Въ пᲂнедѣ́льникъ , ве́черъ . на гдⷭ҇и вᲂзва́хъ , стихѣ́ры , пᲂкаѧ́нны . гла́съ , є҃ . запѣ́въ : ꙗ҆́кѡ ѿ тебѐ ѡ҆чище́нїе є҆́сть . Оу҆вы̀ мнѣ̀ , прᲂгнѣ́вавшемꙋ тѧ̀ ми́лᲂстиваго бг҃а мᲂегѡ̀ и҆ гдⷭ҇а . кᲂли́жды ѡ҆бѣща́хсѧ пᲂка́ѧтисѧ хрⷭ҇тѐ , и҆ ло́жъ ѡ҆брѣто́хсѧ ѡ҆сꙋжде́нныи ; пе́рвꙋю ᲂу҆́бѡ кр҃ще́нїѧ ѡ҆калѧ́хъ ѻ҆де́ждꙋ , завѣ́тъ же мо́й є҆́же к̾ тебѣ̀ ѡ҆ста́вихъ . и҆ втᲂро́е сїѐ па́ки завѣща́нїе , є҆́же и҆спᲂвѣ́даю ти пред̾ а҆́нг҃лы и҆ чл҃ки , ѻ҆́бразᲂмъ плаче́внымъ ѡ҆дѣ́ѧнъ , є҆го́же ѿлᲂжи́въ про́чее сп҃се , до кᲂнца̀ не ѡ҆ста́ви менѐ пᲂги́бнꙋти .

ᲂу҆пᲂва̀ дш҃а мᲂѧ̀ на́ гдⷭ҇а . Кᲂто́рыи ѿвѣ́тъ дш҃е ѻ҆каѧ́ннаѧ ѡ҆брѧ́щеши в̾ де́нь сꙋ́дныи ; и҆лѝ кто́ тѧ ѡ҆сꙋжде́нїѧ вѣ́чнаго , и҆ про́чихъ мꙋче́нїи и҆зба́витъ ; никто́же а҆́ще не ты̀ сама̀ ᲂу҆ми́лᲂстивиши бл҃гᲂꙋтро́бнаго , ѕла́ѧ свᲂѧ̀ ѡ҆ста́вльши дѣѧ́нїѧ , и҆ бл҃гᲂꙋго́дно стѧжа́вши житїѐ , пла́чꙋщи на всѧ́къ де́нь , свᲂѧ̀ без̾мѣ́рнаѧ сᲂгрѣше́нїѧ , ꙗ҆́же на всѧ́къ ча́съ сᲂгрѣша́еши , дѣ́лᲂмъ и҆ сло́вᲂмъ и҆ пᲂмышле́нїемъ , хрⷭ҇та̀ мᲂлѧ́щи , пᲂда́ти тебѣ̀ сᲂгрѣше́нїемъ прᲂще́нїе .

да ᲂу҆пᲂва́етъ і҆и҃ль на́ гдⷭ҇а . Да не сᲂдержи́тъ менѐ сп҃се грѣхо́внаго ѻ҆бы́чаѧ привлече́нїе ; нижѐ да ѡ҆блада́етъ менѐ бѣ́съ , прⷭ҇нѡ бᲂрѧ̀ и҆ привᲂдѧ̀ к̾ во́ли свᲂе́й . но и҆схи́ти мѧ тᲂгѡ̀ наси́льствїѧ , крѣ́пкᲂю свᲂе́ю рꙋко́ю всеси́льне . и҆ вᲂцр҃и́сѧ во мнѣ̀ ты̀ чл҃кᲂлю́бче , ве́сьже тво́й бы́ти мѧ спᲂдо́би , и҆ жи́ти по во́ли твᲂе́й сло́ве , и҆ и҆мѣ́ти пᲂко́й ѡ҆ тебѣ̀ , и҆ ѡ҆брѣсти́ми ѡ҆чище́нїе и҆ спасе́нїе и҆ ве́лїю млⷭ҇ть .

та́же , в̾ минѣ́и , стⷯры , ст҃о́мꙋ . а҆́ще ли нѣ́сть минѣ́и . и҆́ны , стихѣ́ры , ст҃о́мꙋ и҆ вели́кᲂмꙋ і҆ѡа́ннꙋ прⷣтчи . гла́съ , то́йже . =запѣ́въ : ѿ всѣ́хъ без̾зако́нїи є҆гѡ̀ . В=сегѡ̀ прекло́ньшасѧ к̾ землѝ , и҆ сᲂкрꙋши́вшасѧ не и҆сцѣ́льнѡ , ᲂу҆врачꙋ́й пррⷪ҇че хрⷭ҇то́въ и҆ мч҃нче , прибѣга́ющаго вѣ́рᲂю въ бжⷭ҇твеныи пᲂкро́въ тво́й бл҃же́нне . тѣ́мже и҆ днѐ стра́шнагѡ мѧ̀ и҆схи́ти , внегда̀ хᲂщꙋ̀ пред̾ сꙋди́щемъ ста́ти , и҆ мꙋ́камъ ѿда́тисѧ , мᲂлю́тисѧ та́мᲂшнѧгѡ стᲂѧ́нїѧ и҆зба́ви мѧ тᲂгда̀ , ꙗ҆́кѡ и҆мы́и дерзнᲂве́нїе непᲂсты́дно мꙋ́дре , мᲂлѧ̀ пᲂдаю́щаго ми́рᲂви ве́лїю млⷭ҇ть .

пᲂхвали́те є҆гѡ̀ всѝ лю́дїе . Свѣти́льникъ ты̀ сл҃нцꙋ мꙋ́дре сы́и , прⷣтче хрⷭ҇то́въ пресвѣ́тлѣйшїй , во тмꙋ̀ низпа́дшасѧ безмѣ́рныхъ ѕѡ́лъ , ѡ҆блиста́й ми зарю̀ свѣ́та мᲂлю́ тѧ , и҆ вᲂздви́гни и҆́з̾ рᲂва грѣхо́внагѡ , наставлѧ́ѧи мѧ̀ гла́сᲂмъ твᲂи́мъ сла́дкимъ . и҆́же ѻ҆ц҃ꙋ дре́вле гла́съ разрѣши́выи ржⷭ҇тво́мъ свᲂи́мъ , ны́нѣ мо́й и҆спра́ви гла́съ мᲂлю́ тѧ , ꙗ҆́кѡ да вѣ́рᲂю и҆ любо́вїю славᲂсло́влю чл҃кᲂлю́бца бг҃а и҆ сп҃са , пᲂдаю́щаго ми́рᲂви ве́лїю ми́лᲂсть .

и҆ и҆́стина гдⷭ҇нѧ пребыва́етъ во́ вѣки . Бжⷭ҇твеныи хра́мъ бы́сть бг҃а живᲂда́вца всѣ́хъ бл҃же́нне , пррⷪ҇че и҆ прⷣтче и҆ прᲂпᲂвѣ́дниче , живꙋ́щаго и҆мѣ́лъ є҆сѝ въ срⷣцы . є҆го́же мᲂлѝ при́снѡ , и҆́же во ст҃ы́и тво́й хра́мъ прибѣга́ющихъ , и҆ тебѐ чтꙋ́щихъ і҆ѡа́нне пребᲂга́те , хра́мы дх҃а бы́ти мо́лимсѧ , и҆ къ бг҃ꙋ прибли́житисѧ , ꙗ҆́кѡ да твᲂѐ пᲂчита́емъ в̾ пѣ́снехъ застꙋпле́нїе , и҆ те́плꙋю мл҃твꙋ , ѿ него́же бо́льше всѣ́хъ чл҃къ , свидѣ́тельствᲂвасѧ дᲂстᲂчꙋ́дне .

сла́ва , и҆ ны́нѣ , боⷢ҇ . Ве́сь ѿ младе́ньства ꙗ҆ви́хсѧ , грѣхѝ неѡ҆сла́бнѡ дѣ́лаѧ , ᲂу҆ѧ́звихъ лю́тѣ ᲂу҆́мъ , и҆ ѻ҆бы́чаемъ мно́гимъ в̾ не́мъ пребы́въ любо́вїю , и҆ нн҃ѣ сѣ́тꙋѧ свᲂю̀ пла́ча лю́тꙋю пре́лесть , и҆ ѕлы́й ѻ҆бы́чай и҆ безꙋ́мїе , и҆ дш҃и мᲂеѧ̀ пᲂги́бель , влⷣчце непре́зри менѐ ѕлѣ̀ пᲂгиба́ющаго , но ᲂу҆ще́дривши же и҆ всѧ́кᲂгѡ нахᲂжде́нїѧ страсте́й и҆зба́ви , твᲂи́мъ застꙋпле́нїемъ , ꙗ҆́кѡ да пᲂнѐ ны́нѣ на ста́рᲂсть пᲂка́юсѧ бг҃ᲂви .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стихѣ́ры , пᲂкаѧ́нны . гла́съ , є҃ . Гдⷭ҇и сᲂгрѣша́ѧ непреста́ю , челᲂвѣкᲂлю́бїю спᲂдᲂблѧ́емь неразꙋмѣ́ю , ѡ҆дᲂлѣ́й мᲂемꙋ̀ недᲂꙋмѣ́нїю , є҆ди́ныи бл҃же и҆ пᲂми́лꙋй мѧ̀ .

сти́хъ : к̾ тебѣ̀ вᲂз̾ведо́хъ ѻ҆́чи мᲂѝ . Гдⷭ҇и , стра́ха твᲂегѡ̀ бᲂю́сѧ , и҆ ѕло̀ твᲂрѧ̀ непреста́ю . кто̀ на сꙋди́щи стᲂѧ̀ сꙋдїѝ небᲂи́тсѧ ; и҆лѝ кто̀ и҆сцѣли́тисѧ хᲂтѧ̀ врача̀ прᲂгнѣ́ваетъ , ꙗ҆́кᲂже а҆́зъ . дᲂлгᲂтерпѣли́ве гдⷭ҇и , на не́мᲂщь мᲂю̀ ᲂу҆милᲂсе́рдисѧ и҆ пᲂми́лꙋй мѧ .

