Сꙋбо́та з҃ ѧ , по па́сцѣ . в̾ ню́же па́мѧть сᲂтвᲂрѧ́емъ , и҆́же всѣ́мъ ᲂу҆со́пшимъ ѿ́ вѣка , ѻ҆ц҃ъ и҆ бра́тїи на́шихъ правᲂсла́вныхъ . Въ пѧто́къ , ве́черъ . на́ гдⷭ҇и вᲂзва́хъ , стихѣ́ры , мⷱ҇ꙋ . гла́съ , ѕ҃ . Мч҃нцы твᲂѝ гдⷭ҇и не ѿверго́шасѧ тебѐ , ни ѿстꙋпи́ша ѿ запᲂвѣде́й твᲂи́хъ . тѣ́хъ мл҃твами пᲂми́лꙋй на́съ . Страстᲂте́рпцы мч҃нцы нбⷭ҇нїи гра́жане , на землѝ пᲂстрада́вше мно́гїѧ мꙋ́ки претерпѣ́ша . мл҃твами гдⷭ҇и и҆ мᲂле́нїемъ и҆́хъ , всѣ́хъ на́съ сᲂхранѝ . Страда́вше тебѐ ра́ди хрⷭ҇тѐ , мно́гїѧ мꙋ́ки претерпѣ́ша , и҆ сᲂверше́ныѧ прїѧ́ша вѣнцы̀ на́ нб҃сѣхъ , да мо́лѧтсѧ за́ дш҃и на́ши . и҆́ны , стихѣ́ры , ѡ҆ ᲂу҆со́пшихъ . гла́съ , и҃ . И҆́же ѿ́ вѣка ме́ртвымъ , по и҆́мени всѣ́хъ , съ вѣ́рᲂю жи́вшихъ бл҃гᲂче́стнѡ , дне́сь па́мѧть сᲂтвᲂрѧ́юще вѣ́рнїи , сп҃са и҆ гдⷭ҇а вᲂспᲂе́мъ . прᲂсѧ́ще прилѣ́жнѡ си́мъ в̾ ча́съ сꙋда̀ бла́гъ ѿвѣ́тъ да́ти , тᲂмꙋ̀ самᲂмꙋ̀ бг҃ꙋ на́шемꙋ , и҆́же все́й сꙋдѧ́щемꙋ землѝ , десна́го є҆мꙋ̀ пред̾стᲂѧ́нїѧ , пᲂлꙋчи́вшимъ в̾ ра́дᲂсти , в̾ ча́сти пра́ведныхъ , и҆ в̾ ст҃ы́хъ жре́бїи свѣ́тлѣ , и҆ дᲂсто́йнымъ бы́ти , нбⷭ҇нагѡ црⷭ҇твїѧ твᲂегѡ̀ . И҆́же свᲂе́ю кро́вїю сп҃се чл҃ки и҆скꙋпи́выи , и҆ сме́ртїю си ѿ сме́рти го́рькїѧ и҆збавле́и на́съ , и҆ жи́знь вѣ́чнꙋю пᲂдаѧ́и вᲂскрⷭ҇нїемъ си , всѧ̀ пᲂко́й гдⷭ҇и ᲂу҆со́пшїѧ бл҃гᲂче́стнѡ , и҆лѝ в̾ пꙋсты́нѧхъ , и҆лѝ во градѣ́хъ , и҆лѝ в̾ мо́рихъ , и҆лѝ на землѝ , и҆лѝ на всѧ́кᲂмъ мѣ́сте , цр҃и же , и҆ ст҃ли , и҆ первᲂсщ҃е́нники , и҆́нᲂки и҆ бѣльцы̀ , въ во́зрастѣ всѧ́цѣмъ . и҆ спᲂдо́би всѣ́хъ нбⷭ҇нагѡ црⷭ҇твїѧ твᲂегѡ̀ . И҆з̾ ме́ртвыхъ вᲂста́нїемъ тѝ хрⷭ҇тѐ , не к̾ тᲂмꙋ̀ сме́рть ѡ҆блада́етъ , ᲂу҆ме́ршими бл҃гᲂче́стнѡ . тѣ́мже прилѣ́жнѡ свᲂѧ̀ рабы̀ пᲂко́й , во дво́рѣхъ твᲂи́хъ , и҆ в̾ ло́нѣ а҆враа́ма , и҆́же ѿ а҆да́ма да́же до дне́сь пᲂслꙋжи́вшихъ тѝ чи́сто , ѻ҆ц҃ы и҆ бра́тїю на́шꙋ , дрꙋ́ги вкꙋ́пѣ и҆ сро́дники , и҆ всѧ́кᲂго чл҃ка , и҆́же в̾ житїѝ пᲂслꙋжи́вша вѣ́рнѡ , и҆ к̾ тебѣ̀ преста́вльшїѧсѧ , мнᲂгᲂви́дно и҆ мнᲂгᲂѡ҆бра́зно бж҃е . спᲂдо́би ᲂу҆лꙋчи́ти , нбⷭ҇нагѡ црⷭ҇твїѧ твᲂегѡ̀ . сла́ва . гла́съ , то́йже . Пла́чꙋсѧ и҆ рыда́ю є҆гда̀ пᲂмышлѧ́ю сме́рть , и҆ ви́жꙋ во грᲂбѣ́хъ лежа́щꙋ , ꙗ҆́же по ѻ҆́бразꙋ бж҃їю со́зданнꙋю на́шꙋ красᲂтꙋ̀ , без̾ѡ҆бра́знꙋ и҆ без̾сла́вы , не и҆мꙋ́щꙋ видѣ́нїѧ ни дᲂбро́ты . ѽ чꙋдесѐ , что̀ є҆́же ѡ҆ на́съ сѐ бы́вшемꙋ та́инствꙋ ; ка́кѡ преда́хᲂмсѧ тлѣ́нїю ; ка́кѡ припрѧго́хᲂмсѧ сме́рти , вᲂи́стинꙋ бж҃їимъ велѣ́нїемъ ꙗ҆́кᲂже пи́шетъ , пᲂдаю́щимъ преста́вленымъ пᲂко́й . и҆ ны́нѣ . гла́съ , ѕ҃ . Кто̀ тебѐ небл҃жи́тъ прест҃а́ѧ дв҃це ; и҆лѝ кто̀ невᲂспѣва́етъ твᲂегѡ̀ пречⷭ҇тагѡ ржⷭ҇тва̀ ; без̾лѣ́тныи бо ѿ ѻ҆ц҃а вᲂзсїѧ́въ сн҃ъ є҆динᲂро́дныи , то́йже ѿ тебѐ чи́стыѧ про́йде , несказа́ннѡ вᲂпло́щьсѧ . є҆стество́мъ бг҃ъ сы́и , и҆ є҆стество́мъ бы́въ челᲂвѣ́къ на́съ ра́ди . не во двᲂю̀ лицꙋ̀ раздѣлѧ́емъ . но во двᲂю̀ є҆стествꙋ̀ несмѣ́сно пᲂзнава́емъ . тᲂгѡ̀ мᲂлѝ чⷭ҇таѧ и҆ всебл҃же́ннаѧ , пᲂми́лᲂватисѧ дш҃а́мъ на́шимъ .

вмѣ́стѡ же , прᲂки́мна . пᲂе́мъ , а҆ллилꙋ́їю , на́ гласъ , и҃ . сти́хъ : бл҃же́ни ꙗ҆́же и҆збра̀ и҆ прїѧ́тъ ѧ҆̀ гдⷭ҇ь , и҆ па́мѧть и҆́хъ ѿ́ рᲂда и҆ в̾ ро́дъ . сти́хъ : дш҃а и҆́хъ во бл҃ги́хъ вᲂдвᲂрѧ́тсѧ .

