каѳи́сма , к҃ . ѱл҃о́мъ дв҃дᲂвъ , рм҃г .

Бл҃гᲂслᲂве́нъ гдⷭ҇ь бг҃ъ мо́й , наꙋча́ѧ рꙋ́цѣ мᲂѝ на ѡ҆пᲂлче́нїе , и҆ пе́рсты мᲂѧ̀ на́  брань . Млⷭ҇ть мᲂѧ̀ и҆ прибѣ́жище мᲂѐ . застꙋ́пникъ мо́й и҆ и҆зба́витель мо́й . защи́титель мо́й и҆ на́нь ᲂу҆пᲂва́хъ , пᲂвинꙋ́ѧи лю́ди мᲂѧ̀ пᲂд̾ мѧ̀ . Гдⷭ҇и что̀ є҆́сть челᲂвѣ́къ , ꙗ҆́кѡ сказа́лсѧ є҆сѝ є҆мꙋ̀ ; лѝ сн҃ъ челᲂвѣ́чь , ꙗ҆́кѡ вмѣнѧ́еши и҆̀ ; Чл҃къ сꙋетѣ̀ ᲂу҆пᲂдо́бисѧ , дні́е є҆гѡ̀ ꙗ҆́кѡ сѣ́нь прехо́дѧтъ . Гдⷭ҇и прекло́нь нб҃са̀ и҆ сни́ди , кᲂсни́сѧ гᲂра́мъ и҆ вᲂз̾ды́мѧтсѧ . Блеснѝ мо́лнїю , и҆ раз̾жене́ши и҆́хъ . пᲂслѝ стрѣ́лы твᲂѧ̀ , и҆ смꙋти́ши и҆́хъ . Пᲂслѝ рꙋ́кꙋ твᲂю̀ свы́ше , и҆зми́ мѧ и҆ и҆зба́ви мѧ ѿ во́дъ мно́гъ , ѿ  рꙋ́къ сыно́въ чꙋжи́хъ . И҆́хже ᲂу҆ста̀ глаго́лаша сꙋетꙋ̀ , и҆ десни́ца и҆́хъ десни́ца не  пра́вды . Бж҃е пѣ́снь но́вꙋ вᲂспᲂю̀ тебѣ̀ , во ѱалты́ри десѧтᲂстрꙋ́ннѣмъ пᲂю̀ тебѣ̀ . Даю́щемꙋ спасе́нїе цр҃е́мъ , и҆збавлѧ́ющемꙋ дв҃да раба̀ свᲂегѡ̀ , ѿ ѻ҆рꙋ́жїѧ лю́та . И҆зба́ви мѧ и҆ и҆зми́ мѧ и҆з̾ рꙋкѝ сыно́въ чꙋжи́хъ . и҆́хже ᲂу҆ста̀ гл҃аша сꙋетꙋ̀ , и҆ десни́ца и҆́хъ , десни́ца не пра́вды . И҆́хже сы́нᲂве и҆́хъ , ꙗ҆́кѡ нᲂвᲂсажде́нна вᲂдрꙋже́на въ ю҆́нᲂсти свᲂе́й . дще́рѧ и҆́хъ ᲂу҆до́брены , преꙋкра́шены ꙗ҆́кѡ пᲂдо́бїе цр҃кве . Храни́лища и҆́хъ и҆спо́лнь , ѿрыга́юща ѿ сїѧ̀ во ѻ҆́нꙋ . ѻ҆вца̀ и҆́хъ мнᲂгᲂпло́дны , мно́жащїѧсѧ во  и҆схо́дищихъ свᲂи́хъ . вᲂло́ве и҆́хъ то́лсти . Нѣ́сть паде́нїѧ гра́дежꙋ , ни прᲂхо́да , ни во́плѧ в̾ стᲂгна́хъ и҆́хъ . Оу҆блажи́ша лю́ди , и҆́мже сїѧ̀ сꙋ́ть . бл҃же́ни лю́дїе , и҆́мже гдⷭ҇ь бг҃ъ и҆́хъ ;

ѱл҃о́мъ дв҃дᲂвъ , рм҃д .

