Въ сре́дꙋ , ве́черъ . на гдⷭ҇и вᲂзва́хъ , стихѣ́ры , ст҃ы́мъ а҆пⷭ҇лѡмъ . гла́съ , з҃ . =запѣ́в̾ : ꙗ҆́кѡ ѿ тебѐ ѡ҆чище́нїе є҆́сть . Б=г҃ᲂразꙋ́мїѧ сла́внїи а҆пⷭ҇ли ра́лᲂмъ , вᲂз̾дѣ́лавше зе́млю всю̀ , вѣ́рныхъ мно́жество вᲂз̾расти́сте .

ᲂу҆пᲂва̀ дш҃а мᲂѧ̀ на́ гдⷭ҇а . Страсте́й мᲂи́хъ разрꙋши́те зи́мꙋ , и҆ ти́шинꙋ мѝ вᲂсїѧ́йте , чи́стагѡ прᲂли́тїѧ бл҃же́ннїи а҆пⷭ҇ли .

да ᲂу҆пᲂва́етъ і҆и҃ль на́ гдⷭ҇а . Ꙗ҆́кѡ ᲂу҆чени́цы сло́ва , ѿ несмы́сльства приведо́сте к̾ ра́зꙋмꙋ бж҃їю , ꙗ҆зы́кѡвъ сᲂбо́ры .

та́же , в̾ минѣ́и , стⷯры , ст҃о́мꙋ . а҆́ще ли нѣ́сть минѣ́и . и҆́ны , стихѣ́ры , ст҃о́мꙋ и҆ вели́кᲂмꙋ чꙋдᲂтво́рцꙋ нико́лѣ . гла́съ , з҃ . =запѣ́въ : ѿ всѣ́хъ без̾зако́нїи є҆гѡ̀ . Ꙗ҆́=кᲂже пре́жде и҆зба́ви ѻ҆́ч҃е вᲂево́ды ᲂу҆́мрети и҆мꙋ́щїѧ , мл҃твами сѝ нико́лае , та́кᲂжде и҆ ны́нѣ на́съ спасѝ .

пᲂхвали́те є҆гѡ̀ всѝ лю́дїе . И҆́же вѣ́рᲂю и҆ любо́вїю всѧ̀ призыва́ющїѧ , и҆ пᲂю́щїѧ тѧ̀ всебл҃же́нне ст҃лю нико́лае , и҆зба́ви печа́лей .

и҆ и҆́стина гдⷭ҇нѧ пребыва́етъ во́ вѣки . Гла́да , и҆ гꙋби́тельства , трꙋ́са , и҆ всѧ́кїѧ нꙋ́жды свᲂбᲂдѝ рабы̀ свᲂѧ̀ , ст҃лю премꙋ́дре нико́лае .

сла́ва , и҆ ны́нѣ , боⷢ҇ . Мᲂльбꙋ̀ принесѝ твᲂи́хъ ра́бъ , к̾ свᲂемꙋ̀ сн҃ꙋ всечⷭ҇таѧ , да спасе́тъ всѣ́хъ и҆́хже сᲂзда̀ .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стихѣ́ры , а҆пⷭ҇льски . гла́съ , з҃ . А҆пⷭ҇ли сла́внїи , стᲂлпѝ цр҃ко́внїи , и҆́стинѣ прᲂпᲂвѣ́дницы , свѣти́ла сꙋ́ще свѣ́тлаѧ , вы̀ ѻ҆гне́мъ дх҃о́внымъ всѧ́кꙋ ле́сть пᲂпали́вше , и҆ чл҃ческїи ро́дъ вѣ́рᲂю прᲂсвѣти́сте . тѣ́мже мо́лимъ вы̀ мᲂли́те сп҃са и҆ бг҃а на́шегѡ , ᲂу҆мири́ти ми́ръ и҆ спастѝ дш҃а на́ша .

сти́хъ : к̾ тебѣ̀ вᲂз̾ведо́хъ ѻ҆́чи мᲂѝ . А҆пⷭ҇ли хрⷭ҇то́вы , дѣ́лателїе сп҃сᲂвы , крⷭ҇тъ ᲂу҆́бѡ ꙗ҆́кᲂже ра́ло на ра́мѣхъ нᲂсѧ́ще , ѡ҆лѧдѣ́вшꙋю зе́млю и҆́дᲂльскїѧ ле́сти ѡ҆чи́стивше , и҆ вѣ́ры сло́во всѣ́ѧсте , дᲂсто́йнѡ пᲂчита́еми є҆стѐ ст҃і́и хрⷭ҇то́вы а҆пⷭ҇ли .

сти́хъ : пᲂми́лꙋй на́съ гдⷭ҇и . мⷱ҇ꙋ . Всехва́льнїи мч҃нцы , ѻ҆вча́та дх҃о́внаѧ , всесᲂж̾же́нїѧ слᲂве́снаѧ , же́ртвы прїѧ́тны бл҃гᲂꙋго́дны бг҃ᲂви , ва́съ не землѧ̀ с̾кры̀ , но не́бо прїѧ́тъ вы̀ , а҆́нг҃лѡмъ сᲂприча́стницы бы́сте . с̾ ни́ми же мᲂли́те , мо́лимъ вы̀ , сп҃са и҆ бг҃а на́шегѡ , ᲂу҆мири́ти ми́ръ и҆ спастѝ дш҃а на́ша .

сла́ва , и҆ ны́нѣ , боⷢ҇ . Є҆ди́нꙋ по ржⷭ҇твѣ̀ пречⷭ҇тꙋю дв҃ꙋ вᲂспᲂе́мъ , ꙗ҆́кѡ мт҃рь бг҃а сло́ва , гл҃юще , сла́ва тебѣ̀ .

таⷤ , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , боⷢ҇ . =во́ =гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Въ сре́дꙋ , на па́вечерницѣ . кано́нъ , прест҃ѣ́й бцⷣѣ . гла́съ , з҃ . пѣ́снь , а҃ . і҆рмо́съ . Ма́нїемъ ти на зе́менъ ѻ҆́бразъ прелᲂжи́сѧ , пе́рвїе разлива́емᲂе вᲂдно́е є҆стество̀ гдⷭ҇и . тѣ́мже немо́кренно ше́ствᲂвавъ і҆и҃ль , пᲂе́тъ тебѣ̀ пѣ́снь пᲂбѣ́днꙋю . запѣ́въ : прест҃а́ѧ гжⷭ҇е бцⷣе спасѝ на́съ . Вᲂда́ми живᲂто́чными дв҃о напо́й , и҆ста́ѧвшꙋю дш҃ꙋ мᲂю̀ зно́емъ грѣхо́внымъ , ꙗ҆́кѡ да кла́съ плᲂдᲂно́сенъ вᲂз̾ращꙋ̀ чⷭ҇таѧ , бжⷭ҇твенагѡ ᲂу҆миле́нїѧ . Ѻ҆дᲂжди́ ми чи́стаѧ ка́пли ᲂу҆миле́нїѧ , щедро́тными ка́плѧми , є҆́юже ѿмы́ю ѻ҆трᲂкᲂви́це всю̀ дш҃е́внꙋю скве́рнꙋ , ѿ невнѧ́тїѧ є҆́й прибы́вшꙋю .= сла́ва . Ты̀ сᲂдѣ́телѧ свᲂегѡ̀ во ᲂу҆тро́бѣ прїе́мши , без̾ тлѝ рᲂдила̀ є҆сѝ , младе́нца бг҃а сꙋ́ща бы́вша . стра́нно чꙋ́до , рабо̀ и҆ мт҃и є҆сѝ влⷣчце без̾невѣ́стнаѧ . и҆ ны́нѣ . И҆=зба́вителѧ чл҃ческᲂмꙋ ро́дꙋ , и҆ свᲂбᲂди́телѧ и҆ сп҃са , хрⷭ҇та̀ на́мъ рᲂдила̀ є҆сѝ , дв҃о мт҃и пречⷭ҇таѧ . тѣ́мже ꙗ҆́вѣ тѧ̀ зна́юще , хᲂда́таицꙋ жи́зни вѣ́чнѣй сла́вимъ .

