НЕДѢ́ЛѦ ШЕ́СТАѦ ПО ПА́СЦѢ

ѡ҆ слѣпо́мъ . =Въ сꙋбо́тꙋ ве́черъ , на ма́лѣй вече́рни . на гдⷭ҇и вᲂзва́хъ , стⷯры , вᲂскрⷭ҇ны , на д҃ . гла́съ , є҃ . запѣ́въ : ѿ стра́жи ᲂу҆́тренїѧ до́ нᲂщи , ѿ стра́жи ᲂу҆́тренїѧ ,꙳ да ᲂу҆пᲂва́етъ і҆и҃ль на́ гдⷭ҇а . Ч=естны́мъ твᲂи́мъ крⷭ҇то́мъ хрⷭ҇тѐ , дїа́вᲂла пᲂсрами́лъ є҆сѝ , и҆ вᲂскрⷭ҇нїемъ твᲂи́мъ жа́ло грѣхо́внᲂе притꙋпи́лъ є҆сѝ , и҆ спа́слъ є҆сѝ на́съ ѿ вра́тъ сме́ртныхъ , сла́вимъ тѧ є҆динᲂро́дныи .

ꙗ҆́кѡ ѿ́ гдⷭ҇а млⷭ҇ть , и҆ мно́го ѿ негѡ̀ и҆зба́вленїе , и҆ то́й и҆зба́витъ і҆и҃лѧ ,꙳ ѿ всѣ́хъ без̾зако́нїи є҆гѡ̀ . Честны́мъ твᲂи́мъ крⷭ҇то́мъ хрⷭ҇тѐ , дїа́вᲂла пᲂсрами́лъ є҆сѝ , и҆ вᲂскрⷭ҇нїемъ твᲂи́мъ жа́ло грѣхо́внᲂе притꙋпи́лъ є҆сѝ , и҆ спа́слъ є҆сѝ на́съ ѿ вра́тъ сме́ртныхъ , сла́вимъ тѧ є҆динᲂро́дныи .

хвали́те гдⷭ҇а всѝ ꙗ҆зы́цы ,꙳ пᲂхвали́те є҆гѡ̀ всѝ лю́дїе . Вᲂскрⷭ҇нїе даѧ̀ ро́дꙋ чл҃ческᲂмꙋ , ꙗ҆́кѡ ѻ҆вча̀ на закᲂле́нїе веде́сѧ . ᲂу҆страши́шасѧ сегѡ̀ кнѧ́зи а҆́дьстїи , и҆ взѧ́шасѧ врата̀ плаче́внаѧ . вни́де бо цр҃ь сла́вы хрⷭ҇то́съ , гл҃ѧ ю҆́жникѡмъ и҆зыди́те , сꙋ́щїи во тмѣ̀ ѿкры́йтесѧ .

ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ ,꙳ и҆ и҆́стина гдⷭ҇нѧ пребыва́етъ во́ вѣки . Ве́лїе чꙋ́до , неви́димыхъ сᲂдѣ́тель , за чл҃кᲂлю́бїе пло́тїю пᲂстрада́въ , и҆ вᲂскр҃се без̾сме́ртныи . прїиди́те ѻ҆те́чествїѧ ꙗ҆зы́къ , тᲂмꙋ̀ пᲂклᲂни́мсѧ [пᲂкло́н̾] . милᲂсе́рдїемъ бо є҆гѡ̀ ѿ́ лести и҆зба́вльшесѧ , въ трїе́хъ сᲂста́вѣхъ , є҆ди́наго бг҃а пѣ́ти навыко́хᲂмъ .

сла́ва , и҆ ны́нѣ , боⷢ҇ . Ра́дꙋйсѧ две́ри мы́сленнаѧ , є҆ю́же про́йде первᲂвѣ́чныи бг҃ъ . ра́дꙋйсѧ же́зле а҆арѡ́нᲂвъ , и҆з̾расти́вшаѧ цвѣ́тъ ѿ ко́рене і҆єссе́ѡва . ра́дꙋйсѧ трапе́зо , ꙗ҆́же хлѣ́бъ жи́зни на пи́щꙋ всемꙋ̀ пᲂда́вши ро́дꙋ чл҃ческᲂмꙋ , дв҃о мт҃и чи́стаѧ .

На стихо́внѣ , стⷯры , вᲂскрⷭ҇ны . гла́съ , є҃ . Тебѐ вᲂпло́щшагᲂсѧ сп҃са хрⷭ҇та̀ , и҆ ѿ небе́съ неразлꙋ́чьшасѧ , во́ гласѣхъ пѣ́нїѧ вᲂзвели́чимъ . ꙗ҆́кѡ крⷭ҇тъ и҆ сме́рть прїѧ́тъ за́ рᲂдъ на́шъ , ꙗ҆́кѡ чл҃кᲂлю́бецъ гдⷭ҇и , сᲂкрꙋши́выи а҆́дᲂва врата̀ , и҆ тридне́вно вᲂскрⷭ҇лъ є҆сѝ , спаса́ѧ дш҃а на́ша .

сти́хъ : приведꙋ́тсѧ цр҃ю дв҃ы во слѣ́дъ є҆ѧ̀ ,꙳ и҆ и҆́скренѧѧ є҆ѧ̀ приведꙋ́тсѧ тебѣ̀ . Пѣ́нїе ѿ недᲂсто́йныѧ дꙋшѝ , и҆ скве́рныхъ на́шихъ ᲂу҆сте́нъ , ꙗ҆́кѡ бл҃гᲂсе́рда прїимѝ бг҃ᲂрᲂди́тельнице , ꙗ҆́кᲂже в̾до́выѧ двѣ̀ лѣ́птѣ , бл҃гᲂда́рственѣ с̾ любо́вїю принᲂси́мᲂе , за ма́лаѧ вели́каѧ вᲂз̾даю́щи бл҃гᲂда́тїю си . и҆ ѿ всѧ́кᲂгѡ навѣ́та и҆ ѕло́бы и҆зба́ви , мл҃твеники свᲂѧ̀ влⷣчце . рѣша́щи затво́ры , напа́сти превᲂдѧ́щи и҆скꙋше́нїѧ , ꙗ҆́кѡ милᲂсе́рдаѧ ᲂу҆тишѝ сла́вными ти мл҃твами . и҆ ми́рᲂви да́рꙋющи ве́лїю млⷭ҇ть .

сти́хъ : лицꙋ̀ твᲂемꙋ̀ пᲂмо́лѧтсѧ ,꙳ бᲂга́тїи лю́дстїи . Прⷭ҇то́лъ херꙋви́мскїи вᲂи́стинꙋ , ꙗ҆́кѡ превы́шши тва́рей бы́вши . и҆с̾ тебе́ бо бжⷭ҇твенᲂе сло́во , на́шъ зра́къ назда́ти хᲂтѧ̀ , всели́сѧ в̾ тѧ̀ , и҆ прᲂше́дъ съ пло́тїю и҆с̾ тебѐ всечⷭ҇таѧ . крⷭ҇тнꙋю же стра́сть на́съ ра́ди вᲂспрїѧ́тъ , и҆ вᲂскрⷭ҇нїе ꙗ҆́кѡ бг҃ъ дарᲂва̀ , и҆змѣ́ньшемꙋсѧ на́шемꙋ ѡ҆сꙋжде́ннᲂмꙋ є҆стествꙋ̀ . тѣ́мъ ꙗ҆́кѡ сᲂдѣ́телю сн҃ꙋ твᲂемꙋ̀ мо́лимсѧ бг҃ᲂмт҃и , ᲂу҆лꙋчи́ти прᲂще́нїе и҆ млⷭ҇ть , в̾ ча́съ сꙋ́дныи .

сти́хъ : пᲂмѧнꙋ̀ и҆́мѧ твᲂѐ ,꙳ во всѧ́кᲂмъ ро́дѣ и҆ ро́дѣ . И҆мы́и ѡ҆бремене́нꙋ при́снѡ дꙋшѝ мᲂеѧ̀ вы́ю влⷣчце , ѿ мно́жества грѣхѡ́въ и҆ ᲂу҆́зъ лю́тыхъ , несмѣ́ю вᲂз̾зрѣ́ти на высᲂтꙋ̀ бж҃їю . тѣ́мже пᲂнича̀ на́ землю в̾зыва́ю ти пᲂми́лꙋй мѧ̀ , ꙗ҆́же бг҃а всемлⷭ҇тиваго вᲂз̾сїѧ́вши ѿ пречⷭ҇тыхъ лᲂже́снъ твᲂи́хъ . и҆ ны́нѣ пᲂкажѝ чꙋдеса̀ твᲂѧ̀ неи҆зрече́ннѡ , пречⷭ҇тѣи и҆ бжⷭ҇твенїи дла́ни свᲂѝ , къ сн҃ꙋ сѝ пречⷭ҇таѧ вᲂз̾дѣ́вши , пᲂсли́ ми мᲂлѧ́щꙋсѧ ве́лїю млⷭ҇ть .

сла́ва , и҆ нн҃ѣ , боⷢ҇ . Что̀ твᲂю̀ бг҃ᲂрᲂди́тельнице чⷭ҇таѧ , нарекꙋ̀ цр҃квь бг҃ᲂпрїѧ́тнꙋю ; вертᲂгра́дъ ли є҆де́мскїи нарекꙋ̀ , и҆ но́евъ сла́вныи кᲂвче́гъ прᲂрекꙋ̀ спа́сшїи , бг҃а цр҃ѧ держа́вꙋ всѣ́хъ , ст҃ы́и ꙗ҆зы́къ , хрⷭ҇та̀ на́шегѡ ѡ҆би́тель . мѡѷсе́ѡвꙋ же киво́тꙋ ᲂу҆пᲂдо́бисѧ , внꙋ́трь ѡ҆чище́нїе , и҆ же́злъ прᲂцвѣ́тшїи . внꙋ́трь свѣти́льницы , и҆ рꙋ́чка , кади́льница всезлата́ѧ , въ ню́же прибѣга́етъ всѧ́къ вѣ́рныи , и҆ и҆спрᲂша́етъ ве́лїю ми́лᲂсть .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , вᲂскрⷭ҇нъ . гла́съ , є҃ . Сᲂбез̾нача́льнᲂе сло́во ѻ҆ц҃ꙋ и҆ дх҃ᲂви , є҆́же ѿ дв҃ы ро́ждьшеесѧ на спасе́нїе на́ше , вᲂспᲂе́мъ вѣ́рнїи и҆ пᲂклᲂни́мсѧ= [пᲂкло́н̾] ,= ꙗ҆́кѡ бл҃гᲂи҆зво́ли пло́тїю взы́ти на́крⷭ҇тъ , и҆ сме́рть претерпѣ́ти , и҆ вᲂскреси́ти ᲂу҆ме́ршїѧ , в̾ сла́внᲂе вᲂскрⷭ҇нїе свᲂѐ . сла́ва , и҆ ны́нѣ , боⷢ҇ . Ра́дꙋисѧ две́ри гдⷭ҇нѧ непрᲂхᲂди́маѧ . ра́дꙋисѧ стѣно̀ и҆ пᲂкро́ве , прибѣга́ющимъ къ тебѣ̀ . ра́дꙋисѧ завѣ́тренее приста́нище неи҆скꙋсᲂбра́чнаѧ , ро́ждьшаѧ пло́тїю твᲂрца̀ свᲂегѡ̀ и҆ бг҃а , мᲂлѧ́щи непре́зри ѡ҆ вᲂспѣва́ющихъ , и҆ кла́нѧющихсѧ ржⷭ҇твꙋ̀ твᲂемꙋ̀ [пᲂкло́н̾] . та́же , є҆ктенїѧ̀ ма́лаѧ .= и҆ =ѿпꙋ́стъ .

На вели́цѣй вече́рни , каѳи́сма , бл҃же́нъ мꙋ́жъ , всѧ̀ . на гдⷭ҇и вᲂзва́хъ , пᲂста́вимъ стихо́въ , і҃ . и҆ пᲂе́мъ , стихѣ́ры вᲂскрⷭ҇ны . гла́съ , є҃ . =запѣ́въ : и҆зведѝ и҆з̾ темни́цы дш҃ꙋ мᲂю̀ ,꙳ и҆спᲂвѣ́датисѧ и҆́мени твᲂемꙋ̀ . Ч=естны́мъ твᲂи́мъ крⷭ҇то́мъ хрⷭ҇тѐ , дїа́вᲂла пᲂсрами́лъ є҆сѝ , и҆ вᲂскрⷭ҇нїемъ твᲂи́мъ жа́ло грѣхо́внᲂе притꙋпи́лъ є҆сѝ , и҆ спа́слъ є҆сѝ на́съ ѿ вра́тъ сме́ртныхъ , сла́вимъ тѧ є҆динᲂро́дныи .

менѐ ждꙋ́тъ пра́ведницы ,꙳ до́ндеже вᲂзда́си мнѣ̀ . Вᲂскрⷭ҇нїе даѧ̀ ро́дꙋ чл҃ческᲂмꙋ , ꙗ҆́кѡ ѻ҆вча̀ на закᲂле́нїе веде́сѧ . ᲂу҆страши́шасѧ сегѡ̀ кнѧ́зи а҆́дьстїи , и҆ взѧ́шасѧ врата̀ плаче́внаѧ . вни́де бо цр҃ь сла́вы хрⷭ҇то́съ , гл҃ѧ ю҆́жникѡмъ и҆зыди́те , сꙋ́щїи во тмѣ̀ ѿкры́йтесѧ .

и҆з̾ глꙋбины̀ вᲂзва́хъ к̾ тебѣ̀ гдⷭ҇и ,꙳ гдⷭ҇и ᲂу҆слы́ши гла́съ мо́й . Ве́лїе чꙋ́до , неви́димыхъ сᲂдѣ́тель , за чл҃кᲂлю́бїе пло́тїю пᲂстрада́въ , и҆ вᲂскр҃се без̾сме́ртныи . прїиди́те ѻ҆те́чествїѧ ꙗ҆зы́къ , тᲂмꙋ̀ пᲂклᲂни́мсѧ [пᲂкло́н̾] . милᲂсе́рдїемъ бо є҆гѡ̀ ѿ́ лести и҆зба́вльшесѧ , в̾ трїе́хъ сᲂста́вѣхъ , є҆ди́наго бг҃а пѣ́ти навыко́хᲂмъ .

бꙋ́дѣтѣ ᲂу҆́ши твᲂѝ ,꙳ вне́млющѣ гла́съ мл҃твы мᲂеѧ̀ . Вече́рнее пᲂклᲂнѧ́нїе прино́симъ ти , невече́рнемꙋ свѣ́тꙋ , и҆́же на кᲂне́цъ вѣко́мъ , ꙗ҆́кѡ въ зерца́лѣ , пло́тїю вᲂсїѧ́вшꙋ ми́рᲂви , и҆ да́же до а҆́да сᲂше́дшꙋ , и҆ та́мѡ сꙋ́щꙋю тмꙋ̀ разрꙋши́вшꙋ , и҆ свѣ́тъ вᲂскрⷭ҇нїѧ ꙗ҆зы́кѡмъ пᲂказа́вшꙋ , свѣтᲂда́вче гдⷭ҇и сла́ва тебѣ̀ .

а҆́ще без̾зако́нїѧ на́зриши гдⷭ҇и , гдⷭ҇и кто̀ пᲂстᲂи́тъ ,꙳ ꙗ҆́кѡ ѿ тебѐ ѡ҆чище́нїе є҆́сть . Нача́льника спасе́нїю на́шемꙋ хрⷭ҇та̀ славᲂсло́вимъ , тᲂмꙋ́ бо и҆з̾ ме́ртвыхъ вᲂскре́сшꙋ , ми́ръ ѿ́ лести спасе́сѧ . ра́дꙋетсѧ ли́къ а҆́нг҃льскїи , бѣ́гаетъ же бѣсо́вскаѧ ле́сть . а҆да́мъ пады́и вᲂста́етъ , и҆ дїа́вᲂлъ ᲂу҆праздни́сѧ .

и҆́мене ра́ди твᲂегѡ̀ пᲂтерпѣ́хъ тѧ̀ гдⷭ҇и , пᲂтерпѣ̀ дш҃а мᲂѧ̀ в̾ сло́во твᲂѐ ,꙳ ᲂу҆пᲂва̀ дш҃а мᲂѧ̀ на́ гдⷭ҇а . И҆́же ѿ кꙋстᲂді́ѧ , ᲂу҆чи́ми быва́хꙋ ѿбез̾зако́нникъ , пᲂкры́йте хрⷭ҇то́во вᲂскрⷭ҇нїе , и҆ прїими́те сре́бреники , и҆ рцы́те ꙗ҆́кѡ на́мъ спѧ́щимъ , ѿ́ грᲂба ᲂу҆кра́денъ бы́сть мертве́цъ . кто̀ ви́дѣ , и҆лѝ кто̀ слы́ша , мертвеца̀ ᲂу҆кра́дена кᲂгда̀ , па́че же пᲂма́зана и҆ на́га , ѡ҆ста́вльша во́грᲂбѣ пᲂгреба́льнаѧ ; нельсти́тесѧ і҆ꙋде́и , наꙋчи́тесѧ рече́нїемъ прᲂро́ческимъ , и҆ разꙋмѣ́йте ꙗ҆́кѡ вᲂскр҃се вᲂи́стинꙋ и҆зба́витель ми́рꙋ , и҆ всеси́ленъ .

ѿ стра́жи ᲂу҆́тренїѧ до́ нᲂщи , ѿ стра́жи ᲂу҆́тренїѧ ,꙳ да ᲂу҆пᲂва́етъ і҆и҃ль на́ гдⷭ҇а . Гдⷭ҇и и҆́же а҆́да плѣни́въ , и҆ сме́рть пᲂпра́въ сп҃се на́шъ , прᲂсвѣ́тивыи ми́ръ крⷭ҇то́мъ честны́мъ , пᲂми́лꙋй на́съ .

стихѣ́ры , ѡ҆ =слѣпо́мъ . сти́хъ : гла́съ , в҃ . ꙗ҆́кѡ ѿ́ гдⷭ҇а млⷭ҇ть , и҆ мно́го ѿ негѡ̀ и҆зба́вленїе , и҆ то́й и҆зба́витъ і҆и҃лѧ ,꙳ ѿ всѣ́хъ без̾зако́нїи є҆гѡ̀ . И҆́=же слѣпы́и рᲂди́всѧ , во свᲂе́мъ по́мыслѣ глаго́лаше , є҆да̀ а҆́зъ грѣ́хъ ра́ди рᲂди́тельныхъ рᲂди́хсѧ без̾ ѻ҆чїю̀ ; є҆да̀ а҆́зъ за невѣ́рїе ꙗ҆зы́къ рᲂди́хсѧ во ѡ҆бличе́нїе ; недᲂмышлѧ́юсѧ вᲂпраша́ти , кᲂгда̀ но́щь , кᲂгда̀ де́нь ; нетерпи́тѣми но́зѣ ка́меннагѡ претыка́нїѧ . неви́дѣхъ бо сл҃нца сїѧ́юща , ни ѻ҆́браза менѐ сᲂзда́вшагѡ . но мᲂлю́тисѧ хрⷭ҇тѐ бж҃е , при́зри на мѧ̀ и҆ пᲂми́лꙋй мѧ .

хвали́те гдⷭ҇а всѝ ꙗ҆зы́цы ,꙳ пᲂхвали́те є҆гѡ̀ всѝ лю́дїе . И҆́же слѣпы́и рᲂди́всѧ , во свᲂе́мъ по́мыслѣ глаго́лаше , є҆да̀ а҆́зъ грѣ́хъ ра́ди рᲂди́тельныхъ рᲂди́хсѧ без̾ ѻ҆чїю̀ ; є҆да̀ а҆́зъ за невѣ́рїе ꙗ҆зы́къ рᲂди́хсѧ во ѡ҆бличе́нїе ; недᲂмышлѧ́юсѧ вᲂпраша́ти , кᲂгда̀ но́щь , кᲂгда̀ де́нь ; нетерпи́тѣми но́зѣ ка́меннагѡ претыка́нїѧ . неви́дѣхъ бо сл҃нца сїѧ́юща , ни ѻ҆́браза менѐ сᲂзда́вшагѡ . но мᲂлю́тисѧ хрⷭ҇тѐ бж҃е , при́зри на мѧ̀ и҆ пᲂми́лꙋй мѧ .

ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ ,꙳ и҆ и҆́стина гдⷭ҇нѧ пребыва́етъ во́ вѣки . Ми́мѡ хᲂдѧ̀ і҆с҃ъ ѿ ст҃и́лища , ѡ҆брѣ́те чл҃ка слѣ́па ѿ рᲂжде́нїѧ , и҆ ᲂу҆милᲂсе́рдивсѧ пᲂлᲂжѝ бре́нїе на ѻ҆́чїю є҆гѡ̀ , и҆ речѐ к̾ немꙋ̀ , и҆дѝ ᲂу҆мы́исѧ в̾ силᲂа́мѣ , и҆ ᲂу҆мы́всѧ прᲂзрѣ̀ , сла́вꙋ вᲂз̾сыла́ѧ бг҃ꙋ . сᲂсѣ́ди же є҆гѡ̀ гл҃ахꙋ є҆мꙋ̀ , кто́ ти зѣ́ницы ѿве́рзе , є҆ю́же ни кто́же ѿ зрѧ́щихъ и҆сцѣли́ти вᲂз̾мо́жетъ ; ѻ҆́нъ же вᲂзᲂпи́въ речѐ , чл҃къ і҆с҃ъ гл҃емыи , ѻ҆́нъ ми речѐ , ᲂу҆мы́исѧ в̾ силᲂа́мѣ , и҆ прᲂзрѣ́хъ . то́й є҆́сть вᲂи́стинꙋ є҆го́же речѐ мѡѷсе́й в̾ зако́нѣ , хрⷭ҇та̀ месі́ю . то́й є҆́сть сп҃съ дш҃а́мъ на́шимъ . сла́ва . гла́съ , є҃ . Гдⷭ҇и ми́мо хᲂдѧ̀ дре́вле пꙋте́мъ , ѡ҆брѣ́те чл҃ка слѣ́па ѿ рᲂжде́нїѧ , и҆ ᲂу҆дивле́ни бы́вше ᲂу҆ченицы̀ , вᲂпрᲂша́хꙋ тѧ гл҃юще , ᲂу҆чи́телю кто̀ сᲂгрѣшѝ ; се́йли и҆лѝ рᲂди́телѧ є҆гѡ̀ , да слѣ́пъ рᲂди́сѧ ; ты́же сп҃се мо́й вᲂпїѧ́ше к̾ ни́мъ , ни се́й сᲂгрѣшѝ , ни рᲂди́телѧ є҆гѡ̀ , но да ꙗ҆вѧ́тсѧ дѣ́ла бж҃їѧ на не́мъ , мнѣ́ бо пᲂдᲂба́етъ дѣ́лати дѣ́ла пᲂсла́вшагѡ мѧ , ꙗ҆́же никто́же мо́жетъ дѣ́лати ; и҆ сїѧ̀ ре́къ , плю́нꙋвъ до́лꙋ , и҆ бре́нїе сᲂтво́рь , пᲂма́за ѻ҆́чи є҆мꙋ̀ , ре́къ к̾ немꙋ̀ , и҆дѝ ᲂу҆мы́исѧ в̾ силᲂа́мстѣй кꙋпѣ́ли . ѻ҆́нъ же ᲂу҆мы́всѧ здра́въ бы́сть , и҆ вᲂпїѧ́ше к̾ тебѣ̀ , вѣ́рꙋю гдⷭ҇и и҆ пᲂклᲂнѧ́ютисѧ . тѣ́мже вᲂпїе́мъ и҆ мы̀ пᲂми́лꙋй на́съ . и҆ ны́нѣ , боⷢ҇ . гла́съ , то́йже . Во чермнѣ́мъ мо́ри , бракᲂнеи҆скꙋ́сныѧ невѣ́сты ѻ҆́бразъ написа́сѧ дре́вле . та́мѡ мѡѷсе́й раздѣли́тель вᲂдѣ̀ , здѣ́же гаврїи́лъ слꙋжи́тель чꙋдесѝ . тᲂгда̀ глꙋбинꙋ̀ немо́креннѡ ше́ствᲂвавъ і҆и҃ль , ны́нѣ же хрⷭ҇та̀ рᲂдѝ без̾ сѣ́мене дв҃аѧ . мо́ре по прᲂше́ствїи і҆и҃левѣ , пребы́сть непрᲂхᲂди́мѡ . непᲂро́чнаѧ же по ржⷭ҇твѣ̀ є҆мманꙋ́илевѣ , пребы́сть нетлѣ́нна . сы́и пре́жде сы́и , ꙗ҆вле́исѧ ꙗ҆́кѡ чл҃къ , бж҃е пᲂми́лꙋй на́съ . та́же , вы́хᲂдъ : свѣ́тѣ ти́хїи . прᲂки́менъ , дню̀ .

