Во ст҃ꙋ́ю и҆ вели́кꙋю сре́дꙋ , ве́черъ , глаго́лемъ каѳи́смꙋ : къ гдⷭ҇ꙋ внегда̀ скᲂрбѣ́хъ , без̾ пᲂкло́нъ .= на гдⷭ҇и вᲂзва́хъ , пᲂста́вимъ , стихо́въ , і҃ . и҆ пᲂе́мъ стихѣ́ры самᲂгла́сны . гла́съ , а҃ . Тѧ̀ дв҃и́ча сн҃а , блꙋдни́ца пᲂзна́вши бг҃а , гл҃аше рыда́ѧ с̾ пла́чемъ мᲂлѧ́щисѧ , ꙗ҆́кѡ слеза́мъ дᲂсто́йнаѧ сᲂдѣ́лавши , разрѣшѝ до́лгъ ꙗ҆́кᲂже и҆ а҆́зъ власы̀ . вᲂзлюбѝ лю́бѧщꙋю , пра́веднѡ ненави́димꙋю . и҆ бли́зъ мытаре́й тебѐ прᲂпᲂвѣ́мъ , бл҃гᲂда́телю и҆ чл҃кᲂлю́бче . Мнᲂгᲂцѣ́ннᲂе мѵ́рѡ блꙋдни́ца смѣси́въ со слеза́ми , и҆ и҆злїѧ̀ на пречⷭ҇тѣи но́зѣ твᲂѝ , ѡ҆блᲂбыза́ющи . тꙋ̀ а҆́бїе ѡ҆правда́лъ є҆сѝ , на́мъ же прᲂще́нїе да́рꙋй , пᲂстрада́выи заны̀ , и҆ спасѝ на́съ . Є҆гда̀ грѣ́шнаѧ принесе́ ти мѵ́рѡ , тᲂгда̀ ᲂу҆чени́къ сᲂвѣщава́ше со закᲂнᲂпрестꙋ́пными . ѻ҆́ва ᲂу҆́бѡ ра́дᲂвашесѧ вᲂзлива́ющи мѵ́рѡ мнᲂгᲂцѣ́ннᲂе , се́й же тща́шесѧ прᲂда́ти бесцѣ́ннаго . сїѧ̀ влⷣкꙋ пᲂзнава́ше , а҆ се́й ѿ влⷣки разлꙋча́шесѧ . сїѧ̀ свᲂбᲂжда́шесѧ , а҆ і҆ꙋ́да ра́бъ быва́ше врагꙋ̀ . ѕло̀ є҆́сть лѣ́нᲂсть , но ве́лїе пᲂкаѧ́нїе . є҆го́же ми да́рꙋй сп҃се , пᲂстрада́выи заны̀ , и҆ спасѝ на́съ . =Ѽ і҆ꙋ́дино ѻ҆каѧ́нство , ви́дѧше блꙋдни́цꙋ цѣлꙋ́ющꙋю стᲂпы̀ , и҆ ᲂу҆мышлѧ́ше ле́стїю преда́нїе лᲂбыза́нїемъ . ѻ҆на̀ вла́сы разрѣшѝ , а҆ се́й ꙗ҆́рᲂстїю свѧза́шесѧ , нᲂсѧ̀ в̾ мѵ́ра мѣ́стѡ ѕлᲂсмра́днꙋ ѕло́бꙋ . за́висть бо недадѧ́ше что̀ и҆зво́лити є҆́же на по́льзꙋ . ѽ і҆ꙋ́дино ѻ҆каѧ́нство , ѿ него́же и҆зба́ви бж҃е дш҃а на́ша . гла́съ , в҃ . Грѣ́шница притечѐ к̾ мѵ́рꙋ , кꙋпи́ти мнᲂгᲂцѣ́ннаго мѵ́ра , пᲂма́зати бл҃гᲂда́телѧ , и҆ мѷрᲂпрᲂда́телю вᲂпїѧ́ше , да́ждь ми мѵ́рѡ , да пᲂма́жꙋ и҆ а҆́зъ , ѡ҆чи́стившаго мᲂѧ̀ всѧ̀ грѣхѝ . вⷤ . гла́съ , ѕ҃ . Дне́сь хрⷭ҇то́съ прихо́дитъ в̾ до́мъ фарисе́ѡвъ , и҆ жена̀ грѣ́шница пристꙋпи́вши к̾ нᲂга́ма , валѧ́шесѧ вᲂпїю́щи . ви́ждь пᲂгрꙋже́нꙋю грѣхѝ ; ви́ждь ненадѣ́ющꙋюсѧ дѣ́лъ ра́ди , и҆ негнꙋша́емꙋю ѿ твᲂеѧ̀ бл҃гᲂсти , но да́ждь ми гдⷭ҇и ѡ҆ставле́нїе ѕлы́хъ , и҆ спаси́ мѧ . Пристꙋпѝ жена̀ ѕлᲂсмра́днаѧ и҆ ѡ҆скверне́на , сле́зы прᲂлива́ющи , и҆ лю́бѧщи тѧ сп҃се , стра́сти и҆спᲂвѣ́дающи , ка́кѡ вᲂзрю̀ к̾ тебѣ̀ влⷣцѣ ; са́мъ бо прише́лъ є҆сѝ спастѝ блꙋдни́цы , и҆ и҆з̾ глꙋбины̀ ᲂу҆ме́ршꙋю мѧ̀ вᲂскресѝ . и҆́же ла́зарѧ вᲂз̾дви́гнꙋвыи и҆́з̾ грᲂба четверᲂдне́вна , прїими́ мѧ ѡ҆каѧ́ннꙋю гдⷭ҇и , и҆ спаси́ мѧ . Прᲂстрѐ блꙋдни́ца вла́сы тебѣ̀ сꙋдїѝ и҆ влⷣцѣ . прᲂстрѐ і҆ꙋ́да рꙋ́цѣ к̾ закᲂнᲂпрестꙋ́пнымъ . ѻ҆́ва ᲂу҆́бѡ прїѧ́тъ ѡ҆ставле́нїе , ѻ҆́въ же прїѧ́тъ сре́бреники . тѣ́мже ти вᲂпїе́мъ , про́данᲂмꙋ и҆ свᲂбᲂди́вшемꙋ на́съ , гдⷭ҇и сла́ва тебѣ̀ . Ненача́емаѧ житїѧ̀ ра́ди , и҆ ᲂу҆вѣ́даннаѧ нра́ва ра́ди , мѵ́рѡ нᲂсѧ́щаѧ , пристꙋпѝ к̾ тебѣ̀ вᲂпїю́щи , не ѿве́рзи менѐ блꙋдни́цꙋ , рᲂди́выисѧ ѿ дв҃ы . непре́зри мᲂи́хъ сле́зъ , ра́дᲂсте а҆́нг҃лѡмъ . но прїими́ мѧ ка́ющꙋюсѧ , є҆ѧ́же не ѿри́нꙋ сᲂгрѣша́ющꙋю гдⷭ҇и , вели́кїѧ ра́ди твᲂеѧ̀ млⷭ҇ти . сла́ва , и҆ ны́нѣ . гла́съ , и҃ . Гдⷭ҇и ꙗ҆́же во мно́зѣхъ грѣсѣ́хъ впа́дшаѧ жена̀ , твᲂѐ ѡ҆щꙋти́вши бжⷭ҇тво̀ , мѷрᲂно́сицъ взе́мши чи́нъ , рыда́ющи мѵ́рѡ тебѣ̀ пре́же пᲂгребе́нїѧ прино́ситъ . ᲂу҆вы̀ мнѣ̀ глаго́лющи , ꙗ҆́кѡ но́щь мнѣ̀ є҆́сть раз̾жже́нїе блꙋда̀ невᲂз̾держа́нна , мра́чно же и҆ без̾лꙋ́ннѡ раче́нїе грѣха̀ . прїимѝ мᲂѧ̀ и҆сто́чники сле́зъ , и҆́же ѻ҆́блаки прᲂи҆з̾вᲂдѧ́и мо́рю во́дꙋ . приклᲂни́сѧ к̾ мᲂи́мъ вᲂздыха́нїемъ срⷣчнымъ , преклᲂни́выи нб҃са̀ , неи҆зрече́ннымъ твᲂи́мъ сни́тїемъ . да ѡ҆блᲂбыжꙋ̀ пречⷭ҇тѣи твᲂѝ но́зѣ , да ѡ҆тры́ю же сїѧ̀ па́ки главы̀ мᲂеѧ̀ власа́ми , и҆́хже в̾ раѝ є҆́вва въ пᲂлꙋ́дне шꙋ́мᲂмъ ᲂу҆ши́ма ѡ҆гласи́вшисѧ , стра́хᲂмъ скры́сѧ . грѣхо́въ мᲂи́хъ мно́жество , и҆ сꙋде́бъ твᲂи́хъ бе́здны кто̀ и҆з̾слѣ́дитъ ; дꙋшеспа́сче сп҃се мо́й , да мѧ̀ твᲂю̀ рабꙋ̀ непре́зриши , и҆́же неи҆зрече́ннꙋю и҆мѣ́ѧи ве́лїю ми́лᲂсть .

вы́хᲂдъ , с̾ є҆ѵⷢ҇а́лїемъ : свѣ́тѣ ти́хїи . прᲂки́менъ . гла́съ , д҃ . и҆спᲂвѣ́дайтесѧ бг҃ꙋ нбⷭ҇нᲂмꙋ , ꙗ҆́кѡ бл҃гъ ꙗ҆́кѡ в̾ вѣ́къ млⷭ҇ть є҆гѡ̀ . сти́хъ : и҆спᲂвѣ́дайтесѧ гдⷭ҇ви гдⷭ҇емъ , ꙗ҆́кѡ в̾ вѣ́къ ми́лᲂсть є҆гѡ̀ .

ѿ и҆схо́да чте́нїе .

