Глас 6 среда

Во вто́рникъ , ве́черъ . на гдⷭ҇и вᲂзва́хъ , стихѣ́ры крⷭ҇тны . гла́съ , ѕ҃ . поⷣ . в̾ =тре́тїи де́нь . запѣ́въ : ꙗ҆́кѡ ѿ тебѐ ѡ҆чище́нїе є҆́сть . Р=аспе́ншꙋтисѧ дᲂлгᲂтерпѣли́ве гдⷭ҇и ,꙳ пᲂкᲂлѣба́лъ є҆сѝ зе́млю всю̀ ,꙳ вѣ́рныхъ же ᲂу҆тверди́въ срⷣца̀ .꙳ тѣ́мже тѧ̀ вᲂспѣва́емъ ,꙳ и҆ любо́вїю пᲂклᲂнѧ́емсѧ ꙳ непᲂстижи́мѣй си́лѣ твᲂе́й .

ᲂу҆пᲂва̀ дш҃а мᲂѧ̀ на́ гдⷭ҇а . Въ лани́ты заꙋше́нъ бы́сть сп҃се ,꙳ и҆ ѡ҆плева́нъ ,꙳ ꙗ҆дᲂви́тагѡ заꙋши́лъ є҆сѝ врага̀ ѕло́бꙋ .꙳ ѿє́млѧ паде́нїе ,꙳ є҆́же пᲂдъѧ́тъ а҆да́мъ ,꙳ ѡ҆кра́дсѧ видѣ́нїѧ ра́ди .

да ᲂу҆пᲂва́етъ і҆и҃ль на́ гдⷭ҇а . Сл҃нце пᲂмрачи́сѧ ,꙳ и҆ землѧ̀ всѧ̀ трѧса́шесѧ ,꙳ и҆ ка́менїе распаде́сѧ ,꙳ ꙗ҆́кѡ ви́дѣша тѧ̀ сп҃се ,꙳ на́ древѣ пᲂвѣ́шена непра́веднѡ ,꙳ и҆ ѡ҆ставлѧ́юща хᲂтѣ́нїѧ .

та́же , в̾ минѣ́и , стⷯры , ст҃о́мꙋ . а҆́ще ли нѣ́сть минѣ́и . и҆́ны , стⷯры , прест҃ѣ́й бцⷣѣ . гла́съ , и҆ пᲂдо́бенъ , то́йже . =запѣ́въ : ѿ всѣ́хъ без̾зако́нїи є҆гѡ̀ . П=ред̾стᲂѧ́щи ᲂу҆ крⷭ҇та̀ и҆нᲂгда̀ ,꙳ во́ времѧ распѧ́тїѧ дв҃аѧ ,꙳ съ дѣ́вственикᲂмъ ᲂу҆ченикѡ́мъ .꙳ и҆ пла́чꙋщи вᲂпїѧ́ше ᲂу҆вы̀ мнѣ̀ ,꙳ ка́кѡ стра́жеши хрⷭ҇тѐ ,꙳ всѣ́хъ сы́и без̾стра́стїе .

пᲂхвали́те є҆гѡ̀ всѝ лю́дїе . Зача́тїе ти без̾сѣ́менно ,꙳ и҆ ржⷭ҇тво̀ пречи́сто пᲂмышлѧ́ющи ,꙳ ᲂу҆дивлѧ́юсѧ ѕѣлѡ̀ ,꙳ ка́кѡ си́це ꙗ҆́кѡ ѕлᲂдѣ́й ,꙳ бл҃гᲂвᲂли́лъ є҆сѝ ᲂу҆́мрети сп҃се ,꙳ пречⷭ҇таѧ взыва́ше .

и҆ и҆́стина гдⷭ҇нѧ пребыва́етъ во́ вѣки . Распина́юсѧ ᲂу҆́бѡ на́ древѣ ,꙳ и҆ пригвᲂжда́юсѧ ꙗ҆́кѡ чл҃къ ,꙳ и҆ во́ грᲂбѣ пᲂлᲂга́юсѧ ꙗ҆́кѡ ме́ртвъ ,꙳ мт҃и чⷭ҇таѧ дв҃о , ꙳ ꙗ҆́кѡ бг҃ъ же во сла́вѣ ꙳ па́ки вᲂскрⷭ҇нꙋ тридне́венъ .

сла́ва , и҆ ны́нѣ , крⷭ҇тᲂбг҃ᲂро́диченъ . Людмѝ без̾зако́ннѣйшими , без̾пра́вды пригвᲂжда́ема тѧ̀ на́ древѣ , дв҃аѧ и҆ чⷭ҇таѧ , мт҃и твᲂѧ̀ зрѧ́щи , ꙗ҆́кᲂже сїмеѡ́нъ прᲂречѐ , ᲂу҆тро́бᲂю сп҃се ᲂу҆ѧзвлѧ́шесѧ .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стихѣ́ры , крⷭ҇тны . гла́съ , ѕ҃ . Крⷭ҇тъ тво́й гдⷭ҇и , жи́знь и҆ застꙋпле́нїе лю́демъ твᲂи́мъ є҆́сть , и҆ на́нь надѣ́ющїисѧ , тебѐ распѧ́тагѡ пло́тїю бг҃а на́шегѡ пᲂе́мъ , пᲂми́лꙋй на́съ .

сти́хъ : к̾ тебѣ̀ вᲂз̾ведо́хъ ѻ҆́чи мᲂѝ . Крⷭ҇тъ тво́й гдⷭ҇и ра́й ѿве́рзе , ро́дꙋ чл҃ческᲂмꙋ , и҆ ѿ тлѝ и҆зба́вльшесѧ , тебѐ распе́ншагᲂсѧ пло́тїю бг҃а на́шегѡ пᲂе́мъ , пᲂми́лꙋй на́съ .

сти́хъ : пᲂми́лꙋй на́съ гдⷭ҇и . мⷱ҇ꙋ . Страда́вшїи тебѐ ра́ди хрⷭ҇тѐ , мно́гїѧ мꙋ́ки претерпѣ́ша , и҆ сᲂверше́ныѧ вᲂспрїѧ́ша вѣнцы̀ на́ нб҃сѣхъ , да мо́лѧтсѧ ѡ҆ дш҃а́хъ на́шихъ .

=сла́ва , и҆ ны́нѣ , крⷭ҇тᲂбоⷢ҇ . на́ =древѣ живо́тъ на́шъ , зрѧ́щи всенепᲂро́чнаѧ бцⷣа ви́сѧщь , мт҃рьски рыда́ющи вᲂпїѧ́ше , сн҃е мо́й и҆ бж҃е мо́й , спасѝ любо́вїю пᲂю́щїѧ тѧ .

таⷤ , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , крⷭ҇тᲂбоⷢ҇ . =во́ =гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Во вто́рникъ , на па́вечерницѣ . кано́нъ , прест҃ѣ́й бцⷣѣ . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́ сꙋхꙋ хᲂди́въ і҆и҃ль , по бе́зднѣ стᲂпа́ми , гᲂни́телѧ фараѡ́на , ви́дѧ пᲂтᲂплѧ́ема , бг҃ꙋ пᲂбѣ́днꙋю пѣ́снь пᲂе́мъ вᲂпїѧ́ше .

запѣ́въ : прест҃а́ѧ гжⷭ҇е бцⷣе спасѝ на́съ . Всѧ́ко мᲂегѡ̀ рыда́ю житїѧ̀ скве́рнагѡ , и҆ мно́жества без̾мѣ́рныхъ ми ѕѡ́лъ . что́же и҆спᲂвѣ́мъ ти чⷭ҇таѧ ; не дᲂꙋмѣ́ю и҆ ᲂу҆жаса́юсѧ . но пᲂмᲂзи́ ми влⷣчце . Ѿ =кꙋ́дꙋ начнꙋ̀ гл҃ати , лꙋка́ваѧ и҆ лю́таѧ мᲂѧ̀ паде́нїѧ , страстны́и а҆́зъ ; ᲂу҆вы̀ что̀ бꙋ́дꙋ про́чее ; но ѽ влⷣчце пре́жде кᲂнца̀ ᲂу҆ще́дри мѧ . =сла́ва . Сме́ртныи ᲂу҆́бѡ ча́съ , и҆ сꙋди́ще стра́шнᲂе всегда̀ пᲂмышлѧ́ю пречⷭ҇таѧ . ѻ҆бы́чаемъ же всеѕлы́мъ прельща́юсѧ лю́тѣ , но пᲂмᲂзи́ ми . и҆ ны́нѣ . Бл҃ги́хъ тли́тель смᲂтрѧ́ѧ мѧ нн҃ѣ , на́га ѿстꙋ́пльша , и҆ дале́че и҆ ѿ бг҃а ѿчꙋжде́на , бжⷭ҇твеныхъ дᲂбрᲂдѣ́телей , пᲂглᲂти́ти мѧ ᲂу҆стремлѧ́етсѧ влⷣчце пред̾варѝ .