На литі́и , стихѣ́ра хра́мꙋ . та́же , стихѣ́ры бцⷣы , твᲂре́нїе , па́вла а҆мᲂре́йскаго . гла́съ , є҃ . Прⷭ҇то́лъ херꙋви́мскїи вᲂи́стинꙋ , ꙗ҆́ко превы́шши тва́рей бы́вши . и҆з̾ тебе́ бо бжⷭ҇твенᲂе сло́во , на́шъ зра́къ назда́ти хᲂтѧ̀ , всели́сѧ в̾ тѧ̀ , и҆ прᲂше́дъ с̾ пло́тїю и҆з̾ тебѐ всечⷭ҇таѧ . крⷭ҇тнꙋю же стра́сть на́съ ра́ди вᲂспрїѧ́тъ , и҆ вᲂскрⷭ҇нїе ꙗ҆́кѡ бг҃ъ дарᲂва̀ , и҆змѣ́ньшемꙋсѧ на́шемꙋ ѡ҆сꙋжде́ннᲂмꙋ є҆стествꙋ̀ . тѣ́мъ ꙗ҆́кѡ сᲂдѣ́телю сн҃ꙋ твᲂемꙋ̀ мо́лимсѧ бг҃ᲂмт҃и , ᲂу҆лꙋчи́ти прᲂще́нїе и҆ млⷭ҇ть , в̾ ча́съ сꙋ́дныи . Что̀ твᲂю̀ бг҃ᲂрᲂди́тельнице чⷭ҇таѧ , нарекꙋ̀ цр҃квь бг҃ᲂсла́внꙋю ; вертᲂгра́дъ ли є҆де́мскїи и҆менꙋ́ю , и҆ но́евъ чи́стаѧ кᲂвче́гъ прᲂрекꙋ̀ спа́сшїи ; бг҃ꙋ цр҃ьскᲂе сщ҃е́нїе , ве́сь ст҃ъ ꙗ҆зы́къ , хрⷭ҇та̀ на́шегѡ сᲂбо́ръ ; мѡѷсе́ѡвꙋ же кивѡ́тꙋ ᲂу҆пᲂдᲂблѧ́ю тѧ , в̾ не́мже ѡ҆чисти́лище , и҆ же́злъ прᲂзѧ́бшїи . в̾ не́мже свѣ́щникъ , и҆ рꙋ́чка , кади́льницꙋ всезлатꙋ́ю , въ ню́же прибѣга́етъ всѧ́къ вѣ́рныи , и҆ и҆спрᲂша́етъ ве́лїю ми́лᲂсть . Є҆ди́на без̾наде́жнымъ наде́жа , без̾по́мᲂщнымъ гᲂто́ваѧ по́мᲂще , млⷭ҇ти ро́ждьши вᲂли́телѧ і҆с҃а , мᲂю̀ пᲂми́лꙋй ны́нѣ не́мᲂщь чⷭ҇таѧ , и҆ пᲂда́ждь ми пᲂмысло́мъ ᲂу҆миле́нїе , стрꙋѧ́ми сле́зъ , самы́хъ сᲂгрѣше́нїи мᲂи́хъ непᲂбѣди́мꙋю пᲂтᲂпѝ пꙋчи́нꙋ . ѿженѝ без̾мѣ́рныхъ мᲂи́хъ страсте́й бꙋ́рю , и҆ и҆спо́лни ти́шины бжⷭ҇твеныѧ , смꙋще́нᲂе срⷣце мᲂѐ , хрⷭ҇та̀ мᲂлѧ́щи , пᲂда́ти ми сᲂгрѣше́нїемъ сверше́нᲂе ѡ҆ставле́нїе . сла́ва . гла́съ , д҃ . Всѐ житїѐ слѣпы́и но́щь пᲂмышлѧ́ѧ , вᲂзᲂпѝ к̾ тебѣ̀ , гдⷭ҇и ѿве́рзи ми зѣ́ницы сн҃е дв҃дᲂвъ сп҃се на́шъ , да со всѣ́ми и҆ а҆́зъ вᲂспᲂю̀ твᲂю̀ си́лꙋ . и҆ ны́нѣ , боⷢ҇ . Пᲂда́ждь ᲂу҆тѣше́нїе , свᲂи́мъ рабо́мъ всенепᲂро́чнаѧ , ᲂу҆тᲂлѧ́ющи лю́таѧ на ны̀ ѡ҆бстᲂѧ́нїѧ , всѧ́кїѧ ско́рби на́съ и҆з̾мѣнѧ́ющи . тѧ́ бо є҆ди́нꙋ тве́рдо и҆ и҆звѣ́стнѡ ѡ҆снᲂва́нїе и҆́мамы , и҆ твᲂѐ застꙋпле́нїе стѧжа́хᲂмъ , да непᲂстыди́мсѧ влⷣчце , тебѐ призыва́юще . пᲂтщи́сѧ на мл҃твꙋ тебѣ̀ вᲂпїю́щихъ , ра́дꙋисѧ влⷣчце всѣ́мъ пᲂмо́щнице , ра́дᲂсте и҆ пᲂкро́ве дш҃а́мъ на́шимъ .

На стихо́внѣ , стⷯры , вᲂскрⷭ҇ны . гла́съ , є҃ . Тебѐ вᲂпло́щшагᲂсѧ сп҃са хрⷭ҇та̀ , и҆ ѿ небе́съ неразлꙋ́чьшасѧ , во́ гласѣхъ пѣ́нїѧ вᲂзвели́чимъ . ꙗ҆́кѡ крⷭ҇тъ и҆ сме́рть прїѧ́тъ за́ рᲂдъ на́шъ , ꙗ҆́кѡ чл҃кᲂлю́бецъ гдⷭ҇и , сᲂкрꙋши́выи а҆́дᲂва врата̀ , и҆ тридне́вно вᲂскрⷭ҇лъ є҆сѝ , спаса́ѧ дш҃а на́ша .

сти́хъ : гдⷭ҇ь вᲂцр҃и́сѧ ,꙳ в̾ лѣ́пᲂтꙋсѧ ѡ҆блечѐ . Прᲂбᲂде́нымъ ти ре́брᲂмъ живᲂда́вче , ка́пли ѡ҆ставле́нїѧ всѣ́мъ и҆стᲂчи́лъ є҆сѝ , жи́знь и҆ спасе́нїе . пло́тїю же сме́рть вᲂспрїѧ́тъ , без̾сме́ртїе на́мъ дарᲂва̀ . в̾сели́вжесѧ во́ грᲂбъ , на́съ свᲂбᲂди́лъ є҆сѝ , сᲂвᲂскр҃си́въ с̾ сᲂбо́ю сла́внѡ ꙗ҆́кѡ бг҃ъ . сегѡ̀ ра́ди вᲂпїе́мъ ти , чл҃кᲂлю́бче гдⷭ҇и сла́ва тебѣ̀ .

сти́хъ : и҆́бо ᲂу҆твердѝ вселе́ннꙋю ,꙳ ꙗ҆́же непᲂдви́житсѧ . Стра́нно твᲂѐ распѧ́тїе є҆́сть , и҆ є҆́же во а҆́дъ сше́ствїе чл҃кᲂлю́бче . плѣни́въ бо є҆гѡ̀ , и҆ дре́внїѧ ю҆́жники сᲂвᲂскр҃си́лъ є҆сѝ с̾ сᲂбо́ю сла́внѡ ꙗ҆́кѡ бг҃ъ . ра́й ѿве́рзъ , наслади́тисѧ тᲂгѡ̀ спᲂдо́билъ є҆сѝ . тѣ́мже и҆ на́мъ сла́вѧщимъ тридне́внᲂе твᲂѐ вᲂста́нїе , да́рꙋй ѡ҆чище́нїе грѣхѡ́въ , раѧ̀ жи́телѧ спᲂдᲂблѧ́ѧ , ꙗ҆́кѡ є҆ди́нъ млрⷭ҇дъ .

сти́хъ : до́мꙋ твᲂемꙋ̀ пᲂдᲂба́етъ ,꙳ ст҃ы́ни гдⷭ҇и в̾ дᲂлгᲂтꙋ̀ дні́й . И҆́же на́съ ра́ди пло́тїю стрⷭ҇ть прїе́мъ , и҆ тридне́вно и҆з̾ ме́ртвыхъ вᲂскр҃съ , плᲂтьскі́ѧ на́ша стра́сти и҆сцѣлѝ , и҆ вᲂста́ви ѿ сᲂгрѣше́нїи лю́тыхъ чл҃кᲂлю́бче , и҆ спасѝ на́съ .

сла́ва . гла́съ , и҃ . Пра́вдѣ сл҃нце мы́сленнᲂе хрⷭ҇тѐ бж҃е , и҆́же и҆з̾ ᲂу҆тро́бы свѣ́та лише́ннагѡ , твᲂи́мъ пречи́стымъ прикᲂснᲂве́нїемъ прᲂсвѣти́выи ѡ҆бᲂю́дꙋ , и҆ на́ши ѻ҆́чи дш҃е́вныѧ ѡ҆зари́въ , сы́ны дню̀ пᲂкажѝ , да вѣ́рᲂю вᲂпїе́мъ ти . мно́гᲂе твᲂѐ и҆ неи҆зрече́ннᲂе , є҆́же на на́съ бл҃гᲂꙋтро́бїе , чл҃кᲂлю́бче сла́ва тебѣ̀ .

и҆ ны́нѣ , боⷢ҇ . Без̾невѣ́стнаѧ дв҃о , ꙗ҆́же бг҃а без̾ сѣ́мени заче́ньши пло́тїю , мт҃и бг҃а вы́шнѧгѡ , твᲂи́хъ ра́бъ мᲂльбы̀ прїимѝ всенепᲂро́чнаѧ , всѣ́мъ пᲂдаю́щи ѡ҆чище́нїе прегрѣше́нїемъ . ны́нѣ на́ша мᲂле́нїѧ прїе́мши , мᲂлѝ спасти́сѧ всѣ́мъ на́мъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь : бцⷣе дв҃о ра́дꙋисѧ , гⷤ . и҆ про́чее .

Въ нлⷣю , ѕ҃ ю , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь , вᲂскрⷭ҇нъ . гла́съ , є҃ . Сᲂбез̾нача́льнᲂе сло́во ѻ҆ц҃ꙋ и҆ дх҃ᲂви , є҆́же ѿ дв҃ы ро́ждьшеесѧ на спасе́нїе на́ше , вᲂспᲂе́мъ вѣ́рнїи и҆ пᲂклᲂни́мсѧ= [пᲂкло́н̾] ,= ꙗ҆́кѡ бл҃гᲂи҆зво́ли пло́тїю взы́ти на́ крⷭ҇тъ , и҆ сме́рть претерпѣ́ти , и҆ вᲂскр҃си́ти ᲂу҆ме́ршїѧ , в̾ сла́внᲂе вᲂскрⷭ҇нїе свᲂѐ . два́жды . сла́ва , и҆ ны́нѣ , боⷢ҇ . Ра́дꙋисѧ две́ри гдⷭ҇нѧ непрᲂхᲂди́маѧ . ра́дꙋисѧ стѣно̀ и҆ пᲂкро́ве , прибѣга́ющимъ к̾ тебѣ̀ . ра́дꙋисѧ завѣ́тренее приста́нище неи҆скꙋсᲂбра́чнаѧ , ро́ждьшаѧ пло́тїю твᲂрца̀ свᲂегѡ̀ и҆ бг҃а , мᲂлѧ́щи непре́зри ѡ҆ вᲂспѣва́ющихъ , и҆ кла́нѧющихсѧ ржⷭ҇твꙋ̀ твᲂемꙋ̀ [пᲂкло́н̾] .

По а҃ , стихᲂло́гїи , сѣда́ленъ , вᲂскрⷭ҇нъ . гла́съ , є҃ . Крⷭ҇тъ гдⷭ҇нь да пᲂхва́лимъ . пᲂгребе́нїе ст҃о́е пѣ́сньми пᲂчте́мъ , и҆ вᲂскрⷭ҇нїе є҆гѡ̀ прᲂсла́вимъ , ꙗ҆́кѡ сᲂвᲂздви́же ме́ртвыѧ ѿ гро́бъ ꙗ҆́кѡ бг҃ъ , плѣни́въ сме́рти держа́вꙋ , и҆ крѣ́пᲂсть дїа́вᲂлю . и҆ сꙋ́щимъ во а҆́дѣ свѣ́тъ вᲂсїѧ̀ . сти́хъ : вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ , незабꙋ́ди ни́щихъ свᲂи́хъ до кᲂнца̀ . и҆ =па́ки , то́йже , сѣда́ленъ . =сла́ва , и҆ ны́нѣ , боⷢ҇ . Ра́дꙋисѧ ст҃а́ѧ гᲂро̀ и҆ бг҃ᲂпрᲂхо́днаѧ . ра́дꙋисѧ ѡ҆дш҃евле́наѧ кꙋпино̀ и҆ не ѡ҆пали́маѧ . ра́дꙋисѧ ꙗ҆́же є҆ди́на к̾ бг҃ꙋ ми́рᲂви мо́стъ , превᲂдѧ́щи ме́ртвыѧ къ вѣ́чнᲂмꙋ живᲂтꙋ̀ . ра́дꙋисѧ нетлѣ́ннаѧ ѻ҆трᲂкᲂви́це , неи҆скꙋсᲂмꙋ́жно ро́ждьшаѧ спасе́нїе дш҃а́мъ на́шимъ .

По в҃ , стихᲂло́гїи , сѣда́ленъ . гла́съ , є҃ . Гдⷭ҇и ме́ртвъ нарече́сѧ , ᲂу҆мерщвле́и сме́рть . во́грᲂбѣ пᲂлᲂжи́всѧ , и҆спражне́и гро́бы . верхꙋ̀ во́ини гро́бъ стрежа́хꙋ , ни́зꙋ ꙗ҆́же ѿ́ вѣка ме́ртвыѧ вᲂскреси́лъ є҆сѝ , всеси́льне и҆ непᲂстижи́ме гдⷭ҇и сла́ва тебѣ̀ . сти́хъ : и҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ , пᲂвѣ́мъ всѧ̀ чꙋдеса̀ твᲂѧ̀ . и҆ =па́ки , то́йже , сѣда́ленъ . =сла́ва , и҆ ны́нѣ , боⷢ҇ . Стра́ннѡ дв҃ыѧ та́инство , ми́рᲂви же ꙗ҆ви́сѧ спаси́тельнѡ . и҆з̾неѧ́ бо рᲂди́сѧ без̾ сѣ́мене , и҆ пло́тїю ꙗ҆ви́сѧ без̾ и҆стлѣ́нїѧ , всѣ́мъ ра́дᲂсте гдⷭ҇и сла́ва тебѣ̀ .

По непᲂро́чнахъ , трᲂпарѝ , а҆́нг҃льскїи сᲂбо́ръ . и҆пако́й . А҆́нг҃льскимъ зра́кᲂмъ ᲂу҆́мъ смꙋща́юще , и҆ бжⷭ҇твенымъ вᲂста́нїемъ дш҃а прᲂсвѣща́юще . мѷрѡно́сицы а҆пⷭ҇лѡмъ бл҃гᲂвѣствᲂва́хꙋ , вᲂз̾вѣсти́те во ꙗ҆зы́цѣхъ вᲂскрⷭ҇нїе гдⷭ҇а , с̾пᲂспѣшествꙋ́юща чꙋдесы̀ , пᲂдаю́щаго на́мъ ве́лїю млⷭ҇ть .

степе́нны . гла́съ , є҃ . а҆нтифо́нъ , а҃ . пᲂе́мъ по вⷤ . Внегда̀ скᲂрбѣ́ти ми , дв҃дски пᲂю́ ти сп҃се мо́й , и҆зба́ви дш҃ꙋ мᲂю̀ ѿ ꙗ҆зы́ка льсти́ва . Пꙋсты́ннымъ живо́тъ бл҃же́нъ є҆́сть , бж҃їимъ жела́нїемъ вᲂз̾выша́ющимсѧ . Ст҃ы́мъ дх҃ᲂмъ ѡ҆держа́тсѧ всѧ̀ , ви́димаѧ же с̾ неви́димыми , самᲂдержа́венъ бо сы́и , ѿ трⷪ҇цы є҆ди́нъ є҆́сть нело́женъ .

а҆нтифо́нъ , в҃ . На́ гᲂры дш҃е вᲂз̾дви́гнемсѧ , грѧдѝ та́мѡ , ѿ ню́дꙋ же по́мᲂщь прїи́детъ . Десна́ѧ ти рꙋка̀ , и҆ мнѣ̀ хрⷭ҇тѐ прᲂстира́ема , ѿ пре́лести всѧ́кїѧ да сᲂхрани́тъ . Ст҃о́мꙋ дх҃ꙋ , бг҃ᲂсло́вѧще рце́мъ , ты̀ є҆сѝ бг҃ъ , живо́тъ , жела́нїе , свѣ́тъ , ᲂу҆́мъ , ты̀ бл҃гᲂсты́ни , ты̀ црⷭ҇твꙋеши во́ вѣки .

а҆нтифо́нъ , г҃ . Ѡ҆ре́кшихъ мнѣ̀ , во двᲂры̀ вни́демъ гдⷭ҇ни , ра́дᲂсти мно́гїѧ и҆спо́лненъ бы́сть , мл҃твы вᲂз̾сыла́ю . Въ дᲂмꙋ̀ дв҃дᲂвѣ , стра́шнаѧ сᲂверша́ютсѧ , ѻ҆́гнь бо та́мѡ палѧ̀ , всѧ́къ сра́менъ ᲂу҆́мъ . Ст҃о́мꙋ дх҃ꙋ , живᲂнача́льнᲂе дᲂсто́инство , ѿ него́же всѧ́ко живо́тно ѡ҆дш҃евлѧ́етсѧ , ꙗ҆́кᲂже ѡ҆ ѻ҆ц҃ѣ , кꙋ́пнѡ же и҆ ѡ҆ сло́вѣ .

прᲂки́менъ , ѱл҃о́мъ дв҃дᲂвъ . вᲂскрⷭ҇нѝ гдⷭ҇и бж҃е мо́й , да вᲂз̾несе́тсѧ рꙋка̀ твᲂѧ̀ , ꙗ҆́кѡ ты̀ црⷭ҇твꙋеши во́ вѣки . сти́хъ : и҆спᲂвѣ́мсѧ тебѣ̀ гдⷭ҇и бж҃е мо́й всѣ́мъ срⷣцемъ мᲂи́мъ , пᲂвѣ́мъ всѧ̀ чꙋдеса̀ твᲂѧ̀ . всѧ́ко дыха́нїе . є҆ѵⷢ҇а́лїе , ѿ =і҆ѡа́нна . зача́ло , ѯ҃д . =та́же , Вᲂскрⷭ҇нїе хрⷭ҇то́во , гⷤ . ѱл҃о́мъ , н҃ . сла́ва . мл҃твъ ра́ди а҆пⷭ҇лъ , млⷭ҇тиве ѡ҆чи́сти мно́жество сᲂгрѣше́нїи на́шихъ .

и҆ ны́нѣ . мᲂли́твъ ра́ди бцⷣы , млⷭ҇тиве ѡ҆чи́сти мно́жество сᲂгрѣше́нїи на́шихъ .

Пᲂми́лꙋй мѧ бж҃е , по вели́цѣй млⷭ҇ти твᲂе́й , по мно́гимъ щедро́тамъ твᲂи́мъ , ѡ҆чи́сти без̾ зако́нїѧ мᲂѧ̀ , бж҃е сп҃се мо́й .

стихѣ́ра , вᲂскрⷭ҇на . гла́съ , ѕ҃ . Вᲂскр҃съ і҆с҃ъ ѿ́ грᲂба , ꙗ҆́кᲂже прᲂречѐ . и҆ дарᲂва̀ на́мъ живо́тъ вѣ́чныи , ми́ръ и҆ ве́лїю ми́лᲂсть . і҆єре́й , гл҃етъ : спасѝ бж҃е лю́ди . пᲂе́м̾ : гдⷭ҇и пᲂми́лꙋй , ві҃ . і҆єре́й , вᲂз̾гла́с̾ : млⷭ҇тїю и҆ щедро́тами и҆ чл҃кᲂлю́бїемъ .

кано́нъ , па́сцѣ , с̾ бг҃ᲂро́дичнами , на́ и҃ . пи́санъ , в̾ нлⷣю мѷрѡно́сицъ . и҆ ѡ҆ слѣпо́мъ , на́ ѕ҃ .

