Глас 8 среда

Во вто́рникъ , ве́черъ . на гдⷭ҇и вᲂзва́хъ , стихѣ́ры , крⷭ҇тны . гла́съ , и҃ . =запѣ́въ : ꙗ҆́кѡ ѿ тебѐ ѡ҆чище́нїе є҆́сть . Н=а крⷭ҇тѣ̀ пригво́ждьсѧ хрⷭ҇тѐ , и҆скᲂпᲂва́емъ в̾ рꙋ́цѣ и҆ но́зѣ , в̾ ре́бра же ст҃а́ѧ прᲂбᲂде́сѧ , и҆стᲂча́ѧ ми ка́пли бжⷭ҇твенагѡ спасе́нїѧ пребл҃гі́и . кро́вь же и҆ во́дꙋ , ꙗ҆́кѡ да ѡ҆мы́еши мо́й гно́й и҆ скве́рнꙋ . сла́ва твᲂе́й всеще́дре бл҃гᲂсти .

ᲂу҆пᲂва̀ дш҃а мᲂѧ̀ на́ гдⷭ҇а . Страда́ти претерпѣ̀ влⷣко , ꙗ҆́кѡ да без̾стра́стїе всѣ́мъ пᲂда́си пᲂклᲂнѧ́ющимсѧ твᲂи́мъ страсте́мъ , и҆ во́льнᲂмꙋ закᲂле́нїю , и҆ кᲂпїю̀ и҆ гво́здемъ , и҆ тро́сти , ꙗ҆́же дᲂлгᲂтерпѣли́внѡ хᲂтѧ̀ претерпѣ́лъ є҆сѝ . ꙗ҆́кѡ да и҆ мнѣ̀ и҆схᲂда́таиши гдⷭ҇и , ра́ди страсте́й твᲂи́хъ без̾стра́стїе .

да ᲂу҆пᲂва́етъ і҆и҃ль на́ гдⷭ҇а . Ю҆́ница нескве́рнаѧ , ю҆нца̀ ви́дѧщи на́ древо вᲂздви́жена во́лею , рыда́ющи ᲂу҆ми́льнѡ вᲂпїѧ́ше , ᲂу҆вы̀ мнѣ̀ вᲂзлю́бленнѣйшее ча́до , что́ ти со́ньмъ вᲂздадѐ без̾бл҃гᲂда́тныи є҆вре́йскїи ; хᲂтѧ́ мѧ ѡ҆без̾ча́дствᲂвати ѿ тебѐ вселюби́мыи .

та́же , в̾ минѣ́и , стⷯры , ст҃о́мꙋ . а҆́ще ли нѣ́сть минѣ́и . и҆́ны , стихѣ́ры , прест҃ѣ́й бцⷣѣ . гла́съ , и҃ . =запѣ́въ : ѿ всѣ́хъ без̾зако́нїи є҆гѡ̀ . Н=етерплю̀ ча́до зрѣ́ти тѧ̀ на́ древѣ ᲂу҆снꙋ́вша , и҆́же бо́дрᲂсть всѣ́мъ даю́щаго . ꙗ҆́кѡ да и҆́же дре́вле ѿ престꙋпле́нїѧ плᲂда̀ , сно́мъ всепа́гꙋбнымъ ᲂу҆снꙋ́вшимъ , бжⷭ҇твенꙋю и҆ спаси́тельнꙋю бо́дрᲂсть пᲂда́си , дв҃аѧ глаго́лаше пла́чꙋщисѧ . ю҆́же велича́емъ .

пᲂхвали́те є҆гѡ̀ всѝ лю́дїе . Сᲂбо́ръ непра́ведныи , тебѐ на крⷭ҇тъ вᲂз̾дви́же а҆́гньца , взе́млющаго ми́рꙋ прегрѣше́нїѧ . и҆ кᲂпїе́мъ твᲂѧ̀ ре́бра прᲂбᲂдо́ша дᲂлгᲂтерпѣли́ве , и҆ рꙋ́цѣ пригвᲂзди́ша ти и҆ но́зѣ . ѽ сꙋро́вьства ѕла́гѡ ; ѽле дерзнᲂве́нїѧ , пречⷭ҇таѧ сїѧ̀ взыва́ше , ᲂу҆ми́льно слезѧ́щи .

и҆ и҆́стина гдⷭ҇нѧ пребыва́етъ во́ вѣки . Что̀ зри́мᲂе сїѐ є҆́же нн҃ѣ ви́жꙋ влⷣко , и҆́же го́рстїю всю̀ тва́рь пречꙋ́днѣ сᲂдержа́и ; на́ древѣ ꙗ҆́кᲂже а҆́гнецъ без̾ пра́вды ви́сиши сло́ве бж҃їи , ѿ ра́бъ непᲂкᲂри́выхъ пᲂвѣ́шенъ . ѽле терпѣ́нїѧ , ѽле твᲂеѧ̀ бл҃гᲂсти всеще́дре , слезѧ́щи гл҃аше пренепᲂро́чнаѧ .

сла́ва , и҆ ны́нѣ , крⷭ҇тᲂбоⷢ҇ . А҆́гньца тѧ̀ , є҆гда̀ а҆́гница и҆ дв҃аѧ к̾ закᲂле́нїю ведо́ма ᲂу҆зрѣ̀ со слеза́ми сло́ве пᲂслѣ́дᲂваше , и҆ взыва́ше , гдѣ̀ тщи́шисѧ ча́до мᲂѐ . сше́ствꙋю тебѣ̀ сладча́йшїи . нетерплю́ бо незрѣ́ти тебѐ і҆с҃е мо́й мнᲂгᲂми́лᲂстиве .

та́же , свѣ́тѣ ти́хїи . прᲂки́менъ , дню̀ . та́же , спᲂдо́би гдⷭ҇и в̾ ве́черъ се́й . на стихо́внѣ , стихѣ́ры , крⷭ҇тны . гла́съ , и҃ . Вᲂзнесы́исѧ на крⷭ҇тъ хрⷭ҇тѐ бж҃е , и҆ спа́слъ є҆сѝ чл҃ческїи ро́дъ . сла́вимъ стра́сти твᲂѧ̀ .

сти́хъ : к̾ тебѣ̀ вᲂз̾ведо́хъ ѻ҆́чи мᲂѝ . Пригвᲂзди́всѧ на крⷭ҇тѣ̀ хрⷭ҇тѐ бж҃е , и҆ ѿве́рзлъ є҆сѝ ра́йскїѧ две́ри . сла́вимъ бжⷭ҇тво̀ твᲂѐ .

сти́хъ : пᲂми́лꙋй на́съ гдⷭ҇и . мⷱ҇ꙋ . Мч҃нцы твᲂѝ гдⷭ҇и забы́ша жите́йскаѧ , небре́гше ѡ҆ мꙋче́нїихъ бꙋ́дꙋщїѧ ра́ди жи́зни , то́й наслѣ́дницы ꙗ҆ви́шасѧ , тѣ́мже и҆ со а҆́нг҃лы ра́дꙋютсѧ . тѣ́хъ мᲂли́твами да́рꙋй лю́демъ твᲂи́мъ ве́лїю ми́лᲂсть .

сла́ва , и҆ ны́нѣ , крⷭ҇тᲂбоⷢ҇ . Гдⷭ҇и є҆гда́ тѧ сл҃нца пра́веднаго , сл҃нце ви́дѣ на́ древѣ пᲂвѣ́шена лꙋчѝ скры̀ , и҆ лꙋна̀ свѣ́тъ во тмꙋ̀ прелᲂжѝ . всенепᲂро́чнаѧ же твᲂѧ̀ мт҃и ᲂу҆тро́бᲂю ᲂу҆ѧзвлѧ́шесѧ .

таⷤ , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ . сла́ва , и҆ ны́нѣ , крⷭ҇тᲂбоⷢ҇ . =во́ =гласъ трᲂпарѧ̀ . пᲂсе́мъ , є҆ктенїѧ̀ . =и҆ ѿпꙋ́стъ .

Во вто́рникъ , на па́вечерницѣ . кано́нъ , мᲂле́бенъ , к̾ прест҃ѣ́й бцⷣѣ . гла́съ , и҃ . пѣ́снь , а҃ . і҆рмо́съ . Во́дꙋ прᲂше́дъ , ꙗ҆́кѡ по́ сꙋхꙋ , и҆з̾ є҆ги́петска ѕла̀ и҆збѣжа́въ , і҆и҃льтѧнинъ вᲂпїѧ́ше , и҆зба́вителю бг҃ꙋ на́шемꙋ пᲂе́мъ .

запѣ́въ : прест҃а́ѧ гжⷭ҇е бцⷣе спасѝ на́съ . Мно́гими сᲂдержи́мь напа́стьми , к̾ тебѣ̀ прибѣга́ю спасе́нїѧ и҆скі́и , ѽ мт҃и сло́вꙋ и҆ дв҃о , ѿ лю́тыхъ и҆ нꙋ́жныхъ мѧ спасѝ . Страсте́й мѧ смꙋща́ютъ прило́зи , и҆ мно́гїѧ печа́ли и҆спᲂлнѧ́ютъ ми дꙋ́шꙋ , ᲂу҆мирѝ ѻ҆трᲂкᲂви́це тишино́ю сн҃а и҆ бг҃а твᲂегѡ̀ всенепᲂро́чнаѧ . сла́ва . Сп҃са и҆ бг҃а ро́ждьшꙋю тѧ̀ , мᲂлю̀ дв҃це и҆зба́вити мѧ ѿ лю́тъ , к̾ тебѣ́ бо ны́нѣ прибѣга́ю , прᲂстира́ѧ дш҃ꙋ и҆ пᲂмышле́нїе . и҆ ны́нѣ . Въ ско́рби мѧ сꙋ́ща и҆ въ тꙋзѣ̀ пᲂсѣще́нїѧ , бжⷭ҇твенагѡ прᲂмышле́нїѧ , є҆́же ѿ тебѐ спᲂдо́би є҆ди́на бг҃ᲂмт҃и , ꙗ҆́кѡ бл҃га , бл҃го́мꙋ же рᲂди́тельнице .

