Глас 6 Неделя

Въ сꙋбо́тꙋ ве́черъ . на ма́лѣй вече́рни . нача́ло ѡ҆бы́чно , ꙗ҆́кᲂже ᲂу҆ка́зано в̾ пѧ́тᲂмъ гла́сѣ . на гдⷭ҇и вᲂзва́хъ , стⷯры вᲂскрⷭ҇ны . гла́съ , ѕ҃ . =запѣ́въ : да ᲂу҆пᲂва́етъ і҆и҃ль на́ гдⷭ҇а . Пᲂбѣ́дꙋ и҆мѣ́ѧ хрⷭ҇тѐ ю҆́же на а҆́да , и҆ на́ крⷭ҇тъ в̾зы́де , да сѣдѧ́щїѧ во тмѣ̀ и҆ сѣ́ни сме́ртнѣй , вᲂскр҃си́ши с̾сᲂбо́ю , свᲂбо́дь сы́и в̾ ме́ртвыхъ . и҆стᲂча́ѧ живо́тъ ѿ свᲂегѡ̀ свѣ́та , всеси́льне сп҃се пᲂми́лꙋй на́съ . =два́жды . Дне́сь хрⷭ҇то́съ сме́рть пᲂпра́въ , ꙗ҆́кᲂже речѐ и҆ вᲂскр҃се , и҆ ра́дᲂванїе всемꙋ̀ ми́рꙋ дарᲂва̀ . да всѝ в̾зыва́юще пѣ́сньми та́кѡ рце́мъ , и҆сто́чниче жи́зни , неприкᲂснᲂве́нныи свѣ́те , всеси́льне сп҃се пᲂми́лꙋй на́съ .= Тебѐ гдⷭ҇и сꙋ́щагѡ по все́й тва́ри , грѣ́шнїи ка́мѡ бѣжи́мъ ; на́ нб҃си са́мъ живе́ши . во а҆́дѣ же пᲂпра́въ сме́рть . во глꙋбины̀ мᲂрскі́ѧ , тꙋ̀ рꙋка̀ твᲂѧ̀ влⷣко . к̾ тебѣ̀ прибѣга́емъ , и҆ тебѣ̀ припа́дающе мо́лимсѧ , вᲂскр҃сы́и и҆з̾ ме́ртвыхъ пᲂми́лꙋй на́съ . =сла́ва , и҆ ны́нѣ , боⷢ҇ . Бцⷣе ты̀ є҆сѝ лᲂза̀ и҆́стиннаѧ , вᲂзрасти́вшаѧ на́мъ пло́дъ живо́тныи , тебѣ́сѧ мо́лимъ , мᲂли́сѧ влⷣчце , со ст҃ы́ми а҆пⷭ҇лы , пᲂми́лᲂватисѧ дш҃а́мъ на́шимъ .

на стихо́внѣ , стⷯра . гла́съ , ѕ҃ . Вᲂскрⷭ҇нїе твᲂѐ хрⷭ҇тѐ сп҃се , а҆́нг҃ли пᲂю́тъ на́ нб҃сѣхъ . и҆ на́съ на землѝ спᲂдо́би , чи́стыми срⷣцы тебѐ сла́вити .

и҆́ны , стихѣ́ры , бцⷣы . поⷣ . всѐ ᲂу҆пᲂва́нїе .= сти́хъ : приведꙋ́тсѧ цр҃ю дв҃ы во слѣ́дъ є҆ѧ̀ ,꙳ и҆ и҆́скренѧѧ є҆ѧ̀ приведꙋ́тсѧ тебѣ̀ . Ꙗ҆́=кѡ ро́ждьши сло́во вᲂплᲂще́ннѡ , пре́жде вѣ́къ ѻ҆ц҃ꙋ сᲂприснᲂсꙋ́щнᲂе , дв҃о небла́зненаѧ , смире́ныѧ дш҃и мᲂеѧ̀ разрѣшѝ сᲂꙋ́зы . вᲂпїю́ти пᲂмо́щнице ми́рꙋ , и҆зба́ви страсте́й ѡ҆бдержа́нїѧ , и҆ бѣ́дъ грѣхо́вныхъ . и҆ мᲂлю́сѧ спасѝ пренепᲂро́чнаѧ , ѿ сѣ́тей чꙋжда́гѡ , вели́кїѧ ра́ди млⷭ҇ти твᲂеѧ̀ .

сти́хъ : слы́ши дщѝ и҆ ви́ждь ,꙳ и҆ приклᲂнѝ ᲂу҆́хо твᲂѐ . Ѿча́ѧвшагᲂсѧ въ блꙋдѣ́хъ , и҆ ѡ҆бнаже́наго бл҃ги́хъ дѣ́лъ , ᲂу҆да́ленагѡ ѿ бл҃гᲂда́ти влады́чни , спасѝ є҆ди́на ми́рᲂви спасе́нїе ро́ждьшаѧ . и҆зба́ви бѣ́дъ и҆ плѣне́нїѧ , во́лею свѧза́вшагᲂсѧ , и҆ в̾ ро́въ пᲂги́бельныи , ѿ неразꙋ́мїѧ ври́нꙋвшасѧ , влⷣчце ꙗ҆́кѡ млⷭ҇тива и҆ дш҃елюби́ваѧ .

сти́хъ : пᲂмѧнꙋ̀ и҆́мѧ твᲂѐ ,꙳ во всѧ́кᲂмъ ро́дѣ и҆ ро́дѣ . Ви́ждь ско́рбь мᲂю̀ бг҃ᲂрᲂди́тельнице , и҆ вᲂнмѝ мл҃твѣ твᲂегѡ̀ мᲂли́твеника чⷭ҇таѧ , распалѝ и҆ непретвᲂрѝ . да́ждь ми твᲂеѧ̀ по́мᲂщи рꙋ́кꙋ держа́внꙋю бг҃ᲂрᲂди́тельнице . прїимѝ стена́нїе ѿ срⷣца скве́рнава прест҃а́ѧ , и҆ принесѝ свᲂемꙋ̀ сн҃ꙋ и҆ бг҃ꙋ на́шемꙋ , бл҃гᲂслᲂве́наѧ влⷣчце , вели́кїѧ ра́ди твᲂеѧ̀ млⷭ҇ти . сла́ва , и҆ ны́нѣ , боⷢ҇ . Чтⷭ҇аѧ є҆ди́на бг҃а ро́ждьшаѧ , дш҃е́вныхъ прегрѣше́нїи и҆зба́ви мѧ дв҃о мᲂлю́сѧ , и҆ спаси́ мѧ ᲂу҆мерщве́ннагѡ . ты́бо наде́жда є҆сѝ ненадѣ́ющимсѧ , и҆ пᲂмо́щница ми́рꙋ , и҆́маши є҆́же мᲂщѝ ѻ҆трᲂкᲂви́це ꙗ҆́кѡ мт҃и гдⷭ҇нѧ . непре́зри ми мᲂле́нїѧ , нижѐ ѡ҆ста́ви всегдⷭ҇ьствꙋющаѧ влⷣчце , но ꙗ҆́кѡ бл҃гᲂлюби́ваѧ спаси́ мѧ .

таⷤ , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , вᲂскрⷭ҇нъ . є҆ктенїѧ̀ , и҆ =ѿпꙋ́стъ .

ВЪ СУБО́ТУ НА ВЕЛИ́ЦѢЙ ВЕЧЕ́РНИ

нача́ло твᲂри́мъ все́й вече́рнѣй слꙋ́жбѣ , ꙗ҆́кᲂже ᲂу҆ка́зано , въ пѧ́тᲂмъ гла́сѣ . на́ гдⷭ҇и вᲂзва́хъ , стⷯры вᲂскрⷭ҇ны . гла́съ , ѕ҃ . твᲂре́нїе , і҆ѡа́нна дамаски́на . и҆ пᲂе́мъ , стихѡ́въ , і҃ . =запѣ́въ : и҆зведѝ и҆з̾ темни́цы дш҃ꙋ мᲂю̀ ,꙳ и҆спᲂвѣ́датисѧ и҆́мени твᲂемꙋ̀ . П=ᲂбѣ́дꙋ и҆мѣ́ѧ хрⷭ҇тѐ ю҆́же на а҆́да , и҆ на́ крⷭ҇тъ в̾зы́де , да сѣдѧ́щїѧ во тмѣ̀ и҆ сѣ́ни сме́ртнѣй , вᲂскр҃си́ши с̾сᲂбо́ю , свᲂбо́дь сы́и в̾ ме́ртвыхъ . и҆стᲂча́ѧ живо́тъ ѿ свᲂегѡ̀ свѣ́та , всеси́льне сп҃се пᲂми́лꙋй на́съ .

менѐ ждꙋ́тъ пра́ведницы ,꙳ до́ндеже вᲂзда́си мнѣ̀ . Дне́сь хрⷭ҇то́съ сме́рть пᲂпра́въ , ꙗ҆́кᲂже речѐ и҆ вᲂскр҃се , и҆ ра́дᲂванїе всемꙋ̀ ми́рꙋ дарᲂва̀ . да всѝ в̾зыва́юще пѣ́сньми та́кѡ рце́мъ , и҆сто́чниче жи́зни , неприкᲂснᲂве́нныи свѣ́те , всеси́льне сп҃се пᲂми́лꙋй на́съ .

и҆з̾ глꙋбины̀ вᲂзва́хъ к̾ тебѣ̀ гдⷭ҇и ,꙳ гдⷭ҇и ᲂу҆слы́ши гла́съ мо́й . Тебѐ гдⷭ҇и сꙋ́щагѡ по все́й тва́ри , грѣ́шнїи ка́мѡ бѣжи́мъ ; на́ нб҃си са́мъ живе́ши . во а҆́дѣ же пᲂпра́въ сме́рть . во глꙋбины̀ мᲂрскі́ѧ , тꙋ̀ рꙋка̀ твᲂѧ̀ влⷣко . к̾ тебѣ̀ прибѣга́емъ , и҆ тебѣ̀ припа́дающе мо́лимсѧ , вᲂскр҃сы́и и҆з̾ ме́ртвыхъ пᲂми́лꙋй на́съ .

и҆́ны , стихѣ́ры . твᲂре́нїе а҆нато́лїѧ патрїа́рха цр҃ѧ гра́да . =запѣ́въ : бꙋ́дѣтѣ ᲂу҆́ши твᲂѝ ,꙳ вне́млющѣ гла́съ мл҃твы мᲂеѧ̀ . К=рⷭ҇то́мъ твᲂи́мъ хрⷭ҇тѐ хва́лимсѧ , и҆ вᲂскрⷭ҇нїе твᲂѐ пᲂе́мъ и҆ сла́вимъ . ты́ бо є҆сѝ бг҃ъ на́шъ , ра́звѣ тебѐ и҆но́го незна́емъ .

а҆́ще без̾зако́нїѧ на́зриши гдⷭ҇и , гдⷭ҇и кто̀ пᲂстᲂи́тъ ,꙳ ꙗ҆́кѡ ѿ тебѐ ѡ҆чище́нїе є҆́сть . Сла́ва си́лѣ твᲂе́й гдⷭ҇и , ꙗ҆́кѡ ᲂу҆праздни́лъ є҆сѝ держа́вꙋ и҆мꙋ́щагѡ сме́рти . ѡ҆бнᲂви́лъ є҆сѝ на́съ крⷭ҇то́мъ свᲂи́мъ , дарᲂва̀ на́мъ живо́тъ и҆ нетлѣ́нїе .

и҆́мене ра́ди твᲂегѡ̀ пᲂтерпѣ́хъ тѧ̀ гдⷭ҇и , пᲂтерпѣ̀ дш҃а мᲂѧ̀ в̾ сло́во твᲂѐ ,꙳ ᲂу҆пᲂва̀ дш҃а мᲂѧ̀ на́ гдⷭ҇а . Всегда̀ бл҃гᲂсло́вѧще гдⷭ҇а , пᲂе́мъ вᲂскрⷭ҇нїе є҆гѡ̀ . распѧ́тїе бо претерпѣ́въ , и҆ сме́ртїю сме́рть разрꙋшѝ .

ѿ стра́жи ᲂу҆́тренїѧ до́ нᲂщи , ѿ стра́жи ᲂу҆́тренїѧ ,꙳ да ᲂу҆пᲂва́етъ і҆и҃ль на́ гдⷭ҇а . Пᲂгребе́нїе твᲂѐ влⷣко , ᲂу҆́зы а҆́дᲂвы сᲂкрꙋши́въ растерза̀ , и҆ є҆́же и҆з̾ ме́ртвыхъ вᲂскрⷭ҇нїе ве́сь ми́ръ прᲂсвѣтѝ . чл҃кᲂлю́бче сла́ва тебѣ̀ .

та́же , в̾ =минѣ́и , стихѣ́ры , ст҃о́мꙋ . сла́ва , ст҃о́мꙋ , а҆́ще и҆́мать . а҆́ще ли нѝ . сла́ва , и҆ нн҃ѣ , боⷢ҇ , гла́сꙋ . =и҆́ны стⷯры бцⷣѣ , пᲂе́мъ и҆́хъ , и҆дѣ́же нѣ́сть минѣ́и . твᲂре́нїе , па́вла а҆мᲂре́йскаго . гла́съ , г҃ . =запѣ́въ : ꙗ҆́кѡ ѿ́ гдⷭ҇а млⷭ҇ть , и҆ мно́го ѿ негѡ̀ и҆збавле́нїе , и҆ то́й и҆зба́витъ і҆и҃лѧ ,꙳ ѿ всѣ́хъ без̾зако́нїи є҆гѡ̀ . В=и́дѧщи не́мᲂщь мᲂю̀ тѣле́снꙋю , и҆ дш҃е́внᲂе страда́нїе , и҆ серде́чнᲂе ѡ҆ѕлᲂбле́нїе , пᲂсѣще́нїѧ спᲂдо́би мѧ бжⷭ҇твенаго , всенепᲂро́чнаѧ дв҃о , и҆ спаси́ мѧ мᲂлю́сѧ , те́плыми твᲂи́ми мл҃твами .

хвали́те гдⷭ҇а всѝ ꙗ҆зы́цы ,꙳ пᲂхвали́те є҆гѡ̀ всѝ лю́дїе . Всѣ́хъ преи҆до́хъ влⷣчце сᲂгрѣше́ньми , но мно́жества си́хъ дв҃це , ѡ҆чи́щши , ми́лᲂстей пᲂлꙋчи́ти ми чⷭ҇таѧ спᲂдо́би , в̾ бꙋ́дꙋщемъ сꙋдѣ̀ , сн҃а и҆ бг҃а твᲂегѡ̀ .

ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ ,꙳ и҆ и҆́стина гдⷭ҇нѧ пребыва́етъ во́ вѣки . Мно́жество сᲂгрѣше́нїи мᲂи́хъ , зᲂвꙋ́щагѡ ѡ҆чи́сти чи́стаѧ , и҆ чꙋ́вствїи мᲂи́хъ не ᲂу҆ста́внаѧ движе́нїѧ , мᲂли́твенымъ мече́мъ с̾сѣцы̀ , ꙗ҆́кѡ да вѣ́рᲂю и҆ любо́вїю пᲂю̀ , твᲂѐ без̾сѣ́меннᲂе ржⷭ҇тво̀ .

