , и҆́же тебѐ бцⷣꙋ чⷭ҇таѧ вѣ́дꙋщимъ .

пѣ́снь , ѕ҃ . і҆рмо́съ . Ѿ =ки́та прⷪ҇ро́ка спа́слъ є҆сѝ , мене́ же и҆з̾ глꙋбины̀ грѣхо́вныѧ вᲂзведѝ гдⷭ҇и , и҆ спаси́ мѧ . Нѣ́сть в̾ житїѝ се́мъ грѣха̀ , є҆го́же а҆́зъ є҆ди́нъ несᲂтвᲂри́хъ ѻ҆каѧ́нныи . є҆ди́не без̾грѣ́шне ᲂу҆ще́дри мѧ̀ . Вѣ́трилᲂмъ ᲂу҆се́рдїѧ впери́мсѧ , и҆ к̾ приста́нищꙋ спасе́нїѧ , пᲂкаѧ́нїемъ пред̾вари́мъ , ꙗ҆́кѡ да спасе́мсѧ . =мⷱ҇ꙋ . Про́пᲂвѣдїю а҆пⷭ҇лъ , и҆ мч҃ническимъ страда́нїемъ ѡ҆зарѧ́етсѧ тва́рь . и҆́миже и҆ на́съ прᲂсвѣтѝ чл҃кᲂлю́бче . мⷱ҇ꙋ . Сᲂсꙋ́ды в̾мѣсти́вшїѧ зарю̀ бжⷭ҇твенꙋю , и҆ честна́ѧ свѣтᲂли́тїѧ мч҃нкъ всѝ пᲂчте́мъ . боⷢ҇ . Дв҃о вѣ́рнымъ спасе́нїе , и҆зба́витисѧ ѿ всѧ́кᲂго грѣха̀ , рабо́мъ твᲂи́мъ мᲂлѝ гдⷭ҇а .

и҆́нъ , і҆рмо́съ . Вᲂлнѧ́щеесѧ бꙋ́рею . Сщ҃енно ᲂу҆краша́еми , а҆́нг҃льстїи сᲂбо́ри и҆з̾бра́ннїи , первᲂда́тными сїѧ́нїи свѣ́титесѧ , бг҃ᲂдѣ́льнымъ и҆зрече́нїемъ ꙗ҆́вѣ сᲂверша́еми . двⷤа . Трисвѣ́тлыми зарѧ́ми , бᲂга́тнѡ преꙋкра́шени а҆́нг҃ли и҆ а҆рха́нг҃ли , бг҃ᲂзра́чнѡ ѻ҆каѧ́ннꙋю ми дꙋ́шꙋ прᲂсвѣти́те , ва́шими мᲂли́твами . боⷢ҇ . Зачала̀ є҆сѝ пречⷭ҇таѧ всѣ́хъ зижди́телѧ и҆ бг҃а , є҆го́же с̾ тре́петᲂмъ вᲂспѣва́ютъ ра́дꙋющесѧ , всебл҃гᲂгᲂвѣ́йно ѡ҆бстᲂѧ́ще а҆́нг҃ли .

пѣ́снь , з҃ . і҆рмо́съ . Бл҃гᲂслᲂве́нъ є҆сѝ бж҃е ви́дѧ и҆ бе́здны , и҆ на прⷭ҇то́лѣ сѣдѧ̀ свᲂеѧ̀ сла́вы , прехва́льныи пресла́вныи . Бл҃гᲂслᲂве́нъ є҆сѝ гдⷭ҇и бж҃е , и҆́же за млрⷭ҇дїе ка́ющихсѧ вᲂспрїе́млѧи , препѣ́тыи и҆ пресла́вныи . И҆сцѣлѝ бл҃гᲂꙋтро́бне хрⷭ҇тѐ , мно́гїѧ ми стра́сти , и҆́же мᲂю̀ свѣ́дыи не́мᲂщь , препѣ́тыи и҆ пресла́вныи . мⷱ҇ꙋ . Си́лᲂю бжⷭ҇твенᲂю , ᲂу҆крѣ́пльсѧ ли́къ стрⷭ҇тᲂте́рпецъ , врагѝ пᲂбѣдѝ , вᲂпїѧ̀ , препѣ́тыи и҆ превᲂзнᲂси́мыи во́ вѣки . мⷱ҇ꙋ . Оу҆крѣпле́и премꙋ́дрыѧ страстᲂно́сцы сло́ве , терпѣ́ти мнᲂгᲂплете́нныѧ мꙋ́ки , ᲂу҆ще́дри на́съ ꙗ҆́кѡ мнᲂгᲂмлⷭ҇тивъ . боⷢ҇ . Блгⷭ҇ве́нъ є҆сѝ бж҃е , и҆́же во́ чрево дв҃че всели́всѧ , и҆ спа́слъ чл҃ка , препѣ́тыи и҆ превᲂзнᲂси́мыи во́ вѣки .

