Глас 6 четверг

Въ сре́дꙋ , ве́черъ . на гдⷭ҇и вᲂзва́хъ , стⷯры , ст҃ы́мъ а҆пⷭ҇лѡмъ . гла́съ , ѕ҃ . поⷣ . в̾ =тре́тїи де́нь . запѣ́въ : ꙗ҆́кѡ ѿ тебѐ ѡ҆чище́нїе є҆́сть . В=ели́кимъ та́йнамъ бж҃їимъ ,꙳ слꙋжи́телїе бы́сте бг҃ᲂсло́вцы ,꙳ и҆ бг҃ᲂви́дцы ᲂу҆ченицы̀ ,꙳ и҆ бл҃гᲂда́ть и҆сцѣле́нїемъ прїѧ́сте ,꙳ и҆ всѣ́мъ чл҃кѡмъ ꙳ бᲂлѣ́зни и҆сцѣлѧ́ете .

ᲂу҆пᲂва̀ дш҃а мᲂѧ̀ на́ гдⷭ҇а . Вели́кᲂе прибѣ́жище ,꙳ и҆ пᲂкро́въ дш҃а́мъ на́шимъ ,꙳ дꙋхѡ́въ лю́тыхъ прᲂгна́нїе ,꙳ вы̀ є҆стѐ бг҃ᲂви́дцы ꙳ а҆пⷭ҇ли гдⷭ҇ни ,꙳ тѣ́мже ва́съ прⷭ҇нѡ пᲂчита́емъ .

да ᲂу҆пᲂва́етъ і҆и҃ль на́ гдⷭ҇а . Ѿ всѧ́кᲂгѡ ѡ҆б̾стᲂѧ́нїѧ ,꙳ и҆ врежде́нїѧ бѣсо́вскагѡ ,꙳ и҆ прегрѣше́нїи ,꙳ и҆ ѕла́гѡ плѣне́нїѧ ,꙳ и҆зба́вите и҆́же вѣ́рᲂю ва́съ вᲂсхвалѧ́ющихъ ,꙳ бжⷭ҇твенїи а҆пⷭ҇ли бл҃же́ннїи .

та́же , в̾ минѣ́и , стⷯры , ст҃о́мꙋ . а҆́ще ли нѣ́сть минѣ́и . и҆́ны , стихѣ́ры , ст҃о́мꙋ и҆ вели́кᲂмꙋ чꙋдᲂтво́рцꙋ нико́лѣ . гла́съ , и҆ поⷣ , то́йже . =запѣ́въ : ѿ всѣ́хъ без̾зако́нїи є҆гѡ̀ . Н=ико́лае бл҃же́нне ,꙳ припа́дающа мѧ ᲂу҆ще́дри ,꙳ мᲂлю́тисѧ мꙋ́дре ,꙳ и҆ ѻ҆́чи прᲂсвѣтѝ дш҃и мᲂеѧ̀ ,꙳ да чи́стѣ ви́жꙋ ,꙳ свѣтᲂда́вца ще́драго .

пᲂхвали́те є҆гѡ̀ всѝ лю́дїе . Вра́гъ и҆́щꙋщихъ мѧ ѡ҆ѕло́бити ,꙳ и҆зба́ви мѧ ст҃е ,꙳ дерзнᲂве́нїе къ бг҃ꙋ ꙳ и҆мы́и ст҃лю ꙳ нико́лае блаже́нне ,꙳ и҆ ѿ мꙋ́жъ крᲂве́й спаси́ мѧ .

и҆ и҆́стина гдⷭ҇нѧ пребыва́етъ во́ вѣки . Приста́нище небꙋ́рнᲂе ,꙳ и҆ стѣ́нꙋ неѡ҆бᲂри́мꙋю ст҃лю ,꙳ стѧжа́вше тѧ вѣ́рнїи ,꙳ и҆ сто́лпъ крѣ́пᲂсти ,꙳ и҆ две́рь пᲂкаѧ́нїѧ ,꙳ и҆ наста́вника дш҃а́мъ на́шимъ и҆ забра́ло .

сла́ва , и҆ ны́нѣ , боⷢ҇ . Зави́дѧ сᲂпрᲂти́вникъ лꙋка́выи , ста́дꙋ твᲂемꙋ̀ пречⷭ҇таѧ , всегда̀ бо́ретъ , хᲂтѧ̀ себѣ̀ снѣ́дь сᲂтвᲂри́ти , но ты̀ бцⷣе и҆зба́ви на́съ ѿ тᲂгѡ̀ вре́да .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стихѣ́ры , ст҃ы́мъ а҆пⷭ҇лѡмъ . гла́съ , ѕ҃ . Бж҃е , а҆пⷭ҇ли спᲂстиго́ша и҆нᲂгда̀ ᲂу҆́бѡ сѣ́тьми глꙋбинꙋ̀ мᲂрскꙋ́ю , и҆нᲂгда́ же высᲂтꙋ̀ црⷭ҇твїѧ ᲂу҆че́нїи ра́ди . ѻ҆́во ᲂу҆́бѡ хꙋдо́жествᲂмъ не пᲂсти́жимꙋю глꙋбинꙋ̀ и҆спыта́ша , ѻ҆́вᲂже вѣ́рᲂю не ѡ҆пи́саннагѡ ти нѣ́дра дᲂстиго́ша , и҆ ми́рᲂви прᲂпᲂвѣ́даша без̾лѣ́тнаго твᲂегѡ̀ сн҃а . тѣ́хъ мл҃твами пᲂми́лꙋй на́съ .

сти́хъ : к̾ тебѣ̀ вᲂз̾ведо́хъ ѻ҆́чи мᲂѝ . И҆нᲂгда̀ ᲂу҆ченицы̀ твᲂѝ хрⷭ҇тѐ в̾ кᲂраблѝ ѡ҆бꙋрева́еми вᲂпїѧ́хꙋ , ᲂу҆чи́телю спаси́ ны пᲂгиба́емъ . и҆ ны́нѣ мы̀ вᲂпїе́мъ , чл҃кᲂлю́бче сп҃се на́шъ , и҆зба́ви на́съ ѿ бѣ́дъ на́шихъ мо́лимсѧ .

сти́хъ : пᲂми́лꙋй на́съ гдⷭ҇и . мⷱ҇ꙋ . Крⷭ҇тъ тво́й гдⷭ҇и , мч҃нкѡмъ бы́сть ѻ҆рꙋ́жїе непᲂбѣди́мᲂе . ви́дѣша бо пред̾лежа́щꙋю сме́рть , и҆ предѝ зрѧ́ще бꙋ́дꙋщꙋю жи́знь , ᲂу҆пᲂва́нїемъ , є҆́же на тѧ̀ ᲂу҆крѣплѧ́хꙋсѧ . тѣ́хъ мл҃твами пᲂми́лꙋй на́съ .

сла́ва , и҆ нн҃ѣ , боⷢ҇ . Ѻ҆́ко срⷣца мᲂегѡ̀ вᲂспꙋща́ю к̾ тебѣ̀ влⷣчце , непре́зри ма́лᲂе ми вᲂз̾дыха́нїѧ в̾ ча́съ , є҆гда̀ сꙋ́дитъ сн҃ъ тво́й ми́рꙋ , бꙋ́ди ми пᲂкро́въ и҆ пᲂмо́щница .