На стихо́внѣ , мⷱ҇ꙋ . гла́съ , ѕ҃ . Крⷭ҇тъ тво́й гдⷭ҇и , мꙋ́ченикѡмъ бы́сть ѻ҆рꙋ́жїе непᲂбѣди́мᲂе , ви́дѧхꙋ бо пред̾лежа́щꙋю сме́рть , и҆ пред̾зрѧ́ще грѧдꙋ́щꙋю жи́знь , наде́жею твᲂе́ю крѣплѧ́хꙋсѧ . тѣ́хъ мл҃твами пᲂми́лꙋй на́съ .

сти́хъ : бл҃же́ни ꙗ҆́же и҆збра̀ ,꙳ и҆ прїѧ́тъ ѧ҆̀ гдⷭ҇ь . Нача́тᲂкъ ми и҆ сᲂста́въ , зижди́тельнᲂе твᲂѐ бы́сть пᲂвелѣ́нїе . вᲂсхᲂтѣ́въ бо ѿ неви́димагѡ же и҆ ви́димагѡ жи́во сᲂста́вити є҆стество̀ . ѿ землѝ ᲂу҆́бѡ тѣ́ло сᲂзда̀ . да́лъ же ми є҆сѝ дш҃ꙋ , бжⷭ҇твенымъ твᲂи́мъ и҆ живᲂтвᲂрѧ́щимъ в̾дᲂхнᲂве́нїемъ . тѣ́мже сп҃се рабы̀ свᲂѧ̀ , во странѣ̀ живꙋ́щихъ , и҆ в̾ хра́мѣхъ пра́ведныхъ пᲂко́й .

сти́хъ : дш҃а и҆́хъ ,꙳ во бл҃ги́хъ вᲂдвᲂрѧ́тсѧ . Бᲂлѣ́знь а҆да́мꙋ пᲂказа́сѧ дре́ва в̾кꙋше́нїемъ дре́вле во є҆де́мѣ , є҆гда̀ ѕмі́й ꙗ҆́дъ и҆з̾блева̀ . тᲂго́ бо ра́ди вни́де сме́рть всеро́дна , снѣда́ющи чл҃ки . но прише́дъ влⷣка , низ̾лᲂжѝ ѕмі́ѧ , и҆ вᲂскрⷭ҇нїе на́мъ дарᲂва̀ . к̾ немꙋ́ же ᲂу҆́бѡ вᲂзᲂпїе́мъ , пᲂщадѝ сп҃се , и҆́хже прїѧ́тъ , со ст҃ы́ми пᲂко́й , ꙗ҆́кѡ чл҃кᲂлю́бецъ .

сла́ва . гла́съ , в҃ . Ꙗ҆́кѡ цвѣ́тъ ᲂу҆вѧда́етъ , и҆ ꙗ҆́кѡ сѣ́нь ми́мѡ грѧде́тъ , и҆ раз̾рꙋша́етсѧ всѧ́къ чл҃къ . па́ки же гласѧ́щи трꙋбѣ̀ , ме́ртвїи ꙗ҆́кѡ в̾ трꙋ́сѣ всѝ вᲂста́нꙋтъ , к̾ твᲂемꙋ̀ срѣ́тенїю хрⷭ҇тѐ бж҃е . тᲂгда̀ влⷣко и҆́хже преста́ви ѿ на́съ , во ст҃ы́хъ твᲂи́хъ ᲂу҆чинѝ кро́вѣхъ , сᲂгрѣше́нїѧ и҆́хъ бл҃гᲂсе́рде презира́ѧ . и҆ ны́нѣ , боⷢ҇ . Всѐ ᲂу҆пᲂва́нїе мᲂѐ , к̾ тебѣ̀ вᲂзлага́ю мт҃и бж҃їѧ , сᲂхрани́ мѧ во свᲂе́мъ си кро́вѣ .

та́же , нн҃ѣ ѿпꙋща́еши .= трⷭ҇то́е , и҆ по ѻ҆́ч҃е на́шъ . =трᲂпа́рь . гла́съ , и҃ . И҆́же глꙋбина́ми мꙋ́дрᲂсти , чл҃кᲂлю́бнѣ всѧ̀ стро́ѧ , и҆ є҆́же на по́льзꙋ всѣ́мъ пᲂдава́ѧ , є҆ди́не сᲂдѣ́телю . пᲂко́й гдⷭ҇и дш҃а ра́бъ свᲂи́хъ , на тѧ́ бо ᲂу҆пᲂва́нїе вᲂзлᲂжи́ша , твᲂрца̀ и҆ зижди́телѧ и҆ бг҃а на́шегѡ . сла́ва , и҆ ны́нѣ , боⷢ҇ . Тебѐ гра́дъ и҆ приста́нище и҆́мамы , и҆ мᲂли́твеницꙋ бл҃гᲂпрїѧ́тнꙋ , к̾ ро́ждьшемꙋсѧ и҆с̾тебѐ бг҃ꙋ , бцⷣе без̾невѣ́стнаѧ , вѣ́рнымъ спасе́нїе . =є҆ктенїѧ̀ , и҆ =ѿпꙋ́стъ .

по ѿпꙋще́нїи же вече́рни , пᲂе́мъ в̾ притво́рѣ над̾ ко́ливᲂмъ ,= пᲂнахи́дꙋ по ᲂу҆со́пшихъ , по ѡ҆бы́чаю . кано́нъ , =во ѻ҆кта́и , пᲂко́инъ , гла́сꙋ , и҆́же нарѧдꙋ̀ . рѧдᲂво́мꙋ же ст҃о́мꙋ , пᲂе́мъ на па́вечерницѣ , и҆лѝ ка́кѡ настᲂѧ́тель и҆зво́литъ . на па́вечерницѣ , по дᲂсто́йнѡ є҆́сть , гл҃емъ , кᲂнда́къ : со ст҃ы́ми пᲂко́й . сла́ва , и҆ ны́нѣ , кᲂнда́къ : взбра́ннᲂй вᲂево́дѣ .

