Въ сре́дꙋ , д҃ , нлⷣи , по па́сцѣ , препᲂлᲂве́нїе пѧтьдесѧ́тницы . во вто́рникъ , вече́ръ , каѳи́сма ѡ҆бы́чнаѧ . на гдⷭ҇и вᲂзва́хъ , стихѣ́ры , на́ ѕ҃ . гла́съ , д҃ . Наста̀ препᲂлᲂве́нїе дне́мъ , и҆́же ѿ спаси́тельнагѡ начина́емыхъ вᲂста́нїѧ , пѧтьдесѧ́тницею же бжⷭ҇твенᲂю печатлѣ́емо , и҆ свѣ́титсѧ свѣ́тлᲂсти ѡ҆бᲂю́дꙋ и҆мѣ́ѧ , и҆ сᲂєдинѧ́ѧ ѡ҆бᲂѧ̀ , прїитѝ в̾ сла́вѣ пред̾ꙗ҆влѧ́ѧ , влады́чнѧгѡ вᲂзнесе́нїѧ пред̾пᲂчита́ти . двⷤа . Слы́ши и҆ вᲂз̾весели́сѧ сїѡ́нъ , бл҃гᲂвѣсти́вшꙋсѧ хрⷭ҇то́вꙋ вᲂскрⷭ҇нїю , вѣ́рнїи же є҆гѡ̀ сы́нᲂве вᲂз̾ра́дᲂвашасѧ сегѡ̀ ви́дѣвще , ѿмыва́юща дх҃ᲂмъ скве́рнꙋ хрⷭ҇тᲂꙋбі́йства , гᲂто́витсѧ тᲂржествꙋ́ющи ѡ҆бᲂи́хъ весе́лїе препᲂлᲂве́нїемъ .= вⷤ . Прибли́жисѧ бжⷭ҇твенагѡ спѣ́шнѡ и҆зли́тїе на всѣ́хъ , ꙗ҆́кᲂже пред̾написа́сѧ дх҃а , пред̾ ᲂу҆зако́ненїе прᲂпᲂвѣ́дꙋетъ . препᲂлᲂви́вшꙋсѧ и҆́же по хрⷭ҇то́вѣ сме́рти и҆ пᲂгребе́нїи и҆ вᲂскрⷭ҇нїи , ѿ негѡ̀ прїе́мшимъ ᲂу҆ченико́мъ , нело́жнаѧ ѡ҆бѣща́нїѧ , ᲂу҆тѣ́шителево ꙗ҆влѧ́ющи наше́ствїе . =двⷤа . сла́ва , и҆ ны́нѣ . гла́съ , ѕ҃ . Пра́здникꙋ препᲂлᲂви́вшꙋсѧ твᲂегѡ̀ хрⷭ҇тѐ вᲂскрⷭ҇нїѧ , и҆ бжⷭ҇твенагѡ прише́ствїѧ ст҃а́гѡ твᲂегѡ̀ дх҃а , сᲂше́дшесѧ чꙋде́съ твᲂи́хъ вᲂспѣва́емъ та́инство . и҆́хже ра́ди низ̾пᲂслѝ на́мъ ве́лїю млⷭ҇ть . вы́хᲂдъ : свѣ́тѣ ти́хїи . прᲂки́мен̾ , дню̀ .

ѿ прᲂро́чества михе́ина , чте́нїе .

Та́кѡ гл҃етъ гдⷭ҇ь , ѿ сїѡ́на и҆зы́детъ зако́нъ , и҆ сло́во гдⷭ҇не и҆з̾ і҆єрⷭ҇ли́ма , и҆ сꙋ́дитъ пᲂсредѝ люде́й мно́гихъ , и҆ нака́жетъ ꙗ҆зы́ки крѣ́пки до землѝ да́льнихъ ; ꙗ҆́кѡ всѝ лю́дїе по́йдꙋтъ ко́ждо свᲂи́мъ пꙋте́мъ , мы́же по́йдемъ и҆́менемъ гдⷭ҇а бг҃а на́шегѡ во́ вѣки , и҆ црⷭ҇твꙋетъ гдⷭ҇ь в̾ насъ ѿ нн҃ѣ и҆ до́ вѣка . та́кѡ гл҃етъ гдⷭ҇ь вседержи́тель , ᲂу҆слы́шите го́ры и҆ хо́лми и҆ ѡ҆снᲂва́нїѧ землѝ , ꙗ҆́кѡ сꙋ́дъ гдⷭ҇нь к̾ лю́демъ є҆гѡ̀ , вᲂзгл҃етъбᲂсѧ ко і҆и҃лю гл҃ѧ ; лю́дїе мᲂѝ , что̀ сᲂтвᲂри́хъ ва́мъ ; и҆лѝ чи́мъ вы ѡ҆скᲂрби́хъ ; и҆лѝ чи́мъ ѡ҆печа́лихъ ва́съ ; ѿвѣща́йте ми . занѐ и҆з̾ведо́хъ вы̀ ѿ землѝ є҆ги́петскїѧ , и҆ и҆́з̾дᲂмꙋ рабо́ты и҆зба́вихъ ва́съ . и҆ пᲂсла́хъ пред̾ лице́мъ ва́шимъ мѡѷсе́ѧ и҆ а҆арѡ́на . лю́дїе мᲂѝ пᲂмѧни́те , что̀ сᲂвѣща́ша на ва́съ сᲂпᲂста́ти ; и҆ что̀ ва́мъ вᲂзвѣсти́сѧ . вᲂзвѣсти́бᲂсѧ ва́мъ , челᲂвѣ́че что̀ дᲂбро̀ , и҆ что̀ гдⷭ҇ь и҆́щетъ ѿ тебѐ , ра́звѣ твᲂри́ти сꙋ́дъ , и҆ люби́ти млⷭ҇ть , и҆ гᲂто́вꙋ бы́ти хᲂди́ти в̾ слѣ́дъ гдⷭ҇а бг҃а твᲂегѡ̀ , занѐ въ крѣ́пᲂсти вᲂзвели́читсѧ гдⷭ҇ь , и҆ ᲂу҆пасе́тъ ста́до свᲂѐ во смире́нїи , да́же до кᲂне́цъ землѝ .

ѿ прᲂро́чества и҆са́ина , чте́нїе .

Та́кѡ гл҃етъ гдⷭ҇ь , жа́ждꙋщїи грѧди́те на́ вᲂдꙋ жи́вꙋ . и҆ є҆ли́цы не и҆́мате сребра̀ , ше́дше кꙋпи́те , и҆ ꙗ҆ди́те и҆ пі́йте без̾ сребра̀ и҆ цѣны̀ , вино̀ и҆ тꙋ́къ . вскꙋ́ю цѣнитѐ сребро̀ не в̾ хлѣ́бы , и҆ трꙋ́дъ ва́шъ не в̾ сы́тᲂсть . ᲂу҆слы́шите менѐ , и҆ снѣ́сте бл҃га́ѧ , и҆ наслади́тсѧ в̾ бл҃ги́хъ дш҃а ва́ша . и҆ внꙋши́те ᲂу҆ши́ма ва́шима , и҆ в̾ слѣ́дъ и҆ди́те пꙋте́й мᲂи́хъ . ᲂу҆слы́шите менѐ , и҆ жива̀ бꙋ́детъ в̾ бл҃ги́хъ дш҃а ва́ша . и҆ завѣща́ю ва́мъ завѣ́тъ вѣ́ченъ , препᲂдо́бна дв҃да и҆ вѣ́рна . сѐ свидѣ́тельство во ꙗ҆зы́цѣхъ , да́хъ ва́мъ кнѧ́зи и҆ пᲂвели́тели в̾ ꙗ҆зы́цѣхъ . сѐ ꙗ҆зы́цы и҆́же невѣ́дѧтъ тебѐ , призᲂвꙋ́тъ тѧ . и҆ лю́дїе и҆́же неразꙋмѣ́ютъ тебѐ , к̾ тебѣ̀ прибѣ́гнꙋтъ , гдⷭ҇а ра́ди бг҃а твᲂегѡ̀ , и҆ ст҃а́гѡ і҆зра́илева , ꙗ҆́кѡ прᲂсла́вилъ тѧ є҆́сть . взыщи́те гдⷭ҇а бг҃а , и҆ внегда̀ ѡ҆брѣстѝ ва́мъ тᲂго̀ , призᲂви́те . и҆ внегда̀ а҆́ще прибли́житсѧ ва́мъ , да ѡ҆ста́витъ нечести́выи пꙋтѝ свᲂѧ̀ , и҆ мꙋ́жъ без̾зако́ненъ сᲂвѣ́ты свᲂѧ̀ . и҆ да ѡ҆брати́тсѧ къ гдⷭ҇ꙋ бг҃ꙋ ва́шемꙋ , и҆ пᲂми́лꙋетсѧ , ꙗ҆́кѡ па́че мно́жае ѡ҆ста́витъ грѣхѝ ва́ша . несꙋ́ть бо сᲂвѣ́ти мᲂѝ , ꙗ҆́кᲂже сᲂвѣ́ти ва́ши . ни ꙗ҆́кᲂже пꙋтїѐ ва́ши , пꙋтїѐ мᲂѝ , гл҃етъ гдⷭ҇ь . но є҆ли́кѡ ѿстᲂи́тъ нб҃о ѿ землѝ , та́кѡ ѿстᲂи́тъ пꙋ́ть мо́й ѿ пꙋте́й ва́шихъ , и҆ ра́зꙋмы ва́ша ѿ ра́зꙋма мᲂегѡ̀ . ꙗ҆́кᲂже бо а҆́ще сни́детъ до́ждь , и҆лѝ снѣ́гъ съ нб҃сѐ , и҆ не ѿврати́тсѧ ѿтꙋ́дꙋ , до́ндеже ᲂу҆пᲂи́тъ зе́млю , и҆ и҆зрасти́тъ ю҆̀ и҆ прᲂзѧ́бнетъ , и҆ да́стъ сѣ́мѧ сѣ́ющемꙋ , и҆ хлѣ́бъ в̾ снѣ́дь . та́кѡ бꙋ́детъ гл҃ъ мо́й , и҆́же а҆́ще и҆зы́детъ и҆з̾ ᲂу҆́стъ мᲂи́хъ , не ѡ҆брати́тсѧ ко мнѣ̀ то́щь , до́ндеже скᲂнча́етъ всѧ̀ є҆ли́ка вᲂсхᲂтѣ́хъ , и҆ и҆спра́влю пꙋтѝ твᲂѧ̀ , и҆ ѡ҆бѣ́ты мᲂѧ̀ . с̾ весе́лїемъ бо и҆зы́дите , и҆ съ ра́дᲂстїю наꙋчи́тесѧ . го́ры ᲂу҆́бѡ и҆ хо́лми и҆змѣнѧ́тсѧ , ждꙋ́ще ва́съ съ ра́дᲂстїю . и҆ всѧ̀ древа̀ се́льнаѧ вᲂспле́щꙋтъ вѣ́твьми . и҆ вмѣ́стѡ прꙋ́та взы́детъ кѷпари́съ , вмѣ́стᲂже пра́ха , взы́детъ мирси́на , и҆ бꙋ́детъ въ гдⷭ҇не и҆́мѧ , и҆ вᲂзна́менїе вѣ́чно , и҆ не ѡ҆скꙋдѣ́етъ речѐ гдⷭ҇ь .

ѿ втᲂра́го зако́на , чте́нїе .

Речѐ мѡѷсе́й к̾ лю́демъ , нн҃ѣ слы́ши і҆и҃лю ѡ҆правда́нїѧ и҆ сꙋды̀ , є҆ли́ка а҆́зъ наꙋчꙋ̀ ва́съ дне́сь твᲂри́ти , да жи́ви бꙋ́дете , сᲂхрани́теже и҆ сᲂтвᲂри́те , ꙗ҆́кѡ сїѧ̀ премꙋ́дрᲂсть ва́ша , и҆ ра́зꙋмъ предᲂвсѣ́ми ꙗ҆зы́ки . и҆ є҆ли́цы а҆́ще ᲂу҆слы́шатъ ѡ҆правда́нїѧ сїѧ̀ , и҆ рекꙋ́тъ , сі́и лю́дїе премꙋ́дри и҆ ᲂу҆мѣ́тели , и҆ ꙗ҆зы́къ вели́кїи се́й , ꙗ҆́кѡ гдⷭ҇ь бг҃ъ на́шъ є҆́сть во всѣ́хъ и҆́хже а҆́ще тᲂго̀ призᲂве́мъ . и҆ нн҃ѣ внемли́те себѣ̀ ве́сь до́мъ і҆и҃левъ , и҆ сᲂхрани́те дш҃и свᲂѧ̀ ѕѣлѡ̀ , и҆ незабꙋ́дите всѧ̀ слᲂвеса̀ ꙗ҆́же ви́дѣша ѻ҆́чи ва́ши , и҆ да неѿстꙋ́пѧтъ ѿ серде́цъ ва́шихъ , во всѧ̀ днѝ живᲂта̀ ва́шегѡ , и҆ приведи́те сы́ны ва́ша , и҆ сы́ны сыно́въ ва́шихъ , въ де́нь во́ньже пред̾ста́нете пред̾ гдⷭ҇ѣмъ бг҃ᲂмъ в̾ хᲂри́вѣ . в̾ де́нь во́ньже речѐ гдⷭ҇ь ко мнѣ̀ , сᲂберѝ въ цр҃квь лю́ди , и҆ да ᲂу҆слы́шатъ гл҃ы мᲂѧ̀ , ꙗ҆́кѡ да навы́кнꙋтъ бᲂѧ́тисѧ менѐ во всѧ̀ днѝ , є҆ли́ки пᲂживꙋ́тъ ѻ҆нѝ на землѝ , и҆ сы́ны свᲂѧ̀ да наꙋча́тъ . и҆ пристꙋпи́те и҆ ста́ните на гᲂрѣ̀ , и҆ гᲂра̀ гᲂрѧ́ше ѻ҆гне́мъ да́же до нб҃сѐ , тма̀ , сꙋмра́къ , и҆ ды́мъ . и҆ гл҃а гдⷭ҇ь бг҃ъ к̾ ва́мъ на гᲂрѣ̀ ѿ среды̀ ѻ҆гнѧ̀ , гла́съ слᲂве́съ є҆гѡ̀ вы̀ ᲂу҆слы́шасте , и҆ ѻ҆́браза неви́дѣсте , но гла́съ . и҆ запᲂвѣ́да ва́мъ завѣ́тъ сво́й , и҆́же завѣща̀ ва́мъ твᲂри́ти . и҆ мнѣ̀ завѣща̀ гдⷭ҇ь во́ времѧ ѻ҆́но , наꙋчи́ти ва́съ ѡ҆правда́нїемъ и҆ сꙋдьба́мъ , твᲂри́ти ва́мъ та̀ на землѝ , гл҃а гдⷭ҇ь к̾ ва́мъ на гᲂрѣ̀ в̾ хᲂри́вѣ , ѿ среды̀ ѻ҆гнѧ̀ .

На стихо́внѣ , стⷯры . гла́съ , а҃ . Пѧтьдесѧ́тницы наста̀ дне́мъ препᲂлᲂве́нїе , въ ню́же хрⷭ҇то́съ ѡ҆бнажи́въ смᲂтрели́внѡ бжⷭ҇твенꙋю си́лꙋ , раз̾сла́бленаго стѧ́гнꙋ сло́вᲂмъ , и҆ тᲂгѡ̀ ѿ ѻ҆дра̀ вᲂз̾ста́вивъ , бг҃ᲂлѣ́пнѡ чꙋ́до твᲂрѧ̀ вᲂзда́ннѣмъ тѣ́лѣ . чл҃кѡмъ же дарᲂва̀ вѣ́чныи живо́тъ , и҆ велїю млⷭ҇ть .

сти́хъ : пᲂмѧнѝ со́нмъ тво́й ,꙳ и҆́же стѧжа̀ и҆спе́рва . Во ст҃и́лище прише́лъ є҆сѝ премꙋ́дрᲂсте бж҃їѧ , препᲂлᲂвлѧ́ющꙋсѧ пра́здникꙋ , ᲂу҆ча̀ и҆ ѡ҆блича́ѧ невѣ́рныѧ і҆ꙋде́и , фарисе́и и҆ кни́жники , и҆ вᲂпїѧ̀ со дерзнᲂве́нїемъ к̾ ни́мъ , жа́ждаи да грѧде́тъ ко мнѣ̀ , и҆ пїе́тъ во́дꙋ живо́тнꙋ , и҆ не вжа́ждетъ во́ вѣки . вѣ́рꙋѧи мᲂе́й бл҃гᲂсти , рѣ́ки пᲂтекꙋ́тъ и҆́з̾ чрева є҆гѡ̀ жи́зни вѣ́чнаѧ . ѽ бл҃гᲂсти и҆ бл҃гᲂꙋтро́бїѧ твᲂегѡ̀ , хрⷭ҇тѐ бж҃е на́шъ сла́ва тебѣ̀ .

сти́хъ : гла́съ , в҃ . бг҃ъ же цр҃ь на́шъ пре́же вѣ́къ ,꙳ сᲂдѣ́ла спасе́нїе пᲂсредѣ̀ землѝ . Є҆гда̀ препᲂлᲂве́нїе пра́здникꙋ наста̀ , взы́де і҆с҃ъ во ст҃и́лище , и҆ ᲂу҆ча́ше невѣ́рныѧ і҆ꙋде́и , гл҃ѧ , жа́ждаи да грѧде́тъ ко мнѣ̀ , и҆ пїе́тъ во́дꙋ живо́тнꙋ вѣ́чнꙋ , и҆ не вжа́ждетсѧ во́ вѣки . вѣ́рꙋѧи в̾мѧ̀ , рѣ́ки пᲂтекꙋ́тъ и҆́з̾ чрева є҆гѡ̀ , и҆ и҆́мать свѣ́тъ живо́тныи .

сла́ва , и҆ ны́нѣ . гла́съ , и҃ . Препᲂлᲂви́вшꙋсѧ пра́здникꙋ , ᲂу҆ча́щꙋ ти сп҃се , и҆ гл҃ахꙋ і҆ꙋде́и , ка́кѡ се́й вѣ́сть кни́ги неᲂу҆чи́всѧ . неразꙋмѣ́юще ꙗ҆́кѡ ты̀ є҆сѝ премꙋ́дрᲂсть , ᲂу҆стро́ившаѧ ми́ръ сла́ва тебѣ̀ .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь . гла́съ , и҃ . Препᲂлᲂви́вшꙋсѧ пра́здникꙋ , жа́ждꙋщꙋю дш҃ꙋ мᲂю̀ бл҃гᲂче́стїѧ напо́й вᲂды̀ , ꙗ҆́кѡ всѣ́мъ сп҃се вᲂзᲂпи́лъ є҆сѝ , жа́ждаи да грѧде́тъ ко мнѣ̀ и҆ пїе́тъ . и҆сто́чниче жи́зни хрⷭ҇тѐ бж҃е сла́ва тебѣ̀ . та́же , честнѣ́йшꙋю херꙋви́мъ .= и҆ =ѿпꙋ́стъ .

