Въ сре́дꙋ , ве́черъ . на гдⷭ҇и вᲂзва́хъ , стⷯры , ст҃ы́мъ а҆пⷭ҇лѡмъ . гла́съ , и҃ . =запѣ́въ : ꙗ҆́кѡ ѿ тебѐ ѡ҆чище́нїе є҆́сть . Г=дⷭ҇и , ты̀ ᲂу҆тѣ́шителѧ , зарѧ́ми а҆пⷭ҇лы свᲂѧ̀ прᲂсвѣти́лъ є҆сѝ , и҆ свѣти́ла пᲂлᲂжи́въ тѣ́хъ вѣ́рѣ ᲂу҆тверже́нїе . ᲂу҆́мнымъ прᲂсвѣще́нїемъ , ра́зꙋма твᲂегѡ̀ влⷣко . сегѡ̀ ра́ди пᲂкланѧ́емсѧ , не и҆з̾рече́ннᲂмꙋ чл҃кᲂлю́бїю твᲂемꙋ̀ .

ᲂу҆пᲂва̀ дш҃а мᲂѧ̀ на́ гдⷭ҇а . Гдⷭ҇и , а҆пⷭ҇лъ мл҃твами , ѡ҆гради́лъ є҆сѝ ста́до твᲂѐ сїѐ , ѿ враго́въ и҆скꙋше́нїѧ , невре́дно сᲂхранѧ́й . занѐ чⷭ҇тно́ю то̀ и҆скꙋпи́лъ є҆сѝ кро́вїю , ѿ рабо́ты чꙋжа́гѡ . ꙗ҆́кѡ ще́дръ и҆ чл҃кᲂлю́бецъ .

да ᲂу҆пᲂва́етъ і҆и҃ль на́ гдⷭ҇а . Ꙗ҆ви́стесѧ кꙋ́пно во ѡ҆снᲂва́нїи цр҃ко́внѣмъ , ꙗ҆́кѡ честно́е ка́менїе , заре́ю свѣ́тлᲂю вселе́ннѣй блиста́юще бг҃ᲂразꙋ́мїе и҆з̾вѣ́стно , а҆пⷭ҇ли бжⷭ҇твенїи , трⷪ҇цѣ пред̾стᲂѧ́тели , и҆ мᲂли́твеницы ѡ҆ дш҃а́хъ на́шихъ .

та́же , в̾ минѣ́и , стⷯры , ст҃о́мꙋ . а҆́ще ли нѣ́сть минѣ́и . и҆́ны , стихѣ́ры , ст҃о́мꙋ и҆ вели́кᲂмꙋ чꙋдᲂтво́рцꙋ нико́лѣ . гла́съ , и҃ . =запѣ́въ : ѿ всѣ́хъ без̾зако́нїи є҆гѡ̀ . Г=дⷭ҇и , ты̀ честна́го твᲂегѡ̀ ст҃лѧ нико́лꙋ в̾ кᲂнцѣ́хъ прᲂсла́вилъ є҆сѝ , да́въ тᲂмꙋ̀ чꙋде́съ бл҃гᲂда́ть , и҆ пᲂбо́рника пᲂказа́лъ є҆сѝ сꙋ́щимъ в̾ бѣда́хъ лю́тыхъ , и҆ в̾ ско́рбѣхъ и҆ ѕло́бахъ , припа́дающимъ и҆ прᲂсѧ́щимъ тᲂгѡ̀ прⷭ҇нѡ застꙋпле́нїѧ .

пᲂхвали́те є҆гѡ̀ всѝ лю́дїе . Гдⷭ҇и , ты̀ ст҃лѧ твᲂегѡ̀ бжⷭ҇твеными мᲂльба́ми ᲂу҆милᲂсе́рдисѧ , и҆ всѧ́кїѧ бѣды̀ , и҆ всѧ́кᲂгѡ ѡ҆ѕлᲂбле́нїѧ и҆ нахᲂжде́нїѧ вра́жїѧ свᲂбᲂдѝ рабы̀ свᲂѧ̀ . и҆́же вѣ́рᲂю пᲂкланѧ́ющихсѧ твᲂе́й держа́вѣ непᲂбѣди́мѣй .

и҆ и҆́стина гдⷭ҇нѧ пребыва́етъ во́ вѣки . И҆мꙋ́ще тебѐ ко влⷣцѣ пред̾ста́телѧ , и҆ застꙋ́пника те́пла нико́лае , к̾ тебѣ̀ притека́емъ вѣ́рᲂю и҆ взыва́емъ , не ѿвратѝ на́съ без̾дѣ́льны ѿ пᲂкро́ва твᲂегѡ̀ . но пᲂкажѝ твᲂѐ млрⷭ҇дїе прᲂсте́рто на рабы̀ твᲂѧ̀ .

сла́ва , и҆ ны́нѣ , боⷢ҇ . Ви́ждь мᲂегѡ̀ сᲂкрꙋше́нагѡ срⷣца вᲂз̾дыха́нїе бг҃ᲂневѣ́сто , прїимѝ дв҃о мр҃і́е чⷭ҇таѧ , рꙋ́къ мᲂи́хъ вᲂз̾дѣѧ́нїе ꙗ҆́кѡ чл҃кᲂлюби́во , и҆ не ѿри́ни всенепᲂро́чнаѧ , да пᲂю̀ и҆ велича́ю тѧ вᲂзвели́чившꙋю ро́дъ на́шъ .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стихѣ́ры , а҆пⷭ҇льски . гла́съ , и҃ . Гдⷭ҇и , тебѐ вᲂи́стинꙋ на землѝ а҆пⷭ҇ли вᲂзлюби́вше , ᲂу҆ме́ты вмѣни́ша всѧ̀ , да тебѐ є҆ди́наго прїѡбрѧ́щꙋтъ . и҆ по тебѣ̀ на ра́ны тѣлеса̀ свᲂѧ̀ преда́ша . сегѡ̀ ра́ди прᲂсла́влени бы́ша , мᲂли́тесѧ ѡ҆ дш҃а́хъ на́шихъ .

сти́хъ : к̾ тебѣ̀ вᲂз̾ведо́хъ ѻ҆́чи мᲂѝ . Гдⷭ҇и , ты̀ а҆пⷭ҇льскꙋю па́мѧть на землѝ вᲂзвели́чилъ є҆сѝ , вси́ бо в̾кꙋ́пѣ сᲂше́дшесѧ в̾ не́й славᲂсло́вимъ тѧ̀ , ꙗ҆́кѡ пᲂдае́ши на́мъ тѣ́хъ ра́ди и҆сцѣле́нїѧ , и҆ всемꙋ̀ ми́рꙋ смире́нїе , мл҃твами и҆́хъ и҆ ве́лїю ми́лᲂсть .

сти́хъ : пᲂми́лꙋй на́съ гдⷭ҇и . мⷱ҇ꙋ . А҆́ще что̀ дᲂбрᲂдѣѧ́нїе , и҆ а҆́ще что̀ пᲂхвала̀ пᲂдᲂба́етъ ст҃ы́мъ , мече́мъ бо преклᲂни́ша вы́и , тебѐ ра́ди прекло́ньшаго нб҃са̀ и҆ сᲂше́дша , прᲂлїѧ́ша кро́ви свᲂѧ̀ тебѐ ра́ди и҆злїѧ́вшаго себѐ , и҆ зра́къ раба̀ прїе́мша , смири́шасѧ до сме́рти , нищетѣ̀ твᲂе́й пᲂдо́бѧщесѧ . и҆́хже мл҃твами , по мно́жествꙋ щедро́тъ твᲂи́хъ бж҃е пᲂми́лꙋй на́съ .

сла́ва , и҆ ны́нѣ , боⷢ҇ . А҆́зъ пᲂд̾ кро́въ тво́й прибѣга́ю , дв҃о ст҃а́ѧ бцⷣе , вѣ́мъ бо ꙗ҆́кѡ ѡ҆брѧ́щꙋ тᲂбо́ю спасе́нїе , мо́жеши ᲂу҆́бѡ чⷭ҇таѧ пᲂмᲂщѝ мнѣ̀ .