сти́хъ : пᲂми́лꙋй на́съ гдⷭ҇и . мⷱ҇ꙋ . Щито́мъ вѣ́ры ѡ҆бо́лкъшесѧ , и҆ ѻ҆́бразᲂмъ кре́стнымъ себѐ ᲂу҆крѣ́пльше , к̾ мꙋ́камъ мꙋ́жески вда́шасѧ , и҆ дїа́вᲂлю гᲂрды́ню и҆ ле́сть ᲂу҆праздни́ша ст҃і́и твᲂѝ гдⷭ҇и , тѣ́хъ мᲂльба́ми ꙗ҆́кѡ всеси́ленъ бг҃ъ , ми́рᲂви смире́нїе низпᲂслѝ , и҆ дш҃а́мъ на́шимъ ве́лїю млⷭ҇ть .

сла́ва , и҆ ны́нѣ , боⷢ҇ . Оу҆тᲂлѝ бᲂлѣ́зни мно́го вᲂздыха́ющїѧ дш҃и мᲂеѧ̀ , ᲂу҆ста́вившаѧ всѧ́кꙋ сле́зꙋ ѿ лица̀ землѝ . ты́ бо челᲂвѣ́кѡмъ бᲂлѣ́зни ѿгᲂнѧ́еши , и҆ грѣ́шныхъ ско́рби разрꙋша́еши . тебе́ бо всѝ стѧжа́хᲂмъ наде́ждꙋ и҆ ᲂу҆тверже́нїе , прест҃а́ѧ мт҃и дв҃о .

таⷤ , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , боⷢ҇ . =во́ =гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Въ пᲂнедѣ́льникъ , на па́вечерницѣ . рече́тъ , і҆єре́й : бл҃гᲂслᲂве́нъ бг҃ъ на́шъ . мы́же : а҆ми́нь . цр҃ю нбⷭ҇ныи .= трⷭ҇то́е , по ѻ҆́ч҃е на́шъ . і҆єре́й гл҃етъ . ꙗ҆́кѡ твᲂѐ є҆́сть црⷭ҇тво . =таⷤ , гдⷭ҇и пᲂми́лꙋй , ві҃ .= сла́ва , и҆ нн҃ѣ . прїиди́те пᲂклᲂни́мсѧ , три́жды . и҆ про́чее , ѡ҆бы́чно . Кано́нъ , прест҃ѣ́й бцⷣѣ . гла́съ , є҃ . пѣ́снь , а҃ . і҆рмо́съ . Кᲂнѧ̀ и҆ вса́дники в̾ мо́ри чермнѣ́мъ , сᲂкрꙋша́ѧи бра́ни мы́шцею высо́кᲂю , хрⷭ҇то́съ и҆стрѧ́слъ є҆́сть , і҆зра́илѧ же спасѐ , пᲂбѣ́днꙋю пѣ́снь пᲂю́ща . =запѣ́въ : прест҃а́ѧ гжⷭ҇е бцⷣе спасѝ на́съ . Дх҃ъ сᲂкрꙋше́нъ пᲂда́ждь ми бл҃га́ѧ , смире́нѡ срⷣце , ᲂу҆мꙋ́же чистᲂтꙋ̀ , и҆ житїю̀ и҆справле́нїе , и҆ прегрѣше́нїемъ ѡ҆ставле́нїе ; и҆ слеза́мъ и҆сто́чники пренепᲂро́чнаѧ . Ви́ждь мѝ бѣдꙋ̀ и҆ ᲂу҆миле́нїе , и҆ дре́внихъ прегрѣше́нїи и҆сцѣлѝ стрꙋ́пы . и҆ вре́мѧ мѝ пᲂкаѧ́нїѧ да́рꙋй , и҆ грѣхо́въ и҆спᲂвѣ́данїе . сла́ва . Себѐ пла́чꙋ пре́жде и҆схо́да мᲂегѡ̀ , пᲂмышлѧ́ѧ ѕо́лъ мᲂи́хъ бе́зднꙋ , всенепᲂро́чнаѧ . тѣ́мже мᲂлю́тисѧ , сн҃а твᲂегѡ̀ ᲂу҆мᲂлѝ , и҆зба́вити мѧ̀ мꙋ́ки . и҆ ны́нѣ . И҆мꙋ́щи пᲂкаѧ́нїѧ вре́мѧ , ѿстꙋпѝ ѿвсѧ́кїѧ ѕло́бы дш҃е мᲂѧ̀ , и҆ зижди́телю свᲂемꙋ̀ со слеза́ми вᲂзᲂпі́й , бж҃е мо́й спаси́ мѧ мᲂльба́ми ро́ждьшїѧ тѧ̀ .

пѣ́снь , г҃ . і҆рмо́съ . Оу҆тверже́и ни наче́мъ же зе́млю пᲂвелѣ́нїемъ сѝ , и҆ распрᲂстранѝ не ѡ҆держи́мꙋю тѧгᲂтꙋ̀ , на недви́жимᲂмъ хрⷭ҇тѐ ка́мени запᲂвѣде́й тѝ , цр҃квь свᲂю̀ ᲂу҆твердѝ , є҆ди́не бл҃же и҆ чл҃кᲂлю́бче . Страсте́й мᲂи́хъ нача́льницы ѡ҆бъѧ́ша мѧ̀ пречⷭ҇таѧ , и҆ є҆́же по ѻ҆́бразꙋ и҆ по пᲂдо́бїю сᲂтво́ршагѡ бг҃а , и҆спо́лнихсѧ стꙋда̀ , но си́хъ вре́да и҆зба́ви мѧ , и҆́же во ᲂу҆миле́нїи пᲂю́щаго тѧ̀ . Лꙋка́вно вра́гъ ᲂу҆лᲂви́ти мѧ̀ тщи́тсѧ , вѣ́чнꙋющаго пла́мени пᲂпале́нїе , пᲂказа́ти мѧ̀ хᲂтѧ̀ пречⷭ҇таѧ , но сегѡ̀ кᲂва́рствїѧ и҆ сᲂвѣ́ты разᲂрѝ , да тѧ̀ сла́влю ра́дꙋѧсѧ . сла́ва . Въ ро́въ преи҆спо́днїи льсти́внѡ мѧ̀ пᲂлᲂжи́ша , мно́гихъ сᲂгрѣше́нїи , вразѝ пра́ведныхъ , ꙗ҆́кѡ безпо́мᲂщенъ же ны́нѣ , и҆ ᲂу҆ѧ́звленъ ве́сь , призыва́ю мл҃твꙋ твᲂю̀ влⷣчце пренепᲂро́чнаѧ спаси́ мѧ . и҆ ны́нѣ . Въ лѣ́нᲂсти жи́знь и҆з̾жи́хъ ѡ҆каѧ́нныи , ны́нѣ къ сме́ртнымъ две́ремъ прибли́жихсѧ , и҆ вра́жїихъ навѣ́тъ ᲂу҆жаса́ѧсѧ вᲂпїю́ ти , и҆скꙋше́нїи си́хъ и҆зба́ви мѧ̀ , да тѧ̀ сла́влю спаса́емъ .

пѣ́снь , д҃ . і҆рмо́съ . Бжⷭ҇твеннᲂе твᲂѐ разꙋмѣ́въ смᲂтре́нїе , дивѧ́сѧ а҆вва́кꙋмъ хрⷭ҇тѐ тре́петнѡ вᲂпїѧ́ше тѝ , на спасе́нїе лю́демъ сѝ , спастѝ бл҃гі́ѧ свᲂѧ̀ прише́лъ є҆сѝ . Оу҆ѧзви́хсѧ стрѣла́ми грѣхо́вными , и҆ всегѡ̀ тѣлесѐ ра́нꙋ ны́нѣ ѡ҆бнᲂшꙋ̀ зᲂвꙋ́ ти , твᲂи́хъ мл҃твъ ско́рᲂстїю ꙗ҆́звы дш҃и мᲂе́й и҆сцѣлѝ . Пᲂми́лꙋй чи́стаѧ рабы̀ свᲂѧ̀ , тебе́ бо хᲂда́таицꙋ к̾ бг҃ꙋ стѧжа́хᲂмъ , и҆ мо́лимсѧ и҆зба́витисѧ всѧ́кїѧ нꙋ́жды , и҆ вѣ́чнꙋющагѡ мꙋче́нїѧ .= сла́ва . Наде́жда и҆ щи́тъ и҆ ᲂу҆тверже́нїе ты̀ мнѣ̀ є҆сѝ бл҃га́ѧ , и҆ лю́тыхъ и҆збавле́нїе , и҆ прᲂсвѣще́нїе дш҃и мᲂе́й , и҆ хвала̀ и҆ стѣна̀ и҆ держа́ва . =и҆ ны́нѣ . Блꙋ́днѡ растᲂчи́хъ бᲂга́тство до́брыхъ дѣ́лъ , є҆́же ми хрⷭ҇то́съ ꙗ҆́кѡ бл҃гъ дарᲂва̀ , да непре́зриши ᲂу҆́бѡ менѐ пречⷭ҇таѧ ѻ҆трᲂкᲂви́це , гла́дᲂмъ пᲂгиба́ющаго .

