Во вто́рникъ , ве́черъ . на гдⷭ҇и вᲂзва́хъ , стихѣ́ры крⷭ҇тны . гла́съ , є҃ . запѣ́въ : ꙗ҆́кѡ ѿ тебѐ ѡ҆чище́нїе є҆́сть . Вᲂздви́жесѧ ꙗ҆́кᲂже а҆́гнецъ на крⷭ҇тѣ̀ , и҆ вᲂзнᲂше́нїѧ льсти́вагѡ низве́рглъ є҆сѝ , закла́вжесѧ кро́вїю свᲂе́ю , всю̀ ѡ҆ст҃и́лъ є҆сѝ зе́млю , и҆ прᲂбᲂде́сѧ кᲂпїе́мъ , пла́меннᲂмꙋ мнѣ̀ хрⷭ҇тѐ ѻ҆рꙋ́жїю плещѝ да́ти а҆́бїе пᲂвелѣ̀ , и҆ раю̀ в̾мѣсти́ти в̾хо́дъ , и҆ дре́ва мѧ наслажа́тисѧ живо́тнагѡ небᲂѧ́зненѡ . тѣ́мже спасе́нъ бы́въ стрⷭ҇тїю твᲂе́ю , зᲂвꙋ̀ ра́дꙋѧсѧ , сла́ва бжⷭ҇твенᲂмꙋ крⷭ҇тꙋ̀ твᲂемꙋ̀ , и҆́мже клѧ́твы и҆зба́вихᲂмсѧ дре́внїѧ , и҆ бл҃гᲂслᲂве́нїе ѿ́ древа ѡ҆бъє́млемъ , и҆ ве́лїю ми́лᲂсть .

ᲂу҆пᲂва̀ дш҃а мᲂѧ̀ на́ гдⷭ҇а . Оу҆ста́вити бᲂлѣ́зни хᲂтѧ̀ чл҃кᲂмъ , и҆ пᲂнᲂше́нїѧ пребл҃гі́и гдⷭ҇и сп҃се мо́й , распѧ́тїе претерпѣ́въ пᲂно́снᲂе , и҆ же́лчь в̾кꙋси́въ незло́биве , на́шꙋ го́ресть ѿє́млѧ ѕло́бнꙋю . ᲂу҆ѧзви́всѧ сло́ве ре́бръ прᲂбᲂде́нїемъ , ꙗ҆́звы на́ша ꙗ҆́кѡ влⷣка и҆сцѣлѧ́ѧ . тѣ́мже вᲂспѣва́емъ твᲂѐ сла́внᲂе хᲂтѣ́нїе , и҆ пᲂкланѧ́ющесѧ чте́мъ , кᲂпїѐ , и҆ гꙋ́бꙋ , и҆ тро́сть , и҆́миже дарᲂва̀ ми́рꙋ свᲂемꙋ̀ ми́ръ и҆ ве́лїю ми́лᲂсть .

да ᲂу҆пᲂва́етъ і҆и҃ль на́ гдⷭ҇а . Ка́кѡ тѧ̀ і҆с҃е , є҆вре́йскᲂе мно́жество без̾зако́ннᲂе на крⷭ҇тѣ̀ распѧ́ти ѡ҆сꙋдѝ , не ᲂу҆ще́дривъ тебѐ ще́драгѡ , дв҃аѧ пла́чꙋщи вѣща́ше , и҆нᲂгда̀ ꙗ҆́кѡ ᲂу҆зрѣ̀ на крⷭ҇тѣ̀ вᲂз̾дви́жена , є҆го́же ѿ ᲂу҆тро́бы нестра́стнѡ пᲂрᲂдѝ , что́ ти сᲂдѣ́ѧ без̾зако́ннᲂе сᲂбо́рище , ча́до мᲂѐ вᲂжделѣ́ннᲂе . сн҃е мо́й превᲂзлю́бленнѣйшїи , пᲂтщи́сѧ и҆ спасѝ , и҆́же вѣ́рᲂю твᲂѐ сла́вѧщихъ распѧ́тїе , и҆ менѐ ꙗ҆́кᲂже ѡ҆бѣща̀ велича́ющихъ , ꙗ҆́кѡ є҆ди́нъ всепребл҃гі́и .

та́же , в̾ минѣ́и , стⷯры , ст҃о́мꙋ . а҆́ще ли нѣ́сть минѣ́и . и҆́ны , стихѣ́ры , прест҃ѣ́й бцⷣѣ . гла́съ , то́йже . =запѣ́въ : ѿ всѣ́хъ без̾зако́нїи є҆гѡ̀ . Х=ᲂтѧ̀ рꙋкᲂпрᲂсте́ртїе а҆да́ма первᲂзда́ннагѡ , ѿꙗ҆́ти до кᲂнца̀ всебᲂлѣ́зненᲂе чл҃кᲂлю́бче . ꙗ҆́кѡ сᲂзда́тель а҆да́мᲂвъ , гвᲂздьмѝ пригвᲂзди́сѧ без̾грѣ́шне хрⷭ҇тѐ , и҆ кᲂпїе́мъ бжⷭ҇твенаѧ свᲂѧ̀ ре́бра ᲂу҆ѧ́звивъ на́съ ра́ди , вᲂз̾бранѧ́еши сло́ве ѻ҆рꙋ́жїю пла́меннᲂмꙋ , небрани́ти на́мъ вхо́да твᲂи́мъ рабо́мъ . тѣ́мже славᲂсло́вѧще тѧ̀ пᲂе́мъ , держа́вꙋ твᲂю̀ , и҆ крⷭ҇тъ тво́й чте́мъ , и҆ вᲂспѣва́емъ чл҃кᲂлю́бче , и҆́мже всѧ́ко є҆стество̀ ѡ҆брѣ́те небᲂлѣ́зненᲂе дᲂстᲂѧ́нїе , и҆ ве́лїю ми́лᲂсть .

пᲂхвали́те є҆гѡ̀ всѝ лю́дїе . А҆́гньца свᲂегѡ̀ , а҆́гница и҆нᲂгда̀ зрѧ́щи к̾ закᲂле́нїю тща́щасѧ , ᲂу҆се́рдно пᲂслѣ́дᲂваше , сїѧ̀ вᲂпїю́щи є҆мꙋ̀ , ка́мѡ грѧде́ши ча́до мᲂѐ сладча́йшее хрⷭ҇тѐ . чесѡ̀ ра́ди тече́нїе сїѐ дᲂлгᲂтерпѣли́ве тече́ши без̾лѣ́нᲂсти . і҆с҃е превᲂзлю́блене без̾грѣ́шныи мнᲂгᲂмлⷭ҇тиве гдⷭ҇и , да́ждь ми сло́во рабѣ̀ твᲂе́й сн҃е мо́й вселюбе́зныи , непре́зри мѧ ще́дре мᲂлча̀ стра́ннѡ ро́ждьшꙋю тѧ̀ , бж҃е всеще́дрыи , да́рꙋѧи ми́рᲂви ве́лїю млⷭ҇ть .

и҆ и҆́стина гдⷭ҇нѧ пребыва́етъ во́ вѣки . Прⷭ҇то́лъ херꙋви́мскїи вᲂи́стинꙋ , ꙗ҆́кѡ превы́шши тва́рей бы́вши , в̾ тѧ́ бо бжⷭ҇твенᲂе сло́во всели́сѧ чи́стаѧ , на́шъ ѻ҆́бразъ ѡ҆бнᲂви́ти хᲂтѧ̀ . и҆ и҆з̾ тебѐ прᲂше́дъ плᲂтᲂно́сецъ , ꙗ҆́кѡ бл҃гᲂꙋтро́бенъ , крⷭ҇тъ , и҆ стра́сть , на́съ ра́ди прїѧ́тъ , и҆ вᲂскрⷭ҇нїе ꙗ҆́кѡ бг҃ъ дарᲂва̀ . тѣ́мже ꙗ҆́кѡ и҆зба́вльшꙋю на́съ , ѡ҆сꙋжде́ннᲂе є҆стество̀ дв҃о , гдⷭ҇ви бл҃гᲂдарѧ́ще мо́лимсѧ , ᲂу҆лꙋчи́ти спасе́нїе мᲂли́твами ти бжⷭ҇твеными , на́мъ рабо́мъ твᲂи́мъ .

сла́ва , и҆ ны́нѣ , крⷭ҇тᲂбоⷢ҇ . И҆збавле́нїе и҆ цѣ́нꙋ вели́кꙋю , пречⷭ҇тꙋю кро́вь свᲂю̀ и҆зво́лилъ є҆сѝ да́ти на́съ ра́ди , без̾грѣ́шне хрⷭ҇тѐ мо́й , всѣ́мъ хᲂтѧ́и спасе́нїе пᲂлꙋчи́ти . тѣ́мже тѧ̀ зрѧ́щи пригвᲂжде́нна мт҃и твᲂѧ̀ , рыда́ющи власы̀ терза́ше си , глаго́лющи . ча́до а҆́гньче всенепᲂро́чныи , ми́ра хᲂтѧ̀ и҆зба́вити чⷭ҇тно́ю си кро́вїю , ѿ ѻ҆́чїю мᲂе́ю , ка́кѡ за́йде сп҃се , незахᲂди́мᲂе сл҃нце , и҆́же всѣ́мъ пᲂдаѧ́и прᲂсвѣще́нїе и҆ ми́ръ , и҆ ве́лїю млⷭ҇ть .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стихѣ́ры , крⷭ҇тны . гла́съ , є҃ . Гдⷭ҇и при мѡѷсе́и и҆нᲂгда̀ пррⷪ҇цѣ , то́чїю вᲂѡ҆браже́нїе крⷭ҇та̀ твᲂегѡ̀ ꙗ҆влѧ́ѧсѧ , пᲂбѣжда́ше врагѝ твᲂѧ̀ . нн҃ѣ же са́мыи кре́стъ тво́й держа́ще , по́мᲂщи про́симъ , ᲂу҆крѣпѝ цр҃кᲂвь свᲂю̀ , мно́гїѧ ра́ди млⷭ҇ти чл҃кᲂлю́бче .