кано́нъ , гла́съ , є҃ . пѣ́снь , а҃ . і҆рмо́съ . Зе́млю наню́же невᲂсїѧ̀ , ни ви́дѣ сл҃нце ни кᲂгда́же . бе́зднꙋ ю҆́же неви́дѣ на́гꙋ ширᲂта̀ нбⷭ҇наѧ , і҆и҃ль прᲂйдѐ невла́жно гдⷭ҇и , и҆ в̾ведѐ и҆̀ в̾ го́рꙋ ст҃ы́ни твᲂеѧ̀ , хва́лѧща и҆ пᲂю́ща пᲂбѣ́днꙋю пѣ́снь . запѣ́въ : Сла́ва тебѣ̀ бж҃е на́шъ , сла́ва тебѣ̀ . Распѧ́тїе во́льнᲂе прїе́мъ сп҃се пло́тїю , и҆стᲂчи́лъ є҆сѝ бл҃гᲂслᲂве́нїе и҆ жи́знь ми́рꙋ влⷣко , є҆ди́не пребл҃гᲂслᲂве́нне всѣ́хъ сᲂдѣ́телю . тѣ́мже бл҃гᲂслᲂви́мъ тѧ̀ , пᲂе́мъ и҆ сла́вимъ , пᲂю́ще и҆ вᲂспѣва́юще пᲂбѣ́днꙋю пѣ́снь . Вро́вѣ тѧ̀ преиспо́днѣмъ ме́ртва бы́вша хрⷭ҇тѐ , пᲂлᲂжѝ бл҃гᲂѡ҆бра́зныи і҆ѡ́сифъ , и҆ привалѝ к̾ две́ремъ гро́ба ка́мень . но вᲂста́лъ є҆сѝ дᲂлгᲂтерпѣли́ве во сла́вѣ , и҆ ми́ра сᲂвᲂста́вилъ є҆сѝ пᲂю́ща и҆ вᲂспѣва́юща пᲂбѣ́днꙋю пѣ́снь . Ми́ро что̀ принесо́сте со слеза́ми вы̀ , гл҃аше честны́мъ жена́мъ а҆́нг҃лъ ꙗ҆вле́исѧ , хрⷭ҇то́съ вᲂста̀ . те́кше рцы́те бг҃ᲂви́дцемъ ᲂу҆ченико́мъ , пла́чꙋщимъ и҆ рыда́ющимъ , ꙗ҆́кѡ да взыгра́ютъ и҆ ликᲂствꙋ́ютъ вѣ́рнѡ . Чꙋдеса̀ пресла́внаѧ сᲂтвᲂрѧ́ѧ и҆зба́витель , и҆сцѣлѝ слѣ́па ѿ рᲂжде́нїѧ , бре́нїемъ пᲂма́завъ , и҆ речѐ и҆дѝ ᲂу҆мы́исѧ в̾ силᲂа́мѣ , ꙗ҆́кѡ да пᲂзна́еши мѧ бг҃а по землѝ ше́ствꙋюща , в̾ пло́ть ѡ҆бо́лкшасѧ , за милᲂсе́рдїе щедро́тъ . сла́ва . Є҆ди́но трисᲂста́вно сꙋщество̀ пᲂчита́емъ вѣ́рнїи , прᲂславлѧ́емъ ѻ҆ц҃а и҆ сн҃а , и҆ дх҃а пра́ваго , твᲂрца̀ и҆ гдⷭ҇а , и҆ и҆зба́вителѧ всѣ́хъ , є҆ди́наго несᲂзда́нна бг҃а , со беспло́тными зᲂвꙋ́ще . ст҃ъ , ст҃ъ , ст҃ъ є҆сѝ цр҃ю . и҆ ны́нѣ . Во ᲂу҆тро́бꙋ неи҆скꙋсᲂбра́чнꙋю твᲂю̀ , всели́сѧ чи́стаѧ гдⷭ҇ь за милᲂсе́рдїе щедро́тъ , спастѝ хᲂтѧ̀ чл҃ка , и҆стлѣ́вшаго кᲂзньмѝ вра́жїими . тᲂго̀ ᲂу҆́бѡ мᲂлѝ ста́до сїѐ спастѝ , ѿ всѧ́кᲂгѡ плѣне́нїѧ , и҆ ꙗ҆зы́къ наше́ствїѧ .

катава́сїѧ : Спаси́телю бг҃ꙋ , въ мо́ри лю́ди немо́крыми стᲂпа́ми наста́вльшꙋ , и҆ фараѡ́на съ вѡ́и пᲂто́пльшꙋ , тᲂмꙋ̀ є҆ди́нᲂмꙋ вᲂспᲂе́мъ , ꙗ҆́кѡ прᲂсла́висѧ .

пѣ́снь , г҃ . і҆рмо́съ . Кᲂле́блемᲂе срⷣце мᲂѐ гдⷭ҇и вᲂлна́ми жите́йскими , ᲂу҆твердѝ в̾ приста́нище ти́хᲂе наставлѧ́ѧ ꙗ҆́кѡ бг҃ъ . Кᲂле́блющихсѧ срⷣца̀ ᲂу҆тверди́лъ є҆сѝ , зе́млю всю̀ пᲂкᲂлѣба́въ дᲂлгᲂтерпѣли́ве , чⷭ҇тны́мъ распѧ́тїемъ сѝ , є҆́же претерпѣ́лъ є҆сѝ пло́тїю . Въ но́вѣ гро́бѣ тебѐ пᲂлᲂжѝ ще́дре , і҆ѡ́сифъ бл҃гᲂѡ҆бра́зныи . вᲂскр҃съ же и҆з̾ ме́ртвыхъ тридне́венъ , ѡ҆бнᲂви́лъ є҆сѝ на́съ . Что̀ ꙗ҆́кѡ ме́ртва и҆́щете гдⷭ҇а , вᲂскр҃се ꙗ҆́кѡ же речѐ а҆́нг҃лъ жена́мъ вѣща́ше , блиста́ѧисѧ бжⷭ҇твенымъ зра́кᲂмъ . Слѣ́па и҆нᲂгда̀ ѿ рᲂжде́нїѧ прише́дша к̾ тебѣ̀ , и҆сцѣлѝ всеще́дре , сла́вѧща смᲂтре́нїе твᲂѐ и҆ чꙋдеса̀ . сла́ва . Бг҃ꙋ ѻ҆ц҃ꙋ пᲂклᲂнѧ́емсѧ пребез̾нача́льнꙋ , и҆ сн҃ꙋ и҆ бжⷭ҇твенᲂмꙋ дх҃ꙋ , сᲂбез̾нача́льнꙋ є҆стествꙋ̀ , трисᲂста́внꙋ є҆ди́нᲂмꙋ бг҃ꙋ всѣ́хъ . и҆ ны́нѣ , боⷢ҇ . И҆́з̾ чрева дв҃ческа , рᲂдила̀ є҆сѝ бг҃а вᲂплᲂще́нна , є҆мꙋ́же мᲂли́сѧ всест҃а́ѧ влⷣчце , ᲂу҆ще́дрити на́съ .

катава́сїѧ : Си́лᲂю крⷭ҇та̀ твᲂегѡ̀ хрⷭ҇тѐ , ᲂу҆твердѝ мᲂѐ пᲂмышле́нїе , ꙗ҆́кѡ пѣ́ти и҆ сла́вити , сп҃си́тельнᲂе твᲂѐ вᲂзнесе́нїе .

кᲂнда́къ , и҆ и҆́кᲂсъ , па́сцѣ . та́же , сѣда́ленъ . гла́съ , и҃ . И҆́же всѣ́хъ влⷣка и҆ твᲂре́цъ прехᲂдѧ̀ , ѡ҆брѣ́те на пꙋтѝ слѣ́па сѣдѧ́ща , пла́чꙋща и҆ гл҃юща , неви́дѣхъ в̾ житїѝ сл҃нца сїѧ́юща , нижѐ лꙋны̀ свѣ́тлᲂсть ѡ҆зарѧ́ющꙋю , тѣ́мже вᲂпїю́ ти , рᲂжде́исѧ ѿ дв҃ы , и҆ прᲂсвѣще́и всѧ́ческаѧ , прᲂсвѣти́мѧ ꙗ҆́кѡ бл҃гᲂꙋтро́бенъ , да зᲂвꙋ̀ припа́даѧ ти влⷣко хрⷭ҇тѐ бж҃е , грѣхо́въ ѡ҆ставле́нїе да́рꙋй на́мъ , мно́жества ра́ди млⷭ҇ти чл҃кᲂлю́бче . сла́ва , и҆ ны́нѣ , то́йже .

пѣ́снь , д҃ . і҆рмо́съ . Оу҆слы́шахъ гдⷭ҇и слꙋ́хъ тво́й , и҆ ᲂу҆бᲂѧ́хсѧ , разꙋмѣ́хъ смᲂтре́нїе твᲂѐ , и҆ прᲂсла́вихъ тѧ чл҃кᲂлю́бче . Оу҆ме́рша мѧ дре́вᲂмъ , прᲂсте́рсѧ на́ древѣ жи́знь всѣ́хъ , ѡ҆живи́лъ є҆сѝ за вели́кꙋю млⷭ҇ть , сегѡ̀ ра́ди сло́ве сла́влю тѧ . Оу҆ченико́мъ гдⷭ҇и сᲂвᲂдвᲂрѧ́ѧсѧ пресла́внѡ , си́мъ гл҃аше , и҆ди́те прᲂпᲂвѣ́дите всю́дꙋ мᲂѐ вᲂскрⷭ҇нїе . Оу҆вѣрѧ́ѧ влⷣко лю́бѧщимъ тѧ , вᲂста́нїе свᲂѐ є҆́же и҆́з̾ грᲂба , во́ дни мно́ги сᲂвᲂкꙋплѧ́ѧсѧ с̾ ни́ми , ра́дᲂсть твᲂрѧ̀ и҆́мъ . Во ѻ҆чи́въ гдⷭ҇и слѣ́па , и҆з̾лᲂже́снъ рᲂже́на , ре́къ и҆дѝ и҆ ᲂу҆мы́йсѧ и҆ прᲂзрѝ , мᲂѐ сла́вѧ бжⷭ҇тво̀ . сла́ва . Є҆динᲂчⷭ҇тна́ѧ без̾нача́льнаѧ трⷪ҇це , нераздѣ́льна сꙋщество́мъ , раздѣ́льна же сᲂста́вми , спасѝ всѧ̀ и҆́же вѣ́рнѡ тѧ прⷭ҇нѡ сла́вѧщихъ . и҆ ны́нѣ , боⷢ҇ . Ржⷭ҇тво́ ти чи́стаѧ и҆́же па́че є҆стества̀ , славᲂсло́вимъ , блажа́ще вѣ́рнѡ тебѐ пренепᲂро́чнаѧ , ꙗ҆́кѡ бг҃а всѣ́хъ рᲂди́тельницꙋ .

катава́сїѧ : Оу҆слы́шахъ слꙋ́хъ си́лы крⷭ҇та̀ , ꙗ҆́кѡ ра́й ѿве́рзесѧ и҆́мъ , и҆ вᲂзᲂпи́хъ , сла́ва си́лѣ твᲂе́й гдⷭ҇и .

пѣ́снь , є҃ . і҆рмо́съ . Ѡ҆каѧ́ннꙋю дш҃ꙋ мᲂю̀ , бᲂри́мꙋю тмо́ю страсте́й , пред̾вари́въ ᲂу҆ще́дри . и҆ вᲂз̾сїѧ́й мы́сленнᲂе сл҃нце , днѐ свѣтѧ́щїѧ лꙋчѝ во мнѣ̀ , да ѡ҆зари́тъ мѧ в̾ но́щи свѣ́тъ . Вᲂзне́слъсѧ є҆сѝ на́ древо ще́дре , и҆ сᲂвᲂзне́слъ є҆сѝ всѧ̀ чл҃ки , и҆ бᲂри́телѧ ѕмі́ѧ ᲂу҆мертви́лъ є҆сѝ , и҆ ѡ҆живи́лъ є҆сѝ сᲂзда́нїе рꙋ́кꙋ твᲂе́ю , ꙗ҆́кѡ є҆ди́нъ бг҃ъ всѧ́кᲂмꙋ . Пᲂлᲂжи́всѧ во́ грᲂбѣ во́лею , цр҃ю без̾сме́ртне , и҆ црⷭ҇твїѧ а҆́дᲂва всѧ̀ и҆стᲂщи́лъ є҆сѝ , ме́ртвыѧ вᲂскрⷭ҇нїемъ свᲂи́мъ вᲂз̾дви́гнꙋвъ . Чꙋдеса̀ вели́ка сᲂдѣ́лавша сло́ве на землѝ , лю́дїе ᲂу҆би́ша тѧ без̾зако́ннїи . но са́мъ гдⷭ҇и , є҆ди́нъ всеси́ленъ сы́и , ꙗ҆́кᲂже пред̾речѐ и҆з̾ ме́ртвыхъ вᲂскр҃слъ є҆сѝ хрⷭ҇тѐ . Ѻ҆́чи ѿве́рзлъ є҆сѝ , неви́дѣвшаго свѣ́тъ чꙋ́вственыи , дш҃ѝ прᲂсвѣти́лъ є҆сѝ зѣ́ницы , и҆ сла́вити ᲂу҆вѣ́рилъ є҆сѝ сего̀ , пᲂзна́вша тѧ̀ твᲂрца̀ , за млрⷭ҇дїе ꙗ҆ви́вшасѧ чл҃ка . сла́ва . Трⷪ҇цꙋ во є҆ди́нствѣ , и҆ є҆ди́ницꙋ в̾ трⷪ҇цѣ вѣ́рнїи славᲂсло́вимъ , ѻ҆ц҃а и҆ сн҃а и҆ дх҃а пра́ваго , є҆ди́нᲂго бг҃а сᲂзда́телѧ всѧ́кᲂмꙋ сꙋществꙋ̀ вᲂи́стинꙋ . и҆ ны́нѣ , боⷢ҇ . Ка́кѡ рᲂдила̀ є҆сѝ бг҃ᲂра́дᲂваннаѧ дв҃о мт҃и чⷭ҇таѧ , непᲂзна́вши и҆скꙋ́са мꙋ́жеска . ка́кѡ пита́ла є҆сѝ и҆́же всю̀ тва́рь пита́ющаго , ꙗ҆́кᲂже є҆ди́нъ вѣ́сть са́мъ , и҆́же всѣ́мъ твᲂре́цъ и҆ бг҃ъ .

катава́сїѧ : Оу҆́треннююще вᲂпїе́мъ ти гдⷭ҇и спаси́ ны , ты́бо є҆сѝ бг҃ъ на́шъ , ра́звѣ бо тебѐ и҆но́го незна́емъ .

пѣ́снь , ѕ҃ . і҆рмо́съ . Ꙗ҆́кᲂже прⷪ҇ро́ка ѿ ѕвѣ́рѧ и҆зба́вилъ є҆сѝ гдⷭ҇и , и҆ менѐ и҆з̾ глꙋбины̀ без̾зако́нныхъ страсте́й вᲂз̾ведѝ мᲂлю́сѧ , да прилᲂжꙋ̀ призрѣ́ти ми , к̾ цр҃кви ст҃ѣ́й твᲂе́й . Распны́исѧ съ разбо́йникᲂма влⷣко , и҆зба́вилъ є҆сѝ ѿ разбо́йникъ лꙋка́выхъ , дш҃етлѣ́нныхъ стрⷭ҇те́й чл҃кᲂлю́бче гдⷭ҇и , всѣ́хъ вᲂспѣва́ющихъ твᲂѐ распѧ́тїе и҆ вᲂста́нїе сᲂгла́снѡ . Пᲂлᲂжи́ша без̾дыха́нїѧ тебѐ ме́ртва хрⷭ҇тѐ во́ грᲂбѣ , и҆́же всѣ́мъ ме́ртвымъ в̾дыха́юща жи́знь . вᲂскр҃съ же гдⷭ҇и , всѣ́мъ и҆стᲂщи́въ сло́ве гро́бы , бжⷭ҇твенᲂю твᲂе́ю си́лᲂю . По вᲂста́нїи хрⷭ҇тѐ дрꙋго́мъ гл҃аше , сѣди́те ᲂу҆́бѡ во і҆єрⷭ҇ли́мѣ , до́ндеже ѡ҆блече́тесѧ си́лᲂю свы́ше непᲂбѣди́мᲂю , и҆ и҆з̾вѣ́стнᲂю по́мᲂщїю . Бре́нїе сᲂтво́рь , ѻ҆́чи слѣпо́мꙋ и҆́же ѿрᲂжде́нїѧ , пᲂма́залъ є҆сѝ , и҆ дарᲂва̀ є҆мꙋ̀ прᲂзрѣ́ти , пᲂю́щꙋ ти сло́ве не и҆зрече́ннꙋю си́лꙋ , є҆ѧ́же ра́ди спа́слъ є҆сѝ ми́ръ . сла́ва . Трисᲂста́внаѧ є҆ди́нице , ѻ҆́ч҃е пребез̾нача́льне , сн҃е рᲂжде́нне , и҆ дш҃е и҆схо́дныи , бжⷭ҇тво̀ нераздѣ́льно , є҆ди́но сꙋщество̀ и҆ си́ла , спаса́й всѧ̀ лю́ди свᲂѧ̀ . и҆ ны́нѣ , боⷢ҇ . Вели́чїѧ твᲂѧ̀ чи́стаѧ кто̀ и҆спᲂвѣ́сть , бг҃а бо пло́тїю рᲂдила̀ є҆сѝ преє҆сте́ственѡ , тᲂбо́ю и҆збавлѧ́юща чл҃ка є҆го́же сᲂзда̀ дре́вле , ѿ всѧ́кагѡ грѣха̀ .

катава́сїѧ : Ѡ҆бы́де мѧ бе́здна , гро́бъ же ми ки́тъ бы́сть . а҆́зъ же вᲂзᲂпи́хъ к̾ тебѣ̀ чл҃кᲂлю́бче , и҆ спасе́ мѧ десни́ца твᲂѧ̀ гдⷭ҇и .

кᲂнда́къ . гла́съ , д҃ . Дш҃е́вныма ѻ҆чи́ма ѡ҆слѣпле́нъ , къ тебѣ̀ хрⷭ҇тѐ прихᲂжꙋ̀ , ꙗ҆́кᲂже слѣпы́и ѿ рᲂжде́нїѧ , пᲂкаѧ́нїемъ зᲂвꙋ́ ти , ты̀ є҆сѝ сꙋ́щимъ во тмѣ̀ свѣ́тъ пресвѣ́тлыи . и҆́кᲂсъ . Стрꙋю́ ми да́рꙋй хрⷭ҇тѐ , премꙋ́дрᲂсти не и҆зрече́нныѧ , и҆ ра́зꙋма го́рнѧгѡ , свѣ́те сꙋ́щимъ во тмѣ̀ , и҆ прельща́емымъ наста́вниче . да вᲂз̾мᲂгꙋ̀ чꙋдеса̀ твᲂѧ̀ пᲂвѣ́дати , ѻ҆каѧ́нныи а҆́зъ , ꙗ҆́же бжⷭ҇твенаѧ кни́га наꙋчѝ є҆ѵⷢ҇а́лїе , смире́нїю ше́ствᲂвати и҆ слѣпа́гѡ чꙋдᲂтвᲂре́нїю , ꙗ҆́кѡ ѿ рᲂжде́нїѧ слѣ́пъ сы́и , ѻ҆́чи ᲂу҆́бѡ чꙋ́вственыѧ прїе́мъ и҆ дш҃е́вныѧ . вѣ́рᲂю взыва́ю , ты̀ є҆сѝ сꙋ́щимъ во тмѣ̀ , свѣ́тъ пресвѣ́тлыи .

пѣ́снь , з҃ . і҆рмо́съ . Ѻ҆гнѧ̀ гаше́нїе , ѻ҆́трᲂкъ мᲂли́тва , прᲂхлажда́ющи пе́щь , вѣ́стникъ чꙋдесѝ , не ѡ҆палѧ́ющи же ни жгꙋ́ща пѣснᲂсло́вѧщихъ бг҃а , ѻ҆ц҃ъ на́шихъ . Вᲂз̾дви́женꙋ тебѣ̀ на́ древо сп҃се , пᲂгасѐ сл҃нце . землѧ́ же вᲂлнꙋ́ѧшесѧ , и҆ кᲂлѣба́шесѧ тва́рь . и҆ ѿ гро́бъ ме́ртвїи вᲂста́хꙋ . Вᲂста́вшꙋ тѝ и҆з̾ ме́ртвыхъ цр҃ю , дꙋ́ши сᲂвᲂз̾ста́ша та́мѡ сѣдѧ́щихъ , сла́вѧщихъ си́лꙋ твᲂю̀ , є҆ѧ́же ра́ди сме́ртныѧ ᲂу҆́зы разрѣши́шасѧ хрⷭ҇тѐ . Ра́нѡ пᲂма́зати же́нскїи прїи́де ли́къ . ᲂу҆вѣ́дѣвшеже гдⷭ҇и вᲂста́вша тѧ , веселѧ́хꙋсѧ со сщ҃е́нными ᲂу҆ченикѝ , и҆́хже ра́ди пᲂда́ждь на́мъ ѡ҆чище́нїе ѕлы́мъ . Бре́нїемъ пᲂма́залъ є҆сѝ ѻ҆́чи слѣпа́го , и҆ семꙋ̀ пᲂвелѣ̀ к̾ силᲂа́мꙋ и҆тѝ . ѡ҆мы́вжесѧ прᲂзрѣ̀ , пѣснᲂсла́вѧ тѧ хрⷭ҇тѐ цр҃ю всѣ́хъ . сла́ва . Ѻ҆ц҃а без̾нача́льна , сᲂбез̾нача́льна же сн҃а , и҆ дх҃а ст҃а́го пѣснᲂсло́вимъ , зᲂвꙋ́ще , ст҃ъ , ст҃ъ , ст҃ъ є҆сѝ бж҃е всѣ́хъ цр҃ю . и҆ ны́нѣ , боⷢ҇ . По ржⷭ҇твѣ̀ дв҃ᲂю ꙗ҆ви́ласѧ є҆сѝ чи́стаѧ . бг҃а бо рᲂдила̀ є҆сѝ , и҆стᲂщи́вшаго є҆стество̀ а҆́дᲂво пречⷭ҇таѧ си́лᲂю свᲂе́ю , є҆го́же мᲂлѝ прⷭ҇нѡ спасти́сѧ на́мъ .

катава́сїѧ : Въ пещѝ ѻ҆́гненнѣй , пѣвцы̀ спа́слъ дѣ́ти , бл҃гᲂслᲂве́нъ бг҃ъ ѻ҆ц҃ъ на́шихъ .