Вᲂзнесꙋ́  тѧ бж҃е мо́й , цр҃ю мо́й , и҆ бл҃гᲂслᲂвлю̀ и҆́мѧ твᲂѐ в̾ вѣ́къ , и҆ в̾ вѣ́къ вѣ́ка . На всѧ́къ де́нь бл҃гᲂслᲂвлю́ тѧ , и҆ вᲂсхвалю̀ и҆́мѧ твᲂѐ в̾ вѣ́къ , и҆ в̾ вѣ́къ вѣ́ка . Ве́лїи гдⷭ҇ь , и҆ хва́ленъ ѕѣлѡ̀ , и҆ вели́чїю є҆гѡ̀ нѣ́сть кᲂнца̀ . Ро́дъ и҆ ро́дъ вᲂсхва́лѧтъ дѣ́ла твᲂѧ̀ , и҆ си́лꙋ твᲂю̀ вᲂз̾вѣстѧ́тъ . Великᲂлѣ́пїе сла́вы ст҃ы́ни твᲂеѧ̀ вᲂз̾гл҃ютъ , и҆ чꙋдеса̀ твᲂѧ̀ пᲂвѣ́дѧтъ . И҆ си́лꙋ стра́шныхъ твᲂи́хъ рекꙋ́тъ , и҆ вели́чїе твᲂѐ пᲂвѣ́дѧтъ . Па́мѧть мно́жества бл҃гᲂсти твᲂеѧ̀ ѿры́гнꙋтъ , и҆ пра́вдᲂю твᲂе́ю вᲂз̾ра́дꙋютсѧ . Ще́дръ и҆ ми́лᲂстивъ гдⷭ҇ь , дᲂлгᲂтерпѣли́въ и҆ мнᲂгᲂми́лᲂстивъ . Бл҃гъ гдⷭ҇ь всѧ́ческимъ , и҆ щедро́ты є҆гѡ̀ на всѣ́хъ дѣ́лѣхъ є҆гѡ̀ . Да и҆спᲂвѣ́дѧтсѧ тебѣ̀ гдⷭ҇и всѧ̀ дѣ́ла твᲂѧ̀ , и҆ прпⷣбнїи твᲂѝ да бл҃гᲂслᲂвѧ́тъ тѧ̀ . Сла́вꙋ црⷭ҇твїѧ твᲂегѡ̀ рекꙋ́тъ , и҆ си́лꙋ твᲂю̀ вᲂз̾гл҃ютъ . Сказа́ти сн҃ᲂвѡ́мъ чл҃ческимъ си́лꙋ твᲂю̀ , и҆ сла́вꙋ великᲂлѣ́пїѧ црⷭ҇твїѧ твᲂегѡ̀ . Црⷭ҇тво твᲂѐ црⷭ҇тво всѣ́хъ вѣ́къ , и҆ влⷣчество твᲂѐ во всѧ́кᲂмъ ро́дѣ и҆ ро́дѣ . Вѣ́ренъ гдⷭ҇ь во всѣ́хъ слᲂвесѣ́хъ свᲂи́хъ , и҆ прпⷣбенъ во всѣ́хъ дѣ́лѣхъ свᲂи́хъ . Пᲂд̾є́млетъ гдⷭ҇ь всѧ̀ низ̾па́дающїѧ , и҆ и҆справлѧ́етъ всѧ̀ низ̾ве́рженныѧ . Ѻ҆́чи всѣ́хъ на тѧ̀ ᲂу҆пᲂва́ютъ , и҆ ты̀ дае́ши и҆́мъ пи́щꙋ во́ благо вре́мѧ . Ѿверза́еши ты̀ рꙋ́кꙋ твᲂю̀ , и҆ насыща́еши всѧ́ко живо́тно бл҃гᲂвᲂле́нїѧ . Пра́веденъ гдⷭ҇ь во всѣ́хъ пꙋте́хъ свᲂи́хъ , и҆ прпⷣбенъ во всѣ́хъ дѣ́лѣхъ свᲂи́хъ . Бли́зъ гдⷭ҇ь всѣ́мъ призыва́ющимъ и҆̀ , всѣ́мъ призыва́ющимъ и҆̀ вᲂи́стинꙋ . Во́лю бᲂѧ́щихсѧ є҆гѡ̀ сᲂтвᲂри́тъ , и҆ мᲂли́твꙋ и҆́хъ ᲂу҆слы́шитъ , и҆ спасе́тъ и҆́хъ . Храни́тъ гдⷭ҇ь всѧ̀ лю́бѧщїѧ є҆гѡ̀ , и҆ всѧ̀ грѣ́шники пᲂтреби́тъ . Хвалꙋ̀ гдⷭ҇ню вᲂз̾гл҃ютъ ᲂу҆ста̀ мᲂѧ̀ , и҆ да бл҃гᲂслᲂви́тъ всѧ́ка пло́ть и҆́мѧ ст҃о́е є҆гѡ̀ в̾ вѣ́къ , и҆ в̾ вѣ́къ вѣ́ка .

сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .

ѱл҃о́мъ дв҃дᲂвъ , рм҃є .

Хвалѝ дш҃е мᲂѧ̀ гдⷭ҇а , вᲂсхвалю̀ гдⷭ҇а в̾ живᲂтѣ̀ мᲂе́мъ , пᲂю̀ бг҃ꙋ мᲂемꙋ̀ до́ндеже є҆́смь . Не надѣ́йтесѧ на́ кнѧзи , на́ сн҃ы чл҃ческїѧ , в̾ ни́хже нѣ́сть спасе́нїѧ . И҆зы́детъ дꙋ́хъ є҆гѡ̀ , и҆ вᲂз̾врати́тсѧ въ зе́млю свᲂю̀ , въ то́й де́нь пᲂги́бнꙋтъ всѧ̀ пᲂмышле́нїѧ є҆гѡ̀ . Бл҃же́нъ є҆мꙋ́же бг҃ъ і҆а́кѡвль пᲂмо́щникъ є҆гѡ̀ , ᲂу҆пᲂва́нїе є҆гѡ̀ на́ гдⷭ҇а бг҃а свᲂегѡ̀ . Сᲂтво́ршаго нб҃о и҆ зе́млю , мо́ре и҆ всѧ̀ ꙗ҆́же в̾ ни́хъ . Хранѧ́щаго и҆́стинꙋ в̾ вѣ́къ , твᲂрѧ́щаго сꙋ́дъ ѡ҆би́димымъ , даю́щаго пи́щꙋ а҆́лчꙋщимъ . Гдⷭ҇ь рѣши́тъ ѡ҆кᲂва́нныхъ . гдⷭ҇ь ᲂу҆мꙋдрѧ́етъ слѣпца̀ . гдⷭ҇ь вᲂз̾во́дитъ низ̾ве́рженныѧ . гдⷭ҇ь лю́битъ пра́ведники . Гдⷭ҇ь храни́тъ прише́льца , си́ра и҆ вдᲂвꙋ̀ прїе́млетъ , и҆ пꙋ́ть грѣ́шныхъ пᲂгꙋби́тъ . Вᲂцр҃и́тсѧ гдⷭ҇ь во́ вѣки , бг҃ъ тво́й сїѡ́не в̾ ро́дъ и҆ ро́дъ .

ѱл҃о́мъ дв҃дᲂвъ , рм҃ѕ .

Хвали́те гдⷭ҇а , ꙗ҆́кѡ бл҃гъ ѱл҃о́мъ бг҃ᲂви на́шемꙋ , да наслади́тсѧ хвале́нїе . Зи́ждаи і҆єрⷭ҇ли́ма гдⷭ҇ь , раз̾сѣ́ѧннаѧ і҆зра́илева сᲂбере́тъ . И҆сцѣлѧ́ѧ сᲂкрꙋше́нныѧ срⷣцемъ , и҆ ѡ҆бѧза́ѧ сᲂкрꙋше́нїѧ и҆́хъ . И҆счита́ѧи мно́жество ѕвѣ́здъ , и҆ всѣ́мъ и҆́мъ и҆мена̀ нарица́ѧ . Ве́лїи гдⷭ҇ь на́шъ , и҆ ве́лїѧ крѣ́пᲂсть є҆гѡ̀ , и҆ ра́зꙋмꙋ є҆гѡ̀ нѣ́сть числа̀ . Прїе́млѧ кро́ткїѧ гдⷭ҇ь , смирѧ́ѧ же грѣ́шники до землѝ . Начнѣ́те гдⷭ҇ви во и҆спᲂвѣ́данїи , по́йте бг҃ᲂви на́шемꙋ въ гꙋ́слѣхъ . Ѡ҆дѣва́ющемꙋ не́бо ѻ҆́блаки , гᲂто́вающемꙋ землѝ до́ждь . прᲂзѧба́ющемꙋ на гᲂра́хъ сѣ́но , и҆ травꙋ̀ на слꙋ́жбꙋ челᲂвѣ́кѡмъ . Даю́щемꙋ скᲂтѡ́мъ пи́щꙋ и҆́хъ , и҆ птенце́мъ вра́нᲂвѡмъ призыва́ющимъ и҆̀ . Не в̾ си́лѣ ко́нстѣй вᲂсхо́щетъ , ни въ лы́стѣхъ мꙋ́жескихъ бл҃гᲂвᲂли́тъ . Бл҃гᲂвᲂли́тъ гдⷭ҇ь на  бᲂѧ́щихсѧ є҆гѡ̀ , и҆ на ᲂу҆пᲂва́ющихъ на млⷭ҇ть є҆гѡ̀ .