сти́хъ : к̾ тебѣ̀ вᲂз̾ведо́хъ ѻ҆́чи . Крⷭ҇тъ тво́й хрⷭ҇тѐ , а҆́ще и҆ дре́во ви́димѡ є҆́сть сꙋщество́мъ , но бжⷭ҇твенᲂю ѡ҆дѣ́ѧно є҆́сть си́лᲂю , и҆ чꙋ́в̾ственѣ ми́рᲂви ꙗ҆влѧ́ѧсѧ , ᲂу҆́мнѡ на́ше чꙋ́до твᲂри́тъ спасе́нїе . є҆мꙋ́же пᲂкланѧ́ющесѧ сла́вимъ тѧ̀ сп҃се пᲂми́лꙋй на́съ .

сти́хъ : пᲂми́лꙋй на́съ гдⷭ҇и . мⷱ҇ꙋ . Мᲂли́те заны̀ ст҃і́и мч҃нцы , да и҆зба́вимсѧ ѿ без̾зако́нїи на́шихъ , ва́мъ бо дана̀ є҆́сть бл҃гᲂда́ть мᲂли́тисѧ заны̀ .

сла́ва , и҆ нн҃ѣ , крⷭ҇тᲂбоⷢ҇ . Ве́сь вᲂспрїи́мъ мо́й ѻ҆́бразъ сᲂзда́тель и҆ бг҃ъ , ѡ҆блече́сѧ , вᲂѡ҆брази́ти и҆́же пре́жде па́дшїи ѻ҆́бразъ а҆да́мᲂвъ хᲂтѧ̀ , на́ крⷭ҇тъ вᲂзнесе́сѧ во́лею ꙗ҆́кѡ пᲂви́ненъ , и҆ рꙋ́цѣ распрᲂсте́ръ нн҃ѣ , и҆сцѣлѧ́ѧ рꙋ́ки ꙗ҆́же дре́вле къ дре́вꙋ ѡ҆сла́бленѣи снѣ́днᲂмꙋ . є҆го́же всечи́стаѧ ви́дѧщи вᲂсклица́ше , что̀ сїѐ твᲂѐ сн҃е мо́й не и҆зрече́ннᲂе дᲂлгᲂтерпѣ́нїе . нетерплю̀ на крⷭ҇тѣ̀ вᲂздви́жена зрѧ́щи тѧ̀ , и҆́же всѧ̀ го́рьстїю сᲂдержа́щаго землѝ кᲂнцы̀ .

таⷤ , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , крⷭ҇тᲂбоⷢ҇ . =во́ =гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Во вто́рникъ , на па́вечерницѣ . кано́нъ , прест҃ѣ́й бцⷣѣ . гла́съ , є҃ . пѣ́снь , а҃ . і҆рмо́съ . Кᲂнѧ̀ и҆ вса́дники в̾ мо́ри чермнѣ́мъ , сᲂкрꙋша́ѧи бра́ни мы́шцею высо́кᲂю , хрⷭ҇то́съ и҆стрѧ́слъ є҆́сть , і҆зра́илѧ же спасѐ , пᲂбѣ́днꙋю пѣ́снь пᲂю́ща . запѣ́въ : прест҃а́ѧ гжⷭ҇е бцⷣе спасѝ на́съ . Твᲂи́хъ ра́бъ и҆з̾ глꙋбины̀ срⷣца , мл҃твы вѣ́рно принᲂси́мыѧ ти бцⷣе прїе́мли , и҆ сїѧ̀ принᲂсѧ́щи сн҃ꙋ твᲂемꙋ̀ , пᲂда́ждь прегрѣше́нїемъ ѡ҆ставле́нїе . Ꙗ҆́кѡ вᲂи́стинꙋ бл҃гᲂда́тельница сꙋ́щи , бᲂгатѧ́щи земнᲂро́дныхъ , и҆ спае́нїѧ две́ри к̾ жи́зни в̾вᲂдѧ́щи , дв҃о бг҃ᲂмт҃и . пред̾стᲂѧ́щи всегда̀ непреста́й , ѡ҆ мᲂлѧ́щихъ тѧ . сла́ва . Ны́нѣ прекло́ньшисѧ пѣве́цъ твᲂи́хъ мᲂльба́ми , держа́внаѧ ко спасе́нїю сꙋ́щи по́мᲂщь , ѿ бѣ́дъ мᲂли́твами си и҆зе́мши влⷣчце , цѣ́лы сᲂхранѝ пᲂчита́ющихъ тѧ̀ . и҆ ны́нѣ . Пред̾вари́вши в̾ско́рѣ , и҆ пред̾стᲂѧ́щи те́плѣе прест҃а́ѧ дв҃цѣ , ѕѣлѡ̀ ѡ҆держи́мыхъ на́съ лю́тыми ѡ҆бстᲂѧ́нїи ᲂу҆ми́льшисѧ и҆зба́ви , и҆ ѿ печа́ли свᲂбᲂдѝ .

пѣ́снь , г҃ . і҆рмо́съ . Оу҆тверже́и ни наче́мъ же зе́млю пᲂвелѣ́нїемъ сѝ , и҆ распрᲂстранѝ не ѡ҆держи́мꙋю тѧгᲂтꙋ̀ , на недви́жимᲂмъ хрⷭ҇тѐ ка́мени запᲂвѣде́й тѝ , цр҃квь свᲂю̀ ᲂу҆твердѝ , є҆ди́не бл҃же и҆ чл҃кᲂлю́бче . Свѣ́та твᲂегѡ̀ бо́дренꙋю бжⷭ҇твенᲂю мᲂльбо́ю , те́мныи ѻ҆́блакъ срⷣца мᲂегѡ̀ мт҃и бж҃їѧ ѡ҆зари́вши , сн҃а днѝ пᲂкажи́ мѧ , дᲂбрᲂдѣ́тельми прᲂсвѣще́на , свѣтᲂвᲂди́тельнице дш҃а́мъ на́шимъ . Пѣ́ти тѧ̀ по дᲂстᲂѧ́нїю жела́юще прⷭ҇нѡ , но недᲂꙋмѣ́емъ , ѻ҆ба́че же хвалꙋ̀ ѿ ᲂу҆сте́нъ прино́симъ хꙋды́хъ , ю҆́же бл҃гᲂпремѣ́ннаѧ прїимѝ , и҆ мᲂльба́мъ пᲂслꙋ́шница бꙋ́ди , вѣ́рнѡ мᲂлѧ́щимсѧ тѝ . сла́ва . Дᲂбрᲂпло́дны , непло́дныѧ дꙋ́ши пᲂказꙋ́ющи , и҆ ѡ҆лѧдѣ́вшее ѡ҆чища́ющи твᲂе́ю мл҃твᲂю , и҆ мᲂю̀ дш҃ꙋ пло́дъ даю́щꙋ , вѣ́рꙋ и҆ житїѐ нескве́рно , ты̀ бг҃ᲂрᲂди́тельнице пᲂкажѝ . и҆ ны́нѣ . И҆́же всеѧ̀ землѝ го́рьстїю сᲂдержа́и кᲂнцы̀ , ка́кѡ мт҃рьними нѣ́драми ѡ҆бъє́млетсѧ , млеко́мъ же пита́етсѧ сᲂсце́ма , насыща́ѧ всѧ́ко живо́тно бл҃гᲂвᲂле́нїѧ , и҆ бᲂга́тыи и҆злїѧ́нїемъ , ѡ҆бнищава́етъ вᲂплᲂща́емь .

пѣ́снь , д҃ . і҆рмо́съ . Бжⷭ҇твеннᲂе твᲂѐ разꙋмѣ́въ смᲂтре́нїе , дивѧ́сѧ а҆вва́кꙋмъ хрⷭ҇тѐ тре́петнѡ вᲂпїѧ́ше тѝ , на спасе́нїе лю́демъ сѝ , спастѝ бл҃гі́ѧ свᲂѧ̀ прише́лъ є҆сѝ . Ꙗ҆́кѡ є҆ди́нꙋ тѧ̀ к̾ бг҃ꙋ хᲂда́тайцꙋ вѣ́дꙋще сᲂгрѣше́нїемъ до́лги разрѣша́ющꙋ пᲂви́ннымъ пречⷭ҇таѧ , хвала́ми и҆ пѣ́сньми пᲂчита́емъ . Цр҃кᲂвь ѡ҆сщ҃е́ннꙋю тѧ̀ пᲂказа̀ , всели́сѧ в̾тѧ̀ бг҃ъ дв҃о пренепᲂро́чнаѧ . є҆го́же прⷭ҇нѡ мᲂлѝ , сᲂблюстѝ невре́дны рабы̀ твᲂѧ̀ . сла́ва . Мᲂльбꙋ̀ ни́щихъ ᲂу҆слы́ши ᲂу҆пᲂва́ющихъ на тѧ̀ бцⷣе , ᲂу҆скᲂрѝ ѿ бѣ́дъ и҆збавлѧ́ющи на́съ , мт҃рьними сѝ дерзнᲂве́нїи . и҆ ны́нѣ . Въ ско́рбѣхъ сла́дкᲂе ᲂу҆тѣше́нїе , и҆ в̾ напа́стѣхъ по́мᲂщь , и҆ в̾ бѣда́хъ пред̾ста́тельницꙋ тѧ̀ , мт҃и бж҃їѧ стѧжа́вше , ѡ҆ѕлᲂбле́нїи всѧ́кихъ и҆збавлѧ́емсѧ .

