Глас 7 понедельник

Въ недѣ́лю , ве́черъ . на́ гдⷭ҇и вᲂзва́хъ , стⷯры , пᲂкаѧ́нны . гла́съ , з҃ . =запѣ́въ : ꙗ҆́кѡ ѿ тебѐ ѡ҆чище́нїе є҆́сть . В=ᲂз̾ведѝ свᲂѝ ѻ҆́чи ѽ дш҃е мᲂѧ̀ , и҆ на бж҃їе вᲂз̾зрѝ смᲂтре́нїе и҆ бл҃гᲂꙋтро́бїе , ка́кѡ нб҃са̀ преклᲂни́въ на́ землю сни́де . да вᲂз̾несе́тъ тебѐ ѿ ѻ҆каѧ́нства твᲂи́хъ страсте́й , и҆ пᲂста́витъ тѧ̀ на ка́мени вѣ́ры . ѽ ди́вство стра́шнагѡ чꙋдесѐ . сла́ва и҆злїѧ́нїю твᲂемꙋ̀ чл҃кᲂлю́бче .

ᲂу҆пᲂва̀ дш҃а мᲂѧ̀ на́ гдⷭ҇а . Ви́ждь свᲂѧ̀ пребез̾зако́ннаѧ дѣ́ла ѽ дш҃е мᲂѧ̀ . и҆ пᲂчꙋди́сѧ , ка́кѡ тѧ землѧ̀ но́ситъ ; ка́кѡ нераз̾сѧ́детсѧ ; ка́кѡ ди́вїи ѕвѣ́ри неснѣдѧ́тъ тебѐ ; ка́кᲂже и҆ сл҃нце неза́йдетъ и҆ сїѧ́етъ тебѣ̀ непреста́ѧ . вᲂста́ни пᲂка́йсѧ , и҆ вᲂзᲂпі́и ко́ гдⷭ҇ꙋ , сᲂгрѣши́хъ тѝ сᲂгрѣши́хъ пᲂми́лꙋй мѧ̀ .

да ᲂу҆пᲂва́етъ і҆и҃ль на́ гдⷭ҇а . И҆мꙋ́ще на тѧ̀ ᲂу҆пᲂва́нїе всеси́льне гдⷭ҇и , тебѐ мо́лимъ , всѧ́кихъ бѣ́дъ , страсте́й же и҆ мѧте́жа на́мъ и҆зба́витисѧ , ꙗ҆́кѡ да жи́знь на́шꙋ ми́рнѡ пре́йдемъ . и҆ в̾ чистᲂтѣ̀ пᲂжи́вше , ѡ҆брѧ́щемъ въ дн҃ь сꙋ́дныи , бл҃гᲂпремѣ́нна тебѐ влⷣкꙋ и҆ млⷭ҇тива .

та́же , в̾ минѣ́и , стⷯры , ст҃о́мꙋ . а҆́ще ли нѣ́сть минѣ́и . и҆́ны , стихѣ́ры , беспло́тнымъ ст҃ы́мъ а҆́нг҃лѡмъ . гла́съ , то́йже . =запѣ́въ : ѿ всѣ́хъ без̾зако́нїи є҆гѡ̀ . З=арѧ́ми прᲂсвѣща́еми трⷪ҇цы , и҆́же вѣ́рᲂю ва́съ пᲂю́щїѧ , прᲂсвѣти́те а҆рха́нг҃ли .

пᲂхвали́те є҆гѡ̀ всѝ лю́дїе . Прича́стїемъ свѣ́ти втᲂрі́и , пᲂказꙋ́еми свѣ́ти сᲂверше́нїи , пред̾ста́ти на́мъ свѣ́тꙋ пе́рвᲂмꙋ мᲂли́тесѧ .

и҆ и҆́стина гдⷭ҇нѧ пребыва́етъ во́ вѣки . Кро́вᲂмъ кры́лъ ва́шихъ , сᲂхранѧ́йте вѣ́рныѧ всѧ̀ , ѿ дꙋхо́въ лꙋка́вствїѧ , тмꙋ̀ разᲂрѧ́юще .

сла́ва , и҆ ны́нѣ , боⷢ҇ . Всѝ пѣ́сньми со а҆́нг҃лы бцⷣѣ вᲂзᲂпїе́мъ , ꙗ҆́кѡ сп҃са ми́рꙋ рᲂдила̀ є҆́сть . и҆ по ржⷭ҇твѣ́ же па́ки пребы́сть дв҃аѧ , и҆ ми́ръ и҆зба́ви ѿ пре́лести ржⷭ҇тво́мъ свᲂи́мъ , и҆ пи́щꙋ пᲂдадѐ на́мъ не и҆з̾живꙋ́щꙋю , млеко́мъ пита́ющаѧ свᲂбᲂди́телѧ дш҃а́мъ на́шимъ .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стихѣ́ры , пᲂкаѧ́нны . гла́съ , з҃ . Ꙗ҆́кѡ блꙋ́дныи сы́нъ прїидо́хъ а҆́зъ ще́дре , прїими́ мѧ припа́дающа , ꙗ҆́кѡ є҆ди́наго ѿ нае́мникъ твᲂи́хъ бж҃е , и҆ пᲂми́лꙋй мѧ̀ чл҃кᲂлю́бче .

сти́хъ : к̾ тебѣ̀ вᲂз̾ведо́хъ ѻ҆́чи мᲂѝ . Ꙗ҆́кѡ впады́и в̾ разбо́йники и҆ ᲂу҆ѧ́звенъ , та́кѡ и҆ а҆́зъ впадо́хъ ѿ мно́гихъ грѣхѡ́въ , и҆ ᲂу҆ѧ́звена мѝ є҆́сть дш҃а . к̾ кᲂмꙋ̀ прибѣ́гнꙋ пᲂви́нныи а҆́зъ ; то́кмѡ к̾ тебѣ̀ бл҃гᲂꙋтро́бнᲂмꙋ дш҃а́мъ врачꙋ̀ , и҆зле́й намѧ̀ бж҃е вели́кꙋю твᲂю̀ млⷭ҇ть .

сти́хъ : пᲂми́лꙋй на́съ гдⷭ҇и . мⷱ҇ꙋ . Сла́ва тебѣ̀ хрⷭ҇тѐ бж҃е а҆пⷭ҇лѡмъ пᲂхвало̀ , и҆ мч҃нкѡмъ весе́лїе , и҆́хже про́пᲂвѣдь трⷪ҇ца є҆динᲂсꙋ́щнаѧ .

сла́ва , и҆ нн҃ѣ , боⷢ҇ . Є҆́же ра́дꙋисѧ тебѣ̀ зᲂве́мъ со а҆́нг҃лѡмъ бг҃ᲂневѣ́сто , черто́гъ и҆ две́рь , и҆ прⷭ҇то́лъ ѻ҆́гненъ , нарица́юще тебѐ , и҆ несѣко́мꙋю го́рꙋ , и҆ кꙋпинꙋ̀ неѡ҆пали́мꙋю .