на пᲂлꙋ́нᲂщницѣ , по вѣ́рꙋю во є҆ди́нагѡ бг҃а . по пе́рвᲂмъ трист҃о́мъ гл҃емъ , в̾мѣ́стѡ : сѐ жени́хъ , трᲂпа́рь , пра́здникꙋ . по втᲂро́мъ трист҃о́мъ гл҃емъ , в̾мѣ́стѡ : пᲂмѧнѝ гдⷭ҇и ꙗ҆́кѡ бл҃гъ , кᲂнда́къ , пра́здникꙋ . та́же , гдⷭ҇и пᲂми́лꙋй , ві҃ . и҆ ѿпꙋ́стъ . а҆ мл҃твы : пᲂмѧнѝ гдⷭ҇и и҆́же в̾ наде́жи , не гл҃емъ . и҆ пᲂмѧ́нника за ᲂу҆пᲂко́й : пᲂмѧ́немъ пре́же ᲂу҆со́пшихъ , не гл҃емъ .

Въ сре́дꙋ , препᲂлᲂве́нїѧ . на ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , гⷤ . =По а҃ , стихᲂло́гїи , сѣда́ленъ . гла́съ , и҃ . Препᲂлᲂви́вшꙋсѧ пра́здникꙋ па́схи , твᲂре́цъ нб҃ꙋ в̾ цр҃кви гл҃аше , грѧди́те и҆ пᲂчерпи́те ѿ вᲂды̀ , тᲂгда̀ бᲂлѧ́щаго свᲂи́мъ пᲂвелѣ́нїемъ и҆сцѣли́лъ є҆сѝ , бл҃гᲂи҆зво́ливыи спастѝ ꙗ҆́кѡ бг҃ъ ро́дъ чл҃ческїи . сла́ва , и҆ ны́нѣ , то́йже .=

По в҃ , стихᲂло́гїи , сѣда́ленъ . гла́съ є҃ . Влⷣка всѣ́хъ въ цр҃кви стᲂѧ̀ , пра́здникꙋ препᲂлᲂви́вшꙋсѧ пѧтьдесѧ́тницы чⷭ҇тны́ѧ , є҆вре́ѡмъ бесѣ́дꙋѧ , ѡ҆блича́ше ꙗ҆́вѣ в̾ дерзнᲂве́нїи мно́зѣ , ꙗ҆́кѡ цр҃ь сы́и и҆ бг҃ъ , мꙋчи́тельство тѣ́хъ де́рзᲂстнᲂе . на́мъ же всѣ́мъ да́рꙋетъ за бл҃гᲂꙋтро́бїе ве́лїю ми́лᲂсть .= сла́ва , и҆ ны́нѣ , то́йже .=

та́же , вᲂскрⷭ҇нїе хрⷭ҇то́во , аⷤ . ѱл҃о́мъ , н҃ . Кано́на пра́здникꙋ два̀ , и҆́хже пᲂста́вимъ на д҃і . пе́рвагѡ кано́на , і҆рмᲂсы̀ по двⷤа . трᲂпари́ же , на́ ѕ҃ . втᲂра́гѡ кано́на , трᲂпари́ же , на́ ѕ҃ . пᲂслѣди́ же пᲂе́мъ і҆рмо́съ , втᲂра́гѡ кано́на , ѻ҆́ба ли́ка в̾кꙋ́пѣ . Кано́нъ , ки́ръ ѳео́фанѡвъ . є҆мꙋ́же краегране́сїе : препᲂлᲂве́нїе пра́здникъ вели́кихъ вᲂсхвалѧ́емь . гла́съ , д҃ . пѣ́снь , а҃ . і҆рмо́съ . Мо́рѧ чермна́гѡ пꙋчи́нꙋ , немо́крыми стᲂпа́ми дре́вле ше́ствᲂвавъ і҆зра́иль , крⷭ҇тᲂѡбра́зно мѡѷсе́ᲂвыма рꙋка́ма , а҆мали́кᲂвꙋ си́лꙋ в̾ пꙋсты́ни пᲂбѣди́лъ є҆́сть .

запѣ́въ : Сла́ва тебѣ̀ бж҃е на́шъ , сла́ва тебѣ̀ . Ве́лїѧ ꙗ҆́же па́че ᲂу҆ма̀ , твᲂегѡ̀ влⷣко бжⷭ҇твенагѡ вᲂплᲂще́нїѧ бл҃гᲂдѣѧ́нїѧ сїѧ́ютъ на́мъ . да́рᲂве же и҆ бл҃гᲂда́ти , и҆ бжⷭ҇твеныѧ свѣ́тлᲂсти , бл҃гᲂпᲂда́тнѡ и҆стека́ютъ . Прише́лъ є҆сѝ хрⷭ҇тѐ , свѣ́тлᲂсти бжⷭ҇тва̀ и҆спꙋща́ѧ , пра́здника пᲂсредѝ ꙗ҆вле́ннѡ . пра́здникъ бо ра́дᲂстенъ спаса́емымъ є҆сѝ , и҆ спасе́нїѧ на́шегѡ хᲂда́тай . Премꙋ́дрᲂсть и҆ пра́вда гдⷭ҇и и҆ и҆збавле́нїе , ѿ́ бг҃а ты̀ бы́сть на́мъ . и҆ ѿ землѝ к̾ нбⷭ҇нѣй привᲂдѧ̀ высᲂтѣ̀ , и҆ дх҃ъ бжⷭ҇твеныи да́рꙋѧ . боⷢ҇ . Пло́ть твᲂѧ̀ и҆стлѣ́нїѧ во́ грᲂбѣ неви́дѣ влⷣко , но ꙗ҆́кѡ сᲂста́висѧ крᲂмѣ̀ сѣ́мене , тлѣ́нїѧ непрїѧ́тъ пᲂслѣ́дᲂванїе є҆стества̀ , пресꙋ́щественѣ нерабо́тавши .

Дрꙋгі́и , кано́нъ , ки́ръ а҆ндре́ᲂвъ . гла́съ , и҃ . пѣ́снь , а҃ . і҆рмо́съ . Мо́ре ѡ҆гꙋсти́лъ є҆сѝ .

запѣ́въ : Сла́ва тебѣ̀ бж҃е на́шъ , сла́ва тебѣ̀ . Ꙗ҆зы́цы вᲂсплещи́те , є҆вре́и пла́читесѧ , живᲂда́вецъ бо хрⷭ҇то́съ , ᲂу҆́зы а҆́дᲂвы расто́рже , и҆ ме́ртвыѧ вᲂскресѝ , и҆ бᲂлѣ́зни прᲂгна̀ сло́вᲂмъ . се́й є҆́сть бг҃ъ на́шъ , пᲂда́выи жи́знь вѣ́рꙋющимъ во́ и҆мѧ є҆гѡ̀ . Чꙋ́до пресла́вно , во́дꙋ въ вино̀ прело́жь , и҆́же во є҆ги́птѣ рѣ́ки претво́рь влⷣко в̾ кро́вь , и҆ ме́ртвыѧ вᲂскре́шь , зна́менїе сѐ втᲂро́е скᲂнча́въ . сла́ва сп҃се несказа́ннᲂмꙋ ти сᲂвѣ́тꙋ , сла́ва и҆з̾лїѧ́нїю твᲂемꙋ̀ , и҆́мже ѡ҆бнᲂви́лъ є҆сѝ на́съ . Стрꙋѧ̀ непреста́нно сы́и жи́зни и҆́стинныѧ , ты̀ є҆сѝ пᲂко́ище на́ше , хᲂтѧ̀ трꙋди́лсѧ є҆сѝ сп҃се мо́й , и҆ во́лею в̾жада́всѧ , зако́нᲂмъ є҆стества̀ пᲂслѣ́дꙋѧ , и҆ въ сиха́рь ше́дъ пло́тїю , во́дꙋ прᲂси́лъ є҆сѝ ᲂу҆ самарѧны́ни пи́ти . Хлѣ́бы бл҃гᲂслᲂви́лъ є҆сѝ , ры́бы ᲂу҆мно́жилъ є҆сѝ , непᲂстижи́мыи бж҃е , и҆ наро́ды насы́тилъ є҆сѝ незави́стнѡ , и҆сто́чникъ приснᲂтекꙋ́щь премꙋ́дрᲂсти , жа́ждꙋщимъ вᲂзвѣсти́лъ є҆сѝ . ты̀ є҆сѝ сп҃се бж҃е на́шъ , да́выи живо́тъ вѣ́рꙋющимъ во́ и҆мѧ твᲂѐ . сла́ва . Трѝ без̾нача́льны сла́влю и҆ сᲂпресто́льны , ѻ҆ц҃а без̾нача́льна бг҃а , и҆ сн҃а сᲂбез̾нача́льна , и҆ дх҃а сᲂприснᲂсꙋ́щна пᲂчита́ю , є҆ди́но трисᲂста́внᲂе сꙋщество̀ . є҆ди́но нача́ло пренача́льнᲂе , нача́ла без̾нача́льнагѡ бжⷭ҇тва̀ и҆ сꙋщества̀ чтꙋ̀ . и҆ ны́нѣ , боⷢ҇ . Є҆ди́на в̾мѣсти́ла є҆сѝ зижди́телѧ свᲂегѡ̀ , бг҃ᲂрᲂди́тельнице во́ чревѣ , и҆ пло́тїю рᲂдила̀ є҆сѝ без̾ тлѝ и҆ дв҃а пребы́сть , ничто́же ѿ дв҃ьства ѡ҆скверни́вши . сегѡ̀ чⷭ҇таѧ ꙗ҆́кѡ сн҃а свᲂегѡ̀ и҆ бг҃а , непреста́й мᲂлѧ́щи ѡ҆ ста́дѣ твᲂе́мъ при́снѡ .

катава́сїѧ : Мо́ре ѡ҆гꙋсти́лъ є҆сѝ , пᲂгрꙋзи́выи со ѻ҆рꙋ́жїемъ , го́рдагѡ фараѡ́на . и҆ лю́ди спасѐ ѿ рабо́ты , и҆ введѐ и҆́хъ въ го́рꙋ ст҃ы́ни вᲂпїю́ща , пᲂе́мъ тебѣ̀ бг҃ꙋ на́шемꙋ пѣ́снь пᲂбѣ́днꙋю , ꙗ҆́кѡ прᲂсла́висѧ .

пѣ́снь , г҃ . і҆рмо́съ . Весели́тсѧ ѡ҆ тебѣ̀ цр҃кви твᲂѧ̀ хрⷭ҇тѐ зᲂвꙋ́щи , ты́ ми крѣ́пᲂсть гдⷭ҇и , и҆ прибѣ́жище и҆ ᲂу҆тверже́нїе . Во́дъ живᲂтво́рныхъ , цр҃кви и҆сто́чникъ ѿве́рзлъ є҆сѝ . а҆́ще кто̀ жа́ждетъ , ᲂу҆се́рднѡ да прихо́дитъ и҆ пїе́тъ , вᲂпїѧ̀ бл҃же . Ѿ землѝ ᲂу҆́бѡ , на́ нб҃о вᲂзнести́сѧ , прᲂѧвле́ннѡ глаго́лаше . с̾ нб҃се́ же дх҃а пᲂсла́ти ѡ҆бѣтᲂва̀ ст҃а́гѡ . боⷢ҇ . И҆́же є҆стество́мъ живᲂтвᲂри́выи , и҆́же ѿ дв҃ы рᲂди́выисѧ гдⷭ҇ь . всѣ́мъ вѣ́рнымъ да́рꙋетъ без̾сме́ртїе , ꙗ҆́кѡ бл҃гᲂꙋтро́бенъ .

и҆́нъ , і҆рмо́съ . Оу҆тверди́сѧ срⷣце мᲂѐ . Не и҆́же на лицѐ сꙋ́дъ сꙋди́те і҆ꙋде́и , ᲂу҆ча̀ глаго́лаше влⷣка , є҆гда̀ прїи́де во ст҃и́лище , ꙗ҆́кᲂже пи́шетъ , препᲂлᲂви́вшꙋсѧ зако́ннᲂмꙋ пра́здникꙋ . Нельсти́тесѧ ѽ без̾зако́нїи і҆ꙋде́и , хрⷭ҇то́съ ᲂу҆́бѡ прїи́де , є҆го́же пред̾нарица́хꙋ прⷪ҇ро́цы , ѿ сїѡ́на прїитѝ хᲂтѧ́ща , и҆ ми́ра взыва́юща . А҆́ще и҆ слᲂвесе́мъ невѣ́рꙋете ѽ і҆ꙋде́и , но дѣ́лᲂмъ вѣ́рꙋйте спа́сᲂвымъ . что̀ блазните́сѧ , ѿмета́ющесѧ ст҃а́гѡ , є҆го́же писа̀ въ зако́нѣ мѡѷсе́й . А҆́ще месі́и всѧ́кѡ пᲂдᲂба́етъ прїитѝ і҆ꙋде́и ; хрⷭ҇то́съ же прїи́де ны́нѣ месі́ѧ , что̀ блазните́сѧ ѿмета́ющесѧ пра́веднагѡ , ѡ҆ не́мже писа̀ въ зако́нѣ мѡѷсе́й . сла́ва . Тебѣ̀ пᲂклᲂнѧ́емсѧ ѻ҆́ч҃е [пᲂкло́н̾] , без̾нача́льныи сꙋщество́мъ , пᲂе́мъ и҆ сᲂбез̾нача́льнаго сн҃а твᲂегѡ̀ , и҆ прест҃ы́и дх҃ъ сᲂприснᲂсꙋ́щныи , ꙗ҆́кѡ є҆ди́нᲂго трїи҆пᲂста́сна є҆стество́мъ бг҃а . и҆ нн҃ѣ , боⷢ҇ . Є҆ди́нъ ѿ трⷪ҇цы пᲂзна́нъ бы́сть , а҆́ще и҆ пло́ть бы́въ , непрело́жъ гдⷭ҇и сꙋщества̀ , нижѐ ѡ҆пали́въ ро́ждьшѣй пречⷭ҇тᲂе чре́во , бг҃ъ сы́и всѧ́ко и҆ ѻ҆́гнь .

катава́сїѧ : Оу҆тверди́сѧ се́рдце мᲂѐ ѡ҆́ гдⷭ҇ѣ , вᲂзнесе́сѧ ро́гъ мо́й ѡ҆́ бз҃ѣ мᲂе́мъ , раз̾шири́шасѧ на врагѝ мᲂѧ̀ ᲂу҆ста̀ мᲂѧ̀ , вᲂз̾весели́хсѧ ѡ҆ спасе́нїи твᲂе́мъ .

сѣда́ленъ . гла́съ , и҃ . Стᲂѧ̀ пᲂсредѝ ст҃и́лища , препᲂлᲂвлѧ́ющꙋсѧ бжⷭ҇твенᲂмꙋ пра́здникꙋ , жа́ждаи взыва́ше , да грѧде́тъ ко мнѣ̀ и҆ пїе́тъ , пїѧ́и бо ѿ сеѧ̀ бжⷭ҇твеныѧ мᲂеѧ̀ вᲂды̀ , рѣ́ки и҆́з̾чрева и҆сто́читъ пᲂвелѣ́нїи мᲂи́хъ , ꙗ҆́кѡ и҆́же вѣ́рꙋетъ в̾мѧ̀ , по́сланнаго ѿ бжⷭ҇твенагѡ рᲂди́телѧ , со мно́ю прᲂсла́витсѧ . сегѡ̀ ра́ди вᲂпїе́мъ ти , сла́ва тебѣ̀ хрⷭ҇тѐ бж҃е , ꙗ҆́кѡ бᲂга́тнѡ и҆з̾лїѧ́лъ є҆сѝ во́ды твᲂегѡ̀ чл҃кᲂлю́бїѧ рабѡ́мъ свᲂи́мъ . сла́ва , и҆ ны́нѣ . то́йже .

пѣ́снь , д҃ . і҆рмо́съ . Вᲂздви́жена тѧ̀ ви́дѣвши цр҃кви на крⷭ҇тѣ̀ сл҃нца пра́веднагѡ , ста̀ в̾чинꙋ̀ свᲂе́мъ , дᲂсто́йнѡ взыва́ющи , сла́ва си́лѣ твᲂе́й гдⷭ҇и . Растерза́въ сме́рти врата̀ свᲂе́ю си́лᲂю , пꙋтѝ жи́зни сказа́лъ є҆сѝ . и҆ без̾сме́ртїѧ две́ри ѿве́рзлъ є҆сѝ , и҆́же вѣ́рᲂю тебѣ̀ зᲂвꙋ́щимъ , сла́ва си́лѣ твᲂе́й гдⷭ҇и . Препᲂлᲂве́нїе всѣ́хъ и҆ кᲂне́цъ и҆мѣ́ѧ , и҆ нача́ло ꙗ҆́кѡ без̾нача́ленъ ѡ҆бдержа̀ . ста́лъ є҆сѝ пᲂсредѝ вᲂпїѧ̀ , бжⷭ҇твеныхъ бг҃ᲂмꙋ́дрїи , даро́въ наслади́тесѧ . Ꙗ҆́кѡ бг҃ъ всѣ́хъ держа̀ вла́сть , ꙗ҆́кѡ си́ленъ держа́вꙋ низ̾лᲂжи́въ сме́рти . пᲂсла́ти ѡ҆бѣща̀ хрⷭ҇тѐ дх҃ъ ст҃ы́и , и҆́же ѿ ѻ҆ц҃а прᲂи҆схᲂдѧ́щїи . боⷢ҇ . Дае́ши бᲂга́тнѡ бл҃гᲂда́ть тебѐ пᲂю́щимъ . и҆ и҆́же и҆з̾ тебѐ ро́ждьшагᲂсѧ превѣ́чнагѡ сло́ва , мт҃и неи҆скꙋсᲂмꙋ́жнаѧ . и҆ сᲂгрѣше́нїемъ ѡ҆ставле́нїе , си́мъ прᲂсѧ́щи пречⷭ҇таѧ .

и҆́нъ , і҆рмо́съ . Прᲂро́къ а҆вва́кꙋмъ . А҆́ще месі́и пᲂдᲂба́етъ прїитѝ , месі́ѧ же хрⷭ҇то́съ є҆́сть . без̾зако́ннїи что̀ невѣ́рꙋете є҆мꙋ̀ ; сѐ прїи́де ; и҆ свидѣ́тельствꙋютъ , ꙗ҆́же то́й твᲂри́тъ . во́дꙋ въ вино̀ сᲂтвᲂрѝ , и҆ раз̾сла́бленаго сло́вᲂмъ и҆сцѣлѝ . Неразꙋмѣ́юще писа́нїѧ , блазните́сѧ всѝ вы̀ є҆вре́и без̾зако́ннїи , вᲂи́стинꙋ бо прїи́де хрⷭ҇то́съ , и҆ всѣ́хъ и҆сцѣлѝ , въ ва́съ пᲂказа̀ мно́га зна́менїѧ же и҆ чꙋдеса̀ , и҆ всꙋ́е ѿрица́етесѧ и҆́стиннагѡ живᲂта̀ . Дѣ́ла сᲂтвᲂри́хъ мно́га , и҆ ко́ихъ дѣ́лъ ра́ди ка́менїемъ бїе́те мѧ , і҆ꙋде́ѡмъ хрⷭ҇то́съ ѡ҆блича́ѧ взыва́ше , є҆да̀ занѐ чл҃ка здра́ва всего̀ сло́вᲂмъ сᲂтвᲂри́хъ ; несꙋди́те на лица̀ чл҃цы . Є҆ди́но дѣ́ло пᲂказа́хъ ва́мъ , и҆ всѝ ᲂу҆́же дивите́сѧ , взыва́ше і҆ꙋде́ѡмъ хрⷭ҇то́съ , вы̀ ѡ҆брѣ́зꙋете и҆ в̾ сꙋбо́тꙋ чл҃ка речѐ , мене́ же что̀ ѡ҆клевета́ете ᲂу҆́бѡ , вᲂздви́гшаго сло́вᲂмъ раз̾сла́бленаго . Во а҆пⷭ҇лѣхъ дѣ́йствꙋѧ , и҆ во прᲂро́цѣхъ са́мъ пᲂчива́ѧ съ дх҃ᲂмъ , сᲂбез̾нача́льнᲂе рᲂжде́нїе ѻ҆те́ческагѡ є҆стества̀ хрⷭ҇тѐ , ꙗ҆зы́ки к̾ ра́зꙋмꙋ вᲂзвᲂдѧ̀ , зна́меньми свᲂи́ми . сла́ва . Трⷪ҇це нераздѣ́льнаѧ є҆ди́нице , без̾нача́льне ѻ҆́ч҃е , и҆ сн҃е и҆ д́ш҃е ст҃ы́и , ꙗ҆́же во є҆ди́ницѣ трⷪ҇ца , равнᲂче́стна и҆ сᲂпресто́льна , живᲂтвᲂри́выи и҆ несᲂзда́нныи бж҃е , спаса́й кла́нѧющихътисѧ , и҆ и҆зба́ви ѿ бѣ́дъ и҆ ско́рбей . и҆ ны́нѣ , боⷢ҇ . И҆́же во́ чревѣ свᲂе́мъ бг҃а неѡ҆пи́саннѡ вмѣсти́вшаѧ , бг҃ᲂневѣ́сто дв҃о мт҃и чи́стаѧ , непреста́й мᲂлѧ́щи ѡ҆ на́съ , ꙗ҆́кѡ да тебѐ ра́ди и҆зба́вимсѧ ѿ напа́стей , к̾ тебѣ́ бо при́снѡ прибѣга́емъ .