таⷤ , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , боⷢ҇ . =во́ =гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Въ сре́дꙋ , на па́вечерницѣ . кано́нъ , прест҃ѣ́й бцⷣѣ . і҆ѡа́нна є҆рмᲂна́ха . є҆мꙋ́же краегране́сїе прест҃а́ѧ прїимѝ і҆ѡа́нна рыда́нїе . гла́съ , ѕ҃ . пѣ́снь , а҃ . і҆рмо́съ . Пᲂмо́щникъ и҆ пᲂкрᲂви́тель , бы́сть мнѣ̀ во спасе́нїе . се́й ми є҆́сть бг҃ъ , и҆ прᲂсла́влю и҆̀ , бг҃ъ ѻ҆ц҃а мᲂегѡ̀ , и҆ вᲂзнесꙋ̀ и҆̀ , сла́вно бо прᲂсла́висѧ . запѣ́въ : прест҃а́ѧ гжⷭ҇е бцⷣе спасѝ на́съ . Ка́кѡ пристꙋплю̀ к̾ тебѣ̀ чⷭ҇таѧ , ѿча́ѧнъ ѡ҆каѧ́нныи а҆́зъ , ве́сь стра́стенъ нечистᲂта́ми бы́въ . но ᲂу҆ще́дривши спасѝ ѡ҆каѧ́ннꙋю мᲂю̀ дш҃ꙋ бг҃ᲂрᲂди́тельнице пречⷭ҇таѧ . Вᲂста́вши смире́ннаѧ дш҃е , ѿ глꙋбины̀ без̾че́стїѧ , вᲂзᲂпѝ те́плѣ к̾ є҆ди́нᲂй чⷭ҇тѣй , пᲂми́лꙋй ѻ҆трᲂкᲂви́це пренепᲂро́чнаѧ чⷭ҇таѧ , и҆ страсте́й мѧ и҆зба́ви . сла́ва . Бꙋ́рею напа́стей пᲂтᲂпле́нъ бы́хъ грѣхѝ , прᲂстри́ ми ны́нѣ по́мᲂщи рꙋ́кꙋ чи́стаѧ , и҆ и҆зба́ви без̾че́стїѧ страсте́й , ꙗ҆́кѡ да при́снѡ сла́влю тѧ̀ . и҆ ны́нѣ . Грѣха̀ лю́тыѧ бꙋ́ри и҆зба́ви мѧ бг҃ᲂрᲂди́тельнице , ве́сь скве́рненъ ѿ неѧ̀ бы́въ . тѣ́мже ти притека́ю , ѡ҆блегчи́ ми ны́нѣ тѧгᲂтꙋ̀ прегрѣше́нїи мᲂи́хъ .

пѣ́снь , г҃ . і҆рмо́съ . Оу҆твердѝ гдⷭ҇и на ка́мени за́пᲂвѣдей ти , пᲂдви́гшеесѧ срⷣце мᲂѐ , ꙗ҆́кѡ є҆ди́нъ ст҃ъ є҆сѝ и҆ пра́веденъ . Сᲂстарѣ́вшасѧ стрⷭ҇тьмѝ без̾че́стными грѣха̀ , мла́да сᲂтвᲂри́ мѧ пренепᲂро́чнаѧ , сᲂꙋ́зы прегрѣше́нїи ѡ҆блегча́ющи . Бре́нїѧ мѧ ѡ҆чи́сти , и҆ ти́ны грѣхо́вныѧ , и҆ хра́мъ мѧ бжⷭ҇твеныи сᲂтвᲂрѝ бцⷣе , и҆́же чи́стѣ к̾ тебѣ̀ прибѣга́ющаго . сла́ва . Вᲂзни́кни ѡ҆каѧ́ннаѧ дш҃е , ѿ сна̀ ᲂу҆ны́нїѧ , ѻ҆чи́ма же вᲂз̾зрѝ , къ є҆ди́нѣй спаса́ющей тѧ ѻ҆трᲂкᲂви́цѣ , бг҃ᲂневѣ́стнѣй . и҆ нн҃ѣ . Прихᲂжꙋ̀ влⷣчце , ѿча́ѧнъ , и҆ сᲂкрꙋше́нъ . и҆ к̾ мл҃твѣ твᲂе́й те́плѣй прибѣга́ю , спаси́ мѧ чи́стаѧ раба̀ твᲂегѡ̀ .

пѣ́снь , д҃ . і҆рмо́съ . Оу҆слы́шавъ же прᲂро́къ прихо́дъ тво́й гдⷭ҇и , и҆ ᲂу҆бᲂѧ́хсѧ , ꙗ҆́кѡ хо́щеши ѿ дв҃ы рᲂди́тисѧ , и҆ чл҃кѡмъ ꙗ҆ви́тисѧ , и҆ гл҃аше , ᲂу҆слы́шахъ слꙋ́хъ тво́й и҆ ᲂу҆бᲂѧ́хсѧ , сла́ва си́лѣ твᲂе́й . Гл҃ъ же и҆ веще́й , пра́во и҆́мамъ сꙋди́тисѧ бг҃ᲂрᲂди́тельнице , к̾ твᲂемꙋ̀ сн҃ꙋ пренепᲂро́чнаѧ . да ѡ҆брѧ́щꙋ тѧ̀ тᲂгда̀ прибѣ́жище , и҆ застꙋпле́нїе держа́внѣйшее , мꙋ́къ всѣ́хъ и҆збавлѧ́ющи мѧ . Житїѐ мᲂѐ ѡ҆ка́лѧно , не чи́стъ же нра́въ грѣха́ми , ве́сь стра́стенъ бы́хъ , чи́стаѧ . ѡ҆чи́сти мѧ ѿ скве́рны прегрѣше́нїи , и҆ ᲂу҆бѣлѝ ꙗ҆́кѡ снѣ́гъ , твᲂи́мъ хᲂда́тайствᲂмъ , к̾ бг҃ꙋ бл҃гᲂсе́рдᲂмꙋ . сла́ва . Плени́цами мᲂи́хъ сᲂгрѣше́нїи , стѧ́гнꙋтъ є҆́смь всю́дꙋ , к̾ пᲂкаѧ́ннымъ пꙋте́мъ , ᲂу҆клᲂнѧ́тисѧ не мᲂгі́и , прᲂстри́ ми рꙋ́кꙋ пренепᲂро́чнаѧ , ᲂу҆пра́ви же ми стезю̀ , к̾ спасе́нїю пꙋтѝ наставлѧ́ющꙋю мѧ . и҆ ны́нѣ . Лю́тыхъ мѧ мꙋ́къ , и҆ тмы̀ крᲂмѣ́шныѧ , и҆ гее́ны , твᲂи́ми мᲂли́твами свᲂбᲂдѝ дв҃о . и҆́маши бо во́лю и҆ си́лꙋ , гдⷭ҇а ро́ждьшаѧ є҆ди́нᲂго пребл҃га́го .

пѣ́снь , є҃ . і҆рмо́съ . и҆з̾ =нᲂщѝ ᲂу҆́треннююща чл҃кᲂлю́бче прᲂсвѣтѝ мᲂлю́сѧ , и҆ наста́ви мѧ на пᲂвелѣ́нїѧ твᲂѧ̀ , и҆ наꙋчи́ мѧ сп҃се , твᲂри́ти во́лю твᲂю̀ . Въ де́нь сꙋда̀ ꙗ҆ви́сѧ влⷣчце и҆ пред̾ста́ни ми , мꙋ́ки и҆ ѻ҆гнѧ̀ свᲂбᲂжда́ющи , да спа́ссѧ вᲂспᲂю̀ , твᲂю̀ не ѡ҆бᲂри́мꙋю бл҃гᲂда́ть . Оу҆стра́ньшасѧ влⷣчце кро́ва твᲂегѡ̀ , вра́гъ ви́дѧ мѧ , ври́нꙋ во глꙋбинꙋ̀ прегрѣше́нїи дш҃ꙋ мᲂю̀ , и҆ зрѧ́ мѧ смѣе́тсѧ , но пᲂмᲂзи́ ми . =сла́ва . Вᲂзни́кнꙋти сᲂтвᲂрѝ чⷭ҇таѧ , ѡ҆каѧ́ннꙋю и҆ страстнꙋ́ю ми дш҃ꙋ , мᲂлю́ тѧ пренепᲂро́чнаѧ , и҆ и҆змѝ тѧгᲂты̀ є҆ѧ̀ , мно́гихъ грѣхо́въ . и҆ ны́нѣ . Мᲂльбꙋ̀ принᲂшꙋ́ ти пренепᲂро́чнаѧ ᲂу҆ста́ви , ѿ скве́рныхъ и҆ ѡ҆ка́лѧныхъ мᲂи́хъ , ᲂу҆сте́нъ нечи́стыхъ , но ᲂу҆ще́дри мѧ твᲂе́ю мл҃твᲂю мᲂлю́ тѧ .