пѣ́снь , г҃ . і҆рмо́съ . Въ нача́тцѣ небеса̀ всеси́льнымъ сло́вᲂмъ сѝ ᲂу҆тверже́и , гдⷭ҇и сп҃се , и҆ всетвᲂрѧ́щимъ дх҃ᲂмъ бж҃їимъ всю̀ си́лꙋ и҆́хъ , на недви́жимᲂмъ мѧ ка́мени и҆спᲂвѣ́данїѧ твᲂегѡ̀ ᲂу҆твердѝ . Тѣле́снꙋю багрѧни́цꙋ ѿ твᲂи́хъ пречⷭ҇тыхъ крᲂве́й ѡ҆багри́въ цр҃ь всѣ́хъ , и҆ сїю̀ нᲂси́въ крᲂмѣ̀ тлѣ́нїѧ є҆стество́мъ , бг҃ъ же и҆ чл҃къ , ѿ тебѐ про́йде дв҃о , и҆мѣ́ѧ црⷭ҇тво не и҆змѣ́нно . Ꙗ҆́кѡ сᲂкро́вище бл҃ги́хъ , и҆ не и҆зрече́нныхъ дв҃о да́нᲂе всѣ́мъ ѿ́ бг҃а , пᲂдае́ши на́мъ незави́стнᲂе бл҃гᲂда́ти чꙋде́сныѧ да́ры , в̾ напа́стѣхъ и҆ бѣда́хъ и҆ в̾ не́мᲂщехъ , мᲂлѧ́щимсѧ тѝ .= сла́ва . Тѧ̀ дані́илъ чꙋ́дныи , прᲂви́дѧ го́рꙋ чⷭ҇таѧ , ѿ неѧ́же ка́мень ѿсѣче́сѧ хрⷭ҇то́съ , сᲂкрꙋшѝ бѣсо́вскїѧ и҆стꙋка́ны . тѣ́мже ꙗ҆́кѡ всѣ́мъ до́брымъ пѣснᲂсла́вимъ винꙋ̀ , и҆зба́вленїи ржⷭ҇тво́мъ тѝ . и҆ ны́нѣ . Б=г҃ᲂгла́сныи тѧ нѣ́кᲂгда прᲂви́дѧ сви́тᲂкъ , в̾ не́мже сло́во написа́сѧ чи́стаѧ пе́рстᲂмъ ѻ҆́ч҃имъ . тѣ́мже мᲂли́сѧ в̾ кни́зѣ написа́ти мѧ жи́зни , лꙋка́вᲂе писа́нїе грѣхо́въ мᲂи́хъ растерза́вши .

пѣ́снь , д҃ . і҆рмо́съ . Ѻ҆́ч҃а нѣ́дра не ѡ҆ста́вль , и҆ сᲂше́дъ на́ землю хрⷭ҇тѐ бж҃е , та́йнꙋ ᲂу҆слы́шахъ смᲂтре́нїѧ твᲂегѡ̀ , и҆ прᲂсла́вихъ тѧ чл҃кᲂлю́бче . Мл҃твꙋ к̾ ро́ждьшемꙋсѧ и҆з̾ тебѐ бцⷣе сᲂтвᲂрѝ , ꙗ҆́кѡ да ѡ҆брѧ́щемъ по́мᲂщь во́ времѧ ѡ҆бстᲂѧ́нїѧ , и҆́же стра́сти тᲂгѡ̀ сла́вѧщїи . Ми́ро и҆з̾ тебѐ прест҃а́ѧ чи́стаѧ и҆з̾лїѧ́вшеесѧ , сᲂдѣ́тель є҆стествꙋ̀ , бл҃гᲂво́нїѧ и҆спо́лни всѧ́ческаѧ , бжⷭ҇твеными разꙋмѣ́ньми , и҆ смра́днꙋю ле́сть прᲂгна̀ .= сла́ва . Ꙗ҆́кѡ мы́сленꙋю лѣ́ствицꙋ чи́стаѧ пᲂставле́и тѧ̀ , сꙋ́щимъ на землѝ , хрⷭ҇то́съ бг҃ъ , тᲂбо́ю къ нбⷭ҇нымъ бжⷭ҇твенымъ дѣѧ́нїемъ , вѣ́рныѧ вᲂз̾во́дитъ ꙗ҆́кѡ млрⷭ҇дъ . и҆ ны́нѣ . Ѻ҆=тѧгче́нъ бре́менемъ мно́зѣмъ грѣхо́внымъ , бл҃га́ѧ зᲂвꙋ́ ти , ѡ҆чище́нїе мѝ ꙗ҆ви́сѧ , бг҃а ро́ждьшаѧ ми́рꙋ взе́млющаго прегрѣше́нїѧ .

пѣ́снь , є҃ . і҆рмо́съ . Гдⷭ҇и бж҃е мо́й , и҆́з̾ нᲂщи ᲂу҆́треннюѧ тебѣ́сѧ мᲂлю̀ , пᲂда́ждь мѝ ѡ҆ставле́нїе прегрѣше́нїи мᲂи́хъ , и҆ ко свѣ́тꙋ твᲂи́хъ пᲂвелѣ́нїи , пꙋтѝ мᲂѧ̀ напра́ви мᲂлю́тисѧ . Мт҃и чл҃кᲂлю́бца и҆ бг҃а препѣ́таѧ бцⷣе , и҆́же вѣ́рᲂю тѧ̀ и҆ любо́вїю , пѣ́сньми вᲂсхвалѧ́ющихъ при́снѡ , ѡ҆чище́нїе твᲂи́ми мᲂльба́ми , прегрѣше́нїемъ мᲂи́мъ низ̾пᲂслѝ . Пречⷭ҇таѧ бцⷣе , прїѧ́телище сꙋ́щи не и҆змѣ́ннаго свѣ́та , и҆ хра́мъ бжⷭ҇твеныѧ зарѝ , мᲂю̀ дш҃ꙋ ѡ҆мраче́нꙋю свѣ́тᲂмъ сѝ прᲂсвѣтѝ мᲂлю́сѧ .= сла́ва . Гдⷭ҇и бж҃е мо́й , и҆́же бы́ти чл҃къ и҆зво́ливыи , мᲂлю́сѧ бл҃гᲂвᲂлѝ спасти́ мѧ блꙋ́днаго , ра́ди пречⷭ҇то ро́ждьшїѧ тѧ̀ дв҃ы , и҆ чⷭ҇тыѧ ѻ҆трᲂкᲂви́цы . и҆ ны́нѣ . В=лⷣчце бг҃ᲂмт҃и , мᲂи́мъ прегрѣше́нїемъ пᲂда́ждь прᲂще́нїе , ꙗ҆́же жи́знь сᲂста́внꙋю ми́рᲂви ро́ждьшаѧ , пренепᲂро́чнаѧ .

пѣ́снь , ѕ҃ . і҆рмо́съ . Пла́вающагѡ въ мᲂлвѣ̀ жите́йскихъ сꙋ́етїи , и҆ съ кᲂрабле́мъ пᲂтᲂплѧ́ема грѣхѝ , и҆ дш҃етлѣ́ннꙋ звѣ́рю примѣта́ема , ꙗ҆́кѡ і҆ѡ́на хрⷭ҇тѐ вᲂпїю́ ти , ѿ сме́ртныѧ глꙋбины̀ вᲂз̾веди́ мѧ . Ѿ тлѝ сме́рти , и҆ є҆́же ѿ а҆да́ма грѣха̀ , твᲂи́мъ и҆зба́вихᲂмсѧ бцⷣе без̾сѣ́меннымъ ржⷭ҇тво́мъ . бг҃ъ бо вкꙋ́пѣ , и҆ чл҃къ є҆ди́ныи , то́й же и҆ сн҃ъ сы́и , и҆збавле́нїе сᲂгрѣше́нїи вѣ́рнымъ да́рꙋѧ . Мᲂи́хъ прегрѣше́нїи влⷣчце , раздерѝ рꙋкᲂписа́нїе , въ кни́зѣ мѧ спасе́ныхъ написа́вши , бжⷭ҇твеными мл҃твами ти , ꙗ҆́кѡ да во хвале́нїи тѧ̀ пᲂю̀ , ст҃ѣ́йшꙋю херꙋви́мъ сꙋ́щꙋю .= сла́ва . Ѿринᲂве́нныѧ дре́вле , пра́веднымъ тѝ сꙋдо́мъ хрⷭ҇тѐ ѿ твᲂегѡ̀ лица̀ , призва̀ плᲂтьски́мъ прише́ствїемъ ꙗ҆́кѡ млрⷭ҇дъ , и҆ ны́нѣ бл҃же сᲂгрѣ́шшїѧ прїимѝ на́съ , и҆ ѿ ѕѡ́лъ премѣнѝ . и҆ ны́нѣ . Ѡ҆=чище́нїе ро́ждьшꙋю , и҆ грѣ́шникѡмъ бл҃гᲂда́телѧ , дв҃о пречⷭ҇таѧ мᲂлю́ тѧ , вины̀ без̾мѣ́рныхъ прегрѣше́нїи мᲂи́хъ раз̾рѣшѝ мт҃рьнею тѝ мл҃твᲂю , и҆́маши бо ꙗ҆́кѡ мт҃и к̾ сн҃ꙋ є҆́же мᲂщѝ .

