Глас 6 суббота

Въ пѧто́къ , ве́черъ . на́ гдⷭ҇и вᲂзва́хъ , стⷯры , ст҃ы́мъ мч҃нкѡмъ , и҆ ст҃лемъ , и҆ препᲂдо́бнымъ . гла́съ , ѕ҃ . поⷣ . всѐ ᲂу҆пᲂва́нїе .= запѣ́въ : ꙗ҆́кѡ ѿ тебѐ ѡ҆чище́нїе є҆́сть . Хрⷭ҇то́выхъ страсте́й ꙳ пᲂстᲂпа́мъ хᲂдѧ̀ ,꙳ всѐ мꙋ́ченическᲂе сᲂсло́вїе ,꙳ крѣ́пкѡ за́йде к̾ пᲂдвигѡ́мъ мно́гимъ ,꙳ и҆ тᲂгѡ̀ пред̾ нечести́выми мꙋчи́тели ,꙳ и҆ без̾зако́нными царѝ ꙳ бг҃а прᲂпᲂвѣ́даша ,꙳ и҆ мно́ги мꙋ́ки претерпѣ́ша ,꙳ по́чести ча́юще нбⷭ҇ныѧ вᲂспрїѧ́ти .꙳ и҆́хже ны́нѣ ви́дѧще ра́дꙋютсѧ ,꙳ и҆ со всѣ́ми ли́ки беспло́тныхъ си́лъ ꙳ гдⷭ҇ви пред̾стᲂѧ́тъ . С=та́до бг҃ᲂи҆збра́ннᲂе ,꙳ хрⷭ҇та̀ пе́рвагѡ па́стырѧ пᲂдо́бницы бы́вше ,꙳ па́стырїе всесщ҃е́ннїи ,꙳ сᲂхрани́сте невре́днѡ до кᲂнца̀ .꙳ бл҃гᲂче́стїѧ бжⷭ҇твенаѧ сᲂкро́вища ,꙳ ѿгна́вше ди́вїѧ во́лки ,꙳ то́же во ѡ҆гра́дꙋ нбⷭ҇нꙋю ꙳ до́брѣ вᲂзведо́сте ,꙳ и҆дѣ́же ᲂу҆́бѡ ны́нѣ вᲂдвᲂрѧ́еми .꙳ пᲂмина́йте любо́вїю ва́съ вᲂсхвалѧ́ющихъ ,꙳ и҆ хрⷭ҇то́ви со дерзнᲂве́нїемъ мᲂли́тесѧ ꙳ ѡ҆ дш҃а́хъ на́шихъ . Прпⷣбнѡ пᲂжи́вше ѻ҆ц҃ы ,꙳ препᲂдо́бнїи всѝ ,꙳ бѣ́сы пᲂбѣди́сте ,꙳ и҆ со́вѣстнаѧ мꙋче́нїѧ страсте́й ꙳ ᲂу҆гаси́вше раждеже́нїѧ .꙳ до́блественѣ претерпѣ́сте бл҃же́ннїи ,꙳ и҆ ра́дꙋетесѧ ны́нѣ съ нбⷭ҇ными си́лами ,꙳ ꙗ҆́кѡ ᲂу҆пᲂдо́бишасѧ житїю̀ ꙳ въ пло́ти тѣ́мъ беспло́тнымъ ,꙳ с̾ ни́ми же мᲂли́те хрⷭ҇та̀ пребл҃га́гѡ бг҃а ,꙳ и҆збавле́нїе ѡ҆брѣстѝ паде́нїемъ ,꙳ ва́съ пᲂчита́ющимъ .

и҆́ны , стⷯры , мч҃нчны . гла́съ , то́йже . =запѣ́въ : ѿ всѣ́хъ без̾зако́нїи є҆гѡ̀ . Мч҃нцы твᲂѝ гдⷭ҇и не ѿверго́шасѧ тебѐ , ни ѿстꙋпи́ша ѿ запᲂвѣде́й твᲂи́хъ , тѣ́хъ мл҃твами пᲂми́лꙋй на́съ . =двⷤа . Страстᲂте́рпцы мч҃нцы нбⷭ҇нїи гра́ждане , на землѝ пᲂстрада́вше , мно́гїѧ мꙋ́ки претерпѣ́ша . мл҃твами гдⷭ҇и и҆ мᲂле́нїемъ и҆́хъ , всѣ́хъ на́съ сᲂхранѝ .

сла́ва , и҆ ны́нѣ , боⷢ҇ . Кто̀ тебѐ неблажи́тъ прест҃а́ѧ дв҃це ; и҆лѝ кто̀ невᲂспѣва́етъ твᲂегѡ̀ пречтⷭ҇агѡ ржⷭ҇тва̀ ; без̾лѣ́тныи бо ѿ ѻ҆ц҃а вᲂсїѧ́въ сн҃ъ є҆динᲂро́дныи , то́йже ѿ тебѐ чи́стыѧ , про́йде несказа́ннѡ вᲂпло́щьсѧ : є҆стество́мъ бг҃ъ сы́и , и҆ є҆стество́мъ бы́въ челᲂвѣ́къ на́съ ра́ди . не во двᲂю̀ лицꙋ̀ раздѣлѧ́емъ . но во двᲂю̀ є҆стествꙋ̀ нес̾мѣ́снѡ пᲂзнава́емь . тᲂгѡ̀ мᲂлѝ чⷭ҇таѧ и҆ всебл҃же́наѧ , пᲂми́лᲂватисѧ дш҃а́мъ на́шимъ .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стихѣ́ры , мч҃нчны . гла́съ , ѕ҃ . Страда́вшїи тебѐ ра́ди хрⷭ҇тѐ , мно́гїѧ мꙋ́ки претерпѣ́ша , и҆ сᲂверше́ныѧ вѣнцы̀ прїѧ́ша на́ нб҃сѣхъ , да мо́лѧтсѧ ѡ҆ дш҃а́хъ на́шихъ . Крⷭ҇тъ тво́й гдⷭ҇и , мч҃нкѡмъ бы́сть ѻ҆рꙋ́жїе непᲂбѣди́мᲂе , ви́дѧхꙋ бо предлежа́щꙋю сме́рть , и҆ предѝ зрѧ́хꙋ грѧдꙋ́щꙋю жи́знь , ᲂу҆пᲂва́нїемъ є҆́же на тѧ̀ ᲂу҆крѣплѧ́хꙋсѧ . тѣ́хъ мл҃твами пᲂми́лꙋй на́съ . пᲂко́инъ . Нача́тᲂкъ ми и҆ сᲂста́въ зижди́тельнᲂе твᲂѐ бы́сть пᲂвелѣ́нїе , вᲂсхᲂтѣ́въ бо ѿ неви́димагѡ , и҆ ви́димагѡ живо́тнᲂе мѧ̀ сᲂста́вити є҆стество̀ . ѿ землѝ ᲂу҆́бѡ тѣ́ло ми сᲂзда́въ , да́лъ же ми є҆сѝ дш҃ꙋ , бжⷭ҇твенымъ твᲂи́мъ и҆ живᲂтвᲂрѧ́щимъ вдᲂхнᲂве́нїемъ . тѣ́мже спа́се рабы̀ свᲂѧ̀ во странѣ̀ живꙋ́щихъ , и҆ в̾ кро́вѣхъ пра́ведныхъ пᲂко́й . сла́ва , и҆ ны́нѣ , боⷢ҇ . Мᲂли́твами ро́ждьшїѧ тѧ хрⷭ҇тѐ , мч҃нкъ твᲂи́хъ , и҆ а҆пⷭ҇лъ и҆ пррⷪ҇къ , и҆ ст҃лей , прпⷣбныхъ , и҆ пра́ведныхъ , и҆ всѣ́хъ ст҃ы́хъ , ᲂу҆со́пшїѧ рабы̀ свᲂѧ̀ пᲂко́й .

таⷤ , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , боⷢ҇ , вᲂскрⷭ҇нъ , настᲂѧ́щаго гла́са . є҆ктенїѧ̀ . =и҆ ѿпꙋ́стъ .

Впѧто́къ , на па́вечерницѣ . кано́нъ , прест҃ѣ́й бцⷣѣ . гла́съ , ѕ҃ . пѣ́снь , а҃ . і҆рмо́съ . Пᲂмо́щникъ и҆ пᲂкрᲂви́тель , бы́сть мнѣ̀ во спасе́нїе . се́й ми є҆́сть бг҃ъ , и҆ прᲂсла́влю и҆̀ , бг҃ъ ѻ҆ц҃а мᲂегѡ̀ , и҆ вᲂзнесꙋ̀ и҆̀ , сла́вно бо прᲂсла́висѧ . запѣ́въ : прест҃а́ѧ гжⷭ҇е бцⷣе спасѝ на́съ . Не ѿри́ни бл҃га́ѧ , не ѡ҆мерзѝ менѐ , и҆ непре́зри , и҆́же пᲂд̾ твᲂѐ милᲂсе́рдїе чи́стаѧ , те́плѣ прите́кшагѡ , но да́ждь ми є҆́же в̾ тебѣ̀ напита́тисѧ блгⷣтїю . Бцⷣе бл҃га́ѧ , скᲂрбѧ́щимъ застꙋ́пнице , примѝ мᲂѐ ѿ дш҃и стена́нїе , и҆зба́ви мѧ ѿ всѣ́хъ без̾мѣ́рныхъ ѕѡ́лъ , и҆́хже лю́тѣ сᲂдѣ́ѧхъ . сла́ва . Тебѣ̀ припа́даю бл҃га́ѧ , ско́рбнымъ пред̾ста́тельнице , и҆зба́ви мѧ ѻ҆гнѧ̀ вѣ́чнꙋющагѡ , и҆ тмы̀ и҆ про́пасти , и҆́же во всѧ́кᲂмъ житїѝ ѕлѣ̀ пᲂжи́вшагѡ . и҆ ны́нѣ . Оу҆вы̀ мнѣ̀ , ка́кѡ тѧ и҆зба́вителю ᲂу҆мᲂлю̀ і҆с҃е мо́й , без̾мѣ́рнѡ к̾ тебѣ̀ сᲂгрѣши́въ , про́чее , хᲂда́таицꙋ тѝ принᲂша́ю , ро́ждьшꙋю тѧ̀ чⷭ҇тꙋю , пᲂми́лꙋй и҆ спаси́ мѧ .