пѣ́снь , ѕ҃ . і҆рмо́съ . Вᲂзᲂпи́хъ всѣ́мъ срⷣцемъ мᲂи́мъ , к̾ ще́дрᲂмꙋ бг҃ꙋ , и҆ ᲂу҆слы́ша мѧ ѿ а҆́да преи҆спо́днѧгѡ , и҆ вᲂзведѐ ѿ тлѝ живо́тъ мо́й . Блꙋ́днаго менѐ и҆ преѡ҆каѧ́ннаго прїимѝ влⷣко хрⷭ҇тѐ , и҆ мꙋ́ки и҆зба́ви , мᲂльба́ми тебѐ ро́ждьшїѧ , и҆ шꙋ́їѧ ча́сти и҆зба́ви мѧ . Те́мныи а҆́да ѡ҆держи́тъ мѧ стра́хъ , чⷭ҇таѧ , и҆ ко́злищь ча́сть смꙋща́етъ мѧ . ѿ неѧ́же и҆зба́ви мѧ пречⷭ҇таѧ бцⷣе , мᲂлю́ тѧ . сла́ва . Оу҆мертви́вши пло́ти мᲂеѧ̀ страстно́е , влⷣчце бцⷣе , ѡ҆живᲂтвᲂри́ми чи́́стаѧ дш҃ꙋ преѡ҆каѧ́ннꙋю , и҆ на пꙋ́ть пра́выи наста́ви мѧ . и҆ ны́нѣ . Ра́бскᲂе принᲂша́ю ти мᲂле́нїе , неразꙋ́мныи а҆́зъ , и҆ къ твᲂемꙋ̀ прибѣга́ю бл҃гᲂꙋтро́бнᲂмꙋ милᲂсе́рдїю , невᲂз̾вратѝ менѐ чи́стаѧ пᲂсра́млена .

Гдⷭ҇и пᲂми́лꙋй , =гⷤ . сла́ва , и҆ ны́нѣ . сѣда́ленъ , гла́съ , ѕ҃ . Ѿ =срⷣца стена́нїе , и҆ ѿ ᲂу҆тро́бы принᲂша́ю ти пренепᲂро́чнаѧ , твᲂѐ прᲂсѧ̀ бл҃гᲂпребы́тнᲂе застꙋпле́нїе , пᲂми́лꙋй всестрастнꙋ́ю ми дш҃ꙋ . ᲂу҆милᲂсе́рди мнᲂгᲂмлⷭ҇тиваго бг҃а , и҆зба́вити мѧ сꙋда̀ и҆ є҆́зера ѻ҆́гненагѡ , є҆ди́на бл҃гᲂслᲂве́наѧ .

пѣ́снь , з҃ . і҆рмо́съ . Сᲂгрѣши́хᲂмъ и҆ без̾зако́ннᲂвахᲂмъ , и҆ не ѡ҆правди́хᲂмсѧ пред̾ тᲂбо́ю , ни сᲂблюдо́хᲂмъ ни сᲂтвᲂри́хᲂмъ , ꙗ҆́кᲂже запᲂвѣ́да на́мъ , но непреда́ждь на́съ до кᲂнца̀ , ѻ҆те́ческїи бж҃е . Ꙗ҆́кѡ млⷭ҇тивꙋ , ꙗ҆́кѡ бл҃гᲂлюби́вꙋ дв҃ꙋ мт҃рь , всю́ тѧ ꙗ҆́кѡ чи́стꙋ свѣ́дыи , прибѣга́ю а҆́зъ ѡ҆каѧ́нныи , но не ѿвратѝ менѐ всенепᲂро́чнаѧ пᲂсра́млена ѿ себѐ . Вᲂзни́кни ѽ страстна́ѧ дш҃е , и҆ вᲂста́ни ѡ҆каѧ́ннаѧ . бі́й и҆з̾ глꙋбины̀ в̾пе́рси , и҆ и҆спꙋстѝ сле́зъ и҆сто́чники , да тѧ̀ пᲂми́лꙋетъ ѡ҆каѧ́ннꙋю , млрⷭ҇даѧ мт҃и хрⷭ҇та̀ и҆ бг҃а . сла́ва . Хра́мъ бж҃їи бы́въ , ѿ креще́нїѧ бжⷭ҇твенагѡ дре́вле , ве́сь ѡ҆скверни́хсѧ ѻ҆каѧ́нныи . и҆ низ̾лежꙋ̀ ᲂу҆жа́снѡ паде́нїемъ лю́тѣ . но ты́ мѧ вᲂз̾ста́ви пренепᲂро́чнаѧ , ѿча́ѧннымъ наде́жда . и҆ ны́нѣ . Ѻ҆́блакъ тѧ́жекъ пᲂкры̀ , преѡ҆каѧ́ннᲂе ми срⷣце . тма̀ и҆ мра́къ на́йде на страстнꙋ́ю ми дш҃ꙋ бг҃ᲂневѣ́сто , пᲂкаѧ́нїѧ лꙋча́ми ѡ҆зарѝ , да сла́влю тѧ .

пѣ́снь , и҃ . і҆рмо́съ . Є҆го́же во́и нбⷭ҇нїи сла́вѧтъ , и҆ трепе́щꙋтъ херꙋви́ми и҆ серафи́ми , всѧ́кѡ дыха́нїе и҆ тва́рь , по́йте бл҃гᲂслᲂви́те , и҆ превᲂзнᲂси́те є҆гѡ̀ во́ вѣки . Рѣка̀ ѻ҆́гнена смꙋща́етъ , сꙋмра́къ несвѣти́мыи , всегѡ̀ мѧ̀ кᲂле́блетъ . че́рвь мѧ ᲂу҆жаса́етъ скрежетны́и дв҃о , да ѡ҆брѧ́щꙋ тѧ , тᲂгда̀ застꙋ́пницꙋ держа́внꙋ . Вᲂз̾гнѣще́нїе ѻ҆гню̀ да не бꙋ́дꙋ гдⷭ҇и , ни да ᲂу҆слы́шꙋ гла́съ преще́нїѧ твᲂегѡ̀ , и҆мѣ́ѧ мᲂлѧ́щꙋю тѧ , твᲂю̀ чи́стꙋю мт҃рь . є҆ѧ́же мᲂльба́ми пᲂми́лꙋй мѧ взыва́ю ти . сла́ва . Бжⷭ҇твенагѡ гла́са ᲂу҆слы́шати сᲂтвᲂри́ мѧ , и҆ стᲂѧ́нїѧ и҆з̾бра́нныхъ пᲂкажи́ мѧ хрⷭ҇тѐ прича́стника , да не плаче́внᲂе мѣ́сто мѧ прїи́метъ , и҆мы́и мᲂлѧ́щꙋю тѧ̀ ѡ҆ се́мъ бцⷣꙋ . и҆ ны́нѣ . Стрꙋѝ сле́зъ ны́нѣ низ̾пᲂслѝ мѝ , и҆ стена́нїе ѿ дш҃и сᲂтвᲂрѝ чи́стаѧ , всегда̀ припа́дати твᲂемꙋ̀ пᲂкро́вꙋ , ꙗ҆́кѡ да ѡ҆брѧ́щꙋ разрѣше́нїе грѣхо́въ мᲂи́хъ твᲂе́ю мл҃твᲂю .

пѣ́снь , ѳ҃ . і҆рмо́съ . Без̾се́менно зача́тїе , и҆ ржⷭ҇тво̀ несказа́нно , и҆ мт҃ре без̾мꙋ́жныѧ без̾ тлѝ прижи́тїе . бж҃їе бо ржⷭ҇тво̀ ѡ҆бнᲂвлѧ́етъ є҆стество̀ . тѣ́мже тѧ̀ всѝ ро́ди бг҃ᲂневѣ́стнꙋю мт҃рь правᲂсла́вно велича́емъ . Дн҃ь сꙋда̀ стра́шныи смꙋща́етъ мѧ дв҃о , скре́жетъ зꙋбѡ́въ , та́етъ срⷣце мᲂѐ . стᲂѧ́нїе ко́злищь ᲂу҆жаса́етъ мѧ . но по́мᲂщь в̾ лю́тыхъ , да ѡ҆брѧ́щꙋ тѧ бцⷣꙋ , є҆гда̀ и҆́мамъ ѡ҆сꙋди́тисѧ . Ны́нѣ тре́петъ сᲂдержи́тъ мѧ , и҆ стра́хъ смꙋща́етъ мѧ гее́нскїи . и҆ что̀ сᲂдѣ́ѧти невѣ́мъ ѡ҆каѧ́нныи и҆ ѡ҆сꙋжде́ныи ; тѣ́мже притека́ю к̾ тебѣ̀ , и҆ те́плымъ ᲂу҆миле́нїемъ вᲂпїю́ ти , непре́зри менѐ пречⷭ҇таѧ . сла́ва . Зрѧ̀ сꙋди́ща , и҆ пᲂмышлѧ́ю сꙋ́дъ тво́й хрⷭ҇тѐ мо́й , на́ немже и҆́мамъ сꙋди́тисѧ пра́веднѡ ѡ҆ дѣ́лѣхъ ѡ҆сꙋжде́ныи . но и҆́мамъ мᲂле́бницꙋ тᲂгда̀ , къ щедро́тамъ твᲂи́мъ мно́гимъ , мᲂлѧ́щꙋю бг҃ᲂневѣ́стнꙋю мт҃рь твᲂю̀ . и҆ ны́нѣ . Мы́сленѡ прикаса́ющесѧ твᲂи́мъ стᲂпа́мъ всенепᲂро́чнаѧ , мᲂлю́ тѧ прїимѝ рыда́нїе мᲂѐ , пѣ́нїе внꙋшѝ , и҆ прегрѣше́нїемъ разрѣше́нїе пᲂда́ждь ми вᲂпїю́ ти , мл҃твами сѝ дв҃о , да любо́вїю тѧ̀ велича́ю . та́же , дᲂсто́йнѡ є҆́сть . и҆ про́чее , ѡ҆бы́чно . и҆ ѿпꙋ́стъ .