Гдⷭ҇и пᲂми́лꙋй , гⷤ . сла́ва , и҆ ны́нѣ . сѣда́ленъ , гла́съ , з҃ . Пᲂд̾ кро́въ тво́й всѝ земнᲂро́днїи прибѣга́емъ , и҆зба́ви вѣ́чнагѡ ѻ҆гнѧ̀ , дш҃а на́ша бл҃га́ѧ .

пѣ́снь , з҃ . і҆рмо́съ . Пе́щь ѻ҆́трᲂцы ѻ҆гнепа́льнꙋ , дре́вле хла́дъ дѣ́ющꙋ пᲂказа́ша , є҆ди́нъ бг҃ъ пᲂю́ще и҆ гл҃юще , ѻ҆ц҃ъ на́шихъ бж҃е блгⷭ҇ве́нъ є҆сѝ . Ѡ҆тѧгче́ныи ᲂу҆́мъ мо́й сно́мъ , всенепᲂро́чнаѧ , къ бл҃ги́мъ дѣ́ланїемъ вᲂз̾дви́гни , ꙗ҆́кѡ да ᲂу҆блажа́ю тѧ чⷭ҇тнѣ́йшꙋю всѧ́кїѧ тва́ри . Ю҆́нїи трїѐ ѻ҆́трᲂцы , пᲂсредѝ пе́щи твᲂѐ прᲂѡ҆бража́хꙋ ржⷭ҇тво̀ , не ѡ҆пали́сѧ ᲂу҆́бѡ ѻ҆́гнь ро́ждьши чⷭ҇таѧ . тѣ́мже ве́щныѧ мѝ стра́сти срⷣца пᲂпалѝ .= сла́ва . Въ жена́хъ тѧ̀ кра́снꙋ и҆ дᲂбрꙋ̀ , прекра́сныи гдⷭ҇ь разꙋмѣ́въ , и҆з̾ тебѐ вᲂплᲂти́сѧ . тᲂгѡ̀ ᲂу҆́бѡ мᲂлѝ пречⷭ҇та́ѧ ѻ҆трᲂкᲂви́це спасти́ мѧ . и҆ ны́нѣ . Б=жⷭ҇твенаѧ рᲂса̀ и҆з̾ тебѐ прᲂше́дши , и҆ста́ѧвшїѧ зно́емъ грѣхо́внымъ , ѡ҆рᲂша́етъ пренепᲂро́чнаѧ . тѣ́мже тѧ̀ мᲂлю̀ , и҆ста́ѧвшꙋю дш҃ꙋ мᲂю̀ ѡ҆рᲂсѝ .

пѣ́снь , и҃ . і҆рмо́съ . Не ѡ҆па́льна ѻ҆гне́мъ въ сина́и прича́щшисѧ , кꙋпина̀ бг҃а пᲂказа̀ , медленнᲂѧзы́чнꙋ и҆ гꙋгни́вꙋ мѡѷсе́ᲂви . дѣ́ти рве́нїемъ бж҃їимъ вмѣта́емыѧ во ѻ҆́гнь пѣвцы̀ пᲂказа̀ , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . Не ѡ҆па́льна ѻ҆гне́мъ в̾ сина́и бесѣ́дᲂвавши кꙋпина̀ , твᲂѐ пᲂказа̀ стра́ннᲂе ржⷭ҇тво̀ , бг҃ᲂви́дцꙋ мѡѷсе́ю . тѣ́мже ᲂу҆ди́вльсѧ стра́ннᲂмꙋ ржⷭ҇твꙋ́ ти чⷭ҇таѧ , ра́дꙋѧсѧ вᲂпїѧ́ше , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . Оу҆мерщве́ныи мо́й ᲂу҆́мъ грѣхо́мъ , ꙗ҆́же живо́тъ ро́ждьшаѧ чⷭ҇таѧ дв҃о ѡ҆живᲂтвᲂрѝ , и҆ спасѝ и҆́же к̾ бг҃ꙋ премѣне́нїи твᲂи́ми мт҃рьскими , прⷭ҇нѡ мѧ̀ пᲂю́ща , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки .= сла́ва . И҆мѣ́ю тѧ чⷭ҇таѧ в̾но́щи и҆ во́дни , храни́тельницꙋ не ѿстꙋ́пнꙋ мы́сленыхъ и҆ ви́димыхъ вра́гъ , ника́кᲂже навѣ́та ѕла̀ и҆ лꙋка́ва ᲂу҆жаса́юсѧ , пᲂѧ̀ хрⷭ҇то́ви , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . и҆ ны́нѣ . Ѿ= свᲂегѡ̀ чл҃кᲂлю́бїѧ , сн҃ъ тво́й бцⷣе ꙗ҆́кѡ бл҃гъ преклᲂнѧ́емь , тѧ̀ пᲂдадѐ по́мᲂщь на врагѝ , и҆ цѣльбꙋ̀ страсте́й , вѣ́рᲂю зᲂвꙋ́щимъ , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки .

пѣ́снь , ѳ҃ . і҆рмо́съ . Нетлѣ́нїѧ и҆скꙋше́нїемъ ро́ждьшаѧ , и҆ всехитрецꙋ̀ сло́вꙋ пло́ть взаимда́вшаѧ , мт҃и без̾мꙋ́жнаѧ дв҃о бцⷣе , прїѧ́телище непᲂстᲂѧ́ннагѡ селѡ̀ невмѣсти́магѡ , зижди́телѧ свᲂегѡ̀ тѧ̀ велича́емъ . Неѡ҆кра́дши бᲂга́тства дв҃ьства свᲂегѡ̀ , мт҃и пло́тїю ꙗ҆ви́сѧ вседержи́телѧ , невѣ́сто мꙋженеи҆скꙋ́на дв҃о бцⷣе . вᲂспитѣ́вши ꙗ҆́кѡ младѧ̀ , пита́ющаго ꙗ҆́кѡ зижди́телѧ ве́сь ми́ръ и҆ ѡ҆сщ҃а́юща . Чл҃кᲂлю́бнѣйшее сло́во ро́ждьши дв҃о , и҆́же грѣхѝ ми́ра взе́млющаго , сегѡ̀ мᲂлѝ , на́мъ низ̾пᲂсла́ти грѣхо́въ разрѣше́нїе , вѣ́рᲂю несꙋмѣ́ннᲂю по́ дᲂлгꙋ тѧ̀ блажа́щимъ .= сла́ва . Грѣхᲂлюби́въ сы́и и҆ трепе́щꙋ и҆ бᲂю́сѧ , да не внеза́пꙋ кᲂне́цъ житїѧ̀ пᲂсти́гнетъ мѧ̀ чⷭ҇таѧ влⷣчце , всѣ́мъ ѡ҆би́димымъ пред̾ста́тельнице . и҆ ѻ҆́бразы мѧ̀ пᲂкаѧ́нїѧ ᲂу҆крѣпи́ти нн҃ѣ ᲂу҆мᲂле́на бꙋ́ди . и҆ ны́нѣ . Да не во ѻ҆́гнь по́слеши мѧ̀ ᲂу҆гᲂто́ванныи мнѣ̀ , мо́литъ тѧ̀ дв҃о ро́ждьшаѧ тѧ̀ , и҆ бжⷭ҇твеныи беспло́тныи ли́къ . а҆пⷭ҇ли прⷪ҇ро́цы мч҃нцы , и҆ сщ҃еннᲂнача́льницы , и҆ дс҃и пра́ведныхъ , всеще́дре и҆ мнᲂгᲂмлⷭ҇тиве . =та́же , дᲂсто́йнѡ є҆́сть . и҆ про́чее , ѡ҆бы́чно . и҆ ѿпꙋ́стъ .

Въ четверто́къ , на ᲂу҆́трени . по а҃ , стихᲂло́гїи . сѣда́льны , а҆пⷭ҇льски . гла́съ , з҃ . Дѣ́латели селꙋ̀ свᲂемꙋ̀ , ꙗ҆ви́лъ є҆сѝ а҆пⷭ҇лы свᲂѧ̀ сло́ве , пᲂсѣка́юща и҆́дᲂлы . тѣ́мже тѧ̀ влⷣкꙋ въ ꙗ҆зы́цѣхъ прᲂпᲂвѣ́давше , бл҃гᲂче́стнѡ вᲂз̾вели́чиша . сти́хъ : во всю̀ зе́млю и҆зыдо́ша веща́нїѧ и҆́хъ , и҆ в̾ кᲂнцы̀ вселе́нныѧ гл҃ы и҆́хъ . Дѣ́латели селꙋ̀ свᲂемꙋ̀ , ꙗ҆ви́лъ є҆сѝ а҆пⷭ҇лы свᲂѧ̀ сло́ве , пᲂсѣка́юща и҆́дᲂлы . тѣ́мже тѧ̀ влⷣкꙋ в̾ ꙗ҆зы́цѣхъ прᲂпᲂвѣ́давше , бл҃гᲂче́стнѡ вᲂз̾вели́чиша .= сла́ва , и҆ нн҃ѣ , боⷢ҇ . А҆́=ще и҆ мт҃рь тѧ̀ тва́рь пᲂзна̀ , но дв҃ꙋ тѧ̀ зижди́тель пᲂказа́лъ є҆́сть . рᲂди́ла бо є҆сѝ пло́тїю хрⷭ҇та̀ бг҃а , спаса́ющаго дш҃а на́ша .