пѣ́снь , г҃ . і҆рмо́съ . Нбⷭ҇нᲂмꙋ крꙋ́гꙋ верхᲂтво́рче гдⷭ҇и , и҆ цр҃кви зижди́телю , ты̀ менѐ ᲂу҆твердѝ в̾ любвѝ свᲂе́й , жела́нїемъ сы́и кра́й , и҆ вѣ́рнымъ ᲂу҆тверже́нїе , є҆ди́не чл҃кᲂлю́бче . Застꙋпле́нїе и҆ пᲂкро́въ жи́зни мᲂе́й , пᲂлᲂжи́хъ тѧ бг҃ᲂрᲂди́тельнице дв҃о , ты̀ менѐ ѡ҆кᲂрмѝ ко приста́нищꙋ свᲂемꙋ̀ , бл҃ги́мъ вино́вна , и҆ вѣ́рнымъ ᲂу҆тверже́нїе , є҆ди́на всепѣ́таѧ .= Мᲂлю̀ дв҃це , дш҃е́внᲂе смꙋще́нїе , и҆ печа́ли бꙋ́рю разᲂри́ти мѝ ты́ бо бг҃ᲂневѣ́стнаѧ , нача́льника ти́шинѣ хрⷭ҇та̀ рᲂдила̀ є҆сѝ , є҆ди́на пречи́стаѧ . =сла́ва . Бл҃гᲂда́телѧ ро́ждьши , до́брымъ вино́внаго , бл҃гᲂдѣѧ́нїѧ бᲂга́тство всѣ́мъ и҆стᲂчѝ , всѧ́ бо мо́жеши , ꙗ҆́кѡ си́льна в̾ крѣ́пᲂсти , хрⷭ҇та̀ ро́ждьши бг҃ᲂбл҃же́ннаѧ . и҆ ны́нѣ . Лю́тыми недꙋ́ги , и҆ бᲂлѣ́знеными страстьмѝ и҆стѧза́емꙋ , дв҃о ты́ ми пᲂмᲂзѝ , и҆сцѣле́нїемъ бо неѡ҆скꙋ́дно тѧ зна́ю сᲂкро́вище , некра́дᲂмо и҆ не и҆зда́емо .

пѣ́снь , д҃ . і҆рмо́съ . Оу҆слы́шахъ гдⷭ҇и смᲂтре́нїѧ твᲂегѡ̀ та́инство , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ . Страсте́й мᲂи́хъ смꙋще́нїе , и҆ бꙋ́рю ᲂу҆ти́ши мᲂи́хъ прегрѣше́нїи , ꙗ҆́же ко́рмчїю ро́ждьши гдⷭ҇а бг҃ᲂневѣ́сто .= Милᲂсе́рдїѧ твᲂегѡ̀ бе́зднꙋ , призыва́ющꙋ пᲂда́ждь ми , ꙗ҆́же бл҃гᲂсе́рдаго ро́ждьши , и҆ сп҃са всѣ́мъ пᲂю́щимъ тѧ . =сла́ва . Наде́жꙋ и҆ ᲂу҆тверже́нїе , и҆ спасе́нїѧ стѣ́нꙋ недви́жимꙋ , стѧжа́вше тѧ всенепᲂро́чнаѧ , ѕлᲂлю́тыхъ всѣ́хъ и҆збавлѧ́емсѧ . и҆ ны́нѣ . На ѻ҆дрѣ̀ бᲂлѣ́зни мᲂеѧ̀ , грѣхо́внѣ слежа́ща мѧ̀ , ꙗ҆́кѡ чл҃кᲂлюби́ва , пᲂмᲂзи́ ми бцⷣе мт҃и прⷭ҇нѡ дв҃о .

пѣ́снь , є҃ . і҆рмо́съ . Прᲂсвѣтѝ на́съ пᲂвелѣ́нїемъ сѝ гдⷭ҇и , и҆ мы́шцею высо́кᲂю , твᲂегѡ̀ ми́ра пᲂда́ждь на́мъ , є҆ди́не чл҃кᲂлю́бче . И҆спо́лни чи́стаѧ весе́лїѧ живᲂта̀ на́шегѡ , и҆ твᲂю̀ нетлѣ́ннꙋю даю́щи ра́дᲂсть , весе́лїѧ ро́ждьши сꙋ́щаго винꙋ̀ .= И҆зба́ви на́съ ѿ бѣ́дъ бцⷣе чⷭ҇таѧ , вѣ́чнᲂе ро́ждьши и҆збавле́нїе , и҆ ми́ра всѧ́къ ᲂу҆́мъ преи҆мꙋ́щаго . =сла́ва . Разрѣшѝ мглꙋ̀ прегрѣше́нїи мᲂи́хъ бг҃ᲂневѣ́сто , свѣ́тᲂмъ твᲂеѧ̀ свѣ́тлᲂсти , ꙗ҆́же свѣ́тъ ро́ждьши бжⷭ҇твеныи и҆ превѣ́чныи . и҆ ны́нѣ . И҆сцѣлѝ чⷭ҇таѧ дш҃и мᲂеѧ̀ немᲂже́нїе , пᲂсѣще́нїемъ сѝ ᲂу҆бѣ́ждьшисѧ , и҆ здра́вїе мᲂльба́ми сѝ пᲂда́ждь ми .

пѣ́снь , ѕ҃ . і҆рмо́съ . Мл҃твꙋ прᲂлїю̀ ко́ гдⷭ҇ꙋ , и҆ тᲂмꙋ̀ вᲂз̾вѣщꙋ̀ печа́ль мᲂю̀ . ꙗ҆́кѡ ѕѡ́лъ дш҃а мᲂѧ̀ напо́лнисѧ , и҆ живо́тъ мо́й а҆́дꙋ прибли́жисѧ . и҆ мᲂлю́сѧ ꙗ҆́кѡ і҆ѡ́на , ѿ тлѝ бж҃е мо́й вᲂз̾веди́ мѧ . Сме́рти и҆ тлѝ ꙗ҆́кѡ спа́слъ є҆́сть , са́мъ сѧ и҆з̾да́въ на сме́рть , тлѣ́нїемъ и҆ сме́ртїю мᲂѐ є҆стество̀ ꙗ҆́то бы́вшее . дв҃о мᲂлѝ гдⷭ҇а сн҃а свᲂегѡ̀ , враго́въ ѕлᲂдѣ́йствїѧ мѧ̀ и҆зба́вити .= Застꙋ́пницꙋ тѧ̀ живᲂтꙋ̀ свѣ́мъ , и҆ храни́тельницꙋ тве́рдꙋ дв҃це , напа́стей рѣша́щꙋ мᲂлвы̀ , и҆ нало́ги бѣсо́въ ѿгᲂнѧ́ющꙋ . и҆ мᲂлю́сѧ всегда̀ страсте́й мѧ и҆зба́вити всенепᲂро́чнаѧ . =сла́ва . Ꙗ҆́кѡ стѣ́нꙋ и҆ прибѣ́жище стѧжа́хᲂмъ тѧ ѻ҆трᲂкᲂви́це , и҆ дш҃а́мъ сᲂверше́нᲂе спасе́нїе , и҆ прᲂстра́нство в̾ ско́рбѣхъ , и҆ свѣ́тᲂмъ ти при́снѡ ра́дꙋемсѧ , ѽ влⷣчце ны́нѣ на́съ ѿ страсте́й и҆ бѣ́дъ спасѝ . и҆ ны́нѣ . На ѻ҆дрѣ̀ не́мᲂщїю ны́нѣ низ̾лежꙋ̀ , и҆ нѣ́сть и҆сцѣле́нїѧ пло́ти мᲂе́й . но ꙗ҆́же бг҃а и҆ сп҃са ми́рꙋ , и҆ и҆зба́вителѧ недꙋ́гᲂмъ ро́ждьшаѧ , тебѣ̀ мᲂлю́сѧ бл҃го́й , ѿ и҆стлѣ́нїѧ бᲂлѣ́зней вᲂста́ви мѧ .

Гдⷭ҇и пᲂми́лꙋй , гⷤ . сла́ва , и҆ ны́нѣ . сѣда́ленъ , гла́съ , и҃ . А҆́гньца и҆ па́стырѧ и҆ сп҃са ми́рꙋ , на крⷭ҇тѣ̀ зрѧ́щи ро́ждьшаѧ тѧ̀ гл҃аше слезѧ́щи , ми́ръ ᲂу҆́бѡ ра́дꙋетсѧ прїе́млѧ тᲂбо́ю и҆збавле́нїе . ᲂу҆тро́ба же мᲂѧ̀ гᲂри́тъ , зрѧ́щи твᲂѐ распѧ́тїе , є҆́же за всѣ́хъ терпи́ши сн҃е и҆ бж҃е мо́й .

пѣ́снь , з҃ . і҆рмо́съ . И҆́же ѿ і҆ꙋде́и , дᲂше́дше ѻ҆́трᲂцы въ вавилѡ́нъ дре́вле , вѣ́рᲂю ᲂу҆тверже́нїи , пла́мень пе́щныи пᲂпра́вше гл҃юще , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . На́ше спасе́нїе ꙗ҆́кᲂже вᲂсхᲂтѣ̀ сп҃се ᲂу҆стро́ити , во́ чрево дв҃ыѧ всели́сѧ , ю҆́же ми́рꙋ застꙋ́пницꙋ пᲂказа̀ , ѻ҆ц҃ъ на́шихъ бж҃е блгⷭ҇ве́нъ є҆сѝ .= Вᲂли́телѧ млⷭ҇ти мт҃и , є҆го́же рᲂдила̀ ны́нѣ ᲂу҆мᲂлѝ , и҆зба́вити мѧ̀ ѿ прегрѣше́нїи , и҆ дш҃е́вныѧ скве́рны , сн҃ꙋ твᲂемꙋ̀ зᲂвꙋ́ща , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . =сла́ва . Сᲂкро́вище спасе́нїѧ , и҆ и҆сто́чникъ нетлѣ́нїѧ , сто́лпъ ᲂу҆тверже́нїѧ , и҆ две́рь пᲂкаѧ́нїѧ , тебѐ ро́ждьшꙋю вᲂпїю́щимъ пᲂказа̀ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ . и҆ ны́нѣ . Тѣле́сныѧ недꙋ́ги , и҆ дш҃е́вныѧ грѣхѝ , бг҃ᲂрᲂди́тельнице любо́вїю пристꙋпа́ющимъ к̾ кро́вꙋ твᲂемꙋ̀ дв҃це , и҆сцѣли́ти спᲂдо́би , ꙗ҆́же сп҃са хрⷭ҇та̀ на́мъ ро́ждьшаѧ .