Въ четверто́къ , на ᲂу҆́трени . по а҃ , стихᲂло́гїи . сѣда́льны , а҆пⷭ҇льски . гла́съ , ѕ҃ . Ꙗ҆́кѡ пᲂсредѣ̀ ᲂу҆чени́къ твᲂи́хъ прїи́де сп҃се , ми́ръ даѧ̀ и҆́мъ , прїидѝ и҆ к̾ на́мъ , и҆ спасѝ на́съ . сти́хъ : во всю̀ зе́млю и҆зыдо́ша веща́нїѧ и҆́хъ , и҆ в̾ кᲂнцы̀ вселе́нныѧ гл҃ы и҆́хъ . Оу҆чени́къ твᲂи́хъ ли́къ вселе́ннꙋю прᲂсвѣтѝ , бы́вше бо и҆нᲂгда̀ лᲂвцы̀ ры́бамъ , нн҃ѣ же чл҃кѡмъ бы́ша . тѣ́хъ ра́ди бж҃е пᲂми́лꙋй на́съ . сла́ва , и҆ ны́нѣ , боⷢ҇ . Мно́гаѧ премно́жества мᲂи́хъ бцⷣе сᲂгрѣше́нїи , къ тебѣ̀ прибѣго́хъ пречⷭ҇таѧ спасе́нїѧ тре́бꙋѧ . пᲂсѣтѝ бᲂлѣ́знꙋющꙋю мᲂю̀ дш҃ꙋ , и҆ мᲂлѝ сн҃а свᲂегѡ̀ и҆ бг҃а на́шегѡ , пᲂда́ти ми ѡ҆ставле́нїе , ꙗ҆́же сᲂдѣ́ѧхъ ѕлѣ̀ , є҆ди́на бл҃гᲂслᲂве́наѧ .

по в҃ , стихᲂло́гїи , сѣда́льны . гла́съ , ѕ҃ . Оу҆ченицы̀ твᲂѝ сп҃се въ кᲂнцы̀ землѝ пᲂсыла́еми , ꙗ҆зы́ки бл҃гᲂче́стнѡ ꙗ҆́кѡ ры́бы ᲂу҆лᲂви́вше , приведо́ша твᲂе́й бл҃гᲂсти . тѣ́хъ ра́ди ᲂу҆́бѡ вᲂпїе́мъ ти , лю́демъ твᲂи́мъ пᲂда́ждь ве́лїю ми́лᲂсть . сти́хъ : и҆спᲂвѣ́дѧтъ нб҃са̀ чꙋдеса̀ твᲂѧ̀ гдⷭ҇и . Оу҆ченицы̀ твᲂѝ сп҃се въ кᲂнцы̀ землѝ пᲂсыла́еми , ꙗ҆зы́ки бл҃гᲂче́стнѡ ꙗ҆́кѡ ры́бы ᲂу҆лᲂви́вше , приведо́ша твᲂе́й бл҃гᲂсти . тѣ́хъ ра́ди ᲂу҆́бѡ вᲂпїе́мъ ти , лю́демъ твᲂи́мъ пᲂда́ждь ве́лїю млⷭ҇ть .= сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ .= Гдⷭ҇и ст҃ы́хъ твᲂи́хъ па́мѧть , дне́сь ꙗ҆ви́сѧ ꙗ҆́кѡ ра́й и҆́же во є҆де́мѣ . в̾ не́й бо ра́дꙋетсѧ всѧ̀ тва́рь . и҆ пᲂда́ждь на́мъ тѣ́хъ мл҃твами смире́нїе и҆ ве́лїю млⷭ҇ть . сла́ва , и҆ нн҃ѣ , боⷢ҇ . Всест҃а́ѧ бцⷣе , во́ времѧ живᲂта̀ мᲂегѡ̀ , не ѡ҆ста́ви менѐ , и҆ чл҃ческᲂмꙋ застꙋпле́нїю не в̾вѣ́ри менѐ , но сама́ мѧ застꙋпѝ и҆ пᲂми́лꙋй мѧ .

по г҃ , стихᲂло́гїи , сѣда́ленъ . гла́съ , ѕ҃ . Во всю̀ зе́млю ꙗ҆́кѡ мо́лнїѧ , премꙋ́дрыхъ ᲂу҆чени́къ твᲂи́хъ , влⷣко хрⷭ҇тѐ и҆зы́де спасе́нᲂе вѣща́нїе , и҆ ѡ҆зарѝ сꙋ́щихъ во тмѣ̀ лю́тыхъ , сн҃ы дню̀ и҆ свѣ́та на́съ сᲂдѣ́лаша . тѣ́мже тѧ̀ всѧ̀ тва́рь бл҃гᲂче́стно сла́витъ . сла́ва , и҆ ны́нѣ , боⷢ҇ . Ст҃а́ѧ влⷣчце хрⷭ҇та̀ бг҃а на́шегѡ мт҃и , ꙗ҆́кѡ всѣ́хъ твᲂрца̀ недᲂꙋмѣ́нно ро́ждьшаѧ , мᲂлѝ со а҆пⷭ҇лы сщ҃е́нными всегда̀ бл҃гᲂсты́ню є҆гѡ̀ , страсте́й на́съ и҆зба́вити , и҆ ѡ҆ставле́нїе на́мъ пᲂда́ти грѣхѡ́въ .

Кано́нъ , ст҃ы́мъ сла́внымъ и҆ всехва́льнымъ а҆пⷭ҇лѡмъ . твᲂре́нїе , ѳеѡ́фанᲂво . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́ сꙋхꙋ хᲂди́въ і҆и҃ль , по бе́зднѣ стᲂпа́ми , гᲂни́телѧ фараѡ́на , ви́дѧ пᲂтᲂплѧ́ема , бг҃ꙋ пᲂбѣ́днꙋю пѣ́снь пᲂе́мъ вᲂпїѧ́ше . запѣ́въ : ст҃і́и а҆пⷭ҇ли мᲂли́те бг҃а ѡ҆ на́съ . Свѣ́тъ бы́вше ми́рꙋ бг҃ᲂгл҃ивїи , свѣ́тлыми блиста́ньми ѡ҆зари́те на́съ , и҆ страсте́й и҆зба́вите но́щи , и҆ мглы̀ и҆скꙋше́нїи , бг҃ᲂбл҃же́ннїи . двⷤа . Кнѧ́зи честны́ѧ по все́й землѝ , дх҃ъ ст҃ы́и ва́съ пᲂста́ви гдⷭ҇ни ᲂу҆ченицы̀ , тѣ́мже вᲂздꙋ́шнаго кнѧ́зѧ пᲂбѣди́вше , вѣ́рныѧ и҆збавлѧ́ете . Ѿ ѻ҆гнѧ̀ невеще́ственагѡ , ꙗ҆́кѡ свѣтᲂза́рно в̾же́гшесѧ ᲂу҆́глїе , веще́ственыѧ мᲂѧ̀ премꙋ́дрїи стра́сти пᲂпали́те , к̾ свѣ́тꙋ без̾стра́стїѧ и҆ живᲂта̀ наставлѧ́юще мѧ . боⷢ҇ . А҆пⷭ҇лъ мл҃твами , прⷪ҇ркъ и҆ мч҃нкъ , и҆ ро́ждьшаѧ тѧ чⷭ҇тыѧ , гдⷭ҇и і҆с҃е всѣ́хъ цр҃ю , ᲂу҆ще́дри лю́ди сᲂгрѣши́вшїѧ ти .

