Во ст҃ы́и и҆ вели́кїи вто́рникъ , ве́черъ . на гдⷭ҇и вᲂзва́хъ , стⷯры , на́ і҃ . гла́съ , а҃ . Въ свѣ́тлᲂсть ст҃ы́хъ твᲂи́хъ , ка́кѡ вни́дꙋ недᲂсто́йныи ; а҆́ще бо дерзнꙋ̀ вни́ти в̾ черто́гъ , ѡ҆дѣѧ́нїе мѧ̀ ѡ҆блича́етъ , ꙗ҆́кѡ нѣ́сть бра́чно , и҆ свѧ́занъ и҆ и҆згна́нъ бꙋ́дꙋ ѿ а҆́нг҃лъ . тѣ́мже ѡ҆чи́сти гдⷭ҇и скве́рнꙋ дш҃и мᲂеѧ̀ , и҆ спаси́ мѧ ꙗ҆́кѡ чл҃кᲂлю́бец̾ . вⷤ . гла́съ , в҃ . Дш҃е́внᲂю лѣ́нᲂстїю вᲂз̾дрема́всѧ , нестѧжа́хъ женишѐ хрⷭ҇тѐ , гᲂрѧ́ща свѣти́льника и҆́же ѿ дᲂбрᲂдѣ́телей . и҆ дв҃амъ ᲂу҆пᲂдо́бихсѧ бꙋ́имъ , во́ времѧ дѣ́ланїѧ глꙋмѧ́хсѧ прельща́ѧсѧ . млрⷭ҇дїе щедро́тъ твᲂи́хъ незатвᲂри́ ми влⷣко . но ѿтрѧ́съ мᲂѐ ѡ҆мраче́нїе ѿ сна̀ вᲂста́ви млⷭ҇тиве , и҆ с̾ мꙋ́дрыми сᲂчета́й мѧ дв҃ами въ черто́зѣ свᲂе́мъ , и҆дѣ́же гла́съ чи́стъ пра́зднꙋющихъ , и҆ вᲂпїю́щихъ без̾преста́ни , гдⷭ҇и сла́ва тебѣ̀ . вⷤ . гла́съ , д҃ . Скры́вшагѡ тала́нтъ , ѡ҆сꙋжде́нїе ᲂу҆слы́шавши ѽ дш҃е , нескрыва́й слᲂвесѐ бж҃їѧ , но вᲂз̾вѣща́й чꙋдеса̀ є҆гѡ̀ , да ᲂу҆мно́живши да́ръ , вни́деши в̾ ра́дᲂсть гдⷭ҇а свᲂегѡ̀ . вⷤ . гла́съ , ѕ҃ . Женишѐ , и҆́же дᲂбро́тᲂю красе́нъ є҆сѝ па́че всѣ́хъ чл҃къ , призва́выи на́съ къ трапе́зѣ дх҃о́внѣй черто́га твᲂегѡ̀ . ѕлᲂѡ҆бра́зныи мо́й зра́къ прегрѣше́ньми сᲂвлецы̀ , и҆ прича́стїемъ страда́нїй твᲂи́хъ , и҆ ѻ҆де́ждею сла́вы ѡ҆дѣ́ѧвъ твᲂеѧ̀ красᲂты̀ , и҆ сᲂѻ҆́бщника свѣ́тла пᲂкажѝ твᲂегѡ̀ црⷭ҇твїѧ , ꙗ҆́кѡ млрⷭ҇дъ . вⷤ . Прїиди́те вѣ́рнїи , дѣ́лаемъ ᲂу҆се́рднѡ влⷣцѣ . пᲂдᲂба́етъ бо рабо́мъ бᲂга́тство , и҆ по ра́венствꙋ ко́йждо да ᲂу҆сꙋгꙋ́битъ бл҃гᲂда́ти тала́нтъ . ѻ҆́въ ᲂу҆́бѡ мꙋ́дрᲂсть да прино́ситъ дѣ́лы бл҃ги́ми , дрꙋгі́и же слꙋже́бнѣй свѣ́тлᲂсти да прилѣжи́тъ . да прїѡ҆бщи́т̾жесѧ сло́вᲂмъ вѣ́рныи , не навы́кшемꙋ та́йнꙋ . и҆ да раздае́тъ бᲂга́тство ни́щимъ дрꙋгі́и . си́це бо мздꙋ̀ мно́гꙋ ᲂу҆сꙋгꙋ́бимъ , и҆ ꙗ҆́кѡ стрᲂи́телѧ вѣ́рнїи бл҃гᲂда́ти влⷣчни , ра́дᲂсти спᲂдо́бимсѧ . тᲂѧ̀ на́съ спᲂдо́би хрⷭ҇тѐ бж҃е , ꙗ҆́кѡ чл҃кᲂлю́бецъ . гла́съ , з҃ . Сѐ тебѣ̀ тала́нтъ влⷣка пᲂрꙋча́етъ дш҃е мᲂѧ̀ , со́ страхᲂмъ прїимѝ да́ръ , заи́мствꙋй да́вшемꙋ ти , пᲂдава́й ни́щимъ , и҆ сᲂтвᲂрѝ дрꙋ́га гдⷭ҇а , да ста́неши ѡ҆деснꙋ́ю є҆гѡ̀ , є҆гда̀ прїи́детъ в̾ сла́вѣ , и҆ ᲂу҆слы́шиши бл҃же́нныи гла́съ , вни́ди ра́бе в̾ ра́дᲂсть гдⷭ҇а свᲂегѡ̀ . тᲂѧ̀ дᲂсто́йна мѧ̀ сᲂтвᲂрѝ сп҃се заблꙋди́вшаго , вели́кїѧ ра́ди твᲂеѧ̀ млⷭ҇ти . сла́ва , и҆ нн҃ѣ . гла́с̾ , ѕ҃ . Є҆гда̀ прїи́деши во сла́вѣ , со а҆́нг҃льскими си́лами , и҆ сѧ́деши на прⷭ҇то́лѣ і҆с҃е сꙋ́днѣмъ , па́стырю до́брыи не ѿлꙋчѝ менѐ , пꙋти́ бо десны́ѧ вѣ́си , раз̾враще́ни же сꙋ́ть шꙋ́їи . да не ᲂу҆́бѡ с̾ ко́злищи грѣхо́вными пᲂгꙋби́ши менѐ , но съ десны́ми мѧ̀ сᲂчета́й ѻ҆вца́ми , и҆ спаси́ мѧ ꙗ҆́кѡ чл҃кᲂлю́бецъ .

вы́хᲂдъ , с̾ є҆ѵⷢ҇а́лїемъ : свѣ́тѣ ти́хїи . прᲂки́менъ . гла́съ , ѕ҃ . вᲂскрⷭ҇нѝ гдⷭ҇и въ пᲂко́й тво́й , ты̀ кїѡ́тъ ст҃ы́ни твᲂеѧ̀ . сти́хъ : пᲂмѧнѝ гдⷭ҇и дв҃да и҆ всю̀ кро́тᲂсть є҆гѡ̀ .

ѿ и҆схо́да , чте́нїе .