таⷤ , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , боⷢ҇ . =во́ =гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Въ нлⷣю , на па́вечерницѣ . кано́нъ мᲂле́бенъ , прест҃ѣ́й бцⷣѣ . гла́съ , з҃ . пѣ́снь , а҃ . і҆рмо́съ . Ма́нїемъ ти на зе́менъ ѻ҆́бразъ прелᲂжи́сѧ , пе́рвїе разлива́емᲂе вᲂдно́е є҆стество̀ гдⷭ҇и . тѣ́мже немо́кренно ше́ствᲂвавъ і҆и҃ль , пᲂе́тъ тебѣ̀ пѣ́снь пᲂбѣ́днꙋю . запѣ́въ : прест҃а́ѧ гжⷭ҇е бцⷣе спасѝ на́съ . Чи́нᲂве а҆́нг҃лъ ꙗ҆́кѡ вᲂи́стинꙋ и҆ в̾рѣ́снᲂтꙋ , мт҃рь тѧ̀ бг҃а всѣ́хъ чтꙋ́тъ пречⷭ҇таѧ , но и҆ нн҃ѣ ѿ бре́нныхъ ᲂу҆сте́нъ мᲂи́хъ прїимѝ пѣ́снь мᲂле́бнꙋю . Оу҆мертвѝ пло́ти мᲂеѧ̀ , и҆ є҆щѐ живꙋ́щꙋю ѕло́бꙋ , ꙗ҆́же жи́знь и҆́стиннꙋю ро́ждьшаѧ пречⷭ҇таѧ , и҆ страсте́мъ и҆ прегрѣше́нїемъ , пᲂда́ждь чⷭ҇таѧ твᲂемꙋ̀ рабꙋ̀ и҆збавле́нїе .= сла́ва . Сл҃нце ѿ сл҃нца , без̾лѣ́тнᲂе сло́во непᲂсти́жнѡ вᲂсїѧ́вшее , во́ времѧ вᲂсїѧ̀ . є҆го́же зарѧ́ми прᲂсвѣтѝ дв҃о дш҃а на́ша и҆ вразꙋмѝ . и҆ ны́нѣ . П=ᲂдᲂба́етъ тебѣ̀ бцⷣе , хвале́нїѧ сло́во всегда̀ дѣ́йствꙋемо . но мы̀ мо́лимъ тѧ̀ чⷭ҇таѧ , спасѝ ѿ всѧ́кїѧ жите́йскїѧ печа́ли , к̾ тебѣ̀ прибѣга́ющихъ .

пѣ́снь , г҃ . і҆рмо́съ . Въ нача́тцѣ небеса̀ всеси́льнымъ сло́вᲂмъ сѝ ᲂу҆тверже́и , гдⷭ҇и сп҃се , и҆ всетвᲂрѧ́щимъ дх҃ᲂмъ бж҃їимъ всю̀ си́лꙋ и҆́хъ , на недви́жимᲂмъ мѧ ка́мени и҆спᲂвѣ́данїѧ твᲂегѡ̀ ᲂу҆твердѝ . Ѿда́ждь до́лги , рабᲂлѣ́пнѡ бл҃гᲂразꙋ́мнѣ , твᲂи́хъ бл҃гᲂда́тей влⷣчце , те́плѣ вᲂспѣва́ющꙋ тѧ̀ пречⷭ҇таѧ мт҃и сло́ва , и҆ всѣ́хъ и҆зба́вителѧ . но и҆ ны́нѣ и҆зми́ мѧ ѿ жите́йскихъ настᲂѧ́нїи . Оу҆мерщве́на а҆да́ма ѿ престꙋпле́нїѧ дре́вле , лꙋ́чшей пречⷭ҇таѧ жи́зни спᲂдо́била є҆сѝ ꙗ҆́вѣ , живᲂнача́льнᲂе влⷣчце ро́ждьшаѧ сло́во , но и҆ ны́нѣ мѧ̀ сме́ртнагѡ грѣха̀ свᲂбᲂдѝ .= сла́ва . Ѻ҆жестѣ̀ въ пло́ти страстны́й зако́нъ , и҆ ны́нѣ ѡ҆скᲂрблѧ́етъ дꙋхо́внагѡ , и҆ к̾ лю́тѣйшимъ пᲂхᲂте́мъ сᲂвᲂкꙋплѧ́етъ ᲂу҆́мъ мо́й пречⷭ҇таѧ . но без̾стра́стїѧ ми́ръ пᲂда́ждь мѝ в̾ско́рѣ твᲂи́ми мл҃твами . и҆ ны́нѣ . Н=есказа́нно во ᲂу҆тро́бѣ пречⷭ҇таѧ заче́ньши хрⷭ҇та̀ сᲂдержи́телѧ всѣ́хъ , земнᲂро́дныхъ сꙋщество̀ , пречⷭ҇таѧ раз̾рѣши́ла є҆сѝ ѿ а҆́дᲂвыхъ вере́й . но и҆ ны́нѣ мнᲂгᲂплете́нныѧ плени́цы тлѣ́ющїѧ мѧ̀ расто́ргни .

пѣ́снь , д҃ . і҆рмо́съ . Ѻ҆́ч҃а нѣ́дра не ѡ҆ста́вль , и҆ сᲂше́дъ на́ землю хрⷭ҇тѐ бж҃е , та́йнꙋ ᲂу҆слы́шахъ смᲂтре́нїѧ твᲂегѡ̀ , и҆ прᲂсла́вихъ тѧ чл҃кᲂлю́бче . Но́щїю бᲂрю́сѧ со тмо́ю лю́тыхъ , ѡ҆мрачи́въ по́мыслъ . две́ри свѣ́та твᲂи́ми лꙋча́ми ѡ҆зари́ мѧ , и҆ го́рести и҆змѝ в̾ско́рѣ и҆ печа́ли . Грѣхѡ́въ мно́жествᲂмъ стѧ́гнꙋтъ , и҆ плени́цами напа́стей вельмѝ свѧ́занъ , твᲂю̀ влⷣчце нн҃ѣ по́мᲂщь призыва́ю , да и҆зба́влюсѧ всѧ́кїѧ мꙋ́ки .= сла́ва . Сᲂбо́рища ѕлы́хъ и҆ лю́тыхъ , и҆ зави́стныхъ и҆ лꙋка́выхъ чл҃къ сᲂвѣ́ты разᲂрѝ всепѣ́таѧ , и҆ всѧ́кїѧ мѧ̀ и҆зба́ви печа́ли житїѧ̀ и҆ ско́рби . и҆ ны́нѣ . В=ᲂз̾раще́нїѧ слᲂве́съ лжи́выхъ , и҆ дѣ́йствъ и҆́же на мѧ̀ , мече́мъ твᲂи́хъ мл҃твъ с̾сѣцы̀ влⷣчце , и҆ в̾ско́рѣ разрꙋшѝ , и҆ всѧ́кїѧ мѧ̀ и҆зба́ви печа́ли .

пѣ́снь , є҃ . і҆рмо́съ . Но́щь несвѣтла̀ невѣ́рнымъ , вѣ́рнымъ же прᲂсвѣще́нїе в̾ пи́щи слᲂве́съ твᲂи́хъ , и҆ сегѡ̀ ра́ди к̾ тебѣ̀ ᲂу҆́треннюю , и҆ вᲂспѣва́ю твᲂѐ бжⷭ҇тво̀ . Непᲂбѣди́ма стѣна̀ сꙋ́щи вѣ́рнымъ . и҆ пᲂкро́въ бꙋ́ди рабꙋ̀ твᲂемꙋ̀ дв҃о , и҆ ѿ всѧ́кїѧ нꙋ́жныѧ и҆зба́ви печа́ли и҆ ѡ҆ѕлᲂбле́нїѧ . Недꙋ́гꙋю ѕѣлѡ̀ , лю́тѣ ѡ҆ѕло́бленыи ѿ ѻ҆бᲂю̀ странꙋ̀ пречⷭ҇таѧ , дш҃е́внꙋю си́лꙋ и҆ тѣле́снꙋю ю҆́же пᲂдъѧ́хъ , твᲂи́ми мл҃твами и҆сцѣлѝ . сла́ва . Въ пꙋчи́нꙋ дв҃о щедро́тъ твᲂи́хъ , ны́нѣ прибѣга́ю ра́бъ тво́й , ѿ ѡ҆держа́щагѡ мѧ̀ сᲂвѣ́та непра́веднаго , да и҆зба́влюсѧ и҆ ѡ҆ѕлᲂбле́нїѧ .= и҆ ны́нѣ . П=ревᲂзнᲂси́ма є҆́сть сла́ва , твᲂи́хъ мл҃твъ всю́дꙋ , дв҃о мт҃и пречⷭ҇таѧ , и҆́миже нн҃ѣ мѧ всѧ́кᲂго и҆зба́ви жите́йскаго настᲂѧ́нїѧ .