Въ сꙋбо́тꙋ , на ᲂу҆́трени . =По а҃ , стихᲂло́гїи , сѣда́льны , мч҃нчны . гла́съ , ѕ҃ . Страда́льческїи по́двигъ претерпѣ́вше ст҃і́и твᲂѝ гдⷭ҇и , и҆ вѣнцы̀ пᲂбѣ́ды ѿ тебѐ прїе́мше , ᲂу҆праздни́ша смышле́нїѧ без̾зако́нныхъ , и҆ прїѧ́ша вѣнцы̀ нетлѣ́нныѧ . тѣ́ми бж҃е ᲂу҆мᲂле́нъ быва́ѧ , да́рꙋй на́мъ ве́лїю млⷭ҇ть . =сти́хъ : ди́венъ бг҃ъ во ст҃ы́хъ свᲂи́хъ бг҃ъ і҆и҃левъ . Страстᲂте́рпческими прᲂтивле́ньми въ по́двизѣ , мꙋчи́телей ра́ны претерпѣ́ша мч҃нцы , и҆ стᲂѧ́хꙋ ли́цы беспло́тныхъ , по́чести держа́ще пᲂбѣ́ды . ᲂу҆диви́ша премꙋ́дрїи мꙋчи́телей и҆ царе́й , низ̾лᲂжи́ша врага̀ и҆спᲂвѣ́данїемъ хрⷭ҇то́вымъ . ᲂу҆крѣпи́выи и҆́хъ гдⷭ҇и сла́ва тебѣ̀ . сти́хъ : вᲂзва́ша пра́веднїи , и҆ гдⷭ҇ь ᲂу҆слы́ша и҆́хъ . Гдⷭ҇и ст҃ы́хъ твᲂи́хъ па́мѧть , дне́сь пᲂказа́сѧ ꙗ҆́кѡ ра́й и҆́же во є҆де́мѣ , в̾ не́й бо весели́тсѧ всѧ̀ тва́рь . пᲂда́ждь на́мъ тѣ́хъ мл҃твами ве́лїю млⷭ҇ть . сла́ва , пᲂко́инъ . Вᲂи́стинꙋ сꙋета̀ всѧ́ческаѧ , житїе́ же сѣ́нь и҆ со́нъ . и҆́бо всꙋ́е мѧте́тсѧ всѧ́къ чл҃къ , ꙗ҆́кᲂже речѐ писа́нїе , є҆гда̀ ми́ръ прїѡбрѧ́щемъ , тᲂгда̀ во́ грᲂбъ в̾сели́мсѧ , и҆дѣ́же всѝ ца́рїе и҆ ни́щїи . тѣ́мже хрⷭ҇тѐ бж҃е преста́вившїѧсѧ пᲂко́й , ꙗ҆́кѡ чл҃кᲂлю́бецъ . и҆ нн҃ѣ , боⷢ҇ . И҆́же бл҃гᲂслᲂве́нꙋю нарекі́и мт҃рь себѣ̀ , прїи́де на́ стрⷭ҇ть во́лею свᲂе́ю , вᲂсїѧ́въ на крⷭ҇тѣ̀ , взыска́ти хᲂтѧ̀ а҆да́ма . гл҃ѧ а҆́нг҃лѡмъ , сра́дꙋйтемисѧ , ꙗ҆́кѡ ѡ҆брѣ́тесѧ и҆зги́бшаѧ дра́хма . и҆́же всѧ̀ мꙋ́дрѣ ᲂу҆стро́ивыи , гдⷭ҇и сла́ва тебѣ̀ .

пᲂе́мъ , =каѳи́смꙋ , з҃і . бл҃же́ни непᲂро́чнїи , =съ припѣ́вᲂмъ : бл҃гᲂслᲂве́нъ є҆сѝ гдⷭ҇и . на́ гласъ , є҃ . на́двѣ статїѝ . по а҃ же , статїѝ . пᲂе́мъ , є҆ктенїю̀ . ѡ҆ ᲂу҆со́пшихъ . на в҃ й статїѝ , припѣ́въ : сп҃се спаси́ мѧ . на кᲂнцѣ̀ жива̀ бꙋ́детъ дш҃а мᲂѧ̀ , гⷤ , съ припѣ́вᲂмъ .

та́же , пᲂе́мъ : блгⷭ҇ве́нъ є҆сѝ гдⷭ҇и наꙋчѝ на́съ ѡ҆правда́нїемъ твᲂи́мъ . Ст҃ы́хъ ли́къ ѡ҆брѣ́те и҆сто́чникъ жи́зни . и҆ две́рь ра́йскꙋю ѡ҆брѧ́щꙋ и҆ а҆́зъ пꙋ́ть пᲂкаѧ́нїемъ . пᲂги́бшее ѻ҆вча̀ а҆́зъ є҆́смь , призᲂви́ мѧ сп҃се и҆ спаси́ мѧ .= блгⷭ҇ве́нъ є҆сѝ гдⷭ҇и наꙋчѝ на́съ ѡ҆правда́нїемъ твᲂи́мъ . И҆́же дла́нїю ѿ небы́тїѧ сᲂзда́выи мѧ , и҆ ѻ҆́бразᲂмъ свᲂи́мъ бжⷭ҇твенымъ пᲂче́тъ . престꙋпле́нїемъ же за́пᲂвѣди , па́ки вᲂзврати́ мѧ въ зе́млю , ѿ неѧ́же взѧ́тъ бы́хъ . и҆ напᲂдо́бьствїе вᲂзведе́ мѧ , и҆ дре́внею дᲂбро́тᲂю ᲂу҆краси́въ мѧ . блгⷭ҇ве́нъ є҆сѝ гдⷭ҇и наꙋчѝ на́съ ѡ҆правда́нїемъ твᲂи́мъ . Ѻ҆́бразъ є҆́смь неи҆зрече́нныѧ сла́вы твᲂеѧ̀ , а҆́ще и҆ ꙗ҆́звы нᲂшꙋ̀ сᲂгрѣше́нїѧ , но ᲂу҆ще́дри свᲂѐ сᲂзда́нїе влⷣко , и҆ ѡ҆чи́сти свᲂи́мъ млрⷭ҇дїемъ . и҆ жела́емᲂе ѻ҆те́чество пᲂда́ждь ми . и҆ раю̀ па́ки сᲂтвᲂри́ мѧ жи́телѧ . =блгⷭ҇ве́нъ є҆сѝ гдⷭ҇и наꙋчѝ на́съ ѡ҆правда́нїемъ твᲂи́мъ . И҆́же в̾ пꙋ́тъ ᲂу҆́зкїи , и҆ приско́рбныи хᲂди́вшїи , и҆ всѝ и҆́же в̾ житїѝ , крⷭ҇тъ ꙗ҆́кѡ ꙗ҆ре́мъ на ра́мо взе́мшїи , и҆ мнѣ̀ пᲂслѣ́дᲂвавше вѣ́рᲂю , прїиди́те и҆ прїими́те , ꙗ҆́же ᲂу҆гᲂто́вахъ ва́мъ по́чести , вѣнцы̀ нбⷭ҇ныѧ . блгⷭ҇ве́нъ є҆сѝ гдⷭ҇и наꙋчѝ на́съ ѡ҆правда́нїемъ твᲂи́мъ . И҆́же а҆́гньца бж҃їѧ прᲂпᲂвѣ́давше , и҆ закла́ни бы́вше ꙗ҆́кѡ а҆́гньцы , и҆ къ жи́зни и҆́стиннѣй ст҃і́и преста́вльшесѧ , тᲂмꙋ̀ прилѣ́ж нѡ мч҃нцы мᲂли́тесѧ , сᲂгрѣше́нїемъ разрѣше́ нїе на́мъ дарᲂва́ти . блгⷭ҇ве́нъ є҆сѝ гдⷭ҇и наꙋчѝ на́съ ѡ҆правда́нїемъ твᲂи́мъ . Пᲂко́й бж҃е рабы̀ свᲂѧ̀ , и҆ ᲂу҆чинѝ и҆́хъ в̾ раѝ , и҆дѣ́же ли́цы ст҃ы́хъ ти гдⷭ҇и , а҆ пра́веднїи ꙗ҆́кѡ свѣти́ла сїѧ́ютъ . ᲂу҆со́пшїѧ рабы̀ свᲂѧ̀ пᲂко́й , презрѧ̀ и҆́мъ всѧ̀ сᲂгрѣше́нїѧ . сла́ва . Трисвѣ́тлагѡ є҆ди́нагѡ бжⷭ҇тва̀ , бл҃гᲂче́стнѡ пᲂе́мъ вᲂпїю́ще , ст҃ъ є҆сѝ ѻ҆́ч҃е без̾нача́льне , сн҃е и҆ ст҃ы́и д́ш҃е . прᲂсвѣтѝ на́съ со́ страхᲂмъ вᲂпїю́щихъ тѝ , и҆ вѣ́рᲂю сла́вѧщихъ тѧ̀ , и҆ ѿ вѣ́чнагѡ ѻ҆гнѧ̀ и҆схитѝ . и҆ ны́нѣ . Ра́дꙋисѧ чи́стаѧ , ꙗ҆́же бг҃а пло́тїю без̾ сѣ́мене ро́ждьшаѧ , на спасе́нїе всѣ́мъ . и҆ ро́дъ чл҃ческїи ѡ҆брѣ́те тᲂбо́ю спасе́нїе . и҆ тᲂбо́ю ра́й да ѡ҆брѧ́щемъ , бцⷣе чⷭ҇таѧ и҆ блгⷭ҇ве́наѧ . а҆ллилꙋ́їѧ , гⷤ . та́же , є҆ктенїѧ̀ , за ᲂу҆пᲂко́й .= та́же , сѣда́ленъ . гла́съ , є҃ . Пᲂко́й сп҃се на́шъ , с̾ пра́ведными рабы̀ свᲂѧ̀ , и҆ тѣ́хъ вселѝ во двᲂры̀ свᲂѧ̀ , ꙗ҆́кᲂже пи́шетъ , презрѧ̀ и҆́мъ всѧ̀ прегрѣше́нїѧ и҆́хъ ꙗ҆́кѡ бл҃гъ , во́льнаѧ и҆ нево́льнаѧ , и҆ всѧ̀ ꙗ҆́же в̾вѣ́дѣнїи и҆ не в̾вѣ́дѣнїи чл҃кᲂлю́бче . =сла́ва , и҆ ны́нѣ , боⷢ҇ . И҆́же ѿ дв҃ы вᲂсїѧ́выи всемꙋ̀ ми́рꙋ хрⷭ҇тѐ бж҃е , и҆ сн҃ы свѣ́тꙋ тᲂѧ̀ ра́ди пᲂказа́выи пᲂми́лꙋй на́съ .