Во́ дни ѻ҆́ны вели́къ бы́въ мѡѷсе́й , и҆зы́де к̾ бра́тїѧмъ свᲂи́мъ сн҃о́мъ і҆и҃левымъ , разꙋмѣ́въ же бᲂлѣ́знь и҆́хъ , ви́дѣ челᲂвѣ́ка є҆ги́птѧнина бїю́ща нѣ́кᲂегѡ є҆вре́ина , ѿ бра́тїи є҆гѡ̀ сн҃о́въ і҆и҃левыхъ , ѡ҆бᲂзрѣ́вжесѧ сѣ́мѡ и҆ ѡ҆ва́мѡ , и҆ неви́дѣ никᲂго́же , и҆ пᲂразѝ є҆ги́птѧнина , и҆ сᲂкры̀ є҆гѡ̀ в̾ песцѣ̀ . и҆з̾ше́дъ же в̾ де́нь втᲂры́и , ви́дѣ два̀ мꙋ́жа є҆вре́ина прѧ́щасѧ , и҆ глаго́ла ѡ҆би́дѧщемꙋ , что̀ ра́ди ты̀ бїе́ши и҆́скренѧго ; ѻ҆́нъ же речѐ є҆мꙋ̀ , кто́ тѧ пᲂста́ви кнѧ́зѧ и҆ сꙋдїю̀ над̾ на́ми , є҆да̀ ᲂу҆би́ти мѧ ты̀ хо́щеши , ꙗ҆́кᲂже ᲂу҆бѝ вчера̀ є҆ги́птѧнина ; ᲂу҆бᲂѧ́жесѧ мѡѷсе́й и҆ речѐ , а҆́ще си́це ꙗ҆вле́нъ бꙋ́детъ глаго́лъ се́й . ᲂу҆слы́шавъ же фараѡ́нъ сѐ , и҆ и҆ска́ше ᲂу҆би́ти мѡѷсе́ѧ . ѿи҆́де же мѡѷсе́й ѿ лица̀ фараѡ́нᲂва , и҆ всели́сѧ в̾ землѝ мадїа́мстѣй . прише́дъ же в̾ зе́млю мадїа́мскꙋ , сѧ́де при кла́дези . жерцꙋ́ же мадїа́мскꙋ , бѣ́ша се́дмь дще́рей , пасꙋ́ще ѻ҆́вцы ѻ҆ц҃а свᲂегѡ̀ і҆ѡѳо́ра , прише́дше же че́рпахꙋ во́ды , до́ндеже напо́лниша кᲂры́та , напᲂи́ти ѻ҆́вцы ѻ҆ц҃а свᲂегѡ̀ . прише́дше же па́стыри , и҆з̾гна́ша ѧ҆̀ . вᲂста́въ же мѡѷсе́й и҆ и҆зба́ви и҆́хъ , и҆ напᲂѝ ѻ҆́вцы и҆́хъ . прїидо́ша же к̾ рагꙋ́йлꙋ ѻ҆ц҃ꙋ свᲂемꙋ̀ , се́й же речѐ и҆́мъ , что̀ ꙗ҆́кѡ ᲂу҆скᲂри́сте прїитѝ дне́сь ; сїѧ́же реко́ша , чл҃къ є҆ги́птѧнинъ и҆зба́ви на́съ ѿ па́стырей , и҆ начерпа̀ на́мъ и҆ напᲂѝ ѻ҆́вцы на́ша . се́й же речѐ ко дще́ремъ свᲂи́мъ и҆ гдѣ̀ є҆́сть , в̾скꙋ́ю си́це ѡ҆ста́висте чл҃ка ; зᲂви́те ᲂу҆́бѡ є҆гѡ̀ , ꙗ҆́кѡ да ꙗ҆́стъ хлѣ́бъ . всели́жесѧ мѡѷсе́й ᲂу҆ чл҃ка . и҆ и҆з̾дадѐ сепфо́рꙋ дще́рь свᲂю̀ мѡѷсе́ю в̾ женꙋ̀ . во ᲂу҆тро́бѣ же заче́нши жена̀ , и҆ рᲂдѝ сн҃а . мѡѷсе́й же наречѐ и҆́мѧ є҆мꙋ̀ гирса́мъ , гл҃ѧ , ꙗ҆́кѡ пришле́цъ є҆́смь в̾ землѝ чꙋжде́й . и҆́мѧ же втᲂро́мꙋ наречѐ є҆лїеза́ръ . бг҃ъ бо ѻ҆ц҃а мᲂегѡ̀ пᲂмо́щникъ мнѣ̀ , и҆ и҆зба́ви мѧ и҆з̾ рꙋкѝ фараѡ́нᲂвы .

прᲂки́менъ . гла́съ , д҃ . гдⷭ҇и млⷭ҇ть твᲂѧ̀ во́ вѣки , и҆ дѣ́ла рꙋ́къ твᲂи́хъ непре́зри . сти́хъ : и҆спᲂвѣ́мсѧ тебѣ̀ гдⷭ҇и всѣ́мъ срⷣцемъ мᲂи́мъ .

ѿ і҆́ѡва чте́нїе .

Бы́сть ꙗ҆́кѡ де́нь се́й , и҆ прїидо́ша а҆́нг҃ли бж҃їи пред̾ста́ти пре́д̾ гдⷭ҇емъ , и҆ дїа́вᲂлъ пᲂсредѣ̀ и҆́хъ . и҆ речѐ гдⷭ҇ь ко дїа́вᲂлꙋ , ѿкꙋ́дꙋ ты̀ прїи́де ; рече́ же дїа́вᲂлъ пре́д̾ гдⷭ҇емъ , прᲂше́дъ пᲂд̾небе́снꙋю , и҆ ѡ҆бше́дъ зе́млю , прїидо́хъ . и҆ речѐ гдⷭ҇ь ко дїа́вᲂлꙋ , внѧ́тъ ли рабꙋ̀ мᲂемꙋ̀ і҆́ѡвꙋ , ꙗ҆́кѡ нѣ́сть прѧ́мѡ є҆мꙋ̀ ѿ сꙋ́щихъ на землѝ , чл҃къ пᲂдо́бенъ є҆мꙋ̀ , непᲂро́ченъ , пра́веденъ , и҆́стиненъ , бл҃гᲂчести́въ ѿгреба́ѧсѧ ѿ всѧ́кагѡ ѕла̀ , и҆ є҆ще́ же держи́тсѧ неѕло́бїѧ . ты́ же речѐ и҆мѣ́нїѧ є҆гѡ̀ пᲂгꙋби́ти вᲂтщѐ . ѿвѣща́въ же дїа́вᲂлъ ко́ гдⷭ҇ꙋ и҆ речѐ , ко́жа за ко́жꙋ , и҆ всѧ̀ є҆ли́ка и҆́мать чл҃къ да́стъ за́ дш҃ꙋ свᲂю̀ , не ᲂу҆́бо же . но пᲂслѝ рꙋ́кꙋ свᲂю̀ , и҆ кᲂсни́сѧ пло́ти є҆гѡ̀ и҆ кᲂсте́хъ є҆гѡ̀ , и҆ а҆́ще не всѧ́кѡ в̾ лице́ тѧ бл҃гᲂслᲂви́тъ ; и҆ речѐ гдⷭ҇ь ко дїа́вᲂлꙋ , сѐ предаю̀ тебѣ̀ є҆гѡ̀ , то́чїю дш҃ꙋ є҆гѡ̀ сᲂблюдѝ . и҆зы́де же дїа́вᲂлъ ѿ лица̀ гдⷭ҇нѧ , и҆ ᲂу҆да́ри і҆́ѡва гно́емъ лю́тымъ ѿ нᲂгꙋ̀ да́же и҆ до главы̀ . и҆ взѧ́тъ і҆́ѡвъ чре́пъ , да ѡ҆стрᲂга́етъ сво́й гно́й , и҆ то́й сѣдѧ́ше на гно́ищи внѣ̀ гра́да . вре́мени же мно́гꙋ минꙋ́вшꙋ , речѐ і҆́ѡвꙋ жена̀ є҆гѡ̀ , да́же дᲂко́лѣ терпи́ши , гл҃ѧ ; сѐ ждꙋ̀ вре́мене и҆ є҆щѐ ма́лѡ , ча́ѧ наде́жди спасе́нїѧ мᲂегѡ̀ . се́бо пᲂги́бе твᲂѧ̀ па́мѧть ѿ землѝ , сн҃ᲂве же твᲂѝ и҆ дще́ри , мᲂегѡ̀ чре́ва бᲂлѣ́зни и҆ трꙋды̀ , ѡ҆ ни́хже в̾сꙋ́е трꙋди́хсѧ сᲂꙋси́лїемъ . ты́ же са́мъ в̾ гнᲂѝ и҆ че́рвѣхъ сѣди́ши , ѡ҆бнᲂщева́ѧ внѣ̀ без̾ пᲂкро́ва . и҆ а҆́зъ скита́ющисѧ ꙗ҆́кѡ раба̀ , ѿ мѣ́ста на мѣ́сто прехᲂдѧ́щи , и҆ ѿ хра́мины в̾ хра́минꙋ , ча́ющи кᲂгда̀ сл҃нце за́йдетъ , да пᲂчі́ю ѿ трꙋдо́въ , и҆ ѿ ѡ҆бдержа́щихъ мѧ бᲂлѣ́зней , и҆́же мѧ ны́нѣ ѡ҆бдержа́тъ . но рцы̀ гл҃ъ нѣ́кїи ко́ гдⷭ҇ꙋ и҆ ᲂу҆мрѝ . ѻ҆́нъ же вᲂз̾зрѣ́въ к̾ не́й речѐ , в̾скꙋ́ю ꙗ҆́кѡ є҆ди́на є҆сѝ ты̀ ѿ безꙋ́мныхъ же́нъ сицева́ѧ гл҃аше . а҆́ще бл҃га́ѧ прїѧ́хᲂмъ ѿ рꙋкѝ гдⷭ҇ни , ѕлы́хъ ли несте́рпимъ . ѡ҆ си́хъ всѣ́хъ приключи́вшихсѧ є҆мꙋ̀ , несᲂгрѣшѝ і҆́ѡвъ , ни вᲂꙋстна́хъ свᲂи́хъ . и҆ недадѐ безꙋ́мїѧ бг҃ꙋ .