пѣ́снь , г҃ . і҆рмо́съ . Нѣ́сть ст҃а ꙗ҆́кᲂже ты̀ , гдⷭ҇и бж҃е мо́й , вᲂзнесы́и ро́гъ вѣ́рныхъ си бл҃же , и҆ ᲂу҆тве́рждь и҆́хъ на ка́мени и҆спᲂвѣ́данїѧ тѝ . Дш҃ꙋ ѡ҆калѧ́хъ скве́рно ѿ без̾мѣ́рныхъ ѕѡ́лъ мᲂи́хъ , страстны́и а҆́зъ бцⷣе влⷣчце . и҆ ка́мѡ про́чее пᲂйдꙋ̀ , ѿча́ѧнїемъ ве́сь ѡ҆держи́мь . И҆́же по ѻ҆́бразꙋ мѧ̀ ѡ҆калѧ́хъ блꙋ́дныи , ᲂу҆вы̀ мнѣ̀ чи́стаѧ , высᲂкᲂмꙋ́дренᲂю во́лею , не пᲂпᲂдо́бїю бо дѣ́лᲂмъ , и҆ сло́вᲂмъ , и҆ по́мыслᲂмъ сᲂдѣ́ѧхъ без̾мѣ́стнаѧ . сла́ва . Нѣ́сть и҆́нъ в̾ чл҃цѣхъ , и҆́же непᲂдо́бнаѧ сᲂдѣ́ѧвъ , ни рᲂди́сѧ в̾ ми́рѣ ꙗ҆́кᲂже а҆́зъ , бл҃га́ѧ , пᲂмраче́нъ ᲂу҆мо́мъ , и҆́бо кр҃ще́нїе бжⷭ҇твенᲂе ѡ҆скверни́хъ . и҆ ны́нѣ . На кᲂне́цъ дᲂстиго́хъ ѕлы́хъ , прест҃а́ѧ дв҃о , ты̀ пᲂмᲂзи́ми в̾ско́рѣ , нб҃о и҆ землѧ̀ вᲂпїе́та го́рцѣ , ѿ без̾мѣ́стныхъ дѣѧ́нїи непᲂдо́бныхъ .

пѣ́снь , д҃ . і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ цр҃кви бг҃ᲂлѣ́пнѡ зᲂве́тъ вᲂпїю́щи , ѿ со́вести чи́сты ѡ҆́ гдⷭ҇ѣ пра́зднꙋющи . А҆́нг҃льстїи чи́нᲂве , и҆ во́инства нбⷭ҇ныхъ си́лъ . твᲂегѡ̀ сн҃а ᲂу҆жаса́ютсѧ держа́вы чи́стаѧ . ны́нѣ же а҆́зъ ѿча́ѧвсѧ без̾стра́шїемъ ѡ҆держи́мь є҆́смь . Оу҆диви́сѧ всѧ̀ землѧ̀ и҆ ᲂу҆жасе́сѧ , зрѧ́щи , лю́таѧ и҆ ѕла́ѧ твᲂрѧ́щꙋ мѝ , и҆ без̾мѣ́стнаѧ , и҆ твᲂегѡ̀ сн҃а мно́гᲂмꙋ милᲂсе́рдїю чꙋдѧ́тсѧ . сла́ва . Цр҃квь ѡ҆скверни́хъ ѕлѣ̀ тѣле́снꙋю , и҆ цр҃квь гдⷭ҇ню , в̾ ню́же челᲂвѣ́цы трепе́щꙋще в̾хо́дѧтъ . а҆́зъ же блꙋ́дныи без̾ стꙋда̀ в̾хᲂждꙋ̀ , ᲂу҆вы̀ мнѣ̀ . и҆ ны́нѣ . Не ꙗ҆вѝ влⷣчце , не ꙗ҆вѝ стра́нна мѧ , ᲂу҆стра́ньшасѧ кро́ва сн҃а твᲂегѡ̀ , всѧ́кѡ недᲂсто́йна . но ѡ҆мы́й менѐ ѿ скве́рны прегрѣше́нїи мᲂи́хъ .

пѣ́снь , є҃ . і҆рмо́съ . Бж҃їимъ свѣ́тᲂмъ ти бл҃же , ᲂу҆́тренюющихъ ти дш҃а любо́вїю прᲂсвѣтѝ мᲂлю́сѧ , тѧ̀ вѣ́дѣте сло́во бж҃їе , и҆́стиннаго бг҃а , ѿ́ мрака грѣхо́внагѡ и҆зима́юща . Бжⷭ҇твенымъ сїѧ́нїемъ сѝ бл҃га́ѧ , и҆сцѣлѝ дш҃е́вныѧ ми стрⷭ҇ти , є҆́же ми тли́тель в̾сѣ́ѧ . и҆зба́ви мѧ сегѡ̀ плѣне́нїѧ го́рькагѡ , смѣе́тбᲂсѧ , зрѧ̀ менѐ без̾ застꙋпле́нїѧ . А҆да́мъ престꙋпѝ ᲂу҆́бѡ за́пᲂвѣдь є҆ди́нꙋ , сн҃а твᲂегѡ̀ дв҃о , и҆ во и҆згна́нїе в̾падѐ . ка́ко же рыда́ю прегрѣше́нїи мᲂи́хъ бе́зднꙋ , а҆́зъ престꙋ́пныи , и҆ ѿстꙋ́пникъ є҆гѡ̀ . сла́ва . Оу҆бі́ица ᲂу҆́бѡ ꙗ҆́вльсѧ дре́вле , и҆ братᲂꙋбі́йца ка́їнъ бг҃ᲂмъ про́клѧтъ бы́сть . что́же сᲂтвᲂрю̀ , а҆́зъ вседе́рзыи , дш҃ꙋ ᲂу҆́бѡ ᲂу҆би́въ ны́нѣ , и҆ нестыжꙋ́сѧ . и҆ ны́нѣ . И҆са́вꙋ пᲂревнᲂва́хъ лю́тᲂмꙋ , чре́во ѡ҆бъѧде́нїемъ и҆ сы́тᲂстїю ве́сь , дш҃ꙋ ѡ҆скверни́хъ пьѧ́нствᲂмъ , и҆ ласко́рдьствᲂмъ ѡ҆скверни́въ житїѐ мᲂѐ , и҆ кто̀ менѐ непла́четъ , страстна́гѡ ᲂу҆вы̀ мнѣ̀ .

пѣ́снь , ѕ҃ . і҆рмо́съ . Жите́йскагѡ мо́рѧ вᲂз̾двиза́ема зрѧ̀ , напа́стей бꙋ́рею , в̾ ти́хо приста́нище прите́къ вᲂпїю́ ти , вᲂз̾ведѝ ѿ тлѝ живо́тъ мо́й мнᲂгᲂмлⷭ҇тиве . Житїѐ мᲂѐ блꙋ́дно , дш҃а мᲂѧ̀ скверна́ва , и҆ живо́тъ ве́сь ѡ҆ка́ѧнъ . тѣ́ло же мᲂѐ всѐ во ѕлы́хъ лю́тѣ ѡ҆калѧ́хъ , тѣ́мже пᲂтщи́сѧ дв҃це пᲂмᲂщи́ ми . Кᲂне́цъ пред̾ста̀ и҆ не терплю̀ бл҃га́ѧ , со́вѣсть ѡ҆блича́етъ мѧ , пред̾стᲂѧ́тъ бо ми блꙋ́днаѧ дѣѧ́нїѧ лꙋка́вагѡ житїѧ̀ , и҆ сꙋди́ща ᲂу҆жаса́юсѧ , сн҃а твᲂегѡ̀ чⷭ҇таѧ . сла́ва . Пло́ти мᲂеѧ̀ раз̾жже́нїе , рѣка̀ ѻ҆́гнена стра́шна и҆ неꙋгаси́ма , жде́тъ вᲂи́стинꙋ , и҆ че́рвь неᲂу҆сыпа́ѧи , но ᲂу҆гаси́ ми сїѧ̀ мл҃твами твᲂи́ми пречⷭ҇таѧ . и҆ ны́нѣ . Ны́нѣ тре́петᲂмъ ѡ҆держи́мь є҆́смь бл҃га́ѧ , и҆ ᲂу҆жаса́юсѧ лꙋка́вагѡ лᲂвле́нїѧ . пре́жде бо кᲂнца̀ хо́щетъ мѧ тли́тель ᲂу҆би́ти , держа́ мѧ ꙗ҆́кѡ плѣне́на всегѡ̀ , и҆ на́га дᲂбрᲂдѣ́телей .

Гдⷭ҇и пᲂми́лꙋй ,= гⷤ . сла́ва , и҆ ны́нѣ . сѣда́ленъ , гла́съ , ѕ҃ . О=у҆пᲂва́нїе и҆ стѣна̀ , и҆ приста́нище лю́демъ свᲂи́мъ дв҃о , и҆з̾ неѧ́же рᲂди́сѧ без̾стра́стно , сп҃съ всѧ́ческимъ , и҆ спасѐ ᲂу҆пᲂва́ющїѧ на тѧ̀ . ꙗ҆́кᲂже пла́часѧ свᲂегѡ̀ сн҃а при крⷭ҇тѣ̀ , тᲂгѡ̀ и҆ ны́нѣ мᲂлѝ и҆зба́вити ѿ тлѝ всѧ̀ пᲂю́щїѧ тѧ .