таⷤ , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , боⷢ҇ . =во́ =гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Въ сре́дꙋ , на па́вечерницѣ . кано́нъ мᲂле́бенъ , къ прест҃ѣ́й бцⷣѣ . гла́съ , и҃ . пѣ́снь , а҃ . і҆рмо́съ . Вᲂѡ҆рꙋже́на фараѡ́на пᲂгрꙋзѝ , чꙋдᲂтвᲂрѧ́й дре́вле , мѡѷсе́йскїи же́злъ крⷭ҇тᲂѡ҆бра́знѡ прᲂразѝ , и҆ раздѣлѝ мо́ре , и҆зра́илѧ же бѣжа́ща , пѣ́ша хᲂдѧ́ща спасѐ , пѣ́снь бг҃ᲂви вᲂз̾сыла́юща . запѣ́въ : прест҃а́ѧ гжⷭ҇е бцⷣе спасѝ на́съ . Сло́во бж҃їе рᲂдила̀ є҆сѝ вᲂплᲂще́ннѡ , є҆́же пре́же беспло́тнᲂе , па́че є҆стества̀ всенепᲂро́чнаѧ бцⷣе дв҃о , бг҃ᲂмꙋ́жно в̾ ми́рѣ пᲂжи́вшее . тѣ́мъ тѧ̀ всѝ сла́вимъ сꙋ́щее по́ бз҃ѣ застꙋпле́нїе на́ше . И҆спещре́на разли́чїемъ ша́ра бг҃ᲂбл҃гᲂда́тнаѧ , ѻ҆́ч҃ее сло́во пло́ть бы́вшее за млрⷭ҇дїе не и҆з̾рече́ннᲂе , па́че ᲂу҆ма̀ и҆ сло́ва блгⷭ҇ве́наѧ рᲂдила̀ є҆сѝ , пребы́вши дв҃ᲂю нескве́рнаѧ .= сла́ва . Ѿ= ко́рене чⷭ҇таѧ цр҃ьска прᲂзѧбла̀ є҆сѝ , цр҃ѧ хрⷭ҇та̀ бж҃їе сло́во , па́че ᲂу҆ма̀ и҆ смы́сла , вᲂплᲂще́нна рᲂдила̀ є҆сѝ ѿ чи́стыхъ крᲂве́й твᲂи́хъ , сꙋгꙋ́ба є҆стество́мъ пᲂказꙋ́ема , и҆ є҆ди́нствена в̾ сᲂста́вѣ .= и҆ нн҃ѣ . И҆́=же бцⷣꙋ тѧ̀ прᲂпᲂвѣ́даетъ пречⷭ҇таѧ , на всѧ́кїѧ є҆́реси пᲂбѣжде́нїе но́ситъ , пло́ть ᲂу҆́бѡ бы́вшаго не и҆з̾мѣ́ннѡ пᲂрᲂдила̀ є҆сѝ , бг҃ᲂрᲂди́тельнице , вы́шша всѧ́кїѧ тва́ри , сло́во бж҃їе приснᲂсꙋ́щее .

пѣ́снь , г҃ . і҆рмо́съ . Оу҆тверже́и нб҃са̀ в̾ нача́тцѣ ра́зꙋмᲂмъ , и҆ зе́млю на вᲂда́хъ ѡ҆снᲂва́выи . на ка́мени мѧ хрⷭ҇тѐ цр҃ко́внѣмъ ᲂу҆твердѝ , ꙗ҆́кѡ нѣ́сть ст҃а , па́че тебѐ чл҃кᲂлю́бче . Во твᲂю̀ ст҃ꙋ́ю ᲂу҆тро́бꙋ бг҃ъ всели́сѧ , и҆ вᲂплᲂти́сѧ ꙗ҆́кᲂже вѣ́сть бг҃ᲂмт҃и , и҆ спасѐ на́съ живᲂно́сными страстьмѝ . тѣ́мъ тѧ̀ спасе́нїю две́рь сла́вимъ . На землѝ вᲂпло́щьсѧ и҆ пᲂживѐ съ чл҃ки , и҆́же дш҃ꙋ всѣ́мъ чл҃кѡмъ в̾дᲂхнꙋ́въ , ѿ ᲂу҆тро́бы твᲂеѧ̀ прᲂше́дъ , без̾ сѣ́мене пребжⷭ҇твеныи . тѣ́мже тѧ̀ вѣ́рнїи всѝ пѣ́сньми чи́стаѧ ᲂу҆блажа́емъ .= сла́ва . И҆́же ѿ ѻ҆ц҃а пре́же вѣ́къ рᲂжде́на , во ᲂу҆тро́бѣ свᲂе́й заче́нши дв҃о не и҆скꙋсᲂбра́чно . и҆ пᲂрᲂдила̀ є҆сѝ на́мъ в̾кꙋ́пѣ бг҃а и҆ чл҃ка , во ѡ҆бᲂю̀ є҆стествꙋ̀ сᲂверше́на и҆ нераздѣ́льна . и҆ ны́нѣ . же=́злъ прᲂзѧ́бшїи цвѣ́тъ нетлѣ́нїѧ хрⷭ҇та̀ , и҆ златꙋ́ю кади́льницꙋ всѝ тѧ̀ зна́емъ чⷭ҇таѧ , бжⷭ҇твенᲂе сꙋ́щество нᲂсѧ́щи на́ рꙋкꙋ ᲂу҆́гль дв҃о бг҃ᲂбл҃же́ннаѧ .

пѣ́снь , д҃ . і҆рмо́съ . Ты́ ми хрⷭ҇тѐ гдⷭ҇ь , ты́ же и҆ си́ла ми , ты́ ми бг҃ъ , ты́ ми ра́дᲂванїе . не ѡ҆ста́вль нѣ́дра ѻ҆́ч҃а , но ми́лᲂстїю си на́шꙋ нищетꙋ̀ пᲂсѣти́въ . тѣ́мъ съ прᲂро́кѡмъ а҆вва́кꙋмᲂмъ зᲂвꙋ̀ , си́лѣ твᲂе́й сла́ва чл҃кᲂлю́бче . Кїѡ́тъ и҆з̾ дале́ча прᲂѡ҆бразѝ , прїе́мшїи зако́нъ бг҃ᲂпи́санныи , и҆́же во ᲂу҆тро́бѣ живᲂнача́льнᲂе сло́во , заче́нши несказа́нно пренепᲂро́чнаѧ , пита́ющее бᲂга́тно дш҃а пᲂю́щихъ . си́лѣ твᲂе́й сла́ва чл҃кᲂлю́бче . Ты̀ и҆́стиннаѧ спасе́нїю вина̀ , бг҃ᲂмт҃и є҆ди́на бы́сть , твᲂрцꙋ̀ и҆ зижди́телю , ѿ твᲂи́хъ пречⷭ҇тыхъ крᲂве́й пло́ть взаи́мъ да́вши , є҆ю́же сме́ртныѧ сᲂкрꙋши́шасѧ две́ри , и҆ жи́знь челᲂвѣ́кѡмъ дарᲂва́сѧ .= сла́ва . Да ѻ҆́бразъ пᲂгребе́ныи стрⷭ҇тьмѝ , взы́щеши бᲂга́тствᲂмъ бл҃гᲂсти , въ дв҃ыѧ всели́сѧ ᲂу҆тро́бꙋ , и҆з̾ неѧ́же ты̀ премꙋ́дрᲂсть бж҃їѧ хра́мъ сᲂзда̀ , и҆́мже пᲂжи́въ со чл҃ки ще́дре . и҆ спа́слъ є҆сѝ ми́рꙋ кᲂнцы̀ . и҆ нн҃ѣ . по́ =бз҃ѣ тѧ̀ пред̾ста́тельницꙋ стѧжа́хᲂмъ пренепᲂро́чнаѧ , ты́ бо бж҃їѧ мт҃и бы́сть твᲂрца̀ и҆ зижди́телѧ , и҆ на́шъ зра́къ прїе́мшагѡ . и҆ сі́и спа́сша ѿ тлѝ , и҆ бѣ́дъ и҆ сла́вᲂю бжⷭ҇твенᲂю прᲂсла́вльша .

пѣ́снь , є҃ . і҆рмо́съ . Вскꙋ́ю мѧ ѿри́нꙋ , ѿ лица̀ твᲂегѡ̀ свѣ́те незахᲂдѧ́и , пᲂкры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ запᲂвѣде́й ти пꙋтѝ мᲂѧ̀ напра́ви мᲂлю́тисѧ . Ꙗ҆́кѡ бг҃а заче́нши пречⷭ҇таѧ , зижди́телѧ сᲂдѣ́телѧ же и҆ гдⷭ҇а , ро́дᲂве тѧ̀ всѣ́хъ чл҃къ блажа́тъ , и҆ беспло́тныхъ ᲂу҆́мнїи чинᲂнача́льницы , ꙗ҆́кѡ мт҃рь тѧ̀ бг҃ꙋ сла́вѧтъ . Во́инства вы́шнихъ си́лъ пречⷭ҇таѧ блажа́тъ тѧ̀ . тᲂбо́ю бо то́кмѡ и҆́же на землѝ с̾ нбⷭ҇ными сᲂвᲂкꙋ́пльшесѧ , пᲂе́мъ рᲂжество̀ твᲂѐ .= сла́ва . Несказа́ннымъ дв҃о ѻ҆́бразᲂмъ , сло́во в̾сели́сѧ в̾ тѧ̀ и҆ чл҃къ бы́сть . и҆́же пре́жде вѣ́къ ѿ ѻ҆ц҃а вᲂсїѧ́выи , и҆ чл҃ки ѿ тлѝ и҆збавлѧ́ѧ . к̾ жи́зни нетлѣ́ннѣй вᲂз̾вᲂдѧ̀ є҆ди́нъ бл҃гᲂсе́рдыи . и҆ ны́нѣ . О=у҆краси́сѧ пречⷭ҇таѧ дв҃це дв҃ьства дᲂбро́тами , и҆ пе́рвѣй є҆́ввѣ ѿпꙋсти́ла є҆сѝ ѕлᲂѡ҆бра́знᲂе , хрⷭ҇та̀ ро́ждьши , ѻ҆де́ждꙋ без̾сме́ртїѧ да́рꙋѧ тебѐ пᲂю́щимъ .