и҆́нъ , і҆рмо́съ . Превᲂзнᲂси́мыи ѻ҆ц҃е́мъ гдⷭ҇ь .= Не и҆счетнᲂси́льнꙋю хрⷭ҇то́съ , ꙗ҆влѧ́ѧ крѣ́пᲂсть , ва́съ а҆рхистрати́зи пᲂста́вилъ є҆́сть , наꙋчѝ вᲂспѣва́ти , бж҃е бл҃гᲂслᲂве́нъ є҆сѝ . =двⷤа . И҆́же мно́жество безчи́сленᲂе беспло́тныхъ чино́въ ᲂу҆краша́ѧи бл҃гᲂстїю , вѣ́рныхъ сᲂставле́нїѧ , спᲂдо́би пѣ́ти тѧ бж҃е во́ вѣки . боⷢ҇ . Страстьмѝ кᲂле́блема , дв҃о ты̀ нн҃ѣ ᲂу҆твердѝ мѧ̀ , и҆стᲂчи́вшаѧ вѣ́рнымъ безстра́стїе , вᲂпїю́щимъ бж҃е бл҃гᲂслᲂве́нъ є҆сѝ .

пѣ́снь , и҃ . і҆рмо́съ . Твᲂрца̀ всеѧ̀ тва́ри , є҆го́же а҆́нг҃ли бᲂѧ́тсѧ , по́йте лю́дїе , и҆ превᲂзнᲂси́те є҆гѡ̀ во́ вѣки . Ме́ртва престꙋпле́нїемъ бы́вша мѧ , гдⷭ҇и ѡ҆живѝ , да тѧ̀ сла́влю во всѧ̀ вѣ́ки . Прᲂсвѣти́въ мѧ пᲂкаѧ́нїемъ , тмы̀ грѣхо́вныѧ и҆зба́ви мѧ гдⷭ҇и , да тѧ̀ сла́влю во всѧ̀ вѣ́ки . мⷱ҇ꙋ . Страстᲂте́рпцы мч҃нцы , пла́мень пре́лести пᲂпра́ша , ро́сꙋ с̾ нб҃се прїе́мше пресла́вно . мⷱ҇ꙋ . Ꙗ҆́кᲂже землѧ̀ тꙋ́чнаѧ ст҃і́и , кла́съ вᲂи́стинꙋ стᲂри́чествꙋющь , пᲂдвигᲂпᲂло́жникꙋ хрⷭ҇тꙋ̀ ᲂу҆плᲂдᲂно́систе . =боⷢ҇ . и҆з̾ =тебѐ бг҃ъ вᲂпло́щьсѧ всепѣ́таѧ дв҃о , и҆ бг҃ᲂразꙋ́мїемъ прᲂсвѣтѝ ѡ҆мраче́нныѧ .

и҆́нъ , і҆рмо́съ . Тебѣ̀ вседѣ́телю . Привлачи́тъ мѧ ны́нѣ а҆́нг҃льскїи сᲂбо́ръ , пѣ́ти пѣ́нїемъ , и҆ серде́чнымъ жела́нїемъ . с̾ ни́ми же пᲂю̀ , дѣ́ла всѧ́каѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . вⷤ . Слꙋгѝ прест҃ѣ́й и҆ трисл҃нчнѣй зарѝ , спасти́сѧ мᲂли́те вѣ́рᲂю тебѐ пᲂю́щимъ , гдⷭ҇а вᲂспѣва́йте дѣ́ла и҆ превᲂзнᲂси́те є҆гѡ̀ во́ вѣки . боⷢ҇ . Две́ри свѣ́та , дв҃о мт҃и ѻ҆трᲂкᲂви́це , свѣ́тᲂмъ сѝ ѡ҆зарѝ и҆́же вѣ́рᲂю тебѐ пᲂю́щихъ , гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки . та́же , пѣ́снь бцⷣѣ . вели́читъ дш҃а мᲂѧ̀ гдⷭ҇а .= и҆ =пᲂкло́ны до землѝ .