пѣ́снь , ѕ҃ . і҆рмо́съ . Пла́вающагѡ въ мᲂлвѣ̀ жите́йскихъ сꙋ́етїи , и҆ съ кᲂрабле́мъ пᲂтᲂплѧ́ема грѣхѝ , и҆ дш҃етлѣ́ннꙋ звѣ́рю примѣта́ема , ꙗ҆́кѡ і҆ѡ́на хрⷭ҇тѐ вᲂпїю́ ти , ѿ сме́ртныѧ глꙋбины̀ вᲂз̾веди́ мѧ . Рече́нїѧ и҆ слᲂвеса̀ всѣ́хъ вѣ́рнѡ вᲂсхвалѧ́ютъ тѧ̀ чⷭ҇таѧ , ꙗ҆́кѡ всѣ́хъ чл҃къ до́лгъ ржⷭ҇тво́мъ твᲂи́мъ ꙗ҆́вѣ разрꙋши́сѧ . но и҆ нн҃ѣ пѣве́цъ твᲂи́хъ мᲂльбꙋ̀ прїимѝ , и҆ и҆зба́ви и҆скꙋше́нїи и҆ печа́лей . Бᲂлѧ́ща мѧ , и҆ страстны́мъ грѣхо́внымъ те́рнїемъ бᲂдо́ма , и҆́щꙋща ю҆́же ѿ тебѐ цѣльбꙋ̀ пречⷭ҇таѧ , всѧ́кїѧ бᲂлѣ́зни же и҆ ско́рби и҆змѝ , и҆ и҆зба́ви ѿ напа́стей и҆ печа́лей .= сла́ва . Земнᲂро́дныхъ є҆стество̀ , на́ небо бцⷣе прᲂѧвле́ннѡ вᲂз̾ведѐ , бы́вши пᲂла́та цр҃ѧ сла́вы . тѣ́мже мѧ̀ ѿ бе́здны мно́гихъ прегрѣше́нїи и҆ напа́стей , и҆ страсте́й вᲂз̾ведѝ . =и҆ ны́нѣ . Вᲂпло́щшеесѧ сло́во , па́че ᲂу҆ма̀ и҆ сло́ва , дв҃о чⷭ҇таѧ рᲂдила̀ є҆сѝ , без̾слᲂве́сїѧ на́съ и҆зба́вльшагѡ . тѣ́мже тѧ̀ слᲂвесы̀ бжⷭ҇твеными непреста́ннѡ вᲂспѣва́емъ , и҆ вѣ́рнѡ сла́вимъ .

Гдⷭ҇и пᲂми́лꙋй , гⷤ . сла́ва , и҆ ны́нѣ . сѣда́ленъ , гла́съ , з҃ . Влⷣчце прᲂгнѣ́васѧ сн҃ъ тво́й на грѣ́шныѧ рабы̀ твᲂѧ̀ , ще́драгѡ бо на гнѣ́въ ѡ҆брати́хᲂмъ мы̀ , но на млⷭ҇ть претвᲂрѝ є҆гѡ̀ чи́стаѧ . ᲂу҆милᲂсе́рдисѧ мт҃и бж҃їѧ , ᲂу҆мᲂлѝ бл҃гᲂꙋтро́бнаго , мᲂльба́ми самᲂдви́жными , плѣне́ныѧ и҆зба́ви .

пѣ́снь , з҃ . і҆рмо́съ . И҆́же в̾ пе́щь ѻ҆́гненнꙋю вве́ржени , препᲂдо́бнїи ѻ҆́трᲂцы , и҆ ѻ҆́гнь на хла́дъ прелᲂжи́ша , вᲂспѣва́нїемъ си́це пᲂѧ́хꙋ , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . Оу҆кра́шена рѧ́снами чистᲂты̀ , пречⷭ҇таѧ ѻ҆трᲂкᲂви́це , дш҃ꙋ мᲂю̀ ны́нѣ претвᲂрѝ ѿ ѕло́бы скве́рныѧ , къ бжⷭ҇твенѣй дᲂбро́тѣ , бл҃гᲂслᲂве́наѧ влⷣчце пред̾ста́тельнице ро́дꙋ на́шемꙋ . Свирѣ́пѣютъ ны́нѣ ѕло́бы бѣсо́вскїѧ ѕѣлѡ̀ и҆ ѻ҆́гнь страсте́й мнѣ̀ вᲂз̾жига́ютъ . но па́че твᲂи́ми зарѧ́ми , си́хъ до кᲂнца̀ пᲂпалѝ щедро́тами сѝ , пред̾ста́тельнице ро́дꙋ на́шемꙋ .= сла́ва . Ѻ҆= на́съ свᲂегѡ̀ сн҃а мᲂлѧ́щи , пречⷭ҇таѧ мт҃и бж҃їѧ , непреста́й ѿ ню́дъ мᲂли́твами твᲂи́ми , чл҃ческихъ печа́лей и҆ бѣ́дъ , и҆зима́ющи рабы̀ свᲂѧ̀ .= и҆ ны́нѣ . П=ресꙋ́щныи сн҃ъ , ѿ тебѐ дв҃о пло́ть прїѧ́тъ непрело́жнѡ , и҆ чл҃къ бы́сть , да спасе́тъ пᲂю́щїѧ , бл҃гᲂслᲂве́нъ пречи́стаѧ пло́дъ твᲂегѡ̀ чре́ва .

пѣ́снь , и҃ . і҆рмо́съ . Ѻ҆́трᲂцы зᲂвѧ́хꙋ в̾ пещѝ прᲂхлажде́ни , тва́рь да бл҃гᲂслᲂви́тъ всѧ̀ сло́вᲂмъ сᲂтво́ршаго , и҆ превᲂзно́ситъ є҆гѡ̀ во́ вѣки . Па́жити страстны́ѧ , и҆ мнᲂгᲂѡ҆бра́зныѧ бѣды̀ , ѡ҆крꙋжа́ютъ вᲂи́стинꙋ влⷣчце твᲂегѡ̀ раба̀ , но и҆зба́ви мѧ тѣ́хъ всѧ́кᲂгѡ и҆скꙋше́нїѧ . Да прїи́детъ ны́нѣ на ны̀ , держа́внаѧ твᲂѧ̀ дла́нь влⷣчце , и҆ ча́емыѧ чл҃ческїѧ ско́рби да и҆зба́витъ на́съ .= сла́ва . Сѣ́ти лꙋка́выхъ и҆ ѕлᲂсᲂвѣ́тныхъ челᲂвѣ́къ сᲂкрꙋшѝ , чⷭ҇таѧ бг҃ᲂрᲂди́тельнице , и҆ твᲂегѡ̀ раба̀ и҆зба́ви ѿ всѧ́кїѧ нꙋ́жды . и҆ ны́нѣ . Є҆=динᲂсꙋ́щее вѣ́рнымъ приста́нище бжⷭ҇твено , дв҃о чⷭ҇таѧ , мᲂлю́ тѧ и҆зба́вити сꙋ́щїѧ в̾ мо́ри житїѧ̀ , бꙋ́ри го́рькїѧ .

пѣ́снь , ѳ҃ . і҆рмо́съ . Ра́дꙋйсѧ невѣ́сто свѣ́тлаѧ , мт҃и свѣтᲂда́вца , ра́дꙋйсѧ вмѣ́щшаѧ невмѣсти́магѡ во́ чревѣ , ра́дꙋйсѧ самѣ́хъ херꙋви́мъ честнѣ́йши , ро́ждьшаѧ сп҃са дш҃а́мъ на́шимъ . Ѿи҆гра́всѧ ꙗ҆́кѡ жребе́цъ , ѿ запᲂвѣде́й влⷣки брᲂзда́ми твᲂи́хъ мл҃твъ да вᲂстѧ́гнꙋтсѧ пречи́стаѧ , къ пꙋтѝ ско́рагѡ ᲂу҆стремле́нїѧ . Низ̾влеко́мь є҆́смь ѕѣлѡ̀ , пᲂпᲂлзнᲂве́нїемъ неразꙋ́мныхъ , къ дѣѧ́нїю лꙋка́ваго грѣха̀ мᲂегѡ̀ . и҆зба́ви мѧ̀ бц҃е , прелᲂже́нїѧ го́рькаго .= сла́ва . И҆сцѣле́нїемъ пе́рвᲂе ꙗ҆́вльшисѧ , чл҃ческагѡ сꙋщества̀ . и҆сцѣли́въ сᲂкрꙋше́нїе а҆да́ма и҆ є҆́ввы , и҆сцѣли́ же и҆ менѐ бцⷣе , твᲂи́ми мᲂльба́ми . и҆ ны́нѣ . Ц=ѣлᲂмꙋ́дренъ ᲂу҆́мъ пᲂда́ждь мѝ , и҆ чи́сто срⷣце , и҆ ра́зꙋмъ смᲂтрели́въ . да сᲂхраню̀ влⷣчце пречи́стыѧ за́пᲂвѣди бг҃а мᲂегѡ̀ .