сла́ва , и҆ ны́нѣ , боⷢ҇ . гла́съ , ѕ҃ . Кто̀ тебѐ неблажи́тъ прест҃а́ѧ дв҃це ; и҆лѝ кто̀ невᲂспѣва́етъ твᲂегѡ̀ пречⷭ҇тагѡ ржⷭ҇тва̀ ; без̾лѣ́тныи бо ѿ ѻ҆ц҃а вᲂзсїѧ́въ сн҃ъ є҆динᲂро́дныи , то́йже ѿ тебѐ чи́стыѧ про́йде , несказа́ннѡ вᲂпло́щьсѧ . є҆стество́мъ бг҃ъ сы́и , и҆ є҆стество́мъ бы́въ чл҃къ на́съ ра́ди . не во двᲂю̀ лицꙋ̀ раздѣлѧ́емъ . но во двᲂю̀ є҆стествꙋ̀ несмѣ́сно пᲂзнава́емъ . тᲂгѡ̀ мᲂлѝ чⷭ҇таѧ и҆ всебл҃же́ннаѧ , пᲂми́лᲂватисѧ дш҃а́мъ на́шимъ .

та́же , вы́хᲂдъ съ кади́лᲂмъ .= и҆ с=вѣ́те ти́хїи . прᲂки́менъ , дню̀ , =и҆ =є҆ктенїѧ̀ .

и҆́ны , стихѣ́ры . по а҆́зъ вѣ́ди . сти́хъ : гдⷭ҇ь вᲂцр҃и́сѧ ,꙳ в̾ лѣ́пᲂтꙋсѧ ѡ҆блечѐ . Врата̀ сᲂкрꙋши́лъ є҆сѝ мѣ́днаѧ , и҆ вереѝ а҆́дᲂвы сте́рлъ є҆сѝ , ꙗ҆́кѡ бг҃ъ всеси́ленъ , и҆ ро́дъ чл҃ческїи па́дшїи вᲂскр҃си́лъ є҆сѝ . сегѡ̀ ра́ди и҆ мы̀ пᲂю́ще вᲂпїе́мъ , вᲂскр҃сы́и и҆з̾ ме́ртвыхъ гдⷭ҇и сла́ва тебѣ̀ .

сти́хъ : и҆́бо ᲂу҆твердѝ вселе́ннꙋю ,꙳ ꙗ҆́же не пᲂдви́житсѧ . Тлѣ́нїѧ на́съ дре́внѧгѡ хрⷭ҇то́съ и҆спра́вити хᲂтѧ̀ , на крⷭ҇тѣ̀ пригвᲂжда́етсѧ , и҆ во́ грᲂбѣ пᲂлᲂга́етсѧ . є҆го́же мѷрѡно́сицы жены̀ со слеза́ми и҆ска́хꙋ , и҆ пла́чꙋще гл҃ахꙋ , ᲂу҆вы̀ на́мъ сп҃се всѣ́хъ , ка́кѡ вᲂсхᲂтѣ̀ во́ грᲂбъ всели́тисѧ ; всели́вжесѧ во́лею , ка́кѡ ᲂу҆кра́денъ бы́сть ; ка́кѡ прелᲂжи́сѧ ; ко́еже мѣ́сто сᲂкры̀ твᲂѐ живᲂно́снᲂе тѣ́ло ; но ѽ влⷣко ꙗ҆́кᲂже ѡ҆бѣща́сѧ на́мъ , ꙗ҆ви́сѧ , и҆ ᲂу҆тᲂлѝ на́ше рыда́нїе сле́знᲂе . пла́чꙋщим̾жесѧ и҆́мъ , а҆́нг҃лъ к̾ ни́мъ вᲂзᲂпѝ , ѿ пла́ча преста́вше , а҆пⷭ҇лѡмъ рцы́те ꙗ҆́кѡ вᲂскр҃се гдⷭ҇ь , ми́рᲂви да́рꙋѧ ѡ҆чище́нїе , и҆ ве́лїю млⷭ҇ть .

сти́хъ : до́мꙋ твᲂемꙋ̀ пᲂдᲂба́етъ ,꙳ ст҃ы́ни гдⷭ҇и в̾ дᲂлгᲂтꙋ̀ дні́й . Распѧ́тсѧ ꙗ҆́кᲂже вᲂсхᲂтѣ̀ хрⷭ҇тѐ , и҆ сме́рть пᲂгребе́нїемъ си плѣни́лъ є҆сѝ . тридне́внѡ вᲂскр҃се ꙗ҆́кѡ бг҃ъ со сла́вᲂю , ми́рᲂви да́рꙋѧ без̾кᲂне́чныи живо́тъ , и҆ ве́лїю ми́лᲂсть .

сла́ва . самᲂгла́снꙋ стⷯрꙋ , ст҃о́мꙋ , а҆́ще и҆́мать . и҆ ны́нѣ , боⷢ҇ , прѧ́мѡ гла́сꙋ , стⷯры , дᲂгма́тикъ пᲂслѣ́днїи . а҆́ще ли не и҆́мать : сла́ва , и҆ ны́нѣ , боⷢ҇ . Твᲂре́цъ и҆ и҆зба́витель мо́й пречⷭ҇таѧ хрⷭ҇то́съ гдⷭ҇ь , и҆з̾ твᲂи́хъ лᲂже́снъ прᲂше́дъ , в̾ мѧ̀ ѡ҆бо́лксѧ , пе́рвыѧ клѧ́твы а҆да́ма свᲂбᲂдѝ , тѣ́мже тѝ пречⷭ҇таѧ , ꙗ҆́кѡ бж҃їи мт҃ри невѣ́стѣ и҆ дв҃ѣй вᲂи́стинꙋ , вᲂпїе́мъ немо́лчно . ра́дꙋйсѧ а҆́нг҃льски . ра́дꙋйсѧ влⷣчце , пред̾ста́тельнице и҆ пᲂкро́ве , и҆ спасе́нїе дш҃а́мъ на́шимъ .

таⷤ , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , гла́съ , ѕ҃ . а҆́нг҃льскїѧ си́лы . сла́ва , и҆ нн҃ѣ , боⷢ҇ , пи́санъ , на ᲂу҆́трени .= та́же , ѿ=пꙋ́стъ .

Въ сꙋбо́тꙋ на па́вечерницѣ , нача́ло ѡ҆бы́чно , ꙗ҆́кᲂже ᲂу҆ка́зано , в̾ пѧ́тᲂмъ гла́сѣ . Кано́нъ , прест҃ѣ́й бцⷣѣ . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́ сꙋхꙋ хᲂди́въ і҆и҃ль , по бе́зднѣ стᲂпа́ми , гᲂни́телѧ фараѡ́на , ви́дѧ пᲂтᲂплѧ́ема , бг҃ꙋ пᲂбѣ́днꙋю пѣ́снь пᲂе́мъ вᲂпїѧ́ше . запѣ́въ : прест҃а́ѧ гжⷭ҇е бцⷣе спасѝ на́съ . Неѡ҆скꙋ́днꙋ бл҃гᲂда́ть и҆мꙋ́щи ꙗ҆́кѡ бжⷭ҇твенꙋю , мт҃и без̾невѣ́стнаѧ , к̾ тебѣ̀ прибѣга́ющихъ непре́зри , ѿ бѣ́дъ и҆ скᲂрбе́й прⷭ҇нѡ спаса́ющи . Сѐ вре́мѧ наста́ ми ᲂу҆ны́нїѧ , вᲂста́ни пречⷭ҇таѧ влⷣчце , и҆ по́мᲂщи да́ждь ми рꙋ́кꙋ . ты́ бо ми́ръ бжⷭ҇твенагѡ весе́лїѧ и҆спо́лнила є҆сѝ . сла́ва . Держа́вныи тво́й пᲂкро́въ , бг҃ᲂрᲂди́тельнице ꙗ҆́кѡ застꙋ́пница сꙋ́щи , да́ждь ми в̾ско́рѣ , напа́стьми ѡ҆держи́мꙋ , и҆ невре́дна ѿ си́хъ сᲂхрани́ мѧ . и҆ ны́нѣ . Дш҃и мᲂе́й сме́рть притека́етъ , и҆скꙋше́нїѧ же ненави́дѧщихъ , ꙗ҆́кѡ а҆́спиды ѡ҆быдо́ша пᲂгꙋби́ти мѧ . но сама́ мѧ бцⷣе спасѝ .

пѣ́снь , г҃ . і҆рмо́съ . Раз̾шири́шасѧ на врагѝ ᲂу҆ста̀ мᲂѧ̀ , ꙗ҆́кѡ ᲂу҆тверди́сѧ ѡ҆́ гдⷭ҇ѣ срⷣце мᲂѐ . Оу҆мерщве́нꙋю дꙋ́шꙋ мᲂю̀ прегрѣше́ньми , живо́тъ ꙗ҆́кѡ ро́ждьшаѧ бцⷣе , ѡ҆живѝ . Ѿ всѧ́кᲂгѡ и҆скꙋше́нїѧ сᲂблюдѝ , к̾ тебѣ̀ прибѣга́ющихъ бцⷣе ᲂу҆пᲂва́нїе на́ше . сла́ва . Вᲂста́ющихъ на мѧ̀ напа́сти го́рькѡ , спаси́ мѧ мт҃и гдⷭ҇а мᲂегѡ̀ пренепᲂро́чнаѧ . и҆ ны́нѣ . И҆́же ми́рᲂви спасе́нїе пᲂдаю́щаѧ , бжⷭ҇твенымъ ржⷭ҇тво́мъ си , ѿ бѣ́дъ мѧ премѣнѝ .

пѣ́снь , д҃ . і҆рмо́съ . Оу҆слы́шавъ же прᲂро́къ прихо́дъ тво́й гдⷭ҇и , и҆ ᲂу҆бᲂѧ́хсѧ , ꙗ҆́кѡ хо́щеши ѿ дв҃ы рᲂди́тисѧ , и҆ чл҃кѡмъ ꙗ҆ви́тисѧ , и҆ гл҃аше , ᲂу҆слы́шахъ слꙋ́хъ тво́й и҆ ᲂу҆бᲂѧ́хсѧ , сла́ва си́лѣ твᲂе́й . И҆знемо́же нището́ю крѣ́пᲂсть дш҃и мᲂеѧ̀ , бг҃ᲂрᲂди́тельнице , и҆ лю́тᲂе на мѧ̀ ѡ҆мраче́нїе нападѐ , ѿ прегрѣше́нїи и҆мы́и нахо́дъ , при́зри ꙗ҆́кѡ свѣтᲂно́сныи ѻ҆́блакъ бж҃їи , и҆ прᲂсвѣти́ мѧ мᲂлю́сѧ . Бꙋ́рю ѕѡ́лъ мᲂи́хъ , и҆ смꙋще́нїе прегрѣше́нїи , прелᲂжѝ въ тишинꙋ̀ спасе́нїѧ , ꙗ҆́кѡ сꙋ́щи приста́нище всенепᲂро́чнаѧ . и҆ па́гꙋбы тѣ́хъ и҆зба́ви мѧ мᲂлю́сѧ и҆́же рыка́юще ꙗ҆́кѡ и҆́щꙋтъ мѧ львы̀ пᲂжретѝ . сла́ва . Въ нᲂщѝ и҆ во́дни , на земли́ же и҆ въ мо́ри , и҆ на всѧ́кᲂмъ мѣ́стѣ , спасе́нїе тве́рдо сꙋ́щи , бцⷣе пᲂкро́ве непᲂбѣди́мыи спаса́й мѧ , по́ бз҃ѣ бо на тѧ̀ вᲂи́стинꙋ хрⷭ҇тїа́не ᲂу҆пᲂва́емъ . и҆ нн҃ѣ . Ѿ вели́кихъ и҆ разли́чныхъ прегрѣше́нїи же и҆ напа́стей , всегда̀ спаса́еши мѧ . тѣ́мже ꙗ҆́кѡ ро́ждьшꙋю тѧ гдⷭ҇а мᲂлю̀ , и҆ к̾ тебѣ̀ прибѣга́ю , непᲂбѣди́мѣй по́мᲂщи скᲂрбѧ́щимъ , ѿ бѣ́дъ и҆зведи́ мѧ мᲂльба́ми си .

пѣ́снь , є҃ . і҆рмо́съ . Вᲂз̾сїѧ́выи свѣ́тъ всемꙋ̀ ми́рꙋ хрⷭ҇тѐ , прᲂсвѣтѝ срⷣце мᲂѐ , ѿ́ нᲂщи вᲂпїю́ща и҆ спаси́ мѧ . Спасе́нїѧ тѧ̀ пᲂкро́въ сла́вимъ , сло́ва мт҃и непᲂро́чнаѧ , навѣ́тъ небᲂѧ́щесѧ чл҃ческихъ . И҆мꙋ́ще тѧ стѣ́нꙋ неѡ҆бᲂри́мꙋ , и҆скꙋше́нїи же и҆ печа́лей вᲂста́нїѧ , и҆збавлѧ́емсѧ пречи́стаѧ . сла́ва . И҆зми́ мѧ ѿ ѕлы́хъ чл҃къ ꙗ҆зы́ка , чи́стаѧ , ꙗ҆́кᲂже бо бри́твꙋ и҆з̾ѡ҆стри́ша , пᲂгꙋби́ти и҆́щꙋще дш҃ꙋ мᲂю̀ го́рькѡ . и҆ нн҃ѣ . Прилѣ́жнѡ ти припа́даю мᲂлѧ́сѧ , ꙗ҆́кѡ мт҃и зижди́телѧ мᲂегѡ̀ , ѿ ѡ҆держа́щихъ мѧ бѣ́дъ свᲂбᲂдѝ .

пѣ́снь , ѕ҃ . і҆рмо́съ . Ки́тᲂмъ пᲂже́ртъ грѣхо́внымъ , вᲂпїю́ ти хрⷭ҇тѐ со пррⷪ҇кᲂмъ , и҆з̾ и҆стлѣ́нїѧ мѧ свᲂбᲂдѝ . Го́рести в̾кꙋ́съ прїе́мъ , бжⷭ҇твеныѧ сла́дᲂсти ѿчꙋжи́хсѧ пречⷭ҇таѧ . тѣ́мже вᲂпїю́ ти , да́рꙋй ми по́мᲂщь . Ѡ҆мраче́нїе страсте́й , раба́ мѧ тлѝ сᲂдѣ́ла . тѣ́мже свѣ́тъ ро́ждьшаѧ , свᲂбᲂдѝ влⷣчце . сла́ва . Сᲂгла́снѡ тебѣ̀ и҆ вѣ́рнѡ и҆спᲂвѣ́даюсѧ пречи́стаѧ , и҆ пᲂжрꙋ́ ти же́ртвꙋ , тᲂбо́ю и҆зба́вльсѧ ско́рби . и҆ ны́нѣ . Ѿверзо́шасѧ на мѧ̀ непра́вды ᲂу҆ста̀ влⷣчце . тѣ́мже ꙗ҆́кѡ застꙋ́пница , си́хъ в̾ско́рѣ свᲂбᲂдѝ .

Гдⷭ҇и пᲂми́лꙋй ,= гⷤ . сла́ва , и҆ ны́нѣ . кᲂнда́къ . З=астꙋ́пнице хрⷭ҇тїа́нѡмъ непᲂсты́днаѧ , хᲂда́таице к̾ твᲂрцꙋ̀ непрело́жнаѧ , не пре́зри грѣ́шныхъ мᲂле́нїѧ гла́сы . но пред̾варѝ ꙗ҆́кѡ бл҃га̀ на́ пᲂмᲂщь на́шꙋ , вѣ́рнѡ вᲂпїю́щихъ тѝ , ᲂу҆скᲂрѝ на мл҃твꙋ , и҆ пᲂтщи́сѧ на ᲂу҆мᲂле́нїе , застꙋпа́ющи прⷭ҇нѡ бцⷣе чтꙋ́щихъ тѧ̀ .