пѣ́снь , и҃ . і҆рмо́съ . Цр҃ѧ нбⷭ҇нагѡ , є҆го́же пᲂю́тъ вѡ́и а҆́нг҃льстїи . хвали́те и҆ превᲂзнᲂси́те є҆гѡ̀ во́ вѣки . По́мᲂщи ꙗ҆́же ѿ тебѐ тре́бꙋющїѧ непре́зри дв҃о пᲂю́щїѧ , и҆ превᲂзнᲂсѧ́щїѧ хрⷭ҇та̀ во́ вѣки .= Немᲂже́нїе дш҃и мᲂеѧ̀ и҆сцѣлѧ́еши и҆ тѣле́сныѧ бᲂлѣ́зни дв҃о , ꙗ҆́кѡ да тѧ̀ пᲂе́мъ и҆ превᲂзно́симъ чи́стꙋю во́ вѣки . =сла́ва . И҆сцѣле́нїемъ бᲂга́тство и҆злива́еши , вѣ́рнѡ пᲂю́щимъ тѧ̀ дв҃це , и҆ превᲂзнᲂсѧ́щимъ хрⷭ҇та̀ во́ вѣки . и҆ ны́нѣ . Напа́стныѧ ты̀ прило́ги ѿгᲂнѧ́еши , и҆ страстны́ѧ нахо́ды дв҃о , ꙗ҆́кѡ да тѧ̀ пᲂе́мъ и҆ превᲂзно́симъ чⷭ҇тꙋю во́ вѣки .

пѣ́снь , ѳ҃ . і҆рмо́съ . Вᲂи́стинꙋ бцⷣꙋ тѧ̀ и҆спᲂвѣ́дающе , спасе́ннїи тᲂбо́ю дв҃це чⷭ҇таѧ , съ нбⷭ҇ными вѡ́и тѧ̀ велича́емъ . То́ка сле́зъ мᲂи́хъ не ѿврати́сѧ , ꙗ҆́же ѿ всѧ́кᲂгѡ лица̀ всѧ́кꙋ сле́зꙋ ѿє́мшагѡ , дв҃це хрⷭ҇та̀ ро́ждьшаѧ .= Ра́дᲂсти мᲂѐ срⷣце и҆спо́лни дв҃о , ꙗ҆́же ра́дᲂсти прїе́мши и҆спᲂлне́нїе , и҆ грѣхо́внꙋю печа́ль пᲂтреблѧ́ющи . =сла́ва . Свѣ́та твᲂегѡ̀ зарѧ́ми прᲂсвѣтѝ дв҃о , мра́къ невѣ́денїѧ ѿгᲂнѧ́щи , бл҃гᲂвѣ́рно бцⷣꙋ тѧ̀ и҆спᲂвѣ́дающихъ . и҆ ны́нѣ . Вмѣ́сто ѡ҆ѕлᲂбле́нїѧ не́мᲂщи , низ̾лежа́щаго мѧ дв҃о и҆сцѣлѝ , и҆з̾ нездра́вїѧ вᲂздра́вїе претвᲂрѧ́ющи . та́же , дᲂсто́йнѡ є҆́сть . и҆ про́чее , ѡ҆бы́чно . и҆ ѿпꙋ́стъ .

Въ сре́дꙋ , на ᲂу҆́трени . по а҃ , стихᲂло́гїи . сѣда́льны , крⷭ҇тны . гла́съ , и҃ . Ви́дѧ разбо́йникъ , нача́льника жи́зни на крⷭ҇тѣ̀ ви́сѧща , глаго́лаше , а҆́ще небы̀ бг҃ъ бы́лъ вᲂпло́щьсѧ , и҆́же съ на́ми распны́исѧ , небы̀ сл҃нце лꙋчѝ свᲂѧ̀ пᲂтаи́ло , нижѐ землѧ̀ трепе́щꙋщи трѧсла́сѧ . но и҆́же за всѧ̀ терпѧ́и , пᲂмѧни́ мѧ сп҃се є҆гда̀ прїи́деши во црⷭ҇твїи сѝ .= сти́хъ : вᲂзнᲂси́те гдⷭ҇а бг҃а на́шегѡ , и҆ кла́нѧйтесѧ пᲂд̾но́жїю но́гꙋ є҆гѡ̀ ꙗ҆́кѡ ст҃о є҆́сть . Пᲂсредѝ двᲂю̀ разбо́йникꙋ , мѣ́рило пра́веднᲂе ѡ҆брѣ́тесѧ крⷭ҇тъ тво́й . ѻ҆́вᲂмꙋ ᲂу҆́бо нисхᲂдѧ́щꙋ во а҆́дъ тѧгᲂто́ю хꙋле́нїѧ , дрꙋго́мꙋ же легча́щꙋсѧ ѿ грѣ́хъ к̾ ра́зꙋмꙋ бг҃ᲂсло́вїѧ . хрⷭ҇тѐ бж҃е сла́ва тебѣ̀ . сла́ва , и҆ ны́нѣ , крⷭ҇тᲂбоⷢ҇ . А҆́=гньца и҆ па́стырѧ и҆ и҆зба́вителѧ , а҆́гница зрѧ́щи , на крⷭ҇тѣ̀ непра́веднѡ вᲂз̾дви́жена , пла́чꙋщисѧ го́рькѡ взыва́ше , ми́ръ ᲂу҆́бѡ ра́дꙋетсѧ прїе́млѧи тᲂбо́ю и҆збавле́нїе , ᲂу҆тро́ба же мᲂѧ̀ гᲂри́тъ зрѧ́щи твᲂѐ распѧ́тїе , є҆́же терпи́ши за млрⷭ҇дїе млⷭ҇ти бж҃е пребл҃гі́и , без̾грѣ́шне гдⷭ҇и . є҆́йже сᲂгла́снѡ вᲂзᲂпїе́мъ ᲂу҆милᲂсе́рдисѧ дв҃о на ны̀ , и҆зба́ви рабы̀ свᲂѧ̀ ѿ всѧ́кᲂгѡ ѡ҆б̾стᲂѧ́нїѧ .

по в҃ , стихᲂло́гїи , сѣда́льны . гла́съ , и҃ . Пᲂсредѝ є҆де́ма дре́во прᲂцвѣтѐ сме́рть , пᲂсреди́же всеѧ̀ землѝ дре́во вᲂзрастѝ жи́знь . вкꙋси́вше бо пе́рвагѡ плᲂда̀ нетлѣ́ннїи сꙋ́ще , тлѣ́нни бы́хᲂмъ . пᲂлꙋчи́вше же втᲂра́гѡ , нетлѣ́нїѧ напита́хᲂмсѧ . крⷭ҇то́мъ бо спаса́еши ꙗ҆́кѡ бг҃ъ ро́дъ чл҃ческїи .= сти́хъ : бг҃ъ же цр҃ь на́шъ пре́жде вѣ́къ , сᲂдѣ́ла спасе́нїе пᲂсредѣ̀ землѝ . Въ раи́ мѧ пре́же дре́во ѡ҆бнажѝ , внꙋше́нїемъ вра́гъ вне́съ ᲂу҆мерщве́нїе . крⷭ҇тнᲂе же дре́во живо́тъ вѣ́чныи ѡ҆дѣѧ́нїѧ чл҃кѡмъ внесѐ вᲂдрꙋзи́всѧ на землѝ , и҆ ми́ръ ве́сь и҆спо́лнисѧ всѧ́кїѧ ра́дᲂсти . є҆го́же зрѧ́ще вᲂзнᲂси́ма , бг҃ᲂви вѣ́рᲂю лю́дїе сᲂгла́снѡ вᲂзᲂпїе́мъ , и҆спо́лнь сла́вы до́мъ тво́й . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Вселе́ннѣй свѣти́ла прⷭ҇нѡ свѣ́тлаѧ , пᲂказа́стесѧ вѣ́рᲂю мч҃нческᲂю , всю̀ вᲂзлᲂжи́вше наде́ждꙋ ко́ гдⷭ҇ꙋ . и҆ мы́сленымъ ма́слᲂмъ дх҃а ст҃ы́ни , дш҃е́вныѧ свѣщѝ свᲂѧ̀ прᲂсвѣти́сте . тѣ́мже и҆ ча́шꙋ дх҃о́вныѧ прᲂлива́юще кро́ви ꙗ҆́кᲂже во́ды , цр҃кви ꙗ҆ви́стесѧ , стрⷭ҇тᲂте́рпцы всехва́льнїи . мᲂли́те хрⷭ҇та̀ бг҃а , сᲂгрѣше́нїемъ ѡ҆ставле́нїе дарᲂва́ти , пра́зднꙋющимъ любо́вїю ст҃ꙋ́ю па́мѧть ва́шꙋ . сла́ва , и҆ ны́нѣ , крⷭ҇тᲂбоⷢ҇ . Д=в҃о и҆́же и҆з̾ тебѐ вᲂпло́щшагᲂсѧ , ꙗ҆́кѡ ви́дѣла є҆сѝ вᲂзвыша́ема на́ крⷭ҇тъ пᲂсредѝ двᲂю̀ разбо́йникꙋ , пла́чь вᲂспрїе́мши вᲂпїѧ́ше . ᲂу҆вы̀ мнѣ̀ ча́до сладча́йшее , ка́кѡ во́лею ра́спѧтъ бы́сть . и҆́же грѣхѝ взе́млѧи ми́ра ꙗ҆́кѡ бл҃гᲂꙋтро́бенъ , чл҃ческимъ хᲂтѧ̀ ꙗ҆́кѡ бг҃ъ пѣ́снемъ хвале́нїѧ принᲂси́мᲂмъ бы́ти тебѣ̀ .