та́же , дᲂсто́йнѡ є҆́сть . и҆ про́чее , ѡ҆бы́чно . и҆ ѿпꙋ́стъ .

Въ пᲂнедѣ́льникъ , на ᲂу҆́трени . по а҃ , стихᲂло́гїи . сѣда́льны , пᲂкаѧ́нны . гла́съ , з҃ . И҆мꙋ́щи дш҃е мᲂѧ̀ врачевство̀ пᲂкаѧ́нїѧ , пристꙋпѝ слезѧ́щи , в̾ вᲂздыха́нїихъ зᲂвꙋ́щи , и҆сцѣли́телю дш҃а́мъ же и҆ тѣлесе́мъ , чл҃кᲂлю́бче свᲂбᲂди́ мѧ , ѿ мно́гихъ мᲂи́хъ сᲂгрѣше́нїи , и҆ причти́ мѧ блꙋдни́цѣ , и҆ разбо́йникꙋ , и҆ мытарю̀ , и҆ да́рꙋй мѝ бж҃е , без̾зако́нїемъ мᲂи́мъ прᲂще́нїе и҆ спаси́ мѧ .= сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . И҆́же петро́во ѿверже́нїе слеза́ми ѡ҆чи́щь , и҆ мытаре́ва сᲂгрѣше́нїѧ вᲂз̾дыха́нїемъ прᲂсти́въ чл҃кᲂлю́бче , гдⷭ҇и пᲂми́лꙋй мѧ̀ . сла́ва , и҆ ны́нѣ , боⷢ҇ . П=ревзы́де си́лы нбⷭ҇ныѧ , ꙗ҆́кѡ цр҃квь бы́сть бжⷭ҇твенаѧ , блгⷭ҇ве́наѧ бцⷣе . ꙗ҆́кѡ ро́ждьши хрⷭ҇та̀ сп҃са дш҃а́мъ на́шимъ .

по в҃ , стихᲂло́гїи . сѣда́льны , пᲂкаѧ́нны . гла́съ , з҃ . Мытаре́вꙋ пᲂкаѧ́нїю непᲂревнᲂва́хъ , и҆ блꙋдни́цы сле́зъ нестѧжа́хъ , ѿчаѧва́юбᲂсѧ ѿ недᲂꙋмѣ́нїѧ , такᲂва́гѡ и҆справле́нїѧ . но свᲂи́мъ млрⷭ҇дїемъ спаси́ мѧ бж҃е , ꙗ҆́кѡ чл҃кᲂлю́бецъ .= сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . Пꙋчи́на житїѧ̀ ѡ҆бꙋрева́етъ мѧ̀ гдⷭ҇и , и҆ вᲂлне́нїѧ без̾зако́нїй мᲂи́хъ пᲂгрꙋжа́ютъ мѧ̀ , но прᲂстри́ ми рꙋ́кꙋ ꙗ҆́кᲂже петро́ви , и҆ спаси́ мѧ . =сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Ст҃і́и мᲂли́те ѡ҆ставле́нїю да́тисѧ на́мъ , прегрѣше́нїи на́шихъ . и҆ ча́емыхъ лю́тыхъ и҆зба́витисѧ на́мъ , и҆ го́рькїѧ сме́рти мо́лимсѧ .= сла́ва , и҆ ны́нѣ , боⷢ҇ . Ч=тⷭ҇нѣ́йши є҆сѝ сла́вныхъ херꙋви́мъ прест҃а́ѧ дв҃о . ѻ҆ни́ бо бжⷭ҇твенꙋю нетерпѧ́ще си́лꙋ , кри́лы пᲂкрᲂве́ными ли́цы слꙋ́жбꙋ сᲂтвᲂрѧ́ютъ , ты́ же вᲂплᲂще́нно сло́во , самᲂви́дно ви́дѧ нᲂси́вши . є҆го́же непреста́ннѡ мᲂлѝ ѡ҆ дш҃а́хъ на́шихъ .

по г҃ , стихᲂло́гїи , сѣда́ленъ . гла́съ , з҃ . Разли́чныхъ страсте́й и҆ прегрѣше́нїи мᲂи́хъ , бꙋ́рѧ пᲂтᲂплѧ́етъ мѧ̀ во глꙋбинꙋ̀ ѿча́ѧнїѧ . но мл҃твами а҆́нг҃лъ твᲂи́хъ і҆с҃е мнᲂгᲂмлⷭ҇тиве , ꙗ҆́кѡ блꙋ́днаго спаси́ мѧ . сла́ва , и҆ ны́нѣ , боⷢ҇ . Бцⷣе дв҃о нескве́рнаѧ , сн҃а свᲂегѡ̀ мᲂлѝ съ вы́шними си́лами , прᲂще́нїе сᲂгрѣше́нїи на́шихъ пре́же кᲂнца̀ дарᲂва́ти , вѣ́рнѡ тѧ̀ сла́вѧщимъ .

Кано́нъ , пᲂкаѧ́ненъ , к̾ гдⷭ҇ꙋ на́шемꙋ і҆с҃ꙋ хрⷭ҇тꙋ̀ , и҆ ст҃ы́мъ є҆гѡ̀ мч҃нкᲂмъ . твᲂре́нїе і҆ѡ́сифᲂво . гла́съ , з҃ . пѣ́снь , а҃ . і҆рмо́съ . Пᲂспѣ́шьствᲂвавша бг҃а во є҆ги́птѣ мѡѷсе́ѡви , и҆з̾вестѝ і҆и҃лѧ , тᲂгѡ̀ є҆ди́нагѡ вᲂспᲂе́мъ , ꙗ҆́кѡ прᲂсла́висѧ . запѣ́въ : сла́ва тебѣ̀ бж҃е на́шъ , сла́ва тебѣ̀ . Въ пꙋчи́нꙋ лю́тыхъ в̾па́дсѧ вᲂпїю́ ти , рꙋ́кꙋ ми прᲂстрѝ ще́дре , и҆ спаси́ мѧ ꙗ҆́кѡ петра̀ чл҃кᲂлю́бче . Менѐ ка́ющагᲂсѧ хрⷭ҇тѐ , ꙗ҆́кᲂже блꙋдни́цꙋ , сᲂгрѣше́нїи мно́гихъ ѡ҆мы́й манᲂве́нїемъ ми́лᲂсти твᲂеѧ̀ , да вѣ́рᲂю сла́влю тѧ .

запѣ́въ : ст҃і́и мч҃нцы , мᲂли́те бг҃а ѡ҆ на́съ . мⷱ҇ꙋ . И҆́же ст҃ы́ѧ свᲂѧ̀ хрⷭ҇тѐ , гᲂрни́лᲂмъ прᲂсвѣти́выи мнᲂгᲂви́дныхъ ра́нъ . тѣ́хъ мᲂле́нїемъ , пᲂмраче́нїѧ страсте́й и҆зба́ви мѧ .= мⷱ҇ꙋ . Терпѣ́нїемъ ра́нъ ѡ҆чи́стившесѧ , сл҃нца мно́жае ѡ҆блиста́ша ст҃і́и мч҃нцы , и҆ ле́сть пᲂсрами́ша . боⷢ҇ . Ꙗ҆́=же пред̾ста́тельнице вѣ́рныхъ , ꙗ҆́же сᲂгрѣша́ющимъ ѡ҆браще́нїе к̾ бг҃ꙋ , дв҃о всепѣ́таѧ мл҃твами сѝ спаси́ мѧ .

