Глас 7 вторник

Въ пᲂнедѣ́льникъ , ве́черъ . на гдⷭ҇и вᲂзва́хъ , стⷯры , пᲂкаѧ́нны . гла́съ , з҃ . запѣ́въ : ꙗ҆́кѡ ѿ тебѐ ѡ҆чище́нїе є҆́сть . Влⷣко и҆ бж҃е всеще́дрыи , и҆́ми же вѣ́си сꙋдьба́ми , да́ждь ми в̾ срⷣцы тво́й стра́хъ и҆мѣ́ти . да́ждь ми ненави́дѣти дѣѧ́нїи лꙋка́вагѡ . да́ждь ми люби́ти тѧ ѿ всеѧ̀ дш҃и мᲂеѧ̀ , и҆ твᲂри́ти во́лю твᲂю̀ спаси́тельнꙋю . ты́ бо є҆сѝ бг҃ъ на́шъ рекі́и , прᲂси́те и҆ прїи́мѣте .

ᲂу҆пᲂва̀ дш҃а мᲂѧ̀ на́ гдⷭ҇а . Бы́вша мѧ бѣсѡ́мъ смѣ́хъ , чл҃кѡмъ же ᲂу҆ничиже́нїе , пра́веднымъ рыда́нїе . а҆́нг҃лѡмъ пла́чь . ѡ҆скверне́нїе вᲂздꙋ́хꙋ , и҆ землѝ и҆ вᲂда́мъ . тѣ́ло бо ѡ҆калѧ́хъ , дш҃ꙋ и҆ ᲂу҆́мъ ѡ҆скверни́хъ . па́че сло́ва , съ дѣѧ́ньми а҆́зъ бж҃їи вра́гъ бы́хъ . ᲂу҆вы̀ мнѣ̀ ᲂу҆вы̀ мнѣ̀ гдⷭ҇и , сᲂгрѣши́хъ ти сᲂгрѣши́хъ прᲂсти́ мѧ .

да ᲂу҆пᲂва́етъ і҆и҃ль на́ гдⷭ҇а . Мᲂлю́тисѧ , на мнѣ̀ грѣ́шнемъ дᲂлгᲂтерпѝ влⷣко , и҆ непᲂсѣцы̀ менѐ ꙗ҆́кѡ непло́днᲂе дре́во пᲂсѣче́нїемъ сме́ртнымъ , во ѻ҆́гнь ѿсыла́ѧ , но плᲂдᲂно́сна мѧ сᲂтвᲂри́ти ᲂу҆мᲂле́нъ бы́въ . вре́мѧ пᲂкаѧ́нїѧ ми даѧ̀ ꙗ҆́кѡ чл҃кᲂлю́бецъ . ꙗ҆́кѡ да ѿмы́ю сп҃се мно́гїѧ грѣхѝ .

та́же , в̾ минѣ́и , стⷯры , ст҃о́мꙋ . а҆́ще ли нѣ́сть минѣ́и . и҆́ны , стихѣ́ры , ст҃о́мꙋ и҆ вели́кᲂмꙋ і҆ѡа́ннꙋ прⷣтчи . гла́съ , з҃ . =запѣ́въ : ѿ всѣ́хъ без̾зако́нїи є҆гѡ̀ . В=ъ пꙋсты́ни живы́и непᲂро́чно житїѐ , грѣхмѝ ѡ҆пꙋстѣ́вшїи ᲂу҆́мъ мо́й , ѡ҆бнᲂвѝ прⷣтче .

пᲂхвали́те є҆гѡ̀ всѝ лю́дїе . Го́рлицꙋ тѧ̀ прⷪ҇ро́че краснѣ́йшꙋю , разꙋмѣ́вше сла́вимъ . прᲂвᲂз̾вѣща́ющꙋ сꙋ́щимъ в̾ ми́рѣ бжⷭ҇твенꙋю ве́снꙋ .

и҆ и҆́стина гдⷭ҇нѧ пребыва́етъ во́ вѣки . Пред̾ста́телю живᲂтꙋ̀ мᲂемꙋ̀ , дш҃и мᲂе́й храни́телю , бжⷭ҇твеныи прⷣтче , ѿ чл҃къ ꙗ҆зы́ка льсти́ва и҆зба́ви раба̀ свᲂегѡ̀ .

сла́ва , и҆ ны́нѣ , боⷢ҇ . Въ мѧте́жи ѡ҆бꙋрева́ема мѧ лѣ́нᲂсти , в̾ приста́нище бл҃гᲂꙋти́шно спасе́нїѧ и҆спра́ви влⷣчце .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стихѣ́ры , пᲂкаѧ́нны . гла́съ , з҃ . Ꙗ҆́кѡ блꙋ́дныи сы́нъ прїидо́хъ а҆́зъ ще́дре , прїими́ мѧ припа́дающаго , ꙗ҆́кѡ є҆ди́наго ѿ нае́мникъ твᲂи́хъ , и҆ пᲂми́лꙋй мѧ бж҃е чл҃кᲂлю́бче .

сти́хъ : к̾ тебѣ̀ вᲂз̾ведо́хъ ѻ҆́чи мᲂѝ . Ꙗ҆́кѡ впады́и в̾ разбо́йники ᲂу҆ѧ́звеныи . та́кѡ и҆ а҆́зъ впадо́хъ ѿ мно́гихъ грѣхо́въ , и҆ ᲂу҆ѧ́звена мѝ є҆́сть дш҃а , к̾ кᲂмꙋ̀ прибѣ́гнꙋ пᲂви́нныи а҆́зъ ; то́кмѡ к̾ тебѣ̀ милᲂсе́рдᲂмꙋ дш҃а́мъ врачꙋ̀ . и҆зле́й на мѧ̀ бж҃е вели́кꙋю твᲂю̀ млⷭ҇ть .

сти́хъ : пᲂми́лꙋй на́съ гдⷭ҇и . мⷱ҇ꙋ . Ст҃і́и мч҃нцы и҆́же до́брѣ страда́вше , и҆ вѣнча́вшесѧ , мᲂли́тесѧ ко́ гдⷭ҇ꙋ , спасти́сѧ дш҃а́мъ на́шимъ .

сла́ва , и҆ ны́нѣ , боⷢ҇ . Ра́дꙋисѧ сл҃нца ѻ҆́блаче мы́сленагѡ и҆ не и҆зрече́ннагѡ влⷣчце . ра́дꙋисѧ всесвѣ́тлаѧ свѣщѐ . ра́дꙋисѧ свѣ́щниче всезлаты́и . тᲂбо́ю прест҃а́ѧ , є҆́вва и҆зба́висѧ ѿ клѧ́твы . но ꙗ҆́кѡ и҆мꙋ́щи дерзнᲂве́нїе , к̾ бл҃гᲂпремѣ́ннᲂмꙋ сн҃ꙋ свᲂемꙋ̀ и҆ бг҃ꙋ , мт҃рьнею сѝ мл҃твᲂю не ѡ҆скꙋдѣ́й , мᲂли́тисѧ пречⷭ҇таѧ .

таⷤ , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , боⷢ҇ . =во́ =гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Въ пᲂнедѣ́льникъ , на па́вечерницѣ . кано́нъ мᲂле́бенъ , прест҃ѣ́й бцⷣѣ . гла́съ , з҃ . пѣ́снь , а҃ . і҆рмо́съ . Сᲂкрꙋ́шшемꙋ бра́ни мы́шцею высо́кᲂю , и҆ вса́дники тристᲂѧ́ща , пᲂгрꙋ́жшемꙋ вᲂспᲂе́мъ хрⷭ҇тꙋ̀ , ꙗ҆́кѡ и҆зба́вителю на́шемꙋ ꙗ҆́кѡ прᲂсла́висѧ . запѣ́въ : прест҃а́ѧ гжⷭ҇е бцⷣе спасѝ на́съ . Тѧ̀ вино́внꙋ на́шемꙋ спасе́нїю , и҆ бжⷭ҇твенагѡ и҆збавле́нїѧ мо́лимъ пречⷭ҇таѧ , мᲂли́сѧ є҆́же спасти́сѧ на́мъ . Ве́сь є҆́смь в̾ лю́тыхъ напа́стѣхъ въ бѣда́хъ и҆ прегрѣше́нїихъ , вᲂпїю́ ти пречⷭ҇таѧ , спаси́ мѧ раба̀ твᲂегѡ̀ .= сла́ва . Тѧ̀ дв҃ꙋ чⷭ҇тꙋю мо́лимъ , и҆ мт҃рь зижди́телѧ , ѿ всѧ́кᲂгѡ ѡ҆ѕлᲂбле́нїѧ бѣсо́въ , и҆зба́ви на́съ . и҆ ны́нѣ . И҆́=же сло́во пло́тїю ро́ждьши па́че сло́ва , нача́льника жи́зни хрⷭ҇та̀ бг҃а на́шегѡ мᲂлѝ спасти́сѧ на́мъ .