по в҃ , стихᲂло́гїи , сѣда́льны . гла́съ , з҃ . Ꙗ҆́кѡ на́шемꙋ спасе́нїю ѡ҆кᲂрми́телїе , премꙋ́дрыѧ а҆пⷭ҇лы хрⷭ҇та̀ бг҃а , пѣ́ньми и҆ пѣ́сньми по́ дᲂлгꙋ пᲂчте́мъ , ті́и бо пре́лести нече́стїе ѿгна́вше , ми́ръ спасо́ша , ꙗ҆́кѡ самᲂви́дцы сло́ва , и҆ слꙋгѝ и҆ дрꙋ́зи и҆ бра́тїѧ бы́вше . сти́хъ : и҆спᲂвѣ́дѧтъ нб҃са̀ чꙋдеса̀ твᲂѧ̀ гдⷭ҇и . Ꙗ҆́кѡ на́шемꙋ спасе́нїю ѡ҆кᲂрми́телїе , премꙋ́дрыѧ а҆пⷭ҇лы хрⷭ҇та̀ бг҃а , пѣ́ньми и҆ пѣ́сньми по́ дᲂлгꙋ пᲂчте́мъ , ті́и бо пре́лести нече́стїе ѿгна́вше , ми́ръ спасо́ша , ꙗ҆́кѡ самᲂви́дцы сло́ва , и҆ слꙋгѝ и҆ дрꙋ́зи и҆ бра́тїѧ бы́вше . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Мч҃нцы твᲂѝ гдⷭ҇и , врага̀ пᲂбѣди́ша , и҆ ле́сть и҆́дᲂльскꙋю пᲂсрами́ша , вᲂѡ҆рꙋжи́вшесѧ крⷭ҇та̀ твᲂегѡ̀ си́лᲂю . тѣ́мже и҆ со а҆́нг҃лы вᲂспѣва́юще , вᲂпїю́тъ пᲂбѣ́днꙋю пѣ́снь , славᲂсло́вѧще тѧ̀ хрⷭ҇тѐ . тѣ́хъ мл҃твами пᲂда́ждь дш҃а́мъ на́шимъ ѡ҆чище́нїе и҆ ве́лїю млⷭ҇ть .= сла́ва , и҆ ны́нѣ , боⷢ҇ . Р=а́дꙋисѧ и҆з̾ неѧ́же непрело́жнᲂе сло́во пло́ть бы́сть , и҆ всели́сѧ в̾ ны̀ . ра́дꙋисѧ чⷭ҇таѧ а҆пⷭ҇лѡмъ и҆ мч҃нкѡмъ ра́дᲂванїе , и҆ на́мъ вѣ́рнымъ спасе́нїе . ра́дꙋисѧ мт҃и хрⷭ҇та̀ бг҃а .

по г҃ , стихᲂло́гїи , сѣда́ленъ . гла́съ , з҃ . Оу҆ч҃нцы̀ гдⷭ҇ни всехва́льнїи , и҆́же пᲂд̾со́лнечнꙋю всю̀ ꙗ҆́кѡ свѣти́ла ѡ҆зари́ша , во тмѣ̀ страсте́й мѧ , и҆ прегрѣше́нїи сꙋ́ща , прᲂсвѣти́тимисѧ мᲂли́тесѧ . сла́ва , и҆ ны́нѣ , боⷢ҇ . Ꙗ҆́же ми́рꙋ ра́дᲂсте , дв҃о свᲂегѡ̀ сн҃а непреста́ннѡ со а҆пⷭ҇лы мᲂлѝ , прᲂще́нїе дарᲂва́ти на́шимъ прегрѣше́нїемъ , и҆ житїю̀ и҆справле́нїе .

Кано́нъ , ст҃ы́мъ сла́внымъ и҆ всехва́льнымъ а҆пⷭ҇лѡмъ . твᲂре́нїе ѳео́фанᲂво . гла́съ , з҃ . пѣ́снь , а҃ . і҆рмо́съ . Ма́нїемъ ти на зе́менъ ѻ҆́бразъ прелᲂжи́сѧ , пе́рвїе разлива́емᲂе вᲂдно́е є҆стество̀ гдⷭ҇и . тѣ́мже немо́кренно ше́ствᲂвавъ і҆и҃ль , пᲂе́тъ тебѣ̀ пѣ́снь пᲂбѣ́днꙋю . запѣ́въ : ст҃і́и а҆пⷭ҇ли мᲂли́те бг҃а ѡ҆ на́съ . Ма́нїемъ є҆́же къ бжⷭ҇твенᲂмꙋ бг҃ᲂви́дни бы́вше , бо́ги сᲂкрꙋши́сте без̾бо́жныхъ , и҆ къ бжⷭ҇твенѣй всѣ́хъ вᲂз̾двиго́сте любвѝ , вѣ́рᲂвавшихъ бг҃ᲂви всечⷭ҇тні́и . двⷤа . Со́ль ꙗ҆́кᲂже нарече́ни бы́вше все́й землѝ , бг҃ᲂгл҃ивїи гдⷭ҇ни а҆пⷭ҇ли , сᲂгни́тїе ᲂу҆ста́вите , и҆ всѐ мᲂегѡ̀ срⷣца ѡ҆бꙋѧ́нїе лю́тᲂе и҆сцѣли́те . Всѣ́хъ сꙋдїѧ̀ пра́веднѣйшїи , є҆гда̀ хо́щетъ во втᲂро́мъ прише́ствїи с̾ ва́ми сѣ́сти бжⷭ҇твенїи а҆пⷭ҇ли , тᲂгда̀ всѧ́кᲂгѡ ѡ҆сꙋжде́нїѧ на́съ и҆зба́вите .= боⷢ҇ . П=речи́стаѧ бцⷣе , со беспло́тными а҆́нг҃лы , и҆ прᲂро́ки и҆ мч҃нки , и҆ а҆пⷭ҇лы мᲂлѝ , ꙗ҆́кѡ да ѡ҆ставле́нїе прегрѣше́нїемъ прїи́мемъ , и҆ бᲂга́тꙋю млⷭ҇ть .

Дрꙋго́е пра́вило ст҃о́мꙋ , и҆ вели́кᲂмꙋ чꙋдᲂтво́рцꙋ нико́лѣ . твᲂре́нїе і҆ѡ́сифᲂво . і҆рмо́съ . Пᲂспѣ́шьствᲂвавша бг҃а во є҆ги́птѣ мѡѷсе́ѡви , и҆з̾вестѝ і҆и҃лѧ , тᲂгѡ̀ є҆ди́нагѡ вᲂспᲂе́мъ , ꙗ҆́кѡ прᲂсла́висѧ . запѣ́въ : ст҃лю хрⷭ҇то́въ нико́лае , мᲂлѝ бг҃а ѡ҆ на́съ . Прᲂсла́влено на землѝ преше́дъ житїѐ , тебѐ сла́вѧщїѧ нико́лае прича́стники та́мѡ сꙋ́щїѧ сла́вы сᲂтвᲂрѝ . Въ пꙋчи́нѣ лю́тыхъ пла́вающе , жите́йскихъ и҆скꙋше́нїи вᲂлна́ми , всебл҃же́нне ѡ҆бнᲂси́мы є҆смы̀ , ѿ ни́хже на́съ спасѝ . Рꙋ́кꙋ ми нн҃ѣ пᲂда́тельнꙋю по́мᲂщи пᲂда́ждь , ѻ҆́ч҃е нико́лае , ѿ вра́гъ ви́димыхъ же и҆ неви́димыхъ и҆зба́ви мѧ .= боⷢ҇ . И҆́=же невеще́ственыѧ слꙋгѝ сᲂтвᲂри́въ , и҆з̾ тебѐ бцⷣе ражда́етсѧ за млⷭ҇ть не и҆з̾рече́ннꙋю , чл҃кѡмъ ви́димь бы́сть .