та́же , да́сѧ и҆спра́витъ мᲂли́тва .= є҆ѵⷢ҇а́лїе , ѿ матѳе́ѧ . заⷱ҇ , р҃и .= и҆ про́чаѧ , пре́же сщ҃е́нныхъ . и҆ тᲂмꙋ̀ пи́санъ ᲂу҆ка́зъ в̾ вели́кїи пᲂнлⷣникъ .

Во ст҃ꙋ́ю и҆ вели́кꙋю сре́дꙋ , па́вечерницꙋ пᲂе́мъ вели́кꙋю съ пᲂкло́ны . на не́йже пᲂе́мъ , трипѣ́снецъ , твᲂре́нїе ки́ръ а҆ндре́ѧ кри́тскагѡ .= і҆рмо́съ , по вⷤ . трᲂпарѝ , на́ і҃ . и҆ пᲂслѣдѝ і҆рмо́съ ѻ҆́ба ли́ка в̾кꙋ́пѣ . гла́съ , ѕ҃ . пѣ́снь , д҃ . і҆рмо́съ .= Оу҆слы́шавъ же прⷪ҇ркъ прихо́дъ тво́й гдⷭ҇и , и҆ ᲂу҆бᲂѧ́хсѧ , ꙗ҆́кѡ хо́щеши ѿ дв҃ы рᲂди́тисѧ , и҆ чл҃кѡмъ ꙗ҆ви́тисѧ , и҆ гл҃аше , ᲂу҆слы́шахъ слꙋ́хъ тво́й и҆ ᲂу҆бᲂѧ́хсѧ , сла́ва си́лѣ твᲂе́й .

запѣ́въ : Сла́ва тебѣ̀ бж҃е на́шъ , сла́ва тебѣ̀ . Го́рница пᲂстла́ннаѧ прїѧ́тъ тѧ ᲂу҆чи́телѧ со ᲂу҆ченикѝ , и҆ тꙋ̀ па́схꙋ скᲂнча́лъ є҆сѝ , и҆ тꙋ̀ сᲂдѣ́ла та́инство . та́мо бо двѣма̀ по́сланᲂма ᲂу҆ченико́ма твᲂи́ма , па́сха ᲂу҆гᲂто́вати тебѣ̀ . И҆ди́те ко ѻ҆́нъсицѣ , всѧ̀ вѣ́дыи пред̾глаго́летъ а҆пⷭ҇лѡмъ . и҆ бл҃же́нъ є҆́сть , и҆́же мо́жетъ вѣ́рнѡ прїѧ́ти гдⷭ҇а . го́рницꙋ ᲂу҆́бѡ срⷣце пред̾ ᲂу҆гᲂто́вавъ , ве́черю же бл҃гᲂче́стїе . Ве́черю на го́рницѣ пᲂсла́лъ є҆сѝ ᲂу҆гᲂто́вати ᲂу҆ченикѝ свᲂѧ̀ , и҆́же тва́ри сы́и невмѣсти́мъ , и҆ чл҃кѡмъ непᲂсти́жимъ . гл҃аше , и҆ди́те и҆ ᲂу҆гᲂто́вите ми па́схꙋ ꙗ҆́сти , ю҆́же вᲂжделѣ́хъ . Нра́въ сребрᲂлю́бїѧ , и҆ ѻ҆́бразъ тво́й лꙋка́вствїѧ и҆спо́лнь , безꙋ́мныи і҆ꙋ́до . в̾вѣ́ренъ бо бы́въ є҆ди́нъ кᲂвче́жцꙋ , всѧ́кѡ непреклᲂни́лъ є҆сѝ к̾ млрⷭ҇дїю , но затвᲂри́лъ є҆сѝ жесто́кагѡ твᲂегѡ̀ се́рдца ᲂу҆тро́бꙋ , преда́въ є҆ди́нагѡ бл҃гᲂꙋтро́бнагѡ . Вᲂста́въ ѿ ве́чери , и҆ ле́нтїемъ чресла̀ свᲂѧ̀ препᲂѧ́савъ , вᲂѡ҆бража́ѧ без̾мѣ́рнᲂе смире́нїе всебл҃гі́и гдⷭ҇и . и҆ гл҃аше ᲂу҆ченико́мъ свᲂи́мъ , ꙗ҆́кᲂже ви́дите , та́кѡ твᲂри́те при́снѡ , ꙗ҆́же ви́дѣсте дне́сь . И҆́же всѧ̀ настᲂѧ́щаѧ и҆ бꙋ́дꙋщаѧ , и҆ време́нъ прихᲂдѧ́щаѧ вѣ́дыи . пред̾вѣ́дѧше и҆ хᲂтѧ́щаго преда́ти тѧ̀ . и҆ гл҃аше , є҆ди́нъ ѿ ᲂу҆чени́къ хо́щетъ преда́ти мѧ̀ без̾зако́нникѡмъ , є҆ди́нагѡ без̾грѣ́шнагѡ . Цѣлᲂва́нїе и҆спо́лнено льстѝ , є҆́же ра́дꙋисѧ со ѻ҆рꙋ́жїемъ льсти́выи і҆ꙋ́до , ꙗ҆зы́кѡмъ прᲂвѣщава́еши , ꙗ҆́же къ є҆дине́нїю , нра́вᲂмъ же жела́еши ко ѿстᲂѧ́нїю , преда́ти мѧ крᲂвᲂпрᲂли́тникѡмъ бл҃гᲂда́телѧ , ле́стїю пᲂꙋчи́лсѧ є҆сѝ . Лᲂбыза́еши , и҆ предае́ши і҆ꙋ́до , цѣлꙋ́еши и҆ нестыди́шисѧ , ле́стїю прите́къ . кто̀ ненави́дѧ лᲂбза́етъ треѻ҆каѧ́нне ; кто̀ любѧ̀ прᲂдае́тъ на цѣнѣ̀ . цѣлᲂва́нїе твᲂѐ несты́дно , ѕлᲂсᲂвѣ́тїѧ ѡ҆блича́етъ негᲂдᲂва́нїе . Нра́въ бг҃ᲂꙋбі́ицъ , съ преда́нїемъ сребрᲂлю́бїѧ смѣси́сѧ . ѻ҆́въ ᲂу҆́бѡ ко ᲂу҆бїе́нїю вᲂѡ҆рꙋжи́сѧ , ѻ҆́въ же ко ѿчаѧ́нїю веде́тъ ᲂу҆давле́нїѧ , и҆ раска́ѧнїю . тᲂгда̀ раз̾сꙋди́лъ є҆сѝ ѕлѣ̀ , и҆ жи́ти лиши́лсѧ є҆сѝ . сла́ва . Нераз̾дѣ́льна тѧ сꙋщество́мъ , и҆ неслїѧ́нна ли́цы бг҃ᲂсло́вѧ тѧ , трⷪ҇ческᲂе є҆ди́но бжⷭ҇тво̀ , ꙗ҆́кѡ є҆ди́но црⷭ҇твено и҆ сᲂпресто́льно , вᲂпїю̀ тебѣ̀ пѣ́снь вели́кꙋю , и҆́же в̾ вы́шнихъ трегꙋ́бѡ вᲂспѣва́емꙋю . и҆ ны́нѣ , боⷢ҇ . Зача́тїе па́че сло́ва , и҆ ржⷭ҇тво́ ти па́че є҆стества̀ бг҃ᲂрᲂди́тельнице . ѻ҆́вᲂе ᲂу҆́бѡ ѿ дх҃а без̾сѣ́мене , сїе́ же зако́нᲂвъ є҆стества̀ ᲂу҆таѧ́щеесѧ , ꙗ҆́кѡ нетлѣ́нно , и҆ па́че є҆стества̀ всѧ́кᲂго рᲂже́нїѧ , бг҃ъ бо бѣ̀ рᲂже́исѧ .

катава́сїѧ : Оу҆слы́шавъ же прᲂро́къ .