пѣ́снь , ѕ҃ . і҆рмо́съ . Ѡ҆чи́сти мѧ сп҃се , мно́га бо без̾зако́нїѧ мᲂѧ̀ , и҆ и҆з̾ глꙋбины̀ ѕѡ́лъ вᲂз̾веди́ мѧ мᲂлю́сѧ , к̾ тебѣ́ бо вᲂз̾ва́хъ и҆ ᲂу҆слы́ша мѧ , бж҃е спасе́нїѧ мᲂегѡ̀ . И҆́же вседержа́внᲂю си́лᲂю нᲂсѧ̀ всѧ́ческаѧ , в̾ немᲂже́нїе плᲂтьско́е ѿ тебѐ ѡ҆блече́сѧ дв҃о всенепᲂро́чнаѧ , во бл҃гᲂдѣѧ́нїе чл҃кѡмъ , ꙗ҆́кѡ чл҃кᲂлю́бецъ . На́йде на тѧ̀ вседѣ́тельныи дх҃ъ всенепᲂро́чнаѧ и҆ сло́во бж҃їе в̾ тѧ̀ всели́сѧ , и҆ пло́ть бы́сть несказа́нно , пребы́въ не и҆з̾мѣ́ненъ .= сла́ва . Прᲂсвѣтѝ дꙋ́ши правᲂсла́внѡ пᲂю́щихъ тѧ̀ , рече́нїѧ прᲂро́къ твᲂѐ прᲂвᲂз̾вѣсти́ша пречⷭ҇тᲂе зача́тїе , и҆ па́че сло́ва бг҃ᲂневѣ́стнаѧ ржⷭ҇тво̀ . и҆ ны́нѣ . С=еле́нїе бж҃їе , бжⷭ҇твенᲂе вᲂи́стинꙋ и҆ пречⷭ҇тно́е , пᲂе́мъ бл҃гᲂче́стно мр҃і́ю пречⷭ҇тꙋю , бг҃а бо вмѣстѝ вᲂспрїе́мши невмѣсти́маго , и҆ непᲂсти́жимаго .

Гдⷭ҇и пᲂми́лꙋй , гⷤ . сла́ва , и҆ ны́нѣ . сѣда́ленъ , гла́съ , и҃ . Ꙗ҆́кѡ всенепᲂро́чнаѧ невѣ́сто твᲂрцꙋ̀ , ꙗ҆́кѡ не и҆скꙋсᲂмꙋ́жнаѧ мт҃и и҆зба́вителѧ , ꙗ҆́кѡ прїѧ́телище сꙋ́щи ᲂу҆тѣ́шителѧ всепѣ́таѧ . без̾зако́нїю мѧ сꙋ́ща скве́рно жили́ще и҆ бѣсо́мъ и҆гра́лище в̾ ра́зꙋмѣ бы́вша , пᲂтщи́сѧ ѿ си́хъ ѕлᲂдѣ́йствїѧ мѧ и҆зба́вити , свѣ́тло жили́ще дᲂбрᲂдѣ́тельми сᲂдѣ́лавши , свѣтᲂда́тельнаѧ и҆ нетлѣ́ннаѧ раз̾женѝ ѻ҆́блакъ страсте́й , и҆ вы́шнемꙋ прича́стїю спᲂдо́би , и҆ свѣ́тꙋ невече́рнемꙋ мл҃твами сѝ .

пѣ́снь , з҃ . і҆рмо́съ . Бж҃їѧ схᲂжде́нїѧ ѻ҆́гнь ᲂу҆стыдѣ́сѧ въ вавилѡ́нѣ дре́вле . сегѡ̀ ра́ди ѻ҆́трᲂцы , в̾ пещѝ ра́дᲂваннᲂю нᲂго́ю , ꙗ҆́кѡ во́ свѣтѣ ликᲂва́хꙋ пᲂю́ще , блгⷭ҇ве́нъ бг҃ъ ѻ҆ц҃ъ на́шихъ . Пречⷭ҇таѧ влⷣчце заче́нши и҆зба́вителѧ всѣ́хъ , несказа́ннагѡ и҆ бжⷭ҇твенагѡ спᲂдо́би мѧ и҆збавле́нїѧ , велегла́снѡ вᲂпїю́щаго , и҆ пᲂю́ща бл҃гᲂслᲂве́нъ бг҃ъ ѻ҆ц҃ъ на́шихъ . Ны́нѣ всѧ̀ и҆спо́лнишасѧ свѣ́та бжⷭ҇твенагѡ тᲂбо́ю пречⷭ҇таѧ , ты́ бо две́рь ꙗ҆ви́ласѧ , є҆ю́же ми́рᲂви бг҃ъ бесѣ́дᲂва , прᲂсвѣща́ѧ вѣ́рᲂю зᲂвꙋ́щихъ , бл҃гᲂслᲂве́нъ бг҃ъ ѻ҆ц҃ъ на́шихъ .= сла́ва . Сѐ нн҃ѣ и҆спо́лнисѧ дв҃да бжⷭ҇твенагѡ бжⷭ҇твенᲂе прᲂрече́нїе , мо́лѧтсѧ вᲂи́стинꙋ твᲂемꙋ̀ лицꙋ̀ бг҃ᲂрᲂди́тельнице чⷭ҇таѧ , стѧжа́вши бᲂга́тство бл҃гᲂда́ти , ны́нѣ бл҃гᲂсло́вѧще бг҃а , ѻ҆ц҃ъ на́шихъ . и҆ ны́нѣ . З=ачала̀ пречⷭ҇таѧ и҆́же надᲂвсѣ́ми бг҃а и҆ гдⷭ҇а , бл҃гᲂвᲂли́вшаго спастѝ чл҃ческїи ро́дъ ѿ сме́рти и҆ тлѝ . є҆го́же дᲂсто́йнѡ пᲂю́ще зᲂве́мъ , бл҃гᲂслᲂве́нъ бг҃ъ ѻ҆ц҃ъ на́шихъ .

пѣ́снь , и҃ . і҆рмо́съ . Се́дмь седми́цею пе́щь , халдѣ́йскїи мꙋчи́тель , бг҃ᲂчести́вымъ лю́тѣ раз̾жжѐ . си́лᲂю же лꙋ́чшею спасе́ныхъ ви́дѣвъ , твᲂрцꙋ̀ и҆ и҆зба́вителю вᲂпїѧ́ше , дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки . Бл҃гᲂслᲂве́наѧ пречⷭ҇таѧ , дш҃и мᲂеѧ̀ ꙗ҆́звы , и҆ грѣхо́вныѧ стрꙋ́пы ѡ҆чи́сти , бг҃а ро́ждьшаѧ и҆́же надᲂвсѣ́ми , ѻ҆трᲂкᲂви́це чи́стаѧ , ѿ дв҃ческїѧ не и҆скꙋсᲂбра́чныѧ ᲂу҆тро́бы . є҆го́же дѣ́ти блгⷭ҇ви́те , и҆ превᲂз̾нᲂси́те во́ вѣки . Свѣ́та незахᲂди́магѡ бы́сть прїѧ́тельнице всечⷭ҇таѧ , дв҃ьства дᲂбро́тами сїѧ́ющи и҆ всѣ́хъ ѡ҆зари́ла є҆сѝ , бцⷣꙋ тѧ̀ и҆́стиннꙋю и҆спᲂвѣ́дающихъ ѿ дш҃и и҆ вᲂпїю́щихъ , дѣ́ти бл҃гᲂслᲂви́те сщ҃е́ннїи , и҆ превᲂз̾нᲂси́те є҆гѡ̀ во́ вѣки .= сла́ва . Ѡ҆сщ҃ьшисѧ дх҃ᲂмъ ст҃ы́мъ бцⷣе всенепᲂро́чнаѧ , вᲂи́стинꙋ прїѧ́тъ во ᲂу҆тро́бѣ , без̾нача́льна сн҃а ѻ҆ц҃ꙋ сприснᲂсꙋ́щна , в̾ тебѣ̀ чи́стаѧ вᲂплᲂща́ема , во бл҃гᲂдѣѧ́нїе вѣ́рᲂю вᲂпїю́щимъ , дѣ́ти блгⷭ҇ви́те сщ҃е́ннїи , и҆ превᲂзнᲂси́те є҆гѡ̀ во́ вѣки . и҆ ны́нѣ . Ꙗ҆́=кѡ бг҃а ро́ждьши па́че сло́ва и҆ смы́сла , сегѡ̀ ᲂу҆мᲂлѝ пречⷭ҇таѧ бг҃ᲂмт҃и , бы́ти бл҃гᲂꙋвѣ́тливꙋ недᲂсто́йнымъ на́мъ всѣ́мъ , во стра́шнᲂе є҆гѡ̀ и҆ ᲂу҆жа́снᲂе прише́ствїе , є҆гда̀ хо́щетъ сꙋди́ти чл҃ческᲂмꙋ є҆стествꙋ̀ , наги́мъ стᲂѧ́щимъ всѣ́мъ , и҆ со́ страхᲂмъ сꙋди́мымъ .