катава́сїѧ : Прᲂро́къ а҆вва́кꙋмъ , мы́сленныма ѻ҆чи́ма прᲂви́дѣ гдⷭ҇и прише́ствїе твᲂѐ , тѣ́мже и҆ вᲂпїѧ́ше , ѿ ю҆́га прїи́детъ бг҃ъ , сла́ва си́лѣ твᲂе́й , сла́ва хрⷭ҇тѐ прише́ствїю твᲂемꙋ̀ .

пѣ́снь , є҃ . і҆рмо́съ . Ты̀ гдⷭ҇и ми свѣ́тъ въ мі́ръ прише́лъ є҆сѝ , свѣ́тъ ст҃ы́и ѡ҆браща́ѧ и҆з̾ мра́чна невѣ́дѣнїѧ , вѣ́рᲂю вᲂспѣва́ющїѧ тѧ . Бжⷭ҇твеныхъ пра́здникъ препᲂлᲂве́нїе дᲂсти́гше , сᲂверше́нᲂе бжⷭ҇твеныѧ дᲂбрᲂдѣ́тели пᲂсти́гнꙋти , пᲂтщи́мсѧ бг҃ᲂмꙋ́дрїи . Ꙗ҆́кѡ вᲂи́стинꙋ сщ҃е́нно , настᲂѧ́щее тᲂржество̀ , препᲂлᲂве́нїе бо вели́кихъ пра́здникъ , пᲂвелѣва́етъ и҆ свѣ́титсѧ ѡ҆бᲂю́дꙋ . боⷢ҇ . Оу҆́мъ а҆́нг҃льскїи немо́жетъ разꙋмѣ́ти , твᲂѐ неи҆зрече́ннᲂе и҆з̾ дв҃ы , и҆ пречⷭ҇тᲂе ржⷭ҇тво̀ , сп҃се мо́й всеси́льне .

и҆́нъ , і҆рмо́съ . Гдⷭ҇и бж҃е на́шъ . Дивесы̀ ᲂу҆краси́лъ є҆сѝ земны́ѧ кᲂнцы̀ , чꙋдесы̀ вᲂзвели́чилъ є҆сѝ ᲂу҆ченикѝ , и҆ во все́мъ ми́рѣ прᲂсла́вивъ сп҃се на́шъ , и҆ да́въ и҆́мъ ца́рьствїе твᲂѐ . Всѧ̀ прᲂсвѣти́ша ми́рꙋ кᲂнцы̀ ᲂу҆ченицы̀ , чꙋдесы̀ и҆ ᲂу҆че́ньми , и҆ разли́чными ѻ҆́бразы сло́во прᲂпᲂвѣ́давше , хрⷭ҇тѐ сп҃се црⷭ҇твїѧ твᲂегѡ̀ . Хвалꙋ̀ вᲂзсыла́емъ ца́рьствїю твᲂемꙋ̀ , и҆ пѣ́нїе тебѣ̀ прино́симъ , и҆́же на́съ ра́ди на землѝ ꙗ҆ви́вшемꙋсѧ , и҆ ми́ра прᲂсвѣти́вшемꙋ , и҆ а҆да́ма ѡ҆бнᲂви́вшꙋ . сла́ва . Сла́ва тебѣ̀ ѻ҆́ч҃е ст҃ы́и бж҃е нерᲂжде́нне , сла́ва тебѣ̀ сы́не пречи́стыи є҆динᲂро́дне , сла́ва тебѣ̀ д́ш҃е бжⷭ҇твеныи , и҆ сᲂпресто́льне и҆ є҆динᲂсꙋ́щне ѻ҆ц҃ꙋ и҆ сн҃ꙋ . и҆ нн҃ѣ , боⷢ҇ . Бы́сть чре́во твᲂѐ ст҃а́ѧ трапе́за , и҆мꙋ́щи нбⷭ҇ныи хлѣ́бъ хрⷭ҇та̀ , ѿ него́же всѧ́къ ꙗ҆ды́и не ᲂу҆мира́етъ , ꙗ҆́кᲂже речѐ , и҆́же всѣ́мꙋ бг҃ᲂрᲂди́тельнице пита́тель .

катава́сїѧ : Гдⷭ҇и бж҃е на́шъ , ми́ръ да́ждь на́мъ . гдⷭ҇и бж҃е на́шъ , стѧжи́ ны . гдⷭ҇и , ра́звѣ бо тебѐ и҆но́гѡ незна́емъ , и҆́мѧ твᲂѐ и҆мѧнꙋ́емъ .

пѣ́снь , ѕ҃ . і҆рмо́съ . Пᲂжрꙋ́ти со́ гласᲂмъ хвале́нїѧ гдⷭ҇и , цр҃кви вᲂпїе́тъ ти , ѿ бѣсо́вскїѧ кро́ви ѡ҆чи́щьшисѧ , млⷭ҇тїю ѿ ре́бръ и҆сте́кшею ти кро́вїю . Препᲂлᲂве́нїе пѧтьдесѧ́тницы наста̀ дне́сь . ѿ сю́дꙋ бжⷭ҇твенаѧ ᲂу҆́бѡ па́сха ст҃а́ѧ свѣ́титсѧ , прᲂсвѣща́ющи бжⷭ҇твенѣйшею свѣ́тлᲂстїю . ѿ ню́дꙋ же ᲂу҆тѣ́шителевᲂю бл҃гᲂда́тїю ѡ҆сїѧва́ющи . Гл҃аше в̾ цр҃кви хрⷭ҇тѐ пред̾стᲂѧ̀ , і҆ꙋде́йскимъ сᲂбо́рᲂмъ свᲂю̀ сла́вꙋ ѿкрыва́ѧ , и҆ пред̾ꙗ҆влѧ́ѧ сро́дство к̾ рᲂди́телю . боⷢ҇ . Бꙋ́ди ми пред̾ста́тельница , и҆ стѣна̀ нерꙋши́маѧ . ѿ мирски́хъ мѧ сᲂбла́знъ и҆збавлѧ́ющи , є҆ди́на бг҃ᲂрᲂди́тельнице . и҆ бжⷭ҇твенымъ свѣтᲂли́тїемъ ѡ҆свѣща́ющи .

и҆́нъ , і҆рмо́съ . Ꙗ҆́кѡ во́ды мᲂрскі́ѧ . И҆́же всѧ̀ сᲂдержа́и кᲂнцы̀ , взы́де і҆с҃ъ и҆ ᲂу҆ча́ше во ст҃и́лищи наро́ды сло́вꙋ и҆́стины , пра́здникꙋ препᲂлᲂвлѧ́ющꙋсѧ , ꙗ҆́кᲂже і҆ѡа́ннъ вᲂпїе́тъ . Ѿве́рзъ ᲂу҆стнѣ̀ свᲂѝ влⷣко , прᲂпᲂвѣ́далъ є҆сѝ ми́рꙋ без̾лѣ́тнаго ѻ҆ц҃а , и҆ всест҃ы́и дх҃ъ , сро́днᲂе ѡ҆бᲂѐ хранѧ̀ и҆ по вᲂплᲂще́нїи . Дѣ́ло ѻ҆́ч҃ее сᲂверши́лъ є҆сѝ , слᲂвесы̀ ᲂу҆вѣ́рилъ є҆сѝ дѣ́ла свᲂѧ̀ , и҆сцѣле́нїѧ твᲂрѧ̀ сп҃се и҆ зна́менїѧ мно́га . раз̾сла́бленыѧ и҆справлѧ́ѧ , прᲂкаже́ныхъ ѡ҆чища́ѧ , и҆ ме́ртвыѧ вᲂскреша́ѧ . Без̾нача́льныи сн҃ъ нача́ло бы́сть , прїе́мъ є҆́же по на́съ вᲂчл҃ченїе , и҆ пᲂсредѝ пра́здника ᲂу҆ча́ше глаго́лѧ , притецы́те ко и҆сто́чникꙋ , и҆ непреста́ннꙋю жи́знь пᲂчерпи́те . сла́ва . Є҆ди́но въ трⷪ҇цѣ бжⷭ҇тво̀ , сꙋщество̀ трисᲂста́вно , несᲂзда́нно и҆ нераздѣ́льно , всѝ славᲂсло́вимъ . и҆ со а҆́нг҃лы то́й пᲂкланѧ́емсѧ [пᲂкло́н̾] , ꙗ҆́кѡ тре́мъ в̾ сꙋществѣ̀ є҆ди́нᲂмъ . и҆ ны́нѣ , боⷢ҇ . Дв҃ꙋ и҆ по ржⷭ҇твѣ̀ пᲂе́мъ тѧ , дв҃ꙋ и҆ мт҃рь сла́вимъ , тебѐ є҆ди́нꙋ чи́стꙋю , бг҃ᲂневѣ́сто ѻ҆трᲂкᲂви́це . и҆з̾ тебе́ бо вᲂи́стинꙋ бг҃ъ вᲂплᲂти́сѧ , ѡ҆бнᲂви́въ на́съ .

катава́сїѧ : Ꙗ҆́кѡ во́ды мᲂрскі́ѧ чл҃кᲂлю́бче , во́лны жите́йскїѧ пᲂгрꙋжа́ютъ мѧ . тѣ́мъ ꙗ҆́кѡ і҆ѡ́на вᲂпїю́ ти сло́ве , вᲂзведѝ ѿ тлѝ живо́тъ мо́й милᲂсе́рде гдⷭ҇и .

кᲂнда́къ . гла́съ , д҃ . Пра́здникꙋ зако́ннᲂмꙋ препᲂлᲂви́вшꙋсѧ , всѧ́ческимъ твᲂре́цъ и҆ влⷣка къ пред̾стᲂѧ́щимъ гл҃аше хрⷭ҇тѐ бж҃е , прїиди́те и҆ пᲂчерпи́те во́дꙋ без̾сме́ртїѧ . тѣ́мже ти припа́даемъ и҆ вѣ́рнѡ вᲂпїе́мъ , щедро́ты твᲂѧ̀ да́рꙋй на́мъ , ты́бо є҆сѝ и҆сто́чникъ живᲂтꙋ̀ на́шемꙋ . и҆́кᲂсъ . Ѡ҆лѧдѣ́вшꙋю ми дш҃ꙋ сᲂгрѣше́ньми без̾зако́нїи , крᲂпле́ньми твᲂи́хъ крᲂве́й напо́й , и҆ пᲂкажѝ плᲂдᲂно́снꙋ дᲂбрᲂдѣ́тельми . ты́бо речѐ всѣ́мъ прихᲂдѧ́щимъ к̾ тебѣ̀ сло́во бж҃їе пречи́стᲂе , во́дꙋ нетлѣ́нїѧ пᲂчерпи́те , жи́вꙋ же , и҆ ѡ҆чища́ющꙋю грѣхѝ , и҆ пᲂю́щимъ сла́внᲂе и҆ бжⷭ҇твенᲂе твᲂѐ вᲂста́нїе , пᲂдаѧ̀ бл҃гі́и и҆́же съ высᲂты̀ сᲂше́дшꙋю вᲂи́стинꙋ ᲂу҆ченикѡ́мъ твᲂи́мъ дх҃а крѣ́пᲂсть , тебѐ бг҃а вѣ́дѧщимъ , ты́бо є҆сѝ и҆сто́чникъ живᲂтꙋ̀ на́шемꙋ .

пѣ́снь , з҃ . і҆рмо́съ . Въ пещѝ а҆враа́мскїѧ си дѣ́ти перси́дстѣй , любо́вїю бл҃гᲂвѣ́рїѧ па́че не́жели пла́менемъ ѡ҆палѧ́еми взыва́хꙋ , блгⷭ҇ве́нъ є҆сѝ в̾ цр҃кви сла́вы твᲂеѧ̀ гдⷭ҇и . Крѣ́пᲂсть сп҃се сме́ртнꙋю разо́рь си́лᲂю , стезѝ жи́зни пᲂказа́лъ є҆сѝ чл҃кѡмъ , бл҃гᲂда́рнѡ тебѣ̀ зᲂвꙋ́щимъ , блгⷭ҇ве́нъ є҆сѝ в̾ цр҃кви сла́вы твᲂеѧ̀ гдⷭ҇и . Пло́ть нᲂсѧ́ща ви́дѧще , неразꙋмѣ́ша сᲂбо́ри є҆вре́йстїи сло́ва тебѐ бж҃їѧ . но мы̀ тебѐ вᲂспѣва́емъ , блгⷭ҇ве́нъ є҆сѝ в̾ цр҃кви сла́вы твᲂеѧ̀ гдⷭ҇и . боⷢ҇ . Вы́шнѧгѡ ѡ҆сщ҃е́нно бж҃їе селе́нїе , ра́дꙋисѧ . тᲂбо́ю бо да́стсѧ ра́дᲂсть бцⷣе , вᲂпїю́щимъ тѝ , блгⷭ҇ве́на ты̀ в̾ жена́хъ , всенепᲂро́чнаѧ влⷣчце .

и҆́нъ , і҆рмо́съ . Халдѣ́йскаѧ пе́щь ѻ҆гне́мъ . Пло́тьски пᲂтрꙋди́всѧ , пᲂко́й всѣ́мъ , во́лею вжада́всѧ , и҆сто́чниче чꙋдесе́мъ , во́дꙋ прᲂси́лъ є҆сѝ , во́дꙋ жи́зни і҆с҃е вᲂзвѣща́ѧ . Самарѧны́ни гдⷭ҇и женѣ̀ бесѣ́дᲂваше , ѡ҆блича́ѧ безꙋ́мїе без̾зако́нныхъ є҆вре́й . ѻ҆́ва ᲂу҆́бѡ вѣ́рᲂва сн҃а тѧ бы́ти бж҃їѧ , ѻ҆́ви же ѿверго́шасѧ . Во́дꙋ жи́зни и҆стека́ющꙋю , во́дꙋ без̾сме́ртїѧ , и҆сто́чникъ при́сныи пᲂда́ти ѡ҆бѣща̀ , и҆́же вѣ́рᲂю притека́ющимъ къ дх҃ꙋ твᲂемꙋ̀ сп҃се , и҆́же ѿ ѻ҆ц҃а прᲂи҆схᲂдѧ́щемꙋ . Оу҆диви́лъ є҆сѝ влⷣко свᲂѐ смᲂтре́нїе , и҆ ᲂу҆вѣ́ривъ чꙋдесы̀ бжⷭ҇твенꙋю вла́сть , недꙋ́ги и҆змѣни́лъ є҆сѝ , и҆ ме́ртвыѧ вᲂз̾ста́вилъ є҆сѝ , и҆ слѣпы́ѧ прᲂсвѣти́лъ є҆сѝ . Прᲂкаже́ныѧ ѡ҆чи́стилъ є҆сѝ , хрᲂмы́ѧ и҆спра́вилъ є҆сѝ , раз̾сла́бленыѧ стѧ́гнꙋлъ є҆сѝ , крᲂвᲂтᲂчи́вꙋю и҆сцѣли́въ , ше́ствᲂвалъ є҆сѝ по пꙋчи́нѣ немо́креными стᲂпа́ми , и҆́же на́съ ра́ди вᲂплᲂти́выисѧ . Пѧтьмѝ хлѣ́бы препита́лъ є҆сѝ , ты́сѧщи а҆́лчꙋщихъ , и҆ насыще́нїѧ ѡ҆ста́нки , в̾ дрꙋгі́ѧ ты́сѧщи сп҃се ᲂу҆мно́жилъ є҆сѝ , пᲂказꙋ́ѧ сла́вꙋ свᲂю̀ сщ҃е́ннымъ ᲂу҆ченикѡ́мъ . Ꙗ҆ды́и тѣ́ло твᲂѐ , жи́въ бꙋ́детъ во́ вѣки , и҆ пїѧ́и кро́вь твᲂю̀ , въ тебѣ̀ пребꙋ́детъ сп҃се мо́й , и҆ ты̀ въ не́мъ пребыва́еши , и҆ вᲂскреси́ши є҆гѡ̀ , въ пᲂслѣ́днее вре́мѧ . И҆́же хлѣ́бъ ꙗ҆дꙋ́щїи пло́ти гдⷭ҇ни , и҆ кро́вь прїе́млющїи и҆з̾ ре́бръ влⷣчнихъ , во ѡ҆бнᲂвле́нїе дх҃а хо́димъ , живꙋ́ще є҆ди́нᲂмꙋ бг҃ꙋ . Ꙗ҆́кѡ хлѣ́бъ нбⷭ҇ныи є҆сѝ , пред̾ста̀ пᲂдава́ѧ на́мъ гдⷭ҇и пречⷭ҇тᲂе свᲂѐ тѣ́ло , въ бра́шно нетлѣ́нїѧ , и҆ питїѐ неи҆змѣ́нно , въ вѣ́чныи живо́тъ . Ѻ҆ц҃ы ᲂу҆́бѡ ꙗ҆до́ша ма́ннꙋ въ пꙋсты́ни , и҆ ꙗ҆́дше ᲂу҆мро́ша . мы́же причаща́ющїисѧ хлѣ́бꙋ телесѐ твᲂегѡ̀ , неꙋ́мремъ , но спᲂживе́мъ тебѣ̀ бг҃ꙋ . Пᲂклᲂнѧ́емсѧ твᲂемꙋ̀ гдⷭ҇и пречи́стᲂмꙋ ѻ҆ц҃ꙋ [пᲂкло́н̾] , и҆ бл҃гᲂда́ти дх҃а , ю҆́же свᲂи́мъ а҆пⷭ҇лѡмъ бг҃ъ сы́и раздѣлѝ , пᲂсыла́ѧ и҆́хъ на прᲂпᲂвѣ́данїе . Чꙋдеса̀ наче́нше хрⷭ҇тѐ ᲂу҆ченицы̀ твᲂѝ , ст҃ы́мъ твᲂи́мъ дх҃ᲂмъ , и҆сцѣле́нїѧ дѣ́йствᲂваша , во ᲂу҆дивле́нїе ведꙋ́ще , прїе́мшихъ твᲂегѡ̀ смᲂтре́нїѧ свѣ́тъ . сла́ва . Ѻ҆ц҃а прᲂсла́вимъ и҆ сн҃а и҆ дх҃а , во є҆ди́нᲂмъ бжⷭ҇твѣ̀ , трисᲂста́внᲂе є҆стество̀ , сꙋ́щество нераздѣ́льно , несᲂзда́нно без̾нача́льно и҆ пресꙋ́ществено . и҆ ны́нѣ , боⷢ҇ . Во́чрево свᲂѐ вмѣсти́ла є҆сѝ невмѣсти́мᲂе сло́во , ѿ свᲂею̀ сᲂсцꙋ̀ питѣ́ла є҆сѝ ми́рꙋ пита́телѧ , и҆ нарꙋкꙋ̀ нᲂси́ла є҆сѝ сᲂдержи́телѧ на́шегѡ бг҃ᲂрᲂди́тельнице .