пѣ́снь , и҃ . і҆рмо́съ . Є҆го́же вѡ́и нбⷭ҇нїи сла́вѧтъ , и҆ трепе́щꙋтъ херꙋви́ми и҆ серафи́ми , всѧ́кѡ дыха́нїе и҆ тва́рь , по́йте бл҃гᲂслᲂви́те , и҆ превᲂзнᲂси́те є҆гѡ̀ во́ вѣки . Зако́ннᲂе скᲂнча́въ пᲂвелѣ́нїе , и҆́же скрижа́ли зако́нныѧ написа́выи в̾ сина́и . снѣдѐ ᲂу҆́бѡ па́схꙋ , ꙗ҆́же дре́вле сѣно́внꙋ , бы́сть же па́сха та́йнаѧ жива̀ же́ртва . по́йте бл҃гᲂслᲂви́те , и҆ превᲂзнᲂси́те є҆гѡ̀ во́ вѣки . Смири́сѧ на́съ ра́ди бᲂга́тыи , с̾ ве́чери вᲂста́въ , ле́нтїи вᲂспрїе́мъ , си́мъ препᲂѧ́салсѧ є҆сѝ , и҆ прекло́нь вы́ю , ѡ҆мы́лъ є҆сѝ но́зѣ ᲂу҆ченико́мъ , и҆ преда́телю . Є҆ди́нъ ѿ ва́съ ле́стїю преда́стъ мѧ , є҆вре́ѡмъ про́давъ в̾ но́щь сїю̀ , сѐ хрⷭ҇то́съ и҆зре́къ , смꙋща́ше дрꙋ́ги . тᲂгда̀ є҆ди́нъ по є҆ди́нᲂмꙋ недᲂвѣ́дыи кᲂлеба́шесѧ . Оу҆чени́къ є҆го́же люблѧ́ше гдⷭ҇ь , на пе́рси вᲂз̾ле́гъ речѐ є҆мꙋ̀ , кто̀ є҆́сть предаѧ́и тѧ , хрⷭ҇то́съ же речѐ к̾ немꙋ̀ , сѐ влᲂжи́выи в̾ сᲂли́ло рꙋ́кꙋ . Оу҆чени́къ хлѣ́бъ прїе́мыи , хлѣ́бᲂмъ ѿлꙋча́етсѧ . прᲂда́ти пᲂꙋча́ѧсѧ , тече́тъ ко і҆ꙋде́ѡмъ , вᲂпїе́тъ без̾зако́ннымъ , что́ ми хо́щете да́ти , и҆ а҆́зъ ва́мъ преда́мъ є҆гѡ̀ . Па́че ᲂу҆ма̀ и҆ несказа́нно ра́зꙋмꙋ высᲂтѣ̀ твᲂе́й і҆с҃е , кто̀ не ᲂу҆диви́тсѧ ; ꙗ҆́кѡ бре́нїю пред̾ста́лъ є҆сѝ , сᲂдѣ́телю всѧ́ческимъ . ᲂу҆мыва́ѧ ᲂу҆́бѡ но́ги , ѡ҆тира́ѧ же ле́нтїемъ . бл҃гᲂслᲂви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Без̾нача́льне ѻ҆́ч҃е , сн҃е сᲂбез̾нача́льне , сло́ве бж҃їи рᲂди́телѧ ѻ҆ц҃а без̾нача́льна свѣ́те , и҆ ᲂу҆тѣ́шителю бл҃гі́и , дш҃е пра́выи , живы́и и҆ зи́ждѧи , трⷪ҇це є҆ди́нице пᲂми́лꙋй мѧ̀ . и҆ нн҃ѣ , боⷢ҇ . И҆зба́ви на́съ і҆с҃е сп҃се на́шъ , ѿ ле́сти лꙋка́вагѡ и҆ напа́сти . прїимѝ бцⷣꙋ мᲂлѧ́щꙋсѧ непреста́ннѡ . мт҃и бо є҆́сть и҆ мо́жетъ тѧ ᲂу҆мᲂли́ти .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . Є҆го́же вѡ́и нбⷭ҇нїи .= [пᲂкло́н̾ до землѝ] .=

пѣ́снь , ѳ҃ . і҆рмо́съ . Без̾сѣ́менно зача́тїе , и҆ ржⷭ҇тво̀ несказа́нно , и҆ мт҃ре без̾мꙋ́жныѧ без̾ тлѝ прижи́тїе . бж҃їе бо ржⷭ҇тво̀ ѡ҆бнᲂвлѧ́етъ є҆стество̀ . тѣ́мже тѧ̀ всѝ ро́ди бг҃ᲂневѣ́стнꙋю мт҃рь правᲂсла́вно велича́емъ . Вели́кᲂе та́инство твᲂегѡ̀ вᲂчл҃ченїѧ , на́ вечери вᲂз̾лежа́щꙋ ти , ᲂу҆ченико́мъ свᲂи́мъ гдⷭ҇и , ѿкры́въ ре́клъ є҆сѝ , ꙗ҆ди́те хлѣ́бъ жи́зненыи , сѐ є҆́сть тѣ́ло мᲂѐ и҆ кро́вь нетлѣ́нныѧ жи́зни . Сѣ́нь нбⷭ҇наѧ ꙗ҆ви́сѧ го́рница , и҆дѣ́же па́схꙋ хрⷭ҇то́съ сᲂвершѝ , и҆ ве́черю без̾кро́внꙋ и҆ слᲂве́снꙋ слꙋ́жбꙋ . трапе́за же сꙋ́щихъ тꙋ̀ , сᲂверше́ныхъ та́инъ , мы́сленыи же́ртвеникъ . Па́сха хрⷭ҇то́съ є҆́сть вели́каѧ и҆ всечестна́ѧ , снѣде́нъ бы́сть ꙗ҆́кѡ хлѣ́бъ , закла́вжесѧ ꙗ҆́кѡ ѻ҆вча̀ . то́й бо вᲂзнесе́сѧ ѡ҆ на́съ же́ртва , тᲂгѡ̀ тѣ́лꙋ бл҃гᲂче́стнѡ , и҆ тᲂгѡ̀ кро́ви всѝ та́йнѡ причаща́емсѧ . Хлѣ́бъ бл҃гᲂслᲂви́въ , хлѣ́бъ нбⷭ҇ныи сы́и , и҆ сказа́въ ѡ҆ ѻ҆ц҃ѣ̀ рᲂди́тели , прїе́мыи ча́шꙋ ᲂу҆ченико́мъ даѧ́ше , прїими́те и҆ ꙗ҆ди́те вᲂпїѧ̀ , вѣ́рᲂю пі́ите кро́вь , и҆злїѧ́вшꙋюсѧ кᲂпїе́мъ и҆з̾ ре́бръ . А҆ми́нь гл҃ю речѐ , ро́ждїѧмъ винᲂгра́да , а҆пⷭ҇лѡмъ хрⷭ҇то́съ и҆́стина , ѿсе́лѣ не и҆спїю̀ , ѿ ло́знагѡ питїѧ̀ , до́ндеже пїю̀ но́во в̾ сла́вѣ ѻ҆ц҃а мᲂегѡ̀ , с̾ ва́ми наслѣ́дники мᲂи́ми . Рꙋ́цѣ прᲂсте́рлъ є҆сѝ , и҆́маже хлѣ́бъ прїима́ше нетлѣ́нїѧ , прїѧ́ти сре́бреники , ᲂу҆ста̀ к̾ цѣлᲂва́нїю принᲂсѧ̀ льсти́внѡ , и҆́ми же тѣ́ло честно́е и҆ кро́вь прїѧ́тъ . но го́ре тебѣ̀ ꙗ҆́кᲂже речѐ хрⷭ҇то́съ . Хрⷭ҇то́съ ꙗ҆дѧ́ше ми́ръ нбⷭ҇ныи , пред̾лᲂжи́сѧ ꙗ҆́кѡ хлѣ́бъ . прїидѣ́те ᲂу҆́бѡ хрⷭ҇тᲂлю́бцы , бре́нными ᲂу҆сты̀ и҆ чи́стыми срⷣцы̀ , прїи́мемъ вѣ́рнѡ жрꙋ́щагѡ па́схꙋ , в̾ на́съ сщ҃ен нᲂдѣ́йствꙋемꙋю . сла́ва . Трⷪ҇цѣ є҆динᲂсꙋ́щнаѧ , є҆ди́нице трисᲂста́внаѧ , тебѐ вᲂспѣва́емъ . ѻ҆ц҃а сла́вѧще , и҆ сн҃а велича́юще , и҆ дх҃ꙋ пᲂкланѧ́ющесѧ , є҆ди́нᲂмꙋ є҆стествꙋ̀ вᲂи́стинꙋ , гдⷭ҇ꙋ живᲂтꙋ̀ и҆ жи́зни , црⷭ҇твꙋ бескᲂне́чнᲂмꙋ . и҆ ны́нѣ , боⷢ҇ . Черто́же нбⷭ҇ныи , и҆ невѣ́сто прⷭ҇нѡ дв҃аѧ , є҆ди́на ꙗ҆ви́ласѧ є҆сѝ . бг҃а ᲂу҆́бѡ пᲂнᲂси́вши , ро́ждьши непрело́жнѡ , и҆з̾ тебѐ вᲂплᲂще́нна . тѣ́мже тѧ̀ всѝ ро́ди , ꙗ҆́кѡ бг҃ᲂневѣ́стнꙋю мт҃рь , правᲂвѣ́рно велича́емъ .

задᲂсто́йнѡ : Без̾сѣ́менно зача́тїе . [пᲂкло́н̾ до землѝ] . трⷭ҇то́е , и҆ по ѻ҆́ч҃е на́шъ . кᲂнда́къ , дню̀ . та́же , гдⷭ҇и си́лъ с̾ на́ми . и҆ про́чее ѡ҆бы́чно . и҆ ѿпꙋ́стъ .

Во ст҃ы́и вели́кїи четверто́къ на ᲂу҆́трени , є҆ѯа̀ ѱл҃мы̀ , и҆ є҆ктенїѧ̀ .= та́же ,= а҆ллилꙋ́їѧ , на гла́с̾ , и҃ .= трᲂпа́рь . гла́съ , и҃ . Є҆гда̀ сла́внїи ᲂу҆ченицы̀ , на ᲂу҆мᲂве́нїи ве́чери прᲂсвѣща́хꙋсѧ , тᲂгда̀ і҆ꙋ́да ѕлᲂчести́выи , сребрᲂлю́бїемъ недꙋ́гᲂвавъ ѡ҆мрача́шесѧ . и҆ без̾зако́ннымъ сꙋдїѧ́мъ тебѐ пра́веднагѡ сꙋдїю̀ предае́тъ , ви́ждь и҆мѣ́нїемъ люби́телю , и҆́же си́хъ ра́ди несы́тство стѧжа́вша , и҆ ᲂу҆давле́нїю вда́вшасѧ . бѣжѝ несы́тыѧ дш҃и , и҆́же ᲂу҆чи́телю такᲂва́ѧ сᲂдѣ́ѧвшїѧ , и҆́же ѡ҆ всѣ́хъ бл҃гі́и гдⷭ҇и сла́ва тебѣ̀ . =вⷤ . сла́ва , и҆ ны́нѣ , то́йже . та́же , ѱало́мъ , н҃ .= мл҃твы : спасѝ бж҃е лю́ди свᲂѧ̀ , неглаго́лемъ . Кано́нъ , твᲂре́нїе ки́ръ кᲂзмы̀ , гла́съ , ѕ҃ . і҆рмо́съ , по вⷤ . трᲂпарѝ , на в҃і . пѣ́снь , а҃ . і҆рмо́съ . С=ѣ́ченымъ пресѣ́чено бы́сть , мо́ре чермно́е , вᲂлна́ми пита́емаѧ же , и҆зсшѐ глꙋбина̀ . та́же кꙋ́пно без̾ѡ҆рꙋ́жнымъ бы́вши прᲂше́ствїе , и҆҆ всеѡ҆рꙋ́жнымъ гро́бъ . пѣ́снь же бг҃ꙋ , кра́снаѧ вᲂспѣва́шесѧ , сла́вно бо прᲂсла́висѧ хрⷭ҇то́съ бг҃ъ на́шъ .