Дрꙋгі́и кано́нъ , ст҃о́мꙋ чꙋдᲂтво́рцꙋ нико́лѣ . твᲂре́нїе , і҆ѡ́сифᲂво . гла́съ , ѕ҃ . і҆рмо́съ . Чꙋ́вственныи фараѡ́нъ , пᲂтᲂпле́нъ бы́сть съ во́и , і҆зра́иль же прᲂше́дъ пᲂсредѣ̀ мᲂрѧ̀ , вᲂпїѧ́ше гдⷭ҇ви бг҃ꙋ на́шемꙋ пᲂе́мъ , ꙗ҆́кѡ прᲂсла́висѧ . запѣ́въ : ст҃лю хрⷭ҇то́въ нико́лае , мᲂлѝ бг҃а ѡ҆ на́съ . на́ =нб҃сѣхъ живы́и ра́дᲂстнѡ ѻ҆́ч҃е премꙋ́дре , на землѝ и҆́же вѣ́рᲂю сᲂгла́снѡ тебѐ пᲂю́щїѧ , всѧ́кꙋю ско́рбь срⷣца лꙋка́вꙋю раз̾женѝ хᲂда́тайствᲂмъ сѝ . На стра́сти вре́дныѧ , на врагѝ тлетво́рныѧ . и҆ на всѧ́кꙋ льсти́вагѡ ѕло́бꙋ , ᲂу҆крѣпѝ на́съ ѻ҆́ч҃е нико́лае , и҆́же к̾ пᲂкро́вꙋ твᲂемꙋ̀ ст҃о́мꙋ , вѣ́рᲂю притека́ющїѧ . Оу҆ѧ́звеныхъ на́съ ѿ неви́димыхъ стрѣле́цъ , врачевство́мъ твᲂеѧ̀ нико́лае мл҃твы претвᲂрѝ , ꙗ҆́кѡ да здра́вᲂмъ хᲂди́ти на́мъ по пꙋте́хъ гдⷭ҇нихъ . =боⷢ҇ . И҆́же сы́и со ѻ҆ц҃е́мъ съпрⷭ҇нᲂсꙋ́щныи сн҃ъ , на пᲂслѣ́дᲂкъ во́лею всели́сѧ во ᲂу҆тро́бꙋ твᲂю̀ , в̾ на́ше бцⷣе вѣ́рныхъ ѡ҆бнᲂвле́нїе , тѣ́мже вᲂспѣва́емъ тѧ .

пѣ́снь , г҃ . і҆рмо́съ . Нѣ́сть ст҃а ꙗ҆́кᲂже ты̀ , гдⷭ҇и бж҃е мо́й , вᲂзнесы́и ро́гъ вѣ́рныхъ си бл҃же , и҆ ᲂу҆тве́рждь и҆́хъ на ка́мени и҆спᲂвѣ́данїѧ тѝ . Бжⷭ҇твеныи дх҃ъ ва́ша ꙗ҆зы́ки вᲂзвари́въ , прише́ствїемъ стра́шнымъ . сᲂкрꙋше́ныѧ чл҃ки , к̾ живᲂтꙋ̀ ѡ҆бнᲂвлѧ́етъ ва́ми сла́внїи а҆пⷭ҇ли . двⷤа . Въ ра́зꙋмѣ сᲂгрѣша́ю , ко́е ѡ҆брѧ́щꙋ пᲂми́лᲂванїе сло́ве в̾ де́нь сꙋ́дныи ; сегѡ̀ ра́ди вᲂпїю́ ти , твᲂи́хъ ра́ди ᲂу҆чени́къ ᲂу҆ще́дри мѧ самᲂѡ҆сꙋжде́наго . Оу҆пᲂдо́бльшїисѧ хрⷭ҇то́вымъ , спаси́тельнымъ стрⷭ҇те́мъ , дш҃и мᲂеѧ̀ стра́сти лѣ́тныѧ и҆ лю́тыѧ и҆сцѣли́те , вра́чеве сꙋ́ще сла́внїи а҆пⷭ҇ли . боⷢ҇ . Сᲂгрѣши́вшаго мѧ̀ хрⷭ҇тѐ , бцⷣы ра́ди и҆ твᲂи́хъ а҆пⷭ҇лъ , вᲂз̾врати́въ бж҃е пᲂми́лꙋй мѧ , и҆ ѻ҆гнѧ̀ вѣ́чнагѡ сп҃се свᲂбᲂдѝ .

и҆́нъ , і҆рмо́съ . На тве́рдѣмъ вѣ́ры твᲂеѧ̀ ка́мени , пᲂмышле́нїе ᲂу҆твердѝ дш҃и мᲂеѧ̀ , ᲂу҆тверди́ мѧ гдⷭ҇и , тѧ́ бо и҆́мамъ бл҃же , прибѣ́жище и҆ ᲂу҆тверже́нїе . Пᲂбѣ́ды ꙗ҆́вѣ на дш҃етлѣ́нныѧ стра́сти прїѧ́лъ є҆сѝ , нико́лае всебл҃же́нне , ѿ ни́хъ же ѕлѣ̀ всегда̀ пᲂбѣжда́емыхъ на́съ , твᲂи́ми мᲂли́твами и҆зба́ви . Оу҆́ды пло́тьскїѧ ᲂу҆мертви́въ вᲂз̾держа́нїемъ , и҆ к̾ жи́зни преше́лъ є҆сѝ нестарѣ́ющейсѧ , є҆ѧ́же и҆ на́мъ пᲂлꙋчи́ти мᲂли́сѧ мꙋ́дре , ра́дᲂстнѡ вᲂсхвалѧ́ющимъ тѧ . Пᲂсѣща́ти на́съ ѿ нбⷭ҇ныѧ высᲂты̀ непреста́й ст҃лю , ѿгᲂнѧ̀ всю̀ жите́йскꙋю тѣснᲂтꙋ̀ , ꙗ҆́же к̾ бг҃ꙋ твᲂи́ми мл҃твами . боⷢ҇ . Разрѣше́нїе на́мъ грѣхо́въ да́ти чи́стаѧ , и҆зба́вителѧ ᲂу҆мᲂлѝ , пᲂмраче́нїе всѐ ѿ дш҃ъ на́шихъ , прⷭ҇нѡ твᲂи́ми мл҃твами разгᲂнѧ́ющи .

пѣ́снь , д҃ . і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ цр҃кви бг҃ᲂлѣ́пнѡ зᲂве́тъ вᲂпїю́щи , ѿ со́вести чи́сты ѡ҆́ гдⷭ҇ѣ пра́зднꙋющи . Приста́нища бл҃гᲂꙋти́шнаѧ , приста́нища небꙋ́рнаѧ , къ ти́хᲂмꙋ мѧ̀ приста́нищꙋ дᲂведи́те , прегрѣше́нїи лю́тыхъ тревᲂлне́нїемъ ѡ҆бꙋрева́ема . двⷤа . Дш҃е мᲂѧ̀ вᲂздᲂхнѝ , дш҃е мᲂѧ̀ прᲂслези́сѧ . смире́нᲂе срⷣце мᲂѐ бл҃го́мꙋ ѿ ню́дъ прилѣпи́сѧ , ꙗ҆́кѡ да бꙋ́дꙋщаго тѧ̀ пла́мене и҆ мꙋ́ки и҆зба́витъ бг҃ъ . Сп҃са гдⷭ҇а мᲂли́те , спаси́телїе сꙋ́ще чл҃кѡмъ всебл҃же́ннїи а҆пⷭ҇ли , да на́съ спасе́тъ ѿ и҆скꙋше́нїи ѕлы́хъ , ꙗ҆́кѡ чл҃кᲂлю́бецъ . боⷢ҇ . Дв҃о пречⷭ҇таѧ , дв҃о непᲂро́чнаѧ , со а҆пⷭ҇лы ѡ҆ на́съ мᲂльбꙋ̀ сᲂтвᲂрѝ , ꙗ҆́кѡ да и҆зба́вимсѧ лю́тыхъ и҆скꙋше́нїи и҆ бѣ́дъ .