та́же , ѱл҃о́мъ , н҃ . кано́нъ ст҃о́мꙋ , є҆мꙋ́же є҆́сть хра́мъ , со і҆рмᲂсо́мъ , на́ ѕ҃ . а҆ =настᲂѧ́щїи , на́ и҃ . =гла́съ , и҃ . пѣ́снь , а҃ . і҆рмо́съ . Пѣ́снь вᲂз̾сле́мъ . запѣ́в̾ : Пᲂко́й гдⷭ҇и дш҃а ᲂу҆со́пшихъ ра́бъ свᲂи́х̾ . Всѝ пᲂмо́лимсѧ хрⷭ҇тꙋ̀ , твᲂрѧ́ще па́мѧть дне́сь и҆́же ѿ́ вѣка ме́ртвымъ , да ѿ вѣ́чнагѡ ѻ҆гнѧ̀ тѣ́хъ и҆зба́витъ , в̾ вѣ́рѣ ᲂу҆со́пшихъ , ѡ҆ ᲂу҆пᲂва́нїи жи́зни вѣ́чныѧ . вⷤ . Глꙋбино́ю сꙋде́бъ твᲂи́хъ сп҃се , премꙋ́дре ты̀ пред̾пᲂвелѣ̀ , кᲂго́ждо кᲂнчи́нꙋ жи́зни , мѣ́сто и҆ ѻ҆́бразъ . тѣ́мже и҆́хже пᲂкры̀ гро́бъ , во всѧ́кᲂй странѣ̀ , на сꙋдѣ̀ спасѝ всеще́дре . Со́нъ жи́зни на́шеѧ ви́дѣвъ , тѣ́мже ᲂу҆со́пшїѧ ѿ жите́йскїѧ но́щи , днѝ невече́рнемꙋ сн҃ы пᲂкажѝ гдⷭ҇и , ст҃ли правᲂсла́вныѧ , цр҃и́ же и҆ всѧ̀ лю́ди . И҆́хже пᲂкры̀ вᲂда̀ и҆ бра́нь пᲂжа́тъ , и҆́хже ѡ҆бїѧ́тъ трꙋ́съ , и҆ ᲂу҆би́ша ᲂу҆бі́ицы , и҆ и҆́хже ѻ҆́гнь пᲂпалѝ , вѣ́рныхъ млⷭ҇тиве в̾ че́сти ст҃ы́хъ ᲂу҆чинѝ . Всѧ̀ презрѣ́въ плᲂтьскі́ѧ до́лги сп҃се на́шъ , во всѧ́кᲂмъ во́зрастѣ всегѡ̀ ро́да чл҃ча , пред̾ сꙋди́щемъ твᲂи́мъ пᲂста́ви неѡ҆сꙋжде́ны , тебѣ̀ зижди́телю ѿвѣща́ющихъ . сла́ва . Трѝ сᲂста́вы є҆ди́нагѡ є҆стества̀ пᲂю̀ , нерᲂжде́нна ᲂу҆́бѡ ѻ҆ц҃а , сн҃а же ро́ждьшагᲂсѧ , и҆ дх҃а ст҃а́гѡ , без̾нача́льно црⷭ҇тво , вла́сть и҆ бжⷭ҇тво̀ є҆ди́но . и҆ нн҃ѣ , боⷢ҇ . Вᲂи́стинꙋ ты̀ ꙗ҆ви́сѧ нб҃о на землѝ , бо́льше вы́шнѧгѡ нб҃сѐ без̾невѣ́стнаѧ дв҃о , и҆з̾ тебе́ бо вᲂсїѧ̀ сл҃нце в̾ ми́рѣ влⷣка пра́вды .

катава́сїѧ : Пѣ́снь вᲂз̾сле́мъ лю́дїе чꙋдᲂтво́рцꙋ бг҃ꙋ , свᲂбо́ждьшемꙋ і҆и҃лѧ ѿ рабо́ты , пѣ́снь пᲂбѣ́днꙋю пᲂю́ща и҆ вᲂпїю́ща , вᲂспᲂе́мъ тебѣ̀ є҆ди́нᲂмꙋ влⷣцѣ .

пѣ́снь , в҃ . і҆рмо́съ . Ви́дите ви́дите . Ви́дите ви́дите , ꙗ҆́кѡ а҆́зъ є҆́смь бг҃ъ ва́шъ , и҆́же пра́веднымъ сꙋдо́мъ вᲂдрꙋзи́въ предѣ́лы жи́зни . и҆́же в̾ нетлѣ́нїе ѿ тлѝ прїи́мъ всѧ̀ ᲂу҆со́пшїѧ в̾ наде́жи вѣ́чнагѡ вᲂскрⷭ҇нїѧ . И҆́же ѿ четы́рехъ кᲂне́цъ гдⷭ҇и прїе́мъ вѣ́рнѡ ᲂу҆ме́ршїѧ , в̾ мо́ри , и҆лѝ на землѝ , и҆лѝ в̾ рѣка́хъ , и҆лѝ во є҆зе́рахъ , и҆лѝ в̾ ро́веницѣхъ , снѣ́дь ѕвѣре́мъ бы́вшїѧ , пти́цамъ и҆ гадо́мъ , всѧ̀ пᲂко́й . Свᲂе́ю дла́нїю всѧ́ческаѧ гдⷭ҇и , к̾ разсꙋже́нїю , растлѣ́вшїѧсѧ в̾ сᲂста́вы четы́ри , въ прише́ствїи твᲂе́мъ со́бравъ вᲂскресѝ , всѧ̀ и҆́же в̾ невѣ́денїи и҆ ра́зꙋмѣ прᲂща́ѧ тѣ́хъ прегрѣше́нїѧ . ѽ стра́шнᲂмꙋ твᲂемꙋ̀ , втᲂро́мꙋ гдⷭ҇и прише́ствїю , є҆гда̀ ꙗ҆́кѡ в̾ видѣ́нїи мо́лнїи на́ землю прише́дъ , вᲂздви́гнеши всѐ сᲂзда́нїе свᲂѐ сꙋди́тисѧ , и҆́же в̾ вѣ́рѣ тᲂгда̀ пᲂжи́вшихъ , срѣ́тшихъ тѧ̀ с̾ тᲂбо́ю бы́ти спᲂдо́би . сла́ва . Пренепᲂро́чнаѧ є҆ди́нице , пребжⷭ҇твенаѧ трисᲂста́внаѧ , нерᲂжде́нне ѻ҆́ч҃е , сн҃е є҆динᲂро́дне , и҆ дш҃е ѿ ѻ҆ц҃а и҆схᲂдѧ́и , сн҃ᲂмъ же ꙗ҆влѧ́ѧсѧ , премꙋ́дрᲂсте и҆ пра́вдо . гдⷭ҇ьство и҆ црⷭ҇тво , спасѝ всѣ́хъ на́съ . и҆ ны́нѣ , боⷢ҇ . Не и҆з̾гл҃аннᲂе чꙋ́до твᲂегѡ̀ ржⷭ҇тва̀ мт҃и дв҃о , ка́ко бо ражда́еши , и҆ чиста̀ є҆сѝ в̾ то́мже ; ка́кѡ ѻ҆трᲂча̀ ражда́еши , и҆ невѣ́си ѿ ню́дъ и҆скꙋ́са мꙋ́жеска ; ꙗ҆́кᲂже вѣ́сть и҆́же вы́ше є҆стества̀ ѿ менѐ нᲂвᲂлѣ́пнѡ , сло́во бж҃їе рᲂди́всѧ .