запѣ́въ : Сла́ва тебѣ̀ бж҃е на́шъ , сла́ва тебѣ̀ . Всевино́внаѧ и҆ пᲂда́тельнаѧ живᲂтꙋ̀ , без̾чи́сленаѧ мꙋ́дрᲂсть бж҃їѧ , сᲂзда̀ хра́мъ себѣ̀ , ѿ чⷭ҇тыѧ и҆ неи҆скꙋсᲂмꙋ́жныѧ мт҃ре . в̾ цр҃квь бо тѣле́снѡ ѡ҆бо́лксѧ . сла́вно бо прᲂсла́висѧ хрⷭ҇то́съ бг҃ъ на́шъ . Та́йнѡ ᲂу҆ча́ше дрꙋ́ги свᲂѧ̀ , дш҃епита́емꙋю ᲂу҆гᲂто́ваетъ трапе́зꙋ . без̾сме́ртїѧ вᲂи́стинꙋ мꙋ́дрᲂсть бж҃їѧ , и҆ че́рплетъ ча́шꙋ вѣ́рнымъ . тѣ́мъ пристꙋ́пимъ бл҃гᲂче́стнѡ , и҆ вᲂзᲂпїе́мъ , сла́вно бо прᲂсла́висѧ хрⷭ҇то́съ бг҃ъ на́шъ . Оу҆слы́шимъ всѝ вѣ́рнїи , сᲂзыва́ющꙋ с̾ высо́кимъ прᲂпᲂвѣ́данїемъ , несᲂзда́ннꙋю и҆ со є҆сте́ственꙋю премꙋ́дрᲂсть бж҃їю , вᲂпїе́тъ бо вкꙋси́те , и҆ ᲂу҆разꙋмѣ́вше ꙗ҆́кѡ бл҃гъ а҆́зъ є҆́смь , вᲂзᲂпі́йте , сла́вно бо прᲂсла́висѧ хрⷭ҇то́съ бг҃ъ на́шъ . катава́сїѧ : Сѣ́ченымъ пресѣ́чено .

пѣ́снь , г҃ . і҆рмо́съ . Гдⷭ҇ь сы́и всѣ́мъ , и҆҆ зижди́тель бг҃ъ , за сᲂзда́нныхъ без̾стра́стныи ѡ҆бнища́въ , себѐ сᲂедини́въ . и҆҆ па́сха є҆ю́же хᲂтѧ́ше ᲂу҆́мрети , са́мъ себѐ предѝ пᲂжрѐ . ꙗ҆ди́те вᲂпїѧ̀ тѣ́ло мᲂѐ , и҆҆ вѣ́рᲂю ᲂу҆тверди́тесѧ . И҆з̾ба́вительнᲂю всегѡ̀ ро́да чл҃ча , свᲂе́ю , бл҃же свᲂѧ̀ ᲂу҆ченикѝ напᲂи́лъ є҆сѝ , весе́лїѧ ча́шею и҆ напо́лнивъ ю҆̀ . са́мъ бо себѐ сщ҃еннᲂдѣ́йствᲂваше , пі́ите вᲂпїѧ̀ кро́вь мᲂю̀ , и҆ вѣ́рᲂю ᲂу҆тверди́тесѧ . Безꙋ́менъ мꙋ́жъ и҆́же в̾ ва́съ преда́тель , ᲂу҆ченико́мъ си прᲂре́къ сп҃се незло́бивъ , не и҆́мате бо разꙋмѣ́ти всѝ є҆гѡ̀ . и҆ та́кѡ безꙋ́менъ сы́и не и҆́мать ра́зꙋма . ѻ҆ба́че во мнѣ̀ пребꙋ́дите , и҆ вѣ́рᲂю ᲂу҆тверди́тесѧ . катава́сїѧ : Гдⷭ҇ь сы́и всѣ́мъ .

сѣда́ленъ . гла́съ , а҃ . И҆́же є҆зе́ра и҆ и҆сто́чники и҆ мᲂрѧ̀ сᲂтвᲂри́выи , смире́нїю на́съ наказꙋ́ѧ и҆зрѧ́днᲂмꙋ . ле́нтїемъ препᲂѧ́савсѧ , ᲂу҆ченико́мъ но́зѣ ᲂу҆мы̀ , смирѧ́ѧсѧ премно́жествᲂмъ бл҃гᲂꙋтро́бїѧ , и҆ вᲂз̾выша́ѧ на́съ ѿ прᲂпасте́й ѕло́бы , є҆ди́нъ чл҃кᲂлю́бецъ . сла́ва . гла́съ , г҃ . Смирѧ́ѧсѧ за млрⷭ҇дїе , но́зѣ ᲂу҆мы́лъ є҆сѝ ᲂу҆ченико́мъ сѝ гдⷭ҇и , и҆ къ тече́нїю бжⷭ҇твенᲂмꙋ си́хъ напра́вилъ є҆сѝ . непᲂвинꙋ́жесѧ пе́тръ ᲂу҆мы́тисѧ , ѻ҆ба́че бжⷭ҇твенᲂмꙋ пᲂвинꙋ́сѧ пᲂвелѣ́нїю , ѡ҆мыва́емь быва́етъ , и҆ к̾ тебѣ̀ прилѣ́жнѡ мᲂлѧ́сѧ , дарᲂва́ти на́мъ ве́лїю млⷭ҇ть . и҆ ны́нѣ . гла́съ , д҃ . Ꙗ҆ды́и влⷣко со ᲂу҆ченикѝ свᲂи́ми , та́йнѡ пᲂказа́лъ є҆сѝ прест҃ꙋ́ю свᲂю̀ сме́рть , є҆ѧ́же ра́ди ѿ тлѝ и҆зба́вихᲂмсѧ , и҆́же бжⷭ҇твеныѧ твᲂѧ̀ стра́сти чтꙋ́щїи .

пѣ́снь , д҃ . і҆рмо́съ . Прᲂви́дѧ прᲂро́къ та́йны твᲂеѧ̀ неи҆зрече́нныѧ хрⷭ҇тѐ , прᲂвᲂз̾глаша́ше . пᲂлᲂжѝ тве́рдꙋ любо́вь крѣ́пᲂсти ѻ҆́ч҃е ще́дрыи . є҆динᲂро́днаго бо ти сн҃а бл҃гі́и , ѡ҆чи́стника в̾ ми́ръ пᲂсла́лъ є҆сѝ . На́ страсть и҆́же всѣ́мъ и҆з̾ а҆да́ма и҆стᲂчи́вшꙋюсѧ без̾стра́стныи хрⷭ҇тѐ грѧды́и дрꙋго́мъ свᲂи́мъ ре́клъ є҆сѝ , с̾ ва́ми па́схꙋ сїю̀ снѣ́сти вᲂжделѣ́хъ , пᲂне́же є҆динᲂро́днагѡ мѧ ны́нѣ ѡ҆чище́нїе , ѻ҆ц҃ъ в̾ ми́ръ пᲂсла́лъ є҆́сть . Прїи́мъ ча́шꙋ , ᲂу҆ченико́мъ вᲂпїѧ́ше без̾сме́ртне , ѿ плᲂда̀ ло́знагѡ є҆го́же пи́въ , ᲂу҆́же к̾ тᲂмꙋ̀ не пїю̀ с̾ ва́ми . є҆динᲂро́днаго бо мѧ̀ ны́нѣ ѻ҆чи́стника , ѻ҆ц҃ъ в̾ ми́ръ пᲂсла́лъ є҆́сть .= Пи́во но́во па́че слᲂвесѐ , во црⷭ҇твїи мᲂе́мъ речѐ хрⷭ҇то́съ дрꙋго́мъ предѝ и҆спїю̀ , и҆́же ᲂу҆́бѡ бг҃о́мъ бг҃ъ є҆́смь ва́шъ речѐ . є҆динᲂро́днаго бо мѧ̀ ѻ҆чище́нїе , ѻ҆ц҃ъ в̾ ми́ръ пᲂсла́лъ є҆́сть . =катава́сїѧ : Прᲂви́дѧ прᲂро́къ та́йны .

пѣ́снь , є҃ . і҆рмо́съ . Сᲂю́зᲂмъ любвѐ свѧзꙋ́еми а҆пⷭ҇ли , владꙋ́щемꙋ всѣ́ми себѐ хрⷭ҇тꙋ̀ преда́вше , красны̀ но́ги ᲂу҆мыва́хꙋ , бл҃гᲂвѣствꙋ́юще всѣ́мъ ми́ръ . И҆́же неѡ҆держи́мꙋю держа́щаѧ превы́спренюю на вᲂздꙋ́сѣ во́дꙋ , и҆ ꙗ҆́же бе́здны ѡ҆бꙋздава́ющаѧ и҆ мᲂрѧ̀ вᲂстѧзꙋ́ющаѧ бж҃їѧ премꙋ́дрᲂсть , во́дꙋ во ᲂу҆мыва́льницꙋ влива́етъ , но́ги же ᲂу҆мыва́етъ рабо́мъ сѝ влⷣка . Оу҆ченико́мъ пᲂказꙋ́етъ смире́нїѧ ѻ҆́бразъ влⷣка , и҆́же ѻ҆́блаки ѡ҆блага́ѧи нб҃о , препᲂѧсꙋ́етсѧ ле́нтїѡмъ . и҆ преклᲂнѧ́етъ кᲂлѣ́на , рабо́мъ ᲂу҆мыва́ти но́зѣ . є҆мꙋ́же в̾ рꙋцѣ̀ дыха́нїе всѣ́хъ сꙋ́щихъ . катава́сїѧ : Сᲂю́зᲂмъ любвѐ свѧзꙋ́еми .