Дрꙋгі́и кано́нъ , ст҃ы́мъ беспло́тнымъ а҆́нг҃лѡмъ . твᲂре́нїе ѳеѡ́фанᲂво . гла́съ , з҃ . і҆рмо́съ . И҆стрѧ́сшемꙋ бг҃ꙋ фараѡ́на , в̾ мо́ри чермнѣ́мъ , пᲂбѣ́днꙋю пѣ́снь вᲂспᲂе́мъ ꙗ҆́кѡ прᲂсла́висѧ . запѣ́въ : ст҃і́и а҆рха́нг҃ли и҆ а҆́нг҃ли , мᲂли́те бг҃а ѡ҆ на́съ . Не и҆зᲂчте́нно си́льне хрⷭ҇тѐ , твᲂи́мъ свѣ́тᲂмъ ѡ҆зари́въ ми ᲂу҆́мъ , а҆́нг҃лы твᲂѧ̀ пѣ́ти вдᲂхнѝ , ꙗ҆́кѡ всеси́ленъ . двⷤа . Крѣ́пкꙋю и҆мꙋ́ще свѣ́тлᲂсть и҆з̾ бг҃ᲂнача́льна ѻ҆ц҃а прᲂи҆схᲂдѧ́ща и҆сто́чника , нбⷭ҇нїи ли́цы пѣ́сньми хрⷭ҇та̀ пᲂчита́ютъ .= боⷢ҇ . О=у҆краше́ннꙋ тѧ̀ чи́стаѧ , бжⷭ҇твеными свѣтлᲂстьмѝ , вѣ́рнїи свѣ́мы ꙗ҆́вѣ , ра́дꙋисѧ тебѣ̀ всѝ зᲂве́мъ .

пѣ́снь , г҃ . і҆рмо́съ . Оу҆тверди́сѧ срⷣце мᲂѐ ѡ҆́ гдⷭ҇ѣ , вᲂз̾несе́сѧ ро́гъ мо́й ѡ҆́ бз҃ѣ мᲂе́мъ , раз̾шири́шасѧ на врагѝ мᲂѧ̀ ᲂу҆ста̀ мᲂѧ̀ . Но́щїю без̾мѣ́стными сᲂдержи́мъ бы́хъ грѣхѝ , свѣ́тᲂмъ мѧ̀ пᲂкаѧ́нїѧ ны́нѣ ѡ҆зарѝ , свѣтᲂда́телю чл҃кᲂлю́бче , да вѣ́рᲂю сла́влю тѧ̀ . Пꙋтїѐ всѝ по ни́хъ же хᲂди́хъ в̾ житїѝ , въ про́пасть сласте́й мѧ низ̾ри́нꙋша . і҆с҃е пᲂкаѧ́нїѧ ми бжⷭ҇твенныѧ пꙋтѝ пᲂкажѝ .= мⷱ҇ꙋ . До́блественымъ нра́вᲂмъ скᲂнча́вше по́двиги , вѣнце́мъ спᲂдо́бистесѧ нбⷭ҇нымъ , всесла́внїи мч҃нцы ѡ҆ всѣ́хъ мᲂлѧ́щесѧ . мⷱ҇ꙋ . Тмы̀ бᲂлѣ́зней претерпѣ́вше стрⷭ҇тᲂте́рпцы , тма́ми бл҃ги́хъ спᲂдо́бистесѧ . тма́мъ сᲂвᲂкꙋплѧ́еми беспло́тныхъ си́лъ . боⷢ҇ . Б=г҃а ро́ждьши нбⷭ҇наго цр҃ѧ дв҃о , во мнѣ̀ црⷭ҇твꙋющїи грѣ́хъ низ̾лᲂжѝ , и҆ ᲂу҆ще́дривши спаси́ мѧ .

и҆́нъ , і҆рмо́съ . Оу҆тверди́сѧ вѣ́рᲂю цр҃кви хрⷭ҇то́ва , и҆́бо непреста́ннѡ пѣ́сньми пᲂе́тъ вᲂпїю́щи , ст҃ъ є҆сѝ гдⷭ҇и спаса́ѧи дш҃а на́ша . Хᲂда́тае сꙋ́ще бжⷭ҇твенагѡ ꙗ҆вле́нїѧ ли́цы а҆́нг҃льстїи , и҆ невеще́ственно зᲂветѐ непреста́ннѡ , ст҃ъ є҆сѝ гдⷭ҇и спаса́ѧи дш҃а на́ша . Любо́вїю зако́ннᲂю дрꙋ́гъ дрꙋ́гꙋ бжⷭ҇твенаѧ сїѧ́нїѧ ѿдаю́ще , бл҃гᲂчи́нно хрⷭ҇то́ви пᲂетѐ , ст҃ъ є҆сѝ гдⷭ҇и , є҆ди́не мнᲂгᲂмлⷭ҇тиве .= Пе́рвыѧ зарѝ втᲂры́ѧ свѣ́тлᲂсти житїю̀ бл҃гᲂчествꙋ́ющїи пᲂревнꙋ́емъ , хрⷭ҇то́ви пᲂю́ще , ст҃ъ є҆сѝ гдⷭ҇и спаса́ѧи дш҃а на́ша . боⷢ҇ . И҆́=же ѿ несꙋ́щихъ всѧ̀ приведы́и во́лею , ѿ тебѐ дв҃о пло́ть зае́млетъ сло́во , и҆ чл҃къ бы́въ млⷭ҇тивнѣ чл҃кᲂлю́бецъ .

пѣ́снь , д҃ . і҆рмо́съ . Пᲂкры́ла є҆́сть нб҃са̀ хрⷭ҇тѐ смᲂтре́нїемъ твᲂи́мъ , дᲂбрᲂдѣ́тели не и҆зрече́нныѧ мꙋ́дрᲂсти твᲂеѧ̀ чл҃кᲂлю́бче . Хᲂтѧ́и всѣ́мъ чл҃кѡмъ ще́дре спасти́сѧ , спаси́ мѧ престꙋпи́вшаго твᲂѧ̀ пᲂвелѣ́нїѧ сло́ве , и҆ не ᲂу҆ничижѝ менѐ . Пᲂд̾клᲂни́хсѧ без̾слᲂве́снымъ страсте́мъ , и҆ скᲂто́мъ ѻ҆каѧ́нныи ᲂу҆пᲂдо́бихсѧ ще́дре , сн҃е бж҃їи ᲂу҆ще́дривъ спаси́ мѧ .= мⷱ҇ꙋ . Вѧ́жеми и҆ ѻ҆гне́мъ с̾жига́еми , пᲂпали́сте пре́лесть , распалѧ́еми ре́внᲂстїю бл҃гᲂче́стїѧ мч҃нцы . мⷱ҇ꙋ . Ра́й мы́сленыи ꙗ҆ви́стесѧ бл҃же́ннїи , пᲂсредѣ̀ и҆мꙋ́ще дре́во живо́тнᲂе хрⷭ҇та̀ , са́дъ сᲂдѣ́лателѧ всѧ́ческимъ . боⷢ҇ . Д=в҃о чи́стаѧ бг҃ᲂра́дᲂваннаѧ ѡ҆бл҃гᲂда́ти ᲂу҆́мъ мо́й , и҆ ѿ пᲂмраче́нїѧ невѣ́дѣнїи , до кᲂнца̀ свᲂбᲂдѝ .

и҆́нъ , і҆рмо́съ . Оу҆слы́шахъ слꙋ́хъ тво́й и҆ ᲂу҆бᲂѧ́хсѧ , разꙋмѣ́хъ дѣ́ла твᲂѧ̀ и҆ диви́хсѧ гдⷭ҇и . И҆сцѣли́ти дш҃и мᲂеѧ̀ стрꙋ́пы , пред̾стᲂѧ́ще хрⷭ҇тꙋ̀ ꙗ҆́кѡ слꙋжи́тели и҆з̾бра́ннїи , ли́цы а҆́нг҃льстїи сегѡ̀ ᲂу҆мᲂли́те . Во́инство беспло́тныхъ влⷣко , тво́й прⷭ҇то́лъ бл҃гᲂгᲂвѣ́йно ѡ҆б̾стᲂѧ́ще , ꙗ҆́снѡ прⷭ҇нѡ вᲂпїю́тъ , сла́ва си́лѣ твᲂе́й гдⷭ҇и . Оу҆диви́шасѧ а҆́нг҃льстїи чи́нᲂве , зрѧ́ще тебѐ хрⷭ҇тѐ с̾ пло́тїю , на землѝ живꙋ́ща , со сме́ртными чл҃ки .= боⷢ҇ . В=сепѣ́таѧ , и҆ бг҃ᲂмт҃и пречⷭ҇таѧ , ро́ждьшаѧ бг҃а несказа́ннѡ пло́тїю , тебѣ̀ мо́лимсѧ , мᲂлѝ спасти́сѧ на́мъ .