пѣ́снь , ѳ҃ . і҆рмо́съ . Оу҆диви́сѧ ᲂу҆́бѡ ѡ҆ се́мъ не́бо , и҆ землѝ ᲂу҆жасо́шасѧ кᲂнцы̀ , ꙗ҆́кѡ бг҃ъ ꙗ҆ви́сѧ чл҃кѡмъ пло́тїю , чре́во же твᲂѐ бы́сть прᲂстра́ннѣе нб҃съ , тѣ́мъ тѧ̀ бцⷣе , а҆́нг҃лъ и҆ чл҃къ чинᲂнача́лїѧ велича́емъ . Ѿве́рженыхъ вѣ́чнагѡ пребыва́нїѧ , и҆ па́дшихъ ѡ҆каѧ́ннѡ в̾ сме́рть , па́ки на́съ призва́въ пречⷭ҇таѧ мт҃и бы́вши и҆зба́вителѧ , и҆ к̾ пре́жнемꙋ тещѝ спᲂдо́бльши ѻ҆те́чествꙋ , тѣ́мъ тѧ̀ бг҃ᲂмт҃и непреста́нно велича́емъ . Оу҆до́бь бцⷣе пᲂда́ждь ми преитѝ житїѧ̀ вᲂлнꙋ̀ напа́стей , и҆ настᲂѧ́нїѧ страсте́й , ꙗ҆́кѡ бл҃га ᲂу҆крᲂтѧ́ющи , и҆ наставлѧ́ющи к̾ дᲂбрᲂдѣ́тели нбⷭ҇наго ше́ствїѧ , да ꙗ҆́кѡ бл҃гᲂда́тельницꙋ непреста́нно велича́ю тѧ̀ .= сла́ва . Чи́стаѧ пресла́внаѧ мт҃и бж҃їѧ , пᲂю́щїѧ тѧ̀ любо́вїю спасѝ ѿ напа́стей , мᲂлвꙋ̀ рѣша́щи млⷭ҇тивно , ꙗ҆́кѡ бг҃а ᲂу҆́бѡ ро́ждьши , всѧ̀ є҆ли́кѡ хо́щеши твᲂри́ти твᲂри́ши невᲂз̾бра́нно и҆ мо́жеши дв҃це . тѣ́мъ тѧ̀ всѝ велича́емъ . и҆ ны́нѣ . Пᲂбѣжа́ющꙋ є҆́реси ю҆́нᲂшскїѧ , чⷭ҇тнꙋ́ю цр҃квь пᲂкажѝ , ю҆́же хрⷭ҇то́съ сн҃ъ тво́й ѡ҆бра́дᲂваннаѧ кро́вїю чⷭ҇тно́ю свᲂе́ю ꙗ҆́кѡ бл҃гъ стѧжа̀ , и҆ спасѐ ѿ бѣ́дъ и҆ ѿ наси́лїѧ ѡ҆держа́щагѡ на́съ влⷣчце . =та́же , дᲂсто́йнѡ є҆́сть . и҆ про́чее , ѡ҆бы́чно . и҆ ѿпꙋ́стъ .

Въ четверто́къ , на ᲂу҆́трени . по а҃ , стихᲂло́гїи . сѣда́льны , а҆пⷭ҇льски . гла́съ , и҃ . Свѣти́ла ми́рꙋ и҆ наста́вники на́шегѡ спасе́нїѧ , и҆́же ѿ нача́ла бжⷭ҇твеныѧ вᲂспᲂе́мъ ᲂу҆ченикѝ бг҃а на́шегѡ , ꙗ҆́кѡ свѣ́тъ сꙋ́щимъ во тмѣ̀ на́мъ вᲂсїѧ́ша , и҆ сл҃нца сла́вы всѣ́мъ сказа́ша , тѣ́мже и҆ ле́сть и҆́дᲂльскꙋю низ̾лᲂжи́ша , трⷪ҇цꙋ прᲂпᲂвѣ́давше во є҆ди́нᲂмъ бжⷭ҇твѣ̀ . сегѡ̀ ра́ди мо́лимсѧ ва́мъ а҆пⷭ҇ли хрⷭ҇та̀ бг҃а , мᲂли́те грѣхо́въ ѡ҆ставле́нїе дарᲂва́ти на́мъ , и҆ ве́лїю млⷭ҇ть . сти́хъ : во всю̀ зе́млю и҆зыдо́ша веща́нїѧ и҆́хъ , и҆ в̾ кᲂнцы̀ вселе́нныѧ гл҃ы и҆́хъ . Свѣти́ла ми́рꙋ и҆ наста́вники на́шегѡ спасе́нїѧ , и҆́же ѿ нача́ла бжⷭ҇твеныѧ вᲂспᲂе́мъ ᲂу҆ченикѝ бг҃а на́шегѡ , ꙗ҆́кѡ свѣ́тъ сꙋ́щимъ во тмѣ̀ на́мъ вᲂсїѧ́ша , и҆ сл҃нца сла́вы всѣ́мъ сказа́ша , тѣ́мже и҆ ле́сть и҆́дᲂльскꙋю низ̾лᲂжи́ша , трⷪ҇цꙋ прᲂпᲂвѣ́давше во є҆ди́нᲂмъ бжⷭ҇твѣ̀ . сегѡ̀ ра́ди мо́лимсѧ ва́мъ а҆пⷭ҇ли хрⷭ҇та̀ бг҃а , мᲂли́те грѣхо́въ ѡ҆ставле́нїе дарᲂва́ти на́мъ , и҆ ве́лїю млⷭ҇ть . сла́ва , и҆ нн҃ѣ , боⷢ҇ . Во и҆скꙋше́нїѧ мнᲂгᲂплете́ннаѧ впа́дъ , ѿ вра́гъ ви́димыхъ и҆ неви́димыхъ , и҆ бꙋ́рею без̾чи́сленыхъ ми грѣхо́въ ѡ҆держи́мь є҆́смь пречⷭ҇таѧ , да ꙗ҆́кѡ к̾ те́плᲂмꙋ застꙋпле́нїю и҆ пᲂкро́вꙋ , къ приста́нищꙋ мᲂемꙋ̀ притека́ю твᲂеѧ̀ бл҃гᲂсти . тѣ́мже пречⷭ҇таѧ и҆з̾ тебѐ вᲂплᲂти́вшагᲂсѧ без̾ сѣ́мене , мᲂлѝ ѡ҆ всѣ́хъ рабѣ́хъ твᲂи́хъ , непреста́нно пᲂю́щихъ тѧ̀ бцⷣе пречⷭ҇таѧ , мᲂлѧ́щи тᲂгѡ̀ прилѣ́жнѡ , сᲂгрѣше́нїи ѡ҆ставле́нїе дарᲂва́ти , пᲂклᲂнѧ́ющимсѧ вѣ́рᲂю ржⷭ҇твꙋ̀ твᲂемꙋ̀ .

по в҃ , стихᲂло́гїи , сѣда́льны . гла́съ , и҃ . Во всю̀ зе́млю ꙗ҆́кᲂже речѐ пррⷪ҇къ , и҆зы́де премꙋ́дрыхъ а҆пⷭ҇лъ вѣща́нїе , прᲂпᲂвѣ́давше бо сло́во , ꙗ҆зы́ки всѧ̀ прᲂсвѣти́ша . тѣ́мже тѣ́хъ по́ дᲂлгꙋ вᲂсхвалѧ́юще пѣ́сньми пᲂчте́мъ , ꙗ҆́кѡ мо́лѧтъ всегда̀ хрⷭ҇та̀ , спасти́сѧ дш҃а́мъ на́шимъ . сти́хъ : и҆спᲂвѣ́дѧтъ нб҃са̀ чꙋдеса̀ твᲂѧ̀ гдⷭ҇и . Во всю̀ зе́млю ꙗ҆́кᲂже речѐ прⷪ҇ркъ , и҆зы́де премꙋ́дрыхъ а҆пⷭ҇лъ вѣща́нїе , прᲂпᲂвѣ́давше бо сло́во , ꙗ҆зы́ки всѧ̀ прᲂсвѣти́ша . тѣ́мже тѣ́хъ по́ дᲂлгꙋ вᲂсхвалѧ́юще пѣ́сньми пᲂчте́мъ , ꙗ҆́кѡ мо́лѧтъ всегда̀ хрⷭ҇та̀ , спасти́сѧ дш҃а́мъ на́шимъ . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Вᲂздержа́нїемъ страсте́й ѻ҆гнепа́льныѧ ᲂу҆мертви́вше зра́ки и҆ двиза́нїѧ , хрⷭ҇то́вꙋ прїѧ́ша бл҃гᲂда́ть мч҃нцы , недꙋ́ги ѿгᲂнѧ́ти бᲂлѧ́щимъ , и҆ жи́ви сꙋ́ще , и҆ по кᲂнчи́нѣ чꙋдеса̀ твᲂри́ти . и҆ вᲂи́стинꙋ чꙋ́до пресла́вно , ꙗ҆́кѡ ко́сти на́ги и҆стᲂча́ютъ и҆сцѣле́нїѧ , въ сла́вꙋ є҆ди́нᲂмꙋ премꙋ́дрᲂмꙋ зижди́телю бг҃ꙋ . сла́ва , и҆ нн҃ѣ , бг҃ᲂро́диченъ . Пред̾ста́тельнице вѣ́рнымъ , бг҃ᲂрᲂди́тельнице . скᲂрбѧ́щимъ ра́дᲂсте , и҆ пла́чꙋщимъ вели́кᲂе ᲂу҆тѣше́нїе . и҆́же и҆́з̾ чрева твᲂегѡ̀ дв҃о всест҃а́го , па́че є҆стества̀ ро́ждьшагᲂсѧ , непреста́нно ѡ҆ на́съ со а҆пⷭ҇лы ст҃ы́ми мᲂлѝ , и҆зба́вити на́съ въ ча́съ и҆спыта́нїѧ лю́тагѡ ѡ҆сꙋже́нїѧ .

