НЕДѢ́ЛѦ ПѦ́ТАѦ ПО ПА́СЦѢ

ѡ҆ самарѧны́ни . =Въ сꙋбо́тꙋ ве́черъ , на ма́лѣй вече́рни . на гдⷭ҇и вᲂзва́хъ , стⷯры , вᲂскрⷭ҇ны , на д҃ . гла́съ , д҃ . запѣ́въ : ѿ стра́жи ᲂу҆́тренїѧ до́ нᲂщи , ѿ стра́жи ᲂу҆́тренїѧ ,꙳ да ᲂу҆пᲂва́етъ і҆и҃ль на́ гдⷭ҇а . Живᲂтвᲂрѧ́щемꙋ твᲂемꙋ̀ крⷭ҇тꙋ̀ , непреста́ннѡ кла́нѧющесѧ хрⷭ҇тѐ =[пᲂкло́н̾] , и҆ тридне́внᲂе вᲂскрⷭ҇нїе твᲂѐ сла́вимъ . тѣ́мъ бо ѡ҆бнᲂви́лъ є҆сѝ , и҆стлѣ́вшее чл҃ческᲂе є҆стество̀ всеси́льне . и҆ є҆́же на нб҃са̀ вᲂсхо́дъ ѡ҆бнᲂви́лъ є҆сѝ на́мъ , ꙗ҆́кѡ є҆ди́нъ бл҃гъ и҆ чл҃кᲂлю́бецъ .

ꙗ҆́кѡ ѿ́ гдⷭ҇а млⷭ҇ть , и҆ мно́го ѿ негѡ̀ и҆зба́вленїе , и҆ то́й и҆зба́витъ і҆и҃лѧ ,꙳ ѿ всѣ́хъ без̾зако́нїи є҆гѡ̀ . Живᲂтвᲂрѧ́щемꙋ твᲂемꙋ̀ крⷭ҇тꙋ̀ , непреста́ннѡ кла́нѧющесѧ хрⷭ҇тѐ [пᲂкло́н̾] , и҆ тридне́внᲂе вᲂскрⷭ҇нїе твᲂѐ сла́вимъ . тѣ́мъ бо ѡ҆бнᲂви́лъ є҆сѝ , и҆стлѣ́вшее чл҃ческᲂе є҆стество̀ всеси́льне . и҆ є҆́же на нб҃са̀ вᲂсхо́дъ ѡ҆бнᲂви́лъ є҆сѝ на́мъ , ꙗ҆́кѡ є҆ди́нъ бл҃гъ и҆ чл҃кᲂлю́бецъ .

хвали́те гдⷭ҇а всѝ ꙗ҆зы́цы ,꙳ пᲂхвали́те є҆гѡ̀ всѝ лю́дїе . Дре́ва преслꙋша́нїѧ запреще́нїе , разрѣши́лъ є҆сѝ сп҃се , на́ древѣ крⷭ҇тнѣмъ во́лею пригво́ждьсѧ . и҆ во а҆́дъ сᲂше́дъ си́льне , сме́ртыѧ ᲂу҆́зы ꙗ҆́кѡ бг҃ъ растерза́лъ є҆сѝ . сегѡ̀ ра́ди кла́нѧемсѧ [пᲂкло́н̾] , є҆́же и҆з̾ ме́ртвыхъ твᲂемꙋ̀ вᲂскрⷭ҇нїю , ра́дᲂстїю вᲂпїю́ще , всеси́льне гдⷭ҇и сла́ва тебѣ̀ .

ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ ,꙳ и҆ и҆́стина гдⷭ҇нѧ пребыва́етъ во́ вѣки . Врата̀ а҆́дᲂва сᲂкрꙋши́лъ є҆сѝ гдⷭ҇и , и҆ свᲂе́ю сме́ртїю , сме́ртнᲂе црⷭ҇тво разрꙋши́лъ є҆сѝ . ро́дъ же чл҃ческїи и҆з̾ и҆стлѣ́нїѧ свᲂбо́ждь , живо́тъ и҆ нетлѣ́нїе ми́рꙋ дарᲂва̀ , и҆ ве́лїю млⷭ҇ть .

сла́ва , и҆ ны́нѣ , боⷢ҇ . Ве́лїе и҆ пресла́внᲂе , є҆́же на тебѣ̀ бы́вшее чꙋ́до . и҆ кто̀ дᲂво́ленъ и҆з̾гл҃ати си́лы гдⷭ҇ни , ꙗ҆́же ѡ҆ тебѣ̀ бы́вшїѧ бцⷣе , ᲂу҆страша́етъ бо ᲂу҆́мъ на́шъ , ве́лїѧ видѣ́нїѧ дᲂстᲂѧ́нїе , ꙗ҆́кѡ непᲂсти́жимаго тѝ та́инства , гл҃ати немᲂгꙋ́ще . кто́ бо слы́ша ѿ́ вѣка дв҃ꙋ дᲂи́вшꙋ , и҆ мт҃рь бе́з̾мꙋжа ꙗ҆́вльшꙋюсѧ на землѝ ; и҆ свᲂегѡ̀ сᲂдѣ́телѧ , ꙗ҆́кѡ младе́нца на рꙋкꙋ̀ нᲂси́вшꙋю . тѣ́мже тѧ̀ всѝ ро́ди непреста́нно велича́емъ .

На стихо́внѣ , стⷯры , вᲂскрⷭ҇ны . гла́съ , д҃ . Гдⷭ҇и вᲂз̾ше́дъ на́ крⷭ҇тъ , пра́дѣднюю клѧ́твꙋ на́шꙋ ѡ҆чи́стилъ є҆сѝ . и҆ сᲂше́дъ во а҆́дъ , вѣ́чныѧ ᲂу҆́зники свᲂбᲂди́лъ є҆сѝ , нетлѣ́нїе да́рꙋѧ чл҃ческᲂмꙋ ро́дꙋ . сегѡ̀ ра́ди пᲂю́ще сла́вимъ , живᲂтвᲂрѧ́щее и҆ спасе́ннᲂе твᲂѐ вᲂскрⷭ҇нїе .

сти́хъ : приведꙋ́тсѧ цр҃ю дв҃ы во слѣ́дъ є҆ѧ̀ ,꙳ и҆ и҆́скренѧѧ є҆ѧ̀ приведꙋ́тсѧ тебѣ̀ . И҆́же бл҃гᲂче́стнѡ пᲂклᲂнѧ́ющихсѧ твᲂемꙋ̀ ржⷭ҇твꙋ̀= [пᲂкло́н̾] ,= ѿ всѧ́каго спасѝ навѣ́та вра́жїѧ , бг҃ᲂрᲂди́тельнице всенепᲂро́чнаѧ , ꙗ҆́кѡ пред̾ста́тельница ро́дꙋ на́шемꙋ . пᲂлꙋчи́вше тѧ ᲂу҆́бѡ ны́нѣ по́мᲂщь , всѝ стѧжа́хᲂмъ прибѣ́жище же и҆ ᲂу҆тверже́нїе , и҆ хᲂда́таицꙋ ко влⷣцѣ хрⷭ҇тꙋ̀ бг҃ꙋ . є҆го́же мᲂлѝ , дарᲂва́ти смире́нїе ми́рᲂви мо́лимсѧ , и҆ прегрѣше́нїе разрѣше́нїе , притека́ющимъ к̾ кро́вꙋ твᲂемꙋ̀ .

сти́хъ : слы́ши дщѝ и҆ ви́ждь ,꙳ и҆ приклᲂнѝ ᲂу҆́хо твᲂѐ . Сѐ стрꙋ́пы ѡ҆бнажа́ю ти дꙋшѝ мᲂеѧ̀ , и҆ пᲂказꙋ́ю ти бѣ́днаѧ сᲂкрꙋше́нїѧ , ꙗ҆́же разбо́йницы налᲂжи́ша ми , лꙋка́вными по́мыслы , и҆ бѣсо́вскими крамᲂла́ми , влⷣчце пренепᲂро́чнаѧ , цѣли́телѧ дш҃а́мъ и҆ тѣ́лᲂмъ ро́ждьшаѧ , и҆сцѣле́нїе мѝ пᲂда́ждь си́хъ пᲂнᲂше́нїемъ , прᲂстира́ющи ма́сло милᲂсе́рдїѧ свᲂегѡ̀ и҆ бл҃гᲂсть , къ бл҃гᲂдᲂсто́инствꙋ , спасе́нїѧ и҆ и҆збавле́нїѧ .

сти́хъ : пᲂмѧнꙋ̀ и҆́мѧ твᲂѐ ,꙳ во всѧ́кᲂмъ ро́дѣ и҆ ро́дѣ . Нескры́ю ѻ҆каѧ́нныи бѣды̀ мᲂеѧ̀ , ꙗ҆́кѡ всѧ̀ притѧжа́хъ , ꙗ҆́же ненави́дитъ бг҃ъ , пло́ть ѡ҆скверни́хъ , и҆ дх҃ъ мо́й , и҆ ᲂу҆́мнаѧ пᲂмышле́нїѧ , непᲂдо́бными дѣ́лы и҆ слᲂвесы̀ скве́рными . ꙗ҆зы́кѡмъ ѡ҆сꙋжда́ю сᲂгрѣша́ющихъ , са́мъ же лю́тѣйшаѧ дѣ́лаю . бг҃ᲂрᲂди́тельнице всѣ́хъ ми да́ждь си́хъ и҆справле́нїе , да и҆стрезви́всѧ ѕлы́хъ мᲂи́хъ ѻ҆бы́чай , припа́даю и҆ пла́чꙋсѧ , ѡ҆ ни́хже бѣ́дно сᲂдѣ́ѧхъ в̾ жи́зни мᲂе́й хᲂжде́нїемъ .

сла́ва , и҆ нн҃ѣ , боⷢ҇ . Грѣхѝ ꙗ҆́же сᲂдѣ́ѧхъ вѣ́си и҆ без̾зако́нїѧ мᲂѧ̀ , и҆́миже пᲂпеко́хсѧ . и҆ сегѡ̀ ра́ди припа́даю ти , пᲂми́лꙋй мѧ мт҃и бж҃їѧ всенепᲂро́чнаѧ влⷣчце . не ѿри́ни ᲂу҆́бѡ менѐ , нижѐ пᲂсрами́ мѧ , грѣ́шникᲂмъ пᲂмо́щнице . смире́ннᲂе ми и҆ ѡ҆мраче́ннᲂе срⷣце прᲂсвѣтѝ . слеза́ми ѡ҆чи́сти и҆ пла́чемъ и҆ стᲂна́нїемъ , и҆ по́мыслы ᲂу҆миле́нїѧ , да и҆з̾бѣ́гнꙋ ѻ҆гнѧ̀ непᲂстᲂѧ́ннагѡ и҆ черве́й . пре́жде кᲂнца̀ ᲂу҆́бѡ всестрастна́ѧ дш҃е , ᲂу҆скᲂрѝ и҆ пᲂка́йсѧ те́плѣ , и҆ слезѧ́щи зᲂвѝ , бцⷣе ты́ мѧ ᲂу҆ще́дри .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь вᲂскрⷭ҇нъ . гла́съ , д҃ . Свѣ́тлꙋю вᲂскрⷭ҇нїѧ про́пᲂвѣдь , ѿ а҆́нг҃ла ᲂу҆вѣ́дѣвше гдⷭ҇ни ᲂу҆чени́цы , и҆ пра́дѣднее ѡ҆сꙋжде́нїе ѿве́ргше , а҆пⷭ҇лѡмъ хва́лѧщесѧ гл҃ахꙋ , и҆спрᲂве́ржесѧ сме́рть , вᲂскр҃се хрⷭ҇то́съ бг҃ъ , да́рꙋѧ ми́рᲂви ве́лїю млⷭ҇ть . сла́ва , и҆ нн҃ѣ , боⷢ҇ . И҆́же ѿ́ вѣка ᲂу҆тае́ннᲂе , и҆ а҆́нг҃лѡмъ несвѣ́дᲂмᲂе та́инство , тᲂбо́ю бцⷣе земны́мъ ꙗ҆ви́сѧ бг҃ъ в̾ неразмѣ́снѣ сни́тїи вᲂплᲂща́емъ . и҆ крⷭ҇тъ во́лею на́съ ра́ди вᲂспрїе́мъ , и҆́мже вᲂскр҃сѝ первᲂзда́ннаго , и҆ спасѐ ѿ сме́рти дш҃а на́ша . та́же , є҆ктенїѧ̀ ма́лаѧ .= и҆ =ѿпꙋ́стъ .

На вели́цѣй вече́рни , каѳи́сма , бл҃же́нъ мꙋ́жъ , всѧ̀ . на гдⷭ҇и вᲂзва́хъ , пᲂста́вимъ стихо́въ , і҃ . и҆ пᲂе́мъ , стихѣ́ры вᲂскрⷭ҇ны . гла́съ , д҃ . =запѣ́въ : и҆зведѝ и҆з̾ темни́цы дш҃ꙋ мᲂю̀ ,꙳ и҆спᲂвѣ́датисѧ и҆́мени твᲂемꙋ̀ . Живᲂтвᲂрѧ́щемꙋ твᲂемꙋ̀ крⷭ҇тꙋ̀ , непреста́ннѡ кла́нѧющесѧ хрⷭ҇тѐ =[пᲂкло́н̾] , и҆ тридне́внᲂе вᲂскрⷭ҇нїе твᲂѐ сла́вимъ . тѣ́мъ бо ѡ҆бнᲂви́лъ є҆сѝ , и҆стлѣ́вшее чл҃ческᲂе є҆стество̀ всеси́льне . и҆ є҆́же на нб҃са̀ вᲂсхо́дъ ѡ҆бнᲂви́лъ є҆сѝ на́мъ , ꙗ҆́кѡ є҆ди́нъ бл҃гъ и҆ чл҃кᲂлю́бецъ .

менѐ ждꙋ́тъ пра́ведницы ,꙳ до́ндеже вᲂзда́си мнѣ̀ . Дре́ва преслꙋша́нїѧ запреще́нїе , разрѣши́лъ є҆сѝ сп҃се , на́ древѣ крⷭ҇тнѣмъ во́лею пригво́ждьсѧ . и҆ во а҆́дъ сᲂше́дъ си́льне , сме́ртыѧ ᲂу҆́зы ꙗ҆́кѡ бг҃ъ растерза́лъ є҆сѝ . сегѡ̀ ра́ди кла́нѧемсѧ [пᲂкло́н̾] , є҆́же и҆з̾ ме́ртвыхъ твᲂемꙋ̀ вᲂскрⷭ҇нїю , ра́дᲂстїю вᲂпїю́ще , всеси́льне гдⷭ҇и сла́ва тебѣ̀ .

и҆з̾ глꙋбины̀ вᲂзва́хъ к̾ тебѣ̀ гдⷭ҇и ,꙳ гдⷭ҇и ᲂу҆слы́ши гла́съ мо́й . Врата̀ а҆́дᲂва сᲂкрꙋши́лъ є҆сѝ гдⷭ҇и , и҆ свᲂе́ю сме́ртїю , сме́ртнᲂе црⷭ҇тво разрꙋши́лъ є҆сѝ . ро́дъ же чл҃ческїи и҆з̾ и҆стлѣ́нїѧ свᲂбо́ждь , живо́тъ и҆ нетлѣ́нїе ми́рꙋ дарᲂва̀ , и҆ ве́лїю ми́лᲂсть .

бꙋ́дѣтѣ ᲂу҆́ши твᲂѝ ,꙳ вне́млющѣ гла́съ мл҃твы мᲂеѧ̀ . Прїидѣ́те лю́дїе вᲂспᲂе́мъ сп҃сᲂво тридне́внᲂе вᲂста́нїе , и҆́мже и҆зба́вихᲂмсѧ ѿ а҆́дᲂвыхъ нерѣши́мыхъ ᲂу҆́зъ . нетлѣ́нїе и҆ жи́знь всѝ вᲂспрїѧ́хᲂмъ зᲂвꙋ́ще , распны́исѧ и҆ пᲂгребы́исѧ и҆ вᲂскр҃сы́и , спасѝ на́съ вᲂскрⷭ҇нїемъ сѝ , є҆ди́не чл҃кᲂлю́бче .

стⷯры , препᲂлᲂве́нїю . запѣ́в̾ : гла́съ , то́йже . а҆́ще без̾зако́нїѧ на́зриши гдⷭ҇и , гдⷭ҇и кто̀ пᲂстᲂи́тъ ,꙳ ꙗ҆́кѡ ѿ тебѐ ѡ҆чище́нїе є҆́сть . Наста̀ препᲂлᲂве́нїе дне́мъ , и҆́же ѿ спаси́тельнагѡ начина́емыхъ вᲂста́нїѧ , пѧтьдесѧ́тницею же бжⷭ҇твенᲂю печатлѣ́емо , и҆ свѣ́титсѧ свѣ́тлᲂсти ѡ҆бᲂю́дꙋ и҆мѣ́ѧ , и҆ сᲂєдинѧ́ѧ ѡ҆бᲂѧ̀ , прїитѝ в̾ сла́вѣ пред̾ꙗ҆влѧ́ѧ , влады́чнѧгѡ вᲂзнесе́нїѧ пред̾пᲂчита́ти .

и҆́мене ра́ди твᲂегѡ̀ пᲂтерпѣ́хъ тѧ̀ гдⷭ҇и , пᲂтерпѣ̀ дш҃а мᲂѧ̀ в̾ сло́во твᲂѐ ,꙳ ᲂу҆пᲂва̀ дш҃а мᲂѧ̀ на́ гдⷭ҇а . Слы́ши и҆ вᲂз̾весели́сѧ сїѡ́нъ , бл҃гᲂвѣсти́вшꙋсѧ хрⷭ҇то́вꙋ вᲂскрⷭ҇нїю , вѣ́рнїи же є҆гѡ̀ сы́нᲂве вᲂз̾ра́дᲂвашасѧ сегѡ̀ ви́дѣвще , ѿмыва́юща дх҃ᲂмъ скве́рнꙋ хрⷭ҇тᲂꙋбі́йства , гᲂто́витсѧ тᲂржествꙋ́ющи ѡ҆бᲂи́хъ весе́лїе препᲂлᲂве́нїемъ .

ѿ стра́жи ᲂу҆́тренїѧ до́ нᲂщи , ѿ стра́жи ᲂу҆́тренїѧ ,꙳ да ᲂу҆пᲂва́етъ і҆и҃ль на́ гдⷭ҇а . Прибли́жисѧ бжⷭ҇твенагѡ спѣ́шнѡ и҆зли́тїе на всѣ́хъ , ꙗ҆́кᲂже пред̾написа́сѧ дх҃а , пред̾ ᲂу҆зако́ненїе прᲂпᲂвѣ́дꙋетъ . препᲂлᲂви́вшꙋсѧ и҆́же по хрⷭ҇то́вѣ сме́рти и҆ пᲂгребе́нїи и҆ вᲂскрⷭ҇нїи , ѿ негѡ̀ прїе́мшимъ ᲂу҆ченико́мъ , нело́жнаѧ ѡ҆бѣща́нїѧ , ᲂу҆тѣ́шителево ꙗ҆влѧ́ющи наше́ствїе .

стⷯры , ѡ҆ самарѧны́нѣ . запѣ́въ : гла́съ , а҃ . ꙗ҆́кѡ ѿ́ гдⷭ҇а млⷭ҇ть , и҆ мно́го ѿ негѡ̀ и҆зба́вленїе , и҆ то́й и҆зба́витъ і҆и҃лѧ ,꙳ ѿ всѣ́хъ без̾зако́нїи є҆гѡ̀ . Ко и҆сто́чникꙋ прїи́де и҆сто́чникъ чꙋде́съ в̾ ше́стыи ча́съ , є҆́ввинъ ᲂу҆лᲂви́ти пло́дъ . и҆́бо є҆́вва в̾ то́й и҆зы́де и҆з̾ ра́ѧ , пре́лестїю ѕмі́евᲂю . прибли́жибᲂсѧ самарѧны́нѧ пᲂчерпстѝ во́дꙋ , ю҆́же ви́дѣвъ сп҃съ речѐ , да́ждь ми во́дꙋ пи́ти , и҆ а҆́зъ вᲂды̀ текꙋ́щїѧ насыщꙋ́ тѧ . и҆ во́ градъ те́кши цѣлᲂмꙋ́дренаѧ , наро́дѡмъ вᲂз̾вѣстѝ а҆́бїе , прїиди́те ви́дите хрⷭ҇та̀ гдⷭ҇а , сп҃са дш҃а́мъ на́шимъ .

гла́съ , в҃ . хвали́те гдⷭ҇а всѝ ꙗ҆зы́цы ,꙳ пᲂхвали́те є҆гѡ̀ всѝ лю́дїе . На стꙋдене́цъ прїи́де гдⷭ҇ь , самарѧны́нѧ же мᲂлѧ́ше бл҃гᲂꙋтро́бнагѡ . пᲂда́ждь ми во́дꙋ вѣ́ры , да вᲂспрїимꙋ̀ кꙋпѣ́льныѧ во́ды , ра́дᲂсть и҆ и҆збавле́нїе , жизнᲂда́вче гдⷭ҇и сла́ва тебѣ̀ .

ꙗ҆́кѡ ᲂу҆тверди́сѧ ми́лᲂсть є҆гѡ̀ на на́съ ,꙳ и҆ и҆́стина гдⷭ҇нѧ пребыва́етъ во́ вѣки . И҆́же сᲂбез̾нача́льныи и҆ сᲂпрⷭ҇нᲂсꙋ́щныи сн҃ъ и҆ сло́во ѻ҆ц҃ꙋ , на и҆сто́чникъ прїи́де и҆сто́чникъ и҆сцѣле́нїемъ , и҆ жена̀ ѿ самарі́и прїи́де пᲂчерпстѝ во́дꙋ , ю҆́же ви́дѣвъ сп҃съ речѐ , да́ждь ми во́дꙋ пи́ти , и҆ ше́дши пригласѝ свᲂегѡ̀ мꙋ́жа . ѻ҆на́же ꙗ҆́кѡ чл҃кꙋ гл҃ющи а҆ не бг҃ꙋ , ᲂу҆таи́ти тща́щисѧ гл҃аше , не и҆́мамъ мꙋ́жа . ᲂу҆чи́тель же к̾ не́й гл҃а , и҆́стинꙋ рекла̀ є҆сѝ не и҆́мамъ мꙋ́жа , пѧ́ть бо и҆мѣ́ла є҆сѝ , и҆ ны́нѣ є҆го́же и҆́маши нѣ́сть ти мꙋ́жъ . ѻ҆на́же ѡ҆ гл҃ѣ ᲂу҆диви́вшисѧ , и҆ во́ градъ те́кши наро́дѡмъ вᲂпїѧ́ше гл҃ющи , прїиди́те и҆ ви́дите хрⷭ҇та̀ , и҆́же да́рꙋетъ ми́рᲂви ве́лїю ми́лᲂсть . сла́ва . гла́съ , ѕ҃ . Оу҆стꙋденца̀ і҆а́кѡвлѧ ѡ҆брѣ́те і҆с҃ъ самарѧны́ню , про́ситъ во́дꙋ ѿ неѧ̀ , и҆́же ѻ҆́блаки пᲂкрыва́ѧи нб҃о . ѽ чꙋдесѝ , и҆́же херꙋви́мᲂмъ неви́димыи , блꙋдни́цѣ женѣ̀ бесѣ́дꙋетъ . во́дꙋ про́ситъ , и҆́же на вᲂда́хъ зе́млю пᲂвѣ́сивыи . во́дꙋ и҆скі́и , и҆́же и҆сто́чники и҆ є҆зе́ра во́дъ и҆злива́ѧи , хᲂтѧ̀ привлещѝ па́ки тꙋ̀ , ᲂу҆лᲂвле́ннꙋю ѿ сᲂпᲂста́та врага̀ , и҆ напᲂи́ти ю҆̀ вᲂдо́ю живо́ю , пали́мꙋю в̾ бесчи́нствѣхъ лю́тыхъ , и҆́же є҆ди́нъ бл҃гᲂꙋтро́бныи , и҆ чл҃кᲂлю́бецъ . и҆ ны́нѣ , боⷢ҇ . гла́съ , д҃ . И҆́же тебѐ ра́ди бг҃ᲂѻ҆ц҃ъ прⷪ҇ркъ дв҃дъ , пѣ́сненно ѡ҆ тебѣ̀ прᲂвᲂз̾гласѝ , вели́чїѧ ти сᲂтво́ршꙋ , пред̾ста̀ цр҃ца ѡ҆деснꙋ́ю тебѐ , тебе́ бо мт҃рь хᲂда́тайцꙋ живᲂтꙋ̀ пᲂказа̀ , и҆́же без̾ ѻ҆ц҃а и҆з̾ тебѐ вᲂчл҃читисѧ бл҃гᲂи҆зво́ли бг҃ъ , да сво́й па́ки ѡ҆бнᲂви́тъ ѻ҆́бразъ и҆стлѣ́вшїи страстьмѝ , и҆ заблꙋ́ждьшее вᲂлкᲂхи́щнᲂе ѻ҆вча̀ ѡ҆брѣ́тъ , на ра́мо вᲂспрїи́мъ , ко ѻ҆ц҃ꙋ принесѐ , и҆ къ свᲂемꙋ̀ хᲂтѣ́нїю , съ нбⷭ҇ными сᲂвᲂкꙋпи́тъ си́лами . и҆ спасе́тъ бцⷣею ми́ръ хрⷭ҇то́съ , и҆мѣ́ѧи ве́лїю и҆ бᲂга́тꙋю млⷭ҇ть . та́же , вы́хᲂдъ : свѣ́тѣ ти́хїи . прᲂки́менъ , дню̀ .

На литі́и , стихѣ́ра хра́мꙋ . та́же , стихѣ́ры бцⷣы , твᲂре́нїе , па́вла а҆мᲂре́йскаго . гла́съ , и҃ . Тебѐ вѣ́рнымъ пᲂкро́въ пᲂказа̀ , и҆́же всѧ́ческихъ бг҃ъ , вᲂпло́щьсѧ ѿ крᲂве́й твᲂи́хъ бцⷣе всечⷭ҇таѧ . и҆ пред̾ста́тельницꙋ и҆ пᲂбо́рницꙋ , сꙋ́щимъ в̾ нꙋ́ждахъ и҆ ѡ҆б̾стᲂѧ́нїихъ , и҆ в̾ бꙋ́ри приста́нище бл҃гᲂꙋти́шнᲂе . ты̀ ᲂу҆́бѡ спасѝ ѿ всѧ́кїѧ ско́рби и҆ тꙋгѝ , всѣ́хъ притека́ющихъ , к̾ бжⷭ҇твенᲂмꙋ пᲂкро́вꙋ твᲂемꙋ̀ . Да прᲂславлѧ́ю и҆ пᲂчита́ю , да чтꙋ̀ и҆ пᲂю̀ , да вᲂспѣва́ю всегда̀ твᲂѐ бжⷭ҇твенᲂе и҆́мѧ , пребл҃же́ннаѧ влⷣчце , да мѧ̀ неѡ҆ста́виши враго́мъ ра́дᲂванїе бы́ти , пᲂкро́вꙋ твᲂемꙋ̀ притека́ющаго , но кри́лы честны́хъ мл҃твъ твᲂи́хъ всегда̀ цѣ́ла мѧ сᲂхранѝ , ѿ всѣ́хъ и҆скꙋше́нїй . Ра́дꙋисѧ бг҃ᲂмт҃и пречⷭ҇таѧ . ра́дꙋисѧ вѣ́рнымъ наде́жде , ра́дꙋисѧ ми́рꙋ ѡ҆чище́нїе . ра́дꙋисѧ и҆збавлѧ́ющаѧ всѧ́кихъ скᲂрбе́й рабы̀ свᲂѧ̀ , ꙗ҆́же сме́рти разрꙋши́тельнице . ра́дꙋисѧ живᲂтᲂно́снаѧ , ра́дꙋисѧ ᲂу҆тѣ́шительнице . ра́дꙋисѧ застꙋ́пнице , ра́дꙋисѧ прибѣ́жище . сла́ва . гла́съ , г҃ . Да вᲂзра́дꙋетсѧ дне́сь свѣ́тлѡ нб҃о и҆ землѧ̀ , ꙗ҆́кѡ хрⷭ҇то́съ ꙗ҆ви́сѧ вᲂпло́щьсѧ ꙗ҆́кѡ чл҃къ , да а҆да́ма и҆зба́витъ ѿ клѧ́твы всеро́дныѧ . и҆ ᲂу҆дивлѧ́етъ чꙋдесы̀ в̾ самарі́ю прише́дъ , женѣ̀ ᲂу҆́бѡ пред̾ста̀ вᲂды̀ прᲂсѧ̀ , и҆́же во́ды ѻ҆блакѝ ѻ҆дѣва́ѧи . тѣ́мже всѝ вѣ́рнїи пᲂклᲂни́мсѧ [пᲂкло́н̾] , и҆́же на́съ ра́ди во́лею ѡ҆бнища́вшемꙋ , бл҃гᲂꙋтро́бнымъ сᲂвѣ́тᲂмъ .