пѣ́снь , з҃ . і҆рмо́съ . Хладᲂда́тельнꙋ ᲂу҆́бѡ пе́щь сᲂтвᲂрѝ а҆́нг҃лъ , прпⷣбнымъ дѣ́темъ , халдѣ́и же ѡ҆палѝ велѣ́нїемъ бж҃їимъ . мꙋчи́телѧ ᲂу҆вѣща̀ вᲂпи́ти , бл҃гᲂслᲂве́нъ бг҃ъ ѻ҆ц҃ъ на́шихъ . И҆скꙋше́нїѧ дш҃и мᲂеѧ̀ , ю҆́же тꙋ́чнїи ю҆нцы̀ ны́нѣ ѡ҆быдо́ша , прест҃а́ѧ дв҃о сама́ мѧ си́хъ свᲂбᲂдѝ . Защища́ющи то́щно , и҆́же в̾ бѣдѣ̀ сꙋ́щихъ и҆ в̾ печа́ли , ра́дᲂсть бцⷣе пᲂдава́й всегда̀ . сла́ва . Пᲂбѣжде́на мѧ всегѡ̀ , ѿчаѧ́нїемъ дѣ́лъ и҆ печа́ли , ѡ҆гради́ мѧ дв҃це , ꙗ҆́кѡ пᲂкро́въ всѣ́мъ нерꙋши́мыи . и҆ ны́нѣ . Пред̾ста́тельствᲂмъ ти , и҆збавлѧ́емсѧ , бѣ́дъ и҆ скᲂрбе́й , и҆ ѡ҆брѣта́емъ бᲂга́тство ве́лїе не и҆стᲂща́емо .

пѣ́снь , и҃ . і҆рмо́съ . и҆з̾ =пла́мени ст҃ы́мъ ро́сꙋ и҆стᲂчѝ , а҆ пра́веднагѡ же́ртвꙋ и҆ во́ды пᲂпалѝ , всѧ́ бо твᲂри́ши хрⷭ҇тѐ , є҆ли́ко хо́щеши , тѣ́мъ тѧ превᲂзно́симъ гдⷭ҇а во́ вѣки . =Ѿ чл҃ческихъ снѣда́юсѧ ѡ҆ѕлᲂбле́нїй , и҆ мᲂлю́сѧ бцⷣе , и҆зба́ви мѧ сꙋ́етнагѡ сᲂвѣ́та и҆́хъ . Пᲂбѣди́хсѧ в̾ печа́лѣхъ и҆скꙋше́нїи мᲂи́ми , и҆ мᲂлю́сѧ влⷣчце , ѿ си́хъ мѧ спасѝ невреди́ма . сла́ва . Спаси́ мѧ чⷭ҇таѧ ѿ чл҃ка льсти́ва , и҆ ꙗ҆зы́ка , и҆ ᲂу҆́стъ и҆ мꙋчи́тельства , и҆ всѧ́кїѧ нꙋ́жди . и҆ нн҃ѣ . И҆́же нра́вᲂмъ прельща́емь є҆́смь , без̾ ѿвѣ́та сы́и , бцⷣѣ зᲂвꙋ̀ , всѧ́ческихъ мѧ и҆зба́ви ѕѡ́лъ .

пѣ́снь , ѳ҃ . і҆рмо́с̾ . Прїи́мшаѧ ра́дᲂсть а҆́нг҃лᲂм̾ , и҆ ро́ждьшаѧ сᲂзда́телѧ свᲂегѡ̀ , дв҃о спасѝ тебѐ велича́ющїѧ . Ми́лᲂстива ми и҆́же в̾ печа́лѣхъ житїѧ̀ бцⷣе бꙋ́ди , и҆ спасѝ ѿ бѣ́дъ , и҆́же нн҃ѣ прибѣга́ющагѡ к̾ тебѣ̀ . Вᲂи́стинꙋ є҆ди́на на землѝ , и҆ въ мо́ри , ꙗ҆ви́сѧ чи́стаѧ кро́въ неразᲂри́мъ прибѣга́ющимъ ти , несꙋмѣ́ннᲂю дш҃е́ю . сла́ва . Безꙋма̀ себѐ всѧ́ческими пᲂрабо́тивша лю́тыми паде́ньми . мᲂльба́ми твᲂи́ми свᲂбо́дꙋ пᲂда́ждь ми всепѣ́таѧ . и҆ ны́нѣ . Тѧ̀ наде́ждꙋ и҆ застꙋпле́нїе тве́рдо стѧжа́въ чⷭ҇таѧ , велича́ѧ тѧ ꙗ҆́кѡ бцⷣꙋ , пѣ́снь вѣ́рᲂю скᲂнчева́ю .

та́же , дᲂсто́йно є҆́сть . трⷭ҇то́е , и҆ по ѻ҆́ч҃е на́шъ , кᲂнда́къ , гла́сꙋ . гдⷭ҇и пᲂми́лꙋй , м҃ . про́чее , ѡ҆бы́чно . та́же , ѿпꙋ́стъ . и҆ прᲂще́нїе .

Въ нлⷣю , пᲂлꙋ́нᲂщница , вᲂскрⷭ҇на . нача́ло ѡ҆бы́чно , ꙗ҆́кᲂже ᲂу҆ка́зано , в̾ пѧ́тᲂмъ гла́сѣ . =Кано́нъ , прест҃ѣ́й и҆ живᲂнача́льнѣй трⷪ҇цѣ . твᲂре́нїе митрᲂфа́нᲂво . є҆мꙋ́же краегране́сїе , шеста́гѡ пѣ́нїѧ , принᲂша́ю ти бжⷭ҇тво̀ . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́ сꙋхꙋ хᲂди́въ і҆зра́иль , по бе́зднѣ стᲂпа́ми , гᲂни́телѧ фараѡ́на , ви́дѧ пᲂтᲂплѧ́ема , бг҃ꙋ пᲂбѣ́днꙋю пѣ́снь пᲂе́мъ вᲂпїѧ́ше . =запѣ́в̾ : прест҃а́ѧ трⷪ҇це бж҃е на́шъ сла́ва тебѣ̀ . Трѝ сᲂста́вы пᲂе́мъ бг҃ᲂнача́льны , є҆ди́нственагѡ є҆стества̀ , непремѣ́ненъ зра́къ , бл҃га́гѡ чл҃кᲂлю́бца бг҃а , прегрѣше́нїемъ ѡ҆чище́нїе на́мъ да́рꙋюща . Пресꙋ́щныи є҆ди́не гдⷭ҇и , и҆ трисїѧ́нне ли́цы , в̾ бжⷭ҇твѣ̀ є҆ди́нᲂмъ сы́и , вразꙋмѝ на́съ , и҆ спᲂдо́би твᲂегѡ̀ бжⷭ҇твенагѡ сїѧ́нїѧ . сла́ва . Невѣ́стꙋ ᲂу҆кра́сивъ па́велъ , ю҆́же ѿ ꙗ҆зы́къ цр҃кᲂвь , є҆ди́нᲂмꙋ тебѣ̀ трисᲂста́внᲂмꙋ бг҃ꙋ пᲂкланѧ́тисѧ наꙋчѝ , ѿ него́же , и҆ и҆́мже , и҆ в̾ не́мже всѧ̀ бы́ша . и҆ ны́нѣ . Ѿ ᲂу҆тро́бы твᲂеѧ̀ прᲂи҆зы́де , ᲂу҆́мнᲂе бцⷣе сл҃нце , и҆ ѡ҆сїѧ̀ на́съ трисвѣ́тлагѡ бжⷭ҇тва̀ зарѧ́ми . є҆го́же пᲂю́ще , бл҃гᲂче́стнѡ тѧ̀ ᲂу҆бл҃жа́емъ .

пѣ́снь , г҃ . і҆рмо́съ . Нѣ́сть ст҃а ꙗ҆́кᲂже ты̀ , гдⷭ҇и бж҃е мо́й , вᲂзнесы́и ро́гъ вѣ́рныхъ си бл҃же , и҆ ᲂу҆тве́рждь и҆́хъ на ка́мени и҆спᲂвѣ́данїѧ тѝ . Оу҆кра́сивъ трисвѣ́тлыи бж҃е , чи́ны нбⷭ҇ныѧ , ᲂу҆стро́илъ є҆сѝ пѣ́ти трист҃ы́ми тѧ̀ гла́сы . с̾ ни́миже прїимѝ и҆ на́съ , вᲂспѣва́ющихъ твᲂю̀ бл҃гᲂсть . Є҆ди́но непрело́жнѡ тро́ичнᲂе сᲂѡ҆бра́зно є҆ди́нственᲂе бг҃ᲂнача́лїе , вᲂспѣва́юще мо́лимъ тѧ̀ те́плѣ , грѣхо́въ мно́гихъ низ̾пᲂсла́ти ны́нѣ на́мъ прᲂще́нїе . сла́ва . Оу҆́ме без̾нача́льныи ѻ҆́ч҃е , сᲂѡ҆бра́зне бж҃їи сло́ве , и҆ дꙋ́ше бжⷭ҇твеныи , бл҃гі́и и҆ пра́выи , вᲂспѣва́ющихъ вѣ́рнѡ твᲂю̀ держа́вꙋ , сᲂблюдѝ ꙗ҆́кѡ бл҃гᲂꙋтро́бенъ . и҆ ны́нѣ . Па́жить пᲂтребѝ тлѝ , сн҃ъ тво́й чи́стаѧ , челᲂвѣ́къ по сꙋществꙋ̀ бы́въ во ᲂу҆тро́бѣ твᲂе́й , и҆ рᲂдᲂнача́льники дре́внѧго ѡ҆сꙋжде́нїѧ є҆ди́нъ свᲂбᲂдѝ .

Гдⷭ҇и пᲂми́лꙋй , гⷤ . сѣда́ленъ , гла́съ , ѕ҃ . Влⷣко бж҃е при́зри с̾ нб҃сѐ , и҆ ви́ждь на́ше смире́нїе ꙗ҆́кѡ ще́дръ , и҆ ᲂу҆милᲂсе́рдисѧ чл҃кᲂлю́бче пребл҃гі́и . ни ѿкꙋ́дꙋ бо надѣ́емсѧ прᲂще́нїе пᲂлꙋчи́ти ѕлы́хъ , и҆́хже сᲂгрѣши́хᲂмъ . тѣ́мже бꙋ́ди с̾ на́ми , и҆ никто́же на ны̀ . сла́ва , и҆ ны́нѣ , боⷢ҇ . Влⷣчце чи́стаѧ при́зри с̾ нб҃сѐ , и҆ ви́ждь мᲂи́хъ стрꙋпо́въ ра́ны , и҆ ᲂу҆милᲂсе́рдисѧ пречⷭ҇таѧ , и҆сцѣлѝ со́вѣстнᲂе жже́нїе , твᲂе́ю млⷭ҇тїю ѡ҆рᲂша́ющи . и҆ вᲂпїю́щи рабо́мъ твᲂи́мъ , а҆́зъ є҆́смь с̾ ва́ми и҆ никто́же на вы̀ .

пѣ́снь , д҃ . і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ цр҃кви бг҃ᲂлѣ́пнѡ зᲂве́тъ вᲂпїю́щи , ѿ со́вѣсти чи́сты ѡ҆́ гдⷭ҇ѣ пра́зднꙋющи . Вᲂзвыша́й мы́сль , є҆ди́нице трисвѣ́тлаѧ , и҆ дꙋ́ши и҆ срⷣца̀ непреста́ннѡ твᲂи́хъ пѣве́цъ ско́ро вᲂзведѝ , и҆ сїѧ́нїѧ твᲂегѡ̀ свѣ́тлᲂсти спᲂдо́би . Претвᲂрѝ и҆ преѡ҆брази́ мѧ , ѿ ѕло́бы всѧ́кїѧ къ дᲂбрᲂдѣ́тели , є҆ди́на не и҆зᲂбраже́ннаѧ и҆ не и҆змѣ́ннаѧ трⷪ҇це , и҆ твᲂи́ми свѣ́ты ѡ҆свѧтѝ . сла́ва . Пᲂмы́сливъ пе́рвѣе премꙋ́дрѣ , сᲂста́вилъ є҆сѝ а҆́нг҃льскїѧ чи́ны , слꙋже́бныѧ твᲂеѧ̀ бл҃гᲂсти , трисᲂста́вныи бж҃е , с̾ ни́ми же прїимѝ и҆ на́шꙋ хвалꙋ̀ . и҆ ны́нѣ . И҆́же є҆стество́мъ несо́зданыи бг҃ъ прⷭ҇нᲂсꙋ́щныи , сᲂзда́ннᲂе чл҃ческᲂе прїи́мъ є҆стество̀ , вᲂѡ҆бразѝ во ст҃ѣ́й твᲂе́й ᲂу҆тро́бѣ , бцⷣе при́снѡ дв҃о .

пѣ́снь , є҃ . і҆рмо́съ . Бж҃їимъ свѣ́тᲂмъ тѝ бл҃же , ᲂу҆́тренюющихъ тѝ дш҃а любо́вїю , прᲂсвѣтѝ мᲂлю́сѧ , тѧ̀ вѣ́дѣти сло́во бж҃їе , и҆́стиннагѡ бг҃а , ѿ́ мрака грѣхо́внагѡ и҆зима́юща . Разꙋмѣ́юще є҆стество̀ бг҃ᲂнача́льнᲂе прᲂмысли́тельнᲂе и҆ спаси́тельнᲂе , всѣ́хъ сꙋ́щее влⷣко , трисвѣ́тлᲂе же є҆ди́но , к̾ тебѣ̀ ᲂу҆́тренюемъ , прᲂще́нїѧ прᲂсѧ́ще грѣхᲂпаде́нїемъ . Ѻ҆́ч҃е без̾нача́льныи бж҃е , и҆ сᲂприснᲂсꙋ́щныи сн҃е , и҆ дꙋ́ше ст҃ы́и , ᲂу҆твердѝ є҆динᲂнача́льнаѧ трⷪ҇це свᲂѧ̀ пѣвцы̀ , и҆ ѿ всѧ́кїѧ напа́сти и҆зба́ви и҆ ско́рби . сла́ва . Направлѧ́ѧ сїѧ́ньми бл҃гᲂдѣ́тельными , къ бл҃гᲂꙋгᲂже́нїю твᲂегѡ̀ трисᲂста́внагѡ бжⷭ҇тва̀ , сл҃нце сла́вы наꙋча́ѧ мѧ прⷭ҇нѡ , и҆ бжⷭ҇твенагѡ црⷭ҇твїѧ сᲂтвᲂрѝ прича́стника . и҆ нн҃ѣ . И҆́же всѧ̀ нᲂсѧ́и и҆ сᲂблюда́ѧ всеси́льнᲂю тѝ рꙋко́ю , сло́ве бж҃їи не и҆змѣ́нне , сᲂхранѝ и҆ сᲂблюда́й тебѐ сла́вѧщихъ , мл҃твами ро́ждьшїѧ тѧ̀ бг҃ᲂмт҃ре .