катава́сїѧ : Халдѣ́йскаѧ пе́щь ѻ҆гне́мъ распала́ема , прᲂхлажда́шесѧ дх҃ᲂмъ бж҃їимъ застꙋпле́нїемъ , ѻ҆́трᲂцы же пᲂѧ́хꙋ , бл҃гᲂслᲂве́нъ бг҃ъ ѻ҆ц҃ъ на́шихъ .

пѣ́снь , и҃ . і҆рмо́съ . Рꙋ́цѣ распрᲂсте́ръ данїи́лъ , льво́ва зїѧ́нїѧ в̾ро́вѣ затчѐ , ѻ҆́гненꙋю же си́лꙋ ᲂу҆гаси́ша дᲂбрᲂдѣ́телїю пᲂѧ́савшесѧ , и҆́же бл҃гᲂче́стїѧ люби́тели ѻ҆́трᲂцы взыва́юще , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Красе́нъ и҆́з̾грᲂба вᲂста́въ , свᲂегѡ̀ бжⷭ҇тва̀ сла́вᲂю сїѧ́ѧ . а҆пⷭ҇лѡмъ свᲂи́мъ гдⷭ҇и ꙗ҆ви́лъ є҆сѝ дх҃а ѡ҆бѣща́нїе . тѣ́мъ пᲂсыла́ѧ дѣ́йство , бл҃гᲂслᲂви́те всѧ̀ дѣ́ла гдⷭ҇нѧ гдⷭ҇а . Оу҆мертви́въ а҆́да ꙗ҆́кѡ бг҃ъ , живᲂнача́льниче , всѣ́мъ и҆стᲂчи́лъ є҆сѝ живо́тъ вѣ́чныи , є҆го́же ны́нѣ вᲂѡ҆бража́ютъ свѣтлѣ́йше , свѣтᲂно́сныхъ дне́й си́хъ , ра́дᲂстнѡ вᲂпїю́щимъ , блгⷭ҇ви́те всѧ̀ дѣ́ла гдⷭ҇нѧ гдⷭ҇а . Ꙗ҆́кѡ сл҃нце хрⷭ҇тѐ пра́вдѣ ꙗ҆ви́сѧ , зарѧ̀ ми́рꙋ пᲂсла́лъ є҆сѝ а҆пⷭ҇лы свᲂѧ̀ , нᲂсѧ́ща тебѐ свѣ́та без̾сѣ́меннагѡ . и҆ неразꙋ́мїѧ мглꙋ̀ ѡ҆чища́юща , вᲂпїю́щимъ , блгⷭ҇ви́те всѧ̀ дѣ́ла гдⷭ҇нѧ гдⷭ҇а . боⷢ҇ . Сѐ нн҃ѣ ѡ҆скꙋдѣ̀ ꙗ҆́вѣ , ѿ і҆ꙋ́дина пле́мене кнѧ́зь и҆ во́ждь . ты́бо всенепᲂро́чнаѧ рᲂдила̀ є҆сѝ , пре́же ѡ҆бѣща́вшаго ѡ҆бѣтᲂва́нїѧ , и҆́же хрⷭ҇та̀ бг҃а пᲂю́щимъ , блгⷭ҇ви́те всѧ̀ дѣ́ла гдⷭ҇нѧ гдⷭ҇а .

и҆́нъ , і҆рмо́съ . А҆́нг҃ли небе́са . Прїиди́те ви́дите лю́дїе , и҆́же на престо́лѣ сла́вы вᲂспѣва́емаго , и҆́же ѿ люде́й без̾зако́нныхъ ᲂу҆ничижа́ема , и҆ ви́дѧще , по́йте , и҆́же прᲂро́ки месі́ю прᲂнарече́ннаго . Въ сꙋбо́тахъ хрⷭ҇тѐ , и҆ по всѧ̀ днѝ пᲂка́зᲂваше , зна́менїемъ дѣ́ла сᲂтвᲂрѧ́ѧ , и҆́же въ бᲂлѣ́знѣхъ разли́чныхъ . но прельще́нїи лю́дїе ꙗ҆́рᲂстїю распыха́хꙋсѧ . Раз̾сла́бленаго речѐ въ лѣ́тѣхъ мно́зѣхъ лежа́щаго , в̾ сꙋбо́тꙋ сегѡ̀ вᲂз̾ста́вилъ є҆́сть , и҆ престꙋпа́етъ зако́нъ , і҆ꙋде́и хрⷭ҇та̀ го́рькѡ ᲂу҆кᲂрѧ́хꙋ . Премꙋ́дрᲂсть ѻ҆́ч҃аѧ , препᲂлᲂви́вшꙋсѧ пра́здникꙋ , ꙗ҆́кᲂже пи́шетъ , въ цр҃кви пред̾ста̀ и҆ ᲂу҆ча́ше , ꙗ҆́кѡ вᲂи́стинꙋ се́й бѧ́ше месі́ѧ хрⷭ҇то́съ , и҆́же в̾ ми́ръ прише́дыи . Не мѡѷсе́й ли ва́мъ речѐ да́въ зако́нъ , пᲂвелѣва́ющь ѡ҆брѣ́затисѧ , и҆ в̾ сꙋбо́тꙋ чл҃ка ѡ҆брѣ́заете , да нека́кѡ зако́нъ ѻ҆те́ческїи разᲂри́тсѧ , хрⷭ҇то́съ і҆ꙋде́ѡмъ глаго́лаше . Неразꙋ́мнїи всегда̀ и҆́же въ пꙋсты́ни дре́вле прᲂгнѣ́вавшїи бл҃гᲂда́телѧ , за́вистїю прекланѧ́хꙋсѧ , хꙋ́лѧще пᲂкива́юще , непра́ведными ꙗ҆зы́ки , сꙋ́етнымъ пᲂꙋча́ющесѧ . Ты̀ є҆сѝ вᲂи́стинꙋ хрⷭ҇то́съ , и҆́же въ ми́ръ се́й прише́дыи , и҆з̾ него́ же спасе́нїе и҆ ѡ҆ставле́нїе ѻ҆те́ческимъ сᲂгрѣше́нїемъ . ты̀ є҆сѝ вᲂи́стинꙋ живо́тъ , и҆́же в̾тѧ̀ вѣ́рᲂвавшимъ . А҆пⷭ҇ли и҆нᲂгда̀ ст҃а́гѡ дх҃а дѣ́йство ѿ тебѐ прїе́мше сло́ве , по́слани бы́ша во ꙗ҆зы́цѣхъ прᲂпᲂвѣ́дати , и҆ зна́менїѧ твᲂри́ти , и҆ недꙋ́ги и҆сцѣлѧ́ти . блгⷭ҇ви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Є҆ди́нъ бг҃ъ ᲂу҆́бѡ трⷪ҇ца , ни ѻ҆ц҃ꙋ престꙋпи́вшꙋ в̾ сн҃ᲂвство̀ , ни сн҃ꙋ прело́жшꙋсѧ во и҆схᲂжде́нїе дх҃а , но ѡ҆бᲂѧ̀ во є҆ди́нствѣ , и҆ свѣ́тъ бг҃а трѝ прᲂславлѧ́ю во́ вѣки . и҆ ны́нѣ , боⷢ҇ . Ка́кѡ рᲂдила̀ є҆сѝ рцы̀ , и҆́же ѿ ѻ҆ц҃а без̾лѣ́тнѡ прᲂсїѧ́вша , и҆ со ст҃ы́мъ дх҃ᲂмъ вᲂспѣва́ема ; и҆лѝ ꙗ҆́кѡ вѣ́сть и҆́же є҆ди́нъ вᲂсхᲂтѣ̀ и҆з̾ тебѐ рᲂди́тисѧ бцⷣе .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆го̀ во́ вѣки . А҆́нг҃ли небе́са , на прⷭ҇то́лѣ сла́вы сѣдѧ́щагѡ , и҆ ꙗ҆́кѡ бг҃а непреста́нно сла́вимагѡ , блгⷭ҇ви́те по́йте , и҆ превᲂзнᲂси́те є҆гѡ̀ во́ вѣки [пᲂкло́н̾] . честнѣ́йшꙋю непᲂе́мъ .

пѣ́снь , ѳ҃ . і҆рмо́съ . Ка́мень нерꙋкᲂсѣ́чныѧ гᲂры̀ , ѿ несѣко́мыѧ тѧ дв҃цы краеꙋго́лныи ѿсѣче́сѧ хрⷭ҇то́съ , сᲂвᲂкꙋпи́въ разстᲂѧ́щаѧсѧ є҆стества̀ . тѣ́мъ веселѧ́щесѧ , тѧ бцⷣе велича́емъ . Но́вᲂмꙋ и҆ чи́стᲂмꙋ житїю̀ ѿ хрⷭ҇та̀ наꙋчи́вшесѧ , и҆ сїѐ да́же до кᲂнца̀ сᲂхрани́ти пᲂле́знѡ всѝ пᲂтщи́мсѧ , ꙗ҆́кѡ да ст҃а́гѡ дх҃а прише́ствїе прїи́мемъ . Въ нбⷭ҇нᲂе па́ки житїѐ зва́ни бы́вше , хᲂда́тайственᲂю си́лᲂю , и҆злїѧ́вшагᲂсѧ да́же и҆ до ра́бїѧ ѻ҆́браза , и҆ на́съ вᲂзне́сшагѡ , сегѡ̀ дᲂсто́йнѡ велича́емъ . Ты̀ мᲂѐ сме́ртнᲂе живᲂда́вче , ѡ҆блᲂже́нїемъ без̾сме́ртїѧ , и҆ нетлѣ́нїѧ бл҃гᲂда́тїю ѡ҆бо́лкъ сп҃се , вᲂскр҃си́лъ є҆сѝ , и҆ ѻ҆ц҃ꙋ приве́лъ є҆сѝ , вре́меннꙋю ми разрꙋши́въ бра́нь . боⷢ҇ . Ꙗ҆́кѡ ко́рень и҆сто́чникꙋ , и҆ винꙋ̀ нетлѣ́нїѧ , тебѐ дв҃о всѝ вѣ́рнїи ᲂу҆вѣ́дѣвше , пᲂхвала́ми пᲂчита́емъ . ты́ бо сᲂста́внᲂе без̾сме́ртїе на́мъ и҆стᲂчи́ла є҆сѝ .

и҆́нъ , і҆рмо́съ . Чꙋ́же є҆́сть . Пра́здникꙋ препᲂлᲂви́вшꙋсѧ і҆ꙋде́йскᲂмꙋ , в̾ше́лъ є҆сѝ сп҃се мо́й во ст҃и́лище свᲂѐ , и҆ ᲂу҆ча́ше всѣ́хъ . чꙋдѧ́хꙋжесѧ і҆ꙋде́и , гл҃ахꙋ , ѿ кꙋ́дꙋ се́й вѣ́сть кни́ги неꙋчи́всѧ . И҆сцѣле́нїѧ даро́въ и҆зба́витель мо́й и҆стᲂча́ѧ , сᲂтвᲂрѧ́ше чꙋдеса̀ и҆ зна́менїѧ , прᲂгᲂнѧ̀ недꙋ́ги и҆ и҆сцѣлѧ́ѧ бᲂлѧ́щихъ . но і҆ꙋде́и гнѣ́вахꙋсѧ мно́жествꙋ чꙋде́съ є҆гѡ̀ . А҆́ще чл҃ка ѡ҆брѣ́заете в̾ сꙋбо́тꙋ , да нека́кѡ разᲂри́тсѧ зако́нъ ; ны́нѣ намѧ̀ что̀ гнѣ́ваетесѧ , ꙗ҆́кѡ чл҃ка всего̀ здра́ва сᲂтвᲂри́хъ сло́вᲂмъ ; по́ плᲂти вы̀ сꙋ́дите , речѐ і҆ꙋде́ѡмъ хрⷭ҇то́съ . Невѣ́рныѧ і҆ꙋде́и и҆зба́витель мо́й ѡ҆блича́ѧ вᲂпїѧ́ше , несꙋди́те на лица̀ , но пра́веденъ сꙋ́дъ сꙋди́те , и҆́бо зако́нъ и҆ в̾ сꙋбо́тꙋ ѡ҆брѣ́зᲂватисѧ пᲂвелѣва́етъ всѧ́кᲂмꙋ чл҃кꙋ .= Пло́тьски і҆ꙋде́и , по́ плᲂти пᲂмышлѧ́юще писа́нїѧ , писа́нїемъ па́даютъ , ѿпа́даютъ же па́ки и҆ дх҃а и҆́стины . мы́же си́хъ ѡ҆ста́вивше , мꙋ́дрствꙋемъ дх҃о́внаѧ . Писа́нїе ꙗ҆́кᲂже в̾ пло́ти пᲂлᲂжи́сѧ , дх҃ъ и҆́же в̾ глꙋбинѣ̀ бжⷭ҇твеныхъ ра́зꙋмъ . і҆ꙋде́и же сїѧ̀ ѿри́нꙋша неразꙋ́мїемъ , ꙗ҆́кѡ пло́тьсти , и҆́бо дх҃о́внаѧ мꙋ́дрствᲂвати невᲂзмᲂго́ша . Прᲂкаже́ннᲂе ми срⷣце ѡ҆чи́стивъ , и҆ дш҃и мᲂеѧ̀ сло́ве ѻ҆́чи прᲂсвѣ́щь , на ѻ҆дрѣ̀ бᲂлѣ́зни мᲂеѧ̀ лежа́ща и҆спра́ви мѧ , ꙗ҆́кᲂже и҆ раз̾сла́бленаго и҆спра́вилъ є҆сѝ на ѻ҆дрѣ̀ лежа́щаго . И҆́же сꙋхꙋ́ю и҆сцѣли́выи рꙋ́кꙋ сло́вᲂмъ , и҆ и҆ссо́хшꙋю дре́вле зе́млю мᲂегѡ̀ срⷣца и҆сцѣли́въ сло́ве , пᲂкажи́ мѧ плᲂдᲂно́сна , да сᲂдѣ́лаю и҆ а҆́зъ сп҃се плᲂды̀ в̾ пᲂкаѧ́нїи те́плѣ . Бо́льшаѧ чꙋде́съ ᲂу҆ченико́мъ свᲂи́мъ сп҃се ѡ҆бѣща́лъ є҆сѝ пᲂда́ти , пᲂсла́лъ є҆сѝ во ꙗ҆зы́ки прᲂпᲂвѣ́дати сла́вꙋ твᲂю̀ , ѻ҆ни́ же ми́рꙋ прᲂпᲂвѣ́дахꙋ твᲂѐ бжⷭ҇тво̀ , бл҃гᲂда́ть и҆ вᲂплᲂще́нїе . =сла́ва . Чꙋ́же є҆́сть без̾зако́ннымъ сла́вити без̾нача́льнꙋю трⷪ҇цꙋ , ѻ҆ц҃а же и҆ сн҃а и҆ ст҃а́гѡ дх҃а бг҃а , несᲂзда́ннᲂе вседержа́нїе , и҆́мже ве́сь ми́ръ сᲂзда́сѧ , и҆ ᲂу҆тверди́сѧ держа́вᲂю є҆гѡ̀ . и҆ ны́нѣ , боⷢ҇ . Вмѣсти́ла є҆сѝ во ᲂу҆тро́бѣ свᲂе́й дв҃о мт҃и , є҆ди́нᲂго ѿ трⷪ҇цы хрⷭ҇та̀ цр҃ѧ , є҆го́же пᲂе́тъ всѧ̀ тва́рь , и҆ трепе́щꙋтъ го́рнїи престо́ли . тᲂгѡ̀ мᲂлѝ всечи́стаѧ спастѝ дш҃а на́ша .

катава́сїѧ : Чꙋ́же є҆́сть , мт҃ремъ дв҃ᲂю бы́ти , и҆ стра́ннѡ дв҃амъ , дѣ́ти ражда́ти , на тебѣ̀ бцⷣе ѡ҆бᲂѐ смᲂтре́нїе бы́сть . тѣ́мъ тѧ̀ всѧ̀ племена̀ земна́ѧ непреста́ннѡ велича́емъ [пᲂкло́н̾ до землѝ] . свѣти́ленъ . И҆́же ча́шꙋ и҆мѣ́ѧ не и҆стᲂщи́мыхъ сᲂкро́вищь , да́ждь ми пᲂчерпстѝ во́дꙋ , во ѡ҆ставле́нїе грѣхо́въ , ꙗ҆́кѡ сᲂдержи́мъ є҆́смь жа́ждею , бл҃гᲂꙋтро́бне є҆ди́не ще́дрыи . гⷤ .

На хвали́тѣхъ , стⷯры , на д҃ . гла́съ , д҃ . поⷣ . ꙗ҆́кѡ до́блѧ .= Премꙋ́дрᲂсть и҆ си́ла ,꙳ ѻ҆́ч҃ее сїѧ́нїе ,꙳ сло́во приснᲂсꙋ́щнᲂе сн҃ъ бж҃їи ,꙳ во ст҃и́лище прїи́де пло́тїю ,꙳ и҆ ᲂу҆ча́ше і҆ꙋде́йскїѧ наро́ды ,꙳ жесто́кїѧ и҆ неразꙋ́мныѧ .꙳ и҆ чꙋдѧ́хꙋсѧ премꙋ́дрᲂсти бᲂга́тствꙋ ,꙳ вᲂпїю́ще , ѿ кꙋ́дꙋ се́й кни́ги вѣ́сть ,꙳ ѿ чл҃къ неꙋчи́всѧ . =двⷤа . Фарисе́ѡмъ затыка́ше ᲂу҆ста̀ ,꙳ і҆ꙋде́и ѡ҆блича́ше месі́ѧ гдⷭ҇ь ,꙳ и҆ вᲂпїѧ́ше к̾ ни́мъ ,꙳ не на лица̀ без̾зако́ннїи ꙳ ꙗ҆́кѡ непра́ведни сꙋди́те .꙳ въ сꙋбо́тꙋ бо речѐ раз̾сла́бленаго вᲂз̾дви́гнꙋхъ ,꙳ ꙗ҆́кѡ гдⷭ҇ь є҆́смь сꙋбо́тѣ и҆ зако́нꙋ .꙳ что̀ и҆́щете менѐ ᲂу҆би́ти ;꙳ и҆́же ме́ртвыѧ вᲂскреси́вшагѡ . Наꙋѳі́ѧ ка́менїемъ пᲂби́ша ,꙳ лю́дїе без̾зако́ннїи ,꙳ і҆ꙋде́йскᲂе со́нмище без̾бл҃гᲂда́тнᲂе ,꙳ и҆са́їю же пило́ю древѧно́ю раз̾тро́ша .꙳ в̾ ка́лъ мꙋ́драго і҆єремі́ю в̾верго́ша .꙳ гдⷭ҇а же на крⷭ҇тъ вᲂзне́сше ,꙳ и҆ кᲂпїе́мъ ре́бра є҆гѡ̀ прᲂбо́дше ,꙳ ѻ҆чи́ма пᲂмрачи́шасѧ . сла́ва , и҆ ны́нѣ . гла́съ , д҃ . Прᲂсвѣти́вшесѧ бра́тїе вᲂскрⷭ҇нїемъ сп҃са хрⷭ҇та̀ , и҆ дᲂсти́гше препᲂлᲂве́нїѧ пра́здника влⷣчнѧ , прⷭ҇нѡ сᲂхрани́мъ за́пᲂвѣди бж҃їѧ , да дᲂсто́йни бꙋ́демъ и҆ вᲂзнесе́нїе пра́зднᲂвати , и҆ прише́ствїе пᲂлꙋчи́ти ст҃а́гѡ дх҃а . Славᲂсло́вїе вели́кᲂе . трᲂпа́рь , пра́здникꙋ . є҆ктенїѝ . и҆ ѿпꙋ́стъ .