по г҃ , стихᲂло́гїи , сѣда́ленъ . гла́съ , и҃ . Свѣти́ла ꙗ҆ви́стесѧ свѣ́тлаѧ хрⷭ҇то́ви самᲂви́дцы , всегда̀ всю̀ зе́млю прᲂсвѣща́юще . и҆ тмꙋ̀ ѿгᲂнѧ́ще мнᲂгᲂбо́жїѧ свѣ́тᲂмъ бл҃гᲂче́стїѧ ᲂу҆че́ньми , тѣ́мже мѧ сꙋ́ща во тмѣ̀ страсте́й без̾ стра́ха хᲂдѧ́ща , прᲂсвѣти́те ва́шими ст҃ы́ми мл҃твами бг҃ᲂно́снїи а҆пⷭ҇ли . сла́ва , и҆ ны́нѣ , боⷢ҇ . Непᲂсти́жимаго сло́ва сн҃а бж҃їѧ , несказа́нно па́че ᲂу҆ма̀ и҆з̾ тебѐ ро́ждьшасѧ бцⷣе , мᲂлѝ со а҆пⷭ҇лы , смире́нїе чи́сто вселе́ннѣй пᲂда́ти . и҆ прегрѣше́нїи дарᲂва́ти на́мъ пре́жде кᲂнца̀ прᲂще́нїе . и҆ црⷭ҇твїю нбⷭ҇нᲂмꙋ кра́йнїѧ ра́ди бл҃гᲂсти спᲂдо́бити рабы̀ свᲂѧ̀ . та́же , ѱл҃о́мъ , н҃ . пᲂми́лꙋй мѧ бж҃е . і҆єре́й , вᲂз̾гла́съ . ми́лᲂстїю и҆ щедро́тами .

Кано́нъ , ст҃ы́мъ сла́внымъ и҆ всехва́льнымъ а҆пⷭ҇лѡмъ . твᲂре́нїе , ѳео́фанᲂво . гла́съ , и҃ . пѣ́снь , а҃ . і҆рмо́съ . Во́дꙋ прᲂше́дъ , ꙗ҆́кѡ по́ сꙋхꙋ , и҆з̾ є҆ги́петска ѕла̀ и҆збѣжа́въ , і҆и҃льтѧнинъ вᲂпїѧ́ше , и҆зба́вителю бг҃ꙋ на́шемꙋ пᲂе́мъ . запѣ́въ : ст҃і́и а҆пⷭ҇ли мᲂли́те бг҃а ѡ҆ на́съ . Ли́че а҆пⷭ҇льскїи свѣтᲂви́дныи , свѣ́тꙋ вели́кᲂмꙋ пред̾стᲂѧ́и , мᲂѐ ѡ҆мраче́ннᲂе ѡ҆зарѝ срⷣце , и҆ ко спасе́нїю стезѧ́мъ наста́ви . двⷤа . Бли́жнїи дрꙋ́зи и҆зба́вителѧ , стрⷭ҇те́й мѧ любвѐ и҆зба́вите , мно́гими лестьмѝ житїѧ̀ прельще́наго , и҆ неразꙋ́мїѧ но́щїю пᲂкрыва́емаго . Ѻ҆рꙋ́жїемъ ᲂу҆ѧ́звеныхъ ѿ лꙋка́вагѡ , и҆сцѣли́те , стрѣ́лы сꙋ́ще си́льнагѡ а҆пⷭ҇ли бжⷭ҇твенїи , и҆́же с̾ вѣ́рᲂю пᲂд̾ кро́въ ва́шъ прибѣга́ющихъ .= боⷢ҇ . П=о́лныи и҆стᲂча́етсѧ бг҃ᲂлѣ́пно , и҆ ѿ твᲂегѡ̀ чре́ва плᲂтᲂно́сенъ мт҃и чи́стаѧ прᲂисхо́дитъ , спаса́ѧ бл҃гᲂꙋтро́бїемъ прельще́ныѧ ѕло́бᲂю ѕмі́евᲂю .

Дрꙋго́е пра́вило . ст҃о́мꙋ чꙋдᲂтво́рцꙋ нико́лѣ . гла́съ , и҃ . і҆рмо́съ . Пᲂсѣче́ныи несѣко́мᲂе пресѣчѐ , и҆ ви́дѣ сл҃нце зе́млю , є҆ѧ́же нѣ́сть ви́дѣло , лю́тагѡ врага̀ вᲂда̀ пᲂтᲂпи́ла є҆́сть , и҆ непрᲂхᲂди́мᲂе про́йде і҆зра́иль , пѣ́снь же вᲂспѣва́шесѧ гдⷭ҇ви пᲂе́мъ , сла́внѡ бо прᲂсла́висѧ . запѣ́въ : ст҃лю хрⷭ҇то́въ нико́лае , мᲂлѝ бг҃а ѡ҆ на́съ . Сли́ки вы́шнихъ си́лъ цр҃ю всѣ́хъ бл҃же́нне пред̾стᲂѧ̀ на́съ и҆́же на землѝ при́снѡ призыва́ющихъ тѧ̀ . всѧ́кᲂгѡ и҆скꙋше́нїѧ ѕла́гѡ нико́лае спасѝ , раз̾рѣше́нїе прᲂсѧ̀ прегрѣше́нїемъ на́шимъ . И҆́же тѧ̀ застꙋ́пника ѡ҆бᲂга́щшїисѧ нико́лае , во́ дни же и҆ в̾ но́щи вѣ́рᲂю тебѣ̀ взыва́емъ . ны́нѣ пред̾варѝ на́съ вельмѝ бѣ́дствꙋющїѧ , бѣсо́вскими лꙋка́выми навѣ́ты , и҆ тлетво́рныхъ челᲂвѣ́къ , ꙗ҆́кѡ да тишинꙋ̀ пᲂлꙋчи́вше вᲂсхвалѧ́емъ тѧ̀ . Крѣ́пкими жи́лами мл҃твъ твᲂи́хъ нико́лае , ᲂу҆дави́ти на́съ тща́щихсѧ кᲂне́чнᲂмꙋ ᲂу҆давле́нїю преда́ждь , и҆збавлѧ́ѧ на́съ ѿ тѣ́хъ лꙋка́ваго сᲂвѣ́та , во хвале́нїи зᲂвꙋ́щїѧ , гдⷭ҇ви пᲂе́мъ сла́вно бо прᲂсла́висѧ .= боⷢ҇ . З=ако́нъ є҆сте́ственыхъ крᲂмѣ̀ рᲂдила̀ є҆сѝ , закᲂнᲂда́вца бг҃а , чл҃ка бы́вша . тᲂгѡ̀ ꙗ҆́кѡ бл҃га мᲂлѝ всенепᲂро́чнаѧ , на́ша без̾зако́нїѧ презрѣ́ти , вᲂпїю́щихъ всегда̀ , гдⷭ҇ви пᲂе́мъ , сла́вно бо прᲂсла́висѧ .

пѣ́снь , г҃ . і҆рмо́съ . Ты̀ є҆сѝ ᲂу҆тверже́нїе , притека́ющимъ тѝ гдⷭ҇и , ты́ же свѣ́тъ ѡ҆мраче́ннымъ , и҆ пᲂе́тъ тѧ̀ дх҃ъ мо́й . Си́лᲂю препᲂѧ́шите сп҃сᲂвы а҆пⷭ҇ли , и҆знемо́гшее страстьмѝ и҆ пᲂмышле́ньми срⷣце мᲂѐ . двⷤа . Є҆ди́но вᲂз̾вѣща́юще ᲂу҆ченицы̀ трисвѣ́тлᲂе бж҃їе сїѧ́нїе , и҆ мнᲂгᲂбо́жїѧ мглꙋ̀ пᲂтреби́ша . Гно́й лꙋка́выи срⷣца мᲂегѡ̀ ᲂу҆тᲂли́те , ꙗ҆́кѡ вра́чеве бжⷭ҇твенагѡ рꙋкᲂдѣ́йствїѧ , ᲂу҆ченицы̀ бг҃а на́шегѡ .= боⷢ҇ . С=паси́ мѧ чⷭ҇таѧ влⷣчце , ро́ждьшаѧ па́че є҆стества̀ твᲂрца̀ всѣ́хъ и҆ влⷣкꙋ и҆ сп҃са и҆ гдⷭ҇а .

и҆́нъ , і҆рмо́съ , то́йже . Да тѧ̀ пᲂчита́емъ , да пᲂе́мъ тѧ̀ ст҃е , пᲂда́ждь на́мъ рꙋ́кꙋ по́мᲂщи ст҃лю нико́лае . Оу҆спѝ нико́лае твᲂи́ми не ᲂу҆сыпа́ющими мᲂли́твами , ꙗ҆́же на ны̀ вᲂста́ющїѧ напа́сти , мо́лимъ тѧ̀ . Всего́ мѧ страстьмѝ напа́ствꙋема , и҆ и҆скꙋше́нїи лꙋка́выхъ челᲂвѣ́къ , хᲂда́тайствᲂмъ сѝ ст҃е нико́лае и҆зба́ви .= боⷢ҇ . Р=азрѣше́нїе грѣхо́мъ , чи́стаѧ дарᲂва́ти ми мᲂлѝ и҆зба́вителѧ , и҆ жите́йскихъ лю́тыхъ напа́стей .