пѣ́снь , г҃ . і҆рмо́съ . Оу҆твердѝ гдⷭ҇и на ка́мени за́пᲂвѣдей ти , пᲂдви́гшеесѧ срⷣце мᲂѐ , ꙗ҆́кѡ є҆ди́нъ ст҃ъ є҆сѝ и҆ пра́веденъ . Припа́даю ти мт҃и сло́ва , прїими́ мѧ щедро́тами си , прᲂсѧ́щемꙋ же прегрѣше́нїемъ прᲂще́нїе пᲂда́ждь , те́плыми мл҃твами твᲂи́ми . Пᲂми́лꙋй мѧ влⷣчце пᲂми́лꙋй , и҆ и҆зба́ви ѿ всѧ́кᲂгѡ лꙋка́вствїѧ , и҆ ѡ҆ѕлᲂбле́нїѧ бѣсо́въ , и҆ вѣ́чнагѡ мꙋче́нїѧ . сла́ва . Оу҆крᲂтѝ влⷣчце сласте́й мᲂи́хъ го́рькᲂе пїѧ́нство , трезве́нїе бжⷭ҇твенᲂе ми пᲂдаю́щи пᲂкаѧ́нїѧ , и҆ ѡ҆браще́нїе спасе́нᲂе . и҆ нн҃ѣ . Всѧ́ческихъ гдⷭ҇а и҆ сᲂдержи́телѧ , бг҃ᲂрᲂди́тельнице не и҆з̾гл҃аннѡ ро́ждьши , ᲂу҆мᲂлѝ сегѡ̀ , є҆́же спастѝ ста́до твᲂѐ .

пѣ́снь , д҃ . і҆рмо́съ . Оу҆слы́шавъ же прᲂро́къ прихо́дъ тво́й гдⷭ҇и , и҆ ᲂу҆бᲂѧ́хсѧ , ꙗ҆́кѡ хо́щеши ѿ дв҃ы рᲂди́тисѧ , и҆ чл҃кѡмъ ꙗ҆ви́тисѧ , и҆ гл҃аше , ᲂу҆слы́шахъ слꙋ́хъ тво́й и҆ ᲂу҆бᲂѧ́хсѧ , сла́ва си́лѣ твᲂе́й . Ꙗ҆́звы дш҃и мᲂеѧ̀ не преста́ѧ чешꙋ̀ любᲂсластьмѝ , и҆ прилᲂжи́шамисѧ к̾ стрꙋпо́мъ бᲂлѣ́зни , пребыва́ю нечꙋ́вственъ , и҆ не и҆сцѣли́мь . пᲂми́лꙋй бг҃ᲂрᲂди́тельнице и҆ и҆сцѣлѝ , и҆ спаси́ мѧ мᲂли́твами си . Тма̀ грѣхо́внаѧ пᲂкры̀ дш҃ꙋ мᲂю̀ бг҃ᲂрᲂди́тельнице , и҆ ꙗ҆́кѡ в̾ нᲂщѝ си́це хᲂждꙋ̀ во́ свѣтѣ , вѣ́дыи хрⷭ҇то́вы за́пᲂвѣди , свѣ́тъ ро́ждьшаѧ бжⷭ҇твеныи , пᲂми́лꙋй мѧ и҆ прᲂсвѣтѝ мᲂлю́сѧ . сла́ва . Сло́во бг҃а жива́гѡ сни́де во ᲂу҆тро́бꙋ твᲂю̀ , мт҃и дв҃о , и҆ прїе́мъ ѿ твᲂи́хъ крᲂве́й пречⷭ҇тыхъ всѐ мᲂѐ смѣше́нїе , прихо́дитъ сꙋгꙋ́бь во є҆ди́нᲂмъ сᲂста́вѣ , є҆го́же мᲂлѝ спастѝ дш҃а на́ша . и҆ нн҃ѣ . Тѣле́снаѧ хᲂтѣ́нїѧ прилѣ́жнѡ преи҆до́хъ , и҆ сла́сти всѧ̀ , и҆ растлѣ́нъ бы́хъ ве́сь , и҆ скве́рненъ и҆ ме́рзᲂкъ . пречⷭ҇таѧ бг҃ᲂрᲂди́тельнице пᲂми́лꙋй , и҆ спаси́ мѧ милᲂсе́рдїемъ си .

пѣ́снь , є҃ . і҆рмо́съ . и҆з̾ =нᲂщѝ ᲂу҆́треннююща чл҃кᲂлю́бче прᲂсвѣтѝ мᲂлю́сѧ , и҆ наста́ви мѧ на пᲂвелѣ́нїѧ твᲂѧ̀ , и҆ наꙋчи́ мѧ сп҃се , твᲂри́ти во́лю твᲂю̀ . Ѻ҆́гнь гее́нскїи себѣ̀ разжего́хъ , дѣ́ѧ непᲂдо́бнаѧ , и҆ гнѣ́въ бж҃їи лю́тѣ привлеко́хъ , но пᲂмᲂзи́ ми чⷭ҇таѧ , и҆ не ѡ҆ста́ви менѐ . Прегрѣше́нїемъ ѡ҆ставле́нїе прᲂсѧ̀ при́снѡ , и҆ дѣ́ѧ непреста́ю пребез̾зако́ннаѧ , и҆ тебѐ пречⷭ҇таѧ ѡ҆гᲂрчева́ю , ѡ҆чище́нїе вѣ́рнымъ ᲂу҆ще́дри мѧ . =сла́ва . Є҆го́же ѿ свᲂи́хъ крᲂве́й рᲂдила̀ є҆сѝ чⷭ҇таѧ , сᲂверше́на чл҃ка и҆ бг҃а и҆́стинна і҆с҃а , ᲂу҆мᲂлѝ тᲂгѡ̀ и҆зба́витисѧ на́мъ ѻ҆гнѧ̀ вѣ́чнагѡ . и҆ ны́нѣ . Две́ре непрᲂхᲂди́маѧ мᲂлю́сѧ , ѿве́рзи ми две́ри пᲂкаѧ́нїѧ и҆́стиннагѡ , и҆ пᲂкажи́ ми стезѝ пᲂкаѧ́нїѧ чи́стаѧ , ꙗ҆́же всѣ́хъ наста́вница .

пѣ́снь , ѕ҃ . і҆рмо́съ . Вᲂзᲂпи́хъ всѣ́мъ срⷣцемъ мᲂи́мъ , к̾ ще́дрᲂмꙋ бг҃ꙋ , и҆ ᲂу҆слы́ша мѧ ѿ а҆́да преи҆спо́днѧгѡ , и҆ вᲂзведѐ ѿ тлѝ живо́тъ мо́й . Во́лны непᲂдо́бныхъ пᲂмышле́нїи пᲂгрꙋжа́ютъ мѧ ны́нѣ , но ты̀ влⷣчце , к̾ ти́хᲂмꙋ приста́нищꙋ наста́ви пᲂкаѧ́нїѧ и҆́стиннагѡ , твᲂи́мъ млрⷭ҇дїемъ . Наде́жꙋ и҆ стѣ́нꙋ неѡ҆бᲂри́мꙋ , и҆ пред̾ста́тельницꙋ тве́рдꙋ стѧжа́вше тѧ ѻ҆трᲂкᲂви́це , и҆збавлѧ́емсѧ прегрѣше́нїи , и҆ страсте́й лю́тыхъ и҆ всѧ́кᲂгѡ вре́да . сла́ва . Припа́даю ти чⷭ҇таѧ дв҃о , и҆ вᲂпїю̀ съ пла́чемъ , бцⷣе и҆зба́ви дш҃ꙋ мᲂю̀ ѻ҆каѧ́ннꙋю бꙋ́дꙋщагѡ сꙋда̀ , и҆ ѻ҆гнѧ̀ вѣ́чнагѡ . и҆ ны́нѣ . Крѣ́пᲂсть ты̀ є҆сѝ пречⷭ҇таѧ , немᲂщны́мъ дш҃е́ю , тѣ́мже твᲂи́ми мᲂльба́ми , ꙗ҆́кѡ бᲂлѧ́ща дш҃е́ю непре́зри , но и҆сцѣли́ мѧ .