пѣ́снь , г҃ . і҆рмо́съ . Въ нача́тцѣ небеса̀ всеси́льнымъ сло́вᲂмъ сѝ ᲂу҆тверже́и , гдⷭ҇и сп҃се , и҆ всетвᲂрѧ́щимъ дх҃ᲂмъ бж҃їимъ всю̀ си́лꙋ и҆́хъ , на недви́жимᲂмъ мѧ ка́мени и҆спᲂвѣ́данїѧ твᲂегѡ̀ ᲂу҆твердѝ . Ꙗ҆́кѡ нб҃са̀ сла́вꙋ бж҃їю ꙗ҆́кᲂже речѐ прᲂро́къ , пᲂвѣ́дꙋете бжⷭ҇твенїи ᲂу҆ченицы̀ , ᲂу҆ѧснѧ́юще є҆гѡ̀ бжⷭ҇твенᲂе вᲂплᲂще́нїе , и҆ страда́нїѧ премꙋ́дрїи , и҆́миже страсте́й и҆ сме́рти всѣ́хъ , и҆ тлѝ и҆зба́вите . Стрѣ́лы хрⷭ҇та̀ си́льнагѡ и҆з̾ѡ҆щре́ны ꙗ҆ви́стесѧ , ѿ стрѣ́лъ мѧ̀ лꙋка́вагѡ мꙋ́дрїи ᲂу҆ченицы̀ гдⷭ҇ни и҆зба́вите , и҆ ᲂу҆ѧ́звенᲂе лю́тѣ грѣхо́внымъ ѻ҆рꙋ́жїемъ мᲂѐ срⷣце и҆сцѣли́те . Прельще́наго мѧ лю́тѣ , и҆ ѻ҆де́жды ѡ҆бнаже́на бжⷭ҇твеныѧ , бжⷭ҇твеными ѻ҆де́ждами хрⷭ҇то́вы ᲂу҆ченицы̀ прᲂсвѣти́ти пᲂтщи́тесѧ , и҆́же вра́жїѧ кᲂва́рства ѡ҆бнажи́вше всѧ̀ , и҆ тᲂгѡ̀ в̾ стꙋ́дъ ѡ҆блеко́сте .= боⷢ҇ . И҆́=же си́лы нбⷭ҇ныѧ сᲂставле́и сло́вᲂмъ . и҆́же прᲂро́кѡмъ бл҃гᲂда́ть пᲂда́выи , и҆ ᲂу҆ченикѡ́мъ , и҆ всѣ́мъ мꙋ́ченикѡмъ . тѣ́хъ мл҃твами бж҃е , и҆ пречⷭ҇тыѧ ти мт҃ре спасѝ всѣ́хъ и҆ ᲂу҆ще́дри ꙗ҆́кѡ милᲂсе́рдъ .

и҆́нъ , і҆рмо́съ . Оу҆тверже́и нб҃са̀ сло́вᲂмъ сѝ , и҆ земно́е ѡ҆снᲂва́нїе ᲂу҆крѣ́пль на вᲂда́хъ мно́гихъ , ᲂу҆твердѝ мо́й ᲂу҆́мъ , в̾ во́лю твᲂю̀ є҆ди́не млрⷭ҇де . Ѡ҆ вселе́ннѣй принᲂсѧ̀ мᲂле́нїѧ , ѿ всѧ́кїѧ нꙋ́жды и҆ скᲂрбе́й без̾чи́сленыхъ , спасѝ на́съ ст҃е нико́лае . Свѧ́занныхъ не и҆збѣ́жно и҆з̾ темни́цы ꙗ҆́кᲂже и҆зба́вилъ є҆сѝ , и҆ ᲂу҆́зы растерза́въ ѕѡ́лъ мᲂи́хъ , мл҃твами сѝ , примирѝ бг҃ᲂви ст҃е нико́лае . Въ нᲂщѝ и҆ во́ дни застꙋ́пника тѧ нарица́емъ , на́ша мл҃твы принесѝ гдⷭ҇ви сᲂхранѧ́ѧ на́съ при́снѡ ст҃е нико́лае .= боⷢ҇ . К=лещѐ ꙗ҆́же бжⷭ҇твеныи ᲂу҆́гль прїе́мши въ бжⷭ҇твенѣй ᲂу҆тро́бѣ , ника́кᲂже ѡ҆пали́вшисѧ , пᲂпалѝ пречи́стаѧ на́ша прегрѣше́нїѧ .

пѣ́снь , д҃ . і҆рмо́съ . Ѻ҆́ч҃а нѣ́дра не ѡ҆ста́вль , и҆ сᲂше́дъ на́ землю хрⷭ҇тѐ бж҃е , та́йнꙋ ᲂу҆слы́шахъ смᲂтре́нїѧ твᲂегѡ̀ , и҆ прᲂсла́вихъ тѧ чл҃кᲂлю́бче . И҆́же ѻ҆ц҃ꙋ сᲂпресто́льныи сн҃ъ , на землѝ вᲂпло́щьсѧ ꙗ҆́кѡ чл҃къ , и҆збра̀ ва́съ ᲂу҆ченикѝ , є҆гѡ̀ бжⷭ҇тво̀ прᲂпᲂвѣ́дати всѣ́мъ ꙗ҆зы́кѡмъ . вⷤ . Въ сᲂдѣ́йствїе всѣ́хъ страсте́й , впа́дсѧ ᲂу҆мᲂвре́дно ѡ҆каѧ́нныи в̾ разбо́йники , и҆ срⷣцемъ ᲂу҆ѧзви́хсѧ , тѣ́мже мѧ̀ и҆сцѣли́те вра́чеве бᲂлѧ́щимъ а҆пⷭ҇ли . Ѿ страсте́й и҆зба́вите на́съ , и҆ ѿ бѣ́дъ лю́тыхъ и҆ скᲂрбе́й а҆пⷭ҇ли сла́внїи , и҆ ѿ всѧ́кїѧ напа́сти и҆ всебᲂлѣ́зненыѧ мꙋ́ки .= боⷢ҇ . Ꙗ҆́=же бг҃ꙋ мт҃и и҆з̾бра́ннаѧ , со а҆пⷭ҇лы сщ҃е́нными , и҆ мч҃нки , и҆ прⷪ҇рки мᲂли́сѧ , бѣ́дъ и҆ скᲂрбе́й и҆ прегрѣше́нїи и҆зба́витисѧ на́мъ .

и҆́нъ , і҆рмо́съ . Пᲂкры́ла є҆́сть нб҃са̀ хрⷭ҇тѐ смᲂтре́нїемъ твᲂи́мъ , дᲂбрᲂдѣ́тели не и҆зрече́нныѧ , мꙋ́дрᲂсти твᲂеѧ̀ чл҃кᲂлю́бче . Премꙋ́дрᲂстїю свᲂе́ю ѡ҆черни́въ , а҆́рїевъ ᲂу҆́мъ є҆́ресїю пᲂмраче́нныи , и҆ ѿ тᲂгѡ̀ прельща́емыхъ , нико́лае прᲂсвѣти́лъ є҆сѝ . Оу҆врачꙋ́й ми мно́гїѧ стрꙋ́пы бл҃гᲂпрїѧ́тными ти мл҃твами , бг҃ᲂбл҃же́нне ѻ҆́ч҃е нико́лае , и҆ срⷣце мᲂѐ прᲂсвѣтѝ . Оу҆мертви́въ страстна́ѧ взыгра́нїѧ , ѿ ни́хже мѧ̀ ᲂу҆мерщве́ннаго , мл҃твами тѝ всебл҃же́нне ѡ҆живи́въ , и҆ но́ва сᲂтвᲂрѝ .= боⷢ҇ . Р=ᲂдила̀ є҆сѝ пло́тїю без̾лѣ́тнаго , є҆го́же мᲂлѝ , мнᲂгᲂлѣ́тныхъ ѕѡ́лъ на́съ и҆зба́вити , пᲂю́щихъ тѧ̀ всенепᲂро́чнаѧ .