пѣ́снь , д҃ . і҆рмо́съ . Оу҆слы́шахъ гдⷭ҇и смᲂтре́нїѧ твᲂегѡ̀ та́инство , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ . Оу҆краси́стесѧ сла́внїи а҆пⷭ҇ли , бжⷭ҇твеными свѣтлᲂстьмѝ ᲂу҆дᲂбрѧ́еми , и҆ зарѧ́ми прᲂсвѣща́еми , ва́съ свѣти́ла пᲂказа́вшагѡ . двⷤа . Бꙋ́ри всѧ́кїѧ и҆зба́вите мѧ , всѣ́хъ ѡ҆кᲂрми́телїе бжⷭ҇твенїи а҆пⷭ҇ли , в̾ пꙋчи́нѣ бѣ́дствꙋющаго , и҆ напа́стьми житїѧ̀ кᲂле́блемаго . Мᲂрѧ̀ смꙋща́юще мнᲂгᲂбо́жїѧ , ко́ни бг҃ᲂи҆з̾бра́ннїи , прегрѣше́нїи мᲂи́хъ бе́зднꙋ , ва́шими мᲂли́твами пᲂтᲂпи́те .= боⷢ҇ . Р=авнᲂдѣ́тельно рᲂди́телю сло́во , и҆з̾ бᲂкꙋ̀ твᲂе́ю вᲂплᲂти́ла є҆сѝ дв҃о . тѣ́мже ꙗ҆ви́ласѧ є҆сѝ превы́шши всѣ́хъ тва́рей влⷣчце .

и҆́нъ , і҆рмо́съ , то́йже . Ѿ мно́жества прегрѣше́нїи мᲂи́хъ , во мно́ги в̾па́даю без̾чи́сленыѧ ско́рби , пᲂтщи́сѧ ст҃е нико́лае пᲂмᲂщи́ ми , бл҃гᲂда́вцꙋ пᲂдо́бѧсѧ . Себѐ самᲂго̀ пла́чꙋ пᲂгиба́юща , живы́и в̾ лѣ́нᲂсти , и҆ мл҃твами твᲂи́ми нико́лае къ пᲂкаѧ́нїю наведи́ мѧ . И҆́же трѝ ю҆́нᲂши и҆збавле́и ѻ҆́ч҃е нико́лае , ᲂу҆́мрети хᲂтѧ́щїѧ , всѧ́кїѧ мѧ̀ и҆зба́ви тѣснᲂты̀ , и҆ вѣ́чнагѡ ѡ҆сꙋжде́нїѧ .= боⷢ҇ . Д=ѣ́лати ра́зꙋмы нбⷭ҇ныѧ пречⷭ҇таѧ ᲂу҆крѣпи́ мѧ . дш҃ꙋ мᲂю̀ направлѧ́ющи к̾ живо́тнымъ вхо́дᲂмъ пᲂд̾виза́нїѧ .

пѣ́снь , є҃ . і҆рмо́съ . Оу҆́треннююще вᲂпїе́мъ тѝ гдⷭ҇и спаси́ ны , ты́ бо є҆сѝ бг҃ъ на́шъ , ра́звѣ бо тебѐ и҆но́гѡ незна́емъ . Стѣснѧ́еми мно́гими прегрѣше́ньми , к̾ спасе́нѣй ширᲂтѣ̀ и҆спра́вите , ꙗ҆́кѡ ѡ҆кᲂрми́телїе а҆пⷭ҇ли . двⷤа . Чтꙋ́ща мѧ всечестны́и сᲂбо́ръ ва́шъ бг҃ᲂви́дцы а҆пⷭ҇ли , всѧ́кᲂгѡ и҆зба́висте без̾че́стїѧ дѣѧ́нїи мᲂлю́сѧ . Ꙗ҆́кѡ стрⷭ҇те́мъ ᲂу҆пᲂдо́бльшесѧ ст҃і́и сп҃сᲂвѣмъ , всѧ́ко сладᲂстра́стїе ѿ дш҃и мᲂеѧ̀ ѿжени́те а҆пⷭ҇ли .= боⷢ҇ . Б=ᲂлѧ́щꙋю дш҃ꙋ мᲂю̀ и҆сцѣлѝ , ро́ждьшаѧ всѣ́мъ взе́млющагѡ недꙋ́ги , пречⷭ҇таѧ влⷣчце .

и҆́нъ , і҆рмо́съ , то́йже . Оу҆крѣпѝ на́съ мл҃твами си бг҃ᲂбл҃же́нне нико́лае , сᲂблюда́ти пᲂвелѣ́нїѧ хрⷭ҇та̀ , є҆ди́нагѡ бг҃а на́шегѡ . Въ ми́рѣхъ пᲂжи́въ нико́лае , бл҃гᲂꙋха́нїѧ бжⷭ҇твенагѡ на́съ и҆спо́лни . бл҃гᲂче́стнѡ вᲂспѣва́ющихъ тѧ̀ . Оу҆ще́дри на́съ мл҃твами сѝ ст҃лю , бг҃а всеще́драго ᲂу҆мᲂлѧ́ѧ нико́лае , да и҆зба́вимсѧ бѣ́дъ и҆ скᲂрбе́й .= боⷢ҇ . В=о́дъ живᲂто́чныхъ и҆спо́лнь сꙋ́щи ѻ҆трᲂкᲂви́це , всѣ́хъ на́съ напо́й бл҃гᲂче́стно мꙋ́дренѣ пᲂю́щїѧ тѧ̀ .

пѣ́снь , ѕ҃ . і҆рмо́съ . Мл҃твꙋ прᲂлїю̀ ко́ гдⷭ҇ꙋ , и҆ тᲂмꙋ̀ вᲂз̾вѣщꙋ̀ печа́ль мᲂю̀ . ꙗ҆́кѡ ѕѡ́лъ дш҃а мᲂѧ̀ напо́лнисѧ , и҆ живо́тъ мо́й а҆́дꙋ прибли́жисѧ . и҆ мᲂлю́сѧ ꙗ҆́кѡ і҆ѡ́на , ѿ тлѝ бж҃е мо́й вᲂз̾веди́ мѧ . Сᲂтрѧ́сше мᲂли́твъ призыва́нїемъ , низ̾лᲂжи́сте хра́мы и҆́дᲂлᲂвъ ᲂу҆ченицы̀ хрⷭ҇то́вы . но мᲂлю́сѧ вѣ́рᲂю , ᲂу҆ма̀ мᲂегѡ̀ сᲂкрꙋши́те и҆́дᲂлы , и҆ пᲂкажи́те хра́мъ бж҃їи мно́гими грѣхѝ пᲂви́ннаго . вⷤ . И҆́же на ка́мени непᲂкᲂлѣби́мѣмъ сᲂзда́вшесѧ ꙗ҆́кѡ ка́менїе , и҆з̾бра́ннїи бг҃ᲂви́дцы . мᲂѐ срⷣце на песцѣ̀ ᲂу҆мᲂвре́дно сᲂзда́ннᲂе спаси́те . стека́ютбᲂсѧ напа́стей рѣ́ки , и҆ лю́тѣ мѧ ѡ҆бꙋрѣва́ютъ . Любвѐ льсти́выѧ ꙗ҆́же к̾ пло́ти , и҆ ме́рзска мно́гїѧ ра́ди ѕло́бы ꙗ҆́вльшагᲂсѧ , и҆зба́вите мѧ дрꙋ́зи сло́ва , и҆ к̾ любвѝ привѧжи́те вᲂзлюби́вшагѡ грѣ́шныѧ , мно́гїѧ ра́ди млⷭ҇ти ѡ҆ставле́нїѧ .= боⷢ҇ . Ꙗ҆́=кѡ шипо́къ , ꙗ҆́кѡ чи́стѣйшїи кри́нъ , ꙗ҆́кѡ бл҃гᲂꙋха́ннᲂе ѡ҆бᲂнѧ́нїе , ѿ кра́сныхъ ᲂу҆до́лїи мирски́хъ твᲂре́цъ и҆з̾бра́въ тѧ̀ ѻ҆трᲂкᲂви́це , всели́всѧ во ᲂу҆тро́бꙋ твᲂю̀ и҆ рᲂди́всѧ , бл҃гᲂꙋха́нїѧ всѧ́ческаѧ и҆спо́лнилъ є҆́сть .

и҆́нъ , і҆рмо́съ , то́йже . Ра́й срⷣце твᲂѐ ꙗ҆ви́сѧ нико́лае , жи́зни дре́во пᲂсредѝ и҆мѣ́ѧ и҆зба́вителѧ хрⷭ҇та̀ . є҆го́же мᲂлѝ непреста́ннѡ , раѧ̀ сᲂтвᲂри́ти жи́телѧ всѣ́хъ на́съ , те́плымъ застꙋ́пникᲂмъ тᲂбо́ю ѡ҆бᲂга́щшимсѧ . Въ лѣ́нᲂсти жи́знь мᲂю̀ прехᲂдѧ̀ , и҆ без̾бᲂѧ́знено сᲂгрѣша́ю ѻ҆каѧ́нныи , и҆ та́мѡ не ѿрица́емᲂе сꙋди́ще пᲂмышлѧ́ѧ , и҆ стра́хᲂмъ сᲂдержи́мь є҆́смь , ᲂу҆ще́дри мѧ бж҃е , нико́лы мл҃твами ꙗ҆́кѡ бл҃гᲂꙋтро́бенъ . Внеза́пꙋ нахᲂдѧ́щїѧ ми бꙋ́ри и҆скꙋше́нїи мнᲂгᲂѡ҆бра́зныхъ , за мно́жество мᲂи́хъ сᲂгрѣше́нїи , вᲂпїю̀ не ѡ҆ста́ви менѐ бл҃же́нне без̾застꙋпле́нїѧ , но прᲂстри́ ми ꙗ҆́кѡ млⷭ҇тивъ по́мᲂщи рꙋ́кꙋ , и҆ спаси́ мѧ .= боⷢ҇ . П=ᲂла́та высо́кагѡ цр҃ѧ , и҆ ѻ҆гнеѡ҆бра́зныи бы́сть прⷭ҇то́лъ дв҃о , херꙋви́мъ превы́шши и҆ серафи́мъ , па́че ᲂу҆ма̀ бы́вшаѧ . тѣ́мже тѧ̀ всѧ́ко дыха́нїе сла́витъ , ꙗ҆́кѡ мт҃рь зижди́телѧ .