пѣ́снь , ѕ҃ . і҆рмо́съ . Бе́здна пᲂслѣ́днѧѧ грѣхо́въ ѡ҆бы́де мѧ , и҆҆ вᲂлне́нїѧ ᲂу҆́же нетерпѧ̀ , ꙗ҆́кѡ і҆ѡ́на ко влⷣцѣ вᲂпїю́ ти , и҆з̾ тли́ мѧ вᲂз̾ведѝ . Гдⷭ҇а глаша́ете мѧ ѽ ᲂу҆ченицы̀ и҆ ᲂу҆чи́телѧ , є҆́смь бо сп҃съ , вᲂпїѧ́ше . тѣ́мже пᲂдо́битесѧ ѻ҆́бразꙋ , ꙗ҆́кᲂже мѧ ви́дѣсте . Скве́рны кто̀ не и҆мѣ́ѧ , ѡ҆мы́ти нетре́бꙋетъ но́гꙋ . чи́сти ѽ ᲂу҆ченицы̀ вы̀ є҆стѐ , но не всѝ . часо́мъ бо є҆ди́нѣмъ є҆ди́нъ ѿ ва́съ бѣ́ситсѧ . катава́сїѧ : Бе́здна пᲂслѣ́днѧѧ .

кᲂнда́къ . гла́съ , в҃ . Хлѣ́бъ прїе́мъ в̾ рꙋ́цѣ преда́тель , сᲂкрᲂве́ннѡ ты́ѧ прᲂстира́етъ , и҆ прїе́млетъ цѣ́нꙋ сᲂзда́вшагѡ свᲂи́ма рꙋка́ма чл҃ка . и҆ не и҆спра́вленъ пребы́сть , і҆ꙋ́да ра́бъ и҆ льсте́цъ . и҆́кᲂсъ . Къ та́йнѣй трапе́зѣ со́ страхᲂмъ прибли́жившесѧ всѝ , чи́стыми дш҃а́ми хлѣ́бъ вᲂспрїи́мемъ , пребыва́юще со ᲂу҆чи́телемъ , да ᲂу҆ви́димъ , ка́кѡ ᲂу҆мыва́етъ но́ги ᲂу҆ченико́мъ , и҆ да сᲂтвᲂри́мъ ꙗ҆́кᲂже ви́димъ дрꙋ́гъ дрꙋ́гꙋ пᲂкарѧ́ющесѧ , и҆ дрꙋ́гъ дрꙋ́гꙋ но́зѣ ᲂу҆мыва́юще . хрⷭ҇то́съ бо та́кѡ пᲂвелѣ̀ свᲂи́мъ ᲂу҆ченико́мъ , си́це твᲂри́те . но непᲂслꙋ́ша і҆ꙋ́да ра́бъ и҆ льсте́цъ .

пѣ́снь , з҃ . і҆рмо́съ . Ѻ҆́трᲂцы в̾ вавѷло́нѣ , пе́щи пла́менны не ᲂу҆бᲂѧ́шасѧ . но пᲂсредѝ ѻ҆гнѧ̀ в̾ве́ржени , прᲂхлажда́еми взыва́хꙋ , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ . Пᲂкива́ѧ главо́ю і҆ꙋ́да , ѕлѣ̀ прᲂзрѧ̀ пᲂдвиза́шесѧ , пᲂдо́бна вре́мене и҆скі́и преда́ти , сꙋдїю̀ на ѡ҆сꙋжде́нїе . и҆́же всѣ́хъ є҆́сть гдⷭ҇ь и҆ бг҃ъ ѻ҆ц҃ъ на́шихъ . Са́мъ хрⷭ҇то́съ дрꙋго́мъ сѝ вᲂпїѧ́ше , є҆ди́нъ ѿ ва́съ преда́стъ мѧ . и҆ весе́лїе забы́вше , ско́рбїю и҆ стра́хᲂмъ ѡ҆держи́ми бѧ́хꙋ . кто̀ се́й є҆́сть скажѝ гл҃юще , гдⷭ҇и бж҃е ѻ҆ц҃ъ на́шихъ . И҆́же со мно́ю рꙋ́кꙋ сѝ в̾ сᲂли́ло влᲂжи́выи де́рзᲂстїю , тᲂмꙋ̀ ѻ҆ба́че дᲂбро́ бы вра́тъ жите́йскихъ никᲂли́же прᲂитѝ . се́же ре́къ ꙗ҆влѧ́ше преда́телѧ свᲂегѡ̀ . блгⷭ҇ве́нъ є҆сѝ гдⷭ҇и бж҃е ѻ҆ц҃ъ на́шихъ . катава́сїѧ : Ѻ҆́трᲂцы в̾вавѷло́нѣ .

пѣ́снь , и҃ . і҆рмо́съ . По зако́нѣ ѻ҆́ч҃и пребл҃же́ннїи в̾ вавѷло́нѣ ю҆́нїи , бѣдꙋ̀ прїе́млюще царю́ющаго небрего́ша , пᲂвелѣ́нїѧ безꙋ́мнагѡ и҆ сᲂвᲂкꙋпле́ннїи , в̾ не́мже неи҆звари́шасѧ ѻ҆гнѝ , держа́щемꙋ дᲂсто́йнѡ вᲂз̾сыла́хꙋ пѣ́снь , гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки . Сᲂѡ҆бѣ́дницы пребл҃же́ннїи , в̾ сїѡ́нѣ съ сло́вᲂмъ претерпѣ́вше а҆пⷭ҇ли , пᲂслѣ́дᲂвахꙋ па́стырю ꙗ҆́кѡ а҆́гньцы . и҆ сᲂвᲂкꙋ́пленїи , є҆го́же неразлꙋчи́шасѧ хрⷭ҇та̀ , бжⷭ҇твенымъ сло́вᲂмъ пита́еми , бл҃гᲂда́рствено вᲂпїа́хꙋ , гдⷭ҇а по́йте дѣ́ла , и҆ превᲂзнᲂси́те є҆гѡ̀ во́ вѣки . Зако́нныѧ любвѐ , ѕлᲂи҆мени́тыи и҆скарїо́тъ во́лею забы́въ , и҆́же но́зѣ ᲂу҆мы́въ , и҆ гᲂто́вѧшесѧ на преда́нїе . и҆ тво́й ꙗ҆ды́и хлѣ́бъ тѣ́ло бжⷭ҇твено , вᲂз̾дви́же ко́въ натѧ̀ хрⷭ҇тѐ . и҆ вᲂпи́ти неразꙋмѣ̀ , гдⷭ҇а по́йте дѣ́ла , и҆ превᲂзнᲂси́те є҆гѡ̀ во́ вѣки . Прїима́ше рѣши́тельнᲂе тѣ́ло прегрѣше́нїемъ , несмы́сленыи , и҆ кро́вь и҆злива́емꙋю за́миръ бжⷭ҇твенꙋю , нестыдѧ́шесѧ пїѧ̀ , ю҆́же прᲂдаѧ́ше на ценѣ̀ . ѡ҆ ѕло́бѣ же ненегᲂдᲂва̀ , и҆ вᲂпи́ти неразꙋмѣ̀ , гдⷭ҇а вᲂспѣва́йте дѣ́ла , и҆ превᲂзнᲂси́те є҆гѡ̀ во́ вѣки .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . По зако́нѣ ѻ҆́ч҃и .= [пᲂкло́н̾ до землѝ] .=

честнѣ́йшꙋю непᲂе́мъ .

пѣ́снь , ѳ҃ . і҆рмо́съ . Стра́нствїѧ влады́чнѧ , и҆ без̾сме́ртнѣй трапе́зѣ , на го́рнѣмъ мѣ́стѣ , высо́кими ᲂу҆мы̀ вѣ́рнїи прїиди́те вᲂспрїи́мемъ вᲂз̾ше́дша сло́ва , ѿ́ слᲂва наꙋ́чшесѧ , є҆го́же велича́емъ . Ꙗ҆ди́те ᲂу҆ченико́мъ сло́во речѐ па́схꙋ на го́рничнѣмъ мѣ́стѣ , є҆ю́же ᲂу҆́мъ ᲂу҆твержа́етсѧ , и҆ се́ю та́йнѡ вᲂди́тельнѡ сᲂтвᲂри́те без̾ква́снымъ и҆́стины сло́вᲂмъ . тве́рдᲂе же бл҃гᲂда́ти велича́йте . Сᲂдѣ́тельницꙋ ѻ҆ц҃ъ пре́жде вѣ́къ премꙋ́дрᲂсть ража́етъ мѧ , в̾ нача́тᲂкъ пꙋте́мъ свᲂи́мъ , в̾ дѣ́ла сᲂзда́ мѧ , ꙗ҆́же ны́нѣ та́йнѡ сᲂверша́ема . сло́во бо несᲂзда́нно сы́и є҆стество́мъ , гла́сы присвᲂѧ́ю си и҆́хже ны́нѣ прїѧ́хъ . Ꙗ҆́кѡ чл҃къ є҆́смь сꙋщество́мъ а҆ не привидѣ́нїемъ . си́це же бг҃ъ є҆́смь нра́вᲂмъ вᲂз̾даѧ́нїѧ . є҆стества̀ сᲂвᲂкꙋпи́вшасѧ во мнѣ̀ , хрⷭ҇та̀ є҆ди́нᲂгѡ в̾ тѣ́хъ мѧ зна́йте . и҆ ꙗ҆́же ѿ ни́хъ , и҆ и҆́же в̾ ни́хъ , и҆́же ᲂу҆́бѡ є҆́смь спаса́ѧи .