по г҃ , стихᲂло́гїи , сѣда́ленъ . гла́съ , и҃ . На крⷭ҇тѣ́ тѧ ви́дѣвши вᲂзвы́шена , сл҃нца незахᲂди́маго хрⷭ҇тѐ . стра́хᲂмъ сл҃нце пᲂмрачи́сѧ а҆́бїе . землѧ́ же пᲂкᲂлѣба́сѧ . и҆ ка́менїе тре́петᲂмъ распада́шесѧ . и҆ цр҃ко́внаѧ за́вѣса раз̾дра́сѧ . и҆ ме́ртвїи ѿ гро́бъ вᲂста́ша . славᲂсло́вѧще страшно́е и҆ бжⷭ҇твенᲂе схᲂжде́нїе є҆ди́нагѡ бг҃а на́шегѡ . сла́ва , и҆ ны́нѣ , крⷭ҇тᲂбоⷢ҇ . Сн҃а твᲂегѡ̀ и҆ бг҃а , крⷭ҇то́мъ дв҃о сᲂхранѧ́еми при́снѡ . бѣсо́вскїѧ прило́ги и҆ ко́зни пᲂбѣжда́емъ . сꙋ́щꙋю бцⷣꙋ тѧ вᲂи́стинꙋ вᲂспѣва́юще , и҆ любо́вїю всѝ ро́ди блажи́мъ пречⷭ҇таѧ , ꙗ҆́кᲂже прᲂрекла̀ є҆сѝ . тѣ́мже сᲂгрѣше́нїемъ на́шимъ ѡ҆ставле́нїе мл҃твами сѝ да́рꙋй .

та́же , ѱало́мъ , н҃ . пᲂми́лꙋй мѧ бж҃е . и҆ вᲂз̾гла́съ , ми́лᲂстїю и҆ щедро́тами .

Кано́нъ , чⷭ҇тно́мꙋ и҆ живᲂтвᲂрѧ́щемꙋ крⷭ҇тꙋ̀ . твᲂре́нїе , і҆ѡ́сифᲂво . гла́съ , и҃ . пѣ́снь , а҃ . і҆рмо́съ . Вᲂѡ҆рꙋже́на фараѡ́на пᲂгрꙋзѝ , чꙋдᲂтвᲂрѧ́й дре́вле , мѡѷсе́йскїи же́злъ крⷭ҇тᲂѡ҆бра́знѡ прᲂразѝ , и҆ раздѣлѝ мо́ре , и҆зра́илѧ же бѣжа́ща , пѣ́ша хᲂдѧ́ща спасѐ , пѣ́снь бг҃ᲂви вᲂз̾сыла́юща . запѣ́въ : сла́ва гдⷭ҇и крⷭ҇тꙋ̀ твᲂемꙋ̀ чⷭ҇тно́мꙋ . И҆́же ѿ́ древа сла́стнᲂю снѣ́дїю ме́ртва мѧ бы́вшаго , на крⷭ҇тѣ̀ сло́ве ᲂу҆мертви́всѧ ѡ҆живи́лъ є҆сѝ , и҆ сла́вᲂю ᲂу҆дᲂбри́лъ є҆сѝ . пᲂклᲂнѧ́юсѧ твᲂе́й держа́вѣ , славᲂсло́вѧ страда́нїѧ и҆ бл҃гᲂꙋтро́бїе не и҆зᲂчте́ннᲂе . Є҆гда̀ распрᲂстре́сѧ на́ древѣ винᲂгра́дъ , невᲂздѣ́ланно вино̀ бжⷭ҇твеныѧ бл҃гᲂда́ти на́мъ и҆стᲂчѝ , срⷣца̀ веселѧ́щее и҆ пре́лести пїѧ́нство ѿ ню́дъ пᲂтреблѧ́ющее , и҆ грѣхѝ ѡ҆чища́ющее .

запѣ́в̾ : ст҃і́и мч҃нцы , мᲂли́те бг҃а ѡ҆ на́съ . мⷱ҇ꙋ . Преи҆спещрѧ́еми ра́нами великᲂмч҃нцы , и҆ страда́ней бᲂлѣ́зньми ᲂу҆краша́еми , красны̀ дᲂбрᲂтвᲂри́тельнᲂмꙋ влⷣцѣ пред̾ста́сте со сла́вᲂю , всесла́вно веселѧ́щесѧ , и҆ бг҃ᲂви́дны пᲂзнава́еми .= мⷱ҇ꙋ .= Си́лᲂю бжⷭ҇твенᲂю прᲂѧвле́но ᲂу҆крѣплѧ́еми ст҃і́и , си́льнагѡ всю̀ крѣ́пᲂсть гꙋби́тельнꙋю мꙋ́жески низ̾лᲂжи́сте , и҆ вѣнча́вшесѧ краснѡ̀ пᲂбѣди́тельными вѣнцы̀ , ра́дꙋющесѧ бг҃ᲂви пред̾ста́сте .= боⷢ҇ . П=ред̾стᲂѧ́щи крⷭ҇тꙋ̀ твᲂемꙋ̀ гдⷭ҇и , не и҆скꙋ́снаѧ бра́кꙋ , и҆ твᲂѐ ᲂу҆ѧзвле́нїе зрѧ́щи влⷣко , ᲂу҆ѧзвлѧ́ема гл҃аше ᲂу҆вы̀ мнѣ̀ ча́до , бᲂлѣ́зней и҆збѣ́гши ѡ҆ ржⷭ҇твѣ̀ твᲂе́мъ , ны́нѣ бᲂлѣ́знено терза́юсѧ .

Дрꙋгі́и , кано́нъ , къ прест҃ѣ́й бцⷣѣ . і҆рмо́съ , то́йже . =запѣ́въ : прест҃а́ѧ гжⷭ҇е бцⷣе спасѝ на́съ . Н=а тѧ̀ дв҃о наде́жꙋ вᲂзлᲂжи́хъ спасе́нїѧ мᲂегѡ̀ , грѣхо́вныѧ скве́рны ѿ всего́ мѧ ѿмы́й , и҆ чи́ста сᲂдѣ́лай , бг҃ꙋ и҆ сн҃ꙋ твᲂемꙋ̀ бл҃гᲂꙋгᲂжа́ти и҆ сᲂдѣ́ѧти , и҆ тᲂгѡ̀ всест҃о́мꙋ и҆́мени . Две́ри свѣ́та , ѻ҆́чи мᲂѝ прᲂсвѣтѝ , и҆́хже пᲂмрачѝ мра́чныи ѕмі́й тмо́ю прегрѣше́нїи , и҆ две́ри ми ѿве́рзи пᲂкаѧ́нїѧ дв҃о , и҆ к̾ живᲂтꙋ̀ наста́ви мѧ , ѿ пла́мене и҆ тмы̀ и҆схитѝ . Мт҃и бж҃їѧ , ꙗ҆́кѡ дерзнᲂве́нїе и҆мꙋ́щи къ ро́ждьшемꙋсѧ и҆з̾ тебѐ , є҆динᲂро́днᲂмꙋ сло́вꙋ ѻ҆ц҃ꙋ сᲂбез̾нача́льнꙋ , мᲂли́сѧ всенепᲂро́чнаѧ , дш҃ꙋ мᲂю̀ и҆зба́вити ѿ бѣсо́вскагѡ ѡ҆ѕлᲂбле́нїѧ , и҆ ѻ҆гнѧ̀ и҆ всѧ́кᲂгѡ мꙋче́нїѧ . Бл҃гᲂслᲂве́нъ пло́дъ бг҃ᲂневѣ́сто твᲂегѡ̀ чре́ва , и҆́мже землені́и всѝ ѿ клѧ́твы и҆зба́вихᲂмсѧ . бл҃гᲂслᲂве́наѧ пречⷭ҇таѧ , несказа́ннᲂе чꙋ́до , недᲂразꙋмѣ́емᲂе вѣ́дѣнїе , всѣ́хъ вѣ́рныхъ спасе́нїе .

пѣ́снь , г҃ . і҆рмо́съ . Оу҆тверже́и нб҃са̀ в̾ нача́тцѣ ра́зꙋмᲂмъ , и҆ зе́млю на вᲂда́хъ ѡ҆снᲂва́выи . на ка́мени мѧ хрⷭ҇тѐ цр҃ко́внѣмъ ᲂу҆твердѝ , ꙗ҆́кѡ нѣ́сть ст҃а , па́че тебѐ чл҃кᲂлю́бче . Оу҆тверже́и нб҃са , и҆ зе́млю ѡ҆снᲂва́выи , и҆ мо́ре сло́вᲂмъ свѧза́выи , ты̀ свѧ́занъ бы́сть менѐ ра́ди , и҆ на крⷭ҇тѣ̀ пригвᲂжда́емъ , ꙗ҆́кѡ да мѧ̀ ѿ ᲂу҆́зъ грѣха̀ разрѣши́ши чл҃кᲂлю́бче . Крⷭ҇тнᲂмꙋ дре́вꙋ вра́гъ прирази́всѧ , ᲂу҆мертви́сѧ с̾ бѣсы̀ свᲂи́ми ѕлᲂдѣ́йствеными , и҆ вкꙋше́нїемъ лꙋка́вымъ ѡ҆сꙋже́ныи пᲂми́лᲂванъ бы́сть , и҆ ᲂу҆тверже́нїемъ тва́рь бл҃гᲂче́стїѧ ᲂу҆тверди́сѧ .= мⷱ҇ꙋ .= Мнᲂгᲂви́днымъ ра́намъ , и҆ мече́мъ и҆ ѕвѣре́мъ , ѡ҆бнаже́нїемъ тѣле́снымъ вдава́еми лꙋка́вымъ гᲂни́телемъ , бжⷭ҇твенїи и҆ до́блїи страда́льцы , и҆ не ꙗ҆́ты пребы́ша манᲂве́нїемъ лꙋ́чшимъ .= мⷱ҇ꙋ .= Взира́юще пᲂмышле́нїемъ , и҆ тре́звенᲂю мы́слїю къ бꙋ́дꙋщимъ , и҆ текꙋ́щаѧ до кᲂнца̀ пренебрего́ша , хрⷭ҇то́вы мч҃нцы сла́внїи , тѣ́мже нестерпи́мыѧ бᲂлѣ́зни претерпѣ́ша ра́дꙋющесѧ .= боⷢ҇ . М=нᲂгᲂпѣ́таѧ а҆́гница , а҆́гньца зрѧ́щи вᲂз̾двиза́ема на́ древо непра́веднѣ , пла́чꙋщи вᲂсклица́ше мт҃рьски слезѧ́щи , и҆ дᲂлгᲂтерпѣ́нїе пᲂѧ́ше . тᲂгѡ̀ сла́вѧщи .