пѣ́снь , з҃ . і҆рмо́съ . Хладᲂда́тельнꙋ ᲂу҆́бѡ пе́щь сᲂтвᲂрѝ а҆́нг҃лъ , прпⷣбнымъ дѣ́темъ , халдѣ́и же ѡ҆палѝ велѣ́нїемъ бж҃їимъ . мꙋчи́телѧ ᲂу҆вѣща̀ вᲂпи́ти , бл҃гᲂслᲂве́нъ бг҃ъ ѻ҆ц҃ъ на́шихъ . Се́дмь седми́цею пла́мень раз̾жже́ ми страстьмѝ лꙋка́выи , и҆ любᲂдѣѧ́ньми срⷣце всегда̀ ᲂу҆мерщвѧ́етъ . тѣ́мже то́ки мᲂи́хъ сле́зъ ᲂу҆гасѝ є҆гѡ̀ , мт҃и бж҃їѧ , и҆ спаси́ мѧ . Ѡ҆калѧ́ема ти́нᲂю прегрѣше́нїи мᲂи́хъ , не ѿри́ни менѐ влⷣчце бл҃га́ѧ , и҆́бо зрѧ́ мѧ во ѿчаѧ́нїи сꙋ́ща , смѣе́тсѧ прелꙋка́выи вра́гъ , но сама̀ твᲂе́ю держа́внᲂю рꙋко́ю вᲂста́ви . сла́ва . Стра́шно ᲂу҆́бѡ сꙋди́ще , стрⷭ҇тна́ѧ дш҃е мᲂѧ̀ и҆ чꙋ́вственаѧ , и҆ мꙋче́нїе же некᲂнча́емᲂе и҆ гро́знᲂе . но ѻ҆ба́че ны́нѣ припадѝ к̾ мт҃ри сꙋдїѝ твᲂегѡ̀ и҆ бг҃а , не ѿча́йсѧ сама̀ . и҆ ны́нѣ . Ѡ҆мрачи́хсѧ страстны́и , мно́жествᲂмъ без̾мѣ́рныхъ ѕѡ́лъ , и҆ ѡ҆скверни́хъ дш҃ꙋ и҆ тѣ́ло же и҆ ᲂу҆́мъ . тѣ́мже пречⷭ҇таѧ свѣ́тᲂмъ твᲂи́хъ сїѧ́нїи , к̾ без̾стра́стїю сла́дᲂсти ско́рѡ в̾веди́ мѧ .

пѣ́снь , и҃ . і҆рмо́съ . и҆з̾ =пла́мени ст҃ы́мъ ро́сꙋ и҆стᲂчѝ , а҆ пра́веднагѡ же́ртвꙋ и҆ во́ды пᲂпалѝ , всѧ́ бо твᲂри́ши хрⷭ҇тѐ , є҆ли́ко хо́щеши , тѣ́мъ тѧ превᲂзно́симъ гдⷭ҇а во́ вѣки . Ꙗ҆́же ѿ трⷪ҇цы є҆ди́нагѡ бг҃а ро́ждьшаѧ , и҆ на рꙋкꙋ̀ нᲂси́вши дв҃о мт҃и , ᲂу҆гасѝ страсте́й ѻ҆гнепа́льнꙋю пе́щь , и҆ сле́зными то́ки ѡ҆мы́й дш҃ꙋ мᲂю̀ . Прихо́да сме́ртнагѡ ᲂу҆жаса́юсѧ пречⷭ҇таѧ , и҆ сꙋда̀ ѻ҆́нᲂгѡ ве́сь нн҃ѣ ᲂу҆бᲂѧ́хсѧ , дѣ́юже ѕла́ѧ , ника́кᲂже стыжꙋ́сѧ . ᲂу҆ще́дри мѧ пре́жде кᲂнца̀ , мᲂли́твами твᲂи́ми дв҃о . =сла́ва . Стᲂна́нїѧ немо́лчнаѧ влⷣчце да́рꙋй ми , и҆ сле́зъ тꙋ́чꙋ да́ждь , да ѿмы́ю мᲂѧ̀ прегрѣше́нїѧ мно́гаѧ , и҆ не и҆сцѣ́льныѧ ꙗ҆́звы , ꙗ҆́кѡ да ᲂу҆лꙋчꙋ̀ жи́знь вѣ́чнꙋю . и҆ ны́нѣ . Ѕѡ́лъ мᲂи́хъ мно́жество , тебѣ̀ и҆спᲂвѣ́дахъ влⷣчце , ꙗ҆́кѡ ни є҆ди́нъ в̾ ми́рѣ и҆́нъ , прᲂгнѣ́ва бг҃а сн҃а и҆ гдⷭ҇а твᲂегѡ̀ , сего́ ми в̾ско́рѣ премѣнѝ дв҃о .

пѣ́снь , ѳ҃ . і҆рмо́съ . Бг҃а чл҃кѡмъ неꙋдо́бь ви́дѣти , на́ньже несмѣ́ютъ чи́ни а҆́нг҃льстїи зрѣ́ти . тᲂбо́ю бо пречⷭ҇таѧ ꙗ҆ви́сѧ на́мъ сло́во вᲂплᲂще́нно , є҆го́же велича́юще , съ нбⷭ҇ными вѡ́и тѧ̀ велича́емъ . Сѐ прихᲂжꙋ́ ти пречⷭ҇таѧ . со́ страхᲂмъ мно́гимъ и҆ любо́вїю . и҆ любо́вїю , крѣ́пᲂсть вѣ́дыи мно́гїѧ мл҃твы твᲂеѧ̀ ра́бъ тво́й . вельми́ бо мо́жетъ вᲂи́стинꙋ влⷣчце , мᲂльба̀ ма́терьнѧ к̾ сн҃ꙋ , милᲂсе́рдїемъ бо преклᲂнѧ́етсѧ . Ли́ки прїимѝ а҆рха́нг҃лъ же , и҆ мно́жество вы́шнихъ во́инствъ , зижди́телѧ мᲂегѡ̀ , а҆пⷭ҇лъ же и҆ прⷪ҇ркъ сᲂбо́ры , и҆ мч҃нки и҆ прпⷣбныѧ , и҆ сщ҃е́ннᲂмч҃нки . и҆ мл҃твꙋ сᲂтвᲂрѝ чⷭ҇таѧ за на́съ к̾ бг҃ꙋ . сла́ва . Ны́нѣ и҆ тᲂгда̀ твᲂю̀ по́мᲂщь да ѡ҆брѧ́щꙋ чи́стаѧ , в̾ ча́съ во́ньже и҆зы́детъ дх҃ъ мо́й , в̾ско́рѣ и҆зима́ющи и҆зба́ви мѧ , бѣсо́вскагѡ мꙋчи́тельства и҆́хъ , пренепᲂро́чнаѧ . и҆ не ѡ҆ста́ви менѐ бл҃га́ѧ пре́данꙋ бы́ти и҆́мъ . и҆ ны́нѣ . Сꙋдїю̀ ще́драгѡ ча́ю , и҆ чл҃кᲂлюби́ва твᲂегѡ̀ сн҃а , чⷭ҇таѧ непре́зри менѐ . но тᲂго́ ми сᲂтвᲂрѝ бл҃гᲂпремѣ́нна , пᲂста́вити менѐ ѡ҆деснꙋ́ю тᲂгда̀ всенепᲂро́чнаѧ , пречⷭ҇тᲂмꙋ сꙋди́щꙋ є҆гѡ̀ . на тѧ́ бо ᲂу҆пᲂва́ю . та́же , дᲂсто́йнѡ є҆́сть . и҆ про́чее , ѡ҆бы́чно . и҆ ѿпꙋ́стъ .

Въ сре́дꙋ , на ᲂу҆́трени . по а҃ , стихᲂло́гїи . сѣда́льны , крⷭ҇тны . гла́съ , ѕ҃ . Крⷭ҇тъ тво́й гдⷭ҇и ѡ҆ст҃и́сѧ . тѣ́мъ бо быва́ютъ и҆сцѣле́нїѧ бᲂлѧ́щимъ во грѣсѣ́хъ . тᲂгѡ̀ ра́ди тебѣ̀ припа́даемъ пᲂми́лꙋй на́съ . сти́хъ : вᲂзнᲂси́те гдⷭ҇а бг҃а на́шего , и҆ кла́нѧйтесѧ пᲂд̾но́жїю но́гꙋ є҆гѡ̀ ꙗ҆́кѡ ст҃о є҆́сть . То́чїю вᲂдрꙋзи́сѧ дре́во хрⷭ҇тѐ крⷭ҇та̀ твᲂегѡ̀ , ѡ҆снᲂва́нїѧ пᲂкᲂлѣба́шасѧ сме́рти гдⷭ҇и . є҆го́же бо пᲂжрѐ жела́нїемъ а҆́дъ , ѿпꙋстѝ трепе́ща . пᲂказа́лъ є҆сѝ на́мъ спасе́нїе свᲂѐ ст҃ы́и , и҆ славᲂсло́вимъ тѧ̀ сн҃е бж҃їи , пᲂми́лꙋй на́съ . сла́ва , и҆ ны́нѣ , крⷭ҇тᲂбоⷢ҇ . Наде́же , и҆ застꙋпле́нїе , и҆ приста́нище люде́й твᲂи́хъ дв҃це . и҆з̾ тебе́ бо рᲂди́сѧ вᲂи́стинꙋ ми́рꙋ спасе́нїе . ꙗ҆́кᲂже пла́касѧ ᲂу҆ крⷭ҇та̀ сн҃а свᲂегѡ̀ и҆ бг҃а , и҆ спаса́еши ᲂу҆пᲂва́ющихъ на тѧ̀ . тᲂгѡ̀ ны́нѣ ᲂу҆мᲂлѝ и҆зба́вити ѿ тлѝ всѣ́хъ вᲂспѣва́ющихъ тѧ̀ .