катава́сїѧ : Стра́нствїѧ влады́чнѧ .= [пᲂкло́н̾ до землѝ] . свѣти́ленъ . Черто́гъ тво́й ви́жꙋ сп҃се мо́й ᲂу҆кра́шенъ , и҆ ѻ҆де́жды не и҆́мамъ да вни́дꙋ во́нь . прᲂсвѣти́ ми ѡ҆дѣѧ́нїе дш҃и , свѣтᲂда́вче и҆ спаси́ мѧ . =двⷤа . сла́ва , и҆ ны́нѣ , то́йже .

На хвали́тѣхъ , стихѣ́ры , на д҃ . гла́съ , в҃ . Стека́етсѧ ᲂу҆́бѡ про́чее сᲂбо́рище і҆ꙋде́йскᲂе , да сᲂдѣ́телѧ и҆ зижди́телѧ всѧ́ческихъ пила́тꙋ преда́стъ . ѽ без̾зако́нныхъ , ѽ невѣ́рныхъ , ꙗ҆́кѡ грѧдꙋ́щаго сꙋди́ти живы́мъ и҆ ме́ртвымъ , на сꙋ́дъ гᲂто́вѧтъ . и҆сцѣлѧ́ющагѡ стра́сти , к̾ стрⷭ҇ти ᲂу҆страѧ́ютъ . гдⷭ҇и дᲂлгᲂтерпѣли́ве , ве́лїѧ твᲂѧ̀ млⷭ҇ть сла́ва тебѣ̀ .

І҆ꙋ́да без̾зако́нныи , ѡ҆мᲂчи́выи на́ вечери рꙋ́кꙋ в̾ сᲂли́ло с̾ тᲂбо́ю гдⷭ҇и , прᲂстрѐ къ без̾зако́ннымъ рꙋ́цѣ прїѧ́ти сре́бреники . и҆ и҆́же ми́ра пᲂмы́сливыи цѣ́нꙋ , тебѐ бесцѣ́ннагѡ не ᲂу҆бᲂѧ́сѧ прᲂда́ти . и҆́же но́зѣ прᲂстры́и ᲂу҆мы́ти , влⷣкꙋ ѡ҆блᲂбыза̀ льсти́вно , во є҆́же преда́ти без̾зако́ннымъ . ли́ка же а҆пⷭ҇льска ѿве́ргсѧ , и҆ три́десѧть пᲂве́ргъ сре́бреники , твᲂѐ тридне́внᲂе вᲂскрⷭ҇нїе невѣ́дѣ , є҆го́же ра́ди пᲂми́лꙋй на́съ .

І҆ꙋ́да преда́тель льсти́въ сы́и , льсти́внымъ лᲂбза́нїемъ предадѐ сп҃са и҆ гдⷭ҇а , и҆ влⷣкꙋ всѧ́ческимъ . и҆ ꙗ҆́кѡ раба̀ бѣжа́ща прᲂдадѐ і҆ꙋде́ѡмъ . ꙗ҆́кѡ ѻ҆вча̀ на закᲂле́нїе , та́кѡ пᲂслѣ́дᲂваше а҆́гнецъ бж҃їи , сн҃ъ ѻ҆́ч҃ь , є҆ди́нъ мнᲂгᲂмлⷭ҇тивыи .

І҆ꙋ́да ра́бъ и҆ льсте́цъ , ᲂу҆чени́къ сы́и и҆ навѣ́тникъ , и҆ дрꙋ́гъ дїа́вᲂль ѿ дѣ́лъ ꙗ҆ви́сѧ . пᲂслѣ́дᲂваше бо ᲂу҆чи́телю , и҆ на́нь пᲂꙋча́шесѧ на преда́нїе , гл҃аше в̾ себѣ̀ , преда́мъ сегѡ̀ и҆ прїѡ҆брѧ́щꙋ и҆мѣ́нїѧ . и҆ска́ше же и҆ ми́рꙋ про́данꙋ бы́ти , и҆ і҆с҃а ле́стїю ꙗ҆́ти , ѿда́стъ цѣлᲂва́нїе и҆ преда́стъ хрⷭ҇та̀ . и҆ ꙗ҆́кѡ ѻ҆вча̀ на закᲂле́нїе , та́кѡ пᲂслѣ́дᲂваше а҆́гнецъ бж҃їи , є҆ди́нъ млрⷭ҇дъ и҆ чл҃кᲂлю́бецъ .

сла́ва , и҆ нн҃ѣ . гла́съ , то́йже . Є҆го́же прᲂпᲂвѣ́да а҆́гньца и҆са́їѧ грѧде́тъ на закᲂле́нїе во́льнᲂе , и҆ плещѝ дае́тъ на ра́ны , и҆ лани́ты на ᲂу҆даре́нїе , лице́ же не ѿвратѝ ѿ стꙋда̀ заплева́нїѧ . сме́ртїю же без̾ѡ҆бра́знᲂю ѡ҆сꙋжа́етсѧ . всѧ̀ без̾грѣ́шныи во́лею прїе́млетъ , да всѣ́мъ да́рꙋетъ є҆́же и҆з̾ ме́ртвыхъ вᲂскрⷭ҇нїе .

На стихо́внѣ , стихѣ́ры . гла́съ , и҃ . Дне́сь и҆́же на хрⷭ҇та̀ лꙋка́вныи сᲂбра́сѧ сᲂбо́ръ , и҆ на́нь тще́тнаѧ сᲂвѣ́тᲂваше , преда́ти пила́тꙋ на сме́рть непᲂви́ннагѡ . дне́сь и҆мѣ́нїемъ ᲂу҆да́вꙋ і҆ꙋ́да себѣ̀ ѡ҆блага́етъ , и҆ лиша́етсѧ ѡ҆бᲂю́дꙋ жи́зни вре́менныѧ и҆ бжⷭ҇твеныѧ . дне́сь каїа́фа нево́лею прᲂро́чествꙋетъ , лꙋ́чше є҆́сть гл҃ѧ є҆ди́нᲂмꙋ ᲂу҆́мрети за́ люди . прїи́де бо грѣ́хъ ра́ди на́шихъ пᲂстрада́ти , да на́съ свᲂбᲂди́тъ ѿ рабо́ты вра́жїѧ , ꙗ҆́кѡ бл҃гъ и҆ чл҃кᲂлю́бецъ .

сти́хъ : ꙗ҆ды́и хлѣ́бъ мо́й ,꙳ вᲂз̾вели́чи на мѧ̀ ле́сть . Дне́сь і҆ꙋ́да нищелю́бїѧ скрыва́етъ лицѐ , и҆ лихᲂи́мства ѿкрыва́етъ ѻ҆́бразъ . не к̾ тᲂмꙋ̀ ѡ҆ ни́щихъ пече́тсѧ . не к̾ тᲂмꙋ̀ мѵ́рѡ прᲂдае́тъ грѣ́шныѧ , но нбⷭ҇нᲂе мѵ́рѡ , и҆ ѿ негѡ̀ ᲂу҆кра́даетъ сре́бреники . и҆ течѐ ко і҆ꙋде́ѡмъ , гл҃ѧ , закᲂнᲂпрестꙋ́пнымъ , что́ ми хо́щете да́ти , и҆ а҆́зъ ва́мъ преда́мъ є҆гѡ̀ ; ѽ сребрᲂлю́бїѧ рачи́телю . ᲂу҆до́бнꙋ кꙋ́плю твᲂри́ши ра́зꙋмꙋ кꙋпꙋ́ющимъ , что̀ непрᲂдае́магѡ кꙋ́плю твᲂри́ши . нескꙋ́пъ к̾ цѣнѣ̀ ꙗ҆влѧ́ѧсѧ , но ꙗ҆́кѡ раба̀ бѣжа́ща прᲂдае́ши . ѻ҆бы́чай бо кра́дꙋщимъ пᲂмета́ти сщ҃е́ннаѧ . ны́нѣ пᲂве́рже ст҃а́ѧ ѱо́мъ ᲂу҆чени́къ . бѣсᲂва́нїе бо сребрᲂлю́бїѧ , на свᲂегѡ̀ влⷣкꙋ бѣси́тисѧ сᲂтвᲂрѝ є҆гѡ̀ . є҆го́же и҆скꙋше́нїѧ бѣжи́мъ , зᲂвꙋ́ще , дᲂлгᲂтерпѣли́ве гдⷭ҇и сла́ва тебѣ̀ .

сти́хъ : и҆схᲂжда́ше во́нъ ,꙳ и҆ глаго́лаше в̾кꙋ́пѣ . Да никто́же ѽ вѣ́рнїи , влⷣчни ве́чери не неприча́стенъ бꙋ́детъ . и҆ да никто́же ѿ ню́дъ , ꙗ҆́кѡ і҆ꙋ́да лꙋка́выи прибли́житсѧ къ трапе́зѣ . ѻ҆́нъ ᲂу҆́бѡ ᲂу҆крꙋ́хъ взе́мъ , на ѕло́бꙋ ᲂу҆клᲂни́сѧ . ѻ҆́бразᲂмъ сы́и ᲂу҆чени́къ , дѣ́лᲂмъ же гꙋби́тель . со і҆ꙋде́и ᲂу҆́бѡ веселѧ́шесѧ , и҆ со а҆пⷭ҇лы вᲂдвᲂрѧ́шесѧ . ненави́дѧ , лᲂбза́ше , лᲂбыза́ѧ же , предава́ше , и҆скꙋпи́вшаго на́съ ѿ рабо́ты , бг҃а и҆ сп҃са дш҃а́мъ на́шимъ .

сти́хъ : сло́во закᲂнᲂпрестꙋ́пно ,꙳ вᲂз̾лᲂжи́ша на мѧ̀ . Нра́въ тво́й лꙋка́вствїѧ и҆спо́лненъ , без̾зако́нныи і҆ꙋ́до . недꙋ́гꙋѧ бо сребрᲂлю́бїемъ , прїѡ҆брѣ́лъ є҆сѝ чл҃кᲂненавидѣ́нїе . а҆́ще бы бᲂга́тство люби́лъ є҆сѝ , что̀ ко ᲂу҆ча́щемꙋ ѡ҆ нищетѣ̀ прише́лъ є҆сѝ . а҆́ще ли же люби́лъ є҆сѝ є҆гѡ̀ , пᲂчто̀ про́далъ є҆сѝ бесцѣ́ннаго на ᲂу҆бїе́нїе . ᲂу҆бо́йсѧ сл҃нце , вᲂз̾стᲂнѝ землѐ , и҆ движа́щисѧ вᲂзᲂпі́й , неѕло́биве гдⷭ҇и сла́ва тебѣ̀ .