пѣ́снь , є҃ . і҆рмо́съ . Ѡ҆дѣѧ́исѧ свѣ́тᲂмъ ꙗ҆́кѡ ри́зᲂю , к̾ тебѣ̀ ᲂу҆́треннюю , и҆ тебѣ̀ вᲂпїю̀ , дш҃ꙋ мᲂю̀ прᲂсвѣтѝ ѡ҆мра́чнꙋю хрⷭ҇тѐ , ꙗ҆́кѡ млрⷭ҇дъ . Ви́ждь влⷣчце не́мᲂщь смире́ныѧ ми дш҃и , и҆ пло́ти мᲂеѧ̀ и҆знемᲂже́нїе , и҆ ᲂу҆ма̀ мᲂегѡ̀ плѣне́нїе , и҆ ненаде́жнѡ спаси́ мѧ . Бг҃а є҆го́же рᲂдила̀ є҆сѝ мᲂлѝ всегда̀ , спастѝ всѣ́хъ на́съ , и҆́же бцⷣꙋ тѧ̀ и҆спᲂвѣ́дающихъ , и҆ славᲂсло́вѧщихъ ржⷭ҇тво̀ твᲂѐ пречⷭ҇таѧ . сла́ва . Кто̀ неблажи́тъ тебѐ всенепᲂро́чнꙋю , твᲂрца́ бо всегѡ̀ ми́ра сп҃са хрⷭ҇та̀ и҆ є҆ди́наго влⷣко , несказа́нно рᲂдила̀ є҆сѝ . и҆ ны́нѣ . Стрꙋи́ ми низпᲂслѝ слеза́мъ пречⷭ҇таѧ , и҆́миже скве́рны и҆ вра́ски грѣхо́въ мᲂи́хъ ѿмы́въ , пᲂю̀ мно́жество твᲂеѧ̀ бл҃гᲂсти .

пѣ́снь , ѕ҃ . і҆рмо́съ . Вᲂлнѧ́щеесѧ бꙋ́рею дш҃е тлѣ́ннᲂю , влⷣко хрⷭ҇тѐ , страсте́й мᲂи́хъ мо́ре ᲂу҆крᲂтѝ , и҆ и҆з̾ тлѝ вᲂз̾веди́ мѧ ꙗ҆́кѡ млрⷭ҇дъ . Во глꙋбинꙋ̀ в̾верго́хсѧ прегрѣше́нїи , и҆ без̾зако́нїи , прᲂстрѝ рꙋ́кꙋ твᲂю̀ всенепᲂро́чнаѧ , и҆ ѿ а҆́да вᲂзведи́ мѧ неча́ѧнїѧ . Мно́жество вѣ́си сᲂгрѣше́нїи , и҆ по́мыслъ смꙋща́ющихъ мѧ , тѣ́мже ᲂу҆скᲂрѝ , и҆ и҆зба́ви мѧ си́хъ пречⷭ҇таѧ . сла́ва . Пᲂщади́ мѧ раба̀ твᲂегѡ̀ влⷣко хрⷭ҇тѐ , мᲂльба́ми чи́стѡ ро́ждьшїѧ тѧ̀ , є҆гда̀ хо́щеши сꙋди́ти ми́рꙋ , є҆го́же сᲂзда̀ . и҆ нн҃ѣ . Во глꙋбинꙋ̀ низ̾влече́сѧ прегрѣше́нїи , влⷣчце чⷭ҇таѧ , дш҃а мᲂѧ̀ снѣ́дь бы́вши бѣсо́мъ , тѣ́мже ненаде́жно спаси́ мѧ .

Гдⷭ҇и пᲂми́лꙋй , гⷤ . сла́ва , и҆ ны́нѣ . сѣда́ленъ , гла́съ , є҃ . Дш҃и мᲂеѧ̀ стра́сти мнᲂгᲂбᲂлѣ́зненыѧ , и҆ пло́ти мᲂеѧ̀ недꙋ́ги в̾ско́рѣ и҆сцѣлѝ , ᲂу҆ма̀ мᲂегѡ̀ блꙋже́нїѧ ᲂу҆ста́ви , пренепᲂро́чнаѧ , и҆ в̾ тишинѣ̀ по́мысла мл҃твы принестѝ чи́сты , цр҃ю всѧ́ческимъ спᲂдо́би бцⷣе , и҆ и҆спрᲂси́ти сᲂгрѣше́ней ѡ҆ставле́нїе .

пѣ́снь , з҃ . і҆рмо́съ . Превᲂзнᲂси́мыи ѻ҆ц҃е́мъ гдⷭ҇ь , пла́мень ᲂу҆гаси́въ , дѣ́ти же прᲂхлади́лъ є҆́сть , є҆динᲂгла́снѡ пᲂю́ща , бж҃е бл҃гᲂслᲂве́нъ є҆сѝ . Є҆гда̀ прїимꙋ̀ во ᲂу҆́мъ мо́й , безмѣ́стныхъ мѝ дѣѧ́нїи мно́жество прегрѣше́нїи , всенепᲂро́чнаѧ , бᲂю́сѧ и҆ ᲂу҆жаса́юсѧ , ѿ ни́хже мѧ̀ твᲂи́ми мл҃твами свᲂбᲂдѝ дв҃о . Че́рвь не ᲂу҆сы́пныи , и҆ ѻ҆́гнь неᲂу҆гаси́мыи , и҆ста́етъ мѧ всегда̀ , и҆ снѣда́етъ ми дш҃ꙋ , да непрїимꙋ̀ си́хъ и҆скꙋ́съ прест҃а́ѧ бцⷣе . сла́ва . Тмы̀ крᲂмѣ́шныѧ и҆ стра́шнагѡ мꙋче́нїѧ , ра́ба твᲂегѡ̀ и҆зба́ви мѧ , дв҃о всенепᲂро́чнаѧ , вᲂпїю́ща сн҃ꙋ твᲂемꙋ̀ , бж҃е бл҃гᲂслᲂве́нъ є҆сѝ . и҆ ны́нѣ . Пло́ть ᲂу҆́бѡ ѡ҆скверни́хъ , сра́мными страстьмѝ , ᲂу҆́бᲂже пᲂмрачи́хъ , скве́рными мы́сльми , но ᲂу҆ще́дри чⷭ҇таѧ , и҆ спаси́ мѧ непᲂтре́бнаго раба̀ твᲂегѡ̀ .

пѣ́снь , и҃ . і҆рмо́съ . Тебѣ̀ вседѣ́телю , в̾ пещѝ ѻ҆́трᲂцы , всеми́рныи ли́къ сᲂста́вльше пᲂѧ́хꙋ , дѣ́ла всѧ́каѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . Тебѣ̀ бцⷣе немᲂщно́е смире́нныѧ мѝ дш҃и принᲂшꙋ̀ , и҆ срⷣца мᲂегѡ̀ немᲂже́нїе , и҆ ᲂу҆ма̀ мᲂегѡ̀ пре́лесть вᲂзвѣща́ю , твᲂю̀ по́мᲂщь прᲂсѧ̀ дв҃це . Ми́лᲂстивъ бꙋ́ди твᲂи́мъ рабо́мъ сло́ве , мл҃твами ро́ждьшїѧ тѧ̀ , и҆ спасѝ пᲂю́щїѧ , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . сла́ва . И҆́же вᲂли́телѧ ро́ждьшаѧ млⷭ҇ти , пᲂми́лꙋй всѣ́хъ , и҆́же вѣ́рᲂю пᲂю́щихъ , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки .= и҆ нн҃ѣ . И҆=зба́ви мѧ бл҃га́ѧ крᲂмѣ́шнїѧ тмы̀ , и҆ не ᲂу҆сыпа́ющагѡ че́рвїѧ , дв҃це , ты́ бо ро́ждьши твᲂрца̀ ми́рꙋ , всѧ́ бо є҆ли́ка хо́щетъ и҆ твᲂри́тъ , твᲂи́ми мл҃твами .

пѣ́снь , ѳ҃ . і҆рмо́съ . І҆са́їе ликꙋ́й , дв҃аѧ бо и҆мѣ̀ во́ чревѣ , и҆ пᲂрᲂдѝ сн҃а є҆мманꙋ́ила , бг҃а же и҆ чл҃ка , вᲂсто́къ и҆́мѧ є҆мꙋ̀ . є҆го́же велича́юще , тебѐ дв҃о ᲂу҆бл҃жа́емъ . Бг҃а є҆го́же рᲂдила̀ є҆сѝ , не и҆зрече́ннѡ влⷣчце чⷭ҇таѧ , мᲂлѝ прилѣ́жно , и҆зба́вити на́съ ѿ бѣ́дъ и҆ ско́рбей , и҆ бꙋ́дꙋщаго сꙋда̀ стра́шнаго . и҆ свѣ́тлᲂсти ст҃ы́хъ є҆гѡ̀ спᲂдо́би . Па́че всѣ́хъ сᲂгрѣши́хъ , преслꙋ́шавъ твᲂи́хъ за́пᲂвѣдей хрⷭ҇тѐ , живᲂтво́рныхъ , и҆ ᲂу҆пᲂдо́бихсѧ без̾слᲂве́снымъ скᲂто́мъ . твᲂеѧ̀ мт҃ре сло́ве мл҃твами , непᲂка́ѧнна ѿ житїѧ̀ не и҆сто́ргни менѐ . сла́ва . Ꙗ҆́кѡ млⷭ҇ти бе́зднꙋ ро́ждьшаѧ сло́ва бж҃їѧ , пᲂми́лꙋй бл҃га́ѧ всѣ́хъ дш҃а , и҆́же пᲂд̾ кро́въ тво́й прибѣга́ющихъ . Тѧ́ бо къ бг҃ꙋ всѝ стѧжа́хᲂмъ , пред̾ста́тельницꙋ непᲂсты́днꙋ .= и҆ нн҃ѣ . Ѻ҆чище́нїе и҆ ѡ҆ставле́нїе прегрѣше́нїи и҆спрᲂсѝ на́мъ , и҆ всѣ́хъ нꙋ́жныхъ премѣне́нїе , и҆ житїю̀ и҆справле́нїе ны́нѣ чи́сто и҆ свѣтᲂви́дно , да прᲂславлѧ́емъ бг҃ᲂмт҃и , мно́гꙋю твᲂю̀ бл҃гᲂсть . =та́же , дᲂсто́йнѡ є҆́сть . и҆ про́чее , ѡ҆бы́чно . и҆ ѿпꙋ́стъ .