пѣ́снь , и҃ . і҆рмо́съ . А҆́нг҃лъ со́нмъ , и҆ чл҃ческїи сᲂбо́ръ , цр҃ѧ и҆ зижди́телѧ всѣ́мъ , сщ҃е́ннїи хвали́те , бл҃гᲂслᲂви́те леви́ти , лю́дїе превᲂзнᲂси́те є҆гѡ̀ во́ вѣки . А҆́нг҃льстїи чи́нᲂве , на крⷭ҇тѣ́ тѧ ви́дѣвше ви́сѧща хрⷭ҇тѐ всѣ́хъ цр҃ю , и҆ тва́рь всю̀ и҆змѣнѧ́емꙋ стра́хᲂмъ , ᲂу҆жасо́шасѧ пᲂю́ще твᲂѐ чл҃кᲂлю́бїе . А҆́дъ до́лѣ тебѐ ви́дѣвъ стᲂнѧ́ше , и҆ пᲂдава́ше ско́рѡ мертвецы̀ , ꙗ҆́же ѿ́вѣка та́мѡ держи́мыѧ , хрⷭ҇тѐ пѣснᲂсла́вѧщїѧ твᲂѐ чл҃кᲂлю́бїе . Сᲂтвᲂрѧ́ѧ чꙋдеса̀ хрⷭ҇тѐ ᲂу҆́жасна , во́лею вᲂз̾дви́жесѧ на́ крⷭ҇тъ . и҆ с̾ ме́ртвыми сᲂвᲂкꙋпи́сѧ , ᲂу҆мертви́выи а҆́да , и҆ всѣ́хъ до́блестїю разрѣши́лъ є҆сѝ ѿ ᲂу҆́зъ . Слѣпа́го во ѡ҆чи́лъ є҆сѝ , к̾ тебѣ̀ пристꙋпи́вша хрⷭ҇тѐ , семꙋ̀ пᲂвелѣ́лъ є҆сѝ в̾ силѡа́мᲂвꙋ кꙋпѣ́ль и҆тѝ , ѡ҆мы́тижесѧ и҆ прᲂзрѣ́ти , и҆ бг҃а тѧ̀ прᲂпᲂвѣ́дати , пло́тїю ꙗ҆́вльшагᲂсѧ въ ми́рѣ спаси́телѧ . бл҃гᲂслᲂви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Трⷪ҇це нераздѣ́льнаѧ , є҆ди́нице несмѣ́снаѧ , бж҃е всѧ́ческихъ и҆ зижди́телю всѣ́хъ , пѣснᲂсла́вѧщїѧ , и҆ вѣ́рнѡ пᲂкланѧ́ющїѧсѧ держа́вѣ твᲂе́й [пᲂкло́н̾] , ѿ всѧ́кихъ напа́стей и҆зба́ви . и҆ ны́нѣ , бг҃ᲂро́диченъ . Дв҃о пречⷭ҇таѧ бг҃ᲂра́дᲂваннаѧ , свᲂегѡ̀ мᲂлѝ сн҃а всегда̀ , да непᲂсрами́тъ мѧ в̾ де́нь ѡ҆сꙋже́нїѧ , но да причте́тъ мѧ ко и҆збра́ннымъ ѻ҆вца́мъ .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆го̀ во́ вѣки . И҆з̾ ѻ҆ц҃а пре́жде вѣ́къ рᲂжде́ннагѡ сн҃а и҆ бг҃а , и҆ в̾ пᲂслѣ́днѧѧ лѣ́та вᲂплᲂще́нна ѿ дв҃ы мт҃ре , сщ҃е́ннїи по́йте , лю́дїе превᲂзнᲂси́те є҆гѡ̀ во́ вѣки [пᲂкло́н̾] . честнѣ́йшꙋю непᲂе́мъ .

пѣ́снь , ѳ҃ . і҆рмо́съ . Ꙗ҆́кѡ сᲂтвᲂрѝ тебѐ вели́чїе си́льныи , дв҃ꙋ ꙗ҆́вль тѧ̀ чи́стꙋ по ржⷭ҇твѣ̀ . ꙗ҆́кѡ ро́ждьшꙋю без̾ сѣ́мени свᲂегѡ̀ твᲂрца̀ , тѣ́мъ тѧ̀ бцⷣе велича́емъ . На́ древѣ крⷭ҇тнѣмъ пригвᲂзди́сѧ хрⷭ҇тѐ бж҃е , и҆ всѧ̀ ѡ҆бличи́лъ є҆сѝ вра́жїѧ сᲂпрᲂти́внаѧ нача́ла . и҆ пе́рвꙋю клѧ́твꙋ пᲂтреби́лъ є҆сѝ сп҃се , тѣ́мже тѧ̀ по́ дᲂлгꙋ велича́емъ . Ꙗ҆́кѡ ви́дѣвъ тѧ сло́ве с̾ дш҃е́ю а҆́дъ до́лѣ , вᲂз̾стᲂна̀ , и҆ всѧ̀ ме́ртвыѧ ѿ тлѝ разрѣшѝ , пᲂзна́вшїѧ держа́вꙋ вла́сти твᲂеѧ̀ . с̾ ни́ми же тѧ по́ дᲂлгꙋ велича́емъ . Зна́менїѧ сᲂтвᲂрѧ́юща и҆ чꙋдеса̀ стра́шна , сᲂбѡ́ръ є҆вре́йскїи зрѧ̀ , за́вистїю ᲂу҆бѝ плѣни́вшаго а҆́да вᲂскрⷭ҇нїемъ свᲂи́мъ , и҆ всѣ́хъ жизнᲂда́вца вᲂста́вившаго . Вᲂста́лъ є҆сѝ ꙗ҆́кᲂже речѐ живᲂда́вче и҆з̾ ме́ртвыхъ , и҆ ꙗ҆ви́сѧ ст҃ы́мъ ᲂу҆ченико́мъ по вᲂскрⷭ҇нїи , и҆ зна́менїѧ сᲂтво́рь , и҆ прᲂсвѣтѝ слѣпы́ѧ . с̾ ни́ми же тѧ во́ вѣки велича́емъ . сла́ва . Свѣ́тъ ѻ҆ц҃а чтꙋ̀ , свѣ́тъ сла́влю и҆ сн҃а . свѣ́тъ вᲂспѣва́ю и҆ дх҃а нерᲂже́нна . є҆ди́нъ свѣ́тъ нераздѣ́ленъ , въ трїе́хъ ли́цѣхъ разꙋмѣва́емъ , бг҃а и҆ цр҃ѧ всѧ́кᲂй тва́ри . и҆ нн҃ѣ , боⷢ҇ . Ꙗ҆ви́вшисѧ прᲂстра́ннѣйши нб҃съ дв҃о чи́стаѧ , вмѣсти́ла є҆сѝ пло́тїю , бг҃а не ѡ҆пи́саннаго , и҆ рᲂдила̀ є҆сѝ всѣ́мъ на и҆збавле́нїе , и҆́же вѣ́рᲂю несꙋмѣ́ннᲂю вᲂспѣва́ющимъ тѧ̀ .

катава́сїѧ : Тѧ̀ па́че ᲂу҆ма̀ и҆ слᲂвесѐ мт҃рь бж҃їю , в̾лѣ́то без̾лѣ́тнагѡ неи҆зрече́ннѡ ро́ждьшꙋю , вѣ́рнїи є҆динᲂмꙋ́дреннѡ , пѣ́сньми велича́емъ .

задᲂсто́йникъ : Свѣти́сѧ свѣти́сѧ но́выи і҆єрⷭ҇ли́ме , сла́ва бо гдⷭ҇нѧ на тебѣ̀ вᲂсїѧ̀ , ликꙋ́й ны́нѣ и҆ весели́сѧ сїѡ́не , ты́ же чⷭ҇таѧ красꙋ́йсѧ бцⷣе , ѡ҆ вᲂста́нїи ржⷭ҇тва̀ твᲂегѡ̀ [пᲂкло́н̾ до землѝ] . та́же , ст҃ъ гдⷭ҇ь бг҃ъ на́шъ ,= на́ гласъ , є҃ . свѣти́ленъ , па́сцѣ . Пло́тїю ᲂу҆снꙋ́въ ꙗ҆́кѡ ме́ртвъ , цр҃ь и҆ гдⷭ҇ь , тридне́вно вᲂскр҃се , и҆ а҆да́ма вᲂздви́гъ и҆з̾ тлѝ , и҆ ᲂу҆праздни́въ сме́рть . па́сха нетлѣ́нїѧ , ми́рꙋ спасе́нїе . =дрꙋгі́и , свѣти́ленъ , ѡ҆ слѣпо́мъ . Ми́мѡ и҆ды́и сп҃съ на́шъ , ѡ҆брѣ́те чл҃ка слѣ́па без̾ ѻ҆́чїю , плю́нꙋвъ на́ землю , и҆ бре́нїе сᲂтвᲂри́въ пᲂма́за є҆гѡ̀ , к̾ силꙋа́мꙋ пᲂсла̀ и҆тѝ и҆ ᲂу҆мы́тисѧ . ѻ҆́нъ же ᲂу҆мы́всѧ , прїи́де ви́дѧ свѣ́тъ тво́й хрⷭ҇тѐ мо́й . сла́ва , и҆ ны́нѣ , то́йже .

На хвали́тѣхъ , стихѣ́ры , вᲂскрⷭ҇ны . гла́съ , є҃ . =запѣ́въ : хвали́те бг҃а во ст҃ы́хъ є҆гѡ̀ . Г=дⷭ҇и , запечатлѣ́ннꙋ гро́бꙋ ѿ без̾зако́нникъ , прᲂи҆з̾ше́лъ є҆сѝ и҆́з̾ грᲂба , ꙗ҆́кᲂже рᲂди́сѧ ѿ бцⷣы . неразꙋмѣ́ша ка́кѡ вᲂплᲂти́сѧ , беспло́тнїи твᲂѝ а҆́нг҃ли ; нечꙋ́ша кᲂгда̀ вᲂскр҃се , стрегꙋ́щїи тѧ во́ини ; ѡ҆бᲂѧ́ бо запечатлѣ́шасѧ и҆́щꙋщимъ , ꙗ҆ви́шажесѧ чꙋдеса̀ , кла́нѧющимсѧ вѣ́рᲂю та́инствꙋ , є҆́же вᲂспѣва́емъ , вᲂзда́ждь на́мъ ра́дᲂсть , и҆ ве́лїю млⷭ҇ть .

хвали́те є҆гѡ̀ во ᲂу҆тверже́нїи си́лъ є҆гѡ̀ . Гдⷭ҇и , вереѝ вѣ́чныѧ сᲂкрꙋши́въ , и҆ ᲂу҆́зы растерза́въ , ѿ́ грᲂба вᲂскр҃се , ѡ҆ста́вль свᲂѧ̀ пᲂгреба́тельнаѧ , во свидѣ́тельство и҆́стинѣ , тридне́внагѡ пᲂгребе́нїѧ твᲂегѡ̀ . и҆ пред̾вари́въ в̾ галиле́и , и҆́же въ пеще́рѣ стрего́мыи . вели́каѧ твᲂѧ̀ млⷭ҇ть , непᲂсти́жимыи сп҃се пᲂми́лꙋй на́съ .

хвали́те є҆гѡ̀ на си́лахъ є҆гѡ̀ ,꙳ хвали́те є҆гѡ̀ по премно́гᲂмꙋ вели́чествїю є҆гѡ̀ . Гдⷭ҇и , жены̀ теко́ша на́ грᲂбъ ви́дѣти тебѐ хрⷭ҇та̀ , на́съ ра́ди пᲂстрада́вшагѡ , и҆ пристꙋ́пльше ѡ҆брѣто́ша а҆́нг҃ла на ка́мени сѣдѧ́ща , стра́хᲂмъ ѿва́льшемсѧ , и҆ к̾ ни́мъ вᲂзᲂпѝ гл҃ѧ , вᲂскр҃се гдⷭ҇ь . рцы́те ᲂу҆ченико́мъ , ꙗ҆́кѡ вᲂста̀ ѿ ме́ртвыхъ , спаса́ѧ дш҃а на́ша .

хвали́те є҆гѡ̀ во́ гласѣ трꙋ́бнѣмъ ,꙳ хвали́те є҆гѡ̀ во ѱалты́ри и҆ гꙋ́слѣхъ . Гдⷭ҇и , ꙗ҆́кᲂже и҆зы́де ѿ запечатлѣ́нна гро́ба , та́кѡ вни́де и҆ две́ремъ затвᲂре́нᲂмъ ко ᲂу҆ченико́мъ свᲂи́мъ . пᲂказꙋ́ѧ и҆́мъ плᲂтьскі́ѧ ꙗ҆́звы , и҆́хже прїѧ́тъ сп҃се дᲂлгᲂтерпѣли́ве , ꙗ҆́кѡ ѿ сѣ́мене дв҃дᲂва ꙗ҆́звы претерпѣ́въ , ꙗ҆́кѡ сн҃ъ бж҃їи ми́ра свᲂбᲂди́лъ є҆сѝ . вели́каѧ твᲂѧ̀ ми́лᲂсть , непᲂсти́жиме сп҃се пᲂми́лꙋй на́съ .

хвали́те є҆гѡ̀ в̾ тѷмпа́нѣ и҆ ли́цѣ ,꙳ хвали́те є҆гѡ̀ во стрꙋ́нахъ и҆ ѻ҆рга́нѣхъ . Гдⷭ҇и цр҃ю вѣко́мъ , и҆ тво́рче всѣ́хъ , и҆́же на́съ ра́ди распѧ́тїе и҆ пᲂгребе́нїе пло́тїю прїе́мъ , да на́съ ѿ а҆́да свᲂбᲂди́ши всѧ̀ . ты́бо є҆сѝ бг҃ъ на́шъ , ра́звѣ тебѐ и҆но́го незна́емъ .

хвали́те є҆гѡ̀ в̾ кѷмва́лѣхъ дᲂбрᲂгла́сныхъ , хвали́те є҆гѡ̀ в̾ кѷмва́лѣхъ вᲂсклица́нїѧ .꙳ всѧ́ко дыха́нїе да хва́литъ гдⷭ҇а . Гдⷭ҇и превᲂсїѧ́ющаѧ твᲂѧ̀ чꙋдеса̀ кто̀ и҆спᲂвѣ́сть ; и҆лѝ кто̀ вᲂз̾вѣсти́тъ стра́шнаѧ ти та́инства ; в̾ чл҃чивъбᲂсѧ на́съ ра́ди , ꙗ҆́кѡ са́мъ вᲂсхᲂтѣ̀ . держа́вꙋ ꙗ҆ви́лъ є҆сѝ си́лы твᲂеѧ̀ . распѧ́тїемъ бо свᲂи́мъ разбо́йникꙋ ра́й ѿве́рзлъ є҆сѝ . и҆ пᲂгребе́нїемъ свᲂи́мъ вереѝ а҆́дᲂвы сᲂкрꙋши́лъ є҆сѝ , и҆ вᲂскрⷭ҇нїемъ свᲂи́мъ всѧ́ческаѧ прᲂсвѣти́лъ є҆сѝ , млрⷭ҇де сла́ва тебѣ̀ .

сти́хъ : вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ ,꙳ незабꙋ́ди ни́щихъ свᲂи́хъ до кᲂнца̀ . Мѷрѡно́сицы жены̀ , гро́ба твᲂегѡ̀ дᲂсти́гше ѕѣлѡ̀ ра́нѡ , и҆ска́хꙋ тебѐ ми́рᲂмъ пᲂма́зати без̾сме́ртнаго сло́ва и҆ бг҃а . и҆ а҆́нг҃ла глаго́лы ѡ҆гласи́вшесѧ , вᲂз̾враща́хꙋсѧ ра́дᲂстнѡ а҆пⷭ҇лѡмъ вᲂз̾вѣсти́ти ꙗ҆́вѣ . ꙗ҆́кѡ вᲂскрⷭ҇лъ є҆сѝ живо́тъ всѣ́хъ , и҆ пᲂдае́ши ми́рᲂви ѡ҆чище́нїе и҆ ве́лїю млⷭ҇ть .

та́же , стихѣ́ра , ѡ҆ слѣпо́мъ .= сти́хъ : гла́съ , и҃ . и҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ ,꙳ пᲂвѣ́мъ всѧ̀ чꙋдеса̀ твᲂѧ̀ . И҆́=же за млрⷭ҇дїе млⷭ҇ти вᲂплᲂти́всѧ хрⷭ҇тѐ бж҃е , свѣ́та лише́наго ѿ лᲂже́снъ , млрⷭ҇дїемъ не и҆зрече́нныхъ щедро́тъ , сїѧ́нїю бжⷭ҇твенᲂмꙋ спᲂдо́билъ є҆сѝ , сегѡ̀ зѣ́ницамъ пе́рстїю сᲂзда́тельными пе́рсты твᲂи́ми прикᲂснꙋ́всѧ . са́мъ и҆ ны́нѣ свѣтᲂда́телю , и҆ на́ша ѡ҆зарѝ дш҃е́внаѧ чꙋ́вства , ꙗ҆́кѡ є҆ди́нъ млрⷭ҇дъ .

сла́ва . гла́съ , то́йже . Кто̀ вᲂз̾гл҃етъ си́лы твᲂѧ̀ хрⷭ҇тѐ , и҆лѝ кто̀ и҆зᲂчте́тъ чꙋде́съ твᲂи́хъ мно́жество . сꙋгꙋ́бъ бо ꙗ҆́кѡ ви́дѣнъ бы́сть на землѝ за бл҃гᲂсть , сꙋгꙋ́бы и҆ цѣльбы̀ недꙋ́гꙋющимъ даѧ́ше , нето́чїю бо тѣле́сныѧ ѻ҆́чи ѿве́рзлъ є҆сѝ , и҆́же ѿ ᲂу҆тро́бы слѣпо́мꙋ , но и҆ дш҃е́вныѧ . тѣ́мже бг҃а тѧ̀ и҆спᲂвѣ́да кры́ющагᲂсѧ , и҆ всѣ́мъ пᲂдаю́ща ве́лїю млⷭ҇ть .

и҆ ны́нѣ . гла́съ , в҃ . Пребл҃гᲂслᲂве́на є҆сѝ бцⷣе дв҃о , вᲂпло́щшимбᲂсѧ и҆з̾ тебѐ , а҆́дъ плѣни́сѧ , а҆да́мъ призва́сѧ . клѧ́тва пᲂтреби́сѧ , и҆ є҆́вва свᲂбᲂди́сѧ . сме́рть ᲂу҆мертви́сѧ , и҆ мы̀ ѡ҆жи́хᲂмъ . тѣ́мъ пᲂю́ще вᲂзᲂпїе́мъ , бл҃гᲂслᲂве́нъ бг҃ъ на́шъ , и҆зво́ливыи та́кѡ . Сла́вᲂсло́вїе вели́кᲂе . та́же , трᲂпа́рь . Дне́сь спасе́нїе ми́рꙋ , пᲂе́мъ вᲂскрⷭ҇шаго и҆́з̾ грᲂба , и҆ нача́льникꙋ живᲂтꙋ̀ хрⷭ҇та̀ бг҃а на́шегѡ . разрꙋши́въ бо сме́рть , пᲂбѣ́дꙋ да́стъ на́мъ , и҆ ве́лїю млⷭ҇ть . пᲂсе́мъ , є҆ктенїѝ . и҆ ѿпꙋ́стъ .

чте́цъ , гл҃етъ : а҆ми́нь , сла́ва , и҆ ны́нѣ . гла́съ , и҃ . Ма́рїины сле́зы небезꙋма̀ прᲂлива́ютсѧ те́плѣ , сѝ ᲂу҆́бѡ спᲂдо́бисѧ и҆ ᲂу҆че́нїи а҆́нг҃льскихъ , и҆ ѻ҆́бразꙋ самᲂго̀ і҆с҃а . но є҆щѐ земна́ѧ мы́слитъ , ꙗ҆́кѡ жена̀ немᲂщна̀ , тѣ́мъ и҆ ѿсыла́етсѧ неприкаса́тисѧ хрⷭ҇тꙋ̀ . но ѻ҆ба́че прᲂпᲂвѣ́дница пᲂсыла́етсѧ твᲂи́мъ ᲂу҆ченико́мъ , и҆́мже и҆ бл҃гᲂвѣ́щенїе нᲂсѧ́щи , є҆́же ко ѻ҆те́ческᲂмꙋ жре́бїю всхо́дъ вᲂз̾вѣща́ющи тво́й . съ не́ю же спᲂдо́би и҆ на́съ ꙗ҆вле́нїѧ твᲂегѡ̀ влⷣко гдⷭ҇и .= та́же , ча́съ , а҃ . ѱалмы̀ , ѻ҆бы́чны . =и҆ кᲂне́чныи ѿпꙋ́стъ . На литꙋргі́и , бл҃же́нна , на и҃ . ѿ кано́на , ѡ҆ слѣпо́мъ , пѣ́снь г҃ , и҆ ѕ҃ . По вхо́дѣ : трᲂпа́рь , дню̀ . сла́ва , кᲂнда́къ , дню̀ . и҆ нн҃ѣ , кᲂнда́къ , па́сцѣ .

прᲂки́менъ , ѱл҃о́мъ дв҃дᲂвъ . пᲂмᲂли́тесѧ и҆ вᲂздади́те гдⷭ҇ви бг҃ꙋ на́шемꙋ . сти́хъ : вѣ́дᲂмъ во і҆ꙋде́и бг҃ъ , во і҆и҃ли ве́лїе и҆́мѧ є҆гѡ̀ . а҆пⷭ҇лъ , въ дѣѧ́нїихъ . заⷱ҇ , л҃и . а҆ллилꙋ́їѧ . при́зри на мѧ̀ и҆ пᲂми́лꙋй мѧ . сти́хъ : стᲂпы̀ мᲂѧ̀ напра́ви по слᲂвесѝ твᲂемꙋ̀ . є҆ѵⷢ҇а́лїе , ѿ і҆ѡа́нна . заⷱ҇ , л҃д . прича́стенъ , тѣ́ло хрⷭ҇то́во . дрꙋгі́и , хвали́те гдⷭ҇а съ небе́съ .

Въ тꙋ́же , нлⷣю , ѕ҃ ю , ве́черъ . на гдⷭ҇и вᲂзва́хъ , стⷯры , ѡ҆ слѣпо́мъ , г҃ . гла́съ , є҃ . поⷣ . ра́дꙋйсѧ живᲂно́сныи .= С=вѣ́тъ всѣ́мъ чл҃кѡмъ , и҆ ѻ҆́ко ми́ра сегѡ̀ тѣле́снагѡ , сы́и бж҃е и҆ сло́ве , и҆ ѻ҆чи́ма прича́стникъ , сᲂзда́тель и҆ зижди́тель пᲂзнава́емь . и҆ нн҃ѣ ѿ плюнᲂве́нїѧ и҆ ѿ бре́нїѧ , слѣпа́го не и҆зрече́ннѡ прᲂсвѣти́въ пе́рсты свᲂи́ми , и҆ бре́нїемъ и҆ видѣ́нїемъ . є҆́же и҆ ᲂу҆лꙋчи́въ , и҆́же пе́рвїе ѿ рᲂжде́нїѧ зри́мыи , сл҃нца ѿ ню́дъ неви́дѣти , тебѐ сла́дкᲂе ви́дѣ сл҃нце . ви́дѣвъ ѻ҆́бразъ , и҆́же на́съ ра́ди , за милᲂсе́рдїе мно́гᲂе сᲂзда́вшагѡ . Хᲂтѧ́и вре́меннымъ бᲂга́тствᲂмъ , чл҃ческимъ плᲂтски́мъ сᲂсꙋ́дᲂмъ прїѡ҆бщи́тисѧ . и҆́же пе́рвїе слѣпы́и и҆з̾ лᲂже́снъ мт҃ре прᲂи҆зше́дыи , ꙗ҆́кѡ не и҆мѣ́ти сᲂзда́нїе пᲂмышлѧ́ше , ѻ҆чи́ма лише́нїе и҆мѣ́ѧ . и҆́маже нᲂга́ма и҆ мно́жайшаѧ тѣлесѝ преткнᲂве́нїѧ , ꙗ҆́же ѡ҆ ка́менїе . и҆ сегѡ̀ ра́ди тᲂбо́ю бᲂга́тство стѧжа́въ , ви́дѣти свѣ́тъ ми́ра . и҆ и҆́же свѣ́тᲂмъ стрᲂи́телѧ бг҃а и҆ влⷣкꙋ тва́ремъ вᲂзвѣща́ѧ , и҆ сᲂдѣ́телѧ всемꙋ̀ ми́рꙋ . Оу҆сты̀ и҆ дш҃е́ю и҆ ᲂу҆мо́мъ , и҆́же ѿ бре́нїѧ зижди́тельски плюнᲂве́нїемъ ѻ҆чи́ма зѣ́ницы да́вшагѡ . и҆ ѻ҆́бщее прᲂсвѣще́нїе и҆спᲂвѣ́дᲂваше , є҆го́же пре́же лише́нъ бѧ́ше , и҆ тва́ремъ всегѡ̀ ми́ра смᲂтри́телѧ и҆ стрᲂи́телѧ , за млрⷭ҇дїе є҆ди́но сᲂзда́нїѧ ра́ди вᲂчл҃чившагᲂсѧ , прᲂпᲂвѣ́даше сего̀ бг҃а всеси́льна . є҆го́же кни́жницы за́вистїю , и҆ є҆́же к̾ си́мъ бесѣ́дᲂванїе , ѿ ню́дъ немᲂгꙋ́ще зрѣ́ти , и҆з̾гна́на ѿ сᲂбо́рища сꙋ́дѧтъ , ѡ҆слѣпѣва́юще мно́жае , и҆́же ѿ тᲂгда̀ зѣ́ницы да́вша слѣпо́мꙋ , дш҃е́вныѧ и҆ тѣле́сныѧ .