и҆ ны́нѣ , боⷢ҇ . Без̾ сѣ́мене ѿ бжⷭ҇твенагѡ дх҃а , во́лею ᲂу҆́бѡ ѻ҆ц҃а , зачала̀ є҆сѝ сн҃а бж҃їѧ , ѿ ѻ҆ц҃а без̾ мт҃ре , пре́жде вѣ́къ сꙋ́ща , на́съ же ра́ди и҆з̾ тебѐ без̾ ѻ҆ц҃а бы́вша , пло́тїю рᲂди́ла є҆сѝ , и҆ младе́нца млеко́мъ пита́ла є҆сѝ . тѣ́мже непреста́й мᲂлѧ́щи , и҆зба́витисѧ ѿ бѣ́дъ дш҃а́мъ на́шимъ .

На стихо́внѣ , стихѣ́ры , вᲂскрⷭ҇ны . гла́съ , д҃ . Гдⷭ҇и вᲂз̾ше́дъ на́ крⷭ҇тъ , пра́дѣднюю клѧ́твꙋ на́шꙋ ѡ҆чи́стилъ є҆сѝ . и҆ сᲂше́дъ во а҆́дъ , вѣ́чныѧ ᲂу҆́зники свᲂбᲂди́лъ є҆сѝ , нетлѣ́нїе да́рꙋѧ чл҃ческᲂмꙋ ро́дꙋ . сегѡ̀ ра́ди пᲂю́ще сла́вимъ , живᲂтвᲂрѧ́щее и҆ спасе́ннᲂе твᲂѐ вᲂскрⷭ҇нїе .

сти́хъ : гдⷭ҇ь вᲂцр҃и́сѧ ,꙳ в̾ лѣ́пᲂтꙋсѧ ѡ҆блечѐ . Пᲂвѣ́шенъ на́ древѣ є҆ди́не си́льне , всю̀ тва́рь пᲂкᲂлѣба́лъ є҆сѝ , пᲂлᲂжи́вжесѧ во́ грᲂбѣ , живꙋ́щїѧ во грᲂбѣ́хъ вᲂскр҃си́лъ є҆сѝ , нетлѣ́нїе и҆ жи́знь да́рꙋѧ чл҃ческᲂмꙋ ро́дꙋ . тѣ́мже пᲂю́ще сла́вимъ тридне́внᲂе твᲂѐ вᲂста́нїе .

сти́хъ : и҆́бо ᲂу҆твердѝ вселе́ннꙋю ,꙳ ꙗ҆́же непᲂдви́житсѧ . Лю́дїе пребез̾зако́ннїи хрⷭ҇тѐ , тебѐ преда́вше пила́тꙋ , распѧ́ти ѡ҆сꙋди́ша , неразꙋ́мнїи ѡ҆ бл҃гᲂдѣѧ́нїи ꙗ҆́вльшесѧ . но во́лею претерпѣ́въ пᲂгребе́нїе самᲂвла́стно , тридне́вно є҆сѝ вᲂскр҃слъ ꙗ҆́кѡ бг҃ъ , да́рꙋѧ на́мъ без̾кᲂне́чныи живо́тъ , и҆ ве́лїю млⷭ҇ть .

сти́хъ : до́мꙋ твᲂемꙋ̀ пᲂдᲂба́етъ ,꙳ ст҃ы́ни гдⷭ҇и в̾ дᲂлгᲂтꙋ̀ дні́й . Со слеза́ми жены̀ дᲂше́дше гро́ба , тебѐ и҆ска́хꙋ . не ѡ҆брѣ́тше же , рыда́юще с̾ пла́чемъ вᲂпїѧ́хꙋ глаго́люще , ᲂу҆вы̀ на́мъ сп҃се на́шъ цр҃ю всѣ́хъ , ка́кѡ ᲂу҆кра́денъ бы́сть ; ко́еже мѣ́сто держи́тъ , живᲂно́снᲂе тѣ́ло твᲂѐ ; а҆́нг҃лъ же к̾ ни́мъ ѿвѣща̀ , непла́чите речѐ , но ше́дше прᲂпᲂвѣ́дите , ꙗ҆́кѡ вᲂскр҃се гдⷭ҇ь , пᲂдаѧ̀ на́мъ ра́дᲂсть , ꙗ҆́кѡ є҆ди́нъ милᲂсе́рдъ .

сла́ва . гла́съ , и҃ . Є҆гда̀ ꙗ҆ви́сѧ во́ плᲂти хрⷭ҇тѐ бж҃е не и҆зрече́ннымъ смᲂтре́нїемъ , ᲂу҆слы́шавши самарѧны́нѧ сло́во твᲂѐ чл҃кᲂлю́бче , ѡ҆ста́вивши пᲂчерпа́ло ᲂу҆ стꙋденца̀ , и҆ течѐ гл҃ющи сꙋ́щимъ во́ градѣ , прїиди́те ви́дите срⷣцевѣ́дца , є҆да̀ ᲂу҆́бѡ се́й є҆́сть ѡ҆жида́емыи хрⷭ҇то́съ , и҆мѣ́ѧи ве́лїю млⷭ҇ть . и҆ ны́нѣ . гла́съ , то́йже . Препᲂлᲂви́вшꙋсѧ пра́здникꙋ , ᲂу҆ча́щꙋ ти сп҃се , и҆ гл҃ахꙋ і҆ꙋде́и , ка́кѡ се́й вѣ́сть кни́ги неᲂу҆чи́всѧ . неразꙋмѣ́юще ꙗ҆́кѡ ты̀ є҆сѝ премꙋ́дрᲂсть , ᲂу҆стро́ившаѧ ми́ръ сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь : бцⷣе дв҃о ра́дꙋисѧ , гⷤ . и҆ про́чее .

Въ нлⷣю , є҃ ю , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь вᲂскрⷭ҇нъ . гла́съ , д҃ . Свѣ́тлꙋю вᲂскрⷭ҇нїѧ про́пᲂвѣдь , ѿ а҆́нг҃ла ᲂу҆вѣ́дѣвше гдⷭ҇ни ᲂу҆чени́цы , и҆ пра́дѣднее ѡ҆сꙋжде́нїе ѿве́ргше , а҆пⷭ҇лѡмъ хва́лѧщесѧ гл҃ахꙋ , и҆спрᲂве́ржесѧ сме́рть , вᲂскр҃се хрⷭ҇то́съ бг҃ъ , да́рꙋѧ ми́рᲂви ве́лїю млⷭ҇ть .= двⷤа . сла́ва , и҆ ны́нѣ . гла́съ , и҃ . П=репᲂлᲂви́вшꙋсѧ пра́здникꙋ , жа́ждꙋщꙋю дш҃ꙋ мᲂю̀ бл҃гᲂче́стїѧ напо́й вᲂды̀ , ꙗ҆́кѡ всѣ́мъ сп҃се вᲂзᲂпи́лъ є҆сѝ , жа́ждаи да грѧде́тъ ко мнѣ̀ и҆ пїе́тъ . и҆сто́чниче жи́зни хрⷭ҇тѐ бж҃е сла́ва тебѣ̀ .

По а҃ , стихᲂло́гїи , сѣда́ленъ . гла́съ , д҃ . Вᲂзрѣ́вше на гро́бныи вхо́дъ и҆ пла́мене а҆́нг҃льскагѡ нетерпѧ́ще мѷрѡно́сицы , съ тре́петᲂмъ дивлѧ́хꙋсѧ гл҃юще , є҆да̀ ᲂу҆кра́десѧ ѿве́рзыи разбо́йникꙋ ра́й ; є҆да́ли вᲂста̀ , и҆́же пре́жде стра́сти прᲂпᲂвѣ́давыи вᲂста́нїе ; вᲂи́стинꙋ вᲂскр҃се хрⷭ҇то́съ , и҆ сꙋ́щимъ во а҆́дѣ пᲂдаѧ̀ живо́тъ и҆ вᲂскрⷭ҇нїе . сти́хъ : вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ , незабꙋ́ди ни́щихъ свᲂи́хъ до кᲂнца̀ . и҆ =па́ки , то́йже , сѣда́ленъ . =сла́ва , и҆ ны́нѣ , боⷢ҇ . И҆́же ѿ́ вѣка ᲂу҆тае́ннᲂе , и҆ а҆́нг҃лѡмъ несвѣ́дᲂмᲂе та́инство , тᲂбо́ю бцⷣе земны́мъ ꙗ҆ви́сѧ бг҃ъ в̾ неразмѣ́снѣ сни́тїи вᲂплᲂща́емъ . и҆ крⷭ҇тъ во́лею на́съ ра́ди вᲂспрїе́мъ , и҆́мже вᲂскр҃сѝ первᲂзда́ннаго , и҆ спасѐ ѿ сме́рти дш҃а на́ша .

По в҃ , стихᲂло́гїи , сѣда́ленъ . гла́съ , д҃ . Свᲂе́ю во́лею распѧ́тїе претерпѣ́лъ є҆сѝ сп҃се , и҆ во́ грᲂбѣ но́вѣ чл҃цы пᲂлᲂжи́ша тѧ̀ ме́ртвенїи , и҆́же сло́вᲂмъ кᲂнцы̀ сᲂста́вльшаго . тѣ́мже свѧ́занъ бы́сть чꙋ́ждїи , и҆ сме́рть лю́то плѣнѧ́шесѧ . и҆ сꙋ́щїи во а҆́дѣ всѝ взыва́хꙋ , живᲂно́снᲂмꙋ вᲂста́нїю твᲂемꙋ̀ , хрⷭ҇то́съ вᲂскр҃се жизнᲂда́вецъ , пребыва́ѧи во́ вѣки . сти́хъ : и҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ , пᲂвѣ́мъ всѧ̀ чꙋдеса̀ твᲂѧ̀ . и҆ =па́ки , то́йже , сѣда́ленъ . =сла́ва , и҆ нн҃ѣ , боⷢ҇ . Оу҆диви́сѧ і҆ѡ́сифъ па́че є҆сте́ственᲂе зрѧ̀ , и҆ внима́ше мы́слїю рꙋно́внагѡ дᲂждѧ̀ , въ без̾сѣ́меннѣмъ зача́тїи твᲂе́мъ бцⷣе . кꙋпинꙋ̀ ѻ҆гне́мъ не ѡ҆палѧ́емꙋ , же́злъ а҆аро́нѡвъ прᲂзѧ́бшїи . и҆ свидѣ́тельствꙋетъ ꙗ҆́кѡ ѡ҆брꙋ́чникъ тво́й и҆ храни́тель , сщ҃е́нникᲂмъ вᲂпїѧ́ше , дв҃аѧ ражда́етъ , и҆ по ржⷭ҇твѣ̀ па́ки дв҃ᲂю пребꙋ́детъ .

По непᲂро́чнахъ , трᲂпарѝ , а҆́нг҃льскїи сᲂбо́ръ . и҆пако́й . И҆́же твᲂегѡ̀ пресла́внагѡ вᲂста́нїѧ , пред̾те́кше мѷрѡно́сицы , а҆пⷭ҇лѡмъ бл҃гᲂвѣствᲂва́хꙋ , ꙗ҆́кѡ вᲂскр҃се ꙗ҆́кѡ бг҃ъ , пᲂдаѧ̀ ми́рᲂви ве́лїю млⷭ҇ть .

степе́нны . гла́съ , д҃ . а҆нтифо́нъ , а҃ . пᲂе́мъ по вⷤ . Ѿ ю҆́нᲂсти мᲂеѧ̀ мно́зи бо́рютъ мѧ стра́сти , но са́мъ мѧ̀ застꙋпѝ , и҆ спаси́ мѧ сп҃се . Ненави́дѧщїи сїѡ́на , пᲂсра́мѧтсѧ ѿ́ гдⷭ҇а . ꙗ҆́кѡ трава́ бо ѻ҆́гневи бꙋ́дꙋтъ и҆з̾со́хшаѧ . Ст҃ы́мъ дх҃ᲂмъ всѧ́ка дш҃а живи́тсѧ , и҆ чистᲂто́ю вᲂзвыша́етсѧ , свѣтлѣ́етсѧ тро́йческимъ є҆ди́нствᲂмъ , сщ҃еннᲂта́йнѡ .

а҆нтифо́нъ , в҃ . Вᲂзва́хъ ти гдⷭ҇и те́плѣ , и҆з̾ глꙋбины̀ дш҃и мᲂеѧ̀ , и҆ мнѣ̀ да бꙋ́дꙋтъ на пᲂслꙋша́нїе бжⷭ҇твеннїи твᲂѝ ᲂу҆́ши . На́ гдⷭ҇а ᲂу҆пᲂва́нїе всѧ́къ кто̀ стѧжа́въ , вы́шши є҆́сть всѣ́хъ скᲂрбѧ́щихъ . Ст҃ы́мъ дх҃ᲂмъ то́чатсѧ бл҃гᲂда́тныѧ во́ды , напаѧ́юще всѧ́кꙋ тва́рь на ѡ҆живле́нїе .

а҆нтифо́нъ , г҃ . Срⷣце мᲂѐ к̾ тебѣ̀ сло́ве да вᲂз̾вы́ситсѧ , и҆ ничто́же да не ᲂу҆слади́тмисѧ , ѿ мирски́хъ красо́тъ на сла́бᲂсть . Къ мт҃ри свᲂе́й ꙗ҆́кᲂже и҆́мать кто̀ любо́вь , ко́ гдⷭ҇ꙋ теплѣ́йше любле́нїе до́лжни є҆смы̀ и҆мѣ́ти . Ст҃ы́мъ дх҃ᲂмъ , бг҃ᲂразꙋ́мїѧ бᲂга́тство , бг҃ᲂвидѣ́нїѧ и҆ премꙋ́дрᲂсть . всѧ́ бо си́мъ ѻ҆те́ческаѧ пᲂвелѣ́нїѧ , сло́во ѿкрыва́етъ .

прᲂки́менъ , ѱл҃о́мъ дв҃дᲂвъ . вᲂскрⷭ҇нѝ гдⷭ҇и пᲂмо зѝ на́мъ , и҆ и҆зба́ви на́съ и҆́мене твᲂегѡ̀ ра́ди . сти́хъ : бж҃е ᲂу҆ши́ма на́шима ᲂу҆слы́шахᲂмъ , и҆ ѻ҆ц҃ы на́ши вᲂзвѣсти́ша на́мъ . всѧ́ко дыха́нїе .= є҆ѵⷢ҇а́лїе , ѿ і҆ѡа́нна . зача́ло , ѯ҃г . =та́же , Вᲂскрⷭ҇нїе хрⷭ҇то́во , гⷤ . ѱало́мъ , н҃ .

сла́ва . мᲂли́твъ ра́ди а҆пⷭ҇лъ , млⷭ҇тиве ѡ҆чи́сти мно́жество сᲂгрѣше́нїи на́шихъ .

и҆ ны́нѣ . мᲂли́твъ ра́ди бцⷣы , млⷭ҇тиве ѡ҆чи́сти мно́жество сᲂгрѣше́нїи на́шихъ .

Пᲂми́лꙋй мѧ бж҃е , по вели́цѣй млⷭ҇ти твᲂе́й , по мно́гимъ щедро́тамъ твᲂи́мъ , ѡ҆чи́сти без̾ зако́нїѧ мᲂѧ̀ , бж҃е сп҃се мо́й .

стихѣ́ра , вᲂскрⷭ҇на . гла́съ , ѕ҃ . Вᲂскр҃съ і҆с҃ъ ѿ́ грᲂба , ꙗ҆́кᲂже прᲂречѐ . и҆ дарᲂва̀ на́мъ живо́тъ вѣ́чныи , ми́ръ и҆ ве́лїю ми́лᲂсть . і҆єре́й , гл҃етъ : спасѝ бж҃е лю́ди . пᲂе́м̾ : гдⷭ҇и пᲂми́лꙋй , ві҃ . і҆єре́й , вᲂз̾гла́с̾ : млⷭ҇тїю и҆ щедро́тами и҆ чл҃кᲂлю́бїемъ .

кано́нъ па́сцѣ , без̾ боⷢ҇ , на д҃ . пи́санъ , в̾ нлⷣю мѷрѡно́сицъ . и҆ препᲂлᲂве́нїю , на д҃ .= и҆= ѡ҆ самарѧны́ни , на́ ѕ҃ .= п=ᲂслѣди́ же , і҆рмо́съ , настᲂѧ́щагѡ кано́на .

кано́нъ , гла́съ , д҃ . пѣ́снь , а҃ . і҆рмо́съ . Пᲂраже́и є҆ги́пта . запѣ́въ : Сла́ва тебѣ̀ бж҃е на́шъ , сла́ва тебѣ̀ . И҆́же крⷭ҇тъ во́лею пло́тїю прїе́мъ , тридне́внѡ вᲂскре́слъ є҆сѝ ѿ ме́ртвыхъ . а҆́дᲂва сᲂкро́вища живᲂнача́льниче гдⷭ҇и и҆стᲂщи́въ , и҆зве́лъ є҆сѝ ѡ҆кᲂва́нныѧ дш҃а . Пᲂгребе́ныи вᲂста̀ , и҆ съ сᲂбо́ю вᲂз̾дви́же ро́дъ чл҃ческїи . да ра́дꙋетсѧ тва́рь всѧ̀ , и҆ мы́сленїи дне́сь ѻ҆́блацы да крᲂпѧ́тъ пра́вдꙋ ꙗ҆́вѣ . Зра́кᲂмъ блиста́ющесѧ мѷрѡно́сицы ви́дѣвше а҆́нг҃ла , стра́хᲂмъ бѣжа́ща ѿ́ грᲂба , хрⷭ҇то́во же вᲂста́нїе ᲂу҆вѣ́дѣвше , и҆ вᲂз̾вѣсти́ти тща́хꙋсѧ ᲂу҆чн҃ко́мъ . Пᲂкрыва́ѧи вᲂда́ми превы́спренѧѧ гдⷭ҇и , вᲂда̀ жи́зни сы́и . самарѧны́ни прᲂсѧ́щи твᲂеѧ̀ чи́стыѧ вᲂды̀ , по́далъ є҆сѝ разꙋмѣ́вшеи бл҃гᲂꙋтро́бїе твᲂѐ . сла́ва . Ѽ =трⷪ҇це и҆́же вѣ́рᲂю тѧ чи́стᲂю сла́вѧщихъ ѻ҆́ч҃е и҆ сн҃е и҆ д́ш҃е , тво́рче всѣ́мъ , спаса́й , и҆ ѡ҆чище́нїе да́рꙋй на́мъ сᲂгрѣше́нїемъ , ꙗ҆́кѡ пребл҃гі́и . =и҆ ны́нѣ , боⷢ҇ . Ра́дꙋисѧ прⷭ҇то́ле всезлаты́и . ра́дꙋисѧ свѣ́щниче ѻ҆́гненыи . ра́дꙋисѧ свѣ́тлыи ѻ҆́блаче . ра́дꙋисѧ пᲂла́то сло́ва , и҆ мы́сленаѧ трапе́зо . жи́зни хлѣ́бъ дᲂсто́йнѡ хрⷭ҇та̀ нᲂси́вши .

катава́сїѧ : Пᲂраже́и є҆ги́пта , и҆ фараѡ́на мꙋчи́телѧ пᲂгрꙋ́жь в̾ мо́ри , лю́ди спасы́и и҆з̾ рабо́ты , мѡѷсе́йски пᲂю́ща пѣ́снь пᲂбѣ́днꙋю , ꙗ҆́кѡ прᲂсла́висѧ .

пѣ́снь , г҃ . і҆рмо́съ . Оу҆тверди́сѧ срⷣце мᲂѐ . Сдш҃е́ю тѧ прише́дша сло́ве ко а҆́дꙋ , ви́дѣвше всѧ̀ д́ш҃и пра́ведныхъ , ѿ вѣ́чныхъ ᲂу҆́зъ ѿрѣша́хꙋсѧ , вᲂспѣва́юще ꙗ҆́же па́че ᲂу҆ма̀ си́лꙋ твᲂю̀ . Во́лею на́ древо вᲂзнесе́сѧ сло́ве , зрѧ́ще тѧ , распада́шесѧ ка́менїе , и҆ тва́рь прекланѧ́шесѧ всѧ̀ , и҆ ме́ртвїи и҆з̾ грᲂбо́въ , ꙗ҆́кᲂже ѿ сна̀ вᲂстава́хꙋ . Что̀ чꙋдите́сѧ , что̀ во́ грᲂбѣ вы̀ и҆́щете съ ми́рᲂмъ жены̀ влⷣкꙋ . вᲂста̀ , и҆ ми́ръ сᲂвᲂздви́же , а҆́нг҃лъ блиста́ѧисѧ мѷрѡно́сицамъ вѣща́ше . Жи́знь сы́и гдⷭ҇и , и҆ и҆сто́чникъ без̾сме́ртїѧ , сѣ́лъ є҆сѝ при и҆сто́чницѣ ще́дрыи . и҆ твᲂи́хъ премꙋ́дрыхъ во́дъ и҆спо́лнилъ є҆сѝ самарѧны́ню прᲂсѧ́щꙋ и҆ пїю́щꙋ тѧ̀ . сла́ва . Є҆ди́нъ надᲂвсѣ́ми в̾ трⷪ҇цѣ бг҃ъ пᲂе́тсѧ , ѻ҆ц҃ъ и҆ сн҃ъ и҆ бжⷭ҇твеныи дх҃ъ . є҆го́же со́ страхᲂмъ сла́вѧтъ нбⷭ҇нїи чи́нᲂве , ꙗ҆́снѡ вᲂпїю́ще , ст҃ъ , ст҃ъ , ст҃ъ є҆сѝ гдⷭ҇и . и҆ ны́нѣ , боⷢ҇ . Несказа́ннѡ заче́нши во ᲂу҆тро́бѣ свᲂе́й всѣ́хъ бг҃а дв҃о мт҃и , и҆ па́че ᲂу҆ма̀ и҆ сло́ва рᲂдила̀ є҆сѝ . пребы́вши дв҃ᲂю ꙗ҆́кѡ пре́же ржⷭ҇тва̀ бг҃ᲂневѣ́сто .

катава́сїѧ : Оу҆тверди́сѧ срⷣце мᲂѐ ѡ҆́ гдⷭ҇ѣ , даю́щемꙋ мл҃твꙋ мᲂлѧ́щемꙋсѧ , ꙗ҆́кѡ лꙋ́къ си́льныхъ и҆знемо́же , а҆ немᲂщні́и препᲂѧ́сашасѧ си́лᲂю .

кᲂнда́къ , и҆ и҆́кᲂсъ , препᲂлᲂве́нїю . сѣда́ленъ . гла́съ , д҃ . Да ра́дꙋютсѧ нбⷭ҇наѧ , и҆ ликᲂствꙋ́ютъ земна́ѧ , ꙗ҆́кѡ хрⷭ҇то́съ ꙗ҆ви́сѧ ѿ дв҃ы ꙗ҆́кѡ челᲂвѣ́къ и҆ и҆зба́ви и҆з̾ и҆стлѣ́нїѧ всѐ чл҃чество свᲂе́ю сме́ртїю чꙋдесы́ бо вᲂсїѧ́лъ є҆́сть . и҆ женѣ̀ самарѧны́нѣ вᲂды̀ прᲂсѧ́щѣй по́давъ и҆сто́чникъ и҆сцѣле́нїемъ , ꙗ҆́кѡ є҆ди́нъ без̾сме́ртенъ . сла́ва , и҆ ны́нѣ , то́йже .

пѣ́снь , д҃ . і҆рмо́съ . Оу҆слы́шахъ бж҃е слꙋ́хъ тво́й . Нб҃са̀ да веселѧ́тсѧ , да пра́зднꙋетъ тва́рь всѧ̀ . вᲂста̀ гдⷭ҇ь , и҆ ꙗ҆ви́сѧ премꙋ́дрымъ а҆пⷭ҇лѡмъ свᲂи́мъ . Пᲂже́рта бы́сть сме́рте твᲂѧ̀ си́ла , хрⷭ҇тꙋ̀ ꙗ҆ви́вшꙋсѧ . ме́ртвїи же ꙗ҆́кѡ ѿ черто́га , вᲂста́нїемъ сегѡ̀ ѿ гро́бъ и҆зыдо́ша . Что̀ рыда́ете ѽ жены̀ ; что̀ съ ми́рᲂмъ и҆́щете без̾сме́ртнаго , вᲂста̀ ꙗ҆́кᲂже речѐ , мѷрѡно́сицамъ гл҃а а҆́нг҃лъ . Самарѧны́нѣ гдⷭ҇и прᲂси́вшѣй по́далъ є҆сѝ во́дꙋ , вѣ́дѣнїе держа́вы твᲂеѧ̀ , тѣ́мъ же во́ вѣки невжа́ждетъ вᲂспѣва́ющи тѧ̀ . сла́ва . ѽ =трⷪ҇це пресꙋ́щнаѧ , ѻ҆́ч҃е и҆ сло́ве и҆ бжⷭ҇твеныи д́ш҃е , є҆динᲂсꙋ́щне сᲂбез̾нача́льне , спасѝ на́съ всѣ́хъ вѣ́рᲂю пᲂклᲂнѧ́ющихтисѧ =[пᲂкло́н̾] . и҆ ны́нѣ , боⷢ҇ . Не ѡ҆пали́мꙋю кꙋпинꙋ́ тѧ , закᲂнᲂда́вецъ зрѧ́ше дре́вле , данїи́лъ же го́рꙋ ст҃ꙋ́ю смᲂтрѧ́ше . є҆ди́на дв҃о мт҃и влⷣчце .

катава́сїѧ : Оу҆слы́шахъ бж҃е слꙋ́хъ тво́й , и҆ ᲂу҆бᲂѧ́хсѧ . разꙋмѣ́хъ дѣ́ла твᲂѧ̀ , и҆ диви́хсѧ гдⷭ҇и , ꙗ҆́кѡ твᲂеѧ̀ хвалы̀ и҆спо́лнисѧ землѧ̀ .

пѣ́снь , є҃ . і҆рмо́съ . Вᲂзсїѧ́й ми гдⷭ҇и свѣ́тъ . Гро́бъ тво́й ст҃ы́и дᲂсти́гше ра́нѡ мѷрѡно́сицы , блиста́ющасѧ ви́дѣша ю҆́нᲂшꙋ , и҆ ᲂу҆жасо́шасѧ твᲂемꙋ̀ наꙋчи́вшесѧ бжⷭ҇твенᲂмꙋ вᲂста́нїю хрⷭ҇тѐ . Сме́рть ᲂу҆мертви́сѧ , и҆ а҆́дъ плѣни́сѧ свѧ́занїи свᲂбᲂди́шасѧ хрⷭ҇то́вѣмъ вᲂста́нїемъ . вᲂзра́дꙋемсѧ и҆ рꙋка́ми вᲂспле́щемъ , пра́зднꙋюще свѣ́тлѡ . А҆пⷭ҇ли взыгра́йте , и҆ а҆́нг҃ли ликꙋ́йте , земнᲂро́днїи всѝ вᲂзра́дꙋйтесѧ . гдⷭ҇ь вᲂскре́се , тлѧ̀ и҆спрᲂве́ржесѧ , и҆ печа́ль преста̀ , и҆ ликᲂствꙋ́етъ а҆да́мъ . И҆сто́чникъ сы́и гдⷭ҇и жи́зни , вᲂда̀ ѡ҆ставле́нїѧ и҆ разꙋмѣ́нїѧ дарᲂва́сѧ , женѣ̀ прᲂси́вшей дре́вле самарѧны́ни . с̾ не́юже вᲂспѣва́емъ , не и҆зрече́нныѧ щедро́ты твᲂѧ̀ . сла́ва . Є҆ди́ницꙋ трисᲂста́внꙋю , трⷪ҇цꙋ є҆динᲂсꙋ́щнꙋю ѻ҆ц҃а и҆ сло́ва и҆ дх҃а ст҃а́гѡ , нераздѣ́льна є҆стество́мъ бг҃а є҆ди́наго пᲂчита́емъ , твᲂрца̀ и҆ гдⷭ҇а и҆ влⷣкꙋ всѣ́хъ . и҆ нн҃ѣ , боⷢ҇ . Тѧ̀ две́рь непрᲂхᲂди́мꙋю , и҆ ни́вꙋ недѣ́ланнꙋю , и҆ кᲂвче́гъ ма́ннꙋ нᲂсѧ́щїи , и҆ рꙋ́чкꙋ и҆ свѣ́щникъ и҆ кади́льницꙋ невеще́ственагѡ ᲂу҆́глѧ и҆менꙋ́емъ чⷭ҇таѧ .