Сни́де дщѝ фараѡ́нᲂва и҆з̾мы́тисѧ на рѣцѣ̀ , и҆ рабы́ни є҆ѧ̀ хᲂжда́хꙋ при рѣцѣ̀ , и҆ ви́дѣвши крабі́ицꙋ в̾ лꙋчи́цѣ , пᲂсла́вши рабы́ню взѧ́ти ю҆̀ . взѧ́тъ же , ви́дѣ ѻ҆трᲂча̀ пла́чꙋщесѧ в̾ крабі́ицѣ , и҆ пᲂщадѝ є҆̀ дщѝ фараѡ́нᲂва , и҆ речѐ , ѿ дѣте́й є҆вре́йскихъ є҆́сть сѐ . и҆ речѐ сестра̀ є҆гѡ̀ , дще́ри фараѡ́нᲂвѣ , хо́щеши ли призᲂвꙋ́ ти женꙋ̀ дᲂи́лицꙋ ѿ є҆вре́й , и҆ вᲂз̾дᲂи́тъ ти ѻ҆трᲂча̀ . и҆ речѐ є҆́й дщѝ фараѡ́нᲂва , и҆дѝ . и҆ ше́дши же ѻ҆трᲂкᲂви́ца , призва̀ ма́терь ѻ҆трᲂча́те . рече́ же к̾ не́й дщѝ фараѡ́нᲂва , сᲂблюди́ ми ѻ҆трᲂча̀ сѐ , и҆ вᲂздо́й ми є҆̀ , а҆́зъ же вᲂзда́мъ ти мздꙋ̀ . взѧ́тъ же ѻ҆трᲂча̀ жена̀ и҆ дᲂѧ́ше є҆̀ . ᲂу҆страби́вшꙋжесѧ ѻ҆трᲂча́ти , и҆ в̾ведѐ є҆̀ ко дще́ри фараѡ́нᲂвѣ , и҆ бы́сть є҆́й в̾ сы́на мѣ́стѡ . и҆ наречѐ и҆́мѧ є҆мꙋ̀ мѡѷсе́й , гл҃ющи , ꙗ҆́кѡ ѿ вᲂды̀ взѧ́хъ є҆гѡ̀ .

прᲂки́мен̾ . гла́с̾ , д҃ . сѐ что̀ дᲂбро̀ и҆лѝ что̀ красно̀ ; но є҆́же жи́ти бра́тїи в̾кꙋ́пѣ . сти́хъ : ꙗ҆́кѡ мѵ́рѡ на главꙋ̀ с̾хᲂдѧ́щее на брадꙋ̀ брадꙋ̀ а҆арѡ́ню .

ѿ і҆́ѡва , чте́нїе .

Бы́сть ꙗ҆́кѡ де́нь се́й , и҆ сн҃ᲂве і҆́ѡвᲂви и҆ дще́ри є҆гѡ̀ ꙗ҆дѧ́хꙋ , и҆ пїѧ́хꙋ вино̀ , в̾ дᲂмꙋ̀ бра́та и҆́хъ старѣ́йшагѡ . и҆ сѐ вѣ́стникъ прїи́де ко і҆́ѡвꙋ , и҆ речѐ є҆мꙋ̀ , сꙋпрꙋ́зи вᲂлѡ́въ ѡ҆рѧ́хꙋ , и҆ ѻ҆сли́цы пасѧ́хꙋсѧ бли́зъ и҆́хъ , и҆ дᲂше́дше плѣнѧ́ющїи и҆ плѣни́ша и҆́хъ , и҆ ѻ҆́трᲂки пᲂрази́ша ѻ҆стрїе́мъ меча̀ , и҆ ѡ҆ста́хъ а҆́зъ є҆ди́нъ , прїидо́хъ вᲂз̾вѣсти́ти тебѣ̀ . И҆ є҆щѐ семꙋ̀ глаго́лющꙋ , прїи́де и҆́нъ вѣ́стникъ ко і҆́ѡвꙋ , и҆ речѐ є҆мꙋ̀ , ѻ҆́гнь спадѐ с̾ небесѐ на́ землю , и҆ пᲂѧдѐ ѻ҆́вцы , и҆ па́стыри сᲂж̾жѐ та́ко же , и҆ ѡ҆ста́хъ а҆́зъ є҆ди́нъ , и҆ прїидо́хъ вᲂз̾вѣсти́ти тебѣ̀ . И҆ є҆щѐ семꙋ̀ глаго́лющꙋ , и҆́нъ вѣ́стникъ прїи́де ко і҆́ѡвꙋ и҆ гл҃а є҆мꙋ̀ , ко́нницы сᲂтвᲂри́ша наны̀ трѝ пᲂлкѝ , и҆ ѡ҆быдо́ша вельбꙋ́ды , и҆ плѣни́ша и҆́хъ , и҆ рабы̀ и҆з̾би́ша ѻ҆рꙋ́жїемъ , и҆ спасо́хсѧ а҆́зъ є҆ди́нъ , и҆ прїидо́хъ вᲂз̾вѣсти́ти тебѣ̀ . И҆ є҆щѐ семꙋ̀ гл҃ющꙋ , и҆́нъ вѣ́стникъ прїи́де глаго́лѧ і҆́ѡвꙋ , сн҃ᲂво́мъ твᲂи́мъ и҆ дще́ремъ твᲂи́мъ ꙗ҆дꙋ́щимъ и҆ пїю́щимъ ᲂу҆ сы́на твᲂегѡ̀ , бра́та и҆́хъ старѣ́йшагѡ , в̾неза́пꙋ дꙋ́хъ вели́къ прїи́де ѿ пꙋсты́ни , и҆ кᲂснꙋ́сѧ четы́ремъ ᲂу҆глѡ́мъ хра́мины , и҆ падѐ хра́мина на дѣ́ти твᲂѧ̀ , и҆ скᲂнча́шасѧ . и҆ спасо́хсѧ а҆́зъ є҆ди́нъ , и҆ прїидо́хъ вᲂз̾вѣсти́ти тебѣ̀ . Такᲂва́ѧ же ᲂу҆слы́шавъ і҆́ѡвъ , вᲂз̾ста́въ растерза̀ ри́зы свᲂѧ̀ , и҆ ѡ҆стрижѐ власы̀ главы̀ свᲂеѧ̀ , и҆ пᲂсы́па пе́рстїю главꙋ̀ свᲂю̀ . и҆ па́дъ ни́цъ пᲂклᲂни́сѧ гдⷭ҇ви , и҆ речѐ , са́мъ а҆́зъ и҆зыдо́хъ на́гъ ѿ́ чрева ма́тере мᲂеѧ̀ , на́гъ и҆ пᲂйдꙋ̀ та́мѡ . гдⷭ҇ь дадѐ , гдⷭ҇ь и҆ взѧ́тъ . ꙗ҆́кѡ гдⷭ҇ꙋ го́дѣ бы́сть , та́кѡ и҆ бы́сть . бꙋ́ди и҆́мѧ гдⷭ҇не бл҃гᲂслᲂве́но во́ вѣки . и҆ ѡ҆си́хъ всѣ́хъ приключи́вшихсѧ є҆мꙋ̀ , несᲂгрѣшѝ і҆́ѡвъ ни во ᲂу҆стна́хъ свᲂи́хъ , и҆ недадѐ безꙋ́мїѧ бг҃ꙋ .

та́же , да́сѧ и҆спра́витъ мᲂли́тва .= є҆ѵⷢ҇а́лїе , ѿ матѳе́ѧ . заⷱ҇ , р҃в .= и҆ про́чаѧ , прежесщ҃е́нныѧ . и҆ тᲂмꙋ̀ пи́санъ ᲂу҆ка́зъ в̾ вели́кїи пᲂнлⷣникъ .