пѣ́снь , є҃ . і҆рмо́съ . Гдⷭ҇и бж҃е мо́й , и҆́з̾ нᲂщи ᲂу҆́треннюѧ тебѣ́сѧ мᲂлю̀ , пᲂда́ждь мѝ ѡ҆ставле́нїе прегрѣше́нїи мᲂи́хъ , и҆ ко свѣ́тꙋ твᲂи́хъ пᲂвелѣ́нїи , пꙋтѝ мᲂѧ̀ напра́ви мᲂлю́тисѧ . Гдⷭ҇и бж҃е мо́й , и҆́же а҆пⷭ҇лѡмъ свᲂи́мъ ми́ръ дре́вле дарᲂва́выи , тѣ́хъ мл҃твами смире́нїе да́рꙋй всѣ́мъ , и҆ прегрѣше́нїемъ прᲂще́нїе . двⷤа . Гдⷭ҇и бж҃е мо́й , свѣ́дыи сᲂгрѣше́нїѧ дш҃и мᲂеѧ̀ , и҆ не и҆спра́вленыи нра́въ срⷣца мᲂегѡ̀ , тꙋ́не мѧ ᲂу҆ще́дривъ спасѝ , а҆пⷭ҇лъ мᲂльба́ми . Гдⷭ҇и бж҃е мо́й , и҆́же разбо́йника , и҆ блꙋдни́цꙋ сᲂгрѣши́вшꙋю , мно́гїѧ ра́ди спа́слъ є҆сѝ бл҃гᲂсти , мл҃твами твᲂи́хъ а҆пⷭ҇лъ , и҆ менѐ блꙋ́днаго ᲂу҆ще́дри .= боⷢ҇ . Г=дⷭ҇и бж҃е мо́й , рᲂжде́исѧ ѿ дв҃ы не и҆скꙋсᲂбра́чныѧ , тᲂѧ̀ мл҃твами и҆ а҆пⷭ҇лъ твᲂи́хъ , ѡ҆чище́нїе сᲂгрѣше́нїемъ ми да́ждь и҆ бꙋ́дꙋщїѧ и҆зба́ви мꙋ́ки .

и҆́нъ , і҆рмо́съ . Оу҆́треннюетъ дх҃ъ мо́й к̾ тебѣ̀ хрⷭ҇тѐ бж҃е , занѐ свѣ́тъ пᲂвелѣ́нїѧ твᲂѧ̀ , бы́ша и҆сцѣле́нїѧ рабо́мъ твᲂи́мъ чл҃кᲂлю́бче . Сᲂвѣ́ты ѻ҆́ч҃е пᲂд̾виза́емыѧ прⷭ҇нѡ на ны̀ , ненака́заныхъ челᲂвѣ́къ , твᲂи́ми мл҃твами нико́лае без̾дѣ́льны сᲂтвᲂрѝ . Сᲂꙋ́зы ѕѡ́лъ на́шихъ расто́ргни твᲂи́ми мл҃твами , свѧза́выи ѕло́бꙋ дш҃етлѣ́ннагѡ ѕмі́ѧ , всест҃ы́и нико́лае . И҆́же нра́вᲂмъ при́снѡ сᲂгрѣша́ющїи , и҆ мно́жествᲂмъ лю́тыхъ сᲂдержи́мїи ѻ҆́ч҃е , пред̾ста́телѧ тѧ̀ нико́лае те́пла призыва́емъ .= боⷢ҇ . М=р҃і́е гжⷭ҇е всеѧ̀ тва́ри , ѿ врага̀ без̾стꙋ́днѡ ѡ҆блада́ти и҆́щꙋща смире́нᲂе срⷣце мᲂѐ , бг҃ᲂрᲂди́тельнице до кᲂнца̀ свᲂбᲂдѝ .

пѣ́снь , ѕ҃ . і҆рмо́съ . Пла́вающагѡ въ мᲂлвѣ̀ жите́йскихъ сꙋ́етїи , и҆ съ кᲂрабле́мъ пᲂтᲂплѧ́ема грѣхѝ , и҆ дш҃етлѣ́ннꙋ звѣ́рю примѣта́ема , ꙗ҆́кѡ і҆ѡ́на хрⷭ҇тѐ вᲂпїю́ ти , ѿ сме́ртныѧ глꙋбины̀ вᲂзведи́ мѧ . Твᲂе́ю мꙋ́дрᲂстїю бжⷭ҇твенїи ᲂу҆ченицы̀ бы́вше , є҆́ллинскꙋю ѡ҆бъюро́диша премꙋ́дрᲂсть и҆ мꙋдреца̀ ѕло́бы пᲂгꙋби́ша . и҆ в̾ невѣ́дѣнїи блꙋдѧ́щїѧ , свѣ́тᲂмъ бл҃гᲂче́стїѧ премꙋ́дрїи прᲂсвѣти́ша . вⷤ . И҆́же петро́во дре́вле слеза́ми прегрѣше́нїе ѡ҆чи́стивъ , тᲂгѡ̀ мл҃твами дш҃и мᲂеѧ̀ не и҆сче́тнаѧ сᲂгрѣше́нїѧ ѡ҆чи́сти без̾мѣ́рнагѡ тѝ ра́ди бл҃гᲂꙋтро́бїѧ , и҆ премно́гїѧ хрⷭ҇тѐ бл҃гᲂсты́ни . И҆́же ниневи́тѧны дре́вле пᲂка́ѧвшїѧсѧ ᲂу҆ще́дривъ , и҆ менѐ ѻ҆бы́чнымъ сѝ млрⷭ҇дїемъ пᲂми́лꙋй а҆пⷭ҇лъ твᲂи́хъ ра́ди . и҆ да не за мно́жество прегрѣше́нїи , и҆зба́вителю мно́жество прилᲂжи́ши мꙋче́нїѧ .= боⷢ҇ . Ꙗ҆́=же свѣ́тъ ро́ждьшаѧ , прᲂсвѣтѝ дш҃ꙋ мᲂю̀ ѡ҆мраче́нꙋю страстьмѝ , и҆ мᲂли́сѧ со а҆пⷭ҇лы со прⷪ҇рки же и҆ мч҃нки , ѿ всѧ́кᲂгѡ грѣха̀ и҆ вре́да , и҆ всѧ́кїѧ ѕло́бы вра́жїѧ и҆зба́вити мѧ .

и҆́нъ , і҆рмо́съ . І҆ѡ́на и҆́з̾ чрева а҆́дᲂва вᲂпїѧ́ше , живо́тъ мо́й и҆з̾ и҆стлѣ́нїѧ свᲂбᲂдѝ , мы́ же тѝ вᲂпїе́мъ , всемᲂгі́и сп҃се пᲂми́лꙋй на́съ . Разᲂри́лъ є҆сѝ сме́рти непра́ведныи сꙋ́дъ , и҆ спа́слъ є҆сѝ млⷭ҇тїю сѝ ѻ҆́ч҃е нико́лае хᲂтѧ́щїѧ ᲂу҆́мрети , ꙗ҆́кѡ те́плыи пᲂмо́щникъ призыва́ющимъ тѧ̀ . Недꙋ́ги дꙋ́шъ на́шихъ ᲂу҆ти́ши , и҆ ᲂу҆ста̀ ѿверза́ющаѧсѧ в̾сꙋ́е на лю́бѧщихъ тѧ̀ , сщ҃е́ннѣйшїи па́стырю заградѝ . Па́жить го́рькꙋю ѕлᲂче́стїѧ а҆́рїева пᲂтреби́лъ є҆сѝ нико́лае , раствᲂре́нїемъ слᲂве́съ твᲂи́хъ . правᲂсла́внымъ ᲂу҆тверже́нїе ты̀ бы́сть .= боⷢ҇ . О=у҆врачꙋ́й всенепᲂро́чнаѧ не и҆сцѣ́льнѡ бᲂлѧ́щꙋю ѻ҆каѧ́ннꙋю дш҃ꙋ мᲂю̀ , жите́йскими лестьмѝ , и҆ мно́гихъ грѣхѡ́въ ѡ҆б̾стᲂѧ́нїи .

пѣ́снь , з҃ . і҆рмо́съ . Пе́щь ѻ҆́трᲂцы ѻ҆гнепа́льнꙋ , дре́вле хла́дъ дѣ́ющꙋ пᲂказа́ша , є҆ди́нъ бг҃ъ пᲂю́ще и҆ гл҃юще , ѻ҆ц҃ъ на́шихъ бж҃е блгⷭ҇ве́нъ є҆сѝ . Пе́щь дре́вле го́рькагѡ без̾бо́жїѧ рᲂсо́ю бжⷭ҇твенагѡ прᲂпᲂвѣ́данїѧ ᲂу҆гаси́сте сла́внїи а҆пⷭ҇ли , зᲂвꙋ́ще превᲂзнᲂси́мыи ѻ҆ц҃ъ на́шихъ бж҃е бл҃гᲂслᲂве́нъ є҆сѝ . двⷤа . Лю́таго мѧ хрⷭ҇тѐ грѣха̀ , є҆́же во а҆́дѣ мꙋче́нїѧ , и҆ є҆́же в̾ гее́ннѣ бᲂлѣ́зни и҆схитѝ , и҆ спаси́ мѧ мᲂлю́сѧ мᲂльба́ми сло́ве а҆пⷭ҇лъ твᲂи́хъ . Сло́ва мре́жею , и҆з̾ глꙋбины̀ невѣ́дѣнїѧ чл҃ки ᲂу҆лᲂви́вше , и҆ пᲂтᲂплѧ́ема мѧ без̾мѣ́рными прегрѣше́нїи и҆ ѡ҆бꙋрева́ема , ᲂу҆ченицы̀ хрⷭ҇то́вы спаси́те .= боⷢ҇ . С=о а҆́нг҃лы и҆ с̾ мч҃нки и҆ а҆пⷭ҇лы всенепᲂро́чнаѧ , свᲂегѡ̀ сн҃а мᲂлѝ и҆ гдⷭ҇а , спасти́сѧ рабо́мъ тѝ , ѿ напа́стей всѧ́ческихъ и҆ скᲂрбе́й .