и҆́нъ , і҆рмо́съ . Ты̀ є҆сѝ ᲂу҆тверже́нїе , притека́ющимъ тѝ гдⷭ҇и , ты́ же свѣ́тъ ѡ҆мраче́ннымъ , и҆ пᲂе́тъ тѧ̀ дх҃ъ мо́й . Всѐ мᲂѐ жела́нїе къ тебѣ̀ дви́жа влⷣчце чи́стаѧ , плᲂтьски́хъ мѧ жела́нїи в̾ско́рѣ премѣнѝ . Вᲂсїѧ́й ми пᲂкаѧ́нїѧ чи́стыѧ зарѝ , влⷣчце две́ре свѣ́та , и҆ грѣхо́въ мᲂи́хъ мглꙋ̀ пᲂтребѝ . Є҆ди́на всенепᲂро́чнаѧ , пᲂро́ка всѧ́кᲂгѡ на́съ и҆зба́ви , и҆ и҆скꙋше́нїи нахᲂдѧ́щихъ , и҆ ѻ҆гнѧ̀ вѣ́чнꙋющаго . Оу҆скᲂрѝ пᲂсѣти́ти бᲂлѧ́щаго пречⷭ҇таѧ , и҆ ѿ лю́тыѧ ра́ны и҆зба́ви мѧ , и҆ всѧ́кїѧ ско́рби .

пѣ́снь , д҃ . і҆рмо́съ . Ты́ ми хрⷭ҇тѐ гдⷭ҇ь , ты́ же и҆ си́ла ми , ты́ ми бг҃ъ , ты́ ми ра́дᲂванїе . не ѡ҆ста́вль нѣ́дра ѻ҆́ч҃а , но ми́лᲂстїю си на́шꙋ нищетꙋ̀ пᲂсѣти́въ . тѣ́мъ съ прᲂро́кѡмъ а҆вва́кꙋмᲂмъ зᲂвꙋ̀ , си́лѣ твᲂе́й сла́ва чл҃кᲂлю́бче . Ро́дъ чл҃ческїи ѿ паде́нїѧ вᲂзведе́нъ бы́сть , є҆́же пᲂдъѧ́тъ дре́вле первᲂзда́нныи , всѣ́хъ бо сᲂдѣ́тель вᲂз̾дви́жесѧ на́ древо , пе́рсты ѡ҆крᲂвави́въ , и҆ гвᲂздьмѝ во́лею пригвᲂзди́въ рꙋ́цѣ , и҆ въ ре́бра кᲂпїе́мъ прᲂбᲂде́сѧ . Ста̀ крⷭ҇тъ , и҆ ле́сть всѧ̀ паде́сѧ , тебѣ̀ сп҃се ѡ҆бнажи́вшꙋсѧ , ѡ҆бнажи́сѧ чꙋжді́и , и҆ а҆да́мъ бжⷭ҇твенагѡ нетлѣ́нїѧ ри́зᲂю ѡ҆дѣ́ѧсѧ , и҆ тва́рь прᲂсвѣти́сѧ , пᲂмрача́емꙋ сл҃нцꙋ , на́ древѣ хрⷭ҇тѐ распина́емꙋ ти .= мⷱ҇ꙋ .= Но́во закᲂле́наѧ ꙗ҆́кᲂже ѻ҆вча́та мч҃нцы , пᲂжре́ннᲂмꙋ сло́вꙋ принесо́стесѧ , кро́вьными тече́нїи пре́лести мо́ре и҆з̾сꙋши́вше бжⷭ҇твенᲂю бл҃гᲂда́тїю , и҆ и҆злїѧ́нїе страсте́й ѡ҆дᲂжде́нїемъ чꙋде́съ , пᲂтреблѧ́те всегда̀ сла́внїи .= мⷱ҇ꙋ .= Ѿсѣче́нїе ᲂу҆до́въ всѣ́хъ пᲂдъѧ́сте мч҃нцы . и҆ зꙋбо́въ и҆ нᲂкте́й и҆скᲂрене́нїе , рꙋ́къ ѿрѣ́занїе неми́лᲂстивно , ꙗ҆зы́ка же и҆ но́гъ и҆ сᲂста́вᲂвъ тѣле́сныхъ . тѣ́мже премно́зѣй спᲂдо́битесѧ сла́вѣ , всѣ́хъ бг҃ꙋ пред̾стᲂѧ́ще .= боⷢ҇ . С=вᲂегѡ̀ сѝ тельца̀ непᲂро́чнаѧ ю҆́ница ᲂу҆зрѣ́вши на́ древо вᲂздви́жена , вᲂпїѧ́ше с̾ вᲂсклица́нїемъ , ча́до ка́кѡ тѧ без̾зако́нныи со́ньмъ ника́кᲂже ᲂу҆ще́дри , ᲂу҆ще́дрившаго и҆̀ . но сᲂвѣ́тᲂмъ льсти́вымъ ᲂу҆мᲂри́ти непра́веднѡ прᲂи҆зво́ли .

и҆́нъ , і҆рмо́съ . Оу҆слы́шахъ гдⷭ҇и смᲂтре́нїѧ твᲂегѡ̀ та́инство , разꙋмѣ́хъ дѣ́ла твᲂѧ̀ , и҆ прᲂсла́вихъ твᲂѐ бжⷭ҇тво̀ . Дꙋ́шꙋ мᲂю̀ ѡ҆мраче́нꙋю прегрѣше́ньми ѡ҆зарѝ свѣ́тᲂмъ прⷭ҇нѡ дв҃о , ꙗ҆́же сл҃нце ро́ждьшаѧ пра́вды . И҆скꙋше́ней мѧ и҆схи́ти , и҆ житїѧ̀ дш҃етлѣ́нныѧ бꙋ́ри . и҆ ѻ҆гнѧ̀ вѣ́чнагѡ свᲂбᲂди́ мѧ бг҃ᲂневѣ́сто . Дв҃ства сщ҃е́нныи сᲂсꙋ́де , и҆ невмѣсти́маго є҆стество́мъ вселе́нїе , дш҃ꙋ мᲂю̀ ѡ҆мраче́нꙋю ѿ мно́гихъ страсте́й прᲂсвѣтѝ . Всест҃а́ѧ бг҃ᲂневѣ́сто влⷣчце ми́рꙋ , ты́ мѧ спасѝ , ѿ бѣ́дъ и҆збавлѧ́ющи , и҆ страсте́й мᲂлвꙋ̀ ѿгᲂнѧ́щи .

пѣ́снь , є҃ . і҆рмо́съ . Вскꙋ́ю мѧ ѿри́нꙋ , ѿ лица̀ твᲂегѡ̀ свѣ́те незахᲂдѧ́и , пᲂкры́ла мѧ є҆́сть чꙋжа́ѧ тма̀ ѻ҆каѧ́ннагѡ . но ѡ҆брати́ мѧ и҆ к̾ свѣ́тꙋ запᲂвѣде́й ти пꙋтѝ мᲂѧ̀ напра́ви мᲂлю́тисѧ . Да сла́стнагѡ вкꙋше́нїѧ и҆зба́виши мѧ дᲂлгᲂтерпѣли́ве , же́лчи вкꙋси́лъ є҆сѝ хᲂтѧ̀ , и҆ ᲂу҆мерщве́нїѧ , ꙗ҆́кѡ да ме́ртвᲂсти сᲂвлече́ши мѧ і҆с҃е дебельства̀ , на́гъ пригвᲂзди́тисѧ прїѧ́тъ на́ древѣ , пᲂю̀ твᲂѐ милᲂсе́рдїе . И҆стлѣ́вшꙋю страстьмѝ дш҃ꙋ мᲂю̀ , сло́ве но́вꙋ твᲂрѧ̀ , дш҃ꙋ пре́далъ є҆сѝ ѻ҆ц҃ꙋ на́ древѣ ви́сѧ , и҆ нетерпи́тъ сїѧ̀ без̾дꙋ́шнаѧ землѧ̀ разꙋмѣ́вши , но стра́хᲂмъ пᲂкᲂлеба́сѧ вᲂспѣва́ющи тѧ̀ .= мⷱ҇ꙋ .= Оу҆краси́стесѧ бжⷭ҇твенїи мч҃нцы , страстьмѝ ᲂу҆дᲂбрѧ́еми , и҆ пᲂслѣ́дᲂвавше и҆́же страстьмѝ всѣ́мъ без̾стра́стїе пᲂда́вшемꙋ , сло́вꙋ є҆динᲂро́днᲂмꙋ ѻ҆ц҃а без̾нача́льнаго , сегѡ̀ ра́ди с̾ ни́мъ прᲂславлѧ́етесѧ .= мⷱ҇ꙋ .= Оу҆страни́вшесѧ до́льнихъ , незри́мыхъ наслѣ́дᲂвасте , въ нбⷭ҇ныхъ вᲂдвᲂрѧ́ющесѧ селе́нїихъ , и҆ прича́стїемъ бжⷭ҇твенымъ бг҃ᲂтвᲂри́ми невеще́ствено , сп҃сᲂвы непᲂбѣди́мїи мч҃нцы .= боⷢ҇ . С=тра́нно зрѣ́нїе ви́жꙋ взыва́ше препѣ́таѧ , ка́кѡ и҆́же вᲂз̾рѣ́нїемъ всю̀ зе́млю кᲂлѣ́блѧи , на́ древѣ пᲂвѣ́шенъ ᲂу҆снꙋ́лъ є҆сѝ , спѧ́щїѧ ѿ́ вѣка хᲂтѧ̀ вᲂз̾бꙋди́ти . пᲂклᲂнѧ́юсѧ сн҃е твᲂемꙋ̀ дᲂлгᲂтерпѣ́нїю .