ѱл҃о́мъ дв҃дᲂвъ , рм҃з .

Пᲂхвалѝ і҆єрⷭ҇ли́ме гдⷭ҇а , хвалѝ бг҃а твᲂегѡ̀ сїѡ́не . Ꙗ҆́кѡ ᲂу҆крѣпѝ вереѧ̀ вра́тъ твᲂи́хъ , блгⷭ҇вѝ сы́ны твᲂѧ̀ в̾ тебѣ̀ . Ꙗ҆́кѡ пᲂлᲂжѝ предѣ́лы твᲂѧ̀ ми́ръ , и҆ тꙋ́ка пшени́чна насыща́ѧ тѧ̀ . Пᲂсыла́ѧи сло́во свᲂѐ землѝ , до  ско́рᲂсти тече́тъ сло́во є҆гѡ̀ . Даю́щаго снѣ́гъ сво́й ꙗ҆́кѡ во́лнꙋ , мглꙋ̀ ꙗ҆́кѡ пе́пелъ пᲂсыпа́ющагѡ . Мета́ющагѡ го́лᲂть сво́й ꙗ҆́кѡ хлѣ́бы , прᲂти́вꙋ лицꙋ̀ мра́за є҆гѡ̀ кто̀ пᲂстᲂи́тъ . По́слетъ сло́во свᲂѐ , и҆ и҆ста́етъ ѧ҆̀ . д̾хне́тъ дх҃ъ є҆гѡ̀ , и҆ пᲂтекꙋ́тъ во́ды . Вᲂз̾вѣща́ѧи сло́во свᲂѐ і҆а́кѡвꙋ , ѡ҆правда́нїѧ и҆ сꙋдьбы̀ свᲂѧ̀ і҆и҃леви . Не сᲂтвᲂрѝ та́кѡ всѧ́кᲂмꙋ ꙗ҆зы́кꙋ , и҆ сꙋдьбы̀ свᲂѧ̀ не сказа̀ и҆́мъ .

сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .

ѱл҃о́мъ дв҃дᲂвъ , рм҃и .

Хвали́те гдⷭ҇а съ небе́съ , хвали́те є҆гѡ̀ въ вы́шнихъ . Хвали́те є҆гѡ̀ всѝ а҆́нг҃ли є҆гѡ̀ , хвали́те є҆гѡ̀ всѧ̀ си́лы є҆гѡ̀ . Хвали́те є҆гѡ̀ сл҃нце и҆ лꙋна̀ , хвали́те є҆гѡ̀ всѧ̀ ѕвѣ́зды и҆ свѣ́тъ . Хвали́те є҆гѡ̀ нб҃са̀ нб҃съ , и҆ вᲂда̀ ꙗ҆́же превы́ше нб҃съ , да вᲂсхва́лѧтъ и҆́мѧ гдⷭ҇не . Ꙗ҆́кѡ то́й речѐ , и҆ бы́ша . то́й пᲂвелѣ̀ , и҆ сᲂзда́шасѧ . Пᲂста́ви ѧ҆̀ в̾ вѣ́къ и҆ в̾ вѣ́къ вѣ́ка , пᲂвелѣ́нїе пᲂлᲂжѝ и҆ не ми́мѡ и҆́детъ . Хвали́те гдⷭ҇а ѿ  землѝ , ѕмі́еве и҆ всѧ̀ бе́здны . Ѻ҆́гнь , гра́дъ , снѣ́гъ го́лᲂть , дꙋ́хъ бꙋ́ренъ твᲂрѧ́щаѧ сло́во є҆гѡ̀ . Го́ры , и҆ всѝ хо́лми . древа̀ плᲂдᲂно́сна , и҆ всѝ ке́дри . Звѣ́рїе , и҆ всѝ ско́ти . га́ди , и҆ пти́цы перна́ты . Цр҃їе зе́мстїи , и҆ всѝ лю́дїе . кнѧ́зи , и҆ всѝ сꙋдїѝ зе́мстїи . Ю҆́нᲂшы и҆ дв҃ы , ста́рцы съ ю҆́нᲂтами , да вᲂсхва́лѧтъ и҆́мѧ гдⷭ҇не . Ꙗ҆́кѡ вᲂз̾несе́сѧ и҆́мѧ тᲂгѡ̀ є҆ди́нᲂгѡ . И҆спᲂвѣ́данїе є҆гѡ̀ на землѝ и҆ на́ нб҃си , и҆ вᲂз̾несе́тъ ро́гъ люде́й свᲂи́хъ . Пѣ́снь всѣ́мъ прпⷣбнымъ є҆гѡ̀ , сн҃ᲂвѡ́мъ і҆и҃левѡмъ , лю́демъ приближа́ющимсѧ є҆́мъ .