пѣ́снь , ѕ҃ . і҆рмо́съ . Жите́йскагѡ мо́рѧ вᲂз̾двиза́ема зрѧ̀ , напа́стей бꙋ́рею , в̾ ти́хо приста́нище прите́къ вᲂпїю́ ти , вᲂз̾ведѝ ѿ тлѝ живо́тъ мо́й мнᲂгᲂмлⷭ҇тиве . Премꙋ́дрᲂсть и҆ ра́зꙋмъ , бг҃ᲂнача́лїе трисвѣ́тлᲂе , пѣвце́мъ сѝ да́рꙋй , и҆ дᲂбро́ты лꙋча́ми свѣтᲂдѣ́тельныѧ , твᲂеѧ̀ бл҃гᲂсти ѡ҆зари́тисѧ всѣ́хъ спᲂдо́би .= Свѣ́те нераздѣ́льныи по сꙋществꙋ̀ , трисїѧ́нне , вседержи́тельне , непристꙋ́пне , сердца̀ ѡ҆зарѝ , вѣ́рнѡ хва́лѧщихъ держа́вꙋ твᲂю̀ , и҆ къ бжⷭ҇твенѣй любвѝ вперѝ . =сла́ва . Ст҃ъ є҆сѝ и҆ прест҃ъ , трⷪ҇це бж҃е на́шъ , в̾ тре́хъ со́бствѣхъ , сѣдѧ́и на прⷭ҇то́лѣ херꙋви́мстѣ , без̾нача́льныи ѻ҆́ч҃е , и҆ сᲂпрⷭ҇нᲂсꙋ́щныи сло́ве , рᲂди́выисѧ ѿ негѡ̀ пре́жде вѣ́къ . и҆ на пᲂслѣ́дᲂкъ вᲂплᲂти́выисѧ ѿ дв҃ы мт҃ре , сᲂдѣ́йствᲂмъ ст҃а́гѡ дх҃а , спасѝ и҆ пᲂми́лꙋй пᲂкланѧ́ющихсѧ держа́вѣ твᲂе́й . и҆ нн҃ѣ . Въ тѧ̀ всели́сѧ прⷭ҇нѡ дв҃о ꙗ҆́вѣ , сᲂдержи́тель и҆ гдⷭ҇ь всѣ́хъ , и҆ є҆ди́нꙋ трисїѧ́ннꙋ зра́кꙋ бжⷭ҇тва̀ , пᲂклᲂнѧ́тисѧ чл҃ки наказа̀ .

Гдⷭ҇и пᲂми́лꙋй , гⷤ . сѣда́ленъ , гла́съ , ѕ҃ . Ѻ҆́ч҃е и҆ сн҃е съ дх҃ᲂмъ ст҃ы́мъ , вᲂз̾зрѝ на ны̀ вѣ́рᲂю вᲂпїю́щихъ , и҆ сла́вѧщихъ держа́вꙋ твᲂю̀ млрⷭ҇де , со ѻ҆́гнеными бре́ннїи , и҆но́го бо бг҃а ра́звѣ тебѐ невѣ́мы . и҆ вᲂз̾зᲂвѝ пᲂю́щимъ тѧ̀ , а҆́зъ є҆́смь с̾ ва́ми , и҆ никто́же на вы̀ . сла́ва , и҆ нн҃ѣ , боⷢ҇ . Вᲂз̾зрѝ на ны̀ всепѣ́таѧ бцⷣе , вᲂсїѧ́й прᲂсвѣще́нїе въ срⷣца̀ пᲂмраче́наѧ , и҆ ѡ҆зарѝ ста́до твᲂѐ пречⷭ҇таѧ . є҆ли́ко бо хо́щеши мо́жеши , ꙗ҆́кѡ мт҃и сꙋ́щи зижди́телѧ свᲂегѡ̀ , и҆ вᲂпїе́ши лю́бѧщимъ тѧ̀ а҆́зъ є҆́смь с̾ ва́ми , и҆ никто́же на вы̀ .

пѣ́снь , з҃ . і҆рмо́съ . Хладᲂда́тельнꙋ ᲂу҆́бѡ пе́щь сᲂтвᲂрѝ а҆́нг҃лъ , прпⷣбнымъ дѣ́темъ , халдѣ́и же ѡ҆палѝ велѣ́нїемъ бж҃їимъ . мꙋчи́телѧ ᲂу҆вѣща̀ вᲂпи́ти , блгⷭ҇ве́нъ бг҃ъ ѻ҆ц҃ъ на́шихъ . Крѣ́пкꙋю ми мы́сль ᲂу҆стро́й , трисвѣ́тлаѧ ли́цы є҆ди́нице , є҆́же храни́ти и҆ блюстѝ бжⷭ҇твеныѧ за́пᲂвѣди твᲂѧ̀ , и҆ всегда̀ пѣ́ти вѣ́рнѡ , бл҃гᲂслᲂве́нъ є҆сѝ бж҃е ѻ҆ц҃ъ на́шихъ . Ꙗ҆́кѡ є҆ди́нствᲂмъ є҆стества̀ пѣва́емыи , не и҆зрече́ннѡ є҆ди́нственыи бг҃ъ , ли́цы же трⷪ҇цы нᲂсѧ̀ число̀ , сᲂблюдѝ всѣ́хъ на́съ , ѿ разли́чныхъ и҆скꙋше́нїи и҆ напа́стей . сла́ва . Сᲂє҆сте́ствена и҆ сᲂприснᲂсꙋ́щна сла́вимъ , є҆ди́нᲂго тѧ по сꙋществꙋ̀ бг҃а , сво́йствы неразмѣ́сными сᲂста́вными трⷪ҇це , разли́чнᲂе про́стѡ пред̾лага́юще , в̾ зра́цѣ непремѣ́нне ꙗ҆́вѣ . и҆ ны́нѣ . Бг҃ъ пресꙋ́щныи , прїѧ́тъ пречи́стаѧ , ѿ ᲂу҆тро́бы твᲂеѧ̀ чⷭ҇таѧ , на́ше чл҃кᲂлюбе́знѣ смѣше́нїе ꙗ҆́вѣ , и҆ всѣ́хъ наꙋчѝ вᲂпи́ти , бл҃гᲂслᲂве́нъ бг҃ъ ѻ҆ц҃ъ на́шихъ .

пѣ́снь , и҃ . і҆рмо́съ . и҆з̾ =пла́мени ст҃ы́мъ ро́сꙋ и҆стᲂчѝ , а҆ пра́веднагѡ же́ртвꙋ и҆ во́ды пᲂпалѝ , всѧ́ бо твᲂри́ши хрⷭ҇тѐ , є҆ли́ко хо́щеши , тѣ́мъ тѧ превᲂзно́симъ гдⷭ҇а во́ вѣки . Ѡ҆чище́нїе грѣхо́въ всѣ́хъ ско́рѡ пᲂда́ждь ми , и҆ страсте́й мнᲂгᲂѡ҆бра́зныхъ и҆збавле́нїе , сᲂѡ҆бра́знаѧ трⷪ҇це , є҆ди́нице трисᲂста́внаѧ , да тѧ̀ сла́влю те́плѣ тво́й мл҃твеникъ . Вᲂли́тель млⷭ҇ти и҆звѣ́ствᲂванъ , ꙗ҆́кѡ бг҃ъ ми́лᲂстивъ , всѣ́хъ пᲂми́лꙋй , трисвѣ́тлаѧ є҆ди́нице , и҆ трⷪ҇це пребл҃га́ѧ , славᲂсло́вѧщихъ твᲂѐ вели́чїе . =сла́ва . Ѿс́вѣта прⷭ҇нᲂсꙋ́щна , свѣ́тъ сᲂприснᲂсꙋ́щенъ ѻ҆ч҃ь ро́ждьшїисѧ сло́ве , съ дх҃ᲂмъ и҆схо́днымъ свѣ́тᲂмъ , вѣ́рᲂю сла́вимъ , и҆ превᲂзно́симъ є҆ди́нᲂго бг҃а непреста́ннѡ . и҆ ны́нѣ . Врача̀ чл҃кѡмъ пречⷭ҇таѧ рᲂдила̀ є҆сѝ , всеси́льна сло́ва хрⷭ҇та̀ и҆ гдⷭ҇а , прарᲂди́тельныѧ ꙗ҆́звы всѣ́хъ и҆сцѣлѧ́юща , превᲂзнᲂсѧ́щихъ є҆гѡ̀ во́ вѣки .

пѣ́снь , ѳ҃ . і҆рмо́съ . Бг҃а чл҃кѡмъ неꙋдо́бь ви́дѣти , на́ньже несмѣ́ютъ чи́ни а҆́нг҃льстїи зрѣ́ти . тᲂбо́ю бо пречⷭ҇таѧ ꙗ҆ви́сѧ на́мъ сло́во вᲂплᲂще́нно , є҆го́же велича́юще , съ нбⷭ҇ными вѡ́и тѧ̀ велича́емъ . Зрѣ́ти немᲂгꙋ́ще чи́нᲂве херꙋви́мстїи , влⷣко дᲂбро́ты сла́вы твᲂеѧ̀ , кри́лы пᲂкрыва́ющесѧ , непреста́ннѡ тро́ично пѣ́нїе вᲂпїю́тъ тѝ , и҆ трисᲂста́внꙋю твᲂегѡ̀ бг҃ᲂнача́лїѧ є҆ди́нственагѡ держа́вꙋ сла́вѧтъ . Твᲂѧ̀ сїѧ́нїѧ сл҃нце незахᲂди́мᲂе , твᲂи́мъ рабо́мъ пᲂда́ждь в̾ срⷣца̀ . и҆ прᲂсвѣтѝ дꙋ́ши , и҆ и҆зба́ви ѿ прегрѣше́нїи мно́гихъ , є҆ди́не всеми́лᲂстиве , и҆ трисᲂста́вне , и҆ нетлѣ́ннѣй тѝ жи́зни на́съ спᲂдо́би . сла́ва . И҆́же свѣ́тъ є҆ди́нственыи , и҆ трисо́лнечныи , и҆ свѣтᲂда́тельныи , бжⷭ҇тво̀ сы́и , ѡ҆зарѝ вѣ́рᲂю тѧ̀ пᲂю́щихъ , и҆ ѿ мра́чнагѡ и҆зба́ви ѕлᲂдѣ́йства , и҆ спᲂдо́би свѣтлѣ́йшихъ ти селе́нїи , ꙗ҆́кѡ бл҃гъ . и҆ ны́нѣ . Премꙋ́дрѣ дре́вле со́здавъ чл҃ка , тво́й сн҃ъ дв҃о , и҆ и҆стлѣ́вша ѡ҆бнᲂвѝ , тᲂбо́ю препѣ́таѧ , и҆ бжⷭ҇твенагѡ свѣ́та свѣ́тлᲂсти трисо́лнечныѧ , всѣ́хъ и҆спо́лни , и҆́же тебѐ бцⷣꙋ и҆́стиннꙋю вѣ́рᲂю сла́вѧщихъ .

пᲂсе́м̾ , припѣ́вы , григо́рїѧ синаи́та . дᲂсто́йно є҆́сть бг҃ᲂлѣ́пнѡ є҆́же сла́вити тѧ̀ трⷪ҇це ст҃а́ѧ . и҆ мл҃тва , всемᲂгꙋ́щаѧ и҆ живᲂтвᲂрѧ́щаѧ ст҃а́ѧ трⷪ҇це . пи́сано , на пᲂслѣдѝ в̾ кни́зѣ се́й .

Въ нлⷣю на ᲂу҆́тренѣй слꙋ́жбѣ . нача́ло и҆ всѐ вᲂслѣ́дᲂванїе твᲂри́мъ , ꙗ҆́кᲂже ᲂу҆ка́зано въ є҃ мъ гла́сѣ . та́же , по є҆ѯа̀ ѱл҃мѣ́хъ . на бг҃ъ гдⷭ҇ь . трᲂпа́рь , вᲂскрⷭ҇нъ . гла́съ , ѕ҃ . А҆́нг҃льскїѧ си́лы на́ грᲂбѣ твᲂе́мъ , стрегꙋ́щаѧ ѡ҆мертви́ша . и҆ стᲂѧ́ше мр҃і́ѧ при́ грᲂбѣ , и҆́щꙋщи пречⷭ҇тагѡ тѣ́ла твᲂегѡ̀ . и҆спрᲂве́рже а҆́да не и҆скꙋ́шьсѧ ѿ негѡ̀ . срѣ́те дв҃ꙋ да́рꙋѧи живо́тъ , вᲂскр҃съ и҆з̾ ме́ртвыхъ , гдⷭ҇и сла́ва тебѣ̀ . двⷤа . сла́ва , ст҃о́мꙋ , и҆́же тᲂгѡ̀ днѐ .= и҆ ны́нѣ , боⷢ҇ . по́ гласꙋ трᲂпарѧ̀ ст҃а́гѡ . =а҆́ще ли не и҆́мать , то̀ гл҃емъ : сла́ва , и҆ нн҃ѣ , боⷢ҇ . И҆́же бл҃гᲂслᲂве́нꙋю нарекі́и мт҃рь себѣ̀ , прїи́де на́ стрⷭ҇ть во́лею свᲂе́ю , вᲂсїѧ́въ на крⷭ҇тѣ̀ , взыска́ти хᲂтѧ̀ а҆да́ма . гл҃ѧ а҆́нг҃лѡмъ , сра́дꙋйтемисѧ , ꙗ҆́кѡ ѡ҆брѣ́тесѧ и҆зги́бшаѧ дра́хма . и҆́же всѧ̀ мꙋ́дрѣ ᲂу҆стро́ивыи , гдⷭ҇и сла́ва тебѣ̀ .

по а҃ , стихᲂло́гїи . сѣда́ленъ , вᲂскрⷭ҇нъ . гла́съ , ѕ҃ . Гро́бꙋ ѿве́рстꙋ сꙋ́щꙋ , а҆́дꙋ пла́чꙋщꙋсѧ . ма́рїѧ вᲂпїѧ́ше к̾ скры́вшимсѧ а҆пⷭ҇лѡмъ , и҆зы́дите винᲂгра́да дѣ́лателїе , прᲂпᲂвѣ́дите вᲂскрⷭ҇нїѧ сло́во , вᲂскр҃се бо гдⷭ҇ь , пᲂдаѧ̀ ми́рᲂви ве́лїю млⷭ҇ть . сти́хъ : вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ , незабꙋ́ди ни́щихъ свᲂи́хъ до кᲂнца̀ . Гро́бꙋ ѿве́рстꙋ сꙋ́щꙋ , а҆́дꙋ пла́чꙋщꙋсѧ . ма́рїѧ вᲂпїѧ́ше к̾ скры́вшимсѧ а҆пⷭ҇лѡмъ , и҆зы́дите винᲂгра́да дѣ́лателїе , прᲂпᲂвѣ́дите вᲂскрⷭ҇нїѧ сло́во , вᲂскр҃се бо гдⷭ҇ь , пᲂдаѧ̀ ми́рᲂви ве́лїю млⷭ҇ть . сла́ва , и҆ ны́нѣ , боⷢ҇ . Бцⷣе дв҃о мᲂлѝ сн҃а свᲂегѡ̀ , во́лею пригво́ждьшагᲂсѧ на крⷭ҇тѣ̀ , и҆ вᲂскрⷭ҇шаго и҆з̾ ме́ртвыхъ хрⷭ҇та̀ бг҃а на́шегѡ , спасти́сѧ дш҃а́мъ на́шимъ .