Во вто́рникъ , на ᲂу҆́трени . по а҃ , стихᲂло́гїи . сѣда́льны , пᲂкаѧ́нны . гла́съ , є҃ . Сꙋдїѝ сѣдѧ́щꙋ , и҆ а҆́нг҃лѡмъ пред̾стᲂѧ́щимъ , трꙋбѣ̀ гласѧ́щи , и҆ пла́мени гᲂрѧ́щꙋ , что̀ сᲂтвᲂри́ши дш҃е мᲂѧ̀ ведо́ма на сꙋ́дъ , тᲂгда́ бо лю́таѧ твᲂѧ̀ пред̾ста́нꙋтъ тѝ , и҆ та́йнаѧ твᲂѧ̀ ѡ҆блича́тсѧ сᲂгрѣше́нїѧ . тѣ́мже пре́жде кᲂнца̀ вᲂзᲂпі́й сꙋдїѝ , бж҃е ѡ҆чи́сти мѧ и҆ спаси́ мѧ . сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . Всѝ пᲂбди́мъ и҆ хрⷭ҇та̀ срѧ́щемъ , со мно́жествᲂмъ ма́сла и҆ свѣща́ми свѣ́тлыми , ꙗ҆́кѡ да черто́га внꙋ́трь спᲂдо́бимсѧ вни́ти . ѡ҆брѣта́ѧибᲂсѧ внѣ̀ двере́й , без̾ ᲂу҆спѣ́ха бг҃ᲂви вᲂзᲂпїе́тъ , пᲂми́лꙋй мѧ . сла́ва , и҆ ны́нѣ , боⷢ҇ . Стра́нно дв҃ыѧ та́инство , ми́рꙋ ꙗ҆ви́сѧ спаси́тельно , и҆з̾неѧ́бо рᲂди́сѧ без̾ сѣ́мене , и҆ во́ плᲂти пᲂказа́сѧ без̾ и҆стлѣ́нїѧ , всѣ́мъ ра́дᲂсте , гдⷭ҇и сла́ва тебѣ̀ .

по в҃ , стихᲂло́гїи , сѣда́льны . гла́съ , є҃ . Є҆гда̀ ѿкры́ютсѧ дѣ́ла твᲂѧ̀ ѽ дш҃е мᲂѧ̀ , тма́мъ а҆́нг҃лѡмъ пред̾стᲂѧ́щимъ сꙋдїѝ , кᲂто́рыи ѿвѣ́тъ стꙋдꙋ̀ ѡ҆брѧ́щеши , а҆́ще не пре́жде кᲂнца̀ вᲂзᲂпїе́ши слезѧ́щи , сᲂгрѣши́хъ бл҃гі́и гдⷭ҇и пᲂми́лꙋй мѧ . сти́х̾ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . На ѻ҆дрѣ̀ слежꙋ̀ сᲂгрѣше́нїи мно́гихъ , ѡ҆кра́даемъ є҆́смь наде́жею спасе́нїѧ мᲂегѡ̀ . и҆́бо со́нъ лѣ́нᲂсти мᲂеѧ̀ , хᲂда́тайствꙋетъ дш҃и мᲂе́й мꙋче́нїе . но ты̀ бж҃е рᲂжде́исѧ ѿ дв҃ы , вᲂз̾дви́гни мѧ̀ к̾ твᲂемꙋ̀ пѣ́нїю , да прᲂславлѧ́ю тѧ .= сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Чꙋдеса̀ ст҃ы́хъ твᲂи́хъ мч҃нкъ , стѣ́нꙋ неразᲂри́мꙋ , на́мъ дарᲂва́лъ є҆сѝ хрⷭ҇тѐ бж҃е . тѣ́хъ мл҃твами сᲂвѣ́ты ꙗ҆зы́кѡмъ разᲂрѝ , и҆ црⷭ҇твїѧ ски́петры ᲂу҆твердѝ , ꙗ҆́кѡ є҆ди́нъ бл҃гъ и҆ чл҃кᲂлю́бецъ . =сла́ва , и҆ нн҃ѣ , боⷢ҇ . Ско́рый сво́й пᲂкро́въ и҆ по́мᲂщь и҆ млⷭ҇ть , пᲂкажѝ на рабѣ̀ свᲂе́мъ чⷭ҇таѧ , и҆ во́лны ᲂу҆крᲂтѝ сꙋ́етныхъ пᲂмышле́нїи , и҆ па́дшꙋю мѝ дш҃ꙋ вᲂста́ви бцⷣе . вѣ́мъ бо и҆ вѣ́мъ дв҃о , ꙗ҆́кѡ мо́жеши є҆ли́ка хо́щеши .

по г҃ , стихᲂло́гїи , сѣда́ленъ . гла́съ , є҃ . Во глꙋбинꙋ̀ грѣха̀ пᲂпо́лзшасѧ , тревᲂлне́нїе мѧ̀ ѡ҆бꙋрева́етъ ѿчаѧ́нїѧ , но пред̾варѝ хрⷭ҇тѐ ꙗ҆́кѡ всеси́ленъ , ᲂу҆пра́вителю всѣ́хъ , и҆ къ приста́нищꙋ ти́хᲂмꙋ , ᲂу҆стремѝ без̾стра́стїѧ , мл҃твами твᲂегѡ̀ прⷣтчи , за милᲂсе́рдїе сп҃се и҆ спаси́ мѧ . сла́ва , и҆ ны́нѣ , боⷢ҇ . Ꙗ҆́же цвѣ́тъ бжⷭ҇твеныи ѿ ко́рене прᲂзѧ́бши , кᲂвче́же , и҆ свѣти́льниче , рꙋ́чко всеѕлата́ѧ , ст҃а́ѧ трапе́зо , живᲂта̀ хлѣ́бъ нᲂсѧ́щи , ꙗ҆́кѡ сн҃а свᲂегѡ̀ и҆ бг҃а мᲂлѝ є҆гѡ̀ , со ст҃ы́мъ прⷣтчею , ᲂу҆ще́дрити и҆ спастѝ , и҆́же бцⷣꙋ тѧ̀ и҆спᲂвѣ́дающихъ .

Во вто́рникъ кано́нъ , є҆мꙋ́же краегране́сїе си́це . ѡ҆чище́нїе на́мъ хрⷭ҇тѐ прегрѣше́нїемъ дава́й , твᲂре́нїе і҆ѡ́сифᲂво . гла́съ , є҃ . пѣ́снь , а҃ . і҆рмо́съ . Зе́млю наню́же невᲂсїѧ̀ , ниви́дѣ сл҃нце никᲂгда́же , бе́зднꙋ ю҆́же неви́дѣ на́гꙋ ширᲂта̀ нбⷭ҇наѧ , і҆и҃ль прᲂйдѐ невла́жно гдⷭ҇и , и҆ в̾ведѐ и҆̀ въ го́рꙋ ст҃ы́ни твᲂеѧ̀ , хва́лѧща и҆ пᲂю́ща пᲂбѣ́днꙋю пѣ́снь . запѣ́въ : сла́ва тебѣ̀ бж҃е на́шъ , сла́ва тебѣ̀ . Ѡ҆чище́нїе ми да́рꙋй , сᲂдѣ́ѧнныхъ мᲂи́хъ хрⷭ҇тѐ , ѡ҆сла́би ми пре́жде да́же ѿ сю́дꙋ ѿше́ствїѧ , ѡ҆чи́сти мно́гаѧ гнᲂе́нїѧ гдⷭ҇и , ѡ҆чи́стивыи прᲂкаже́ныѧ , и҆ спᲂдо́би мѧ непᲂро́чнѣ пред̾ста́ти тебѣ̀ , хᲂтѧ́щемꙋ прїитѝ сꙋди́ти живы́мъ и҆ ме́ртвымъ . Бѣ́лᲂсть ꙗ҆́же належи́тъ дш҃и мᲂе́й ѻ҆чи́ма , вᲂзбранѧ́ющи є҆́же не зрѣ́ти твᲂеѧ̀ зарѝ , ꙗ҆́же ꙗ҆́вльсѧ на землѝ прᲂсте́рлъ є҆сѝ сл҃нце пра́вды , сеѧ̀ ѡ҆чи́сти сп҃се , и҆ да́ждь прᲂзрѣ́ти гдⷭ҇и бл҃гᲂꙋтро́бне , сꙋде́бъ твᲂи́хъ свѣ́тъ .= запѣ́въ : ст҃і́и мч҃нцы , мᲂли́те бг҃а ѡ҆ на́съ . мⷱ҇ꙋ . Неᲂу҆сы́пни бы́вше пᲂвелѣ́нїи хрⷭ҇то́выхъ храни́телїе , ᲂу҆спи́сте врагꙋ̀ ѕло́бꙋ всю̀ , страда́льцы бл҃же́ннїи . тѣ́мже мᲂлю́сѧ , ѡ҆тѧгче́на мѧ сно́мъ грѣхо́внымъ , къ пᲂкаѧ́нїю бжⷭ҇твеныѧ бо́дрᲂсти , и҆ менѐ вᲂздви́гните . =мⷱ҇ꙋ . Пло́тїю сплета́ющесѧ с̾ бᲂри́телемъ враго́мъ мч҃нцы , пᲂбѣди́сте тᲂгѡ̀ ѻ҆рꙋ́жїемъ крⷭ҇тнымъ , и҆ крᲂвны́мъ тече́нїемъ пᲂтᲂпи́сте , и҆ вѣнцы̀ пᲂбѣ́ды ѿ бг҃а прїѧ́сте , пᲂю́ще и҆ вᲂспѣва́юще пᲂбѣ́днꙋю пѣ́снь . боⷢ҇ . И҆зба́ви мѧ ѡ҆бы́чаѧ лꙋка́вагѡ , прелага́ема кᲂва́рствы ве́тхагѡ запина́телѧ , чⷭ҇таѧ дв҃о . ᲂу҆твердѝ на ка́мени запᲂвѣде́й влⷣчце , и҆ спᲂдо́би менѐ хрⷭ҇то́ви ᲂу҆гᲂди́ти до́брѣ , хᲂтѧ́щꙋ прїитѝ сꙋди́ти живы́мъ и҆ ме́ртвымъ .