по в҃ , стихᲂло́гїи . сѣда́льны , крⷭ҇тны . гла́съ , ѕ҃ . Дне́сь прᲂро́ческᲂе и҆спо́лнисѧ сло́во . се́бо пᲂкланѧ́емсѧ на мѣ́стѣ , и҆дѣ́же стᲂѧ́стѣ но́зѣ твᲂѝ гдⷭ҇и , и҆ дре́во спасе́нїѧ вкꙋси́вше , грѣхо́вныхъ страсте́й свᲂбᲂдꙋ̀ ᲂу҆лꙋчи́хᲂмъ , мл҃твами бцⷣы , є҆ди́не чл҃кᲂлю́бче . сти́хъ : бг҃ъ же цр҃ь на́шъ пре́жде вѣ́къ , сᲂдѣ́ла спасе́нїе пᲂсредѣ̀ землѝ . Гдⷭ҇и ѡ҆сꙋди́ша тѧ і҆ꙋде́и на сме́рть , живᲂта̀ всѣ́хъ . и҆́же чермно́е мо́ре жеѕло́мъ прᲂше́дшїи , ко крⷭ҇тꙋ́ тѧ пригвᲂзди́ша . и҆ и҆́же ѿ ка́мене ме́дъ с̾са́вшїи , же́лчь ти принесо́ша . но во́лею претерпѣ́лъ є҆сѝ , да на́съ свᲂбᲂди́ши ѿ рабо́ты вра́жїѧ , гдⷭ҇и сла́ва тебѣ̀ . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Страда́льческаѧ въ стᲂѧ́нїи по́двиги , мꙋчи́телскїѧ ра́ны на мꙋ́ченики , и҆ стᲂѧ́хꙋ ли́цы беспло́тныхъ по́чести держа́ще пᲂбѣ́ды . ᲂу҆диви́ша мꙋчи́телѧ и҆ царѧ̀ премꙋ́дрїи , низ̾лᲂжи́ша престꙋ́пника и҆спᲂвѣ́данїемъ хрⷭ҇то́вымъ . ᲂу҆крѣпи́выи и҆́хъ гдⷭ҇и сла́ва тебѣ̀ . сла́ва , и҆ нн҃ѣ , крⷭ҇тᲂбоⷢ҇ . Пред̾стᲂѧ́щи ᲂу҆ крⷭ҇та̀ не и҆скꙋсᲂбра́чнаѧ мт҃и , и҆́же и҆з̾ неѧ̀ ро́ждьшемꙋсѧ без̾ сѣ́мене вᲂзᲂпѝ , ѻ҆рꙋ́жїе срⷣце мᲂѐ про́йде ѽ сн҃е , нетерпѧ́щи ви́сѧща на́ древѣ тѧ̀ зрѣ́ти ; є҆го́же трепе́щꙋтъ всѧ́ческаѧ , ꙗ҆́кѡ зижди́телѧ и҆ бг҃а , дᲂлгᲂтерпѣли́ве гдⷭ҇и сла́ва тебѣ̀ .

по г҃ , стихᲂло́гїи , сѣда́ленъ . гла́съ , ѕ҃ . На крⷭ҇тѣ́ тѧ во́лею на́съ ра́ди пригвᲂжде́на хрⷭ҇тѐ , тва́рь ви́дѣвши кᲂлѣба́шесѧ стра́хᲂмъ . сл҃нце ве́сь пᲂмрачѝ свѣ́тъ , ка́менїе распаде́сѧ , и҆ цр҃кви бжⷭ҇твенаѧ за́вѣса раздра́сѧ , на ѡ҆бличе́нїе лю́тыхъ и҆ без̾зако́нныхъ є҆вре́й . сла́ва , и҆ нн҃ѣ , крⷭ҇тᲂбоⷢ҇ . Тебѐ ро́ждьшаѧ хрⷭ҇тѐ , при́снѡ дв҃аѧ ѻ҆трᲂкᲂви́ца , на крⷭ҇тѣ̀ зрѧ́щи тѧ на́съ ра́ди вᲂзнесе́на , ᲂу҆ѧзвлѧ́ше сѝ печа́ли ѻ҆рꙋ́жїемъ срⷣце и҆ дш҃ꙋ , и҆ пла́каше рыда́ющи мт҃рьски . тᲂѧ̀ мл҃твами пᲂми́лꙋй на́съ , гдⷭ҇и млⷭ҇тиве .

Кано́нъ , честно́мꙋ и҆ живᲂтвᲂрѧ́щемꙋ крⷭ҇тꙋ̀ , твᲂре́нїе , ки́ръ і҆ѡ́сифᲂво . гла́съ , ѕ҃ . пѣ́снь , а҃ . і҆рмо́съ . Ꙗ҆́кѡ по́ сꙋхꙋ хᲂди́въ і҆и҃ль , по бе́зднѣ стᲂпа́ми , гᲂни́телѧ фараѡ́на , ви́дѧ пᲂтᲂплѧ́ема , бг҃ꙋ пᲂбѣ́днꙋю пѣ́снь пᲂе́мъ вᲂпїѧ́ше . запѣ́въ : сла́ва гдⷭ҇и крⷭ҇тꙋ̀ твᲂемꙋ̀ чⷭ҇тно́мꙋ . Ты̀ дла́ни прᲂсте́ръ на крⷭ҇тѣ̀ , ѡ҆бъѧ́лъ є҆сѝ влⷣко ѿринᲂве́нныѧ чл҃ки , и҆ къ свᲂемꙋ̀ ѻ҆ц҃ꙋ приведѐ , ꙗ҆́кѡ сн҃ъ вᲂзлю́бленъ и҆ є҆динᲂсꙋ́щенъ . Ꙗ҆́кᲂже а҆́гнецъ вᲂздви́женъ бы́сть на́ крⷭ҇тъ сло́ве , свᲂегѡ̀ ѻ҆вча́те и҆ща̀ заблꙋ́ждьшаго . и҆ ѡ҆брѣ́тъ , сᲂчета́лъ є҆сѝ то̀ к̾ незаблꙋ́ждьшимъ і҆с҃е . сла́ва держа́вѣ твᲂе́й . запѣ́в̾ : ст҃і́и мч҃нцы , мᲂли́те бг҃а ѡ҆ на́съ . мⷱ҇ꙋ . Жи́знь вы́шнюю жела́юще , сла́внїи страстᲂте́рпцы мч҃нцы , ᲂу҆мертви́шасѧ на землѝ , претерпѣ́вше мꙋче́нїѧ мно́га , и҆ разли́чныѧ напа́сти , дᲂстᲂбл҃же́ннїи . мⷱ҇ꙋ . Пред̾ сꙋди́щи непра́ведными за хрⷭ҇та̀ , и҆́же всѣ́мъ пра́веднаго , пред̾ста́вше страда́льцы , сꙋ́дъ всѧ́къ непра́ведныи , ва́съ ѡ҆правда́ющїи , ѻ҆́ бз҃ѣ претерпѣ́сте . боⷢ҇ . Да без̾стра́стїе всѣ́мъ , и҆́же и҆з̾ а҆да́ма и҆схᲂда́тайствꙋеши влⷣко , стра́сть терпи́ши на крⷭ҇тѣ̀ . и҆ зрѧ́щи тѧ землѧ̀ трѧса́шесѧ , рыда́ющи мт҃рьски , вᲂпїѧ́ше влⷣчце .

Дрꙋгі́и кано́нъ , прест҃ѣ́й бцⷣѣ . і҆рмо́съ , то́йже . =запѣ́въ : прест҃а́ѧ гжⷭ҇е бцⷣе спасѝ на́съ . Т=ебѐ всест҃а́ѧ дв҃о , нб҃о прᲂстры́и гдⷭ҇ь , и҆ зе́млю ѡ҆снᲂва́выи , и҆з̾ тебѐ прᲂше́дъ с̾ пло́тїю , нб҃о земно́е на́мъ пᲂказа́лъ є҆́сть . Ꙗ҆́же бг҃а заче́ншаѧ , и҆́же на́съ ра́ди бы́вшаго чл҃ка , тᲂгѡ̀ мᲂлѝ чи́стаѧ , в̾ де́нь сꙋ́дныи на́съ ᲂу҆ще́дрити , мно́гѡ сᲂгрѣши́вшихъ є҆мꙋ̀ . Свѣ́тлѣйшими лꙋча́ми , вᲂсїѧ́вшее сл҃нце ѿ ст҃а́гѡ ти чре́ва , всю̀ зе́млю ѡ҆зарѧ́етъ влⷣчце . тѣ́мже прᲂсвѣ́щшїисѧ , тѧ̀ бж҃їю ма́терь чте́мъ . Ѡ҆мраче́нїе дш҃и мᲂеѧ̀ без̾мѣ́стныхъ пᲂмышле́нїи мглꙋ̀ разрꙋшѝ , наведе́ньми бцⷣе влⷣчце свѣ́тᲂмъ ст҃ы́хъ запᲂвѣде́й , вᲂпло́щшагᲂсѧ и҆з̾ тебѐ .