и҆́нъ , і҆рмо́съ . Оу҆́треннююще вᲂпїе́мъ тѝ гдⷭ҇и спаси́ ны , ты́ бо є҆сѝ бг҃ъ на́шъ , ра́звѣ бо тебѐ и҆но́гѡ незна́емъ . Пᲂе́мъ тѧ̀ дв҃о всепѣ́таѧ , ꙗ҆́же сло́во бж҃їе вмѣсти́вшїѧ во́ чревѣ свᲂе́мъ пренепᲂро́чнаѧ . Ѻ҆гнѧ̀ негаси́магѡ и҆ че́рвїѧ и҆зба́ви мѧ мт҃и бж҃їѧ , ꙗ҆́кѡ и҆мꙋ́щи є҆́же ми́лᲂвати цѣле́бно . Стѣна̀ ты̀ вѣ́рнымъ и҆ держа́ва всест҃а́ѧ є҆сѝ , спаса́ющи ѿ и҆скꙋше́нїи пᲂю́щїѧ тѧ̀ . Недꙋ́гꙋющꙋю дш҃ꙋ мᲂю̀ и҆сцѣлѝ . ро́ждьшаѧ всѣ́хъ спасе́нїе , и҆ взе́млющаго недꙋ́ги , пречⷭ҇таѧ влⷣчце .

пѣ́снь , ѕ҃ . і҆рмо́съ . Бе́здна грѣхо́внаѧ и҆ прегрѣше́нїи бꙋ́рѧ мѧ смꙋща́етъ , и҆ во глꙋбинꙋ̀ нꙋ́жнꙋю рѣ́етъ ѿча́ѧнїѧ , но са́мъ крѣ́пкꙋю рꙋ́кꙋ ми прᲂстрѝ ꙗ҆́кѡ петро́ви , и҆ ѿ тлѝ бж҃е мо́й вᲂз̾веди́ мѧ . Вᲂспѣ́ша нбⷭ҇ныѧ си́лы всѧ̀ и҆ ᲂу҆жасо́шасѧ , на крⷭ҇тѣ́ тѧ сло́ве взира́юще ви́сѧща , и҆ а҆да́мъ ᲂу҆ѧ́звеныи сп҃се и҆сцѣлѣ̀ ꙗ҆́звᲂю твᲂе́ю , и҆ клѧ́тва прᲂгна́на бы́сть . Разрѣша́етсѧ ѿ ᲂу҆́зъ нерѣши́мыхъ чл҃чество , тебѣ̀ сло́ве пло́тїю свѧ́занꙋ бы́вшꙋ , и҆ свѧза́етсѧ мꙋчи́тель ꙗ҆́кѡ пти́ца , и҆ ѿ всѣ́хъ вѣ́рныхъ нарꙋга́емъ . сла́ва хрⷭ҇тѐ бл҃гᲂꙋтро́бїю твᲂемꙋ̀ .= мⷱ҇ꙋ .= Ꙗ҆ви́стесѧ бг҃ᲂзра́чнїи стрⷭ҇тᲂте́рпцы ꙗ҆́кᲂже ᲂу҆́глїе , всѧ́кꙋ ѕлᲂче́стїѧ ве́щь пᲂпалѧ́юще бл҃гᲂда́тїю , на ᲂу҆́глехъ же ѻ҆гнѧ̀ всесᲂжига́еми , и҆ бжⷭ҇твенᲂе прᲂхлажде́нїе прїе́млюще .= мⷱ҇ꙋ .= Ѻ҆вча́та и҆́стиннаго па́стырѧ стрⷭ҇тᲂно́сцы ꙗ҆влѧ́еми , пᲂсредѝ ди́вїихъ вᲂлко́въ невреже́ни пребы́сте , и҆ скᲂнча́вше до́брѣ тече́нїе бжⷭ҇твенїи , ко ѡ҆гра́дꙋ нбⷭ҇нꙋю всели́стесѧ .= боⷢ҇ . Г=дⷭ҇а тѧ̀ живᲂтꙋ̀ пᲂрᲂди́хъ , и҆ кра́сна дᲂбро́тᲂю па́че сыно́въ чл҃ческихъ , дв҃аѧ взыва́ше , и҆ ка́кѡ ны́нѣ ᲂу҆мира́еши сн҃е , дᲂбро́ты не и҆мѣ́ѧ в̾ распѧ́тїи , ᲂу҆дᲂбри́выи всѧ̀ манᲂве́нїемъ .

и҆́нъ , і҆рмо́съ . Ѡ҆чи́сти мѧ сп҃се , мно́га бо без̾зако́нїѧ мᲂѧ̀ , и҆ и҆з̾ глꙋбины̀ ѕѡ́лъ вᲂз̾веди́ мѧ мᲂлю́сѧ , к̾ тебѣ́ бо вᲂзва́хъ и҆ ᲂу҆слы́ша мѧ , бж҃е спасе́нїѧ мᲂегѡ̀ . Мр҃і́е чи́стᲂе и҆ всечⷭ҇тно́е жили́ще всѣ́хъ сᲂдѣ́телѧ , дш҃ꙋ ѡ҆чища́ющаѧ пᲂда́ждь ми сле́зы , и҆ бꙋ́дꙋщагѡ сꙋда̀ и҆ мꙋ́ки и҆схи́ти мѧ . Две́ри бж҃їѧ , вхо́ды бжⷭ҇твеныѧ пᲂкажѝ смире́ннѣй ми дш҃и . внѧ́же вше́дъ и҆спᲂвѣ́дающисѧ , и҆ ѕлы́хъ разрѣше́нїе бцⷣе вᲂспрїимꙋ̀ . Пꙋчи́на грѣхо́въ и҆ во́лны ѿчаѧ́нїѧ , ѡ҆бꙋрѣва́ютъ ми ᲂу҆́мъ , ᲂу҆млрⷭ҇дисѧ влⷣчце и҆ рꙋ́кꙋ ми прᲂстрѝ и҆ спаси́ мѧ , ꙗ҆́же сп҃са ро́ждьшаѧ . Тѧ̀ пред̾ста́тельницꙋ и҆ стѣ́нꙋ , вѣ́рнїи всѝ и҆́мамы , и҆́же во глꙋбинѣ̀ ѕлы́хъ мѧте́жехъ и҆ скᲂрбѣ́хъ при́снѡ бѣ́дствꙋющїи , бцⷣе є҆ди́на вѣ́рнымъ прибѣ́жище .

пѣ́снь , з҃ . і҆рмо́съ . Бж҃їѧ схᲂжде́нїѧ ѻ҆́гнь ᲂу҆стыдѣ́сѧ въ вавилѡ́нѣ дре́вле . сегѡ̀ ра́ди ѻ҆́трᲂцы , в̾ пещѝ ра́дᲂваннᲂю нᲂго́ю , ꙗ҆́кѡ во́ свѣтѣ ликᲂва́хꙋ пᲂю́ще , блгⷭ҇ве́нъ бг҃ъ ѻ҆ц҃ъ на́шихъ . Оу҆ѧ́звилъ є҆сѝ рꙋ́цѣ свᲂѝ хрⷭ҇тѐ , и҆́маже сᲂдѣ́лалъ є҆сѝ чꙋдеса̀ , и҆ ра́ны претерпѣ́въ , ра́ны мᲂѧ̀ всѧ̀ и҆сцѣлѧ́ѧ , пᲂю̀ тѧ̀ є҆ди́не дᲂлгᲂтерпѣли́ве , зᲂвы̀ , блгⷭ҇ве́нъ бг҃ъ ѻ҆ц҃ъ на́шихъ . Пригвᲂзди́лъ є҆сѝ рꙋ́цѣ свᲂѝ и҆ но́зѣ гвᲂздьмѝ сп҃се распина́емъ , и҆ в̾ ре́бра прᲂбᲂде́сѧ , ка́пли и҆стᲂча́ѧ всѣ́мъ ѡ҆ставле́нїѧ , пᲂю́щимъ непреста́ннѡ , и҆ гл҃ющимъ , бл҃гᲂслᲂве́нъ бг҃ъ ѻ҆ц҃ъ на́шихъ .= мⷱ҇ꙋ .= Ли́къ сᲂста́вимъ пѣснᲂсла́вѧще бж҃їѧ мч҃нки . и҆́же лико́мъ а҆́нг҃льскимъ причте́нныѧ , и҆ земны́ѧ прᲂсщ҃а́юща , и҆ всегда̀ пᲂю́щихъ , блгⷭ҇ве́нъ бг҃ъ ѻ҆ц҃ъ на́шихъ .= мⷱ҇ꙋ .= Во ст҃ы́хъ свѣ́тлᲂстехъ , ѡ҆ст҃и́вшесѧ всели́стесѧ , пᲂсыла́юще всѣ́мъ ѡ҆сщ҃е́нїе же и҆ и҆збавле́нїе , вᲂсхвалѧ́ющимъ ва́съ бжⷭ҇твенїи мч҃нцы , и҆ вᲂспѣва́ющимъ хрⷭ҇та̀ , ѻ҆ц҃ъ на́шихъ бж҃е бл҃гᲂслᲂве́нъ є҆сѝ .= боⷢ҇ . Н=езахᲂди́мᲂе сл҃нце ка́кѡ за́йде , на́ древѣ распина́емь , дв҃аѧ вᲂпїѧ́ше ти сло́ве , и҆ ви́дѣвъ сл҃нце ѡ҆ста́ви тече́нїе , свѣти́ти немᲂгі́и , тебѣ̀ стра́ждꙋщꙋ влⷣко , пѣснᲂсло́влю твᲂѐ сн҃е без̾зло́бїе .

и҆́нъ , і҆рмо́съ . Дѣ́ти є҆вре́йскїѧ въ пещѝ , пᲂпра́вше и҆ пла́мень дерзнꙋ́вше , и҆ на́ рᲂсꙋ ѻ҆́гнь прело́жше вᲂпїѧ́хꙋ , бл҃гᲂслᲂве́нъ є҆сѝ гдⷭ҇и бж҃е во́ вѣки . Мᲂлю́тѧ пречⷭ҇таѧ ᲂу҆мертвѝ живꙋ́щїи во мнѣ̀ грѣ́хъ , и҆ живᲂта̀ пᲂлꙋчи́ти спᲂдо́би мѧ дв҃о , и҆ ча́сти мѧ и҆зба́ви та́мѡ мꙋ́чимыхъ . Стра́сти раз̾ли́чныѧ мѧ ѡ҆бꙋрѣва́ютъ , ро́ждьшаѧ чи́стаѧ и҆сто́чника без̾стра́стїю , тѣ́хъ ѡ҆держа́нїѧ , и҆ ѻ҆гнѧ̀ вѣ́чнагѡ и҆зба́ви мѧ бцⷣе мл҃твами сѝ . Нра́вᲂмъ во́льнымъ сᲂгрѣша́ю , и҆ пᲂрабᲂща́емь є҆́смь без̾мѣ́стнымъ ѡ҆бы́чаемъ , ны́нѣ ко ѡ҆бы́чнѣй твᲂе́й млⷭ҇ти притека́ю , ѿча́ѧннаго спаси́ мѧ всест҃а́ѧ бцⷣе . Оу҆гасѝ пла́мень страсте́й мᲂи́хъ , и҆ ᲂу҆ти́ши бꙋ́рю срⷣца мᲂегѡ̀ , бг҃ᲂмт҃и чⷭ҇таѧ , и҆ и҆зба́ви мѧ пречⷭ҇таѧ ѿ бѣсо́въ мꙋче́нїѧ , и҆ ѻ҆гнѧ̀ вѣ́чнагѡ .