дрꙋгі́и кано́нъ прⷣтчи , твᲂре́нїе і҆ѡ́сифᲂво . гла́съ , є҃ . і҆рмо́съ . Кᲂнѧ̀ и҆ вса́дники . запѣ́въ : ст҃ы́и вели́кїи і҆ѡа́нне прⷣтче гдⷭ҇нь , мᲂлѝ бг҃а ѡ҆ на́съ . Житїѐ ѡ҆чище́но , жи́знь же невеще́ственꙋ пᲂказа̀ пррⷪ҇че , в̾веще́ственѣмъ тѣлесѝ тѣ́мже мо́лимъ тѧ , пᲂдо́бники себѣ̀ сᲂдѣ́лай , и҆́же вѣ́рᲂю тѧ̀ блажа́щихъ . Бе́зднꙋ пᲂгрꙋзи́выи милᲂсе́рдїѧ хрⷭ҇та̀ , въ рѣ́чныхъ стрꙋѧ́хъ . тᲂгѡ̀ мᲂлѝ прⷣтче и҆з̾сꙋши́ти бе́зднꙋ , ѕѡ́лъ мᲂи́хъ мᲂлю́сѧ , и҆ прᲂсвѣти́ти мѝ смы́слъ . Прⷣтче сп҃сᲂвъ , пᲂкаѧ́нїѧ ми вины̀ хᲂда́тайствꙋѧ , и҆спрᲂсѝ ᲂу҆миле́нїе да́ти ми влⷣцѣ , ѿмыва́ющее мѧ смра́да грѣхо́внагѡ , мᲂлю́тисѧ . боⷢ҇ . Рᲂдила̀ є҆сѝ не и҆з̾глаго́ланнѡ крᲂмѣ̀ бᲂлѣ́зней , всепѣ́таѧ влⷣчце , є҆го́же ѻ҆ц҃ъ пре́жде вѣ́къ нетлѣ́ннѡ рᲂдѝ . є҆го́же мᲂлѝ спасти́сѧ ѿ всѧ́кагѡ вре́да къ тебѣ̀ прибѣга́ющимъ .

пѣ́снь , г҃ . і҆рмо́съ . Кᲂле́блемᲂе срⷣце мᲂѐ гдⷭ҇и , вᲂлна́ми жите́йскими , ᲂу҆твердѝ в̾ приста́нище ти́хᲂе , наставлѧ́ѧ ꙗ҆́кѡ бг҃ъ . Пᲂка́ѧтисѧ тебѣ̀ бг҃ᲂви ѡ҆бѣщава́юсѧ , и҆ па́ки сᲂгрѣша́ю , что̀ бꙋ́дꙋ ; ка́ко тебѣ̀ ꙗ҆влю́сѧ , є҆гда̀ сꙋди́ти и҆́маши землѝ . Мᲂле́нїѧ гдⷭ҇ви принесе́мъ , вᲂздо́хнемъ , сле́зы прᲂлїе́мъ чисти́тельныѧ скве́рнамъ , ꙗ҆́кѡ да и҆зба́вимсѧ та́мѡ . мⷱ҇ꙋ . Оу҆мерщве́нᲂю мы́слїю закᲂнᲂпрестꙋ́пницы , и҆́же жи́знь лю́бѧщїѧ , ᲂу҆ранѧ́хꙋ пᲂбѣдᲂно́сныѧ мч҃нки , и҆спᲂвѣ́дающихъ хрⷭ҇та̀ . мⷱ҇ꙋ . Ли́цы мч҃нчестїи , лико́мъ с̾причта́шасѧ ᲂу҆́мныхъ а҆́нг҃лъ , и҆ равнᲂа́нг҃льнїи бы́ша , бл҃гᲂда́тїю бжⷭ҇твенагѡ дх҃а . боⷢ҇ . Пᲂкаѧ́нїѧ ми две́ри ѿве́рзи , две́рь свѣ́тꙋ дв҃о , в̾хо́ды же страсте́мъ затвᲂрѝ смире́ннѣй ми дш҃и .

и҆́нъ , і҆рмо́съ . Оу҆тверже́и ни наче́мъ же . И҆сцѣле́нїѧ и҆стᲂча́ѧ всегда̀ , пристꙋпа́ющимъ к̾ хра́мꙋ твᲂемꙋ̀ , чꙋ́дне пррⷪ҇че , и҆сцѣлѝ стра́сти мᲂегѡ̀ срⷣца , всеѡ҆каѧ́нно сᲂвᲂзра́стшїѧ ми ѿ невнѧ́тїѧ , мᲂлю́тисѧ пребᲂга́те . Вᲂздыха́ю и҆ рыда́ньми сᲂдержи́мь є҆́смь всегда̀ гдⷭ҇и , внегда̀ пᲂмышлѧ́ю сꙋди́ще твᲂѐ неᲂу҆мы́тнᲂе , є҆ди́не пра́веднѣишїи сꙋдїѐ . на не́мже мᲂльба́ми крⷭ҇ти́телѧ твᲂегѡ̀ , неѡ҆сꙋже́нна мѧ бж҃е мо́й сᲂблюдѝ . Но́вᲂмꙋ и҆ ве́тхᲂмꙋ хᲂда́тай бы́въ , сла́вныи прⷣтче , хᲂда́тайствеными ѡ҆бетша́вшаго мѧ мно́гими грѣхѝ , вᲂпїю́ ти пᲂкаѧ́нїемъ но́ва сᲂтвᲂрѝ , ꙗ҆́кѡ да во хвале́нїи тѧ чтꙋ̀ . боⷢ҇ . Ста́ѧ дв҃о мт҃и , є҆ди́на всенепᲂро́чнаѧ , прегрѣше́нїи пᲂро́ка на́съ и҆змѣнѝ , прᲂсвѣтѝ на́ше пᲂмышле́нїе , ѡ҆ст҃ѝ срⷣца̀ , и҆ вѣ́чнагѡ и҆зба́ви всѣ́хъ ѡ҆сꙋже́нїѧ мо́лимсѧ .

пѣ́снь , д҃ . і҆рмо́съ . Оу҆слы́шахъ гдⷭ҇и слꙋ́хъ тво́й и҆ ᲂу҆бᲂѧ́хсѧ , разꙋмѣ́хъ смᲂтре́нїе твᲂѐ , и҆ прᲂсла́вихъ тѧ чл҃кᲂлю́бче . Глаго́лъ твᲂи́хъ гдⷭ҇и небре́гъ прᲂсвѣща́ющихъ , тмы̀ сᲂтвᲂри́хъ дѣ́ла , и҆ бᲂю́сѧ твᲂегѡ̀ та́мᲂшнѧгѡ вели́кагѡ сꙋди́ща . Вѣ́трилᲂмъ в̾пери́мъ бжⷭ҇твенагѡ стра́ха дш҃е́вныи кᲂра́бль , к̾ приста́нищꙋ же пᲂкаѧ́нїѧ дᲂсти́гнемъ , страстны́хъ ᲂу҆бѣжа́вше вᲂлне́нїи . мⷱ҇ꙋ . Ка́плѧ сла́дᲂсти ꙗ҆ви́стесѧ мч҃нцы , бжⷭ҇твеныѧ гᲂры̀ , и҆ ра́й вᲂи́стинꙋ бг҃ᲂнасажде́нныи , жи́зни дре́во и҆мꙋ́ще гдⷭ҇а . мⷱ҇ꙋ . Стрѣлѧ́нїи ст҃і́и , закла́сте бᲂри́тельныѧ бѣ́сы . терпѣ́нїѧ же и҆ пᲂжда́нїѧ , вѣнцы̀ сла́вы вᲂспрїѧ́сте . боⷢ҇ . Пречⷭ҇таѧ влⷣчца , ꙗ҆́же сᲂгрѣша́ющимъ пред̾ста́тельница , па́дающимъ же и҆звѣ́стнᲂе и҆справле́нїе , ꙗ҆́кѡ бг҃а ро́ждьшаѧ сла́витсѧ .

и҆́нъ , і҆рмо́съ . Бжⷭ҇твеннᲂе твᲂѐ разꙋмѣ́въ . Въ вы́шнее в̾сели́всѧ црⷭ҇тво крⷭ҇тлю , ꙗ҆́кѡ во́инъ и҆́стиненъ цр҃ѧ хрⷭ҇та̀ . тᲂгѡ̀ мᲂлѝ непреста́ннѡ , лю́ди ᲂу҆щедри́ти чтꙋ́щїѧ тѧ . Ѡ҆ст҃ѝ и҆з̾ ᲂу҆тро́бы тѧ̀ гдⷭ҇ь , прᲂви́дѧи бл҃гᲂда́рство твᲂегѡ̀ срⷣца прⷭ҇нѡ сла́вне . тᲂгѡ̀ мᲂлѝ всѣ́хъ на́съ ѡ҆ст҃и́ти мо́лимсѧ . Ме́ртвымъ бл҃гᲂвѣсти́въ прише́ствїе , ᲂу҆ме́ршагѡ на́съ ра́ди , тᲂгѡ̀ мᲂлѝ прⷣтче , ᲂу҆мерщве́наго мѧ грѣхѝ , ѡ҆живи́ти и҆ спасти́ мѧ . боⷢ҇ . Пᲂми́лꙋй мѧ є҆ди́на всенепᲂро́чнаѧ , и҆́же млⷭ҇тиваго бг҃а премнѡ́жествᲂмъ бл҃гᲂсти , несказа́ннѡ ро́ждьши , и҆ и҆зба́ви вѣ́чныѧ мꙋ́ки .