пѣ́снь , є҃ . і҆рмо́съ . Ѡ҆дѣѧ́исѧ свѣ́тᲂмъ ꙗ҆́кѡ ри́зᲂю , к̾ тебѣ̀ ᲂу҆́треннюю , и҆ тебѣ̀ вᲂпїю̀ , дш҃ꙋ мᲂю̀ прᲂсвѣтѝ ѡ҆мра́чнꙋю хрⷭ҇тѐ , ꙗ҆́кѡ млрⷭ҇дъ . И҆́же первᲂнача́льна в̾ лѣ́та ро́ждьши , во ѡ҆пи́саннѣй пло́ти , и҆́же вᲂи́стинꙋ є҆стество́мъ неѡ҆пи́саннаго , тᲂгѡ̀ , мᲂлѝ непреста́ннѡ ѡ҆ рабѣ́хъ твᲂи́хъ . Ты̀ приближа́ешисѧ в̾ско́рѣ , сꙋ́щимъ в̾ нꙋ́жахъ , прⷭ҇нѡ пᲂмᲂга́ющи , и҆ ᲂу҆правлѧ́еши , призыва́ющихъ тѧ̀ во и҆скꙋше́нїихъ , ко спасе́нїю пречⷭ҇таѧ . сла́ва . Млⷭ҇тива є҆стество́мъ , млрⷭ҇даго бг҃а , мл҃твами пᲂказа́вши , пᲂда́ждь твᲂи́мъ рабо́мъ ми́рнꙋ жи́знь , и҆ прегрѣше́нїемъ и҆збавле́нїе пренепᲂро́чнаѧ . и҆ ны́нѣ . Оу҆́гль ро́ждьшаѧ , є҆го́же ᲂу҆зрѣ̀ и҆са́їѧ , пᲂпали́ми ве́щи всенепᲂро́чнаѧ сᲂгрѣше́нїемъ , и҆ прᲂсвѣти́ мѧ мᲂлю́сѧ .

пѣ́снь , ѕ҃ . і҆рмо́съ . Вᲂлнѧ́щеесѧ бꙋ́рею дш҃е тлѣ́ннᲂю , влⷣко хрⷭ҇тѐ , страсте́й мᲂи́хъ мо́ре ᲂу҆крᲂтѝ , и҆ и҆з̾ тлѝ вᲂз̾веди́ мѧ ꙗ҆́кѡ млрⷭ҇дъ . Оу҆мерщве́нныхъ на́съ страстьмѝ грѣха̀ влⷣчце , вᲂз̾ста́вивши ѡ҆живѝ мл҃твами си , ꙗ҆́кѡ тлѝ пᲂтреби́телѧ ро́ждьшаѧ . Неле́стнѡ ᲂу҆пᲂва́нїе тѧ̀ , и҆ неѡ҆бᲂри́мꙋ стѣ́нꙋ на врагѝ , и҆ тве́рдꙋ и҆мꙋ́ще по́мᲂщь , и҆́же наны̀ навѣ́тъ не ᲂу҆бᲂи́мсѧ . сла́ва . Земнᲂро́днымъ пред̾ста́ни в̾ бᲂлѣ́знехъ при́снѡ чи́стаѧ , и҆ лю́тыми ᲂу҆вѧда́ющими твᲂѧ̀ слꙋжи́телѧ невре́дны сᲂхранѝ . и҆ ны́нѣ . Дш҃ꙋ мᲂю̀ прᲂсвѣтѝ ѡ҆мрачи́вшꙋюсѧ , ѻ҆́блакᲂмъ пᲂмышле́нїе нахᲂдѧ́щихъ ми бг҃ᲂневѣ́сто , навѣ́тᲂмъ челᲂвѣкᲂꙋбі́йцы бѣ́са .

Гдⷭ҇и пᲂми́лꙋй ,= гⷤ . сла́ва , и҆ ны́нѣ . сѣда́ленъ , гла́съ , є҃ . К=рⷭ҇то́мъ сн҃а твᲂегѡ̀ бг҃ᲂра́дᲂваннаѧ , и҆́дᲂльскаѧ пре́лесть всѧ̀ ᲂу҆празни́сѧ , и҆ бѣсо́вскаѧ си́ла пᲂпра́на бы́сть . сегѡ̀ ра́ди вѣ́рнїи тѧ̀ по́ дᲂлгꙋ при́снѡ пᲂе́мъ , и҆ бл҃гᲂслᲂви́мъ во́ вѣки , и҆ бцⷣꙋ вᲂи́стинꙋ и҆спᲂвѣ́дающе тѧ̀ велича́емъ .

пѣ́снь , з҃ . і҆рмо́съ . Превᲂзнᲂси́мыи ѻ҆ц҃е́мъ гдⷭ҇ь , пла́мень ᲂу҆гаси́въ , дѣ́ти же прᲂхлади́лъ є҆́сть , є҆динᲂгла́снѡ пᲂю́ща , бж҃е бл҃гᲂслᲂве́нъ є҆сѝ . Прїимѝ влⷣчце , вѣ́рныхъ прᲂше́нїе ра́бъ тѝ , напа́стей и҆зима́ющи , и҆ ѿ скᲂрбе́й спаса́ющи , вѣ́рнѡ пᲂю́щихъ , бж҃е бл҃гᲂслᲂве́нъ є҆сѝ . И҆́же бл҃ги́хъ дѣ́лателѧ бг҃а , на́мъ ро́ждьши , тᲂгѡ̀ ᲂу҆мᲂлѝ мт҃рьними мᲂльба́ми чⷭ҇таѧ , ᲂу҆ще́дрити ѡ҆ тебѣ̀ хва́лѧщихсѧ . сла́ва . Пред̾ста́тельницꙋ непᲂбѣди́мꙋ , и҆ ѡ҆снᲂва́нїе непᲂкᲂлеби́мо тѧ̀ стѧжа́вше , и҆ твᲂи́мъ ѻ҆дѣ́ѧвшесѧ застꙋпле́нїемъ влⷣчце , пᲂбѣжда́емъ стрѣльца̀ ꙗ҆́же наны̀ кᲂва́рьствїѧ . и҆ ны́нѣ . Ви́ждь смире́нїе твᲂегѡ̀ раба̀ влⷣчце , и҆ вѣ́чнаго ѻ҆гнѧ̀ свᲂбᲂди́мѧ , непреста́ннѡ пᲂю́ща , бж҃е бл҃гᲂслᲂве́нъ є҆сѝ .

пѣ́снь , и҃ . і҆рмо́съ . Тебѣ̀ вседѣ́телю , в̾ пещѝ ѻ҆́трᲂцы , всеми́рныи ли́къ сᲂста́вльше пᲂѧ́хꙋ , дѣ́ла всѧ́каѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . Гл҃ы вкꙋ́пѣ и҆ мы́сльми , хвалꙋ̀ дв҃о тебѣ̀ плетꙋ́ще , вѣ́рнїи взыва́емъ , гдⷭ҇а по́йте , и҆ превᲂзнᲂси́те є҆гѡ̀ во́ вѣки . Всю̀ тебѐ дᲂбро́тꙋ сᲂлѡ́мᲂнъ бли́жнюю бг҃ᲂви пред̾написа̀ , ꙗ҆́кѡ ближа́йшꙋ сꙋ́щꙋ семꙋ̀ , мт҃рьнимъ дв҃це дерзнᲂве́нїемъ , сꙋ́щихъ в̾ ми́рѣ и҆збавлѧ́ющи . сла́ва . Тѧ̀ съ бг҃ᲂмъ ᲂу҆пᲂва́нїе спасе́нїѧ в̾ напа́стѣхъ и҆мꙋ́ще , вѣ́рнїи взыва́емъ , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . и҆ ны́нѣ . Прїимѝ пѣ́снь ѿ хꙋды́хъ ᲂу҆сте́нъ , дв҃о всепѣ́таѧ вᲂпїю́щихъ тѝ , ра́дꙋисѧ бᲂлѧ́щимъ тѣ́лᲂмъ цѣле́бнице , и҆ ѿча́ѧннымъ дш҃а́мъ спасе́нїе .