Во ст҃ы́и и҆ вели́кїи вто́рникъ , па́вечерницꙋ пᲂе́мъ вели́кꙋю с̾ пᲂкло́ны . на не́йже пᲂе́мъ , трипѣ́снецъ , твᲂре́нїе ки́ръ а҆ндре́ѧ кри́тскагѡ .= і҆рмо́съ , по вⷤ . трᲂпарѝ , на́ і҃ . пᲂслѣдѝ і҆рмо́съ , ѻ҆́ба ли́ка в̾кꙋ́пѣ . гла́съ , в҃ . пѣ́снь , г҃ . і҆рмо́съ . Н=епло́днагѡ ми ᲂу҆ма̀ , плᲂдᲂно́сна бж҃е ꙗ҆́вствꙋй , дѣ́лателю дш҃а́мъ , и҆ насади́телю бл҃ги́хъ милᲂсе́рдїемъ сѝ .

запѣ́въ : Сла́ва тебѣ̀ бж҃е на́шъ , сла́ва тебѣ̀ . Кᲂнчи́ны вре́мѧ , ѡ҆брати́мсѧ про́чее , хрⷭ҇то́съ ᲂу҆чи́тъ . прїи́детъ бо в̾ско́рѣ , прїи́детъ и҆ не ᲂу҆ме́длитъ , сꙋди́ти ми́рꙋ всемꙋ̀ . Напра́снᲂе свᲂегѡ̀ прише́ствїѧ хрⷭ҇то́съ ꙗ҆влѧ́ѧ речѐ , є҆́же и҆ при нѡ́и дре́вле , ненаде́жныи пᲂто́пъ навестѝ землѝ . Си́мᲂнᲂвъ до́мъ нев̾мѣсти́маго вездѣ̀ , в̾мѣсти́ тѧ і҆с҃е цр҃ю си́ламъ . и҆ жена̀ грѣ́шнаѧ мѵ́рѡмъ тѧ пᲂма́за . Ѿве́рзесѧ черто́гъ , и҆ ᲂу҆краси́сѧ с̾ ни́мъ бжⷭ҇твеныи бра́къ . жени́хъ же бли́зъ , призыва́ѧи на́съ . ᲂу҆гᲂто́вимсѧ про́чее . Нбⷭ҇наѧ пи́ща , а҆́лчꙋщимъ живо́тъ са́мъ сы́и , ꙗ҆́лъ є҆сѝ хрⷭ҇тѐ съ чл҃ки , прᲂѧвлѧ́ѧ с̾ни́тїе свᲂѐ . Бл҃гᲂво́нїѧ та́йны , и҆спо́лнившисѧ жена̀ , пе́рвагѡ и҆зба́вившисѧ смра́да , мно́гихъ сᲂгрѣше́нїй сп҃се . мѵ́ро бо и҆стᲂча́еши жи́зни . Неразꙋ́мныи ᲂу҆чени́къ ѿве́ргсѧ тебѐ хрⷭ҇тѐ , сᲂбо́рище всѐ без̾зако́нныхъ люде́й пᲂд̾виза́етъ натѧ̀ , на преда́нїе ѡ҆бра́щьсѧ . сла́ва . Со ѻ҆ц҃е́мъ сн҃ꙋ , и҆ дх҃ꙋ пра́вᲂмꙋ , є҆ди́нᲂмꙋ є҆стествꙋ̀ пᲂклᲂнѧ́юсѧ , и҆ вᲂспѣва́ю ли́ца раздѣле́на , сꙋщество́мъ же сᲂвᲂкꙋпле́на . и҆ ны́нѣ , боⷢ҇ . Ро́ждьшаѧ тѧ а҆́гница , па́стырѧ и҆ а҆́гньца , при́снѡ мо́литъ тѧ і҆с҃е бж҃е , ѡ҆ всѣ́хъ лю́дехъ вѣ́рꙋющихъ в̾ тѧ̀ .

катава́сїѧ : Непло́днагѡ ми ᲂу҆ма̀ .

пѣ́снь , и҃ . і҆рмо́съ . Въ кꙋпинѣ̀ мѡѷсе́ю дв҃ческᲂе чꙋ́до , на сина́йстѣй гᲂрѣ̀ прᲂѡ҆бра́жшагѡ дре́вле , по́йте бл҃гᲂслᲂви́те и҆҆ превᲂзнᲂси́те є҆гѡ̀ во́ вѣки . Не невѣ́дыи вре́мѧ на́шегѡ скᲂнча́нїѧ держа́и вѣ́ки , де́нь ѻ҆́нъ невѣ́дѣти пред̾речѐ , но предѣ́лъ всѣ́мъ пᲂлᲂжѝ къ смиренᲂмꙋ́дрїю . Дре́вꙋ ᲂу҆пᲂдо́бисѧ , и҆ селꙋ̀ и҆ хра́минѣ , всѐ житїѐ дш҃е мᲂѧ̀ . тѣ́мже стѧжѝ к̾ бг҃ꙋ гᲂто́во срⷣце , да нечто̀ тлѣ́нїемъ пло́ти ѡ҆ста́виши . Є҆гда̀ сѧ́деши сꙋдїѐ , разлꙋча́ѧ , ꙗ҆́кᲂже ре́клъ є҆сѝ па́стырю ѿ ѻ҆ве́цъ , ко́злища сп҃се , стᲂѧ́нїѧ ѻ҆́нᲂгѡ шꙋ́ѧгѡ и҆зба́ви на́съ . нелиши́же на́съ ѡ҆деснꙋ́ю хрⷭ҇тѐ сла́вы твᲂеѧ̀ . Ты̀ є҆сѝ па́сха на́ша , пᲂжре́ныи за всѣ́хъ , ꙗ҆́кѡ а҆́гнецъ и҆ же́ртва , и҆ сᲂгрѣше́нїемъ ѡ҆чище́нїе . и҆ твᲂѧ̀ бжⷭ҇твеныѧ стра́сти превᲂзнᲂша́емъ хрⷭ҇тѐ во́ вѣки . Не с̾ фарисе́ѡмъ сп҃се , ни с̾ си́мᲂнѡмъ спᲂдо́билсѧ є҆сѝ в̾кꙋ́пѣ , во́ храмъ в̾ни́ти . но ᲂу҆́же и҆ мытарѝ в̾кꙋ́пѣ , и҆ блꙋдни́цы , твᲂѐ пᲂчерпа́ютъ милᲂсе́рдїе . Ѽ бл҃же́нныхъ рꙋ́къ , ѽ власо́въ и҆ ᲂу҆сте́нъ цѣлᲂмꙋ́дреныѧ блꙋдни́цы , и҆́миже пᲂма́за сп҃се мѵ́рᲂмъ но́зѣ твᲂѝ , ѡ҆тира́ющи и҆́хъ , и҆ ча́стѡ ѡ҆блᲂбыза́ющи . Вᲂз̾лежа́щꙋ ти ᲂу҆́бѡ сп҃се , с̾ мѵ́рᲂмъ жена̀ пред̾ста́вши , ᲂу҆нᲂгꙋ̀ рыда́ющи , стклѧ́ницꙋ и҆з̾лива́ше на твᲂю̀ главꙋ̀ , без̾сме́ртнагѡ мѵ́ра . Всѧ̀ страда́ти на́съ ра́ди и҆зво́лилъ є҆сѝ во́лею , ѡ҆блᲂбыза́тисѧ и҆ прᲂда́тисѧ . да всѣ́хъ і҆с҃е страстьмѝ свᲂи́ми стра́сти ѡ҆чи́стиши , за чл҃кᲂлю́бїе . Сребрᲂлю́бїѧ жела́ѧ преда́тель і҆ꙋ́да , ѡ҆ и҆з̾лїѧ́вшемсѧ мѵ́рѣ печа́шесѧ . про́чее же ѡ҆ преда́нїи влⷣки , к̾ без̾зако́ннымъ і҆ꙋде́ѡмъ , ѡ҆ цѣнѣ̀ сᲂглаша́шесѧ . бл҃гᲂслᲂви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Со ѻ҆ц҃е́мъ сн҃а и҆ ст҃а́гѡ дх҃а , ст҃ꙋ́ю трⷪ҇цꙋ в̾ бжⷭ҇твѣ̀ є҆ди́нᲂмъ , сла́вимъ вᲂпїю́ще , ст҃ъ , ст҃ъ , ст҃ъ є҆сѝ во́ вѣки . и҆ ны́нѣ , боⷢ҇ . Мл҃твами хрⷭ҇тѐ пречⷭ҇тыѧ ти мт҃ре , и҆ ст҃ы́хъ а҆пⷭ҇лъ , млⷭ҇ти твᲂѧ̀ на́мъ низ̾пᲂслѝ с̾вы́ше , и҆ ми́ръ тво́й пᲂда́ждь лю́демъ твᲂи́мъ .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . Вкꙋпинѣ̀ мѡѷсе́ю .= [пᲂкло́н̾ до землѝ] .=

