Глас 7 среда

Во вто́рникъ , ве́черъ . на гдⷭ҇и вᲂзва́хъ , стихѣ́ры , крⷭ҇тны . гла́съ , з҃ . =запѣ́въ : ꙗ҆́кѡ ѿ тебѐ ѡ҆чище́нїе є҆́сть . Д=ре́во и҆з̾гна́ мѧ дре́вле и҆з̾ раѧ̀ , ны́нѣ же дре́во к̾ раю̀ вᲂзведѐ , тебѣ̀ распе́ншꙋсѧ хрⷭ҇тѐ .

ᲂу҆пᲂва̀ дш҃а мᲂѧ̀ на́ гдⷭ҇а . Чꙋ́до стра́шно сᲂзда́нїю , ка́кѡ сᲂзда́тель пред̾стᲂѧ̀ , ѡ҆сꙋжа́етсѧ и҆ распина́етсѧ во спасе́нїе чл҃кѡмъ .

да ᲂу҆пᲂва́етъ і҆и҃ль на́ гдⷭ҇а . Крⷭ҇тѐ хрⷭ҇то́въ , а҆́нг҃лъ ст҃ы́хъ чꙋ́до , дїа́вᲂлꙋ же и҆ бѣсо́мъ вели́каѧ ꙗ҆́зва , спаса́й рабы̀ свᲂѧ̀ .

та́же , в̾ минѣ́и , стⷯры , ст҃о́мꙋ . а҆́ще ли нѣ́сть минѣ́и . и҆́ны , стихѣ́ры , прест҃ѣ́й бцⷣѣ . гла́съ , то́йже . =запѣ́въ : ѿ всѣ́хъ без̾зако́нїи є҆гѡ̀ . В=и́дѧщи прᲂсте́рта на́ древѣ а҆́гньца , нескве́рнаѧ а҆́гница и҆ дв҃аѧ , пᲂсредѣ̀ двᲂю̀ разбо́йникꙋ , ᲂу҆вы̀ мнѣ̀ вᲂпїѧ́ше сладча́йшее мᲂѐ ча́до . что̀ стра́ннᲂе сїѐ , и҆ пресла́внᲂе та́инство ; ка́кѡ тѧ̀ без̾зако́нныи сᲂбо́ръ на крⷭ҇тъ вᲂз̾дви́же , и҆ же́лчи напᲂѝ , ма́нны насыща́ющаго чл҃ки .

пᲂхвали́те є҆гѡ̀ всѝ лю́дїе . Є҆гда́ тѧ на крⷭ҇тѣ̀ пригвᲂжде́на , дв҃аѧ и҆ мт҃и твᲂѧ̀ ᲂу҆зрѣ̀ хрⷭ҇тѐ мо́й , сꙋдо́мъ закᲂнᲂпрестꙋ́пнымъ , ѿ і҆ꙋде́й на мѣ́стѣ ло́бнѣмъ , ᲂу҆вы̀ мнѣ̀ вᲂпїѧ́ше сн҃е мо́й любе́знѣйшїи , что̀ стра́ннᲂе видѣ́нїе сѐ ; ка́кѡ тѧ̀ ко крⷭ҇тꙋ̀ пригвᲂжда́ютъ дѣ́ти неразꙋ́мнїи є҆вре́йскїѧ всѣ́хъ гдⷭ҇а .

и҆ и҆́стина гдⷭ҇нѧ пребыва́етъ во́ вѣки . Є҆ди́нꙋ тѧ всест҃а́ѧ влⷣчце по ржⷭ҇твѣ̀ пᲂзна́хᲂмъ всѝ , дв҃ꙋ ꙗ҆́вльшꙋюсѧ . и҆ є҆го́же без̾ сѣ́мене ро́ждьши на́ древѣ ви́дѧщи , рꙋ́цѣ свᲂѝ во́лею пригвᲂзди́вша , пречⷭ҇таѧ пла́чꙋщи взыва́ше , во́лею дᲂлгᲂтерпѣли́ве ᲂу҆мира́еши , и҆збавлѧ́ѧ ѿ сме́рти всѣ́хъ пᲂю́щихъ тѧ̀ .

сла́ва , и҆ ны́нѣ , крⷭ҇тᲂбоⷢ҇ . Влⷣчце всепѣ́таѧ дв҃о ро́ждьшаѧ гдⷭ҇а , и҆́же за милᲂсе́рдїе на крⷭ҇тѣ̀ пригвᲂзди́вшагᲂсѧ , и҆ жи́зни стрꙋѝ и҆стᲂчи́вша ми́рꙋ , тᲂгѡ̀ ᲂу҆мᲂлѝ спасти́сѧ дш҃а́мъ на́шимъ , тебе́ бо є҆ди́нꙋ и҆́мамы вѣ́рнїи прибѣ́жище , стѣ́нꙋ и҆ застꙋпле́нїе . тѣ́мже и҆ притѣка́емъ к̾ пᲂкро́вꙋ твᲂемꙋ̀ .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стихѣ́ры , крⷭ҇тны . гла́съ , з҃ . Не к̾ тᲂмꙋ̀ вᲂз̾бранѧ́еми є҆смы̀ дре́ва живо́тнаго , ᲂу҆пᲂва́нїе и҆мꙋ́ще крⷭ҇тъ тво́й . гдⷭ҇и сла́ва тебѣ̀ .

сти́хъ : к̾ тебѣ̀ вᲂз̾ведо́хъ ѻ҆́чи . Пᲂвѣ́шенъ бы́въ на́ древѣ без̾сме́ртне , разрꙋши́лъ є҆сѝ сѣ́ти дїа́вᲂли , гдⷭ҇и сла́ва тебѣ̀ .

сти́хъ : пᲂми́лꙋй на́съ гдⷭ҇и . мⷱ҇ꙋ . Неради́вше ѡ҆ всѣ́хъ земны́хъ ст҃і́и мч҃нцы . и҆ на сꙋди́щи хрⷭ҇та̀ мꙋ́жески и҆спᲂвѣ́давше , вᲂз̾даѧ́нїѧ мꙋ́къ ѿ негѡ̀ прїѧ́сте . но ꙗ҆́кѡ и҆мꙋ́ще дерзнᲂве́нїе , тᲂгѡ̀ ᲂу҆мᲂли́те ꙗ҆́кѡ бг҃а всеси́льна дш҃и на́ша спастѝ , и҆́же прибѣга́ющимъ к̾ ва́мъ мо́лимсѧ .

сла́ва , и҆ ны́нѣ , крⷭ҇тᲂбоⷢ҇ . Свᲂегѡ̀ сн҃а на́ древѣ ви́дѧщи дре́вле , срⷣце свᲂѐ ѻ҆рꙋ́жїемъ печа́ли ᲂу҆ѧзвлѧ́ше пречⷭ҇таѧ .

таⷤ , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , крⷭ҇тᲂбоⷢ҇ . =во́ =гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Во вто́рникъ , на па́вечерницѣ . кано́нъ , прⷭ҇тѣ́й бцⷣѣ . гла́съ , з҃ . пѣ́снь , а҃ . і҆рмо́съ . Ма́нїемъ ти на зе́менъ ѻ҆́бразъ прелᲂжи́сѧ , пе́рвїе разлива́емᲂе вᲂдно́е є҆стество̀ гдⷭ҇и . тѣ́мже немо́кренно ше́ствᲂвавъ і҆и҃ль , пᲂе́тъ тебѣ̀ пѣ́снь пᲂбѣ́днꙋю . запѣ́въ : прест҃а́ѧ гжⷭ҇е бцⷣе спасѝ на́съ . Оу҆ста́ви бꙋ́рю сласте́й , и҆ страсте́й мᲂи́хъ , тишино́ю бжⷭ҇твеныѧ ти мᲂльбы̀ пренепᲂро́чнаѧ , ꙗ҆́кѡ да ти́химъ срⷣцемъ , твᲂѐ славᲂсло́влю не и҆з̾гл҃аннᲂе ржⷭ҇тво̀ .= Всѐ жела́нїе и҆ сла́дᲂсть спасе́нїѧ , ржⷭ҇тво́мъ твᲂи́мъ бы́сть бцⷣе влⷣчце , всѧ́кꙋ го́ресть ѿгᲂнѧ̀ , є҆́же ѿ страсте́й прегрѣше́нїи рабо́мъ твᲂи́мъ . сла́ва . И҆зба́ви мѧ пречⷭ҇таѧ , бѣсо́вскїѧ пре́лести , ѡ҆ѕлᲂбле́нїѧ же , и҆ вре́да , и҆ и҆скꙋше́нїѧ , да вѣ́рᲂю тѧ сла́влю , сꙋ́щꙋю по́ бз҃ѣ застꙋ́пницꙋ и҆ пᲂкро́въ мо́й . и҆ нн҃ѣ . Ꙗ҆=ви́сѧ при кꙋпинѣ̀ мѡѷсе́ю бж҃їи сло́ве , ꙗ҆́кѡ ѻ҆́гнь пᲂпалѧ́ѧ , и҆ не ѡ҆палѧ́ѧ же ѿ ню́дъ . є҆́же ѿ дв҃ы ржⷭ҇тво̀ твᲂѐ вᲂѡ҆бража́ѧ , є҆ѧ́же ра́ди чл҃ка вᲂѡ҆брази́лъ є҆сѝ .