пѣ́снь , г҃ . і҆рмо́съ . Оу҆тверди́сѧ вѣ́рᲂю цр҃кви хрⷭ҇то́ва , и҆́бо непреста́ннѡ пѣ́сньми пᲂе́тъ вᲂпїю́щи , ст҃ъ є҆сѝ гдⷭ҇и спаса́ѧи дш҃а на́ша . Всепа́гꙋбныѧ ѕло́бы ше́ствᲂвавъ стезю̀ , не ѡ҆брѣто́хъ пꙋтѝ спасе́нїѧ мᲂегѡ̀ , к̾ немꙋ́же мѧ ты̀ наста́ви пренепᲂро́чнаѧ влⷣчце . Крѣ́пᲂсть и҆ ᲂу҆тверже́нїе , и҆ по́мᲂщь , и҆ наде́ждꙋ тѧ̀ є҆ди́нꙋ написꙋ́ю всенепᲂро́чнаѧ , ты́ ми бꙋ́ди застꙋ́пница въ де́нь и҆схо́да .= сла́ва . Всегда́ тѧ пренепᲂро́чнаѧ мᲂлю̀ , в̾ ча́съ сме́рти мᲂеѧ̀ пред̾ста́ни , и҆ мꙋ́ки и҆зба́ви раба̀ твᲂегѡ̀ . и҆ нн҃ѣ . Р=ᲂди́всѧ ѿ дв҃ы несказа́ннѡ ꙗ҆ви́сѧ ꙗ҆́кᲂже и҆зво́ли сп҃се на́шъ , и҆ ми́ра ѡ҆бнᲂви́лъ є҆сѝ гдⷭ҇и .

пѣ́снь , д҃ . і҆рмо́съ . Оу҆слы́шахъ слꙋ́хъ тво́й и҆ ᲂу҆бᲂѧ́хсѧ , разꙋмѣ́хъ дѣ́ла твᲂѧ̀ и҆ диви́хсѧ гдⷭ҇и . Пᲂвелѣ́нїѧ мᲂегѡ̀ влⷣки престꙋ́пль , враго́мъ ꙗ҆ви́хсѧ ᲂу҆до́бь ѡ҆держи́мъ ты́ мѧ и҆зба́ви влⷣчце . Въ ча́съ сме́рти и҆зба́ви пречⷭ҇таѧ , и҆ спасѝ дꙋ́шꙋ мᲂю̀ страстнꙋ́ю ѿ бѣсо́въ .= сла́ва . Разрѣшѝ пречⷭ҇таѧ влⷣчце , сᲂꙋ́зы прегрѣше́нїи мᲂи́хъ , и҆ к̾ живᲂтꙋ̀ вѣ́чнᲂмꙋ бꙋ́ди ми хᲂда́таица мл҃твами сѝ . и҆ ны́нѣ . В=ᲂспѣва́емъ тѧ по ржⷭ҇твѣ̀ па́ки дв҃ꙋю , и҆ прᲂславлѧ́емъ тѧ̀ пречⷭ҇таѧ , ꙗ҆́кѡ мт҃рь бг҃а на́шегѡ .

пѣ́снь , є҃ . і҆рмо́съ . Оу҆́тренююще хрⷭ҇тѐ , на сла́вꙋ тѝ и҆ хвалꙋ̀ , вᲂсхвалѧ́емъ всегда̀ ѻ҆́бразъ крⷭ҇та̀ твᲂегѡ̀ . є҆го́же да́лъ є҆сѝ на́мъ на́ пᲂмᲂщь ѻ҆рꙋ́жїе . Приста́нище въ бꙋ́ри лю́тѣ смꙋща́емымъ , спасе́нїѧ две́ри вѣ́рᲂю спаса́емымъ дв҃о бл҃га́ѧ , спаси́ мѧ раба̀ свᲂегѡ̀ . Мно́гїѧ щедро́ты твᲂѧ̀ дв҃о бцⷣе , на мнѣ̀ рабѣ̀ твᲂе́мъ да ꙗ҆вѧ́тсѧ бᲂга́тно , и҆збавлѧ́ющи мѧ стра́шнагѡ и҆ бꙋ́дꙋщагѡ сꙋда̀ .= сла́ва . Но́щь стра́сти непᲂстᲂѧ́нна , сᲂдержи́тъ дш҃ꙋ мᲂю̀ , и҆ къ па́гꙋбнѣй про́пасти ѿсыла́ютъ . свѣ́тᲂмъ мл҃твы твᲂеѧ̀ бцⷣе спаси́ мѧ раба̀ твᲂегѡ̀ . и҆ нн҃ѣ . П=рест҃а́ѧ дв҃о ѡ҆бра́дᲂваннаѧ , ро́ждьшаѧ сло́во в̾ лѣ́та па́че сло́ва , мᲂлѝ є҆гѡ̀ спастѝ дш҃а на́ша .

пѣ́снь , ѕ҃ . і҆рмо́съ . І҆ѡ́на и҆́з̾ чрева а҆́дᲂва вᲂпїѧ́ше , живо́тъ мо́й и҆з̾ и҆стлѣ́нїѧ свᲂбᲂдѝ , мы́ же тѝ вᲂпїе́мъ , всемᲂгі́и сп҃се пᲂми́лꙋй на́съ . Въ напа́стѣхъ застꙋ́пницꙋ тѧ̀ и҆́мамы тве́рдꙋ , в̾ ско́рбѣхъ крѣ́пкᲂе спасе́нїе , пᲂко́й в̾ печа́лѣхъ , в̾ бѣда́хъ по́мᲂщь , прⷭ҇нѡ дв҃о . Ты́ ми храни́тельница жи́зни все́й ꙗ҆ви́сѧ пречⷭ҇таѧ , ты́ мѧ и҆зба́ви ѿ бѣсо́въ в̾ ча́съ сме́рти ; ты̀ и҆ по сме́рти ᲂу҆пᲂко́й .= сла́ва . Дᲂбро́та честны́хъ ст҃ы́хъ а҆́нг҃лъ , ра́дᲂванїе чл҃кѡмъ всѣ́мъ , ты̀ є҆сѝ бцⷣе дв҃о . ты́ мѧ к̾ живᲂтꙋ̀ наста́ви . и҆ ны́нѣ . И҆=сцѣлѝ пренепᲂро́чнаѧ ѻ҆каѧ́ннꙋю дꙋ́шꙋ мᲂю̀ , не и҆сцѣ́льнѡ бᲂлѧ́щꙋю , жите́йскими прелестьмѝ , и҆ мно́гихъ двере́й затвᲂре́нми .

Гдⷭ҇и пᲂми́лꙋй , гⷤ . сла́ва , и҆ ны́нѣ . сѣда́ленъ , гла́съ , з҃ . За млрⷭ҇дїе млⷭ҇ти твᲂеѧ̀ хрⷭ҇тѐ бж҃е , ѿ дв҃ы ст҃ы́ѧ вᲂплᲂти́тисѧ и҆зво́лилъ є҆сѝ , є҆ѧ́же ра́ди сᲂблюдѝ жи́знь на́шꙋ ꙗ҆́кѡ чл҃кᲂлю́бецъ .

пѣ́снь , з҃ . і҆рмо́съ . Пе́щь гᲂрѧ́щꙋю прᲂхлади́лъ є҆сѝ сп҃се , и҆ ѻ҆́трᲂки же спасѐ хва́лѧщїѧ тѧ и҆ гл҃юща , блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ . Мно́жествѡ прегрѣше́нїи мᲂи́хъ прїе́млю во ᲂу҆́мъ , во ѿча́ѧнїи быва́ю , дв҃о пренепᲂро́чнаѧ . тѣ́мже ти зᲂвꙋ̀ пᲂмᲂзи́ ми , да не до кᲂнца̀ пᲂги́бнꙋ . Жи́зни сꙋ́щꙋю мт҃рь тѧ̀ чи́стаѧ вѣ́дыи , зᲂвꙋ́ ти , сме́рти дш҃е́вныѧ и҆зба́ви мѧ , и҆ вѣ́чныѧ жи́зни спᲂдо́би .= сла́ва . И҆зба́ви пренепᲂро́чнаѧ , ѿ бѣ́дъ и҆ страсте́й , и҆ бᲂлѣ́зней ѡ҆ѕлᲂбле́нїѧ , и҆ житїѧ̀ сᲂгрѣше́нїи , и҆ ѿ вѣ́чнагѡ ѻ҆гнѧ̀ негаси́магѡ , и҆́же вѣ́рнѡ чтꙋ́щїѧ тѧ̀ пѣ́сньми . и҆ ны́нѣ . В=сѧ́къ ꙗ҆зы́къ сла́витъ тѧ чи́стаѧ сла́вꙋ сꙋ́щꙋю и҆ пᲂхвалꙋ̀ ро́да на́шегѡ , и҆ наста́вницꙋ заблꙋ́ждьшимъ бцⷣе препѣ́таѧ .

пѣ́снь , и҃ . і҆рмо́съ . Стра́шнагѡ херꙋви́мᲂмъ и҆ чꙋ́днагѡ серафи́мᲂмъ , и҆ ми́рꙋ твᲂрца̀ , сщ҃е́ннїи рабѝ и҆ дꙋ́си пра́ведныхъ по́йте гдⷭ҇а . Всѐ житїѐ мᲂѐ и҆з̾жи́хъ въ лѣ́нᲂсти а҆́зъ преѻ҆каѧ́нныи , и҆ ны́нѣ недᲂꙋмѣ́юсѧ и҆ къ кᲂнцꙋ̀ прибли́живсѧ зᲂвꙋ̀ пᲂмᲂзи́ ми влⷣчце . Грѣ́шникѡмъ прибѣ́жище , низ̾ве́рженымъ и҆справле́нїе , ты̀ є҆сѝ влⷣчце . сегѡ̀ ра́ди притека́ю къ пᲂкро́вꙋ твᲂемꙋ̀ , и҆ спаси́ мѧ .= сла́ва . Неꙋсы́пнꙋ мл҃твꙋ ꙗ҆́кѡ и҆мꙋ́щи , всенепᲂро́чнаѧ влⷣчце ми́рꙋ , сꙋда̀ и҆зба́ви бꙋ́дꙋщаго , вѣ́рᲂю чтꙋ́щихъ ѻ҆́бразъ тво́й . и҆ ны́нѣ . П=ᲂе́тъ тѧ всѧ́къ ꙗ҆зы́къ сла́вѧщи , бг҃а бо препѣ́таго рᲂдила̀ є҆сѝ дв҃о бг҃ᲂневѣ́сто , є҆го́же мᲂлѝ непреста́ннѡ спастѝ дш҃а пᲂю́щихъ тѧ̀ .

пѣ́снь , ѳ҃ . і҆рмо́съ . Вы́ше є҆стества̀ мт҃рь , и҆ по є҆стествꙋ̀ дв҃ꙋ , є҆ди́нꙋ в̾ жена́хъ бл҃гᲂслᲂве́нꙋю , пѣ́сньми вѣ́рнїи бцⷣꙋ велича́емъ . Пᲂд̾ твᲂѐ млрⷭ҇дїе прибѣга́ющїи вѣ́рᲂю , и҆збавлѧ́ютсѧ ско́рбныхъ бѣ́дъ житїѧ̀ , тѣ́мже и҆ а҆́зъ къ твᲂемꙋ̀ пᲂкро́вꙋ прибѣго́хъ бцⷣе . Крѣпка̀ застꙋ́пница , непᲂбѣди́ма стѣна̀ печа́льнымъ чⷭ҇таѧ , спаси́ мѧ ѿ страсте́й грѣхо́въ и҆ ѻ҆гнѧ̀ вѣ́чнꙋющаго .= сла́ва . Свѣ́тлыми сїѧ́ньми вᲂсїѧ́вшаго сло́ва , ѿ тебѐ дв҃о чⷭ҇таѧ , ѡ҆зари́ мѧ и҆ спасѝ ꙗ҆́кѡ бл҃га , и҆ ѿ мꙋ́къ и҆схи́ти . и҆ ны́нѣ . Но́сиши нᲂсѧ́щаго всѧ́ческаѧ , ст҃ы́ма рꙋка́ма твᲂи́ма , є҆го́же мᲂлѝ чⷭ҇таѧ , чꙋжа́гѡ ѕлᲂдѣ́йства неѡ҆держи́мы на́съ спасѝ . =та́же , дᲂсто́йнѡ є҆́сть . и҆ про́чее . и҆ ѿпꙋ́стъ .

Во вто́рникъ , на ᲂу҆́трени . по а҃ , стихᲂло́гїи . сѣда́льны , пᲂкаѧ́нны . гла́съ , з҃ . И҆мꙋ́щи дш҃е мᲂѧ̀ врачевство̀ пᲂкаѧ́нїѧ , пристꙋпѝ слезѧ́щи вᲂз̾дыха́нїемъ вᲂпїю́щи , и҆сцѣли́телю дш҃а́мъ же и҆ тѣ́лᲂмъ , свᲂбᲂди́ мѧ чл҃кᲂлю́бче ѿ мно́гихъ сᲂгрѣше́нїи , и҆ причти́ мѧ блꙋдни́цѣ , и҆ разбо́йникꙋ , и҆ мытарю̀ , да́рꙋй ми бж҃е без̾зако́нїемъ мᲂи́мъ прᲂще́нїе и҆ спаси́ мѧ .= сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . И҆́же петро́во ѿверже́нїе слеза́ми ѡ҆чи́стивъ , и҆ мытаре́ва сᲂгрѣше́нїѧ вᲂз̾дыха́нїемъ прᲂсти́въ , чл҃кᲂлю́бче гдⷭ҇и пᲂми́лꙋй мѧ . =сла́ва , и҆ ны́нѣ , боⷢ҇ . Ра́дꙋисѧ бцⷣе , ꙗ҆́же невмѣсти́маго въ нб҃сѣ́хъ , вмѣсти́вши во ᲂу҆тро́бѣ свᲂе́й . ра́дꙋисѧ дв҃о прᲂро́ческаѧ про́пᲂвѣдь , є҆́ю же на́мъ вᲂсїѧ̀ є҆мманꙋ́илъ . ра́дꙋисѧ мт҃и хрⷭ҇та̀ бг҃а .

по в҃ , стихᲂло́гїи , сѣда́льны . гла́съ , з҃ . Мытаре́вꙋ пᲂкаѧ́нїю непᲂревнᲂва́хъ , и҆ блꙋдни́цы сле́зъ нестѧжа́хъ , ѿчаѧва́юбᲂсѧ ѿ недᲂꙋмѣ́нїѧ такᲂва́гѡ не и҆справле́нїѧ . но твᲂи́мъ бл҃гᲂꙋтро́бїемъ спаси́ мѧ бж҃е , ꙗ҆́кѡ чл҃кᲂлю́бецъ .= сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . И҆́же блꙋдни́цы сле́зы , и҆ петро́вы прїе́мыи , и҆ мытарѧ̀ ѡ҆правда́выи и҆з̾ глꙋбины̀ вᲂз̾дᲂхнꙋ́вша . и҆ менѐ ѿча́ѧннаго ѿ дѣ́лъ ᲂу҆ще́дри сп҃се , и҆ спаси́ мѧ . =сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Ст҃і́и твᲂѝ гдⷭ҇и на землѝ пᲂд̾ви́гшесѧ , врага̀ пᲂпра́ша , и҆ ле́сть и҆́дᲂльскꙋю ᲂу҆праздни́ша , тѣ́мже и҆ вѣнцы̀ ѿ тебѐ прїѧ́ша чл҃кᲂлю́бца влⷣки и҆ млⷭ҇тиваго бг҃а , пᲂдаю́щаго ми́рᲂви ве́лїю млⷭ҇ть .= сла́ва , и҆ ны́нѣ , боⷢ҇ . П=ревзы́де си́лы нбⷭ҇ныѧ , ꙗ҆́кѡ цр҃кви бы́сть бжⷭ҇твенаѧ бл҃гᲂслᲂве́наѧ бцⷣе , ꙗ҆́кѡ ро́ждьши сп҃са дш҃а́мъ на́шимъ .

по г҃ , стихᲂло́гїи , сѣда́ленъ . гла́съ , з҃ . Ꙗ҆́кѡ блꙋдни́ца припа́даю тѝ чл҃кᲂлю́бче , а҆́ще и҆ слеза́ми ве́сь недᲂꙋмѣ́юсѧ ᲂу҆миле́нїѧ . мл҃твами прⷣтчи , ꙗ҆́кѡ ѻ҆́нꙋ ᲂу҆милѝ млⷭ҇тиве , и҆ спаси́ мѧ . сла́ва , и҆ нн҃ѣ , боⷢ҇ . Пред̾ста́тельнице те́плаѧ и҆ застꙋ́пнице хрⷭ҇тїа́нѡмъ є҆сѝ , бцⷣе всепѣ́таѧ , тѣ́мже съ прⷣтчемъ , сн҃а свᲂегѡ̀ мᲂлѝ , ѡ҆брѣстѝ на́мъ млⷭ҇ть .

Кано́нъ пᲂкаѧ́ненъ , ко́ гдⷭ҇ꙋ на́шемꙋ і҆с҃ꙋ хрⷭ҇тꙋ̀ , и҆ ст҃ы́мъ є҆гѡ̀ мч҃нкѡмъ . твᲂре́нїе і҆ѡ́сифᲂво . гла́съ , з҃ . пѣ́снь , а҃ . і҆рмо́съ . Сᲂкрꙋ́шшемꙋ бра́ни мы́шцею высо́кᲂю , и҆ вса́дники тристᲂѧ́ща , пᲂгрꙋ́ж̾шемꙋ вᲂспᲂе́мъ хрⷭ҇тꙋ̀ , ꙗ҆́кѡ и҆зба́вителю на́шемꙋ ꙗ҆́кѡ прᲂсла́висѧ . запѣ́въ : сла́ва тебѣ̀ бж҃е на́шъ , сла́ва тебѣ̀ . Всегда̀ сᲂгрѣша́ю , и҆ небᲂю́сѧ тебѐ хрⷭ҇тѐ , дᲂлгᲂтерпѣ́нїемъ и҆́щꙋщагѡ мнѣ̀ пᲂкаѧ́нїе , да́ждь ми пᲂмышле́нїе ѡ҆браще́нїѧ ꙗ҆́кѡ бл҃гъ , и҆ непре́зри менѐ . Грѣхѝ ко грѣхо́мъ прилага́ю при́снѡ , непреста́ю ника́кᲂже а҆́зъ ѻ҆каѧ́нныи . є҆ди́не бл҃же без̾грѣ́шныи хрⷭ҇тѐ , ᲂу҆ще́дри и҆ спаси́ мѧ .

запѣ́в̾ : ст҃і́и мч҃нцы , мᲂли́те бг҃а ѡ҆ на́съ . мⷱ҇ꙋ . Де́рзᲂстнѣ до́блїи приглаша́хꙋ страда́льцы , сїѐ пᲂзо́рище и҆спо́лнено по́двига теце́мъ , пред̾сѣди́тъ хрⷭ҇то́съ . пᲂд̾вигᲂпᲂло́жникъ , вѣнчава́ѧ пᲂбѣди́телей врага̀ . мⷱ҇ꙋ . Сᲂвле́кшесѧ тѣ́ла мнᲂгᲂѡ҆бра́зными ра́нами , и҆ нетлѣ́нїѧ ри́зᲂю ѡ҆дѣ́ѧстесѧ мч҃нцы хрⷭ҇то́вы , и҆ ѻ҆ц҃а си́рыхъ сн҃ѡве бы́сте .= боⷢ҇ . М=но́гими грѣхѝ ѡ҆ѕло́бленꙋю дꙋ́шꙋ мᲂю̀ , бг҃ᲂрᲂди́тельнице дв҃о и҆сцѣлѝ , ꙗ҆́кѡ да во гласѣ́хъ бл҃гᲂдаре́нїѧ прилѣ́жнѡ всегда̀ сла́влю тѧ .

Дрꙋгі́и кано́нъ , честно́мꙋ и҆ вели́кᲂмꙋ прᲂро́кꙋ і҆ѡа́ннꙋ прⷣтчи . твᲂре́нїе і҆ѡ́сифᲂво . гла́съ , з҃ . і҆рмо́съ . Ма́нїемъ ти на зе́менъ ѻ҆́бразъ прелᲂжи́сѧ , пе́рвїе разлива́емᲂе вᲂдно́е є҆стество̀ гдⷭ҇и . тѣ́мже немо́кренно ше́ствᲂвавъ і҆и҃ль , пᲂе́тъ тебѣ̀ пѣ́снь пᲂбѣ́днꙋю . запѣ́въ : ст҃ы́и вели́кїи , і҆ѡа́нне прⷣтче гдⷭ҇нь , мᲂлѝ бг҃а ѡ҆ на́съ . Красᲂта̀ цр҃ко́внаѧ , ᲂу҆краше́нъ ꙗ҆ви́лсѧ є҆сѝ бл҃же́нне прⷣтче , є҆ѧ́же всегда̀ мл҃твами си спаса́й , ѿ всѧ́кїѧ бꙋ́ри є҆рети́чествꙋющихъ , крѣ́пкꙋ и҆ непᲂкᲂлѣби́мꙋ сᲂблюда́ѧ . Непᲂро́чно ѻ҆вча̀ твᲂрцꙋ̀ прине́слъсѧ є҆сѝ , закла́всѧ бжⷭ҇твеныи прⷣтче , ꙗ҆́кѡ а҆́гнецъ неѕло́бивъ . тѣ́мже вѣ́рᲂю тѝ зᲂвꙋ̀ . всѧ́кїѧ мѧ ѕло́бы вра́жїѧ и҆зба́ви . И҆сцѣлѝ тѣле́сныѧ и҆ дш҃ъ на́шихъ бᲂлѣ́зни , прⷭ҇нѡ сла́вныи прⷣтче , мᲂлѧ̀ всегда̀ сло́ва , всѣ́мъ недꙋ́ги и҆ бᲂлѣ́зни милᲂсе́рднѡ взе́мшаго .= боⷢ҇ . Р=ᲂдила̀ є҆сѝ всест҃а́ѧ непᲂстижи́мᲂе сло́во , пло́тїю по сᲂста́вꙋ на́мъ примѣси́вшагᲂсѧ . тᲂгѡ̀ всегда̀ мᲂлѝ спастѝ вѣ́рнѡ тебѐ прⷭ҇нѡ бл҃жа́щихъ .

пѣ́снь , г҃ . і҆рмо́съ . Оу҆тверже́и нб҃са̀ сло́вᲂмъ сѝ , и҆ земно́е ѡ҆снᲂва́нїе ᲂу҆крѣ́пль на вᲂда́хъ мно́гихъ , ᲂу҆твердѝ мо́й ᲂу҆́мъ , в̾ во́лю твᲂю̀ є҆ди́не млрⷭ҇де . И҆́же презира́ѧи чл҃кѡмъ грѣхѝ , мно́гагѡ ра́ди хрⷭ҇тѐ чл҃кᲂлю́бїѧ пре́зри є҆ди́не сп҃се мно́гаѧ мᲂѧ̀ ѕла́ѧ . да тѧ̀ сла́влю пребл҃га́го . Всегда̀ плᲂтьска́ѧ хᲂтѣ́нїѧ твᲂрю̀ , твᲂѧ́ же хᲂтѣ́нїѧ хрⷭ҇тѐ презрѣ́въ несмы́сленныи , и҆ бᲂю́сѧ пла́меннагѡ тᲂмле́нїѧ сло́ве , ѿ него́же мѧ̀ и҆зба́ви .= мⷱ҇ꙋ . Тѣле́снымъ бᲂлѣ́знемъ прїѡбща́ющесѧ страда́льцы , на небᲂлѣ́зненꙋю зрѧ́хꙋ жи́знь и҆ без̾печа́льнꙋю . є҆ѧ́же ᲂу҆лꙋчи́вше в̾ ра́дᲂсти , вѣ́рнымъ бᲂлѣ́зни прⷭ҇нѡ ѡ҆блегча́ютъ . мⷱ҇ꙋ . Зарѧ́ми по́двигъ стрⷭ҇тᲂно́сцы , пре́лести лю́тꙋю но́щь разрꙋши́сте , и҆ к̾ невече́рнемꙋ свѣ́тꙋ преи҆до́сте , на́шихъ бᲂлѣ́зней тмꙋ̀ при́снѡ ѿє́млюще . боⷢ҇ . Д=ве́рь бж҃їю прᲂви́дѣ тѧ̀ прⷪ҇ркъ , є҆ю́же са́мъ про́йде є҆ди́нъ ꙗ҆́кᲂже вѣ́сть , дв҃о пречⷭ҇таѧ . тѣ́мже мᲂлю́сѧ ти , пᲂкаѧ́нїѧ две́ри сама́ ми ѿве́рзи .

и҆́нъ , і҆рмо́съ . Въ нача́тцѣ нб҃са̀ всеси́льнымъ сло́вᲂмъ сѝ ᲂу҆тверже́и , гдⷭ҇и сп҃се , и҆ всетвᲂрѧ́щимъ дх҃ᲂмъ бж҃їимъ всю̀ си́лꙋ и҆́хъ , на недви́жимᲂмъ мѧ ка́мени и҆спᲂвѣ́данїѧ твᲂегѡ̀ ᲂу҆твердѝ . Сᲂлнечнᲂлꙋ́чными блиста́ньми всю̀ прᲂсвѣща́еши тва́рь . сл҃нца бо мы́сленагѡ ѕвѣзда̀ свѣ́тлаѧ ꙗ҆ви́лсѧ є҆сѝ прⷣтче . є҆го́же мᲂлѝ прилѣ́жнѡ , страсте́й тмꙋ̀ ѿгна́ти ѿ всебᲂлѣ́зненыхъ срⷣцъ на́шихъ . Зако́на и҆ бл҃гᲂда́ти стᲂѧ̀ пᲂсредѣ̀ бжⷭ҇твеныи прⷪ҇рче , пᲂказꙋ́ѧ всѣ́мъ ꙗ҆́вѣ , ѻ҆́вᲂмꙋ ᲂу҆́бѡ преста́ти , ѻ҆́вѣй же сїѧ́нїе быва́ющее чи́сто , ѡ҆бнᲂвле́нїе сᲂверше́но ѡ҆бетша́вшимъ грѣхѝ . Бѣсо́вскагѡ наше́ствїѧ , ѿ сᲂбла́знъ жите́йскихъ , и҆ ѿ всѧ́кїѧ ско́рби , на́съ и҆зба́ви вᲂпїе́мъ хрⷭ҇то́въ крⷭ҇тлю , ᲂу҆мᲂли́въ бл҃га́го , и҆ в̾ де́нь сꙋ́дныи мꙋче́нїѧ свᲂбᲂдѝ .= боⷢ҇ . Б=л҃гᲂслᲂве́наѧ ꙗ҆́же бг҃а неска́заннѡ ро́ждьшаѧ , съ бжⷭ҇твенымъ є҆гѡ̀ крⷭ҇тлемъ , мᲂлѝ тᲂгѡ̀ непреста́ннѡ влⷣчце ѡ҆ на́съ , в̾ напа́сти в̾па́дающихъ жите́йскїѧ , и҆ держи́мыѧ грѣхѝ .

пѣ́снь , д҃ . і҆рмо́съ . Плᲂтьско́е прише́ствїе твᲂѐ хрⷭ҇тѐ , и҆з̾вѣствꙋ́ѧ пррⷪ҇къ а҆ввакꙋ́мъ зва́ше , сла́ва си́лѣ твᲂе́й гдⷭ҇и . Оу҆страни́хсѧ ѿ пꙋтѝ , є҆́же к̾ жи́зни ведꙋ́ща мѧ и҆ въ ꙗ҆́мꙋ ѕлы́хъ в̾падо́хъ , сп҃се непре́зри менѐ . Сле́зныѧ ми то́ки низ̾пᲂслѝ влⷣко сло́ве бж҃їи , да ѿмы́ю мно́гихъ сᲂгрѣше́нїи мᲂи́хъ тимѣ́нїе .= мⷱ҇ꙋ . Привᲂди́ми ꙗ҆́кѡ а҆́гньцы к̾ закᲂле́нїю мч҃нцы , бᲂрца̀ врага̀ закала́хꙋ , сла́вѣ спᲂдᲂблѧ́еми . мⷱ҇ꙋ . И҆злива́емыѧ то́ки крᲂве́й всехва́льнїи , пᲂто́ки пи́щи ᲂу҆гᲂто́ваша ва́мъ , бжⷭ҇твенїи мч҃нцы . боⷢ҇ . В=ᲂплᲂти́сѧ ѿ крᲂве́й твᲂи́хъ чи́стыхъ гдⷭ҇ь , пᲂкаѧ́нїе чл҃кѡмъ да́рꙋѧ ѻ҆трᲂкᲂви́це , хᲂда́тайствᲂмъ тѝ .

и҆́нъ , і҆рмо́съ . Ѻ҆́ч҃а нѣ́дра не ѡ҆ста́вль , и҆ сᲂше́дъ на́ землю хрⷭ҇тѐ бж҃е , та́йнꙋ ᲂу҆слы́шахъ смᲂтре́нїѧ твᲂегѡ̀ , и҆ прᲂсла́вихъ тѧ чл҃кᲂлю́бче . Низ̾лᲂжи́въ пᲂлкѝ вра́жїѧ , и҆ мꙋ́жествᲂвавъ на ни́хъ свѣтлѣ́йше , во мнѣ̀ црⷭ҇твꙋющїи грѣ́хъ низ̾лᲂжѝ , мᲂлю́тисѧ крⷭ҇тлю мл҃твами сѝ . Свѣти́льникъ ꙗ҆́вльсѧ бл҃же́нне мы́сленыи . пᲂказа́лъ є҆сѝ чл҃кѡмъ і҆с҃а , пра́веднᲂе вели́кᲂе сл҃нце , и҆́мже ѡ҆зари́тисѧ срⷣца́мъ всѣ́хъ мᲂли́сѧ . Въ без̾зако́нїихъ заче́нсѧ и҆ рᲂди́хсѧ , живꙋ̀ в̾ лѣ́нᲂсти , и҆ бᲂю́сѧ та́мᲂшнихъ мꙋче́нїи , ѿ ни́хже мѧ и҆схи́ти крⷭ҇тлю бг҃а ᲂу҆мᲂли́въ . Мᲂле́нїѧ ѡ҆ на́съ тебѐ чтꙋ́щимъ крⷭ҇тлю бг҃ᲂви принᲂсѝ . ꙗ҆́кѡ да и҆зба́витъ на́съ ѿ всѧ́кᲂгѡ лю́тагѡ ѡ҆б̾стᲂѧ́нїѧ , и҆ бѣсо́вскагѡ вре́да , мо́лимсѧ .= боⷢ҇ . З=ако́на сѣ́ни , тебѐ мнᲂгᲂви́дно пᲂказа́ша ро́ждьшꙋю бг҃а . є҆го́же мᲂлѝ всенепᲂро́чнаѧ , всѧ́кᲂгѡ мѧ без̾зако́нїѧ и҆ страсте́й тѣле́сныхъ и҆зба́вити .

пѣ́снь , є҃ . і҆рмо́съ . Ѿгна́выи но́щь страстнꙋ́ю , вᲂз̾сїѧ́ ми свѣ́тъ разꙋ́мныи , и҆́же первᲂро́днꙋю тмꙋ̀ ѿгна́въ бе́здны , и҆ первᲂзда́нныи свѣ́тъ вᲂз̾сїѧ́выи ми́рꙋ сᲂдѣ́телю всѣ́хъ . И҆зба́ви мѧ сло́ве пра́ведныѧ твᲂеѧ̀ ꙗ҆́рᲂсти , є҆гда̀ сꙋ́диши землѝ , и҆ ѿ мно́гихъ сᲂгрѣше́нїи пᲂкаѧ́нїемъ ѡ҆чи́щь , хра́мъ мѧ̀ пᲂкажѝ твᲂеѧ̀ бл҃гᲂсти є҆ди́не сᲂдѣ́телю всѣ́хъ . Мно́гᲂю мгло́ю страсте́й ѡ҆слѣпи́хсѧ ᲂу҆мо́мъ , и҆ несвѣ́мъ что̀ дѣ́лаю ѡ҆нечꙋ́вствисѧ срⷣцемъ , ѡ҆брати́ мѧ хрⷭ҇тѐ , и҆ пᲂкаѧ́нїе мѝ да́ждь чисти́тельнᲂе скве́рнамъ .= мⷱ҇ꙋ . По́двигъ и҆спо́лнь по́та страда́льцы , те́кше ю҆́нᲂшески , къ нбⷭ҇нѣй свѣ́тлᲂсти дᲂидо́сте , пᲂбѣ́дныѧ по́чести ѿ живᲂнача́льныѧ рꙋкѝ прїе́мше , тѣ́мже ра́дꙋетесѧ ны́нѣ . мⷱ҇ꙋ . Крѣ́пкими жи́лами сщ҃е́нныхъ бᲂлѣ́зней ва́шихъ страда́льцы , задави́сте вᲂи́стинꙋ началᲂѕло́бнагѡ ѕмі́ѧ , и҆ ра́йскїѧ пи́щи спᲂдо́бистесѧ . тѣ́мже вᲂсхвалѧ́емъ ва́съ . боⷢ҇ . Ꙗ҆́=же сл҃нца ѻ҆́блаче свѣ́тлыи вᲂсїѧ́й ми свѣ́тъ мы́сленыи и҆́стиннагѡ пᲂкаѧ́нїѧ . и҆ ѿженѝ тмꙋ̀ лꙋка́выхъ пᲂмышле́нїи , да вѣ́рᲂю пᲂю́ тѧ ꙗ҆́кѡ спасе́нїе чл҃кѡмъ .

и҆́нъ , і҆рмо́съ . Гдⷭ҇и бж҃е мо́й , и҆́з̾ нᲂщи ᲂу҆́треннюѧ тебѣ́ сѧ мᲂлю̀ , пᲂда́ждь мѝ ѡ҆ставле́нїе прегрѣше́нїи мᲂи́хъ , и҆ ко свѣ́тꙋ твᲂи́хъ пᲂвелѣ́нїи , пꙋтѝ мᲂѧ̀ напра́ви мᲂлю́тисѧ . Прᲂзѧ́блъ є҆сѝ гла́съ вᲂпїю́щагѡ , в̾ пꙋсты́хъ пᲂмышле́нїи всемꙋ́дре , бж҃їѧ пᲂзна́нїѧ . тѣ́мже мᲂлю́ тѧ , дш҃ꙋ мᲂю̀ ѡ҆пꙋстѣ́вшꙋю всѧ́кимъ престꙋпле́нїемъ ѡ҆бнᲂвѝ . Честны́и влⷣцѣ сᲂсꙋ́дъ ꙗ҆влѧ́емъ бжⷭ҇твеныи прⷪ҇рче , нечи́стыхъ дѣѧ́нїи и҆зба́ви мѧ мл҃твами сѝ . и҆ че́сть ᲂу҆лꙋчи́ти вѣ́чнꙋю бл҃гᲂда́вца мᲂлѝ . Прибли́жишасѧ без̾зако́нїѧ на мѧ̀ вхо́дᲂмъ лѣ́нᲂсти , ѻ҆бразы̀ пᲂкаѧ́нїѧ мѧ бл҃же́нне прⷣтче ᲂу҆твердѝ , ꙗ҆́кѡ да ᲂу҆се́рднѡ пꙋтѝ гдⷭ҇нѧ ше́ствꙋю .= боⷢ҇ . О=у҆мертвѝ пло́ти мᲂеѧ̀ земна́ѧ мꙋдрᲂва́нїѧ , бцⷣе живо́тъ ро́ждьшаѧ , сме́ртїю сме́рть до кᲂнца̀ бжⷭ҇твенᲂю си́лᲂю прⷭ҇та́ѧ чⷭ҇таѧ пᲂтре́бльшагѡ .

пѣ́снь , ѕ҃ . і҆рмо́съ . Во глꙋбинꙋ̀ грѣхо́внꙋю впа́дсѧ бл҃же , ꙗ҆́кѡ і҆ѡ́на ѿ ки́та вᲂпїю́ ти , вᲂзведѝ ѿ тлѝ бж҃е живо́тъ мо́й , и҆ спаси́ мѧ чл҃кᲂлю́бче . Но́въ блꙋдни́къ ꙗ҆ви́хсѧ скве́рнѡ жи́въ на землѝ , и҆ сла́стнымъ стремле́нїемъ пᲂд̾клᲂни́хсѧ , ѡ҆брати́ мѧ гдⷭ҇и бж҃е мо́й , и҆ спаси́ мѧ ꙗ҆́кѡ чл҃кᲂлю́бецъ . Вᲂз̾стᲂнѝ ѽ дш҃е мᲂѧ̀ да и҆зба́вишисѧ стᲂна́нїѧ . прᲂслези́сѧ , ꙗ҆́кѡ да сле́зъ непреста́нныхъ непрїи́меши и҆скꙋ́са та́мѡ в̾ бᲂлѣ́зни , никꙋ́ю и҆мꙋ́щихъ по́льзы .= мⷱ҇ꙋ . Ꙗ҆ви́стесѧ ꙗ҆́кᲂже ка́менїе в̾ вѣнцѣ́хъ ꙗ҆́вѣ , хрⷭ҇то́вы цр҃кви вᲂдрꙋже́ни , и҆ ᲂу҆краше́нїе то́й лѣ́пᲂтно бы́сте , честні́и великᲂмч҃нцы . мⷱ҇ꙋ . Кᲂнчи́ны дᲂсто́йныѧ ᲂу҆лꙋчи́вше премꙋ́дрїи , без̾кᲂне́чнаѧ наслѣ́дᲂвасте вᲂз̾даѧ́нїѧ . тѣ́мже кᲂнчи́ны на́ша в̾ пᲂкаѧ́нїи бы́ти мч҃нцы мᲂли́тесѧ . боⷢ҇ . и҆з̾ =глꙋбины̀ лѣ́нᲂсти , и҆ без̾мѣ́рныхъ ѕѡ́лъ , вᲂз̾веди́ мѧ бл҃га́ѧ ꙗ҆́же бе́зднꙋ бл҃гᲂꙋтро́бїѧ ро́ждьши , и҆ и҆сто́чникъ ми сле́зъ прⷭ҇нѡ дв҃о да́рꙋй .

и҆́нъ , і҆рмо́съ . І҆ѡ́на и҆́з̾ чрева а҆́дᲂва вᲂпїѧ́ше , живо́тъ мо́й и҆з̾ и҆стлѣ́нїѧ свᲂбᲂдѝ , мы́ же тѝ вᲂпїе́мъ , всемᲂгі́и сп҃се пᲂми́лꙋй на́съ . Лꙋча́ми дᲂбрᲂдѣ́телей ꙗ҆́вѣ блиста́ѧ . и҆ свѣ́тлᲂстїю мꙋче́нїѧ сїѧ́ѧ , прᲂсвѣща́еши всю̀ тва́рь , мы́сленагѡ вᲂсто́ка дрꙋ́же бли́жнїи . Вᲂз̾ра́слъ є҆сѝ ѿ ста́рицы непло́дныѧ бл҃же́нне , тѣ́мже вᲂпїю́ ти , грѣхѝ мно́гими мѧ̀ сᲂстарѣ́вшагᲂсѧ , пᲂкаѧ́нїѧ дᲂбро́тами ѡ҆бнᲂвѝ мл҃твами сѝ . Свѣти́льниче свѣ́та невече́рнѧгѡ бжⷭ҇твеныи прᲂро́че , свѣ́щникъ ᲂу҆гаше́ныи мᲂеѧ̀ дш҃и , вᲂз̾жзѝ мл҃твами сѝ , и҆ свѣ́та бжⷭ҇твенагѡ прича́стника мѧ сᲂтвᲂрѝ .= боⷢ҇ . Ꙗ҆́=кѡ до́ждь сни́де сло́во во ᲂу҆тро́бꙋ твᲂю̀ пречⷭ҇таѧ дв҃о . є҆го́же мᲂлѝ , тече́нїѧ и҆з̾сꙋши́ти без̾мѣ́рныхъ мᲂи́хъ ѕѡ́лъ мᲂлю́тисѧ .

пѣ́снь , з҃ . і҆рмо́съ . Пе́щныхъ ѻ҆́трᲂкъ неприкᲂснꙋ́сѧ невредѝ и҆́хъ ѻ҆́гнь . тᲂгда̀ трїѐ ꙗ҆́кѡ є҆ди́нѣми ᲂу҆сты̀ пᲂѧ́хꙋ и҆ блгⷭ҇влѧ́хꙋ гл҃юще , блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ . Въ стра́сти бесче́стїѧ впа́дсѧ , скᲂтꙋ̀ ᲂу҆пᲂдо́бихсѧ сп҃се , пᲂмрачи́всѧ не зрю̀ терпѣ́нїе твᲂѐ , сло́ве дᲂлгᲂтерпѣли́внᲂе , ѡ҆браще́нїѧ ми вре́мѧ да́ждь и҆ спаси́ мѧ . Лѣ́нᲂстнѡ жи́знь мᲂю̀ скᲂнча́хъ , дѣ́ю ꙗ҆́же недᲂсто́итъ твᲂри́ти . и҆ сѐ нн҃ѣ про́чее а҆́дᲂвымъ врато́мъ приближа́юсѧ , непрїе́млѧ чꙋ́вства . непре́зри мѧ хрⷭ҇тѐ , ꙗ҆́кѡ є҆ди́нъ сы́и бл҃гъ .= мⷱ҇ꙋ . Вᲂжделѣ́вше жи́зни вѣ́чныѧ , ми́рᲂви ᲂу҆мертви́стесѧ премꙋ́дрїи . и҆ терпѣ́нїемъ ра́нъ раз̾ли́чныхъ , врага̀ ме́ртва пᲂказа́сте . бл҃гᲂслᲂвенъ бг҃ъ ᲂу҆крѣпи́выи ва́съ . мⷱ҇ꙋ . Разрѣши́вшесѧ ѿ нꙋ́жды тѣле́сныѧ , разᲂри́сте пре́лести вѧза́нїѧ , и҆ ко хрⷭ҇тꙋ̀ крѣ́пкᲂю любо́вїю мч҃нцы дꙋ́ши привѧза́сте , свѧза́вшемꙋсѧ пло́тїю , и҆ разрꙋши́вшꙋ клѧ́твꙋ . боⷢ҇ . С=ви́тᲂкъ но́въ прᲂро́къ тебѐ пред̾ви́дѣвъ , в̾ не́мже написа́сѧ сло́во ѻ҆́ч҃ее . тѣ́мже чи́стаѧ мᲂлю́сѧ , в̾ кни́зѣ мѧ живꙋ́щихъ написа́тисѧ спᲂдо́би , мно́гихъ мᲂи́хъ ѕѡ́лъ разᲂрѧ́ющи написа́нїе .

и҆́нъ , і҆рмо́съ . Пе́щь ѻ҆́трᲂцы ѻ҆гнепа́льнꙋ , дре́вле хла́дъ дѣ́ющꙋ пᲂказа́ша , є҆ди́нъ бг҃ъ пᲂю́ще и҆ глаго́люще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Да́ждь ми тꙋ́чи сле́зныѧ мл҃твами сѝ , ю҆́же бл҃гᲂꙋтро́бїѧ бе́зднꙋ , рѣчны́ми тече́ньми и҆змы́въ прⷣтче , и҆ всего́ мѧ ѡ҆чи́сти скве́рны пло́ти же и҆ дх҃а . Мᲂле́нїѧ принесѝ бл҃же́нне , и҆́же над̾ всѣ́ми бг҃ꙋ на́шемꙋ , ꙗ҆́кѡ да и҆ менѐ пᲂми́лꙋетъ ꙗ҆́кѡ милᲂсе́рдъ , мнᲂгᲂсᲂгрѣша́ющаго , и҆ вᲂз̾никнᲂве́нїѧ нн҃ѣ не и҆мꙋ́щаго . Непло́днаѧ дш҃е пᲂтщи́сѧ пᲂка́ѧтисѧ , да не ꙗ҆́кѡ смᲂко́вницꙋ тѧ̀ непло́днꙋю , бжⷭ҇твеныи сꙋ́дъ пᲂсѣче́тъ и҆́з̾кᲂрене . влⷣцѣ вᲂзᲂпі́й , бж҃е ѡ҆чи́стивъ и҆ спаси́ мѧ . боⷢ҇ . Оу҆мерщве́нꙋ дш҃ꙋ мᲂю̀ стѧжа́въ , ѕлы́ми престꙋпле́ньми , тебѣ̀ ᲂу҆мертви́вшꙋю а҆́да , ржⷭ҇тво́мъ сѝ мᲂлю́сѧ влⷣчце , пᲂкаѧ́нїѧ мѧ̀ ѻ҆бразы̀ ѡ҆живѝ .

пѣ́снь , и҃ . і҆рмо́съ . А҆́нг҃лъми немо́лчнѡ , въ вы́шнихъ сла́вимагѡ бг҃а , нб҃са̀ нб҃съ , землѧ̀ го́ры хо́лми и҆ глꙋбина̀ , и҆ ве́сь ро́дъ чл҃ческїи , хвала́ми є҆гѡ̀ ꙗ҆́кѡ твᲂрца̀ и҆ и҆зба́вителѧ бл҃гᲂслᲂви́те . Преи҆з̾ѡ҆би́льнѡ пита́всѧ вредѧ́щими сластьмѝ , ᲂу҆мᲂвре́днѡ несмы́сленыи а҆́зъ , преи҆до́хъ всѧ́кагѡ грѣ́шника , и҆мѣ́ѧи бл҃гᲂꙋтро́бїѧ премно́жество , пᲂда́ждь ми ѡ҆чище́нїе прегрѣше́нїемъ . Ны́нѣ при две́рехъ жени́хъ , свѣщꙋ̀ ᲂу҆красѝ дш҃е , ма́слᲂмъ напᲂи́мъ тꙋ̀ , млⷭ҇тынею и҆ всѧ́кими до́брыми дѣ́лы , пре́жде затвᲂре́нїѧ две́ремъ пᲂтщи́сѧ со хрⷭ҇то́мъ бы́ти , въ ра́дᲂсти не и҆зрече́ннѣй .= мⷱ҇ꙋ . Небᲂѧ́щесѧ мꙋ́къ до́блїи вᲂз̾глаша́хꙋ страда́льцы , сѐ бл҃гᲂпрїѧ́тно вре́мѧ , ста́немъ всѝ тве́рдымъ ᲂу҆мо́мъ , стѧ́жемъ ма́лыми бᲂлѣ́зньми , жи́знь небᲂлѣ́зненꙋю , и҆ пи́щꙋ нестарѣ́ющꙋюсѧ . мⷱ҇ꙋ . Вᲂда́ми бжⷭ҇твеными стрⷭ҇тᲂте́рпцы спа́сᲂвы , навᲂднѧ́еми при́снѡ , напᲂи́сте всю̀ зе́млю , пᲂдо́битисѧ пᲂд̾виго́мъ ва́шимъ , и҆ плᲂдᲂно́снꙋ тꙋ̀ дᲂбрᲂдѣ́тельми сᲂдѣ́лᲂвасте ѡ҆ хрⷭ҇тѣ̀ во́ вѣки . боⷢ҇ . Б=цⷣе крѣ́пкаѧ пред̾ста́тельница , и҆ наде́жде хрⷭ҇тїа́нѡмъ , в̾ де́нь стра́шныи пред̾ста́ни мѝ сᲂгрѣши́вшемꙋ мно́гѡ , и҆ и҆зба́ви гее́ны стра́шныѧ , и҆ ѻ҆вца́мъ мѧ̀ десны́мъ сᲂчета́й .

и҆́нъ , і҆рмо́съ . Є҆ди́нагѡ без̾нача́льнагѡ цр҃ѧ сла́вы , є҆го́же хва́лѧтъ нбⷭ҇ныѧ си́лы , и҆ трепе́щꙋтъ чи́ни а҆́нг҃льстїи , по́йте сщ҃е́ннїи , лю́дїе превᲂзнᲂси́те є҆гѡ̀ во́ вѣки . Сᲂꙋ́зъ разрѣши́тимисѧ мно́гихъ мѝ прегрѣше́нїи свѧза́вшагᲂсѧ , и҆ свѧ́занымъ разрѣше́нїе пᲂда́вшаго , ᲂу҆мᲂлѝ прⷪ҇рче , и҆ хᲂди́ти в̾ пꙋте́хъ ᲂу҆пра́ви к̾ пра́вдѣ ведꙋ́щимъ . Оу҆ѧзви́хсѧ сла́сти ѻ҆рꙋ́жїемъ , и҆ в̾ бᲂлѣ́зни серде́чнѣй зᲂвꙋ̀ прⷣтче , и҆сцѣлѝ дш҃и мᲂеѧ̀ бᲂлѣ́зни , хрⷭ҇та̀ ᲂу҆мᲂли́въ , є҆ди́нагѡ врача̀ дш҃а́мъ же и҆ тѣ́лᲂмъ . Рꙋко́ю сѝ прⷣтче , є҆го́же крⷭ҇ти́лъ є҆сѝ сло́ва , не ѡ҆скꙋдѣ́й мᲂли́ти непреста́ннѡ , и҆зба́вити мѧ̀ и҆з̾ рꙋкѝ грѣхо́вныѧ , сᲂгрѣши́вшаго мно́гѡ , и҆ смире́ннаго и҆ ѡ҆сꙋже́ннаго . Ꙗ҆́кѡ пᲂгребо́хъ въ землѝ неразꙋ́мно тала́нтъ , є҆го́же ѿ бг҃а прїѧ́хъ , ча́ю го́рькᲂе мꙋче́нїе . ѿ него́же крⷭ҇тлю и҆схи́ти мѧ мл҃твами сѝ вѣ́рнѡ мᲂлѧ́щагᲂсѧ ти .= боⷢ҇ . П=ребыла̀ є҆сѝ не ѡ҆пали́ма , прїе́мши во ᲂу҆тро́бѣ ѻ҆́гнь нестерпи́мыи дв҃о . тѣ́мже и҆схи́ти мѧ̀ ѿ ѻ҆гнѧ̀ негаси́магѡ , ѡ҆рᲂша́ющи мѧ ны́нѣ , при́снагѡ пᲂкаѧ́нїѧ предо́брыми ѻ҆бразы̀ .

та́же , пѣ́снь бцⷣѣ . вели́читъ дш҃а мᲂѧ̀ гдⷭ҇а .= и҆ =пᲂкло́ны до землѝ .

пѣ́снь , ѳ҃ . і҆рмо́съ . Без̾сѣ́меннагѡ ржⷭ҇тва̀ зача́тїе кто̀ ска́жетъ ѿ чл҃къ ; и҆ нетлѣ́ннагѡ ржⷭ҇тва̀ рᲂжде́нїю кто̀ не пᲂчꙋди́тсѧ ѿ земнᲂро́дныхъ ; тѣ́мже тѧ̀ всѧ̀ племена̀ земна́ѧ бцⷣе велича́емъ . Да наслѣ́димъ бꙋ́дꙋщаѧ бл҃га́ѧ , пла́чемъ вᲂз̾дыха́нїемъ ᲂу҆мо́лимъ хрⷭ҇та̀ , до́ндеже вре́мѧ и҆́мамы вѣ́рнїи , пᲂкаѧ́нїѧ и҆ мᲂле́нїѧ . Ꙗ҆́кѡ ханане́ѧ зᲂвꙋ́ ти пᲂми́лꙋй мѧ хрⷭ҇тѐ . ꙗ҆́кᲂже дре́вле пᲂнича́ющꙋю и҆спра́ви мѧ і҆с҃е . и҆ спаси́ мѧ ꙗ҆́кѡ петра̀ , грѣхмѝ пᲂгрꙋжа́емаго .= мⷱ҇ꙋ . Стѣснѧ́еми скᲂрбьмѝ , и҆ темни́цами же и҆ мꙋче́ньми , страстᲂно́сцы мч҃нцы , къ прᲂстра́нствꙋ ᲂу҆тѣше́нїѧ преи҆до́ша . ѿ тѣснᲂты̀ и҆ ѿ прегрѣше́нїи на́съ и҆збавлѧ́ютъ . мⷱ҇ꙋ . Землѧ̀ ᲂу҆́бѡ пᲂкры̀ ва́ша тѣлеса̀ ны́нѣ , нб҃о же держи́тъ дꙋ́си ст҃ы́ѧ . прⷭ҇нѡ прⷭ҇то́лꙋ пред̾стᲂѧ́ще сла́вы , со а҆́нг҃лы ра́дꙋющесѧ . боⷢ҇ . Ѻ҆=бо́лксѧ в̾ мѧ̀ гдⷭ҇ь и҆з̾ тебѐ про́йде пречⷭ҇таѧ , тᲂгѡ̀ ᲂу҆́бѡ мᲂлѝ дв҃о , ѻ҆де́ждею мѧ̀ свѣ́та ᲂу҆ѧсни́ти , сᲂвле́кши страсте́й мᲂи́хъ вре́тище тѧ́жкᲂе .

и҆́нъ , і҆рмо́съ . Нетлѣ́нїѧ и҆скꙋше́нїемъ ро́ждьшаѧ , и҆ всехитрецꙋ̀ сло́вꙋ пло́ть взаимда́вшаѧ , мт҃и без̾мꙋ́жнаѧ дв҃о бцⷣе , прїѧ́телище непᲂстᲂѧ́ннагѡ селѡ̀ невмѣсти́магѡ , зижди́телѧ свᲂегѡ̀ тѧ̀ велича́емъ . Ѿ сщ҃е́ннаго ко́рене прⷪ҇рче и҆з̾ра́слъ є҆сѝ . и҆ ѕло́бы кᲂре́нїе всѐ и҆сто́рглъ є҆сѝ , и҆́ми же пᲂдавлѧ́ема и҆ пᲂкрыва́ема пᲂсѣти́ мѧ бл҃же́нне , и҆ сѣ́мѧ пᲂкаѧ́нїѧ вᲂз̾раща́ти плᲂды̀ ᲂу҆пра́ви мѧ . Краснѣ́йшꙋ го́рлицꙋ , и҆ сла́вїѧ тѧ̀ , цр҃кви зна́етъ вели́кїи прⷣтче . пᲂкаѧ́нїѧ бо вᲂз̾гласи́лъ є҆сѝ пѣ́снь , дш҃а́мъ ѡ҆пꙋстѣ́вшимъ , и҆ ѕлы́ми ѡ҆лѧденѣ́вшимъ . тѣ́мже вѣ́рᲂю тѧ̀ ᲂу҆блажа́емъ . Ты̀ пꙋтѝ ведꙋ́щїѧ , ко спасе́нїѧ вхо́дꙋ всѣ́мъ пᲂказа́лъ є҆сѝ сла́вныи прⷣтче . и҆́ми же хᲂди́ти мѧ ᲂу҆крѣпѝ , всѣ́ми житїѧ̀ без̾ пꙋ́тїи заблꙋ́ждьщаго ле́стїю , и҆́же пре́лесть сᲂдѣ́лавшаго . Стра́шныи де́нь ко две́ремъ прибли́жисѧ , и҆ ѡ҆сꙋжде́нїю дѣ́ла и҆мы́и рыда́ю . гдⷭ҇и гдⷭ҇и , є҆ди́не млⷭ҇тиве , мл҃твами твᲂегѡ̀ прⷣтчи и҆ всѣ́хъ ст҃ы́хъ , не ѡ҆сꙋжде́на тᲂгда̀ ꙗ҆ви́ мѧ .= боⷢ҇ . С=вѣ́тъ ро́ждьшаѧ бжⷭ҇твеныи бг҃ᲂра́дᲂваннаѧ , пᲂмраче́нꙋю престꙋпле́ньми дш҃ꙋ мᲂю̀ , прᲂсвѣтѝ мᲂлю́сѧ . и҆ тмы̀ вѣ́чныѧ свᲂбо́дна мѧ̀ ꙗ҆вѝ , ꙗ҆́кѡ да велича́ю тѧ и҆ сла́влю приснᲂбл҃же́ннꙋю .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стихѣ́ры , пᲂкаѧ́нны . гла́съ , з҃ . Ꙗ҆́кѡ непло́днꙋю смᲂко́вницꙋ сп҃се , непᲂсѣцы̀ менѐ грѣ́шнагѡ , но на мно́га лѣ́та пᲂжда́нїе ми да́рꙋй , напаѧ́ѧ дш҃ꙋ мᲂю̀ слеза́ми пᲂкаѧ́нїѧ , да пло́дъ принесꙋ́ ти млⷭ҇тиве .

сти́хъ : и҆спо́лнихᲂмсѧ за ᲂу҆́тра . Ꙗ҆́кѡ сл҃нце сы́и пра́веднᲂе , прᲂсвѣтѝ срⷣца̀ тебѐ пᲂю́щихъ , гдⷭ҇и сла́ва тебѣ̀ .

сти́хъ : и҆ бꙋ́ди свѣ́тлᲂсть . мⷱ҇ꙋ . Пᲂсредѣ̀ сꙋди́ща закᲂнᲂпрестꙋ́пныхъ , ра́дꙋющесѧ вᲂпїѧ́хꙋ страстᲂте́рпцы твᲂѝ , гдⷭ҇и сла́ва тебѣ̀ .

сла́ва , и҆ ны́нѣ , боⷢ҇ . Свѣ́тъ хрⷭ҇тѐ вᲂсїѧ́лъ є҆сѝ ѿ дв҃ы , и҆ прᲂсвѣти́лъ є҆сѝ ро́дъ чл҃ческїи , гдⷭ҇и сла́ва тебѣ̀ .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= є҆ктенїѧ̀ . =та́же , ча́съ , а҃ . ѱалмы̀ , ѡ҆бы́чны . и҆ про́чее , и҆ кᲂне́чныи ѿпꙋ́стъ .

Во вто́рникъ , бл҃же́нны . гла́съ , з҃ .

Красе́нъ бѣ̀ и҆ до́бръ въ снѣ́дь , и҆́же менѐ ᲂу҆мертви́выи пло́дъ , хрⷭ҇то́съ є҆́сть дре́во живо́тнᲂе , ѿ него́ же ꙗ҆ды́и не ᲂу҆мира́ю . но вᲂпїю̀ с̾ разбо́йникᲂмъ , пᲂмѧни́ мѧ сп҃се во црⷭ҇твїи сѝ .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Стрꙋ́пы мᲂегѡ̀ срⷣца не и҆сцѣ́льныѧ , и҆сцѣлѝ ще́дре , ꙗ҆́кѡ вра́чь дш҃а́мъ же и҆ тѣ́лᲂмъ , и҆ хᲂди́ти ми пра́вѡ всегда̀ вᲂспасе́ныѧ пꙋтѝ ᲂу҆пра́ви гдⷭ҇и .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Пред̾текі́и пра́веднᲂмꙋ сл҃нцꙋ хрⷭ҇то́въ крⷭ҇тлю , свѣти́льникъ дш҃и мᲂеѧ̀ ᲂу҆гаше́ныи , мно́гᲂю ѕло́бᲂю , вᲂз̾жзѝ бжⷭ҇твеными мл҃твами сѝ , ꙗ҆́кѡ да ᲂу҆блажа́ю тѧ всегда̀ спаса́емь .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Пᲂстрада́вше и҆ вѣнча́ни бы́вше , врага̀ пᲂсрами́сте , и҆ ны́нѣ живетѐ на́ нб҃сѣхъ , свѣ́та не и҆змѣ́ннагѡ и҆спᲂлнѧ́еми мꙋ́дрїи мч҃нцы , мᲂлѧ́щесѧ ѡ҆ дш҃а́хъ на́шихъ .

сла́ва . Оу҆врачꙋ́й дш҃и мᲂеѧ̀ стра́сти мнᲂгᲂлѣ́тныѧ , бжⷭ҇твенаѧ трⷪ҇це , пᲂдаю́щи ми бл҃гᲂда́ть и҆ ѡ҆чище́нїе , твᲂегѡ̀ ра́ди прⷣтчи и҆ вѣ́чныи живо́тъ , ꙗ҆́кѡ да велича́ю твᲂю̀ бес̾чи́сленꙋю ми́лᲂсть .

и҆ ны́нѣ . Вмѣсти́ла є҆сѝ нетѣ́снѡ , мѣ́стно во́ чрево невмѣсти́маго . є҆го́же всегда̀ мᲂлѝ мт҃и чⷭ҇таѧ , тѣснᲂты̀ всѧ́кїѧ и҆ страсте́й наведе́нїѧ , и҆зба́витисѧ рабо́мъ твᲂи́мъ , любо́вїю тѧ̀ хва́лѧщимъ .

<< Previous

Contents

Next >>