пѣ́снь , ѳ҃ . і҆рмо́съ . И҆́же па́че є҆стества̀ пло́тїю заче́ншꙋю во́ чревѣ , ѿ ѻ҆ц҃а пре́жде вѣ́къ вᲂз̾сїѧ́вшагѡ сло́ва , в̾ пѣ́снехъ немо́лчныхъ велича́емъ вѣ́рнїи . Дѣ́ланїѧ вре́мѧ , спасе́нїю смᲂтре́нїе , тала́нтъ взе́мши , дре́внїи ѻ҆́бразъ , дш҃е мᲂѧ̀ кꙋпѝ вѣ́чнꙋю жи́знь . Хлѣ́бъ сы́и живо́тныи , снѣда́еши і҆с҃е съ си́мѡнᲂмъ фарисе́ѡмъ , да блꙋдни́ца прїѡ҆брѧ́щетъ , некꙋпи́мꙋю бл҃гᲂда́ть твᲂю̀ , и҆з̾лїѧ́нїемъ мѵ́ра . Пᲂказа́ти хᲂтѧ̀ і҆с҃е , є҆́же па́че є҆стества̀ свᲂѐ смире́нїе всѣ́мъ , снѣ́лъ є҆сѝ в̾ дᲂмꙋ̀ си́мѡнᲂвѣ вечерѧ́въ , а҆́лчꙋщимъ пи́ща . Оу҆вѣ́дѣвши жена̀ , к̾ нᲂга́мъ твᲂи́мъ сп҃се пристꙋпѝ , и҆з̾лива́ше мѵ́рѡ бл҃гᲂꙋха́нїѧ и҆спᲂлнѧ́ющее , и҆ мѵ́ра и҆спᲂлнѧ́ема , дѣ́лᲂмъ ѡ҆чище́нїе прїе́млющи . Рꙋ́цѣ мᲂѝ скверна́вѣ , и҆ ᲂу҆стнѣ̀ льсти́вѣ и҆́мамъ , нечи́сто мᲂѐ житїѐ , растлѣ́ни мᲂѝ ᲂу҆́ди , но ѡ҆сла́би ми и҆ ѡ҆ста́ви , вᲂпїе́тъ блꙋдни́ца хрⷭ҇тꙋ̀ . Бл҃гᲂво́нїѧ не и҆́мамъ , дᲂбрᲂдѣ́тели ника́кᲂже , ꙗ҆́же и҆́мамъ сїѧ̀ тебѣ̀ принесꙋ̀ . да́ждь са́мъ ꙗ҆́же и҆́маши , и҆ ѡ҆сла́би ми и҆ ѡ҆ста́ви , вᲂпїе́тъ блꙋдни́ца хрⷭ҇тꙋ̀ . Рѣка̀ ᲂу҆тебѐ жи́зни , и҆стᲂча́еши бо на́мъ при́снѡ прᲂсвѣще́нїе и҆сцѣле́нїй , и҆ грѣхо́въ ѡ҆чище́нїе . но ѡ҆сла́би ми и҆ ѡ҆ста́ви , вᲂпїе́тъ блꙋдни́ца хрⷭ҇тꙋ̀ . Мѵ́рѡ ᲂу҆менѐ тлѣ́ннᲂе , мѵ́рѡ ᲂу҆тебѐ жи́зни , мѵ́ро бо тебѣ̀ и҆́мѧ и҆з̾лїѧ́нно на дᲂсто́йныѧ . но ѡ҆сла́би ми и҆ ѡ҆ста́ви , вᲂпїе́тъ блꙋдни́ца хрⷭ҇тꙋ̀ . сла́ва . Без̾нача́ленъ є҆сѝ ѻ҆́ч҃е , несᲂзда́ненъ сн҃е , сᲂпресто́ленъ и҆ дш҃е , є҆ди́но тро́е є҆стество́мъ , и҆ трѝ лица́ми є҆ди́нъ є҆сѝ бг҃ъ и҆́стиненъ . и҆ нн҃ѣ , боⷢ҇ . Бцⷣе ᲂу҆пᲂва́нїе чтꙋ́щимъ тѧ прⷭ҇нѡ , непреста́й мᲂлѧ́щи и҆з̾ тебѐ рᲂди́вшагᲂсѧ , и҆зба́вити мѧ бѣ́дъ , и҆ всѧ́кихъ и҆скꙋше́нїй .

задᲂсто́йнѡ : И҆́же па́че є҆стества̀ . [пᲂкло́н̾ до землѝ] . трⷭ҇то́е , и҆ по ѻ҆́ч҃е на́шъ . кᲂнда́къ , дню̀ . та́же , гдⷭ҇и си́лъ с̾ на́ми . и҆ про́чее ѡ҆бы́чно . и҆ ѿпꙋ́стъ .

Во ст҃ꙋ́ю и҆ вели́кꙋю сре́дꙋ , на ᲂу҆́трени , є҆ѯа̀ ѱалмы̀ , и҆ є҆ктенїѧ̀ .= пᲂсе́мъ , а҆ллилꙋ́їѧ , на́ гласъ , и҃ . та́же , трᲂпа́рь . гла́съ , и҃ . Сѐ жени́хъ грѧде́тъ в̾пᲂлꙋ́нᲂщи , и҆ бл҃же́нъ ра́бъ є҆го́же ѡ҆брѧ́щетъ бдѧ́ща . недᲂсто́инъ же па́ки , є҆го́же ѡ҆брѧ́щетъ лѣнѧ́щасѧ . блюдѝ ᲂу҆́бѡ дш҃е мᲂѧ̀ , да не сно́мъ ѡ҆тѧгᲂти́шисѧ , и҆ да не сме́рти предана̀ бꙋ́деши , и҆ црⷭ҇твїѧ внѣ̀ затвᲂри́шисѧ . но вᲂспрѧнѝ зᲂвꙋ́щи , ст҃ъ , ст҃ъ , ст҃ъ є҆сѝ бж҃е , бцⷣы ра́ди пᲂми́лꙋй на́съ . =двⷤа . сла́ва , и҆ ны́нѣ , то́йже . та́же , ѱалты́рь с̾ пᲂкло́ны .= По а҃ , стихᲂло́гїи , сѣда́ленъ . гла́съ , а҃ . Сѐ лꙋка́выи сᲂвѣ́тъ вᲂи́стинꙋ сᲂбра́сѧ враже́бнѣ , ꙗ҆́кѡ ѡ҆сꙋ́жена ѡ҆сꙋди́ти , и҆́же в̾ вы́шнихъ сѣдѧ́щаго , и҆ ꙗ҆́кѡ сꙋдїю̀ всѣ́хъ и҆ гдⷭ҇а . ны́нѣ сᲂбира́етсѧ с̾ пила́тᲂмъ и҆́рᲂдъ , и҆ а҆́нна в̾кꙋ́пѣ же и҆ каїа́фа , и҆стѧза́ти є҆ди́наго дᲂлгᲂтерпѣли́ваго . =сла́ва , и҆ ны́нѣ , то́йже .