та́же , стихѣ́ры , в̾ минѣ́и , г҃ . сла́ва , и҆ ны́нѣ . гла́съ , в҃ . И҆́же слѣпы́и рᲂди́всѧ , во свᲂе́мъ по́мыслѣ глаго́лаше , є҆да̀ а҆́зъ грѣ́хъ ра́ди рᲂди́тельныхъ рᲂди́хсѧ без̾ ѻ҆чїю̀ ; є҆да̀ а҆́зъ за невѣ́рїе ꙗ҆зы́къ рᲂди́хсѧ во ѡ҆бличе́нїе ; недᲂмышлѧ́юсѧ вᲂпраша́ти , кᲂгда̀ но́щь , кᲂгда̀ де́нь ; нетерпи́тѣми но́зѣ ка́меннагѡ претыка́нїѧ . неви́дѣхъ бо сл҃нца сїѧ́юща , ни ѻ҆́браза менѐ сᲂзда́вшагѡ . но мᲂлю́тисѧ хрⷭ҇тѐ бж҃е , при́зри на мѧ̀ и҆ пᲂми́лꙋй мѧ .

На стихо́внѣ , стихѣ́ры . гла́съ , є҃ . Честны́мъ твᲂи́мъ крⷭ҇то́мъ хрⷭ҇тѐ , дїа́вᲂла пᲂсрами́лъ є҆сѝ , и҆ вᲂскрⷭ҇нїемъ твᲂи́мъ жа́ло грѣхо́внᲂе притꙋпи́лъ є҆сѝ , и҆ спа́слъ є҆сѝ на́съ ѿ вра́тъ сме́ртныхъ , сла́вимъ тѧ є҆динᲂро́дныи .

сти́хъ : к̾ тебѣ̀ вᲂз̾ведо́хъ ѻ҆́чи мᲂѝ . Гдⷭ҇и сᲂгрѣша́ѧ непреста́ю , и҆ чл҃кᲂлю́бїю спᲂдᲂблѧ́емь неразꙋмѣ́ю . ѡ҆дᲂлѣ́й мᲂемꙋ̀ ѡ҆мраче́нїю , є҆ди́не бл҃же , и҆ пᲂми́лꙋй мѧ̀ .

сти́хъ : пᲂми́лꙋй на́съ гдⷭ҇и . мⷱ҇ꙋ . Ѡ҆ земны́хъ всѣ́хъ небре́гше , и҆ на мꙋ́ки мꙋ́жески дерзнꙋ́вше , бл҃же́нныхъ наде́ждъ непᲂгрѣши́сте , но небе́снᲂмꙋ црⷭ҇твїю наслѣ́дницы бы́сте , прехва́льнїи мꙋ́ченицы . и҆мꙋ́ще дерзнᲂве́нїе к̾ чл҃кᲂлю́бцꙋ бг҃ꙋ , ми́рꙋ смире́нїѧ прᲂси́те , и҆ дш҃а́мъ на́шимъ ве́лїю млⷭ҇ть . сла́ва , и҆ ны́нѣ . гла́съ , в҃ . Ми́мѡ хᲂдѧ̀ і҆с҃ъ ѿ ст҃и́лища , ѡ҆брѣ́те чл҃ка слѣ́па ѿ рᲂжде́нїѧ , и҆ ᲂу҆милᲂсе́рдивсѧ пᲂлᲂжѝ бре́нїе на ѻ҆́чїю є҆гѡ̀ , и҆ речѐ к̾ немꙋ̀ , и҆дѝ ᲂу҆мы́исѧ в̾ силᲂа́мѣ , и҆ ᲂу҆мы́всѧ прᲂзрѣ̀ , сла́вꙋ вᲂз̾сыла́ѧ бг҃ꙋ . сᲂсѣ́ди же є҆гѡ̀ гл҃ахꙋ є҆мꙋ̀ , кто́ ти зѣ́ницы ѿве́рзе , є҆ю́же ни кто́же ѿ зрѧ́щихъ и҆сцѣли́ти вᲂз̾мо́жетъ ; ѻ҆́нъ же вᲂзᲂпи́въ речѐ , чл҃къ і҆с҃ъ гл҃емыи , ѻ҆́нъ ми речѐ , ᲂу҆мы́исѧ в̾ силᲂа́мѣ , и҆ прᲂзрѣ́хъ . то́й є҆́сть вᲂи́стинꙋ є҆го́же речѐ мѡѷсе́й в̾ зако́нѣ , хрⷭ҇та̀ месі́ю . то́й є҆́сть сп҃съ дш҃а́мъ на́шимъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , вᲂскрⷭ҇нъ . сла́ва , и҆ ны́нѣ , боⷢ҇ .= є҆ктенїѧ̀ . и҆ ѿпꙋ́стъ . На па́вечерницѣ , по дᲂсто́йнѣ , кᲂнда́къ , ѡ҆ слѣпо́мъ . =и҆ про́чее ѡ҆бы́чно .

Впнⷣе , ѕ҃ ѧ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь вᲂскрⷭ҇нъ , двⷤа . сла́ва , и҆ ны́нѣ , боⷢ҇ .

По а҃ , стихᲂло́гїи , сѣда́ленъ . гла́съ , є҃ . Крⷭ҇тъ гдⷭ҇нь да пᲂхва́лимъ . пᲂгребе́нїе ст҃о́е пѣ́сньми пᲂчте́мъ , и҆ вᲂскрⷭ҇нїе є҆гѡ̀ прᲂсла́вимъ , ꙗ҆́кѡ сᲂвᲂздви́же ме́ртвыѧ ѿ гро́бъ ꙗ҆́кѡ бг҃ъ , плѣни́въ сме́рти держа́вꙋ , и҆ крѣ́пᲂсть дїа́вᲂлю . и҆ сꙋ́щимъ во а҆́дѣ свѣ́тъ вᲂсїѧ̀ . сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . Сꙋдїѝ сѣдѧ́щꙋ , и҆ а҆́нг҃лѡмъ пред̾стᲂѧ́щимъ , трꙋбѣ̀ гласѧ́щи , и҆ пла́мени гᲂрѧ́щꙋ , что̀ сᲂтвᲂри́ши дш҃е мᲂѧ̀ ведо́ма на сꙋ́дъ ; тᲂгда́ бо лю́таѧ тебѣ̀ пред̾ста́нꙋтъ , и҆ та́йнаѧ твᲂѧ̀ ѡ҆блича́тсѧ сᲂгрѣше́нїѧ . тѣ́мже пре́же кᲂнца̀ вᲂзᲂпі́и сꙋдїѝ , бж҃е ѡ҆чи́сти мѧ и҆ спаси́ мѧ . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Сїѧ́етъ дне́сь па́мѧть стрⷭ҇тᲂте́рпецъ , и҆́мать бо ѿ нб҃съ зарю̀ . ли́къ а҆́нг҃льскїи тᲂржествꙋ́етъ , и҆ чл҃ческїи ро́дъ спра́зднꙋетъ . тѣ́мже мо́лѧтсѧ гдⷭ҇ви пᲂми́лᲂватисѧ дш҃а́мъ на́шимъ . сла́ва , и҆ ны́нѣ , боⷢ҇ . Ст҃ѣ́йшꙋ херꙋви́мъ , превы́шшꙋ серафи́мъ пречⷭ҇таѧ , бцⷣꙋ тѧ̀ вᲂи́стинꙋ и҆спᲂвѣ́дающе , и҆́мамы грѣ́шнїи застꙋ́пницꙋ , и҆ ѡ҆брѣта́емъ во́ времѧ напа́стей спасе́нїе . тѣ́мже непреста́й ѡ҆ на́съ мᲂлѧ́щисѧ , ꙗ҆́кѡ держа́ва и҆ прибѣ́жище дш҃а́мъ на́шимъ .

По в҃ , стихᲂло́гїи , сѣда́ленъ . гла́съ , є҃ . Ѻ҆ц҃ꙋ и҆ дх҃ᲂви сᲂбез̾нача́льныи , и҆́же свѣ́тᲂмъ ꙗ҆́кѡ ри́зᲂю ѡ҆дѣва́ѧисѧ , чл҃кᲂлю́бнѣ на́ше є҆стество̀ прїѧ́тъ , и҆ недꙋ́ги чл҃ческїѧ ѿгᲂнѧ́ѧ ꙗ҆́кѡ бг҃ъ , прᲂсвѣще́и зѣ́ницы , и҆́же ѿ лᲂже́снъ мт҃рьнихъ свѣ́та лише́нагѡ .= сла́ва , и҆ ны́нѣ , то́йже .=

та́же , вᲂскрⷭ҇нїе хрⷭ҇то́во , аⷤ . ѱл҃о́мъ , н҃ . кано́нъ , ѡ҆ слѣпо́мъ , на и҃ . и҆ въ минѣ́и , на д҃ .

На хвали́тѣхъ , стихѣ́ры , на д҃ . гла́съ , є҃ . Гдⷭ҇и , запечатлѣ́ннꙋ гро́бꙋ ѿ без̾зако́нникъ , прᲂи҆з̾ше́лъ є҆сѝ и҆́з̾ грᲂба , ꙗ҆́кᲂже рᲂди́сѧ ѿ бцⷣы . неразꙋмѣ́ша ка́кѡ вᲂплᲂти́сѧ , беспло́тнїи твᲂѝ а҆́нг҃ли ; нечꙋ́ша кᲂгда̀ вᲂскр҃се , стрегꙋ́щїи тѧ во́ини ; ѡ҆бᲂѧ́ бо запечатлѣ́шасѧ и҆́щꙋщимъ , ꙗ҆ви́шажесѧ чꙋдеса̀ , кла́нѧющимсѧ вѣ́рᲂю та́инствꙋ , є҆́же вᲂспѣва́емъ , вᲂзда́ждь на́мъ ра́дᲂсть , и҆ ве́лїю ми́лᲂсть . двⷤа . Гдⷭ҇и стра́ха твᲂегѡ̀ бᲂю́сѧ , а҆ ѕло̀ твᲂрѧ̀ непреста́ю . кто̀ на сꙋди́щи сꙋдїѝ небᲂи́тсѧ ; и҆лѝ кто̀ врачева́нїю хᲂтѧ̀ , врача̀ прᲂгнѣ́ваетъ ; ꙗ҆́кᲂже а҆́зъ . дᲂлгᲂтерпѣли́ве гдⷭ҇и , на́ немᲂщь мᲂю̀ ᲂу҆милᲂсе́рдисѧ , и҆ пᲂми́лꙋй мѧ . мⷱ҇ꙋ . Бл҃гᲂслᲂве́но во́инство цр҃ѧ нбⷭ҇нагѡ . а҆́ще бо и҆ земні́и бы́ша страстᲂте́рпцы , но а҆́нг҃льскᲂе дᲂстᲂѧ́нїе пᲂтща́шасѧ дᲂсти́гнꙋти , ѡ҆ мꙋ́кахъ неради́ша , и҆ свᲂи́ми стрⷭ҇тьмѝ , беспло́тныхъ спᲂдо́бльшесѧ че́сти . тѣ́мже мᲂли́твами и҆́хъ гдⷭ҇и , низ̾пᲂслѝ на́мъ ве́лїю млⷭ҇ть . сла́ва , и҆ ны́нѣ . гла́съ , д҃ . Всѐ житїѐ слѣпы́и но́щь пᲂмышлѧ́ѧ , вᲂзᲂпѝ к̾ тебѣ̀ , гдⷭ҇и ѿве́рзи ми зѣ́ницы сн҃е дв҃дᲂвъ сп҃се на́шъ , да со всѣ́ми и҆ а҆́зъ вᲂспᲂю̀ твᲂю̀ си́лꙋ .

На стихо́внѣ , стихѣ́ры . гла́съ , в҃ . поⷣ . до́ме є҆вфра́фᲂвъ .= В=ᲂи́стинꙋ ты̀ сᲂзда́тель ,꙳ земно́мꙋ сꙋществꙋ̀ ,꙳ и҆́бо слѣпо́мꙋ зѣ́ницы ꙳ бре́нїемъ прᲂсвѣща́еши ,꙳ ꙗ҆́кᲂже сᲂзда̀ пе́рвїе чл҃ка .

сти́хъ : при́зри на мѧ̀ ,꙳ и҆ пᲂми́лꙋй мѧ̀ . Плю́нꙋвъ и҆ с̾ пе́рстїю смѣси́въ ,꙳ пᲂмазꙋ́еши ѡ҆слѣпле́нїи зѣ́ницы ,꙳ и҆ ско́рѡ и҆сцѣле́нїе ꙳ пᲂдава́еши ,꙳ ꙗ҆́кѡ чл҃кᲂлю́бецъ .

сти́хъ : стᲂпы̀ мᲂѧ̀ напра́ви ,꙳ по слᲂвесѝ твᲂемꙋ̀ . Стра́нна и҆ чꙋ́дна ,꙳ дѣ́ла твᲂѧ̀ ще́дре ,꙳ ꙗ҆́кѡ бо чл҃къ плю́еши ,꙳ и҆ ꙗ҆́кѡ бг҃ъ пᲂдава́еши ꙳ ѻ҆чи́ма прᲂзрѣ́нїе . сла́ва , и҆ ны́нѣ . гла́съ , є҃ . Гдⷭ҇и ми́мо хᲂдѧ̀ дре́вле пꙋте́мъ , ѡ҆брѣ́те чл҃ка слѣ́па ѿ рᲂжде́нїѧ , и҆ ᲂу҆дивле́ни бы́вше ᲂу҆ченицы̀ , вᲂпрᲂша́хꙋ тѧ гл҃юще , ᲂу҆чи́телю кто̀ сᲂгрѣшѝ ; се́йли и҆лѝ рᲂди́телѧ є҆гѡ̀ , да слѣ́пъ рᲂди́сѧ ; ты́ же сп҃се мо́й вᲂпїѧ́ше к̾ ни́мъ , ни се́й сᲂгрѣшѝ , ни рᲂди́телѧ є҆гѡ̀ , но да ꙗ҆вѧ́тсѧ дѣ́ла бж҃їѧ на не́мъ , мнѣ́ бо пᲂдᲂба́етъ дѣ́лати дѣ́ла пᲂсла́вшагѡ мѧ , ꙗ҆́же никто́же мо́жетъ дѣ́лати ; и҆ сїѧ̀ ре́къ , плю́нꙋвъ до́лꙋ , и҆ бре́нїе сᲂтво́рь , пᲂма́за ѻ҆́чи є҆мꙋ̀ , ре́къ к̾ немꙋ̀ , и҆дѝ ᲂу҆мы́исѧ въ силᲂа́мстѣй кꙋпѣ́ли . ѻ҆́нъ же ᲂу҆мы́всѧ здра́въ бы́сть , и҆ вᲂпїѧ́ше к̾ тебѣ̀ , вѣ́рꙋю гдⷭ҇и и҆ пᲂклᲂнѧ́ютисѧ . тѣ́мже вᲂпїе́мъ и҆ мы̀ пᲂми́лꙋй на́съ .

та́же , бл҃го є҆́сть . и҆ ча́съ , а҃ . и҆ ѿпꙋ́стъ .

На бл҃же́ннах̾ , трипѣ́снец̾ , є҆мꙋ́же краегране́сїе , сла́ва бг҃ꙋ пᲂдᲂба́етъ . гла́съ , є҃ . пѣ́снь , а҃ . і҆рмо́съ . пᲂе́мъ гдⷭ҇ви .

во црⷭ҇твїи сѝ є҆гда̀ прїи́деши ,꙳ пᲂмѧнѝ на́съ гдⷭ҇и . Твᲂи́мъ честны́мъ крⷭ҇то́мъ гдⷭ҇и , дре́внїѧ клѧ́твы всѝ и҆зба́вихᲂмсѧ . тѣ́мже твᲂю̀ сла́вимъ бл҃гᲂсть .

бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Распны́исѧ во́лею и҆ вᲂста̀ , сᲂкро́вища всѧ̀ плѣни́въ сме́рти , хрⷭ҇то́съ сп҃съ на́шъ , тᲂгѡ̀ прᲂславлѧ́емъ .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Стра́ненъ зра́къ ви́дѣвше блиста́ющь , мѷрѡно́сицы а҆́нг҃ла , бжⷭ҇твенᲂе мнѧ́хꙋ зижди́телѧ вᲂскрⷭ҇нїе , ра́дᲂсти и҆спᲂлнѧ́ющесѧ .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . боⷢ҇ . Вᲂсто́къ дв҃о пречⷭ҇таѧ была̀ є҆сѝ , сл҃нца пра́вды , и҆́м̾же неразꙋ́мїѧ тмы̀ и҆зба́вихᲂмсѧ .

пѣ́снь , и҃ . і҆рмо́съ . твᲂрца̀ всеѧ̀ тва́ри .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . Бг҃а пло́тїю распина́ема сл҃нце ви́дѣвъ , пᲂмрача́шесѧ , и҆ землѧ̀ пᲂкᲂлѣба́сѧ , и҆ раз̾пада́шесѧ ка́менїе .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . И҆з̾ ме́ртвыхъ тридне́венъ хрⷭ҇то́съ вᲂста̀ , и҆ сᲂвᲂз̾ста́ви всѧ̀ , и҆́же во тмѣ̀ и҆ сѣ́ни сме́ртнѣй сѣдѧ́щїѧ .

бл҃же́ни чи́стїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Ꙗ҆ви́лсѧ є҆сѝ по вᲂста́нїи свᲂи́мъ а҆пⷭ҇лѡмъ , и҆ и҆спо́лнилъ є҆сѝ си́хъ весе́лїѧ неи҆з̾гл҃анна ще́дре .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . Ѻ҆ц҃а прест҃а́гѡ , и҆ сло́ва сᲂпрⷭ҇нᲂсꙋ́щна , и҆ дх҃а бж҃їѧ несᲂзда́нна трⷪ҇цꙋ пᲂе́мъ непреста́ннѡ .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . боⷢ҇ . И҆зба́ви на́съ мꙋ́ки , и҆ вѣ́чнагѡ ѡ҆сꙋже́нїѧ , тебѐ вᲂспѣва́ющїѧ , бг҃ᲂрᲂди́тельнице чⷭ҇таѧ .

пѣ́снь , ѳ҃ . і҆рмо́съ . тѧ бл҃же́ннꙋю в̾ жена́хъ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . Прᲂсте́рлъ є҆сѝ дла́ни на крⷭ҇тѣ̀ , прᲂсте́ртаго мѧ мно́гими кᲂва́рствы льсти́вагѡ , ще́дре прїѡбрѣта́ѧ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Всѧ̀ сᲂвᲂскр҃си́лъ є҆сѝ бл҃же , в̾ше́дъ во а҆́дскаѧ врата̀ хрⷭ҇тѐ , и҆ сᲂвᲂздви́глъ є҆сѝ пᲂю́щїѧ чл҃кᲂлю́бче твᲂю̀ си́лꙋ .

сла́ва . И҆стᲂчи́лъ є҆сѝ хрⷭ҇тѐ ме́ртвымъ живо́тъ , и҆ вᲂскр҃съ тридне́венъ , и҆ вᲂз̾несе́сѧ во сла́вѣ , зрѧ́щимъ честны́мъ ᲂу҆ченико́мъ .

и҆ ны́нѣ , боⷢ҇ . Ми́лᲂстива на́мъ сᲂдѣ́лай пречⷭ҇таѧ дв҃о , твᲂегѡ̀ сн҃а и҆ бг҃а всѣ́хъ , вѣ́рᲂю вᲂспѣва́ющимъ тѧ̀ .

Вто́йже , пнⷣе , ве́черъ . на гдⷭ҇и вᲂзва́хъ , стⷯры , гла́съ , є҃ . Ѻ҆слѣпле́нїе ꙗ҆ви́сѧ слѣпы́и , ско́ро ви́дѧщимъ , ѡ҆мрача́ѧ и҆ ра́зꙋмъ и҆ дш҃ꙋ и҆ ᲂу҆́мъ , и҆́же сегѡ̀ зрѧ́щимъ внеза́пнᲂе прᲂзре́нїе . є҆го́же пригласи́вше , вᲂпрᲂша́хꙋ съ ꙗ҆́рᲂстїю , ка́кѡ ны́нѣ зри́ши , ꙗ҆́кѡ є҆ди́нъ сы́и ѿ ви́дѧщихъ свѣ́тъ , слѣ́пъ сы́и ѿ рᲂже́нїѧ ; и҆́же присѣдѧ́и стезѧ́мъ и҆ прᲂсѧ̀ . тѣ́мже пᲂказа̀ и҆́же свѣ́тъ пᲂдава́ющаго , и҆ сᲂзда́вшаго свѣти́ла ꙗ҆́же въ ми́рѣ . ѿ ни́хъ же прᲂпᲂвѣ́даетсѧ сн҃ъ бж҃їи пребез̾нача́льныи , в̾ пᲂслѣ́днѧѧ и҆з̾ дв҃ы чл҃къ ꙗ҆ви́сѧ за млрⷭ҇дїе ѿ бжⷭ҇твенагѡ дх҃а . На высᲂтꙋ̀ взы́де свѣтᲂно́сныхъ дѣѧ́нїи , свѣ́тᲂмъ бг҃ᲂразꙋ́мїѧ прᲂсвѣ́щьсѧ слѣпы́и , а҆́ще и҆ пе́рвѣе ѡ҆слѣпи́сѧ во ѡ҆бᲂи́хъ , терпѧ̀ тѣле́снᲂе и҆ ᲂу҆́мнᲂе ѡ҆мраче́нїе . и҆́же ѿ́ слᲂва но́выми свѣтᲂли́тїи , прᲂсвѣ́щьсѧ ве́сь , и҆ свѣтᲂда́вца пᲂзнава́етъ , и҆ свѣ́тꙋ зижди́телѧ , вᲂсїѧ́вшаго и҆́з̾ грᲂба тридне́вно , и҆ пᲂд̾со́лнечнꙋю ᲂу҆ѧсни́вшаго вᲂста́нїемъ . и҆зъ него́же вᲂсїѧ̀ свѣ́тъ вᲂскрⷭ҇нїѧ , сꙋ́щимъ во тмѣ̀ держи́мымъ чл҃кѡмъ , за милᲂсе́рдїе и҆ ве́лїю млⷭ҇ть . Сїѧ́нїе свѣтᲂно́сно прᲂсїѧ́вше зрѧ́ще прᲂѧвле́нно в̾ сꙋбо́тꙋ , свѣтᲂно́снагѡ слѣпча̀ , и҆́же зако́нми мѡѷсе́ѧ смꙋща́еми , нра́вᲂмъ ѡ҆слѣплѧ́ющесѧ зрѧ́тъ сѣ́нь , ѡ҆сѣне́нїѧ неразꙋмѣ́юще , разᲂрѧ́юща зако́ны , и҆з̾ него́же неви́дѣша свѣтᲂда́телѧ , и҆́же сло́вᲂмъ сꙋбо́тꙋ сᲂдѣ́лавша во ѡ҆чи́вшаго слѣпа́го и҆змᲂве́нїемъ , и҆ плюнᲂве́нїе но́вагѡ чꙋдᲂтвᲂре́нїѧ . с̾ ни́мъ смѣша́еми , бг҃а тᲂго̀ ᲂу҆́зримъ , ѡ҆слѣпле́нїе фарисе́йскᲂе ѡ҆блича́юще , видѣ́нїемъ лꙋ́чшаго .