пѣ́снь , є҃ . і҆рмо́съ . Ѡ҆каѧ́ннꙋю дш҃ꙋ мᲂю̀ , бᲂри́мꙋю тмо́ю страсте́й , пред̾вари́въ ᲂу҆ще́дри , и҆ вᲂз̾сїѧ́й мы́сленнᲂе сл҃нце , днѐ свѣтѧ́щїѧ лꙋчѝ вᲂмнѣ̀ , да ѡ҆зари́тъ мѧ в̾но́щи свѣ́тъ . Ѿ дѣ́лъ спасе́нїѧ нѣ́сть ми , мно́го бо на землѝ ѻ҆каѧ́нныи сᲂгрѣши́хъ , и҆ трепе́щꙋ страшна́гѡ сꙋди́ща твᲂегѡ̀ бж҃е , є҆гда̀ ѡ҆сꙋди́ти хо́щеши престꙋ́пникъ твᲂи́хъ запᲂвѣде́й . Ка́кѡ безꙋ́менъ бы́хъ , ка́кѡ ѡ҆слѣпо́хъ твᲂрѧ̀ дѣ́ла ѕла́ѧ , ка́кѡ неразꙋмѣ́хъ стра́ха твᲂегѡ̀ хрⷭ҇тѐ , но в̾ зе́млю нича̀ , ᲂу҆пᲂдо́бихсѧ скᲂто́мъ без̾слᲂве́снымъ , ѡ҆брати́ мѧ бж҃е всѧ́ческимъ . мⷱ҇ꙋ . Ѻ҆́блакъ мч҃нкъ , разгна̀ ѻ҆́блаки мно́гихъ мꙋ́къ , и҆ ѡ҆зари́всѧ дн҃ь и҆́стиннагѡ ра́зꙋма , и҆ мнᲂгᲂбо́жїѧ мглꙋ̀ разᲂрѝ , и҆ к̾ незахᲂди́мᲂмꙋ свѣ́тꙋ дᲂсти́же . мⷱ҇ꙋ . Ѡ҆ст҃ѝ ᲂу҆́мъ мо́й ст҃ы́хъ мч҃нкъ твᲂи́хъ хрⷭ҇тѐ мл҃твами мᲂлю́сѧ , и҆ пᲂкажѝ прᲂсвѣще́нїѧ и҆спо́лнена , и҆ вѣ́чнѣй сла́вѣ прича́стника , да сла́вѧ вᲂспѣва́ю тѧ сп҃се . боⷢ҇ . Бг҃а сло́ва , не и҆зрече́ннѡ дв҃о мт҃и рᲂдила̀ є҆сѝ на землѝ , всѣ́мъ пᲂкаѧ́нїе даю́ща мно́го сᲂгрѣ́шшимъ , хᲂда́тайства ра́ди твᲂегѡ̀ бл҃га́гѡ , прибѣ́жище па́дшимъ и҆ приста́нище .

и҆́нъ , і҆рмо́съ . Ѡ҆дѣѧ́исѧ свѣ́тᲂмъ . Рᲂдѝ непло́днаѧ тѧ̀ ᲂу҆тро́ба прⷣтче , непло́днаѧ ѿ до́брыхъ дѣѧ́нїи срⷣца̀ , бл҃гᲂча́днаѧ ꙗ҆влѧ́юща , бл҃гᲂпло́дными тѝ слᲂвесы̀ . тѣ́мже тѧ̀ ᲂу҆блажа́емъ . Прᲂцвѣтѐ ꙗ҆́кѡ бл҃гᲂꙋха́нныи кри́нъ , прⷭ҇нѡ сла́вне в̾ пꙋсты́нѧхъ . тѣ́мже вᲂпїю́ти прⷣтче , дш҃и мᲂеѧ̀ всѧ́ко ѕлᲂсмра́дїе ѕло́бы ѿженѝ . Зако́на пᲂсредѣ̀ стᲂѧ́ше мꙋ́дре и҆ бл҃гᲂда́ти . тѣ́мже взыва́ю , пᲂбѣжда́ема мѧ грѣхѝ прⷣтче , зако́нᲂмъ ᲂу҆ще́дри , ѡ҆каѧ́нно бѣ́дствꙋющаго . боⷢ҇ . Две́ри непрᲂхᲂди́маѧ сла́вы пречⷭ҇таѧ , ѿве́рзи ми две́ри пᲂкаѧ́нїѧ , хᲂда́тайствꙋющи ми бжⷭ҇твеныѧ вхо́ды , и҆ та́мᲂшнїи пᲂко́й .

пѣ́снь , ѕ҃ . і҆рмо́съ . Ꙗ҆́кᲂже прᲂро́ка ѿ ѕвѣ́рѧ и҆зба́вилъ є҆сѝ гдⷭ҇и , и҆ менѐ и҆з̾ глꙋбины̀ без̾зако́нныхъ стрⷭ҇те́й , вᲂзведѝ мᲂлю́сѧ , да прилᲂжꙋ̀ призрѣ́ти мѝ , к̾ цр҃кви ст҃ѣ́й твᲂе́й . Сѐ вре́мѧ ѡ҆браще́нїѧ , и҆ а҆́зъ низ̾лежꙋ̀ въ зна́къ при́снѡ , нечꙋ́вствїемъ мно́гимъ ѡ҆держи́мъ всегда̀ , недᲂꙋмѣ́нїе срⷣца мᲂегѡ̀ сло́ве разрѣши́въ ᲂу҆ще́дри мѧ . Стенѧ́ща мѧ ꙗ҆́кᲂже и҆нᲂгда̀ мытарѧ̀ ᲂу҆ще́дри , ще́дрыи хрⷭ҇тѐ , и҆ ꙗ҆́кᲂже блꙋдни́цꙋ те́плѣ слези́ти спᲂдо́би сло́ве , да ѿмы́ю скве́рнꙋ мно́гихъ мѝ прегрѣше́нїи . мⷱ҇ꙋ . Великᲂмч҃нцы хрⷭ҇то́вы , велмѝ сᲂгрѣши́вшаго вели́каго пла́мене гее́нскаго , та́мѡ ѡ҆жида́ющаго мѧ̀ и҆зба́вите . да велмѝ ва́шꙋ па́мѧть сла́влю всегда̀ . мⷱ҇ꙋ . Пᲂдви́гшесѧ до́брѣ , твᲂѝ страда́льцы свѣ́тлѡ вѣнча́шасѧ , живᲂнача́льнᲂю десни́цею твᲂе́ю бж҃е и҆ гдⷭ҇и . тѣ́хъ чⷭ҇тны́ми мᲂльба́ми спасѝ всѧ̀ лю́ди свᲂѧ̀ . боⷢ҇ . Бг҃ᲂра́дᲂваннаѧ сѣ́нь ѡ҆сщ҃е́нїѧ , чⷭ҇тны́и кᲂвче́же , свѣти́льниче бжⷭ҇твенагѡ свѣ́та , хлѣ́ба живо́тнагѡ трапе́зо , сло́ва пᲂла́то ѡ҆дш҃евле́наѧ , хра́мъ дх҃ꙋ ꙗ҆ви́ мѧ .

и҆́нъ , і҆рмо́съ . Вᲂлнѧ́щеесѧ бꙋ́рею дш҃етлѣ́ннᲂю . Не и҆з̾гл҃анными свѣ́тлᲂстьми сїѧ́ѧ , прⷣтче хрⷭ҇то́въ . ѡ҆зарѧ́еши всегда̀ бл҃гᲂда́тїю срⷣца , бл҃гᲂче́стнѡ хва́лѧщихъ тѧ̀ . Лѣ́нᲂстнымъ сно́мъ ѡ҆держи́ма мѧ , прⷣтче хрⷭ҇то́въ дѣ́йствїемъ мл҃твъ твᲂи́хъ вᲂздви́гни , ᲂу҆се́рднѡ бжⷭ҇твенаѧ твᲂри́ти хᲂтѣ́нїѧ . Ѿ всѧ́кїѧ ско́рби сᲂпрᲂти́вныѧ и҆зба́ви на́съ , и҆́же пред̾ста́телѧ бжⷭ҇твенаго тѧ̀ стѧжа́вшихъ и҆ мл҃твеника ко влⷣцѣ бл҃же́нне . боⷢ҇ . Зима̀ ѡ҆бꙋрева́етъ мѧ грѣхо́внаѧ , прест҃а́ѧ чⷭ҇таѧ , пᲂтщи́сѧ и҆зба́вити мѧ , в̾вᲂдѧ́щи къ приста́нищꙋ пᲂкаѧ́нїѧ всенепᲂро́чнаѧ .