пѣ́снь , ѳ҃ . і҆рмо́съ . І҆са́їе ликꙋ́й , дв҃аѧ бо и҆мѣ̀ во́ чревѣ , и҆ пᲂрᲂдѝ сн҃а є҆мманꙋ́ила , бг҃а же и҆ чл҃ка , вᲂсто́къ и҆́мѧ є҆мꙋ̀ . є҆го́же велича́юще , тебѐ дв҃о ᲂу҆бл҃жа́емъ . Къ тебѣ̀ прᲂлива́емъ , и҆́же ѿ бᲂлѣ́зни мᲂли́твꙋ на́шꙋ , пᲂми́лꙋй на́съ грѣ́шныхъ . да непᲂсрами́мсѧ въ дн҃ь и҆скꙋше́нїѧ , тѧ̀ всемилᲂсе́рдꙋю бцⷣꙋ призыва́емъ . Пе́рьстнᲂе сро́дьство , непре́зри влⷣчце чи́стаѧ . но бꙋ́ди пᲂмо́щница пᲂкрыва́ющи , в̾ печа́лѣхъ ᲂу҆крѣплѧ́ющи , и҆ и҆збавлѧ́ющи всѣ́хъ недꙋ́жныхъ . на тѧ́ бо ᲂу҆пᲂва́емъ гᲂто́вꙋю , во є҆́же спастѝ на́съ . сла́ва . Бж҃е ᲂу҆слы́ши люде́й твᲂи́хъ мл҃твꙋ ны́нѣ , и҆ и҆зба́ви на́съ вре́да вра́жїѧ , сѐ тебѣ̀ приво́димъ и҆́стинно ѡ҆чище́нїе , тебѐ ро́ждьшꙋю , ю҆́же любо́вїю ᲂу҆бл҃жа́емъ . и҆ ны́нѣ . Пᲂд̾ держа́вꙋ крѣ́пᲂсти твᲂеѧ̀ влⷣчце , притека́емъ то́щнѡ . всѧ́къ земнᲂро́дныи , прᲂсѧ̀ млⷭ҇ти , и҆ щедро́ты твᲂѧ̀ ми́лᲂстивныѧ , ꙗ҆́же прᲂлїѧ́вши всѣ́хъ на́съ ѡ҆свѧтѝ . та́же , дᲂсто́йнѡ є҆́сть . и҆ про́чее . и҆ ѿпꙋ́стъ .

Въ сре́дꙋ , на ᲂу҆́трени . по а҃ , стихᲂло́гїи . сѣда́льны , крⷭ҇тны . гла́съ , є҃ . Мѣ́сто ло́бнᲂе ра́й бы́сть , то́чїю бо вᲂдрꙋзи́сѧ дре́во крⷭ҇тнᲂе , а҆́бїе и҆з̾растѝ гро́здъ живо́тныи , тебѐ сп҃се в̾ на́ше весе́лїе , сла́ва тебѣ̀ . сти́хъ : вᲂзнᲂси́те гдⷭ҇а бг҃а на́шего , и҆ кла́нѧйтесѧ пᲂд̾но́жїю но́гꙋ є҆гѡ̀ ꙗ҆́кѡ ст҃о є҆́сть . И҆́же распе́ншагᲂсѧ сп҃са и҆ и҆зба́вителѧ на́шего во́лею , ꙗ҆́кᲂже вѣ́сть и҆ ꙗ҆́кᲂже бл҃гᲂи҆зво́ли , вᲂспᲂе́мъ вѣ́рнїи и҆ прᲂсла́вимъ , ꙗ҆́кѡ пригвᲂздѝ на крⷭ҇тѣ̀ грѣхѝ чл҃кѡмъ , и҆збавлѧ́ѧ ѿ пре́лести ро́дъ чл҃ческїи , и҆ црⷭ҇твїю спᲂдо́билъ є҆́сть . сла́ва , и҆ ны́нѣ , крⷭ҇тᲂбоⷢ҇ . Вᲂз̾вы́шена на́ древѣ , ꙗ҆́кѡ ᲂу҆зрѣ̀ рᲂди́вшаѧ тѧ̀ бᲂлѣ́зней крᲂмѣ̀ , рыда́ше съ пла́чемъ и҆ в̾зыва́ше , ᲂу҆вы̀ мнѣ̀ сладча́йшїй сн҃е , ᲂу҆ѧзвлѧ́юсѧ дш҃е́ю , на крⷭ҇тѣ̀ в̾зира́ющи тѧ̀ пригвᲂжде́ннаго , пᲂсредѣ̀ двᲂю̀ ѕлᲂдѣ́ю , ꙗ҆́кᲂже ѕлᲂдѣ́ѧ пригвᲂжде́нна .

по в҃ , стихᲂло́гїи , сѣда́льны . гла́съ , є҃ . И҆́же распѧ́тїе претерпѣ́выи свᲂе́ю во́лею , и҆ ѿ и҆стлѣ́нїѧ чл҃ки свᲂбᲂди́въ сп҃се , пᲂе́мъ вѣ́рнїи и҆ пᲂклᲂнѧ́емтисѧ , ꙗ҆́кѡ прᲂсвѣти́лъ є҆сѝ на́съ си́лᲂю крⷭ҇тнᲂю , и҆ всѝ вᲂспѣва́емъ тѧ̀ чл҃кᲂлю́бче ще́дрыи , ꙗ҆́кѡ жизнᲂда́вца и҆ гдⷭ҇а . сти́хъ : бг҃ъ же цр҃ь на́шъ пре́жде вѣ́къ , сᲂдѣ́ла спасе́нїе пᲂсредѣ̀ землѝ . Дре́во крⷭ҇та̀ твᲂегѡ̀ сп҃се на́шъ , ми́рᲂви ꙗ҆ви́сѧ спасе́нїе , на то́мъ бо пригвᲂзди́лсѧ є҆сѝ во́лею , и҆ ѿ клѧ́твы и҆збавлѧ́ѧ земнᲂро́дныѧ , всѣ́мъ ра́дᲂсти гдⷭ҇и сла́ва тебѣ̀ . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Гдⷭ҇и ча́ши стрⷭ҇те́й твᲂи́хъ , стрⷭ҇тᲂте́рпцы твᲂѝ пᲂревнᲂва́вше , ѡ҆ста́виша жите́йскаѧ краснѣ́йшаѧ , и҆ бы́ша а҆́нг҃лѡмъ сᲂприча́стницы , тѣ́хъ мл҃твами пᲂда́ждь дш҃а́мъ на́шимъ смире́нїе хрⷭ҇тѐ , и҆ ве́лїю ми́лᲂсть . сла́ва , и҆ ны́нѣ , крⷭ҇тᲂбоⷢ҇ . Крⷭ҇то́мъ сн҃а твᲂегѡ̀ бг҃ᲂра́дᲂваннаѧ , и҆́дᲂльскаѧ пре́лесть всѧ̀ ᲂу҆праздни́сѧ , и҆ бѣсо́вскаѧ си́ла пᲂпра́на бы́сть . сегѡ̀ ра́ди вѣ́рнїи по́ дᲂлгꙋ тѧ̀ при́снѡ пᲂе́мъ , и҆ бл҃гᲂслᲂви́мъ , и҆ бцⷣꙋ вᲂи́стинꙋ и҆спᲂвѣ́дающе тебѐ велича́емъ .

по г҃ , стихᲂло́гїи , сѣда́ленъ . гла́съ , є҃ . На крⷭ҇тѣ́ тѧ пригвᲂжде́на и҆ ᲂу҆снꙋ́вша , а҆́нг҃льстїи чи́нᲂве ви́дѣвше и҆ ᲂу҆страши́шасѧ , і҆с҃е всѣ́хъ цр҃ю , и҆ пᲂбѣго́ша а҆́бїе бѣсо́встїи пᲂлцы̀ , и҆ сᲂкрꙋши́шасѧ вереѧ̀ а҆́дᲂвы , и҆ сме́рти мꙋчи́тельство низ̾лᲂжи́сѧ , и҆ и҆́же во грᲂбѣ́хъ ме́ртвїи вᲂскресо́ша . сла́ва , и҆ ны́нѣ , крⷭ҇тᲂбоⷢ҇ . На крⷭ҇тѣ̀ зрѧ́щи тѧ̀ хрⷭ҇тѐ мт҃и твᲂѧ̀ , во́лею пᲂсредѣ̀ разбо́йникꙋ ви́сѧща , растерза́ющисѧ мт҃рьски ᲂу҆тро́бᲂю гл҃аше , без̾грѣ́шныи сн҃е , ка́кѡ непра́веднѡ на крⷭ҇тѣ̀ , ꙗ҆́кᲂже ѕлᲂдѣ́й пригвᲂжде́нъ бы́сть , и҆́же чл҃ческїи ро́дъ хᲂтѧ̀ ѡ҆живи́ти , ꙗ҆́кѡ бл҃гᲂꙋтро́бенъ .

Въ сре́дꙋ , кано́нъ крⷭ҇тꙋ̀ , є҆мꙋ́же краегране́сїе , си́це . и҆́же ми́ра вᲂзнᲂсѧ́и хрⷭ҇тѐ , вᲂзнесе́сѧ на́ древо . твᲂре́нїе , ки́ръ і҆ѡ́сифᲂво . гла́съ , є҃ . пѣ́снь , а҃ . і҆рмо́съ . Кᲂнѧ̀ и҆ вса́дники в̾ мо́ри чермнѣ́мъ , сᲂкрꙋша́ѧи бра́ни мы́шцею высо́кᲂю , хрⷭ҇то́съ и҆стрѧ́слъ є҆́сть , і҆зра́илѧ же спасѐ , пᲂбѣ́днꙋю пѣ́снь пᲂю́ща . запѣ́въ : сла́ва гдⷭ҇и крⷭ҇тꙋ̀ твᲂемꙋ̀ честно́мꙋ . И҆́же непᲂстиже́нїемъ разꙋмѣва́емаго вᲂплᲂще́нна , и҆ ми́рꙋ ꙗ҆́вльшасѧ тѣле́снѣ , на́ древо вᲂздви́же , вᲂсхᲂтѣ́вша дре́вле , є҆вре́йскїи сᲂбо́ръ закᲂнᲂпрестꙋ́пныи . Є҆гда̀ и҆́же плᲂдᲂно́сна винᲂгра́да тебѐ хрⷭ҇тѐ , на́ древо крⷭ҇тнᲂе є҆вре́и бѣси́вшесѧ вᲂз̾двиго́ша , тᲂгда̀ вино̀ и҆ска́пилъ є҆сѝ весе́лїѧ сло́ве , всѧ́кᲂе пьѧ́нство ѕлы́хъ ѿє́млюще . мⷱ҇ꙋ . Въ зако́нѣхъ непа́даетъ пᲂхвала̀ мч҃нцы , ва́шегѡ терпѣ́нїѧ , па́че бо є҆стества̀ всѧ́кᲂго чл҃ческаго бᲂлѣ́зни претерпѣ́сте , и҆ ко ᲂу҆пᲂкᲂе́нїю небᲂлѣ́зненᲂмꙋ всели́стесѧ веселѧ́щесѧ . мⷱ҇ꙋ . Вᲂлна́ми мꙋ́къ преи҆змыва́еми ѡ҆кᲂрмле́нїемъ сло́ва , всехва́льнїи хрⷭ҇то́ви страда́льцы , в̾ приста́нища дᲂстиго́сте нбⷭ҇наѧ , бжⷭ҇твеныѧ ти́шины , нн҃ѣ наслажа́ющесѧ . боⷢ҇ . Є҆гда̀ и҆́же и҆́з̾ чрева твᲂегѡ̀ рᲂжде́наго гдⷭ҇а , ᲂу҆смᲂтрѝ на́ древо без̾ пра́вды вᲂз̾выша́ема , дв҃о прᲂслези́сѧ , и҆ тᲂгѡ̀ вᲂспѣ́ла є҆сѝ , не и҆з̾рече́ннᲂе вᲂи́стинꙋ нисхᲂже́нїе .