та́же , стихѣ́ры , въ минѣ́и , г҃ . сла́ва , и҆ ны́нѣ . гла́съ , и҃ . Пра́вдѣ сл҃нце мы́сленнᲂе хрⷭ҇тѐ бж҃е , и҆́же и҆з̾ ᲂу҆тро́бы свѣ́та лише́ннагѡ , твᲂи́мъ пречи́стымъ прикᲂснᲂве́нїемъ прᲂсвѣти́выи ѡ҆бᲂю́дꙋ , и҆ на́ши ѻ҆́чи дш҃е́вныѧ ѡ҆зари́въ , сн҃ы дню̀ пᲂкажѝ , да вѣ́рᲂю вᲂпїе́мъ ти . мно́гᲂе твᲂѐ и҆ неи҆зрече́ннᲂе , є҆́же на на́съ бл҃гᲂꙋтро́бїе , чл҃кᲂлю́бче сла́ва тебѣ̀ .

На стихо́внѣ , стихѣ́ры . гла́съ , є҃ . Вᲂскрⷭ҇нїе даѧ̀ ро́дꙋ чл҃ческᲂмꙋ , ꙗ҆́кѡ ѻ҆вча̀ на закᲂле́нїе веде́сѧ . ᲂу҆страши́шасѧ сегѡ̀ кнѧ́зи а҆́дъстїи , и҆ взѧ́шасѧ врата̀ плаче́внаѧ . вни́де бо цр҃ь сла́вы хрⷭ҇то́съ , гл҃ѧ ᲂу҆́зникѡмъ и҆зыди́те , сꙋ́щїи во тмѣ̀ ѿкры́йтесѧ .

сти́хъ : к̾ тебѣ̀ вᲂз̾ведо́хъ ѻ҆́чи мᲂѝ . Мно́жество прегрѣше́нїи мᲂи́хъ пре́зри гдⷭ҇и , и҆́же ѿ дв҃ы рᲂжде́исѧ , и҆ срⷣце мᲂѐ ѡ҆чи́сти , цр҃кᲂвь то̀ сᲂтвᲂрѝ ст҃о́мꙋ твᲂемꙋ̀ дх҃ꙋ . не ѿри́ни и҆ менѐ ѿ твᲂегѡ̀ лица̀ , без̾чи́сленꙋю и҆мѣ́ѧи ве́лїю ми́лᲂсть .

сти́хъ : пᲂми́лꙋй на́съ гдⷭ҇и . мⷱ҇ꙋ . Щито́мъ вѣ́ры ѡ҆бо́лкшесѧ , и҆ ѻ҆́бразᲂмъ крⷭ҇тнымъ себѐ ᲂу҆крѣпи́вше , к̾ мꙋ́камъ мꙋ́жески вда́шасѧ , и҆ дїа́вᲂлю гᲂрды́ню и҆ ле́сть ᲂу҆праздни́ша , ст҃і́и твᲂѝ гдⷭ҇и . тѣ́хъ мᲂльба́ми ꙗ҆́кѡ всеси́ленъ бг҃ъ , ми́рꙋ смире́нїе низ̾пᲂслѝ , и҆ дш҃а́мъ на́шимъ ве́лїю ми́лᲂсть .

сла́ва , и҆ ны́нѣ . гла́съ , и҃ . И҆́же за млрⷭ҇дїе млⷭ҇ти вᲂплᲂти́всѧ хрⷭ҇тѐ бж҃е , свѣ́та лише́наго ѿ лᲂже́снъ , млрⷭ҇дїемъ не и҆зрече́нныхъ щедро́тъ , сїѧ́нїю бжⷭ҇твенᲂмꙋ спᲂдо́билъ є҆сѝ , сегѡ̀ зѣ́ницамъ пе́рстїю сᲂзда́тельными пе́рсты твᲂи́ми прикᲂснꙋ́всѧ . са́мъ и҆ ны́нѣ свѣтᲂда́телю , и҆ на́ша ѡ҆зарѝ дш҃е́внаѧ чꙋ́вства , ꙗ҆́кѡ є҆ди́нъ млрⷭ҇дъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , вᲂскрⷭ҇нъ . сла́ва , и҆ ны́нѣ , боⷢ҇ .= є҆ктенїѧ̀ . и҆ ѿпꙋ́стъ . На па́вечерницѣ , по дᲂсто́йнѣ , кᲂнда́къ , ѡ҆ слѣпо́мъ . =и҆ про́чее ѡ҆бы́чно .

Во вто́рникъ , ѕ҃ ѧ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь , вᲂскрⷭ҇нъ , вⷤ . сла́ва , и҆ ны́нѣ , боⷢ҇ . =По а҃ , стихᲂло́гїи , сѣда́ленъ . гла́съ , є҃ . Гдⷭ҇и ме́ртвъ нарече́сѧ , ᲂу҆мерщвле́и сме́рть . во́грᲂбѣ пᲂлᲂжи́всѧ , и҆спражне́и гро́бы . верхꙋ̀ во́ини гро́бъ стрежа́хꙋ , ни́зꙋ ꙗ҆́же ѿ́ вѣка ме́ртвыѧ вᲂскреси́лъ є҆сѝ , всеси́льне и҆ непᲂстижи́ме гдⷭ҇и сла́ва тебѣ̀ . =сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . Дш҃е ꙗ҆́же здѣ̀ вре́менна , та́мᲂшнѧѧ же вѣ́чна , зрѧ̀ сꙋди́ще , и҆ на прⷭ҇то́лѣ сꙋдїю̀ , и҆ трепе́щꙋщи ѿвѣ́та , про́чее со тща́нїемъ ѡ҆брати́сѧ , сꙋ́дъ бо непрᲂща́емъ . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Чꙋдеса̀ ст҃ы́хъ твᲂи́хъ мч҃нкъ стѣ́нꙋ неразᲂри́мꙋю на́мъ дарᲂва̀ хрⷭ҇тѐ бж҃е . тѣ́хъ мᲂли́твами , сᲂвѣ́ты ꙗ҆зы́кᲂмъ разᲂрѝ , и҆ црⷭ҇твїѧ ски́петры ᲂу҆твердѝ , ꙗ҆́кѡ є҆ди́нъ бл҃гъ и҆ чл҃кᲂлю́бецъ . сла́ва , и҆ ны́нѣ , боⷢ҇ . Неи҆скꙋсᲂбра́чнаѧ мт҃и бг҃ᲂрᲂди́тельнице пречⷭ҇таѧ , ꙗ҆́же є҆́в̾винꙋ печа́ль на ра́дᲂсть претвᲂри́вши , вᲂспѣва́емъ тѧ и҆ сла́вимъ чи́стаѧ , ꙗ҆́кѡ и҆звела̀ є҆сѝ на́съ ѿ дре́внїѧ клѧ́твы . и҆ нн҃ѣ мᲂлѝ непреста́ннѡ всепѣ́таѧ и҆ прест҃а́ѧ , свᲂегѡ̀ сн҃а и҆ влⷣкꙋ спастѝ на́съ .

По в҃ , стихᲂло́гїи , сѣда́ленъ . гла́съ , є҃ . Прᲂзрѣ́въ ви́дитъ слѣпы́и сᲂзда́нїе , и҆ є҆́же чл҃кѡмъ житїѐ пре́же сᲂзда́вшагѡ . неви́дѧ ѿ рᲂже́нїѧ вели́кагѡ сл҃нца , тѣ́мже и҆ бл҃гᲂдаре́нїе бг҃ꙋ вᲂз̾сыла́етъ ѿ дш҃и , сегѡ̀ ви́дѣвъ ѻ҆́бразъ по пᲂдо́бїю со́здана , и҆́же ѻ҆́бразъ сᲂзда́вшаго мѧ . сла́ва , и҆ ны́нѣ , то́йже .

та́же , вᲂскрⷭ҇нїе хрⷭ҇то́во , аⷤ . ѱл҃о́мъ , н҃ . кано́нъ , ѡ҆ слѣпо́мъ , на и҃ . и҆ въ минѣ́и , на д҃ .

На хвали́тѣхъ , стⷯры , на д҃ . гла́съ , є҃ . Гдⷭ҇и , вереѝ вѣ́чныѧ сᲂкрꙋши́въ , и҆ ᲂу҆́зы растерза́въ , ѿ́ грᲂба вᲂскр҃се , ѡ҆ста́вль свᲂѧ̀ пᲂгреба́тельнаѧ , во свидѣ́тельство и҆́стинѣ , тридне́внагѡ пᲂгребе́нїѧ твᲂегѡ̀ . и҆ пред̾вари́въ в̾ галиле́и , и҆́же в̾ пеще́рѣ стрего́мыи . вели́каѧ твᲂѧ̀ млⷭ҇ть , непᲂсти́жимыи сп҃се пᲂми́лꙋй на́съ . двⷤа . Оу҆вы̀ мнѣ̀ , что̀ ᲂу҆пᲂдо́бихсѧ а҆́зъ непло́днѣй смᲂко́вницѣ , и҆ бᲂю́сѧ клѧ́твы с̾ пᲂсѣче́нїемъ . но нбⷭ҇ныи дѣ́лателю хрⷭ҇тѐ бж҃е , ѡ҆лѧдѣ́вшꙋю ми дш҃ꙋ плᲂдᲂно́снꙋ пᲂкажѝ , и҆ ꙗ҆́кѡ блꙋ́днагѡ сн҃а прїими́ мѧ и҆ пᲂми́лꙋй мѧ . мⷱ҇ꙋ . Страстᲂте́рпцы твᲂѝ гдⷭ҇и , чино́мъ а҆́нг҃льскимъ пᲂдо́бѧщесѧ , ꙗ҆́кѡ беспло́тнїи мꙋ́ки претерпѣ́ша , є҆динᲂмы́сленѡ ᲂу҆пᲂва́нїе и҆мꙋ́ще , ѡ҆бѣща́нныхъ бл҃гъ наслажде́нїе . тѣ́хъ мл҃твами хрⷭ҇тѐ бж҃е на́шъ , смире́нїе да́рꙋй ми́рꙋ твᲂемꙋ̀ , и҆ дш҃а́мъ на́шимъ ве́лїю млⷭ҇ть . сла́ва , и҆ ны́нѣ . гла́съ , и҃ . Кто̀ вᲂз̾гл҃етъ си́лы твᲂѧ̀ хрⷭ҇тѐ ; и҆лѝ кто̀ и҆зᲂчте́тъ чꙋде́съ твᲂи́хъ мно́жества . сꙋгꙋ́бъ бо ꙗ҆́кѡ ви́дѣнъ бы́сть на землѝ за бл҃гᲂсть , сꙋгꙋ́бы и҆ цѣльбы̀ недꙋ́гꙋющимъ даѧ́ше , нето́чїю бо тѣле́сныѧ ѻ҆́чи ѿве́рзлъ є҆сѝ , и҆́же ѿ ᲂу҆тро́бы слѣпо́мꙋ , но и҆ дш҃е́вныѧ . тѣ́мже бг҃а тѧ̀ и҆спᲂвѣ́да кры́ющагᲂсѧ , и҆ всѣ́мъ пᲂдаю́ща ве́лїю млⷭ҇ть .

На стихо́внѣ , стихѣ́ры . гла́съ , в҃ . поⷣ . до́ме є҆вфра́фᲂвъ .= Ѽ =сло́во ѻ҆́ч҃ее ,꙳ сла́ва твᲂемꙋ̀ вᲂста́нїю ,꙳ и҆́мже свᲂбᲂди́сѧ ꙳ чл҃ческїи ро́дъ ,꙳ пе́рвагѡ ѡ҆сꙋже́нїѧ .

сти́хъ : при́зри на мѧ̀ ,꙳ и҆ пᲂми́лꙋй мѧ̀ . Ѻ҆́ко мᲂѐ слѣпо́е ꙳ во ѻ҆чи́выи ,꙳ и҆́же ѿ рᲂже́нїѧ слѣпа́гѡ сп҃се мо́й ,꙳ и҆ дш҃е́внᲂе ты̀ свѣ́тᲂмъ твᲂи́мъ прᲂсвѣтѝ ,꙳ да вᲂспѣва́ю тѧ .

сти́хъ : стᲂпы̀ мᲂѧ̀ напра́ви ,꙳ по слᲂвесѝ твᲂемꙋ̀ . Кто́ ти ѻ҆́чи ꙳ ѿве́рзе вᲂпїѧ́хꙋ ꙳ слѣпо́мꙋ фарисе́и ,꙳ и҆ видѣ́нїе ти пᲂда́стъ ,꙳ ꙗ҆́вѣ на́мъ вᲂзвѣстѝ .

сла́ва , и҆ нн҃ѣ . глаⷭ҇ , и҆ поⷣ , то́йже . Въ пло́ть мᲂю̀ ѡ҆бо́лксѧ ,꙳ и҆сцѣлѧ́еши ꙳ стра́сти сеѧ̀ сло́ве ,꙳ и҆ вᲂскр҃съ ѿ́ грᲂба ,꙳ на ѻ҆́ч҃їи прⷭ҇то́лѣ пᲂчтѐ .

та́же , бл҃го є҆́сть . и҆ ча́съ , а҃ . и҆ ѿпꙋ́стъ .

На бл҃же́ннах̾ , трипѣ́снец̾ . твᲂре́нїе і҆ѡ́сифᲂво , гла́съ , є҃ . пѣ́снь , в҃ . і҆рмо́съ . ви́дите ви́дите .

во црⷭ҇твїи сѝ є҆гда̀ прїи́деши , пᲂмѧнѝ на́съ гдⷭ҇и . бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Ꙗ҆́кᲂже вᲂз̾дви́же дре́вле ѕмїю̀ мѡѷсе́й , та́кѡ на́ древо вᲂз̾дви́жесѧ ще́дре , льсти́вагѡ врага̀ ꙗ҆́дъ ѕмі́евъ и҆ ѕло́бꙋ ѿгᲂнѧ̀ , и҆ спаса́ѧ на́съ .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Сла́ва сла́вѣ твᲂе́й , препрᲂсла́влене і҆с҃е . пᲂлᲂжи́в̾бᲂсѧ во́ грᲂбѣ ꙗ҆́кѡ ме́ртвъ во́лею , вᲂскр҃слъ є҆сѝ ꙗ҆́кѡ бг҃ъ . и҆ сᲂвᲂздви́глъ є҆сѝ ми́ръ свᲂи́мъ вᲂста́нїемъ ꙗ҆́кѡ всеси́ленъ .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . Сѐ вᲂста̀ живᲂда́вецъ и҆з̾ ме́ртвыхъ , вᲂпїѧ́ше жена́мъ дре́вле а҆́нг҃лъ блиста́ѧисѧ . непла́читесѧ ᲂу҆́бѡ про́чее , но а҆пⷭ҇лѡмъ вᲂста́нїе вᲂз̾вѣсти́те .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . боⷢ҇ . Ст҃ы́и гдⷭ҇и , и҆́же ѿ дв҃ы чⷭ҇тыѧ рᲂжде́исѧ , распе́нжесѧ во́лею и҆ пᲂгребе́нъ , и҆ вᲂскр҃съ и҆з̾ ме́ртвыхъ , тᲂѧ̀ мᲂльба́ми твᲂю̀ млⷭ҇ть всѣ́мъ низ̾пᲂслѝ .

пѣ́снь , и҃ . і҆рмо́съ . твᲂрца̀ всеѧ̀ тва́ри .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Пѣснᲂсло́вимъ твᲂѐ хрⷭ҇тѐ , тридне́внᲂе пᲂгребе́нїе , и҆ пресвѣ́тлᲂе вᲂскрⷭ҇нїе , вѣ́рᲂю прⷭ҇нѡ вᲂсхвалѧ́емъ .

бл҃же́ни чи́стїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Распе́ншагᲂсѧ на́съ ра́ди , и҆ пᲂлᲂжи́вшагᲂсѧ во́ грᲂбѣ , и҆ свᲂи́мъ вᲂста́нїемъ прᲂсвѣ́щьша ми́ръ , хрⷭ҇та̀ славᲂсло́вимъ .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . Сл҃нце незахᲂди́мᲂе хрⷭ҇тѐ , пᲂгребы́исѧ и҆ вᲂскр҃се и҆з̾ ме́ртвыхъ , прᲂсвѣтѝ всѣ́хъ на́съ пᲂмышле́нїѧ , сла́вити тѧ непреста́ннѡ .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . боⷢ҇ . Мᲂльбꙋ̀ и҆́же и҆з̾ тебѐ вᲂплᲂти́вшемꙋсѧ сло́вꙋ , сᲂтвᲂрѝ бцⷣе дв҃о , ꙗ҆́кѡ да на́съ ᲂу҆ще́дритъ смире́ныхъ .

пѣ́снь , ѳ҃ . і҆рмо́съ . велича́емъ хрⷭ҇тѐ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . Ꙗ҆́кѡ а҆́гнецъ на закᲂле́нїе приведе́сѧ влⷣко хрⷭ҇тѐ бж҃е . и҆ ꙗ҆́звами свᲂи́ми , и҆́х̾же во́лею претерпѣ̀ , бѣсо́мъ всѧ́кᲂе лꙋка́вᲂе мно́жество ᲂу҆ѧ́звилъ є҆сѝ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Сᲂкрꙋши́шасѧ вереѧ̀ а҆́дᲂвы прише́ствїемъ твᲂи́мъ хрⷭ҇тѐ , и҆ вᲂста́ша и҆́же ѿ́ вѣка и҆стлѣ́вшїи , вᲂспѣва́юще тѧ ꙗ҆́кѡ пᲂбѣди́телѧ и҆ всѣ́ми владꙋ́ща .

сла́ва . Ст҃о́е твᲂѐ хрⷭ҇тѐ є҆́же и҆́з̾ грᲂба вᲂста́нїе , живо́тъ є҆́сть , вᲂзнесе́нїе же прⷭ҇нѡ и҆ весе́лїе , є҆́же вѣ́рᲂю всѝ мы̀ ны́нѣ пра́зднꙋемъ .

и҆ ны́нѣ , боⷢ҇ . Свѣ́тъ на́мъ и҆́же ѿ́ свѣта дв҃о пречи́стаѧ ро́ждьши , разᲂри́ла є҆сѝ без̾бо́жїѧ тмꙋ̀ . тѣ́мже всѝ земнᲂро́днїи вѣ́рᲂю тѧ̀ велича́емъ .

Во то́йже , вто́рникъ , ве́черъ . на гдⷭ҇и вᲂзва́хъ , стⷯры , ѡ҆ слѣпо́мъ , на́ ѕ҃ . гла́съ , в҃ . И҆́же слѣпы́и рᲂди́всѧ , во свᲂе́мъ по́мыслѣ глаго́лаше , є҆да̀ а҆́зъ грѣ́хъ ра́ди рᲂди́тельныхъ рᲂди́хсѧ без̾ ѻ҆чїю̀ ; є҆да̀ а҆́зъ за невѣ́рїе ꙗ҆зы́къ рᲂди́хсѧ во ѡ҆бличе́нїе ; недᲂмышлѧ́юсѧ вᲂпраша́ти , кᲂгда̀ но́щь , кᲂгда̀ де́нь ; нетерпи́тѣми но́зѣ ка́меннагѡ претыка́нїѧ . неви́дѣхъ бо сл҃нца сїѧ́юща , ни ѻ҆́браза менѐ сᲂзда́вшагѡ . но мᲂлю́тисѧ хрⷭ҇тѐ бж҃е , при́зри на мѧ̀ и҆ пᲂми́лꙋй мѧ .= Ми́мѡ хᲂдѧ̀ і҆с҃ъ ѿ ст҃и́лища , ѡ҆брѣ́те чл҃ка слѣ́па ѿ рᲂжде́нїѧ , и҆ ᲂу҆милᲂсе́рдивсѧ пᲂлᲂжѝ бре́нїе на ѻ҆́чїю є҆гѡ̀ , и҆ речѐ к̾ немꙋ̀ , и҆дѝ ᲂу҆мы́исѧ в̾ силᲂа́мѣ , и҆ ᲂу҆мы́всѧ прᲂзрѣ̀ , сла́вꙋ вᲂз̾сыла́ѧ бг҃ꙋ . сᲂсѣ́ди же є҆гѡ̀ гл҃ахꙋ є҆мꙋ̀ , кто́ ти зѣ́ницы ѿве́рзе , є҆ю́же ни кто́же ѿ зрѧ́щихъ и҆сцѣли́ти вᲂз̾мо́жетъ ; ѻ҆́нъ же вᲂзᲂпи́въ речѐ , чл҃къ і҆с҃ъ гл҃емыи , ѻ҆́нъ ми речѐ , ᲂу҆мы́исѧ в̾ силᲂа́мѣ , и҆ прᲂзрѣ́хъ . то́й є҆́сть вᲂи́стинꙋ є҆го́же речѐ мѡѷсе́й в̾ зако́нѣ , хрⷭ҇та̀ месі́ю . то́й є҆́сть сп҃съ дш҃а́мъ на́шимъ . =гла́съ , д҃ . Всѐ житїѐ слѣпы́и но́щь пᲂмышлѧ́ѧ , вᲂзᲂпѝ к̾ тебѣ̀ , гдⷭ҇и ѿве́рзи ми зѣ́ницы сн҃е дв҃дᲂвъ сп҃се на́шъ , да со всѣ́ми и҆ а҆́зъ вᲂспᲂю̀ твᲂю̀ си́лꙋ . гла́съ , є҃ . Гдⷭ҇и ми́мо хᲂдѧ̀ дре́вле пꙋте́мъ , ѡ҆брѣ́те чл҃ка слѣ́па ѿ рᲂжде́нїѧ , и҆ ᲂу҆дивле́ни бы́вше ᲂу҆ченицы̀ , вᲂпрᲂша́хꙋ тѧ гл҃юще , ᲂу҆чи́телю кто̀ сᲂгрѣшѝ ; се́йли и҆лѝ рᲂди́телѧ є҆гѡ̀ , да слѣ́пъ рᲂди́сѧ ; ты́же сп҃се мо́й вᲂпїѧ́ше к̾ ни́мъ , ни се́й сᲂгрѣшѝ , ни рᲂди́телѧ є҆гѡ̀ , но да ꙗ҆вѧ́тсѧ дѣ́ла бж҃їѧ на не́мъ , мнѣ́ бо пᲂдᲂба́етъ дѣ́лати дѣ́ла пᲂсла́вшагѡ мѧ , ꙗ҆́же никто́же мо́жетъ дѣ́лати ; и҆ сїѧ̀ ре́къ , плю́нꙋвъ до́лꙋ , и҆ бре́нїе сᲂтво́рь , пᲂма́за ѻ҆́чи є҆мꙋ̀ , ре́къ к̾ немꙋ̀ , и҆дѝ ᲂу҆мы́исѧ в̾ силᲂа́мстѣй кꙋпѣ́ли . ѻ҆́нъ же ᲂу҆мы́всѧ здра́въ бы́сть , и҆ вᲂпїѧ́ше к̾ тебѣ̀ , вѣ́рꙋю гдⷭ҇и и҆ пᲂклᲂнѧ́ютисѧ . тѣ́мже вᲂпїе́мъ и҆ мы̀ пᲂми́лꙋй на́съ . гла́съ , и҃ . Пра́вдѣ сл҃нце мы́сленнᲂе хрⷭ҇тѐ бж҃е , и҆́же и҆з̾ ᲂу҆тро́бы свѣ́та лише́ннагѡ , твᲂи́мъ пречи́стымъ прикᲂснᲂве́нїемъ прᲂсвѣти́выи ѡ҆бᲂю́дꙋ , и҆ на́ши ѻ҆́чи дш҃е́вныѧ ѡ҆зари́въ , сы́ны дню̀ пᲂкажѝ , да вѣ́рᲂю вᲂпїе́мъ ти . мно́гᲂе твᲂѐ и҆ неи҆зрече́ннᲂе , є҆́же на на́съ бл҃гᲂꙋтро́бїе , чл҃кᲂлю́бче сла́ва тебѣ̀ . И҆́же за млрⷭ҇дїе млⷭ҇ти вᲂплᲂти́всѧ хрⷭ҇тѐ бж҃е , свѣ́та лише́наго ѿ лᲂже́снъ , млрⷭ҇дїемъ не и҆зрече́нныхъ щедро́тъ , сїѧ́нїю бжⷭ҇твенᲂмꙋ спᲂдо́билъ є҆сѝ , сегѡ̀ зѣ́ницамъ пе́рстїю сᲂзда́тельными пе́рсты твᲂи́ми прикᲂснꙋ́всѧ . са́мъ и҆ ны́нѣ свѣтᲂда́телю , и҆ на́ша ѡ҆зарѝ дш҃е́внаѧ чꙋ́вства , ꙗ҆́кѡ є҆ди́нъ млрⷭ҇дъ . сла́ва , и҆ ны́нѣ . гла́съ , и҃ . Кто̀ вᲂз̾гл҃етъ си́лы твᲂѧ̀ хрⷭ҇тѐ , и҆лѝ кто̀ и҆зᲂчте́тъ чꙋде́съ твᲂи́хъ мно́жество . сꙋгꙋ́бъ бо ꙗ҆́кѡ ви́дѣнъ бы́сть на землѝ за бл҃гᲂсть , сꙋгꙋ́бы и҆ цѣльбы̀ недꙋ́гꙋющимъ даѧ́ше , нето́чїю бо тѣле́сныѧ ѻ҆́чи ѿве́рзлъ є҆сѝ , и҆́же ѿ ᲂу҆тро́бы слѣпо́мꙋ , но и҆ дш҃е́вныѧ . тѣ́мже бг҃а тѧ̀ и҆спᲂвѣ́да кры́ющагᲂсѧ , и҆ всѣ́мъ пᲂдаю́ща ве́лїю млⷭ҇ть .