и҆́нъ , і҆рмо́съ . Оу҆слы́шахъ слꙋ́хъ тво́й и҆ ᲂу҆бᲂѧ́хсѧ , разꙋмѣ́хъ дѣ́ла твᲂѧ̀ , и҆ диви́хсѧ гдⷭ҇и . Оу҆врачꙋ́й ст҃е , ᲂу҆ѧ́звенᲂе ѿ льсти́ваго не и҆спра́вленᲂе срⷣце мᲂѐ , ᲂу҆мᲂли́въ бл҃гᲂда́вца нико́лае . Сᲂкрꙋши́лъ є҆сѝ кꙋми́ры па́гꙋбныѧ , хрⷭ҇то́въ ᲂу҆го́дниче . тѣ́мже вѣ́рᲂю мᲂлю́ тѧ нико́лае , ᲂу҆ма̀ мᲂегѡ̀ кꙋми́ры пᲂтребѝ . Мирᲂдᲂхнᲂве́ненъ бы́въ пра́ведными дѣлесы̀ бг҃ᲂмꙋ́дре , и҆ ми́рскїи ᲂу҆краси́лъ є҆сѝ прⷭ҇то́лъ , ѻ҆́ч҃е ст҃лю нико́лае . боⷢ҇ . Без̾невѣ́стнаѧ влⷣчце , бл҃гᲂслᲂве́наѧ бг҃ᲂрᲂди́тельнице , пᲂю́щїѧ тѧ спаса́й ѿ всѧ́кᲂгѡ вре́да , є҆ди́на чл҃кѡмъ пᲂмо́щнице .

пѣ́снь , є҃ . і҆рмо́съ . Бж҃їимъ свѣ́тᲂмъ тѝ бл҃же , ᲂу҆́тренюющихъ тѝ дш҃а любо́вїю , прᲂсвѣтѝ мᲂлю́сѧ , тѧ̀ вѣ́дѣти сло́во бж҃їе , и҆́стиннагѡ бг҃а , ѿ́ мрака грѣхо́внагѡ и҆зима́юща . Пꙋ́ть в̾вᲂдѧ́щїи в̾ живо́тъ , тѣ́снагѡ ра́ди ше́ствїѧ , бѣ́дъ же и҆ скᲂрбе́й , ᲂу҆ченицы̀ сло́ва , ꙗ҆́вѣ хᲂди́вшїи , стезю̀ жи́зни мᲂеѧ̀ ᲂу҆гла́дите . двⷤа . Свѣти́льницы бжⷭ҇твенагѡ вᲂсто́ка , и҆зба́вите мѧ ѿ тмы̀ страсте́й , и҆ сласте́й пᲂмраче́нїѧ . и҆ напа́стей , и҆ бѣ́дъ , и҆ бꙋ́ри и҆скꙋше́нїи , хрⷭ҇то́вы а҆пⷭ҇ли . Сви́тцы сло́ва бг҃ᲂзра́чнїи , въ кни́зѣ мѧ написа́тисѧ живо́тнѣй мᲂли́те а҆пⷭ҇ли , грѣхо́въ мᲂи́хъ ѕло́е растерза́юще писа́нїе , мᲂли́твами ва́шими . боⷢ҇ . Спасе́нїе мᲂѐ и҆ ᲂу҆пᲂва́нїе , спаси́ мѧ ᲂу҆пᲂва́ющаго на тѧ̀ , всѣ́хъ ᲂу҆пᲂва́нїе непᲂсты́днᲂе є҆́же къ сн҃ꙋ твᲂемꙋ̀ мᲂльба́ми , и҆ бжⷭ҇твеныхъ ᲂу҆чени́къ ѻ҆трᲂкᲂви́це всепѣ́таѧ .

и҆́нъ , і҆рмо́съ . Вᲂзсїѧ́выи свѣ́тъ всемꙋ̀ ми́рꙋ хрⷭ҇тѐ , прᲂсвѣтѝ срⷣце мᲂѐ , ѿ́ нᲂщи вᲂпїю́ща и҆ спаси́ мѧ . Дрема́нїемъ лѣ́нᲂсти ѡ҆держи́ма , ᲂу҆се́рдна мѧ ᲂу҆стро́й , сщ҃е́нными хᲂда́тайствы твᲂи́ми нико́лае . І҆с҃а сп҃са ᲂу҆мᲂлѝ ст҃лю нико́лае , вѣ́чнаго мѧ и҆зба́вити мꙋче́нїѧ . Мирски́хъ мѧ̀ сᲂбла́знъ спасѝ , и҆ ѿ бѣсо́вскагѡ ѡ҆ѕлᲂбле́нїѧ , мл҃твами сѝ ст҃лю нико́лае . боⷢ҇ . И҆́же бы́ти на́мъ пᲂдава́ѧи , во твᲂю̀ ᲂу҆тро́бꙋ всели́сѧ бцⷣе , є҆го́же мᲂлѝ спастѝ на́съ .

пѣ́снь , ѕ҃ . і҆рмо́съ . Жите́йскагѡ мо́рѧ вᲂз̾двиза́ема зрѧ̀ , напа́стей бꙋ́рею , в̾ ти́хо приста́нище прите́къ вᲂпїю́ ти , вᲂз̾ведѝ ѿ тлѝ живо́тъ мо́й мнᲂгᲂми́лᲂстиве . Ꙗ҆́кѡ скрижа́ли бг҃ᲂпи́санныѧ дх҃а , честна́ѧ закᲂнᲂпᲂлᲂже́нїѧ , въ дш҃а́хъ и҆ мѣ́стѣ нело́жнѡ сла́внїи . и҆́миже въ писа́нїихъ ᲂу҆праздни́сте зако́нъ , ми́ръ спа́сше . вⷤ . Дш҃е сᲂгрѣша́ющи , ѡ҆бы́чаемъ же ѕлы́мъ ᲂу҆мᲂвре́днѡ рабо́тающи , ѡ҆браще́нїемъ ѡ҆брати́сѧ , и҆ гдⷭ҇ви ще́дрᲂмꙋ вᲂзᲂпі́й , а҆пⷭ҇лъ ра́ди сло́ве спаси́ мѧ . Ѻ҆вца́мъ десны́мъ сᲂчета́й мѧ , во ᲂу҆жа́снᲂмъ и҆ стра́шнᲂмъ прише́ствїи твᲂе́мъ , и҆збра́ннымъ твᲂи́мъ , мл҃твами бжⷭ҇твеныхъ прᲂпᲂвѣ́дникъ твᲂи́хъ , закла́выисѧ за всѣ́хъ а҆́гньче неѕло́бивыи . боⷢ҇ . Ли́къ мо́литъ тѧ беспло́тныхъ слꙋ́гъ , сн҃е бж҃їи пребез̾нача́льне , и҆ ᲂу҆чени́къ сᲂбо́ръ с̾ро́ждьшею тѧ , лю́демъ свᲂи́мъ пᲂда́ждь ми́лᲂсти твᲂѧ̀ .

и҆́нъ , і҆рмо́съ . Ки́тᲂмъ пᲂже́ртъ грѣхо́внымъ , вᲂпїю́ ти хрⷭ҇тѐ со пррⷪ҇кᲂмъ , и҆з̾ и҆стлѣ́нїѧ мѧ свᲂбᲂдѝ . Свѣти́льника тѧ̀ разꙋ́мнагѡ и҆мꙋ́щи тва́рь нико́лае , прᲂсвѣща́етсѧ зарѧ́ми не и҆сче́тныхъ чꙋде́съ твᲂи́хъ . Невᲂз̾дрема́нныи мл҃твениче , к̾ тебѣ̀ притека́ющимъ нико́лае , ѿ сна̀ ѕла́гѡ лѣ́нᲂсти и҆зба́ви мѧ . И҆зба́вилъ є҆сѝ дре́вле мꙋ́дре хᲂтѧ́щїѧ непра́ведно ᲂу҆́мрети , та́кᲂжде и҆ менѐ и҆зба́ви ѿ бѣ́дъ и҆ прегрѣше́нїи нико́лае . боⷢ҇ . Дв҃о є҆ди́на чи́стаѧ ѡ҆бра́дᲂваннаѧ пᲂмᲂзи́ ми , прⷭ҇нѡ ѡ҆бꙋрева́емꙋ жите́йскими напа́стьми .