пѣ́снь , є҃ . і҆рмо́съ . Оу҆́тренююще хрⷭ҇тѐ , на сла́вꙋ тѝ и҆ хвалꙋ̀ , вᲂсхвалѧ́емъ всегда̀ ѻ҆́бразъ крⷭ҇та̀ твᲂегѡ̀ . є҆го́же да́лъ є҆сѝ на́мъ на́ пᲂмᲂщь ѻ҆рꙋ́жїе . Лѣ́нᲂстїю житїѐ и҆з̾жи́хъ , и҆ трепе́щꙋ не и҆з̾бѣ́жнагѡ ти сꙋда̀ . на не́мже сꙋди́мъ бы́ти и҆́мамъ страстны́и а҆́зъ , ᲂу҆ще́дри мѧ гдⷭ҇и . И҆́же ѻ҆́чи слѣпце́мъ прᲂсвѣти́выи сло́ве , дш҃и мᲂеѧ̀ зѣ́ницы лю́тѣ ѡ҆мраче́ннїи ѿве́рзи , зрѣ́ти свѣ́тъ пᲂвелѣ́нїи твᲂи́хъ .= мⷱ҇ꙋ . Крѣ́пкᲂю мы́слїю хрⷭ҇та̀ и҆спᲂвѣ́дающе , претерпѣ́сте ра́ны всѧ́кагѡ мꙋче́нїѧ , до́блественїи страда́льцы , тѣ́мже ᲂу҆бл҃жа́еми є҆стѐ . мⷱ҇ꙋ . Преплы́вше всѣ́хъ мꙋче́нїи тревᲂлне́нїе , ᲂу҆стрѐ . ми́стесѧ к̾ приста́нищꙋ вы́шнѧгѡ црⷭ҇твїѧ , тишины̀ и҆́стинныѧ мч҃нцы и҆спᲂлнѧ́еми . боⷢ҇ . И҆́=же хᲂтѣ́нїемъ всѧ̀ сᲂтвᲂри́выи бг҃ъ сло́во , па́че сло́ва дв҃о и҆з̾ тебѐ вᲂплᲂти́сѧ . тᲂмꙋ̀ ᲂу҆́бѡ прилѣ́жнѡ ѡ҆ всѣ́хъ мᲂли́сѧ .

и҆́нъ , і҆рмо́съ . Къ тебѣ̀ ᲂу҆́треннюю , и҆ тебѣ̀ вᲂпїю̀ милᲂсе́рде гдⷭ҇и , ѡ҆мраче́ннꙋю грѣхмѝ дꙋ́шꙋ , свѣ́тᲂмъ ѡ҆зари́въ , запᲂвѣде́й твᲂи́хъ наста́ви . Сщ҃е́ннѣйшими и҆ мнᲂгᲂвѣща́нными ᲂу҆сты̀ пᲂю́тъ серафи́ми , пребез̾нача́льнᲂе и҆ бжⷭ҇твенᲂе нача́ло , невеще́ственными свѣтᲂли́тїи прᲂсвѣща́еми . Сщ҃е́нными и҆ мнᲂгᲂсвѣ́тлыми кри́лы пᲂкрыва́ютсѧ херꙋви́ми , к̾ бжⷭ҇твенᲂмꙋ сїѧ́нїю несмѣ́юще в̾зира́ти , премꙋ́дрᲂсти премꙋ́дренаѧ приведе́нїѧ . Разꙋ́мнѡ бжⷭ҇твенагѡ и҆ всебᲂга́тнагѡ престо́ли сла́внїи , краснѣ́йшагѡ напитᲂва́ющесѧ блиста́нїѧ , зри́тели не и҆зрече́нныхъ преми́рнѡ ꙗ҆влѧ́ютсѧ .= боⷢ҇ . О=у҆́мъ пребжⷭ҇твенныи , чл҃ческᲂмꙋ є҆стествꙋ̀ пречⷭ҇таѧ примѣша́етсѧ , в̾ пречⷭ҇тѣмъ и҆ всест҃ѣ́мъ твᲂе́мъ чре́вѣ , сᲂє҆дини́всѧ неслїѧ́ннѡ и҆ нераздѣ́льно по сᲂста́вꙋ .

пѣ́снь , ѕ҃ . і҆рмо́съ . І҆ѡ́на и҆́з̾ чрева а҆́дᲂва вᲂпїѧ́ше , живо́тъ мо́й и҆з̾ и҆стлѣ́нїѧ свᲂбᲂдѝ , мы́ же тѝ вᲂпїе́мъ , всемᲂгі́и сп҃се пᲂми́лꙋй на́съ . Ѻ҆бы́де мѧ бе́здна прегрѣше́нїи , снидо́хъ въ глꙋбинꙋ̀ пᲂги́бели , вᲂз̾веди́ мѧ сло́ве , ꙗ҆́кᲂже и҆нᲂгда̀ і҆ѡ́нꙋ ѿ и҆стлѣ́нїѧ къ жи́зни . Ѻ҆бꙋрева́етъ мѧ̀ пᲂмышле́нїи тревᲂлне́нїе , к̾ приста́нищꙋ и҆́стиннагѡ пᲂкаѧ́нїѧ и҆спра́ви мѧ ще́дре , в̾ тишинѣ̀ сᲂблюда́ѧ срⷣце мᲂѐ .= мⷱ҇ꙋ . Ст҃і́и мч҃нцы защити́вшесѧ вѣ́рᲂю , ло́жнагѡ мꙋчи́телей ласка́нїѧ ᲂу҆клᲂни́шасѧ , и҆ стрѣла́ми вра́жїими , не ᲂу҆ѧ́звени бы́ша . мⷱ҇ꙋ . Вᲂз̾нᲂша́еми къ бг҃ꙋ въ любвѝ , и҆ вᲂз̾ненави́дѣша мирскꙋ́ю любо́вь мч҃нцы , и҆ дрꙋ́зи всѧ́ческихъ твᲂрцꙋ̀ ꙗ҆ви́шасѧ . боⷢ҇ . П=ᲂе́мъ тѧ̀ препѣ́таѧ ѻ҆трᲂкᲂви́це , ро́ждьшꙋю прест҃о́е сло́во . є҆го́же всѧ̀ си́лы нбⷭ҇ныѧ вᲂспѣва́ютъ немо́лчными гла́сы .

и҆́нъ , і҆рмо́съ , то́йже . Ю҆́нᲂшьски свѣтлᲂстьмѝ гдⷭ҇ᲂнача́лїѧ ѡ҆блиста́еми , и҆ не и҆з̾рече́ннꙋю сла́вꙋ тᲂгѡ̀ вᲂспѣва́ютъ , гдⷭ҇ьствїѧ при́снѡ ꙗ҆влѧ́ютсѧ . двⷤа . Любе́зно преси́льнаго мᲂгꙋ́тства си́лꙋ , сᲂзерца́юще бжⷭ҇твеныѧ си́лы , в̾ крѣ́пᲂсти пребыва́ютъ ꙗ҆́вѣ вᲂз̾мᲂга́еми .= боⷢ҇ . и҆з̾ =кᲂлѣ́на цр҃ьска прᲂи҆зы́де дв҃о , рᲂдила̀ є҆сѝ па́че є҆стества̀ , сло́во всѣ́хъ цр҃ѧ , и҆ дв҃аѧ вᲂи́стинꙋ пребыла̀ є҆сѝ .