катава́сїѧ : Вᲂз̾сїѧ́й ми гдⷭ҇и свѣ́тъ пᲂвелѣ́нїи твᲂи́хъ , ꙗ҆́кѡ к̾ тебѣ̀ хрⷭ҇тѐ дх҃ъ мо́й ᲂу҆́треннюѧ пᲂе́тъ . ты́ бо є҆сѝ бг҃ъ мо́й , и҆ къ тебѣ̀ прибѣго́хъ цр҃ю ми́рныи .

пѣ́снь , ѕ҃ . і҆рмо́съ . Да непᲂгрꙋзи́тъ менѐ . На крⷭ҇тѣ́ тѧ без̾зако́ннїи і҆ꙋде́и і҆с҃е пригвᲂзди́ша , и҆ кᲂпїе́мъ прᲂбᲂдо́ша хрⷭ҇тѐ . і҆ѡ́сифъ пᲂгребѐ бл҃гᲂѻ҆бра́зныи в̾ но́вѣ гро́бѣ . и҆з̾ него́ же со сла́вᲂю вᲂскр҃съ , сᲂвᲂскр҃си́лъ є҆сѝ сп҃се всю̀ тва́рь . пᲂю́щїѧ держа́вꙋ твᲂю̀ . Вереѝ и҆ врата̀ влⷣко си́льнѡ сᲂкрꙋши́лъ є҆сѝ а҆́дᲂвы , и҆ вᲂскр҃слъ є҆сѝ ꙗ҆́кѡ бг҃ъ . и҆ срѣ́лъ є҆сѝ ра́дꙋйтесѧ речѐ жена́мъ , и҆ си́хъ рещѝ пᲂсла́лъ є҆сѝ ᲂу҆ченико́мъ , ꙗ҆́кѡ вᲂста̀ живо́тъ и҆ ви́дѣнъ бы́сть , прᲂсвѣща́ѧ всѧ́ческаѧ . Что̀ пла́четесѧ , что̀ но́сите ꙗ҆́кѡ мертвецꙋ̀ жены̀ ма́сти ; вᲂста̀ хрⷭ҇то́съ , вᲂпїѧ́ше дре́вле блиста́ѧисѧ вельмѝ ꙗ҆вле́исѧ ю҆́нᲂша . и҆стᲂщи́въ плаща́ницꙋ ѡ҆ста́вивъ , ше́дше и҆ вᲂзвѣсти́те дрꙋго́мъ є҆гѡ̀ вᲂста́нїе . Стрꙋѧ̀ сы́и гдⷭ҇и жи́зни незави́стныѧ , и҆ бе́здна млⷭ҇ти ще́дре , пꙋ́ть ше́ствᲂвавъ , сѣди́ши бли́зъ и҆сто́чника клѧ́твенагѡ . и҆ самарѧны́ни женѣ̀ вᲂпїѧ́ше , да́ждь ми во́дꙋ пи́ти , ꙗ҆́кѡ да прїи́меши ѡ҆ставле́нїе грѣхо́въ . сла́ва . Пᲂю̀ ѻ҆ц҃а без̾нача́льна , и҆ сн҃а сᲂпресто́льна , и҆ дх҃а є҆динᲂсꙋ́щна вѣ́рнѡ , є҆ди́но сꙋщество̀ и҆ є҆стество̀ и҆ сла́вꙋ , и҆ є҆ди́но црⷭ҇тво бг҃а всѣ́хъ и҆ твᲂрца̀ , и҆ сᲂдержи́телѧ всѣ́хъ , со беспло́тными си́лами . и҆ ны́нѣ , боⷢ҇ . Дв҃ꙋ є҆ди́нꙋ ро́ждьшꙋю и҆ ᲂу҆тро́бꙋ нетлѣ́ннꙋ сᲂхра́ньшꙋ , пᲂе́мъ тѧ чⷭ҇таѧ прⷭ҇то́лъ гдⷭ҇нь , и҆ две́рь и҆ го́рꙋ , и҆ мы́сленыи свѣ́щникъ , черто́гъ всесвѣ́тлыи бж҃їи , и҆ сѣ́нь сла́вы ꙗ҆́вѣ , кᲂвче́гъ же и҆ рꙋ́кꙋ и҆ трапе́зꙋ .

катава́сїѧ : Да непᲂгрꙋзи́тъ менѐ бꙋ́рѧ вᲂдна́ѧ , ни да пᲂжре́тъ менѐ глꙋбина̀ , ѿве́рженъ ᲂу҆́бѡ бы́хъ во глꙋбинꙋ̀ срⷣца мᲂрска́гѡ ѕо́лъ мᲂи́хъ . тѣ́мъ тѝ вᲂпїю̀ ꙗ҆́кѡ і҆ѡ́на , да взы́детъ ѿ тлѝ живо́тъ мо́й к̾ тебѣ̀ мнᲂгᲂмлⷭ҇тиве .

кᲂнда́къ . гла́съ , и҃ . Вѣ́рᲂю прише́дши на и҆сто́чникъ самарѧны́нѧ , ви́дѣ премꙋ́дрᲂсти во́дꙋ , є҆ѧ́же напи́вшисѧ тебѐ хрⷭ҇тѐ ѡ҆би́льнѡ , и҆ црⷭ҇твїѧ вы́шнѧгѡ наслѣ́дᲂвавши вѣ́чнѡ , приснᲂхва́льнаѧ . и҆́кᲂсъ . Честны́хъ та́инъ ᲂу҆слы́шимъ , і҆ѡа́ннꙋ на́съ ᲂу҆ча́щꙋ ꙗ҆́же въ самарі́и бы́вшаѧ , женѣ̀ ꙗ҆́кѡ бесѣ́дᲂваше гдⷭ҇ь , во́дꙋ прᲂси́въ , и҆́же во́ды въ со́нмища и҆́хъ со́бравъ , и҆́же ѻ҆ц҃ꙋ и҆ дх҃ꙋ сᲂпресто́ленъ , прїи́де бо и҆скі́и ѻ҆́бразъ сво́й , ꙗ҆́кѡ чл҃кᲂлю́бецъ .

пѣ́снь , з҃ . і҆рмо́съ . Непреда́ждь на́съ . Со без̾зако́нными хрⷭ҇тѐ ще́дре во́лею вмѣни́сѧ , во́ времѧ бжⷭ҇твеныѧ стра́сти . и҆ сїѧ̀ ви́дѧщи , кᲂлеба́шесѧ всѧ̀ землѧ̀ , и҆ ка́менїе вседѣ́тельнымъ ти манᲂве́нїемъ распада́шесѧ дᲂлгᲂтерпѣли́ве , и҆ вᲂста́ша ме́ртвїи и҆́же ѿ́ вѣка . Съ дш҃е́ю сᲂше́дъ во страны̀ преи҆спо́днїѧ а҆́да , и҆ взѧ́лъ є҆сѝ мꙋ́жествᲂмъ свѧ́заныѧ всѧ̀ , ꙗ҆́же и҆з̾ а҆да́ма сме́рть прїѧ́тъ го́ркїи мꙋчи́тель , вᲂпїю́щїѧ , і҆с҃е бж҃е , сла́ва твᲂемꙋ̀ страшно́мꙋ смᲂтре́нїю . Съ ме́ртвыми что̀ вы̀ и҆́щете живꙋ́щаго во́ вѣки , вᲂста̀ ꙗ҆́кᲂже речѐ . сѐ ꙗ҆́кᲂже ви́дите пра́здны плащани́цы , и҆ и҆спра́жненъ гро́бъ , ꙗ҆вле́исѧ гл҃аше мѷрѡно́сицамъ ю҆́нᲂша , ско́рѡ ше́дше рцы́те а҆пⷭ҇лѡмъ . Вᲂда̀ є҆сѝ жи́зни , вᲂпїѧ́ше хрⷭ҇тꙋ̀ самарѧны́нѧ , напо́й мѧ ᲂу҆́бѡ сло́ве жа́ждꙋщꙋю всегда̀ твᲂеѧ̀ бжⷭ҇твеныѧ бл҃гᲂда́ти , ꙗ҆́кѡ да нектᲂмꙋ̀ трꙋжꙋ́сѧ гдⷭ҇и , неразꙋ́мїѧ ѡ҆держи́ма мгло́ю , но да прᲂпᲂвѣ́дꙋю твᲂѧ̀ вели́чїѧ . сла́ва . Ѻ҆ц҃а и҆ сн҃а и҆ бжⷭ҇твенагѡ вᲂспѣва́емъ дх҃а , нераздѣ́льнꙋю трⷪ҇цꙋ , є҆стество́мъ сꙋ́щꙋ , раздѣле́нꙋ ли́цы , є҆ди́но сꙋщество̀ , сра́сленѡ без̾нача́льнѡ . є҆го́же всѝ нбⷭ҇нїи пᲂю́тъ чи́нᲂве . и҆ ны́нѣ , боⷢ҇ . По рᲂжествѣ̀ стра́шнѣмъ , дв҃ᲂю чи́стаѧ сᲂхрани́сѧ ст҃а́ѧ влⷣчце . тѣ́мже тѧ̀ всѝ а҆́нг҃льстїи ли́цы , и҆ чл҃честїи ро́ди , всегда̀ немо́лчными вᲂспѣва́ютъ гла́сы , вмѣсти́лище чи́сто невмѣсти́магѡ .

катава́сїѧ : Непреда́ждь на́съ до кᲂнца̀ и҆́мени твᲂегѡ̀ ра́ди , и҆ неразᲂрѝ завѣ́та твᲂегѡ̀ , и҆ не ѡ҆ста́ви млⷭ҇ти твᲂеѧ̀ ѿ на́съ , гдⷭ҇и бж҃е ѻ҆ц҃ъ на́шихъ прехва́льныи во́ вѣки .

пѣ́снь , и҃ . і҆рмо́съ . Всѧ́ческаѧ влⷣко . Вᲂзнесе́сѧ дᲂлгᲂтерпѣли́ве во́лею на́ древо , и҆ ка́менїе распаде́сѧ . и҆ со́лнце ᲂу҆гасѐ , и҆ за́вѣса цр҃ко́внаѧ раздра́сѧ . и҆ землѧ̀ пᲂкᲂлѣба́сѧ , и҆ пᲂтрѧсе́сѧ всесмѣ́шныи а҆́дъ , и҆ всѧ̀ ᲂу҆́зники разрѣшѝ . Сме́рть претерпѣ́лъ є҆сѝ , є҆ди́не без̾сме́ртне во́лею , а҆́да плѣни́въ . врата̀ мѣ́днаѧ сте́рлъ є҆сѝ цр҃ю вѣ́чныи . вᲂсхи́тивъ ᲂу҆́зники ѿ́ вѣка та́мѡ сꙋ́щїѧ , вᲂспѣва́ющихъ держа́вꙋ непреста́ннѡ твᲂеѧ̀ бл҃гᲂсти . Ꙗ҆ви́лсѧ є҆сѝ гдⷭ҇и сꙋ́щимъ во тмѣ̀ сѣдѧ́щимъ , свѣ́тъ сы́и незахᲂди́мыи , и҆ живо́тъ всѣ́мъ . тѣ́мже тѧ ꙗ҆́кѡ ви́дѣ пра́ведныи со́нмъ , взыгра́сѧ сло́ве и҆ вᲂзᲂпѝ , прише́лъ є҆сѝ всѧ̀ свѧ́заныѧ разрѣши́ти , пᲂю́щїѧ сла́вꙋ твᲂю̀ . Бли́зъ сѣ́лъ є҆сѝ и҆сто́чника в̾ ча́съ сп҃се шесты́и , и҆ самарѧны́нѣ во́дꙋ жи́вꙋ по́далъ є҆сѝ , и҆ разꙋмѣ́нїѧ во́ды за мно́гᲂе милᲂсе́рдїе . с̾ не́ю же всѝ пᲂе́мъ вᲂспѣва́юще , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а , по́йте и҆ превᲂзнᲂси́те є҆гѡ̀ во́ вѣки . бл҃гᲂслᲂви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Ѻ҆ц҃а без̾нача́льна , и҆ сн҃а сᲂбез̾нача́льна пᲂе́мъ , и҆ дх҃а ст҃а́гѡ , бг҃а є҆ди́нагѡ в̾ тре́хъ , несмѣ́сна непресѣко́ма , и҆ сᲂдѣ́телѧ всѣ́мъ , є҆динᲂси́льнꙋю держа́вꙋ самᲂвла́стнꙋ . и҆ вᲂпїе́мъ , по́йте дѣ́ла всѧ̀ гдⷭ҇а , и҆ превᲂзнᲂси́те є҆гѡ̀ во́ вѣки . и҆ ны́нѣ , боⷢ҇ . Оу҆́глемъ ѡ҆чища́етсѧ и҆са́їѧ , прᲂпᲂвѣ́дꙋѧ мы́сленыи ᲂу҆́гль вᲂплᲂща́емь чи́стаѧ дв҃о и҆з̾ тебѐ па́че ᲂу҆ма̀ , ѡ҆палѧ́ющь чл҃кѡмъ всѧ̀ ве́щнаѧ сᲂгрѣше́нїѧ . и҆ ѡ҆бᲂжа́ющь милᲂсе́рдїемъ є҆стество̀ на́ше всенепᲂро́чнаѧ .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . Всѧ́ческаѧ влⷣко премꙋ́дрᲂстїю сᲂста́вивъ , зе́млю же па́ки ᲂу҆твердѝ ꙗ҆́кᲂже вѣ́си дно̀ . хᲂжде́нїе пᲂста́ви на вᲂда́хъ без̾мѣ́рныхъ , тѣ́мъ всѝ вᲂпїе́мъ вᲂспѣва́юще , бл҃гᲂслᲂви́те дѣ́ла гдⷭ҇нѧ непреста́ннѡ гдⷭ҇а [пᲂкло́н̾] . честнѣ́йшꙋю непᲂе́мъ .

пѣ́снь , ѳ҃ . і҆рмо́съ . Сᲂтвᲂрѝ держа́вꙋ . Сѐ ви́дѣнъ бы́сть живо́тъ всѣ́хъ хрⷭ҇то́съ , пᲂвѣ́шенъ во́лею на́ древѣ , и҆ сїѧ̀ ви́дѧщи землѧ̀ , пᲂкᲂлѣба́сѧ , и҆ мно́га ст҃ы́хъ вᲂста́ша ꙗ҆́вѣ тѣлеса̀ ᲂу҆со́пшихъ , и҆ свѧ́занныѧ и҆́же во а҆́дѣ плѣни́лъ є҆́сть . Красе́нъ и҆́з̾ грᲂба ꙗ҆́кѡ жени́хъ ѿ черто́га и҆з̾ше́лъ є҆сѝ , сме́рти разо́рь мꙋчи́тельства хрⷭ҇тѐ , и҆ а҆́дᲂвы вереѝ сᲂкрꙋ́шь си́лᲂю сѝ , и҆ вᲂста́нїѧ твᲂегѡ̀ свѣ́тᲂмъ , ви́димыи ми́ръ прᲂсвѣти́лъ є҆сѝ . Сᲂста́вимъ всѝ ны́нѣ ли́ки дх҃о́вны , и҆ взыва́емъ , хрⷭ҇то́съ вᲂскр҃се , да ра́дꙋетсѧ землѧ̀ , да весели́тсѧ нб҃о и҆ ѻ҆́блацы да крᲂпѧ́тъ на́мъ пра́вды тꙋ́чꙋ , пра́зднꙋющимъ свѣ́тлѡ , и҆ хрⷭ҇та̀ пᲂю́щимъ . Жи́знь живꙋ́щихъ , и҆сто́чникъ бл҃ги́хъ гдⷭ҇ь , бᲂга́тнѡ и҆стᲂча́ѧ во́дꙋ ᲂу҆че́нїемъ , вᲂпїе́тъ женѣ̀ , пᲂда́ждь ми во́дꙋ пи́ти , ꙗ҆́кѡ да пᲂда́мъ ти во́дꙋ , сᲂгрѣше́нїемъ твᲂи́мъ и҆з̾сꙋше́нїе . сла́ва . Свѣ́та є҆ди́нᲂго нераздѣ́льна , трисл҃нечнᲂе є҆ди́нство , без̾нача́льнагѡ ѻ҆ц҃а и҆ сн҃а и҆ дх҃а , бжⷭ҇тво̀ є҆ди́но жи́знь всѣ́хъ и҆ твᲂре́цъ . тᲂгѡ̀ вᲂспᲂе́мъ вѣ́рнїи со беспло́тными , трист҃ы́и пѣ́сньми сщ҃еннᲂсла́вѧще . и҆ ны́нѣ , боⷢ҇ . Свѣ́тꙋ бы́вши жили́ще чи́стаѧ , ѡ҆зарѝ зѣ́ницы дш҃и мᲂеѧ̀ , ѡ҆мраче́ныѧ мно́гими ко́зньми врага̀ , и҆ ви́дѣти спᲂдо́би ꙗ҆́снѡ , и҆́же ѿ тебѐ вᲂсїѧ́вшїи свѣ́тъ , па́че ᲂу҆ма̀ чи́стымъ срⷣцемъ .

катава́сїѧ : Сᲂтвᲂрѝ держа́вꙋ мы́шцею свᲂе́ю , низлᲂжи́ бо си́льныѧ со престо́лъ , и҆ вᲂзнесѐ смире́нныѧ бг҃ъ і҆и҃левъ . в̾ ни́хже пᲂсѣтѝ на́съ вᲂсто́къ свы́ше , и҆ напра́вилъ ны̀ є҆́сть на пꙋ́ть ми́ренъ .

задᲂсто́йникъ : Свѣти́сѧ свѣти́сѧ но́выи і҆єрⷭ҇ли́ме , сла́ва бо гдⷭ҇нѧ на тебѣ̀ вᲂсїѧ̀ , ликꙋ́й ны́нѣ и҆ весели́сѧ сїѡ́не , ты́ же чⷭ҇таѧ красꙋ́йсѧ бцⷣе , ѡ҆ вᲂста́нїи ржⷭ҇тва̀ твᲂегѡ̀ [пᲂкло́н̾ до землѝ] . та́же , ст҃ъ гдⷭ҇ь бг҃ъ на́шъ ,= на́ гласъ , д҃ . свѣти́ленъ , па́сцѣ . Пло́тїю ᲂу҆снꙋ́въ ꙗ҆́кѡ ме́ртвъ , цр҃ь и҆ гдⷭ҇ь , тридне́вно вᲂскр҃се , и҆ а҆да́ма вᲂздви́гъ и҆з̾ тлѝ , и҆ ᲂу҆праздни́въ сме́рть . па́сха нетлѣ́нїѧ , ми́рꙋ спасе́нїе . =и҆ дрꙋгі́и , ѡ҆ самарѧны́нѣ . сла́ва . Въ самарі́ю прише́лъ є҆сѝ сп҃҃се мо́й всеси́льне , и҆ женѣ̀ прᲂси́вшѣй во́дꙋ по́далъ є҆сѝ , и҆́же є҆вре́ѡмъ во́ды и҆стᲂчи́въ и҆з̾ ка́мене премно́ги , и҆ менѐ жа́ждꙋща напо́й , да не к̾ тᲂмꙋ̀ в̾ жа́ждꙋ в̾ без̾кᲂне́чныѧ вѣ́ки . и҆ ны́нѣ . И҆́же ча́шꙋ и҆мѣ́ѧ не и҆стᲂщи́мыхъ сᲂкро́вищь , да́ждь ми пᲂчерпстѝ во́дꙋ , во ѡ҆ставле́нїе грѣхо́въ , ꙗ҆́кѡ сᲂдержи́мъ є҆́смь жа́ждею , бл҃гᲂꙋтро́бне є҆ди́не ще́дрыи .

На хвали́тѣхъ . стихѣ́ры , вᲂскрⷭ҇ны . гла́съ , д҃ . =запѣ́въ : хвали́те бг҃а во ст҃ы́хъ є҆гѡ̀ . И҆́=же распѧ́тїе претерпѣ́выи и҆ сме́рть , и҆ вᲂскр҃сы́и и҆з̾ ме́ртвыхъ всемᲂгі́и гдⷭ҇и , сла́вимъ твᲂѐ вᲂскрⷭ҇нїе .

хвали́те є҆гѡ̀ во ᲂу҆тверже́нїи си́лъ є҆гѡ̀ . Крⷭ҇то́мъ твᲂи́мъ хрⷭ҇тѐ , ѿ дре́внїѧ клѧ́твы свᲂбᲂди́лъ є҆сѝ на́съ , и҆ сме́ртїю свᲂе́ю , и҆́же є҆стество̀ на́ше мꙋча́щаго дїа́вᲂла ᲂу҆праздни́лъ є҆сѝ . вᲂскрⷭ҇нїемъ же свᲂи́мъ , ра́дᲂсти всѧ́ческаѧ и҆спо́лнилъ є҆сѝ . тѣ́мже вᲂпїе́мъ ти , вᲂскр҃сы́и и҆з̾ ме́ртвыхъ , гдⷭ҇и сла́ва тебѣ̀ .

хвали́те є҆гѡ̀ на си́лахъ є҆гѡ̀ ,꙳ хвали́те є҆гѡ̀ по премно́гᲂмꙋ вели́чествїю є҆гѡ̀ . Твᲂи́мъ крⷭ҇то́мъ хрⷭ҇тѐ сп҃се , наста́ви на́съ на и҆́стинꙋ твᲂю̀ , и҆ и҆зба́ви ны̀ ѿ сѣ́ти вра́жїѧ . вᲂскр҃сы́и и҆з̾ ме́ртвыхъ , вᲂста́ви на́съ па́дшїѧсѧ грѣхо́мъ , прᲂсте́ръ рꙋ́кꙋ свᲂю̀ чл҃кᲂлю́бче гдⷭ҇и , мл҃твами ст҃ы́хъ твᲂи́хъ .

хвали́те є҆гѡ̀ во́ гласѣ трꙋ́бнѣмъ ,꙳ хвали́те є҆гѡ̀ во ѱалты́ри и҆ гꙋ́слѣхъ . Ѻ҆те́ческихъ си нѣ́дръ не ѿлꙋ́чьсѧ є҆динᲂро́днᲂе сло́во бж҃їе , прїи́де на́ землю за чл҃кᲂлю́бїе , чл҃къ бы́въ непрело́женъ . и҆ распѧ́тїе и҆ сме́рть претерпѣ́лъ є҆сѝ пло́тїю , без̾стра́стныи бжⷭ҇тво́мъ . вᲂскр҃съ же и҆з̾ ме́ртвыхъ , без̾сме́ртїе по́далъ є҆сѝ ро́дꙋ чл҃ческᲂмꙋ , ꙗ҆́кѡ є҆ди́нъ всеси́ленъ .

хвали́те є҆гѡ̀ в̾ тѷмпа́нѣ и҆ ли́цѣ ,꙳ хвали́те є҆гѡ̀ во стрꙋ́нахъ и҆ ѻ҆рга́нѣхъ . Сме́рть и҆з̾во́лилъ є҆сѝ пло́тїю , на́мъ без̾сме́ртїе хᲂда́тайствꙋѧ сп҃се . и҆ во́грᲂбъ всели́сѧ , да на́съ ѿ а҆́да свᲂбᲂди́ши , сᲂвᲂскр҃си́въ съ сᲂбо́ю . пᲂстрада̀ ᲂу҆́бѡ ꙗ҆́кѡ чл҃къ , но вᲂскр҃се ꙗ҆́кѡ бг҃ъ . сегѡ̀ ра́ди вᲂпїе́мъ , сла́ва тебѣ̀ живᲂда́вче гдⷭ҇и , є҆ди́не чл҃кᲂлю́бче .

и҆́ны , стⷯры , ѡ҆ самарѧны́нѣ .= запѣ́въ : гла́съ , в҃ .= хвали́те є҆гѡ̀ в̾ кѷмва́лѣхъ дᲂбрᲂгла́сныхъ , хвали́те є҆гѡ̀ в̾ кѷмва́лѣхъ вᲂсклица́нїѧ .꙳ всѧ́ко дыха́нїе да хва́литъ гдⷭ҇а . На стꙋдене́цъ прїи́де гдⷭ҇ь , самарѧны́нѧ же мᲂлѧ́ше бл҃гᲂꙋтро́бнагѡ . пᲂда́ждь ми во́дꙋ вѣ́ры , да вᲂспрїимꙋ̀ кꙋпѣ́льныѧ во́ды , ра́дᲂсть и҆ и҆збавле́нїе , жизнᲂда́вче гдⷭ҇и сла́ва тебѣ̀ .

сти́хъ : вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ ,꙳ незабꙋ́ди ни́щихъ свᲂи́хъ до кᲂнца̀ . И҆́же сᲂбез̾нача́льныи и҆ сᲂпрⷭ҇нᲂсꙋ́щныи сн҃ъ и҆ сло́во ѻ҆ц҃ꙋ , на и҆сто́чникъ прїи́де и҆сто́чникъ и҆сцѣле́нїемъ , и҆ жена̀ ѿ самарі́и прїи́де пᲂчерпстѝ во́дꙋ , ю҆́же ви́дѣвъ сп҃съ речѐ , да́ждь ми во́дꙋ пи́ти , и҆ ше́дши пригласѝ свᲂегѡ̀ мꙋ́жа . ѻ҆на́же ꙗ҆́кѡ чл҃кꙋ гл҃ющи а҆ не бг҃ꙋ , ᲂу҆таи́ти тща́щисѧ гл҃аше , не и҆́мамъ мꙋ́жа . ᲂу҆чи́тель же к̾ не́й гл҃а , и҆́стинꙋ рекла̀ є҆сѝ не и҆́мамъ мꙋ́жа , пѧ́ть бо и҆мѣ́ла є҆сѝ , и҆ ны́нѣ є҆го́же и҆́маши нѣ́сть ти мꙋ́жъ . ѻ҆на́же ѡ҆ гл҃ѣ ᲂу҆диви́вшисѧ , и҆ во́ градъ те́кши наро́дѡмъ вᲂпїѧ́ше гл҃ющи , прїиди́те и҆ ви́дите хрⷭ҇та̀ , и҆́же да́рꙋетъ ми́рᲂви ве́лїю ми́лᲂсть .

сти́хъ : гла́съ , ѕ҃ . и҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ ,꙳ пᲂвѣ́мъ всѧ̀ чꙋдеса̀ твᲂѧ̀ . Та́кѡ гл҃етъ гдⷭ҇ь самарѧны́нѣ , а҆́ще бы вѣ́дала да́ръ бж҃їи , и҆ кто̀ є҆́сть гл҃ѧи тебѣ̀ да́ждь ми вᲂды̀ пи́ти , и҆ ты́ бы прᲂси́ла ᲂу҆ негѡ̀ , и҆ да́лъ бы ти пи́ти , да не вжа́ждешисѧ во́ вѣки , гл҃етъ гдⷭ҇ь .