катава́сїѧ : Ви́дите ви́дите ꙗ҆́кѡ а҆́зъ є҆́смь бг҃ъ ва́шъ , и҆́же пре́жде вѣ́къ рᲂжде́нныи ѿ ѻ҆ц҃а , и҆ ѿ дв҃ы в̾ пᲂслѣ́днѧѧ без̾ мꙋ́жа вᲂпло́щсѧ , и҆ разо́рь прегрѣше́нїѧ пра́дѣда а҆да́ма , ꙗ҆́кѡ чл҃кᲂлю́бецъ .

пѣ́снь , г҃ . і҆рмо́съ . Оу҆тверже́й рꙋко́ю свᲂе́ю .

Преше́дшїѧ житїѧ̀ тече́нїе , въ сла́вѣ бл҃гᲂче́стнѣ , пра́веднымъ ѡ҆дѣ́ѧтисѧ вѣнце́мъ спᲂдо́би бж҃е , и҆ нбⷭ҇ныхъ бл҃гъ наслади́тисѧ . вⷤ . И҆́хъ же всѧ́кᲂмꙋ є҆стествꙋ̀ мᲂрски́мъ , и҆ пти́цамъ нбⷭ҇нымъ бы́сть бра́шно , твᲂи́ми сꙋдьба́ми хрⷭ҇тѐ , вᲂскр҃сѝ бж҃е , въ пᲂслѣ́днїи дн҃ь со сла́вᲂю . вⷤ . И҆́же напра́снѡ вᲂсхище́нныѧ пᲂпалѧ́емыѧ ѿ мо́лнїи , и҆ и҆зме́ршїѧ мра́зᲂмъ и҆ всѧ́кᲂю ра́нᲂю , пᲂко́й бж҃е , є҆гда̀ всѧ̀ ѻ҆гне́мъ и҆скꙋ́сиши . И҆́же при́снѡ вᲂзмꙋще́нᲂе , житїѧ̀ мо́ре преплы́вшїѧ хрⷭ҇тѐ в̾ нетлѣ́ннᲂе твᲂегѡ̀ житїѧ̀ спᲂдо́би приста́нище притещѝ , и҆́же правᲂсла́вно житїѐ ѡ҆кᲂрми́вшїѧ . сла́ва . Оу҆́мно бжⷭ҇твенꙋю є҆ди́ницꙋ , в̾ трѝ ли́ца про́сто вкꙋ́пѣ раздѣли́ти , и҆ в̾ то́мже сᲂвᲂкꙋпле́нїи . ꙗ҆́кᲂже ско́рᲂсть мо́лнїи в̾ трѝ лица̀ сїѧ́ющи , ви́дитсѧ во є҆ди́нствѣ . и҆ ны́нѣ , боⷢ҇ . Недᲂꙋмѣ́нно є҆́сть твᲂѐ чꙋ́до , бе́з̾мꙋжа бо ражда́еши , и҆ дв҃ство свᲂѐ чи́сто сᲂблюда́еши ро́ждьши . тѣ́мже а҆́нг҃лъ мно́жество , и҆ чл҃ческїи ро́дъ пᲂе́тъ тѧ̀ во́ вѣки .

катава́сїѧ : Оу҆тверже́й рꙋко́ю свᲂе́ю , сн҃е бж҃їи нб҃са̀ , на ᲂу҆тверже́нїе и҆́стиннагѡ ра́зꙋма . ᲂу҆твердѝ на́ша срⷣца̀ на тѧ̀ надѣ́ющихсѧ .

та́же , є҆ктенїѧ̀ ѻ҆бы́чнаѧ . а҆ не заꙋпᲂко́й . пᲂсе́мъ , кᲂнда́къ , и҆ и҆́кᲂсъ , хра́мꙋ .= и҆ с=ѣда́ленъ .

пѣ́снь , д҃ . і҆рмо́съ . И҆з̾ гᲂры̀ присѣ́нныѧ . Ѻ҆ц҃ы и҆ пра́ѻ҆ц҃ы , дѣ́ды и҆ пра́дѣды , ѿ пе́рвыхъ да́же и҆ до пᲂслѣ́днихъ , во бл҃гᲂзако́нїи ᲂу҆ме́ршїѧ и҆ бл҃гᲂвѣ́рїи , всѧ̀ пᲂмѧнѝ сп҃се на́шъ . вⷤ . Въ гᲂрѣ̀ и҆ на пꙋтѝ , на мѣ́стехъ пꙋсты́хъ житїѐ ѡ҆ста́вившїѧ в̾ вѣ́рѣ , и҆́нᲂки же и҆ бѣльцы̀ , ю҆́нᲂшы и҆ ста́рцы , со ст҃ы́ми хрⷭ҇тѐ вселѝ . вⷤ . И҆́хъ же ᲂу҆бѝ ме́чь и҆ ко́нь сᲂвᲂсхи́ти , гра́дъ снѣ́гъ , и҆ до́ждь ᲂу҆мно́женъ . и҆́хже ᲂу҆давѝ пли́нфа , и҆лѝ пе́рсть пᲂсы́па , хрⷭ҇тѐ сп҃се на́шъ пᲂко́й . Ѿ печа́ли и҆ ра́дᲂсти , преше́дшїѧ ненаде́жно , и҆́же в̾ вѣ́рѣ ᲂу҆́бѡ ѡ҆ста́вившїѧ житїѐ , в̾ бл҃гᲂде́нствїи пᲂстрада́вшїѧ и҆лѝ ѕлᲂдѣ́йствы , хрⷭ҇тѐ сп҃се на́шъ пᲂко́й . сла́ва . Стра́нно ꙗ҆́кѡ є҆ди́но , и҆ трѝ бжⷭ҇тво̀ , всѐ по є҆ди́нᲂмꙋ лицꙋ̀ нераздѣ́льно , ѻ҆ц҃ъ бо и҆ сн҃ъ и҆ дх҃ъ ст҃ы́и є҆́сть , пᲂклᲂнѧ́емъ є҆ди́нъ бг҃ъ . и҆ ны́нѣ , боⷢ҇ . Напра́ви на́съ дв҃о ѡ҆кᲂрмлѧ́ющи , ѡ҆бꙋрева́емыѧ вᲂлно́ю грѣха̀ , в̾ спасе́нᲂе приста́нище , гдⷭ҇ᲂрᲂди́тельнице , и҆збавлѧ́ющи ѿ всѧ́кихъ лю́тъ .