ѱл҃о́мъ дв҃дᲂвъ , рм҃ѳ .

Вᲂспо́йте гдⷭ҇ви пѣ́снь но́вꙋ , хвале́нїе є҆гѡ̀ въ цр҃кви прпⷣбныхъ . Да вᲂз̾весели́тсѧ і҆зра́иль , ѡ҆ сᲂтво́ршемъ є҆гѡ̀ . и҆ сн҃ᲂве сїѡ́ни , вᲂз̾ра́дꙋютсѧ ѡ҆ царѝ свᲂе́мъ . Да вᲂсхва́лѧтъ и҆́мѧ є҆гѡ̀ в̾ ли́цѣ , в̾ тимпа́нѣ и҆ ѱалты́ри да пᲂю́тъ є҆мꙋ̀ . Ꙗ҆́кѡ бл҃гᲂвᲂли́тъ гдⷭ҇ь въ лю́дехъ свᲂи́хъ , и҆ вᲂз̾несе́тъ кро́ткїѧ во спасе́нїе . Вᲂсхва́лѧтсѧ препᲂдо́бнїи во сла́вѣ , и҆ вᲂз̾ра́дꙋютсѧ на ло́жихъ свᲂи́хъ . Вᲂз̾нᲂше́нїѧ бж҃їѧ в̾ гᲂрта́ни и҆́хъ , и҆ мечѝ ѡ҆бᲂю́дꙋ ѻ҆стры̀ в̾ рꙋка́хъ и҆́хъ . Сᲂтвᲂри́ти ѿмще́нїе во ꙗ҆зы́цѣхъ , ѡ҆бличе́нїе в̾ лю́дехъ . Свѧза́ти царѧ̀ и҆́хъ пꙋ́ты , и҆ сла́вныѧ и҆́хъ рꙋчны́ми ѡ҆ко́вы желѣ́зными . Сᲂтвᲂри́ти в̾ ни́хъ сꙋ́дъ напи́санъ , сла́ва сѝ є҆́сть всѣ́мъ препᲂдо́бнымъ є҆гѡ̀ .

ѱл҃о́мъ , р҃н .

Хвали́те бг҃а во ст҃ы́хъ є҆гѡ̀ , хвали́те є҆гѡ̀ во ᲂу҆тверже́нїи си́лъ є҆гѡ̀ . Хвали́те є҆гѡ̀ на си́лахъ є҆гѡ̀ , хвали́те є҆гѡ̀ по премно́гᲂмꙋ вели́чествїю є҆гѡ̀ . Хвали́те є҆гѡ̀ во́ гласѣ трꙋ́бнѣмъ , хвали́те є҆гѡ̀ во ѱалты́ри и҆ гꙋ́слѣхъ . Хвали́те є҆гѡ̀ в̾ тѷмпа́нѣ и҆ ли́цѣ , хвали́те є҆гѡ̀ въ стрꙋ́нахъ и҆ ѻ҆рга́нѣхъ . Хвали́те є҆гѡ̀ въ кѷмва́лѣхъ дᲂбрᲂгла́сныхъ , хвали́те є҆гѡ̀ въ  кѷмва́лѣхъ вᲂсклица́нїѧ . Всѧ́ко дыха́нїе да  хва́литъ гдⷭ҇а .

сла́ва , и҆ ны́нѣ . А҆ллилꙋ́їѧ ,= гⷤ . Гдⷭ҇и пᲂми́лꙋй , =г҃ . сла́ва , и҆ ны́нѣ .