На часѣ́хъ , трᲂпа́рь , и҆ кᲂнда́къ , пра́здникꙋ .

На литꙋргі́и , бл҃же́нна , на́ и҃ . ѿ кано́на , пра́здникꙋ , пѣ́снь , г҃ , и҆ ѕ҃ . По вхо́дѣ : трᲂпа́рь , пра́здникꙋ . сла́ва , и҆ ны́нѣ , кᲂнда́къ , пра́здникꙋ . прᲂки́менъ , ѱл҃о́мъ дв҃дᲂвъ . ве́лїи гдⷭ҇ь на́шъ и҆ ве́лїѧ крѣ́пᲂсть є҆гѡ̀ , и҆ ра́зꙋмꙋ є҆гѡ̀ нѣ́сть числа̀ . сти́хъ : хвали́те гдⷭ҇а ꙗ҆́кѡ бл҃гъ ѱл҃о́мъ , бг҃ᲂви на́шемꙋ , да наслади́тсѧ хвале́нїе . а҆пⷭ҇лъ , въ дѣѧ́нїихъ . заⷱ҇ , л҃д . а҆ллилꙋ́їѧ . пᲂмѧнѝ со́нмъ тво́й , є҆го́же є҆сѝ стѧжа́лъ и҆спе́рва .= сти́хъ : бг҃ъ же цр҃ь на́шъ пре́жде вѣ́къ , сᲂдѣ́ла спасе́нїе пᲂсредѣ̀ землѝ . =є҆ѵⷢ҇а́лїе , ѿ і҆ѡа́нна . заⷱ҇ , к҃ѕ . прича́стенъ . ꙗ҆ды́и мᲂю̀ пло́ть , и҆ пїѧ́и мᲂю̀ кро́вь , во мнѣ̀ пребыва́етъ и҆ а҆́зъ в̾ не́мъ , речѐ гдⷭ҇ь .

Въ тꙋ́же , сре́дꙋ , препᲂлᲂве́нїѧ , ве́черъ . на гдⷭ҇и вᲂзва́хъ , стⷯры , пра́здникꙋ , г҃ . гла́съ , д҃ . поⷣ . и҆́же зва́нныи свы́ше .= Р=азᲂри́выи держа́вꙋ сме́рти хрⷭ҇тѐ ,꙳ сме́ртїю свᲂе́ю ,꙳ жи́знь пᲂдадѐ чл҃кѡмъ ,꙳ въ сла́внѣмъ вᲂста́нїи твᲂе́мъ ,꙳ сᲂвᲂздви́глъ є҆сѝ ро́дъ чл҃ческїи ,꙳ сᲂше́ствїемъ свᲂи́мъ .꙳ тѣ́мже бл҃гᲂда́рственꙋю хвалꙋ̀ тебѣ̀ пᲂе́мъ ,꙳ пра́здникъ пра́зднꙋющїи ,꙳ тридне́внагѡ и҆ свѣтᲂно́снагѡ ти вᲂста́нїѧ ,꙳ в̾ ѻ҆́нь же препᲂлᲂве́нїе всечⷭ҇тны́хъ ны́нѣ дні́й на́мъ всѣ́мъ прᲂсїѧ̀ ,꙳ і҆с҃е жизнᲂда́вче , бл҃гᲂда́телю дш҃а́мъ на́шимъ . Пре́жде чⷭ҇тна́гѡ крⷭ҇та̀ твᲂегѡ̀ и҆ стра́сти ,꙳ чꙋдесе́мъ пресла́внаѧ сᲂверша́ѧ въ лю́дехъ ,꙳ въ пра́здникъ зако́нныи ꙗ҆́кᲂже пи́шетъ ,꙳ пᲂсредѣ̀ ста́лъ є҆сѝ хрⷭ҇тѐ всеси́льне ,꙳ и҆ всѣ́мъ вᲂзᲂпи́лъ є҆сѝ ,꙳ а҆́ще кто̀ жа́ждетъ , ко мнѣ̀ да прїи́детъ ,꙳ хᲂтѧ́и пи́ти во́дꙋ бжⷭ҇твенагѡ пи́ва ,꙳ и҆ да пᲂче́рпнетъ жи́зненыѧ вᲂды̀ ,꙳ жи́зни бо во́дꙋ , и҆ си́лы ꙳ и҆ премꙋ́дрᲂсти , а҆́зъ всѣ́мъ пᲂда́мъ ,꙳ ꙗ҆́кѡ вᲂсхᲂтѣ́хъ чл҃кѡмъ ᲂу҆пᲂдо́битисѧ , ꙗ҆́кѡ чл҃кᲂлю́бецъ . Ꙗ҆́кѡ на ѻ҆дрѣ́ мѧ лежа́ща бᲂлѣ́зни ,꙳ сᲂгрѣше́нїи мᲂи́хъ ,꙳ и҆ ѡ҆палѧ́емь прегрѣше́ньми .꙳ ꙗ҆́кѡ за вели́кꙋю чл҃кᲂлю́бїѧ пꙋчи́нꙋ ,꙳ хрⷭ҇тѐ мнᲂгᲂми́лᲂстиве , чл҃къ во́лею бы́въ ,꙳ ны́нѣ неви́димо мѧ ꙗ҆́кᲂже разсла́бленагѡ вᲂздви́гни ,꙳ и҆ стезѧ́ми бжⷭ҇твеныхъ за́пᲂвѣдей твᲂи́хъ тещѝ сбᲂдо́би .꙳ и҆́же пре́жде страсте́й сп҃се ,꙳ лю́демъ є҆вре́йскимъ ,꙳ чꙋде́сными мно́жествы ᲂу҆вѣрѧ́емь ,꙳ ꙗ҆́кѡ бг҃ъ сы́и во́лею пᲂстрада́лъ є҆сѝ пло́тїю .

та́же , стихѣ́ры , в̾ минѣ́и , г҃ . сла́ва , и҆ ны́нѣ . гла́съ , в҃ . Є҆гда̀ прїи́де во ст҃и́лище хрⷭ҇тѐ бж҃е , препᲂлᲂви́вшꙋсѧ пра́здникꙋ , тᲂгда̀ лю́ди ᲂу҆ча́ше вᲂпїѧ̀ , вѣ́рꙋѧи в̾ мѧ̀ а҆́ще и҆ ᲂу҆́мретъ жи́въ бꙋ́детъ . і҆ꙋде́и же распыха́хꙋсѧ , с̾ фарисе́и и҆ сад̾дꙋке́и и҆ кни́жники гл҃юще , кто̀ се́й и҆́же гл҃етъ хꙋлы̀ , непᲂмышлѧ́юще ꙗ҆́кѡ ты̀ є҆сѝ и҆́же пре́жде вѣ́къ , со ѻ҆ц҃е́мъ и҆ дх҃ᲂмъ прᲂславлѧ́емыи . бж҃е на́шъ сла́ва тебѣ̀ .

На стихо́внѣ , стихѣ́ры . гла́съ , г҃ . Стра́стїю твᲂе́ю хрⷭ҇тѐ , ѡ҆мрачи́выи сл҃нце , и҆ свѣ́тᲂмъ твᲂегѡ̀ вᲂскрⷭ҇нїѧ , прᲂсвѣще́и всѧ́ческаѧ , прїимѝ на́шꙋ вече́рнюю пѣ́снь чл҃кᲂлю́бче .

сти́хъ : к̾ тебѣ̀ вᲂз̾ведо́хъ ѻ҆́чи мᲂѝ . Во всю̀ зе́млю и҆зы́де вѣща́нїе ва́ше ст҃і́и а҆пⷭ҇ли , и҆́дᲂльскꙋю бо ле́сть разᲂри́сте , бг҃ᲂразꙋ́мїе прᲂпᲂвѣ́давше , сѐ до́брыи по́двигъ ва́шъ є҆́сть бл҃же́ннїи . тѣ́мже пᲂе́мъ и҆ сла́вимъ ва́ша па́мѧти .

сти́хъ : пᲂми́лꙋй на́съ гдⷭ҇и . мⷱ҇ꙋ . Мч҃нцы твᲂѝ гдⷭ҇и вѣ́рᲂю ᲂу҆тве́рждьшесѧ , и҆ наде́ждею ᲂу҆крѣпи́вшесѧ , любо́вїю же крⷭ҇та̀ твᲂегѡ̀ дш҃е́внѡ сᲂє҆дини́вшесѧ , вра́жїе мꙋчи́тельство разрꙋши́ша , и҆ ᲂу҆лꙋчи́вше вѣнцы̀ со беспло́тными , и҆ мо́лѧтсѧ ѡ҆ дш҃а́хъ на́шихъ .

сла́ва , и҆ ны́нѣ . гла́съ , г҃ . Препᲂлᲂви́вшꙋсѧ пра́здникꙋ , сла́вимъ и҆́же пᲂсредѝ землѝ спасе́нїе сᲂдѣ́лавшаго . пᲂсредѣ́ бо двᲂю̀ разбо́йникꙋ , живо́тъ на́ древѣ ви́сѧщь , и҆ ѻ҆́вᲂмꙋ ᲂу҆́бѡ хꙋ́лѧщꙋ , мᲂлча́ше , вѣ́рꙋющемꙋ же вᲂпїѧ́ше , дне́сь со мно́ю бꙋ́деши в̾ раѝ . сᲂше́лъ є҆сѝ во́ грᲂбъ , плѣни́лъ є҆сѝ а҆́да , и҆ вᲂскре́се тридне́венъ , спаса́ѧ дш҃а на́ша .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . и҆ =ѿпꙋ́стъ .

Въ четверто́къ , д҃ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , три́жды . =По а҃ , стихᲂло́гїи , сѣда́ленъ . гла́съ , г҃ . Хрⷭ҇то́съ ѿ ме́ртвыхъ вᲂста̀ , нача́тᲂкъ ᲂу҆со́пшимъ бы́сть , пе́рвенецъ тва́ри , и҆ сᲂдѣ́тель всѣ́мъ бы́вшимъ . и҆стлѣ́вшее є҆стество̀ ро́да на́шегѡ , сᲂбо́ю ѡ҆бнᲂвѝ . не к̾ тᲂмꙋ̀ сме́рте ѡ҆блада́еши , и҆́бо всѣ́хъ влⷣка держа́вꙋ твᲂю̀ разрꙋшѝ . =сти́хъ : во всю̀ зе́млю и҆зыдо́ша вѣща́нїѧ и҆́хъ , и҆ в̾ кᲂнцы̀ вселе́нныѧ гл҃ы и҆́хъ . А҆пⷭ҇лъ твᲂи́хъ па́мѧть гдⷭ҇и , ᲂу҆ѧсни́лъ є҆сѝ ꙗ҆́кѡ всеси́ленъ , ꙗ҆́кѡ ᲂу҆крѣпи́лъ є҆сѝ и҆́хъ страсте́мъ твᲂи́мъ пᲂдо́битисѧ , пᲂбѣди́ша мꙋ́жески вра́жїю си́лꙋ , тѣ́мже и҆ прїѧ́ша и҆сцѣле́нїемъ бл҃гᲂда́ти . тѣ́хъ мл҃твами чл҃кᲂлю́бче , ми́ръ пᲂда́ждь лю́демъ твᲂи́мъ . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Страстᲂте́рпцы ст҃і́и , мᲂли́те млⷭ҇тивагѡ бг҃а , да сᲂгрѣше́нїемъ ѡ҆ставле́нїе пᲂда́стъ дш҃а́мъ на́шимъ .= сла́ва , и҆ ны́нѣ , боⷢ҇ . П=рᲂро́цы прᲂпᲂвѣ́даша , а҆пⷭ҇ли наꙋчи́ша , мч҃нцы и҆спᲂвѣ́даша , и҆ мы̀ вѣ́рᲂвахᲂмъ , бцⷣꙋ тѧ̀ вᲂи́стинꙋ сꙋ́щꙋю . тѣ́мже и҆ велича́емъ ржⷭ҇тво̀ твᲂѐ несказа́ннᲂе .

По в҃ , стихᲂло́гїи , сѣда́ленъ . гла́съ , и҃ . Премꙋ́дрᲂсти во́дꙋ жи́зни , и҆стᲂча́ѧ ми́рꙋ всемꙋ̀ сп҃се , призыва́еши пᲂчерпьстѝ спасе́нїѧ во́ды , бжⷭ҇твеныи бо тво́й зако́нъ прїе́мъ чл҃къ , тѣ́мъ ᲂу҆гаша́етъ преле́стнᲂе ᲂу҆́глїе , тѣ́мже во́ вѣки не в̾жа́ждетсѧ ни прїи́метъ сы́тᲂсти твᲂеѧ̀ влⷣко цр҃ю нбⷭ҇ныи . сегѡ̀ ра́ди сла́вимъ держа́вꙋ твᲂю̀ хрⷭ҇тѐ бж҃е , сᲂгрѣше́нїемъ ѡ҆ставле́нїе прᲂсѧ́ще , пᲂсла́ти бᲂга́тнѡ рабо́мъ твᲂи́мъ . сла́ва , и҆ ны́нѣ , то́йже .

та́же , вᲂскрⷭ҇нїе хрⷭ҇то́во , аⷤ . ѱл҃о́мъ , н҃ . кано́нъ , пра́здникꙋ , на и҃ . и҆ в̾ минѣ́и , на д҃ .

На хвали́тѣхъ , стⷯры , на д҃ . гла́съ , г҃ . Во́ свѣтѣ твᲂе́мъ влⷣко , ᲂу҆́зримъ свѣ́тъ чл҃кᲂлю́бче , вᲂскр҃се бо и҆з̾ ме́ртвыхъ , спасе́нїе ро́дꙋ чл҃ческᲂмꙋ да́рꙋѧ . да тѧ̀ всѧ̀ тва́рь сла́витъ є҆ди́нагѡ без̾сме́ртнагѡ , пᲂми́лꙋй на́съ . двⷤа . Хрⷭ҇то́вы за́пᲂвѣди , непᲂро́чнѡ сᲂхра́нше ст҃і́и а҆пⷭ҇ли , тꙋ́не прїѧ́сте тꙋ́не пᲂдава́ете , и҆сцѣлѧ́юще стра́сти дꙋ́шъ и҆ тѣле́съ на́шихъ . тѣ́мже и҆мꙋ́ще дерзнᲂве́нїе , тᲂгѡ̀ мᲂли́те , пᲂми́лᲂватисѧ дш҃а́мъ на́шимъ . мⷱ҇ꙋ . Ꙗ҆́кѡ свѣти́ла въ ми́рѣ сїѧ́ете , и҆ по сме́рти ст҃і́и мч҃нцы , по́двигᲂмъ до́брымъ пᲂдвиза́стесѧ , и҆мꙋ́ще дерзнᲂве́нїе , хрⷭ҇та̀ мᲂли́те , пᲂми́лᲂватисѧ дш҃а́мъ на́шимъ . сла́ва , и҆ ны́нѣ . гла́съ , д҃ . Гдⷭ҇и , пре́жде чⷭ҇тна́гѡ ти крⷭ҇та̀ , пра́здникꙋ препᲂлᲂви́вшꙋсѧ , во ст҃и́лище в̾ше́лъ є҆сѝ , і҆ꙋде́и со дерзнᲂве́нїемъ ᲂу҆ча̀ , ꙗ҆́же мѡѷсе́ᲂмъ в̾ зако́нѣ тᲂбо́ю закᲂнᲂпᲂлᲂже́нїѧ . дивѧ́щим̾жесѧ хрⷭ҇тѐ твᲂе́й премꙋ́дрᲂсти пречⷭ҇тᲂмꙋ та́инствꙋ , и҆́же натѧ̀ рᲂпта́нїемъ в̾ себѣ̀ , и҆ за́вистїю пᲂꙋча́хꙋсѧ , гл҃юще , ка́кѡ се́й вѣ́сть кни́ги неꙋчи́всѧ ; невѣ́дѧще тебѐ сп҃са дш҃а́мъ на́шимъ .

На стихо́внѣ , стихѣ́ры . гла́съ , в҃ . поⷣ . до́ме є҆вфра́фᲂвъ .= В=о ст҃и́лище ꙳ в̾ше́лъ є҆сѝ сп҃се мо́й ,꙳ пра́здникꙋ препᲂлᲂви́вшꙋсѧ ,꙳ ᲂу҆ча̀ и҆ ѡ҆блича́ѧ ,꙳ є҆вре́йскᲂе безꙋ́мїе .

сти́хъ : пᲂмѧнѝ со́нмъ тво́й ,꙳ и҆́же стѧжа̀ и҆спе́рва . А҆́ще кто̀ ны́нѣ жа́ждетъ ,꙳ гдⷭ҇ь вᲂпїѧ́ше ,꙳ да грѧде́тъ и҆ пїе́тъ ꙳ во́дꙋ жи́зни ми́рᲂви ,꙳ и҆ не в̾жа́ждетсѧ никᲂли́же .

сти́хъ : бг҃ъ же цр҃ь на́шъ пре́же вѣ́къ ,꙳ сᲂдѣ́ла спасе́нїе пᲂсредѣ̀ землѝ . Вᲂда̀ жи́зни хрⷭ҇тѐ ,꙳ и҆ и҆сто́чникъ без̾сме́ртїѧ ,꙳ напо́й весе́лїѧ ꙳ срⷣце мᲂѐ жа́ждꙋщее ,꙳ жи́зни свᲂеѧ̀ бескᲂне́чныѧ . сла́ва , и҆ ны́нѣ . гла́съ , и҃ . Препᲂлᲂви́вшꙋсѧ пра́здникꙋ па́схи , в̾ цр҃квь вше́лъ є҆сѝ ст҃и́лища сп҃се на́шъ , и҆ ста́въ пᲂсредѣ̀ наро́да , ᲂу҆ча́ше и҆́хъ со дерзнᲂве́нїемъ , и҆ гл҃аше , а҆́зъ є҆́смь свѣ́тъ ми́рꙋ , и҆́же въ слѣ́дъ менѐ грѧде́тъ , не и҆́мать хᲂди́ти во тмѣ̀ , но и҆́мать свѣ́тъ без̾сме́ртныѧ жи́зни .

та́же , бл҃го є҆́сть . и҆ ча́съ , а҃ . и҆ ѿпꙋ́стъ .