пѣ́снь , з҃ . і҆рмо́съ . Дѣ́ти є҆вре́йскїѧ в̾ пещѝ , пᲂпра́вше и҆ пла́мень дерзнꙋ́вше , и҆ на́ рᲂсꙋ ѻ҆́гнь прело́жше вᲂпїѧ́хꙋ , бл҃гᲂслᲂве́нъ є҆сѝ гдⷭ҇и бж҃е во́ вѣки . Но́щь мѧ сᲂдержи́тъ лѣ́нᲂсти , и҆ пᲂкрыва́етъ мѧ мгла̀ грѣхо́внаѧ , свѣ́тъ ми́рꙋ премꙋ́дрїи а҆пⷭ҇ли ꙗ҆́вльшесѧ , ѡ҆зари́ти пᲂтщи́тесѧ ѡ҆мраче́нᲂе ми срⷣце . двⷤа . Дрꙋго́е не́бо ꙗ҆́вльшесѧ , пᲂвѣ́дꙋюще бг҃а на́шегѡ сла́вꙋ , без̾сла́вїѧ стрⷭ҇те́й и҆зба́вите бг҃ᲂгл҃ивїи , вѣ́рᲂю прибѣга́ющїѧ , к̾ держа́внᲂмꙋ ва́шемꙋ пᲂкро́вꙋ . Ѻ҆́гненᲂе ᲂу҆́глїе ꙗ҆́вльше а҆пⷭ҇ли , вᲂз̾жига́еми ѻ҆гне́мъ ᲂу҆тѣ́шителѧ , и҆ всѧ́кꙋ ве́щь пᲂпали́те на́шеѧ ѕло́бы , и҆ ѻ҆гнѧ̀ негаси́магѡ и҆зба́вите на́съ во́ вѣки .= боⷢ҇ . Г=ᲂра̀ присѣ́ннаѧ ꙗ҆ви́ласѧ є҆сѝ нерꙋкᲂсѣ́чнаѧ , и҆з̾ неѧ́же ѿсѣче́сѧ ка́мень . тѣ́мже влⷣчце ᲂу҆бѣлѝ дш҃ꙋ мᲂю̀ ѡ҆мраче́нꙋю , и҆ ѡ҆камене́нꙋю го́рькими любᲂсластьмѝ .

и҆́нъ , і҆рмо́съ , то́йже . И҆стᲂчи́лъ є҆сѝ стрꙋѝ ᲂу҆че́нїи , є҆ресе́й и҆з̾сꙋша́ющїѧ пᲂто́ки , и҆ вѣ́рныхъ дꙋ́ши напᲂѧ́ющїѧ бᲂга́тнѡ , сщ҃еннᲂдѣ́йствениче нико́лае , сегѡ̀ ра́ди тѧ̀ чте́мъ . Оу҆крѣпи́лсѧ є҆сѝ си́лᲂю тро́йческᲂю вᲂз̾мᲂга́емь кꙋми́ры ле́стныѧ пᲂгꙋби́ти . тѣ́мже вѣ́рнѡ мᲂлю́тисѧ ѻ҆́ч҃е , ᲂу҆ма̀ мᲂегѡ̀ и҆́дᲂлы страстны́ѧ ѿженѝ . Мѵ́рѧнᲂмъ прпⷣбнѡ первᲂпресто́льникъ бы́въ , по сме́рти и҆стᲂча́еши бжⷭ҇твенᲂе мѵ́ро , ѕлᲂсмра́дныѧ на́ша ѿгᲂнѧ́ѧ недꙋ́ги нико́лае всебл҃же́нне , вѣ́рнѡ к̾ тебѣ̀ пристꙋпа́ющимъ .= боⷢ҇ . О=у҆крати́ла є҆сѝ ᲂу҆стремле́нїе сме́ртнᲂе , без̾сме́ртнаго бг҃а пᲂро́ждьшаѧ , є҆го́же мᲂлѝ чⷭ҇таѧ , стра́сти ᲂу҆мертви́ти смире́нагѡ ми тѣлесѐ , и҆ живᲂтꙋ́ мѧ спᲂдо́бити .

пѣ́снь , и҃ . і҆рмо́съ . Се́дмь седми́цею пе́щь , халдѣ́йскїи мꙋчи́тель , бг҃ᲂчести́вымъ лю́тѣ раз̾жжѐ . си́лᲂю же лꙋ́чшею спасе́ныхъ ви́дѣвъ , твᲂрцꙋ̀ и҆ и҆зба́вителю вᲂпїѧ́ше , дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки . Кᲂле́блемꙋю страстьмѝ , дш҃ꙋ мᲂю̀ ᲂу҆крѣпи́те , и҆́же цр҃кви неразᲂри́маѧ ѡ҆снᲂва́нїѧ , стᲂлпѝ непᲂкᲂлеби́мїи , вѣ́рныхъ пред̾гра́дїѧ , лᲂвцы̀ сꙋ́щимъ во глꙋбинѣ̀ пᲂги́бели , бл҃гᲂꙋти́шнаѧ приста́нища вѣ́рнѡ пᲂю́щимъ , дѣ́ти блгⷭ҇ви́те , сщ҃е́ннїи вᲂспо́йте , лю́дїе превᲂз̾нᲂси́те є҆гѡ̀ во́ вѣки . двⷤа . И҆́же во́ грᲂбѣ те́мнагѡ ѿчаѧ́нїѧ , и҆ в̾ преи҆спо́днихъ сласте́й паде́жи лежа́щаго мѧ , ва́шими мл҃твами вᲂз̾вестѝ ᲂу҆млрⷭ҇дитесѧ ᲂу҆ченицы̀ сп҃сᲂвы , и҆́же ᲂу҆чи́телева бл҃гᲂꙋтро́бїѧ ѡ҆бᲂгати́тисѧ ꙗ҆́вѣ спᲂдо́бистесѧ , а҆пⷭ҇ли бг҃ᲂви́дцы во всѧ̀ вѣ́ки . два́жды . боⷢ҇ . Ꙗ҆́кѡ свѣтла̀ въ красᲂта́хъ дᲂбрᲂдѣ́телей ꙗ҆ви́ласѧ є҆сѝ всечⷭ҇таѧ , дᲂбрᲂтвᲂри́тельнᲂе вседѣ́телѧ бл҃гᲂлѣ́пїе во ᲂу҆тро́бꙋ в̾мѣсти́ла є҆сѝ . є҆го́же прилѣ́жнѡ мᲂлѝ , ѿ безъѡ҆бра́зїѧ страсте́й , сᲂдержи́мꙋю и҆ дᲂбро́тꙋ пе́рвꙋю прᲂсѧ́щꙋ чⷭ҇таѧ ѕѣлѡ̀ бл҃гᲂлѣ́пнѣйши нелѣ́пᲂтнꙋю дш҃ꙋ мᲂю̀ прᲂсвѣти́ти , во всѧ̀ вѣ́ки .

и҆́нъ , і҆рмо́съ . Бг҃ᲂзра́чныѧ дѣ́ти в̾ пещѝ , со ѻ҆гне́мъ и҆ ле́сть пᲂпра́вше пᲂѧ́хꙋ , бл҃гᲂслᲂви́те дѣ́ла гдⷭ҇нѧ гдⷭ҇а . Прᲂсвѣще́нъ сы́и бг҃ᲂмꙋ́дре ст҃лю , свѣтᲂза́рными лꙋча́ми трисл҃нчнагѡ бжⷭ҇тва̀ , страсте́й мᲂи́хъ тмꙋ̀ мл҃твами сѝ разᲂрѝ нико́лае . И҆́же вᲂево́ды трѝ и҆збавле́и ѿ сме́рти прише́ствїемъ стра́шнымъ , сщ҃еннᲂтаи́ниче нико́лае , ѿ всѧ́кᲂгѡ смертᲂно́снагѡ вре́да и҆ на́съ и҆зба́ви . Кᲂле́блющїѧсѧ бѣсо́вскими и҆скꙋше́нїи , и҆ ѿ ѡ҆би́дѧщихъ чл҃къ , твᲂи́ми мл҃твами ᲂу҆твердѝ на́съ , и҆ невре́дны спасѝ всебл҃же́нне нико́лае .= боⷢ҇ . Мᲂльбꙋ̀ принесѝ гдⷭ҇ви , ᲂу҆ще́дрити и҆ спастѝ , вѣ́рᲂю къ тебѣ̀ притека́ющїѧ прест҃а́ѧ дв҃о , чл҃кѡмъ пᲂмо́щнице . =та́же , пѣ́снь бцⷣѣ . вели́читъ дш҃а мᲂѧ̀ .= и҆ =пᲂкло́ны до землѝ .