сла́ва . гла́съ , ѕ҃ . И҆сто́чникъ живᲂнача́льныи і҆с҃ъ сп҃съ на́шъ , ко и҆сто́чникꙋ прїи́де патрїа́рха і҆а́кѡва , пи́ти прᲂша́ше вᲂды̀ , ѿ жены̀ самарѧны́ни . сїѧ́ же неприча́стнᲂе і҆ꙋде́ѡмъ прире́кши , мꙋ́дрыи зижди́тель приво́дитъ ю҆̀ сла́дкими глаго́лы , па́че к̾ прᲂше́нїю прⷭ҇нѡ живо́тнѣй вᲂдѣ̀ . ю҆́же прїи́мши всѣ́мъ прᲂпᲂвѣ́да рекꙋ́щи , прїиди́те ви́дите та́йнꙋ вѣ́дꙋщагѡ бг҃а , прише́дшагѡ пло́тїю , да спасе́тъ ро́дъ на́шъ . и҆ ны́нѣ . гла́съ , в҃ . Пребл҃гᲂслᲂве́на є҆сѝ бцⷣе дв҃о , вᲂпло́щшимбᲂсѧ и҆з̾ тебѐ , а҆́дъ плѣни́сѧ , а҆да́мъ призва́сѧ . клѧ́тва пᲂтреби́сѧ , и҆ є҆́вва свᲂбᲂди́сѧ . сме́рть ᲂу҆мертви́сѧ , и҆ мы̀ ѡ҆жи́хᲂмъ . тѣ́мъ пᲂю́ще вᲂзᲂпїе́мъ , бл҃гᲂслᲂве́нъ бг҃ъ на́шъ , и҆зво́ливыи та́кѡ . Сла́вᲂсло́вїе вели́кᲂе . та́же , трᲂпа́рь . Вᲂскре́съ и҆́з̾ грᲂба и҆ ᲂу҆́зы растерза́въ , разрꙋши́лъ є҆сѝ гдⷭ҇и сме́рти ѡ҆сꙋже́нїе , и҆ всѧ̀ ѿ сѣ́ти непрїѧ́зненыѧ и҆зба́вль . ꙗ҆вѝ себѐ а҆пⷭ҇лѡмъ свᲂи́мъ , и҆ пᲂсла́въ и҆́хъ на́ прᲂпᲂвѣдь , и҆ тѣ́ми ми́ръ сво́й по́далъ є҆сѝ вселе́ннѣй , є҆ди́не мнᲂгᲂмлⷭ҇тиве . пᲂсе́мъ , є҆ктенїѝ . и҆ ѿпꙋ́стъ .

чте́цъ , гл҃етъ : а҆ми́нь , сла́ва , и҆ ны́нѣ . гла́съ , з҃ . Сѐ тма̀ и҆ ра́нѡ , и҆ что̀ ᲂу҆́грᲂба ма́рїе стᲂи́ши , мно́гꙋ тмꙋ̀ и҆мꙋ́щи в̾ ра́зꙋмѣ , в̾ не́мже гдѣ̀ пᲂлᲂже́нъ бы́сть вᲂпрᲂша́ше і҆с҃а ; но ви́ждь сри́щꙋщасѧ ᲂу҆ченикѝ , ка́ко ри́зами и҆ сꙋдаре́мъ вᲂскрⷭ҇нїе ѡ҆брѣто́ша , и҆ вᲂспᲂмѧнꙋ́ша ꙗ҆́же ѡ҆ си́хъ писа́нїѧ . и҆́ми же , с̾ ни́ми и҆ мы̀ вѣ́рᲂвавше , вᲂспѣва́емъ тѧ̀ жизнᲂда́вца хрⷭ҇та̀ .= та́же , ча́съ , а҃ . ѱалмы̀ , ѻ҆бы́чны . =и҆ кᲂне́чныи ѿпꙋ́стъ .

На часѣ́хъ , трᲂпа́рь : свѣ́тлꙋю вᲂскрⷭ҇нїѧ . сла́ва , препᲂлᲂве́нїю . кᲂндакѝ , премѣнѧ́емъ , препᲂлᲂве́нїю , и҆ ѡ҆ самарѧны́нѣ . На литꙋргі́и , бл҃же́нна , на и҃ . ѿ кано́на , ѡ҆ самарѧны́нѣ , пѣ́снь г҃ , и҆ ѕ҃ . По вхо́дѣ , трᲂпа́рь : свѣ́тлꙋю вᲂскрⷭ҇нїѧ . и҆ препᲂлᲂве́нїю . сла́ва , кᲂнда́къ , ѡ҆ самарѧны́нѣ . и҆ ны́нѣ , кᲂнда́къ , препᲂлᲂве́нїю .

прᲂки́мен̾ , ѱл҃о́мъ дв҃дᲂвъ . по́йте бг҃ꙋ на́шемꙋ по́йте , по́йте цр҃е́ви на́шемꙋ по́йте . сти́хъ : всѝ ꙗ҆зы́цы вᲂсплещи́те рꙋка́ми , вᲂскли́кните бг҃ꙋ гла́сᲂмъ ра́дᲂсти . а҆пⷭ҇лъ , въ дѣѧ́нїихъ . заⷱ҇ , к҃и .= а҆ллилꙋ́їѧ . налѧцы̀ и҆ спѣ́й и҆ црⷭ҇твꙋй , и҆́стины ра́ди и҆ кро́тᲂсти и҆ пра́вды . =сти́хъ : вᲂзлюби́лъ є҆сѝ пра́вдꙋ , и҆ вᲂзненави́дѣ без̾зако́нїе . є҆ѵⷢ҇а́лїе , ѿ і҆ѡа́нна . заⷱ҇ , в҃і . задᲂсто́йникъ : Чꙋ́же є҆́сть .= прича́стенъ , тѣ́ло хрⷭ҇то́во . =дрꙋгі́и , хвали́те гдⷭ҇а с̾ небе́съ .

Пᲂдᲂба́етъ вѣ́дати , ꙗ҆́кѡ слꙋ́жба самарѧны́нѣ пᲂе́тсѧ , д҃ , днѝ . в̾ =недѣ́лю , в̾= четверто́къ , в̾ пѧто́къ , и҆ в̾ сꙋбо́тꙋ . в̾ =пᲂнедѣ́льникъ ᲂу҆́бѡ , =и҆ во вто́рникъ , и҆ въ сре́дꙋ , пᲂе́тсѧ слꙋ́жба препᲂлᲂве́нїю . и҆ та́кѡ ѿдава́етсѧ пра́зднество .

Въ тꙋ́же , нлⷣю , ве́черъ . на гдⷭ҇и вᲂзва́хъ , стⷯры , пра́здникꙋ , г҃ . гла́съ , а҃ . поⷣ . нбⷭ҇нымъ чино́мъ .= Т=вᲂре́цъ всѧ́ческихъ и҆ цр҃ь всѣ́хъ ,꙳ и҆́же ѻ҆ц҃ꙋ и҆ бг҃ꙋ ,꙳ приснᲂсꙋ́щнᲂе сло́во ,꙳ во́лею ѿ дв҃ы пло́ть прїи́мъ , и҆ бы́въ чл҃къ ,꙳ неи҆зрече́нныѧ мꙋ́дрᲂсти ,꙳ ꙗ҆́кѡ бг҃ъ всѣ́мъ и҆стᲂчѝ ᲂу҆че́нїѧ . Пра́здникꙋ препᲂлᲂви́вшꙋсѧ і҆ꙋде́ѡмъ ,꙳ в̾ цр҃квь прише́лъ є҆сѝ и҆́же зако́нꙋ влⷣко ,꙳ ᲂу҆ча̀ со́ властїю ,꙳ и҆ кни́жники ѡ҆блича́ѧ ꙗ҆́кᲂже пи́шетъ ,꙳ и҆ ᲂу҆дивлѧ́ѧ мꙋ́дрᲂстїю слᲂве́съ свᲂи́хъ ,꙳ и҆ чꙋ́дными ꙗ҆вле́ньми . Пᲂда́тель премꙋ́дрᲂсти , и҆ бл҃ги́мъ да́тель ,꙳ и҆з̾лива́ѧи бжⷭ҇твеныѧ стрꙋѝ ,꙳ ѿ и҆сто́чника приснᲂтекꙋ́щагѡ ,꙳ прїидѣ́те ко мнѣ̀ зᲂве́тъ ,꙳ во́дꙋ жи́зни жа́ждꙋщїи пᲂчерпи́те речѐ ,꙳ и҆ рѣ́ки и҆́з̾ чрева ва́шегѡ ,꙳ дарᲂва́нїи бжⷭ҇твеныхъ и҆стекꙋ́тъ .

та́же , стихѣ́ры , в̾ минѣ́и , г҃ . сла́ва , и҆ ны́нѣ . гла́съ , д҃ . Гдⷭ҇и , пре́жде честна́гѡ ти крⷭ҇та̀ , пра́здникꙋ препᲂлᲂви́вшꙋсѧ , во ст҃и́лище в̾ше́лъ є҆сѝ , і҆ꙋде́и со дерзнᲂве́нїемъ ᲂу҆ча̀ , ꙗ҆́же мѡѷсе́ᲂмъ в̾ зако́нѣ тᲂбо́ю закᲂнᲂпᲂлᲂже́ нїѧ . дивѧ́щим̾жесѧ хрⷭ҇тѐ твᲂе́й премꙋ́дрᲂсти пречⷭ҇тᲂмꙋ та́инствꙋ , и҆́же натѧ̀ рᲂпта́нїемъ в̾ себѣ̀ , и҆ за́вистїю пᲂꙋча́хꙋсѧ , гл҃юще , ка́кѡ се́й вѣ́сть кни́ги неꙋчи́всѧ ; невѣ́дѧще тебѐ сп҃са дш҃а́мъ на́шимъ .

На стихо́внѣ , стихѣ́ры . гла́съ , д҃ . Живᲂтвᲂрѧ́щемꙋ твᲂемꙋ̀ крⷭ҇тꙋ̀ , непреста́ннѡ кла́нѧющесѧ хрⷭ҇тѐ [пᲂкло́н̾] , и҆ тридне́внᲂе вᲂскрⷭ҇нїе твᲂѐ сла́вимъ . тѣ́мъ бо ѡ҆бнᲂви́лъ є҆сѝ , и҆стлѣ́вшее чл҃ческᲂе є҆стество̀ всеси́льне . и҆ є҆́же на нб҃са̀ вᲂсхо́дъ ѡ҆бнᲂви́лъ є҆сѝ на́мъ , ꙗ҆́кѡ є҆ди́нъ бл҃гъ и҆ чл҃кᲂлю́бецъ .

сти́хъ : к̾ тебѣ̀ вᲂз̾ведо́хъ ѻ҆́чи мᲂѝ . Хᲂтѣ́хъ слеза́ми ѡ҆мы́ти , мᲂи́хъ грѣхо́въ гдⷭ҇и рꙋкᲂписа́нїе , и҆ про́чее живᲂта̀ мᲂегѡ̀ , пᲂкаѧ́нїемъ ᲂу҆гᲂди́ти тебѣ̀ , но вра́гъ льсти́тъ мѧ и҆ бо́ретъ дш҃ꙋ мᲂю̀ . гдⷭ҇и пре́же да́же до кᲂнца̀ непᲂги́бнꙋ и҆ спаси́ мѧ .

сти́хъ : пᲂми́лꙋй на́съ гдⷭ҇и . мⷱ҇ꙋ . Прᲂславлѧ́ѧисѧ в̾ па́мѧтехъ ст҃ы́хъ твᲂи́хъ хрⷭ҇тѐ бж҃е , и҆ ѿ ни́хъ ᲂу҆мᲂле́нъ быва́ѧ , низ̾пᲂслѝ на́мъ ве́лїю млⷭ҇ть . сла́ва , и҆ ны́нѣ . гла́съ , ѕ҃ . Пра́здникꙋ препᲂлᲂви́вшꙋсѧ , твᲂегѡ̀ хрⷭ҇тѐ вᲂскрⷭ҇нїѧ , и҆ бжⷭ҇твенагѡ прише́ствїѧ ст҃а́гѡ твᲂегѡ̀ дх҃а , сᲂше́дшесѧ чꙋде́съ твᲂи́хъ вᲂспᲂе́мъ та́инство . в̾ ни́хже низ̾пᲂслѝ на́мъ ве́лїю ми́лᲂсть .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . и҆ =ѿпꙋ́стъ .

Въ пнⷣльникъ , є҃ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , три́жды . =По а҃ , стихᲂло́гїи , сѣда́ленъ . гла́съ , д҃ . Вᲂзрѣ́вше на гро́бныи вхо́дъ , и҆ пла́мене а҆́нг҃льскагѡ нетерпѧ́ще мѷрѡно́сицы , съ тре́петᲂмъ дивлѧ́хꙋсѧ глаго́люще , є҆да̀ ᲂу҆кра́десѧ ѿве́рзыи разбо́йникꙋ ра́й ; є҆да́ ли вᲂста̀ , и҆́же пре́жде стра́сти прᲂпᲂвѣ́давыи вᲂста́нїе ; вᲂи́стинꙋ вᲂскр҃се хрⷭ҇то́съ , и҆ сꙋ́щимъ во а҆́дѣ пᲂдаѧ̀ живо́тъ и҆ вᲂскрⷭ҇нїе . =сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . Смире́нꙋю дш҃ꙋ мᲂю̀ пᲂсѣтѝ гдⷭ҇и , и҆́же во грѣсѣ́хъ жи́знь всю̀ и҆зжи́вшꙋю . и҆ ꙗ҆́кᲂже блꙋдни́цꙋ прїими́ мѧ сп҃се и҆ спаси́ мѧ . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Дне́сь а҆́нг҃льскаѧ во́инства , въ па́мѧть страстᲂте́рпецъ прїидо́ша , вѣ́рныхъ мы́сли прᲂсвѣти́ти , и҆ вселе́ннꙋю бл҃гᲂда́тїю ᲂу҆ѧсни́ти . тѣ́ми бж҃е ᲂу҆мᲂле́нъ быва́ѧ , да́рꙋй на́мъ ве́лїю ми́лᲂсть . сла́ва , и҆ ны́нѣ , боⷢ҇ . И҆́же ѿ а҆́нг҃ла сло́во прїе́мши дв҃о во ᲂу҆тро́бѣ свᲂе́й , и҆ ро́ждьши вᲂплᲂще́на хрⷭ҇та̀ бг҃а є҆мманꙋ́ила . бцⷣе мᲂлѝ ѡ҆ дш҃а́хъ на́шихъ .

По в҃ , стихᲂло́гїи , сѣда́ленъ . гла́съ , є҃ . И҆́же влⷣка всѣ́хъ в̾ цр҃кви стᲂѧ̀ , пра́здникꙋ препᲂлᲂви́вшꙋсѧ пѧтьдесѧ́тницы честны́ѧ , є҆вре́ѡмъ бесѣ́дꙋѧ , ѡ҆блича́ше ꙗ҆́снѡ со дерзнᲂве́нїемъ мно́гимъ мꙋчи́тельскꙋю и҆́хъ де́рзᲂсть , ꙗ҆́кѡ цр҃ь сы́и и҆ бг҃ъ . на́мъ же всѣ́мъ да́рꙋетъ за бл҃гᲂꙋтро́бїе ве́лїю млⷭ҇ть . сла́ва , и҆ ны́нѣ , то́йже .

та́же , вᲂскрⷭ҇нїе хрⷭ҇то́во , аⷤ . ѱл҃о́мъ , н҃ . кано́нъ , пра́здникꙋ , на и҃ . и҆ в̾ минѣ́и , на д҃ .

На хвали́тѣхъ , стихѣ́ры , на д҃ . гла́съ , д҃ . Распѧ́тїе претерпѣ́въ и҆ сме́рть , и҆ вᲂскр҃съ и҆з̾ ме́ртвыхъ , всеси́льне гдⷭ҇и , сла́вимъ твᲂѐ вᲂскрⷭ҇нїе . двⷤа . Кто̀ ѡ҆бꙋрева́емь , притека́ѧ ко приста́нищꙋ твᲂемꙋ̀ , гдⷭ҇и не спасе́тсѧ ли , и҆лѝ кто̀ бᲂлѣ́знꙋѧ , и҆ припа́даѧ ко врачевствꙋ̀ семꙋ̀ , не и҆сцѣлева́етлисѧ , сᲂдѣ́телю всѧ́ческимъ и҆ врачꙋ̀ недꙋ́жнымъ , гдⷭ҇и пре́же да́же до кᲂнца̀ , непᲂги́бнꙋ и҆ спаси́ мѧ . мⷱ҇ꙋ . Кто̀ недиви́тсѧ зрѧ̀ ст҃і́и мч҃нцы , по́двига до́брагѡ и҆́мже пᲂдвиза́стесѧ ; ка́кѡ во́ плᲂти сꙋ́ще беспло́тнагѡ врага̀ пᲂбѣди́сте , хрⷭ҇та̀ и҆спᲂвѣ́дающе , и҆ крⷭ҇то́мъ вᲂѡ҆рꙋжи́вшесѧ . тѣ́мже дᲂсто́йни ꙗ҆ви́стесѧ бѣсо́мъ прᲂгᲂни́тели , и҆ ва́рварѡмъ пᲂбѣди́тели . непреста́ннѡ мᲂлѧ́щесѧ , спасти́сѧ дш҃а́мъ на́шимъ . сла́ва , и҆ ны́нѣ . гла́съ , и҃ . Препᲂлᲂви́вшꙋсѧ пра́здникꙋ па́схи , в̾ цр҃квь вше́лъ є҆сѝ ст҃и́лища сп҃се на́шъ , и҆ ста́въ пᲂсредѣ̀ наро́да , ᲂу҆ча́ше и҆́хъ со дерзнᲂве́нїемъ , и҆ гл҃аше , а҆́зъ є҆́смь свѣ́тъ ми́рꙋ , и҆́же въ слѣ́дъ менѐ грѧде́тъ , не и҆́мать хᲂди́ти во тмѣ̀ , но и҆́мать свѣ́тъ без̾сме́ртныѧ жи́зни .

На стихо́внѣ , стихѣ́ры . гла́съ , в҃ . поⷣ . до́ме є҆в̾фра́фᲂвъ . Ве́сь въ бз҃ѣ ты̀ сы́и сло́ве ,꙳ пᲂгрꙋжа́ема мѧ хᲂтѧ̀ ,꙳ и҆зѧ́ти ѿ сᲂгрѣше́нїи ,꙳ сᲂвᲂкꙋ́пльсѧ мнѣ̀ ,꙳ чл҃кᲂлю́бче .

сти́хъ : пᲂмѧнѝ со́нмъ тво́й ,꙳ и҆́же стѧжа̀ и҆спе́рва . Ты̀ є҆сѝ цр҃ю ꙳ премꙋ́дрᲂсть вели́каѧ .꙳ тᲂбо́ю ѻ҆ц҃ъ ,꙳ ми́ръ сᲂтвᲂрѝ ,꙳ премꙋ́дрено со ст҃ы́мъ дх҃ᲂмъ .

сти́хъ : бг҃ъ же цр҃ь на́шъ пре́же вѣ́къ ,꙳ сᲂдѣ́ла спасе́нїе пᲂсредѣ̀ землѝ . Прїидѣ́те ꙳ бл҃гᲂвѣ́рнѡ ,꙳ и҆́же жи́зни во́дꙋ ꙳ пи́ти жела́ющїи ,꙳ вᲂпїѧ́ше сп҃се мо́й .

сла́ва , и҆ ны́нѣ . гла́съ , и҆ поⷣ , то́йже . Преста̀ сѣ́нь ,꙳ и҆́бѡ месі́ѧ ꙳ пᲂсредѣ̀ пра́здника ,꙳ ꙗ҆́кᲂже бл҃гᲂда́ть ꙳ и҆́нꙋ свѣтᲂно́снꙋ ѡ҆блиста́лъ є҆́сть .

та́же , бл҃го є҆́сть . и҆ ча́съ , а҃ . и҆ ѿпꙋ́стъ .

На бл҃же́ннах̾ , трипѣ́снец̾ , є҆мꙋ́же краегране́сїе : сла́ва бг҃ꙋ на́шемꙋ . гла́съ , д҃ . пѣ́снь , а҃ . і҆рмо́съ . тристᲂѧ́ща крѣ́пкїи .

во црⷭ҇твїи сѝ є҆гда̀ прїи́деши ,꙳ пᲂмѧнѝ на́съ гдⷭ҇и . Свѧза́въ вра́жїю гꙋби́тельнꙋю держа́вꙋ ᲂу҆́зами , и҆́х̾же претерпѣ́лъ є҆сѝ на́съ ра́ди чл҃кᲂлю́бче . крⷭ҇то́мъ же свᲂи́мъ со́бралъ є҆сѝ гдⷭ҇и растᲂче́ныѧ , и҆ враждꙋ̀ разᲂри́лъ є҆сѝ средᲂгра́дїѧ . тѣ́мже вᲂспѣва́емъ тѧ .

бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Гдⷭ҇ь ꙗ҆́кᲂже пре́жде стра́сти речѐ , вᲂскр҃се держа́внѡ . плѣни́въ ꙗ҆́кѡ бг҃ъ а҆́дᲂва црⷭ҇твїѧ , всѧ́же вᲂздви́глъ тꙋ̀ спѧ́щїѧ ѿ́ вѣка , тᲂгѡ̀ велича́ющїѧ .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Дивѧ́щесѧ видѣ́нїю и҆ ѻ҆́бразꙋ мѷрᲂно́сицъ ли́къ , бжⷭ҇твенагѡ слꙋжи́телѧ . ѿ негѡ̀ наꙋча́хꙋсѧ , сѐ хрⷭ҇то́съ вᲂскр҃се , ше́дше , прᲂпᲂвѣ́дите ᲂу҆ченико́мъ , рыда́ющимъ и҆ пла́чꙋщимъ .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . боⷢ҇ . Вᲂсїѧ̀ чи́стаѧ ꙗ҆́кѡ жени́хъ красе́нъ и҆з̾ ме́ртвыхъ , и҆́же ѿ твᲂи́хъ лᲂже́снъ вᲂпло́щьсѧ , па́че ᲂу҆ма̀ бл҃гᲂстїю . тѣ́мже со а҆пⷭ҇лы ви́дѣвши сла́вѧще , тридне́внᲂе сегѡ̀ вᲂскрⷭ҇нїе .

пѣ́снь , и҃ . і҆рмо́съ . и҆зба́вителю всѣ́хъ .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . Пречи́стѣи прᲂсте́рлъ є҆сѝ дла́ни свᲂѝ , на крⷭ҇тѣ̀ во́лею дᲂлгᲂтерпѣли́ве , ѡ҆бъѧ́тъ всѣ́хъ , и҆ ѿ рꙋкѝ и҆зба́вилъ є҆сѝ чꙋжа́гѡ . сегѡ̀ ра́ди тѧ со́ страхᲂмъ сла́вимъ .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Ꙗ҆́кᲂже пᲂлᲂжи́сѧ во́лею во́ грᲂбѣ , спѧ́щїи дре́вле во грᲂбѣ́хъ , и҆́же и҆з̾ ме́ртвыхъ вᲂста́нїемъ твᲂи́мъ сᲂвᲂз̾ста́ша , стра́хᲂмъ вᲂпїю́ще , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Ди́вна и҆ пресла́вна чꙋдеса̀ , дѣ́йствꙋѧ хрⷭ҇тѐ свᲂи́мъ гл҃ᲂмъ , сᲂбо́ръ є҆вре́йскїи ви́дѣвъ тѧ , ѡ҆сꙋжа́етъ на сме́рть , жи́знь всѣ́хъ сꙋ́ща , бл҃гᲂꙋтро́бне гдⷭ҇и .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . Во́ днехъ хрⷭ҇тѐ четы́ридесѧтихъ с̾ мꙋ́дрыми и҆ чⷭ҇тны́ми а҆пⷭ҇лы ꙗ҆́вѣ вᲂдвᲂрѧ́ѧсѧ , в̾вѣ́рилъ є҆сѝ бжⷭ҇твенᲂе смᲂтре́нїе , и҆́м̾же спа́слъ є҆сѝ ми́ръ пᲂю́щїи тѧ̀ .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . боⷢ҇ . Ꙗ҆́кѡ стра́шнᲂе твᲂѐ ржⷭ҇тво̀ всенепᲂро́чнаѧ , и҆́м̾же всѝ стра́шнагѡ паде́нїѧ и҆зба́влени бы́хᲂмъ , зᲂвꙋ́ще , ра́дꙋисѧ всѣ́мъ чл҃кѡмъ пред̾ста́тельнице . ра́дꙋисѧ ми́рꙋ па́дшемꙋ вᲂзва́нїе .

пѣ́снь , ѳ҃ . і҆рмо́съ . є҆́вва ᲂу҆́бѡ недꙋ́гᲂмъ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . Прᲂсте́рта во́лею на крⷭ҇тѣ̀ сл҃нце зрѧ̀ тебѐ пребл҃гі́и , стра́хᲂмъ сᲂкры̀ лꙋчѝ . и҆ пᲂкᲂлѣба́шасѧ землѝ ѡ҆снᲂва́нїѧ , и҆ ка́менїе распаде́сѧ влⷣко , и҆ цр҃ко́внаѧ за́вѣса раз̾дра́сѧ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Пᲂма́завъ тѧ̀ дре́вле і҆ѡ́сифъ , и҆ плащани́цею ѡ҆бви́въ , пᲂлᲂжѝ в̾ но́вѣ гро́бѣ , жи́знь сꙋ́щꙋ всѣ́хъ . и҆ вᲂскре́слъ є҆сѝ тридне́внѡ , и҆стᲂщи́въ а҆́дᲂва црⷭ҇твїѧ , бжⷭ҇твенᲂю си́лᲂю всемᲂгі́и .

сла́ва . Ви́дѣнъ бы́сть а҆пⷭ҇лы и҆́з̾ грᲂба вᲂста́въ тридне́внѡ , и҆ вᲂпїѧ́ше , и҆ди́те дрꙋ́зи и҆ ᲂу҆чени цы̀ мᲂѝ , прᲂпᲂвѣ́дите во всѣ́хъ ꙗ҆зы́цѣхъ ꙗ҆́же ви́дѣсте чꙋдеса̀ , и҆ и҆́же па́че сло́ва си́лꙋ мᲂю̀ .

и҆ ны́нѣ , боⷢ҇ . Ме́ртвымъ вдыха́юща жи́знь ꙗ҆́кᲂже ви́дѣ всенепᲂро́чнаѧ , и҆́з̾ грᲂба вᲂста́вша со сла́вᲂю , и҆спо́лнисѧ ра́дᲂсти , зᲂвꙋ́щи , сн҃е мо́й и҆ бж҃е мо́й , велича́ю твᲂѐ є҆́же па́че сло́ва смᲂтре́нїе .

Въ то́йже , пнⷣльникъ , ве́черъ . на гдⷭ҇и вᲂзва́хъ , стⷯры , пра́здникꙋ , г҃ . гла́съ , а҃ . поⷣ . нбⷭ҇нымъ чино́мъ . Пѧтьдесѧ́тницы наста́вши , препᲂло ве́нїе дне́мъ ,꙳ в̾ не́й же хрⷭ҇то́съ сло́во бжⷭ҇твенᲂю си́лᲂю ,꙳ раз̾сла́бленаго стѧ́гнꙋ сло́вᲂмъ свᲂи́мъ ,꙳ и҆ бл҃гᲂтече́нїе дарᲂва̀ .꙳ сла́ва вᲂпїю́щꙋ бл҃гᲂꙋтро́бнѣй твᲂе́й ,꙳ є҆́же к̾ на́мъ во́льнѣй бл҃гᲂсты́ни . И҆́же сы́и со ѻ҆ц҃е́мъ по пᲂдо́бїю ,꙳ пᲂсредѝ пра́здника к̾ на́мъ прише́дъ ,꙳ грѣ́хъ хᲂтѧ̀ ѿѧ́ти про́чее ,꙳ вᲂпло́щьсѧ прише́лъ є҆сѝ ,꙳ без̾грѣ́шно бо сїѐ прїе́мъ ,꙳ ꙗ҆́кѡ чл҃кᲂлю́бецъ ꙗ҆ви́лсѧ є҆сѝ . Є҆гда̀ в̾ препᲂлᲂве́нїе пра́здникꙋ бл҃гі́и ,꙳ в̾шелъ є҆сѝ сп҃се мо́й во ст҃и́лище свᲂѐ ,꙳ непᲂкᲂри́выѧ ᲂу҆ча̀ ,꙳ а҆́ще кто̀ жа́ждетъ і҆ꙋде́ѡмъ взыва́ше и҆зба́вителю ,꙳ да пїе́тъ во́дꙋ жи́зни ,꙳ и҆ не в̾жа́ждетсѧ никᲂли́же .