по в҃ , стихᲂло́гїи , сѣда́ленъ . гла́съ , ѕ҃ . Гдⷭ҇и , пред̾стᲂѧ́ше гро́бꙋ твᲂемꙋ̀ ма́рїѧ магдалы́ни , и҆ пла́чꙋщи вᲂпїѧ́ше , вертᲂгра́дарѧ тѧ мнѧ́щи гл҃аше , гдѣ̀ пᲂлᲂжи́лъ є҆сѝ вѣ́чныи живо́тъ . гдѣ̀ скры́лъ є҆сѝ и҆́же на прⷭ҇то́лѣ херꙋви́мстѣмъ сѣдѧ́щаго ; стрегꙋ́щїи бо є҆гѡ̀ , ѿ́ страха ѡ҆мертвѣ́ша . и҆лѝ гдⷭ҇а мᲂегѡ̀ да́ждь ми ; и҆лѝ со мно́ю вᲂзᲂпі́и , и҆́же въ ме́ртвыхъ бы́въ , и҆ ме́ртвыѧ вᲂскр҃си́выи , гдⷭ҇и сла́ва тебѣ̀ . сти́хъ : и҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ , пᲂвѣ́мъ всѧ̀ чꙋдеса̀ твᲂѧ̀ . Гдⷭ҇и , пред̾стᲂѧ́ше гро́бꙋ твᲂемꙋ̀ ма́рїѧ магдалы́ни , и҆ пла́чꙋщи вᲂпїѧ́ше , вертᲂгра́дарѧ тѧ мнѧ́щи гл҃аше , гдѣ̀ пᲂлᲂжи́лъ є҆сѝ вѣ́чныи живо́тъ . гдѣ̀ скры́лъ є҆сѝ и҆́же на прⷭ҇то́лѣ херꙋви́мстѣмъ сѣдѧ́щаго ; стрегꙋ́щїи бо є҆гѡ̀ , ѿ́ страха ѡ҆мертвѣ́ша . и҆лѝ гдⷭ҇а мᲂегѡ̀ да́ждь ми ; и҆лѝ со мно́ю вᲂзᲂпі́и , и҆́же въ ме́ртвыхъ бы́въ , и҆ ме́ртвыѧ вᲂскр҃си́выи , гдⷭ҇и сла́ва тебѣ̀ . сла́ва , и҆ нн҃ѣ , боⷢ҇ . Пред̾написꙋ́етъ гедеѡ́нъ зача́тїе , и҆ сказꙋ́етъ дв҃дъ ржⷭ҇тво̀ твᲂѐ препѣ́таѧ бцⷣе дв҃о . сни́де бо ꙗ҆́кѡ до́ждь на рꙋно̀ , сло́во во ᲂу҆тро́бꙋ твᲂю̀ . и҆зрасти́ла є҆сѝ без̾ сѣ́мене землѐ ст҃а́ѧ , ми́рꙋ спасе́нїе хрⷭ҇та̀ бг҃а на́шегѡ ѡ҆бра́дᲂваннаѧ .

та́же , кафи́сма : бл҃же́ни непᲂро́чнїи .= пᲂсе́м̾ , трᲂпарѝ : а҆́нг҃льскїи сᲂбо́ръ . пи́саны , в̾ кᲂнцѣ̀ кни́ги сеѧ̀ . =та́же , і҆єре́й глаго́летъ , є҆ктенїю̀ ма́лꙋю . по вᲂз̾гла́сѣ , и҆пако́й . Во́льнᲂю и҆ живᲂтво́рнᲂю тѝ сме́ртїю хрⷭ҇тѐ бж҃е , врата̀ а҆́дᲂва сᲂкрꙋши́въ ꙗ҆́кѡ бг҃ъ . и҆ ѿве́рзлъ є҆сѝ на́мъ дре́внїи ра́й . и҆ вᲂскр҃съ и҆з̾ ме́ртвыхъ , и҆зба́ви и҆з̾ и҆стлѣ́нїѧ живо́тъ на́шъ .

=степе́нны . гла́съ , ѕ҃ . а҆нтифѡ́нъ , а҃ . пᲂе́мъ по два́жды . на́ =нб҃о ѻ҆́чи мᲂѝ вᲂз̾вᲂжꙋ̀ , к̾ тебѣ̀ сло́ве , ᲂу҆ще́дри мѧ да живꙋ́ ти . Пᲂми́лꙋй на́съ ᲂу҆ничиже́нныхъ , ᲂу҆стрᲂѧ́ѧ бл҃гᲂпᲂтре́бныѧ тѝ сᲂсꙋ́ды сло́ве . Ст҃ы́мъ дх҃ᲂмъ , всѧ́ка спасе́ннаѧ вина̀ . а҆́ще ко́емꙋ сѐ по дᲂстᲂѧ́нїю д̾хне́тъ , ско́рѡ в̾зе́млетъ ѿ земны́хъ , вᲂзвыша́етъ , вᲂзвраща́етъ , и҆ ᲂу҆стрᲂѧ́етъ гᲂрѣ̀ .

а҆нтифо́нъ , в҃ . А҆́ще не гдⷭ҇ь бы́лъ бы в̾ на́съ , ни є҆ди́нъ же ѿ на́съ прᲂти́вꙋ вᲂз̾мо́глъ бы , вра́жїимъ бра́немъ . ѡ҆дᲂлѣ́ти пᲂбѣжда́ющїи бо ѿ здѣ̀ вᲂзно́сѧтсѧ . Зꙋбы̀ и҆́хъ да неѧ́та бꙋ́детъ дш҃а мᲂѧ̀ , ꙗ҆́кѡ птене́цъ сло́ве . ᲂу҆вы̀ мнѣ̀ , ка́кѡ хᲂщꙋ̀ ѿ врага̀ и҆з̾бы́ти грѣхᲂлюби́въ сы́и . Ст҃ы́мъ дх҃ᲂмъ , ѡ҆бᲂже́нїе всѣ́мъ , бл҃гᲂвᲂле́нїе , и҆ ра́зꙋмъ , ми́ръ , и҆ бл҃гᲂслᲂве́нїе . равнᲂмо́щенъ бо є҆́сть ѻ҆ц҃ꙋ и҆ сло́вꙋ .

а҆нтифо́нъ , г҃ . Надѣ́ющїисѧ на́ гдⷭ҇а , враго́мъ стра́шни , и҆ всѣ́мъ ди́вни , гᲂрѣ́ бо зрѧ́тъ . Въ без̾зако́нїи рꙋ́къ свᲂи́хъ , пра́ведныхъ жре́бїи , пᲂмо́щника тѧ и҆мѣ́ѧ сп҃се , непрᲂстрꙋ́тъ . Ст҃а́гѡ дх҃а , держа́ва на всѣ́хъ . є҆мꙋ́же вы́шнѧѧ во́инства пᲂкланѧ́ютсѧ , со всѧ́кимъ дыха́нїемъ до́льнимъ .

і҆єре́й , глаго́летъ : во́нмемъ .= ми́ръ всѣ́мъ . премꙋ́дрᲂсть . прᲂки́менъ , ѱл҃о́мъ , дв҃дᲂвъ . Гдⷭ҇и вᲂздви́гни си́лꙋ твᲂю̀ , и҆ прїидѝ да спасе́ши ны . =сти́хъ : пасы́и і҆зра́илѧ , вᲂнмѝ наставлѧ́ѧи ꙗ҆́кѡ ѻ҆вча̀ і҆ѡ́сифа .

і҆єре́й : ꙗ҆́кѡ ст҃ъ є҆сѝ гдⷭ҇и бж҃е . та́же : Всѧ́ко дыха́нїе да хва́литъ гдⷭ҇а . сти́хъ : хвали́те бг҃а во ст҃ы́хъ є҆гѡ̀ , хвали́те є҆гѡ̀ во ᲂу҆тверже́нїи си́лъ є҆гѡ̀ . і҆єре́й : и҆ =ѡ҆спᲂдо́битисѧ на́мъ дᲂсто́йнѡ . =пᲂе́мъ : Гдⷭ҇и пᲂми́лꙋй , гⷤ . і҆єре́й : премꙋ́дрᲂсть , про́сти ᲂу҆слы́шимъ ст҃а́гѡ . і҆єре́й , гл҃етъ , є҆ѵⷢ҇а́лїе рѧ́дꙋ . вᲂскрⷭ҇нїе хрⷭ҇то́во , аⷤ . та́же , ѱало́мъ , н҃ . пᲂми́лꙋй мѧ бж҃е . сла́ва . мл҃твъ ра́ди а҆пⷭ҇лъ , млⷭ҇тиве ѡ҆чи́сти мно́жество сᲂгрѣше́нїи на́шихъ .= и҆ ны́нѣ . мл҃твъ ра́ди бцⷣы , млⷭ҇тиве ѡ҆чи́сти мно́жество сᲂгрѣше́нїи на́шихъ . =та́же , пᲂми́лꙋй мѧ бж҃е по вели́цѣй млⷭ҇ти твᲂе́й по мно́гимъ щедро́тамъ твᲂи́мъ , ѡ҆чи́сти без̾зако́нїѧ мᲂѧ̀ , бж҃е сп҃се мо́й . стⷯра , вᲂскрⷭ҇на . гла́съ , ѕ҃ . Вᲂскр҃съ і҆с҃ъ ѿ́ грᲂба , ꙗ҆́кᲂже прᲂречѐ . и҆ дарᲂва̀ на́мъ живо́тъ вѣ́чныи , ми́ръ и҆ ве́лїю млⷭ҇ть . і҆єре́й , гл҃етъ : спасѝ бж҃е лю́ди . пᲂе́мъ : Гдⷭ҇и пᲂми́лꙋй , ві҃ . і҆єре́й , вᲂз̾гла́съ : ми́лᲂстїю и҆ щедро́тами . Кано́нъ , вᲂскрⷭ҇нъ . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́ сꙋхꙋ хᲂди́въ і҆и҃ль , по бе́зднѣ стᲂпа́ми , гᲂни́телѧ фараѡ́на , ви́дѧ пᲂтᲂплѧ́ема , бг҃ꙋ пᲂбѣ́днꙋю пѣ́снь пᲂе́мъ вᲂпїѧ́ше . запѣ́въ : сла́ва гдⷭ҇и вᲂскрⷭ҇нїю твᲂемꙋ̀ . Распрᲂсте́ртᲂма дла́ньма на крⷭ҇тѣ̀ , ѻ҆те́ческагѡ и҆спо́лнилъ є҆сѝ бл҃гᲂвᲂле́нїѧ всѧ́ческаѧ і҆с҃е бл҃же . тѣ́мже пᲂбѣ́днꙋю пѣ́снь всѝ тебѣ̀ пᲂе́мъ . Стра́хᲂмъ тебѣ̀ ꙗ҆́кѡ раба̀ сме́рть пᲂвелѣ́на , пристꙋпѝ ко влⷣцѣ живᲂтꙋ̀ . тᲂѧ̀ ра́ди раздава́ющꙋ на́мъ , без̾кᲂне́чныи живо́тъ и҆ вᲂскрⷭ҇нїе . боⷢ҇ . Свᲂего́ си прїе́мши сᲂдѣ́телѧ ꙗ҆́кѡ са́мъ вᲂсхᲂтѣ̀ , ѿ без̾ сѣ́меннагѡ чре́ва ти , па́че ᲂу҆ма̀ вᲂплᲂща́ема чⷭ҇таѧ , тва́ремъ вᲂи́стинꙋ ꙗ҆ви́сѧ влⷣчце .

Дрꙋгі́и кано́нъ , крⷭ҇тᲂвᲂскрⷭ҇нъ . і҆рмо́съ . Вᲂлно́ю мᲂрско́ю . запѣ́въ : сла́ва гдⷭ҇и крⷭ҇тꙋ̀ твᲂемꙋ̀ и҆ вᲂскрⷭ҇нїю . Стра́хᲂмъ ти сме́ртнаѧ врата̀ ѿверза́ютсѧ , и҆ растерза́ютсѧ вереѝ вѣ́чныѧ . честны́мъ бо ти схᲂжде́нїемъ вᲂскрⷭ҇нꙋша дре́внїи мертвецы̀ , бл҃гᲂда́рственѡ пᲂю́ще , хрⷭ҇тѐ , вᲂскрⷭ҇нїе твᲂѐ .= Ра́нѡ жены̀ на́ грᲂбъ прїидо́ша , ми́рѡ нᲂсѧ́ще со слеза́ми , въ бѣ́лыхъ ри́захъ ви́дѣша блиста́ющасѧ а҆́нг҃ла , къ ни́мъ в̾зыва́юща , вᲂскр҃се и҆з̾ ме́ртвыхъ живо́тъ всѣ́хъ . =боⷢ҇ . Ра́дꙋисѧ свѣтᲂно́снаѧ сѣ́не , и҆ свѣ́щниче цр҃кви , и҆ трапе́зо , и҆ гᲂро̀ ст҃а́ѧ . ра́дꙋисѧ пᲂла́то сла́вы , и҆ престо́лѣ бг҃а на́шегѡ . ра́дꙋисѧ стѣно̀ не ѡ҆бᲂри́маѧ , на́мъ вᲂспѣва́ющимъ тѧ̀ .

и҆́нъ , кано́нъ , прест҃ѣ́й бцⷣѣ . є҆мꙋ́же краегра́несїе , сицево̀ . мт҃и бж҃їѧ , незави́стнꙋю мѝ да́ждь ра́дᲂсть . і҆рмо́съ . Ꙗ҆́кѡ по́ сꙋхꙋ хᲂди́въ . запѣ́въ : прест҃а́ѧ гжⷭ҇е бцⷣе спасѝ на́съ . Причасти́вшисѧ є҆́вва садꙋ̀ преслꙋша́нїѧ пи́щи , клѧ́твꙋ в̾ведѐ , но сїю̀ раз̾рꙋши́ла є҆сѝ чи́стаѧ , бл҃гᲂслᲂве́нїю нача́льника хрⷭ҇та̀ ро́ждьши . Би́сера ѿ бжⷭ҇твеныѧ мо́лнїи , хрⷭ҇та̀ ро́ждьши , стрⷭ҇те́й мᲂи́хъ мглꙋ̀ , и҆ сᲂгрѣше́нїи смꙋще́нїе разᲂрѝ чи́стаѧ , свѣ́тᲂмъ твᲂеѧ̀ свѣ́тлᲂсти . Ꙗ҆зы́кᲂмъ ча́ѧнїе , ѿ тебѐ вᲂплᲂща́емаго бг҃а , і҆а́кѡвъ прᲂви́дѧше та́йно , мы́сленыма ѻ҆чи́ма , и҆збавлѧ́ющаго на́съ хᲂда́тайствᲂмъ ти . Ѡ҆скꙋдѣ́вшимъ кнѧзе́мъ ѿ кᲂлѣ́на і҆ꙋ́дѡва всечⷭ҇таѧ , сн҃ъ тво́й и҆ бг҃ъ прᲂше́дъ во́ждь , земны́мъ кᲂнце́мъ , и҆́стинно ны́нѣ вᲂцр҃и́сѧ . и҆́нъ , кано́нъ , в̾ минѣ́и , ст҃о́мꙋ . катава́сїѧ , по ᲂу҆ста́вꙋ .

пѣ́снь , г҃ . і҆рмо́съ . Нѣ́сть ст҃а ꙗ҆́кᲂже ты̀ , гдⷭ҇и бж҃е мо́й , вᲂзнесы́и ро́гъ вѣ́рныхъ си бл҃же , и҆ ᲂу҆тве́рждь и҆́хъ на ка́мени и҆спᲂвѣ́данїѧ тѝ . Бг҃а распина́ема пло́тїю зрѧ́щи всѧ̀ тва́рь , распада́шесѧ стра́хᲂмъ ; но вседержа́щею дла́нїю на́съ ра́ди распѧ́таго , крѣ́пкѡ держи́ма бѣ̀ . Сме́ртїю сме́рть разᲂре́на , лежи́тъ ѻ҆каѧ́ннаѧ без̾дыха́нїѧ , живᲂта́ бо нетерпѧ́щи , бжⷭ҇твенагѡ прираже́нїѧ , ᲂу҆мерщвѧ́етсѧ крѣ́пкїи , и҆ да́рꙋетсѧ всѣ́мъ вᲂскрⷭ҇нїе . боⷢ҇ . Бжⷭ҇твенаго ржⷭ҇тва́ ти чⷭ҇таѧ , всѧ́кїи є҆стества̀ чи́нъ превᲂсхо́дитъ чꙋ́до . бг҃а бо пресꙋ́щна зачала̀ є҆сѝ во́ чревѣ , и҆ ро́ждьши пребыва́еши при́снѡ дв҃аѧ .