пѣ́снь , г҃ . і҆рмо́съ . Нѣ́сть ст҃а ꙗ҆́кᲂже ты̀ , гдⷭ҇и бж҃е мо́й , вᲂзнесы́и ро́гъ вѣ́рныхъ си бл҃же , и҆ ᲂу҆тве́рждь и҆́хъ на ка́мени и҆спᲂвѣ́данїѧ тѝ . Крⷭ҇тъ вᲂдрꙋзи́сѧ на землѝ , и҆ низ̾паде́сѧ ле́сть , и҆ тва́рь кᲂлѣба́шесѧ , и҆ срⷣца кᲂле́блемаѧ вра́жїими напа́стьми , ᲂу҆тверже́нїе вѣ́рᲂю прїима́хꙋ . Бѣси́вшесѧ непра́веднїи лю́дїе , тебѐ пра́веднаго є҆ди́нᲂго ѡ҆сꙋди́ша ᲂу҆́мрети , ѡ҆правда́юща земны́ѧ , и҆ ѿ непра́ведныѧ рꙋкѝ льсти́ваго , тѣ́хъ и҆зима́юща . мⷱ҇ꙋ . Пᲂдвиза́ше всю̀ ѕло́бꙋ свᲂю̀ льсти́выи , со ст҃ы́ми бᲂрѧ́сѧ . но пᲂбѣжда́шесѧ зрѧ̀ непᲂбѣжда́емы тѣ́хъ , бжⷭ҇твеныѧ свѣ́тлᲂсти ѻ҆́бщники . мⷱ҇ꙋ . Тѣле́снаѧ красᲂта̀ зѣ́льными и҆змѣнѧ́шесѧ ра́нами , и҆ ѡ҆блистава́шесѧ па́че свѣ́тлᲂсть дш҃е́внаѧ , страстᲂте́рпецъ хрⷭ҇то́выхъ дѣ́йствᲂмъ ст҃а́гѡ дх҃а . боⷢ҇ . Кра́сна дᲂбро́тᲂю тѧ̀ сн҃е , па́че всѣ́хъ чл҃къ , внегда̀ ража́ти ми разꙋмѣ́хъ . и҆ ка́кѡ распина́емь нн҃ѣ дᲂбро́ты не и҆́маши хрⷭ҇тѐ , дв҃аѧ гл҃аше слезѧ́щи .

и҆́нъ , і҆рмо́съ , то́йже . Рꙋко́ю держа́щи хрⷭ҇та̀ сᲂдержа́щаго всѧ̀ . ѿ рꙋкѝ лꙋка́вагѡ дїа́вᲂла , и҆ всѧ́кᲂгѡ вреже́нїѧ и҆зба́ви на́съ , бг҃ᲂрᲂди́тельнице чи́стаѧ пᲂю́щихъ тѧ̀ . Бѣсо́вскагѡ смꙋще́нїѧ и҆зба́ви на́съ дв҃о , и҆ чл҃къ непра́ведныхъ , и҆ всѧ́кихъ и҆скꙋше́нїи , и҆ недꙋ́гъ тлетво́рныхъ , твᲂи́ми мл҃твами влⷣчце всенепᲂро́чнаѧ . Сѐ тебѐ всѝ ро́дᲂве блажа́тъ ѻ҆трᲂкᲂви́це , без̾лѣ́тнᲂе сло́во въ пло́ти пᲂд̾лѣ́ты ро́ждьши преє҆сте́ствено , и҆ дв҃аѧ па́ки пребыва́еши . Ꙗ҆́кѡ чл҃кᲂлю́бца бг҃а ро́ждьшаѧ дв҃о , непᲂтре́бнаго мѧ свᲂегѡ̀ раба̀ , въ ча́съ стра́шнагѡ прише́ствїѧ є҆гѡ̀ , и҆зба́ви всѧ́кᲂгѡ ѡ҆сꙋже́нїѧ .

пѣ́снь , д҃ . і҆рмо́съ . Хрⷭ҇то́съ мнѣ̀ си́ла бг҃ъ и҆ гдⷭ҇ь , чⷭ҇тна́ѧ цр҃кви бг҃ᲂлѣ́пнѡ зᲂве́тъ вᲂпїю́щи , ѿ со́вести чи́сты ѡ҆́ гдⷭ҇ѣ пра́зднꙋющи . Распѧ́та на́ древѣ тѧ сл҃нце незахᲂди́мᲂе хрⷭ҇тѐ , зрѧ̀ сл҃нце пᲂмрача́шесѧ стра́хᲂмъ , и҆ те́мныѧ пре́лести ѿпꙋще́на быва́ше всѧ̀ тва́рь , вᲂспѣва́ющаѧ тѧ̀ . Вѧза́хꙋ рꙋ́цѣ твᲂѝ сп҃се , лю́дїе закᲂнᲂпрестꙋ́пнїи , и҆ свѧ́занїи нерѣши́мыхъ ᲂу҆́зъ , всѝ ѿпꙋща́еми быва́хꙋ . и҆ свѧ́занъ быва́ше вра́гъ , и҆ ле́сть раз̾рꙋша́шесѧ . мⷱ҇ꙋ . Тече́нїемъ крᲂве́й ᲂу҆дави́сте мꙋ́ченицы , фараѡ́на гᲂни́телѧ , ᲂу҆мᲂвре́днѡ без̾мѣ́рнѡ хва́лѧщасѧ , и҆ къ землѝ бл҃го́й веселѧ́щесѧ преи҆до́сте . мⷱ҇ꙋ . Кры́лы дх҃о́вными . пред̾вперѧ́еми страда́льцы , вра́жїѧ сѣ́ти ра́дꙋющесѧ претеко́ша , и҆дѣ́же пе́рваѧ бл҃гᲂсть и҆ жи́вᲂтъ , и҆ свѣ́тъ невече́рнїи в̾селѧ́еми . боⷢ҇ . Ѻ҆рꙋ́жїемъ ᲂу҆ѧзви́всѧ страсте́й влⷣчце , и҆́же и҆з̾ тебѐ вᲂплᲂти́вшагᲂсѧ , є҆гда̀ тᲂгѡ̀ ви́дѣла є҆сѝ распина́ема , и҆ кᲂпїе́мъ в̾ пречⷭ҇таѧ ре́бра на́съ ра́ди прᲂбᲂда́ема .

и҆́нъ , і҆рмо́съ , то́йже . Бжⷭ҇твеныи хра́мъ , бж҃їю ст҃ꙋ́ю дв҃ꙋ вᲂспᲂе́мъ свѣ́тлѡ , всѝ блажа́ще ѡ҆бᲂжи́вшїисѧ є҆ѧ̀ ра́ди , и҆ лю́тыхъ и҆зба́вльшесѧ . Ꙗ҆́кѡ две́рь ведꙋ́щꙋю къ бжⷭ҇твенᲂмꙋ в̾хо́дꙋ . ꙗ҆́кѡ ра́й бжⷭ҇твеныи . ꙗ҆́кѡ мы́слено мѣ́сто сщ҃е́нїѧ . ꙗ҆́кѡ дᲂбро́тꙋ і҆а́кѡвлю , дв҃ꙋю ᲂу҆блажа́емъ . Приста́нище бл҃гᲂꙋти́шно тѧ̀ пᲂказа̀ хрⷭ҇то́съ , влⷣчце всенепᲂро́чнаѧ , и҆́же вѣ́рᲂю и҆ любо́вїю ѿ мы́сли чи́стыѧ взыва́ющимъ , тебѐ бцⷣꙋ и҆́стиннꙋю . Мр҃і́е пречⷭ҇таѧ , чистѣ́йшее бы́сть прїѧ́телище прᲂстра́ннᲂе , бжⷭ҇твенагѡ вселе́нїѧ , дш҃е́внꙋю ми скве́рнꙋ и҆ ка́лъ пᲂтребѝ .