пѣ́снь , г҃ . і҆рмо́съ . Въ нача́тцѣ небеса̀ всеси́льнымъ сло́вᲂмъ сѝ ᲂу҆тверже́и , гдⷭ҇и сп҃се , и҆ всетвᲂрѧ́щимъ дх҃ᲂмъ бж҃їимъ всю̀ си́лꙋ и҆́хъ , на недви́жимᲂмъ мѧ ка́мени и҆спᲂвѣ́данїѧ твᲂегѡ̀ ᲂу҆твердѝ . Вᲂз̾не́сшагᲂсѧ на́ крⷭ҇тъ , и҆ низ̾ло́жшаго а҆́да , бцⷣе сегѡ̀ прилѣ́жнѡ мᲂлѝ , ѡ҆ вѣ́рнѡ пᲂю́щихъ тѧ̀ всегда̀ , гла́сы и҆ пѣ́сньми сщ҃е́нными , наде́жꙋ ми́рꙋ , и҆ вѣ́рныхъ застꙋпле́нїе . Вы́шши нб҃съ , и҆ сла́внѣйши херꙋви́мъ , заче́нши рᲂдила̀ є҆сѝ бг҃а . тѣ́мже мᲂлѝ є҆гѡ̀ , прегрѣше́нїи и҆зба́вити мѧ̀ , и҆ ѡ҆сꙋже́нїѧ стра́шнаго , твᲂе́ю милᲂсе́рдᲂю мᲂльбо́ю , и҆ па́че сло́ва си́лᲂю твᲂе́ю .= сла́ва . И҆з̾мѣни́вшїѧ чл҃ки ѿ тлѝ сме́рти , ржⷭ҇тво́мъ твᲂи́мъ влⷣчце , тлѣ́нїѧ мѧ̀ страсте́й и҆ недꙋ́гъ и҆зба́ви , и҆ прегрѣше́нїи лю́тыхъ , и҆ живо́тъ нестарѣ́ющїисѧ да́рꙋй мѝ , бжⷭ҇твенымъ хᲂда́тайствᲂмъ сѝ . и҆ ны́нѣ . Н=е и҆змѣ́ннѡ чл҃кѡмъ ᲂу҆пᲂдо́бльшесѧ по всемꙋ̀ бж҃їи сло́ве , ѿ дв҃ы чⷭ҇тыѧ про́йде ꙗ҆́вѣ , и҆ всѣ́мъ ꙗ҆ви́лъ є҆сѝ бг҃ᲂнача́лїе трисвѣ́тлᲂе , въ неразлꙋ́чнѣ сꙋществѣ̀ , не и҆змѣ́нныхъ сᲂста́вѣхъ .

пѣ́снь , д҃ . і҆рмо́съ . Ѻ҆́ч҃а нѣ́дра не ѡ҆ста́вль , и҆ сᲂше́дъ на́ землю хрⷭ҇тѐ бж҃е , та́йнꙋ ᲂу҆слы́шахъ смᲂтре́нїѧ твᲂегѡ̀ , и҆ прᲂсла́вихъ тѧ чл҃кᲂлю́бче . Млⷭ҇ть свᲂю̀ и҆ млрⷭ҇дїе , на рабы̀ свᲂѧ̀ чⷭ҇таѧ прᲂстрѝ , и҆́же прⷭ҇нѡ мᲂлѧ́щїѧ тѧ̀ , стра́шныѧ мꙋ́ки и҆збавлѧ́ющи мл҃твами сѝ . Чи́стᲂю мл҃твᲂю сѝ , и҆ те́плᲂю вѣ́рᲂю , к̾ тебѣ̀ прибѣга́ю пренепᲂро́чнаѧ , ты̀ бꙋ́ди ѡ҆чисти́лище мно́гихъ прегрѣше́нїи мᲂи́хъ , и҆збавлѧ́ющи и҆ спаса́ющи мѧ̀ .= сла́ва . Ра́дᲂсти на́шеѧ хᲂда́таица пречⷭ҇таѧ , свᲂи́мъ ржⷭ҇тво́мъ ꙗ҆ви́сѧ влⷣчце , сегѡ̀ мᲂлѝ пренепᲂро́чнаѧ , напа́стей и҆зба́вити , и҆ вѣ́чнѣй жи́зни спᲂдо́бити мѧ̀ . и҆ ны́нѣ . Ѻ҆=те́ческихъ нѣ́дръ не ѿлꙋ́чьсѧ , и҆ ѿ дв҃ы вᲂпло́щьсѧ хрⷭ҇тѐ бж҃е , сᲂхранѝ ста́до твᲂѐ смᲂтре́нїѧ твᲂегѡ̀ , пᲂкланѧ́ющеесѧ бжⷭ҇твенымъ ѻ҆бразо́мъ .

пѣ́снь , є҃ . і҆рмо́съ . Но́щь несвѣтла̀ невѣ́рнымъ , вѣ́рнымъ же прᲂсвѣще́нїе в̾ пи́щи слᲂве́съ твᲂи́хъ , и҆ сегѡ̀ ра́ди к̾ тебѣ̀ ᲂу҆́треннюю , и҆ вᲂспѣва́ю твᲂѐ бжⷭ҇тво̀ . Тѧ̀ мᲂлю̀ дв҃о чи́стаѧ , ѿ мра́чнагѡ грѣха̀ дш҃ꙋ мᲂю̀ и҆зба́вити , и҆ ѡ҆зари́ти бжⷭ҇твенᲂю заре́ю пᲂкаѧ́нїѧ ми́лᲂсти твᲂеѧ̀ . Сꙋ́щїѧ в̾ пꙋчи́нѣ лю́тыхъ напа́стей , и҆ нꙋ́жныхъ страсте́й , прест҃а́ѧ чⷭ҇таѧ твᲂи́ми мл҃твами , и҆ мᲂльба́ми и҆зба́ви , и҆ спасѝ хва́лѧщихъ тѧ̀ .= сла́ва . И҆́же бг҃а заче́нши во ᲂу҆тро́бѣ дв҃честѣй , и҆ ро́ждьши бцⷣе пречⷭ҇таѧ , тѧ̀ пᲂю́щїѧ ѿ всѧ́кагѡ и҆зба́ви вѣ́чнагѡ ѡ҆сꙋжде́нїѧ . и҆ нн҃ѣ . В=ѣ́дꙋще бж҃їю тѧ̀ мт҃рь чⷭ҇таѧ , и҆ застꙋ́пницꙋ на́шꙋ . тѧ̀ хᲂда́таицꙋ пред̾лага́емъ спасе́нїѧ на́шегѡ , к̾ ще́дрᲂмꙋ гдⷭ҇ꙋ .

пѣ́снь , ѕ҃ . і҆рмо́съ . Вᲂзᲂпи́хъ гдⷭ҇и в̾ ско́рбь мᲂю̀ к̾ тебѣ̀ , и҆ вᲂз̾ведѝ ѿ тлѝ живо́тъ мо́й , мнᲂгᲂмлⷭ҇тиве . Твᲂегѡ̀ сн҃а влⷣчце , вᲂз̾несе́ннаго на́ крⷭ҇тъ , и҆ и҆зба́вльшаго челᲂвѣ́ки ѿ тлѝ , ᲂу҆мᲂлѝ спасти́сѧ на́мъ . Пречⷭ҇таѧ влⷣчце не ѡ҆ста́ви менѐ , на тѧ̀ ᲂу҆пᲂва́юща . но свᲂю̀ ᲂу҆скᲂрѝ по́мᲂщь .= сла́ва . Ѿ= печа́ли и҆зба́ви , призыва́ющихъ тѝ бжⷭ҇твенᲂе и҆́мѧ , и҆ страшны́ѧ свᲂбᲂдѝ мꙋ́ки .= и҆ ны́нѣ . П=речⷭ҇таѧ влⷣчце , наде́жа тве́рдаѧ , любо́вїю пᲂю́щїѧ тѧ̀ ꙗ҆́кѡ и҆́стиннꙋю бцⷣꙋ , сᲂхранѝ .

Гдⷭ҇и пᲂми́лꙋй , гⷤ . сла́ва , и҆ ны́нѣ . сѣда́ленъ , гла́съ , з҃ . Распе́ншагᲂсѧ на́съ ра́ди хрⷭ҇та̀ бг҃а , и҆ низ̾ло́жьшаго сме́рти держа́вꙋ , непреста́ннѡ мᲂлѝ бцⷣе дв҃о , да спасе́тъ дш҃а на́ша .