На бл҃же́ннах̾ , трипѣ́снец̾ , є҆мꙋ́же краегране́сїе : хвала̀ гдⷭ҇ви . гла́съ , г҃ . пѣ́снь , д҃ . і҆рмо́съ . присѣ́ннꙋю го́рꙋ .

во црⷭ҇твїи сѝ є҆гда̀ прїи́деши , пᲂмѧнѝ на́съ гдⷭ҇и . бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Не и҆зрече́ннымъ свᲂи́мъ сᲂвᲂкꙋпле́нїемъ , ᲂу҆пᲂдо́бивсѧ чл҃кѡмъ и҆́же є҆ди́нъ пресꙋ́щныи , крⷭ҇тъ пло́тїю претерпѣ́въ , и҆ в̾мѣни́сѧ въ ме́ртвыхъ , и҆ тридне́внѡ вᲂскр҃се жи́знь всѣ́хъ .

=бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . =

с҃е бж҃е на́шъ , вᲂда̀ жи́зни сы́и , ше́ствꙋеши трꙋжа́ѧсѧ во́ плᲂти ко и҆сто́чникꙋ . сᲂсѣда́еши же , и҆ самарѧны́нѣ женѣ̀ , премꙋ́дрᲂсти твᲂеѧ̀ во́дꙋ та́йнѡ прᲂлива́еши .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . Недꙋ́ги разли́чныѧ , прихᲂдѧ́щихъ к̾ тебѣ̀ сло́ве ѡ҆чища́ѧ пᲂвелѣ́нїемъ си . крⷭ҇тъ во́лею претерпѣ́лъ є҆сѝ , и҆ во́ грᲂбѣ пᲂлᲂжи́всѧ , и҆ вᲂскр҃си́лъ є҆сѝ є҆стество̀ чл҃ческᲂе и҆стлѣ́вшее .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . боⷢ҇ . На тѧ̀ премꙋ́дрᲂсть ѻ҆ц҃а без̾нача́льнагѡ сни́де , ꙗ҆́кѡ до́ждь на рꙋно̀ чи́стаѧ , и҆ вᲂпло́щьсѧ крᲂмѣ̀ прелᲂже́нїѧ , пꙋтѝ жи́зненыѧ пᲂказа̀ на́мъ , вѣ́дѧщимъ тѧ дв҃ꙋю по ржⷭ҇твѣ̀ и҆ мт҃рь .

пѣ́снь , и҃ . і҆рмо́съ . сᲂше́дшагѡ со ѻ҆́трᲂки .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Ты̀ на крⷭ҇тъ вᲂзне́слъсѧ , чл҃ческᲂе є҆стество̀ сᲂвᲂзне́слъ є҆сѝ сло́ве , и҆ пᲂлᲂжи́всѧ во́ грᲂбѣ , и҆́же во грᲂбѣ́хъ спѧ́щїѧ вᲂздви́глъ є҆сѝ , бжⷭ҇твенымъ вᲂста́нїемъ сѝ ще́дре .

=бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . =

єрихѡ́на и҆ сали́ма бли́жнѧѧ , съ вᲂда́ми мно́гими преше́дъ , къ стꙋденцꙋ̀ і҆а́кѡвлю прїи́де , и҆сто́чникъ премꙋ́дрᲂсти , во́дꙋ спасе́нїѧ самарѧны́ни даѧ̀ .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . Ты̀ и҆́же слѣпцы̀ прᲂсвѣти́въ сло́вᲂмъ и҆ раз̾сла́бленыхъ пᲂвелѣ́нїемъ сѝ стѧ́гнꙋвъ , и҆ ме́ртвъ тридне́внѡ вᲂз̾сїѧ̀ и҆́з̾ грᲂба , ᲂу҆мерщве́нꙋю вᲂскр҃сѝ дш҃ꙋ мᲂю̀ .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . боⷢ҇ . Ми́рꙋ всемꙋ̀ бцⷣе мр҃і́е , ты̀ є҆сѝ прибѣ́жище , мирски́хъ мѧ̀ сᲂбла́знъ и҆ страсте́й тѣле́сныхъ , и҆ вѣ́чнꙋющїѧ и҆зба́ви гее́ны , ꙗ҆́кѡ да пѣснᲂсла́влю тѧ̀ .

пѣ́снь , ѳ҃ . і҆рмо́съ . тебѐ не ѡ҆пали́мꙋю кꙋпинꙋ̀ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . Прᲂсте́рлъ є҆сѝ дла́ни на́ древѣ , ѕлѣ̀ прᲂсте́ршихсѧ пра́ѻ҆ц҃а рꙋ́къ , к̾ дре́ва снѣ́ди , пᲂтреблѧ́ѧ вре́дъ , хрⷭ҇тѐ мнᲂгᲂмлⷭ҇тиве .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Гл҃ᲂмъ раз̾сла́бленаго стѧ́гнꙋвъ хрⷭ҇тѐ , и҆ хрᲂмы́хъ и҆спра́вивъ . распѧ́тсѧ і҆с҃е и҆ вᲂскр҃се , ᲂу҆ченико́мъ на мно́ги днѝ ꙗ҆влѧ́ѧсѧ .

сла́ва . Ви́дѣ самарѧны́нѧ жена̀ тебѐ , прише́дши пᲂчерпьстѝ , и҆ во́дꙋ жи́зни ѿ тебѐ прїе́мши , насы́тисѧ , хрⷭ҇тѐ бж҃е , вᲂспѣва́ющи тѧ .

и҆ ны́нѣ , боⷢ҇ . Ѽ и҆́же па́че ᲂу҆ма̀ , твᲂи́хъ чꙋде́съ прест҃а́ѧ дв҃о . ты́ бо рᲂдила̀ є҆сѝ бг҃а вᲂплᲂще́нна , и҆́же бжⷭ҇твенымъ вᲂста́нїемъ свᲂи́мъ всѣ́хъ спа́сша .

Въ то́йже , четверто́къ , ве́черъ . на гдⷭ҇и вᲂзва́хъ , стихѣ́ры , пра́здникꙋ , г҃ . гла́съ , а҃ . поⷣ . нбⷭ҇нымъ чино́мъ . Пѧтьдесѧ́тницы наста́вши , препᲂлᲂве́нїе дне́мъ ,꙳ в̾ не́й же хрⷭ҇то́съ сло́во бжⷭ҇твенᲂю си́лᲂю ,꙳ раз̾сла́бленаго стѧ́гнꙋ сло́вᲂмъ свᲂи́мъ ,꙳ и҆ бл҃гᲂтече́нїе дарᲂва̀ .꙳ сла́ва вᲂпїю́щꙋ бл҃гᲂꙋтро́бнѣй твᲂе́й ,꙳ є҆́же к̾ на́мъ во́льнѣй бл҃гᲂсты́ни . И҆́же сы́и со ѻ҆ц҃е́мъ по пᲂдо́бїю ,꙳ пᲂсредѝ пра́здника к̾ на́мъ прише́дъ ,꙳ грѣ́хъ хᲂтѧ̀ ѿѧ́ти про́чее ,꙳ вᲂпло́щьсѧ прише́лъ є҆сѝ ,꙳ без̾грѣ́шно бо сїѐ прїе́мъ ,꙳ ꙗ҆́кѡ чл҃кᲂлю́бецъ ꙗ҆ви́лсѧ є҆сѝ . Є҆гда̀ в̾ препᲂлᲂве́нїе пра́здникꙋ бл҃гі́и ,꙳ в̾шелъ є҆сѝ сп҃се мо́й во ст҃и́лище свᲂѐ ,꙳ непᲂкᲂри́выѧ ᲂу҆ча̀ ,꙳ а҆́ще кто̀ жа́ждетъ і҆ꙋде́ѡмъ взыва́ше и҆зба́вителю ,꙳ да пїе́тъ во́дꙋ жи́зни ,꙳ и҆ не в̾жа́ждетсѧ никᲂли́же .

та́же , стихѣ́ры , в̾ минѣ́и , г҃ . сла́ва , и҆ ны́нѣ . гла́съ , и҃ . Ѡ҆чи́стимъ пᲂмышле́нїемъ сᲂкро́вища , и҆ дш҃е́внаѧ сїѧ́нїѧ ѡ҆зари́мъ , и҆ жи́знь ᲂу҆́зримъ хрⷭ҇та̀ во ст҃и́лище прише́дша , премно́жествᲂмъ бл҃гᲂсти , да врага̀ пᲂсрами́тъ , и҆ спасе́тъ ро́дъ на́шъ , стрⷭ҇тїю крⷭ҇тнᲂю и҆ вᲂскрⷭ҇нїемъ . к̾ немꙋ́ же вᲂзᲂпїе́мъ , непᲂсти́жиме гдⷭ҇и сла́ва тебѣ̀ .

На стихо́внѣ , стихѣ́ры . гла́съ , г҃ . Крⷭ҇тꙋ̀ твᲂемꙋ̀ пᲂклᲂнѧ́емсѧ хрⷭ҇тѐ честно́мꙋ , сᲂхра́нникꙋ ми́рᲂви , спасе́нїю на́мъ грѣ́шнымъ , и҆ вели́кᲂмꙋ ѡ҆чище́нїю , цр҃е́мъ пᲂбѣ́дѣ , и҆ пᲂхвале́нїю все́й вселе́ннѣй .

сти́хъ : к̾ тебѣ̀ вᲂзведо́хъ ѻ҆́чи мᲂѝ . Твᲂи́мъ крⷭ҇то́мъ хрⷭ҇тѐ сп҃се , сме́рти держа́ва разрꙋши́сѧ , и҆ дїа́вᲂлѧ ле́сть ᲂу҆праздни́сѧ . ро́дъ же чл҃ческїи вѣ́рᲂю спаса́емь , пѣ́снь ти всегда̀ прино́ситъ .

сти́хъ : пᲂми́лꙋй на́съ гдⷭ҇и . мⷱ҇ꙋ . Ве́лїѧ крⷭ҇та̀ твᲂегѡ̀ гдⷭ҇и си́ла , вᲂдрꙋзи́бᲂсѧ на мѣ́стѣ , и҆ дѣ́йствꙋетъ в̾ ми́рѣ , и҆ пᲂказа̀ ѿ ры́барей а҆пⷭ҇лы , и҆ ѿ ꙗ҆зы́къ мч҃нки , да мо́лѧтсѧ ѡ҆ дш҃а́хъ на́шихъ . сла́ва , и҆ ны́нѣ . гла́съ , а҃ . Пѧтьдесѧ́тницы наста̀ дне́мъ препᲂлᲂве́нїе , в̾ ню́же хрⷭ҇то́съ ѡ҆бнажи́въ смᲂтрели́внѡ бжⷭ҇твенꙋю си́лꙋ , раз̾сла́бленаго стѧ́гнꙋ сло́вᲂмъ , и҆ тᲂгѡ̀ ѿ ѻ҆дра̀ вᲂз̾ста́вивъ , бг҃ᲂлѣ́пнѡ чꙋ́до твᲂрѧ̀ вᲂз̾да́ннѣмъ тѣ́лѣ . чл҃кѡмъ же дарᲂва̀ вѣ́чныи живо́тъ , и҆ велїю млⷭ҇ть .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . и҆ =ѿпꙋ́стъ .

Въ пѧто́къ , д҃ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , три́жды . =По а҃ , стихᲂло́гїи , сѣда́ленъ . гла́съ , г҃ . Крⷭ҇тъ вᲂдрꙋзи́сѧ на землѝ , и҆ кᲂснꙋ́сѧ нб҃сѝ , не ꙗ҆́кѡ дре́вꙋ дᲂсѧ́гшꙋ высᲂты̀ , но тебѣ̀ и҆́же на не́мъ и҆спᲂлнѧ́ющемꙋ всѧ́ческаѧ , гдⷭ҇и сла́ва тебѣ̀ . =сти́хъ : вᲂзнᲂси́те гдⷭ҇а бг҃а на́шегѡ , и҆ кла́нѧйтесѧ пᲂдно́жїю но́гꙋ є҆гѡ̀ ꙗ҆́кѡ ст҃о є҆́сть . Пло́тїю сме́рти в̾кꙋ́шь гдⷭ҇и , го́ресть сме́ртнꙋю пресѣчѐ вᲂста́нїемъ свᲂи́мъ , и҆ чл҃ка на ню̀ ᲂу҆крѣпѝ , дре́внїѧ клѧ́твы , пᲂбѣжде́нїе призыва́ѧ . защи́тниче жи́зни на́шеѧ , хрⷭ҇тѐ бж҃е сла́ва тебѣ̀ . сти́хъ : ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . мⷱ҇ꙋ . Бл҃гᲂдꙋ́шнᲂе терпѣ́нїѧ ва́шегѡ , пᲂбѣдѝ ко́зни ѕлᲂнача́льнагѡ врага̀ , мч҃нцы прехва́льнїи , сегѡ̀ ра́ди вѣ́чнᲂмꙋ спᲂдо́бистесѧ бл҃же́нствꙋ . но мᲂли́тесѧ гдⷭ҇ви , хрⷭ҇тᲂлюби́выхъ люде́й спастѝ ста́до , мч҃нцы сꙋ́ще и҆́стины . сла́ва , и҆ ны́нѣ , крⷭ҇тᲂбоⷢ҇ . Же́злъ си́лы стѧжа́вше , крⷭ҇тъ сн҃а твᲂегѡ̀ бцⷣе , тѣ́мъ низ̾лага́емъ вра́жїѧ шата́нїѧ , ꙗ҆́кѡ да непреста́ннѡ тѧ̀ велича́емъ .

По в҃ , стихᲂло́гїи , сѣда́ленъ . гла́съ , и҃ . Премꙋ́дрᲂсти сло́во ѻ҆ц҃а , и҆́же и҆ да́въ а҆пⷭ҇лѡмъ гл҃ъ бж҃їи , прᲂпᲂвѣ́дати кᲂнце́мъ , и҆́же на землѝ тᲂгѡ̀ прише́ствїе . ѿ прельще́нныхъ є҆вре́й мр҃і́ѧ ᲂу҆карѧ́шесѧ , гдⷭ҇ь же ꙗ҆́кѡ льсте́цъ и҆ бѣ́съ и҆мѣ́ѧ , ᲂу҆жа́снѡ ᲂу҆ничижа́емь , и҆ ꙗ҆́кѡ неѕло́бивъ к̾ ни́мъ вᲂпїѧ́ше , несꙋди́ти нераз̾сꙋ́денъ сꙋ́дъ на мѧ̀ без̾зако́ннїи . к̾ немꙋ̀ ᲂу҆́бѡ вᲂзᲂпїе́мъ , чл҃кᲂлю́бче хрⷭ҇тѐ бж҃е , сᲂгрѣше́нїемъ ѡ҆ставле́нїе низ̾пᲂслѝ , вᲂспѣва́ющимъ вѣ́рᲂю не и҆зрече́ннꙋю сла́вꙋ твᲂю̀ . сла́ва , и҆ ны́нѣ , то́йже .

та́же , вᲂскрⷭ҇нїе хрⷭ҇то́во , аⷤ . ѱл҃о́мъ , н҃ . кано́нъ , пра́здникꙋ , на и҃ . и҆ в̾ минѣ́и , на д҃ .

На хвали́тѣхъ , стихѣ́ры , на д҃ . гла́съ , г҃ . Дре́во преслꙋша́нїѧ ми́рᲂви сме́рть прᲂзѧбѐ , дре́во же крⷭ҇тнᲂе живо́тъ и҆ нетлѣ́нїе дарᲂва̀ . тѣ́мже тебѐ мо́лимъ распе́ншагᲂсѧ гдⷭ҇а , да зна́менаетсѧ на на́съ свѣ́тъ лица̀ твᲂегѡ̀ . двⷤа . Прїиди́те всѝ ꙗ҆зы́цы , разꙋмѣ́йте стра́шныѧ та́йны си́лꙋ . хрⷭ҇то́съ бо сп҃съ на́шъ , и҆́же и҆спе́рва сы́и сло́во , распѧ́тсѧ на́съ ра́ди , и҆ во́лею пᲂгребе́сѧ , и҆ вᲂскр҃се и҆з̾ ме́ртвыхъ , є҆́же спастѝ всѧ́ческаѧ , тᲂмꙋ̀ пᲂклᲂни́мсѧ [пᲂкло́н̾] . мⷱ҇ꙋ . Ст҃ы́хъ страстᲂте́рпецъ па́мѧть , прїиди́те лю́дїе всѝ пᲂчте́мъ , ꙗ҆́кѡ пᲂзо́ръ бы́ша а҆́нг҃лѡмъ и҆ чл҃кѡмъ . пᲂбѣ́ды вѣнцы̀ ѿ хрⷭ҇та̀ прїѧ́ша , и҆ мо́лѧтсѧ ѡ҆ дш҃а́хъ на́шихъ . сла́ва , и҆ ны́нѣ . гла́съ , а҃ . Во ст҃и́лище прише́лъ є҆сѝ премꙋ́дрᲂсте бж҃їѧ , препᲂлᲂвлѧ́ющꙋсѧ пра́здникꙋ , ᲂу҆ча̀ и҆ ѡ҆блича́ѧ невѣ́рныѧ і҆ꙋде́и , фарисе́и и҆ кни́жники , и҆ вᲂпїѧ̀ со дерзнᲂве́нїемъ к̾ ни́мъ , жа́ждаи да грѧде́тъ ко мнѣ̀ , и҆ пїе́тъ во́дꙋ живо́тнꙋ , и҆ не вжа́ждетъ во́ вѣки . вѣ́рꙋѧи мᲂе́й бл҃гᲂсти , рѣ́ки пᲂтекꙋ́тъ и҆́з̾ чрева є҆гѡ̀ жи́зни вѣ́чнаѧ . ѽ бл҃гᲂсти и҆ бл҃гᲂꙋтро́бїѧ твᲂегѡ̀ , хрⷭ҇тѐ бж҃е на́шъ сла́ва тебѣ̀ .

На стихо́внѣ , стихѣ́ры . гла́съ , ѕ҃ . поⷣ . в̾ =тре́тїи де́нь . П=ᲂсредѣ̀ ста́въ сп҃съ ст҃и́лища и҆ вᲂпїѧ́ше ,꙳ ꙗ҆́кѡ влⷣка всѧ́ческимъ и҆ и҆зба́витель ,꙳ да грѧде́тъ и҆ пїе́тъ во́дꙋ без̾сме́ртїѧ ,꙳ и҆ не в̾жа́ждетсѧ ,꙳ ꙗ҆́кᲂже пи́сано є҆́сть .

сти́хъ : пᲂмѧнѝ со́нмъ тво́й ,꙳ и҆́же стѧжа̀ и҆спе́рва . И҆́же всѧ́ческимъ ꙳ гдⷭ҇ь и҆ твᲂре́цъ чл҃кᲂлю́бецъ ,꙳ прихᲂдѧ́щимъ вᲂпїѧ́ше чꙋ́днѣ ,꙳ грѧди́те жа́ждꙋщїи ,꙳ пᲂчерпи́те во́ды щедро́тъ мᲂи́хъ пᲂдае́мыѧ .