пѣ́снь , є҃ . і҆рмо́съ . Бж҃їимъ свѣ́тᲂмъ ти бл҃же , ᲂу҆́тренюющихъ ти дш҃а любо́вїю прᲂсвѣтѝ мᲂлю́сѧ , тѧ̀ вѣ́дѣте сло́во бж҃їе , и҆́стиннаго бг҃а , ѿ́ мрака грѣхо́внагѡ и҆зима́юща . Ѡ҆блача́ѧи нб҃о ѻ҆́блаки хрⷭ҇тѐ , на крⷭ҇тѣ̀ на́гъ пригвᲂзди́сѧ во́лею , нагᲂтꙋ̀ ѕло́бѣ мᲂе́й приѡ҆дѣва́ѧ , и҆ ри́зами нетлѣ́нїѧ прᲂсвѣща́ѧ влⷣко . На крⷭ҇тѣ̀ ра́спѧтъ бы́сть , и҆́стинныи винᲂгра́дъ хрⷭ҇то́съ , ꙗ҆́кѡ вᲂи́стинꙋ сы́и , сла́дᲂсть дш҃а́мъ на́шимъ , вино̀ и҆ска́паѧ , пре́лести всѧ́ко пїѧ́нство бᲂри́телѧ пᲂтреблѧ́ѧ . мⷱ҇ꙋ . И҆спещре́ни сщ҃е́нными ꙗ҆́звами хрⷭ҇то́ви страда́льцы , и҆ вѣнцы̀ ᲂу҆краша́еми , пло́тїю пᲂстрада́вшемꙋ бг҃ꙋ пред̾стᲂѧ́тъ , на́шимъ прегрѣше́нїемъ разрѣше́нїе про́сѧтъ . мⷱ҇ꙋ . Взира́юще стрⷭ҇тᲂте́рпцы к̾ та́мᲂшнѣй сла́вѣ , и҆ жи́зни , и҆ и҆́стиннᲂмꙋ весе́лїю , всѧ́ко тревᲂлне́нїе лю́тыхъ пᲂдъѧ́сте , стра́стїю влⷣчнею ᲂу҆крѣплѧ́еми . =боⷢ҇ . во́ =чрево вмѣсти́вшаѧ тѧ̀ хрⷭ҇тѐ , є҆ди́нᲂго невмѣсти́маго всѣ́ми , бᲂлѣ́зней крᲂмѣ̀ рᲂди́хъ . ны́нѣ же бᲂлѣ́знꙋю , внегда̀ распе́ншꙋтисѧ , пречи́стаѧ дв҃аѧ пла́чꙋщи глаго́лаше .

и҆́нъ , і҆рмо́съ , то́йже . И҆́же сло́вᲂмъ всѧ̀ сᲂзда́выи , и҆ мꙋ́дрымъ про́мыслᲂмъ ᲂу҆правлѧ́ѧ є҆ди́нъ гдⷭ҇ь , ꙗ҆́кᲂже хо́щетъ , бл҃гᲂꙋтро́бїемъ сᲂздава́етсѧ и҆з̾ тебѐ пречⷭ҇таѧ , и҆ пло́ть несказа́ннѡ быва́етъ . Сѐ дв҃це , прᲂро́чески зача́тъ во ᲂу҆тро́бѣ , и҆́же надᲂвсѣ́ми бг҃а влⷣкꙋ и҆ гдⷭ҇а . и҆ не и҆зрече́ннѡ тᲂгѡ̀ чи́стаѧ рᲂдила̀ є҆сѝ . и҆ по ржⷭ҇твѣ̀ дв҃аѧ нетлѣ́нна пребы́вши . Мр҃і́е влⷣчце всѣ́хъ , и҆зба́ви мѧ ꙗ҆́кѡ ми́лᲂстива , стра́шнагѡ плѣне́нїѧ мᲂлю́сѧ . и҆ грѣха̀ мᲂегѡ̀ рꙋкᲂписа́нїе расто́ргни кᲂпїе́мъ , вᲂпло́щшагᲂсѧ и҆з̾ тебѐ . Грѣха̀ мᲂегѡ̀ плени́цꙋ , твᲂи́мъ хᲂда́тайствᲂмъ , и҆ пред̾ста́тельствᲂмъ дв҃о расто́ргни , ѿча́ѧннымъ бо ты̀ є҆сѝ наде́жа , и҆́же вѣ́рᲂю притека́ющимъ къ бжⷭ҇твеннᲂмꙋ пᲂкро́вꙋ твᲂемꙋ̀ .

пѣ́снь , ѕ҃ . і҆рмо́съ . Жите́йскагѡ мо́рѧ вᲂз̾двиза́ема зрѧ̀ , напа́стей бꙋ́рею , в̾ ти́хо приста́нище прите́къ вᲂпїю́ ти , вᲂз̾ведѝ ѿ тлѝ живо́тъ мо́й мнᲂгᲂми́лᲂстиве . Вѣнча́сѧ дᲂлгᲂтерпѣли́ве те́рнїемъ , ѿсѣка́ѧ страсте́й те́рнїе . кᲂпїе́мъ в̾ ре́бра прᲂбᲂде́нъ бы́въ , ᲂу҆мертви́лъ є҆сѝ ѕмі́ѧ мнᲂгᲂко́зненаго , и҆́же на́съ ме́ртвы сᲂдѣ́лавшаго . На крⷭ҇тъ вᲂздви́женъ бы́сть , низ̾лага́ѧ вра́жїю си́лꙋ влⷣко . рабо́ты же го́рькїѧ менѐ свᲂбᲂжда́ѧ , прїѧ́тъ заꙋше́нїе . пᲂкланѧ́юсѧ твᲂемꙋ̀ ще́дре дᲂлгᲂтерпѣ́нїю . мⷱ҇ꙋ . Крⷭ҇то́мъ ѡ҆гражда́еми страда́льцы , пре́лести стѣ́ны лꙋка́выѧ разверго́ша , и҆ к̾ вы́шнемꙋ гра́дꙋ пресели́шасѧ , пᲂбѣ́дными вѣнцы̀ ᲂу҆кра́шени . тѣ́мже ᲂу҆блажа́еми сꙋ́ть . мⷱ҇ꙋ . На высᲂтꙋ̀ пресла́внѡ мꙋче́нїѧ , са́ми себѐ вᲂзве́дше сла́внїи . лꙋка́ваѧ вᲂзнᲂше́нїѧ вра́жїѧ , на́ землю низверго́сте , и҆ вѣнцы̀ свы́ше прїѧ́сте . боⷢ҇ . Ѻ҆́ч҃ее сїѧ́нїе ка́кѡ вᲂздви́жесѧ на крⷭ҇тъ , прᲂсвѣща́ѧ всѧ́ческаѧ , и҆ низ̾лага́ѧ тмѣ̀ нача́льника , пречⷭ҇таѧ влⷣчце мт҃рьски пла́чꙋщи вѣща́ше .

и҆́нъ , і҆рмо́съ , то́йже . Не ѡ҆пали́вши ᲂу҆тро́бꙋ твᲂю̀ , ѻ҆́гнь сы́и і҆с҃ъ , и҆з̾ тебѐ пло́тїю прᲂше́дъ . тᲂгѡ̀ чи́стаѧ мᲂлѝ , ѻ҆гнѧ̀ и҆ всѧ́кїѧ мꙋ́ки и҆зба́витисѧ , вѣ́рᲂю вᲂспѣва́ющимъ тѧ . Ст҃ы́хъ а҆́нг҃лъ тѧ бл҃гᲂлѣ́пїе вᲂспѣва́ю всенепᲂро́чнаѧ , и҆ мᲂлю̀ , нелѣ́пᲂтнаѧ пᲂтребѝ ѿ менѐ , бѣсо́вскаѧ мечта́нїѧ . в̾ тишинѣ̀ сᲂблюда́ющи срⷣце мᲂѐ . Пло́тнымъ во ѡ҆браже́нїемъ сᲂеди́нивсѧ , и҆́же ѿ ѻ҆ц҃а є҆динᲂро́дныи во ᲂу҆тро́бѣ твᲂе́й , є҆ди́нъ ѿ двᲂю̀ , без̾ сѣ́мене про́йде , и҆ сᲂблюдѐ не вреже́но , честно́е дв҃ство твᲂѐ всенепᲂро́чнаѧ . Мно́жество ѡ҆чи́сти мᲂи́хъ грѣхѡ́въ , мно́жествᲂмъ млⷭ҇ти твᲂеѧ̀ . и҆ спаси́ мѧ раба̀ твᲂегѡ̀ бл҃га́ѧ , к̾ тебѣ̀ прибѣга́ющаго , и҆ мᲂлѧ́щасѧ вѣ́рнѡ млⷭ҇ти твᲂе́й .