и҆́нъ , і҆рмо́съ . Тебѐ навᲂда́хъ .= Тебѐ вᲂскрⷭ҇шаго тридне́вно , и҆ ꙗ҆́вльшагᲂсѧ жена́мъ мѷрѡно́сицамъ сп҃се , и҆ тѣ́мъ ра́дꙋйтесѧ ре́кша , пѣснᲂсло́вѧще вᲂпїе́мъ , нѣ́сть ст҃а , ра́звѣ тебѐ гдⷭ҇и чл҃кᲂлю́бче . Сла́ва твᲂемꙋ̀ вᲂста́нїю сп҃се на́шъ . ꙗ҆́кѡ на́съ ѿ а҆́дᲂва тлѣ́нїѧ , и҆ сме́рти и҆зба́вилъ є҆сѝ , ꙗ҆́кѡ всеси́ленъ , и҆ пᲂю́ще гл҃емъ , нѣ́сть ст҃а ра́звѣ тебѐ гдⷭ҇и , чл҃кᲂлю́бче . =боⷢ҇ . Тебѐ и҆́же ѿ ст҃ы́ѧ бг҃ᲂѻ҆трᲂкᲂви́цы вᲂпло́щшасѧ сло́ва , и҆ спа́сшаго ѿ пре́лести па́дшаго первᲂзда́нна , бг҃ᲂлѣ́пнѡ сла́вимъ . нѣ́сть ст҃а ра́звѣ тебѐ гдⷭ҇и чл҃кᲂлю́бче .

и҆́нъ , і҆рмо́съ . Нѣ́сть ст҃а ꙗ҆́кᲂже .= Т=лѣ́ннꙋю и҆ сме́ртнꙋю мᲂю̀ пло́ть всечⷭ҇таѧ бг҃ᲂмт҃и , ѿ ᲂу҆тро́бы твᲂеѧ̀ несказа́ннѡ прїе́мъ бл҃гі́и , и҆ ѡ҆нетлѣ́нивъ тꙋ̀ , вѣ́чно себѣ̀ свѧза́лъ є҆́сть . Бг҃а вᲂплᲂща́ема и҆з̾ тебѐ зрѧ́ще дв҃о , ᲂу҆дивлѧ́хꙋсѧ стра́хᲂмъ а҆́нг҃льстїи ли́цы , и҆ ꙗ҆́кѡ мт҃рь бж҃їю , немо́лчными пѣ́сньми тѧ̀ сла́вѧхꙋ . Оу҆жасе́сѧ прᲂро́къ данїи́лъ , го́рꙋ тѧ мы́сленꙋю зрѧ̀ бг҃ᲂмт҃и , ѿ неѧ́же ка́мень ѿсѣче́сѧ крᲂмѣ̀ рꙋ́къ , и҆ бѣсо́вскаѧ жили́ща держа́вно сᲂкрꙋшѝ . Немо́жетъ тѧ̀ сло́во чл҃ческᲂе , ни ꙗ҆зы́къ дв҃о пᲂхвали́ти дᲂсто́йнѡ . ѿ тебе́ бо всечи́стаѧ , без̾ сѣ́мене жизнᲂда́вецъ бг҃ъ , вᲂплᲂти́тисѧ бл҃гᲂи҆зво́ли .

і҆єре́й гл҃етъ , є҆ктенїю̀ ма́лꙋю . та́же : кᲂнда́къ , и҆ и҆́кᲂсъ , и҆ сѣда́лен̾ , в̾ минѣ́и , ст҃о́мꙋ . а҆́ще є҆́сть .

пѣ́снь , д҃ . і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ цр҃кви бг҃ᲂлѣ́пнѡ зᲂве́тъ вᲂпїю́щи , ѿ со́вѣсти чи́сты ѡ҆́ гдⷭ҇ѣ пра́зднꙋющи . Дре́во прᲂцвѣло̀ є҆́сть хрⷭ҇тѐ сꙋ́щаго живᲂта̀ , жи́знь на́мъ и҆зрастѝ . крⷭ҇тъ бо вᲂдрꙋзи́сѧ , и҆ всѧ̀ напᲂи́въ кро́вїю и҆ вᲂдо́ю и҆з̾ нетлѣ́нныхъ ти ре́бръ . Нектᲂмꙋ̀ ѕмі́й мнѣ̀ , ло́жнѡ ѡ҆бᲂже́нїе влага́етъ . хрⷭ҇то́съ бо бл҃гᲂдѣ́тель чл҃чꙋ є҆стествꙋ̀ , ны́нѣ невᲂзбра́ннѡ стезю̀ живᲂтꙋ̀ мᲂемꙋ̀ ᲂу҆стро́й . боⷢ҇ . Ꙗ҆́кѡ вᲂи́стинꙋ не и҆з̾гл҃анна сꙋ́ть , и҆ непᲂсти́жима твᲂегѡ̀ бцⷣе бг҃ᲂлѣ́пнаго ржⷭ҇тва̀ , сꙋ́щимъ на землѝ , и҆ нбⷭ҇нымъ прⷭ҇нѡ дв҃о та́инство .

и҆́нъ , і҆рмо́съ . Є҆́же на крⷭ҇тѣ̀ .= И҆́же в̾ вы́шнихъ рᲂди́телю со прⷭ҇нᲂсꙋ́щныи , пло́тьски на́ древѣ за на́съ пригвᲂзди́сѧ , разрꙋша́ѧ клѧ́твꙋ ю҆́же в̾ раѝ , ꙗ҆́ко всеси́ленъ . Не и҆стлѣ̀ во́ грᲂбѣ пречⷭ҇таѧ пло́ть и҆зба́вителѧ лежа́щи , но ꙗ҆́кѡ всеси́ленъ сᲂкрꙋшѝ а҆́дᲂвы вереѝ , и҆ вᲂскр҃се во сла́вѣ хрⷭ҇тѐ тридне́вно . =боⷢ҇ . Мѷрѡно́сицамъ сп҃съ на́шъ вᲂскр҃съ и҆з̾ ме́ртвыхъ , вᲂзгласѝ ра́дꙋйтесѧ . и҆ к̾ ни́мъ вᲂзᲂпѝ , ше́дше про́чее мꙋ́дрымъ а҆пⷭ҇лѡмъ бл҃гᲂвѣсти́те .

и҆́нъ , і҆рмо́съ . Хрⷭ҇то́съ мнѣ̀ си́ла .= П=ᲂе́мъ пречи́стаѧ тебѐ всенепᲂро́чнꙋю , тебѐ ра́ди спа́сшїисѧ , и҆ бл҃гᲂче́стнѡ пᲂю́ще вᲂпїе́мъ бл҃гᲂслᲂве́на , ꙗ҆́же бг҃а пло́тїю ро́ждьшаѧ . Свѣ́тъ незахᲂди́мыи дв҃о ро́ждьши , во тмѣ̀ сꙋ́щимъ житїѧ̀ , пло́тїю свѣтѧ́щь всебл҃же́ннаѧ . и҆ пᲂю́щимъ тѧ при́снѡ дв҃о , ра́дᲂсть и҆стᲂчи́ла є҆сѝ . Бл҃гᲂда́ть прᲂцвѣтѐ , зако́нъ преста̀ , тебѐ ра́ди пречⷭ҇та́ѧ . ты́ бо чⷭ҇таѧ рᲂдила̀ є҆сѝ гдⷭ҇а , даю́щаго на́мъ прⷭ҇нѡ дв҃о ѡ҆ставле́нїе . Ме́ртва мѧ пᲂказа̀ сада̀ в̾кꙋше́нїе , жи́зни же дре́во ѿ тебѐ ꙗ҆́вльшеесѧ , всечⷭ҇таѧ ѡ҆живѝ , и҆ раѧ̀ пи́щи наслѣ́дника мѧ ᲂу҆стро́й .

пѣ́снь , є҃ . і҆рмо́съ . Бж҃їимъ свѣ́тᲂмъ тѝ бл҃же , ᲂу҆́тренюющихъ тѝ дш҃а любо́вїю , прᲂсвѣтѝ мᲂлю́сѧ , тѧ̀ вѣ́дѣти сло́во бж҃їе , и҆́стиннагѡ бг҃а , ѿ́ мрака грѣхо́внагѡ и҆зима́юща . Ѿстꙋпа́етъ ми херꙋви́мъ ны́нѣ влⷣко , и҆ пла́меннᲂе ѻ҆рꙋ́жїе плещѝ мнѣ̀ дае́тъ , тѧ̀ ви́дѣвше сло́во бж҃їе и҆́стиннаго бг҃а , разбо́йникꙋ пꙋ́ть в̾ ра́й сᲂтво́ршаго . Нектᲂмꙋ̀ бᲂю́сѧ , є҆́же в̾ зе́млю влⷣко хрⷭ҇тѐ вᲂзвраще́нїѧ . ты́ бо ѿ землѝ вᲂз̾ве́лъ мѧ є҆сѝ забве́на , ра́ди бл҃гᲂꙋтро́бїѧ мно́гагѡ , к̾ высᲂтѣ̀ нетлѣ́нїѧ , вᲂскрⷭ҇нїемъ свᲂи́мъ . боⷢ҇ . И҆́же бцⷣꙋ тѧ ѿ дш҃и и҆спᲂвѣ́дающїѧ , влⷣчце ми́рꙋ бл҃га́ѧ спаса́й . тебе́ бо застꙋпле́нїе непᲂбѣди́мо и҆́мамы , и҆́стиннꙋю бг҃ᲂрᲂди́тельницꙋ .

и҆́нъ , і҆рмо́съ . Бг҃ᲂѧвле́нїѧ ти хрⷭ҇тѐ .= За милᲂсе́рдїе бл҃же є҆́же ѡ҆ на́съ , прїе́мъ пло́ть , во́лею на крⷭ҇тѣ̀ пригво́ждьсѧ менѐ ра́ди , и҆́же дре́вле ѡ҆ста́вльша , ст҃ꙋ́ю ти за́пᲂвѣдь снѣ́дїю въ раѝ , и҆ ᲂу҆мира́еши чл҃кᲂлѣ́пно , живо́тъ да́рꙋѧ ми . Тебѐ и҆́же на престо́лѣ ꙗ҆́кѡ бг҃а , и҆ въ ме́ртвыхъ ꙗ҆́кѡ сме́ртна в̾мѣни́вшасѧ , ви́дѣвъ а҆́дъ и҆з̾блева̀ , ꙗ҆́же и҆мѧ́ше пре́жде ѻ҆каѧ́нныи . и҆ тридне́вно си́льне , сᲂвᲂскр҃си́лъ є҆сѝ ѿпа́дшее є҆стество̀ , са́мъ же ми́ръ ве́сь хрⷭ҇тѐ прᲂсвѣти́лъ є҆сѝ . =боⷢ҇ . Не и҆стлѣ̀ ᲂу҆тро́бᲂю , дв҃ческᲂе ржⷭ҇тво̀ пᲂд̾є́мши . но па́ки ꙗ҆́кᲂже пре́жде пребыла̀ є҆сѝ , бцⷣе мт҃и не и҆скꙋсᲂбра́чнаѧ . тѣ́мже мᲂли́сѧ прилѣ́жно ѡ҆ рабѣ́хъ свᲂи́хъ , тебѐ славᲂсло́вѧщихъ , и҆зба́витисѧ ѿ и҆скꙋше́нїи и҆ бѣ́дъ .

и҆́нъ , і҆рмо́съ . Бж҃їимъ свѣ́тᲂмъ .= Ч=истᲂто́ю вᲂсїѧ́вши свѣ́тлᲂстно , бжⷭ҇твенᲂе ᲂу҆гᲂто́вано бы́сть жили́ще влⷣцѣ всепѣ́таѧ . ты́ бо є҆ди́на мт҃и ꙗ҆ви́сѧ вᲂи́стинꙋ бж҃їѧ , рꙋка́ма ꙗ҆́кᲂже младе́нца сегѡ̀ нᲂси́вши . Нᲂсѧ́щи дᲂбро́тꙋ мы́сленꙋю , и҆зрѧ́дныѧ ти дш҃и , невѣ́ста бж҃їѧ была̀ є҆сѝ . запечатлѣ́нна дв҃ьствᲂмъ чи́стаѧ . и҆ свѣ́тᲂмъ чистᲂты̀ , ми́ра прᲂсвѣща́ющи . Да рыда́етъ со́нмъ ѕлᲂчести́выхъ , не и҆спᲂвѣ́дающихъ тѧ , ꙗ҆́вѣ чи́стꙋю бж҃їю мт҃рь . ты́ бо врата̀ бжⷭ҇твенагѡ свѣ́та пᲂказа́сѧ на́мъ , мра́къ сᲂгрѣше́нїи разᲂрѧ́ющи .

пѣ́снь , ѕ҃ . і҆рмо́съ . Жите́йскагѡ мо́рѧ вᲂз̾двиза́ема зрѧ̀ , напа́стей бꙋ́рею , в̾ ти́хо приста́нище прите́къ вᲂпїю́ ти , вᲂз̾ведѝ ѿ тлѝ живо́тъ мо́й мнᲂгᲂмлⷭ҇тиве . Распина́емь влⷣко , гвᲂздьмѝ ᲂу҆́бѡ , клѧ́твꙋ ю҆́же на на́съ пᲂтреби́лъ є҆сѝ . кᲂпїе́мъ же прᲂбᲂда́емь в̾ ре́бра , а҆да́мᲂво рꙋкᲂписа́нїе растерза́въ , ми́ръ свᲂбᲂди́лъ є҆сѝ . А҆да́мъ низведе́сѧ , ле́стїю запѧ́тъ бы́въ ко а҆́дᲂвѣ про́пасти . но и҆́же є҆стество́мъ бг҃ъ сы́и млⷭ҇тивъ , сᲂше́лъ є҆сѝ на и҆ска́нїе , и҆ на ра́мꙋ пᲂне́съ сᲂвᲂскреси́лъ є҆сѝ . боⷢ҇ . Пречⷭ҇таѧ влⷣчце , ро́ждьшаѧ земны́мъ ко́рмчїю и҆ гдⷭ҇а , страсте́й мᲂи́хъ непᲂстᲂѧ́ннᲂе и҆ лю́тᲂе разженѝ смꙋще́нїе , и҆ ти́шинꙋ пᲂда́ждь срⷣцꙋ мᲂемꙋ̀ .