катава́сїѧ : И҆з̾ гᲂры̀ присѣ́нныѧ сло́ве прⷪ҇ро́къ , и҆з̾ є҆ди́ныѧ бцⷣы хᲂтѧ́щасѧ вᲂплᲂти́ти , бг҃ᲂви́днѡ разсмо́трь , и҆ со́ страхᲂмъ славᲂсло́вѧши си́лꙋ твᲂю̀ .

пѣ́снь , є҃ . і҆рмо́съ . Оу҆́треннюетъ дх҃ъ мо́й . Кᲂго́ждо па́мѧть ᲂу҆ме́ршихъ бл҃гᲂче́стно ѿ́ вѣка , дне́сь твᲂрѧ́ще , гдⷭ҇и , прилѣ́жно тѝ вᲂпїе́мъ , всѧ̀ пᲂко́й со ст҃ы́ми твᲂи́ми . вⷤ . Ѿ всѧ́кᲂгѡ и҆́х̾же прїѧ́тъ ро́да и҆ ро́да , цр҃е́й и҆ кнѧ́зь , и҆лѝ и҆́нᲂки правᲂсла́вныѧ ще́дре , вѣ́чнагѡ тѣ́хъ и҆зба́ви мꙋче́нїѧ . вⷤ . Всѣ́хъ и҆́хъ же со́здалъ є҆сѝ , пᲂле́знаѧ вѣ́дыи , и҆́мже пᲂпꙋсти́лъ є҆сѝ гдⷭ҇и ско́рыми паде́жами не наде́жнѡ ᲂу҆мретѝ , и҆зба́ви мꙋ́ки всѧ́кїѧ бж҃е на́шъ . Ѻ҆гнѧ̀ при́снѡ палѧ́щаго , и҆ ѿ тмы̀ несвѣти́мыѧ , скре́жета зꙋбна́гѡ , и҆ че́рвїѧ всегда̀ мꙋча́щаго , и҆ всѧ́кїѧ мꙋ́ки и҆зба́ви сп҃се на́шъ , всѧ̀ ᲂу҆ме́ршїѧ вѣ́рнѡ . сла́ва . Є҆дино престо́льнаѧ без̾нача́льнаѧ , трисᲂста́внаѧ є҆ди́ нице , ꙗ҆́же раздѣле́нїемъ є҆ди́нство и҆ сᲂеди не́нїемъ ли́цы є҆стество̀ и҆мꙋ́щаѧ во є҆ди́но на́съ сᲂвᲂкꙋпѝ хᲂтѣ́нїе , твᲂи́хъ за́пᲂвѣдей . и҆ ны́нѣ , боⷢ҇ . Па́че ѻ҆гнезра́чныхъ серафи́мъ , ꙗ҆ви́сѧ чⷭ҇таѧ чⷭ҇тнѣ́йши , ро́ждьши си́мъ непри стꙋ́пнагѡ , і҆с҃а сп҃са , вᲂплᲂще́нїемъ ѡ҆бᲂжи́вша земнᲂро́дныхъ сꙋщество̀ .

катава́сїѧ : Оу҆́треннюетъ дх҃ъ мо́й , к̾ тебѣ̀ хрⷭ҇тѐ бж҃е , занѐ свѣ́тъ пᲂвелѣ́нїѧ твᲂегѡ̀ прише́ ствїѧ , в̾ ни́хъ ᲂу҆́бѡ ѡ҆зарѝ ᲂу҆ма̀ на́шегѡ влⷣко , и҆ наста́ви на стезю̀ живо́тнꙋю .

пѣ́снь , ѕ҃ . і҆рмо́съ . Ѡ҆держи́ма мѧ прїимѝ . Сме́рти разрꙋши́выи бᲂлѣ́зни страсте́й , нача́льниче жи́зни бж҃е на́шъ , и҆́же ѿ́ вѣка ᲂу҆со́пшїѧ , рабы̀ твᲂѧ̀ пᲂко́й . два́жды . Не и҆з̾гл҃анными твᲂи́ми сꙋдьба́ми , и҆́хже ᲂу҆би́ша чаро́внаѧ напᲂе́нїѧ , ѡ҆тра́вы , и҆ напра́снᲂе ᲂу҆давле́нїе , со ст҃ы́ми гдⷭ҇и пᲂко́й . Є҆гда̀ сꙋ́диши всѧ́ческимъ , стᲂѧ́щимъ наги́мъ , и҆ ѿкрᲂве́ нᲂмъ пред̾ лице́мъ твᲂи́мъ , тᲂгда̀ ще́дре пᲂщадѝ пᲂслꙋжи́вшихъ ти вѣ́рнѡ бж҃е . Въ пᲂслѣ́дней ᲂу҆́бѡ трꙋбѣ̀ , вᲂстрꙋби́вшꙋ твᲂемꙋ̀ а҆рха́нг҃лꙋ , в̾ вᲂскрⷭ҇нїе жи́зни всѣ́хъ , тᲂгда̀ хрⷭ҇тѐ рабы̀ твᲂѧ̀ пᲂко́й . Ѿв́ѣка и҆́хъ же прїѧ́тъ вѣ́рныѧ бж҃е , ро́да всѧ́кᲂгѡ чл҃ча , спᲂдо́би во́ вѣки со ᲂу҆го́ждьшими тебѣ̀ сла́вити тѧ . сла́ва . Бг҃ᲂнача́льнаѧ трист҃а́ѧ и҆ є҆динᲂпрⷭ҇то́льнаѧ , трⷪ҇це ѻ҆́ч҃е и҆ сн҃е со ст҃ы́мъ дх҃ᲂмъ , ты̀ є҆сѝ бг҃ъ мо́й , и҆́же все́ю держа́вᲂю свᲂе́ю , сᲂдержа́и всѧ́ческаѧ . и҆ нн҃ѣ , боⷢ҇ . Ѿ ко́рене твᲂегѡ̀ вᲂсїѧ̀ цвѣ́тъ жи́зни , спаса́ѧи ми́ра ѿ чⷭ҇тыѧ ѻ҆тро кᲂви́цы хрⷭ҇то́съ бг҃ъ , и҆ є҆ссе́ю пра́дѣде взыгра́й .

катава́сїѧ : Ѡ҆держи́ма мѧ прїимѝ милᲂсе́рде , грѣхмѝ мно́гими , и҆ припа́дающа к̾ щедро́тамъ твᲂи́мъ ꙗ҆́кѡ прᲂро́ка гдⷭ҇и , и҆ спаси́ мѧ .

пᲂсе́мъ , є҆ктенїѧ̀ заꙋпᲂко́й . и҆ мᲂли́тва и҆ вᲂз̾гла́съ . та́же , кли́рицы пᲂю́тъ насхо́дѣ . кᲂнда́къ , со ст҃ы́ми пᲂко́й . и҆ ста́въ пра́выи ли́къ на кры́лᲂсъ пᲂе́тъ , кᲂне́цъ и҆́кᲂса .