пѣ́снь , з҃ . і҆рмо́съ . Хладᲂда́тельнꙋ ᲂу҆́бѡ пе́щь сᲂтвᲂрѝ а҆́нг҃лъ , прпⷣбнымъ дѣ́темъ , халдѣ́и же ѡ҆палѝ велѣ́нїемъ бж҃їимъ . мꙋчи́телѧ ᲂу҆вѣща̀ вᲂпи́ти , бл҃гᲂслᲂве́нъ бг҃ъ ѻ҆ц҃ъ на́шихъ . Ꙗ҆дᲂви́тагѡ заꙋши́лъ є҆сѝ ѕмі́ѧ ѕло́бꙋ , заꙋше́нъ бы́въ и҆ пᲂвѣ́шенъ на́ древѣ , є҆ди́не си́льне . всѣ́хъ прᲂсвѣти́лъ є҆сѝ вᲂпи́ти , блгⷭ҇ве́нъ бг҃ъ ѻ҆ц҃ъ на́шихъ . Ѿд́рева вкꙋ́шь а҆да́мъ пе́рвыи чл҃къ , ѡ҆брѣ́те сме́рть . втᲂры́и же на не́мъ хрⷭ҇то́съ ᲂу҆мертви́сѧ , без̾сме́ртнꙋю жи́знь да́рꙋетъ , ᲂу҆мертви́въ врага̀ мнᲂгᲂко́зненаго . мⷱ҇ꙋ . Терпѧ́ще стра́сть мч҃нцы , мꙋче́нїемъ гдⷭ҇ви вᲂзведо́стесѧ , и҆ на ка́мени ста́сте тве́рдѣмъ вѣ́ры , всѧ́кꙋ лꙋка́вꙋю низ̾лага́юще ѕло́бꙋ вра́жїю , бжⷭ҇твенымъ манᲂве́нїемъ . мⷱ҇ꙋ . Прᲂсвѣти́вшесѧ стра́стьми страда́льцы , и҆ прᲂсїѧ́сте сл҃нца свѣтлѣ́йши . и҆ те́мнаѧ влⷣчествїѧ всѧ̀ разрꙋши́сте , пᲂю́ще хрⷭ҇то́ви , бл҃гᲂслᲂве́нъ бг҃ъ ѻ҆ц҃ъ на́шихъ . боⷢ҇ . И҆́же сы́и не и҆змѣ́ненъ бжⷭ҇тво́мъ , и҆змѣни́лъ є҆сѝ пᲂвѣ́шенъ тва́рь всю̀ , дв҃аѧ гл҃аше сн҃е . и҆ зрѧ́щи сїѧ̀ пла́каше , дивѧ́щисѧ мно́гᲂмꙋ ти дᲂлгᲂтерпѣ́нїю .

и҆́нъ , і҆рмо́съ , то́йже . Сѣдѧ́и в̾ нѣ́дрѣхъ рᲂди́телѧ неѡ҆пи́санныи , ны́нѣ сѣди́тъ ѡ҆пи́санъ пречⷭ҇таѧ в̾ нѣ́дрѣхъ твᲂи́хъ , твᲂи́мъ ѡ҆блᲂже́нъ зра́кᲂмъ . за є҆́же спастѝ а҆да́ма , но́въ а҆да́мъ бы́въ . Мᲂлѧ́щи непреста́й чл҃кᲂлю́бца бг҃а на́шегѡ , всенепᲂро́чнаѧ . ꙗ҆́кѡ да прїи́мемъ всекᲂне́чнᲂе прᲂще́нїе ѕлы́хъ . и҆ ᲂу҆лꙋчи́мъ є҆́же на́ нб҃сѣхъ ᲂу҆гᲂто́ванныхъ бл҃гъ , лю́бѧщимъ є҆гѡ̀ . Бл҃гᲂслᲂви́мъ тѧ пренепᲂро́чнаѧ , ро́ждьшꙋю блгⷭ҇ве́наго гдⷭ҇а , и҆́же бл҃гᲂслᲂве́ньми вѣнча́ющаго бжⷭ҇твеными є҆стество̀ чл҃ческᲂе , и҆ но́во твᲂрѧ́ща то̀ ѡ҆бетша́вшее пре́жде . Спасе́нїѧ тѧ̀ приста́нищемъ ѡ҆бᲂгати́вшесѧ чи́стаѧ , ѿ бꙋ́ри спаса́емсѧ . и҆ наде́жꙋ ꙗ҆́же на тѧ̀ ꙗ҆́кѡ крѣ́пᲂсть дш҃и сᲂдержа́ще , зᲂве́мъ , бл҃гᲂслᲂве́наѧ ꙗ҆́же бг҃а пло́тїю ро́ждьши .

пѣ́снь , и҃ . і҆рмо́съ . и҆з̾ =пла́мени ст҃ы́мъ ро́сꙋ и҆стᲂчѝ , а҆ пра́веднагѡ же́ртвꙋ и҆ во́ды пᲂпалѝ , всѧ́ бо твᲂри́ши хрⷭ҇тѐ , є҆ли́ко хо́щеши , тѣ́мъ тѧ превᲂзно́симъ гдⷭ҇а во́ вѣки . Го́рдаго ѕмі́ѧ , ты̀ смири́лъ є҆сѝ вы́шнїи бж҃е , смире́нїемъ срⷣца вᲂзнᲂси́мъ на́ древо , и҆ а҆да́ма страстьмѝ смире́нагѡ , вᲂз̾не́слъ є҆сѝ ще́дре . Дре́внюю го́ресть претвᲂрѧ́ѧи , на́ древо вᲂзнесе́нъ бы́сть . же́лчи в̾кꙋша́ѧ , всѣ́мъ сла́дᲂсть и҆ жи́знь сᲂста́внаѧ сы́и влⷣко , и҆ свѣ́тъ и҆ спасе́нїе . =мⷱ҇ꙋ . Непреклᲂни́сте кᲂлѣ́нъ и҆стꙋка́ннымъ всехва́льнїи , но пᲂже́рты бы́сте ꙗ҆́кѡ а҆́гньцы непᲂро́чнїи . и҆ лꙋка́вагѡ крѣ́пᲂсть преклᲂни́сте , пѣснᲂсла́вѧще хрⷭ҇та̀ во́ вѣки . мⷱ҇ꙋ . Хра́мы дх҃ꙋ жи́вы ꙗ҆ви́стесѧ мч҃нцы , хра́мы и҆́дᲂльскїѧ низ̾лᲂжи́сте , и҆ к̾ хра́мꙋ нбⷭ҇нᲂмꙋ взѧ́ти бы́сте , пѣснᲂсла́вѧще хрⷭ҇та̀ во́ вѣки . боⷢ҇ . І҆а́кѡвъ тѧ̀ пред̾ви́дѣ дв҃о лѣ́ствицꙋ , к̾ нбⷭ҇нѣй высᲂтѣ̀ на́съ вᲂзвᲂдѧ́щꙋ , и҆́же во глꙋбинꙋ̀ ѕѡ́лъ пᲂпо́лзшихсѧ . тѣ́мже чⷭ҇тꙋю тѧ̀ бл҃гᲂслᲂви́мъ во́ вѣки .

и҆́нъ , і҆рмо́съ , то́йже . Вᲂи́стинꙋ бцⷣꙋ и҆спᲂвѣ́дꙋемъ тѧ̀ , а҆́нг҃лѡво є҆́же ра́дꙋисѧ , вѣ́рнѡ вᲂпїе́мъ ти . є҆ди́на бо сꙋ́щимъ на землѝ ра́дᲂсть рᲂдила̀ є҆сѝ , ѡ҆бра́дᲂваннаѧ чⷭ҇таѧ и҆ блгⷭ҇ве́наѧ . Бг҃ᲂвѣща́ннаѧ цѣвни́ца твᲂегѡ̀ пра́ѻ҆ц҃а , кᲂвче́гъ тѧ прест҃ъ пред̾ѡ҆бража́ше , нᲂсѧ́щи бг҃а во́ плᲂти всенепᲂро́чнаѧ . є҆го́же превᲂзно́симъ гдⷭ҇а во́ вѣки . Не и҆скꙋсᲂбра́чнаѧ ѻ҆трᲂкᲂви́це бг҃ᲂра́дᲂваннаѧ , и҆ приста́нище и҆́же въ бꙋ́ри хрⷭ҇тїа́нѡмъ , и҆ ᲂу҆пᲂва́нїе , и҆зба́ви ѿ напа́стей , и҆ стрⷭ҇те́й и҆ ѡ҆ѕлᲂбле́нїѧ , и҆ ѿ вѣ́чнагѡ ѻ҆гнѧ̀ рабы̀ свᲂѧ̀ . Є҆гда̀ прїи́деши въ сла́вѣ сꙋди́ти всѧ́ческимъ , десны́мъ мѧ ѻ҆вца́мъ причтѝ влⷣко грѣ́шнагѡ , мт҃ре твᲂеѧ̀ мᲂльба́ми . да тѧ̀ сла́влю во всѧ̀ вѣ́ки . та́же , пѣ́снь бцⷣѣ . вели́читъ дш҃а мᲂѧ̀ .= и҆ =пᲂкло́ны до землѝ .