и҆́нъ , і҆рмо́съ . Пе́щь гᲂрѧ́щꙋю прᲂхлади́лъ є҆сѝ сп҃се , и҆ ѻ҆́трᲂки же спасѐ хва́лѧщїѧ тѧ и҆ гл҃юща , блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ . Красᲂта̀ цр҃ко́внаѧ бы́въ премꙋ́дре нико́лае , всѧ́кїѧ мѧ не красᲂты̀ страсте́й без̾че́стныхъ и҆зба́ви , бл҃гᲂда́телѧ всегѡ̀ ми́ра ᲂу҆мᲂли́въ ст҃лю . Тꙋ́чами мл҃твъ твᲂи́хъ нико́лае мꙋ́дре , всѣ́хъ на́съ напо́й срⷣца̀ , принᲂси́ти тебѣ̀ плᲂды̀ бжⷭ҇твеныѧ , хᲂда́тайствꙋющемꙋ жи́знь не и҆з̾живꙋ́щꙋю . Прᲂсвѣтѝ твᲂи́ми мл҃твами на́ша пᲂмышле́нїѧ , вѣ́рнѡ ᲂу҆́тренюющїѧ и҆ бг҃а сла́вѧщїѧ , разрꙋши́выи мᲂльба́ми ти , а҆ртеми́дино ка́пище .= боⷢ҇ . В=сѧ́къ ꙗ҆зы́къ вѣ́рᲂю сла́витъ тѧ̀ чⷭ҇таѧ , сла́вꙋ сꙋ́щꙋю и҆ пᲂхвалꙋ̀ ро́дꙋ на́шемꙋ , и҆ наста́вницꙋ заблꙋ́ждьшимъ , бцⷣе пребл҃же́ннаѧ .

пѣ́снь , и҃ . і҆рмо́съ . Не ѡ҆па́льна ѻ҆гне́мъ въ сина́и прича́щшисѧ , кꙋпина̀ бг҃а пᲂказа̀ , медленнᲂѧзы́чнꙋ и҆ гꙋгни́вꙋ мѡѷсе́ᲂви . дѣ́ти рве́нїемъ бж҃їимъ вмѣта́емыѧ во ѻ҆́гнь пѣвцы̀ пᲂказа̀ , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . Оу҆́глїе ѻ҆гне́мъ разꙋ́мнымъ вже́гшесѧ , ꙗ҆́кᲂже тро́стїе всю̀ и҆́дᲂльскꙋю ле́сть пᲂпали́ша хрⷭ҇то́ви ᲂу҆ченицы̀ , и҆ прᲂсвѣти́ша вѣ́рныхъ дꙋ́ши , зᲂвꙋ́ще всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . двⷤа . Ѡ҆мраче́нꙋю дш҃ꙋ мᲂю̀ грѣхо́мъ , и҆ ѡ҆бъюро́дѣвшее страстьмѝ без̾че́стїѧ ны́нѣ прᲂсвѣти́те срⷣце мᲂѐ , свѣ́тꙋ приснᲂсꙋ́щнᲂмꙋ прича́стницы хрⷭ҇то́ви а҆пⷭ҇ли , ꙗ҆́кѡ да не преста́ннѡ зᲂвꙋ̀ , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . Оу҆ѧ́звенꙋю ми дш҃ꙋ ꙗ҆дᲂви́тымъ го́рдагѡ ᲂу҆грызе́нїемъ , и҆́же ꙗ҆́звы пло́тїю прїе́мыи , и҆сцѣлѝ мл҃твами сщ҃е́нныхъ тѝ ᲂу҆чени́къ . и҆ спасѝ пᲂю́щїѧ всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки .= боⷢ҇ . Н=е ѡ҆па́льнѡ ро́ждьши ѻ҆́гнь , сᲂхрани́ла є҆сѝ дв҃о пречⷭ҇таѧ , тѣ́мже мᲂлѝ є҆го́же рᲂдила̀ є҆сѝ со беспло́тными ли́ки и҆ а҆пⷭ҇лы вѣ́рно спасти́сѧ пᲂю́щимъ , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки .

и҆́нъ , і҆рмо́съ . Сꙋ́щимъ в̾ пещѝ ѻ҆трᲂко́мъ пᲂдо́бѧщесѧ , дх҃о́внꙋю ро́сꙋ прїи́мше вѣ́рᲂю вᲂпїе́мъ , бл҃гᲂслᲂви́те дѣ́ла гдⷭ҇нѧ гдⷭ҇а . Въ ми́рѣхъ , мирᲂꙋха́ннᲂе тѣ́ло твᲂѐ , всест҃е нико́лае лежа́щее , ми́ро притѣка́ющимъ и҆стᲂча́етъ , и҆ ᲂу҆ставлѧ́етъ недꙋ́ги . Ми́рᲂви тѧ застꙋ́пника пᲂказа̀ , и҆́же ми́рꙋ твᲂре́цъ и҆ гдⷭ҇ь , тѣ́мже призыва́ющимъ тѧ̀ ны́нѣ нико́лае , ѡ҆брѣта́ешисѧ и҆зба́витель гᲂто́вѣйшїи . Нѣ́сть и҆́же призва́выи тѧ̀ в̾ ско́рбѣхъ , и҆ ско́рѡ не ѡ҆брѧ́щетъ ᲂу҆тѣше́нїѧ . тѣ́мжетисѧ мо́лимъ , всѧ̀ бᲂлѣ́зни на́ша нико́лае ѡ҆блегчѝ .= боⷢ҇ . Пᲂе́тъ всѧ́къ ꙗ҆зы́къ и҆ сла́витъ тѧ , дв҃о бг҃ᲂневѣ́сто , бг҃а бо препѣ́таго ро́ждьши , є҆го́же мᲂлѝ непреста́нно ѡ҆ дш҃а́мъ на́шихъ . =та́же , пѣ́снь бцⷣѣ . вели́читъ дш҃а мᲂѧ̀ гдⷭ҇а .= и҆ =пᲂкло́ны до землѝ .

пѣ́снь , ѳ҃ . і҆рмо́съ . Нетлѣ́нїѧ и҆скꙋше́нїемъ ро́ждьшаѧ , и҆ всехитрецꙋ̀ сло́вꙋ пло́ть взаимда́вшаѧ , мт҃и без̾мꙋ́жнаѧ дв҃о бцⷣе , прїѧ́телище непᲂстᲂѧ́ннагѡ селѡ̀ невмѣсти́магѡ , зижди́телѧ свᲂегѡ̀ тѧ̀ велича́емъ . Сн҃ᲂве свѣ́тꙋ и҆ дне́ви ва́съ ꙗ҆ви́лъ є҆́сть , и҆́же ѿ́ бг҃а ѻ҆ц҃а сло́во , то̀ вᲂз̾люби́вше бжⷭ҇твенїи а҆пⷭ҇ли , свѣти́ла вселе́ннѣй , бѣсо́мъ пᲂтреби́тели , наста́вницы заблꙋ́ждьшимъ , цр҃кви тве́рдаѧ ѡ҆снᲂва́нїѧ . двⷤа . Ра́ла слᲂвесѝ , и҆́же на вы́ѧхъ легча́йшее и҆́го нᲂси́вшїи , ѡ҆бнᲂви́те нн҃ѣ ѡ҆леденѣ́вшꙋю страстьмѝ дш҃ꙋ мᲂю̀ , и҆ пᲂкаѧ́нїѧ сѣ́менемъ , плᲂдᲂно́снꙋ тꙋ̀ сᲂдѣ́лайте . Закᲂнᲂпᲂлᲂже́нїихъ мѧ бжⷭ҇твеныхъ неради́вша , и҆ бы́вша мѧ бѣсо́мъ жили́ще , и҆ дѣ́лателище всѧ́кᲂгѡ грѣха̀ , ᲂу҆ще́дри мѧ сло́ве мᲂли́твами а҆пⷭ҇лъ твᲂи́хъ ꙗ҆́кѡ чл҃кᲂлю́бецъ . боⷢ҇ . Да мѧ̀ во ѻ҆́гнь непо́слеши ᲂу҆гᲂто́ванныи мнѣ̀ , мо́литъ тѧ̀ дв҃аѧ тебѐ ро́ждьшаѧ , и҆ бжⷭ҇твенїи беспло́тнїи ли́цы , а҆пⷭ҇ли , прⷪ҇ро́цы , и҆ мч҃нцы , ст҃лїе , и҆ дꙋ́си пра́ведныхъ , всеще́дре мнᲂгᲂми́лᲂстиве .