и҆́нъ , і҆рмо́съ . Ꙗ҆́тъ бысть .= Ка́кѡ претерпѣ̀ ра́ны и҆ дᲂсажде́нїѧ сло́ве , и҆ заꙋше́нїѧ ; ты́ бо во́лею ꙗ҆́кѡ чл҃къ , пло́тїю стра́сть претерпѣ́лъ є҆сѝ , но бг҃ъ сы́и , без̾стра́стенъ пребы́сть , распина́емь на́ древѣ пᲂсредѣ̀ двᲂю̀ разбо́йникꙋ . спа́слъ же є҆сѝ ѿ тлѝ є҆стество̀ на́ше ꙗ҆́кѡ всеси́ленъ . Ты̀ во́ грᲂбѣ хᲂтѧ̀ пᲂлᲂжи́сѧ сп҃се менѐ ра́ди , ꙗ҆́кѡ ме́ртвъ , и҆ свѣ́тъ вᲂсїѧ́лъ є҆сѝ , и҆́же во тмѣ̀ и҆ сѣ́ни сме́ртнѣй держи́мымъ . ѡ҆блиста́въ же тридне́вно , и҆ срѣ́тъ мѷрѡно́сицъ , си́це вᲂз̾гласи́въ тѣ́мъ , ра́дꙋйтесѧ вᲂи́стинꙋ , и҆ рцы́те про́чее а҆пⷭ҇лѡмъ мᲂи́мъ . =боⷢ҇ . Ѽ дв҃о ѡ҆бра́дᲂваннаѧ мт҃и бг҃ᲂневѣ́стнаѧ , ты̀ и҆́же пре́жде вѣ́къ рᲂжде́ннаго ѿ ѻ҆ц҃а без̾нача́льна , не и҆скꙋсᲂбра́чно прїе́мши во ᲂу҆тро́бѣ свᲂе́й , и҆ рᲂдила̀ є҆сѝ вᲂплᲂще́нна . є҆го́же мᲂлѝ ѡ҆ всѣ́хъ на́съ , мно́жество щедро́тъ низпᲂсла́ти на́мъ ;

и҆́нъ , і҆рмо́съ . Жите́йскагѡ мо́рѧ .= В=ели́кїи пред̾написа̀ во прᲂро́цѣхъ мѡѷсе́й тѧ , кᲂвче́гъ и҆ трапе́зꙋ , и҆ свѣ́щникъ , и҆ рꙋ́чкꙋ , ѻ҆бра́знѡ ꙗ҆влѧ́ѧ вᲂплᲂще́нїе , є҆́же ѿ тебѐ вы́шнѧгѡ мт҃и дв҃о . Оу҆мерщвѧ́етсѧ сме́рть , ᲂу҆пражнѧ́етсѧ и҆ тлѣ́нїе а҆да́мᲂва ѡ҆сꙋжде́нїѧ плᲂдо́мъ твᲂи́мъ , прелᲂжи́всѧ , ѽ влⷣчце живо́тъ бо рᲂдила̀ є҆сѝ , ѿ и҆стлѣ́нїѧ и҆збавлѧ́ющь пᲂю́щихъ тѧ̀ . Зако́нъ и҆знемо́же , и҆ пре́йде сѣ́нь , вы́ше ᲂу҆ма̀ и҆ по́мысла , ꙗ҆ви́вшисѧ бл҃гᲂда́ти , ꙗ҆́же ѿ тебѐ дв҃о , ржⷭ҇твᲂмъ бг҃а и҆ сп҃са , мнᲂгᲂпѣ́таѧ .

і҆єре́й гл҃етъ , є҆ктенїю̀ ма́лꙋю .

кᲂнда́къ , вᲂскрⷭ҇нъ . Живᲂнача́льнᲂю дла́нїю , ᲂу҆ме́ршихъ ѿ мра́чныхъ ᲂу҆до́лїй , жизнᲂда́вецъ вᲂскреси́въ всѣ́хъ хрⷭ҇то́съ бг҃ъ , вᲂскрⷭ҇нїе дарᲂва́въ чл҃ческᲂмꙋ ро́дꙋ . є҆́сть бо всѣ́хъ спаси́тель и҆ вᲂскрⷭ҇нїе и҆ живо́тъ , и҆ бг҃ъ всѧ́ческимъ .= и҆́кᲂсъ . К=рⷭ҇тъ и҆ пᲂгребе́нїе твᲂѐ жизнᲂда́вче вᲂспѣва́емъ вѣ́рнїи и҆ пᲂкланѧ́емсѧ , ꙗ҆́кѡ а҆́да свѧза́лъ є҆сѝ без̾сме́ртне ꙗ҆́кѡ бг҃ъ всеси́льныи , и҆ ме́ртвыхъ сᲂвᲂскреси́лъ є҆сѝ , и҆ врата̀ сме́ртныѧ сᲂкрꙋши́лъ є҆сѝ , и҆ держа́вꙋ а҆́дᲂвꙋ низ̾лᲂжи́въ ꙗ҆́кѡ бг҃ъ . тѣ́мже земнᲂро́днїи славᲂсло́вимъ тѧ любо́вїю , вᲂскрⷭ҇шаго и҆ низ̾лᲂжи́вша вра́жїю держа́вꙋ всепа́гꙋбнꙋю , и҆ всѣ́хъ вᲂскр҃си́вшаго , и҆́же в̾ тѧ̀ вѣ́рᲂвавшихъ , и҆ ми́ръ и҆зба́вльшаго ѿ стрѣ́лъ ѕмі́евыхъ , и҆ ѿ пре́лести вра́жїѧ , ꙗ҆́кѡ бг҃ъ всѧ́ческихъ .

пѣ́снь , з҃ . і҆рмо́съ . Хладᲂда́тельнꙋ ᲂу҆́бѡ пе́щь сᲂтвᲂрѝ а҆́нг҃лъ , прпⷣбнымъ дѣ́темъ , халдѣ́и же ѡ҆палѝ велѣ́нїемъ бж҃їимъ . мꙋчи́телѧ ᲂу҆вѣща̀ вᲂпи́ти , блгⷭ҇ве́нъ бг҃ъ ѻ҆ц҃ъ на́шихъ . Рыда́ѧ стра́сти твᲂеѧ̀ сл҃нце , в̾ мра́къ ѡ҆блече́сѧ , и҆ во́дне по все́й землѝ влⷣко хрⷭ҇тѐ , свѣ́тъ пᲂмрачи́сѧ , бл҃гᲂслᲂве́нъ бг҃ъ ѻ҆ц҃ъ на́шихъ . Ѡ҆блеко́шасѧ хрⷭ҇тѐ , схᲂжде́нїемъ ти , в̾ свѣ́тъ преи҆спо́днѧѧ . пра́ѻ҆ц҃ъ же весе́лїѧ и҆спо́лненъ ꙗ҆ви́сѧ , ликᲂвствꙋ́ѧ и҆гра́ше , вᲂпїѧ̀ , блгⷭ҇ве́нъ бг҃ъ ѻ҆ц҃ъ на́шихъ . трⷪ҇ченъ . Трⷪ҇цꙋ всѣ́ми владꙋ́щꙋю , є҆стество́мъ трисᲂста́внꙋю , бл҃гᲂсть без̾чи́сленꙋю и҆ пꙋчи́нꙋ свѣ́та . пᲂю́ще вᲂзᲂпїе́мъ вѣ́рнїи , блгⷭ҇ве́нъ бг҃ъ ѻ҆ц҃ъ на́шихъ .

и҆́нъ , і҆рмо́съ . Не и҆зрече́ннᲂе чꙋ́до .= Тебѐ сп҃са на ло́бнѣмъ распѧ́ша , закᲂнᲂпрестꙋ́пныхъ дѣ́ти нечести́выѧ , и҆́же врата̀ мѣ́днаѧ и҆ вереѝ сᲂкрꙋши́вшагѡ , на спасе́нїе на́мъ пᲂю́щимъ , и҆зба́вителю бж҃е бл҃гᲂслᲂве́нъ є҆сѝ . Ты̀ сме́рти держа́вꙋ разрꙋши́лъ є҆сѝ , и҆ вᲂскр҃се вᲂздви́женїе даѧ̀ , и҆́же вᲂи́стинꙋ тѧ гдⷭ҇а сла́вѧщимъ , и҆ правᲂсла́вно вѣ́рᲂю тебѣ̀ вᲂпїю́щимъ , и҆зба́вителю бж҃е бл҃гᲂслᲂве́нъ є҆сѝ . =боⷢ҇ . Є҆ди́нᲂго ѿ трⷪ҇цы рᲂдила̀ є҆сѝ пречи́стаѧ , милᲂсе́рдїѧ ра́ди на землѝ ꙗ҆́вльшагᲂсѧ , во двᲂю̀ є҆стествꙋ̀ . є҆го́же непреста́ннѡ мᲂлѝ , спастѝ дш҃а на́ша .

и҆́нъ , і҆рмо́съ . Хладᲂда́тельнꙋ ᲂу҆́бѡ пе́щь .= Ю҆́=нᲂшъ трїе́хъ пе́щь не ѡ҆палѝ , ржⷭ҇тво̀ пред̾ вᲂѡ҆бража́ющихъ , бжⷭ҇твеныи бо ѻ҆́гнь тебѐ не ѡ҆палѝ , всели́сѧ в̾ тѧ̀ , и҆ всѧ̀ наꙋчѝ вᲂпи́ти , блгⷭ҇ве́нъ бг҃ъ ѻ҆ц҃ъ на́шихъ . Бл҃жа́тъ кᲂнцы̀ тебѐ всечⷭ҇таѧ мт҃и , ꙗ҆́кᲂже прᲂрекла̀ є҆сѝ , прᲂсвѣща́еми свѣтᲂѡ҆бра́зїемъ сїѧ́нїи твᲂи́хъ , и҆ бл҃гᲂда́тїю свѣтѧ́щесѧ , вᲂпїю́тъ , блгⷭ҇ве́наѧ ꙗ҆́же бг҃а пло́тїю ро́ждьшаѧ . Па́гꙋбныѧ ᲂу҆́бѡ зꙋ́бы в̾ мѧ̀ вᲂнзѣ̀ ѕмі́й вселꙋка́выи , но сїѧ̀ тво́й бг҃ᲂмт҃и сᲂкрꙋшѝ сн҃ъ , крѣ́пᲂсть пᲂдава́ѧ ми вᲂпи́ти , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . Ѡ҆чи́стилище є҆стества̀ ты́ є҆си , є҆ди́на бг҃ᲂбл҃же́ннаѧ . на ра́мѣхъ бо херꙋви́мскихъ сѣдѧ́щагѡ бг҃а , дла́ньма нᲂси́вши , вᲂпїе́ши , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ .

пѣ́снь , и҃ . і҆рмо́съ . и҆з̾ =пла́мени ст҃ы́мъ ро́сꙋ и҆стᲂчѝ , а҆ пра́веднагѡ же́ртвꙋ и҆ во́ды пᲂпалѝ , всѧ́ бо твᲂри́ши хрⷭ҇тѐ , є҆ли́ко хо́щеши , тѣ́мъ тѧ превᲂзно́симъ гдⷭ҇а во́ вѣки . І҆ꙋде́йскїѧ дре́вле прᲂрᲂкᲂꙋбі́йцы лю́ди , за́висть бг҃ᲂꙋбі́йственꙋю ны́нѣ сᲂдѣ́лаша , тебѐ на крⷭ҇тъ вᲂзне́сше сло́ве бж҃їи , є҆го́же превᲂзно́симъ во́ вѣки . Нбⷭ҇ныхъ крꙋ́гъ не ѡ҆ста́вль , и҆ во а҆́дъ сᲂше́дъ , всѐ сᲂвᲂздви́же хрⷭ҇тѐ лежа́щее во гнᲂѝ чл҃чество . тѣ́мже тѧ пᲂе́мъ гдⷭ҇а , и҆ превᲂзно́симъ во́ вѣки . =трⷪ҇ченъ . Є҆ди́но є҆стество̀ трⷪ҇цы , не и҆счете́нно си́льнѡ , превᲂсхᲂдѧ́щее , всѧ́каго сло́ва , и҆ є҆стества̀ и҆ по́мыслъ , прⷭ҇нѡ правᲂсла́вно прᲂпᲂвѣ́даемъ , и҆ превᲂзно́симъ во́ вѣки .

и҆́нъ , і҆рмо́съ . Оу҆жасни́сѧ бᲂѧ́исѧ .= Оу҆жасе́сѧ всѧ́къ слꙋ́хъ , ка́кѡ вы́шнїи во́лею прїи́де на́ землю , а҆́дᲂвꙋ крѣ́пᲂсть разрꙋшѝ , распѧ́тїемъ и҆ пᲂгребе́нїемъ ; и҆ всѣ́хъ вᲂз̾дви́же зва́ти , дѣ́ти бл҃гᲂслᲂви́те , сщ҃е́ннїи по́йте , и҆ превᲂзнᲂси́те є҆гѡ̀ во́ вѣки . =Ѽ не и҆з̾глаго́ланнᲂмꙋ тѝ хрⷭ҇тѐ смᲂтре́нїю , и҆ не и҆зрече́ннᲂмꙋ дᲂлгᲂтерпѣ́нїю , мене́ бо зрѧ̀ пᲂгиба́юща во а҆́дᲂвѣ темни́цѣ , стра́сти претерпѣ́въ и҆зба́ви . тѣ́мже тѧ блгⷭ҇ви́мъ всѣ́хъ влⷣкꙋ , и҆ превᲂзно́симъ во́ вѣки . боⷢ҇ . За на́съ дв҃о є҆сте́ствено па́че є҆стества̀ , про́йде є҆ди́нъ , тва́ри твᲂрца̀ и҆ влⷣкꙋ ро́ждьши препѣ́таѧ , и҆ по ржⷭ҇твѣ̀ непᲂро́чнаѧ ꙗ҆ви́сѧ вы́шши всеѧ̀ тва́ри . тѣ́мъ вᲂспѣва́емъ дѣ́ла гдⷭ҇а , и҆ превᲂзно́симъ во́ вѣки .

и҆́нъ , і҆рмо́съ . и҆з̾ =пла́мени ст҃ы́мъ . З=лато́ю ри́зᲂю ꙗ҆́кᲂже цр҃цꙋ , сн҃ъ тво́й прᲂсвѣтли́въ заре́ю дх҃а , тебѐ ѡ҆деснꙋ́ю себѐ пᲂста́ви пречⷭ҇таѧ . є҆го́же превᲂзно́симъ во всѧ̀ вѣ́ки . И҆́же во́лею є҆ди́нᲂю ми́ръ ᲂу҆тверди́въ , ѿ пречⷭ҇тыѧ ᲂу҆тро́бы твᲂеѧ̀ пло́ть зае́млетъ , с̾вы́ше тꙋ̀ назда́ти хᲂтѧ̀ . є҆го́же превᲂзно́симъ во всѧ̀ вѣ́ки . Сᲂчета́нїемъ ко мнѣ̀ чл҃кꙋ сло́ва , бжⷭ҇твено жили́ще была̀ є҆сѝ пречⷭ҇таѧ , вᲂсїѧ́вши ꙗ҆́вѣ дв҃ьства свѣ́тлᲂстїю , тѣ́мже тѧ̀ пᲂе́мъ вѣ́рнїи во всѧ̀ вѣ́ки . Златᲂза́рныи тѧ̀ свѣ́щникъ предвᲂѡ҆бразѝ , прїе́мшꙋю несказа́нно свѣ́тъ неприкᲂснᲂве́нныи , сїѧ́нїемъ свᲂи́мъ ѡ҆зарѧ́ющи кᲂнцы̀ . тѣ́мже тѧ̀ пᲂе́мъ чⷭ҇таѧ во́ вѣки .

по и҃ пѣ́сни , пᲂе́мъ : Хва́лимъ , бл҃гᲂслᲂви́мъ , кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . і҆рмо́съ катава́сїи , и҆ твᲂри́мъ пᲂкло́нъ . пᲂе́мъ , пѣ́снь бцⷣѣ . вели́читъ дш҃а мᲂѧ̀ гдⷭ҇а . =и҆ =пᲂе́мъ , честнѣ́йшꙋю херꙋви́мъ , на ко́йждо сти́хъ , на́ ѻ҆ба ли́ка . =и҆ =твᲂри́мъ пᲂкло́ны .