пѣ́снь , ѳ҃ . і҆рмо́съ . Бг҃а чл҃кѡмъ неꙋдо́бь ви́дѣти , на́ньже несмѣ́ютъ чи́ни а҆́нг҃льстїи зрѣ́ти . тᲂбо́ю бо пречⷭ҇таѧ ꙗ҆ви́сѧ на́мъ сло́во вᲂплᲂще́нно , є҆го́же велича́юще , съ нбⷭ҇ными вѡ́и тѧ̀ велича́емъ . Времена́мъ и҆ лѣ́тᲂмъ , сы́и гдⷭ҇ь , пᲂсредѣ̀ землѝ в̾ пᲂлꙋ̀ днѝ , на́ древо вᲂзнесе́сѧ распина́емъ , є҆ди́не дᲂлгᲂтерпѣли́ве . пᲂсредѣ̀ раѧ̀ претерпѣ́вшаго пᲂпᲂлзнᲂве́нїе , плᲂда̀ тлетво́рнагѡ и҆справлѧ́ѧ . Крⷭ҇тъ вᲂдрꙋжа́шесѧ , и҆ мꙋчи́тель в̾ дш҃и сме́ртнꙋю ꙗ҆́звꙋ прїима́ше , и҆ свѧ́занїи ѿ тлѝ ѿрѣша́еми быва́хꙋ . ра́зꙋмъ же во всѧ̀ чл҃ки в̾сажда́шесѧ . вра́гъ ᲂу҆пражнѧ́шесѧ , и҆ ра́дᲂсти всѧ̀ и҆спᲂлнѧ́хꙋсѧ . мⷱ҇ꙋ . Землѧ̀ сᲂвᲂкꙋпи́сѧ гдⷭ҇ними мч҃нки с̾ нб҃сы̀ , ѿ не́леже хрⷭ҇то́съ , пᲂжре́нъ бы́сть распина́емъ . и҆ ва́ше мно́жество привлечѐ , мно́жество ѕѣ́льныхъ мꙋ́къ претерпѣ́вшїѧ , и҆ мно́жествꙋ бжⷭ҇твеныхъ слꙋ́гъ сᲂѡ҆блиста́ющїѧ . мⷱ҇ꙋ . Свѣ́тᲂмъ невеще́ственымъ ѡ҆блиста́еми , пᲂлᲂже́нїемъ бз҃и бы́сте гдⷭ҇ни мч҃нцы , в̾ первᲂро́дныхъ селе́нїихъ вᲂдвᲂрѧ́еми , и҆ вѣ́чныѧ сла́вы и҆спᲂлнѧ́еми , тѣ́мже по́дᲂлгꙋ вѣ́рнїи ва́съ пᲂчита́емъ . боⷢ҇ . Стра́шно ржⷭ҇тво̀ претерпѣ́хъ влⷣко , внегда̀ стра́ннѡ тебѐ рᲂди́хъ дᲂлгᲂтерпѣли́ве . є҆го́же тва́рь распина́ема на́ древѣ , во́лею зрѧ́щи дре́вле ᲂу҆страши́сѧ . непᲂро́чнаѧ пла́кавши вᲂпїю́щи мт҃рьски , є҆ѧ́же велича́емъ .

и҆́нъ , і҆рмо́съ , то́йже . Сн҃ъ сло́во бж҃їе без̾нача́льнᲂе вᲂпло́щьсѧ , сн҃ъ дв҃ыѧ быва́етъ . бл҃гᲂвᲂле́нїемъ же ѻ҆ц҃а , и҆ дх҃а бжⷭ҇твенаго дѣ́йствᲂмъ , ве́сь ѡ҆бнᲂвѝ и҆стлѣ́вшїи мо́й зра́къ , ꙗ҆́кѡ всеси́ленъ . Дш҃е вᲂзни́кни , и҆ бо́дрствꙋй къ мл҃твамъ , и҆ ко всѣ́мъ бл҃ги́мъ прилѣжа́нїемъ . лѣ́нᲂсть со́ннꙋю ѿве́рзи , бо́дренꙋ и҆мꙋ́щи храни́тельницꙋ всегда̀ , чи́стꙋю мт҃рь бж҃їю , є҆ѧ́же велича́емъ . Оу҆пᲂва́нїе и҆ пᲂкро́въ и҆ ра́дᲂванїе , ты̀ вѣ́рнымъ є҆сѝ бцⷣе всенепᲂро́чнаѧ . сегѡ̀ ра́ди мᲂлю́сѧ твᲂи́мъ щедро́тамъ , прᲂсвѣтѝ дш҃ꙋ мᲂю̀ , ю҆́же ѡ҆мрачѝ тма̀ мно́гихъ грѣхѡ́въ , и҆ лꙋка́выхъ пᲂмышле́нїи . Ст҃а́ѧ дв҃о бг҃ᲂра́дᲂваннаѧ , две́ри свѣ́та ѿве́рзи ми , но́щь грѣха̀ да мѧ̀ не пᲂкры́етъ . и҆спра́ви жи́знь мᲂю̀ , къ приста́нищꙋ бл҃гᲂꙋти́шнᲂмꙋ бжⷭ҇твеныхъ пᲂвелѣ́нїи , и҆́же и҆з̾ тебѐ вᲂчл҃чившагᲂсѧ .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стихѣ́ры , крⷭ҇тны . гла́съ , ѕ҃ . Ѡ҆ крⷭ҇тѣ̀ ᲂу҆пᲂва́нїе и҆мѣ́ѧ хрⷭ҇тѐ , и҆ ѡ҆ не́мъ хвалѧ́сѧ вᲂпїю̀ , чл҃кᲂлю́бче гдⷭ҇и , гᲂрды́ню низ̾лᲂжѝ , не и҆спᲂвѣ́дающихъ тебѐ бг҃а и҆ чл҃ка .

сти́хъ : и҆спо́лнихᲂмсѧ за ᲂу҆́тра . И҆́же крⷭ҇то́мъ ѡ҆гражда́емїи , врагꙋ̀ прᲂтивлѧ́емсѧ , не бᲂѧ́щесѧ ко́ѕни є҆гѡ̀ и҆ ла́ѧнїѧ , ꙗ҆́кѡ бо го́рдыи ᲂу҆праздни́сѧ , и҆ пᲂпра́нъ бы́сть си́лᲂю на́ древѣ пригвᲂжде́ннагѡ хрⷭ҇та̀ .

сти́хъ : и҆ бꙋ́ди свѣ́тлᲂсть . мⷱ҇ꙋ . Па́мѧть мч҃нкъ , ра́дᲂсть бᲂѧ́щимсѧ гдⷭ҇а , пᲂстрада́вше бо хрⷭ҇та̀ ра́ди , вѣнцы̀ ѿ негѡ̀ прїѧ́ша , и҆ нн҃ѣ с̾ дерзнᲂве́нїемъ мо́лѧтсѧ ѡ҆ дш҃а́хъ на́шихъ .

сла́ва , и҆ нн҃ѣ , крⷭ҇тᲂбоⷢ҇ . А҆́гньца свᲂегѡ̀ , а҆́гница нескве́рнаѧ дре́вле и҆ непᲂро́чнаѧ влⷣчца , на́ древѣ крⷭ҇тнѣмъ ꙗ҆́кѡ ᲂу҆зрѣ̀ , мт҃рьски вᲂсклица́ше , и҆ дивѧ́щисѧ вᲂпїѧ́ше ча́до сладча́йшее что̀ зрѣ́нїе сїѐ , но́вᲂе и҆ пресла́внᲂе . ка́кѡ со́нмъ без̾бл҃гᲂда́тныи , сꙋди́щꙋ пила́тᲂвꙋ предаде́ тѧ , и҆ ѡ҆сꙋжа́ютъ на сме́рть , живᲂта̀ всѧ́ческимъ ; но вᲂспѣва́ю ти не и҆зрече́ннᲂе сло́во схᲂжде́нїе .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= є҆ктенїѧ̀ . =та́же , ча́съ , а҃ . ѱалмы̀ , ѡ҆бы́чны . и҆ про́чее , и҆ кᲂне́чныи ѿпꙋ́стъ .

Въ сре́дꙋ , бл҃же́нны . гла́съ , ѕ҃ .

Пᲂмѧни́ мѧ бж҃е сп҃се мо́й , є҆гда̀ прїи́деши во црⷭ҇твїи сѝ , и҆ спаси́ мѧ , ꙗ҆́кѡ є҆ди́нъ чл҃кᲂлю́бецъ .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Во́лею вᲂзнесе́сѧ на́ древо , и҆ сꙋ́щїѧ во глꙋбинѣ̀ ѕѡ́лъ сᲂвᲂзне́слъ є҆сѝ , твᲂю̀ пᲂю́щїѧ сп҃се бл҃гᲂсть .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Землѧ̀ пᲂтрѧсе́сѧ , и҆ сл҃нце ᲂу҆гасѐ , ви́дѣвше тѧ̀ на́ древѣ сл҃нца пра́веднаго , во́лею стра́ждꙋща .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Страсте́мъ сп҃сᲂвымъ страстᲂте́рпцы прїѡбща́ющесѧ , бжⷭ҇твеныѧ свѣ́тлᲂсти с̾причаща́етесѧ , прича́стїемъ ѡ҆бᲂжа́еми .

сла́ва . Вᲂз̾неси́ мѧ и҆з̾ глꙋбины̀ грѣхо́вныѧ хрⷭ҇тѐ мо́й , и҆́же ѿ трⷪ҇цы є҆ди́нъ во́лею претерпѣ́выи распѧ́тїе .

и҆ ны́нѣ . Пред̾стᲂѧ́щи ᲂу҆ крⷭ҇та̀ дв҃о мт҃и , и҆ зрѧ́щи сн҃а свᲂегѡ̀ во́лею стра́ждꙋща , тᲂгѡ̀ велича́ше .

<< Previous

Contents

Next >>