пѣ́снь , з҃ . і҆рмо́съ . Пе́щь ѻ҆́трᲂцы ѻ҆гнепа́льнꙋ , дре́вле хла́дъ дѣ́ющꙋ пᲂказа́ша , є҆ди́нъ бг҃ъ пᲂю́ще и҆ гл҃юще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . Въ недᲂвѣ́денїи , и҆ печа́ли сы́и , и҆ въ бѣда́хъ пречⷭ҇таѧ , тѧ̀ призыва́ю те́плꙋю ѿ срⷣца мᲂегѡ̀ , пред̾варѝ и҆ и҆зба́ви мѧ , и҆ пᲂда́ждь чⷭ҇таѧ ᲂу҆тѣше́нїе мнѣ̀ . Прегрѣше́нїи мно́гихъ тревᲂлне́нїѧ и҆ страсте́й ѡ҆бꙋрева́ютъ мѧ̀ , и҆ ко глꙋбинѣ̀ пᲂги́бели низ̾во́дѧтъ . да́ждь ми рꙋ́кꙋ и҆ спасѝ , и҆ пᲂми́лꙋй мѧ̀ си́лᲂю твᲂе́ю .= сла́ва . Твᲂю̀ мт҃рь привᲂжꙋ́ ти въ мл҃твꙋ сп҃се чл҃кᲂлю́бче . ю҆́же прїе́мъ , и҆зба́ви мѧ̀ прегрѣше́нїи , и҆ бꙋ́дꙋщаго сꙋда̀ , и҆ вѣ́чнꙋющагѡ и҆зба́ви мꙋче́нїѧ . и҆ ны́нѣ . О=у҆мерщве́нꙋ дш҃ꙋ стѧжа́въ , лю́тыми престꙋпле́ньми , тѧ̀ мᲂлю̀ влⷣчце , ᲂу҆мᲂри́вшꙋю а҆́да ржⷭ҇тво́мъ сѝ , пᲂкаѧ́нїѧ ѻ҆бразы̀ ѡ҆живи́ мѧ .

пѣ́снь , и҃ . і҆рмо́съ . Вᲂи́стинꙋ сꙋ́щагѡ бг҃а , и҆ всѣ́мъ сꙋществꙋ̀ винна̀ , хрⷭ҇та̀ превᲂзно́симъ , и҆ славᲂсло́вимъ во всѧ̀ вѣ́ки . Спаси́ мѧ пречⷭ҇таѧ , ѿ бѣ́дъ , и҆ тлѝ , и҆ страсте́й , к̾ тебѣ́ бо прибѣга́ю мᲂе́й наде́жи , и҆ бжⷭ҇твенᲂмꙋ спасе́нїю . Въ ча́съ кᲂне́чныи , ѿ клеветни́къ лю́тыхъ и҆зе́мши влⷣчце дв҃о , и҆ к̾ бжⷭ҇твенᲂмꙋ жили́щꙋ сама̀ наста́ви мѧ .= сла́ва . Вᲂз̾ни́кни ѽ дш҃е , бцⷣѣ припа́дающи вᲂзᲂпі́й , наде́жа и҆ спасе́нїе всѣ́хъ , ѻ҆гнѧ̀ вѣ́чнаго и҆зба́ви мѧ . и҆ ны́нѣ . Є҆=ди́нꙋ в̾ жена́хъ , бл҃гᲂслᲂве́нꙋю дв҃ꙋ вᲂспᲂе́мъ , хрⷭ҇та̀ превᲂз̾нᲂша́юще , и҆ славᲂсло́вѧще во всѧ̀ вѣ́ки .

пѣ́снь , ѳ҃ . і҆рмо́съ . Мт҃и бг҃ꙋ и҆ дв҃а , ражда́ющи и҆ дв҃ствꙋющи па́ки , не є҆сте́ственно дѣ́ло , но бж҃їе схᲂжде́нїе , тѣ́мъ ꙗ҆́кѡ є҆ди́нꙋ , бж҃їихъ чꙋде́съ спᲂдо́бльшꙋюсѧ прⷭ҇нѡ велича́емъ . Бцⷣа прино́ситъ тѝ мᲂльбꙋ̀ ѡ҆ мнѣ̀ , влⷣко хрⷭ҇тѐ . ю҆́же прїи́мъ , и҆зба́ви мѧ̀ ѿ всѧ́кїѧ мꙋ́ки . Всегда̀ мᲂлю́ тѧ влⷣчце , смире́нꙋю и҆зба́ви дш҃ꙋ мᲂю̀ , бꙋ́дꙋщаго сꙋда̀ и҆ мꙋ́ки .= сла́ва . Твᲂрца̀ мᲂегѡ̀ и҆ зижди́телѧ мᲂлѝ дв҃о . стра́шнагѡ и҆зба́вити мѧ сꙋда̀ , и҆ жи́знь дарᲂва́ти ми . и҆ ны́нѣ . Всенепᲂро́чнаѧ мт҃и дв҃о чⷭ҇таѧ , дш҃е́вныхъ скве́рнъ , и҆зба́ви твᲂѐ ста́до , тебѐ велича́ющихъ . =та́же , дᲂсто́йнѡ є҆́сть . и҆ про́чее , ѡ҆бы́чно . и҆ ѿпꙋ́стъ .

Въ сре́дꙋ , на ᲂу҆́трени . по а҃ , стихᲂло́гїи . сѣда́льны , крⷭ҇тны . гла́съ , з҃ . Цр҃кви вᲂпїе́тъ тѝ хрⷭ҇тѐ бж҃е , на пе́вгѣ , и҆ ке́дрѣ , и҆ на кипари́сѣ , пᲂклᲂнѧ́ющисѧ тебѣ̀ , пᲂбѣ́ды вѣ́рнымъ да́рꙋй , бцⷣы ра́ди , и҆ пᲂми́лꙋй на́съ .= сти́хъ : вᲂз̾нᲂси́те гдⷭ҇а бг҃а на́шегѡ , и҆ кла́нѧйтесѧ пᲂд̾но́жїю но́гꙋ є҆гѡ̀ ꙗ҆́кѡ ст҃о є҆́сть . И҆́же менѐ ра́ди прїе́мъ на крⷭ҇тѣ̀ пригвᲂжде́нїе , прїимѝ мᲂѐ бо́дренᲂе хвале́нїе хрⷭ҇тѐ бж҃е , ꙗ҆́кѡ чл҃кᲂлю́бецъ . сла́ва , и҆ ны́нѣ , крⷭ҇тᲂбоⷢ҇ . Р=аспе́ншагᲂсѧ на́съ ра́ди хрⷭ҇та̀ бг҃а , и҆ низ̾лᲂжи́вшаго сме́рти держа́вꙋ , непреста́ннѡ мᲂлѝ бцⷣе дв҃о , да спасе́тъ дш҃а на́ша .

по в҃ , стихᲂло́гїи , сѣда́льны . гла́съ , з҃ . Ѻ҆гнѧ̀ свѣтлѣ́йше , и҆ пла́мене дѣ́йственѣйше , дре́во пᲂказа́лъ є҆сѝ крⷭ҇та̀ твᲂегѡ̀ хрⷭ҇тѐ , пᲂпалѧ́юще грѣхѝ чл҃кѡмъ , и҆ прᲂсвѣща́ѧ срⷣца̀ пᲂю́щихъ во́льнᲂе твᲂѐ распѧ́тїе . бж҃е сла́ва тебѣ̀ .= сти́хъ : бг҃ъ же цр҃ь на́шъ пре́жде вѣ́къ , сᲂдѣ́ла спасе́нїе пᲂсредѣ̀ землѝ . Ѻ҆блада́ѧи беспло́тными си́лами , и҆ свѣ́дыи дш҃и мᲂе́й лѣ́нᲂсть , крⷭ҇то́мъ твᲂи́мъ спаси́ мѧ хрⷭ҇тѐ бж҃е , ꙗ҆́кѡ чл҃кᲂлю́бецъ . =сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Ра́дꙋйтесѧ пра́веднїи , да веселѧ́тсѧ нбⷭ҇наѧ , на земли́ бо мч҃нцы пᲂд̾ви́гшесѧ , ле́сть ᲂу҆праздни́ша , да ра́дꙋетсѧ цр҃кви пᲂбѣди́тельнаѧ пра́зднꙋющи , страстᲂпᲂло́жникꙋ , и҆ є҆ди́нᲂмꙋ пᲂбѣдᲂтво́рцꙋ хрⷭ҇тꙋ̀ бг҃ꙋ , пᲂдаю́щемꙋ ми́рᲂви ве́лїю млⷭ҇ть .= сла́ва , и҆ ны́нѣ , крⷭ҇тᲂбоⷢ҇ . Ꙗ҆́=кᲂже зрѧ́щи тѧ̀ гдⷭ҇и , дв҃аѧ распина́ема , пла́чꙋщи вᲂпїѧ́ше ти , вᲂспѣва́ю ти не и҆зрече́ннᲂе ѽ сн҃е мо́й дᲂлгᲂтерпѣ́нїе , и҆ є҆́же къ чл҃кѡмъ кра́йнее и҆ бжⷭ҇твенᲂе сᲂше́ствїе .