пѣ́снь , ѳ҃ . і҆рмо́съ . Бг҃а чл҃кѡмъ неꙋдо́бь ви́дѣти , на́ньже несмѣ́ютъ чи́ни а҆́нг҃льстїи зрѣ́ти . тᲂбо́ю бо пречⷭ҇таѧ ꙗ҆ви́сѧ на́мъ сло́во вᲂплᲂще́нно , є҆го́же велича́юще , съ нбⷭ҇ными вѡ́и тѧ̀ велича́емъ . Страсте́мъ неприча́стенъ пребы́сть ты̀ , сло́ве бж҃їи , пло́тїю причасти́всѧ страсте́мъ , но рѣши́ши ѿ страсте́й чл҃ка , страсте́мъ бы́въ стра́сть сп҃се на́шъ . є҆ди́нъ бо є҆сѝ без̾стра́стенъ и҆ всеси́ленъ . Тлю̀ сме́ртнꙋю прїе́мъ , тлѣ́нїемъ сᲂблю́дъ тѣ́ло свᲂѐ невкꙋше́но , твᲂѧ́ же живᲂтвᲂрѧ́щаѧ и҆ бжⷭ҇твенаѧ дш҃а влⷣко , во а҆́дѣ не ѡ҆ста́влена бы́сть . но ꙗ҆́кᲂже ѿ сна̀ вᲂскр҃съ , на́съ сᲂвᲂздви́глъ є҆сѝ . трⷪ҇ченъ . Бг҃а ѻ҆ц҃а , сн҃а сᲂбез̾нача́льна , всѝ земні́и ᲂу҆стна́ми чи́стыми прᲂсла́вимъ , не и҆зрече́ннꙋю же и҆ пресла́внꙋю , дх҃а прест҃а́гѡ си́лꙋ чтꙋ́ще . є҆ди́на бо є҆́сть всеси́льнаѧ трⷪ҇ца нераздѣ́льна .

и҆́нъ , і҆рмо́съ . Нерыда́й менѐ мт҃и .= А҆́=ще и҆ во́ грᲂбъ сᲂше́лъ є҆сѝ , ꙗ҆́кѡ ме́ртвъ живᲂда́вче , но а҆́дᲂвꙋ крѣ́пᲂсть растерза́въ хрⷭ҇тѐ , сᲂвᲂздви́глъ є҆сѝ ме́ртвыѧ , и҆́хже пре́жде пᲂглᲂтѝ . и҆ вᲂскрⷭ҇нїе всѣ́мъ пᲂдае́ши ꙗ҆́кѡ бг҃ъ , и҆́же вѣ́рᲂю и҆ любо́вїю тебѐ велича́ющимъ . Да ᲂу҆бѣли́тсѧ тва́рь , да вᲂзвеселѧ́тсѧ всѝ земнᲂро́днїи , вра́гъ бо плѣни́сѧ а҆́дъ . вᲂскр҃се хрⷭ҇то́съ , и҆ первᲂзда́нныи сᲂвᲂста̀ в̾ сла́вѣ , и҆зба́вльсѧ ѿ тлѝ , жена́мъ мѷрѡно́сицамъ зᲂве́тъ а҆́нг҃лъ .

и҆́нъ , і҆рмо́съ . Бг҃а чл҃кѡмъ неꙋдо́бь .= Ѕ=вѣзда̀ сїѧ́ющи зарѧ́ми бжⷭ҇тва̀ ѿ і҆а́кѡва , мра́кᲂмъ держи́мымъ вᲂсїѧ̀ , тебѐ ра́ди пречⷭ҇таѧ , хрⷭ҇то́съ бг҃ъ сло́во вᲂплᲂще́нно . и҆́мже прᲂсвѣща́еми , с̾ нбⷭ҇ными вѡ́и тебѐ велича́емъ . Оу҆крѣплѧ́емъ си́лᲂю твᲂе́ю и҆ бл҃гᲂда́тїю , тебѣ̀ пѣ́снь ᲂу҆се́рднѡ ѿ́ срⷣца вᲂзлᲂжи́хъ . но сїю̀ прїимѝ дв҃о чи́стаѧ , бл҃гᲂда́ть вᲂздаю́щи твᲂю̀ мнᲂгᲂсвѣ́тлꙋю , ѿ нетлѣ́нныхъ сᲂкро́вищь бг҃ᲂблаже́ннаѧ . Пᲂста́въ пᲂказа́сѧ бг҃ᲂтка́ненъ ꙗ҆́вѣ дв҃о , в̾ не́мже ѻ҆де́ждꙋ тѣлесѐ сло́во и҆стка̀ , бг҃ᲂсᲂдѣ́лавъ мо́й зра́къ . въ него́ же ѡ҆бо́лксѧ , всѣ́хъ спасѐ , и҆́же ѿ мы́сли чи́сты тебѐ велича́ющихъ . Ме́ртвымъ вᲂскрⷭ҇нїе ны́нѣ дарᲂва́сѧ , твᲂи́мъ несказа́ннымъ , и҆ не и҆зрече́ннымъ ржⷭ҇тво́мъ бцⷣе всечⷭ҇таѧ . жи́знь бо ѿ тебѐ в̾ пло́ть ѡ҆бло́жшисѧ всѣ́мъ вᲂсїѧ̀ , и҆ сме́ртнᲂе свѣше́нїе ꙗ҆́вѣ разрꙋшѝ .

таⷤ , дᲂсто́йно є҆́сть .= пᲂсе́мъ , є҆ктенїѧ̀ ма́лаѧ . та́же : ст҃ъ гдⷭ҇ь бг҃ъ на́шъ . =сти́хъ : ꙗ҆́кѡ ст҃ъ гдⷭ҇ь бг҃ъ на́шъ . сти́хъ : надᲂвсѣ́ми людьмѝ бг҃ъ на́шъ . пᲂсе́мъ , свѣти́ленъ , вᲂскрⷭ҇нъ . сла́ва , ст҃о́мꙋ , а҆́ще є҆́сть . и҆ ны́нѣ , боⷢ҇ , вᲂскрⷭ҇нъ . и҆ =ѱалмы̀ , ѡ҆бы́чны . =на хвали́тѣхъ , стихѣ́ры , вᲂскрⷭ҇ны . гла́съ , ѕ҃ . =запѣ́въ : хвали́те бг҃а во ст҃ы́хъ є҆гѡ̀ . К=рⷭ҇тъ тво́й гдⷭ҇и , жи́знь и҆ вᲂскрⷭ҇нїе лю́дем̾ твᲂи́мъ є҆́сть . и҆ на́нь надѣ́ющесѧ , тебѐ вᲂскрⷭ҇шагѡ бг҃а на́шегѡ пᲂе́мъ , пᲂми́лꙋй на́съ .

хвали́те є҆гѡ̀ во ᲂу҆тверже́нїи си́лъ є҆гѡ̀ . Пᲂгребе́нїе твᲂѐ влⷣко , ра́й ѿве́рзе ро́дꙋ чл҃ческᲂмꙋ . и҆ ѿ тлѝ и҆зба́вльшесѧ , тебѐ вᲂскрⷭ҇шагѡ бг҃а на́шегѡ пᲂе́мъ , пᲂми́лꙋй на́съ .

хвали́те є҆гѡ̀ на си́лахъ є҆гѡ̀ ,꙳ хвали́те є҆гѡ̀ по премно́гᲂмꙋ вели́чествїю є҆гѡ̀ . Со ѻ҆ц҃е́мъ и҆ дх҃ᲂмъ хрⷭ҇та̀ вᲂспᲂе́мъ , вᲂскрⷭ҇шагѡ и҆з̾ ме́ртвыхъ . и҆ к̾ немꙋ̀ вᲂзᲂпїе́мъ , ты̀ є҆сѝ жи́знь на́ша и҆ вᲂскрⷭ҇нїе , пᲂми́лꙋй на́съ .

хвали́те є҆гѡ̀ во́ гласѣ трꙋ́бнѣмъ ,꙳ хвали́те є҆гѡ̀ во ѱалты́ри и҆ гꙋ́слѣхъ . Тридне́внѡ вᲂскрⷭ҇лъ є҆сѝ хрⷭ҇тѐ и҆́з̾ грᲂба , ꙗ҆́кᲂже є҆́сть пи́сано , и҆ сᲂвᲂскреси́въ пра́дѣда на́шегѡ . сегѡ̀ ра́ди тѧ̀ сла́витъ ро́дъ челᲂвѣ́ческїи , и҆ пᲂе́тъ твᲂѐ вᲂскрⷭ҇нїе .

хвали́те є҆гѡ̀ в̾ тѷмпа́нѣ и҆ ли́цѣ ,꙳ хвали́те є҆гѡ̀ во стрꙋ́нахъ и҆ ѻ҆рга́нѣхъ . Гдⷭ҇и , вели́ко и҆ стра́шно є҆́сть твᲂегѡ̀ вᲂскрⷭ҇нїѧ та́инство , та́кѡ бо про́йде и҆́з̾ грᲂба , ꙗ҆́кѡ жени́хъ ѿ черто́га . сме́ртїю сме́рть разрꙋшѝ , да а҆да́ма свᲂбᲂди́ши . тѣ́мже на́ небесѣхъ а҆́нг҃ли ликꙋ́ютъ , и҆ на землѝ чл҃цы сла́вѧтъ , є҆́же на на́съ бы́вшее млрⷭ҇дїе твᲂѐ чл҃кᲂлю́бче .

хвали́те є҆гѡ̀ в̾ кѷмва́лѣхъ дᲂбрᲂгла́сныхъ , хвали́те є҆гѡ̀ в̾ кѷмва́лѣхъ вᲂсклица́нїѧ .꙳ всѧ́ко дыха́нїе да хва́литъ гдⷭ҇а . Ѽ без̾зако́ннїи і҆ꙋде́е , гдѣ̀ сꙋ́ть печа́ти и҆ сре́бреницы , и҆́хже да́сте во́инѡмъ . неꙋкра́дено бы́сть сᲂкро́вище , но вᲂскр҃се ꙗ҆́кѡ си́ленъ . са́ми же пᲂсрами́стесѧ , ѿве́ргшїисѧ хрⷭ҇та̀ гдⷭ҇а сла́вы , пᲂстрада́вшаго и҆ пᲂгребе́на , и҆ вᲂскрⷭ҇ша и҆з̾ ме́ртвыхъ . тᲂмꙋ̀ пᲂклᲂни́мсѧ .

вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ ,꙳ незабꙋ́ди ни́щихъ свᲂи́хъ до кᲂнца̀ . Запечатлѣ́ннꙋ гро́бꙋ , ка́кѡ ѡ҆кра́дени бы́сте і҆ꙋде́и ; стра́жи приста́вльше , и҆ зна́менїѧ пᲂлᲂжи́вше , две́ремъ затвᲂре́нᲂмъ про́йде цр҃ь . и҆лѝ ꙗ҆́кѡ ме́ртва пред̾ста́вите , и҆лѝ ꙗ҆́кѡ бг҃ꙋ пᲂклᲂни́тесѧ , с̾ на́ми пᲂю́ще , сла́ва гдⷭ҇и крⷭ҇тꙋ̀ твᲂемꙋ̀ и҆ вᲂскрⷭ҇нїю .

и҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ ,꙳ пᲂвѣ́мъ всѧ̀ чꙋдеса̀ твᲂѧ̀ . Живᲂпрїѧ́тнаго ти гро́ба , мѷрѡно́сицы жены̀ рыда́юще дᲂстиго́ша гдⷭ҇и , и҆ ми́ро нᲂсѧ́ще , тѣ́ло твᲂѐ пречи́стᲂе пᲂма́зати и҆ска́хꙋ . ѡ҆брѣ́тше же свѣтᲂно́сна а҆́нг҃ла , на ка́мени сѣдѧ́ща , и҆ къ ни́мъ вѣща́юща и҆ глаго́люща , что̀ слезитѐ , и҆́же и҆з̾ ре́бръ и҆стᲂчи́вшаго ми́рᲂви жи́знь ; что̀ и҆́щете ꙗ҆́кѡ ме́ртва во́грᲂбѣ без̾сме́ртнагѡ ; ше́дше же па́че , вᲂзвѣсти́те тᲂгѡ̀ ᲂу҆ченикѡ́мъ , сла́внᲂе є҆гѡ̀ вᲂскрⷭ҇нїе , всеми́рнᲂе ра́дᲂванїе . и҆́мже и҆ на́съ сп҃се прᲂсвѣти́выи , да́рꙋй ѡ҆чище́нїе и҆ ве́лїю ми́лᲂсть .

сла́ва , стихѣ́ра є҆ѵⷢ҇а́льскаѧ .= и҆ ны́нѣ . гла́съ , в҃ . пребл҃гᲂслᲂве́на є҆сѝ бцⷣе дв҃о . Славᲂсло́вїе вели́кᲂе . =і҆єре́й , вᲂз̾гла́съ : ꙗ҆́кѡ твᲂѐ є҆́сть црⷭ҇тво .= трᲂпа́рь : Вᲂскр҃съ и҆́з̾ грᲂба и҆ ᲂу҆́зы растерза́въ , разрꙋши́лъ є҆сѝ гдⷭ҇и сме́рти ѡ҆сꙋже́нїе , и҆ всѧ̀ ѿ сѣ́ти непрїѧ́зненыѧ и҆зба́вль . ꙗ҆вѝ себѐ а҆пⷭ҇лѡмъ свᲂи́мъ , и҆ пᲂсла́въ и҆́хъ на́ прᲂпᲂвѣдь , и҆ тѣ́ми ми́ръ сво́й по́далъ є҆сѝ вселе́ннѣй , є҆ди́не мнᲂгᲂмлⷭ҇тиве . =пᲂсе́мъ , є҆ктенїѝ . и҆ ѿпꙋ́стъ . та́же , ча́съ , а҃ . ѱалмы̀ , ѡ҆бы́чны . и҆ кᲂне́чныи ѿпꙋ́стъ .

Въ нлⷣю , бл҃же́нны . гла́съ , ѕ҃ .

Пᲂмѧни́ мѧ бж҃е сп҃се мо́й , є҆гда̀ прїи́деши во црⷭ҇твїи сѝ , и҆ спаси́ мѧ , ꙗ҆́кѡ є҆ди́нъ чл҃кᲂлю́бецъ .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Дре́вᲂмъ а҆да́мꙋ прельще́нꙋ бы́вшꙋ , дре́вᲂмъ же крⷭ҇тнымъ па́ки спа́слъ є҆сѝ разбо́йника , вᲂпїю́ща , пᲂмѧни́ мѧ гдⷭ҇и , є҆гда̀ прїи́деши во црⷭ҇твїи сѝ .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . Вᲂспᲂе́мъ и҆́же во́лею распе́ншагᲂсѧ , и҆ пᲂгребе́на хрⷭ҇та̀ бг҃а на́шегѡ , и҆ вᲂскрⷭ҇ша во сла́вѣ тридне́внѡ .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Врата̀ а҆́дᲂва и҆ вереѝ сᲂкрꙋши́въ , и҆ сꙋ́щїѧ жизнᲂда́вче во а҆́дѣ , всѧ̀ вᲂскр҃си́лъ є҆сѝ , зᲂвꙋ́щїѧ , сп҃се ще́дрыи , сла́ва вᲂста́нїю тѝ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . И҆́же и҆́з̾ грᲂба вᲂскрⷭ҇шаго , ꙗ҆́кᲂже речѐ пре́жде стрⷭ҇ти , и҆ а҆́да плѣни́вша , хрⷭ҇та̀ сᲂгла́снѡ всѝ вᲂспᲂе́мъ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Свѣ́тъ ми́рꙋ а҆пⷭ҇ли пᲂказа́вшесѧ , ве́сь мра́къ пре́лести ѿгна́ша , зарѧ́ми бжⷭ҇твеными , ᲂу҆че́нїи свᲂи́хъ .

сла́ва . Ѻ҆ц҃а и҆ сн҃а славᲂсло́вимъ , и҆ дх҃а ст҃а́гѡ гл҃юще , трⷪ҇це ст҃а́ѧ спасѝ дш҃а на́ша .

и҆ ны́нѣ . Ра́дꙋисѧ две́ри бг҃ꙋ ѿве́рстаѧ , не и҆з̾гл҃аннѡ в̾ тѧ̀ все́льшасѧ , и҆ прᲂше́дша и҆з̾ тебѐ при́снѡ дв҃о .

<< Previous

Contents

Next >>