Дрꙋгі́и кано́нъ бцⷣѣ , є҆мꙋ́же краегране́сїе . пѧ́тᲂе быва́етъ пѣ́нїе ны́нѣ дв҃ѣй . і҆рмо́съ , то́йже . =запѣ́въ : прест҃а́ѧ гжⷭ҇е бцⷣе спасѝ на́съ . Д=ве́ри бжⷭ҇твеныѧ сла́вы , ѿве́рзшаѧ ра́йскїѧ две́ри , пᲂкаѧ́нїѧ две́ри и҆ мнѣ̀ ѿве́рзи мᲂлю́сѧ , и҆ ᲂу҆́мъ мо́й прᲂсвѣтѝ , вᲂспѣва́ти тѧ̀ бг҃ᲂѡ҆бра́дᲂваннаѧ . Оу҆ста́вила є҆сѝ сме́ртныи то́къ , ро́ждьши и҆́же живᲂто́мъ и҆ сме́ртїю ѡ҆блада́ющаго , всенепᲂро́чнаѧ . тᲂгѡ̀ ᲂу҆́бѡ мᲂлѝ , ᲂу҆мерщвлѧ́ющаѧ прегрѣше́нїѧ дш҃ꙋ мᲂю̀ , ᲂу҆ста́вити и҆ спасти́ мѧ . Є҆ди́нꙋ ѿ рᲂдѡ́въ тѧ̀ дᲂбро́тꙋ і҆а́кѡвлю и҆з̾бра̀ сло́во , и҆́же ѻ҆ц҃ꙋ сᲂбез̾нача́льнᲂе , и҆ ѿ твᲂи́хъ вᲂплᲂти́сѧ крᲂве́й . влⷣчце спаси́ мѧ хᲂда́тайствᲂмъ си . Ꙗ҆́кᲂже на рꙋно̀ до́ждь нбⷭ҇ныи на тѧ̀ сше́дшїи , пᲂдъє́мши всечⷭ҇таѧ , тѣ́мже ѡ҆дᲂжде́нїѧ страсте́й мᲂи́хъ и҆зсꙋшѝ , мᲂлю́ тѧ мт҃и дв҃о .

пѣ́снь , г҃ . і҆рмо́съ . Оу҆тверже́и ни наче́мъ же зе́млю пᲂвелѣ́нїемъ сѝ , и҆ распрᲂстранѝ не ѡ҆держи́мꙋю тѧгᲂтꙋ̀ , на недви́жимᲂмъ хрⷭ҇тѐ ка́мени запᲂвѣде́й тѝ , цр҃квь свᲂю̀ ᲂу҆твердѝ , є҆ди́не бл҃же и҆ чл҃кᲂлю́бче . Распе́ньшꙋтисѧ , и҆ ра́й па́ки ѿве́рзесѧ , и҆ разбо́йникъ пре́же всѣ́хъ ра́дꙋѧсѧ в̾хо́дитъ . и҆ ᲂу҆мира́еши і҆с҃е мо́й , и҆ вра́гъ льсте́цъ ᲂу҆мерщьвѧ́етсѧ ᲂу҆мерщьве́ныи же а҆да́мъ ѡ҆живлѧ́етсѧ . сла́ва премно́гᲂмꙋ тѝ млрⷭ҇дїю . Оу҆гаша́еши грѣхо́внагѡ пла́мене , распина́емь і҆с҃е на́ древѣ за бл҃гᲂсть , и҆ рꙋши́ши пре́лесть свѧзꙋ́емь . ѡ҆бнаже́нъ бы́въ , ѡ҆дѣва́еши в̾ красᲂтꙋ̀ сла́вы чл҃ка , сла́ва мно́гᲂмꙋ бл҃гᲂꙋтро́бїю твᲂемꙋ̀ . мⷱ҇ꙋ . Ꙗ҆вле́и приснᲂсїѧ́ющаѧ ѕвѣ́зды мч҃нки , нече́стїѧ тмꙋ̀ разгᲂнѧ́юща . тѣ́хъ мᲂльба́ми хрⷭ҇тѐ , но́щь ѕѡ́лъ мᲂи́хъ ѿженѝ , и҆ прᲂсвѣтѝ ѡ҆мраче́ннᲂе мѝ срⷣце . мⷱ҇ꙋ . Зако́нно бл҃гᲂсла́внїи пᲂстрада́вше мч҃нцы , и҆ зако́нно вѣ́рᲂю вѣнцы̀ вѣнча́ни бы́ша , и҆ без̾зако́ннꙋющихъ сᲂвѣ́ты ᲂу҆клᲂни́ша мꙋ́дрѣ , и҆ пи́щꙋ бжⷭ҇твенꙋю прїѧ́ша , и҆ ра́йскᲂе в̾селе́нїе . боⷢ҇ . Пᲂю́тъ а҆́нг҃льстїи ли́цы , тѧ̀ всепѣ́таѧ , без̾ раз̾сꙋже́нїѧ си́хъ преи҆мꙋ́щꙋю . бг҃а бо рᲂдила̀ є҆сѝ пло́тїю , и҆́же ѿ́ древа клѧ́твꙋ дре́вᲂмъ пᲂгꙋ́бльшаго , и҆ бл҃гᲂслᲂве́нїе и҆стᲂчи́вшаго .

и҆́нъ , і҆рмо́съ , то́йже . Стрѣло́ю грѣхо́внᲂю ᲂу҆ѧ́звенаго мѧ , и҆́же в̾ тебѣ̀ лѣкᲂва́нїемъ всегѡ̀ и҆сцѣлѝ чи́стаѧ , и҆ ѿ сᲂдержа́щихъ мѧ̀ и҆змѣнѝ бᲂлѣ́зней , ꙗ҆́же бᲂлѣ́зней премѣни́вшаѧ ро́дъ чл҃ческїи , ржⷭ҇тво́мъ свᲂи́мъ . И҆́же всꙋ́е смире́ннᲂе срⷣце мᲂѐ ѡ҆скᲂрблѧ́ющаѧ , и҆ и҆́щꙋщаѧ ᲂу҆мертви́ти мѧ̀ , неви́димыѧ врагѝ , влⷣчце твᲂи́мъ низ̾лᲂжѝ застꙋпле́нїемъ , да пребꙋ́дꙋтъ бездѣ́льни , стꙋда̀ и҆спᲂлнѧ́еми . Во́дъ живᲂтво́рныхъ мѧ и҆спо́лни влⷣчце , ꙗ҆́же бжⷭ҇твенꙋю во́дꙋ ми́рᲂви и҆стᲂчи́вшаѧ , без̾зако́нїи мᲂи́хъ лю́тыѧ и҆зсꙋшѝ пᲂто́ки , и҆ срⷣца мᲂегѡ̀ во́лны бжⷭ҇твенᲂю сѝ тишино́ю ᲂу҆крᲂтѝ . Пре́йде сѣ́нь , зако́нꙋ с̾кᲂнча́емꙋ , закᲂнᲂда́вца бо хрⷭ҇та̀ ро́ждьши , бл҃гᲂда́ть ѡ҆чище́нїѧ и҆ прᲂсвѣще́нїѧ на́мъ зако́нъ пᲂлага́юща , и҆ клѧ́твꙋ ѿє́млюща пречⷭ҇таѧ дв҃о всенепᲂро́чнаѧ .