та́же , стихѣ́ры , в̾ минѣ́и , г҃ . сла́ва , и҆ ны́нѣ . гла́съ , и҃ . Препᲂлᲂви́вшꙋсѧ пра́здникꙋ , пре́жде стра́сти , и҆ сла́внагѡ вᲂскрⷭ҇нїѧ твᲂегѡ̀ гдⷭ҇и . и҆́м̾же ᲂу҆ча̀ бл҃же во ст҃и́лищи невѣ́рꙋющїѧ і҆ꙋде́и , фарисе́и и҆ кни́жники . и҆ вᲂпїѧ̀ лю́демъ , жа́ждаи да грѧде́тъ ко мнѣ̀ и҆ пїе́тъ , вѣ́рꙋѧи в̾ мѧ̀ , во́дъ жи́зни дх҃а бжⷭ҇твенагѡ рѣ́ки и҆стекꙋ́тъ и҆́з̾ чрева є҆гѡ̀ . ѽ неи҆з̾гл҃аннѣй мꙋ́дрᲂсти твᲂегѡ̀ хвале́ нїѧ . и҆́же всѧ̀ и҆спᲂлнѧ́ѧи , бж҃е на́шъ сла́ва тебѣ̀ .

На стихо́внѣ , стихѣ́ры . гла́съ , д҃ . Дре́ва преслꙋ ша́нїѧ запреще́нїе , разрѣши́лъ є҆сѝ сп҃се , на́ древѣ крⷭ҇тнѣмъ во́лею пригво́ждьсѧ . и҆ во а҆́дъ сᲂше́дъ си́льне , сме́ртыѧ ᲂу҆́зы ꙗ҆́кѡ бг҃ъ растерза́лъ є҆сѝ . сегѡ̀ ра́ди кла́нѧемсѧ [пᲂкло́н̾] , є҆́же и҆з̾ ме́ртвыхъ твᲂемꙋ̀ вᲂскрⷭ҇нїю , ра́дᲂстїю вᲂпїю́ще , всеси́льне гдⷭ҇и сла́ва тебѣ̀ .

сти́хъ : к̾ тебѣ̀ вᲂз̾ведо́хъ ѻ҆́чи мᲂѝ . Ѡ҆мы́й мѧ слеза́ми мᲂи́ми сп҃се , ꙗ҆́кѡ ѡ҆скверни́хсѧ мно́гими грѣхѝ . тѣ́мже припа́даю ти , сᲂгрѣши́хъ пᲂми́лꙋй мѧ бж҃е .

сти́хъ : пᲂми́лꙋй на́съ гдⷭ҇и . мⷱ҇ꙋ . Ст҃ы́хъ мч҃нкъ прїе́мыи терпѣ́нїе , и҆ ѿ на́съ прїимѝ пѣ́нїе чл҃кᲂлю́бче . да́рꙋй на́мъ тѣ́хъ мл҃твами ве́лїю млⷭ҇ть . сла́ва , и҆ ны́нѣ . гла́съ , и҃ . Ѡ҆чи́стимъ мы́сленаѧ чꙋ́вства , и҆ дш҃е́вными зарѧ́ми прᲂсвѣти́мсѧ , и҆ жи́знь ви́димъ хрⷭ҇та̀ во ст҃и́лище прише́дша , премно́жествᲂмъ бл҃гᲂсти , да врага̀ пᲂсрами́тъ стрⷭ҇тьмѝ крⷭ҇та̀ и҆ вᲂскрⷭ҇нїемъ , и҆ спасе́тъ ро́дъ на́шъ . к̾ немꙋ́ же вᲂзᲂпїе́мъ , непᲂстижи́ме гдⷭ҇и сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . и҆ =ѿпꙋ́стъ .

Во вто́рникъ , є҃ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , три́жды . =По а҃ , стихᲂло́гїи , сѣда́ленъ . гла́съ , д҃ . Вᲂскрⷭ҇лъ є҆сѝ ꙗ҆́кѡ без̾сме́ртенъ сп҃се и҆́з̾ грᲂба , и҆ сᲂвᲂз̾дви́глъ є҆сѝ ми́ръ сво́й , свᲂе́ю си́лᲂю хрⷭ҇тѐ бж҃е на́шъ . сᲂкрꙋши́лъ є҆сѝ крѣ́пᲂстїю сме́рти держа́вꙋ , ꙗ҆ви́лъ є҆сѝ млⷭ҇тиве вᲂскрⷭ҇нїе всѣ́мъ . =сти́хъ : гдⷭ҇и не ꙗ҆́рᲂстїю твᲂе́ю ѡ҆бличѝ менѐ , ни гнѣ́вᲂмъ твᲂи́мъ пᲂкажѝ менѐ . Препла́ваѧ пꙋчи́нꙋ настᲂѧ́щагѡ житїѧ̀ , пᲂмышлѧ́ю бе́зднꙋ мно́гихъ мᲂи́хъ ѕѡ́лъ , и҆ не и҆мѣ́ю ѡ҆кᲂрми́телѧ пᲂмышле́нїемъ , петро́въ прᲂвѣщава́ю ти гла́съ , спаси́ мѧ хрⷭ҇тѐ , спаси́ мѧ бж҃е ꙗ҆́кѡ чл҃кᲂлю́бецъ . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Крⷭ҇то́мъ вᲂѡ҆рꙋжи́вшесѧ стрⷭ҇тᲂте́рпцы твᲂѝ хрⷭ҇тѐ бж҃е на́шъ , пᲂбѣди́ша ко́ѕни ѕлᲂнача́льнагѡ врага̀ , вᲂсїѧ́ша ꙗ҆́кѡ свѣти́ла чл҃ки наставлѧ́юще , пᲂдава́ютъ и҆сцѣле́нїѧ и҆́же вѣ́рᲂю прᲂсѧ́щимъ . тѣ́хъ мл҃твами спасѝ дш҃а на́ша . сла́ва , и҆ ны́нѣ , боⷢ҇ . Ꙗ҆́кѡ всѣ́хъ тва́рей лꙋ́чши є҆сѝ , сла́вити тѧ̀ недᲂꙋмѣ́емъ бцⷣе . но мо́лимъ тѧ , тꙋ́не пᲂми́лꙋй на́съ .

По в҃ , стихᲂло́гїи , сѣда́ленъ . гла́съ , и҃ . Премꙋ́дрᲂсти во́дꙋ и҆ жи́зни и҆стᲂча́ѧи ми́рꙋ , всѣ́хъ сп҃се зᲂве́ши пᲂчерпстѝ спаси́тельныѧ во́ды , бжⷭ҇твеныи бо зако́нъ тво́й прїе́мъ чл҃къ , тѣ́мъ ᲂу҆гаша́етъ ле́стнᲂе ᲂу҆́глїе . тѣ́мже невжа́ждетсѧ во́ вѣки , ни прїи́метъ сы́тᲂсти твᲂеѧ̀ влⷣко цр҃ю нбⷭ҇ныи . сегѡ̀ ра́ди сла́вимъ держа́вꙋ твᲂю̀ хрⷭ҇тѐ бж҃е , сᲂгрѣше́нїемъ ѡ҆ставле́нїе прᲂсѧ́ще , ꙗ҆́кѡ є҆ди́нъ сы́и мнᲂгᲂми́лᲂстивъ . сла́ва , и҆ ны́нѣ , то́йже .

та́же , вᲂскрⷭ҇нїе хрⷭ҇то́во , аⷤ . ѱл҃о́мъ , н҃ . кано́нъ , пра́здникꙋ , на и҃ . и҆ в̾ минѣ́и , на д҃ .

На хвали́тѣхъ , стⷯры , на д҃ . гла́съ , д҃ . Крⷭ҇то́мъ твᲂи́мъ хрⷭ҇тѐ , ѿ дре́внїѧ клѧ́твы свᲂбᲂди́лъ є҆сѝ на́съ , и҆ сме́ртїю свᲂе́ю , и҆́же є҆стество̀ на́ше мꙋча́щаго дїа́вᲂла ᲂу҆праздни́лъ є҆сѝ . вᲂскрⷭ҇нїемъ же свᲂи́мъ , ра́дᲂсти всѧ́ческаѧ и҆спо́лнилъ є҆сѝ . тѣ́мже вᲂпїе́мъ ти , вᲂскр҃сы́и и҆з̾ ме́ртвыхъ , гдⷭ҇и сла́ва тебѣ̀ . двⷤа . Ѻ҆вча̀ є҆́смь слᲂве́снаго ти ста́да , и҆ к̾ тебѣ̀ прибѣга́ю па́стырю до́брᲂмꙋ , взыщѝ менѐ заблꙋ́ждьшаго бж҃е и҆ пᲂми́лꙋй мѧ . мⷱ҇ꙋ . А҆́нг҃лѡмъ сᲂприча́стницы бы́сте ст҃і́и мч҃нцы , на сꙋди́щи хрⷭ҇та̀ , мꙋ́жески прᲂпᲂвѣ́дасте , всѧ̀ бо ꙗ҆́же в̾ ми́рѣ ѡ҆ста́висте кра́снаѧ , ꙗ҆́кѡ несꙋ́щаѧ , вѣ́рꙋ же ꙗ҆́кѡ наде́жꙋ тве́рдꙋ ᲂу҆держа́сте . тѣ́мже и҆ ле́сть ѿгна́вше , и҆стᲂча́ете вѣ́рнымъ и҆сцѣле́нїемъ дарᲂва́нїѧ . непреста́ннѡ мᲂли́те , спасти́сѧ дш҃а́мъ на́шимъ . сла́ва , и҆ ны́нѣ . гла́съ , в҃ . Є҆гда̀ прїи́де во ст҃и́лище хрⷭ҇тѐ бж҃е , препᲂлᲂви́вшꙋсѧ пра́здникꙋ , тᲂгда̀ лю́ди ᲂу҆ча́ше вᲂпїѧ̀ , вѣ́рꙋѧи в̾ мѧ̀ а҆́ще и҆ ᲂу҆́мретъ жи́въ бꙋ́детъ . і҆ꙋде́и же распыха́хꙋсѧ , с̾ фарисе́и и҆ сад̾дꙋке́и и҆ кни́жники гл҃юще , кто̀ се́й и҆́же гл҃етъ хꙋлы̀ , непᲂмышлѧ́юще ꙗ҆́кѡ ты̀ є҆сѝ и҆́же пре́жде вѣ́къ , со ѻ҆ц҃е́мъ и҆ дх҃ᲂмъ прᲂславлѧ́емыи . бж҃е на́шъ сла́ва тебѣ̀ .

На стихо́внѣ , стихѣ́ры . гла́съ , в҃ . поⷣ . до́ме є҆в̾фра́фᲂвъ . Прїи́де ꙳ сᲂдѣ́тель в̾ сїѡ́нъ ,꙳ и҆ ста́въ пᲂсредѝ цр҃кве ,꙳ и҆ лю́демъ даѧ́ше ꙳ бл҃гᲂда́ть спаси́тельнꙋю .

сти́хъ : пᲂмѧнѝ со́нмъ тво́й ,꙳ и҆́же стѧжа̀ и҆спе́рва . Текꙋ́щїи бо и҆сто́чникъ ,꙳ бꙋ́детъ питїѐ ꙳ дх҃о́вныѧ бл҃гᲂда́ти ,꙳ въ дш҃и всели́тсѧ ,꙳ пїю́щагѡ во́ды .

сти́хъ : бг҃ъ же цр҃ь на́шъ пре́же вѣ́къ ,꙳ сᲂдѣ́ла спасе́нїе пᲂсредѣ̀ землѝ . Прекло́нь нб҃са̀ ,꙳ сᲂше́лъ є҆сѝ сп҃се мо́й ,꙳ и҆ пло́ть ѿ дв҃ы ꙳ крᲂмѣ̀ прелᲂже́нїѧ прїѧ́лъ є҆сѝ ,꙳ и҆стᲂча́ѧ ми ѡ҆ставле́нїе .

сла́ва , и҆ ны́нѣ . гла́съ , и҆ поⷣ , то́йже . Лꙋча̀ ѿ ѻ҆ц҃а ,꙳ прᲂсїѧ́лъ є҆сѝ сло́ве ,꙳ но в̾ пᲂслѣ́днее вре́мѧ ꙳ ꙗ҆ви́лсѧ є҆сѝ ꙗ҆́кѡ чл҃къ ,꙳ пᲂдаѧ́ ми ѡ҆ставле́нїе .

та́же , бл҃го є҆́сть . и҆ ча́съ , а҃ . и҆ ѿпꙋ́стъ .

На бл҃же́ннах̾ , трипѣ́снецъ . гла́съ , д҃ . пѣ́снь , в҃ . і҆рмо́съ . ви́дите ви́дите .

во црⷭ҇твїи сѝ є҆гда̀ прїи́деши , пᲂмѧнѝ на́съ гдⷭ҇и . бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Вᲂздви́же ѕмїю̀ мѡѷсе́й , распѧ́тїе твᲂѐ вᲂѡ҆бража́ѧ дре́вле в̾ пꙋсты́ни сина́йстѣй , распны́исѧ на́съ ра́ди , и҆ ѕмі́евы вражды̀ и҆ ꙗ҆́да и҆збавлѧ́ѧи челᲂвѣ́ки , сᲂкрꙋшѝ главꙋ̀ всегꙋби́тельнꙋю .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Ма́сти со слеза́ми нᲂсѧ́ще , теча́хꙋ къ бжⷭ҇твенᲂмꙋ гро́бꙋ со тща́нїемъ мѷрᲂнѡ́сицы ра́нѡ ѕѣлѡ̀ , ꙗ҆́кᲂже бг҃ᲂгла́сныи и҆ ѻ҆де́ждею ви́дѣша ю҆́нᲂшꙋ , стра́хᲂмъ ᲂу҆жаса́хꙋсѧ .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . Бᲂлѣ́зни и҆сцѣлѧ́юща сло́вᲂмъ , раз̾сла́бленыѧ и҆справлѧ́юща , и҆ вᲂскреша́юща ме́ртвыѧ сло́ве , є҆вре́йстїи лю́дїе ѡ҆сꙋди́ша тѧ ᲂу҆мретѝ . но вᲂскре́слъ є҆сѝ ꙗ҆́кѡ бг҃ъ си́ленъ в̾ крѣ́пᲂсти , а҆́дᲂво разрꙋши́въ црⷭ҇твїе .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . боⷢ҇ . Ꙗ҆ви́сѧ вᲂплᲂща́емь всечⷭ҇таѧ не и҆зрече́ннѡ ѿ твᲂи́хъ крᲂве́й пресꙋ́щественыи бг҃ъ , и҆ вмѣни́сѧ в̾ мертвецѣ́хъ , всѣ́хъ сы́и жи́знь , вᲂскр҃съ держа́внѡ . є҆го́же ви́дѣвши и҆спо́лнисѧ ра́дᲂсти , сегѡ̀ велича́ющи .

пѣ́снь , и҃ . і҆рмо́съ . во ѻ҆гнѝ пла́меннѣ .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Раздра́выи рꙋкᲂписа́нїе а҆да́мᲂво крⷭ҇то́мъ гдⷭ҇и , бл҃гᲂслᲂве́нїе ны́нѣ и҆стᲂчи́лъ є҆сѝ на́мъ , клѧ́тва во́лею хрⷭ҇тѐ бы́въ . тѣ́мже тѧ бл҃гᲂсло́вимъ прⷭ҇нѡ во́ вѣки .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Ви́дѣ сᲂбо́ръ ᲂу҆чени́ческїи гдⷭ҇и вᲂста́вша тѧ и҆з̾ ме́ртвыхъ , и҆ ᲂу҆тѣше́нїѧ и҆спо́лнисѧ та́йнагѡ . к̾ ни́мъ же ᲂу҆́бѡ вᲂпїѧ́ше , ви́дѧще мѧ бг҃а живᲂда́вца , и҆ди́те речѐ , прᲂпᲂвѣ́дите мѧ всѣ́хъ цр҃ѧ .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . Пᲂе́мъ твᲂѐ распѧ́тїе честно́е і҆с҃е бл҃гᲂꙋтро́бне . славᲂсло́вимъ пᲂгребе́нїе , и҆ стра́шнᲂе вᲂскрⷭ҇нїе вѣ́рᲂю . и҆́м̾же ѿ а҆́дᲂвыхъ разрѣши́хᲂмсѧ нерѣши́мыхъ ᲂу҆́зъ , хрⷭ҇тѐ бж҃е всѣ́хъ .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . боⷢ҇ . І҆с҃а є҆го́же вᲂплᲂти́ла є҆сѝ па́че сло́ва чи́стаѧ влⷣчце , вᲂста́вша ви́дѣвши ѿ ме́ртвыхъ вᲂпїѧ́ше , что̀ красна̀ дᲂбро́та твᲂѧ̀ сн҃е мо́й . є҆ѧ́же ра́ди к̾ пе́рвᲂй а҆да́мъ ны́нѣ взы́де дᲂбро́тѣ .

пѣ́снь , ѳ҃ . і҆рмо́съ . ꙗ҆́кѡ сᲂтвᲂрѝ мнѣ̀ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . Ꙗ҆́кѡ вᲂзнесе́сѧ на́ древо пригвᲂжда́емь на крⷭ҇тѣ̀ , свѣти́ла сᲂкры́ша свѣ́тъ , и҆ трѧса́шесѧ землѧ̀ , и҆ сꙋ́щїи во а҆́дᲂвѣхъ ᲂу҆́захъ свᲂбᲂжда́хꙋсѧ сп҃се .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Сᲂкрꙋши́въ сме́рти вереѝ хрⷭ҇тѐ и҆ ᲂу҆́зы , вᲂскр҃слъ є҆сѝ со сла́вᲂю держа́внѡ . вᲂсхи́тивъ и҆́х̾же пе́рвѣе и҆мѧ́ше ᲂу҆́зники , ꙗ҆́кѡ бг҃а пѣснᲂсла́вѧщихъ тѧ̀ .

сла́ва . Землѧ̀ тᲂржествꙋ́етъ , и҆ пра́з̾днꙋетъ нб҃о , вᲂста́нїе всѣ́хъ твᲂрца̀ . и҆́м̾же спасѐ на́съ ѿ ᲂу҆́зъ и҆ тлѝ , пѣснᲂсла́вѧщихъ є҆гѡ̀ .

и҆ ны́нѣ , боⷢ҇ . Свѣ́та твᲂегѡ̀ зарѧ́ми бцⷣе , разᲂрѝ мᲂегѡ̀ невѣ́дѣнїѧ мглꙋ̀ , ꙗ҆́кѡ да вѣ́рᲂю гла́сы пѣснᲂсла́вѧ непреста́ннѡ твᲂѧ̀ чꙋдеса̀ .

Во то́йже , вто́рникъ , ве́черъ . на гдⷭ҇и вᲂзва́хъ , стихѣ́ры , пра́здникꙋ , на ѕ҃ . гла́съ , д҃ . Наста̀ препᲂлᲂве́нїе дне́мъ , и҆́же ѿ спаси́тельнагѡ начина́емыхъ вᲂста́нїѧ , пѧтьдесѧ́тницею же бжⷭ҇твенᲂю печатлѣ́емо , и҆ свѣ́титсѧ свѣ́тлᲂсти ѡ҆бᲂю́дꙋ и҆мѣ́ѧ , и҆ сᲂєдинѧ́ѧ ѡ҆бᲂѧ̀ , прїитѝ в̾ сла́вѣ пред̾ꙗ҆влѧ́ѧ , влады́чнѧгѡ вᲂзнесе́нїѧ пред̾пᲂчита́ти . двⷤа . Слы́ши и҆ вᲂз̾весели́сѧ сїѡ́нъ , бл҃гᲂвѣсти́вшꙋсѧ хрⷭ҇то́вꙋ вᲂскрⷭ҇нїю , вѣ́рнїи же є҆гѡ̀ сы́нᲂве вᲂз̾ра́дᲂвашасѧ сегѡ̀ ви́дѣвще , ѿмыва́юща дх҃ᲂмъ скве́рнꙋ хрⷭ҇тᲂꙋбі́йства , гᲂто́витсѧ тᲂржествꙋ́ющи ѡ҆бᲂи́хъ весе́лїе препᲂлᲂве́нїемъ .= вⷤ . Прибли́жисѧ бжⷭ҇твенагѡ спѣ́шнѡ и҆зли́тїе на всѣ́хъ , ꙗ҆́кᲂже пред̾написа́сѧ дх҃а , пред̾ ᲂу҆зако́ненїе прᲂпᲂвѣ́дꙋетъ . препᲂлᲂви́вшꙋсѧ и҆́же по хрⷭ҇то́вѣ сме́рти и҆ пᲂгребе́нїи и҆ вᲂскрⷭ҇нїи , ѿ негѡ̀ прїе́мшимъ ᲂу҆ченико́мъ , нело́жнаѧ ѡ҆бѣща́нїѧ , ᲂу҆тѣ́шителево ꙗ҆влѧ́ющи наше́ствїе . =двⷤа . сла́ва , и҆ ны́нѣ . гла́съ , ѕ҃ . Пра́здникꙋ препᲂлᲂви́вшꙋсѧ твᲂегѡ̀ хрⷭ҇тѐ вᲂскрⷭ҇нїѧ , и҆ бжⷭ҇твенагѡ прише́ствїѧ ст҃а́гѡ твᲂегѡ̀ дх҃а , сᲂше́дшесѧ чꙋде́съ твᲂи́хъ вᲂспѣва́емъ та́инство . и҆́хже ра́ди низ̾пᲂслѝ на́мъ ве́лїю млⷭ҇ть .

На стихо́внѣ , стⷯры . гла́съ , а҃ . Пѧтьдесѧ́тницы наста̀ дне́мъ препᲂлᲂве́нїе , въ ню́же хрⷭ҇то́съ ѡ҆бнажи́въ смᲂтрели́внѡ бжⷭ҇твенꙋю си́лꙋ , раз̾сла́бленаго стѧ́гнꙋ сло́вᲂмъ , и҆ тᲂгѡ̀ ѿ ѻ҆дра̀ вᲂз̾ста́вивъ , бг҃ᲂлѣ́пнѡ чꙋ́до твᲂрѧ̀ вᲂзда́ннѣмъ тѣ́лѣ . чл҃кѡмъ же дарᲂва̀ вѣ́чныи живо́тъ , и҆ велїю млⷭ҇ть .

сти́хъ : пᲂмѧнѝ со́нмъ тво́й ,꙳ и҆́же стѧжа̀ и҆спе́рва . Во ст҃и́лище прише́лъ є҆сѝ премꙋ́дрᲂсте бж҃їѧ , препᲂлᲂвлѧ́ющꙋсѧ пра́здникꙋ , ᲂу҆ча̀ и҆ ѡ҆блича́ѧ невѣ́рныѧ і҆ꙋде́и , фарисе́и и҆ кни́жники , и҆ вᲂпїѧ̀ со дерзнᲂве́нїемъ к̾ ни́мъ , жа́ждаи да грѧде́тъ ко мнѣ̀ , и҆ пїе́тъ во́дꙋ живо́тнꙋ , и҆ не вжа́ждетъ во́ вѣки . вѣ́рꙋѧи мᲂе́й бл҃гᲂсти , рѣ́ки пᲂтекꙋ́тъ и҆́з̾ чрева є҆гѡ̀ жи́зни вѣ́чнаѧ . ѽ бл҃гᲂсти и҆ бл҃гᲂꙋтро́бїѧ твᲂегѡ̀ , хрⷭ҇тѐ бж҃е на́шъ сла́ва тебѣ̀ .

сти́хъ : гла́съ , в҃ . бг҃ъ же цр҃ь на́шъ пре́же вѣ́къ ,꙳ сᲂдѣ́ла спасе́нїе пᲂсредѣ̀ землѝ . Є҆гда̀ препᲂлᲂве́нїе пра́здникꙋ наста̀ , взы́де і҆с҃ъ во ст҃и́лище , и҆ ᲂу҆ча́ше невѣ́рныѧ і҆ꙋде́и , гл҃ѧ , жа́ждаи да грѧде́тъ ко мнѣ̀ , и҆ пїе́тъ во́дꙋ живо́тнꙋ вѣ́чнꙋ , и҆ не вжа́ждетсѧ во́ вѣки . вѣ́рꙋѧи в̾мѧ̀ , рѣ́ки пᲂтекꙋ́тъ и҆́з̾ чрева є҆гѡ̀ , и҆ и҆́мать свѣ́тъ живо́тныи .

сла́ва , и҆ ны́нѣ . гла́съ , и҃ . Препᲂлᲂви́вшꙋсѧ пра́здникꙋ , ᲂу҆ча́щꙋ ти сп҃се , и҆ гл҃ахꙋ і҆ꙋде́и , ка́кѡ се́й вѣ́сть кни́ги неᲂу҆чи́всѧ . неразꙋмѣ́юще ꙗ҆́кѡ ты̀ є҆сѝ премꙋ́дрᲂсть , ᲂу҆стро́ившаѧ ми́ръ сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . и҆ =ѿпꙋ́стъ . рѧдᲂво́мꙋ же ст҃о́мꙋ слꙋ́жба пᲂе́тсѧ , на па́вечерницѣ .

Въ сре́дꙋ , є҃ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , гⷤ . =По а҃ , стихᲂло́гїи , сѣда́ленъ . гла́съ , и҃ . Препᲂлᲂви́вшꙋсѧ пра́здникꙋ па́схи , твᲂре́цъ нб҃ꙋ в̾ цр҃кви гл҃аше , грѧди́те и҆ пᲂчерпи́те ѿ вᲂды̀ , тᲂгда̀ бᲂлѧ́щаго свᲂи́мъ пᲂвелѣ́нїемъ и҆сцѣли́лъ є҆сѝ , бл҃гᲂи҆зво́ливыи спастѝ ꙗ҆́кѡ бг҃ъ ро́дъ чл҃ческїи . сла́ва , и҆ ны́нѣ , то́йже .=

По в҃ , стихᲂло́гїи , сѣда́ленъ . гла́съ є҃ . Влⷣка всѣ́хъ въ цр҃кви стᲂѧ̀ , пра́здникꙋ препᲂлᲂви́вшꙋсѧ пѧтьдесѧ́тницы чⷭ҇тны́ѧ , є҆вре́ѡмъ бесѣ́дꙋѧ , ѡ҆блича́ше ꙗ҆́вѣ в̾ дерзнᲂве́нїи мно́зѣ , ꙗ҆́кѡ цр҃ь сы́и и҆ бг҃ъ , мꙋчи́тельство тѣ́хъ де́рзᲂстнᲂе . на́мъ же всѣ́мъ да́рꙋетъ за бл҃гᲂꙋтро́бїе ве́лїю ми́лᲂсть .= сла́ва , и҆ ны́нѣ , то́йже .=

та́же , вᲂскрⷭ҇нїе хрⷭ҇то́во , аⷤ . ѱл҃о́мъ , н҃ . Кано́на пра́здникꙋ два̀ , и҆́хъ же пᲂста́вимъ на д҃і . пе́рвагѡ кано́на , і҆рмᲂсы̀ по двⷤа . трᲂпари́ же , на́ ѕ҃ . втᲂра́гѡ кано́на , трᲂпари́ же , на́ ѕ҃ . пᲂслѣди́ же пᲂе́мъ і҆рмо́съ , втᲂра́гѡ кано́на , ѻ҆́ба ли́ка в̾кꙋ́пѣ .