По в҃ , стихᲂло́гїи , сѣда́ленъ . гла́съ , г҃ . Сᲂвѣ́тъ без̾зако́нїѧ , сᲂбира́етсѧ в̾ каїа́финѣ двᲂрѣ̀ , ᲂу҆мертви́ти тѧ гдⷭ҇и . ᲂу҆ченика̀ и҆ преда́телѧ твᲂегѡ̀ влⷣко , ꙗ҆́кѡ с̾пᲂспѣ́шника лꙋка́ва привᲂдѧ̀ . є҆го́же ѡ҆бличи́лъ є҆сѝ , лю́тѣ натѧ̀ пᲂдвиза́ема , нехᲂтѧ́ща прїѧ́ти ве́лїѧ млⷭ҇ти .= сла́ва , и҆ ны́нѣ , то́йже .=

По г҃ , стихᲂло́гїи , сѣда́ленъ . гла́съ , г҃ . Блꙋдни́ца пристꙋпѝ к̾ тебѣ̀ , мѵ́рѡ со слеза́ми и҆з̾лива́ющи на́ нᲂзѣ твᲂѝ чл҃кᲂлю́бче . и҆ смра́да страсте́й и҆збавлѧ́етсѧ пᲂвелѣ́нїемъ ти . ды́ша же бл҃гᲂда́ть твᲂю̀ , ᲂу҆чени́къ небл҃гᲂда́рныи сїю̀ ѿлага́етъ , и҆ смра́дᲂмъ ѡ҆дѣва́етсѧ сребрᲂлю́бїѧ , прᲂдаѧ̀ тебѐ . сла́ва хрⷭ҇тѐ бл҃гᲂꙋтро́бїю твᲂемꙋ̀ . сла́ва , и҆ ны́нѣ , то́йже . та́же , ѱл҃о́мъ , н҃ .= та́же , спасѝ бж҃е лю́ди свᲂѧ̀ . мы́же : г=дⷭ҇и пᲂми́лꙋй , в҃і .

Та́же , трипѣ́снецъ . твᲂре́нїе , ки́ръ кᲂзмы̀ . і҆рмо́съ , по два́жды . трᲂпарѝ , на в҃і . пᲂслѣдѝ і҆рмо́съ , ѻ҆́ба ли́ка в̾кꙋ́пѣ .= гла́съ , в҃ . пѣ́снь , г҃ . і҆рмо́съ . Н=а ка́мени мѧ вѣ́ры ᲂу҆твердѝ , раз̾ширѝ ᲂу҆ста̀ мᲂѧ̀ на врагѝ мᲂѧ̀ . вᲂз̾весели́бᲂсѧ дх҃ъ мо́й вᲂспѣва́ти , нѣ́сть ст҃а ꙗ҆́кᲂже бг҃ъ на́шъ , и҆ нѣ́сть пра́ведна па́че тебѐ гдⷭ҇и .

запѣ́въ : Сла́ва тебѣ̀ бж҃е на́шъ , сла́ва тебѣ̀ . Сꙋ́етнаѧ сᲂбо́рища без̾зако́нныхъ , во́лею сᲂбира́ютсѧ ѕлᲂнра́внᲂю , ѡ҆сꙋжде́нна и҆зба́вителѧ тѧ ѿда́ти хрⷭ҇тѐ . тѣ́мъ ти зᲂве́мъ , ты̀ є҆сѝ бг҃ъ на́шъ , и҆ нѣ́сть пра́ведна па́че тебѐ гдⷭ҇и . Лю́тыи сᲂвѣ́тъ без̾зако́нныхъ , ᲂу҆мышлѧ́ютъ бг҃ᲂбо́рныхъ дꙋ́ши , ꙗ҆́кѡ ѕлᲂпᲂтре́бна ᲂу҆́бѡ пра́ведника тѧ ѡ҆сꙋди́ти хрⷭ҇та̀ . тѣ́мъ ти зᲂве́мъ , ты̀ є҆сѝ бг҃ъ на́шъ , и҆ нѣ́сть пра́ведна па́че тебѐ гдⷭ҇и .

катава́сїѧ : На ка́мени мѧ вѣ́ры .

кᲂнда́къ . гла́съ д҃ . Па́че блꙋдни́цы , бл҃же без̾зако́ннᲂвахъ ще́дре , сле́зъ тᲂче́нїѧ ника́кᲂже ти принесо́хъ , но мᲂлча́нїемъ мᲂлѧ́сѧ припа́даю ти , и҆ любо́вїю лᲂбыза́ю пречⷭ҇тѣи но́зѣ твᲂѝ , да прᲂще́нїе ми ꙗ҆́кѡ влⷣка пᲂда́си грѣхо́мъ . ꙗ҆́кѡ да зᲂвꙋ́ти сп҃се , ѿ скве́рныхъ дѣ́лъ мᲂи́хъ и҆зба́ви мѧ . и҆́кᲂсъ . Ꙗ҆́же пе́рвѣе блꙋдни́ца жена̀ , в̾неза́пꙋ цѣлᲂмꙋ́дрена ꙗ҆ви́сѧ , вᲂз̾ненави́дѣвши дѣ́лъ гнꙋ́снагѡ грѣха̀ , и҆ сла́дᲂсти тѣле́сныѧ , пᲂмышлѧ́ющи стꙋ́дъ , и҆ мно́гихъ бꙋ́дꙋщихъ мꙋ́къ , и҆́хже прїи́мꙋтъ блꙋдницы̀ и҆ любᲂдѣ́и . ѿ ни́хже пе́рвыи є҆́смь а҆́зъ и҆ небᲂю́сѧ , но пребыва́ю въ ѕлѣ̀ ѻ҆бы́чаи безꙋ́мныи . блꙋдни́ца же жена̀ ᲂу҆бᲂѧ́вшисѧ ᲂу҆скᲂри́вше прїи́де , вᲂпїю́щи и҆зба́вителю , чл҃кᲂлю́бче ще́дрыи , ѿ скве́рныхъ дѣ́лъ мᲂи́хъ и҆зба́ви мѧ .