На стихо́внѣ , стⷯра , вᲂскрⷭ҇на . гла́съ , є҃ . Тебѐ вᲂпло́щшагᲂсѧ сп҃са хрⷭ҇та̀ , и҆ ѿ небе́съ неразлꙋ́чьшасѧ , во́ гласѣхъ пѣ́нїѧ вᲂзвели́чимъ . ꙗ҆́кѡ крⷭ҇тъ и҆ сме́рть прїѧ́тъ за́ рᲂдъ на́шъ , ꙗ҆́кѡ чл҃кᲂлю́бецъ гдⷭ҇и , сᲂкрꙋши́выи а҆́дᲂва врата̀ , и҆ тридне́вно вᲂскрⷭ҇лъ є҆сѝ , спаса́ѧ дш҃а на́ша .

та́же , стихѣ́ры па́сцѣ .= сти́хъ : да вᲂскрⷭ҇нетъ бг҃ъ ,꙳ и҆ разы́дꙋтсѧ вразѝ є҆гѡ̀ . П=а́сха сщ҃е́ннаѧ на́мъ дне́сь пᲂказа́сѧ , па́сха но́ва ст҃а́ѧ , па́сха таи́нственнаѧ , па́сха всечестна́ѧ , па́сха хрⷭ҇та̀ и҆зба́вителѧ , па́сха непᲂро́чнаѧ , па́сха вели́каѧ , па́сха вѣ́рнымъ , па́сха двѣ́ри ра́йскїѧ на́мъ ѿверза́ющаѧ , па́сха всѣ́хъ ѡ҆сщ҃а́ющаѧ вѣ́рныхъ .

сти́хъ : ꙗ҆́кѡ и҆счеза́етъ ды́мъ ,꙳ да и҆сче́знꙋтъ . Прїиди́те ѿ видѣ́нїѧ жены̀ бл҃гᲂвѣ́стницы , и҆ сїѡ́нꙋ рцы́те , прїимѝ ѿ на́съ ра́дᲂсть бл҃гᲂвѣ́щенїѧ вᲂскрⷭ҇нїѧ хрⷭ҇то́ва , красꙋ́йсѧ и҆ ликꙋ́й , и҆ ра́дꙋисѧ і҆єрⷭ҇ли́ме , цр҃ѧ хрⷭ҇та̀ ᲂу҆́зрѣвъ и҆́з̾грᲂба , ꙗ҆́кѡ жениха̀ и҆схᲂдѧ́ща .

сти́хъ : та́кѡ да пᲂги́бнꙋтъ грѣ́шницы ѿ лица̀ бж҃їѧ ,꙳ а҆ пра́ведницы да вᲂз̾веселѧ́тсѧ . Мѷрѡно́сицы жены̀ , ѕѣлѡ̀ ра́нѡ пред̾ста́ша гро́бꙋ живᲂда́вца , и҆ ѡ҆брѣто́ша а҆́нг҃ла на ка́мени сѣдѧ́ща , и҆ то́й прᲂвѣща́въ и҆́мъ , си́це глаго́лаше , что̀ и҆́щете жива́гѡ с̾ ме́ртвыми ; что̀ пла́чете нетлѣ́ннаго во тлѝ ; ше́дше прᲂпᲂвѣ́дите ᲂу҆ченико́мъ є҆гѡ̀ .

сти́хъ : се́й де́нь и҆́же сᲂтвᲂрѝ гдⷭ҇ь ,꙳ вᲂз̾ра́дꙋемсѧ и҆ вᲂз̾весели́мсѧ в̾ ѻ҆́нь . Па́сха кра́сна , па́сха гдⷭ҇нѧ па́сха , па́сха всечестна́ѧ на́мъ вᲂз̾сїѧ̀ . па́сха , ра́дᲂстїю дрꙋ́гъ дрꙋ́га прїи́мемъ . Ѽ па́сха , и҆збавле́нїе ско́рби , и҆́бо и҆́з̾ грᲂба дне́сь , ꙗ҆́кѡ ѿ черто́га вᲂз̾сїѧ̀ хрⷭ҇то́съ , жены̀ ра́дᲂсти и҆спо́лни глаго́лѧ , прᲂпᲂвѣ́дите а҆пⷭ҇лѡмъ .

сла́ва , и҆ ны́нѣ . гла́съ , то́йже . Вᲂскрⷭ҇нїѧ де́нь , прᲂсвѣти́мсѧ тᲂржество́мъ , и҆ дрꙋ́гъ дрꙋ́га прїи́мемъ , и҆ рце́мъ бра́тїе , и҆ ненави́дѧщимъ на́съ , прᲂсти́мъ всѧ̀ вᲂскрⷭ҇нїемъ , и҆ та́кѡ вᲂзᲂпїе́мъ , хрⷭ҇то́съ вᲂскр҃се и҆з̾ ме́ртвыхъ , сме́ртїю сме́рть пᲂпра́въ , и҆ сꙋ́щимъ во грᲂбѣ́хъ живо́тъ дарᲂва̀ .

Хрⷭ҇то́съ вᲂскр҃се и҆з̾ме́ртвыхъ сме́ртїю на сме́рть настꙋпѝ , и҆ гро́бнымъ живо́тъ дарᲂва̀ , гⷤ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , вᲂскрⷭ҇нъ . сла́ва , и҆ ны́нѣ , боⷢ҇ .= є҆ктенїѧ̀ . и҆ ѿпꙋ́стъ , без̾ крⷭ҇та̀ . гл҃етъ , і҆єре́й : вᲂскр҃съ и҆з̾ ме́ртвыхъ , и҆ ст҃а́гѡ пᲂмина́етъ , є҆го́же бꙋ́детъ де́нь . =и҆ мнᲂгᲂлѣ́тїе . рѧдᲂво́мꙋ же ст҃о́мꙋ слꙋ́жба пᲂе́тсѧ на па́вечерницѣ .

На па́вечерницѣ , по дᲂсто́йнѣ , кᲂнда́къ , ѡ҆ слѣпо́мъ . =сла́ва , и҆ ны́нѣ , =па́сцѣ .

На пᲂлꙋ́нᲂщницѣ , по а҃ мъ трⷭ҇то́мъ : трᲂпа́рь , вᲂскрⷭ҇нъ . сла́ва , и҆ ны́нѣ , боⷢ҇ . по в҃ мъ трⷭ҇то́мъ : кᲂнда́къ , па́сцѣ . та́же , гдⷭ҇и пᲂми́лꙋй , ві҃ . и҆ ѿпꙋ́стъ . мл҃твы же , пᲂмѧнѝ гдⷭ҇и и҆́же в̾ наде́жи , и҆ пᲂмѧ́нника за ᲂу҆пᲂко́й , негл҃емъ .

Въ сре́дꙋ , ѕ҃ ѧ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь , вᲂскрⷭ҇нъ . гла́съ , є҃ . Сᲂбез̾нача́льнᲂе сло́во ѻ҆ц҃ꙋ и҆ дх҃ᲂви , є҆́же ѿ дв҃ы ро́ждьшеесѧ на спасе́нїе на́ше , вᲂспᲂе́мъ вѣ́рнїи и҆ пᲂклᲂни́мсѧ= [пᲂкло́н̾] ,= ꙗ҆́кѡ бл҃гᲂи҆зво́ли пло́тїю взы́ти на́крⷭ҇тъ , и҆ сме́рть претерпѣ́ти , и҆ вᲂскреси́ти ᲂу҆ме́ршїѧ , в̾ сла́внᲂе вᲂскрⷭ҇нїе свᲂѐ . двⷤа . сла́ва , и҆ ны́нѣ , боⷢ҇ . Ра́дꙋисѧ две́ри гдⷭ҇нѧ непрᲂхᲂди́маѧ . ра́дꙋисѧ стѣно̀ и҆ пᲂкро́ве , прибѣга́ющимъ к̾ тебѣ̀ . ра́дꙋисѧ завѣ́тренее приста́нище неи҆скꙋсᲂбра́чнаѧ , ро́ждьшаѧ пло́тїю твᲂрца̀ свᲂегѡ̀ и҆ бг҃а , мᲂлѧ́щи непре́зри ѡ҆ вᲂспѣва́ющихъ , и҆ кла́нѧющихсѧ ржⷭ҇твꙋ̀ твᲂемꙋ̀ [пᲂкло́н̾] .

По а҃ , стихᲂло́гїи , сѣда́ленъ , вᲂскрⷭ҇нъ . гла́съ , є҃ . Крⷭ҇тъ гдⷭ҇нь да пᲂхва́лимъ . пᲂгребе́нїе ст҃о́е пѣ́сньми пᲂчте́мъ , и҆ вᲂскрⷭ҇нїе є҆гѡ̀ прᲂсла́вимъ , ꙗ҆́кѡ сᲂвᲂздви́же ме́ртвыѧ ѿ гро́бъ ꙗ҆́кѡ бг҃ъ , плѣни́въ сме́рти держа́вꙋ , и҆ крѣ́пᲂсть дїа́вᲂлю . и҆ сꙋ́щимъ во а҆́дѣ свѣ́тъ вᲂсїѧ̀ . сти́хъ : вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ , незабꙋ́ди ни́щихъ свᲂи́хъ до кᲂнца̀ . и҆ =па́ки , то́йже , сѣда́ленъ . =сла́ва , и҆ ны́нѣ , боⷢ҇ . Ра́дꙋисѧ ст҃а́ѧ гᲂро̀ и҆ бг҃ᲂпрᲂхо́днаѧ . ра́дꙋисѧ ѡ҆дш҃евле́наѧ кꙋпино̀ и҆ не ѡ҆пали́маѧ . ра́дꙋисѧ ꙗ҆́же є҆ди́на к̾ бг҃ꙋ ми́рᲂви мо́стъ , превᲂдѧ́щи ме́ртвыѧ къ вѣ́чнᲂмꙋ живᲂтꙋ̀ . ра́дꙋисѧ нетлѣ́ннаѧ ѻ҆трᲂкᲂви́це , неи҆скꙋсᲂмꙋ́жно ро́ждьшаѧ спасе́нїе дш҃а́мъ на́шимъ .

По в҃ , стихᲂло́гїи , сѣда́ленъ . гла́съ , и҃ . И҆́же всѣ́хъ влⷣка и҆ твᲂре́цъ прехᲂдѧ̀ , ѡ҆брѣ́те на пꙋтѝ слѣ́па сѣдѧ́ща , пла́чꙋща и҆ гл҃юща , неви́дѣхъ в̾ житїѝ сл҃нца сїѧ́юща , нижѐ лꙋны̀ свѣ́тлᲂсть ѡ҆зарѧ́ющꙋю , тѣ́мже вᲂпїю́ ти , рᲂжде́исѧ ѿ дв҃ы , и҆ прᲂсвѣще́и всѧ́ческаѧ , прᲂсвѣти́мѧ ꙗ҆́кѡ бл҃гᲂꙋтро́бенъ , да зᲂвꙋ̀ припа́даѧ ти влⷣко хрⷭ҇тѐ бж҃е , грѣхо́въ ѡ҆ставле́нїе да́рꙋй на́мъ , мно́жества ра́ди млⷭ҇ти чл҃кᲂлю́бче . сла́ва , и҆ ны́нѣ , то́йже .

та́же , вᲂскрⷭ҇нїе хрⷭ҇то́во , а҃ . ѱл҃о́мъ , н҃ . кано́нъ , =па́сцѣ , со і҆рмᲂсо́мъ , на́ ѕ҃ . и҆ ѡ҆ слѣпо́мъ , на д҃ . и҆ =пред̾пра́зднествꙋ , на д҃ .

Кано́нъ , пред̾пра́зднествꙋ , нᲂсѧ̀ краегране́сїе , по бꙋ́квамъ . гла́съ , є҃ . пѣ́снь , а҃ . і҆рмо́съ . Кᲂнѧ̀ и҆ вса́дники .

запѣ́въ : Сла́ва тебѣ̀ бж҃е на́шъ , сла́ва тебѣ̀ . Гᲂрѣ̀ ко ѻ҆ц҃ꙋ хрⷭ҇то́съ вᲂсхо́дитъ , и҆ прино́ситъ пло́ть ю҆́же ѿ на́съ вᲂспрїѧ́тъ . тᲂго̀ вᲂспᲂе́мъ в̾ пᲂхвале́нїи дне́сь , пᲂбѣ́днꙋю пѣ́снь пᲂю́ще , ꙗ҆́кѡ прᲂсла́висѧ . вⷤ . сла́ва . Кни́ги писа́нїи бжⷭ҇твеныхъ , и҆ про́пᲂвѣди премꙋ́дрыхъ прᲂпᲂвѣ́дникъ кᲂне́цъ ꙗ҆́вѣ прїѧ́ша , по вᲂста́нїи бо влⷣка , вᲂсхо́дитъ со сла́вᲂю в̾ нбⷭ҇наѧ . и҆ ны́нѣ , боⷢ҇ . Землѧ̀ та́йнѡ ликꙋ́етъ и҆ нбⷭ҇наѧ весе́лїѧ и҆спᲂлнѧ́ютсѧ , ѡ҆ вᲂзнесе́нїи хрⷭ҇то́вѣ . ꙗ҆́же дре́вле раз̾стᲂѧ́щаѧ , сᲂє҆ди́нившемꙋ бл҃гᲂда́тїю , и҆ вражды̀ прегражде́нїе разᲂри́вшꙋ .

катава́сїѧ : Спаси́телю бг҃ꙋ , въ мо́ри лю́ди немо́крыми стᲂпа́ми наста́вльшꙋ , и҆ фараѡ́на съ вѡ́и пᲂто́пльшꙋ , тᲂмꙋ̀ є҆ди́нᲂмꙋ вᲂспᲂе́мъ , ꙗ҆́кѡ прᲂсла́висѧ .

пѣ́снь , г҃ . і҆рмо́съ . Оу҆тверже́и ни наче́мъ же . Свѧза́въ свᲂе́ю сме́ртїю сло́ве сме́рть , и҆з̾ ме́ртвыхъ вᲂскр҃се ꙗ҆́вѣ тридне́венъ , и҆ къ небе́снымъ сп҃се взы́де со сла́вᲂю , пѣснᲂсло́вѧщимъ беспло́тнымъ , твᲂѐ смᲂтре́нїе неи҆зрече́ннᲂе . вⷤ . сла́ва . Прїи́де къ земны́мъ хрⷭ҇тѐ крᲂмѣ̀ тѣ́ла , и҆ ѡ҆бо́лксѧ въ пло́ть , распѧ́тїе претерпѣ̀ , и҆ вᲂста́въ и҆з̾ ме́ртвыхъ , вᲂз̾ше́лъ є҆сѝ со сла́вᲂю , к̾ пе́рвᲂмꙋ свѣ́тꙋ ѻ҆ц҃ꙋ твᲂемꙋ̀ , ми́рна сᲂтвᲂри́въ всѧ́ческаѧ . и҆ нн҃ѣ , боⷢ҇ . Пᲂиска́въ и҆́же на землѝ блꙋдѧ́щее ѻ҆вча̀ , незаблꙋ́дныи сло́ве , сїѐ счини́лъ є҆сѝ . и҆ вᲂзнесе́сѧ к̾ нб҃сѝ , сѣ́лъ є҆сѝ во сла́вѣ ѡ҆деснꙋ́ю свᲂегѡ̀ рᲂди́телѧ . сла́ва мно́гᲂмꙋ бл҃гᲂꙋтро́бїю твᲂемꙋ̀ .

катава́сїѧ : Си́лᲂю крⷭ҇та̀ твᲂегѡ̀ хрⷭ҇тѐ , ᲂу҆твердѝ мᲂѐ пᲂмышле́нїе , ꙗ҆́кѡ пѣ́ти и҆ сла́вити , спаси́тельнᲂе твᲂѐ вᲂзнесе́нїе .

кᲂнда́къ , и҆ =и҆́кᲂсъ , ѡ҆ слѣпо́мъ . та́же , сѣда́ленъ є҆гѡ̀ . =сла́ва , и҆ ны́нѣ . Предвари́ша ᲂу҆́тро .

пѣ́снь , д҃ . і҆рмо́съ . Бжⷭ҇твеннᲂе твᲂѐ . И҆́же пре́же грѣхо́мъ ѡ҆сꙋ́женᲂе є҆стество̀ на́ше , всѣ́хъ цр҃ю , твᲂи́мъ прїѧ́тїемъ пᲂми́лᲂвасѧ . пѣ́снено сла́вѧще твᲂѐ стра́хᲂмъ вᲂста́нїе , и҆ бжⷭ҇твенᲂе вᲂзнесе́нїе . Дивѧ́тсѧ беспло́тныхъ чи́ны , смᲂтрѧ́юще тѧ хрⷭ҇тѐ ѡ҆бо́лкшасѧ тѣ́лᲂмъ земны́мъ , и҆ вᲂз̾ше́дша на ѻ҆́блакъ , и҆ къ небе́снымъ вᲂсхᲂдѧ́ща . сла́ва . Ви́дѣвше ѡ҆брᲂще́ны ри́зы твᲂѧ̀ хрⷭ҇тѐ всѣ́хъ цр҃ю , твᲂи́мъ вᲂсхо́дᲂмъ , ᲂу҆жасо́шасѧ а҆́нг҃льскїѧ си́лы , и҆ со́ страхᲂмъ и҆ ра́дᲂстїю пᲂклᲂни́шасѧ . и҆ нн҃ѣ , боⷢ҇ . Вᲂспле́щемъ рꙋка́ми , гдⷭ҇ь вᲂста̀ и҆з̾ ме́ртвыхъ , и҆ къ нбⷭ҇нымъ взы́де . пᲂвинꙋ́вшимсѧ є҆мꙋ̀ а҆́нг҃лѡмъ , ꙗ҆́кѡ твᲂрцꙋ̀ и҆ бг҃ꙋ на́шемꙋ .

катава́сїѧ : Оу҆слы́шахъ слꙋ́хъ си́лы крⷭ҇та̀ , ꙗ҆́кѡ ра́й ѿве́рзесѧ и҆́мъ , и҆ вᲂзᲂпи́хъ , сла́ва си́лѣ твᲂе́й гдⷭ҇и .

пѣ́снь , є҃ . і҆рмо́съ . Ѡ҆дѣѧ́исѧ свѣ́тᲂмъ . Разрѣши́въ ѡ҆сꙋже́нїе чл҃чествꙋ хрⷭ҇то́съ вᲂскр҃съ , и҆ вᲂзнесе́сѧ къ нбⷭ҇нымъ , ѻ҆́ч҃имъ сᲂсѣде́нїемъ пᲂчтѐ , и҆́хже вᲂзлюбѝ . вⷤ . сла́ва . По вᲂскрⷭ҇нїи ра́дᲂстны твᲂрѧ̀ хрⷭ҇тѐ ᲂу҆ченикѝ свᲂѧ̀ , взы́де гᲂрѣ̀ к̾ свᲂемꙋ̀ рᲂди́телю , є҆го́же не ѿлꙋчи́лсѧ є҆сѝ , а҆́ще и҆ чл҃кѡмъ прїѡ҆бщи́всѧ . и҆ нн҃ѣ , боⷢ҇ . Зако́нꙋ пред̾сѣ́нїѧ , и҆ прᲂпᲂвѣ́данїѧ бг҃ᲂгла́сныхъ и҆спо́лнивъ хрⷭ҇тѐ , взы́де на нбⷭ҇наѧ , ѻ҆́блакꙋ тѧ пᲂдъе́мшꙋ сп҃се .

катава́сїѧ : Оу҆́треннююще вᲂпїе́мъ ти гдⷭ҇и спаси́ ны , ты́бо є҆сѝ бг҃ъ на́шъ , ра́звѣ бо тебѐ и҆но́гѡ незна́емъ .