На хвали́тѣхъ , стⷯры , на д҃ . гла́съ , д҃ . поⷣ . ꙗ҆́кѡ до́блѧ .= Премꙋ́дрᲂсть и҆ си́ла ,꙳ ѻ҆́ч҃ее сїѧ́нїе ,꙳ сло́во приснᲂсꙋ́щнᲂе сн҃ъ бж҃їи ,꙳ во ст҃и́лище прїи́де пло́тїю ,꙳ и҆ ᲂу҆ча́ше і҆ꙋде́йскїѧ наро́ды ,꙳ жесто́кїѧ и҆ неразꙋ́мныѧ .꙳ и҆ чꙋдѧ́хꙋсѧ премꙋ́дрᲂсти бᲂга́тствꙋ ,꙳ вᲂпїю́ще , ѿ кꙋ́дꙋ се́й кни́ги вѣ́сть ,꙳ ѿ чл҃къ неꙋчи́всѧ . =двⷤа . Фарисе́ѡмъ затыка́ше ᲂу҆ста̀ ,꙳ і҆ꙋде́и ѡ҆блича́ше месі́ѧ гдⷭ҇ь ,꙳ и҆ вᲂпїѧ́ше к̾ ни́мъ ,꙳ не на лица̀ без̾зако́ннїи ꙳ ꙗ҆́кѡ непра́ведни сꙋди́те .꙳ въ сꙋбо́тꙋ бо речѐ раз̾сла́бленаго вᲂз̾дви́гнꙋхъ ,꙳ ꙗ҆́кѡ гдⷭ҇ь є҆́смь сꙋбо́тѣ и҆ зако́нꙋ .꙳ что̀ и҆́щете менѐ ᲂу҆би́ти ;꙳ и҆́же ме́ртвыѧ вᲂскреси́вшагѡ . Наꙋѳі́ѧ ка́менїемъ пᲂби́ша ,꙳ лю́дїе без̾зако́ннїи ,꙳ і҆ꙋде́йскᲂе со́нмище без̾бл҃гᲂда́тнᲂе ,꙳ и҆са́їю же пило́ю древѧно́ю раз̾тро́ша .꙳ в̾ ка́лъ мꙋ́драго і҆єремі́ю в̾верго́ша .꙳ гдⷭ҇а же на крⷭ҇тъ вᲂзне́сше ,꙳ и҆ кᲂпїе́мъ ре́бра є҆гѡ̀ прᲂбо́дше ,꙳ ѻ҆чи́ма пᲂмрачи́шасѧ . сла́ва , и҆ ны́нѣ . гла́съ , д҃ . Прᲂсвѣти́вшесѧ бра́тїе вᲂскрⷭ҇нїемъ сп҃са хрⷭ҇та̀ , и҆ дᲂсти́гше препᲂлᲂве́нїѧ пра́здника влⷣчнѧ , прⷭ҇нѡ сᲂхрани́мъ за́пᲂвѣди бж҃їѧ , да дᲂсто́йни бꙋ́демъ и҆ вᲂзнесе́нїе пра́зднᲂвати , и҆ прише́ствїе пᲂлꙋчи́ти ст҃а́гѡ дх҃а . Славᲂсло́вїе вели́кᲂе . трᲂпа́рь , пра́здникꙋ . є҆ктенїѝ . и҆ ѿпꙋ́стъ . На часѣ́хъ , трᲂпа́рь , и҆ кᲂнда́къ , пра́здникꙋ . На литꙋргі́и , бл҃же́нны , на́ и҃ . ѿ кано́на , пра́здникꙋ , пѣ́снь , ѳ҃ ѧ , ѡ҆бᲂю̀ кано́нъ . По вхо́дѣ : трᲂпа́рь , пра́здникꙋ . сла́ва , и҆ ны́нѣ , кᲂнда́къ , пра́здникꙋ . прᲂки́менъ , ѱл҃о́мъ дв҃дᲂвъ . ве́лїи гдⷭ҇ь на́шъ и҆ ве́лїѧ крѣ́пᲂсть є҆гѡ̀ , и҆ ра́зꙋмꙋ є҆гѡ̀ нѣ́сть числа̀ . сти́хъ : хвали́те гдⷭ҇а ꙗ҆́кѡ бл҃гъ ѱл҃о́мъ , бг҃ᲂви на́шемꙋ , да наслади́тсѧ хвале́нїе . а҆пⷭ҇лъ , въ дѣѧ́нїихъ . заⷱ҇ , л҃в . а҆ллилꙋ́їѧ . пᲂмѧнѝ со́нмъ тво́й , є҆го́же є҆сѝ стѧжа́лъ и҆спе́рва .= сти́хъ : бг҃ъ же цр҃ь на́шъ пре́жде вѣ́къ , сᲂдѣ́ла спасе́нїе пᲂсредѣ̀ землѝ . =є҆ѵⷢ҇а́лїе , ѿ і҆ѡа́нна . заⷱ҇ , и҃і . прича́стенъ . ꙗ҆ды́и мᲂю̀ пло́ть , и҆ пїѧ́и мᲂю̀ кро́вь , во мнѣ̀ пребыва́етъ и҆ а҆́зъ в̾ не́мъ , речѐ гдⷭ҇ь .

Въ тꙋ́же , сре́дꙋ , ве́черъ . на гдⷭ҇и вᲂзва́хъ , стихѣ́ры , ѡ҆ самарѧны́нѣ , г҃ . гла́съ , д҃ . поⷣ . ꙗ҆́кѡ до́блѧ .= Ꙗ҆́кѡ и҆сто́чникъ бл҃гᲂсти сы́и дх҃а , ꙳ и҆ жи́зни сᲂкро́вище ꙳ чл҃кᲂлю́бче ,꙳ ка́кѡ женѣ̀ самарѧны́нѣ ꙗ҆́вѣ бесѣ́дꙋеши ,꙳ да́ждь ми во́дꙋ пи́ти .꙳ несказа́нне гдⷭ҇и ,꙳ вᲂспѣва́емъ ти мно́гᲂе бл҃гᲂꙋтро́бїе ,꙳ и҆́м̾же спаса́еши чл҃ческїи ве́сь ро́дъ ,꙳ за мно́гꙋю бл҃гᲂсть . И҆сто́чникъ прⷭ҇нᲂсꙋ́щныи ,꙳ живо́тъ без̾сме́ртныи ,꙳ стрꙋѧ̀ неѡ҆скꙋ́дна же и҆ нетлѣ́нна ,꙳ пꙋ́ть ше́ствᲂвавъ ,꙳ сѣдѧ́ше бли́зъ стꙋденца̀ ,꙳ премꙋ́дрыѧ ᲂу҆ченикѝ пᲂсла́въ по бра́шно ,꙳ самарѧны́нѣ женѣ̀ бесѣ́дꙋѧ ,꙳ сїю̀ хᲂтѧ̀ ᲂу҆лᲂви́ти ,꙳ и҆ привестѝ ко ѻ҆ц҃ꙋ ,꙳ ꙗ҆́кᲂже є҆ди́нъ вѣ́сть . П=рїиди́те и҆ ви́дите чл҃ка ,꙳ и҆́же и҆зрече́ ми дне́сь на и҆сто́чницѣ сѣдѧ̀ ,꙳ ꙗ҆́же сᲂдѣ́ѧхъ .꙳ прᲂро́къ бо и҆́стиненъ є҆́сть и҆ вели́къ ,꙳ сᲂкрᲂве́наѧ и҆ ꙗ҆вле́наѧ вѣ́дыи всѧ̀ .꙳ к̾ немꙋ́же вᲂзᲂпїе́мъ ,꙳ да́рꙋй жа́ждꙋщимъ во́дꙋ жи́зни ю҆́же и҆́маши ,꙳ да не вжа́ждемъ па́ки во́ вѣки чл҃кᲂлю́бче .

та́же , стихѣ́ры , в̾ минѣ́и , г҃ . сла́ва , и҆ ны́нѣ . гла́съ , а҃ . Ко и҆сто́чникꙋ прїи́де и҆сто́чникъ чꙋде́съ в̾ ше́стыи ча́съ , є҆́ввинъ ᲂу҆лᲂви́ти пло́дъ . и҆́бо є҆́вва в̾ то́й и҆зы́де и҆з̾ ра́ѧ , пре́лестїю ѕмі́евᲂю . прибли́жибᲂсѧ самарѧны́нѧ пᲂчерпстѝ во́дꙋ , ю҆́же ви́дѣвъ сп҃съ речѐ , да́ждь ми во́дꙋ пи́ти , и҆ а҆́зъ вᲂды̀ текꙋ́щїѧ насыщꙋ́ тѧ . и҆ во́ градъ те́кши цѣлᲂмꙋ́дренаѧ , наро́дѡмъ вᲂз̾вѣстѝ а҆́бїе , прїиди́те ви́дите хрⷭ҇та̀ гдⷭ҇а , сп҃са дш҃а́мъ на́шимъ .

На стихо́внѣ , стихѣ́ры . гла́съ , д҃ . Гдⷭ҇и вᲂз̾ше́дъ на́ крⷭ҇тъ , пра́дѣднюю клѧ́твꙋ на́шꙋ ѡ҆чи́стилъ є҆сѝ . и҆ сᲂше́дъ во а҆́дъ , вѣ́чныѧ ᲂу҆́зники свᲂбᲂди́лъ є҆сѝ , нетлѣ́нїе да́рꙋѧ чл҃ческᲂмꙋ ро́дꙋ . сегѡ̀ ра́ди пᲂю́ще сла́вимъ , живᲂтвᲂрѧ́щее и҆ спасе́ннᲂе твᲂѐ вᲂскрⷭ҇нїе .

сти́хъ : к̾ тебѣ̀ вᲂз̾ведо́хъ ѻ҆́чи мᲂѝ . А҆пⷭ҇льскїи ли́къ , дх҃ᲂмъ ст҃ы́мъ прᲂсвѣти́лъ є҆сѝ хрⷭ҇тѐ , и҆ на́шꙋ скве́рнꙋ грѣхо́внꙋю , тѣ́хъ ра́ди ѡ҆мы́й бж҃е , и҆ пᲂми́лꙋй на́съ .

сти́хъ : пᲂми́лꙋй на́съ гдⷭ҇и . мⷱ҇ꙋ . Же́ртвы ѡ҆дш҃евле́ныѧ , всесᲂж̾же́нїѧ слᲂве́снаѧ , мч҃нцы гдⷭ҇ни , закᲂле́нїѧ сᲂверше́на бж҃їѧ , бг҃а зна́ющїи , и҆ бг҃ᲂмъ зна́емаѧ ѻ҆вча́та , и҆́хже ѡ҆гра́да вᲂлкѡ́мъ невхᲂди́ма , мᲂли́тесѧ и҆ на́мъ ᲂу҆пасе́нымъ бы́ти с̾ ва́ми , на вᲂдѣ̀ пᲂко́ищнѣй .

сла́ва , и҆ ны́нѣ . гла́съ , в҃ . На стꙋдене́цъ прїи́де гдⷭ҇ь , самарѧны́нѧ же мᲂлѧ́ше бл҃гᲂꙋтро́бнагѡ . пᲂда́ждь ми во́дꙋ вѣ́ры , да вᲂспрїимꙋ̀ кꙋпѣ́льныѧ во́ды , ра́дᲂсть и҆ и҆збавле́нїе , жизнᲂда́вче гдⷭ҇и сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , вᲂскрⷭ҇нъ . сла́ва , и҆ ны́нѣ , боⷢ҇ .= є҆ктенїѧ̀ . и҆ =ѿпꙋ́стъ .

Въ четверто́къ , є҃ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь , вᲂскрⷭ҇нъ , двⷤа . сла́ва , и҆ ны́нѣ , боⷢ҇ . =По а҃ , стихᲂло́гїи , сѣда́ленъ . гла́съ , д҃ . Вᲂзрѣ́вше на гро́бныи вхо́дъ и҆ пла́мене а҆́нг҃льскагѡ нетерпѧ́ще мѷрѡно́сицы , съ тре́петᲂмъ дивлѧ́хꙋсѧ гл҃юще , є҆да̀ ᲂу҆кра́десѧ ѿве́рзыи разбо́йникꙋ ра́й ; є҆да́ли вᲂста̀ , и҆́же пре́жде стра́сти прᲂпᲂвѣ́давыи вᲂста́нїе ; вᲂи́стинꙋ вᲂскр҃се хрⷭ҇то́съ , и҆ сꙋ́щимъ во а҆́дѣ пᲂдаѧ̀ живо́тъ и҆ вᲂскрⷭ҇нїе . =сти́хъ : во всю̀ зе́млю и҆зыдо́ша вѣща́нїѧ и҆́хъ , и҆ в̾ кᲂнцы̀ вселе́нныѧ гл҃ы и҆́хъ . Свѣти́ла в̾ кᲂнцѣ́хъ , ᲂу҆ченикѝ твᲂѧ̀ хрⷭ҇тѐ ꙗ҆ви́лъ є҆сѝ , сїѧ́юща дш҃а́мъ сꙋ́щимъ во тмѣ̀ , ра́зꙋмъ тво́й влⷣко . и҆ ле́сть и҆́дᲂльскꙋю тѣ́хъ ра́ди ѡ҆мрачи́въ , ᲂу҆че́ньми бл҃гᲂче́стїѧ прᲂсвѣти́лъ є҆сѝ ми́ръ . тѣ́хъ мᲂльба́ми спасѝ дш҃а на́ша . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Мꙋ́жески ра́ны претерпѣ́вше , дᲂсто́йнѡ вᲂспрїѧ́сте црⷭ҇твїѧ хрⷭ҇то́ва нетлѣ́нныи вѣне́цъ . жела́нїемъ бо влеко́ми к̾ жи́зни нестарѣ́ющейсѧ , претерпѣ́сте мꙋ́ки пло́тїю страстᲂте́рпцы , тѣ́мже мᲂли́те пᲂми́лᲂватисѧ на́мъ .= сла́ва , и҆ ны́нѣ , боⷢ҇ . С=ло́во ѻ҆́ч҃ее хрⷭ҇та̀ бг҃а на́шегѡ , и҆з̾ тебѐ вᲂплᲂти́вшеесѧ разꙋмѣ́хᲂмъ бцⷣе дв҃о , є҆ди́на чⷭ҇таѧ , и҆ є҆ди́на блгⷭ҇ве́ннаѧ . тѣ́мже непреста́ннѡ тѧ пᲂю́ще велича́емъ .

По в҃ , стихᲂло́гїи , сѣда́ленъ . гла́съ , ѕ҃ . Ꙗ҆́кѡ вѣ́рнѣй и҆ чꙋ́днѣй самарѧны́нѣ гдⷭ҇и , бжⷭ҇тва̀ свᲂегѡ̀ и҆сто́чникъ ѿве́рзлъ є҆сѝ , и҆ и҆злїѧ́лъ є҆сѝ бг҃ᲂразꙋ́мїѧ наню̀ , напаѧ́ѧ питїе́мъ бл҃гᲂпрїѧ́тнымъ . и҆з̾ него́же и҆ ны́нѣ на́мъ низ̾пᲂслѝ , сᲂгрѣше́нїемъ ѡ҆ставле́нїе пребл҃гі́и гдⷭ҇и . сла́ва , и҆ ны́нѣ , то́йже .

та́же , вᲂскрⷭ҇нїе хрⷭ҇то́во , аⷤ . ѱл҃о́мъ , н҃ . кано́нъ , ѡ҆ самарѧны́нѣ , на и҃ . и҆ в̾ минѣ́и , на д҃ .

На хвали́тѣхъ , стихѣ́ры , на д҃ . гла́съ , д҃ . Ѻ҆те́ческихъ си нѣ́дръ не ѿлꙋ́чьсѧ є҆динᲂро́днᲂе сло́во бж҃їе , прїи́де на́ землю за чл҃кᲂлю́бїе , чл҃къ бы́въ непрело́женъ . и҆ распѧ́тїе и҆ сме́рть претерпѣ́лъ є҆сѝ пло́тїю , без̾стра́стныи бжⷭ҇тво́мъ . вᲂскр҃съ же и҆з̾ ме́ртвыхъ , без̾сме́ртїе по́далъ є҆сѝ ро́дꙋ чл҃ческᲂмꙋ , ꙗ҆́кѡ є҆ди́нъ всеси́ленъ . двⷤа . Не кни́жныѧ ᲂу҆ченикѝ , дх҃ъ тво́й ст҃ы́и каза́тели ꙗ҆вѝ хрⷭ҇тѐ бж҃е , и҆ мнᲂгᲂвѣща́ннымъ бл҃гᲂгла́сїемъ , ꙗ҆зы́къ пре́лесть ᲂу҆празднѝ ꙗ҆́кѡ всеси́ленъ . мⷱ҇ꙋ . Честна̀ сме́рть ст҃ы́хъ твᲂи́хъ гдⷭ҇и , мече́мъ бо и҆ ѻ҆гне́мъ , и҆ дш҃е́ю сᲂкрꙋше́ннᲂю прᲂлїѧ́ша кро́вь свᲂю̀ , ᲂу҆пᲂва́нїе и҆мꙋ́ще на тѧ̀ , вᲂспрїѧ́ти трꙋдо́мъ мздꙋ̀ . и҆ претерпѣ́вше , прїѧ́ша ѿ тебѐ сп҃се ве́лїю ми́лᲂсть . сла́ва , и҆ ны́нѣ . гла́съ , в҃ . И҆́же сᲂбез̾нача́льныи и҆ сᲂпрⷭ҇нᲂсꙋ́щныи сн҃ъ и҆ сло́во ѻ҆ц҃ꙋ , на и҆сто́чникъ прїи́де и҆сто́чникъ и҆сцѣле́нїемъ , и҆ жена̀ ѿ самарі́и прїи́де пᲂчерпстѝ во́дꙋ , ю҆́же ви́дѣвъ сп҃съ речѐ , да́ждь ми во́дꙋ пи́ти , и҆ ше́дши пригласѝ свᲂегѡ̀ мꙋ́жа . ѻ҆на́же ꙗ҆́кѡ чл҃кꙋ гл҃ющи а҆ не бг҃ꙋ , ᲂу҆таи́ти тща́щисѧ гл҃аше , не и҆́мамъ мꙋ́жа . ᲂу҆чи́тель же к̾ не́й гл҃а , и҆́стинꙋ рекла̀ є҆сѝ не и҆́мамъ мꙋ́жа , пѧ́ть бо и҆мѣ́ла є҆сѝ , и҆ ны́нѣ є҆го́же и҆́маши нѣ́сть ти мꙋ́жъ . ѻ҆на́же ѡ҆ гл҃ѣ ᲂу҆диви́вшисѧ , и҆ во́ градъ те́кши наро́дѡмъ вᲂпїѧ́ше гл҃ющи , прїиди́те и҆ ви́дите хрⷭ҇та̀ , и҆́же да́рꙋетъ ми́рᲂви ве́лїю ми́лᲂсть .

На стихо́внѣ , стихѣ́ры . гла́съ , д҃ . поⷣ . ꙗ҆́кѡ до́блѧ . Съ черпа́лᲂмъ пᲂчерпстѝ ,꙳ прише́дши ко и҆сто́чникꙋ самарѧны́нѧ ,꙳ пᲂчерпа́ло без̾ вᲂды̀ ѡ҆ста́вивши ,꙳ є҆ди́на ко́ градꙋ вᲂстечѐ ,꙳ и҆сто́чникъ живᲂтекꙋ́щїи вᲂпїѧ́ше ѡ҆брѣстѝ ,꙳ ѿ ню́дꙋ же пᲂчерпѐ ꙳ незави́стнѡ спасе́нїѧ во́дꙋ ,꙳ и҆ свᲂѐ прᲂхладѝ се́рдце ,꙳ и҆ста́ѧвшее страстьмѝ .

сти́хъ : налѧцы̀ и҆ спѣ́й и҆ црⷭ҇твꙋй ,꙳ и҆́стины ра́ди и҆ кро́тᲂсти и҆ пра́вды . Вᲂи́стинꙋ ре́клъ є҆́сть гдⷭ҇ь самарѧны́нѣ ,꙳ ꙗ҆́кѡ не и҆́маши дне́сь мꙋ́жа зако́нна ,꙳ пѧ́ть бо и҆мѣ́ла є҆сѝ пе́рвѣе .꙳ и҆ ны́нѣ є҆го́же стѧжа́ла є҆сѝ ,꙳ нѣ́сть ти мꙋ́жъ ,꙳ но зако́на чꙋ́ждь .꙳ ꙗ҆́же и҆ пᲂтща́вшисѧ ,꙳ сꙋ́щимъ во́ градѣ вᲂпїѧ́ше ,꙳ ви́дѣхъ чл҃ка и҆́же и҆зрече́ ми ꙳ всѧ̀ , є҆ли́ка в̾ та́йнѣ сᲂтвᲂри́хъ .

сти́хъ : вᲂзлюби́лъ є҆сѝ пра́вдꙋ ,꙳ и҆ вᲂзненави́дѣ без̾зако́нїе . Стрꙋю̀ та́йнѡ живᲂтекꙋ́щꙋ ,꙳ ѿ нбⷭ҇нагѡ и҆сто́чника ,꙳ самарѧны́нѧ пᲂчерпѐ ,꙳ ѡ҆брѣ́тши бо текꙋ́щꙋ сїю̀ на стꙋденцѣ̀ ,꙳ и҆з̾ него́же тлѣ́ннꙋю и҆мѧ́ше ,꙳ по ѡ҆бы́чаю пᲂчерпстѝ во́дꙋ .꙳ но вѣ́чнꙋ в̾хᲂдѧ́щꙋ въ се́рдцы пᲂказа̀ ,꙳ ꙗ҆́кѡ и҆сто́чникъ и҆́нъ но́въ ,꙳ страсте́мъ ѡ҆рᲂша́ѧ распале́нїе .

сла́ва , и҆ ны́нѣ . гла́съ , г҃ . Да вᲂзра́дꙋетсѧ дне́сь свѣ́тлѡ нб҃о и҆ землѧ̀ , ꙗ҆́кѡ хрⷭ҇то́съ ꙗ҆ви́сѧ вᲂпло́щьсѧ ꙗ҆́кѡ чл҃къ , да а҆да́ма и҆зба́витъ ѿ клѧ́твы всеро́дныѧ . и҆ ᲂу҆дивлѧ́етъ чꙋдесы̀ в̾ самарі́ю прише́дъ , женѣ̀ ᲂу҆́бѡ пред̾ста̀ вᲂды̀ прᲂсѧ̀ , и҆́же во́ды ѻ҆блакѝ ѻ҆дѣва́ѧи . тѣ́мже всѝ вѣ́рнїи пᲂклᲂни́мсѧ [пᲂкло́н̾] , и҆́же на́съ ра́ди во́лею ѡ҆бнища́вшемꙋ , бл҃гᲂꙋтро́бнымъ сᲂвѣ́тᲂмъ .

та́же , бл҃го є҆́сть . и҆ ча́съ , а҃ . и҆ ѿпꙋ́стъ .

На бл҃же́ннах̾ , трипѣ́снецъ . гла́съ , д҃ . пѣ́снь , д҃ . і҆рмо́съ . любвѐ ра́ди ще́дре свᲂегѡ̀ си ѻ҆́браза .

во црⷭ҇твїи сѝ є҆гда̀ прїи́деши , пᲂмѧнѝ на́съ гдⷭ҇и . бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Ꙗ҆́кѡ вᲂз̾дви́жесѧ во́лею на́ древо , и҆ землѧ̀ и҆ го́ры и҆ хо́лми пᲂкᲂлѣба́шасѧ с̾ тре́петᲂмъ . стра́ждꙋща тѧ ви́дѧще , ще́дре дᲂлгᲂтерпѣли́ве .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Оу҆бᲂѧ́всѧ твᲂегѡ̀ сп҃се сни́тїѧ а҆́дъ , ме́ртвыхъ ꙗ҆́же и҆мѧ́ше , пᲂдава́ше въско́рѣ , вᲂспѣва́ющихъ твᲂю̀ неи҆зрече́ннꙋю си́лꙋ .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . Неразꙋ́мныи зрѧ́ тѧ є҆вре́йскїи сᲂбо́ръ ще́дре , слѣпы́мъ ѻ҆́чи даю́ща , ᲂу҆бива́ше сꙋ́щаго жи́знь и҆ вᲂскрⷭ҇нїе .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . боⷢ҇ . Ви́дѣвши и҆́з̾ грᲂба вᲂста́вша свᲂегѡ̀ сн҃а дв҃о , со а҆пⷭ҇лы є҆гѡ̀ ра́дᲂвашесѧ чⷭ҇таѧ . с̾ ни́ми же тѧ сла́вимъ .

пѣ́снь , и҃ . і҆рмо́съ . всѧ̀ дѣ́ла бж҃їѧ .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . На крⷭ҇тѣ̀ тѧ̀ ви́дѣвъ разбо́йникъ бл҃гᲂразꙋ́мныи , пᲂмѧни́ мѧ вᲂпїѧ́ше влⷣко , ᲂу҆диви́всѧ си́лѣ твᲂе́й , и҆ и҆́же па́че ᲂу҆ма̀ твᲂемꙋ̀ стра́шнᲂмꙋ смᲂтре́нїю .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Ꙗ҆ви́сѧ хрⷭ҇тѐ жена́мъ , ра́дꙋйтесѧ глаго́лѧ ми́лᲂстивнѡ ꙗ҆́кѡ чл҃кᲂлю́бецъ . ско́рбь ꙗ҆́вѣ ᲂу҆тᲂлѧ́ѧ , и҆ ра́дᲂстны твᲂрѧ̀ чл҃ки свᲂи́мъ вᲂста́нїемъ .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . Дре́вле слѣпо́мꙋ ѿ рᲂже́нїѧ , ꙗ҆́кѡ дарᲂва̀ свѣ́тъ свѣтᲂда́вче і҆с҃е , си́це и҆ мнѣ̀ серде́чныѧ зѣ́ницы ѿве́рзи , разꙋмѣ́ти свѣ́тъ твᲂи́хъ пᲂвелѣ́нїи .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . боⷢ҇ . И҆зба́ви мѧ ѻ҆гнѧ̀ гее́нскагѡ , и҆ вѣ́чнагѡ ѡ҆сꙋжде́нїѧ чи́стаѧ . ᲂу҆ти́ши пᲂмышле́нїи мᲂи́хъ , свирѣ́пᲂе вᲂлне́нїе , и҆ напра́ви к̾ тишинѣ̀ жи́зни во приста́нище .

пѣ́снь , ѳ҃ . і҆рмо́съ . ка́мень нерꙋкᲂсѣ́чныѧ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . Прᲂсте́рлъ є҆сѝ дла́ни на́ древѣ , пе́рвыѧ снѣ́ди дре́ва влⷣко рꙋ́кꙋ прᲂсте́ршꙋюсѧ , дш҃етлѣ́нныи вре́дъ и҆сцѣлѧ́ѧ . тѣ́мже непᲂсти́жимᲂе смᲂтре́нїе твᲂѐ сла́вимъ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Врата̀ и҆ вереѝ сме́рти , сни́тїемъ сѝ сᲂкрꙋшѝ , а҆́дᲂва црⷭ҇твїѧ всѧ̀ , свᲂе́ю си́лᲂю сп҃се и҆стᲂщи́лъ є҆сѝ . и҆ вᲂскр҃се тридне́внѡ , вселе́ннꙋю прᲂсвѣти́лъ є҆сѝ .

сла́ва . Ре́клъ є҆сѝ сп҃се ꙗ҆́вльсѧ , твᲂи́мъ ст҃ы́мъ а҆пⷭ҇лѡмъ по вᲂскрⷭ҇нїи , ми́ръ прᲂше́дше вѣ́рᲂю , прᲂпᲂвѣ́дите ꙗ҆́же во мнѣ̀ ви́дѣсте стра́шнаѧ и҆ неи҆зрече́ннаѧ та́инства .

и҆ ны́нѣ , боⷢ҇ . Ви́дѣ хрⷭ҇та̀ вᲂста́вша со жена́ми мѷрѡно́сицами , прелᲂжи́вши рыда́нїе в̾ ра́дᲂсть , и҆ сегѡ̀ сла́влѧше . тѣ́мже велегла́снѡ тѧ бг҃ᲂрᲂди́тельнице велича́емъ .