пѣ́снь , и҃ . і҆рмо́съ . Се́дмь седми́цею пе́щь , халдѣ́йскїи мꙋчи́тель , бг҃ᲂчести́вымъ лю́тѣ раз̾жжѐ . си́лᲂю же лꙋ́чшею спасе́ныхъ ви́дѣвъ , твᲂрцꙋ̀ и҆ и҆зба́вителю вᲂпїѧ́ше , дѣ́ти бл҃гᲂслᲂви́те , сщ҃е́ннїи вᲂспо́йте лю́дїе , и҆ превᲂзнᲂси́те є҆гѡ̀ во́ вѣки . и҆з̾ =ко́рене прᲂзѧ́блъ є҆сѝ і҆єссе́ѡва вᲂпло́щьсѧ хрⷭ҇тѐ , и҆скᲂренѧ́ѧ и҆зра́стшее те́рнїе а҆да́мᲂва престꙋпле́нїѧ , вѣне́цъ нᲂсѧ̀ те́рнᲂвъ . на́ древѣ же пригво́ждьсѧ , ꙗ҆́же ѿ́ дре́ва и҆сцѣли́въ и҆зра́стшꙋю клѧ́твꙋ , и҆ пᲂю́щїѧ спаса́еши , сщ҃е́ннїи вᲂспо́йте , лю́дїе превᲂз̾нᲂси́те є҆гѡ̀ во́ вѣки . Да бг҃а чл҃ка сᲂдѣ́лаеши чл҃кᲂлю́бче , бы́сть чл҃къ и҆ крⷭ҇тꙋ̀ прича́щьсѧ , въ ре́бра прᲂбᲂда́емь , и҆ ѻ҆цто́мъ с̾ же́лчїю напᲂѧ́емь . тѣ́мже спа́сшїисѧ твᲂи́ми страстьмѝ сло́ве , вᲂпїе́мъ бл҃гᲂда́рственѡ , дѣ́ти бл҃гᲂслᲂви́те , сщ҃е́ннїи вᲂспо́йте , лю́дїе превᲂз̾нᲂси́те є҆гѡ̀ во́вѣки . мⷱ҇ꙋ .= Свѧ́зани бы́вше мч҃нцы , и҆ ꙗ҆́кѡ а҆́гньцы закала́еми , и҆ на ѻ҆гнѝ немлⷭ҇тивно и҆спеца́еми , ѕвѣре́мъ же вдава́еми , и҆ в̾ главы̀ ᲂу҆сѣка́еми , ра́дᲂвастесѧ ра́дᲂстїю не и҆з̾гл҃аннᲂю , вᲂпїю́ще , дѣ́ти блгⷭ҇ви́те , сщ҃е́ннїи вᲂспо́йте , лю́дїе превᲂз̾нᲂси́те хрⷭ҇та̀ во́ вѣки .= мⷱ҇ꙋ .= Вѣнцено́сцы мꙋ́ченицы . а҆́нг҃лѡмъ сᲂприча́стницы , и҆́же беспло́тныѧ врагѝ пᲂпра́вше , мл҃твꙋ сᲂтвᲂри́те ѡ҆ на́съ ко́ гдⷭ҇ꙋ . ꙗ҆́кѡ да в̾ любвѝ и҆ во мно́зѣ є҆динᲂмышле́нїи пᲂживе́мъ , вᲂпїю́ще несꙋмнѣ́ннымъ срⷣцемъ , дѣ́ти блгⷭ҇ви́те , сщ҃е́ннїи вᲂспо́йте , лю́дїе превᲂз̾нᲂси́те хрⷭ҇та̀ во́ вѣки .= боⷢ҇ . Б=ᲂлѣ́зненѣ стᲂнѧ́щи , мт҃рьски вᲂсклица́ше , и҆ ᲂу҆тро́бнагѡ смꙋще́нїѧ нетерпѧ́щи на крⷭ҇тѣ̀ взира́ше , ро́ждьшагᲂсѧ и҆з̾ твᲂегѡ̀ чре́ва , вᲂпїю́щи что̀ зрѣ́нїе сѐ ча́до , ка́кѡ стра́жеши , и҆́же є҆стество́мъ без̾стрⷭ҇тныи , всѧ́кѡ хᲂтѧ̀ ро́дъ чл҃ческїи ѿ страсте́й свᲂбᲂди́ти .

и҆́нъ , і҆рмо́съ . Цр҃ѧ нбⷭ҇нагѡ , є҆го́же пᲂю́тъ вѡ́и а҆́нг҃льстїи . хвали́те и҆ превᲂзнᲂси́те є҆гѡ̀ во́ вѣки . Бг҃ᲂрᲂди́тельнице дв҃о , ты̀ мᲂѧ̀ грѣхѝ и҆ бре́мѧ ѡ҆блегчѝ ѿ прегрѣше́нїи , ꙗ҆́кѡ да тѧ̀ велича́ю . Ꙗ҆́же сꙋдїю̀ ро́ждьши и҆ бг҃а , мᲂльба́ми бл҃гᲂпремѣни́тельными твᲂи́ми , млⷭ҇тива мнѣ̀ тᲂгѡ̀ пᲂкажѝ чⷭ҇таѧ , ꙗ҆́кѡ да спасе́тъ мѧ ѿ вѣ́чнагѡ ѻ҆гнѧ̀ . Прегрѣше́нїѧ мᲂѧ̀ мно́гаѧ прев̾зыдо́ша , бцⷣе да́ждь ми ны́нѣ рꙋ́кꙋ по́мᲂщи , и҆ ѿ пла́мене негаси́маго и҆зба́ви мѧ непᲂтре́бнаго . Прᲂсвѣтѝ пречⷭ҇таѧ срⷣца мᲂегѡ̀ ѻ҆́чи мᲂлю́сѧ , че́рнᲂстїю грѣхо́внᲂю ѡ҆слѣпле́ныѧ . и҆ прїѧ́тны бжⷭ҇твенагѡ сїѧ́нїѧ пᲂкажѝ , ꙗ҆́кѡ да ꙗ҆влю́сѧ тебѐ радѝ , твᲂемꙋ̀ сн҃ꙋ чи́стъ . та́же , пѣ́снь бцⷣѣ . вели́читъ дш҃а мᲂѧ̀ гдⷭ҇а .= и҆ =пᲂкло́ны до землѝ .

пѣ́снь , ѳ҃ . і҆рмо́съ . Оу҆диви́сѧ ᲂу҆́бѡ ѡ҆ се́мъ не́бо , и҆ землѝ ᲂу҆жасо́шасѧ кᲂнцы̀ , ꙗ҆́кѡ бг҃ъ ꙗ҆ви́сѧ чл҃кѡмъ пло́тїю , чре́во же твᲂѐ бы́сть прᲂстра́ннѣе нб҃съ , тѣ́мъ тѧ̀ бцⷣе , а҆́нг҃лъ и҆ чл҃къ чинᲂнача́лїѧ велича́емъ . И҆сцѣли́лъ є҆сѝ влⷣко мᲂѧ̀ ꙗ҆́звы ᲂу҆ѧ́звивсѧ , и҆ ѡ҆крᲂвави́въ рꙋ́цѣ свᲂѝ , и҆ къ пꙋте́мъ хᲂди́ти спаси́тельнымъ , ꙗ҆́кѡ бл҃гъ напра́вилъ мѧ є҆сѝ гдⷭ҇и . но́зѣ пригвᲂзди́въ сѝ на крⷭ҇тѣ̀ , и҆́маже дре́вле рᲂдᲂнача́льницы ви́дѣвше хᲂдѧ́ща тѧ̀ в̾ раѝ , сᲂкрыва́хꙋсѧ . И҆спра́вившꙋтисѧ на крⷭ҇тѣ̀ , и҆спра́висѧ пады́и паде́нїемъ ве́лїемъ первᲂзда́нныи , крѣ́пᲂсть же всѧ̀ паде́сѧ вра́жїѧ , и҆ всѧ̀ землѧ̀ ѡ҆ст҃и́сѧ кро́вїю и҆ вᲂдо́ю , ѿ ре́бръ твᲂи́хъ и҆злїѧ́ннᲂю , тѣ́мже тѧ̀ всеще́дре непреста́ннѡ велича́емъ .= мⷱ҇ꙋ .= Вѧ́жеми ст҃і́и мч҃нцы вѧза́нїѧ лꙋка́вагѡ разрꙋши́сте , и҆ вѧза́ньми и҆́хже претерпѣ́сте терпѣли́вно , тᲂгѡ̀ свѧза́сте , и҆ пᲂкᲂри́сте по́д̾нᲂзѣ стꙋда̀ и҆спо́лнена . и҆ смѣ́хъ зрѧ́щимъ сᲂтвᲂри́сте , бл҃гᲂда́тїю бжⷭ҇твенᲂю .= мⷱ҇ꙋ .= Землѧ̀ пᲂлᲂже́нїемъ сщ҃е́нныхъ мч҃нкъ мᲂще́й ѡ҆ст҃и́сѧ , и҆́бо и҆сто́чникъ и҆стᲂча́етъ и҆сцѣле́нїи всѧ́ческихъ , сїѧ̀ бжⷭ҇твено стѧжа́въ , стра́сти тѣле́сныѧ и҆ дш҃е́вныѧ непреста́ннѡ и҆сцѣлѧ́юща , и҆ врежде́нїе бѣсо́вскᲂе ѿрѣва́юща , бжⷭ҇твенᲂю бл҃гᲂда́тїю .= боⷢ҇ . И҆=збѣ́гши бᲂлѣ́зней мт҃рьнихъ , во́ времѧ рᲂжде́нїѧ , дᲂлгᲂтерпѣли́ве . є҆гда́ же ти ны́нѣ стра́сти во́льнѣй причасти́вшꙋсѧ , и҆ бᲂлѣ́зни прїи́мшꙋ , пᲂбᲂлѣ́хъ ᲂу҆тро́бᲂю , и҆ дш҃е́ю бᲂлѣ́зни и҆спо́лнихсѧ , пречⷭ҇таѧ вᲂпїѧ́ше , є҆ѧ́же дᲂсто́йнѡ велича́емъ .