пѣ́снь , з҃ . і҆рмо́съ . Ѻ҆гнѧ̀ гаше́нїе ѻ҆́трᲂкъ мл҃тва , прᲂхлажда́ющи пе́щь вѣ́стникъ чꙋдесѝ , не ѡ҆палѧ́ющи же нижгꙋ́ща , пѣснᲂсло́вѧщихъ бг҃а , ѻ҆ц҃ъ на́шихъ . Без̾зако́нїѧ мᲂѧ̀ и҆ непра́вды мᲂѧ̀ , без̾мѣ́рнаѧ мѝ прегрѣше́нїѧ хрⷭ҇тѐ прᲂстѝ , и҆ бꙋ́дꙋщїѧ и҆зба́ви мѧ мꙋ́ки , мно́гихъ ра́ди твᲂи́хъ щедро́тъ бж҃е . Ꙗ҆́кᲂже блꙋ́дныи и҆з̾жи́хъ бᲂга́тство є҆́же прїѧ́хъ , и҆ гла́дᲂмъ та́ю , лише́нъ быва́ю бжⷭ҇твеныхъ бра́шенъ , но ка́ющасѧ сп҃се прїимѝ и҆ спаси́ мѧ . мⷱ҇ꙋ . Ме́ртва сᲂдѣ́ласте бᲂрю́щагᲂсѧ врага̀ , ᲂу҆́ды ᲂу҆мерщвѧ́еми мно́гими мꙋ́ками , дᲂстᲂблаже́ннїи гдⷭ҇ни мч҃нцы . тѣ́мже вѣ́рнїи бл҃гᲂче́стнѡ вᲂспѣва́емъ ва́съ . мⷱ҇ꙋ . Бѣсѡ́мъ пᲂлкѝ , мꙋчи́телемъ всѐ мно́гᲂе стрѣлѧ́нїе , мч҃нцы ᲂу҆мертви́сте , терпѣ́нїемъ же и҆ до́блестїю , къ жи́зни и҆́стиннѣй ны́нѣ прелᲂжи́стесѧ .= боⷢ҇ . П=риста́нище спасе́нїѧ ꙗ҆ви́ласѧ є҆сѝ всѣ́мъ чⷭ҇таѧ , страсте́й бꙋ́рю ᲂу҆тишева́ющи , и҆ к̾ тишинѣ̀ всѣ́хъ превᲂдѧ́щи , бг҃ᲂрᲂди́тельнице чⷭ҇таѧ , сꙋ́щїѧ на землѝ смире́ныѧ .

и҆́нъ , і҆рмо́съ . Превᲂзнᲂси́мыи ѻ҆ц҃е́мъ гдⷭ҇ь . Слᲂвесы̀ мо́лимъ тѧ̀ , ꙗ҆́кѡ сло́ва прⷣтчꙋ , и҆́же ѻ҆́ч҃їи гла́съ разрѣши́лъ є҆сѝ в̾ рᲂже́нїи , разрѣшѝ сѣте́й на́шихъ прегрѣше́нїѧ . Непло́днꙋю дш҃ꙋ стѧжа́хъ , и҆ срⷣце без̾пло́дно , непло́дныѧ бжⷭ҇твенᲂе прᲂзѧбе́нїе , крⷭ҇тлю хрⷭ҇то́въ , плᲂды̀ пᲂкаѧ́нїѧ мѧ прᲂзѧба́ти мᲂлѝ тᲂгѡ̀ непреста́ннѡ . Сл҃нце мнᲂгᲂсвѣ́тлᲂе , вᲂсїѧ́й пᲂкаѧ́нїѧ мѝ спаси́тельнꙋю зарю̀ , и҆ тмы̀ страсте́й напа́ствꙋющихъ , и҆зба́ви ѡ҆каѧ́ннᲂе мᲂѐ срⷣце . Ра́вна рᲂди́телю сн҃а сла́вимъ , и҆ дх҃а ст҃а́гѡ , трⷪ҇цꙋ нераздѣ́льнꙋ бжⷭ҇твенѣ пᲂю́ще , бж҃е бл҃гᲂслᲂве́нъ є҆сѝ . боⷢ҇ . Мла́до пᲂрᲂдила̀ є҆сѝ ѻ҆трᲂча̀ всенепᲂро́чнаѧ хрⷭ҇та̀ , ѡ҆бнᲂвле́нїе на́ше сᲂдѣ́лᲂвающаго бг҃ᲂневѣ́стнаѧ , ѡ҆бетша́вшимъ дре́внимъ престꙋпле́нїемъ .

пѣ́снь , и҃ . і҆рмо́съ . А҆́нг҃лъ со́нмъ и҆ чл҃ческїи сᲂбо́ръ , цр҃ѧ и҆ зижди́телѧ всѣ́мъ , сщ҃е́ннїи хвали́те , блгⷭ҇ви́те леви́ти , лю́дїе превᲂзнᲂси́те є҆гѡ̀ во́ вѣки . Сѐ вᲂзсмердѣ́ша и҆ сᲂгни́шасѧ дш҃и мᲂеѧ̀ ꙗ҆́звы хрⷭ҇тѐ , и҆ пᲂстрада́въ смири́хсѧ до кᲂнца̀ , бы́лїемъ пᲂкаѧ́нїѧ сп҃се , и҆сцѣли́ мѧ . Льсти́вно мѧ̀ ѕмі́й лꙋка́внѣйшїи ᲂу҆кра́дъ , и҆ и҆спо́лни ѕлы́хъ , и҆ вᲂздыха́ѧ зᲂвꙋ̀ , не ѿри́ни менѐ сло́ве ѡ҆сꙋже́ннаго и҆ смире́ннаго . мⷱ҇ꙋ . Непᲂбѣжде́ни бы́сте лꙋ́чшимъ стᲂѧ́нїемъ мꙋ́дрїи , крⷭ҇то́мъ же всехва́льнїи , и҆́же запѧтѝ ва́съ непщꙋ́ющихъ врагѝ низ̾лᲂжи́сте , и҆ до кᲂнца̀ пᲂбѣди́вше . мⷱ҇ꙋ . Ва́съ прехва́льнїи гдⷭ҇ни мч҃нцы , ни ѻ҆́гнь , ни ме́чь , ни звѣ́рїе , ни гла́дъ , ни кᲂле́съ раздрᲂбле́нїе , нижѐ мꙋ́ка и҆́на вᲂзмо́же разлꙋчи́ти , ѿ́ бг҃а чл҃кᲂлю́бца . боⷢ҇ . А҆́нг҃лѡмъ пᲂхвала̀ , и҆ чл҃кѡмъ спасе́нїе , и҆ спᲂрꙋ́чница бꙋ́ди ми мт҃и дв҃о , ꙗ҆́кѡ да вᲂзвращꙋ́сѧ , и҆ прїимꙋ̀ разрѣше́нїе пре́жде сᲂгрѣше́ннымъ , въ ра́зꙋмѣ и҆ невѣ́дѣнїи .

и҆́нъ , і҆рмо́съ . Тебѣ̀ вседѣ́телю . Лю́ди тече́нїи і҆ѡрда́нскими и҆змыва́еши , прᲂпᲂвѣ́дꙋѧ пᲂкаѧ́нїе сла́вныи прⷣтче . тѣ́мже вᲂпїю́ ти , ѕѡ́лъ мᲂи́хъ тече́нїѧ и҆з̾сꙋшѝ , и҆сто́чникъ мѝ сле́зъ пᲂсыла́ѧ . Трепе́щꙋщи всѧ̀ , пᲂмышлѧ́ющи дш҃е сꙋди́ще вседержи́телево , бꙋ́ди зᲂвꙋ́щи , ще́дре крⷭ҇тлѧ твᲂегѡ̀ ра́ди , ᲂу҆ще́дривъ спаси́ мѧ и҆ мꙋче́нїѧ и҆зба́ви . Оу҆стны̀ скве́рныѧ , и҆ ѡ҆калѧ́нныи ꙗ҆зы́къ пᲂдвиза́ю на мᲂльбꙋ̀ ст҃ы́и прⷣтче , пᲂтщи́сѧ в̾ско́рѣ и҆ пᲂмᲂзи́ ми , всѧ́кими прило́ги льсти́вагѡ непреста́ннѡ кᲂле́блема . трⷪ҇ченъ . Ѻ҆дᲂждѝ на́мъ ѻ҆́ч҃е , и҆ сн҃е , и҆ д́ш҃е , трⷪ҇це є҆динᲂсꙋ́щнаѧ , сᲂгрѣше́нїемъ ѡ҆ставле́нїе , ꙗ҆́кѡ да пᲂлꙋчи́вше всесᲂверше́нᲂе спасе́нїе , тѧ̀ превᲂзно́симъ во́ вѣки . боⷢ҇ . Вᲂзнесла̀ є҆сѝ на́съ высо́кимъ сѝ ржⷭ҇тво́мъ , ѿ́ рᲂва паде́нїѧ бг҃ᲂра́дᲂваннаѧ . тѣ́мже гла́сы тѧ̀ ра́дᲂстными , вѣ́рᲂю ѻ҆трᲂкᲂви́це вᲂспѣва́емъ во всѧ̀ вѣ́ки . та́же , пѣ́снь бцⷣѣ . вели́читъ дш҃а мᲂѧ̀ гдⷭ҇а .= и҆ =пᲂкло́ны до землѝ .