сти́хъ : бг҃ъ же цр҃ь на́шъ пре́же вѣ́къ ,꙳ сᲂдѣ́ла спасе́нїе пᲂсредѣ̀ землѝ . Сла́ва тебѣ̀ ѻ҆́ч҃е ст҃ы́и ,꙳ и҆ сн҃е и҆ дш҃е ст҃ы́и ,꙳ ра́внѡ вы̀ пᲂю̀ ,꙳ пᲂклᲂнѧ́юсѧ бг҃ꙋ є҆ди́нᲂмꙋ трїе́мъ ,꙳ неслїѧ́нна ли́ца сла́влю , и҆ во́ вѣки вѣ́рᲂю чтꙋ̀ . сла́ва , и҆ ны́нѣ . гла́съ , в҃ . Є҆гда̀ препᲂлᲂве́нїе пра́здникꙋ наста̀ , взы́де і҆с҃ъ во ст҃и́лище , и҆ ᲂу҆ча́ше невѣ́рныѧ і҆ꙋде́и , гл҃ѧ , жа́ждаи да грѧде́тъ ко мнѣ̀ , и҆ пїе́тъ во́дꙋ живо́тнꙋ вѣ́чнꙋ , и҆ не вжа́ждетсѧ во́ вѣки . вѣ́рꙋѧи в̾мѧ̀ , рѣ́ки пᲂтекꙋ́тъ и҆́з̾ чрева є҆гѡ̀ , и҆ и҆́мать свѣ́тъ живо́тныи .

та́же , бл҃го є҆́сть . и҆ ча́съ , а҃ . и҆ ѿпꙋ́стъ .

На бл҃же́ннах̾ , трипѣ́снец̾ , є҆мꙋ́же краегране́сїе : сла́ва тебѣ̀ бж҃е . гла́съ , г҃ . пѣ́снь , є҃ . і҆рмо́съ . ꙗ҆́кѡ ви́дѣ и҆са́їѧ .

во црⷭ҇твїи сѝ є҆гда̀ прїи́деши , пᲂмѧнѝ на́съ гдⷭ҇и . бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Вѧ́жемь ще́дре бы́въ , и҆ во́лею къ дре́вꙋ пригвᲂжда́емь , свѧ́заныхъ всѧ́кими престꙋпле́ньми и҆збавлѧ́еши . пᲂлᲂжи́въ же сѧ во́ грᲂбѣ , ꙗ҆́же во грᲂбѣ́хъ ᲂу҆снꙋ́вшїѧ мертвецы̀ вᲂздвиза́еши , пᲂю́щихъ твᲂѐ стра́шнᲂе вᲂскрⷭ҇нїе .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Гдⷭ҇ь вᲂскр҃се и҆з̾ ме́ртвыхъ , ꙗ҆́кᲂже речѐ тридне́венъ , и҆ со а҆пⷭ҇лы вᲂдвᲂрѧ́ѧсѧ вᲂпїѧ́ше , въ ве́сь ми́ръ ше́дше вᲂзвѣсти́те ꙗ҆́снѡ , ꙗ҆́же ви́дите вели́каѧ мᲂѧ̀ чꙋдеса̀ .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . Диви́тсѧ срⷣце и҆ слꙋ́хъ сп҃се твᲂемꙋ̀ бл҃гᲂꙋтро́бїю , и҆ смᲂтре́нїю и҆ схᲂжде́нїю . пло́тїю бо по землѝ хᲂдѧ̀ , самарѧны́нѣ же прᲂсѧ́щи женѣ̀ , во́дꙋ пᲂда́лъ є҆сѝ бжⷭ҇твенагѡ ра́зꙋма .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . боⷢ҇ . Ст҃а́ѧ бцⷣе и҆́же во ст҃ы́хъ ст҃а́гѡ рᲂди́вши сло́ва , ѿ без̾нача́льнагѡ ѻ҆ц҃а вᲂсїѧ́вшагѡ , мᲂлѝ є҆гѡ̀ непреста́ннѡ , ѡ҆ст҃и́ти и҆ прᲂсвѣти́ти дш҃а на́ша и҆ срⷣца̀ , любо́вїю пᲂю́щихъ тѧ .

пѣ́снь , и҃ . і҆рмо́съ . въ непᲂстᲂѧ́ннѣмъ ѻ҆гнѝ .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . На крⷭ҇тъ вᲂзнесе́сѧ во́лею , всѐ сᲂвᲂзне́слъ є҆сѝ чл҃ческᲂе сꙋщество̀ . въ ме́ртвыхъ же жи́знь сы́и вмѣни́сѧ , ѡ҆живи́лъ є҆сѝ сп҃се пᲂю́щїѧ смᲂтре́нїе твᲂѐ , и҆ и҆́же со сла́вᲂю вᲂсхᲂжде́нїе ще́дре .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Ми́ръ ра́дᲂстїю пра́зднꙋетъ , во ст҃ѣ́мъ ти вᲂста́нїи живᲂда́вче , и҆́мъ же всю̀ си́лꙋ а҆́дᲂвꙋ пᲂпра́лъ є҆сѝ , и҆ сме́рти жа́ло притꙋпи́лъ є҆сѝ сло́ве , и҆ нетлѣ́нїе и҆стᲂчи́лъ є҆сѝ чл҃кѡмъ .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . Ви́дѣвши тѧ жена̀ самарѧны́нѧ трꙋди́вшасѧ ще́дре , и҆ прᲂсѧ́ща во́дꙋ пи́ти , без̾сме́ртїѧ прїе́млетъ во́ды , вᲂпїю́щи , да́ждь ми во́дꙋ жи́вꙋ гдⷭ҇и , ꙗ҆́кѡ да не в̾жа́ждꙋсѧ во всѐ вре́мѧ живᲂта̀ мᲂегѡ̀ .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . боⷢ҇ . Хра́мъ бж҃їи пᲂказа́сѧ пречⷭ҇таѧ дв҃о бцⷣе , семꙋ̀ пло́ть ѡ҆дш҃евле́нꙋ , ѿ твᲂи́хъ крᲂве́й пречⷭ҇тыхъ в̾зае́мъ да́вши ѻ҆трᲂкᲂви́це . тѣ́мже тѧ пᲂчита́емъ во всѧ̀ вѣ́ки .

пѣ́снь , ѳ҃ . і҆рмо́съ . в̾ зако́ннѣм̾ сѣннᲂписа́нїи .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . Диви́тсѧ сл҃нце зрѧ̀ на́ древѣ пригвᲂжде́на тебѐ хрⷭ҇тѐ , пᲂкᲂлѣба́шесѧ кᲂнцы̀ , и҆ пᲂтрѧсе́сѧ всѧ̀ землѧ̀ , и҆ распа́дашесѧ ка́менїе , и҆ а҆́дъ до́лѣ ꙗ҆́же ѿ́ вѣка ᲂу҆́зники ѿрѣшѝ , вᲂспѣва́ющїѧ тѧ .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Пᲂлᲂжи́сѧ хрⷭ҇тѐ во́ грᲂбѣ жи́знь и҆ вᲂскрⷭ҇нїе , вᲂскр҃съ же в̾ сла́вѣ , во́днехъ мно́гихъ , со свᲂи́ми вᲂдвᲂрѧ́ѧсѧ ᲂу҆ченикѝ , и҆ си́хъ прᲂпᲂвѣ́дники въ ве́сь ми́ръ пᲂсыла́ѧ , стра́шнагѡ смᲂтре́нїѧ твᲂегѡ̀ .

сла́ва . Пꙋтѝ мнѣ̀ жи́зни пᲂказꙋ́еши млⷭ҇тиве , млⷭ҇тїю мно́гᲂю ше́ствꙋеши , и҆ сѣди́ши трꙋди́всѧ ѿ пꙋтѝ , и҆ женѣ̀ прᲂсѧ́щи , во́ды без̾сме́ртїѧ пᲂсыла́еши пᲂю́щей мно́гᲂе твᲂѐ смᲂтре́нїе .

и҆ ны́нѣ , боⷢ҇ . Вᲂпло́щьсѧ хрⷭ҇то́съ и҆з̾ тебѐ па́че сло́ва , сло́во сы́и ѻ҆́ч҃ее дв҃о бцⷣе , и҆ распѧ́тсѧ хᲂтѧ̀ на́съ ра́ди , и҆ тридне́внымъ вᲂста́нїемъ ми́рꙋ кᲂнцы̀ ѡ҆свѣща́етъ . с̾ ни́мъ же тѧ по́ дᲂлгꙋ ᲂу҆блажа́емъ .

Въ то́йже , пѧто́къ , ве́черъ . на гдⷭ҇и вᲂзва́хъ , стихѣ́ры пра́здникꙋ , г҃ . гла́съ , є҃ . поⷣ . ра́дꙋйсѧ живᲂно́сныи .= Ꙗ҆ви́сѧ свѣтᲂѧвле́нныи и҆ кра́сныи , и҆́же спасе́нагѡ вᲂста́нїѧ де́нь , препᲂлᲂве́нїе прест҃о́е , ꙗ҆́кѡ пᲂлꙋ́дне свѣ́тлѡ , ѡ҆зарѧ́ющи ми́ръ бжⷭ҇твеными бл҃гᲂда́тьми . хрⷭ҇то́вымъ бо вᲂста́нїемъ , прᲂсвѣти́шасѧ кᲂнцы̀ нетлѣ́нїемъ , ѡ҆блиста́етъ во ѡ҆бра́знаѧ , и҆ пᲂказꙋ́етъ є҆́же на высᲂтꙋ̀ вᲂзнесе́нїе , ꙗ҆влѧ́ѧ мнᲂгᲂрачи́тельнᲂе дх҃а наи́тїе , пѧтьдесѧ́тницы чи́стыѧ свѣ́тлᲂе тᲂржество̀ . тѣ́мже и҆ пᲂдава́етъ дш҃а́мъ на́шимъ ми́ръ и҆ ве́лїю ми́лᲂсть . Сла́вы бжⷭ҇твеныѧ ꙗ҆́кѡ рѣкꙋ̀ , пра́здникꙋ ны́нѣ препᲂлᲂви́вшꙋсѧ , гдⷭ҇ь стрꙋѝ бл҃гᲂсе́рдїѧ всѣ́мъ пᲂдава́ѧ вᲂпїе́тъ , жа́ждаи да грѧде́тъ и҆ пїе́тъ те́плѣ , и҆сто́чникъ бо милᲂсе́рдїѧ , и҆ ми́лᲂсти пꙋчи́на , са́мъ сы́и и҆стᲂча́етъ ми́рꙋ ѡ҆ставле́нїе , ѡ҆мыва́етъ прегрѣше́нїѧ , и҆ ѡ҆чища́етъ недꙋ́ги . спаса́етъ ꙗ҆́же вᲂскрⷭ҇нїе є҆гѡ̀ пра́зднꙋющїѧ , пᲂкрыва́етъ любо́вїю чтꙋ́щихъ и҆́же со сла́вᲂю вᲂзнесе́нїе є҆гѡ̀ , и҆ пᲂдава́етъ дш҃а́мъ на́шимъ , ми́ръ и҆ ве́лїю млⷭ҇ть . П=ᲂсредѝ ст҃и́лища стᲂѧ̀ , не ѡ҆пи́санныи бг҃ъ же и҆ гдⷭ҇ь . бг҃ъ бо сы́и є҆стество́мъ , а҆́ще и҆ на́съ ра́ди чл҃къ бы́въ , и҆ ѡ҆пи́санъ ꙗ҆ви́сѧ пло́тїю . тѣ́мже и҆стᲂча́ѧ живо́тныѧ во́ды всѣ́мъ гл҃ѧ , ѽ чл҃цы , дш҃ы ѡ҆чи́стите , и҆ зно́й страсте́й прᲂхлади́те , да ни кто̀ ᲂу҆лиши́тсѧ питїѧ̀ , бжⷭ҇твенꙋю бо бл҃гᲂда́ть да́рꙋю без̾сме́ртїѧ , и҆ лꙋ́чшее вы́шнѧгѡ црⷭ҇твїѧ прича́стїе , и҆ вели́кїѧ млⷭ҇ти .

та́же , стихѣ́ры , в̾ минѣ́и , г҃ . сла́ва . гла́съ , в҃ . Є҆гда̀ прїи́де во ст҃и́лище хрⷭ҇тѐ бж҃е , препᲂлᲂви́вшꙋсѧ пра́здникꙋ , тᲂгда̀ лю́ди ᲂу҆ча́ше вᲂпїѧ̀ , вѣ́рꙋѧи в̾ мѧ̀ а҆́ще и҆ ᲂу҆́мретъ жи́въ бꙋ́детъ . і҆ꙋде́и же распыха́хꙋсѧ , с̾ фарисе́и и҆ сад̾дꙋке́и и҆ кни́жники гл҃юще , кто̀ се́й и҆́же гл҃етъ хꙋлы̀ , непᲂмышлѧ́юще ꙗ҆́кѡ ты̀ є҆сѝ и҆́же пре́жде вѣ́къ , со ѻ҆ц҃е́мъ и҆ дх҃ᲂмъ прᲂславлѧ́емыи . бж҃е на́шъ сла́ва тебѣ̀ . и҆ ны́нѣ , боⷢ҇ . гла́съ , г҃ . Ка́кѡ недиви́мсѧ , бг҃ᲂмꙋ́жнᲂмꙋ твᲂемꙋ̀ ржⷭ҇твꙋ̀ пречⷭ҇таѧ , и҆скꙋше́нїѧ бо мꙋ́жеска непрїе́мши всенепᲂро́чнаѧ , рᲂдила̀ є҆сѝ без̾ ѻ҆ц҃а сн҃а пло́тїю , и҆́же пре́жде вѣ́къ рᲂжде́ннагѡ ѿ ѻ҆ц҃а без̾ мт҃ре , ника́кᲂже претерпѣ́вша и҆змѣне́нїѧ , ли смѣше́нїѧ , ли раздѣле́нїѧ , но во ѻ҆бᲂю̀ сꙋществꙋ̀ , сво́йство цѣ́ло сᲂхра́ньша . тѣ́мже мт҃и дв҃о влⷣчце , тᲂгѡ̀ мᲂлѝ спастѝ дш҃а , и҆́же правᲂсла́внѡ , бцⷣꙋ тѧ̀ и҆спᲂвѣ́дающихъ .

На стихо́внѣ , стихѣ́ры . гла́съ , г҃ . Твᲂи́мъ крⷭ҇то́мъ хрⷭ҇тѐ сп҃се , сме́рти держа́ва разрꙋши́сѧ , и҆ дїа́вᲂлѧ ле́сть ᲂу҆праздни́сѧ . ро́дъ же чл҃ческїи вѣ́рᲂю спаса́емь , пѣ́снь ти всегда̀ прино́ситъ .

сти́хъ : гдⷭ҇ь вᲂцр҃и́сѧ ,꙳ в̾лѣ́пᲂтꙋсѧ ѡ҆блечѐ . Прᲂсвѣти́шасѧ всѧ́ческаѧ , вᲂскрⷭ҇нїемъ твᲂи́мъ гдⷭ҇и , и҆ ра́й па́ки ѿве́рзесѧ . всѧ́ же тва́рь вᲂсхвалѧ́ющи тѧ , пѣ́снь ти всегда̀ прино́ситъ .

сти́хъ : и҆́бо ᲂу҆҆твердѝ вселе́ннꙋю ,꙳ ꙗ҆́же не пᲂдви́житсѧ . Сла́влю ѻ҆ц҃а и҆ сн҃а си́лꙋ , и҆ ст҃а́гѡ дх҃а пᲂю̀ влады́чество , нераздѣ́льно и҆ несᲂзда́нно бжⷭ҇тво̀ , трⷪ҇цꙋ є҆динᲂсꙋ́щнꙋю , црⷭ҇твꙋющꙋю во́ вѣки вѣко́мъ .

сти́хъ : до́мꙋ твᲂемꙋ̀ пᲂдᲂба́етъ ,꙳ ст҃ы́ни гдⷭ҇и в̾ дᲂлгᲂтꙋ̀ дні́й . Стрⷭ҇тїю твᲂе́ю хрⷭ҇тѐ , ѡ҆мрачи́выи сл҃нце , и҆ свѣ́тᲂмъ твᲂегѡ̀ вᲂскрⷭ҇нїѧ , прᲂсвѣще́и всѧ́ческаѧ , прїимѝ на́шꙋ вече́рнюю пѣ́снь чл҃кᲂлю́бче .

сла́ва , и҆ ны́нѣ . гла́съ , г҃ . Препᲂлᲂви́вшꙋсѧ пра́здникꙋ , сла́вимъ и҆́же пᲂсредѝ землѝ спасе́нїе сᲂдѣ́лавшаго . пᲂсреди́ бо двᲂю̀ разбо́йникꙋ живо́тъ на́ древѣ ви́сѧщь , и҆ ѻ҆́вᲂмꙋ ᲂу҆́бѡ хꙋ́лѧщꙋ , мᲂлча́ше , вѣ́рꙋющемꙋ же вᲂпїѧ́ше , дне́сь со мно́ю бꙋ́деши в̾ раѝ . сᲂше́лъ є҆сѝ во́ грᲂбъ , плѣни́лъ є҆сѝ а҆́да , и҆ вᲂскр҃слъ є҆сѝ тридне́внѡ , спаса́ѧ дш҃а на́ша .

та́же , нн҃ѣ ѿпꙋща́еши . трⷭ҇то́е , и҆ по ѻ҆́ч҃е на́шъ . трᲂпа́рь , пра́здникꙋ .= є҆ктенїѧ̀ . и҆ =ѿпꙋ́стъ .

Въ сꙋбо́тꙋ , д҃ , нлⷣи , по па́сцѣ . на ᲂу҆́трени , на бг҃ъ гдⷭ҇ь , трᲂпа́рь , пра́здникꙋ , гⷤ . =По а҃ , стихᲂло́гїи , сѣда́ленъ . гла́съ , г҃ . Хрⷭ҇то́съ ѿ ме́ртвыхъ вᲂста̀ , нача́тᲂкъ ᲂу҆со́пшимъ бы́сть , пе́рвенецъ тва́ри , и҆ сᲂдѣ́тель всѣ́мъ бы́вшимъ . и҆стлѣ́вшее є҆стество̀ ро́да на́шегѡ , сᲂбо́ю ѡ҆бнᲂвѝ . не к̾ тᲂмꙋ̀ сме́рте ѡ҆блада́еши , и҆́бо всѣ́хъ влⷣка держа́вꙋ твᲂю̀ разрꙋшѝ . =сти́хъ : вᲂскрⷭ҇нѝ гдⷭ҇и бж҃е мо́й да вᲂзнесе́тсѧ рꙋка̀ твᲂѧ̀ , незабꙋ́ди ни́щихъ свᲂи́хъ до кᲂнца̀ . Пло́тїю сме́рть вкꙋ́шь гдⷭ҇и , го́ресть сме́ртнꙋю пресѣчѐ вᲂста́нїемъ свᲂи́мъ , и҆ чл҃ка наню̀ ᲂу҆крѣпѝ , пе́рвыѧ клѧ́твы ѡ҆дᲂлѣ́нїе призыва́ѧ . защи́тниче жи́зни на́шеѧ , хрⷭ҇тѐ бж҃е сла́ва тебѣ̀ . сла́ва , и҆ ны́нѣ , боⷢ҇ . Тебѐ хᲂда́таицꙋ спасе́нїѧ ро́да на́шегѡ , вᲂспѣва́емъ бцⷣе дв҃о . пло́тїю бо є҆ю́же и҆з̾ тебѐ прᲂше́дъ сн҃ъ тво́й и҆ бг҃ъ на́шъ , крⷭ҇тнꙋю прїе́мъ стра́сть , и҆зба́вилъ є҆́сть на́съ и҆з̾ и҆стлѣ́нїѧ , ꙗ҆́кѡ чл҃кᲂлю́бецъ .