пѣ́снь , и҃ . і҆рмо́съ . Глаго́лъ мꙋчи́телевъ пᲂне́же превᲂзмо́же , се́дмь седми́цею пе́щь раз̾жжена̀ бы́сть дре́вле . в̾ не́йже дѣ́ти неѡ҆пали́шасѧ , царе́во пᲂпра́вше велѣ́нїе . но вᲂпїѧ́хꙋ , всѧ̀ дѣ́ла гдⷭ҇нѧ гдⷭ҇а , по́йте и҆ превᲂзнᲂси́те є҆гѡ̀ во́ вѣки . И҆з̾лива́ющи жена̀ мѵ́рѡ че́стнѡ , на влⷣчнїи и҆ бжⷭ҇твеныи стра́шныи ве́рхъ хрⷭ҇тѐ . слѣдо́мъ твᲂи́мъ пречⷭ҇тымъ прикᲂснꙋ́сѧ , ѡ҆скверне́ныма дла́ньма , и҆ вᲂпїѧ́ше , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . Слеза́ми ѡ҆мыва́етъ но́зѣ сᲂзда́вшагѡ , пᲂви́ннаѧ грѣхо́мъ , и҆ ѡ҆тира́етъ вла́сы свᲂи́ми , тѣ́мже и҆́хъ же в̾ житїѝ непᲂгрѣшѝ сᲂдѣ́ѧнныхъ и҆збавле́нїѧ , и҆ вᲂпїѧ́ше , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки . Сщ҃еннᲂдѣ́йствᲂвашесѧ и҆збавле́нїе бл҃гᲂнра́внѣй , ѿ спасе́нныѧ ᲂу҆тро́бы , и҆ сле́зъ и҆сто́чника , въ не́мъ же и҆спᲂвѣ́данїемъ и҆з̾мы́вшисѧ , нестыдѧ́шесѧ , но вᲂпїѧ́ше , всѧ̀ дѣ́ла гдⷭ҇нѧ гдⷭ҇а по́йте , и҆ превᲂзнᲂси́те є҆гѡ̀ во́ вѣки .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . Глаго́лъ мꙋчи́телевъ .= [пᲂкло́н̾ до землѝ] .=

честнѣ́йшꙋю непᲂе́мъ .

пѣ́снь , ѳ҃ . і҆рмо́съ . Дш҃а́ми чи́стыми и҆ нескве́рными ᲂу҆стна́ми , прїиди́те вᲂз̾вели́чимъ , нескве́рнꙋю , и҆ пречⷭ҇тꙋю мт҃рь є҆м̾манꙋ́илевꙋ . є҆ѧ́же сꙋ́щꙋ ѿ неѧ̀ рᲂжде́нꙋ принᲂсѧ́ще мл҃твꙋ пᲂщадѝ дш҃ъ на́шихъ хрⷭ҇тѐ бж҃е и҆ спасѝ на́съ . Невᲂз̾бл҃гᲂда́тенъ ꙗ҆ви́выисѧ , и҆ лꙋка́выи ревнᲂѡ҆бра́зникъ , да́ръ дᲂсто́йнѡ бжⷭ҇твенъ , сло́вᲂмъ прᲂдае́тъ , и҆́мже до́лгъ разрꙋши́сѧ грѣхо́въ , крады́и лю́тыи і҆ꙋ́да , любᲂбжⷭ҇твенꙋю бл҃гᲂда́ть . пᲂщадѝ дш҃а на́ша хрⷭ҇тѐ бж҃е , и҆ спасѝ на́съ . Гл҃етъ ше́дъ без̾зако́ннымъ кнѧзе́мъ , что́ ми хо́щете да́ти , и҆ а҆́зъ хрⷭ҇та̀ ва́мъ и҆ско́маго , хᲂтѧ́щимъ преда́мъ ; сво́йство бж҃їе і҆ꙋ́да ѿри́нꙋвъ зла́тᲂмъ . пᲂщадѝ дш҃а на́ша хрⷭ҇тѐ бж҃е , и҆ спасѝ на́съ . Ѽ слѣпо́тнагѡ сребрᲂлю́бїѧ нечести́ве . ѿ нꙋ́дꙋже забве́нїе , пᲂлꙋчи́лъ є҆сѝ , ꙗ҆́кѡ дꙋшѝ ника́кᲂже равнᲂстᲂѧ́теленъ ми́ръ , и҆́мже наꙋчи́лсѧ є҆сѝ . ѿчаѧ́нїемъ са́мъ себѐ ᲂу҆дави́лъ є҆сѝ , в̾же́гъ себѣ̀ преда́телю ѻ҆́гнь гее́нскїи . пᲂщадѝ дш҃а на́ша хрⷭ҇тѐ бж҃е , и҆ спасѝ на́съ .

задᲂсто́йнѡ : Дш҃а́ми чи́стыми .= [пᲂкло́н̾ до землѝ] . свѣти́ленъ . Черто́гъ тво́й ви́жꙋ сп҃се мо́й ᲂу҆кра́шенъ , и҆ ѻ҆де́жды не и҆́мамъ да вни́дꙋ во́нь . прᲂсвѣти́ ми ѡ҆дѣѧ́нїе дш҃и , свѣтᲂда́вче и҆ спаси́ мѧ . =двⷤа . сла́ва , и҆ ны́нѣ , то́йже .

На хвали́тѣхъ , стихѣ́ры , на д҃ . гла́съ , а҃ . Тебѐ дв҃ыѧ сн҃а , блꙋдни́ца пᲂзна́вши бг҃а , гл҃аше съ пла́чемъ мᲂлѧ́щисѧ , ꙗ҆́кѡ слеза́мъ дᲂсто́йнаѧ сᲂдѣ́лавши . разрѣшѝ до́лгъ , ꙗ҆́кᲂже и҆ а҆́зъ власы̀ . вᲂз̾любѝ лю́бѧщꙋю . пра́веднѡ ненави́димꙋю . и҆ бли́зъ мытаре́й тебѐ прᲂпᲂвѣ́мъ , бл҃гᲂда́телю и҆ чл҃кᲂлю́бче . Мнᲂгᲂцѣ́ннᲂе мѵ́рѡ блꙋдни́ца смѣси́въ со слеза́ми , и҆ и҆злїѧ̀ на пречⷭ҇тѣи но́зѣ твᲂѝ ѡ҆блᲂбыза́ющи , тꙋ̀ а҆́бїе ѡ҆правда́лъ є҆сѝ . на́мъ же прᲂще́нїе да́рꙋй , пᲂстрада́выи за на́съ , и҆ спасѝ на́съ . Є҆гда̀ грѣ́шнаѧ принᲂша́ше ти мѵ́рѡ , тᲂгда̀ ᲂу҆чени́къ сᲂглаша́шесѧ со закᲂнᲂпрестꙋ́пными . ѻ҆́ба ᲂу҆́бѡ ра́дᲂвашесѧ , вᲂз̾лива́ющи мѵ́рѡ мнᲂгᲂцѣ́ннᲂе . се́й же тща́шесѧ прᲂда́ти бесцѣ́ннаго , сїѧ̀ влⷣкꙋ пᲂзнава́ше , а҆ се́й ѿ влⷣки разлꙋча́шесѧ . сїѧ̀ свᲂбᲂжда́шесѧ , а҆ і҆ꙋ́да ра́бъ быва́ше врагꙋ̀ . ѕло̀ є҆́сть лѣ́нᲂсть , но ве́лїе пᲂкаѧ́нїе . є҆́же ми да́рꙋй сп҃се , пᲂстрада́выи на́съ ра́ди , и҆ спасѝ на́съ . Ѽ і҆ꙋ́дино ѡ҆каѧ́нство . зрѧ́ше блꙋдни́цꙋ цѣлꙋ́ющꙋ стᲂпы̀ , и҆ ᲂу҆мышлѧ́ше ле́стїю , ѡ҆ преда́нїи цѣлᲂва́нїемъ , ѻ҆на̀ власы̀ разрѣшѝ , а҆ се́й ꙗ҆́рᲂстїю вѧза́шесѧ . нᲂсѧ̀ вмѣ́стѡ мѵ́ра , ѕлᲂсмра́днꙋю ѕло́бꙋ , за́висть бо недадѧ́ше пред̾пᲂчита́ти пᲂле́знаѧ . ѽ і҆ꙋ́дино ѡ҆каѧ́нство . ѿ него́же и҆зба́ви бж҃е дш҃а на́ша . сла́ва . гла́съ , в҃ . Грѣ́шнаѧ течѐ к̾ мѵ́рꙋ , кꙋпи́ти мнᲂгᲂцѣ́ннаго мѵ́ра , пᲂма́зати бл҃гᲂда́телѧ , и҆ мѷрᲂпрᲂда́телю вᲂпїѧ́ше , да́ждь ми мѵ́рѡ , да пᲂма́жꙋ и҆ а҆́зъ , ѡ҆чи́стившагѡ всѧ̀ мᲂѧ̀ грѣхѝ . и҆ ны́нѣ . гла́съ , ѕ҃ . Дне́сь хрⷭ҇то́съ прихо́дитъ в̾ до́мъ фарисе́ѡвъ , и҆ жена̀ грѣ́шница пристꙋпи́вши к̾ нᲂга́ма , валѧ́шесѧ вᲂпїю́щи . ви́ждь пᲂгрꙋже́нꙋю грѣхѝ ; ви́ждь ненадѣ́ющꙋюсѧ дѣ́лъ ра́ди , и҆ негнꙋша́емꙋю ѿ твᲂеѧ̀ бл҃гᲂсти , но да́ждь ми гдⷭ҇и ѡ҆ставле́нїе ѕлы́хъ , и҆ спаси́ мѧ .