Гдⷭ҇и пᲂми́лꙋй , гⷤ . сла́ва , и҆ ны́нѣ . сѣда́ленъ , гла́съ , ѕ҃ . За милᲂсе́рдїе щедро́тъ хрⷭ҇тѐ , сᲂше́лъ є҆сѝ на́ землю , и҆ ѿ дв҃ы вᲂпло́щьсѧ , всѧ̀ ѡ҆ст҃и́лъ є҆сѝ ꙗ҆́же ѿ землѝ , и҆ к̾ нб҃сѝ всѧ̀ призва̀ и҆ ᲂу҆пᲂва́юще на тѧ̀ непᲂгрѣши́мъ никᲂли́же , и҆ и҆збавлѧ́емсѧ тᲂбо́ю настᲂѧ́нїи , ты́ бо є҆сѝ сп҃съ на́шъ , сᲂзда́телю бж҃е на́шъ .

пѣ́снь , з҃ . і҆рмо́съ . Сᲂгрѣши́хᲂмъ и҆ без̾зако́ннᲂвахᲂмъ , и҆ не ѡ҆правди́хᲂмсѧ пред̾ тᲂбо́ю , ни сᲂблюдо́хᲂмъ ни сᲂтвᲂри́хᲂмъ , ꙗ҆́кᲂже запᲂвѣ́да на́мъ , но непреда́ждь на́съ до кᲂнца̀ , ѻ҆те́ческїи бж҃е . Є҆гда̀ дш҃а ѻ҆каѧ́ннаѧ ми , ѿ тѣлесѐ терпѣ́ти и҆́мать разлꙋче́нїе , и҆ небꙋ́детъ и҆збавлѧ́ѧи и҆лѝ ᲂу҆тѣша́ѧи ю҆̀ , тᲂгда̀ влⷣчце пред̾ста́ни и҆ и҆зба́ви мѧ бѣсо́въ ѡ҆ѕлᲂбле́нїѧ . Припа́даю ти , и҆ принᲂшꙋ̀ сле́зъ те́плыѧ ка́пли , вѣ́мъ тѧ чл҃кᲂлю́бнᲂе , вѣ́мъ дᲂлгᲂтерпѣ́нїе , и҆ неѕло́бїе . ты́ мѧ ны́нѣ пᲂми́лꙋй чи́стаѧ , прᲂстѝ и҆ спаси́ мѧ . сла́ва . Пᲂми́лꙋй дв҃о страстнꙋ́ю и҆ ѡ҆каѧ́ннꙋю мᲂю̀ дꙋ́шꙋ . ви́ждь страсте́й смꙋще́нїе . ви́ждь и҆ разгᲂрѣ́нїе пло́ти не пᲂстᲂѧ́ннᲂе , и҆ по́мᲂщь да́ждь ми спасе́нꙋю и҆ и҆збавле́нїе . и҆ ны́нѣ . Ѻ҆ц҃а є҆динᲂсꙋ́щныи , сᲂбез̾нача́льныи сн҃ъ и҆ сло́во , пло́ть ѿ тебѐ прїѧ́тъ ра́внꙋ , ᲂу҆́мнꙋ , и҆ ѡ҆дш҃евле́нꙋ непрело́жнѡ , ꙗ҆́кѡ вѣ́сть са́мъ , и҆ є҆стество̀ на́ше ѡ҆бнᲂвѝ в̾ не́й лꙋ́чше дв҃о чⷭ҇таѧ .

пѣ́снь , и҃ . і҆рмо́съ . Є҆го́же во́и нбⷭ҇нїи сла́вѧтъ , и҆ трепе́щꙋтъ херꙋви́ми и҆ серафи́ми , всѧ́кѡ дыха́нїе и҆ тва́рь , по́йте бл҃гᲂслᲂви́те , и҆ превᲂзнᲂси́те є҆гѡ̀ во́ вѣки . Недᲂꙋмѣ́ю пᲂмышлѧ́ѧ дѣѧ́нїѧ мᲂѧ̀ , и҆ трепе́щꙋ сꙋдїѝ стра́шнагѡ сꙋди́ща , кі́и ѿвѣ́тъ ѻ҆каѧ́нныи принесꙋ̀ тᲂгда̀ ; влⷣчце ми́рꙋ бꙋ́ди ми застꙋ́пница . Не ѿве́рзи ᲂу҆́бѡ менѐ сама̀ влⷣчце ѿ лица̀ твᲂегѡ̀ , є҆гда̀ ко твᲂемꙋ̀ вᲂз̾зрю̀ ѻ҆́бразꙋ , но млⷭ҇тива бꙋ́ди ми , и҆ настᲂѧ́щагѡ премѣни́ мѧ ѡ҆сꙋже́нїѧ . сла́ва . Невѣ́сто бж҃їѧ , мр҃і́е без̾невѣ́стнаѧ . ѿ всѧ́кᲂгѡ лꙋка́вагѡ вре́да и҆зба́ви мѧ вᲂпїю́ ти твᲂегѡ̀ раба̀ , и҆ в̾ бꙋ́дꙋщей прѝ , пред̾ста́ни ми є҆ди́на хрⷭ҇тїа́нѡмъ пред̾ста́тельнице . и҆ ны́нѣ . Да чл҃ки сн҃ъ тво́й влⷣчце ѡ҆бᲂжи́тъ , ꙗ҆ви́сѧ и҆з̾ тебѐ сᲂверше́нъ чл҃къ . сегѡ̀ ᲂу҆́бѡ мᲂлѝ , сᲂверше́но ѡ҆чи́щшасѧ пᲂкажѝ прича́стника мѧ бжⷭ҇твенᲂмꙋ є҆гѡ̀ ца́рствїю .

пѣ́снь , ѳ҃ . і҆рмо́съ . Прїи́мшаѧ ра́дᲂсть а҆́нг҃лѡмъ , и҆ ро́ждьшаѧ сᲂзда́телѧ свᲂегѡ̀ . дв҃о спасѝ тебѐ велича́ющїѧ . Ты̀ є҆ди́на пред̾ста́тельница чл҃кѡмъ є҆сѝ пречⷭ҇таѧ , ты̀ є҆сѝ стѣна̀ хрⷭ҇тїа́нѡмъ чи́стаѧ , тѧ̀ ны́нѣ пред̾лага́ю к̾ хрⷭ҇тꙋ̀ хᲂда́таицꙋ , ѡ҆ мнѣ̀ смире́ннѣмъ , да твᲂи́ми мл҃твами пᲂми́лꙋетъ мѧ ѻ҆каѧ́ннаго . Но́щи дѣ́ла сᲂдѣ́лахъ , и҆ но́щь мꙋче́нїѧ хо́щетъ мѧ ны́нѣ пᲂкры́ти пра́веднѡ сꙋ́етнаго , и҆ всѧ́ко тᲂмле́нїе прїѧ́ти а҆́дᲂво . но ро́ждьшаѧ сꙋдїю̀ , и҆ бг҃а чⷭ҇таѧ дв҃о , и҆зба́ви мѧ всѧ́кᲂго мꙋче́нїѧ . сла́ва . Вре́мѧ живᲂта̀ мᲂегѡ̀ , в̾ ѕлы́хъ и҆з̾жи́хъ , и҆ къ две́ремъ а҆́да прибли́жихсѧ , и҆ ве́сь негᲂто́въ и҆дꙋ̀ та́мѡ . пᲂмᲂзи́ ми бл҃га́ѧ бцⷣе , на тѧ́ бо наде́жꙋ вᲂз̾лᲂжи́хъ . и҆ ны́нѣ . Бл҃гᲂлюби́ваѧ влⷣчце , а҆́нг҃лѡмъ ᲂу҆краше́нїе , мч҃нкѡмъ сла́ва , с̾ си́ми пᲂмᲂли́сѧ ѡ҆брѣстѝ на́мъ млⷭ҇ть , и҆ разрѣше́нїе дᲂлго́въ , и҆ вᲂзмᲂщѝ всѣ́мъ до́брѣ , жи́зни на́шеѧ тече́нїе скᲂнча́ти , бжⷭ҇твенаѧ дѣ́ющимъ . та́же , дᲂсто́йнѡ є҆́сть . и҆ про́чее , ѡ҆бы́чно . и҆ ѿпꙋ́стъ .

Въ сꙋбо́тꙋ , на ᲂу҆́трени . по а҃ , стихᲂло́гїи . сѣда́льны , мч҃нчны . гла́съ , ѕ҃ . Свѣ́тъ пра́веднымъ всегда̀ , ст҃і́и бо ѡ҆ тебѣ̀ прᲂсвѣти́вшесѧ , сїѧ́ютъ прⷭ҇нѡ ꙗ҆́кѡ свѣти́ла , свѣ́щники нечести́выхъ ᲂу҆гаси́вше . и҆́хже мл҃твами сп҃се на́шъ , ты̀ прᲂсвѣтѝ свѣти́льникъ мо́й , и҆ спаси́ мѧ . сти́хъ : ди́венъ бг҃ъ во ст҃ы́хъ свᲂи́хъ бг҃ъ і҆зра́илевъ . Страда́льческїи по́двигъ претерпѣ́вше ст҃і́и , и҆ по́чести пᲂбѣ́ды ѿ тебѐ прїѧ́ша , ᲂу҆праздни́ша ᲂу҆мышле́нїѧ без̾зако́нныхъ , и҆ прїѧ́ша вѣнцы̀ нетлѣ́нныѧ . тѣ́ми бж҃е ᲂу҆мᲂле́нъ бы́въ , да́рꙋй на́мъ ве́лїю млⷭ҇ть . сла́ва , и҆ ны́нѣ , боⷢ҇ . И҆́же бл҃гᲂслᲂве́нꙋю нарекі́и мт҃рь себѣ̀ , прїи́де на́ страсть во́лею свᲂе́ю , вᲂсїѧ́въ на крⷭ҇тѣ̀ , взыска́ти хᲂтѧ̀ а҆да́ма , гл҃ѧ а҆́нг҃лѡмъ , с̾ра́дꙋйтемисѧ , ꙗ҆́кѡ ѡ҆брѣ́тесѧ и҆з̾ги́бшаѧ дра́хма . и҆́же всѧ̀ мꙋ́дрѣ ᲂу҆стро́ивыи бж҃е сла́ва тебѣ̀ .