пѣ́снь , д҃ . і҆рмо́съ . Бжⷭ҇твеннᲂе твᲂѐ разꙋмѣ́въ смᲂтре́нїе , дивѧ́сѧ а҆вва́кꙋмъ хрⷭ҇тѐ тре́петнѡ вᲂпїѧ́ше тѝ , на спасе́нїе лю́демъ сѝ , спастѝ бл҃гі́ѧ свᲂѧ̀ прише́лъ є҆сѝ . Дш҃а́мъ всекᲂне́чнᲂе и҆збавле́нїе сᲂтвᲂрѧ́ѧ хрⷭ҇тѐ , в̾ рꙋ́цѣ ѻ҆ц҃ꙋ пре́далъ є҆сѝ прест҃ꙋ́ю дш҃ꙋ свᲂю̀ , на́ древѣ во́лею ви́симъ . Непра́ведныи сꙋдїѧ̀ , ѡ҆сꙋди́ тѧ пра́веднаго сꙋдїю̀ і҆с҃е , ᲂу҆мретѝ на́ древѣ ви́сѧщꙋ , ꙗ҆́кѡ да ѡ҆правди́ши на́съ , непра́веднѣ врагꙋ̀ пᲂд̾кло́ньшїѧсѧ . мⷱ҇ꙋ . Ви́дѣти спᲂдо́бистесѧ мч҃нцы , ꙗ҆́же ѿ́ вѣка бл҃га́ѧ , бѣда́мъ мно́гимъ и҆ скᲂрбе́мъ , и҆ не и҆сцѣ́льнымъ мꙋ́камъ , на землѝ ꙗ҆вле́ннѡ причасти́вшесѧ . мⷱ҇ꙋ . Зи́мꙋ и҆скꙋше́нїи преи҆до́сте и҆ къ ве́снѣ вᲂздаѧ́нїѧ нбⷭ҇нагѡ дᲂстиго́сте , и҆ ликѡ́мъ а҆́нг҃льскимъ , че́стнѡ сᲂчета́стесѧ мч҃нцы . боⷢ҇ . Кᲂпїѐ бжⷭ҇твеныхъ страсте́й про́йде твᲂю̀ бл҃гᲂслᲂве́наѧ дш҃ꙋ , внегда̀ ви́дѣ распина́ема свᲂегѡ̀ сн҃а , и҆ в̾ рꙋ́цѣ ѻ҆́ч҃їи дш҃ꙋ преда́вша .

и҆́нъ , і҆рмо́съ , то́йже . Ѿ дѣ́лъ нѣ́стьми спасе́нїѧ , тѣ́мже пᲂд̾кро́въ тво́й съ наде́жею прибѣга́ю дв҃о всенепᲂро́чнаѧ , ѿча́ѧннагѡ мѧ спасѝ мл҃твами си . Свѣ́та чⷭ҇тᲂе прїѧ́телище , сл҃нца нᲂси́ло чⷭ҇тно́е , лю́тыхъ че́рнᲂстїю ѡ҆мраче́нᲂе срⷣце мᲂѐ ѡ҆зарѝ , и҆ спаси́ мѧ влⷣчце . И҆з̾тка́вшаѧ ѻ҆де́ждꙋ разꙋ́мнѡ , ѿ крᲂве́й твᲂи́хъ дв҃ческихъ , и҆́же нб҃о ѻ҆́блаки ѻ҆трᲂкᲂви́це ѡ҆дѣва́ющемꙋ , ѻ҆де́жею нетлѣ́нїѧ ле́стїю , ѡ҆блецы̀ ѡ҆бнаже́ннагѡ мѧ . Ѿ ᲂу҆до́лїи жите́йскихъ , ꙗ҆́кѡ кри́нъ вᲂспрїѧ́тъ тѧ̀ зижди́тель , и҆з̾ тебѐ ми́рᲂви в̾дᲂхнꙋ̀ , дх҃о́внᲂе бл҃гᲂꙋха́нїе , дв҃о прест҃а́ѧ бг҃ᲂневѣ́сто .

пѣ́снь , є҃ . і҆рмо́съ . Ѡ҆дѣѧ́исѧ свѣ́тᲂмъ ꙗ҆́кѡ ри́зᲂю , к̾ тебѣ̀ ᲂу҆́треннюю , и҆ тебѣ̀ вᲂпїю̀ , дш҃ꙋ мᲂю̀ прᲂсвѣтѝ ѡ҆мра́чнꙋю хрⷭ҇тѐ , ꙗ҆́кѡ млрⷭ҇дъ . Стᲂѧ́ше сꙋди́мъ , пра́ведныи сꙋдїѐ хрⷭ҇тѐ , и҆ ѡ҆сꙋжда́ѧ пло́тїю враждꙋ̀ , тро́стїю бїе́мь , и҆ свᲂбᲂже́нїе сверше́но пᲂд̾писꙋ́ѧ мнѣ̀ . Тебѐ ꙗ҆́кѡ ви́дѣ пло́тїю пᲂвѣ́шена хрⷭ҇тѐ на́ древѣ сл҃нце , свѣ́тъ во тмꙋ̀ прелᲂжѝ , и҆ землѧ̀ пᲂкᲂлеба́сѧ , и҆ ка́менїе распаде́сѧ . мⷱ҇ꙋ . Землѝ кᲂнцы̀ ѡ҆ст҃и́ли є҆стѐ , ꙗ҆́кѡ и҆спо́лнителїе бо зако́на бжⷭ҇твенаго , всехва́льнїи мч҃нцы , стра́жꙋще ст҃ы́ню наслѣ́дᲂвасте . мⷱ҇ꙋ . Предо́брѣйшїи , и҆ бг҃ᲂза́рнѣйшїи , и҆́же бжⷭ҇твенᲂю сла́вᲂю ѡ҆дѣ́ѧни , и҆ ѡ҆бнажи́вшїи вра́жїю ѕло́бꙋ , мч҃нцы да пᲂчита́ютсѧ . боⷢ҇ . Тебѐ всенепᲂро́чнꙋю бж҃їю рᲂди́тельницꙋ ᲂу҆бл҃жа́емъ . є҆ѧ́же ра́ди клѧ́тва непло́ды бы́сть , и҆ и҆збавле́нїе и҆ блгⷭ҇ве́нїе даде́сѧ .

и҆́нъ , і҆рмо́съ , то́йже . Да ѡ҆брѧ́щꙋ тѧ̀ по́мᲂщь дв҃о , и҆зима́ющꙋю мѧ в̾ ча́съ сꙋ́дныи ѡ҆сꙋже́нїѧ , є҆гда̀ сꙋди́щꙋ и҆́же и҆з̾ тебѐ ро́ждьшагᲂсѧ пред̾ста́нꙋ . Зако́нѡмъ мѧ̀ пᲂбѣжда́ема грѣхо́внымъ чи́стаѧ , и҆ лестьмѝ чꙋжа́го ча́сто прельща́ема , и҆ въ бре́ги прегрѣше́нїи низ̾рѣ́ема ѡ҆братѝ . Оу҆́гнь ро́ждьшаѧ є҆го́же ᲂу҆зрѣ̀ и҆са́їѧ , пᲂпалѝ ве́щи всенепᲂро́чнаѧ мᲂи́хъ сᲂгрѣше́нїи , и҆ прᲂсвѣти́ мѧ мᲂлю́сѧ . Пло́ть ѿ крᲂве́й твᲂи́хъ хрⷭ҇то́ви в̾заи́мъ да́вши , плᲂтьскі́ѧ ми дв҃о стра́сти ѿ ню́дъ ѡ҆чи́сти , и҆ без̾стра́стїѧ стезю̀ пᲂкажи́ми .

пѣ́снь , ѕ҃ . і҆рмо́съ . Вᲂлнѧ́щеесѧ бꙋ́рею дш҃е тлѣ́ннᲂю , влⷣко хрⷭ҇тѐ , страсте́й мᲂи́хъ мо́ре ᲂу҆крᲂтѝ , и҆ и҆з̾ тлѝ вᲂз̾веди́ мѧ ꙗ҆́кѡ млрⷭ҇дъ . Вᲂз̾дви́жесѧ дᲂлгᲂтерпѣли́ве на́ древо , всѐ вра́жїе вᲂз̾выше́нїе низ̾лᲂжи́лъ є҆сѝ , и҆ спа́слъ є҆сѝ па́дшаго , мно́гїѧ ра́ди бл҃гᲂсти . Дш҃и пра́ведныхъ , на́ древѣ тѧ̀ дре́вле дш҃ꙋ преда́вша влⷣко ꙗ҆́кѡ ѡ҆щꙋти́ша , вѣ́чныхъ ᲂу҆́зъ сло́ве ѿпꙋща́еми быва́хꙋ . мⷱ҇ꙋ . Ꙗ҆́кᲂже тве́рдїи а҆дама́нти , мꙋ́къ всѣ́хъ жже́нїѧ , терпѣли́вымъ нра́вᲂмъ пᲂдъѧ́сте , и҆ врага̀ смири́вше низ̾лᲂжи́сте . мⷱ҇ꙋ . Пᲂдо́бницы хрⷭ҇то́вымъ стрⷭ҇те́мъ бы́вши , пᲂдъѧ́сте всѧ́ко мꙋче́нїе стрⷭ҇тᲂте́рпцы гдⷭ҇ни . сегѡ̀ ра́ди нбⷭ҇ныхъ красо́тъ спᲂдо́бистесѧ . боⷢ҇ . Ди́вно ржⷭ҇тво́ ти , и҆́же ве́лїѧ чꙋдеса̀ твᲂрѧ́и , и҆ во ст҃ы́хъ прᲂславлѧ́емо бцⷣе є҆ди́на всечꙋ́днаѧ влⷣчце .

и҆́нъ , і҆рмо́съ , то́йже . Да непо́жретъ менѐ влⷣчце , ᲂу҆ны́нїѧ глꙋбина̀ , и҆ грѣхо́внаѧ вᲂлна̀ да непᲂкры́етъ менѐ , но твᲂе́ю мл҃твᲂю да спасе́нъ бꙋ́дꙋ є҆ди́на чⷭ҇таѧ . Зако́нꙋ свѣ́щникъ , прᲂѡ҆бража́ше тѧ ро́ждьшꙋю свѣ́тъ , прᲂсвѣти́вшаго пречⷭ҇таѧ всѧ́ческаѧ , тѣ́мже вᲂпїю́ ти , ѡ҆мраче́ннаго мѧ прᲂсвѣтѝ . Бл҃га́гѡ ро́ждьшаѧ бл҃гᲂда́телѧ и҆ сᲂдѣ́телѧ , всечⷭ҇таѧ влⷣчце . бл҃гᲂлюби́ваѧ , дш҃ꙋ мᲂю̀ ѡ҆ѕло́бленꙋю ᲂу҆блажѝ . Винꙋ̀ спасе́нїѧ жизнᲂда́вца рᲂдила̀ є҆сѝ на́мъ , вѣ́чнᲂе и҆збавле́нїе да́рꙋюща вᲂи́стинꙋ , и҆́же тѧ̀ бцⷣꙋ прᲂпᲂвѣ́дающимъ .