по г҃ , стихᲂло́гїи , сѣда́ленъ . гла́съ , з҃ . Распе́ншꙋтисѧ влⷣко хрⷭ҇тѐ , вра́гъ свѧ́занъ бы́сть , и҆ сме́рть ᲂу҆мертви́сѧ , ме́ртвыхъ же , дꙋ́ши и҆́же во а҆́дᲂвѣ днѣ̀ держи́мыѧ , ѿ ᲂу҆́зъ разрѣши́шасѧ . сла́ва , и҆ ны́нѣ , крⷭ҇тᲂбоⷢ҇ . Крⷭ҇то́мъ сн҃а твᲂегѡ̀ ѡ҆гражда́еми дв҃о , прило́гъ бѣсо́вскихъ и҆з̾бѣга́емъ . тѣ́мже тѧ̀ бцⷣе без̾невѣ́стнаѧ , по́дᲂлгꙋ вᲂспѣва́юще сла́вимъ .

Кано́нъ , чⷭ҇тно́мꙋ и҆ живᲂтвᲂрѧ́щемꙋ крⷭ҇тꙋ̀ гдⷭ҇ню , твᲂре́нїе ки́ръ і҆ѡ́сифᲂво . гла́съ , з҃ . пѣ́снь , а҃ . і҆рмо́съ . Ма́нїемъ ти на зе́менъ ѻ҆́бразъ прелᲂжи́сѧ , пе́рвїе разлива́емᲂе вᲂдно́е є҆стество̀ гдⷭ҇и . тѣ́мже немо́кренно ше́ствᲂвавъ і҆и҃ль , пᲂе́тъ тебѣ̀ пѣ́снь пᲂбѣ́днꙋю .

запѣ́въ : сла́ва гдⷭ҇и крⷭ҇тꙋ̀ твᲂемꙋ̀ чⷭ҇тно́мꙋ . Распѧ́тїе влⷣка пᲂнᲂша́емь терпи́тъ , чл҃кѡмъ ѿє҆́млѧ пᲂнᲂше́нїе ꙗ҆́кѡ чл҃кᲂлю́бецъ . кᲂпїе́мъ въ ре́бра прᲂбᲂде́сѧ , си́мъ закала́ѧ врага̀ бᲂри́телѧ .= Ꙗ҆́=кᲂже лꙋ́къ напрѧ́гъ сво́й крⷭ҇тъ млⷭ҇тиве , стрѣла́ми ᲂу҆ѧ́звилъ є҆сѝ гвᲂзде́й , сᲂпрᲂтивᲂбᲂрца̀ сп҃се . и҆ ѿ негѡ̀ дре́вле ᲂу҆ѧ́звеныѧ чл҃ки и҆сцѣли́лъ є҆сѝ .

запѣ́въ : ст҃і́и мч҃нцы , мᲂли́те бг҃а ѡ҆ на́съ . мⷱ҇ꙋ . Крᲂвьмѝ ст҃ы́хъ , нечи́стыхъ крᲂве́й преста́ша скверне́нїѧ , и҆́дᲂлѡмъ принᲂси́маѧ . всѧ́ же землѧ̀ ѡ҆ст҃и́сѧ , тѣ́хъ во хвале́нїихъ прⷭ҇нѡ ᲂу҆бл҃жа́ющи .= мⷱ҇ꙋ . Вᲂспѣ́ша си́лы нбⷭ҇ныѧ , земны́хъ зрѧ́ще в̾ тѣлесѝ , съ без̾тѣле́сными бᲂрю́щасѧ , тѣ́мже и҆ пᲂд̾вигᲂпᲂло́жникъ , си́хъ вѣнцы̀ пᲂбѣ́ждьшихъ вѣнча̀ . боⷢ҇ . Р=аздра́сѧ рꙋкᲂписа́нїе а҆да́мᲂво , вᲂпїѧ́ше пречⷭ҇таѧ влⷣчца . кᲂпїе́мъ сн҃ꙋ ᲂу҆ѧ́звенꙋ тѝ бы́вшꙋ . тѣ́мже пᲂю̀ твᲂѐ страда́нїе , всѣ́мъ и҆стᲂчи́вшагѡ без̾стра́стїе влⷣко .

Дрꙋгі́и кано́нъ , прест҃ѣ́й бцⷣѣ . і҆рмо́съ , то́йже . =запѣ́въ : прест҃а́ѧ гжⷭ҇е бцⷣе спасѝ на́съ . П=ᲂю́щїѧ бцⷣе вели́чїѧ тѝ любо́вїю , твᲂѧ̀ сᲂхранѝ лю́ди , и҆ ѿ вре́да и҆зба́ви . ты́ бо всѣ́мъ є҆сѝ пред̾ста́тельница , и҆ рꙋкᲂвᲂди́тельница чи́стаѧ и҆ ᲂу҆тверже́нїе . Во́дꙋ без̾сме́ртїѧ ро́ждьшаѧ дв҃о , и҆сцѣле́нїѧ во́ды на́мъ пᲂда́ждь , всѧ̀ смертᲂно́сныѧ стра́сти , дꙋ́шъ на́шихъ и҆ тѣле́съ ѡ҆мыва́ющи . Честно́е влⷣчцѣ бг҃ᲂра́дᲂваннаѧ селе́нїе ꙗ҆ви́ласѧ є҆сѝ , пᲂче́тшагѡ є҆стество̀ пра́ѻ҆ц҃а . тѣ́мже тѧ̀ чⷭ҇таѧ мо́лимъ , всѧ́кᲂго без̾че́стїѧ страсте́й и҆зба́ви на́съ . Сл҃нце ро́ждьшаѧ пра́веднᲂе ми́рꙋ , тмꙋ̀ ѿженѝ ѿ и҆́же вѣ́рнѡ вᲂспѣва́ющихъ тѧ̀ ѻ҆трᲂкᲂви́це , во свѣ́тлѣмъ твᲂе́мъ се́мъ , и҆ ст҃ѣ́мъ хра́мѣ всенепᲂро́чнаѧ .

пѣ́снь , г҃ . і҆рмо́съ . Въ нача́тцѣ небеса̀ всеси́льнымъ сло́вᲂмъ сѝ ᲂу҆тверже́и , гдⷭ҇и сп҃се , и҆ всетвᲂрѧ́щимъ дх҃ᲂмъ бж҃їимъ всю̀ си́лꙋ и҆́хъ , на недви́жимᲂмъ мѧ ка́мени и҆спᲂвѣ́данїѧ твᲂегѡ̀ ᲂу҆твердѝ . Прᲂпны́и нб҃са̀ ꙗ҆́кѡ ко́жꙋ , на́ древѣ , распрᲂсте́рлъ є҆сѝ рꙋ́цѣ і҆с҃е , рꙋкѝ не ᲂу҆держа́нїе а҆да́мᲂва грѣха̀ и҆сцѣлѧ́ѧ , ꙗ҆́кѡ млⷭ҇тивъ , и҆ и҆схища́ѧ всѣ́хъ , ѿ рꙋкѝ льсти́вагѡ бᲂрца̀ . Тебѐ вѣнча́ша те́рнїемъ цр҃ю , лю́дїе закᲂнᲂпрестꙋ́пнїи , и҆́же сла́вᲂю вѣнча́вшагѡ чл҃ки , и҆ преслꙋша́нїѧ а҆да́мᲂва те́рнїе и҆скᲂрени́вша хрⷭ҇тѐ , и҆ вса́ждьшаго всѣ́мъ бг҃ᲂразꙋ́мїѧ и҆зраще́нїе . мⷱ҇ꙋ . Є҆стество́мъ сꙋ́ще ме́ртвенїи , без̾сме́ртїю в̾ не́мъ пᲂꙋчи́тисѧ вᲂз̾люби́сте премꙋ́дрїи . тѣ́мже мч҃нцы , мꙋче́нїѧ , ско́рби , гᲂне́нїѧ , ра́ны , и҆ ᲂу҆до́въ же ᲂу҆рѣ́занїѧ , всѧ̀ ра́дꙋющесѧ претерпѣ́сте .= мⷱ҇ꙋ . Го́рдымъ по́мыслᲂмъ пᲂгꙋби́ти всѧ̀ претѧ́щаго , льсти́ваго врага̀ вы̀ страда́льцы смири́сте , смири́вшасѧ ѡ҆ хрⷭ҇тѣ̀ , и҆ вᲂз̾несо́стесѧ держа́вᲂю бжⷭ҇твенᲂю на негѡ̀ вᲂѡ҆рꙋжи́вшесѧ . боⷢ҇ . И҆́=же во́лею закᲂле́наго а҆́гньца на́ стрⷭ҇ть прише́дша , зрѧ́щи мт҃и и҆ а҆́гница , сле́зъ и҆сто́чники прᲂлива́ше гл҃ющи , что̀ сїѐ ча́до сщ҃е́ннᲂе ; ка́кѡ ᲂу҆мерщвѧ́ешисѧ ; ѡ҆живи́ти всѧ̀ ᲂу҆ме́ршаѧ прᲂмышлѧ́ѧ .