пѣ́снь , з҃ . і҆рмо́съ . Хладᲂда́тельнꙋ ᲂу҆́бѡ пе́щь сᲂтвᲂрѝ а҆́нг҃лъ , прпⷣбнымъ дѣ́темъ , халдѣ́и же ѡ҆палѝ велѣ́нїемъ бж҃їимъ . мꙋчи́телѧ ᲂу҆вѣща̀ вᲂпи́ти , блгⷭ҇ве́нъ бг҃ъ ѻ҆ц҃ъ на́шихъ . Оу҆́дицею сло́ва а҆пⷭ҇ли , и҆з̾вле́кше всѣ́хъ и҆з̾ глꙋбины̀ пре́лести , приведо́сте к̾ закла́вшемꙋсѧ сло́вꙋ на́съ ра́ди , пᲂю́ще є҆мꙋ̀ , блгⷭ҇ве́нъ бг҃ъ ѻ҆ц҃ъ на́шихъ . двⷤа . Ꙗ҆́вльшемꙋсѧ ве́щїю тѣле́снᲂю а҆пⷭ҇ли , нехᲂда́тайственѣ сᲂвᲂкꙋ́пльшесѧ , прᲂсвѣти́вшесѧ свѣтᲂда́тельными тᲂгѡ̀ сїѧ́ньми . тѣ́мже мѧ прᲂсвѣти́те вᲂпїю́ща , блгⷭ҇ве́нъ бг҃ъ ѻ҆ц҃ъ на́шихъ . Па́стырѧ до́браго ᲂу҆мᲂли́те , бжⷭ҇твенїи ᲂу҆ченицы̀ , в̾ гᲂра́хъ мѧ заблꙋ́ждьшаго престꙋпле́нїѧ в̾зыска́ти , и҆ спастѝ вᲂпїю́ща прилѣ́жнѡ , блгⷭ҇ве́нъ бг҃ъ ѻ҆ц҃ъ на́шихъ . боⷢ҇ . Со прⷪ҇рки а҆пⷭ҇лы же и҆ мч҃нки , дв҃о є҆го́же рᲂдила̀ є҆сѝ мᲂлѝ , земны́хъ мѧ и҆зба́вити ѕѡ́лъ , и҆ прича́стника нбⷭ҇ныхъ бл҃гъ бы́ти мѧ спᲂдо́би влⷣчце .

и҆́нъ , і҆рмо́съ . Ст҃ы́хъ ти ѻ҆́трᲂкъ хвалы̀ пᲂслꙋ́шавъ , и҆ пе́щь ѻ҆́гненнꙋю прᲂхла́ждь , блгⷭ҇ве́нъ є҆сѝ гдⷭ҇и . Си́лᲂю бж҃їею пребл҃же́нне , є҆рети́чествꙋющихъ пᲂлкѝ пᲂпра́лъ є҆сѝ . и҆ ѿ тѣ́хъ пре́лести , ста́до свᲂѐ спа́слъ є҆сѝ нико́лае . Ꙗ҆вле́исѧ пла́вающимъ , и҆ сво́й гра́дъ препита́лъ є҆сѝ стра́ждꙋщїи , дш҃етлѣ́ннагѡ мѧ гла́да и҆зба́ви , мл҃твами сѝ ѻ҆́ч҃е нико́лае . Оу҆твердѝ ѻ҆́ч҃е мл҃твами сѝ , тебѐ призыва́ющїѧ на́ пᲂмᲂщь нико́лае , ᲂу҆тиша́ѧ бѣсо́вскꙋю лꙋка́вꙋю бꙋ́рю . боⷢ҇ . Влⷣчце всѣ́хъ чл҃къ ст҃а́ѧ бцⷣе , рабо́ты мѧ страстны́ѧ , твᲂи́ми мл҃твами до кᲂнца̀ свᲂбᲂдѝ .

пѣ́снь , и҃ . і҆рмо́съ . и҆з̾ =пла́мени ст҃ы́мъ ро́сꙋ и҆стᲂчѝ , а҆ пра́веднагѡ же́ртвꙋ и҆ во́ды пᲂпалѝ , всѧ́ бо твᲂри́ши хрⷭ҇тѐ , є҆ли́ко хо́щеши , тѣ́мъ тѧ превᲂзно́симъ гдⷭ҇а во́ вѣки . Мл҃твᲂю серпо́мъ , ѡ҆чи́стите пле́велы всѧ̀ мы́сли мᲂеѧ̀ , бжⷭ҇твенїи дѣ́лателїе сп҃са а҆пⷭ҇ли , ꙗ҆́кѡ да спаси́тельнагѡ плᲂда̀ принесꙋ̀ кла́съ . =двⷤа . Ѡ҆лѧдинѣ́вшаѧ срⷣца̀ , ѡ҆бнᲂви́сте ра́лᲂмъ сло́ва , и҆ всѣ́ѧвше ᲂу҆че́нїе честно́е , кла́сы стᲂри́чествꙋющїѧ спа́сшихсѧ пᲂжа́сте бг҃ᲂви́дцы . Вра́жїю ѕло́бꙋ ᲂу҆спи́вше , ᲂу҆снꙋ́ли є҆стѐ сно́мъ пра́ведныхъ пᲂдо́бнымъ . неꙋсы́пнїи ѡ҆ на́съ мᲂли́твеницы бы́вше , ᲂу҆чени́цы сло́ва во всѧ̀ вѣ́ки . боⷢ҇ . Ѻ҆гнѧ̀ негаси́магѡ и҆зба́ви мѧ гдⷭ҇и , прⷪ҇ркъ и҆ мч҃нкъ , и҆ а҆пⷭ҇лъ твᲂи́хъ . и҆ и҆́же во ᲂу҆тро́бꙋ вмѣсти́вшїѧ тѧ не и҆зрече́ннѡ , дв҃ыѧ не и҆скꙋсᲂмꙋ́жныѧ ще́дре мл҃твами .

и҆́нъ , і҆рмо́съ . Ст҃і́и ѻ҆́трᲂцы въ вавило́нѣ , херꙋви́мꙋ ᲂу҆пᲂдо́бльшесѧ , трист҃ꙋ́ю вᲂз̾сыла́хꙋ пѣ́снь , блгⷭ҇ви́те по́йте , и҆ превᲂзнᲂси́те є҆гѡ̀ во́ вѣки . На высᲂтꙋ̀ житїѧ̀ свѣтлѣ́йшагѡ вᲂсте́къ , ꙗ҆ви́сѧ зна́емь вселе́ннѣй бг҃ᲂно́сне , чꙋдᲂдѣѧ́нїи разли́чными , прᲂсвѣща́ѧ сꙋ́щихъ во тмѣ̀ нико́лае . Ѡ҆бл҃гᲂда́ти бжⷭ҇твенѣ бо́дрствꙋющихъ , и҆ тѧ̀ чтꙋ́щїѧ нико́лае , ᲂу҆спѝ ѕло́бꙋ враждꙋ́ющихъ челᲂвѣ́къ , на на́съ нахᲂдѧ́щихъ бл҃же́нне . И҆́же всѧ̀ сѣ́ти вра́жїѧ крѣ́пᲂстїю сᲂкрꙋши́въ дх҃о́внᲂю ѿ тѣ́хъ и҆зба́ви мѧ твᲂи́ми мл҃твами , ѡ҆кᲂрмлѧ́ѧ живо́тъ мо́й бг҃ᲂмꙋ́дре ст҃лю нико́лае . боⷢ҇ . Пᲂе́мъ тѧ дв҃о бг҃ᲂрᲂди́тельнице , є҆ѧ́же ра́ди клѧ́тва непло́дна бы́сть . и҆ бл҃гᲂслᲂве́нїе всѣ́мъ прїи́де , вѣ́дꙋщимъ тѧ є҆ди́нꙋ мт҃рь бг҃а на́шегѡ без̾мꙋ́жнꙋю . та́же , пѣ́снь бцⷣѣ . вели́читъ дш҃а мᲂѧ̀ .= и҆ =пᲂкло́ны до землѝ .