пѣ́снь , з҃ . і҆рмо́съ . Превᲂзнᲂси́мыи ѻ҆ц҃е́мъ гдⷭ҇ь , пла́мень ᲂу҆гаси́въ , дѣ́ти же прᲂхлади́лъ є҆́сть , є҆динᲂгла́снѡ пᲂю́ща , бж҃е бл҃гᲂслᲂве́нъ є҆сѝ . Вѣнча̀ те́рнїемъ тѧ̀ цр҃ю без̾сме́ртне , со́ньмъ закᲂнᲂпрестꙋ́пныи , и҆́же и҆з̾ ко́рене и҆з̾сѣца́юща преле́стнᲂе те́рнїе , бж҃е блгⷭ҇ве́нъ є҆сѝ . Да ѡ҆блече́ши мѧ сло́ве в̾ ри́зꙋ нетлѣ́нїѧ , ѡ҆бнажи́лсѧ є҆сѝ во́лею , и҆ терпи́ши ѡ҆плева́нїѧ , и҆ распѧ́тїе , и҆ стра́сть , без̾стра́стенъ сы́и по сꙋществꙋ̀ . мⷱ҇ꙋ . Сᲂѡ҆бра́зи бы́вше страсте́мъ ст҃і́и , и҆́же всѣ́ми влⷣчествꙋющемꙋ . вᲂи́стинꙋ є҆стѐ сн҃ᲂве и҆ наслѣ́дницы , црⷭ҇тва непᲂкᲂлеби́магѡ . мⷱ҇ꙋ . Древесе́мъ без̾слᲂве́снѣйшимъ , непринесо́сте че́сти , и҆́же на́ древѣ прᲂсте́ршагѡ рꙋ́цѣ чтꙋ́же , ꙗ҆́кѡ всѣ́хъ цр҃ѧ и҆ влⷣкꙋ . боⷢ҇ . Стра́ннѡ є҆́сть ржⷭ҇тво́ ти всенепᲂро́чнаѧ , бг҃а бо рᲂдила̀ є҆сѝ , и҆́же дре́вᲂмъ ᲂу҆вѧди́вшаго пла́мень пре́лести , и҆ прᲂсвѣти́вшаго ми́ръ .

и҆́нъ , і҆рмо́съ , то́йже . Пᲂю́ тѧ всепѣ́таѧ , бг҃а бо препѣ́таго без̾ сѣ́мене рᲂдила̀ є҆сѝ дв҃о всест҃а́ѧ , ѡ҆бᲂжа́ющаго пᲂю́щихъ , бж҃е бл҃гᲂслᲂве́нъ є҆сѝ . Оу҆мертвѝ стра́сти мᲂѧ̀ , жи́знь ро́ждьшаѧ , вᲂз̾дви́гни мѧ лежа́ща во́ грᲂбѣ нечꙋ́вьствїѧ , да любо́вїю сла́влю тѧ̀ бг҃ᲂневѣ́сто . При́зри на мᲂле́нїѧ ра́бъ твᲂи́хъ влⷣчце , ѿ бѣ́дъ и҆збавлѧ́ющи , и҆ ѿ скᲂрбе́й спаса́ющи , вѣ́рᲂю пᲂю́щїѧ , бж҃е бл҃гᲂслᲂве́нъ є҆сѝ . Не и҆сче́тнѡ си́льнаго , и҆́же на́шꙋ не́мᲂщь ѡ҆бо́лкшагѡ , пᲂрᲂдила̀ є҆сѝ чⷭ҇таѧ , є҆го́же мᲂлѝ и҆сцѣли́ти дш҃ꙋ мᲂю̀ лю́тѣ и҆знемо́гшꙋю .

пѣ́снь , и҃ . і҆рмо́съ . Тебѣ̀ вседѣ́телю , в̾ пещѝ ѻ҆́трᲂцы , всеми́рныи ли́къ сᲂста́вльше пᲂѧ́хꙋ , дѣ́ла всѧ́каѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . Вы́шнїи бж҃е , на́ крⷭ҇тъ вᲂз̾дви́жесѧ , же́лчи напᲂѧ́емъ , сла́дᲂсте жи́зненаѧ , кᲂпїе́мъ прᲂбᲂда́ешисѧ , закала́ѧ си́мъ , и҆́же въ раѝ а҆да́ма низ̾лᲂжи́вшаго . Разрѣша́еши мѧ ѿ ᲂу҆́зъ грѣхо́вныхъ сло́ве , хᲂтѣ́нїемъ свѧза́емь , и҆ вѣ́чными ᲂу҆́зами свѧза́ѧ сп҃се , врага̀ ѿстꙋ́пника . тѣ́мже твᲂѧ̀ сла́влю стра́сти во́ вѣки . мⷱ҇ꙋ . Ꙗ҆ви́стесѧ прича́стницы свѣ́та невеще́ственагѡ , свѣ́ти сꙋ́ще втᲂрі́и ст҃і́и мч҃нцы . тмꙋ̀ пре́лести ѿє́млюще , и҆ всѣ́мъ вѣ́рнымъ срⷣца̀ прᲂсвѣща́юще бжⷭ҇твенѣ . мⷱ҇ꙋ . І҆єрᲂсали́ма вы́шнѧгѡ свᲂбо́днагѡ , сн҃ᲂве бы́сте мч҃нцы , прᲂсвѣща́юще первᲂро́дныхъ цр҃кᲂвь , и҆ превᲂзнᲂсѧ́ще хрⷭ҇та̀ во́ вѣки . боⷢ҇ . Стᲂѧ́ше ᲂу҆ крⷭ҇та̀ смᲂтрѧ́ющи ѻ҆трᲂкᲂви́це , пригвᲂжде́на хрⷭ҇та̀ є҆го́же рᲂдила̀ є҆сѝ влⷣчце . тѣ́мже вᲂпїѧ́ше , да не без̾ча́днꙋ мѧ ꙗ҆ви́ши без̾нача́льне , пребез̾нача́льнагѡ ѻ҆ц҃а сн҃е и҆ сло́ве .

и҆́нъ , і҆рмо́съ , то́йже . И҆́же предо́браѧ и҆ бг҃ᲂзра́чнаѧ дв҃о , до́брыхъ мѧ̀ видѣ́нїемъ ᲂу҆дᲂбри́вши прᲂсвѣтѝ , ꙗ҆́кѡ да зᲂвꙋ̀ , гдⷭ҇а по́йте , и҆ превᲂзнᲂси́те є҆гѡ̀ во́ вѣки . Две́ри свѣ́та , пᲂкаѧ́нїѧ мѝ две́ри свѣтᲂза́рныѧ ѿве́рзи , пᲂказꙋ́ющи всѧ́кꙋ пра́вᲂсть , и҆ пꙋ́ть пра́вды , в̾вᲂдѧ́щїи к̾ бжⷭ҇твенымъ хᲂтѣ́нїемъ в̾хо́да . Ст҃о́е чⷭ҇таѧ сло́во , вѣ́рныѧ ѡ҆сщ҃а́ющее , не и҆з̾гл҃аннѡ рᲂдила̀ є҆сѝ , тᲂгѡ̀ мᲂлѝ прест҃а́ѧ , смире́ннꙋю дш҃ꙋ мᲂю̀ ны́нѣ ѡ҆ст҃и́ти , ѕло́бᲂю ѡ҆скверне́нꙋю . Стрꙋѧ̀ свѣ́тлагѡ без̾сме́ртїѧ ѻ҆трᲂкᲂви́це . и҆з̾ тебѐ прᲂи҆зы́де и҆́же всѣ́хъ гдⷭ҇ь ; тѣ́мже вᲂпїю́ ти чⷭ҇таѧ , стрꙋѝ ѕѡ́лъ мᲂи́хъ и҆з̾сꙋшѝ , тꙋ́чами твᲂи́хъ мл҃твъ .

та́же , пѣ́снь бцⷣѣ . вели́читъ дш҃а мᲂѧ̀ гдⷭ҇а .= и҆ =пᲂкло́ны до землѝ .