и҆́нъ , і҆рмо́съ , то́йже . Да́ждь рабо́мъ свᲂи́мъ чⷭ҇таѧ спаси́тельнᲂе прᲂше́нїе въ бжⷭ҇твенѣмъ твᲂе́мъ се́мъ хра́мѣ , в̾ не́мже и҆сто́чникъ чꙋде́съ и҆стᲂча́ѧ пᲂказа́ла є҆сѝ прⷭ҇нѡ наи́тїемъ бжⷭ҇твенымъ , и҆ вѣ́чнагѡ и҆зба́ви мꙋче́нїѧ . Млⷭ҇темъ бе́зднꙋ хрⷭ҇та̀ , па́че вины̀ и҆ сло́ва , да́телѧ всѣ́мъ до́брымъ ро́ждьши чи́стаѧ , бжⷭ҇твеныи хра́мъ тво́й се́й ꙗ҆влѧ́еши вᲂи́стинꙋ , ѡ҆сѣне́нїемъ твᲂи́мъ бжⷭ҇твенымъ , всѧ́ческихъ страсте́й ѡ҆чище́нїе . Бл҃гᲂслᲂве́нъ пло́дъ твᲂегѡ̀ чре́ва дв҃о бцⷣе , всѣ́мъ ра́дᲂсти , ра́дᲂсть бо всемꙋ̀ ми́рꙋ рᲂдила̀ є҆сѝ , и҆ весе́лїе вᲂи́стинꙋ чл҃кᲂлю́бца , разгна́вшаго печа́ль грѣхо́внꙋю бг҃ᲂневѣ́сто . Кᲂвче́же мы́сленыи , ꙗ҆́же нетлѣ́ннꙋю ма́ннꙋ ро́ждьшаѧ ми́рꙋ вᲂи́стиннꙋ , пᲂсредѣ̀ на́съ дв҃о прїидѝ в̾ ча́съ сі́й , и҆ всѧ́кїѧ на́съ и҆з̾мѣнѝ скве́рны , и҆́же чи́стѣ тебѐ ᲂу҆блажа́ющихъ .

пѣ́снь , д҃ . і҆рмо́съ . Ѻ҆́ч҃а нѣ́дра не ѡ҆ста́вль , и҆ сᲂше́дъ на́ землю хрⷭ҇тѐ бж҃е , та́йнꙋ ᲂу҆слы́шахъ смᲂтре́нїѧ твᲂегѡ̀ , и҆ прᲂсла́вихъ тѧ чл҃кᲂлю́бче . На землѝ чл҃къ ꙗ҆́вльсѧ , нбⷭ҇ныѧ ме́ртвеныхъ сᲂтвᲂри́лъ є҆сѝ . и҆ вᲂз̾не́сбᲂсѧ на́ древо влⷣко , всѧ̀ сᲂвᲂз̾не́слъ є҆сѝ вᲂспѣва́ющихъ твᲂѧ̀ страда́нїѧ . За ме́ртвыѧ ᲂу҆мира́еши живᲂтѐ , за непра́ведныѧ і҆с҃е мо́й , пра́ведне стра́сть терпи́ши пᲂно́снꙋю . пᲂе́мъ дᲂлгᲂтерпѣли́ве не и҆з̾рече́ннᲂе бл҃гᲂꙋтро́бїе твᲂѐ . мⷱ҇ꙋ . Звѣре́й ᲂу҆стремле́нїѧ , врѣ́нїѧ ѻ҆гнѧ̀ , рꙋ́къ же и҆ но́гъ ѿсѣче́нїѧ , и҆стᲂрга́нїѧ ᲂу҆дᲂвѡ́мъ , и҆ всѧ́ко и҆́но мꙋче́нїе претерпѣ́сте мч҃нцы , и҆схᲂда́тайствꙋющее бжⷭ҇твенᲂе наслажде́нїе .= мⷱ҇ꙋ . Ѿ= тѣле́сныхъ кᲂне́цъ страда́льцы ко хрⷭ҇тꙋ̀ всѣ́хъ бг҃ꙋ зᲂвꙋ́ще , ᲂу҆слы́шани бы́сте , и҆ на ка́мень вᲂз̾несо́стесѧ бжⷭ҇твенагѡ ны́нѣ сᲂверше́нїѧ .= боⷢ҇ . М=ᲂльбꙋ̀ за на́съ к̾ вᲂплᲂще́ннᲂмꙋ и҆з̾ тебѐ бцⷣе сᲂтвᲂрѝ , ꙗ҆́кѡ да ѡ҆брѧ́щемъ по́мᲂщь во́ времѧ напа́сти , и҆́же тᲂгѡ̀ стра́сти сла́вѧщїи .

и҆́нъ , і҆рмо́съ , то́йже . Тѧ̀ а҆вва́кꙋмъ го́рꙋ дре́вле вᲂз̾гласи́въ , пречⷭ҇таѧ бцⷣа дᲂбрᲂдѣ́тельми присѣ́ннꙋю , всѣ́хъ влⷣчце ѡ҆сѣнѧ́ющꙋю , ѿ ѡ҆пале́нїѧ ѕло́бы нача́льнагѡ бᲂрца̀ . Мᲂле́нїе гдⷭ҇ви принесѝ , вᲂплᲂще́ннᲂмꙋ и҆з̾ твᲂи́хъ влⷣчце пречⷭ҇тыхъ крᲂве́й , спастѝ лю́ди твᲂѧ̀ ѿ всѧ́кᲂгѡ вре́да , и҆́же тебѐ по́ дᲂлгꙋ блажа́щихъ . Твᲂѧ̀ пресла́внаѧ сїѧ̀ бг҃ᲂбл҃гᲂда́тнаѧ цр҃кᲂвь , бы́сть во и҆сцѣле́нїе дш҃а́мъ же и҆ тѣ́лᲂмъ . ᲂу҆ставлѧ́етъ бо всѧ́кꙋ бᲂлѣ́знь , и҆ ѡ҆чища́етъ ѿ страсте́й , вѣ́рнѡ тебѐ бл҃жа́щихъ . Пᲂсѣще́нїемъ твᲂи́мъ дв҃о спасѝ , те́плымъ и҆ чⷭ҇тны́мъ . всѧ̀ и҆́же съ любо́вїю , прибѣга́ющїѧ влⷣчце къ твᲂемꙋ̀ застꙋпле́нїю пᲂсѣща́й , и҆ да́рꙋй ꙗ҆́же к̾ жи́зни прᲂше́нїѧ .

пѣ́снь , є҃ . і҆рмо́съ . Гдⷭ҇и бж҃е мо́й , и҆́з̾ нᲂщи ᲂу҆́треннюѧ тебѣ́сѧ мᲂлю̀ , пᲂда́ждь мѝ ѡ҆ставле́нїе прегрѣше́нїи мᲂи́хъ , и҆ ко свѣ́тꙋ твᲂи́хъ пᲂвелѣ́нїи , пꙋтѝ мᲂѧ̀ напра́ви мᲂлю́тисѧ . Распѧ́тїе прїѧ́тъ , на ѕлы́хъ ѿѧ́тїе бж҃їи сло́ве . же́лчи же в̾кꙋси́въ , сла́дкаго вкꙋше́нїѧ го́рькїи вре́дъ пᲂтреблѧ́ѧ . сла́ва мно́гᲂмꙋ ти милᲂсе́рдїю . И҆́же на крⷭ҇тѣ̀ твᲂи́мъ вᲂз̾дви́женїемъ , всю̀ зе́млю пᲂкᲂлѣба́лъ є҆сѝ бжⷭ҇твенᲂю сѝ держа́вᲂю , и҆ и҆сцѣли́въ є҆ѧ̀ влⷣко сᲂкрꙋше́нїѧ . и҆ кᲂле́блемаѧ срⷣца , к̾ твᲂемꙋ̀ ᲂу҆тверди́въ пᲂзна́нїю .= мⷱ҇ꙋ . Распрᲂсте́ръ ѿстꙋ́пникъ всю́дꙋ сѣ́ти ѕло́бныѧ , но не ꙗ҆́лъ є҆́сть хрⷭ҇то́вы мч҃нки . кри́ла бо прїе́мше ѻ҆́гненаѧ , и҆ ко ѻ҆би́телемъ бжⷭ҇твенымъ прелетѣ́ша . мⷱ҇ꙋ . Манᲂве́нїемъ не ѡ҆скꙋ́днымъ ѿ́ бг҃а ѡ҆бᲂжа́еми стрⷭ҇тᲂте́рпцы , бᲂлѣ́зненыхъ мꙋче́нїи всѧ́ческихъ не ᲂу҆страши́стесѧ . ꙗ҆́кᲂже и҆но́мꙋ стра́ждꙋщꙋ . та́кѡ всемꙋ́дрїи са́ми предлежа́сте . боⷢ҇ . К=і́има ѻ҆чи́ма ви́жꙋ , ѻ҆́ко и҆з̾сꙋша́ющее всѧ̀ бе́здны , сы́не мо́й ᲂу҆гаша́емѡ на крⷭ҇тѣ̀ ви́сѧщꙋ ти , чи́стаѧ дв҃аѧ вᲂпїѧ́ше , пла́чемъ себѐ смꙋща́ющи .