кᲂнда́к̾ . гла́съ , и҃ . Со ст҃ы́ми ᲂу҆пᲂко́й хрⷭ҇тѐ дш҃а ра́бъ свᲂи́хъ , и҆дѣ́же нѣ́сть бᲂлѣ́зни , ни печа́ ли , ни вᲂздыха́нїѧ , но жи́знь без̾кᲂне́чнаѧ . и҆́кᲂсъ . Са́мъ є҆ди́нъ є҆сѝ без̾сме́ртенъ , сᲂтвᲂри́ выи и҆ сᲂзда́выи чл҃ка . земні́и же ѿ землѝ со́здани бы́хᲂмъ , и҆ в̾ зе́млю тꙋ́же по́йдемъ , ꙗ҆́кᲂже пᲂвелѣ́лъ є҆сѝ сᲂзда́выи мѧ̀ и҆ ре́клъ ми , ꙗ҆́кѡ землѧ̀ є҆сѝ , и҆ в̾ зе́млю по́йдеши , и҆дѣ́же всѝ земні́и ѿхо́димъ , над̾гро́бнᲂе рыда́нїе твᲂрѧ́ще , и҆ пᲂю́ще пѣ́снь а҆́нг҃льскꙋю , а҆ллилꙋ́їѧ .

пѣ́снь , з҃ . і҆рмо́съ . Ѡ҆снᲂва́выи зе́млю . И҆́же бл҃гᲂче́стнѡ ѿ́ вѣка преста́вльшихсѧ па́мѧть твᲂрѧ́ще вᲂпїе́мъ , блгⷭ҇ве́нъ є҆сѝ во́ вѣки гдⷭ҇и , бж҃е ѻ҆ц҃ъ на́шихъ . вⷤ . И҆́же напра́снѡ ᲂу҆ме́ршїѧ , и҆з̾ бре́га и҆ стремни́ны па́дшїѧсѧ , и҆ дре́ва , и҆ желѣ́за , и҆ всѧ́кᲂгѡ ка́мене , пᲂко́й бж҃е ᲂу҆со́пшїѧ вѣ́рнѡ . вⷤ . Въ стра́шнᲂе прише́ствїе твᲂѐ ще́дре , ѡ҆деснꙋ́ю ѻ҆ве́цъ свᲂи́хъ пᲂста́ви , правᲂсла́внѡ и҆́же в̾ жи́зни пᲂслꙋжи́вшихъ ти хрⷭ҇тѐ , и҆ преста́вльшїѧсѧ к̾ тебѣ̀ . вⷤ . сла́ва . Ꙗ҆́кᲂже трисл҃нца бжⷭ҇тво̀ , є҆ди́нагѡ свѣ́та сїѧ́нїе , да вᲂспᲂе́тсѧ . ѻ҆ц҃ъ бо и҆ сн҃ъ и҆ бжⷭ҇твеныи дх҃ъ , є҆ди́нъ є҆стество́мъ , но трѝ сᲂста́вы . и҆ ны́нѣ , боⷢ҇ . Дв҃дьскᲂе сᲂгла́снѡ вᲂспѣва́емъ пѣ́нїе , го́рꙋ бж҃їю тѧ̀ нари́чꙋще дв҃о . в̾ ню́же всели́сѧ пло́тїю сло́во , ѡ҆бнᲂвѝ на́съ дх҃о́вно в̾ себѣ̀ .

катава́сїѧ : Ѡ҆снᲂва́выи зе́млю в̾ нача́тцѣ , и҆ нб҃са̀ сло́вᲂмъ ᲂу҆тверже́й , бл҃гᲂслᲂве́нъ є҆сѝ гдⷭ҇и бж҃е ѻ҆ц҃ъ на́шихъ .

пѣ́снь , и҃ . і҆рмо́съ . Прᲂѧвле́ннагѡ на гᲂрѣ̀ . Сᲂкрꙋши́выи пе́рвѣе сѣ́нь сме́ртнꙋю , вᲂсїѧ́въ тридне́вно и҆́з̾ грᲂба , сн҃ы вᲂскрⷭ҇нїѧ свᲂегѡ̀ сᲂтвᲂрѝ , гдⷭ҇и сла́вы , всѧ̀ ᲂу҆ме́ршїѧ в̾ вѣ́рѣ во́ вѣки . двⷤа . Без̾вѣ́стнымъ и҆ сᲂкрᲂве́нымъ свѣ́дѣтелю , є҆гда̀ хо́щеши ѿкры́ти тмы̀ дѣ́ла , и҆ сᲂвѣ́ты срⷣцъ на́шихъ , тᲂгда̀ не и҆стѧжѝ сло́ва , со всѣ́ми и҆́же вѣ́рᲂю ᲂу҆со́пшими . двⷤа . Оу҆ме́ршїѧ напра́снѡ ѿ паде́нїи , ѿ кли́ча же ѕѣ́льна , и҆ ско́ра тече́нїѧ , заꙋше́нїѧ и҆ ᲂу҆давле́ нїѧ же и҆ пха́нїѧ , гдⷭ҇и сла́вѣ , вѣ́рᲂю ᲂу҆со́пшимъ ѡ҆сла́би во́ вѣки . вⷤ . бл҃гᲂслᲂви́мъ ѻ҆ц҃а и҆ сн҃а и҆ ст҃а́гѡ дх҃а гдⷭ҇а . Ꙗ҆́кѡ є҆ди́ницꙋ сꙋщество́мъ пᲂю́ тѧ , ꙗ҆́кѡ трⷪ҇цꙋ ли́цы тѧ̀ чтꙋ̀ , ѻ҆́ч҃е и҆ сн҃е и҆ дш҃е прест҃ы́и , без̾нача́льнꙋю держа́вꙋ твᲂегѡ̀ црⷭ҇твїѧ сла́влю во́ вѣки . и҆ ны́нѣ , боⷢ҇ . Стрꙋѧ̀ жива́гѡ и҆сто́чника запечатлѣ́нна пᲂказа́сѧ бцⷣе дв҃о , бе́з̾мꙋжа бо гдⷭ҇а ро́ждьши , без̾сме́ртїѧ вᲂдо́ю вѣ́рныѧ напаѧ́еши во всѧ̀ вѣ́ки .

катава́сїѧ : Хва́лимъ бл҃гᲂслᲂви́мъ кла́нѧемсѧ гдⷭ҇ви , пᲂе́мъ и҆ превᲂзно́симъ є҆гѡ̀ во́ вѣки . = Прᲂѧвле́ннагѡ на гᲂрѣ̀ ст҃ѣ́й , и҆ в̾ кꙋпинѣ̀ ѻ҆́гненнѣй , дв҃ческꙋю мѡѷсе́ѡви та́йнꙋ ꙗ҆́вльшагѡ , гдⷭ҇а по́йте и҆ превᲂзнᲂси́те є҆гѡ̀ во́ вѣки =[пᲂкло́н̾] . честнѣ́йшꙋю пᲂе́мъ .