Въ то́йже , четверто́къ , ве́черъ . на гдⷭ҇и вᲂзва́хъ , стⷯры , ѡ҆ самарѧны́нѣ , г҃ . гла́съ , д҃ . поⷣ . и҆́же зва́нныи свы́ше .= П=ри и҆сто́чницѣ хрⷭ҇то́съ самарѧны́ню ѡ҆брѣ́тъ ,꙳ прᲂша́ше вᲂды̀ пи́ти ѿ неѧ̀ ,꙳ жада́ѧ сеѧ̀ и҆справле́нїе и҆ спасе́нїе ,꙳ є҆́же и҆ разꙋмѣ́сѧ дѣ́лы скᲂнчава́ѧемь ,꙳ сїю́ бо привле́къ ,꙳ во́дꙋ сᲂгрѣше́нїѧ са́мъ и҆звле́клъ є҆́сть ,꙳ и҆ вᲂды̀ и҆спо́лнисѧ жи́зни ,꙳ гра́жанѡмъ и҆спᲂвѣ́дающи ,꙳ се́й дре́вле и҆́же в̾ зако́нѣ рече́нныи месі́ѧ хрⷭ҇то́съ ,꙳ ꙗ҆ви́сѧ ꙗ҆́кѡ чл҃къ ,꙳ мы́слемъ сᲂкрᲂве́ннымъ ꙗ҆влѧ́ѧ неи҆з̾гл҃аннаѧ . Месі́ѧ хрⷭ҇то́съ на землѝ ꙗ҆ви́сѧ ,꙳ сꙋ́щимъ во́ градѣ самарѧны́нѧ речѐ ,꙳ пи́саныи прїи́де в̾ мѡѷсе́ѡвѣ зако́нѣ ,꙳ и҆ ꙗ҆́кѡ чл҃къ на́мъ ꙗ҆влѧ́етсѧ ,꙳ и҆́же и҆ дѣѧ́нїѧ мᲂѧ̀ сказа̀ .꙳ и҆ ꙗ҆́же во глꙋбинѣ̀ срⷣца мᲂегѡ̀ ꙳ сᲂкрᲂве́наѧ , всѧ́ ми речѐ .꙳ тѣ́мже гра́жане сте́кшесѧ ,꙳ ви́дѣвше слᲂвеса̀ є҆ѧ̀ по всемꙋ̀ и҆́стинна ,꙳ и҆ ве́щи ᲂу҆диви́шасѧ ,꙳ и҆ ᲂу҆вѣ́ришасѧ видѣ́нїемъ . Тебѐ и҆́же в̾ шесты́и ча́съ ,꙳ ꙗ҆́кѡ влⷣкꙋ и҆нᲂгда̀ в̾ раѝ хᲂдѧ́ща бг҃а ,꙳ ꙗ҆́же пе́рвыѧ мт҃ре ви́дѣ дщѝ па́ки ꙳ в̾ ча́съ шесты́и та́кѡ сѣдѧ́ща ,꙳ и҆дѣ́же и҆сто́чникъ вᲂды̀ ,꙳ и҆ кла́денецъ ка́паше ,꙳ и҆ ѿ неѧ̀ прᲂсѧ́ща пи́ти ,꙳ ꙗ҆́кѡ да вᲂды̀ ѻ҆́нꙋ напᲂи́ши жи́зни нетлѣ́нныѧ ,꙳ є҆́же и҆ сᲂдѣ́ѧ ,꙳ и҆ твᲂеѧ̀ живᲂно́сныѧ вᲂды̀ ,꙳ ѻ҆на̀ напи́вшисѧ ,꙳ и҆ со тща́нїемъ те́кши ,꙳ во́ градѣ прᲂпᲂвѣ́да вᲂдно́е бᲂга́тство .

та́же , стихѣ́ры , в̾ минѣ́и , г҃ . сла́ва , и҆ ны́нѣ . гла́съ , ѕ҃ . Та́кѡ гл҃етъ гдⷭ҇ь самарѧны́нѣ , а҆́ще бы вѣ́дала да́ръ бж҃їи , и҆ кто̀ є҆́сть гл҃ѧи тебѣ̀ да́ждь ми вᲂды̀ пи́ти , и҆ ты́ бы прᲂси́ла ᲂу҆ негѡ̀ , и҆ да́лъ бы ти пи́ти , да не вжа́ждешисѧ во́ вѣки , гл҃етъ гдⷭ҇ь .

На стихо́внѣ , стⷯры . гла́съ , д҃ . Всегда̀ и҆мꙋ́ще хрⷭ҇тѐ , крⷭ҇тъ тво́й на́ пᲂмᲂщь , сѣ́ти вра́жїѧ ᲂу҆до́бь пᲂпира́емъ .

сти́хъ : к̾ тебѣ̀ вᲂз̾ведо́хъ ѻ҆́чи мᲂѝ . Живᲂтвᲂрѧ́щемꙋ твᲂемꙋ̀ крⷭ҇тꙋ̀ , непреста́ннѡ кла́нѧющесѧ хрⷭ҇тѐ [пᲂкло́н̾] , и҆ тридне́внᲂе вᲂскрⷭ҇нїе твᲂѐ сла́вимъ . тѣ́мъ бо ѡ҆бнᲂви́лъ є҆сѝ , и҆стлѣ́вшее чл҃ческᲂе є҆стество̀ всеси́льне . и҆ є҆́же на нб҃са̀ вᲂсхо́дъ ѡ҆бнᲂви́лъ є҆сѝ на́мъ , ꙗ҆́кѡ є҆ди́нъ бл҃гъ и҆ чл҃кᲂлю́бецъ .

сти́хъ : пᲂми́лꙋй на́съ гдⷭ҇и . мⷱ҇ꙋ . Прᲂславлѧ́ѧисѧ в̾ па́мѧтѣхъ ст҃ы́хъ твᲂи́хъ хрⷭ҇тѐ бж҃е , и҆ ѿ ни́хъ ᲂу҆мᲂле́нъ быва́ѧ , низ̾пᲂслѝ на́мъ ве́лїю млⷭ҇ть . сла́ва , и҆ ны́нѣ . гла́съ , ѕ҃ . При стꙋденцы̀ і҆а́кѡвли , ѡ҆брѣ́те і҆с҃ъ самарѧны́ню , про́ситъ во́дꙋ ѿ неѧ̀ , и҆́же ѻ҆́блаки пᲂкрыва́ѧи нб҃о . ѽ чꙋ́до , и҆́же херꙋви́мᲂмъ неви́димыи , блꙋдни́цѣ женѣ̀ бесѣ́дꙋетъ . во́дꙋ про́ситъ , и҆́же на вᲂда́хъ зе́млю пᲂвѣ́шеи . во́дꙋ прᲂсѧ̀ , и҆́же и҆сто́чники и҆ є҆зе́ра во́дъ прᲂлива́ѧ , хᲂтѧ̀ привлещѝ дре́вле тꙋ̀ ᲂу҆лᲂвлѧ́емꙋю ѿ бᲂри́телѧ врага̀ , и҆ напᲂи́ти є҆ѧ̀ вᲂды̀ жи́вы , ѡ҆палѧ́емꙋю в̾ без̾мѣ́стныхъ лю́тѣ , ꙗ҆́кѡ є҆ди́нъ млрⷭ҇дъ и҆ чл҃кᲂлю́бецъ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , вᲂскрⷭ҇нъ . сла́ва , и҆ ны́нѣ , боⷢ҇ .= є҆ктенїѧ̀ . и҆ =ѿпꙋ́стъ .

Въ пѧто́къ , є҃ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь , вᲂскрⷭ҇нъ , двⷤа . сла́ва , и҆ ны́нѣ , боⷢ҇ . =По а҃ , стихᲂло́гїи , сѣда́ленъ . гла́съ , д҃ . На крⷭ҇тѣ́ тѧ пригвᲂзди́ша і҆ꙋде́и сп҃се , и҆́мже ѿ и҆стлѣ́нїѧ на́съ призва̀ , хрⷭ҇тѐ бж҃е на́шъ . прᲂсте́рлъ є҆сѝ дла́ни на не́мъ во́лею , кᲂпїе́мъ же въ ре́бра свᲂѧ̀ вᲂсхᲂтѣ̀ прᲂбᲂсти́сѧ , мно́жествᲂмъ щедро́тъ твᲂи́хъ , є҆ди́не чл҃кᲂлю́бче . =сти́хъ : вᲂзнᲂси́те гдⷭ҇а бг҃а на́шегѡ , и҆ кла́нѧйтесѧ пᲂд̾но́жїю но́гꙋ є҆гѡ̀ ꙗ҆́кѡ ст҃о є҆́сть . Вᲂскр҃слъ є҆сѝ ꙗ҆́кѡ без̾сме́ртенъ ѿ́ грᲂба сп҃се , и҆ сᲂвᲂста́вилъ є҆сѝ ми́ръ сво́й , си́лᲂю свᲂе́ю хрⷭ҇тѐ бж҃е на́шъ . сᲂкрꙋши́лъ є҆сѝ крѣ́пᲂстїю сме́рти держа́вꙋ . пᲂказа́лъ є҆сѝ млⷭ҇тиве вᲂскрⷭ҇нїе всѣ́мъ , тѣ́мже тѧ сла́вимъ є҆ди́нагѡ бг҃а на́шегѡ . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Дне́сь а҆́нг҃льскаѧ во́инства , в̾ па́мѧть стрⷭ҇тᲂте́рпецъ прїидо́ша , вѣ́рныхъ мы́сли прᲂсвѣти́ти , и҆ вселе́ннꙋю бл҃гᲂда́тїю ᲂу҆ѧсни́ти . тѣ́хъ ра́ди бж҃е ᲂу҆мᲂле́нъ быва́ѧ , да́рꙋй на́мъ ве́лїю млⷭ҇ть . сла́ва , и҆ ны́нѣ , крⷭ҇тᲂбоⷢ҇ . Дв҃о всенепᲂро́чнаѧ мт҃и хрⷭ҇та̀ бг҃а , ѻ҆рꙋ́жїе про́йде твᲂю̀ пречⷭ҇тꙋю дш҃ꙋ , є҆гда̀ распина́ема ви́дѣ во́лею сн҃а и҆ бг҃а твᲂегѡ̀ . є҆го́же пребл҃гᲂслᲂве́наѧ мᲂлѧ́щи непреста́й , прᲂще́нїе сᲂгрѣше́нїемъ на́мъ дарᲂва́ти .

По в҃ , стихᲂло́гїи , сѣда́ленъ . гла́съ , д҃ . Ѿ и҆сто́чника вᲂды̀ , земна́гѡ и҆ тлѣ́ннагѡ , прише́дши по ѡ҆бы́чаю самарѧны́нѧ пᲂчерпстѝ , во́дꙋ жи́вꙋ пᲂчерпѐ . та́кѡ ѡ҆брѣ́те на стꙋденцѣ̀ сѣдѧ́ща , и҆дѣ́же и҆сто́чникъ и҆ кла́денецъ і҆а́кѡвъ и҆скᲂпа̀ , и҆́же в̾ ми́рѣ жа́ждꙋщихъ пла́менемъ , напᲂѧ́ющꙋ хла́дᲂмъ . сла́ва , и҆ ны́нѣ , то́йже .

та́же , вᲂскрⷭ҇нїе хрⷭ҇то́во , аⷤ . ѱл҃о́мъ , н҃ . кано́нъ , ѡ҆ самарѧны́нѣ , на и҃ . и҆ в̾ минѣ́и , на д҃ .

На хвали́тѣхъ , стихѣ́ры , на д҃ . гла́съ , д҃ . поⷣ . Да́лъ є҆сѝ зна́менїе ,꙳ бᲂѧ́щимсѧ тебѐ гдⷭ҇и ,꙳ крⷭ҇тъ тво́й чⷭ҇тны́и ,꙳ и҆́м̾же пᲂсрами́лъ є҆сѝ ,꙳ нача́ла тмы̀ и҆ вла́сти ,꙳ и҆ вᲂзве́лъ є҆сѝ на́съ ꙳ на пе́рвᲂе бл҃же́нство .꙳ тѣ́мже ти чл҃кᲂлю́бнᲂе смᲂтре́нїе сла́вимъ ,꙳ і҆с҃е всеси́льне ,꙳ сп҃се дш҃а́мъ на́шимъ . двⷤа . Распѧ́тїе претерпѣ́въ и҆ сме́рть , и҆ вᲂскр҃съ и҆з̾ ме́ртвыхъ , всеси́льне гдⷭ҇и , сла́вимъ твᲂѐ вᲂскрⷭ҇нїе . мⷱ҇ꙋ . Кто̀ недиви́тсѧ зрѧ̀ ст҃і́и мч҃нцы , по́двига до́брагѡ , и҆́м̾же пᲂдвиза́стесѧ ; ка́кѡ во́ плᲂти сꙋ́ще , беспло́тнаго врага̀ пᲂбѣди́сте ; хрⷭ҇та̀ и҆спᲂвѣ́дающе , и҆ крⷭ҇то́мъ вᲂѡ҆рꙋжи́вшесѧ . тѣ́мже дᲂсто́йнѡ ꙗ҆ви́стесѧ бѣсо́мъ прᲂгᲂни́теле , и҆ сᲂпᲂста́тѡмъ пᲂбѣди́теле . непреста́ннѡ мᲂли́те спасти́сѧ дш҃а́мъ на́шимъ . сла́ва , и҆ ны́нѣ . гла́съ , ѕ҃ . И҆сто́чникъ живᲂнача́лїѧ , і҆с҃ъ сп҃съ на́шъ , и҆сто́чникꙋ пред̾ста̀ патрїа́рха і҆а́кѡва , пи́ти прᲂша́ше во́дꙋ ѿ жены̀ самарѧны́ни . ѻ҆́нᲂйже неприча́стнᲂе і҆ꙋде́ѡмъ прире́кши . мꙋ́дрыи зижди́тель привлачи́тъ ю҆̀ сла́дкими глаго́лы , па́ки къ прᲂше́нїю при́снѡ живо́тныѧ вᲂды̀ , є҆ѧ́же прїе́мши , всѣ́мъ прᲂпᲂвѣ́да ре́кши , прїидѣ́те ви́дите тайнᲂвѣ́дца и҆ бг҃а прише́дша пло́тїю , да спасе́тъ ро́дъ на́шъ .

На стихо́внѣ , стихѣ́ры . гла́съ , д҃ . поⷣ . ꙗ҆́кѡ до́блѧ . И҆сто́чникъ при́сныи ꙳ сѣдѧ́щь на ро́веницѣ ви́дѣ жена̀ ,꙳ терпѣ́ти немᲂгꙋ́щи ꙳ зно́й мно́гихъ страсте́й нестерпи́мыхъ ,꙳ прᲂсѧ́щи прїѧ́ти во́дꙋ жи́зни ,꙳ и҆́же и҆з̾ негѡ̀ и҆з̾лива́емꙋ .꙳ ю҆́же прїѧ́тъ тꙋ́не ѿ́ слᲂва ,꙳ и҆ не к̾тᲂмꙋ̀ ко и҆сто́чникꙋ тщи́тсѧ ,꙳ земно́мꙋ и҆ тлѣ́ннᲂмꙋ .

=сти́хъ : налѧцы̀ и҆ спѣ́й и҆ црⷭ҇твꙋй ,꙳ и҆́стины ра́ди и҆ кро́тᲂсти и҆ пра́вды . =

ꙋде́йскїѧ ѡ҆бы́чаи жена̀ гᲂнѧ́щи ,꙳ и҆ винꙋ̀ прилага́ющи неприкᲂснᲂве́нїѧ ,꙳ прича́стїю , вᲂды̀ хрⷭ҇то́съ ,꙳ прїѡ҆бщѝ мꙋ́дрыи сᲂдѣ́тель ,꙳ сла́дкими прᲂвѣща́ньми ,꙳ и҆спрᲂси́ти живᲂтекꙋ́щꙋю ꙳ сїю̀ во́дꙋ бжⷭ҇твенꙋю .꙳ ю҆́же пи́вши и҆ ко́ градꙋ прїи́де ,꙳ вᲂз̾вѣща́ющи бы́вшаѧ .

сти́хъ : вᲂзлюби́лъ є҆сѝ пра́вдꙋ ,꙳ и҆ вᲂзненави́дѣ без̾зако́нїе . Ни пᲂчерпа́ла и҆́маши ,꙳ и҆ стꙋдене́цъ глꙋбо́къ ,꙳ ѿ кꙋ́дꙋ ᲂу҆́бѡ пᲂда́си ми во́дꙋ нетлѣ́ннꙋ ,꙳ самарѧны́нѧ вᲂпїѧ́ше ти хрⷭ҇тѐ .꙳ тебѣ̀ ꙗ҆́кѡ чл҃ка зрѧ́щи а҆ не бг҃а ,꙳ и҆ слᲂвесе́мъ чꙋдѧ́щисѧ ,꙳ и҆́ми же вѣща́ньми сла́дкими напᲂи́лъ є҆сѝ ,꙳ и҆ бг҃а тѧ и҆ влⷣкꙋ тва́ремъ ,꙳ и҆спᲂвѣ́дати сᲂтвᲂри́лъ є҆сѝ .

сла́ва , и҆ ны́нѣ . гла́съ , и҃ . Є҆гда̀ ꙗ҆ви́сѧ во́ плᲂти хрⷭ҇тѐ бж҃е не и҆зрече́ннымъ смᲂтре́нїемъ , ᲂу҆слы́шавши самарѧны́нѧ сло́во твᲂѐ чл҃кᲂлю́бче , ѡ҆ста́вивши пᲂчерпа́ло ᲂу҆ стꙋденца̀ , и҆ течѐ гл҃ющи сꙋ́щимъ во́ градѣ , прїиди́те ви́дите срⷣцевѣ́дца , є҆да̀ ᲂу҆́бѡ се́й є҆́сть ѡ҆жида́емыи хрⷭ҇то́съ , и҆мѣ́ѧи ве́лїю млⷭ҇ть .

та́же , бл҃го є҆́сть . и҆ ча́съ , а҃ . и҆ ѿпꙋ́стъ .

На бл҃же́ннах̾ , трипѣ́снец̾ , є҆мꙋ́же краегране́сїе : сла́ва бг҃ꙋ , а҆ми́нь . гла́съ , д҃ . пѣ́снь , є҃ . і҆рмо́съ . ᲂу҆диви́шасѧ всѧ́ческаѧ .

во црⷭ҇твїи сѝ є҆гда̀ прїи́деши , пᲂмѧнѝ на́съ гдⷭ҇и . Свѧзꙋ́емь влⷣко , и҆ на́ древѣ пригвᲂжда́емь , раз̾рѣши́лъ мѧ є҆сѝ ᲂу҆́зъ грѣхо́вныхъ , и҆ к̾ любвѝ свᲂе́й пригвᲂзди́лъ є҆сѝ . тѣ́мже бл҃гᲂда́рнѡ ти пᲂю̀ вели́чїе , и҆ несказа́ннꙋю си́лꙋ .

бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . И҆́же ꙗ҆ви́вшꙋтисѧ сп҃се во а҆́дѣ , дре́вле ѡ҆сꙋжде́ныи а҆да́мъ , раз̾рѣши́сѧ ѡ҆сꙋжде́нїѧ , и҆ мнᲂгᲂлѣ́тныхъ ᲂу҆́зъ , вᲂпїѧ̀ , сла́ва мно́зѣй ти сло́ве бл҃гᲂсти , і҆с҃е мнᲂгᲂмлⷭ҇тиве .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Оу҆жа́снѡ ꙗ҆влѧ́етсѧ жена́мъ а҆́нг҃лъ в̾нꙋ́трь сѣдѧ̀ гро́ба , и҆ вᲂз̾гласѝ , что̀ прїидо́сте ра́нѡ и҆ска́ти , хрⷭ҇то́съ вᲂскр҃се , ᲂу҆мертви́въ сме́рть .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . боⷢ҇ . Ст҃а́ѧ всенепᲂро́чнаѧ , и҆́же во ст҃ы́хъ ст҃а́гѡ препᲂчива́юща рᲂди́вши , сегѡ̀ ꙗ҆́кѡ ви́дѣла є҆сѝ и҆́з̾ грᲂба вᲂсїѧ́вша , ꙗ҆́кѡ жениха̀ и҆з̾ черто́га , пѣ́сньми велича́ше сегѡ̀ с̾хᲂжде́нїе .

пѣ́снь , и҃ . і҆рмо́съ . ѻ҆́трᲂки бл҃гᲂчести́выѧ .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . И҆́же ѡ҆ а҆да́мѣ пᲂмраче́ннᲂе є҆стество̀ , чл҃кᲂлю́бче назида́ѧ , прᲂсте́рлъ є҆сѝ дла́ни свᲂѧ̀ на́ древѣ пригвᲂжда́емь , и҆ в̾ ре́бра пречⷭ҇таѧ и҆скᲂпᲂва́емь . тѣ́мже мно́гᲂе бл҃гᲂꙋтро́бїе твᲂѐ , хвалᲂсло́вимъ во всѧ̀ вѣ́ки .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Ꙗ҆́кѡ ви́дѣ тебѐ до́лꙋ а҆́дъ , плѣнѧ́юща сегѡ̀ црⷭ҇твїѧ и҆́хъ же дре́вле пᲂглᲂтѝ , стра́хᲂмъ твᲂи́мъ ᲂу҆мерщвлѧ́емь , ме́ртвыѧ даѧ́ше всѧ̀ , сло́ве зᲂвꙋ́щїѧ , гдⷭ҇а по́йте дѣ́ла , и҆ превᲂзнᲂси́те є҆гѡ̀ во́ вѣки .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Рыда́ющимъ вᲂпїѧ́ше мѷрѡно́сицамъ , на ка́мени сѣдѧ́и а҆́нг҃лъ , те́кше вᲂз̾вѣсти́те ᲂу҆ченико́мъ вᲂста́нїе жизнᲂда́вца , ᲂу҆́же бо вᲂи́стинꙋ вᲂста̀ , и҆ а҆́дᲂво низ̾лᲂжи́въ мꙋчи́тельство , и҆ дїа́вᲂлю сте́рлъ ѕло́бꙋ .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . Є҆ди́нагѡ тѧ сла́влю сꙋщество́мъ , трⷪ҇цꙋ же прᲂпᲂвѣ́даю ли́цы , є҆ди́но бжⷭ҇тво̀ , ѻ҆ц҃а пребезнача́льна , и҆ сн҃а , и҆ дх҃а ст҃а́гѡ , вᲂпїѧ̀ всегда̀ , гдⷭ҇а по́йте дѣ́ла , и҆ превᲂзнᲂси́те є҆гѡ̀ во́ вѣки .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . боⷢ҇ . Ꙗ҆́кѡ ꙗ҆ви́сѧ бг҃ъ и҆з̾ тебѐ дв҃о , неразрꙋшѝ всѧ́кѡ дв҃ствꙋ зна́менїѧ , та́кѡ вᲂста̀ , ка́меню запечатлѣ́нїѧ ѡ҆ста́ви непᲂкᲂле́блема . є҆го́же ви́дѣвши , ра́дᲂсти и҆спо́лнисѧ , бл҃гᲂслᲂвѧ́щи сегѡ̀ бжⷭ҇твенꙋю си́лꙋ во всѧ̀ вѣ́ки .

пѣ́снь , ѳ҃ . і҆рмо́съ . всѧ́къ зе́менъ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . Гᲂрѣ̀ вᲂз̾ше́дъ на высᲂтꙋ̀ крⷭ҇та̀ во́лею дᲂлгᲂтерпѣли́ве , привле́клъ є҆сѝ чл҃ка , ѿ про́пастей па́гꙋбы к̾ свѣ́тꙋ . пᲂлᲂжи́в̾жесѧ во́ грᲂбѣ жи́знь сы́и хрⷭ҇тѐ , ꙗ҆́же во грᲂбѣ́хъ спѧ́щихъ вᲂз̾дви́глъ є҆сѝ честны́мъ и҆ сла́внымъ вᲂста́нїемъ свᲂи́мъ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Мѵ́рѡ тебѐ ли́къ же́нскїи принᲂша́ше , жи́зни нача́льникꙋ , и҆ смᲂтри́въ тѧ вᲂста́вша , бл҃гᲂвѣстѝ ᲂу҆ченико́мъ вᲂста́нїе , со́бранᲂмъ в̾кꙋ́пѣ , и҆ пла́чꙋщимъ , и҆́же ви́дѣша тѧ , прᲂсвѣще́нїѧ и҆ ра́дᲂсти и҆спо́лнишасѧ .

сла́ва . Сл҃нце хрⷭ҇тѐ , во а҆́дѣ бы́въ с̾ дш҃е́ю ꙗ҆́кѡ бг҃ъ , и҆́же та́мѡ спѧ́щимъ ѡ҆ко́ванымъ ѿ́ вѣка , сво́й свѣ́тъ вᲂсїѧ́лъ є҆сѝ , и҆ вᲂскр҃си́лъ є҆сѝ ст҃ы́мъ вᲂскрⷭ҇нїемъ свᲂи́мъ , вᲂспѣва́ющихъ твᲂю̀ бл҃гᲂсть .

и҆ ны́нѣ , боⷢ҇ . Ма́нїемъ дв҃о всѧ̀ нᲂсѧ́щаго бг҃а рᲂдила̀ є҆сѝ , чл҃ка бы́вша за бл҃гᲂꙋтро́бїе бг҃ᲂра́дᲂваннаѧ . є҆го́же прилѣ́жнѡ мᲂлѝ , прᲂсвѣти́ти на́ша срⷣца̀ , бл҃жа́щихъ тѧ вᲂи́стинꙋ , ꙗ҆́кѡ чⷭ҇тꙋю бг҃ᲂмт҃рь .

Въ то́йже , пѧто́къ , ве́черъ . на гдⷭ҇и вᲂзва́хъ , стихѣ́ры , ѡ҆ самарѧны́нѣ , г҃ . гла́съ , а҃ . Ко и҆сто́чникꙋ прїи́де и҆сто́чникъ чꙋде́съ в̾ ше́стыи ча́съ , є҆́ввинъ ᲂу҆лᲂви́ти пло́дъ . и҆́бо є҆́вва в̾ то́й и҆зы́де и҆з̾ ра́ѧ , пре́лестїю ѕмі́евᲂю . прибли́жибᲂсѧ самарѧны́нѧ пᲂчерпстѝ во́дꙋ , ю҆́же ви́дѣвъ сп҃съ речѐ , да́ждь ми во́дꙋ пи́ти , и҆ а҆́зъ вᲂды̀ текꙋ́щїѧ насыщꙋ́ тѧ . и҆ во́ градъ те́кши цѣлᲂмꙋ́дренаѧ , наро́дѡмъ вᲂз̾вѣстѝ а҆́бїе , прїиди́те ви́дите хрⷭ҇та̀ гдⷭ҇а , сп҃са дш҃а́мъ на́шимъ . гла́съ , в҃ . На стꙋдене́цъ прїи́де гдⷭ҇ь , самарѧны́нѧ же мᲂлѧ́ше бл҃гᲂꙋтро́бнагѡ . пᲂда́ждь ми во́дꙋ вѣ́ры , да вᲂспрїимꙋ̀ кꙋпѣ́льныѧ во́ды , ра́дᲂсть и҆ и҆збавле́нїе , жизнᲂда́вче гдⷭ҇и сла́ва тебѣ̀ .= И҆́=же сᲂбез̾нача́льныи и҆ сᲂпрⷭ҇нᲂсꙋ́щныи сн҃ъ и҆ сло́во ѻ҆ц҃ꙋ , на и҆сто́чникъ прїи́де и҆сто́чникъ и҆сцѣле́нїемъ , и҆ жена̀ ѿ самарі́и прїи́де пᲂчерпстѝ во́дꙋ , ю҆́же ви́дѣвъ сп҃съ речѐ , да́ждь ми во́дꙋ пи́ти , и҆ ше́дши пригласѝ свᲂегѡ̀ мꙋ́жа . ѻ҆на́же ꙗ҆́кѡ чл҃кꙋ гл҃ющи а҆ не бг҃ꙋ , ᲂу҆таи́ти тща́щисѧ гл҃аше , не и҆́мамъ мꙋ́жа . ᲂу҆чи́тель же к̾ не́й гл҃а , и҆́стинꙋ рекла̀ є҆сѝ не и҆́мамъ мꙋ́жа , пѧ́ть бо и҆мѣ́ла є҆сѝ , и҆ ны́нѣ є҆го́же и҆́маши нѣ́сть ти мꙋ́жъ . ѻ҆на́же ѡ҆ гл҃ѣ ᲂу҆диви́вшисѧ , и҆ во́ градъ те́кши наро́дѡмъ вᲂпїѧ́ше гл҃ющи , прїиди́те и҆ ви́дите хрⷭ҇та̀ , и҆́же да́рꙋетъ ми́рᲂви ве́лїю ми́лᲂсть .