и҆́нъ , і҆рмо́съ . Но́щь несвѣтла̀ невѣ́рнымъ . Ѡ҆тѧгче́ныхъ сно́мъ грѣхо́внымъ чи́стаѧ ᲂу҆бᲂдрѣва́ющи , ѻ҆ба́че же в̾ пречи́стѣмъ хра́мѣ твᲂе́мъ , твᲂе́ю бо́дренᲂю и҆ бжⷭ҇твенᲂю мл҃твᲂю на́съ ᲂу҆ще́дри бг҃ᲂневѣ́сто . Да́ждь чⷭ҇таѧ всѣ́мъ на́мъ рꙋ́кꙋ пᲂмᲂже́нїѧ и҆́же къ тебѣ̀ притека́ющимъ . и҆ ѿмы́й всѧ́кїѧ ѕло́бы скве́рнꙋ , и҆ бᲂлѣ́зни ѡ҆чи́сти мл҃твами сѝ . Ꙗ҆́же бг҃а заче́нши во ᲂу҆тро́бѣ дв҃честѣй , и҆ ро́ждьши бцⷣе пречⷭ҇таѧ , тѧ̀ пᲂю́щїѧ и҆зба́ви ѿ всѧ́кᲂго вѣ́чнагѡ ѡ҆сꙋже́нїѧ . И҆́же въ хра́мъ тво́й вѣ́рᲂю прихᲂдѧ́щихъ дꙋ́ши ѡ҆бнᲂвлѧ́ютсѧ ѡ҆бетша́вшїѧ грѣхмѝ , и҆ по́ дᲂлгꙋ тѧ̀ всѝ пренепᲂро́чнаѧ сла́вѧтъ .

пѣ́снь , ѕ҃ . і҆рмо́съ . Пла́вающагѡ въ мᲂлвѣ̀ жите́йскихъ сꙋ́етїи , и҆ съ кᲂрабле́мъ пᲂтᲂплѧ́ема грѣхѝ , и҆ дш҃етлѣ́ннꙋ звѣ́рю примѣта́ема , ꙗ҆́кѡ і҆ѡ́на хрⷭ҇тѐ вᲂпїю́ ти , ѿ сме́ртныѧ глꙋбины̀ вᲂз̾веди́ мѧ . И҆зба́вителю сы́и є҆ди́не , цѣ́нꙋ свᲂю̀ пᲂлᲂжи́въ спаси́тельнꙋю кро́вь , и҆ и҆скꙋпи́лъ є҆сѝ плѣне́ныѧ на́съ пребл҃гі́и , и҆ свᲂемꙋ̀ рᲂди́телю приведѐ . ᲂу҆би́въ крⷭ҇то́мъ хрⷭ҇тѐ мꙋчи́телѧ . Не вᲂз̾держа́нїемъ дре́вле , паде́нїемъ лю́тымъ падо́хсѧ , хрⷭ҇то́съ же вᲂз̾двиза́емь на́ древо , рꙋ́цѣ прᲂсте́ръ па́дшаго мѧ вᲂз̾дви́же , и҆ ᲂу҆ѧзви́всѧ во́лею , всѧ̀ мᲂѧ̀ ꙗ҆́звы ꙗ҆́вѣ и҆сцѣлѝ .= мⷱ҇ꙋ . Дрема́нїемъ пре́лести , ѿ ню́дъ не вᲂз̾дрема́вшесѧ , всѧ́ко ᲂу҆стремле́нїе ᲂу҆спи́сте мꙋчи́телемъ мч҃нцы , и҆ пра́веднымъ пᲂдо́бнымъ сно́мъ ᲂу҆снꙋ́вше бл҃же́ннїи . неꙋсы́пнїи всѣ́хъ мл҃твеницы бы́сте . мⷱ҇ꙋ . Оу҆тверже́ни на ка́мени бжⷭ҇твеныхъ хрⷭ҇то́выхъ пᲂвелѣ́нїи , вра́жїими кᲂва́рьствы , непрело́жни пребы́сте всесла́внїи мч҃нцы , и҆ тᲂгѡ̀ нᲂга́ми пᲂпра́сте бг҃ᲂмꙋ́дрено , к̾ бг҃ꙋ бг҃ᲂлѣ́пнѡ и҆дꙋ́ще . боⷢ҇ . М=ла́до ѻ҆трᲂча̀ ражда́еши бцⷣе , и҆́же пре́жде вѣ́къ без̾лѣ́тнѡ , ѻ҆ц҃ꙋ сразꙋмѣва́емаго . но́во твᲂрѧ́ща на крⷭ҇тѣ̀ чл҃чество ѡ҆бетша́вшее грѣхмѝ ѕлᲂнача́льнагѡ сᲂвѣ́тᲂмъ , пренепᲂро́чнаѧ .

и҆́нъ , і҆рмо́съ . І҆ѡ́на и҆́з̾ чрева а҆́дᲂва вᲂпїѧ́ше . Є҆ди́на на́мъ спасе́нїѧ и҆стᲂчи́ла є҆сѝ во́дꙋ , є҆ди́на чⷭ҇таѧ распале́нїе пре́лести и҆зсꙋши́вши . ѡ҆рᲂша́еши ра́зꙋмъ и҆́стинныи рабѡ́мъ твᲂи́мъ . Ѡ҆дш҃евле́ныи бг҃а на́шегѡ гра́де , ста́до свᲂѐ ѿ без̾бо́жныхъ ва́рваръ , трꙋ́са же и҆ нꙋ́жи , и҆ всѧ́кᲂго и҆скꙋше́нїѧ свᲂбᲂдѝ . Стрꙋ́пы дꙋ́шъ на́шихъ бцⷣе ѿженѝ , мл҃твъ твᲂи́хъ ѡ҆крᲂпле́нїемъ , и҆ тѣле́сныѧ недꙋ́ги , да бжⷭ҇твеными гла́сы вᲂспѣва́емъ тѧ̀ . И҆́же разрѣши́вшаѧ ѿ бᲂлѣ́зней дв҃о є҆́ввꙋ , ржⷭ҇тво́мъ свᲂи́мъ пречⷭ҇тымъ ѻ҆трᲂкᲂви́це , разрѣши́ ми бᲂлѣ́зни страстны́ѧ дш҃и же и҆ тѣлесѐ .

пѣ́снь , з҃ . і҆рмо́съ . Пе́щь ѻ҆́трᲂцы ѻ҆гнепа́льнꙋ , дре́вле хла́дъ дѣ́ющꙋ пᲂказа́ша , є҆ди́нъ бг҃ъ пᲂю́ще и҆ гл҃юще , ѻ҆ц҃ъ на́шихъ бж҃е блгⷭ҇ве́нъ є҆сѝ . Небᲂлѣ́зненꙋ ѡ҆брѣ́те жи́знь пра́ѻ҆ц҃ъ , тебѣ̀ во́лею пᲂбᲂлѣ́вшꙋ на крⷭ҇тѣ̀ , и҆ ме́ртвꙋ бы́вшꙋ , и҆ ѕмі́ѧ ᲂу҆мертви́вшꙋ , і҆с҃е хрⷭ҇тѐ мнᲂгᲂми́лᲂстиве . Зако́нныѧ клѧ́твы и҆зба́вихᲂмсѧ всѝ , закᲂнᲂда́вецъ бо вᲂз̾дви́жесѧ на́ крⷭ҇тъ , блгⷭ҇ве́нїе прⷭ҇нѡ текꙋ́щее и҆ бл҃гᲂда́ть , и҆ млⷭ҇ть , и҆ тлѣ́нїю и҆стᲂчѝ пᲂтребле́нїе .= мⷱ҇ꙋ . Во́льными ᲂу҆стремле́ньми пристꙋпа́юще к̾ мꙋче́нїемъ мч҃нцы , и҆́же во́лею пᲂстрада́вшаго вᲂѡ҆бража́хꙋ , ѿ него́ же вѣнча́вшесѧ , со а҆́нг҃лы ны́нѣ ликᲂствꙋ́ютъ . мⷱ҇ꙋ . Тѣ́ло преда́вше разли́чнымъ мꙋ́камъ всехва́льнїи мч҃нцы , крᲂвны́ми прᲂлїѧ́нїи , беспло́тныѧ врагѝ ᲂу҆дави́сте , и҆ и҆сто́чники и҆сцѣле́нїѧ то́чите . боⷢ҇ . К=а́кѡ непла́чꙋ сладча́йшее ча́до на крⷭ҇тѣ̀ зрѧ́щи тѧ̀ ; ка́кѡ нерыда́ю без̾ пра́вды стра́ждꙋщꙋ тѝ сꙋдїѐ пра́веднѣйшїи ; дв҃аѧ мт҃и вѣща́ше .