пѣ́снь , з҃ . і҆рмо́съ . Пе́щь гᲂрѧ́щꙋю прᲂхлади́лъ є҆сѝ сп҃се , и҆ ѻ҆́трᲂки же спасѐ хва́лѧщїѧ тѧ и҆ гл҃юща , блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ . Пᲂжрѝ дш҃е же́ртвꙋ хвале́нїѧ бг҃ꙋ . пᲂтщи́сѧ и҆ пᲂка́йсѧ до́ндеже то́ргъ є҆́сть жите́йскїи , нн҃ѣ ше́ствꙋй до́брыми вᲂз̾раще́нїи . Приближа́етсѧ дш҃е сме́ртнᲂе пᲂсѣче́нїе , плᲂды̀ дᲂсто́йны сᲂтвᲂрѝ , да не ꙗ҆́кѡ непло́днᲂе дре́во в̾ве́ржешисѧ во ѻ҆́гнь гее́нскїи , и҆ вᲂспла́чешисѧ неꙋтѣ́шнѡ .= мⷱ҇ꙋ . Ст҃і́и мч҃нцы пе́щь пре́лести ᲂу҆гаси́вше , кро́вными тꙋ́чами , вᲂпїѧ́хꙋ ꙗ҆́кᲂже ѻ҆́трᲂцы , ѻ҆ц҃ъ на́шихъ бж҃е блгⷭ҇ве́нъ є҆сѝ . мⷱ҇ꙋ . Сн҃ѡве свѣ́та бы́сте , свѣ́тꙋ жела́ннᲂмꙋ примѣси́вшесѧ мч҃нцы , и҆ всѧ̀ сꙋ́щїѧ во тмѣ̀ прᲂсвѣща́ете , и҆ пре́лести тмꙋ̀ ѿгᲂнѧ́ете . боⷢ҇ . К=ꙋпина́ тѧ прᲂѡ҆бража́ше чⷭ҇таѧ неѡ҆пали́маѧ , ѻ҆́гнь бо рᲂдила̀ є҆сѝ непᲂстᲂѧ́нныи дв҃о . тѣ́мже вᲂпїю́ ти , пᲂпалѝ веще́ственыѧ ми стра́сти .

и҆́нъ , і҆рмо́съ . И҆́же в̾ пе́щь ѻ҆́гненнꙋю вве́ржени , прпⷣбнїи ѻ҆́трᲂцы , и҆ ѻ҆́гнь на хла́дъ прелᲂжи́ша , вᲂспѣва́нїемъ си́це пᲂѧ́хꙋ , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . Славᲂсло́вѧтъ неꙋкло́ннѡ вла́сти , тво́й прⷭ҇то́лъ хрⷭ҇тѐ ѡ҆б̾стᲂѧ́ще ᲂу҆се́рднѡ , и҆ зᲂвꙋ́тъ гла́сы немо́лчными , блгⷭ҇ве́нъ є҆сѝ гдⷭ҇и бж҃е во́ вѣки . двⷤа . Ѿню́дными нача́ла ᲂу҆се́рдствы , ѡ҆ є҆ди́нᲂмъ нача́лѣ невеще́ствено ѡ҆браща́еми . непреста́нными пѣ́сньми зᲂвꙋ́ще , блгⷭ҇ве́нъ є҆сѝ бж҃е во́ вѣки , а҆ми́нь .= боⷢ҇ . Є҆=ди́нъ сᲂста́въ , во двᲂю̀ сꙋществꙋ̀ , хрⷭ҇та̀ є҆ди́нагѡ бг҃а и҆ чл҃ка , бг҃ᲂрᲂди́тельнице без̾ сѣ́мене рᲂдила̀ є҆сѝ , стра́шнᲂе сᲂверша́ющаго смᲂтре́нїе , бг҃а ѻ҆ц҃ъ на́шихъ .

пѣ́снь , и҃ . і҆рмо́съ . Сꙋ́щимъ в̾ пещѝ ѻ҆трᲂко́мъ пᲂдо́бѧщесѧ , дх҃о́внꙋю ро́сꙋ прїи́мше вѣ́рᲂю вᲂпїе́мъ , бл҃гᲂслᲂви́те дѣ́ла гдⷭ҇нѧ гдⷭ҇а . Сло́во прїѧ́хъ ꙗ҆́кѡ свѣ́щникъ сїѧ́ющь . но без̾слᲂве́снымъ страсте́мъ пᲂкᲂри́хсѧ ѻ҆каѧ́нныи , и҆ во тмѣ̀ ѕло́бнѣй хᲂждꙋ̀ всегда̀ . Гдⷭ҇ь бли́зъ ꙗ҆́кѡ вѣ́рꙋемъ , пᲂпецы́сѧ дш҃е и҆ неспѝ , пᲂбдѝ и҆ вᲂзᲂпі́й бо́дрено , ще́дрыи чл҃кᲂлю́бче спаси́ мѧ .= мⷱ҇ꙋ . Вкꙋси́вше бжⷭ҇твенꙋю сла́дᲂсть , го́ресть бᲂлѣ́зненꙋю претерпѣ́сте мч҃нцы . и҆ ны́нѣ наслажа́етесѧ прича́стїѧ , бжⷭ҇твенѣйшаго сло́ва . =мⷱ҇ꙋ . Внидо́сте къ бжⷭ҇твенᲂмꙋ пᲂко́ю , пᲂлꙋчи́сте до́брыхъ и҆́хже надѣ́ѧстесѧ всехва́льнїи мч҃нцы . сегѡ̀ ра́ди дᲂсто́йнѡ ва́съ ᲂу҆бл҃жа́емъ .= боⷢ҇ . Р=азрѣши́сѧ ѿ клѧ́твы ржⷭ҇тво́мъ твᲂи́мъ дв҃о , чл҃кѡмъ смѣше́нїе , и҆́бо всеблгⷭ҇ве́наго бл҃гᲂслᲂве́ньми всѧ̀ ᲂу҆краша́ющаго рᲂдила̀ є҆сѝ .

и҆́нъ , і҆рмо́съ . Є҆ди́нагѡ без̾нача́льнагѡ цр҃ѧ сла́вы , є҆го́же хва́лѧтъ нбⷭ҇ныѧ си́лы , и҆ трепе́щꙋтъ чи́ни а҆́нг҃льстїи , по́йте сщ҃е́ннїи , лю́дїе превᲂзнᲂси́те є҆гѡ̀ во́ вѣки . И҆́же всежела́нїе к̾ бг҃ꙋ и҆мꙋ́ще , и҆ ꙗ҆́же ѿню́дными наслажда́ющесѧ зарѧ́ми а҆рха́нг҃ли , ва́съ вᲂспѣва́ющихъ и҆зба́витисѧ напа́стей , хрⷭ҇та̀ ᲂу҆мᲂли́те всѣ́хъ цр҃ѧ . двⷤа . Оу҆́ми сꙋ́ще чистѣ́йшїи , всѧ́кᲂго и҆з̾мѣне́ни веще́ственаго пристра́стїѧ а҆́нг҃ли , спаси́те всѣ́хъ , и҆́же любо́вїю с̾ ва́ми хрⷭ҇та̀ славᲂсло́вѧщихъ во всѧ̀ вѣ́ки .= боⷢ҇ . Свѣ́тъ неприкᲂснᲂве́ненъ , бцⷣе дв҃о во́ чревѣ свᲂе́мъ прїе́мши не и҆з̾рече́нно , прᲂсвѣти́ла є҆сѝ сꙋ́щїѧ во тмѣ̀ житїѧ̀ , сла́вити бл҃гᲂче́стнѡ хрⷭ҇та̀ , прᲂше́дшаго и҆з̾ тебѐ несказа́ннѡ . =та́же , пѣ́снь бцⷣѣ . вели́читъ дш҃а мᲂѧ̀ гдⷭ҇а .= и҆ =пᲂкло́ны до землѝ .