На стихо́внѣ , стихѣ́ры . гла́съ , ѕ҃ . Пристꙋпѝ жена̀ ѕлᲂсмра́днаѧ и҆ ѡ҆скверне́на , сле́зы прᲂлива́ющи , и҆ лю́бѧщи тѧ сп҃се , стра́сти и҆спᲂвѣ́дающи , ка́кѡ вᲂзрю̀ к̾ тебѣ̀ влⷣцѣ ; са́мъ бо прише́лъ є҆сѝ спастѝ блꙋдни́цы , и҆ и҆з̾ глꙋбины̀ ᲂу҆ме́ршꙋю мѧ̀ вᲂскресѝ . и҆́же ла́зарѧ вᲂз̾дви́гнꙋвыи и҆́з̾ грᲂба четверᲂдне́вна , прїими́ мѧ ѻ҆каѧ́ннꙋю гдⷭ҇и , и҆ спаси́ мѧ .

сти́хъ : и҆спо́лнихᲂмсѧ заꙋ́тра млⷭ҇ти . Прᲂстрѐ блꙋдни́ца вла́сы тебѣ̀ сꙋдїѝ и҆ влⷣцѣ . прᲂстрѐ і҆ꙋ́да рꙋ́цѣ к̾ закᲂнᲂпрестꙋ́пнымъ . ѻ҆́ва ᲂу҆́бѡ прїѧ́тъ ѡ҆ставле́нїе , ѻ҆́въ же прїѧ́тъ сре́бреники . тѣ́мже ти вᲂпїе́мъ , про́данᲂмꙋ и҆ свᲂбᲂди́вшемꙋ на́съ , гдⷭ҇и сла́ва тебѣ̀ .

сти́хъ : и҆ бꙋ́ди свѣ́тлᲂсть гдⷭ҇а . Ненача́емаѧ житїѧ̀ ра́ди , и҆ ᲂу҆вѣ́даннаѧ нра́ва ра́ди , мѵ́рѡ нᲂсѧ́щаѧ , пристꙋпѝ к̾ тебѣ̀ вᲂпїю́щи , не ѿве́рзи менѐ блꙋдни́цꙋ , рᲂди́выисѧ ѿ дв҃ы . непре́зри мᲂи́хъ сле́зъ , ра́дᲂсте а҆́нг҃лѡмъ . но прїими́ мѧ ка́ющꙋюсѧ , є҆ѧ́же не ѿри́нꙋ сᲂгрѣша́ющꙋю гдⷭ҇и , вели́кїѧ ра́ди твᲂеѧ̀ млⷭ҇ти .

сла́ва , и҆ ны́нѣ . гла́съ , и҃ . Гдⷭ҇и ꙗ҆́же во мно́зѣхъ грѣсѣ́хъ впа́дшаѧ жена̀ , твᲂѐ ѡ҆щꙋти́вши бжⷭ҇тво̀ , мѷрᲂно́сицъ взе́мши чи́нъ , рыда́ющи мѵ́рѡ тебѣ̀ пре́же пᲂгребе́нїѧ прино́ситъ . ᲂу҆вы̀ мнѣ̀ глаго́лющи , ꙗ҆́кѡ но́щь мнѣ̀ є҆́сть раз̾жже́нїе блꙋда̀ невᲂз̾держа́нна , мра́чно же и҆ без̾лꙋ́ннѡ раче́нїе грѣха̀ . прїимѝ мᲂѧ̀ и҆сто́чники сле́зъ , и҆́же ѻ҆́блаки прᲂи҆з̾вᲂдѧ́и мо́рю во́дꙋ . приклᲂни́сѧ къ мᲂи́мъ вᲂздыха́нїемъ серде́чнымъ , преклᲂни́выи нб҃са̀ , неи҆зрече́ннымъ твᲂи́мъ сни́тїемъ . да ѡ҆блᲂбыжꙋ̀ пречⷭ҇тѣи твᲂѝ но́зѣ , да ѡ҆тры́ю же сїѧ̀ па́ки главы̀ мᲂеѧ̀ власа́ми , и҆́хже в̾ раѝ є҆́вва въ пᲂлꙋ́дне шꙋ́мᲂмъ ᲂу҆ши́ма ѡ҆гласи́вшисѧ , стра́хᲂмъ скры́сѧ . грѣхо́въ мᲂи́хъ мно́жество , и҆ сꙋде́бъ твᲂи́хъ бе́здны кто̀ и҆з̾слѣ́дитъ ; дꙋшеспа́сче сп҃се мо́й , да мѧ̀ твᲂю̀ рабꙋ̀ непре́зриши , и҆́же неи҆зрече́ннꙋю и҆мѣ́ѧи ве́лїю млⷭ҇ть . =и҆ =про́чаѧ слꙋ́жба с̾ пᲂкло́ны , ᲂу҆́трени и҆ часо́мъ , ꙗ҆́кᲂже ᲂу҆каза́сѧ в̾ пнлⷣьникъ вели́кїи .

Во ст҃ꙋ́ю и҆ вели́кꙋю сре́дꙋ . на ѕ҃ мъ , часѣ̀ . трᲂпа́рь , гла́съ , и҃ . Дне́сь лꙋка́вᲂе сᲂбра́сѧ со́нмище , и҆ на тѧ̀ тще́тнаѧ пᲂꙋчи́шасѧ . дне́сь ѿ сᲂгла́сїѧ ᲂу҆давле́нїемъ і҆ꙋ́да и҆з̾мѣнѧ́етсѧ . каїа́фа же нево́лею и҆спᲂвѣ́дꙋетъ , ꙗ҆́кѡ є҆ди́нъ за всѣ́хъ вᲂспрїе́млеши сме́рть во́лею . и҆зба́вителю на́шъ хрⷭ҇тѐ бж҃е сла́ва тебѣ̀ .= сла́ва , кᲂне́цъ . =и҆ ны́нѣ , ве́сь .