По в҃ , стихᲂло́гїи , сѣда́ленъ . гла́съ , и҃ . Пра́здникꙋ препᲂлᲂви́вшꙋсѧ зако́ннᲂмꙋ , в̾ ѻ҆́нь же ᲂу҆ча́ше сп҃се мо́й во ст҃и́лищи , ѡ҆блича́ѧ безꙋ́мїе невѣ́рныхъ є҆вре́й , и҆ вᲂпїѧ̀ къ наро́дѡмъ бжⷭ҇твенымъ гла́сᲂмъ , ꙗ҆́кѡ чл҃кᲂлю́бецъ взыва́ше , жа́ждаи да грѧде́тъ ко мнѣ̀ и҆ пїе́тъ . тѣ́мже и҆ запᲂвѣ́да вѣ́рꙋющимъ , пᲂда́ти весе́лїѧ во́ды ѿ и҆сто́чника нетлѣ́нна . сегѡ̀ ра́ди вᲂпїе́мъ ти , низ̾пᲂслѝ хрⷭ҇тѐ бж҃е дх҃ъ тво́й ст҃ы́и и҆ спасѝ на́съ , ꙗ҆́кѡ є҆ди́нъ мнᲂгᲂмлⷭ҇тивъ . сла́ва , и҆ ны́нѣ , то́йже .

та́же , вᲂскрⷭ҇нїе хрⷭ҇то́во , аⷤ . ѱл҃о́мъ , н҃ . кано́нъ , пра́здникꙋ , на́ ѕ҃ . хра́мꙋ , на д҃ . в̾ минѣ́и , на д҃ .

На хвали́тѣхъ , стⷯры , на д҃ . гла́съ , г҃ . Прїиди́те всѝ ꙗ҆зы́цы , разꙋмѣ́йте стра́шныѧ та́йны си́лꙋ . хрⷭ҇то́съ бо сп҃съ на́шъ , и҆́же и҆спе́рва сы́и сло́во , распѧ́тсѧ на́съ ра́ди , и҆ во́лею пᲂгребе́сѧ , и҆ вᲂскр҃се и҆з̾ ме́ртвыхъ , є҆́же спастѝ всѧ́ческаѧ . тᲂмꙋ̀ пᲂклᲂни́мсѧ [пᲂкло́н̾] . Пᲂвѣ́даша всѧ̀ чꙋдеса̀ , стра́жїе твᲂѝ гдⷭ҇и , но сᲂбо́ръ сꙋ́етныхъ , и҆спо́лни мздо́ю десни́цы и҆́хъ , скры́ти мнѧ́щихъ вᲂскрⷭ҇нїе твᲂѐ , є҆́же ми́ръ сла́витъ , пᲂми́лꙋй на́съ . Ра́дᲂсти всѧ̀ и҆спо́лнишасѧ , вᲂскрⷭ҇нїѧ и҆скꙋ́съ прїе́мше . ма́рїѧ бо магдалы́ни ко́ грᲂбꙋ прїи́де , и҆ ѡ҆брѣ́те а҆́нг҃ла на ка́мени сѣдѧ́ща , ри́зами блиста́ющасѧ , и҆ гл҃юща , что̀ и҆́щете жива́го с̾ ме́ртвыми ; нѣ́сть здѣ̀ , но вᲂста̀ , ꙗ҆́кᲂже речѐ , пред̾варѧ́ю вы̀ в̾ галиле́и . Во́ свѣтѣ твᲂе́мъ влⷣко , ᲂу҆́зримъ свѣ́тъ чл҃кᲂлю́бче , вᲂскр҃се бо и҆з̾ ме́ртвыхъ , спасе́нїе ро́дꙋ чл҃ческᲂмꙋ да́рꙋѧ . да тѧ̀ всѧ̀ тва́рь пѣснᲂсло́витъ , є҆ди́наго без̾грѣ́шнагѡ пᲂми́лꙋй на́съ . сла́ва , и҆ ны́нѣ . гла́съ , д҃ . Прᲂсвѣти́вшесѧ бра́тїе , вᲂскрⷭ҇нїемъ сп҃са хрⷭ҇та̀ , и҆ дᲂсти́гше препᲂлᲂве́нїе пра́здника влⷣчнѧ , и҆́скренѡ сᲂхрани́мъ за́пᲂвѣди бж҃їѧ , да дᲂсто́йни бꙋ́демъ и҆ вᲂзнесе́нїе пра́зднᲂвати , и҆ прише́ствїе пᲂлꙋчи́ти ст҃а́гѡ дх҃а .

На стихо́внѣ , стихѣ́ры . гла́съ , в҃ . поⷣ . до́ме є҆вфра́фᲂвъ .= В=ели́къ є҆сѝ цр҃ю̀ ,꙳ и҆ вели́ка твᲂѧ̀ держа́ва ,꙳ вельми́ бо ѡ҆бнища́лъ є҆сѝ ,꙳ и҆ вели́кихъ дарᲂва́нїй ꙳ вселе́ннꙋю и҆спо́лнилъ є҆сѝ .

сти́хъ : пᲂмѧнѝ со́нмъ тво́й ,꙳ и҆́же стѧжа̀ и҆спе́рва . Ста́лъ є҆сѝ в̾ цр҃кви ,꙳ и҆стᲂча́ѧ свᲂѧ̀ стрꙋѝ ,꙳ пра́здникꙋ препᲂлᲂви́вшꙋсѧ ,꙳ и҆ напᲂѧ́ѧ жа́ждꙋщихъ ,꙳ бжⷭ҇твеныѧ бл҃гᲂда́ти милᲂсе́рде .

сти́хъ : бг҃ъ же цр҃ь на́шъ пре́же вѣ́къ ,꙳ сᲂдѣ́ла спасе́нїе пᲂсредѣ̀ землѝ . Во ст҃и́лище ꙳ вше́лъ є҆сѝ сп҃се мо́й ,꙳ пра́здникꙋ препᲂлᲂви́вшꙋсѧ ,꙳ ᲂу҆ча̀ и҆ ѡ҆блича́ѧ ꙳ є҆вре́ѡмъ без̾зако́нїе .

сла́ва , и҆ ны́нѣ . гла́съ , и҆ поⷣ , то́йже . Спасти́ мѧ вᲂсхᲂтѣ́въ ,꙳ вᲂплᲂти́лсѧ є҆сѝ пресла́внѡ ,꙳ ѿ дв҃ы неи҆скꙋсᲂмꙋ́жныѧ ,꙳ и҆ пᲂсредѣ̀ цр҃кве свᲂеѧ̀ ,꙳ бл҃гᲂда́ть мнѣ̀ и҆стᲂчи́лъ є҆сѝ .

та́же , бл҃го є҆́сть . и҆ ча́съ , а҃ . и҆ ѿпꙋ́стъ .

На блаже́ннахъ , четверᲂпѣ́снецъ . гла́съ , г҃ . пѣ́снь , ѕ҃ . і҆рмо́съ . бе́здна пᲂслѣ́днѧѧ .

во црⷭ҇твїи сѝ є҆гда̀ прїи́деши ,꙳ пᲂмѧнѝ на́съ гдⷭ҇и . Прᲂбᲂде́сѧ кᲂпїе́мъ въ бжⷭ҇твенаѧ ре́бра , и҆ ᲂу҆ѧ́звенаго чл҃ка престꙋпле́нїемъ , живᲂда́вче и҆сцѣли́лъ є҆сѝ , бжⷭ҇твеными сѝ страстьмѝ . тѣ́мже влⷣко вᲂспѣва́емъ держа́вꙋ твᲂю̀ .

бл҃же́ни ни́щїи дх҃ᲂмъ ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . Оу҆даре́нїе претерпѣ́лъ є҆сѝ і҆с҃е , разᲂрѧ́ѧ а҆́дᲂва црⷭ҇твїѧ , и҆ вереѝ сте́рлъ є҆сѝ рꙋко́ю вседержа́внᲂю тѝ , спа́слъ є҆сѝ всѣ́хъ , и҆ вᲂскр҃се тридне́внѡ .

бл҃же́ни пла́чꙋщїи ,꙳ ꙗ҆́кѡ ті́и ᲂу҆тѣ́шатсѧ . Стᲂѧ́ше пред̾ сꙋди́щемъ пила́тᲂвымъ ꙗ҆́кѡ ѡ҆сꙋжде́нъ , и҆́же землѝ все́й сꙋдѧ́и гдⷭ҇и , хᲂтѧ̀ є҆го́же со́здалъ є҆сѝ ѿ а҆́да и҆зба́вити , сᲂше́лъ є҆сѝ к̾ немꙋ̀ є҆ди́не милᲂсе́рде .

бл҃же́ни кро́тцыи ,꙳ ꙗ҆́кѡ ті́и наслѣ́дѧтъ зе́млю . боⷢ҇ . Рᲂдила̀ є҆сѝ крᲂмѣ̀ бᲂлѣ́зней сн҃а , и҆́же пре́жде вѣ́къ ѿ ѻ҆ц҃а рᲂжде́на чи́стаѧ . є҆го́же ра́ди бᲂлѧ́ше , зрѧ́щи пло́тїю распина́ема ви́сѧща , вᲂскрⷭ҇шꙋ же ꙗ҆́кѡ бг҃ꙋ , ра́дᲂвашесѧ свѣ́тлѡ .

пѣ́снь , з҃ . і҆рмо́съ . пе́рвїе тѣ́лꙋ злато́мꙋ .

бл҃же́ни а҆́лчꙋщїи и҆ жа́ждꙋщїи пра́вды ,꙳ ꙗ҆́кѡ ті́и насы́тѧтсѧ . И҆́же херꙋви́мѡмъ и҆ серафи́мѡмъ сы́и непристꙋ́пенъ , пло́тїю распѧ́тїе претерпѣ́лъ є҆сѝ за млрⷭ҇дїе млⷭ҇ти твᲂеѧ̀ , да спасе́ши а҆да́ма , и҆стлѣ́вшаго престꙋпле́нїемъ .

бл҃же́ни млⷭ҇тивїи ,꙳ ꙗ҆́кѡ ті́и пᲂми́лᲂвани бꙋ́дꙋтъ . Ты̀ сᲂше́дъ съ дш҃е́ю ко а҆́дꙋ , разᲂри́лъ є҆сѝ держа́вꙋ є҆гѡ̀ влⷣко , и҆ вᲂздви́глъ є҆сѝ сꙋ́щїѧ в̾ не́мъ свѧ́заныѧ , вᲂспѣва́ющїѧ твᲂю̀ держа́вꙋ живᲂда́вче .

бл҃же́ни чⷭ҇тїи срⷣцемъ ,꙳ ꙗ҆́кѡ ті́и бг҃а ᲂу҆́зрѧтъ . Ѿѧ́тсѧ печа́ли ᲂу҆ны́нїе , мѷрѡно́сицы пᲂтщи́тесѧ гро́ба дᲂсти́гнꙋти , и҆ и҆́з̾ грᲂба хрⷭ҇та̀ вᲂскрⷭ҇ша зрѧ́ще , прᲂпᲂвѣ́дите ми́рꙋ .

бл҃же́ни мирᲂтво́рцы ,꙳ ꙗ҆́кѡ ті́и сн҃ᲂве бж҃їи нарекꙋ́тсѧ . боⷢ҇ . Хрⷭ҇та̀ є҆го́же рᲂдила̀ є҆сѝ чи́стаѧ , красꙋ́йсѧ ви́дѧщи вᲂскрⷭ҇ша тридне́внѡ со сла́вᲂю и҆з̾ ме́ртвыхъ , ꙗ҆́кѡ мт҃и ᲂу҆мᲂлѝ є҆гѡ̀ ѡ҆ все́мъ ми́рѣ .

пѣ́снь , и҃ . і҆рмо́съ . въ непᲂстᲂѧ́ннѣмъ ѻ҆гнѝ .

бл҃же́ни и҆з̾гна́ни пра́вды ра́ди ,꙳ ꙗ҆́кѡ тѣ́хъ є҆́сть црⷭ҇тво нбⷭ҇нᲂе . И҆́же всѧ́ко дыха́нїе сᲂзда́выи сло́вᲂмъ , ѿ і҆ꙋде́й пло́тїю на́ древѣ во́лею пᲂвѣ́шаетсѧ , и҆ же́лчїю напᲂѧ́етсѧ , и҆ зрѧ́щи тва́рь всѧ̀ , вᲂзмꙋща́шесѧ , без̾бл҃гᲂда́тныхъ рыда́ющи безꙋ́мїѧ .

бл҃же́ни є҆стѐ є҆гда̀ пᲂно́сѧтъ ва́мъ , и҆ и҆зже нꙋ́тъ вы̀ , и҆ рекꙋ́тъ всѧ́къ ѕо́лъ гл҃ъ ,꙳ навы̀ лжꙋ́ще менѐ ра́ди . Тебѐ нача́льника и҆ сп҃са ми́рꙋ , ꙗ҆́кѡ чл҃ка всеѧ́децъ прїѧ́тъ а҆́дъ , є҆го́же свѧза̀ ꙗ҆́кѡ гдⷭ҇ь , и҆ и҆́х̾же дре́вле и҆мѧ́ше пᲂви́нныѧ , взѧ́лъ є҆сѝ , и҆ сᲂвᲂскр҃си́лъ є҆сѝ тридне́внѡ и҆́з̾ грᲂба .

ра́дꙋйтесѧ и҆ весели́тесѧ ,꙳ ꙗ҆́кѡ мзда̀ ва́ша мно́га на́ нб҃сѣхъ . Ѻ҆те́ческихъ не ѿлꙋ́чьсѧ нѣ́дръ , пло́ть на́съ ра́ди ѿ дв҃ы прїѧ́тъ , и҆ сме́рть во́лею пᲂд̾ѧ́лъ є҆сѝ . пᲂлᲂже́нъ же во́ грᲂбѣ , вᲂста́лъ є҆сѝ сло́ве бж҃їи тридне́внѡ . тѣ́мже тѧ пᲂе́мъ є҆ди́нагѡ жизнᲂда́вца .

пᲂмѧнѝ на́съ гдⷭ҇и ,꙳ є҆гда̀ прїи́деши во црⷭ҇твїи сѝ . боⷢ҇ . Рᲂдила̀ є҆сѝ чи́стаѧ сн҃а без̾ бᲂлѣ́зни , пре́жде вѣ́къ сꙋ́щаго со ѻ҆ц҃е́мъ же и҆ дх҃ᲂмъ ст҃ы́мъ . є҆го́же на крⷭ҇тѣ̀ ви́сѧща зрѧ́щи , бᲂлѧ́ше ᲂу҆́бѡ , вᲂста́вша же и҆́з̾ грᲂба ви́дѣвши , с̾ра́дꙋешисѧ во́ вѣки .

пѣ́снь , ѳ҃ . і҆рмо́съ . в̾ зако́ннѣм̾ сѣннᲂписа́нїи .

пᲂмѧнѝ на́съ влⷣко ,꙳ є҆гда̀ прїи́деши во црⷭ҇твїи сѝ . Свѣти́ла хрⷭ҇тѐ ви́дѣвши тѧ̀ на крⷭ҇тѣ̀ пло́тїю ви́сѧща , с̾кры́ша свѣ́тъ , и҆ разбо́йникъ зрѧ̀ , бг҃ᲂсло́вꙋетъ . землѧ́ же всѧ̀ кᲂле́блетсѧ , и҆ за́вѣса раздира́ема вᲂпїе́тъ , сла́ва дᲂлгᲂтерпѣ́нїю твᲂемꙋ̀ влⷣко .

пᲂмѧнѝ на́съ ст҃ы́и ,꙳ є҆гда̀ прїи́деши во црⷭ҇твїи сѝ . Твᲂѐ цр҃ю сни́тїе стра́шно вᲂи́стинꙋ бы́сть въ преи҆спо́днихъ , а҆́дᲂвы бо врата̀ и҆ вереѝ сте́рлъ є҆сѝ , и҆ всѧ̀ и҆́х̾же и҆мѧ́ше ᲂу҆́зники , плѣни́лъ є҆сѝ , и҆ вᲂскр҃си́лъ є҆сѝ держа́внѡ , и҆́же бг҃а тѧ прᲂпᲂвѣ́давшихъ .

сла́ва . Ме́ртва тѧ хрⷭ҇тѐ снѧ́тъ і҆ѡ́сифъ ѿ́ древа вѣ́рнѡ , и҆ смѵ́рнᲂю и҆ ма́стїю и҆ пᲂнѧ́вицею , любо́вїю и҆ ра́дᲂстїю пᲂма́завъ , и҆з̾лива́етъ сле́зъ мно́жество , и҆ въ ме́ртвенѣмъ гро́бѣ пᲂлᲂжѝ . тѣ́мже с̾ ни́мъ тебѐ велича́емъ .

и҆ ны́нѣ , боⷢ҇ . И҆́же пре́жде вѣ́къ сꙋ́щагѡ неразлꙋ́чна со ѻ҆ц҃е́мъ и҆ дх҃ᲂмъ , ты̀ всенепᲂро́чнаѧ дв҃о ѻ҆трᲂкᲂви́це , во ᲂу҆тро́бѣ прїе́мши рᲂдила̀ є҆сѝ небᲂлѣ́зненѡ . ви́сѧща же на́ древѣ во́лею ви́дѧщи тᲂгѡ̀ , ᲂу҆тро́бᲂю ᲂу҆ѧзвлѧ́шесѧ . но па́ки вᲂскрⷭ҇нїемъ є҆гѡ̀ , ра́дᲂстнѡ црⷭ҇твꙋеши с̾ ни́мъ , в̾ бескᲂне́чнѣй жи́зни бг҃ᲂблаже́ннаѧ .

На литꙋргі́и . прᲂки́менъ , ѱл҃о́мъ дв҃дᲂвъ . весе ли́тесѧ ѡ҆́ гдⷭ҇ѣ , и҆ ра́дꙋйтесѧ пра́веднїи . сти́хъ : бл҃же́ни и҆́мже ѿпꙋсти́шасѧ без̾зако́нїѧ , и҆ и҆́мже прикры́шасѧ грѣсѝ . дрꙋгі́и , дш҃а и҆́хъ во бл҃ги́хъ вᲂдвᲂрѧ́тсѧ . а҆пⷭ҇лъ , в̾ дѣѧ́нїихъ . заⷱ҇ , к҃ѳ . и҆ заꙋпᲂко́й , к̾ сᲂлꙋ́нѧнѡмъ . заⷱ҇ , с҃о .= а҆ллилꙋ́їѧ . вᲂзва́ша пра́веднїи , и҆ гдⷭ҇ь ᲂу҆слы́ша и҆́хъ . сти́хъ : мно́ги ско́рби пра́веднымъ , и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь . =сти́хъ : бл҃же́ни ꙗ҆́же и҆збра̀ и҆ прїѧ́тъ и҆́хъ гдⷭ҇ь , па́мѧть и҆́хъ ѿ́ рᲂда и҆ в̾ ро́дъ . є҆ѵⷢ҇а́лїе , ѿ =і҆ѡа́нна . заⷱ҇ , л҃а . =и҆ дрꙋго́е , заꙋпᲂко́й , ѿ і҆ѡа́нна . зача́ло , ѕ҃і . прича́стенъ . ꙗ҆ды́и мᲂю̀ пло́ть , и҆ пїѧ́и мᲂю̀ кро́вь , во мнѣ̀ пребыва́етъ и҆ а҆́зъ в̾ не́мъ , речѐ гдⷭ҇ь . дрꙋгі́и , бл҃же́ни ꙗ҆́же и҆збра̀ и҆ прїѧ́тъ ѧ҆̀ гдⷭ҇ь , па́мѧть и҆́хъ в̾ ро́дъ и҆ ро́дъ .