пѣ́снь , ѳ҃ . і҆рмо́съ . Тѧ бл҃же́ннꙋю в̾жена́хъ и҆ блгⷭ҇ве́ннꙋю бг҃ᲂмъ , чл҃ческїи ро́дъ хвала́ми велича́емъ . Млⷭ҇тивъ бꙋ́ди ми гдⷭ҇и , без̾числа̀ безꙋ́мнѡ сᲂгрѣши́вшемꙋ , и҆ твᲂегѡ̀ црⷭ҇твїѧ сло́ве спᲂдо́би мѧ . Ꙗ҆́кᲂже ниневи́тѧны спа́слъ є҆сѝ , дре́вле пᲂка́ѧвшїѧсѧ є҆ди́не сп҃се , и҆ на́съ пᲂю́щихъ тѧ̀ спасѝ ми́лᲂстїю свᲂе́ю . мⷱ҇ꙋ . Пло́ть преда́вше всѣ́мъ ꙗ҆́звамъ , неꙋѧ́звенꙋ спаслѝ є҆стѐ дш҃ꙋ стрⷭ҇тᲂте́рпцы , бжⷭ҇твеныѧ сла́вы прича́стницы . мⷱ҇ꙋ . Дневны́ѧ свѣ́тлыѧ ѕвѣ́зды , на землѝ всѣ́мъ ѡ҆зарѧ́ющи дш҃а , страстᲂно́сцы всѣ́хъ влⷣцѣ ꙗ҆ви́стесѧ . боⷢ҇ . Но́сиши ꙗ҆́кѡ престо́лъ ѻ҆́гненъ , и҆́же манᲂве́нїемъ всѧ̀ нᲂсѧ́щаго , и҆ дᲂи́ши дв҃о всѧ́ческаѧ пита́ющаго .

и҆́нъ , і҆рмо́съ . І҆са́їе ликꙋ́й . Чино́мъ нача́льницы бы́вше а҆́нг҃льскимъ , свѣтлѣ́йшїи миха́иле . и҆ ты̀ гаврїи́ле бжⷭ҇твенагѡ вᲂплᲂще́нїѧ , всеи́стинныи прᲂпᲂвѣ́дникъ бы́въ . всѣ́хъ сᲂхранѧ́йте пᲂю́щихъ ва́съ сла́внїи . двⷤа . И҆́же бᲂга́тыми даѧ́ньми , преи҆злива́ѧи свᲂѧ̀ сᲂкро́вища , и҆́же чи́ны приведы́и а҆́нг҃льскїѧ , с̾ ни́ми же прише́дъ ꙗ҆́кѡ сꙋдїѧ̀ и҆ всѣ́хъ цр҃ь , спаси́ мѧ влⷣко прибѣга́ющаго млⷭ҇ти твᲂе́й . боⷢ҇ . Невеще́ственїи ᲂу҆́ми , а҆рха́нг҃ли , вла́сти , прⷭ҇то́ли , херꙋви́ми , си́лы , и҆ серафи́ми , а҆́нг҃ли свѣ́тлїи , нача́ла , и҆ гдⷭ҇ьствїѧ , твᲂемꙋ̀ сн҃ꙋ пренепᲂро́чнаѧ чⷭ҇таѧ , съ тре́петᲂмъ слꙋ́жатъ , бцⷣе всебл҃же́ннаѧ .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стихѣ́ры , пᲂкаѧ́нны . гла́съ , є҃ . Мно́жество прегрѣше́нїи мᲂи́хъ пре́зри гдⷭ҇и , и҆́же ѿ дв҃ы рᲂжде́исѧ , и҆ всѧ̀ ѡ҆чи́сти грѣхѝ мᲂѧ̀ , мы́сль мнѣ̀ пᲂдаѧ̀ ѡ҆браще́нїѧ , ꙗ҆́кѡ є҆ди́нъ чл҃кᲂлю́бецъ , мᲂлю́сѧ пᲂми́лꙋй мѧ .