и҆́нъ , і҆рмо́съ . Оу҆страши́сѧ всѧ́къ слꙋ́хъ , не и҆зрече́ннагѡ бж҃їѧ схᲂжде́нїѧ , ꙗ҆́кѡ вы́шнїи во́лею сни́де да́же и҆ до́ плᲂти . ѿ дв҃ческагѡ бо чре́ва бы́въ ᲂу҆́бѡ чл҃къ . тѣ́мже тѧ̀ пречⷭ҇тꙋю бцⷣꙋ , вѣ́рнїи велича́емъ . Оу҆ще́дри пречⷭ҇таѧ ѻ҆каѧ́ннꙋю ми дꙋ́шꙋ , и҆ ᲂу҆мертвѝ стра́сти гꙋби́тельныѧ , и҆ мꙋчи́тельнᲂе недᲂꙋмѣ́нїе ѿженѝ , стрꙋѧ́ же сле́зъ ст҃ы́ѧ да́рꙋй приснᲂживо́тныѧ , и҆́миже и҆зба́влюсѧ ждꙋ́щагѡ мѧ лю́тагѡ ѡ҆сꙋжде́нїѧ . Стѣна̀ хрⷭ҇тїа́нѡмъ и҆ прибѣ́жище тве́рдᲂе ми́рꙋ , в̾ не́мже спаса́емсѧ , ты̀ є҆сѝ дв҃о чи́стаѧ бг҃ᲂневѣ́сто . и҆з̾ тебе́ бо бг҃ъ вᲂплᲂти́всѧ , тебѐ всѣ́мъ пᲂдадѐ пᲂкро́въ спаси́тельныи . тѣ́мже чи́стаѧ спаси́ мѧ недᲂсто́йнаго . Без̾нача́льне сло́ве ѻ҆ц҃а , и҆ сн҃е мо́й , и҆ ст҃о́мꙋ дх҃ꙋ сᲂпресто́льныи , ка́кѡ свᲂѝ пречⷭ҇тѣи дла́ни на крⷭ҇тѣ̀ прᲂсте́рлъ є҆сѝ . что̀ ны́нѣ тᲂли́каѧ твᲂѧ̀ нищета̀ пребл҃гі́и ; пред̾стᲂѧ́щи твᲂемꙋ̀ распѧ́тїю вᲂпїѧ́ше всенепᲂро́чнаѧ . И҆ска́пающи бжⷭ҇твенꙋю сла́дᲂсть , и҆́же всѣ́хъ сла́дᲂсть ро́ждьшаѧ , ᲂу҆сладѝ дш҃ꙋ мᲂю̀ , ѡ҆гᲂрче́ннꙋю ꙗ҆́дᲂмъ ѕмїѧ̀ , ѿчꙋжа́ющи мѧ го́рькагѡ грѣха̀ всегда̀ хᲂда́тайствᲂмъ тѝ , пред̾ста́тельнице вѣ́рнымъ непᲂсты́днаѧ .

та́же , дᲂсто́йнѡ є҆́сть . и҆ пᲂкло́нъ до землѝ . та́же , є҆ктенїѧ̀ ма́лаѧ . и҆ свѣти́ленъ . и҆ ѱалмы̀ ѡ҆бы́чны .

на стихо́внѣ , стихѣ́ры , крⷭ҇тны . гла́съ , и҃ . Мѡѷсе́ѡвъ же́злъ прᲂѡ҆бража́ше чⷭ҇тны́и крⷭ҇тъ тво́й , сп҃се на́шъ , тѣ́мъ бо спаса́еши , ꙗ҆́кѡ и҆з̾ глꙋбины̀ мᲂрскі́ѧ лю́ди свᲂѧ̀ чл҃кᲂлю́бче .

сти́хъ : и҆спо́лнихᲂмсѧ за ᲂу҆́тра . И҆́же дре́вле во є҆де́мѣ в̾ раѝ , дре́во снѣ́днᲂе прᲂзѧ́бло є҆́сть пᲂсредѝ садо́въ , цр҃кви же твᲂѧ̀ хрⷭ҇тѐ , крⷭ҇тъ тво́й прᲂцвѣтѐ , и҆стᲂча́ющь всемꙋ̀ ми́рꙋ жи́знь ; но ѻ҆́но ᲂу҆́бѡ ᲂу҆мертвѝ снѣ́дїю ꙗ҆́дшаго а҆да́ма , се́же жи́ва сᲂтвᲂрѝ , вѣ́рᲂю спа́сшасѧ разбо́йника . є҆го́же спасе́нїѧ прича́стники и҆ на́съ ꙗ҆вѝ хрⷭ҇тѐ бж҃е . и҆́же стрⷭ҇тїю свᲂе́ю разрꙋши́въ , ꙗ҆́же на ны̀ ко́зни вра́жїѧ , и҆ спᲂдо́би на́съ црⷭ҇твїю твᲂемꙋ̀ гдⷭ҇и .

сти́хъ : и҆ бꙋ́ди свѣ́тлᲂсть гдⷭ҇а . мⷱ҇ꙋ . Мч҃нцы хрⷭ҇то́вы непᲂбѣди́мїи , пᲂбѣди́вше ле́сть си́лᲂю крⷭ҇тнᲂю . вᲂспрїѧ́сте бл҃гᲂда́ть вѣ́чныѧ жи́зни , мꙋчи́телей преще́нїѧ не ᲂу҆бᲂѧ́вшесѧ , мꙋ́ками ᲂу҆ранѧ́еми весели́стесѧ , и҆ ны́нѣ кро́ви ва́ша бы́ша и҆сцѣле́нїѧ дш҃а́мъ на́шимъ , мᲂли́те спасти́сѧ дш҃а́мъ на́шимъ .

сла́ва , и҆ ны́нѣ , крⷭ҇тᲂбоⷢ҇ . На крⷭ҇тѣ̀ пᲂвѣ́шена зрѧ́щи чⷭ҇таѧ , тебѐ ро́ждьшаѧ гдⷭ҇и , и҆ бли́зъ бы́вши пла́чꙋщи гл҃аше , ча́до что̀ сїѧ̀ стра́жеши пло́тїю , и҆ тщи́шисѧ без̾ча́дствᲂвати мѧ . пᲂтщи́сѧ прᲂсла́витисѧ , ꙗ҆́кѡ да вᲂз̾вели́чꙋсѧ стра́стїю твᲂе́ю .

та́же , бл҃го є҆́сть и҆спᲂвѣ́датисѧ . трⷭ҇то́е , и҆ по ѻ҆́ч҃е на́шъ . трᲂпа́рь , ст҃о́мꙋ .= є҆ктенїѧ̀ . =та́же , ча́съ , а҃ . ѱалмы̀ , ѡ҆бы́чны . и҆ про́чее , и҆ кᲂне́чныи ѿпꙋ́стъ .

Въ сре́дꙋ , бл҃же́нны . гла́съ , и҃ .

Пᲂмѧнѝ на́съ хрⷭ҇тѐ сп҃се ми́ра , ꙗ҆́кᲂже разбо́йника пᲂмѧнꙋ̀ на́ древѣ , и҆ спᲂдо́би всѣ́хъ є҆ди́не ще́дре , нбⷭ҇нᲂмꙋ црⷭ҇твїю тѝ .

бл҃же́ни и҆згна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . жезло́мъ мѡѷсе́й крⷭ҇тъ вᲂѡ҆бража́ѧ , раз̾дѣлѧ́ше глꙋбинꙋ̀ , лю́ди і҆зра́ильтескїѧ превᲂдѧ̀ . мы́ же тᲂгѡ̀ вᲂѡ҆бража́юще , мы́сленыѧ врагѝ пᲂбѣжда́емъ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зженꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ на вы̀ лжꙋ́ще менѐ ра́ди . Дре́вле і҆а́кѡвъ бл҃гᲂслᲂвлѧ́ѧ ѻ҆́трᲂки сн҃ы сн҃о́въ свᲂи́хъ , рꙋ́цѣ премѣнѧ́ѧ прᲂсте́ръ , назнамена̀ тво́й крⷭ҇тъ хрⷭ҇тѐ сп҃се , и҆́мже всѝ ѿ клѧ́твы свᲂбᲂди́хᲂмсѧ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Страсте́мъ хрⷭ҇то́вымъ ревнꙋ́юще страстᲂте́рпцы , мꙋ́ки го́рькїѧ пᲂдъѧ́сте мꙋ́жески , и҆ нетлѣ́нными вѣнцы̀ вѣнча́вшесѧ , на́ нб҃сѣхъ живетѐ .

сла́ва . Зако́ны твᲂѧ̀ хрⷭ҇тѐ и҆́же є҆ди́ныи ѿ трⷪ҇цы , сᲂтвᲂрѝ сᲂблюда́ти ми , и҆ зако́нныѧ рабо́ты лꙋка́вагѡ и҆схи́ти , си́лᲂю всемᲂгꙋ́щагѡ крⷭ҇та̀ , и҆ спаси́ мѧ .

=и҆ ны́нѣ . и҆з̾ =дв҃ческаго чре́ва твᲂегѡ̀ чⷭ҇таѧ вᲂсїѧ̀ сᲂдѣ́тель , сл҃нцꙋ и҆ лꙋнѣ̀ . є҆го́же зрѧ́ще пᲂвѣ́шена на́ древѣ всѧ̀ тва́рь кᲂлеба́шесѧ .

<< Previous

Contents

Next >>