пѣ́снь , ѕ҃ . і҆рмо́съ . Вᲂлнѧ́щеесѧ бꙋ́рею .= Стра́ннѡ видѣ́нїе ꙗ҆ви́сѧ а҆́нг҃лѡмъ , чл҃чь зра́къ нᲂсѧ̀ , вᲂсхо́дᲂмъ твᲂи́мъ стра́шнымъ чл҃кᲂлю́бче , тѣ́мже со́ страхᲂмъ вᲂспѣва́хꙋ тѧ . =вⷤ . сла́ва . Всѧ́ческихъ гдⷭ҇ь , со сла́вᲂю вᲂсхо́дитъ свѣ́тлѡ , къ свᲂемꙋ̀ без̾нача́льнᲂмꙋ рᲂди́телю . всѧ̀ тва́рь да пра́зднꙋетъ ликꙋ́ющи . и҆ ны́нѣ , боⷢ҇ . Всѧ́къ ꙗ҆зы́къ дне́сь , да вᲂпїе́тъ в̾ вᲂскликнᲂве́нїи , хрⷭ҇то́съ взы́де в̾ трꙋбѣ̀ бжⷭ҇твенѣй , со́ гласᲂмъ к̾ нб҃сѝ , и҆́хже не ѡ҆ста́ви .

катава́сїѧ : Ѡ҆бы́де мѧ бе́здна , гро́бъ же ми ки́тъ бы́сть . а҆́зъ же вᲂзᲂпи́хъ к̾ тебѣ̀ чл҃кᲂлю́бче , и҆ спасе́ мѧ десни́ца твᲂѧ̀ гдⷭ҇и .

=кᲂнда́къ , и҆ =и҆́кᲂсъ , па́сцѣ .

пѣ́снь , з҃ . і҆рмо́съ . Превᲂзнᲂси́мыи ѻ҆ц҃е́мъ . Растерза́въ средᲂгра́дїе вражды̀ , крⷭ҇то́мъ и҆ стра́стїю свᲂе́ю гдⷭ҇и . ѻ҆́блакᲂмъ нᲂси́мь , взы́де со сла́вᲂю к̾ без̾нача́льнᲂмꙋ ѻ҆ц҃ꙋ . вⷤ . сла́ва . Что́ ти ри́зы червлены̀ чл҃кᲂлю́бче , си́ламъ бжⷭ҇твенымъ вᲂпрᲂша́ющимъ ; тᲂчи́ло ны́нѣ и҆з̾гнето́хъ , хрⷭ҇то́съ вᲂсхᲂдѧ̀ вᲂпїѧ́ше . и҆ нн҃ѣ , боⷢ҇ . Пѣ́сньми твᲂѐ распѧ́тїе хрⷭ҇тѐ и҆ вᲂста́нїе сᲂгла́снѡ сла́вимъ , свѣ́тлѡ пра́зднꙋюще , с̾ вᲂзнесе́нїемъ честны́мъ во́ вѣки .

катава́сїѧ : Въ пещѝ ѻ҆́гненнѣй , пѣвцы̀ спа́слъ дѣ́ти , бл҃гᲂслᲂве́нъ бг҃ъ ѻ҆ц҃ъ на́шихъ .

пѣ́снь , и҃ . і҆рмо́съ . Тебѣ̀ вседѣ́телю . Свѣ́тъ тѧ ѿ́ свѣта сꙋ́ща , ѻ҆́блакъ свѣ́телъ пᲂдъѧ́тъ ѿ гᲂры̀ є҆леѡ́нскїѧ , всѣ́мъ зрѧ́щимъ бжⷭ҇твенымъ ᲂу҆ченико́мъ твᲂи́мъ , и҆ тебѐ славᲂсло́вѧщимъ хрⷭ҇тѐ во́ вѣки . Рꙋка́ми вᲂспле́щемъ ѱало́мски , вᲂскр҃се хрⷭ҇то́съ бг҃ъ на́шъ , и҆ взы́де ѿню́дꙋже сни́де к̾ на́мъ чл҃кᲂлю́бнѡ смири́въ ꙗ҆́же дре́вле растᲂче́наѧ . бл҃гᲂслᲂви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Пᲂѧ̀ дв҃дъ вᲂпїе́тъ , хрⷭ҇то́съ взы́де на херꙋви́мѣхъ , и҆ летѣ̀ ꙗ҆́вѣ на крилꙋ̀ а҆́нг҃льскихъ чино́въ , є҆го́же превᲂзно́симъ во́ вѣки . и҆ ны́нѣ , боⷢ҇ . Ꙗ҆ви́лсѧ є҆сѝ ᲂу҆ченико́мъ вᲂскр҃съ ѿ́ грᲂба , и҆ си́хъ вᲂзве́лъ є҆сѝ на́ гᲂрꙋ є҆леѡ́нскꙋю , ѿ ню́дꙋ же ѻ҆́блакъ свѣ́телъ пᲂдъе́мъ , взѧ́тъ к̾ го́рнимъ хрⷭ҇тѐ тебѐ со сла́вᲂю .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆го̀ во́ вѣки . И҆з̾ ѻ҆ц҃а пре́жде вѣ́къ рᲂжде́ннагѡ сн҃а и҆ бг҃а , и҆ в̾ пᲂслѣ́днѧѧ лѣ́та вᲂплᲂще́нна ѿ дв҃ы мт҃ре , сщ҃е́ннїи по́йте , лю́дїе превᲂзнᲂси́те є҆гѡ̀ во́ вѣки [пᲂкло́н̾] . честнѣ́йшꙋю непᲂе́мъ .

=пѣ́снь , ѳ҃ . і҆рмо́съ . =

са́їе ликꙋ́й . Сщ҃е́нно тᲂржество̀ всѧ̀ тва́рь прино́ситъ ꙗ҆́вѣ вᲂзнесе́нїю твᲂемꙋ̀ сло́ве бж҃їи , и҆́мже прине́слъ є҆сѝ ѻ҆ц҃ꙋ твᲂемꙋ̀ на́ше є҆стество̀ , вᲂспрїе́мъ па́че сло́ва неи҆змѣ́нныи . Ꙗ҆́кѡ бг҃ъ сᲂкрꙋши́лъ є҆сѝ врата̀ а҆́дᲂва хрⷭ҇тѐ и҆ вереѝ . и҆ вᲂскр҃съ и҆з̾ ме́ртвыхъ , къ нбⷭ҇нымъ со сла́вᲂю взы́де , чино́мъ а҆́нг҃льскимъ , врата̀ вᲂзми́те вᲂпїю́щимъ со ᲂу҆дивле́нїемъ . Твᲂемꙋ̀ бжⷭ҇твенᲂмꙋ вᲂсхо́дꙋ , дивѧ́щимсѧ бжⷭ҇твенымъ ᲂу҆ченико́мъ , пред̾ста́ша ꙗ҆́вствено а҆́нг҃ли , тѣ́мъ вᲂпїю́ще є҆го́же ви́дѣсте вᲂсхᲂдѧ́ща на нб҃са̀ , та́кѡ прїи́детъ со сла́вᲂю сꙋди́ти всѣ́мъ . сла́ва . И҆́же хрⷭ҇тѐ дарᲂва́лъ є҆сѝ смире́нїе ᲂу҆ченико́мъ , к̾ го́рнимъ дре́вле вᲂсхᲂдѧ̀ , то̀ и҆ на́мъ бᲂга́тнѡ низ̾пᲂслѝ , в̾ любвѝ всѣ́хъ сᲂблюда́ѧ , ꙗ҆́кѡ да сᲂгла́снѡ тебѐ сп҃са велича́емъ . и҆ ны́нѣ , боⷢ҇ . Свѣтᲂно́снаѧ кᲂлесни́ца сл҃нца мы́сленагѡ , ты̀ бы́сть вᲂи́стинꙋ нескве́рнаѧ чи́стаѧ . и҆́мже сѣдѧ́щїи во тмѣ̀ , ви́дѣша свѣ́тъ разꙋмѣ́нїѧ , по́ дᲂлгꙋ тѧ̀ сла́вѧще .

катава́сїѧ : Тѧ̀ па́че ᲂу҆ма̀ и҆ слᲂвесѐ мт҃рь бж҃їю , в̾лѣ́то без̾лѣ́тнагѡ неи҆зрече́ннѡ ро́ждьшꙋю , вѣ́рнїи є҆динᲂмꙋ́дреннѡ , пѣ́сньми велича́емъ .

задᲂсто́йникъ : Свѣти́сѧ свѣти́сѧ но́выи і҆єрⷭ҇ли́ме , сла́ва бо гдⷭ҇нѧ на тебѣ̀ вᲂсїѧ̀ , ликꙋ́й ны́нѣ и҆ весели́сѧ сїѡ́не , ты́ же чи́стаѧ красꙋ́йсѧ бцⷣе , ѡ҆ вᲂста́нїи ржⷭ҇тва̀ твᲂегѡ̀ [пᲂкло́н̾ до землѝ] .

свѣти́ленъ , па́сцѣ . Пло́тїю ᲂу҆снꙋ́въ ꙗ҆́кѡ ме́ртвъ , цр҃ь и҆ гдⷭ҇ь , тридне́вно вᲂскр҃се , и҆ а҆да́ма вᲂздви́гъ и҆з̾ тлѝ , и҆ ᲂу҆праздни́въ сме́рть . па́сха нетлѣ́нїѧ , ми́рꙋ спасе́нїе . три́жды .

На хвали́тѣхъ , стихѣ́ры , на д҃ . гла́съ , в҃ . И҆́же слѣпы́и рᲂди́всѧ , во свᲂе́мъ по́мыслѣ глаго́лаше , є҆да̀ а҆́зъ грѣ́хъ ра́ди рᲂди́тельныхъ рᲂди́хсѧ без̾ ѻ҆чїю̀ ; є҆да̀ а҆́зъ за невѣ́рїе ꙗ҆зы́къ рᲂди́хсѧ во ѡ҆бличе́нїе ; недᲂмышлѧ́юсѧ вᲂпраша́ти , кᲂгда̀ но́щь , кᲂгда̀ де́нь ; нетерпи́тѣми но́зѣ ка́меннагѡ претыка́нїѧ . неви́дѣхъ бо сл҃нца сїѧ́юща , ни ѻ҆́браза менѐ сᲂзда́вшагѡ . но мᲂлю́тисѧ хрⷭ҇тѐ бж҃е , при́зри на мѧ̀ и҆ пᲂми́лꙋй мѧ .= Ми́мѡ хᲂдѧ̀ і҆с҃ъ ѿ ст҃и́лища , ѡ҆брѣ́те чл҃ка слѣ́па ѿ рᲂжде́нїѧ , и҆ ᲂу҆милᲂсе́рдивсѧ пᲂлᲂжѝ бре́нїе на ѻ҆́чїю є҆гѡ̀ , и҆ речѐ к̾ немꙋ̀ , и҆дѝ ᲂу҆мы́исѧ в̾ силᲂа́мѣ , и҆ ᲂу҆мы́всѧ прᲂзрѣ̀ , сла́вꙋ вᲂз̾сыла́ѧ бг҃ꙋ . сᲂсѣ́ди же є҆гѡ̀ гл҃ахꙋ є҆мꙋ̀ , кто́ ти зѣ́ницы ѿве́рзе , є҆ю́же ни кто́же ѿ зрѧ́щихъ и҆сцѣли́ти вᲂз̾мо́жетъ ; ѻ҆́нъ же вᲂзᲂпи́въ речѐ , чл҃къ і҆с҃ъ гл҃емыи , ѻ҆́нъ ми речѐ , ᲂу҆мы́исѧ в̾ силᲂа́мѣ , и҆ прᲂзрѣ́хъ . то́й є҆́сть вᲂи́стинꙋ є҆го́же речѐ мѡѷсе́й в̾ зако́нѣ , хрⷭ҇та̀ месі́ю . то́й є҆́сть сп҃съ дш҃а́мъ на́шимъ . =гла́съ , д҃ . Всѐ житїѐ слѣпы́и но́щь пᲂмышлѧ́ѧ , вᲂзᲂпѝ к̾ тебѣ̀ , гдⷭ҇и ѿве́рзи ми зѣ́ницы сн҃е дв҃дᲂвъ сп҃се на́шъ , да со всѣ́ми и҆ а҆́зъ вᲂспᲂю̀ твᲂю̀ си́лꙋ . гла́съ , є҃ . Гдⷭ҇и ми́мо хᲂдѧ̀ дре́вле пꙋте́мъ , ѡ҆брѣ́те чл҃ка слѣ́па ѿ рᲂжде́нїѧ , и҆ ᲂу҆дивле́ни бы́вше ᲂу҆ченицы̀ , вᲂпрᲂша́хꙋ тѧ гл҃юще , ᲂу҆чи́телю кто̀ сᲂгрѣшѝ ; се́йли и҆лѝ рᲂди́телѧ є҆гѡ̀ , да слѣ́пъ рᲂди́сѧ ; ты́же сп҃се мо́й вᲂпїѧ́ше к̾ ни́мъ , ни се́й сᲂгрѣшѝ , ни рᲂди́телѧ є҆гѡ̀ , но да ꙗ҆вѧ́тсѧ дѣ́ла бж҃їѧ на не́мъ , мнѣ́ бо пᲂдᲂба́етъ дѣ́лати дѣ́ла пᲂсла́вшагѡ мѧ , ꙗ҆́же никто́же мо́жетъ дѣ́лати ; и҆ сїѧ̀ ре́къ , плю́нꙋвъ до́лꙋ , и҆ бре́нїе сᲂтво́рь , пᲂма́за ѻ҆́чи є҆мꙋ̀ , ре́къ к̾ немꙋ̀ , и҆дѝ ᲂу҆мы́исѧ в̾ силᲂа́мстѣй кꙋпѣ́ли . ѻ҆́нъ же ᲂу҆мы́всѧ здра́въ бы́сть , и҆ вᲂпїѧ́ше к̾ тебѣ̀ , вѣ́рꙋю гдⷭ҇и и҆ пᲂклᲂнѧ́ютисѧ . тѣ́мже вᲂпїе́мъ и҆ мы̀ пᲂми́лꙋй на́съ .

та́же , стихѣ́ры па́сцѣ .= сти́хъ : да вᲂскрⷭ҇нетъ бг҃ъ ,꙳ и҆ разы́дꙋтсѧ вразѝ є҆гѡ̀ . П=а́сха сщ҃е́ннаѧ на́мъ дне́сь пᲂказа́сѧ , па́сха но́ва ст҃а́ѧ , па́сха таи́нственнаѧ , па́сха всечестна́ѧ , па́сха хрⷭ҇та̀ и҆зба́вителѧ , па́сха непᲂро́чнаѧ , па́сха вели́каѧ , па́сха вѣ́рнымъ , па́сха двѣ́ри ра́йскїѧ на́мъ ѿверза́ющаѧ , па́сха всѣ́хъ ѡ҆сщ҃а́ющаѧ вѣ́рныхъ .

сти́хъ : ꙗ҆́кѡ и҆счеза́етъ ды́мъ ,꙳ да и҆сче́знꙋтъ . Прїиди́те ѿ видѣ́нїѧ жены̀ бл҃гᲂвѣ́стницы , и҆ сїѡ́нꙋ рцы́те , прїимѝ ѿ на́съ ра́дᲂсть бл҃гᲂвѣ́щенїѧ вᲂскрⷭ҇нїѧ хрⷭ҇то́ва , красꙋ́йсѧ и҆ ликꙋ́й , и҆ ра́дꙋисѧ і҆єрⷭ҇ли́ме , цр҃ѧ хрⷭ҇та̀ ᲂу҆́зрѣвъ и҆́з̾грᲂба , ꙗ҆́кѡ жениха̀ и҆схᲂдѧ́ща .

сти́хъ : та́кѡ да пᲂги́бнꙋтъ грѣ́шницы ѿ лица̀ бж҃їѧ ,꙳ а҆ пра́ведницы да вᲂз̾веселѧ́тсѧ . Мѷрѡно́сицы жены̀ , ѕѣлѡ̀ ра́нѡ пред̾ста́ша гро́бꙋ живᲂда́вца , и҆ ѡ҆брѣто́ша а҆́нг҃ла на ка́мени сѣдѧ́ща , и҆ то́й прᲂвѣща́въ и҆́мъ , си́це глаго́лаше , что̀ и҆́щете жива́гѡ с̾ ме́ртвыми ; что̀ пла́чете нетлѣ́ннаго во тлѝ ; ше́дше прᲂпᲂвѣ́дите ᲂу҆ченико́мъ є҆гѡ̀ .

сти́хъ : се́й де́нь и҆́же сᲂтвᲂрѝ гдⷭ҇ь ,꙳ вᲂз̾ра́дꙋемсѧ и҆ вᲂз̾весели́мсѧ в̾ ѻ҆́нь . Па́сха кра́сна , па́сха гдⷭ҇нѧ па́сха , па́сха всечестна́ѧ на́мъ вᲂз̾сїѧ̀ . па́сха , ра́дᲂстїю дрꙋ́гъ дрꙋ́га прїи́мемъ . Ѽ па́сха , и҆збавле́нїе ско́рби , и҆́бо и҆́з̾ грᲂба дне́сь , ꙗ҆́кѡ ѿ черто́га вᲂз̾сїѧ̀ хрⷭ҇то́съ , жены̀ ра́дᲂсти и҆спо́лни глаго́лѧ , прᲂпᲂвѣ́дите а҆пⷭ҇лѡмъ .

сла́ва , и҆ ны́нѣ . гла́съ , то́йже . Вᲂскрⷭ҇нїѧ де́нь , прᲂсвѣти́мсѧ тᲂржество́мъ , и҆ дрꙋ́гъ дрꙋ́га прїи́мемъ , и҆ рце́мъ бра́тїе , и҆ ненави́дѧщимъ на́съ , прᲂсти́мъ всѧ̀ вᲂскрⷭ҇нїемъ , и҆ та́кѡ вᲂзᲂпїе́мъ , хрⷭ҇то́съ вᲂскр҃се и҆з̾ ме́ртвыхъ , сме́ртїю сме́рть пᲂпра́въ , и҆ сꙋ́щимъ во грᲂбѣ́хъ живо́тъ дарᲂва̀ .

Хрⷭ҇то́съ вᲂскр҃се и҆з̾ ме́ртвыхъ сме́ртїю на сме́рть настꙋпѝ , и҆ гро́бнымъ живо́тъ дарᲂва̀ , гⷤ .

Славᲂсло́вїе вели́кᲂе . по трⷭ҇то́мъ , трᲂпа́рь , вᲂскрⷭ҇нъ . сла́ва , и҆ ны́нѣ , боⷢ҇ , є҆гѡ̀ .= и҆ є҆ктенїѝ . и҆ ѿпꙋ́стъ , без̾ крⷭ҇та̀ . гл҃етъ , і҆єре́й : вᲂскр҃съ и҆з̾ ме́ртвыхъ , и҆ ст҃а́гѡ пᲂмина́етъ , є҆го́же бꙋ́детъ де́нь . =и҆ а҃ ча́съ по ѡ҆бы́чаю .

На а҃ мъ часѣ̀ , гл҃емъ ѱалмы̀ ѡ҆бы́чныѧ . сла́ва . =трᲂпа́рь , вᲂскрⷭ҇нъ . сᲂбезнача́льнᲂе сло́во . =и҆ ны́нѣ , боⷢ҇ . что́ тѧ нарече́мъ . по трⷭ҇то́мъ , кᲂнда́къ , ѡ҆ =слѣпо́мъ . =и҆ кᲂне́чныи ѿпꙋ́стъ .

тре́тїи же ча́съ , и҆ ѕ҃ и , и҆ ѳ҃ и , пᲂе́мъ па́сцѣ .

На литꙋргі́и , а҆нтифо́ны па́сцѣ . вхо́д̾ , гл҃емъ : Въ цр҃квахъ бл҃гᲂслᲂви́те бг҃а гдⷭ҇а , ѿ и҆сто́чникъ і҆зра́илевъ . і҆єре́й , пᲂе́тъ : Прїиди́те пᲂклᲂни́мсѧ и҆ припаде́мъ хрⷭ҇тꙋ̀ .= мы́же : С=пасѝ на́съ сн҃е бж҃їи , вᲂскр҃съ и҆з̾ ме́ртвыхъ пᲂю́щихъ ти , а҆ллилꙋ́їѧ , гⷤ .

трᲂпа́рь : Хрⷭ҇то́съ вᲂскр҃се и҆з̾ ме́ртвыхъ сме́ртїю на сме́рть настꙋпѝ , и҆ гро́бнымъ живо́тъ дарᲂва̀ ,= три́жды . сла́ва , и҆ ны́нѣ . кᲂнда́къ , гла́съ , и҃ . А҆́=ще и҆ во́ грᲂбъ сни́де без̾сме́ртне , но а҆́дᲂвꙋ разрꙋши́лъ є҆сѝ си́лꙋ , и҆ вᲂскр҃се ꙗ҆́кѡ пᲂбѣди́тель хрⷭ҇тѐ бж҃е , жена́мъ мѷрѡно́сицамъ ра́дᲂсть прᲂвѣща́въ , и҆ свᲂи́мъ а҆пⷭ҇лѡмъ ми́ръ дарᲂва̀ , и҆́же па́дшимъ пᲂдаѧ̀ вᲂскрⷭ҇нїе .

вмѣ́стѡ трⷭ҇та́гѡ пᲂе́мъ : Є҆ли́цы во хрⷭ҇та̀ крⷭ҇ти́стесѧ , во хрⷭ҇та̀ ѡ҆блеко́стесѧ , а҆ллилꙋ́їѧ .

прᲂки́менъ , ѱало́мъ дв҃дᲂвъ . се́й де́нь и҆́же сᲂтвᲂрѝ гдⷭ҇ь , вᲂзра́дꙋемсѧ и҆ вᲂзвесели́мсѧ во́нь . сти́хъ : и҆спᲂвѣ́дайтесѧ гдⷭ҇ви ꙗ҆́кѡ бл҃гъ ꙗ҆́кѡ во́ вѣки млⷭ҇ть є҆гѡ̀ . сти́хъ : да рече́тъ ᲂу҆́бѡ до́мъ і҆и҃левъ , ꙗ҆́кѡ бл҃гъ ꙗ҆́кѡ во́ вѣки млⷭ҇ть є҆гѡ̀ . а҆пⷭ҇лъ , в̾дѣѧ́нїих̾ . заⷱ҇ , м҃а . а҆ллилꙋ́їѧ . ты̀ вᲂскр҃съ ᲂу҆ще́дриши сїѡ́на . сти́хъ : съ нб҃сѐ призрѣ̀ гдⷭ҇ь ви́дѣти всѧ̀ сы́ны чл҃ческїѧ . є҆ѵⷢ҇а́лїе , ѿ і҆ѡа́нна . заⷱ҇ , м҃г . прича́стенъ . тѣ́ло хрⷭ҇то́во . и҆ =про́чаѧ слꙋ́жба вᲂскрⷭ҇на всѧ̀ . =и҆ ѿпꙋ́стъ со крⷭ҇то́мъ , ꙗ҆́кᲂже ᲂу҆каза́сѧ на па́схꙋ . за є҆́же ѿдава́етсѧ , хрⷭ҇то́съ вᲂскр҃се . на трапе́зѣ быва́етъ ᲂу҆тѣше́нїе бра́тїи , ꙗ҆́мы ма́сло , и҆ ры́бꙋ , и҆ вино̀ пїе́мъ , бл҃гᲂдарѧ́ще бг҃а . и҆ та́кѡ сᲂверше́но , ѿдае́тсѧ пра́здникъ , па́сцѣ ѻ҆́ гдⷭ҇ѣ .