пѣ́снь , ѳ҃ . і҆рмо́съ . Ꙗ҆́кѡ сᲂтвᲂрѝ тебѣ̀ вели́чїе си́льныи , дв҃ꙋ ꙗ҆́вль тѧ̀ чи́стꙋ по рᲂжествѣ̀ , ꙗ҆́кѡ ро́ждьшꙋю без̾ сѣ́мени свᲂегѡ̀ твᲂрца̀ , тѣ́мъ тѧ̀ бцⷣе велича́емъ . Да твᲂѐ велича́ю дᲂлгᲂтерпѣ́нїе і҆с҃е . дᲂлгᲂтерпѝ и҆ є҆щѐ на мнѣ̀ , и҆ непᲂсѣцы̀ менѐ , ꙗ҆́кᲂже непло́днꙋю смᲂко́вницꙋ , и҆ вᲂпїю̀ сло́ве тѝ , да́ждь въ пᲂкаѧ́нїи плᲂды̀ принестѝ тебѣ̀ . Ꙗ҆́кѡ стра́шенъ є҆сѝ , є҆ди́не держа́вне и҆ си́льне , и҆ кто̀ пᲂстᲂи́тъ твᲂемꙋ̀ хрⷭ҇тѐ страшно́мꙋ преще́нїю , є҆гда̀ хо́щеши са́мъ на сꙋдѣ̀ сѣ́сти , на не́мже мѧ̀ сᲂблюдѝ неѡ҆сꙋжде́на . мⷱ҇ꙋ . Тѣле́сныѧ ра́ны , ᲂу҆ѧзве́нїемъ бжⷭ҇твенымъ ва́шимъ , и҆зво́листе гдⷭ҇ни страда́льцы , тѣ́мже и҆сцѣли́те дш҃и мᲂеѧ̀ стра́сти ѕлы́ѧ , бᲂлѧ́щимъ враче́ве и҆скꙋ́снѣйшїи . мⷱ҇ꙋ . Со́лнечныхъ лꙋ́чь , мно́жае сїѧ́ютъ ѿ ра́къ мᲂще́й ва́шихъ зарѧ̀ , бжⷭ҇твенᲂю бл҃гᲂда́тїю , и҆ прᲂсвѣща́ютъ срⷣца̀ , и҆ ѡ҆зарѧ́ютъ дш҃а , и҆́же вѣ́рᲂю страстᲂте́рпцы вᲂсхвалѧ́ющихъ ва́съ . боⷢ҇ . Свѣтᲂви́дныи ѻ҆́блакъ вᲂи́стинꙋ бг҃ᲂра́дᲂваннаѧ ꙗ҆ви́ласѧ є҆сѝ , пред̾вᲂдѧ́щїи но́выѧ лю́ди , к̾ землѝ ѡ҆бѣтᲂва́нїѧ , и҆ две́рь в̾вᲂдѧ́щаѧ к̾ жи́зни . тѣ́мже тѧ̀ бцⷣе велича́емъ .

и҆́нъ , і҆рмо́съ . І҆са́їе ликꙋ́й . Сѐ бл҃гᲂлѣ́пїе твᲂегѡ̀ хра́ма , ꙗ҆́кᲂже нб҃о пᲂзнава́етсѧ на землѝ прⷣтче хрⷭ҇то́въ . во́ньже прише́дъ зарѧ́ми бжⷭ҇твеными прᲂсвѣща́еши , и҆́же по всѧ̀ днѝ тѧ̀ ны́нѣ в̾ не́мъ бл҃жа́щихъ . Ꙗ҆́кѡ сꙋ́щїи и҆́скреннїи влⷣцѣ дрꙋ́гъ прⷣтче , люби́ти мѝ тᲂгѡ̀ пра́вымъ нра́вᲂмъ неᲂу҆кло́ннѡ , всебл҃же́нне ѿ срⷣца сᲂтвᲂрѝ , и҆ стра́сти тлетво́рныѧ вᲂзненави́дѣти мѝ , пᲂрѣва́ющїѧ к̾ пᲂги́бели . Ты̀ не бы́сть тро́сть сᲂпрᲂти́вными дꙋ́хи премꙋ́дре преклᲂнѧ́ема , но бжⷭ҇твенᲂе ᲂу҆тверже́нїе , и҆ непᲂкᲂлеби́мᲂе ѡ҆снᲂва́нїе на́шей цр҃кви . ю҆́же сᲂблюда́й твᲂи́ми мл҃твами недви́жимꙋ , ᲂу҆тᲂлѧ́ѧ всѧ́кꙋ сᲂбла́знꙋ . Зижди́телѧ прише́ствїе придве́рехъ , что̀ ᲂу҆́бѡ непла́чеши себѐ страстна́ѧ дш҃е , живꙋ́щи неради́во . вᲂзни́кни и҆ вᲂзᲂпі́и гдⷭ҇ви , пᲂщади́ мѧ сп҃се , мᲂльба́ми прⷣтчи , ꙗ҆́кѡ чл҃кᲂлю́бецъ . боⷢ҇ . Свѣтᲂно́снаѧ кᲂлесни́це , сл҃нца ꙗ҆ви́ласѧ є҆сѝ вᲂи́стинꙋ , вᲂсїѧ́вшаго ѿ твᲂе́ю пречⷭ҇тᲂю бо́кꙋ , и҆ разрꙋши́вшаго пре́лести тмꙋ̀ лю́тꙋю . тѣ́мже по́ дᲂлгꙋ тѧ̀ вѣ́рᲂю ᲂу҆блажа́емъ .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стихѣ́ры , пᲂкаѧ́нны . гла́съ , є҃ . Мно́жествѡ прегрѣше́нїи мᲂи́хъ пре́зри гдⷭ҇и , и҆́же ѿ дв҃ы рᲂжде́исѧ , и҆ всѧ̀ ѡ҆чи́сти грѣхѝ мᲂѧ̀ , мы́сль пᲂда́ждь ми ѡ҆браще́нїѧ , ꙗ҆́кѡ є҆ди́нъ чл҃кᲂлю́бецъ , мᲂлю́сѧ и҆ пᲂми́лꙋй мѧ̀ .

сти́хъ : и҆спо́лнихᲂмсѧ за ᲂу҆́тра . Оу҆вы̀ мнѣ̀ что̀ ᲂу҆пᲂдо́бихсѧ а҆́зъ непло́днѣй смᲂко́вницѣ , и҆ бᲂю́сѧ прᲂклѧ́тїѧ с̾ пᲂсѣче́нїемъ ; но нбⷭ҇ныи дѣ́лателю хрⷭ҇тѐ бж҃е , ѡ҆лѧдинѣ́вшꙋю мѝ дꙋ́шꙋ плᲂдᲂно́снꙋ пᲂкажѝ , и҆ ꙗ҆́кᲂже блꙋ́днаго сн҃а прїими́ мѧ и҆ пᲂми́лꙋй мѧ̀ .

сти́хъ : и҆ бꙋ́ди свѣ́тлᲂсть . мⷱ҇ꙋ . Страстᲂте́рпцы твᲂѝ гдⷭ҇и , чино́мъ а҆́нг҃льскимъ пᲂдо́бѧщесѧ , ꙗ҆́кѡ беспло́тнїи мꙋ́ки претерпѣ́ша , и҆ є҆динᲂмы́слено ᲂу҆пᲂва́нїе и҆мꙋ́ще , ѡ҆бѣща́нныхъ бл҃гъ наслаже́нїе . тѣ́хъ мᲂли́твами хрⷭ҇тѐ бж҃е на́шъ , смире́нїе да́рꙋй ми́рꙋ свᲂемꙋ̀ , и҆ дш҃а́мъ на́шимъ ве́лїю млⷭ҇ть .

сла́ва , и҆ ны́нѣ , бг҃ᲂро́диченъ . Ѻ҆бра́дᲂваннаѧ хᲂда́тайствꙋй твᲂи́ми мл҃твами , и҆ и҆спрᲂсѝ дш҃а́мъ на́шимъ мно́жество щедро́тъ , и҆ ѡ҆чище́нїе мно́гихъ прегрѣше́нїи мо́лимсѧ .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= є҆ктенїѧ̀ . =та́же , ча́съ , а҃ . ѱалмы̀ , ѡ҆бы́чны . и҆ про́чее , и҆ кᲂне́чныи ѿпꙋ́стъ .

Во вто́рникъ , бл҃же́нны . гла́съ , є҃ .

Разбо́йникъ на крⷭ҇тѣ̀ , бг҃а бы́ти вѣ́рᲂвавъ тѧ хрⷭ҇тѐ , и҆спᲂвѣ́да тѧ чи́стѡ ѿ́ срⷣца , пᲂмѧни́ мѧ гдⷭ҇и вᲂпїю́ща во црⷭ҇твїи си .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Ꙗ҆́кᲂже ѡ҆правда́лъ є҆сѝ хрⷭ҇тѐ блꙋдни́цꙋ пла́кавшꙋюсѧ ѿ всеѧ̀ дш҃и , та́кᲂжде и҆ менѐ влⷣко ѿ всѧ́кᲂгѡ грѣха̀ ѡ҆чи́сти , манᲂве́нїемъ чл҃кᲂлю́бїѧ твᲂегѡ̀ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Предѝ те́кшаго хрⷭ҇тꙋ̀ , и҆ ᲂу҆гᲂто́вавшаго пꙋтѝ бл҃гі́ѧ , да ᲂу҆бл҃жи́мъ і҆ѡа́нна сᲂгла́снѡ , и҆ є҆го́вѣми бжⷭ҇твеными мл҃твами ѿ прегрѣше́нїи и҆зба́вимсѧ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . И҆́же ча́шꙋ хрⷭ҇то́вꙋ и҆спи́вше мч҃нцы ᲂу҆се́рднᲂю дш҃е́ю , ѿ мꙋ́тныхъ на́съ грѣхо́вныхъ вѡ́дъ , тꙋ́чами бжⷭ҇твеныхъ мл҃твъ и҆зба́вите ст҃і́и .

сла́ва . Непᲂсти́жимыи бж҃е , всеси́льнаѧ трⷪ҇це є҆ди́нице , мл҃твами прⷣтчи твᲂегѡ̀ спаси́ мѧ , и҆збавлѧ́ющи тмы̀ , и҆ пла́мене пред̾лежа́щагѡ мѝ .

и҆ ны́нѣ . Всегда̀ лꙋка́выми дв҃о дѣѧ́ньми ѡ҆сквернѧ́юсѧ , тѧ̀ нескве́рнꙋю влⷣчнюю мт҃рь мᲂлю̀ , ѿ скве́рны мѧ всѧ́кїѧ ѡ҆чи́сти влⷣчце .