и҆́нъ , і҆рмо́съ , то́йже . Ѻ҆́гнь ро́ждьшаѧ бжⷭ҇твеныи дв҃о , хвра́стныѧ пᲂпалѝ стра́сти вᲂспѣва́ющихъ тѧ̀ всепѣ́таѧ , и҆ свѣ́тᲂмъ ѡ҆зарѝ пᲂкаѧ́нїѧ всѣ́хъ мо́лимсѧ . Нетлѣ́ннаѧ ѻ҆трᲂкᲂви́це , ѿ тлѝ на́съ и҆зба́ви . бж҃їѧ пᲂла́то ѡ҆дш҃евле́наѧ , до́мы на́съ пᲂкажѝ бжⷭ҇твенагѡ дх҃а , и҆́же въ цр҃кви твᲂе́й непреста́ннѡ вѣ́рᲂю пᲂю́щихъ тѧ̀ . Стрꙋѝ и҆з̾лива́еши и҆сцѣле́нїѧ всѣ́мъ , и҆сто́чника бо живᲂтꙋ̀ рᲂдила̀ є҆сѝ , и҆ те́плᲂю бцⷣе мл҃твᲂю сѝ , сїѐ твᲂѐ ста́до ѡ҆чища́еши , ѿ скве́рны , бг҃ᲂневѣ́сто . Ѻ҆́бразы всѝ бжⷭ҇твенагѡ ти ржⷭ҇тва̀ , бжⷭ҇твенїи прⷪ҇рцы ви́дѣвше , ра́дᲂстнѡ вᲂспѣва́хꙋ вᲂпїю́ще . препѣ́тыи ѻ҆ц҃е́мъ бж҃е бл҃гᲂслᲂве́нъ є҆сѝ .

пѣ́снь , и҃ . і҆рмо́съ . Не ѡ҆па́льна ѻ҆гне́мъ въ сина́и прича́щшисѧ , кꙋпина̀ бг҃а пᲂказа̀ , медленнᲂѧзы́чнꙋ и҆ гꙋгни́вꙋ мѡѷсе́ᲂви . дѣ́ти рве́нїемъ бж҃їимъ вмѣта́емыѧ во ѻ҆́гнь пѣвцы̀ пᲂказа̀ , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . Кро́вь и҆ вᲂда̀ и҆сте́кшаѧ и҆з̾ ре́бръ твᲂи́хъ сп҃се , ми́ръ ве́сь ѡ҆бнᲂвѝ , и҆ нетлѣ́нїе и҆стᲂчѝ . же́ртвы же скве́рныѧ ; и҆ прᲂли́тїе нечи́стыхъ крᲂве́й разрꙋши́шасѧ . тѣ́мже тѧ̀ всѧ̀ дѣ́ла гдⷭ҇а пᲂе́мъ , и҆ превᲂзно́симъ во всѧ̀ вѣ́ки . Вѣнце́мъ терно́вымъ ᲂу҆вѧзе́сѧ сп҃се , ѻ҆це́тъ и҆ же́лчи в̾кꙋсѝ , и҆ ѡ҆плева́нъ бы́сть , и҆ бїе́нъ , вᲂз̾дви́жесѧ на́ крⷭ҇тъ , гво́зди прїе́мъ , и҆́миже спасе́нъ бы́хъ а҆́зъ вᲂпїю́ ти , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки .= мⷱ҇ꙋ . Ѿ= не и҆стᲂщи́мыхъ сᲂкро́вищь и҆́стины , пресвѣ́тло ѡ҆бᲂгати́вшесѧ страда́льцы , всѧ́кꙋ нищетꙋ̀ ѡ҆плева́сте и҆́дᲂльскꙋю . и҆ ѡ҆бᲂгати́телїе ни́щимъ ꙗ҆ви́стесѧ , вᲂпїю́ще , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки .= мⷱ҇ꙋ . Закᲂнᲂпᲂлᲂже́нїѧ ѕлᲂчести́выхъ неради́вше , ꙗ҆́кᲂже ѻ҆́трᲂцы мч҃нцы во ѻ҆́гнь палѧ́щь в̾ве́ржени бы́сте , въ не́мже хла́дъ бж҃їи прᲂстꙋжа́ющь ва́съ ѡ҆брѣто́сте , вᲂпїю́ще , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . боⷢ҇ . З=ако́нныи дре́вле кᲂвче́гъ прᲂѡ҆бразᲂва́ше тѧ чⷭ҇таѧ , не скрижа́ли внꙋ́трь нᲂсѧ́щи , но хрⷭ҇та̀ закᲂнᲂда́вца . є҆го́же без̾зако́ннїи лю́дїе на крⷭ҇тѣ̀ пригвᲂзди́ша , на́съ вᲂпїю́щихъ спаса́юща , всѧ̀ дѣ́ла гдⷭ҇нѧ гдⷭ҇а по́йте и҆ превᲂзнᲂси́те є҆гѡ̀ во́ вѣки .

и҆́нъ , і҆рмо́съ . Є҆ди́наго без̾нача́льнаго цр҃ѧ сла́вы , є҆го́же хва́лѧтъ нбⷭ҇ныѧ си́лы , и҆ трепе́щꙋтъ чи́ни а҆́нг҃льстїи , по́йте сщ҃е́ннїи , лю́дїе превᲂзнᲂси́те є҆гѡ̀ во́ вѣки . Чꙋде́съ бе́зднꙋ и҆стᲂчи́вшаѧ ми́рꙋ всепѣ́таѧ , страсте́й на́шихъ стрꙋю̀ и҆з̾сꙋшѝ , и҆ ѡ҆ставле́нїѧ ро́сꙋ и҆ска́пи на́мъ , и҆́же вѣ́рᲂю непреста́ннѡ чтꙋ́щимъ тѧ̀ дв҃о . =и҆з̾ =тебѐ сл҃нце пра́вдѣ вᲂсїѧ́въ , и҆́же во тмѣ̀ страсте́й сѣдѧ́щимъ , тебѐ свѣ́тъ сᲂдѣ́ла всепѣ́таѧ чⷭ҇таѧ . тѣ́мже тѧ по́ дᲂлгꙋ пᲂе́мъ бцⷣе . Цр҃кви всесвѣ́тлаѧ бж҃їѧ бы́вши , сᲂбра́нныѧ во ст҃ѣ́й цр҃кви твᲂе́й рабы̀ твᲂѧ̀ , дх҃ꙋ жили́ща пᲂкажѝ чⷭ҇таѧ , тебѐ славᲂсло́вѧщихъ во всѧ̀ вѣ́ки . Свѣ́тᲂмъ твᲂегѡ̀ ржⷭ҇тва̀ , вселе́ннꙋю чꙋдᲂлѣ́пнѡ прᲂсвѣти́ла є҆сѝ бцⷣе , и҆́стиннаго бг҃а на́ рꙋкꙋ твᲂе́ю пᲂнᲂси́вши , прᲂсвѣща́ющаго прⷭ҇нѡ вѣ́рнѡ зᲂвꙋ́щихъ , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки .

та́же , пѣ́снь бцⷣѣ . вели́читъ дш҃а мᲂѧ̀ гдⷭ҇а .= и҆ =пᲂкло́ны до землѝ .

пѣ́снь , ѳ҃ . і҆рмо́съ . Мт҃и бг҃ꙋ и҆ дв҃а , ражда́ющи и҆ дв҃ствꙋющи па́ки , не є҆сте́ственно дѣ́ло , но бж҃їе схᲂжде́нїе , тѣ́мъ ꙗ҆́кѡ є҆ди́нꙋ , бж҃їихъ чꙋде́съ спᲂдо́бльшꙋюсѧ при́снѡ велича́емъ . Крѣ́пᲂсть вра́жїѧ ѿ ню́дъ ѿѧ́тсѧ , тебѣ̀ крѣ́пкѡ на́ древѣ си́льне вᲂзᲂпи́вшꙋ , к̾ пребез̾нача́льнᲂмꙋ ѻ҆ц҃ꙋ твᲂемꙋ̀ , сᲂзыва́юшꙋ растᲂче́ныѧ ѻ҆́вцы свᲂѧ̀ влⷣко к̾ твᲂемꙋ̀ пᲂзна́нїю . Ꙗ҆́кᲂже а҆́гнецъ вᲂз̾дви́жесѧ на крⷭ҇тъ во́лею влⷣко , и҆схища́ѧ ѿ во́лка слᲂве́сныѧ сп҃се ѻ҆́вцы свᲂѧ̀ , и҆ во ѡ҆гра́дѣ твᲂи́хъ пᲂвелѣ́нїи затвᲂрѧ́ѧ си́хъ вᲂспѣва́ющїѧ тѧ̀ . мⷱ҇ꙋ . Твᲂи́хъ страсте́й пᲂдо́бницы ꙗ҆влѧ́еми сла́внїи страстᲂте́рпцы , мнᲂгᲂѡ҆бра́зными ви́ды мꙋче́нїѧ претерпѣва́хꙋ крѣ́пкѡ , тѣ́мже вѣнцы̀ ᲂу҆лꙋчи́вше сла́вы , и҆ црⷭ҇твїю твᲂемꙋ̀ хрⷭ҇тѐ спᲂдо́бишасѧ .= мⷱ҇ꙋ . Со́лнечныѧ ѡ҆блистава́ютъ бл҃гᲂда́ти , прᲂсвѣща́юще вѣ́рныѧ , и҆́же честно́е страстᲂте́рпецъ сла́вѧщихъ дᲂстᲂхва́льнᲂе тᲂржество̀ . тѣ́мъ и҆́же сїѐ при́снѡ твᲂрѧ́щїи , тмы̀ прегрѣше́нїи и҆збавлѧ́емсѧ бл҃гᲂда́тїю . боⷢ҇ . С=вѣ́тъ ᲂу҆́мныи на крⷭ҇тѣ̀ ѡ҆блиста̀ , тво́й пречⷭ҇таѧ сн҃ъ , и҆ нача́льники тмы̀ ѡ҆бличѝ бг҃ᲂневѣ́сто . и҆ сл҃нцꙋ пᲂмрачѝ свѣ́тъ , и҆ вѣ́рныхъ и҆спᲂлне́нїѧ чⷭ҇таѧ прᲂсвѣти́лъ є҆́сть .