пѣ́снь , ѳ҃ . і҆рмо́съ . Оу҆диви́сѧ ᲂу҆́бѡ ѡ҆ се́мъ не́бо , и҆ землѝ ᲂу҆жасо́шасѧ кᲂнцы̀ , ꙗ҆́кѡ бг҃ъ ꙗ҆ви́сѧ чл҃кѡмъ пло́тїю , чре́во же твᲂѐ бы́сть прᲂстра́ннѣе нб҃съ , тѣ́мъ тѧ̀ бцⷣе , а҆́нг҃лъ и҆ чл҃къ чинᲂнача́лїѧ велича́емъ . Льво́мъ дш҃етлѣ́ннымъ , си́лᲂю бж҃їею сᲂкрꙋши́вше че́люсти а҆пⷭ҇ли , ꙗ҆́кѡ ѿ хрⷭ҇та̀ кнѧ́зи пᲂста́влени бы́сте на землѝ ѱл҃о́мски , дх҃ꙋ сїю̀ пᲂкарѧ́юще бл҃гᲂче́стнѡ . тѣ́мже бесчи́ннаѧ двиза́нїѧ мᲂегѡ̀ срⷣца , зако́нᲂмъ бжⷭ҇твенымъ пᲂкᲂри́те . двⷤа . Кра́снаго па́че всѣ́хъ сн҃о́въ чл҃ческихъ , ꙗ҆́вльшасѧ в̾ ми́рѣ прᲂпᲂвѣ́давше сло́ва бж҃їѧ . но́зѣ ᲂу҆краси́сте ꙗ҆́кѡ бл҃га́ѧ прᲂпᲂвѣ́дающе всемꙋ́дрїи , ми́ръ же и҆ живо́тъ . тѣ́мже смꙋще́нꙋю страстьмѝ дш҃ꙋ мᲂю̀ , ва́шими мл҃твами ᲂу҆мири́те . Оу҆мертви́вше ᲂу҆́ды ꙗ҆́же на землѝ , в̾ живо́тъ всѧ́ческїи ѡ҆блеко́стесѧ , страстьмѝ стра́сть и҆з̾ѡ҆бразꙋ́юще честнꙋ́ю . тѣ́мже ᲂу҆мерщве́ннаго мѧ стрѣло́ю ѕло́бы лꙋка́вагѡ , ѡ҆живи́те бы́лїемъ при́снагѡ пᲂкаѧ́нїѧ , бг҃ᲂбл҃же́ннїи а҆пⷭ҇ли .= боⷢ҇ . Н=едꙋ́гꙋющꙋю дш҃ꙋ мᲂю̀ стра́стїю лю́тᲂю , ро́ждьшаѧ бг҃а пребл҃га́гѡ , ꙗ҆́кѡ млⷭ҇тива и҆сцѣлѝ , и҆ и҆зба́ви мѧ при́снѡ пречⷭ҇таѧ , пᲂд̾стрека́ющихъ и҆ нахᲂдѧ́щихъ ми враго́въ , ꙗ҆́кѡ да спаса́емь ᲂу҆се́рднѡ тѧ̀ велича́ю , вᲂз̾вели́чившꙋю ро́дъ на́шъ .

и҆́нъ , і҆рмо́съ . Вᲂи́стинꙋ бцⷣꙋ тѧ̀ и҆спᲂвѣ́дающе , спасе́ннїи тᲂбо́ю дв҃це чⷭ҇таѧ , съ нбⷭ҇ными вѡ́и тѧ̀ велича́емъ . Ꙗ҆́кѡ и҆зба́витель тебѐ вѣ́рᲂю мᲂлѧ́щимъ , и҆зба́ви мѧ ѕло́бы всѧ́кїѧ нико́лае , бл҃га́го мᲂлѧ̀ бг҃а и҆ гдⷭ҇а . Сы́и съ нбⷭ҇ными ны́нѣ ликᲂстᲂѧ́ньми , ст҃ѣ́йшїи ѻ҆́ч҃е нико́лае , блага́гѡ ᲂу҆мᲂлѝ бг҃а спастѝ на́съ . Сꙋ́дъ при две́рехъ блюдѝ дш҃е мᲂѧ̀ , и҆ сꙋдїѝ бг҃ꙋ вᲂзᲂпі́и , нико́лы мл҃твами спаси́ мѧ гдⷭ҇и .= боⷢ҇ . С=вѣ́тꙋ сꙋ́щи прїѧ́телище дв҃о , прᲂсвѣтѝ ѡ҆мраче́нꙋю страстьмѝ дш҃ꙋ мᲂю̀ , ꙗ҆́кѡ да вѣ́рᲂю и҆ любо́вїю при́снѡ сла́влю тѧ̀ .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стⷯры , а҆пⷭ҇лѡмъ . гла́съ , и҃ . Гдⷭ҇и , тебѐ вᲂи́стинꙋ на землѝ а҆пⷭ҇ли вᲂзлюби́вше , ᲂу҆ме́ты вмѣни́ша всѧ̀ , да тебѐ є҆ди́нагѡ прїѡбрѧ́щꙋтъ . и҆ по тебѣ̀ на ра́ны тѣлеса̀ свᲂѧ̀ преда́ша . сегѡ̀ ра́ди прᲂсла́влени бы́ша , мᲂли́тесѧ ѡ҆ дш҃а́хъ на́шихъ .

сти́хъ : и҆спо́лнихᲂмсѧ за ᲂу҆́тра . Гдⷭ҇и , ты̀ а҆пⷭ҇льскꙋю па́мѧть на землѝ вᲂзвели́чилъ є҆сѝ , вси́ бо в̾кꙋ́пѣ сᲂше́дшесѧ в̾ не́й славᲂсло́вимъ тѧ̀ , ꙗ҆́кѡ пᲂдае́ши на́мъ тѣ́хъ ра́ди и҆сцѣле́нїѧ , и҆ всемꙋ̀ ми́рꙋ смире́нїе , мл҃твами и҆́хъ и҆ ве́лїю ми́лᲂсть .

сти́хъ : и҆ бꙋ́ди свѣ́тлᲂсть . мⷱ҇ꙋ . Во брᲂнѧ̀ вѣ́ры ѡ҆бо́лкшесѧ до́брѣ , и҆ ѻ҆́бразᲂмъ крⷭ҇тнымъ вᲂѡ҆рꙋжи́вше себѐ , во́ини крѣ́пцы ꙗ҆ви́стесѧ . мꙋчи́телемъ мꙋ́жески прᲂти́вистесѧ , и҆ дїа́вᲂлю пре́лесть низ̾лᲂжи́сте , пᲂбѣди́телїе бы́вше , вѣнце́мъ спᲂдо́бистесѧ . мᲂли́тесѧ прⷭ҇нѡ ѡ҆ на́съ , спасти́сѧ дш҃а́мъ на́шимъ .

сла́ва , и҆ ны́нѣ , боⷢ҇ . И҆схи́ти мѧ влⷣчце рꙋкѝ ѕмі́евы чл҃кᲂꙋбі́йца , хᲂтѧ́ща мѧ лꙋка́вствᲂмъ пᲂглᲂти́ти до кᲂнца̀ , сᲂкрꙋшѝ че́люсти є҆гѡ̀ мᲂлю́ тѧ , и҆ ко́зни разᲂрѝ . ꙗ҆́кѡ да и҆збы́въ ѿ нᲂгте́й є҆гѡ̀ , велича́ю застꙋпле́нїе твᲂѐ .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= є҆ктенїѧ̀ . =та́же , ча́съ , а҃ . ѱалмы̀ , ѡ҆бы́чны . и҆ про́чее , и҆ кᲂне́чныи ѿпꙋ́стъ .

Въ четверто́къ , бл҃же́нны . гла́съ , и҃ .

Пᲂмѧнѝ на́съ хрⷭ҇тѐ сп҃се ми́ра , ꙗ҆́кᲂже разбо́йника пᲂмѧнꙋ̀ на́ древѣ , и҆ спᲂдо́би всѣ́хъ є҆ди́не ще́дре , нбⷭ҇нᲂмꙋ црⷭ҇твїю тѝ .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Трꙋбы̀ ꙗ҆́вльшесѧ хрⷭ҇то́ви а҆пⷭ҇ли , сꙋ́щїѧ во́ грᲂбѣхъ ѕлᲂвѣ́рїѧ лежа́щїѧ вᲂз̾дви́гнꙋли є҆стѐ , и҆ бжⷭ҇твеныѧ жи́зни прича́стники сᲂдѣ́ласте .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Сѣ́менемъ та́йнымъ сло́ва , бг҃ᲂгла́снїи , всѣ́хъ ꙗ҆зы́къ срⷣца̀ непло́днаѧ , плᲂдᲂно́сна сᲂдѣ́ласте бжⷭ҇твенагѡ ра́зꙋма . тѣ́мже дᲂсто́йнѡ блажи́ми є҆стѐ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Всѧ́кїѧ себѐ ѡ҆бнажи́вше ѕло́бы , пᲂсредѣ̀ лю́тыхъ прᲂи҆до́ша до́блествено , и҆ съ нб҃сѐ въ ри́зы спасе́нїѧ страда́льцы ѡ҆дѣ́ѧшасѧ .

сла́ва . Оу҆мертвѝ ѕлᲂтво́рныхъ страсте́й вᲂста́нїѧ , честна́ѧ трⷪ҇це всест҃а́ѧ , мл҃твами бжⷭ҇твеныхъ а҆пⷭ҇лъ твᲂи́хъ , ꙗ҆́кѡ да спаса́емь сла́влю тѧ̀ .

и҆ ны́нѣ . Ра́дꙋисѧ клещѐ ᲂу҆́глѧ бжⷭ҇твенагѡ . ра́дꙋисѧ прᲂро́кᲂмъ печа́ть кꙋ́пнѡ , и҆ а҆пⷭ҇лѡмъ ѡ҆глаше́нїе пречⷭ҇таѧ бцⷣе . є҆ѧ́же ра́ди ѿ и҆стлѣ́нїѧ свᲂбᲂди́хᲂмсѧ .