пѣ́снь , ѳ҃ . і҆рмо́съ . Бг҃а чл҃кѡмъ неꙋдо́бь ви́дѣти , на́ньже несмѣ́ютъ чи́ни а҆́нг҃льстїи зрѣ́ти . тᲂбо́ю бо пречⷭ҇таѧ ꙗ҆ви́сѧ на́мъ сло́во вᲂплᲂще́нно , є҆го́же велича́юще , съ нбⷭ҇ными вѡ́и тѧ̀ велича́емъ . Бг҃а къ челᲂвѣ́кѡмъ примѣси́вшасѧ , и҆ ме́ртвенᲂе сᲂє҆дине́нїе , несмѣ́сно ѡ҆бᲂжи́вшаго , во все́мъ ми́рѣ прᲂпᲂвѣ́давше , всѣ́хъ без̾бо́жныѧ пре́лести свᲂбᲂди́сте , тѣ́мже блажи́ми є҆стѐ приснᲂмꙋ́дрїи а҆пⷭ҇ли . двⷤа . Хрⷭ҇то́вꙋ стра́сть и҆з̾ѡ҆бразꙋ́юше а҆пⷭ҇ли , страсте́й ра́ди тѣлесѐ разли́чныхъ , пло́ти мᲂеѧ̀ стрⷭ҇ти ᲂу҆мертви́те , и҆ и҆знемо́гшꙋю и҆ бѣ́дствꙋющꙋю , ᲂу҆мерщве́нꙋю мᲂю̀ дꙋ́шꙋ ѡ҆живи́те . Пꙋ́ть бꙋ́ди ми наставлѧ́ющїи мѧ , к̾ незаблꙋ́днᲂмꙋ пꙋтѝ за́пᲂвѣдей твᲂи́хъ чл҃кᲂлю́бче , грѣха̀ впа́дшаго въ про́пасть и҆ заблꙋ́ждьшаго , и҆ прекло́ньшагᲂсѧ к̾ пꙋте́мъ лꙋка́вымъ , и҆ бѣ́дствꙋющагѡ . боⷢ҇ . Ли́цы а҆́нг҃льстїи , и҆ а҆рха́нг҃лъ , вла́сти , и҆ си́лы , нача́ла , гдⷭ҇ьствїѧ , херꙋви́ми , и҆ серафи́ми , и҆ прⷭ҇то́ли хрⷭ҇тѐ , сᲂбо́ръ а҆пⷭ҇лъ с̾ ро́ждьшею тѧ , є҆ди́не мо́лѧт̾тисѧ цр҃ю , спастѝ ми́ръ сво́й .

и҆́нъ , і҆рмо́съ . Прїи́мшаѧ ра́дᲂсть а҆́нг҃лѡмъ , и҆ ро́ждьшаѧ сᲂзда́телѧ свᲂегѡ̀ , дв҃о спасѝ тебѐ велича́ющїѧ . Сщ҃е́нникѡмъ ᲂу҆дᲂбре́нїе , чꙋдесе́мъ и҆сто́чниче нико́лае , ᲂу҆мᲂлѝ бг҃а чл҃кᲂлю́бца , ѡ҆брѣстѝ на́мъ грѣхѡ́въ ѡ҆ставле́нїе . Ꙗ҆́кᲂже дре́вле ᲂу҆́зники и҆зба́вилъ є҆сѝ ѿ сме́рти , та́кѡ и҆ на́съ и҆зба́ви и҆скꙋше́нїи жите́йскихъ нико́лае . Ты̀ въ ми́рѣхъ , ликі́йскихъ пᲂгребе́нъ бы́сть , ми́ро то́чиши всегда̀ нико́лае , ѕлᲂво́нїѧ страсте́й ѿгᲂнѧ́ѧ при́снѡ . Зижди́телѧ прише́ствїе при две́рехъ , нелѣни́сѧ дш҃е мᲂѧ̀ , но вᲂзᲂпі́й , нико́лы мл҃твами хрⷭ҇тѐ спаси́ мѧ . боⷢ҇ . Свѣ́тъ ро́ждьшаѧ всепѣ́таѧ , срⷣца мᲂегѡ̀ зѣ́ницꙋ ѡ҆слѣ́пшꙋю прᲂсвѣтѝ , да пᲂю́ тѧ и҆́же тебѐ ра́ди спаса́емъ .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стⷯры , а҆пⷭ҇лѡмъ . гла́съ , ѕ҃ . Бꙋ́рю ᲂу҆ти́шивше , льстѝ бѣсо́вскїѧ , мꙋ́дрѣ въ ти́шинꙋ а҆пⷭ҇ли хрⷭ҇то́ви , ве́сь ми́ръ наста́висте въ вѣ́рꙋ правᲂсла́внꙋю . и҆ ны́нѣ мᲂли́тесѧ ѡ҆ дш҃а́хъ на́шихъ .

сти́хъ : и҆спо́лнихᲂмсѧ за ᲂу҆́тра . Па́мѧть мꙋ́дрыхъ ᲂу҆чени́къ хрⷭ҇та̀ цр҃ѧ на́шегѡ , дᲂсто́йнѡ пѣ́сньми пᲂчте́мъ вѣ́рнїи , ті́и бо трⷪ҇ческꙋю вѣ́рꙋ в̾ ми́рѣ прᲂпᲂвѣ́даша .

сти́хъ : и҆ бꙋ́ди свѣ́тлᲂсть . мⷱ҇ꙋ . И҆збра́нныѧ ᲂу҆дивѝ ст҃ы́ѧ бг҃ъ на́шъ , ра́дꙋйтесѧ и҆ весели́тесѧ всѝ рабѝ є҆гѡ̀ , ва́мъ бо ᲂу҆гᲂто́ва вѣнцы̀ и҆ црⷭ҇твїе свᲂѐ ; но мо́лимъ вы , и҆ на́съ незабꙋ́дите .

сла́ва , и҆ ны́нѣ , боⷢ҇ . Прелᲂже́нїе скᲂрбѧ́щимъ , премѣне́нїе бᲂлѧ́щимъ є҆сѝ бцⷣе всепѣ́таѧ , спасѝ гра́дъ и҆ лю́ди . бᲂри́мымъ смире́нїе , ѡ҆бꙋрева́емымъ тишина̀ , є҆ди́на пред̾ста́тельница вѣ́рнымъ .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= є҆ктенїѧ̀ . =та́же , ча́съ , а҃ . ѱалмы̀ , ѡ҆бы́чны . и҆ про́чее , и҆ кᲂне́чныи ѿпꙋ́стъ .

Въ четверто́къ , бл҃же́нны . гла́съ , ѕ҃ .

Пᲂмѧни́ мѧ бж҃е сп҃се мо́й , є҆гда̀ прїи́деши во црⷭ҇твїи сѝ , и҆ спаси́ мѧ , ꙗ҆́кѡ є҆ди́нъ чл҃кᲂлю́бецъ .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Ꙗ҆́кѡ лꙋчѝ та́йныѧ , прᲂте́кше в̾ ми́рѣ а҆пⷭ҇ли сла́внїи , чл҃ческїи ро́дъ вѣ́рᲂю прᲂсвѣти́ли є҆стѐ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Ꙗ҆́кѡ ѻ҆́блацы ѡ҆крᲂпи́ли є҆стѐ во́дꙋ въ ми́рѣ , бжⷭ҇твенагѡ ра́зꙋма , прᲂсвѣще́нїи , гдⷭ҇ни а҆пⷭ҇ли .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ небесѣхъ . Мꙋче́нїѧ ѻ҆гню̀ прїѡ҆бща́ющесѧ , бжⷭ҇твенꙋю ро́сꙋ прᲂхлажа́ющꙋю ва́съ , ѿ́ гдⷭ҇а вᲂспрїѧ́сте мч҃нцы .

сла́ва . Ст҃ѣ́й и҆ честнѣ́й трⷪ҇цѣ , вѣ́рнїи пᲂклᲂнѧ́ющесѧ сᲂгла́снѡ вᲂзᲂпїе́мъ , а҆пⷭ҇лъ мᲂльба́ми спасѝ всѣ́хъ на́съ .

и҆ ны́нѣ . Ро́ждьшаѧ сло́ва па́че слᲂвесѝ бцⷣе , ѻ҆ц҃ꙋ сᲂбез̾нача́льнаго , тᲂгѡ̀ мᲂлѝ спасти́сѧ дш҃а́мъ на́шимъ .

<< Previous

Contents

Next >>