прᲂки́менъ . гла́съ , д҃ . бл҃гᲂслᲂви́тъ тѧ̀ гдⷭ҇ь ѿ сїѡ́на , сᲂтвᲂри́выи нб҃о и҆ зе́млю . сти́хъ : сѐ ны́нѣ бл҃гᲂслᲂви́те гдⷭ҇а всѝ рабѝ гдⷭ҇ни .

ѿ пррⷪ҇чества і҆єзекі́илева , чте́нїе .

Речѐ гдⷭ҇ь ко мнѣ̀ , сн҃е чл҃чь , пᲂслю̀ а҆́зъ тебѐ к̾ до́мꙋ і҆и҃левꙋ , к̾ прᲂгнѣ́вающимъ мѧ̀ , ꙗ҆́же ѡ҆гᲂрчи́ша мѧ са́ми , и҆ ѻ҆тцы̀ и҆́хъ ѿверго́шасѧ менѐ да́же до дне́шнѧгѡ днѐ , и҆ сн҃ᲂве жестᲂкᲂли́чнїи , и҆ твердᲂсерде́чнїи . а҆́зъ пᲂслю̀ тѧ̀ к̾ ни́мъ и҆ рече́ши к̾ ни́мъ , та́кѡ глаго́летъ гдⷭ҇ь бг҃ъ , а҆́ще ᲂу҆́бѡ ᲂу҆слы́шатъ и҆лѝ ᲂу҆бᲂѧ́тсѧ , зане́ же до́мъ разгнѣ́ваѧи є҆́сть , и҆ пᲂзна́ютъ ꙗ҆́кѡ прⷪ҇ркъ є҆сѝ ты̀ пᲂсредѣ̀ и҆́хъ . и҆ ты̀ сн҃е чл҃чь да не ᲂу҆бᲂи́шисѧ и҆́хъ , нижѐ ᲂу҆жаси́шисѧ ѿ лица̀ и҆́хъ , зане́ же раз̾свирѣ́пѣютъ и҆ ѡ҆бы́дꙋтъ тѧ ѡ҆́крⷭ҇тъ , пᲂсредѣ́ бо скᲂрпі́евъ ты̀ живе́ши , и҆ слᲂве́съ и҆́хъ да не ᲂу҆бᲂи́шисѧ , и҆ ѿ лица̀ и҆́хъ да не ᲂу҆жа́снешисѧ , зане́ же до́мъ ѡ҆гᲂрчева́ѧи є҆́сть ; и҆ ты̀ сн҃е чл҃чь рцы̀ слᲂвеса̀ мᲂѧ̀ к̾ ни́мъ , а҆́ще ᲂу҆́бѡ ᲂу҆слы́шатъ и҆лѝ ᲂу҆бᲂѧ́тсѧ , зане́ же до́мъ прᲂгнѣ́ваѧи є҆́сть . и҆ ты̀ сн҃е чл҃чь пᲂслꙋ́шай глаго́лющагѡ к̾ тебѣ̀ , не бꙋ́ди раз̾гнѣ́ваѧи , ꙗ҆́кᲂже и҆ до́мъ раз̾гнѣ́ваѧи . ѿве́рзи ᲂу҆ста̀ свᲂѧ̀ , и҆ снѣ́ждь ꙗ҆́же а҆́зъ да́мъ тебѣ̀ . и҆ ви́дѣхъ и҆ сѐ рꙋка̀ прᲂсте́рта ко мнѣ̀ , и҆ в̾ не́й сви́тᲂкъ кни́жныи . и҆ разви́тъ є҆гѡ̀ предᲂмно́ю , и҆ в̾ то́мъ пи́сана бы́ша пре́днѧѧ и҆ за́днѧѧ . и҆ впи́сано в̾ не́мъ , рыда́нїе , и҆ жа́лᲂсть , и҆ го́ре . И҆ речѐ ко мнѣ̀ , сн҃е чл҃чь , снѣ́ждь сви́тᲂкъ се́й , и҆ и҆дѝ и҆ рцы̀ сн҃ᲂво́мъ і҆и҃левᲂмъ . и҆ раз̾ве́рзе ᲂу҆ста̀ мᲂѧ̀ и҆ ᲂу҆хлѣ́би мѧ сви́ткᲂмъ си́мъ . и҆ речѐ ко мнѣ̀ , сн҃е чл҃чь , ᲂу҆ста̀ твᲂѧ̀ снѣдѧ́тъ , и҆ чре́во твᲂѐ и҆спо́лнитсѧ сви́тка сегѡ̀ да́ннагѡ тебѣ̀ . и҆ снѣдо́хъ є҆гѡ̀ , и҆ бы́сть во ᲂу҆стѣ́хъ мᲂи́хъ , ꙗ҆́кѡ ме́дъ сла́дᲂкъ .

прᲂки́мен̾ . гла́съ , ѕ҃ . бᲂѧ́щїисѧ гдⷭ҇а блгⷭ҇ви́те гдⷭ҇а . сти́хъ : хвали́те и҆́мѧ гдⷭ҇не , хвали́те рабѝ гдⷭ҇а .

по ѡ҆сла́би ѡ҆ста́ви , и҆ по ѻ҆́ч҃е на́шъ .= кᲂнда́къ , дню̀ . =та́же , кᲂнда́къ . хра́мꙋ ст҃а́гѡ , и҆лѝ ст҃ы́ѧ . сла́ва . со ст҃ы́ми пᲂко́й . и҆ ны́нѣ , застꙋ́пнице хрⷭ҇тїа́нѡмъ . гдⷭ҇и пᲂми́лꙋй , м҃ . сла́ва , и҆ ны́нѣ , честнѣ́йшꙋ херꙋви́мъ . и҆ пᲂкло́ны , д҃ , вели́кїѧ , с̾ мл҃твᲂю . и҆ про́чихъ , г҃і . та́же , трⷭ҇то́е , и҆ по ѻ҆́ч҃е на́шъ , гдⷭ҇и пᲂми́лꙋй , в҃і . и҆ в̾мѣ́стѡ , всест҃а́ѧ трⷪ҇це . гл҃емъ мᲂли́твꙋ : влⷣко гдⷭ҇и і҆с҃е хрⷭ҇тѐ бж҃е на́шъ дᲂлгᲂтерпѣли́ве . та́же , дᲂсто́йнѡ є҆́сть . сла́ва , и҆ ны́нѣ . гдⷭ҇и пᲂми́лꙋй , вⷤ , гдⷭ҇и бл҃гᲂслᲂвѝ . глаго́лемъ ѿпꙋ́стъ бᲂльшо́й : влⷣко мнᲂго ми́лᲂстиве . и҆ прᲂще́нїе земно́е . пᲂсе́мъ , пᲂмо́лимсѧ ѡ҆ держа́вныхъ .

=и҆ =ѿсе́лѣ пᲂкло́ны в̾ цр҃кви ѡ҆ставлѧ́ютсѧ . а҆ прихо́дныѧ и҆ ѿхо́дныѧ пᲂкло́ны земны́ѧ в̾ цр҃кви не ѡ҆ставлѧ́ютсѧ . А҆ по кѣ́лїѧмъ пᲂкло́ны , и҆ до заꙋ́трени свѣ́тлыѧ нлⷣи .