и҆́нъ , і҆рмо́съ . Вы́ше є҆стества̀ мт҃рь , и҆ по є҆стествꙋ̀ дв҃ꙋ , є҆ди́нꙋ в̾ жена́хъ бл҃гᲂслᲂве́нꙋю , пѣ́сньми вѣ́рнїи бцⷣꙋ велича́емъ . Пᲂслѣ́дᲂвавъ нра́вᲂмъ сщ҃е́нныхъ а҆пⷭ҇лъ , и҆ прⷭ҇то́лъ тѣ́хъ наслѣ́дᲂвалъ є҆сѝ ꙗ҆́кѡ ст҃ль че́стенъ , дᲂстᲂсла́вныи нико́лае . Ꙗ҆́кѡ ревни́телѧ тѧ̀ бжⷭ҇твенаго , и҆ пᲂмо́щника по всемꙋ̀ тебѐ призыва́ющимъ те́плѣ , во все́мъ ми́рѣ блаже́нне , твᲂре́цъ вели́ка пᲂказа̀ . Сᲂкрꙋше́нымъ срⷣцемъ вᲂпїе́мъ тѝ ѻ҆́ч҃е , ᲂу҆тѣше́нїе на́мъ бꙋ́ди в̾ ско́рбѣхъ , печа́ли разгᲂнѧ́ѧ всегда̀ ѿ дꙋ́шъ на́шихъ нико́лае . Сме́ртнᲂе пᲂсѣче́нїе , ꙗ҆́кᲂже сѣки́ра дре́вꙋ пред̾лежи́тъ тѝ ѽ дш҃е , нелѣни́сѧ ᲂу҆́бѡ пᲂкаѧ́нїѧ плᲂды̀ пᲂказа́ти бг҃ᲂви ᲂу҆се́рдьствꙋй .= боⷢ҇ . Н=ᲂси́вши нᲂсѧ́щаго всѧ́ческаѧ ст҃ы́ма тѝ рꙋка́ма , є҆го́же мᲂлѝ чи́стаѧ ѿ чꙋжа́гѡ ѕлᲂдѣ́йства невре́днымъ на́мъ спасти́сѧ .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стⷯры , а҆пⷭ҇лѡмъ . гла́съ , з҃ . А҆пⷭ҇ли сла́внїи , стᲂлпѝ цр҃ко́внїи , и҆́стинѣ прᲂпᲂвѣ́дницы , свѣти́ла сꙋ́ще свѣ́тлаѧ , вы̀ ѻ҆гне́мъ дх҃о́внымъ всю̀ ле́сть пᲂпали́сте , челᲂвѣ́ческїи же ро́дъ прᲂсвѣти́сте . тѣ́мже мо́лимъ вы̀ , мᲂли́те сп҃са и҆ бг҃а на́шегѡ , ᲂу҆мири́ти ми́ръ и҆ спастѝ дш҃а на́ша .

сти́хъ : и҆спо́лнихᲂмсѧ за ᲂу҆́тра . А҆пⷭ҇ли хрⷭ҇то́вы дѣ́лателїе сп҃сᲂвы , крⷭ҇тъ ꙗ҆́кᲂже ра́ло на ра́мѣхъ нᲂсѧ́ще , ѡ҆леденѣ́вшꙋю зе́млю ѿ и҆́дᲂльскїѧ льстѝ ѡ҆чи́стивше , вѣ́рᲂю сло́во всѣ́ѧсте . вᲂи́стинꙋ дᲂсто́йнѡ пᲂчита́еми є҆стѐ ст҃і́и хрⷭ҇то́вы а҆пⷭ҇ли .

сти́хъ : и҆ бꙋ́ди свѣ́тлᲂсть . мⷱ҇ꙋ . Є҆ди́но ды́шꙋще , и҆ на є҆ди́но в̾зира́юще стрⷭ҇тᲂте́рпцы мч҃нцы , є҆ди́нъ пꙋ́ть живᲂта̀ ѡ҆брѣ́тше є҆́же за хрⷭ҇та̀ сме́рть . ра́вно ѡ҆бразꙋ́ющесѧ дрꙋ́гъ ко́ дрꙋгꙋ кᲂнчи́нᲂю . ѽле чꙋдесѝ ꙗ҆́кѡ сᲂкро́вища мꙋ́къ пред̾вᲂсхища́хꙋ . и҆ дрꙋ́гъ ко́ дрꙋгꙋ гл҃ахꙋ , ꙗ҆́кѡ а҆́ще не ны́нѣ ᲂу҆́мремъ , ᲂу҆́мремъ же всѧ́кѡ , и҆ бытїю̀ до́лжнаѧ пᲂслꙋ́жимъ , претерпи́мъ бѣдꙋ̀ любᲂче́стїемъ ѻ҆́бще всѝ и҆зво́ливше , и҆ сме́ртїю живо́тъ кꙋ́пимъ . мл҃твами и҆́хъ бж҃е пᲂми́лꙋй на́съ .

сла́ва , и҆ ны́нѣ , боⷢ҇ . Рᲂди́всѧ ѿ дв҃ы несказа́нно хрⷭ҇тѐ , и҆ прᲂсвѣти́лъ є҆сѝ сꙋ́щїѧ во тмѣ̀ , вᲂпїю́щїѧ гдⷭ҇и сла́ва тебѣ̀ .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= є҆ктенїѧ̀ . =та́же , ча́съ , а҃ . ѱалмы̀ , ѡ҆бы́чны . и҆ про́чее , и҆ кᲂне́чныи ѿпꙋ́стъ .

Въ четверто́къ , бл҃же́нны . гла́съ , з҃ .

Красе́нъ бѣ̀ и҆ до́бръ въ снѣ́дь , и҆́же менѐ ᲂу҆мертви́выи пло́дъ , хрⷭ҇то́съ є҆́сть дре́во живо́тнᲂе , ѿ него́ же ꙗ҆ды́и не ᲂу҆мира́ю . но вᲂпїю̀ с̾ разбо́йникᲂмъ , пᲂмѧни́ мѧ сп҃се во црⷭ҇твїи сѝ .

=бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . и҆з̾ =глꙋбины̀ ѕлᲂвѣ́рїѧ , ꙗ҆зы́къ стада̀ привлеко́сте премꙋ́дрїи к̾ вѣ́рѣ бг҃ᲂкра́снѣй , и҆ к̾ мы́сленѣй трапе́зѣ , ѡ҆бро́къ мнᲂгᲂразли́чныи , всѣ́хъ приведо́сте сла́внїи а҆пⷭ҇ли .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Ѡ҆мраче́нїе лю́тыѧ пре́лести , свѣ́тᲂмъ прᲂпᲂвѣ́данїѧ ѿгна́вше а҆пⷭ҇ли гдⷭ҇ни , срⷣца̀ бл҃гᲂчести́выхъ прᲂсвѣти́ли є҆стѐ ꙗ҆́вѣ , тѣ́мже ва́съ пѣ́сньми бжⷭ҇твеными ᲂу҆блажа́емъ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Сѣко́ми на ᲂу҆деса̀ мече́мъ страда́льцы бжⷭ҇твенїи , не ѿсѣче́ни пребы́сте любвѐ и҆зба́вителѧ . к̾ немꙋ́ же вᲂсте́кше , ны́нѣ живетѐ въ ра́дᲂсти , всѝ нбⷭ҇нᲂю сла́вᲂю ѡ҆блистава́еми .

сла́ва . Зло́бныи тли́тель , ро́да чл҃ческагѡ ѡ҆бдержи́тъ мѧ̀ , мл҃твами прᲂпᲂвѣ́дникъ твᲂи́хъ , всеси́льнаѧ трⷪ҇це , и҆схи́ти мѧ̀ ѿ гᲂрта́ни є҆гѡ̀ , да велича́ю твᲂю̀ без̾мѣ́рнꙋю ми́лᲂсть .

и҆ ны́нѣ . Сᲂпресто́льна ѻ҆ц҃ꙋ сн҃а чⷭ҇таѧ дв҃о , ѿ чи́стыхъ тѝ крᲂве́й прᲂи҆звела̀ є҆сѝ , нᲂсѧ́щаго пло́ть ме́ртвенꙋю , ꙗ҆́кѡ да ѡ҆без̾сме́ртитъ сꙋщество̀ чл҃ческᲂе . тѣ́мже по́ дᲂлгꙋ тѧ̀ всѝ ᲂу҆блажа́емъ .