и҆́нъ , і҆рмо́съ . Нетлѣ́нїѧ и҆скꙋше́нїемъ . Сщ҃е́ннѣйши вы́шнихъ си́лъ ꙗ҆ви́ласѧ є҆сѝ , твᲂрца́ бо всѣ́хъ пᲂро́ждьши , мт҃и не и҆скꙋсᲂмꙋ́жнаѧ ст҃а́ѧ бцⷣе . тѣ́мже тѧ̀ со а҆́нг҃лы сла́вимъ непреста́ннѡ , вᲂспѣва́юще вели́чїѧ твᲂѧ̀ . Ꙗ҆́кѡ прᲂсвѣща́емꙋ зарѧ́ми бжⷭ҇твенагѡ дх҃а , го́рꙋ дв҃о тѧ̀ ви́дѣвъ присѣ́ннꙋ , сщ҃е́ннѣйшїи прⷪ҇ркъ бцⷣе . тѣ́мже тѧ̀ со а҆́нг҃лы челᲂвѣ́цы блажи́мъ , ꙗ҆́кᲂже прᲂрекла̀ є҆сѝ бг҃ᲂбл҃же́ннаѧ . Ста́мна ꙗ҆ви́ласѧ є҆сѝ , ма́ннꙋ бжⷭ҇твенꙋю нᲂсѧ́щи . и҆ лѣ́ствица ви́дѣна бы́сть челᲂвѣ́ки ѿ землѝ вᲂз̾вᲂдѧ́щи , є҆ди́на не и҆скꙋсᲂмꙋ́жнаѧ дв҃о бцⷣе . тѣ́мже сᲂше́дшесѧ вѣ́рнїи славᲂсло́вимъ тѧ̀ по́ дᲂлгꙋ , бг҃ᲂра́дᲂваннаѧ . Бы́вшаѧ бжⷭ҇тва̀ ѻ҆трᲂкᲂви́це селе́нїе , бы́вша мѧ разбо́йникѡмъ дш҃етлѣ́ннымъ верте́пъ , и҆ дѣ́лателище всѧ́кᲂго без̾зако́нїѧ , ба́нею мѧ сле́зъ ѡ҆мы́вши , бжⷭ҇твенагѡ дх҃а жили́ще ꙗ҆вѝ . Свѣ́тъ ро́ждьшаѧ є҆ди́на превѣ́чныи , вѣ́чныѧ мѧ тмы̀ и҆зба́ви влⷣчце , и҆ прᲂсвѣтѝ дв҃о дш҃ꙋ мᲂю̀ , страстьмѝ житїѧ̀ всю̀ ѡ҆мраче́ннꙋю , да любо́вїю при́снѡ сла́влю тѧ̀ .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стⷯры , крⷭ҇тны . гла́съ , з҃ . Влⷣка сы́и чл҃кᲂлю́бче жизнᲂда́вче , и҆скꙋпи́лъ є҆сѝ крⷭ҇то́мъ свᲂи́мъ вселе́ннꙋю , гдⷭ҇и сла́ва тебѣ̀ .

сти́хъ : и҆спо́лнихᲂмсѧ за ᲂу҆́тра . На крⷭ҇тѣ̀ пригвᲂзди́сѧ лᲂза̀ и҆́стиннаѧ . ѡ҆бъи҆ма́ша ꙗ҆зы́цы ра́й с̾ разбо́йникᲂмъ . сїѐ сла́ва цр҃ко́внаѧ . сѐ бᲂга́тство црⷭ҇твїѧ . пᲂстрада́выи на́съ ра́ди , гдⷭ҇и сла́ва тебѣ̀ .

сти́хъ : и҆ бꙋ́ди свѣ́тлᲂсть . мⷱ҇ꙋ . Свѣти́ла ꙗ҆ви́шасѧ вселе́ннѣй , всехва́льнїи стрⷭ҇тᲂте́рпцы хрⷭ҇то́вы вᲂпїю́ще , гдⷭ҇и сла́ва тебѣ̀ .

=сла́ва , и҆ нн҃ѣ , крⷭ҇тᲂбоⷢ҇ . на́ =древѣ пригвᲂжде́на тѧ̀ во́лею , всенепᲂро́чнаѧ ꙗ҆́кѡ ᲂу҆зрѣ̀ , пла́чꙋщи пᲂѧ́ше держа́вꙋ твᲂю̀ .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= є҆ктенїѧ̀ . =та́же , ча́съ , а҃ . ѱалмы̀ , ѡ҆бы́чны . и҆ про́чее , и҆ кᲂне́чныи ѿпꙋ́стъ .

Въ сре́дꙋ , бл҃же́нны . гла́съ , з҃ .

Красе́нъ бѣ̀ и҆ до́бръ въ снѣ́дь , и҆́же менѐ ᲂу҆мертви́выи пло́дъ , хрⷭ҇то́съ є҆́сть дре́во живо́тнᲂе , ѿ него́ же ꙗ҆ды́и не ᲂу҆мира́ю . но вᲂпїю̀ с̾ разбо́йникᲂмъ , пᲂмѧни́ мѧ сп҃се во црⷭ҇твїи сѝ .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Распрᲂсте́рлъ є҆сѝ на крⷭ҇тѣ̀ дла́ни , прᲂсте́ртїе рꙋкѝ а҆да́мᲂвы к̾ дре́вꙋ снѣ́днᲂмꙋ , и҆справлѧ́ѧ пᲂпᲂлзе́нїе ще́дре , ра́ди бл҃гᲂсти мно́гїѧ , тѣ́мже тѧ̀ сла́вимъ бл҃гᲂда́телю гдⷭ҇и .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . На мѣ́стѣ тѧ ло́бнѣмъ сᲂбо́ръ є҆вре́йскїи , хрⷭ҇тѐ цр҃ю ра́спѧлъ , сᲂкрꙋша́юща лꙋка́ваго гꙋби́тельнꙋю главꙋ̀ , и҆ и҆стᲂча́юща на́мъ ѿ ре́бръ ст҃ы́хъ твᲂи́хъ рѣ́ки ѡ҆ставле́нїѧ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Пᲂдо́бѧщесѧ хрⷭ҇то́вымъ стрⷭ҇те́мъ чⷭ҇тны́мъ и҆ спаси́тельнымъ мч҃нцы прехва́льнїи , претерпѣ́сте мꙋ́ки мнᲂгᲂви́дныѧ , и҆ къ без̾сме́ртїю прїидо́сте в̾кꙋ́пѣ , тѣ́мже бл҃жи́ми є҆стѐ .

сла́ва . Сᲂблюдѝ ѽ трⷪ҇це ст҃а́ѧ пᲂю́щїѧ тѧ̀ рабы̀ твᲂѧ̀ , ᲂу҆крѣпѝ си́лᲂю крⷭ҇та̀ , и҆ к̾ вы́шнемꙋ гра́дꙋ хᲂди́ти напра́ви на́съ , и҆дѣ́же и҆ сꙋ́щꙋю ѡ҆брѧ́щемъ млⷭ҇ть .

и҆ ны́нѣ . Распина́ема и҆з̾ тебѐ ро́ждьшагᲂсѧ зрѧ́щи слезѧ́ще , ᲂу҆тро́бᲂю смꙋща́ющисѧ мт҃и чⷭ҇таѧ , ка́кѡ сїѧ̀ во́лею стра́жеши сн҃е зᲂвꙋ́щи ; хᲂтѧ̀ чл҃чество ѿ страсте́й и҆зба́вити .

<< Previous

Contents

Next >>