сла́ва . Нра́въ тво́й лꙋка́вствїѧ . и҆ нн҃ѣ . гла́съ , є҃ . Та́инствꙋѧ гдⷭ҇и , ᲂу҆ченикѝ свᲂѧ̀ ᲂу҆ча́ше гл҃ѧ , ѽ дрꙋ́зи , зри́те , да никі́иже ва́съ стра́хъ ѿлꙋчи́тъ ѿ менѐ . а҆́ще бо и҆ стражꙋ̀ , но за́ миръ . нижѐ сᲂблазните́сѧ ѡ҆ мнѣ̀ . не прїидо́хъ бо да пᲂслꙋ́жатъ мѝ , но да пᲂслꙋжꙋ̀ и҆ пᲂлᲂжꙋ̀ дш҃ꙋ свᲂю̀ и҆збавле́нїе за́ миръ . а҆́ще ᲂу҆́бѡ вы̀ дрꙋ́зи мᲂѝ менѐ пᲂдража́ете , и҆ хᲂтѧ́и пе́рвыи бы́ти , да бꙋ́детъ пᲂслѣ́днїи . и҆ влⷣка , ꙗ҆́кѡ слꙋга̀ . пребꙋ́дите ᲂу҆́бѡ во мнѣ̀ , да гро́здъ принесе́те . а҆́зъ бо є҆́смь винᲂгра́дъ живо́тныи .

на а҃ мъ , часѣ̀ . боⷢ҇ , гл҃емъ . что́ тѧ нарече́мъ .= та́же , трᲂпа́рь . гла́съ , г҃ . Заꙋше́нъ бы́въ за́ рᲂдъ чл҃ческїи , и҆ непрᲂгнѣ́вавсѧ . свᲂбᲂдѝ ѿ и҆стлѣ́нїѧ живо́тъ на́шъ гдⷭ҇и , и҆ спасѝ на́съ . =сла́ва , кᲂне́цъ . и҆ ны́нѣ , ве́сь . прᲂки́менъ . гла́съ , д҃ . да разꙋмѣ́ютъ ꙗ҆зы́цы , ꙗ҆́кѡ и҆́мѧ тебѣ̀ гдⷭ҇ь . сти́хъ : бж҃е кто̀ ᲂу҆пᲂдо́битсѧ тебѣ̀ .

ѿ пррⷪ҇чества і҆єремі́ина , чте́нїе .

Гдⷭ҇и скажи́ ми да разꙋмѣ́ю . тᲂгда̀ ви́дѣхъ начина́нїѧ и҆́хъ , а҆́зъ же ꙗ҆́кѡ а҆́гнѧ неѕло́биво ведо́мо на закᲂле́нїе , но разꙋмѣ́хъ , ꙗ҆́кѡ на мѧ̀ пᲂмы́слиша по́мыслъ лꙋка́въ , гл҃юще , прїиди́те и҆ влᲂжи́мъ дре́во в̾ хлѣ́бъ є҆гѡ̀ , и҆ и҆стреби́мъ є҆гѡ̀ ѿ землѝ живы́хъ , и҆ и҆́мѧ є҆гѡ̀ да непᲂмѧне́тсѧ к̾ тᲂмꙋ̀ . гдⷭ҇и си́ламъ и҆́же сꙋ́диши пра́веднѡ , и҆ и҆спыта́ѧ срⷣца̀ и҆ ᲂу҆тро́бы , да ви́жꙋ є҆́же ѿ тебѐ ѿмще́нїе твᲂѐ на ни́хъ , ꙗ҆́кѡ к̾ тебѣ̀ ѿкры́хъ ѡ҆правда́нїе мᲂѐ . сегѡ̀ ра́ди та́кѡ гл҃етъ гдⷭ҇ь к̾ мꙋ́жемъ а҆наѳѡ́ѳскимъ и҆́щꙋщимъ дш҃ꙋ твᲂю̀ , и҆ гл҃ющимъ , не и҆́маши прᲂро́чествᲂвати ѡ҆ и҆́мени гдⷭ҇ни . а҆́ще ли же нѝ , ᲂу҆́мреши в̾ рꙋка́хъ на́шихъ . сегѡ̀ ра́ди та́кѡ гл҃етъ гдⷭ҇ь си́ламъ , сѐ а҆́зъ пᲂсѣщꙋ̀ на ни́хъ , ю҆́нᲂши и҆́хъ ѻ҆рꙋ́жїемъ ᲂу҆́мрꙋтъ , и҆ сн҃ᲂве и҆́хъ и҆ дще́рѧ и҆́хъ скᲂнча́ютсѧ гла́дᲂмъ , и҆ ѡ҆ста́нка небꙋ́дꙋтъ ѿ ни́хъ . занѐ , наведꙋ̀ ѕла́ѧ на живꙋ́щихъ во а҆наѳѡ́ѳѣ , в̾ лѣ́то пᲂсѣще́нїѧ и҆́хъ . пра́веденъ є҆сѝ гдⷭ҇и , ꙗ҆́кѡ ѿвѣща́ю к̾ тебѣ̀ . ѻ҆ба́че сꙋдьбы̀ вᲂз̾глаго́лю к̾ тебѣ̀ . что̀ ꙗ҆́кѡ пꙋ́ть нечести́вымъ спѣ́етсѧ , и҆ дᲂбро̀ є҆́сть всѣ́мъ и҆́же престꙋпа́ютъ и҆ без̾зако́ннѡ дѣ́ютъ . ᲂу҆гᲂбзи́шасѧ всѝ ѿмѣта́ющїи ѿмета́нїѧ . насади́лъ є҆сѝ и҆́хъ , и҆ ᲂу҆кᲂрени́шасѧ . ча́да сᲂтвᲂри́ша , и҆ сᲂтвᲂри́ша пло́дъ . бли́зъ є҆сѝ ты̀ ᲂу҆сто́мъ и҆́хъ , дале́че же ѿ ᲂу҆тро́бъ и҆́хъ . и҆ ты̀ гдⷭ҇и вѣ́си мѧ и҆ ви́дѣлъ мѧ є҆сѝ , и҆ и҆скꙋси́лъ є҆сѝ се́рдце мᲂѐ пред̾ сᲂбо́ю . сᲂберѝ и҆́хъ ꙗ҆́кѡ ѻ҆́вцы на закᲂле́нїе , и҆ ѡ҆чи́сти ѧ҆̀ в̾ де́нь закᲂле́нїѧ и҆́хъ . дᲂко́лѣ вᲂспла́четсѧ всѧ̀ землѧ̀ , и҆ трава̀ всѧ̀ се́льнаѧ и҆́з̾схнетъ , ѿ ѕло́бъ живꙋ́щихъ на не́й . и҆ пᲂгибо́ша ско́ти и҆́хъ и҆ пти́цы , ꙗ҆́кѡ реко́ша , не ᲂу҆́зритъ бг҃ъ пꙋте́й на́шихъ , твᲂѧ́ же но́ги текꙋ́тъ и҆ ѡ҆слабѣ́стасѧ . сᲂбере́тесѧ всѧ̀ ѕвѣ́ри се́льныѧ , и҆ да прїи́дꙋтъ є҆́же снѣ́сти є҆ѧ̀ . па́стырїе мно́зи прᲂсмради́ша винᲂгра́дъ мо́й , и҆ ѡ҆скверни́ша ча́сть мᲂю̀ жела́емꙋю . в̾ пꙋсты́ню же непрᲂхо́днꙋю пᲂлᲂжи́сѧ , и҆ в̾ требле́нїе па́гꙋбы . ꙗ҆́кѡ та́кѡ гл҃етъ гдⷭ҇ь ѡ҆ всѣ́хъ сᲂсѣ́дѣхъ лꙋка́выхъ , и҆ каса́ющихсѧ наслѣ́дїю мᲂемꙋ̀ , є҆́же раздѣли́хъ лю́демъ мᲂи́мъ і҆и҃лю . сѐ а҆́зъ вᲂстерза́ю и҆́хъ ѿ землѝ и҆́хъ . и҆ до́мъ і҆ꙋ́дᲂвъ и҆змꙋ̀ ѿ среды̀ и҆́хъ . и҆ бꙋ́детъ пᲂвнегда̀ и҆зѧ́ти ми и҆́хъ , и҆ вселю̀ и҆́хъ кᲂго́ждо в̾ дᲂстᲂѧ́нїе свᲂѐ , и҆ кᲂго́ждо в̾ зе́млю и҆́хъ .

прᲂки́мен̾ . гла́съ , и҃ . пᲂмᲂли́тесѧ и҆ вᲂз̾дади́те , гдⷭ҇ви бг҃ꙋ на́шемꙋ . сти́хъ : вѣ́дᲂмъ во і҆ꙋде́и бг҃ъ , во і҆и҃ли ве́лїе и҆́мѧ є҆гѡ̀ . про́чаѧ же трѝ часы̀ , пᲂе́мъ по ѻ҆бы́чаю в̾ притво́рѣ во свᲂѐ вре́мѧ . и҆ блаже́нна без̾ пѣ́нїѧ . ѡ҆сла́би ѡ҆ста́ви . ѻ҆́ч҃е на́шъ . и҆ кᲂнда́къ , дню̀ . гдⷭ҇и пᲂми́лꙋй , м҃ . и҆ ѿпꙋ́стъ . ѿ́дне же сегѡ̀ до недѣ́ли ѳѡмины̀ , литі́и за ᲂу҆пᲂко́й в̾ притво́рѣ небыва́ютъ .