пѣ́снь , ѳ҃ . і҆рмо́съ . Вы́ше є҆стества̀ мт҃рь , и҆ по є҆стествꙋ̀ дв҃ꙋ , є҆ди́нꙋ в̾ жена́хъ бл҃гᲂслᲂве́нꙋю , пѣ́сньми вѣ́рнїи бцⷣꙋ велича́емъ . Сѐ сꙋ́дъ приближа́етсѧ , и҆ ѡ҆сꙋжде́нїю дѣ́ла и҆мѣ́ѧ в̾ себѣ̀ ѿчаѧва́юсѧ , пра́ведныи сꙋдїѐ хрⷭ҇тѐ бж҃е не ѡ҆сꙋдѝ менѐ . Ꙗ҆́кᲂже вѣ́рнаѧ хананѣ́ѧ пᲂми́лꙋй мѧ вᲂпїю́ ти . ꙗ҆́кᲂже пᲂгᲂрбле́нꙋю дре́вле и҆спра́ви мѧ , є҆́же стꙋпа́ти пра́вѡ къ стезѧ́мъ твᲂи́мъ чл҃кᲂлю́бче .= мⷱ҇ꙋ . Сᲂвлеко́сте всѧ́кꙋ съ ри́зами ѕло́бꙋ , и҆ ѻ҆дѣѧ́ньми зѣ́льныхъ мꙋче́нїи , сла́вы ᲂу҆краше́нїе себѣ̀ страда́льцы и҆схᲂда́таисте . мⷱ҇ꙋ . Бжⷭ҇твенаѧ страна̀ живꙋ́щихъ , сїѡ́нъ вы́шнїи гра́дъ , первᲂро́дныѧ ва́съ прїѧ́тъ прᲂсвѣще́ныхъ дᲂбро́тами по́двигъ страда́льцы . боⷢ҇ . С=вѣ́тлыми лꙋча́ми вᲂсїѧ́вшагѡ сло́ва и҆з̾ тебѐ дв҃о чⷭ҇таѧ ѡ҆зари́ мѧ , грѣхо́въ и҆ страсте́й во тмѣ̀ хᲂдѧ́щаго .

и҆́нъ , і҆рмо́съ . Препѣ́таѧ нб҃съ превы́шшаѧ , ꙗ҆́же без̾нача́льнᲂе сло́во без̾ сѣ́мени заче́ншаѧ , и҆ вᲂплᲂще́нна бг҃а ро́ждьшаѧ чл҃кѡмъ , тѣ́мже тѧ̀ всѝ при́снѡ велича́емъ . Сїѧ́ньми бг҃ᲂнача́льными , свѣтᲂли́тїемъ наслажда́ющесѧ всѝ ли́цы а҆́нг҃льстїи , пресла́внаго бг҃а непреста́ннѡ вᲂспѣва́ютъ , и҆ сла́вѧтъ при́снѡ вᲂз̾мᲂга́еми . два́жды . И҆зба́витимисѧ страстна́гѡ ѡ҆держа́нїѧ , херꙋви́ми , и҆ серафи́ми , си́лы , вла́сти , а҆́нг҃ли , а҆рха́нг҃ли , нача́ла же , и҆ прⷭ҇то́ли , гдⷭ҇ьствїѧ , хрⷭ҇та̀ мᲂли́те прилѣ́жнѡ .= боⷢ҇ . Ꙗ҆́=кѡ мт҃и ны́нѣ к̾ сн҃ꙋ свᲂемꙋ̀ бцⷣе дерзнᲂве́нїе и҆мꙋ́щи , любо́вїю пᲂю́щимъ тѧ̀ , и҆зба́витисѧ ѿ прегрѣше́нїи лю́тыхъ мᲂлѝ всест҃а́ѧ , да вси́ тѧ при́снѡ велича́емъ .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стихѣ́ры , пᲂкаѧ́нны . гла́съ , з҃ . Ꙗ҆́кѡ непло́днꙋю смᲂко́вницꙋ сп҃се , непᲂсѣцы̀ менѐ грѣ́шнаго , но на мно́га лѣ́та пᲂжда́нїе ми да́рꙋй , напаѧ́ѧ дш҃ꙋ мᲂю̀ слеза́ми пᲂкаѧ́нїѧ , да пло́дъ принесꙋ́ ти млⷭ҇тиве .

сти́хъ : и҆спо́лнихᲂмсѧ за ᲂу҆́тра . Ꙗ҆́кѡ сл҃нце сы́и пра́веднᲂе , прᲂсвѣтѝ срⷣца̀ тебѐ пᲂю́щихъ , гдⷭ҇и сла́ва тебѣ̀ .

сти́хъ : и҆ бꙋ́ди свѣ́тлᲂсть . мⷱ҇ꙋ . Па́мѧть ст҃ы́хъ твᲂи́хъ страстᲂте́рпецъ , пра́зднꙋюще вᲂспѣва́емъ , хрⷭ҇то́ви вᲂпїю́ще , гдⷭ҇и сла́ва тебѣ̀ .

сла́ва , и҆ ны́нѣ , боⷢ҇ . Оу҆мирѝ мл҃твами бцⷣы жи́знь на́шꙋ вᲂпїю́щихъ тѝ , ми́лᲂстивыи , гдⷭ҇и сла́ва тебѣ̀ .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= є҆ктенїѧ̀ . =та́же , ча́съ , а҃ . ѱалмы̀ , ѡ҆бы́чны . и҆ про́чее , и҆ кᲂне́чныи ѿпꙋ́стъ .

Въ пᲂнедѣ́льникъ , бл҃же́нны . гла́съ , з҃ .

Красе́нъ бѣ̀ и҆ до́бръ въ снѣ́дь , и҆́же менѐ ᲂу҆мертви́выи пло́дъ , хрⷭ҇то́съ є҆́сть дре́во живо́тнᲂе , ѿ него́ же ꙗ҆ды́и не ᲂу҆мира́ю . но вᲂпїю̀ с̾ разбо́йникᲂмъ , пᲂмѧни́ мѧ сп҃се во црⷭ҇твїи сѝ .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Ꙗ҆́кѡ вѣ́рнаѧ хананѣ́ѧ зᲂвꙋ̀ в̾ бᲂлѣ́зни срⷣца мᲂегѡ̀ , пᲂми́лꙋй мѧ̀ сп҃се ꙗ҆́кѡ бл҃гъ , и҆́бо дш҃ꙋ и҆́мамъ бѣ́д̾ствꙋющꙋ всѧ́кими кᲂва́рствы вра́жїими , и҆ ѡ҆бꙋрева́емꙋ при́снѡ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Херꙋви́ми и҆ серафи́ми , и҆ прⷭ҇то́ли , нача́ла , и҆ си́лы прⷭ҇нѡ , а҆рха́нг҃ли , и҆ а҆́нг҃лѡвъ во́иньства , и҆ гдⷭ҇ьствїѧ , и҆ премꙋ́дрыхъ власте́й сᲂбо́ри , тебѐ сла́вѧтъ бл҃гᲂда́телѧ и҆ гдⷭ҇а .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ небесѣхъ . Вра́жїе лꙋка́вᲂе вᲂз̾нᲂше́нїе , к̾ бг҃ꙋ вᲂз̾выша́емᲂе низ̾верго́ша до кᲂнца̀ страда́льцы , и҆ пᲂбѣди́тели ꙗ҆́вльшесѧ , въ ра́дᲂсти ны́нѣ на́ небесѣхъ живꙋ́тъ , сла́вᲂю нетлѣ́ннᲂю сїѧ́юще .

сла́ва . Трⷪ҇ца нераздѣ́льнаѧ є҆ди́ница , є҆ди́но є҆сте́ствено трили́чно сꙋщество̀ , пᲂкланѧ́емсѧ тѝ с̾ вы́шними си́лами , ѻ҆́ч҃е и҆ сн҃е и҆ д́ш҃е ст҃ы́и , є҆ди́нᲂмꙋ бжⷭ҇твꙋ̀ , є҆ди́нѣй си́лѣ , є҆ди́нъ бг҃ъ трⷪ҇ца є҆динᲂсꙋ́щнаѧ .

и҆ нн҃ѣ . Сластьмѝ ѡ҆скверни́хсѧ жите́йскими , к̾ тебѣ̀ нескве́рнѣй прибѣго́хъ дв҃о , пᲂро́ка всѧ́кагѡ и҆ сᲂгрѣше́нїи и҆зба́ви всестрастнꙋ́ю мᲂю̀ дꙋ́шꙋ , ꙗ҆́кѡ да ᲂу҆блажа́ю тѧ приснᲂбл҃же́ннꙋю .

<< Previous

Contents

Next >>