сти́хъ : и҆спо́лнихᲂмсѧ за ᲂу҆́тра . Оу҆вы̀ мнѣ̀ , что̀ ᲂу҆пᲂдо́бихсѧ а҆́зъ непло́днѣй смᲂко́вницѣ , и҆ бᲂю́сѧ прᲂклѧ́тїѧ с̾ пᲂсѣче́нїемъ . но нбⷭ҇ныи дѣ́лателю хрⷭ҇тѐ бж҃е , ѡ҆лѧдинѣ́вшꙋю дш҃ꙋ мᲂю̀ плᲂдᲂно́снꙋ пᲂкажѝ , и҆ ꙗ҆́кѡ блꙋ́днаго сн҃а прїими́ мѧ и҆ пᲂми́лꙋй .

сти́хъ : и҆ бꙋ́ди свѣ́тлᲂсть . мⷱ҇ꙋ . Бл҃гᲂслᲂве́но во́инство нбⷭ҇нагѡ цр҃ѧ . а҆́ще бо и҆ земнᲂро́дни бѣ́ша стрⷭ҇тᲂте́рпцы , но а҆́нг҃льскᲂе дᲂстᲂѧ́нїе пᲂтща́шасѧ дᲂсти́гнꙋти . ѡ҆ тѣлесѣ́хъ неради́ша , и҆ страсте́й ра́ди беспло́тныхъ спᲂдо́бишасѧ че́сти . тѣ́мже мᲂли́твами и҆́хъ гдⷭ҇и , низ̾пᲂслѝ на́мъ ве́лїю млⷭ҇ть .

сла́ва , и҆ ны́нѣ , бг҃ᲂро́диченъ . Ѻ҆бра́дᲂваннаѧ хᲂда́тайствꙋй твᲂи́ми мл҃твами , и҆ и҆спрᲂсѝ дш҃а́мъ на́шимъ мно́жествѡ щедро́тъ , и҆ ѡ҆чище́нїе мно́гимъ прегрѣше́нїемъ мо́лимсѧ .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ , а҆́ще и҆́мать . а҆́щели нѝ , глаго́лемъ , трᲂпа́рь , дню̀ .= є҆ктенїѧ̀ . =та́же , ча́съ , а҃ . ѱалмы̀ , ѡ҆бы́чны . и҆ про́чее , и҆ кᲂне́чныи ѿпꙋ́стъ .

Въ пᲂнедѣ́льникъ , бл҃же́нны . гла́съ , є҃ .

Разбо́йникъ на крⷭ҇тѣ̀ , бг҃а бы́ти вѣ́рᲂвавъ тѧ хрⷭ҇тѐ , и҆спᲂвѣ́да тѧ чи́стѡ ѿ́ срⷣца , пᲂмѧни́ мѧ гдⷭ҇и вᲂпїю́ща во црⷭ҇твїи си .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Дш҃етлѣ́ннїи мѧ разбо́йницы , на пꙋтѝ жите́йстѣмъ срѣ́тше ᲂу҆ѧ́звиша , но ко твᲂемꙋ̀ бл҃гᲂꙋтро́бїю ны́нѣ притека́ю , и҆сцѣлѝ хрⷭ҇тѐ и҆ спаси́ мѧ мᲂлю́сѧ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Нбⷭ҇нїи ли́цы пѣснᲂсло́вѧтъ тѧ̀ всѣ́хъ бг҃а . тѣ́хъ влⷣко сщ҃е́нными хᲂда́тайствы , мно́гаѧ ми пре́зри ѕла́ѧ , и҆ спаси́ мѧ мᲂлю́сѧ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . А҆́нг҃льскимъ лико́мъ сᲂчета́еми хрⷭ҇то́ви страда́льцы , и҆ и҆спᲂлнѧ́еми прᲂсвѣще́нїемъ приснᲂсꙋ́щнымъ , нᲂщны́ѧ стра́сти срⷣца мᲂегѡ̀ ѿжени́те .

сла́ва . Со сла́вᲂю ѽ трⷪ҇це , а҆́нг҃льскими вᲂспѣва́ема гла́сы , ѡ҆ѕло́бленꙋю ѿ бѣсо́въ дш҃ꙋ мᲂю̀ , и҆спо́лни ра́дᲂсти , к̾ свѣ́тꙋ наставлѧ́ющи мѧ .

и҆ ны́нѣ . Ꙗ҆́же ѿ а҆́нг҃ла ра́дᲂсть в̾ лᲂжесна́хъ вᲂспрїе́мши чⷭ҇таѧ , сѣ́тꙋющꙋю лꙋка́выми дѣ́лы дш҃ꙋ мᲂю̀ , и҆спо́лни ра́дᲂсти , к̾ свѣ́тꙋ наставлѧ́ющи мѧ .