пѣ́снь , ѳ҃ . і҆рмо́съ . Прᲂѧвле́ннᲂе на гᲂрѣ̀ . И҆дѣ́же є҆́сть веселѧ́щимсѧ жили́ще , ст҃ы́мъ твᲂи́мъ гдⷭ҇и , всѧ̀ ѿ́ вѣка ᲂу҆со́пшїѧ , в̾ вѣ́рѣ же и҆ наде́жди , ра́дᲂватисѧ спᲂдо́би . вⷤ . И҆́же бж҃їѧ гнѣ́ва мо́рᲂмъ ᲂу҆ме́ршїѧ , сᲂкрꙋше́ныѧ ѿ трѣснᲂве́нїѧ всѧ́кᲂгѡ , с̾ нб҃сѐ снесе́наго , землѝ раз̾сѣ́дшисѧ , и҆ разгна́вшꙋсѧ мо́рю , всѧ̀ вѣ́р ныѧ хрⷭ҇тѐ пᲂко́й . И҆́же ѿ гадо́въ ᲂу҆грызе́ньми ᲂу҆ме́ршїѧ , пᲂглᲂще́ныѧ ѕмїѧ́ми , и҆ пᲂпра́ньми ко́ньскими , и҆ ѿ ᲂу҆давле́нїѧ и҆ ѡ҆бѣ́шанїѧ ѿ и҆́скренѧгѡ , вѣ́рно ти пᲂслꙋжи́вшїѧ пᲂко́й . Всѧ́къ во́зрастъ , ста́рцы , и҆ ю҆́нᲂши , ю҆́ныѧ и҆ младе́нцы , ѻ҆́трᲂки и҆ съ сꙋ́щїѧ млеко̀ , мꙋ́жеско є҆стество̀ и҆ же́нско , пᲂко́й хрⷭ҇тѐ ᲂу҆со́пшїѧ вѣ́рнѡ . Кᲂго́ждо по и҆́мени , вѣ́рнѡ ᲂу҆ме́ршїѧ ѿ́ вѣка , и҆ ѿ́ рᲂда рᲂдо́въ , неѡ҆сꙋжде́ннѡ пред̾ ста́ти тебѣ̀ хрⷭ҇тѐ , в̾ прише́ствїи твᲂе́мъ спо до́би . сла́ва . Є҆ди́нъ в̾ трⷪ҇цѣ бж҃е сла́ва тебѣ̀ прⷭ҇нѡ . а҆́ще бо и҆ бг҃ъ ко́ждо , но є҆ди́нъ є҆сте ство́мъ є҆сѝ , ѻ҆ц҃ъ и҆ сн҃ъ и҆ дх҃ъ , трисвѣ́тлыми сво́йствы . и҆ ны́нѣ , боⷢ҇ . Па́че ᲂу҆ма̀ ржⷭ҇тво́ ти , ражда́еши бо приснᲂсꙋ́щаго и҆ млеко́мъ дᲂи́ши несказа́ннѡ пищеда́вца ми́рꙋ . держи́ши бо всѧ̀ сᲂдержа́щагѡ , хрⷭ҇та̀ и҆зба́вителѧ на́шегѡ всенепᲂро́чнаѧ .

катава́сїѧ : Прᲂѧвле́ннᲂе на гᲂрѣ̀ закᲂнᲂда́вцꙋ , ѻ҆гне́мъ и҆ кꙋпино́ю , ржⷭ҇тво̀ при́снѡ дв҃ыѧ . в̾ на́ше вѣ́рныхъ спасе́нїе , пѣ́сньми немо́лчными велича́емъ . та́же , дᲂсто́йнѡ є҆́сть .

свѣти́ленъ . Нб҃о ѕвѣзда́ми ᲂу҆краси́выи ꙗ҆́кѡ бг҃ъ , и҆ свᲂи́ми ст҃ы́ми всю̀ зе́млю прᲂсвѣти́выи сᲂдѣ́телю всѣ́хъ спаса́й пᲂю́щихъ тѧ̀ . сла́ва . И҆́же ме́ртвыми и҆ живы́ми ѡ҆блада́ѧи ꙗ҆́кѡ бг҃ъ , пᲂко́й свᲂѧ̀ рабы̀ в̾ се́лѣхъ и҆з̾бра́нныхъ , а҆́ще бо и҆ сᲂгрѣши́ша сло́ве , но не ѿстꙋпи́ша ѿ тебѐ . и҆ ны́нѣ , боⷢ҇ . И҆́же сла́дᲂсть а҆́нг҃лѡмъ , скᲂрбѧ́ щимъ ра́дᲂсте , хрⷭ҇тїа́нѡмъ застꙋ́пнице , дв҃о мт҃и бж҃їѧ , застꙋпа́й на́съ , и҆ и҆зба́ви вѣ́чныѧ мꙋ́ки .

На хвали́тѣхъ , стихѣ́ры , на д҃ . гла́съ , и҃ . И҆́же рꙋко́ю свᲂе́ю сᲂзда́въ а҆да́ма , и҆ пᲂста́ви предѣ́лы нетлѣ́нїѧ , и҆ ᲂу҆мерщве́нїѧ сп҃се , и҆ и҆́же бл҃гᲂда́тїю жи́зни , тлѣ́нїѧ премѣни́въ , к̾ пе́рвѣй прелага́ѧ жи́зни , са́мъ рабы̀ твᲂѧ̀ влⷣко ꙗ҆́же преста́вилъ є҆сѝ ѿ на́съ , с̾ пра́ведными пᲂко́й в̾ ли́цѣ и҆збра́нныхъ . и҆ си́хъ и҆мена̀ написа́въ в̾ кни́зѣ живо́тнѣй , во́ гласѣ а҆рха́нг҃лᲂвѣ вᲂскр҃сѝ , въ трꙋ́бнѣ гла́сѣ , и҆ спᲂдо́би и҆́хъ нбⷭ҇нагѡ црⷭ҇твїѧ твᲂегѡ̀ . два́жды . И҆́же свᲂе́ю кро́вїю сп҃се чл҃ки и҆скꙋпи́въ , и҆ сме́ртїю свᲂе́ю , ѿ сме́рти го́рькїѧ и҆зба́вивъ на́съ , и҆ жи́знь вѣ́чнꙋю пᲂдаѧ̀ на́мъ вᲂскрⷭ҇нїемъ сѝ всѧ̀ пᲂко́й гдⷭ҇и , ᲂу҆со́пшїѧ бл҃гᲂче́стнѡ , и҆лѝ в̾ пꙋсты́нѧхъ , и҆лѝ во градѣ́хъ , и҆лѝ в̾ мо́ри и҆лѝ на землѝ , и҆лѝ на всѧ́кᲂмъ мѣ́стѣ , цр҃и́ же и҆ ст҃ли , и҆ а҆рхїє҆ре́и , и҆́нᲂки и҆ бѣлцы̀ , во всѧ́кᲂмъ во́зрастѣ и҆ ро́дѣ , и҆ спᲂдо́би и҆́хъ нбⷭ҇нᲂмꙋ црⷭ҇твїю твᲂемꙋ̀ . Хрⷭ҇то́съ вᲂскр҃се , разрѣши́въ ᲂу҆́зы а҆да́ма первᲂзда́ннагѡ , и҆ а҆́дᲂвꙋ разрꙋши́въ крѣ́пᲂсть , дерза́йте всѝ ме́ртвїи , ᲂу҆мертви́сѧ сме́рть , плѣне́нъ бы́сть а҆́дъ с̾ не́ю , и҆ хрⷭ҇то́съ вᲂцр҃и́сѧ . распе́нсѧ , и҆ вᲂскр҃се . то́й на́мъ дарᲂва̀ нетлѣ́нїе плᲂтьско́е . то́й вᲂздви́гнетъ на́съ , и҆ да́рꙋетъ на́мъ вᲂскрⷭ҇нїе . и҆ сла́вы ѻ҆́нᲂѧ весе́лїю всѧ̀ спᲂдо́битъ , и҆́же вѣ́рᲂю и҆ любо́вїю , вѣ́рᲂвавшїѧ те́плѣ в̾ негѡ̀ . сла́ва . гла́съ , ѕ҃ . Бᲂлѣ́знь а҆да́мꙋ пᲂказа́сѧ дре́ва в̾кꙋше́нїемъ дре́вле во є҆де́мѣ , є҆гда̀ ѕмі́й ꙗ҆́дъ и҆з̾блева̀ , тᲂго́ бо ра́ди вни́де сме́рть всеро́дна , снѣда́ющи чл҃ки . но прише́дъ влⷣка , низ̾лᲂжѝ ѕмі́ѧ , и҆ вᲂскрⷭ҇нїе на́мъ дарᲂва̀ . к̾ немꙋ́ же ᲂу҆́бѡ вᲂзᲂпїе́мъ , пᲂщадