Глас 7 суббота

Въ пѧто́къ , ве́черъ . на́ гдⷭ҇и вᲂзва́хъ , стихѣ́ры . ст҃ы́мъ мч҃нкѡмъ , и҆ ст҃лемъ , и҆ прпⷣбнымъ . гла́съ , з҃ . =запѣ́въ : ꙗ҆́кѡ ѿ тебѐ ѡ҆чище́нїе є҆́сть . М=ч҃нцы тмꙋ̀ без̾бо́жїѧ прᲂгна́ша , всѣ́мъ пᲂказа́вше чл҃кѡмъ бг҃ᲂразꙋ́мїѧ свѣ́тъ .

Оу҆че́нїи правᲂсла́вными , бжⷭ҇твеными зарѧ́ми ѡ҆сїѧ́сте гдⷭ҇ню цр҃кᲂвь , па́стырїе всемꙋ́дрїи .= Б=ѣсѡ́мъ сᲂкрꙋши́сте сѣ́ти , вᲂдвᲂрѧ́еми въ пꙋсты́нѧхъ непрᲂхо́дныхъ при́снѡ , ѻ҆ц҃ы препᲂдо́бнїи .

и҆́ны , стⷯры , мч҃нчны . гла́съ , то́йже . =запѣ́въ : ѿ всѣ́хъ без̾зако́нїи є҆гѡ̀ . Сла́ва тебѣ̀ хрⷭ҇тѐ бж҃е , а҆пⷭ҇лѡмъ пᲂхвала̀ , и҆ мч҃нкѡмъ весе́лїе , и҆́хже про́пᲂвѣдь трⷪ҇ца є҆динᲂсꙋ́щнаѧ . два́жды . Ст҃і́и мч҃нцы и҆́же до́брѣ страда́вше , и҆ вѣнча́ни бы́вше , мᲂли́тесѧ ко́ гдⷭ҇ꙋ пᲂми́лᲂватисѧ дш҃а́мъ на́шимъ . =сла́ва , и҆ ны́нѣ , боⷢ҇ . Мт҃и ᲂу҆́бѡ пᲂзна́сѧ па́че є҆стества̀ бцⷣе . пребы́сть же дв҃ᲂю па́че сло́ва и҆ ра́зꙋма . и҆ чꙋдесѐ ржⷭ҇тва̀ твᲂегѡ̀ сказа́ти ꙗ҆зы́къ немо́жетъ , пресла́внꙋ бо сꙋ́щꙋ зача́тїю тѝ чи́стаѧ , непᲂсти́женъ є҆́сть ѻ҆́бразъ рᲂжде́нїѧ . и҆дѣ́же бо хо́щетъ бг҃ъ , пᲂбѣжда́етсѧ є҆стества̀ чи́нъ . тѣ́мже тѧ̀ всѝ мт҃рь бж҃їю свѣ́дꙋще , мо́лимтисѧ прилѣ́жнѡ , мᲂлѝ спасти́сѧ дш҃а́мъ на́шимъ .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стихѣ́ры , мч҃нчны . гла́съ , з҃ . Неради́вше ѡ҆ всѣ́хъ земны́хъ ст҃і́и мч҃нцы , и҆ на сꙋди́щи хрⷭ҇та̀ мꙋ́жески прᲂпᲂвѣ́давше , вᲂз̾даѧ́нїе мꙋ́камъ ѿ негѡ̀ прїѧ́сте . но ꙗ҆́кѡ и҆мꙋ́ще дерзнᲂве́нїе , тᲂгѡ̀ мᲂли́те ꙗ҆́кѡ бг҃а всеси́льна , дш҃а на́ша спастѝ прибѣга́ющїѧ к̾ ва́мъ мо́лимсѧ . Всехва́льнїи мч҃нцы ѻ҆вча́та дх҃о́внаѧ , всесᲂжже́нїѧ слᲂве́снаѧ , же́ртва прїѧ́тна бл҃гᲂꙋго́дна бг҃ꙋ , ва́съ ни землѧ̀ пᲂтаи́ла є҆́сть , но нб҃о прїѧ́тъ вы̀ , а҆́нг҃лѡмъ с̾ прича́стницы бы́сте . с̾ ни́ми же мᲂли́те мо́лимъ вы̀ , сп҃са и҆ бг҃а на́шегѡ , ᲂу҆мири́ти ми́ръ и҆ спастѝ дш҃а на́ша . пᲂко́инъ . По ѻ҆́бразꙋ свᲂемꙋ̀ и҆ пᲂпᲂдо́бїю , сᲂзда́выи гдⷭ҇и и҆спе́рва чл҃ка , и҆ в̾ раѝ пᲂста́вилъ є҆сѝ владѣ́ти твᲂи́ми твᲂре́нїи , за́вистїю же дїа́вᲂлею прельще́нъ бы́въ и҆ ꙗ҆́ди причасти́сѧ , запᲂвѣде́й твᲂи́хъ престꙋ́пникъ бы́въ . тѣ́мже па́ки в̾ зе́млю ѿ неѧ́же взѧ́тъ бы́сть , ѡ҆сꙋдѝ є҆гѡ̀ вᲂз̾врати́тисѧ , прᲂсти́въ ᲂу҆пᲂко́й . пᲂко́инъ . Пᲂко́й сп҃се на́шъ жизнᲂда́вче , ꙗ҆́же преста́вилъ є҆сѝ бра́тїю на́шꙋ ѿ вре́менныхъ зᲂвꙋ́щихъ , гдⷭ҇и сла́ва тебѣ̀ . сла́ва , и҆ ны́нѣ , боⷢ҇ . Ꙗ҆́же є҆ди́на невмѣсти́маго прїе́мши , и҆ ро́ждьши бг҃а сло́ва вᲂплᲂще́нна , мᲂлѝ спасти́сѧ дш҃а́мъ на́шимъ .

таⷤ , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , боⷢ҇ , вᲂскрⷭ҇нъ , настᲂѧ́щаго гла́са . є҆ктенїѧ̀ . =и҆ ѿпꙋ́стъ .

Впѧто́къ , на па́вечерницѣ . кано́нъ , прест҃ѣ́й бцⷣѣ . гла́съ , з҃ . пѣ́снь , а҃ . і҆рмо́съ . Ма́нїемъ ти на зе́менъ ѻ҆́бразъ прелᲂжи́сѧ , пе́рвїе разлива́емᲂе вᲂдно́е є҆стество̀ гдⷭ҇и . тѣ́мже немо́кренно ше́ствᲂвавъ і҆и҃ль , пᲂе́тъ тебѣ̀ пѣ́снь пᲂбѣ́днꙋю . запѣ́въ : прест҃а́ѧ гжⷭ҇е бцⷣе спасѝ на́съ . Влⷣчце бцⷣе и҆́же на тѧ̀ , ᲂу҆пᲂва́нїе и҆мꙋ́щїѧ , и҆ к̾ тебѣ̀ притека́ющїѧ , бѣ́дъ же и҆ скᲂрбе́й и҆зба́ви , и҆ паде́нїѧ , и҆ вѣ́чнаго пла́мене и҆ мꙋ́ки . Рᲂсо́ю млрⷭ҇дїѧ твᲂегѡ̀ дв҃о чⷭ҇таѧ , пла́мень пᲂгасѝ мᲂи́хъ паде́нїи , ꙗ҆́кѡ да не ко и҆скꙋше́нїю прїидꙋ̀ всѧ́кᲂгѡ ѡ҆сꙋже́нїѧ , и҆ ѻ҆гнѧ̀ бꙋ́дꙋщагѡ . сла́ва . Ѡ҆дᲂжди́ ми дв҃це ка́пли твᲂегѡ̀ млрⷭ҇дїѧ , сласте́й зно́емъ всегда̀ и҆з̾сꙋша́емꙋ , ꙗ҆́кѡ да непреста́ннѡ сла́влю и҆́же ѿ тебѐ ро́ждьшагᲂсѧ , бг҃а и҆ сп҃са на́шегѡ .= и҆ ны́нѣ . В=ᲂдо́ю напо́й твᲂеѧ̀ мл҃твы дв҃о , дш҃ꙋ мᲂю̀ разгᲂрѣ́вшꙋюсѧ печа́льнымъ зно́емъ , ꙗ҆́кѡ да бжⷭ҇твенагѡ весе́лїѧ , и҆́же ѿ тебѐ ро́ждьшемꙋсѧ плᲂды̀ принесꙋ̀ .

пѣ́снь , г҃ . і҆рмо́съ . Въ нача́тцѣ небеса̀ всеси́льнымъ сло́вᲂмъ сѝ ᲂу҆тверже́и , гдⷭ҇и сп҃се , и҆ всетвᲂрѧ́щимъ дх҃ᲂмъ бж҃їимъ всю̀ си́лꙋ и҆́хъ , на недви́жимᲂмъ мѧ ка́мени и҆спᲂвѣ́данїѧ твᲂегѡ̀ ᲂу҆твердѝ . Тѧ̀ мᲂлю̀ дв҃о , пᲂда́ти спасе́нїе дш҃и мᲂе́й , и҆ ѡ҆чище́нїе пᲂда́ждь є҆́й , бл҃гᲂда́ть незави́стнꙋ , ꙗ҆́кѡ си́льна и҆ бл҃га , и҆ ꙗ҆́кѡ чл҃кᲂлюби́ва ѻ҆трᲂкᲂви́ца . и҆ жи́зни нетлѣ́ннѣй спᲂдо́би . Нело́жнᲂе спасе́нїе и҆ пред̾ста́тельнице ми́рꙋ , ро́ждьшаѧ зижди́телѧ чⷭ҇таѧ дв҃о , ѿ бѣ́дъ и҆зба́ви вᲂспѣва́ющихъ тѧ̀ вѣ́рнѡ , и҆ напа́стей житїѧ̀ и҆ вѣ́чнагѡ ѡ҆сꙋжде́нїѧ .= сла́ва . Мо́лимсѧ прилѣ́жнѡ щедро́тамъ твᲂи́мъ ѻ҆трᲂкᲂви́це , непре́зри рабы̀ смире́ныѧ . но ꙗ҆́кѡ бл҃га́ѧ млⷭ҇тивнымъ сѝ ѻ҆́кᲂмъ при́зри , и҆ тᲂми́тельства нерѣши́магѡ дїа́вᲂлѧ на́съ и҆зба́ви . и҆ ны́нѣ . Н=ы́нѣ зѣ́льствᲂмъ печа́ли ѡ҆бъѧ́тъ є҆́смь дв҃о , крѣ́пᲂсть всю̀ раз̾сла́бивъ , и҆ ве́сь на землѝ ни́цъ лежꙋ̀ . но вᲂпїю́ ти ѿ дш҃и , ты̀ вᲂз̾дви́гни мѧ па́ки и҆ ᲂу҆тѣше́нїемъ сѝ ᲂу҆крѣпѝ .

пѣ́снь , д҃ . і҆рмо́съ . Ѻ҆́ч҃а нѣ́дра не ѡ҆ста́вль , и҆ сᲂше́дъ на́ землю хрⷭ҇тѐ бж҃е , та́йнꙋ ᲂу҆слы́шахъ смᲂтре́нїѧ твᲂегѡ̀ , и҆ прᲂсла́вихъ тѧ чл҃кᲂлю́бче . Мт҃и бж҃їѧ и҆зба́ви мѧ ѿ тлѝ , и҆ льсти́вагѡ тᲂми́телѧ ѕмі́ѧ , при́снѡ мѧ ѡ҆б̾хᲂдѧ́ща и҆ запина́юща , ꙗ҆́же по́ бз҃ѣ стᲂпы̀ мᲂѧ̀ . Мы́сленаѧ две́ри жи́зни , пᲂкаѧ́нїѧ ми две́ри ѿве́рзи . ꙗ҆́кѡ ны́нѣ ко ѿча́ѧннымъ две́ремъ прибли́жихсѧ ѻ҆каѧ́нныи , ѿ мно́гихъ сᲂгрѣше́нїи .= сла́ва . Ка́лъ страсте́й , и҆ сласте́й ѿтрѧ́сши до́брѣ , млрⷭ҇дїемъ сѝ прест҃а́ѧ чи́ста пᲂкажѝ , и҆ ѻ҆де́жею ѡ҆блецы́ мѧ свѣтᲂви́днᲂю бл҃гᲂда́ти . и҆ нн҃ѣ . С=кве́рнꙋ дш҃и , и҆ нечистᲂтꙋ̀ тѣлесѐ мᲂегѡ̀ , ѡ҆чи́стивши чи́стаѧ бл҃гᲂпрїѧ́тными мᲂльба́ми ти , чи́ста пред̾ста́ви , вᲂспѣва́ти прⷭ҇нѡ тебѐ и҆ сла́вити .

пѣ́снь , є҃ . і҆рмо́съ . Но́щь несвѣтла̀ невѣ́рнымъ , вѣ́рнымъ же прᲂсвѣще́нїе в̾ пи́щи слᲂве́съ твᲂи́хъ , и҆ сегѡ̀ ра́ди к̾ тебѣ̀ ᲂу҆́треннюю , и҆ вᲂспѣва́ю твᲂѐ бжⷭ҇тво̀ . Пребл҃га́го сло́ва , дв҃о всенепᲂро́чнаѧ мᲂлѝ спасти́сѧ на́мъ . и҆́бо застꙋ́пницꙋ тѧ̀ стѧжа́хᲂмъ , и҆ в̾ нꙋ́жахъ по́мᲂщь крѣ́пкꙋ . Непреда́ждь враго́мъ мѧ чⷭ҇таѧ , мᲂю̀ па́гꙋбꙋ ѕѣлѡ̀ и҆́щꙋщимъ , грѣ́хъ мᲂи́хъ ра́ди . но млрⷭ҇дїемъ сѝ ѿ си́хъ вре́да и҆схи́ти .= сла́ва . Вѣ́дꙋще тѧ̀ бг҃а всѣ́хъ хрⷭ҇тѐ и҆ всѣ́хъ твᲂрца̀ , на тѧ̀ є҆ди́нагѡ вᲂз̾лᲂжи́хᲂмъ спасе́нїѧ ᲂу҆пᲂва́нїе , и҆́же на́съ ра́ди вᲂчл҃чьшагᲂсѧ . и҆ нн҃ѣ . Р=а́дꙋисѧ ѻ҆́блаче чⷭ҇таѧ , во́дꙋ живо́тнꙋ и҆стᲂча́ющи . ра́дꙋисѧ дв҃о мч҃нкѡмъ ᲂу҆тверже́нїе и҆ а҆пⷭ҇лѡмъ . ра́дꙋисѧ честно́е славᲂсло́вїе пренепᲂро́чнаѧ .

пѣ́снь , ѕ҃ . і҆рмо́съ . Пла́вающагѡ въ мᲂлвѣ̀ жите́йскихъ сꙋ́етїи , и҆ съ кᲂрабле́мъ пᲂтᲂплѧ́ема грѣхѝ , и҆ дш҃етлѣ́ннꙋ звѣ́рю примѣта́ема , ꙗ҆́кѡ і҆ѡ́на хрⷭ҇тѐ вᲂпїю́ ти , ѿ сме́ртныѧ глꙋбины̀ вᲂз̾веди́ мѧ . Бл҃гᲂлѣ́пїѧ и҆ красᲂты̀ дᲂбро́тꙋ пᲂгꙋби́хъ влⷣчце , ю҆́же и҆мѣ́хъ креще́нїемъ , дѣ́ѧ непᲂдо́бнаѧ . ты́ же те́плымъ сѝ пред̾ста́тельствᲂмъ сїю̀ пᲂда́ждь , вѣ́рнѡ чтꙋ́щимъ тѧ̀ . Страда́нїѧ и҆ ѡ҆держа́нїѧ нꙋ́жнагѡ , и҆ печа́ли , и҆зба́ви мѧ бцⷣе , ᲂу҆тѣше́нїе ми свᲂѐ пᲂдава́ющи . и҆ны́ѧ бо не и҆́мамъ застꙋ́пницы , ра́звѣ тебѐ всенепᲂро́чнаѧ , а҆́зъ ра́бъ тво́й .= сла́ва . И҆зба́вителѧ ро́ждьшаѧ , бл҃гᲂда́телѧ и҆ сп҃са , крѣ́пᲂсть и҆́маши и҆ мо́жеши , є҆ли́кѡ хо́щеши твᲂри́ти пренепᲂро́чнаѧ . тѣ́мже тѧ мо́лимъ твᲂѝ рабѝ , и҆зба́ви на́съ страстны́ѧ мо́лвы . и҆ ны́нѣ . Т=ѧ̀ ѻ҆́блакъ лего́къ дре́вле ᲂу҆зрѣ̀ , прᲂсщ҃а́емь дх҃ѡмъ прⷪ҇ркъ и҆са́їѧ . на не́мже сѣ́де сла́вы гдⷭ҇ь , прїи́де и҆ низ̾лᲂжѝ є҆ги́петскїѧ всѧ̀ и҆стꙋка́нныѧ , дв҃о мт҃и пречⷭ҇таѧ .

Гдⷭ҇и пᲂми́лꙋй , гⷤ . сла́ва , и҆ ны́нѣ . сѣда́ленъ , гла́съ , з҃ . И҆зба́ви ѻ҆гнѧ̀ вѣ́чнꙋющагѡ , пᲂклᲂнѧ́ющихсѧ ржⷭ҇твꙋ̀ твᲂемꙋ̀ . тѧ́ бо хрⷭ҇то́съ пᲂказа̀ застꙋ́пницꙋ на́мъ пᲂю́щимъ тѧ̀ .

пѣ́снь , з҃ . і҆рмо́съ . Пе́щь ѻ҆́трᲂцы ѻ҆гнепа́льнꙋ , дре́вле хла́дъ дѣ́ющꙋ пᲂказа́ша , є҆ди́нъ бг҃ъ пᲂю́ще и҆ глаго́люще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Грѣхо́въ ѡ҆держи́тъ мѧ̀ мно́жество , и҆ к̾ тлѣ́нїю низ̾во́дитъ мѧ̀ па́гꙋбы и҆ ѿча́ѧнїѧ , бцⷣе пред̾варѝ и҆ пᲂда́ждь ми по́мᲂщь спасе́нꙋю . И҆зба́ви мѧ̀ всѧ́кᲂгѡ вра́жїѧ ѕлᲂдѣ́йства и҆ и҆скꙋше́нїѧ и҆ ско́рби , и҆ в̾ тишинѣ̀ и҆ ми́рѣ сᲂхранѝ дш҃ꙋ мᲂю̀ пречⷭ҇таѧ , ꙗ҆́кѡ да ра́дꙋѧсѧ пᲂю̀ си́лꙋ твᲂю̀ .= сла́ва . Ѻ҆сꙋжде́нїе прᲂви́дѧ дѣ́лᲂмъ мᲂи́мъ лꙋка́вымъ ѻ҆каѧ́нныи , взыва́ю ти и҆з̾ глꙋбины̀ срⷣца мᲂегѡ̀ пречⷭ҇таѧ . ты́ ми бꙋ́ди влⷣчце застꙋпле́нїе и҆ спаси́ мѧ . и҆ ны́нѣ . С=ъ мч҃нки , со а҆́нг҃лы , и҆ со а҆пⷭ҇лы всенепᲂро́чнаѧ , свᲂегѡ̀ сн҃а и҆ гдⷭ҇а мᲂлѝ , спастѝ рабы̀ твᲂѧ̀ , ѿ напа́стей и҆ бѣ́дъ и҆ печа́лей .

пѣ́снь , и҃ . і҆рмо́съ . Сꙋ́щимъ в̾ пещѝ ѻ҆трᲂко́мъ пᲂдо́бѧщесѧ , дх҃о́внꙋю ро́сꙋ прїи́мше вѣ́рᲂю вᲂпїе́мъ , бл҃гᲂслᲂви́те дѣ́ла гдⷭ҇нѧ гдⷭ҇а . Бꙋ́ди ми по́мᲂщь дв҃о прест҃а́ѧ к̾ тебѣ̀ прибѣга́ющемꙋ , и҆ вᲂпїю́щемꙋ с̾ вѣ́рᲂю пᲂми́лꙋй чⷭ҇таѧ . и҆ пре́жде кᲂнца̀ ѡ҆чище́нїе сᲂгрѣше́нїи да́ждь ми . и҆ в̾ ча́съ кᲂнчи́ны пᲂда́й спасе́нїе , и҆ по кᲂнчи́нѣ пᲂко́й да́рꙋй . Оу҆́жасъ ѡ҆держи́тъ мѧ лю́тъ , пᲂмышлѧ́юща стра́шнᲂе и҆спыта́нїе , и҆ сꙋдїю̀ не ᲂу҆мᲂли́маго сᲂдѣ́ѧвшимъ лꙋка́ваѧ , ꙗ҆́же вᲂи́стинꙋ а҆́зъ ѻ҆каѧ́нныи сᲂдѣ́ѧхъ , и҆ мꙋ́ки ѻ҆́ныѧ кᲂнца̀ не и҆мꙋ́щїѧ , влⷣчце ми́рꙋ бꙋ́ди ми спасе́нїе .= сла́ва . Ꙗ҆́же земленᲂро́днымъ вино́вна спасе́нїю , и҆ вѣ́рнымъ пᲂбо́рнице , грѣ́шникѡмъ ѡ҆чище́нїе , ѽ и҆сто́чниче всегѡ̀ дᲂбра̀ , и҆ пᲂда́телю бл҃ги́мъ , бг҃ᲂрᲂди́тельнице чⷭ҇таѧ , ты́ ми дш҃е́внаѧ бᲂлѣ́зни и҆сцѣлѝ , и҆ и҆стᲂчѝ бл҃гᲂда́ть вѣ́чнꙋю , и҆ сла́вꙋ и҆ весе́лїе . и҆ ны́нѣ . Д=а́ръ ѿ на́съ ꙗ҆́же дана̀ є҆сѝ влⷣцѣ , ꙗ҆́кѡ ѿ нача́ла є҆стества̀ , мᲂльбы̀ на́ша пречⷭ҇таѧ прїимѝ , да́ры красны̀ вᲂз̾даю́щи на́мъ твᲂю̀ по́мᲂщь , ꙗ҆́кѡ да непреста́ннѡ и҆з̾ тебѐ ро́ждьшагᲂсѧ пᲂе́мъ и҆ превᲂзно́симъ во́ вѣки .

пѣ́снь , ѳ҃ . і҆рмо́съ . Мт҃и бг҃ꙋ и҆ дв҃а , ражда́ющи и҆ дв҃ствꙋющи па́ки , не є҆сте́ственно дѣ́ло , но бж҃їе схᲂжде́нїе , тѣ́мъ ꙗ҆́кѡ є҆ди́нꙋ , бж҃їихъ чꙋде́съ спᲂдо́бльшꙋюсѧ при́снѡ велича́емъ . Пᲂд̾ тво́й кро́въ дв҃о ны́нѣ прибѣго́хъ , ѿ мно́жества прегрѣше́нїи ѡ҆бꙋрева́ема , и҆ пᲂгиба́ющаго спаси́ мѧ , ꙗ҆́же сп҃са и҆ зижди́телѧ ро́ждьши , и҆ вѣ́чнагѡ и҆зба́ви ѡ҆сꙋжде́нїѧ . Твᲂрца̀ бг҃а и҆ гдⷭ҇а , ѿ твᲂи́хъ вᲂпло́щшагᲂсѧ пречⷭ҇таѧ крᲂве́й , ѡ҆ на́съ чⷭ҇таѧ мᲂлѝ , ᲂу҆ще́дрити млрⷭ҇дїемъ свᲂи́мъ лю́ди ѿча́ѧнныѧ .= сла́ва . Ѻ҆гнѧ̀ негаси́магѡ и҆зба́ви мѧ , и҆ тмы̀ внѣ́шнїѧ , и҆ пла́ча вѣ́чнагѡ , ѡ҆сꙋжде́нїю сꙋ́ща дᲂсто́йна , ѽ прест҃а́ѧ чⷭ҇таѧ бцⷣе , хᲂда́тайствᲂмъ сѝ те́плымъ ко́ гдⷭ҇ꙋ . и҆ ны́нѣ . Пᲂд̾ твᲂе́ю бцⷣе бл҃гᲂда́тїю сᲂхранѧ́емь , неснѣде́нъ пребыва́ю , прило́ги сᲂпрᲂти́вныхъ вра́гъ . тѣ́мже ꙗ҆́кѡ ᲂу҆тверже́нїе бжⷭ҇твено и҆ степе́нь , вᲂспѣва́ю и҆ пᲂклᲂнѧ́юсѧ и҆ велича́ю тѧ . =та́же , дᲂсто́йнѡ є҆́сть . и҆ про́чее , ѡ҆бы́чно . и҆ ѿпꙋ́стъ .

Въ сꙋбо́тꙋ , на ᲂу҆́трени . по а҃ , стихᲂло́гїи . сѣда́льны , мч҃нчны . гла́съ , з҃ . Ст҃і́и мᲂли́тесѧ , ѡ҆ставле́нїе да́ти на́мъ прегрѣше́нїи на́шихъ , и҆ ча́емыхъ лю́тъ и҆зба́витисѧ на́мъ , и҆ го́рькїѧ сме́рти мо́лимсѧ . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . Ст҃і́и твᲂѝ гдⷭ҇и на землѝ пᲂд̾ви́гшесѧ врага̀ пᲂпра́ша , и҆ и҆́дᲂльскꙋю ле́сть ᲂу҆праздни́ша . тѣ́мже и҆ вѣнцы̀ ѿ тебѐ прїѧ́ша чл҃кᲂлю́бца влⷣки , и҆ млⷭ҇тивагѡ бг҃а , пᲂдаю́щагѡ ми́рꙋ ве́лїю млⷭ҇ть .= сла́ва , и҆ ны́нѣ , боⷢ҇ . Ꙗ҆́=кѡ на́шемꙋ вᲂскрⷭ҇нїю сᲂкро́вище , къ тебѣ̀ прибѣга́ющїѧ пречⷭ҇таѧ , ѿ́ рᲂва и҆з̾ глꙋбины̀ грѣхо́вныѧ вᲂз̾ведѝ , ты́ бо пᲂви́нныѧ грѣхꙋ̀ спасла̀ є҆сѝ , ро́ждьши спасе́нїе на́ше . ꙗ҆́же пре́же рᲂжества̀ дв҃а , и҆ в̾ рᲂжествѣ̀ дв҃а , и҆ по рᲂжествѣ̀ па́ки дв҃аѧ .

по в҃ , стихᲂло́гїи , сѣда́льны , мч҃нчны . гла́съ , з҃ . Ра́дꙋйтесѧ пра́веднїи , и҆ да веселѧ́тсѧ нбⷭ҇наѧ , на земли́ бо мч҃нцы пᲂдви́гшесѧ , ле́сть ᲂу҆праздни́ша . да взыгра́етсѧ цр҃кви пᲂбѣди́тельнаѧ пра́зднꙋющи , пᲂд̾вигᲂпᲂло́жникꙋ и҆ є҆ди́нᲂмꙋ пᲂбѣдᲂтво́рцꙋ хрⷭ҇тꙋ̀ бг҃ꙋ че́сть вᲂз̾сыла́ющи , пᲂдаю́щемꙋ ми́рᲂви ве́лїю млⷭ҇ть . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . Мч҃нцы твᲂѝ гдⷭ҇и , врага̀ пᲂбѣди́ша , и҆ ле́сть и҆́дᲂльскꙋю пᲂсрами́ша , вᲂѡ҆рꙋжи́вшесѧ крⷭ҇та̀ твᲂегѡ̀ си́лᲂю . тѣ́мже и҆ со а҆́нг҃лы вᲂспѣва́юще взыва́ютъ пᲂбѣ́днꙋю пѣ́снь , славᲂсло́вѧще тебѐ хрⷭ҇тѐ . тѣ́хъ мл҃твами пᲂда́ждь дш҃а́мъ на́шимъ ѡ҆чище́нїе и҆ ве́лїю ми́лᲂсть . сти́хъ : мно́ги ско́рби пра́веднымъ , и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь . Во странѣ̀ живꙋ́щихъ гдⷭ҇и , и҆ въ се́лѣхъ пра́ведныхъ твᲂи́хъ ᲂу҆чинѝ дх҃и , и҆́мже сᲂтвᲂрѧ́емъ па́мѧть чл҃кᲂлю́бче . и҆ а҆́ще что̀ сᲂгрѣши́ша в̾ житїѝ сꙋ́ще , ꙗ҆́кѡ млⷭ҇тивъ и҆ бл҃гᲂпремѣни́тель бг҃ъ прᲂстѝ , пᲂдаѧ̀ ми́рᲂви ве́лїю ми́лᲂсть .= сла́ва , и҆ ны́нѣ , боⷢ҇ . Н=е и҆скꙋсᲂбра́чнаѧ ѻ҆трᲂкᲂви́це всенепᲂро́чнаѧ , и҆́же ѿ твᲂи́хъ крᲂве́й вᲂплᲂще́ннагѡ бг҃а на́шегѡ , прⷭ҇нѡ со прⷪ҇рки , и҆ ст҃ли , и҆ мч҃нки мᲂлѝ спастѝ дш҃а на́ша .

та́же , ѱало́мъ , н҃ . пᲂми́лꙋй мѧ бж҃е . і҆єре́й , вᲂз̾гла́съ . ми́лᲂстїю и҆ щедро́тами .

Кано́нъ , ст҃ы́мъ мч҃нкѡмъ , и҆ ст҃лемъ , и҆ прпⷣбнымъ . и҆ ᲂу҆со́пшимъ . є҆мꙋ́же краегране́сїе си́цево , ли́къ вᲂспѣва́ю , па́стырей , и҆ мч҃нкъ . твᲂре́нїе і҆ѡ́сифᲂво . гла́съ , з҃ . пѣ́снь , а҃ . і҆рмо́съ . Пᲂспѣ́шьствᲂвавша бг҃а во є҆ги́птѣ мѡѷсе́ѡви , и҆з̾вестѝ і҆и҃лѧ , тᲂгѡ̀ є҆ди́нагѡ вᲂспᲂе́мъ , ꙗ҆́кѡ прᲂсла́висѧ . запѣ́въ : ст҃і́и мч҃нцы , мᲂли́те бг҃а ѡ҆ на́съ . мⷱ҇ꙋ . Ли́къ мч҃нкъ нельсти́выхъ , всѧ̀ пре́лести пᲂбѣдѝ бᲂрца̀ , и҆ ликꙋ́етъ ра́дꙋющисѧ пред̾ лице́мъ сᲂзда́вшаго и҆̀ .

запѣ́въ : ст҃і́и всѝ мᲂли́те бг҃а ѡ҆ на́съ . Ст҃лїе хрⷭ҇то́ви , и҆ прпⷣбнїи всѝ пᲂд̾ви́гшїисѧ , пи́щи спᲂдо́бишасѧ вѣ́чнѣй бл҃гᲂда́тїю . И҆зба́ви на́съ хрⷭ҇тѐ , ѿ всѧ́кїѧ ꙗ҆́рᲂсти , мᲂле́нїемъ прⷪ҇рѡ́къ , и҆ прпⷣбныхъ , и҆ же́нъ сщ҃е́нныхъ и҆ спасѝ дш҃а на́ша .= сла́ва .= пᲂко́ин̾ . Сᲂзда́выи мѧ ѿ землѝ сло́ве , и҆ в̾ зе́млю па́ки вᲂз̾врати́тимисѧ пᲂвелѣ́лъ є҆сѝ , пᲂко́й ꙗ҆́же в̾ вѣ́рѣ преста́вилъ є҆сѝ .= боⷢ҇ . П=речⷭ҇таѧ мт҃и , ꙗ҆́же бг҃а прест҃о́е сло́во пᲂро́ждьшаѧ , ѡ҆ст҃ѝ всѧ̀ любо́вїю тѧ̀ сла́вѧщихъ .

Дрꙋгі́и , кано́нъ , ᲂу҆со́пшимъ , пᲂе́мъ нарѧдꙋ̀ , и҆дѣ́же нѣ́сть минѣ́и . твᲂре́нїе ѳео́фанᲂво . гла́съ , з҃ . і҆рмо́съ . Ма́нїемъ ти на зе́менъ ѻ҆́бразъ прелᲂжи́сѧ , пе́рвїе разлива́емᲂе вᲂдно́е є҆стество̀ гдⷭ҇и . тѣ́мже немо́кренно ше́ствᲂвавъ і҆и҃ль , пᲂе́тъ тебѣ̀ пѣ́снь пᲂбѣ́днꙋю .

запѣ́въ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . Дᲂбро́тъ ᲂу҆кра́шени дᲂбрᲂдѣ́тельными ви́ды , и҆ бжⷭ҇твенᲂе вᲂз̾лᲂже́нїе раз̾ли́чными красᲂта́ми сїѧ́юще бл҃гᲂче́стїемъ , мч҃нцы хрⷭ҇тꙋ̀ бг҃ꙋ принесо́стесѧ .

запѣ́въ : пᲂко́й гдⷭ҇и дш҃а ᲂу҆со́пшихъ ра́бъ свᲂи́хъ . Зарѣ̀ непристꙋ́пнагѡ и҆ трисл҃нчнагѡ сїѧ́нїѧ ᲂу҆лꙋчи́ти спᲂдо́би , преста́вльшїѧсѧ рабы̀ твᲂѧ̀ мнᲂгᲂмлⷭ҇тиве гдⷭ҇и , ѿ ню́дꙋ же ѿбѣжѐ всѧ́ка бᲂлѣ́знь , и҆ печа́ль и҆ вᲂз̾дыха́нїе .= сла́ва . Оу҆мерщве́нїемъ ѡ҆сꙋжде́нᲂе є҆стество̀ , в̾ живо́тъ сᲂста́вныи , живᲂда́вче са́мъ сы́и вᲂз̾дви́глъ є҆сѝ . тѣ́мже ꙗ҆́кѡ є҆ди́нъ ще́дръ , вѣ́рᲂю к̾ тебѣ̀ преста́вльшїѧсѧ ᲂу҆пᲂко́й . и҆ ны́нѣ . И҆=спра́вила є҆сѝ пречⷭ҇таѧ пра́мт҃рьнее паде́нїе ро́ждьши гдⷭ҇а сло́ва , и҆́же сїю̀ вᲂскреси́вшаго , и҆ сꙋ́щимъ во грᲂбѣ́хъ вдᲂхнꙋ́вша живо́тъ вла́стїю бжⷭ҇твенᲂю .

пѣ́снь , г҃ . і҆рмо́съ . Оу҆тверже́и нб҃са̀ сло́вᲂмъ сѝ , и҆ земно́е ѡ҆снᲂва́нїе ᲂу҆крѣ́пль на вᲂда́хъ мно́гихъ , ᲂу҆твердѝ мо́й ᲂу҆́мъ , в̾ во́лю твᲂю̀ є҆ди́не млрⷭ҇де . мⷱ҇ꙋ . Сᲂкрꙋша́еми ка́менїемъ , и҆ в̾ ро́въ вмѣта́еми , сᲂкрꙋши́сте всю̀ льсти́вагѡ си́лꙋ , и҆ несᲂкрꙋше́ни ᲂу҆мо́мъ мч҃нцы пребы́сте . Заре́ю бжⷭ҇твеныхъ ᲂу҆че́нїи , и҆ дᲂбрᲂдѣ́телей лꙋча́ми премꙋ́дрїи ст҃лїе , вѣ́рныѧ прᲂсвѣща́юще . и҆ є҆ресе́й мглꙋ̀ всю̀ ѿгна́сте . Оу҆мертви́вшесѧ ми́рꙋ прпⷣбнїи твᲂѝ сло́ве , преми́рнꙋю вᲂи́стинꙋ жи́знь наслѣ́дᲂваша . и҆́хже ра́ди ще́дре всѣ́хъ на́съ ᲂу҆ще́дри .= сла́ва .= пᲂко́инъ . Ѡ҆ преста́вльшихсѧ в̾ вѣ́рѣ и҆ наде́жи , мо́лимсѧ всѝ бл҃го́мꙋ влⷣцѣ , пᲂми́лᲂвати и҆́хъ в̾ ча́съ сꙋда̀ .= боⷢ҇ . Н=е и҆стᲂщи́въ нѣ́дръ ѻ҆те́ческихъ сло́во , в̾ нѣ́дрѣхъ твᲂи́хъ пречⷭ҇таѧ младе́нецъ держи́мь ꙗ҆ви́сѧ , нача́ло ѿ тебѐ прїе́мь без̾нача́льныи .

и҆́нъ , і҆рмо́съ . Въ нача́тцѣ нб҃са̀ всеси́льнымъ сло́вᲂмъ сѝ ᲂу҆тверже́и , гдⷭ҇и сп҃се , и҆ всетвᲂрѧ́щимъ дх҃ᲂмъ бж҃їимъ всю̀ си́лꙋ и҆́хъ , на недви́жимᲂмъ мѧ ка́мени и҆спᲂвѣ́данїѧ твᲂегѡ̀ ᲂу҆твердѝ . ди́венъ бг҃ъ . Ю҆́нᲂшеско и҆ крѣ́пко терпѣ́нїе , мꙋ́жественѣ пᲂказа́ша мч҃нкъ ли́цы . ра́нъ бо ᲂу҆стремле́нїе пᲂдъѧ́ша , и҆ мꙋче́нїи ꙗ҆́звы , нетлѣ́нныѧ твᲂеѧ̀ сла́вы сп҃се жела́юще и҆ красᲂты̀ . пᲂко́й гдⷭ҇и . Въ вѣ́чныи ти живо́тъ , и҆́же въ наде́жди ᲂу҆со́пшихъ , ми́лᲂстиве прїимѝ дш҃и . и҆ жела́емыхъ и҆ бжⷭ҇твеныхъ влⷣко нѣ́дръ , бжⷭ҇твенагѡ а҆враа́ма внꙋ́трь вселѝ , и҆ съ ла́заремъ бл҃же́ннымъ спричтѝ .= сла́ва . Сᲂше́дыи съ нб҃съ во є҆́же спастѝ ро́дъ чл҃ческїи , бл҃гᲂꙋтро́бныи сп҃се , невеще́ственнагѡ свѣ́та , и҆ бжⷭ҇твеныѧ сла́вы твᲂеѧ̀ насыща́тисѧ и҆ ра́дᲂсти , бл҃гᲂче́стнѡ преста́вленыѧ , твᲂи́мъ млрⷭ҇дїемъ спᲂдо́би . и҆ ны́нѣ . З=ако́ны є҆стества̀ раз̾рѣши́шасѧ в̾ тебѣ̀ , непᲂсти́жимᲂе бо сло́во заче́ншисѧ чⷭ҇таѧ , и҆ зако́нъ на́мъ бжⷭ҇твеныи даде́сѧ , всѣ́мъ ѡ҆ставле́нїе пᲂдаѧ̀ ѿчаѧва́емымъ прегрѣше́ньми , бл҃гᲂда́тїю бжⷭ҇твеныѧ любвѐ .

пѣ́снь , д҃ . і҆рмо́съ . Плᲂтьско́е прише́ствїе твᲂѐ хрⷭ҇тѐ , и҆з̾вѣствꙋ́ѧ пррⷪ҇къ а҆ввакꙋ́мъ зва́ше , сла́ва си́лѣ твᲂе́й гдⷭ҇и . мⷱ҇ꙋ . Оу҆крѣплѧ́еми є҆́же ко́ гдⷭ҇ꙋ любо́вїю мч҃нцы , ѡ҆бнемᲂщи́ша вра́жїю си́лꙋ , тѣ́мже ᲂу҆блажа́ютсѧ . Ꙗ҆́кѡ ѻ҆вча́та па́стырѧ и҆ а҆́гньцы , бл҃же́ннїи і҆єра́рси , слᲂве́снᲂмꙋ ста́дꙋ пред̾ста́сте бжⷭ҇твенᲂю бл҃гᲂда́тїю . Мнᲂгᲂсвѣ́тлыѧ ꙗ҆́кѡ ѕвѣ́зды , дᲂбрᲂдѣ́телей свѣ́тлᲂстїю , ѡ҆зари́сте вѣ́рныхъ и҆спᲂлне́нїе , прпⷣбнїи ѻ҆ц҃ы на́ши . сла́ва . Є҆ди́нственᲂе тᲂржество̀ крѣ́пкихъ же́нъ , и҆ сᲂсло́вїе ст҃ы́хъ прᲂро́къ , ᲂу҆лꙋчи́ша нбⷭ҇ныѧ бл҃гᲂсти .= боⷢ҇ . М=ᲂлѝ є҆го́же рᲂдила̀ є҆сѝ сн҃а всепѣ́таѧ , и҆скꙋше́нїи всѧ́ческихъ и҆ скᲂрбе́й , и҆зба́витисѧ рабо́мъ твᲂи́мъ .

и҆́нъ , і҆рмо́съ . Ѻ҆́ч҃а нѣ́дра не ѡ҆ста́вль , и҆ сᲂше́дъ на́ землю хрⷭ҇тѐ бж҃е , та́йнꙋ ᲂу҆слы́шахъ смᲂтре́нїѧ твᲂегѡ̀ , и҆ прᲂсла́вихъ тѧ чл҃кᲂлю́бче . ди́венъ бг҃ъ . Страда́льныѧ бᲂлѣ́зни терпѣли́внѡ пᲂказа́вше хрⷭ҇тѐ мч҃нцы , вѣнцы̀ ᲂу҆вѧзо́шасѧ пра́вды твᲂеѧ̀ , и҆ сла́вѧтъ твᲂю̀ си́лꙋ . пᲂко́й гдⷭ҇и . Па́че є҆сте́ственыѧ свѣ́тлᲂсти бл҃же , преста́вленыѧ бл҃гᲂче́стнѡ спᲂдо́би , є҆гда̀ прїи́деши во сла́вѣ свᲂе́й со а҆́нг҃лы твᲂи́ми , всеще́дре и҆ мнᲂгᲂми́лᲂстиве .= сла́ва . Трисвѣ́тлыѧ зарѝ бл҃же , и҆ є҆ди́нственагѡ ѡ҆блиста́нїѧ бжⷭ҇тва̀ , наслади́тисѧ спᲂдо́би пре́жде ѿше́дшїѧ , и҆ сла́вѧщїѧ тѧ̀ чл҃кᲂлю́бче . и҆ ны́нѣ . И҆́=же ѻ҆́ч҃а нѣ́дра не ѡ҆ста́вль , въ дв҃ческихъ нѣ́дрѣхъ хрⷭ҇то́съ вᲂдвᲂри́сѧ , и҆ сме́рти и҆зба́вилъ є҆́сть , тебѐ блажа́щїѧ бг҃ᲂмт҃и є҆ди́на всепѣ́таѧ .

пѣ́снь , є҃ . і҆рмо́съ . Оу҆́треннюетъ дх҃ъ мо́й къ тебѣ̀ хрⷭ҇тѐ бж҃е , занѐ свѣ́тъ пᲂвелѣ́нїѧ твᲂѧ̀ , бы́ша и҆сцѣле́нїѧ рабо́мъ твᲂи́мъ чл҃кᲂлю́бче . мⷱ҇ꙋ . Ѡ҆ ꙗ҆́звахъ плᲂтьски́хъ неради́вше , крѣ́пцыи страда́льцы , и҆ ꙗ҆́звы всѣ́хъ и҆сцѣлѧ́ете и҆ стра́сти , бжⷭ҇твеными ва́шими ꙗ҆́звами . Прїѧ́сте вла́сть рѣша́ти и҆ вѧза́ти на землѝ ст҃лїе хрⷭ҇то́ви . тѣ́мже на́ша грѣхо́вныѧ плени́цы нерѣши́мыѧ разрѣши́те . Оу҆мо́мъ чи́стымъ бг҃ꙋ сᲂє҆дини́вшесѧ , ли́цы по́стничестїи , прⷪ҇ркъ и҆ пра́ведныхъ , и҆ же́нъ чⷭ҇тны́хъ , ликꙋ́ютъ ра́дꙋющесѧ , ликᲂва́нїемъ неразᲂри́мымъ .= сла́ва .= пᲂко́инъ . Ꙗ҆́кѡ є҆ди́нъ сы́и мнᲂгᲂмлⷭ҇тивъ , вѣ́рᲂю хрⷭ҇тѐ преста́вленыѧ ѿ житїѧ̀ , ра́еви сᲂтвᲂрѝ жи́телѧ чл҃кᲂлю́бче .= боⷢ҇ . Ч=ерто́гъ неразᲂри́мь ꙗ҆́вльшисѧ бг҃ꙋ . мᲂлѝ тᲂгѡ̀ всест҃а́ѧ дв҃о , черто́га мѧ мы́сленагѡ жи́телѧ сᲂдѣ́лати .

и҆́нъ , і҆рмо́съ . Гдⷭ҇и бж҃е мо́й , и҆́з̾ нᲂщи ᲂу҆́треннюѧ тебѣ́сѧ мᲂлю̀ , пᲂда́ждь мѝ ѡ҆ставле́нїе прегрѣше́нїи мᲂи́хъ , и҆ ко свѣ́тꙋ твᲂи́хъ пᲂвелѣ́нїи , пꙋтѝ мᲂѧ̀ напра́ви мᲂлю́тисѧ . ди́венъ бг҃ъ . Ме́ртвᲂстїю живᲂно́снᲂю и҆стка́ннᲂю мꙋче́нїи ра́ди , всехва́льнїи мч҃нцы ѡ҆дѣ́ѧни свѣ́тлѡ , дш҃а́мъ пре́жде ᲂу҆со́пшимъ бжⷭ҇твенїи и҆спрᲂси́те пᲂко́й . пᲂко́й гдⷭ҇и . Ѿ не и҆знꙋри́мыхъ сᲂкро́вищь , прᲂлива́ѧи бл҃гᲂꙋтро́бїе сп҃се , дш҃и и҆́хже преста́вилъ є҆сѝ , съ первᲂро́дными ти въ жили́щихъ нбⷭ҇ныхъ бл҃гᲂвᲂлѝ вᲂдвᲂри́тисѧ .= сла́ва . Тѧгᲂтꙋ̀ ѿлᲂжи́вше , и҆ ѿ ᲂу҆́зъ разрѣши́вшесѧ , и҆ к̾ вы́шнемꙋ живᲂтꙋ̀ рабы̀ твᲂѧ̀ преше́дшїѧ хрⷭ҇тѐ , наслажда́тисѧ твᲂи́хъ ст҃ы́хъ свѣтлᲂсте́й сп҃се бл҃гᲂвᲂлѝ . и҆ ны́нѣ . В=лⷣчце бг҃ᲂмт҃и , мᲂи́мъ сᲂгрѣше́нїемъ разрѣше́нїе пᲂда́ждь , и҆ да́рꙋй ми прᲂще́нїе грѣхо́въ мᲂи́хъ , ꙗ҆́же живо́тъ сᲂста́вныи ми́рꙋ ро́ждьши , всенепᲂро́чнаѧ .

пѣ́снь , ѕ҃ . і҆рмо́съ . І҆ѡ́на и҆́з̾ чрева а҆́дᲂва вᲂпїѧ́ше , живо́тъ мо́й и҆з̾ и҆стлѣ́нїѧ свᲂбᲂдѝ , мы́ же тѝ вᲂпїе́мъ , всемᲂгі́и сп҃се пᲂми́лꙋй на́съ . мⷱ҇ꙋ . Низ̾лᲂжи́сте вра́жїѧ вᲂз̾выше́нїѧ , вᲂз̾выша́еми к̾ бг҃ꙋ во страда́нїихъ всесла́внїи ѻ҆рꙋ́жницы , и҆ гра́ждане нбⷭ҇нїи бы́сте . Є҆ресе́й зи́мꙋ ѿгᲂнѧ́ще хрⷭ҇то́вы и҆́стиннїи ст҃лїе , къ веснѣ̀ и҆́стиннѣй мно́жество бл҃гᲂчести́выхъ приведо́ша . Крѣ́пᲂстїю твᲂе́ю хрⷭ҇тѐ , прпⷣбныхъ мно́жество , и҆ прᲂро́къ и҆ же́нъ ст҃ы́хъ ѡ҆правда́шасѧ , и҆ незахᲂди́магѡ свѣ́та наслажда́ютсѧ .= сла́ва .= пᲂко́инъ . Преста́вилъ є҆сѝ ще́дре ѿ вре́менныхъ рабы̀ свᲂѧ̀ . но сїѧ̀ вѣ́чнагѡ весе́лїѧ , и҆ живᲂта̀ и҆́стиннагѡ прича́стники спᲂдо́би .= боⷢ҇ . Ѡ҆=ст҃ѝ всест҃а́ѧ дв҃о рабы̀ свᲂѧ̀ , прест҃о́е сло́во пло́тїю ро́ждьшаѧ . є҆го́же пᲂе́тъ всѧ́ко дыха́нїе , ѡ҆сщ҃а́юща .

и҆́нъ , і҆рмо́съ . Пла́вающагѡ въ мᲂлвѣ̀ жите́йскихъ сꙋ́етїи , и҆ съ кᲂрабле́мъ пᲂтᲂплѧ́ема грѣхѝ , и҆ дш҃етлѣ́ннꙋ звѣ́рю примѣта́ема , ꙗ҆́кѡ і҆ѡ́на хрⷭ҇тѐ вᲂпїю́ ти , ѿ сме́ртныѧ глꙋбины̀ вᲂз̾веди́ мѧ . ди́венъ бг҃ъ . Ли́къ мч҃ническїи неꙋдо́бь нᲂси́мыѧ бᲂлѣ́зни , крѣ́пкѡ претерпѣ́вше , небᲂлѣ́зненыѧ пи́щи наслѣ́дᲂваша , пра́ведныѧ вѣнцы̀ ѿ живᲂно́сныѧ десни́цы прїѧ́ша .= пᲂко́й гдⷭ҇и . Съ пра́ведными и҆дѣ́же ст҃ы́хъ ли́кᲂве , и҆ и҆дѣ́же свѣ́тлᲂсть прпⷣбныхъ , и҆ вѣ́чныѧ жи́зни наслажде́нїе , пре́жде ᲂу҆со́пшїѧ твᲂѧ̀ рабы̀ ᲂу҆чинѝ млⷭ҇тиве , ꙗ҆́кѡ бг҃ъ без̾сме́ртенъ . сла́ва . Съ пра́ведными и҆дѣ́же ст҃ы́хъ ли́кᲂве , и҆ и҆дѣ́же свѣ́тлᲂсть прпⷣбныхъ , и҆ вѣ́чныѧ жи́зни наслажде́нїе , пре́жде ᲂу҆со́пшїѧ твᲂѧ̀ рабы̀ ᲂу҆чинѝ млⷭ҇тиве , ꙗ҆́кѡ бг҃ъ без̾сме́ртенъ . и҆ ны́нѣ . И҆́=же во́лею бжⷭ҇твенᲂю и҆ сᲂдѣ́тельнᲂю си́лᲂю , всѧ̀ сᲂставле́и ѿ небы́тїѧ , и҆з̾ ᲂу҆тро́бы твᲂеѧ̀ чи́стыѧ прᲂизы́де . и҆ сꙋ́щїѧ во тмѣ̀ сме́ртнѣй , бг҃ᲂнача́льными блиста́ньми прᲂсвѣти́лъ є҆́сть .

кᲂнда́къ . гла́съ , и҃ . Со ст҃ы́ми пᲂко́й хрⷭ҇тѐ дш҃а ра́бъ свᲂи́хъ , и҆дѣ́же нѣ́сть бᲂлѣ́зни , ни печа́ли , ни вᲂз̾дыха́нїѧ , но жи́знь вѣ́чнаѧ . и҆́кᲂсъ . Са́мъ є҆ди́нъ є҆сѝ без̾сме́ртенъ , сᲂтвᲂри́выи и҆ сᲂзда́выи чл҃ка . тлѣ́ннїи и҆́же ѿ землѝ со́здани бы́хᲂмъ , и҆ въ зе́млю тꙋ́же по́йдемъ , ꙗ҆́кᲂже пᲂвелѣ́лъ є҆сѝ , сᲂзда́выи мѧ и҆ ре́клъ ми , ꙗ҆́кѡ землѧ̀ є҆сѝ и҆ в̾ зе́млю па́ки по́йдеши , и҆дѣ́же всѝ земні́и ѿхо́димъ , над̾гро́бнᲂе рыда́нїе твᲂрѧ́ще , и҆ пᲂю́ще пѣ́снь а҆́нг҃льскꙋю , а҆ллилꙋ́їѧ .

пѣ́снь , з҃ . і҆рмо́съ . Въ пещѝ сꙋ́ще халдѣ́йстѣй , а҆враа́мстїи ѻ҆́трᲂцы , ликᲂва́хꙋ со а҆́нг҃лѡмъ гл҃юще , блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ . мⷱ҇ꙋ . Тече́нїи крᲂвны́ми стрⷭ҇тᲂте́рпцы . нече́стїѧ ᲂу҆гаси́ша пла́мень , пᲂю́ще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . І҆єра́рхи вᲂсхвалѧ́емъ , прᲂсвѣти́тели ми́рꙋ бы́вшїѧ , пᲂю́ще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Пѣ́сньми да пᲂчтꙋ́тсѧ , прᲂро́къ и҆ прпⷣбныхъ ст҃ы́и сᲂбо́ръ , пᲂю́щихъ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ .= сла́ва .= пᲂко́инъ . И҆зба́ви гее́ны и҆́хже прїѧ́тъ хрⷭ҇тѐ ще́дрыи , вѣ́рныѧ рабы̀ твᲂѧ̀ , вᲂпїю́щихъ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ .= боⷢ҇ . Ꙗ҆́=кѡ а҆́нг҃лъ чⷭ҇тнѣ́йшꙋ , бцⷣꙋ пѣснᲂсло́вимъ , вᲂпїю́ще , ѻ҆ц҃ъ на́шихъ бж҃е блгⷭ҇ве́нъ є҆сѝ .

и҆́нъ , і҆рмо́съ . Пе́щь ѻ҆́трᲂцы ѻ҆гнепа́льнꙋ , дре́вле хла́дъ дѣ́ющꙋ пᲂказа́ша , є҆ди́нъ бг҃ъ пᲂю́ще и҆ гл҃юще , ѻ҆ц҃ъ на́шихъ бж҃е блгⷭ҇ве́нъ є҆сѝ . ди́венъ бг҃ъ . Вѣнцы̀ нᲂсѧ́ще ли́цы мч҃нкъ , цр҃ѧ хрⷭ҇та̀ ꙗ҆́снѡ ѡ҆б̾стᲂѧ́тъ мы́слено , со а҆́нг҃льскими ликᲂстᲂѧ́ньми , бл҃гᲂслᲂве́нъ є҆сѝ зᲂвꙋ́ще , бж҃е ѻ҆ц҃ъ на́шихъ . пᲂко́й гдⷭ҇и . Ты̀ сме́рти и҆ живᲂтꙋ̀ ѻ҆́бласть и҆мѣ́ѧ ще́дре , пи́щи бжⷭ҇твенѣй спᲂдо́би , и҆́же в̾ вѣ́рѣ твᲂе́й сп҃се прелᲂже́ныѧ . бл҃гᲂслᲂве́нъ є҆сѝ зᲂвꙋ́щихъ , бж҃е ѻ҆ц҃ъ на́шихъ .= сла́ва . Прᲂсвѣща́ѧи свѣ́тᲂмъ невеще́ственагѡ свѣтᲂли́тїѧ хрⷭ҇тѐ , дш҃а ꙗ҆́же преста́вилъ є҆сѝ в̾ се́лѣхъ нбⷭ҇ныхъ вселѝ , славᲂсло́вити тѧ̀ непреста́ннѡ со ᲂу҆го́дники твᲂи́ми . и҆ ны́нѣ . И҆́=же пре́жде без̾ мт҃ре и҆з̾ ѻ҆ц҃а , ны́нѣ же без̾ ѻ҆ц҃а и҆з̾ тебѐ дв҃о хрⷭ҇то́съ не и҆зрече́ннѡ рᲂди́сѧ . на́съ ра́ди чл҃къ в̾ пло́ть ѡ҆бо́лксѧ . бл҃гᲂслᲂве́нъ пречⷭ҇таѧ пло́дъ твᲂегѡ̀ чре́ва .

пѣ́снь , и҃ . і҆рмо́съ . Сꙋ́щимъ в̾ пещѝ ѻ҆трᲂко́мъ пᲂдо́бѧщесѧ , дх҃о́внꙋю ро́сꙋ прїи́мше вѣ́рᲂю вᲂпїе́мъ , блгⷭ҇ви́те дѣ́ла гдⷭ҇нѧ гдⷭ҇а . мⷱ҇ꙋ . Хра́мы и҆́дᲂльскїѧ разверго́сте всесла́внїи , и҆ хра́мы сᲂзда́сте себѐ дх҃ꙋ стрⷭ҇тᲂте́рпцы . хра́брски тече́нїе скᲂнча́вше . Ꙗ҆ви́стесѧ ꙗ҆́кѡ цвѣ́ты бл҃гᲂꙋха́ннїи ст҃лїе ра́зꙋмᲂмъ , дш҃а вѣ́рныхъ веселѧ́ще бл҃гᲂче́стїемъ . тѣ́мже дᲂсто́йнѡ бл҃жи́ми є҆стѐ . Зе́млю всю̀ прᲂше́дше прпⷣбнїи , и҆ бж҃їи прише́лцы прⷪ҇рцы бы́сте , вы́шнее сᲂблюда́юще наслаже́нїе , и҆ сла́вꙋ при́снѡ пребыва́ющꙋю .= сла́ва .= пᲂко́инъ . Ꙗ҆́кѡ живы́мъ и҆ ме́ртвымъ сло́ве гдⷭ҇и , и҆́же вѣ́рᲂю ᲂу҆со́пшїѧ рабы̀ твᲂѧ̀ , ликѡ́мъ сᲂчета́й спаса́емыхъ всѣ́хъ , ꙗ҆́кѡ є҆ди́нъ чл҃кᲂлю́бецъ .= боⷢ҇ . же=́нъ всѣ́хъ сᲂсло́вїе , пᲂсто́мъ и҆ страда́нїемъ взыска́вшихъ гдⷭ҇а , мо́лѧтсѧ непреста́ннѡ , бжⷭ҇твенᲂмꙋ лицꙋ̀ твᲂемꙋ̀ пречⷭ҇таѧ .

и҆́нъ , і҆рмо́съ . Є҆ди́нᲂгѡ без̾нача́льнагѡ цр҃ѧ сла́вы , є҆го́же хва́лѧтъ нбⷭ҇ныѧ си́лы , и҆ трепе́щꙋтъ чи́ни а҆́нг҃льстїи , по́йте сщ҃е́ннїи , лю́дїе превᲂзнᲂси́те є҆гѡ̀ во́ вѣки . ди́венъ бг҃ъ . Къ нбⷭ҇нѣй зрѧ́ще сла́вѣ мч҃нцы , хрⷭ҇то́ва прише́ствїѧ , ѡ҆ земнѣ́й неради́ша сла́вѣ , пᲂю́ще бл҃гᲂче́стнѡ тᲂгѡ̀ , ꙗ҆́кѡ цр҃ѧ во всѧ̀ вѣ́ки . пᲂко́й гдⷭ҇и . И҆́же земнꙋ́ю разрꙋши́въ хра́минꙋ , є҆́же ѡ҆ наде́жди жи́зни ᲂу҆со́пшимъ , нбⷭ҇нꙋю хра́минꙋ пᲂда́ждь въ пра́ведныхъ се́лѣхъ , си́хъ пᲂко́й во всѧ̀ вѣ́ки . блгⷭ҇ви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Ме́ртвымъ вᲂскрⷭ҇нїе ꙗ҆́кѡ бг҃ъ пᲂдава́ѧи , и҆́же и҆сто́чникъ жи́зни и҆мы́и , ты̀ напо́й пи́щными пᲂто́ки ꙗ҆́кѡ є҆ди́нъ бл҃гъ , пре́же ᲂу҆со́пшихъ во всѧ̀ вѣ́ки .= и҆ ны́нѣ . Свѣ́тъ неприкᲂснᲂве́нныи бцⷣе дв҃о во́ чревѣ свᲂе́мъ прїе́мши не и҆з̾рече́ннѡ , прᲂсвѣти́ла є҆сѝ сꙋ́щїѧ во тмѣ̀ житїѧ̀ , сла́вити бл҃гᲂче́стно хрⷭ҇та̀ , прᲂше́дшаго и҆з̾ тебѐ несказа́ннѡ . =та́же , пѣ́снь бцⷣѣ . вели́читъ дш҃а мᲂѧ̀ гдⷭ҇а .= и҆ =пᲂкло́ны .

пѣ́снь , ѳ҃ . і҆рмо́съ . Вы́ше є҆стества̀ мт҃рь , и҆ по є҆стествꙋ̀ дв҃ꙋ , є҆ди́нꙋ в̾ жена́хъ бл҃гᲂслᲂве́нꙋю , пѣ́сньми вѣ́рнїи бцⷣꙋ велича́емъ . мⷱ҇ꙋ . Сщ҃е́нныхъ мч҃нкъ , и҆ прⷪ҇ркъ , и҆ пра́ведныхъ , ѿ́ вѣка до́брѣ жи́вшихъ , мл҃твами и҆́хъ хрⷭ҇тѐ , дш҃и на́ши пᲂми́лꙋй . Ꙗ҆́кѡ слꙋжи́тели влⷣцѣ , сщ҃еннᲂтаи́нницы ꙗ҆́вльшесѧ , сᲂвᲂкꙋпи́стесѧ слꙋга́мъ нбⷭ҇нымъ , с̾ ни́ми же ѡ҆ на́съ мᲂле́нїе принеси́те . Съ жена́ми бл҃же́ннᲂе скᲂнча́вшїѧ тече́нїе , пᲂчте́мъ по́стническїѧ ли́ки ст҃ы́ѧ , ꙗ҆́кѡ да тѣ́хъ мл҃твами ᲂу҆лꙋчи́мъ сщ҃е́нїе .= сла́ва .= пᲂко́ин̾ . Є҆́й спᲂдо́бишасѧ , сла́вѣ ст҃ы́хъ всѣ́хъ ликᲂстᲂѧ́нїѧ хрⷭ҇тѐ , преста́вленыѧ спᲂдо́би причасти́тисѧ , правᲂсла́внѡ тебѣ̀ слꙋжи́вшїѧ .= боⷢ҇ . Г=рѣхᲂлюби́въ сы́и , сꙋди́ща стра́шнагѡ трепе́щꙋ , ро́ждьшагᲂсѧ и҆з̾ тебѐ чⷭ҇таѧ . в̾ не́мже мѧ ꙗ҆́кѡ бл҃га́ѧ не ѡ҆сꙋже́на сᲂблюдѝ .

и҆́нъ , і҆рмо́съ . Мт҃и бг҃ꙋ и҆ дв҃а , ражда́ющи и҆ дѣ́вствꙋющи па́ки , не є҆сте́ственно дѣ́ло , но бж҃їе схᲂжде́нїе , тѣ́мъ ꙗ҆́кѡ є҆ди́нꙋ , бж҃їихъ чꙋде́съ спᲂдо́бльшꙋюсѧ при́снѡ велича́емъ . ди́венъ бг҃ъ . Ꙗ҆вле́ннѡ до́блїи мч҃нцы прᲂсвѣща́ютъ ми́ръ , вѣ́ры сꙋ́ще стᲂлпѝ , и҆ цр҃квамъ непᲂкᲂлѣби́маѧ тверды́нѧ и҆ пред̾гра́дїѧ бл҃гᲂче́стїѧ . тѣ́хъ по дᲂстᲂѧ́нїю вѣ́рнїи ᲂу҆блажа́емъ . пᲂко́й гдⷭ҇и . И҆зба́ви ѻ҆гнѧ̀ вѣ́чнагѡ влⷣко ѿ на́съ преста́вльшихсѧ , ре́бръ твᲂи́хъ кᲂпїе́мъ , грѣхо́внᲂе рꙋкᲂписа́нїе растерза́въ си́хъ , ꙗ҆́кѡ є҆ди́нъ чл҃кᲂлю́бецъ , и҆ ст҃ы́хъ свѣ́тлᲂсти спᲂдо́би .= сла́ва . Ꙗ҆́кѡ бл҃гъ бг҃ъ и҆ чл҃кᲂлю́бецъ , ꙗ҆́кѡ млⷭ҇тивъ , и҆ ще́дръ , ꙗ҆́кѡ живᲂтꙋ̀ без̾сме́ртнᲂмꙋ сы́и сᲂкро́вище не и҆стᲂщи́мᲂе сп҃се , вѣ́рᲂю пре́жде ᲂу҆со́пшїѧ неразᲂри́мѣй пи́щи твᲂе́й спᲂдо́би . и҆ ны́нѣ . З=ако́нꙋ сѣ́ни и҆ пре́жнѧѧ гада́нїѧ , твᲂи́мъ ржⷭ҇тво́мъ преи҆до́ша . и҆́бо и҆спᲂлне́нїе зако́нꙋ и҆ прᲂро́кѡмъ хрⷭ҇то́съ бы́сть . є҆го́же во двᲂю̀ сꙋществꙋ̀ пᲂю́ще , тебѐ прⷭ҇нѡ дв҃ꙋю чи́стꙋю ᲂу҆блажа́емъ .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на хвали́тѣхъ , стⷯры , мч҃нчны . гла́съ , з҃ . Па́мѧть ст҃ы́хъ твᲂи́хъ страстᲂте́рпецъ пра́зднꙋюще , тебѐ пᲂе́мъ хрⷭ҇тѐ вᲂпїю́ще , гдⷭ҇и сла́ва тебѣ̀ . Пᲂсредѣ̀ сꙋди́ща закᲂнᲂпрестꙋ́пныхъ , ра́дꙋющесѧ вᲂпїѧ́хꙋ хрⷭ҇тѐ стрⷭ҇тᲂте́рпцы , гдⷭ҇и сла́ва тебѣ̀ . Є҆ди́но ды́шꙋще , и҆ к̾ є҆ди́нᲂмꙋ взира́юще стрⷭ҇тᲂте́рпцы мч҃нцы . є҆ди́нъ пꙋ́ть живᲂта̀ ѡ҆брѣ́тше , є҆́же за хрⷭ҇та̀ сме́рть , ра́вно ѡ҆бразꙋ́ющесѧ дрꙋ́гъ ко́ дрꙋгꙋ кᲂнчи́нᲂю . ѽле чꙋдесѐ , ꙗ҆́кѡ сᲂкро́вища мꙋ́ки пред̾вᲂсхища́хꙋ . дрꙋ́гъ ко́ дрꙋгꙋ гл҃ахꙋ , ꙗ҆́кѡ а҆́ще не ны́нѣ ᲂу҆́мремъ , ᲂу҆́мремъ же всѧ́кѡ , и҆ бытїю̀ до́лжнаѧ пᲂслꙋ́жимъ . сᲂтвᲂри́мъ тре́бꙋ любᲂче́стїемъ ѻ҆́бщее свᲂѐ и҆з̾во́ливше , сме́ртїю живо́тъ кꙋ́пимъ . мл҃твами и҆́хъ бж҃е пᲂми́лꙋй на́съ . сла́ва , пᲂко́инъ . Во странѣ̀ пра́ведныхъ твᲂи́хъ млⷭ҇тиве , вѣ́рᲂю твᲂе́ю преста́вленыѧ ѿ вре́менныхъ , ᲂу҆чинѝ чл҃кᲂлю́бче . и҆ ны́нѣ , боⷢ҇ . Пᲂе́мъ тѧ пречⷭ҇таѧ бцⷣе и҆ сла́вимъ , є҆го́же рᲂдила̀ є҆сѝ бг҃а сло́ва , зᲂвꙋ́ще сла́ва тебѣ̀ .

на стихо́внѣ , стихѣ́ры , пᲂко́йны . гла́съ , з҃ . Оу҆мерщве́нъ ᲂу҆зрѣ́сѧ на крⷭ҇тѣ̀ є҆ди́не без̾сме́ртне , и҆ во́ грᲂбѣ ꙗ҆́кѡ ме́ртвъ пᲂлᲂжи́сѧ , ᲂу҆мерщве́нїѧ и҆ тлѝ сме́ртныѧ челᲂвѣ́ки и҆збавлѧ́ѧ . но ꙗ҆́кѡ пꙋчи́на млрⷭ҇дїѧ сы́и не и҆стᲂщи́маѧ , и҆ и҆сто́чникъ бл҃гᲂсты́ни , дш҃и свᲂи́хъ ра́бъ ѿ на́съ преста́вленыхъ пᲂко́й .

сти́хъ : бл҃же́ни ꙗ҆́же и҆збра̀ ,꙳ и҆ прїѧ́тъ и҆́хъ гдⷭ҇ь . Нетлѣ́ннᲂю твᲂе́ю дᲂбро́тᲂю , и҆ сла́дᲂстїю красᲂты̀ , и҆ бжⷭ҇твенагѡ ти свѣ́та лꙋча́ми прᲂсвѣща́тисѧ спᲂдо́би , къ тебѣ̀ преста́вльшїѧсѧ бла́же , въ невеще́ственѣмъ свѣтᲂли́тїи , свѣтᲂѧвле́нїѧ твᲂегѡ̀ . со а҆́нг҃лы ликᲂствꙋ́юще пред̾тᲂбо́ю влⷣко , цр҃е́мъ сла́вы и҆ гдⷭ҇емъ .

сти́хъ : дш҃а и҆́хъ ,꙳ во бл҃ги́хъ вᲂдвᲂрѧ́тсѧ . Ꙗ҆́кѡ не и҆здае́мᲂе и҆мѣ́ѧ даро́въ великᲂлѣ́пїе . ꙗ҆́кѡ сᲂкро́вище не ѡ҆скꙋ́дно бᲂга́тыѧ бл҃гᲂсты́ни , к̾ тебѣ̀ преста́вльшихсѧ ꙗ҆́кѡ бг҃ъ вселѝ , въ страна́хъ и҆з̾бра́нныхъ твᲂи́хъ , в̾ мѣ́стѣ ѡ҆слабле́нїѧ , в̾ дᲂмꙋ̀ сла́вы твᲂеѧ̀ , в̾ пи́щи ра́йстѣй , в̾ дв҃ственѣмъ черто́зѣ , ꙗ҆́кѡ милᲂсе́рдъ .

сла́ва , и҆ ны́нѣ , боⷢ҇ . Зако́нꙋ и҆спᲂлне́нїе рᲂдила̀ є҆сѝ , и҆зба́вителѧ пло́тїю бы́вша . небо̀ бы́сть пре́жде в̾ зако́нѣ ѡ҆правда́нїе , хрⷭ҇то́съ же на́съ ра́ди распѧ́тсѧ и҆ ѡ҆правда̀ . и҆ ꙗ҆́кѡ ᲂу҆́бѡ и҆мꙋ́ще дерзнᲂве́нїе ꙗ҆́кѡ мт҃и , мᲂлѝ сн҃а свᲂегѡ̀ бл҃гᲂꙋтро́бнаго , дш҃и ᲂу҆пᲂко́ити бл҃гᲂче́стнѡ ѿ на́съ преста́вленыхъ всепѣ́таѧ .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= сла́ва , и҆ нн҃ѣ , боⷢ҇ , вᲂскрⷭ҇нъ , настᲂѧ́щаго гла́са . є҆ктенїѧ̀ . =та́же , ча́съ , а҃ . ѱалмы̀ , ѡ҆бы́чны . и҆ про́чее , и҆ кᲂне́чныи ѿпꙋ́стъ .

Въ сꙋбо́тꙋ , бл҃же́нны . гла́съ , з҃ .

Красе́нъ бѣ̀ и҆ до́бръ въ снѣ́дь , и҆́же менѐ ᲂу҆мертви́выи пло́дъ , хрⷭ҇то́съ є҆́сть дре́во живо́тнᲂе , ѿ него́ же ꙗ҆ды́и не ᲂу҆мира́ю . но вᲂпїю̀ с̾ разбо́йникᲂмъ , пᲂмѧни́ мѧ сп҃се во црⷭ҇твїи сѝ .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Скᲂнча́вше до́брыи по́двигъ , и҆ вѣ́рꙋ сᲂблю́дше , вѣнцы̀ нетлѣ́нныѧ ѿ бг҃а прїѧ́ли є҆стѐ , и҆ сла́вы є҆гѡ̀ спᲂдо́бистесѧ мч҃нцы всехва́льнїи , а҆́нг҃лѡмъ сᲂжи́телїе .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Сщ҃еннᲂдѣ́йственицы , и҆ прпⷣбныхъ сᲂбо́ри , и҆ прⷪ҇ркъ , и҆ честны́хъ же́нъ приче́тъ да пᲂчтꙋ́тсѧ сщ҃е́ннѡ , во храмѣ́хъ первᲂро́дныхъ , ны́нѣ живꙋ́ще в̾ ра́дᲂсти , и҆ сᲂвᲂдвᲂрѧ́ющесѧ со беспло́тными чи́ньми .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Оу҆чинѝ в̾ хра́мѣхъ ст҃ы́хъ , и҆́хже преста́вилъ є҆сѝ ѿ на́съ сло́ве бж҃їи . тѣ́хъ презрѣ́въ дш҃е́внаѧ сᲂгрѣше́нїѧ , в̾ вѣ́дѣнїи и҆ не в̾ вѣ́дѣнїи , сᲂдѣ́ѧннаѧ на землѝ , и҆ ᲂу҆ще́дри рабы̀ свᲂѧ̀ .

сла́ва . Рабѝ ѽ трⷪ҇це ст҃а́ѧ , ᲂу҆мира́ющїи к̾ тебѣ̀ прихо́дѧтъ , и҆зба́витисѧ ѿ стра́шныхъ ѻ҆нѣ́хъ мꙋ́къ . и҆ ᲂу҆лꙋчи́ти про́сѧтъ , бл҃ги́хъ сла́вы ст҃ы́ѧ твᲂеѧ̀ , в̾ ча́съ сꙋ́дныи .

и҆ ны́нѣ . Всели́сѧ въ твᲂе́й ᲂу҆тро́бѣ всест҃а́ѧ чⷭ҇таѧ , ѻ҆́ч҃ее сїѧ́нїе , и҆ прельще́ныѧ вра́жїимъ ѕлы́мъ , сᲂвѣ́тᲂмъ , и҆ в̾па́дшихъ во тлю̀ , па́ки ѡ҆бнᲂви́лъ є҆́сть .

кᲂне́цъ седьмо́мꙋ гла́сꙋ .

<< Previous

Contents

Next >>