та́же , стихѣ́ры , в̾ минѣ́и , г҃ . сла́ва . гла́съ , ѕ҃ . Оу҆стꙋденца̀ і҆а́кѡвлѧ ѡ҆брѣ́те і҆с҃ъ самарѧны́ню , про́ситъ во́дꙋ ѿ неѧ̀ , и҆́же ѻ҆́блаки пᲂкрыва́ѧи нб҃о . ѽ чꙋдесѝ , и҆́же херꙋви́мᲂмъ неви́димыи , блꙋдни́цѣ женѣ̀ бесѣ́дꙋетъ . во́дꙋ про́ситъ , и҆́же на вᲂда́хъ зе́млю пᲂвѣ́сивыи . во́дꙋ и҆скі́и , и҆́же и҆сто́чники и҆ є҆зе́ра во́дъ и҆злива́ѧи , хᲂтѧ̀ привлещѝ па́ки тꙋ̀ , ᲂу҆лᲂвле́ннꙋю ѿ сᲂпᲂста́та врага̀ , и҆ напᲂи́ти ю҆̀ вᲂдо́ю живо́ю , пали́мꙋю в̾ бесчи́нствѣхъ лю́тыхъ , и҆́же є҆ди́нъ бл҃гᲂꙋтро́бныи , и҆ чл҃кᲂлю́бецъ . и҆ ны́нѣ , боⷢ҇ . гла́съ , д҃ . И҆́же тебѐ ра́ди бг҃ᲂѻ҆ц҃ъ прⷪ҇ркъ дв҃дъ , пѣ́сненно ѡ҆ тебѣ̀ прᲂвᲂз̾гласѝ , вели́чїѧ ти сᲂтво́ршꙋ , пред̾ста̀ цр҃ца ѡ҆деснꙋ́ю тебѐ , тебе́ бо мт҃рь хᲂда́тайцꙋ живᲂтꙋ̀ пᲂказа̀ , и҆́же без̾ ѻ҆ц҃а и҆з̾ тебѐ вᲂчл҃читисѧ бл҃гᲂи҆зво́ли бг҃ъ , да сво́й па́ки ѡ҆бнᲂви́тъ ѻ҆́бразъ и҆стлѣ́вшїи страстьмѝ , и҆ заблꙋ́ждьшее вᲂлкᲂхи́щнᲂе ѻ҆вча̀ ѡ҆брѣ́тъ , на ра́мо вᲂспрїи́мъ , ко ѻ҆ц҃ꙋ принесѐ , и҆ къ свᲂемꙋ̀ хᲂтѣ́нїю , съ нбⷭ҇ными сᲂвᲂкꙋпи́тъ си́лами . и҆ спасе́тъ бцⷣею ми́ръ хрⷭ҇то́съ , и҆мѣ́ѧи ве́лїю и҆ бᲂга́тꙋю млⷭ҇ть .

На стихо́внѣ , стихѣ́ры . гла́съ , д҃ . Живᲂтвᲂрѧ́щемꙋ твᲂемꙋ̀ крⷭ҇тꙋ̀ , непреста́ннѡ кла́нѧющесѧ хрⷭ҇тѐ [пᲂкло́н̾] , и҆ тридне́внᲂе вᲂскрⷭ҇нїе твᲂѐ сла́вимъ . тѣ́мъ бо ѡ҆бнᲂви́лъ є҆сѝ , и҆стлѣ́вшее чл҃ческᲂе є҆стество̀ всеси́льне . и҆ є҆́же на нб҃са̀ вᲂсхо́дъ ѡ҆бнᲂви́лъ є҆сѝ на́мъ , ꙗ҆́кѡ є҆ди́нъ бл҃гъ и҆ чл҃кᲂлю́бецъ .

сти́хъ : гдⷭ҇ь вᲂцр҃и́сѧ ,꙳ и҆ въ лѣ́пᲂтꙋсѧ ѡ҆блечѐ . Дре́ва преслꙋша́нїѧ запреще́нїе , разрѣши́лъ є҆сѝ сп҃се , на́ древѣ крⷭ҇тнѣмъ во́лею пригво́ждьсѧ . и҆ во а҆́дъ сᲂше́дъ си́льне , сме́ртыѧ ᲂу҆́зы ꙗ҆́кѡ бг҃ъ растерза́лъ є҆сѝ . сегѡ̀ ра́ди кла́нѧемсѧ [пᲂкло́н̾] , є҆́же и҆з̾ ме́ртвыхъ твᲂемꙋ̀ вᲂскрⷭ҇нїю , ра́дᲂстїю вᲂпїю́ще , всеси́льне гдⷭ҇и сла́ва тебѣ̀ .

сти́хъ : и҆́бо ᲂу҆҆твердѝ вселе́ннꙋю ,꙳ ꙗ҆́же непᲂдвижитсѧ . Врата̀ а҆́дᲂва сᲂкрꙋши́лъ є҆сѝ гдⷭ҇и , и҆ свᲂе́ю сме́ртїю , сме́ртнᲂе ца́рьство разрꙋши́лъ є҆сѝ . ро́дъ же чл҃ческїи и҆зъ и҆стлѣ́нїѧ свᲂбо́ждь , живо́тъ и҆ нетлѣ́нїе ми́рꙋ дарᲂва̀ , и҆ ве́лїю ми́лᲂсть .

сти́хъ : до́мꙋ твᲂемꙋ̀ пᲂдᲂба́етъ ,꙳ ст҃ы́ни гдⷭ҇и в̾ дᲂлгᲂтꙋ̀ дні́й . Гдⷭ҇и вᲂз̾ше́дъ на́ крⷭ҇тъ , пра́дѣднюю клѧ́твꙋ на́шꙋ ѡ҆чи́стилъ є҆сѝ . и҆ сᲂше́дъ во а҆́дъ , вѣ́чныѧ ᲂу҆́зники свᲂбᲂди́лъ є҆сѝ , нетлѣ́нїе да́рꙋѧ чл҃ческᲂмꙋ ро́дꙋ . сегѡ̀ ра́ди пᲂю́ще сла́вимъ , живᲂтвᲂрѧ́щее и҆ спасе́ннᲂе твᲂѐ вᲂскрⷭ҇нїе .

сла́ва , и҆ ны́нѣ . гла́съ , и҃ . Є҆гда̀ ꙗ҆ви́сѧ во́ плᲂти хрⷭ҇тѐ бж҃е не и҆зрече́ннымъ смᲂтре́нїемъ , ᲂу҆слы́шавши самарѧны́нѧ сло́во твᲂѐ чл҃кᲂлю́бче , ѡ҆ста́вивши пᲂчерпа́ло ᲂу҆ стꙋденца̀ , и҆ течѐ гл҃ющи сꙋ́щимъ во́ градѣ , прїиди́те ви́дите срⷣцевѣ́дца , є҆да̀ ᲂу҆́бѡ се́й є҆́сть ѡ҆жида́емыи хрⷭ҇то́съ , и҆мѣ́ѧи ве́лїю млⷭ҇ть .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , вᲂскрⷭ҇нъ . сла́ва , и҆ ны́нѣ , боⷢ҇ .= є҆ктенїѧ̀ . и҆ =ѿпꙋ́стъ .

Въ сꙋбо́тꙋ , є҃ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь , вᲂскрⷭ҇нъ , двⷤа . сла́ва , и҆ ны́нѣ , боⷢ҇ . =По а҃ , стихᲂло́гїи , сѣда́ленъ . гла́съ , д҃ . Вᲂзрѣ́вше на гро́бныи вхо́дъ и҆ пла́мене а҆́нг҃льскагѡ нетерпѧ́ще мѷрѡно́сицы , съ тре́петᲂмъ дивлѧ́хꙋсѧ гл҃юще , є҆да̀ ᲂу҆кра́десѧ ѿве́рзыи разбо́йникꙋ ра́й ; є҆да́ли вᲂста̀ , и҆́же пре́жде стра́сти прᲂпᲂвѣ́давыи вᲂста́нїе ; вᲂи́стинꙋ вᲂскр҃се хрⷭ҇то́съ , и҆ сꙋ́щимъ во а҆́дѣ пᲂдаѧ̀ живо́тъ и҆ вᲂскрⷭ҇нїе . =сла́ва . Вᲂскр҃се ѿ́ грᲂба сп҃се ꙗ҆́кѡ без̾сме́ртенъ , сᲂвᲂста́вилъ є҆сѝ ми́ръ сво́й , си́лᲂю свᲂе́ю хрⷭ҇тѐ бж҃е на́шъ . сᲂкрꙋши́лъ є҆сѝ крѣ́пᲂстїю сме́рти держа́вꙋ , пᲂказа́лъ є҆сѝ млⷭ҇тиве вᲂскрⷭ҇нїе всѣ́мъ . тѣ́мже тѧ сла́вимъ є҆ди́нагѡ бг҃а на́шегѡ . и҆ ны́нѣ , боⷢ҇ . И҆́же ѿ́ вѣка ᲂу҆тае́ннᲂе , и҆ а҆́нг҃лѡмъ несвѣ́дᲂмᲂе та́инство , тᲂбо́ю бцⷣе земны́мъ ꙗ҆ви́сѧ , бг҃ъ въ неразмѣ́снѣ сни́тїи вᲂплᲂща́емъ . и҆ крⷭ҇тъ во́лею на́съ ра́ди вᲂспрїе́мъ , и҆́м̾же вᲂскр҃сѝ первᲂзда́ннаго , и҆ спасѐ ѿ сме́рти дш҃а на́ша .

По в҃ , стихᲂло́гїи , сѣда́ленъ . гла́съ , д҃ . Да веселѧ́тсѧ нбⷭ҇наѧ , да ра́дꙋютсѧ земна́ѧ , ꙗ҆́кѡ хрⷭ҇то́съ ѿ дв҃ы ꙗ҆ви́сѧ ꙗ҆́кѡ чл҃къ , и҆зба́ви и҆з̾тлѝ всѐ чл҃чество свᲂе́ю сме́ртїю , чꙋдеса́ми же прᲂсїѧ̀ , женѣ̀ самарѧны́нѣ во́дꙋ прᲂсѧ́щи , пᲂдадѐ и҆сто́чникъ и҆сцѣле́нїемъ , ꙗ҆́кѡ є҆ди́нъ без̾сме́ртенъ . сла́ва , и҆ ны́нѣ , то́йже .

та́же , вᲂскрⷭ҇нїе хрⷭ҇то́во , аⷤ . ѱл҃о́мъ , н҃ . =кано́нъ , ѡ҆ =самарѧны́нѣ , на́ ѕ҃ . и҆ ст҃о́мꙋ , є҆мꙋ́же є҆́сть хра́мъ , на д҃ . и҆ в̾ минѣ́и , на д҃ .

На хвали́тѣхъ , стихѣ́ры , на д҃ . гла́съ , д҃ . И҆́же распѧ́тїе претерпѣ́выи и҆ сме́рть , и҆ вᲂскр҃сы́и и҆з̾ ме́ртвыхъ всемᲂгі́и гдⷭ҇и , сла́вимъ твᲂѐ вᲂскрⷭ҇нїе .= Крⷭ҇то́мъ твᲂи́мъ хрⷭ҇тѐ , ѿ дре́внїѧ клѧ́твы свᲂбᲂди́лъ є҆сѝ на́съ , и҆ сме́ртїю свᲂе́ю , и҆́же є҆стество̀ на́ше мꙋча́щаго дїа́вᲂла ᲂу҆праздни́лъ є҆сѝ . вᲂскрⷭ҇нїемъ же свᲂи́мъ , ра́дᲂсти всѧ́ческаѧ и҆спо́лнилъ є҆сѝ . тѣ́мже вᲂпїе́мъ ти , вᲂскр҃сы́и и҆з̾ ме́ртвыхъ , гдⷭ҇и сла́ва тебѣ̀ . Твᲂи́мъ крⷭ҇то́мъ хрⷭ҇тѐ сп҃се , наста́ви на́съ на и҆́стинꙋ твᲂю̀ , и҆ и҆зба́ви ны̀ ѿ сѣ́ти вра́жїѧ . вᲂскр҃сы́и и҆з̾ ме́ртвыхъ , вᲂста́ви на́съ па́дшїѧсѧ грѣхо́мъ , прᲂсте́ръ рꙋ́кꙋ свᲂю̀ чл҃кᲂлю́бче гдⷭ҇и , мл҃твами ст҃ы́хъ твᲂи́хъ . Ѻ҆те́ческихъ си нѣ́дръ не ѿлꙋ́чьсѧ є҆динᲂро́днᲂе сло́во бж҃їе , прїи́де на́ землю за чл҃кᲂлю́бїе , чл҃къ бы́въ непрело́женъ . и҆ распѧ́тїе и҆ сме́рть претерпѣ́лъ є҆сѝ пло́тїю , без̾стра́стныи бжⷭ҇тво́мъ . вᲂскр҃съ же и҆з̾ ме́ртвыхъ , без̾сме́ртїе по́далъ є҆сѝ ро́дꙋ чл҃ческᲂмꙋ , ꙗ҆́кѡ є҆ди́нъ всеси́ленъ . =сла́ва , и҆ ны́нѣ . гла́съ , ѕ҃ . И҆сто́чникъ живᲂнача́льныи і҆с҃ъ сп҃съ на́шъ , ко и҆сто́чникꙋ прїи́де патрїа́рха і҆а́кѡва , пи́ти прᲂша́ше вᲂды̀ , ѿ жены̀ самарѧны́ни . сїѧ́ же неприча́стнᲂе і҆ꙋде́ѡмъ прире́кши , мꙋ́дрыи зижди́тель приво́дитъ ю҆̀ сла́дкими глаго́лы , па́че к̾ прᲂше́нїю прⷭ҇нѡ живо́тнѣй вᲂдѣ̀ . ю҆́же прїи́мши всѣ́мъ прᲂпᲂвѣ́да рекꙋ́щи , прїиди́те ви́дите та́йнꙋ вѣ́дꙋщагѡ бг҃а , прише́дшагѡ пло́тїю , да спасе́тъ ро́дъ на́шъ .

На стихо́внѣ , стихѣ́ры . гла́съ , д҃ . поⷣ . ꙗ҆́кѡ до́блѧ .= Ꙗ҆́=кѡ и҆сто́чникъ бл҃гᲂсти сы́и дх҃а , ꙳ и҆ жи́зни сᲂкро́вище ꙳ чл҃кᲂлю́бче ,꙳ ка́кѡ женѣ̀ самарѧны́нѣ ꙗ҆́вѣ бесѣ́дꙋеши ,꙳ да́ждь ми во́дꙋ пи́ти .꙳ несказа́нне гдⷭ҇и ,꙳ вᲂспѣва́емъ ти мно́гᲂе бл҃гᲂꙋтро́бїе ,꙳ и҆́м̾же спаса́еши чл҃ческїи ве́сь ро́дъ ,꙳ за мно́гꙋю бл҃гᲂсть .

сти́хъ : налѧцы̀ и҆ спѣ́й и҆ црⷭ҇твꙋй ,꙳ и҆́стины ра́ди и҆ кро́тᲂсти и҆ пра́вды . И҆сто́чникъ прⷭ҇нᲂсꙋ́щныи ,꙳ живо́тъ без̾сме́ртныи ,꙳ стрꙋѧ̀ неѡ҆скꙋ́дна же и҆ нетлѣ́нна ,꙳ пꙋ́ть ше́ствᲂвавъ ,꙳ сѣдѧ́ше бли́зъ стꙋденца̀ ,꙳ премꙋ́дрыѧ ᲂу҆ченикѝ пᲂсла́въ по бра́шно ,꙳ самарѧны́нѣ женѣ̀ бесѣ́дꙋѧ ,꙳ сїю̀ хᲂтѧ̀ ᲂу҆лᲂви́ти ,꙳ и҆ привестѝ ко ѻ҆ц҃ꙋ ,꙳ ꙗ҆́кᲂже є҆ди́нъ вѣ́сть .

сти́хъ : вᲂзлюби́лъ є҆сѝ пра́вдꙋ ,꙳ и҆ вᲂзненави́дѣ без̾зако́нїе . Прїиди́те и҆ ви́дите чл҃ка ,꙳ и҆́же и҆зрече́ ми дне́сь на и҆сто́чницѣ сѣдѧ̀ ,꙳ ꙗ҆́же сᲂдѣ́ѧхъ .꙳ прᲂро́къ бо и҆́стиненъ є҆́сть и҆ вели́къ ,꙳ сᲂкрᲂве́наѧ и҆ ꙗ҆вле́наѧ вѣ́дыи всѧ̀ .꙳ к̾ немꙋ́же вᲂзᲂпїе́мъ ,꙳ да́рꙋй жа́ждꙋщимъ во́дꙋ жи́зни ю҆́же и҆́маши ,꙳ да не вжа́ждемъ па́ки во́ вѣки чл҃кᲂлю́бче .

сла́ва , и҆ ны́нѣ . гла́съ , ѕ҃ . Та́кѡ гл҃етъ гдⷭ҇ь самарѧны́нѣ , а҆́ще бы вѣ́дала да́ръ бж҃їи , и҆ кто̀ є҆́сть гл҃ѧи тебѣ̀ да́ждь ми вᲂды̀ пи́ти , и҆ ты́ бы прᲂси́ла ᲂу҆ негѡ̀ , и҆ да́лъ бы ти пи́ти , да не вжа́ждешисѧ во́ вѣки , гл҃етъ гдⷭ҇ь .

та́же , бл҃го є҆́сть . и҆ ча́съ , а҃ . и҆ ѿпꙋ́стъ .

На бл҃же́ннахъ , четверᲂпѣ́снецъ . гла́съ , д҃ . пѣ́снь , ѕ҃ . і҆рмо́съ . пᲂжрꙋ́ти со́ гласᲂмъ .

во црⷭ҇твїи сѝ є҆гда̀ прїи́деши ,꙳ пᲂмѧнѝ на́съ гдⷭ҇и . Прᲂсте́ръ на крⷭ҇тѣ̀ пречи́стѣи дла́ни свᲂѝ , мы́сленагѡ ра́спѧлъ є҆сѝ а҆мали́ка бжⷭ҇твенᲂю си́лᲂю свᲂе́ю , и҆ ми́ръ и҆зба́вилъ є҆сѝ ѿ рабо́ты хрⷭ҇тѐ бж҃е на́шъ .

бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Сᲂкрꙋши́въ стра́шнымъ сни́тїемъ а҆́да хрⷭ҇тѐ , и҆ и҆́х̾же держа́ше ᲂу҆́зники , бжⷭ҇твенᲂю вᲂсхи́ти си́лᲂю , и҆ вᲂскр҃се ꙗ҆́кѡ бг҃ъ и҆́з̾ грᲂба тридне́внѡ .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Ꙗ҆́кѡ прїидо́ша ко́ грᲂбꙋ жены̀ , пᲂма́зати тѧ без̾цѣ́ннᲂе мѵ́рѡ . к̾ ни́мъ же а҆́нг҃лъ вᲂпїѧ́ше , непла́читесѧ є҆го́же и҆́щете вᲂста̀ гдⷭ҇ь .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . боⷢ҇ . Не к̾тᲂмꙋ̀ бг҃ᲂмт҃и дв҃о рыда́й , сн҃ъ бо тво́й вᲂскр҃се , ꙗ҆́кѡ бг҃ъ тридне́внѡ и҆́з̾ грᲂба . но ра́дꙋисѧ и҆ мᲂлѝ є҆гѡ̀ спасти́сѧ на́мъ .

пѣ́снь , з҃ . і҆рмо́съ . спасы́и во ѻ҆гнѝ .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . На ло́бнѣмъ на́съ ра́ди , пᲂсредѝ разбо́йникꙋ пᲂвѣ́шенъ бы́въ на крⷭ҇тѣ̀ , и҆ вла́сти тмы̀ на се́мъ ᲂу҆праздни́лъ є҆сѝ . всеси́льне гдⷭ҇и бж҃е ѻ҆ц҃ъ на́шихъ бл҃гᲂслᲂве́нъ є҆сѝ .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Кᲂпїе́мъ въ ре́бра прᲂбᲂде́сѧ , и҆стᲂчи́лъ є҆сѝ на́мъ живᲂда́вче ѿ и҆сто́чника приснᲂтекꙋ́щагѡ , твᲂеѧ̀ бжⷭ҇твеныѧ кро́ве хрⷭ҇тѐ зᲂвꙋ́щимъ , препѣ́тыи гдⷭ҇и бж҃е ѻ҆ц҃ъ бл҃гᲂслᲂве́нъ є҆сѝ .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Блиста́ѧисѧ ѻ҆де́ждею а҆́нг҃лъ , рыда́ющимъ вᲂпїѧ́ше жена́мъ , пᲂчто̀ ꙗ҆́кѡ ме́ртва со бл҃гᲂꙋха́ньми и҆́щете , и҆мꙋ́щагѡ живᲂтꙋ̀ вла́сть хрⷭ҇та̀ ; вᲂскр҃се ꙗ҆́кᲂже речѐ и҆ пре́жде стрⷭ҇ти .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . боⷢ҇ . Пло́ть прїѧ́тъ и҆з̾ тебѐ чи́стаѧ сᲂдержа́и тва́рь всю̀ , и҆ землѝ кᲂнцы̀ , и҆ ᲂу҆́мрети на́съ ра́ди и҆з̾во́ливъ . є҆го́же зрѧ́щи вᲂскр҃сша со сла́вᲂю ѿ́ грᲂба , вᲂз̾весели́сѧ .

пѣ́снь , и҃ . і҆рмо́съ . рꙋ́цѣ распрᲂсте́ръ данїи́лъ .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Ꙗ҆́звᲂю влⷣко свᲂе́ю , всѐ и҆сцѣли́лъ є҆сѝ чл҃чество сп҃се , претерпѣ́лъ же є҆сѝ сме́рть , и҆ сегѡ̀ ѿ тлѣ́нїѧ свᲂбᲂди́лъ є҆сѝ свᲂе́ю сме́ртїю бл҃же , и҆ на́съ ѡ҆без̾сме́ртилъ є҆сѝ вᲂпїю́щихъ , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . Весели́тесѧ всѝ лю́дїе земні́и , и҆ всѧ̀ ра́дꙋйтесѧ ны́нѣ нбⷭ҇наѧ , жизнᲂда́вецъ бо гдⷭ҇ь вᲂскр҃се ѿ́ грᲂба , сᲂвᲂскреси́въ на́ше є҆стество̀ , зᲂвꙋ́ще , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а , по́йте и҆ превᲂзнᲂси́те є҆гѡ̀ во́ вѣки .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Мꙋчи́телѧ свѧза́въ хрⷭ҇тѐ с̾ни́тїемъ свᲂи́мъ , пᲂлᲂжи́всѧ во́ грᲂбѣ , мертвецы̀ вᲂз̾дви́глъ є҆сѝ всѧ̀ , бл҃гᲂда́рнѡ вᲂспѣва́ющихъ тѧ , бл҃гᲂда́телѧ всѣ́хъ и҆ вседержи́телѧ , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а , по́йте и҆ превᲂзнᲂси́те є҆гѡ̀ во́ вѣки .

пᲂмѧнѝ на́съ гдⷭ҇и ,꙳ є҆гда̀ прїи́деши во црⷭ҇твїи сѝ . боⷢ҇ . А҆да́ма па́дшаго во є҆де́мѣ , раз̾рѣши́ти смѣше́нїе чⷭ҇таѧ хᲂтѧ̀ всеси́льныи гдⷭ҇ь , вᲂплᲂти́сѧ и҆з̾ тебѐ пречⷭ҇таѧ , и҆ распѧ́т̾жесѧ и҆ пᲂгребе́сѧ и҆ вᲂскр҃се , спаса́ѧ на́съ , и҆́же любо́вїю тебѐ вᲂспѣва́ющихъ , мр҃і́е бг҃ᲂневѣ́сто .

пѣ́снь , ѳ҃ . і҆рмо́съ . є҆́вва ᲂу҆́бѡ недꙋ́гᲂмъ .

пᲂмѧнѝ на́съ влⷣко ,꙳ є҆гда̀ прїи́деши во црⷭ҇твїи сѝ . Раздра́сѧ твᲂи́мъ и҆́же на крⷭ҇тѣ̀ дᲂлгᲂтерпѣли́ве вᲂз̾дви́женїемъ за́вѣса , и҆ сл҃нце сᲂкры̀ лꙋчѝ , раз̾сѣда́емо же ка́менїе пᲂказᲂва́ше непра́веднᲂе закᲂле́нїе , є҆́же претерпѣ̀ сп҃се во́лею за́ рᲂдъ чл҃ческїи .

пᲂмѧнѝ на́съ ст҃ы́и ,꙳ є҆гда̀ прїи́деши во црⷭ҇твїи сѝ . Прᲂбᲂде́сѧ кᲂпїе́мъ і҆с҃е чл҃кᲂлю́бче на́ древѣ , и҆сцѣли́лъ є҆сѝ ᲂу҆ѧзви́вшагᲂсѧ престꙋпле́нїемъ а҆да́ма в̾ раѝ дᲂлгᲂтерпѣли́ве . пᲂлᲂже́нъ же в̾ ме́ртвыхъ , ꙗ҆́кѡ без̾сме́ртенъ всѧ̀ и҆з̾ве́лъ є҆сѝ вᲂспѣва́ющїѧ тѧ .

сла́ва . И҆́же всѧ̀ дла́нїю держа́и , и҆ и҆́же ма́нїемъ стро́ѧ пᲂд̾сл҃нечнꙋю , ка́кѡ в̾ ме́ртвыхъ в̾мѣни́сѧ без̾сме́ртенъ сы́и , хᲂтѧ̀ и҆зба́вити ᲂу҆ѧ́звеныѧ , ᲂу҆грызе́нїемъ ѕмі́евымъ ; тебѐ вᲂспѣва́емъ ꙗ҆́кѡ чл҃кᲂлю́бца .

и҆ ны́нѣ , боⷢ҇ . Ме́ртва и҆ на́га свᲂегѡ̀ сн҃а ви́сѧща на́ древѣ зрѧ́щи , бᲂлѧ́ше , а҆́бїе сегѡ̀ вᲂскр҃сша тридне́внѡ ви́дѧщи , весели́сѧ всенепᲂро́чнаѧ , ꙗ҆́кѡ мт҃и , и҆ мᲂли́сѧ ѡ҆ и҆́же вѣ́рᲂю пᲂчита́ющихъ тѧ .

На литꙋргі́и . прᲂки́менъ , ѱл҃о́мъ дв҃дᲂвъ . весе ли́тесѧ ѡ҆́ гдⷭ҇ѣ , и҆ ра́дꙋйтесѧ пра́веднїи . сти́хъ : бл҃же́ни и҆́мже ѿпꙋсти́шасѧ без̾зако́нїѧ , и҆ и҆́мже прикры́шасѧ грѣсѝ . дрꙋгі́и , дш҃а и҆́хъ во бл҃ги́хъ вᲂдвᲂрѧ́тсѧ . а҆пⷭ҇лъ , въ дѣѧ́нїих̾ . заⷱ҇ , л҃з . и҆ заꙋпᲂко́й , к̾ сᲂлꙋ́нѧнѡмъ . заⷱ҇ , с҃о .= а҆ллилꙋ́їѧ . вᲂзва́ша пра́веднїи , и҆ гдⷭ҇ь ᲂу҆слы́ша и҆́хъ . сти́хъ : мно́ги ско́рби пра́веднымъ , и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь . =сти́хъ : бл҃же́ни ꙗ҆́же и҆збра̀ и҆ прїѧ́тъ и҆́хъ гдⷭ҇ь , па́мѧть и҆́хъ ѿ́ рᲂда и҆ в̾ ро́дъ . є҆ѵⷢ҇а́лїе , ѿ і҆ѡа́нна . заⷱ҇ , л҃и . и҆ дрꙋго́е , заꙋпᲂко́й , ѿ і҆ѡа́нна . зача́ло , ѕ҃і . прича́стенъ . ра́дꙋйтесѧ пра́веднїи ѡ҆́ гдⷭ҇ѣ . дрꙋгі́и , бл҃же́ни ꙗ҆́же и҆збра̀ и҆ прїѧ́тъ ѧ҆̀ гдⷭ҇ь , па́мѧть и҆́хъ в̾ ро́дъ и҆ ро́дъ .