по в҃ , стихᲂло́гїи . сѣда́льны , мч҃нчны . гла́съ , ѕ҃ . Страда́льческᲂе стᲂѧ́нїе в̾ по́двизѣ , мꙋчи́тельскїѧ ра́ны на мч҃нцѣхъ , и҆ стᲂѧ́хꙋ ли́цы беспло́тныхъ , по́чести держа́ще пᲂбѣ́ды . ᲂу҆диви́ша мꙋ́дрїи мꙋчи́телей и҆ царе́й , и҆ низ̾лᲂжи́ша ѿстꙋ́пника , и҆спᲂвѣ́данїемъ хрⷭ҇то́вѣмъ . ᲂу҆крѣпи́выи и҆́хъ , гдⷭ҇и сла́ва тебѣ̀ . сти́хъ : ди́венъ бг҃ъ во ст҃ы́хъ свᲂи́хъ бг҃ъ і҆и҃левъ . Гдⷭ҇и ст҃ы́хъ твᲂи́хъ па́мѧть дне́сь пᲂказа́сѧ , ꙗ҆́кѡ ра́й и҆́же во є҆де́мѣ , в̾ не́мъ бо ра́дꙋетсѧ всѧ̀ тва́рь , и҆ пᲂда́ждь на́мъ тѣ́хъ мᲂльба́ми , смире́нїе и҆ ве́лїю млⷭ҇ть . сти́хъ : мно́ги ско́рби пра́веднымъ , и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь . Вᲂи́стинꙋ сꙋета̀ всѧ́ческаѧ , житїе́ же сѣ́нь и҆ со́нъ , и҆ в̾сꙋ́е мѧте́тсѧ всѧ́къ земнᲂро́дныи , ꙗ҆́кᲂже речѐ писа́нїе . є҆гда̀ ми́ръ прїѡбрѧ́щемъ , тᲂгда̀ во́ грᲂбъ в̾сели́мсѧ , и҆дѣ́же в̾кꙋ́пѣ ца́рїе и҆ ᲂу҆бо́зїи . тѣ́мже хрⷭ҇тѐ бж҃е , преста́вленыѧ пᲂко́й ꙗ҆́кѡ чл҃кᲂлю́бецъ . сла́ва , и҆ ны́нѣ , боⷢ҇ . Ѿ срⷣца вᲂздыха́нїѧ и҆ ѿ ᲂу҆тро́бы принᲂшꙋ́ ти , твᲂѐ всенепᲂро́чнаѧ мᲂлю̀ бл҃гᲂпремѣни́тельнᲂе застꙋпле́нїе . пᲂми́лꙋй всестрастнꙋ́ю ми дꙋ́шꙋ , ᲂу҆мᲂлѝ мнᲂгᲂмлⷭ҇тиваго бг҃а , и҆зба́вити мѧ сꙋда̀ , и҆ є҆́зера ѻ҆́гненагѡ , є҆ди́на бл҃гᲂслᲂве́наѧ . та́же , ѱало́мъ , н҃ . пᲂми́лꙋй мѧ бж҃е . і҆єре́й , вᲂз̾глаⷭ҇ . млⷭ҇тїю и҆ щедро́тами . Кано́нъ , ст҃ы́мъ мч҃нкѡмъ , и҆ ст҃лемъ , и҆ прпⷣбнымъ , и҆ ᲂу҆со́пшимъ . твᲂре́нїе і҆ѡ́сифᲂво . гла́съ , ѕ҃ . пѣ́снь , а҃ . і҆рмо́съ . Чꙋ́вственныи фараѡ́нъ , пᲂтᲂпле́нъ бы́сть с̾ во́и , і҆зра́иль же прᲂше́дъ пᲂсредѣ̀ мᲂрѧ̀ , вᲂпїѧ́ше гдⷭ҇ви бг҃ꙋ на́шемꙋ пᲂе́мъ , ꙗ҆́кѡ прᲂсла́висѧ . запѣ́въ : ст҃і́и мꙋ́ченицы , мᲂли́те бг҃а ѡ҆ на́съ . мⷱ҇ꙋ . Свѣ́тлымъ ᲂу҆мо́мъ , те́мныѧ ѡ҆свѣти́сте , ѕлᲂчести́выѧ же мꙋчи́тели , мч҃нцы пᲂсрами́вше , пᲂбѣдᲂно́сцы бы́вше ꙗ҆́вѣ , и҆ к̾ невече́рнемꙋ свѣ́тꙋ преи҆до́ша . запѣ́въ : ст҃і́и всѝ мᲂли́те бг҃а ѡ҆ на́съ . Ст҃лїе хрⷭ҇то́ви , и҆ прпⷣбныхъ ли́къ и҆ пррⷪ҇къ и҆ пра́ведныхъ всѣ́хъ , є҆ди́нственᲂе тᲂржество̀ , дᲂбрᲂдѣ́тельными красᲂта́ми блиста́ющесѧ , внидо́ша к̾ нбⷭ҇нымъ селе́нїемъ . же́нъ всѧ́ко мно́жество присво́ившесѧ хрⷭ҇то́ви , и҆́же є҆́ввꙋ лю́тымъ прельще́нїемъ ᲂу҆мᲂри́вшаго пᲂпра́ша трꙋды̀ мꙋ́жескими , ᲂу҆блажа́ютсѧ бжⷭ҇твеными пѣ́сньми . сла́ва . И҆́же ѿ землѝ в̾ нача́лѣ со́здавъ челᲂвѣ́ка хрⷭ҇тѐ , дꙋ́ши свᲂи́хъ ра́бъ пᲂко́й мо́лимсѧ , во ѻ҆би́телѣхъ пра́ведныхъ , и҆ в̾ мѣ́стѣхъ ѡ҆слабле́нїѧ ꙗ҆́кѡ пребл҃гъ . боⷢ҇ . Сщ҃е́ннѣйши чи́стаѧ херꙋви́мъ и҆ серафи́мъ ꙗ҆ви́ласѧ є҆сѝ , ро́ждьши твᲂрца̀ тва́ри . є҆го́же непреста́ннѡ мᲂлѝ , ᲂу҆ще́дрити рабы̀ твᲂѧ̀ тебѐ сла́вѧщихъ .

Дрꙋго́е , пра́вило ᲂу҆со́пшимъ , пᲂе́мъ , нарѧдꙋ̀ , и҆дѣ́же нѣ́сть , минѣ́и . твᲂре́нїе ѳео́фанᲂво . і҆рмо́съ . Ꙗ҆́кѡ по́ сꙋхꙋ . запѣ́въ : ди́венъ бг҃ъ во ст҃ы́хъ свᲂи́хъ бг҃ъ і҆и҃левъ . Въ нбⷭ҇ныхъ черто́зѣхъ , при́снѡ до́блїи мч҃нцы мо́лѧтсѧ тебѣ̀ хрⷭ҇тѐ , ꙗ҆́же ѿ землѝ преста́вилъ є҆сѝ вѣ́рныѧ , вѣ́чныхъ бл҃гъ пᲂлꙋчи́ти спᲂдо́би . запѣ́въ : пᲂко́й гдⷭ҇и дш҃и ᲂу҆со́пшихъ ра́бъ свᲂи́хъ . Оу҆краше́и всѧ́ческаѧ , живо́тнᲂе смѣше́ннᲂе , пᲂсредѣ́ мѧ чл҃ка , смире́нїѧ же в̾кꙋ́пѣ и҆ вели́чества , со́з̾далъ є҆сѝ . тѣ́мже ра́бъ свᲂи́хъ дꙋ́ши сп҃се пᲂко́й . сла́ва . Ра́йска жи́телѧ , и҆ земледѣ́лателѧ в̾ нача́тцѣхъ мѧ ᲂу҆чини́въ , престꙋпи́вша же твᲂю̀ за́пᲂвѣдь и҆зри́нꙋлъ є҆сѝ . тѣ́мже ра́бъ свᲂи́хъ дꙋ́ши сп҃се пᲂко́й . и҆ ны́нѣ . И҆́же ѿ ребра̀ сᲂзда́выи є҆́ввꙋ пе́рвѣе на́шꙋ пра́матерь , и҆з̾ пречⷭ҇тагѡ ти чре́ва в̾ пло́ть ѡ҆блече́сѧ , є҆ю́же сме́рти крѣ́пᲂсть чи́стаѧ раз̾рꙋши́лъ є҆́сть .

пѣ́снь , г҃ . і҆рмо́съ . На тве́рдѣмъ вѣ́ры твᲂеѧ̀ ка́мени , пᲂмышле́нїе ᲂу҆твердѝ дꙋшѝ мᲂеѧ̀ , ᲂу҆тверди́ мѧ гдⷭ҇и , тѧ́ бо и҆́мамъ бл҃же , прибѣ́жище и҆ ᲂу҆тверже́нїе . мⷱ҇ꙋ . Тѣле́снымъ примѣси́вшесѧ бᲂлѣ́знемъ страда́льцы , на не бᲂлѣ́зненᲂе в̾зира́хꙋ вᲂздаѧ́нїе ра́дꙋющесѧ , и҆ ны́нѣ ᲂу҆ставлѧ́ютъ на́ша бᲂлѣ́зни мно́гїѧ бл҃гᲂда́тїю . Нра́вᲂмъ крѣ́пкимъ ѿгᲂнѧ́юще звѣ́ри лꙋка́выѧ , бжⷭ҇твенїи ст҃лїе , и҆зба́виша неврежде́нны ѿ ѕло́бъ тѣ́хъ , хрⷭ҇то́ва бжⷭ҇твенаѧ вᲂспита́нїѧ . Во́лею и҆́гꙋ гдⷭ҇ню пᲂд̾веде́ныи ли́къ прпⷣбныхъ , ᲂу҆мертви́въ мꙋдрᲂва́нїе плᲂтьско́е , и҆ живо́тъ вѣ́чныи вᲂспрїѧ́тъ . сла́ва . И҆зба́ви хрⷭ҇тѐ ѻ҆гнѧ̀ вѣ́чнаго , бл҃гᲂче́стно ѿ житїѧ̀ преста́вльшїѧсѧ , и҆ ѡ҆ставле́нїе да́ждь тѣ́хъ дᲂлго́мъ бл҃же , и҆ црⷭ҇твїѧ наслаже́нїе . боⷢ҇ . Ꙗ҆́же хрⷭ҇та̀ вᲂз̾люби́вшїѧ жены̀ , тебѐ и҆́же тᲂгѡ̀ не и҆зрече́нно ро́ждьшей , всест҃а́ѧ влⷣчце , ра́дᲂстнᲂю мы́слїю пред̾стᲂѧ́ще ликꙋ́ютъ .

и҆́нъ , і҆рмо́съ . Нѣ́сть ст҃а . ди́венъ бг҃ъ . Зако́нно пᲂстрада́вше твᲂѝ мч҃нцы живᲂда́вче , и҆ вѣнцы̀ пᲂбѣ́ды ᲂу҆краси́вшесѧ ѿ тебѐ , прилѣ́жнѡ преста́вльшимсѧ вѣ́рнымъ , вѣ́чнᲂе хᲂда́тайствꙋютъ и҆збавле́нїе . пᲂко́й гдⷭ҇и . Наказа́въ пре́же мно́гими чꙋдесы̀ и҆ зна́меньми , менѐ заблꙋ́ждьшаго , пᲂслѣ́днее же себѐ самᲂгѡ̀ и҆з̾лїѧ̀ млⷭ҇тиве , и҆ в̾зыска́въ ѡ҆брѣ́лъ є҆сѝ сп҃се . сла́ва . Ѿ текꙋ́щагѡ непреста́ннѡ тлѣ́нїѧ , к̾ тебѣ̀ преше́дшїѧ , в̾ се́лѣхъ вѣ́чныхъ всели́тисѧ ра́дᲂстно спᲂдо́би бл҃же , ѡ҆правда́въ вѣ́рᲂю же и҆ бл҃гᲂда́тїю . и҆ ны́нѣ . Нѣ́сть непᲂро́чны , ꙗ҆́кᲂже ты̀ пречⷭ҇таѧ бг҃ᲂмт҃и , є҆ди́на бо ѿ́вѣка и҆́стиннаго зачала̀ є҆сѝ во́чревѣ , сме́рти разᲂри́вшаго си́лꙋ .

пѣ́снь , д҃ . і҆рмо́съ . Оу҆слы́шахъ слꙋ́хъ тво́й и҆ ᲂу҆бᲂѧ́хсѧ , разꙋмѣ́хъ дѣ́ла твᲂѧ̀ , и҆ диви́хсѧ гдⷭ҇и . мⷱ҇ꙋ . Стᲂѧ́ще зрѧ́хꙋ го́рдаго страстᲂте́рпцы , пред̾ нᲂга́ми и҆́хъ раз̾сѣда́ющасѧ и҆ всѧ́ческихъ зижди́телѧ бл҃гᲂда́рствено сла́влѧхꙋ . Гл҃ъ свѣ́тлᲂстїю , ст҃лїе наставлѧ́юще чл҃ки к̾ свѣ́тꙋ разꙋмѣ́нїѧ , ѿ тмы̀ є҆ресе́й спасо́ша . Ꙗ҆́кѡ ᲂу҆́глїе ꙗ҆ви́стесѧ , к̾ бжⷭ҇твенᲂмꙋ те́плᲂмꙋ сᲂвᲂкꙋпле́нїю , и҆ стра́сти пᲂпали́вше веще́ственыѧ , прпⷣбнїи вельмѝ прᲂсла́вистесѧ . сла́ва . Живы́ми ты̀ гдⷭ҇и , и҆ ме́ртвыми ѻ҆блада́ѧ , и҆́хже преста́вилъ є҆сѝ ᲂу҆пᲂко́й , со всѣ́ми ᲂу҆гᲂди́вшими тебѣ̀ влⷣко . боⷢ҇ . Гдⷭ҇ь пречⷭ҇таѧ и҆з̾ тебѐ не и҆з̾рече́ннѡ в̾ пло́ть ѡ҆бᲂлкі́исѧ , же́нъ сᲂсло́вїе мꙋ́жественѣ пᲂд̾виза́вшихсѧ прїѧ́тъ .

и҆́нъ , і҆рмо́съ . Хрⷭ҇то́съ мнѣ̀ си́ла . ди́венъ бг҃ъ . Премꙋ́дрᲂсти бо́льшее ꙗ҆влѧ́ѧ пᲂзна́нїе влⷣко и҆ ѡ҆ дарѣ́хъ мнᲂгᲂсᲂверше́ныхъ бл҃гᲂсти , мꙋ́ченическїѧ ли́ки а҆́нг҃лѡмъ сᲂчета́лъ є҆сѝ . пᲂко́й гдⷭ҇и . Пречⷭ҇тꙋю сла́вꙋ твᲂю̀ пᲂлꙋчи́ти спᲂдо́би , к̾ тебѣ̀ преста́вленымъ , и҆дѣ́же хрⷭ҇тѐ веселѧ́щихсѧ є҆́сть жили́ще , и҆ гла́съ чи́стагѡ ра́дᲂванїѧ . сла́ва . Пᲂю́щихъ прїимѝ бжⷭ҇твенᲂю держа́вᲂю ти , и҆́хже ѿ землѝ прїѧ́тъ , ча́да свѣ́тꙋ тѣ́хъ сᲂдѣ́лавъ , грѣхо́внꙋю мглꙋ̀ ѡ҆чища́ѧ мнᲂгᲂми́лᲂстиве . и҆ ны́нѣ . Прїѧ́телище пречи́стᲂе , цр҃кᲂвь непᲂро́чнꙋю , кᲂвче́гъ всест҃ъ , дв҃ствено мѣ́стѡ сщ҃е́нїѧ , тебѐ дᲂбро́тꙋ і҆а́кѡвлю влⷣка и҆збра́лъ є҆́сть .

пѣ́снь , є҃ . і҆рмо́съ . Вᲂз̾сїѧ́выи свѣ́тъ всемꙋ̀ ми́рꙋ хрⷭ҇тѐ , прᲂсвѣтѝ срⷣце мᲂѐ , ѿ́нᲂщи вᲂпїю́ща и҆ спаси́ мѧ . мⷱ҇ꙋ . И҆стка́ннꙋю ѿ вы́шнїѧ бл҃гᲂда́ти , ѡ҆бо́лкшесѧ во ѻ҆де́жꙋ страда́льцы , врага̀ ѡ҆бнажи́сте . Со ст҃ы́ми прᲂро́ки пᲂчте́мъ первᲂсщ҃е́нники бг҃ᲂмꙋ́дрыѧ , и҆ прпⷣбныѧ бг҃ᲂви ᲂу҆гᲂди́вшїѧ . Во ѱалмѣ́хъ и҆ пѣ́снехъ , вᲂсхва́лимъ же́нъ сᲂсло́вїе , ꙗ҆́кѡ бг҃ᲂви до́брѣ ᲂу҆гᲂди́вшїѧ . сла́ва . Вселе́нїихъ пра́ведныхъ твᲂи́хъ гдⷭ҇и твᲂѧ̀ рабы̀ ᲂу҆чинѝ , презира́ѧ ꙗ҆́же в̾ житїѝ тѣ́хъ сᲂгрѣше́нїѧ . боⷢ҇ . И҆збавлѧ́ющи на́съ , всѧ́кᲂгѡ вра́жїѧ вре́да ꙗ҆ви́сѧ влⷣчце , мᲂлѧ́щи хрⷭ҇та̀ є҆ди́наго бл҃гᲂꙋтро́бнаго .

и҆́нъ , і҆рмо́съ . Бж҃їимъ свѣ́тᲂмъ тѝ . ди́венъ бг҃ъ . Ꙗ҆́кѡ всепло́дїе сщ҃е́ннᲂмч҃нцы , и҆ ꙗ҆́кѡ ѿ нача́тᲂкъ чл҃ческагѡ є҆стества̀ , прᲂсла́вленᲂмꙋ прине́сшесѧ бг҃ᲂви , на́мъ спасе́нїе прⷭ҇нѡ хᲂда́тайствꙋютъ . пᲂко́й гдⷭ҇и . Нбⷭ҇нагѡ житїѧ̀ , и҆ раздаѧ́нїю дарᲂва́нїи спᲂдо́би гдⷭ҇и , пре́жде ᲂу҆со́пшїѧ вѣ́рныѧ рабы̀ твᲂѧ̀ . пᲂдаѧ̀ прегрѣше́нїемъ и҆збавле́нїе . сла́ва . И҆́же є҆ди́нъ є҆стество́мъ живᲂтво́рецъ бла́гᲂсти вᲂи́стинꙋ не и҆з̾слѣ́димаѧ пꙋчи́на , с̾кᲂнча́вшїѧсѧ црⷭ҇твїю твᲂемꙋ̀ спᲂдо́би ще́дре є҆ди́не без̾сме́ртне . и҆ нн҃ѣ . Крѣ́пᲂсть и҆ пѣ́нїе , и҆з̾ тебѐ влⷣчце ми́рꙋ рᲂжде́исѧ , и҆ спасе́нїе бы́выи пᲂги́бшимъ , и҆́же ѿ а҆́дᲂвыхъ вра́тъ и҆збавлѧ́ѧ , вѣ́рᲂю тебѐ блажа́щихъ .

пѣ́снь , ѕ҃ . і҆рмо́съ . Ки́тᲂмъ пᲂже́ртъ грѣхо́внымъ , вᲂпїю́ ти хрⷭ҇тѐ со прᲂро́кᲂмъ , и҆з̾ и҆стлѣ́нїѧ мѧ свᲂбᲂдѝ . мⷱ҇ꙋ . Крᲂве́й бжⷭ҇твеныхъ тече́нїемъ , мы́сленыѧ врагѝ пᲂгрꙋзи́сте , вѣ́рныхъ же срⷣца̀ стрⷭ҇тᲂте́рпцы напᲂи́сте . Распе́нше себѐ ми́рꙋ и҆ страсте́мъ , прпⷣбнїи , и҆ премꙋ́дрїи ст҃лїе , бжⷭ҇твенѣй сла́вѣ спᲂдо́бистесѧ . Пррⷪ҇кѡмъ ли́къ , и҆ честны́хъ же́нъ сᲂбо́ръ , до́брѣ пᲂдвиза́вшихсѧ по́дᲂлгꙋ ᲂу҆блажа́емъ . сла́ва . Пᲂко́й бж҃е пре́жде ᲂу҆со́пшихъ дꙋ́ши , со и҆збра́нными твᲂи́ми , презира́ѧ тѣ́хъ прегрѣше́нїѧ . боⷢ҇ . Пло́тїю рᲂди́вшаѧ хрⷭ҇та̀ , пло́ти мᲂеѧ̀ стра́сти ᲂу҆мертвѝ , и҆ ѡ҆живѝ дв҃о дш҃ꙋ мᲂю̀ хᲂда́тайствᲂмъ си .

и҆́нъ , і҆рмо́съ . Жите́йскагѡ мо́рѧ . ди́венъ бг҃ъ . На крⷭ҇тѣ̀ пригвᲂжда́емь , мч҃нческїѧ ли́ки к̾ себѣ̀ со́бралъ є҆сѝ , пᲂдо́бѧщихсѧ стрⷭ҇ти твᲂе́й бл҃же , тѣ́мжетисѧ мо́лимъ , къ тебѣ̀ преста́вленыѧ ᲂу҆пᲂко́й . пᲂко́й гдⷭ҇и . Не и҆зрече́ннᲂю сла́вᲂю свᲂе́ю , є҆гда̀ прїи́деши стра́шно сꙋди́ти ми́рꙋ всемꙋ̀ , на ѻ҆́блацѣхъ бл҃гᲂвᲂлѝ и҆зба́вителю свѣ́тло срѣстѝ тебѐ , ꙗ҆́же ѿ землѝ прїѧ́тъ вѣ́рныѧ рабы̀ свᲂѧ̀ . сла́ва . И҆сто́чникъ жи́зни сы́и влⷣко , в̾ мꙋ́жествѣ бжⷭ҇твенѣмъ , ѡ҆кᲂва́нныѧ и҆звᲂдѧ̀ рабы̀ свᲂѧ̀ , и҆́же к̾ тебѣ̀ вѣ́рнѡ ѿше́дшїѧ в̾ пи́щи ра́йстѣй в̾селѝ . и҆ ны́нѣ . Въ зе́млю вᲂз̾врати́хᲂмсѧ , престꙋпи́вше бж҃їю за́пᲂвѣдь , тебе́ же ра́ди дв҃о на нб҃са̀ ѿ землѝ вᲂз̾несо́хᲂмсѧ , тлю̀ сме́ртнꙋю ѿтрѧ́сше .

кᲂнда́къ . гла́съ , и҃ . Со ст҃ы́ми пᲂко́й хрⷭ҇тѐ дш҃а ра́бъ свᲂи́хъ , и҆дѣ́же нѣ́сть бᲂлѣ́зни , ни печа́ли , ни вᲂз̾дыха́нїѧ , но жи́знь вѣ́чнаѧ . и҆́кᲂсъ . Са́мъ є҆ди́нъ є҆сѝ без̾сме́ртенъ , сᲂтвᲂри́выи и҆ сᲂзда́выи чл҃ка . тлѣ́ннїи и҆́же ѿ землѝ со́здани бы́хᲂмъ , и҆ въ зе́млю тꙋ́же по́йдемъ , ꙗ҆́кᲂже пᲂвелѣ́лъ є҆сѝ , сᲂзда́выи мѧ и҆ ре́клъ ми , ꙗ҆́кѡ землѧ̀ є҆сѝ и҆ в̾ зе́млю па́ки по́йдеши , и҆дѣ́же всѝ земні́и ѿхо́димъ , над̾гро́бнᲂе рыда́нїе твᲂрѧ́ще , и҆ пᲂю́ще пѣ́снь а҆́нг҃льскꙋю , а҆ллилꙋ́їѧ .

пѣ́снь , з҃ . і҆рмо́съ . Ст҃ы́хъ ти ѻ҆́трᲂкъ хвалы̀ пᲂслꙋ́шавъ , и҆ пе́щь ѻ҆́гненнꙋю прᲂхла́ждь , блгⷭ҇ве́нъ є҆сѝ гдⷭ҇и . мⷱ҇ꙋ . Хрⷭ҇то́вы страстᲂте́рпцы , ᲂу҆гаси́вшїѧ пла́мень лю́тагѡ без̾бо́жїѧ тꙋ́чами крᲂве́й , пѣ́сньми пᲂчте́мъ . Бл҃гᲂсла́внїи і҆єра́рси , зи́мꙋ є҆ресе́й разрꙋши́вше , и҆ к̾ ве́снѣ бжⷭ҇твенѣй ра́дꙋющесѧ преи҆до́ша . Терпѣ́нїемъ бᲂга́тꙋю дх҃а бл҃гᲂда́ть наслѣ́дᲂвасте по́стницы , и҆ мно́жество бѣсѡ́въ пᲂгꙋби́сте . сла́ва . Раѧ̀ пи́щи твᲂеѧ̀ наслѣ́дᲂвати спᲂдо́би ще́дре , вѣ́рᲂю преста́вленыѧ ѿ житїѧ̀ мнᲂгᲂмлⷭ҇тиве . боⷢ҇ . И҆́же тебѐ дв҃ꙋ пᲂказа́выи чи́стаѧ и҆ по ржⷭ҇твѣ̀ , ст҃ы́хъ же́нъ ли́ки , тебѣ̀ пᲂслѣ́дᲂвавшїѧ спа́слъ є҆́сть .

и҆́нъ , і҆рмо́съ . Хладᲂда́тельнꙋ ᲂу҆́бѡ . ди́венъ бг҃ъ . И҆зба́вльшїисѧ твᲂе́ю кро́вїю мч҃нцы , пе́рвагѡ престꙋпле́нїѧ . ѡ҆крᲂпи́вшежесѧ свᲂе́ю кро́вїю , прᲂѡ҆бразꙋ́юще ꙗ҆́вѣ твᲂѐ закᲂле́нїе , бл҃гᲂслᲂве́нъ є҆сѝ бж҃е ѻ҆ц҃ъ на́шихъ . пᲂко́й гдⷭ҇и . Свирѣ́пꙋющꙋю сме́рть ᲂу҆мертви́лъ є҆сѝ , сло́ве живᲂнача́льнѣйшїи , в̾ вѣ́рѣ же твᲂе́й ᲂу҆со́пшїѧ прїимѝ , тебѐ пᲂю́щїѧ хрⷭ҇тѐ , и҆ гл҃ющїѧ , бл҃гᲂслᲂве́нъ бг҃ъ ѻ҆ц҃ъ на́шихъ . сла́ва . Вᲂѡ҆дꙋши́въ мѧ чл҃ка , в̾дᲂхнᲂве́нїемъ бжⷭ҇твенымъ бг҃ᲂнача́льнѣйшїи влⷣко , преста́вленыѧ црⷭ҇твїѧ твᲂегѡ̀ спᲂдо́би , пѣ́ти тебѐ сп҃се , бл҃гᲂслᲂве́нъ бг҃ъ ѻ҆ц҃ъ на́шихъ . и҆ ны́нѣ . Превы́шши всѣ́хъ тва́рей , пренепᲂро́чнаѧ бы́сть , заче́нши бг҃а , сᲂкрꙋши́вшаго сме́ртныѧ две́ри , и҆ вереѝ сте́ршаго , тѣ́мже тѧ̀ чи́стаѧ , пѣснᲂсло́вимъ вѣ́рнїи . ꙗ҆́кѡ бг҃ꙋ мт҃рь .

пѣ́снь , и҃ . і҆рмо́съ . Ст҃і́и ѻ҆́трᲂцы в̾ вавило́нѣ , херꙋви́мꙋ ᲂу҆пᲂдо́бльшесѧ , трист҃ꙋ́ю вᲂз̾сыла́хꙋ пѣ́снь , бл҃гᲂслᲂви́те по́йте , и҆ превᲂзнᲂси́те є҆гѡ̀ во́ вѣки . мⷱ҇ꙋ . Дᲂбле́ственѣ мꙋче́нїи тревᲂлне́нїемъ ᲂу҆ранѧ́еми , бжⷭ҇твенїи мч҃нцы , бл҃гᲂда́тїю прᲂше́дше в̾ тишинꙋ̀ глꙋбо́кꙋю , вы́шнѧгѡ црⷭ҇твїѧ дᲂстиго́ша . Прпⷣбнїи , всемꙋ́дрїи ст҃лїе , ꙗ҆ви́вшесѧ ꙗ҆́кѡ сл҃нце прᲂсвѣща́ютъ вселе́ннꙋю , ᲂу҆че́нїи лꙋча́ми , и҆ и҆сцѣле́нїи свѣтлᲂстьмѝ . Сла́внїи прᲂро́цы , и҆ первᲂсщ҃е́нницы , прпⷣбнїи всѝ и҆ пра́веднїи , мч҃нкъ мно́жество , и҆ же́нъ , ста́до ва́ше всѐ сᲂхрани́те , ѿ бѣсѡ́въ непрекло́нно . сла́ва . Вᲂспᲂе́мъ пра́ведныѧ и҆́же ѿ́вѣка , и҆ бг҃ᲂглаго́ливыѧ прᲂро́ки , и҆ вᲂзᲂпїе́мъ со ᲂу҆миле́нїемъ , тѣ́хъ сло́ве мл҃твами , вѣ́рᲂю ᲂу҆со́пшихъ пᲂко́й . боⷢ҇ . Всю́ тѧ бли́жнюю дᲂбро́тꙋ бг҃а дв҃о , ли́къ же́нскїи вᲂзлюбѝ , и҆ во слѣ́дъ тебѐ приведо́шасѧ влⷣцѣ всѣ́хъ , сᲂгла́снѡ бл҃жа́ще тѧ пречⷭ҇таѧ .

и҆́нъ , і҆рмоⷭ҇ . и҆з̾ =пла́мени ст҃ы́мъ . =ди́венъ бг҃ъ . Крѣ́пкѡ по́двиги пᲂказꙋ́юще , пᲂбѣ́ды вѣнцы̀ прїѧ́сте мч҃нцы страстᲂте́рпцы , хрⷭ҇то́ви зᲂвꙋ́ще , тѧ̀ превᲂзно́симъ гдⷭ҇а во́ вѣки . пᲂко́й гдⷭ҇и . Сщ҃е́ннѡ вѣ́рныѧ жите́йскаѧ ѡ҆ста́вльшїѧ , и҆ к̾ тебѣ̀ влⷣцѣ ѿлꙋчи́вшїѧсѧ , прїимѝ кро́ткѡ и҆ пᲂко́й , ꙗ҆́кѡ млрⷭ҇дъ , тѧ̀ превᲂз̾нᲂсѧ́щихъ гдⷭ҇а во́ вѣки . блгⷭ҇ви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Ны́нѣ въ землѝ кро́ткихъ всѣ́хъ вᲂдвᲂри́тисѧ пре́жде ᲂу҆со́пшїѧ сп҃се бл҃гᲂвᲂлѝ , вѣ́рᲂю твᲂе́ю ѡ҆правда́въ и҆ бл҃гᲂда́тїю , тѧ̀ превᲂзнᲂсѧ́щихъ гдⷭ҇а во́ вѣки . и҆ ны́нѣ . Бл҃жи́мъ тѧ всѝ пребл҃же́наѧ , и҆́же сло́во вᲂи́стинꙋ сꙋ́ще бл҃же́нᲂе пᲂрᲂдила̀ є҆сѝ , пло́ть бы́вшее на́съ ра́ди . є҆го́же превᲂзно́симъ гдⷭ҇а во́ вѣки .

та́же , пѣ́снь бцⷣѣ . вели́читъ дш҃а мᲂѧ̀ гдⷭ҇а .= и҆ =пᲂкло́ны .

пѣ́снь , ѳ҃ . і҆рмо́съ . Прїи́мшаѧ ра́дᲂсть а҆́нг҃лѡмъ , и҆ ро́ждьшаѧ сᲂзда́телѧ свᲂегѡ̀ , дв҃о спасѝ тебѐ велича́ющїѧ . мⷱ҇ꙋ . Ѻ҆вча́та чⷭ҇таѧ приведо́стесѧ ко влⷣцѣ страстᲂте́рпцы мч҃нцы . тᲂгѡ̀ мᲂли́те спастѝ дш҃а на́ша . Ꙗ҆́кѡ па́стырїе на зла́цѣ бл҃гᲂче́стїѧ ст҃лїе , вѣ́рныѧ ᲂу҆пасо́сте , и҆ ны́нѣ во ѡ҆гра́дꙋ бжⷭ҇твенꙋю всели́стесѧ . Со ст҃ы́ми ст҃ли , и҆ пррⷪ҇ки , и҆ со жена́ми крѣ́пкѡ пᲂстрада́вшими , и҆ прпⷣбныхъ ли́ки ᲂу҆бл҃жи́мъ . сла́ва . Є҆мꙋ́же причаща́ютсѧ весе́лїю прⷭ҇нᲂсꙋ́щнᲂмꙋ ст҃ы́хъ сᲂбо́ри , спᲂдо́би преста́вленыхъ ᲂу҆лꙋчи́ти мнᲂгᲂмлⷭ҇тиве . боⷢ҇ . Свѣ́тъ ро́ждьшаѧ дв҃о , прᲂсвѣтѝ дш҃ꙋ мᲂю̀ , тмꙋ̀ ѿгᲂнѧ́ющи грѣха̀ , и҆ лѣ́нᲂсти мᲂеѧ̀ .

и҆́нъ , і҆рмо́съ . Бг҃а чл҃кѡмъ . ди́венъ бг҃ъ . Наде́жа мч҃нкѡмъ ли́ки ᲂу҆крѣпѝ , и҆ к̾ твᲂе́й любвѝ распале́нїемъ в̾перѝ , бꙋ́дꙋщїи си́мъ пред̾вᲂѡ҆брази́вши непᲂкᲂлеби́мыи вᲂи́стинꙋ пᲂко́й , є҆мꙋ́же преста́вленыѧ бл҃же вѣ́рныѧ спᲂдо́би . пᲂко́й гдⷭ҇и . Свѣ́тлᲂе твᲂѐ хрⷭ҇тѐ и҆ бжⷭ҇твенᲂе ᲂу҆лꙋчи́ти сїѧ́нїе , вѣ́рᲂю преста́вленымъ бл҃гᲂвᲂлѝ , ꙗ҆́же в̾ ло́нѣхъ а҆враа́мᲂвѣхъ пᲂко́й , ꙗ҆́кѡ є҆ди́нъ млⷭ҇тивъ тѣ́мъ да́рꙋѧ , и҆ вѣ́чнагѡ спᲂдᲂблѧ́ѧ бл҃же́нства . сла́ва . И҆́же сы́и є҆стество́мъ бл҃гъ и҆ млрⷭ҇дъ , и҆ хᲂти́тель ми́лᲂстемъ , и҆ бл҃гᲂꙋтро́бїѧ пꙋчи́на , и҆́хже ѿ мѣ́ста сегѡ̀ ѡ҆ѕлᲂбле́нїѧ , и҆ сѣ́ни сме́ртныѧ преста́вилъ є҆сѝ , и҆дѣ́же сїѧ́етъ тво́й свѣ́тъ сп҃се тѣ́хъ ᲂу҆чинѝ . и҆ ны́нѣ . Сѣ́нь ст҃ꙋ́ю чⷭ҇таѧ вѣ́мы тѧ , и҆ кᲂвче́гъ , и҆ скрижа́ль зако́на и҆ бл҃гᲂда́ти . тебе́ бо ра́ди ѡ҆ставле́нїе дарᲂва́сѧ , ѡ҆правда́нымъ кро́вїю , вᲂплᲂще́ннагѡ и҆з̾ твᲂегѡ̀ чре́ва всенепᲂро́чнаѧ .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . =и҆ =ѱалмы̀ ѻ҆бы́чны .

на хвали́тѣхъ , стⷯры , мч҃нчны . гла́съ , ѕ҃ . Гдⷭ҇и в̾ па́мѧть ст҃ы́хъ твᲂи́хъ , всѧ̀ тва́рь пра́зднꙋетъ , нб҃са̀ ра́дꙋютсѧ со а҆́нг҃лы , и҆ землѧ̀ весели́тсѧ съ чл҃ки . тѣ́хъ мл҃твами пᲂми́лꙋй на́съ . Гдⷭ҇и , а҆́ще небы́хᲂмъ ст҃ы́ѧ твᲂѧ̀ и҆мѣ́ли мл҃твеники , и҆ бл҃гᲂсты́ню твᲂю̀ ми́лꙋющꙋю на́съ ка́кѡ смѣ́ли бы́хᲂмъ сп҃се пѣ́ти тѧ , є҆го́же славᲂсло́вѧтъ без̾преста́ни а҆́нг҃ли . срⷣцевѣ́дче пᲂщадѝ дш҃а на́ша . Па́мѧть мч҃нкъ , ра́дᲂсть бᲂѧ́щимсѧ гдⷭ҇а , пᲂстрада́вше бо хрⷭ҇та̀ ра́ди , вѣнцы̀ ѿ негѡ̀ прїѧ́ша . и҆ ны́нѣ со дерзнᲂве́нїемъ мо́лѧтсѧ ѡ҆ дш҃а́хъ на́шихъ . И҆збра́нныѧ ᲂу҆дивѝ ст҃ы́ѧ бг҃ъ на́шъ . ра́дꙋйтесѧ и҆ весели́тесѧ всѝ рабѝ є҆гѡ̀ . ва́мъ бо ᲂу҆гᲂто́вилъ є҆́сть вѣне́цъ црⷭ҇твїѧ свᲂегѡ̀ . но мо́лимъ вы̀ , и҆ на́съ незабꙋ́дите . сла́ва , пᲂко́инъ . Бᲂлѣ́знь а҆да́мꙋ бы́сть , дре́ва в̾кꙋше́нїе дре́вле во є҆де́мѣ , є҆гда̀ ѕмїѧ̀ ꙗ҆́дъ ѿры́гнꙋ , тᲂго́ бо ра́ди вни́де сме́рть всеро́дна снѣда́ющи чл҃ка . но прише́дъ влⷣка низ̾лᲂжѝ ѕмі́ѧ , и҆ вᲂскрⷭ҇нїе на́мъ дарᲂва̀ . к̾ немꙋ́же ᲂу҆́бѡ вᲂзᲂпїе́мъ пᲂщадѝ сп҃се , и҆ и҆́хже прїѧ́тъ со ст҃ы́ми ᲂу҆пᲂко́й , ꙗ҆́кѡ чл҃кᲂлю́бецъ . и҆ ны́нѣ , боⷢ҇ . Бг҃а и҆з̾ тебѐ вᲂплᲂти́вшасѧ разꙋмѣ́хᲂмъ бцⷣе дв҃о . тᲂгѡ̀ мᲂлѝ ѡ҆ спасе́нїи дш҃ъ на́шихъ .

на стихо́внѣ , стихѣ́ры , пᲂко́йны . гла́съ , ѕ҃ . поⷣ . всѐ ᲂу҆пᲂва́нїе . И҆мѣ́ѧи непᲂсти́жимᲂе ,꙳ є҆́же ѡ҆ на́съ бл҃гᲂꙋтро́бїе ,꙳ и҆ и҆сто́чникъ не и҆стᲂщи́мыи ꙳ бжⷭ҇твеныѧ бл҃гᲂсти ,꙳ мнᲂгᲂмлⷭ҇тиве , и҆́же к̾ тебѣ̀ влⷣко преше́дшїѧ ,꙳ на землѝ живы́хъ вселѝ ,꙳ все́ла вᲂз̾лю́бленаѧ и҆ жела́емаѧ ,꙳ ѡ҆держа́нїе да́рꙋѧ ,꙳ всегда̀ пребыва́ющее .꙳ ты́ бо за всѣ́хъ прᲂлїѧ́лъ є҆сѝ кро́вь свᲂю̀ сп҃се ,꙳ и҆ живᲂно́снᲂю цѣно́ю ꙳ ми́ра и҆скꙋпи́лъ є҆сѝ . сти́хъ : бл҃же́ни ꙗ҆́же и҆збра̀ и҆ прїѧ́тъ ѧ҆̀ гдⷭ҇ь ,꙳ па́мѧть и҆́хъ ѿ́ рᲂда в̾ ро́дъ . Оу҆мерщве́нїе претерпѣ́лъ ꙳ є҆сѝ живᲂтвᲂрѧ́щею во́лею ,꙳ и҆ живо́тъ и҆стᲂчѝ ,꙳ и҆ пи́щꙋ приснᲂсꙋ́щнꙋю вѣ́рнымъ да́лъ є҆сѝ ,꙳ в̾ не́йже ᲂу҆чинѝ ᲂу҆со́пшїѧ ꙳ ѡ҆ ᲂу҆пᲂва́нїи вᲂскрⷭ҇нїѧ .꙳ тѣ́хъ сᲂгрѣше́нїѧ ꙳ всѧ̀ прᲂща́ѧ бл҃гᲂда́тїю ,꙳ ꙗ҆́кѡ є҆ди́нъ без̾грѣ́шенъ ,꙳ и҆ є҆ди́нъ бл҃гъ и҆ чл҃кᲂлю́бецъ ,꙳ да всѣ́ми пᲂе́тсѧ твᲂѐ и҆́мѧ хрⷭ҇тѐ ,꙳ и҆ спасе́нᲂе сла́вимъ чл҃кᲂлю́бїе твᲂѐ . сти́хъ : дш҃а и҆́хъ ,꙳ во бл҃ги́хъ вᲂдвᲂрѧ́тсѧ . Живы́ми гдⷭ҇ьствꙋюще ,꙳ бг҃ᲂнача́льнᲂю вла́стїю ,꙳ и҆ ме́ртвыми влады́чествꙋюща ,꙳ тебѐ хрⷭ҇тѐ зна́юще мо́лимсѧ ,꙳ вѣ́рныѧ рабы̀ свᲂѧ̀ ,꙳ к̾ тебѣ̀ є҆ди́нᲂмꙋ бл҃гᲂда́телю ѿше́дшїѧ .꙳ тѣ́хъ пᲂко́й со и҆з̾бра́нными ти чл҃кᲂлю́бче ,꙳ на мѣ́стѣ ᲂу҆тѣше́нїѧ ,꙳ во ст҃ы́хъ свѣ́тлᲂстехъ ,꙳ вᲂли́тель бо ми́лᲂсти є҆сѝ ,꙳ и҆ спаса́еши ꙗ҆́кѡ бг҃ъ ,꙳ и҆́хже по ѻ҆́бразꙋ свᲂемꙋ̀ сᲂзда̀ , є҆ди́не мнᲂгᲂми́лᲂстиве . сла́ва , и҆ ны́нѣ , боⷢ҇ . Ꙗ҆ви́сѧ пребыва́лище бг҃ᲂлѣ́пнѡ пречⷭ҇таѧ , бг҃а бо вмѣсти́ла є҆сѝ , и҆ хрⷭ҇та̀ рᲂдила̀ є҆сѝ , не и҆скꙋсᲂбра́чнаѧ мт҃и дв҃о , во двᲂю̀ сꙋществꙋ̀ , во є҆ди́нᲂмъ же сᲂста́вѣ . тᲂгѡ̀ ᲂу҆мᲂлѝ чи́стаѧ , є҆динᲂро́днаго пе́рвенца , и҆́же тѧ̀ дв҃ꙋ непᲂро́чнꙋю , и҆ по ржⷭ҇твѣ̀ сᲂхра́ньшаго , дꙋ́ши пᲂко́ити и҆́же вѣ́рᲂю ᲂу҆со́пшихъ во́ свѣтѣ , и҆ в̾ нетлѣ́ннѣмъ бл҃же́нствѣ .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= сла́ва , и҆ нн҃ѣ , боⷢ҇ , вᲂскрⷭ҇нъ , настᲂѧ́щаго гла́са . є҆ктенїѧ̀ . =та́же , ча́съ , а҃ . ѱалмы̀ , ѡ҆бы́чны . и҆ про́чее , и҆ кᲂне́чныи ѿпꙋ́стъ .

Въ сꙋбо́тꙋ , бл҃же́нны . гла́съ , ѕ҃ .

Пᲂмѧни́ мѧ бж҃е сп҃се мо́й , є҆гда̀ прїи́деши во црⷭ҇твїи сѝ , и҆ спаси́ мѧ , ꙗ҆́кѡ є҆ди́нъ чл҃кᲂлю́бецъ .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Ѻ҆гнѧ̀ и҆ меча̀ , и҆ ѕвѣре́й ди́вїихъ ᲂу҆стремле́нїѧ свѣрѣ́пагѡ , стрⷭ҇тᲂте́рпцы сла́внїи не ᲂу҆бᲂѧ́вшесѧ , приснᲂсꙋ́щнагѡ живᲂта̀ спᲂдо́бистесѧ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . И҆́же пррⷪ҇ки и҆ ᲂу҆чи́тели , и҆ прпⷣбныѧ и҆ првⷣныѧ , прᲂсла́вивъ чл҃кᲂлю́бче , тѣ́хъ мл҃твами спасѝ дш҃а на́ша .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Со всѣ́ми ст҃ы́ми и҆ пра́ведными , ᲂу҆чинѝ сло́ве , и҆́хже в̾ вѣ́рѣ преста́вилъ є҆сѝ ѿ вре́менныхъ , ꙗ҆́кѡ да сла́вимъ тѧ .

сла́ва . Ѻ҆ц҃а , и҆ сн҃а славᲂсло́вимъ , и҆ ст҃а́гѡ дх҃а , глаго́люще , трⷪ҇це ст҃а́ѧ спасѝ дш҃а на́ша .

и҆ ны́нѣ . Бл҃же́нна в̾ рᲂдѣ́хъ всѣ́хъ ꙗ҆ви́ласѧ є҆сѝ , бг҃а бо вᲂи́стинꙋ бл҃же́ннагѡ несказа́ннѡ рᲂдила̀ є҆сѝ пречⷭ҇таѧ .

кᲂне́цъ шесто́мꙋ гла́сꙋ .

<< Previous

Contents

Next >>