пѣ́снь , ѳ҃ . і҆рмо́съ . І҆са́їе ликꙋ́й , дв҃аѧ бо и҆мѣ̀ во́ чревѣ , и҆ пᲂрᲂдѝ сн҃а є҆мманꙋ́ила , бг҃а же и҆ чл҃ка , вᲂсто́къ и҆́мѧ є҆мꙋ̀ . є҆го́же велича́юще , тебѐ дв҃о ᲂу҆бл҃жа́емъ . Ꙗ҆́кѡ а҆́гнецъ вᲂз̾дви́жесѧ на́ древо влⷣко хрⷭ҇тѐ , че́люсти сᲂкрꙋша́ѧ во́лка мы́сленаго , и҆ ѿ ᲂу҆́стъ є҆гѡ̀ и҆схища́ѧ свᲂѧ̀ слᲂве́сныѧ ѻ҆́вцы , и҆ приве́дъ ѧ҆̀ влⷣко къ рᲂди́телеви . Вѣнце́мъ те́рнᲂвымъ ᲂу҆вѧзе́сѧ , ꙗ҆́кᲂже цр҃ь црⷭ҇твꙋющимъ хрⷭ҇тѐ , лꙋка́вᲂмꙋ пᲂтреблѧ́ѧ црⷭ҇твїѧ , и҆ и҆́з̾кᲂрене ѿсѣка́ѧ пре́лести те́рнїе . тѣ́мже вѣ́рᲂю тѧ̀ бл҃же сла́вимъ . мⷱ҇ꙋ . Ѻ҆блиста̀ ꙗ҆́кᲂже сл҃нце твердᲂстᲂѧ́тельнᲂе прᲂтивле́нїе ва́ше , и҆ всю̀ раз̾рꙋшѝ вра́жїю мглꙋ̀ , мч҃нцы непᲂбѣди́мїи , прᲂсвѣти́телїе всѣ́мъ вѣ́рнымъ , стᲂлпѝ непрекло́ннїи бл҃гᲂче́стїѧ , дᲂстᲂсла́внїи . мⷱ҇ꙋ . По́лкъ бг҃ᲂсо́бранъ , во́иньство бжⷭ҇твенᲂе , сᲂбо́ръ и҆збра́нныи , ст҃а́ѧ сѣ́нь ꙗ҆ви́стесѧ , вы̀ всехва́льнїи мч҃нцы сп҃са , лꙋка́вагѡ гра́ды разрꙋша́юще бжⷭ҇твенᲂю бл҃гᲂда́тїю . боⷢ҇ . Сᲂдѣ́телѧ рᲂдила̀ є҆сѝ , бл҃гᲂче́стїю сади́телѧ , в̾сажда́юща на землѝ ра́зꙋмъ и҆́стинныи , и҆ прᲂзѧ́бшꙋю ѿ сада̀ разᲂрѧ́юща клѧ́твꙋ . є҆го́же велича́юще тебѐ дв҃о ᲂу҆блажа́емъ .

и҆́нъ , і҆рмо́съ , то́йже . Ѻ҆снᲂва́нїе непᲂкᲂлѣби́мо сп҃са рᲂдила̀ є҆сѝ чи́стаѧ , на вᲂда́хъ зе́млю бжⷭ҇твенымъ пᲂвелѣ́нїемъ ѡ҆снᲂва́вшаго . є҆го́же мᲂлѝ , на́съ ᲂу҆тверди́ти , и҆́же чи́сто тебѐ блажа́щихъ . Въ пꙋ́ть смире́нїѧ пᲂвелѣ́нїи бжⷭ҇твеныхъ , нело́жнѡ ше́ствᲂвати и҆ непреле́стнѡ сᲂтвᲂри́ мѧ чи́стаѧ , бѣсо́вскїи мѧте́жь , и҆ страсте́мъ нахᲂжде́нїѧ ѿгᲂнѧ́ющи , и҆ тишинꙋ̀ пᲂдаю́щи мѝ . Дрема́нїемъ ѡ҆держи́ма нерадѣ́нїѧ , ви́дѧ вра́гъ нахо́дитъ неѡ҆сла́бнѡ , сно́мъ сла́сти надѣ́ѧсѧ ᲂу҆кра́стимѧ . но сама́ мѧ сᲂхранѝ чи́стаѧ не ᲂу҆сы́пнᲂю си мᲂли́твᲂю мт҃и дв҃о . Ꙗ҆́кѡ самᲂѡ҆сꙋжде́нъ пᲂмышлѧ́ю мᲂи́хъ грѣхо́въ мно́жество , и҆ стра́шнᲂе сꙋди́ще сꙋдїѝ , на не́мже хᲂщꙋ̀ сꙋди́тисѧ . но ꙗ҆́же сꙋдїю̀ ро́ждьши бг҃а , тᲂгда́ мѧ сᲂблюдѝ бцⷣе не ѡ҆сꙋжде́на .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стⷯры , крⷭ҇тны . гла́съ , є҃ . То́чїю вᲂдрꙋзи́сѧ дре́во хрⷭ҇тѐ крⷭ҇та̀ твᲂегѡ̀ , пре́лесть прᲂгна́на бы́сть и҆́дᲂльскаѧ , и҆ бл҃гᲂда́ть прᲂцвѣтѐ . небо̀ к̾ тᲂмꙋ̀ ѡ҆сꙋже́нїѧ є҆́сть мꙋчи́тельство , но пᲂбѣ́да ꙗ҆ви́сѧ на́мъ спасе́нїѧ , крⷭ҇тъ бо на́мъ є҆́сть пᲂхвала̀ , крⷭ҇тъ на́мъ ᲂу҆тверже́нїе , крⷭ҇тъ на́мъ ра́дᲂванїе .

сти́хъ : и҆спо́лнихᲂмсѧ за ᲂу҆́тра . Веде́нъ бы́сть на́съ ра́ди на же́ртвꙋ хрⷭ҇тѐ ꙗ҆́кѡ ѻ҆вча̀ , и҆ ꙗ҆́кѡ а҆́гнецъ неѕло́бивъ є҆мманꙋ́илъ , на закᲂле́нїе во́льнᲂе , съ без̾зако́нники вмѣне́нъ бы́сть . прїиди́те вᲂспо́йте ѻ҆те́чествїѧ ꙗ҆зы́къ , и҆ пᲂклᲂни́тесѧ на крⷭ҇тѣ̀ пᲂвѣ́шенᲂмꙋ , живᲂтꙋ̀ без̾кᲂне́чнᲂмꙋ .

сти́хъ : и҆ бꙋ́ди свѣ́тлᲂсть . мⷱ҇ꙋ . Ст҃і́и мч҃нцы на землѝ пᲂдви́гшесѧ , мра́зъ претерпѣ́ша , ѻ҆гне́ви преда́шасѧ , вᲂда̀ и҆́хъ прїѧ́тъ . тѣ́хъ є҆́сть гла́съ , прᲂидо́хᲂмъ сквᲂзѣ̀ ѻ҆́гнь и҆ во́дꙋ , и҆ и҆зведѐ ны̀ в̾ пᲂко́й . мᲂли́твами и҆́хъ хрⷭ҇тѐ бж҃е пᲂми́лꙋй на́съ .

сла́ва , и҆ нн҃ѣ , крⷭ҇тᲂбоⷢ҇ . Зрѧ́щи дре́вле а҆́гньца свᲂегѡ̀ , дв҃аѧ мт҃и всебл҃же́ннаѧ ѻ҆трᲂкᲂви́це , на́ крⷭ҇тъ вᲂз̾дви́жена , вᲂпїѧ́ше слезѧ́щи , ᲂу҆вы̀ мнѣ̀ сн҃е мо́й , ка́кѡ ᲂу҆мира́еши , бг҃ъ є҆стество́мъ сы́и без̾сме́ртенъ .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= є҆ктенїѧ̀ . =та́же , ча́съ , а҃ . ѱалмы̀ , ѡ҆бы́чны . и҆ про́чее , и҆ кᲂне́чныи ѿпꙋ́стъ .

Въ сре́дꙋ , бл҃же́нны . гла́съ , є҃ .

Разбо́йникъ на крⷭ҇тѣ̀ , бг҃а бы́ти вѣ́рᲂвавъ тѧ хрⷭ҇тѐ , и҆спᲂвѣ́да тѧ чи́стѡ ѿ́ срⷣца , пᲂмѧни́ мѧ гдⷭ҇и вᲂпїю́ща во црⷭ҇твїи си .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Прᲂбᲂде́нъ бы́сть в̾ ре́бра , пᲂто́ки ѡ҆ставле́нїѧ и҆стᲂчи́лъ є҆сѝ хрⷭ҇тѐ . пригвᲂзди́въ же сѝ на крⷭ҇тѣ̀ рꙋ́цѣ , ве́сь разᲂрѧ́ѧ , страстны́и чл҃кѡмъ ра́зꙋмъ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Вᲂзше́дъ на́ крⷭ҇тъ , всѐ пᲂкᲂлеба́лъ є҆сѝ бѣсо́вскᲂе мно́жество , и҆ низве́рглъ є҆сѝ па́гꙋбнꙋю держа́вꙋ мꙋчи́телѧ , влⷣко хрⷭ҇тѐ , и҆ спа́слъ чл҃чество .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Пᲂдо́бницы хрⷭ҇то́вымъ страсте́мъ бы́вше , пᲂдъѧ́сте всѧ́ко мꙋче́нїе , страстᲂте́рпцы гдⷭ҇ни . сегѡ̀ ра́ди нбⷭ҇ныхъ красо́тъ спᲂдо́бистесѧ .

сла́ва . На крⷭ҇тѣ̀ и҆́же ѻ҆ц҃ꙋ и҆ бжⷭ҇твенᲂмꙋ дх҃ꙋ нераздѣ́льныи , во́льнꙋю претерпѣ́лъ є҆сѝ стрⷭ҇ть хрⷭ҇тѐ , стра́сти всѧ̀ тлетво́рныѧ ѿ на́съ и҆зима́ѧ .

и҆ ны́нѣ . Пред̾стᲂѧ́щи ᲂу҆ крⷭ҇та̀ бг҃ᲂра́дᲂваннаѧ , и҆ сн҃а свᲂегѡ̀ ви́дѧщи ᲂу҆ѧ́звена , дш҃е́ю ᲂу҆ѧзвлѧ́шесѧ , вᲂспѣва́ше , тᲂгѡ̀ мно́гᲂе вᲂи́стинꙋ смᲂтре́нїе .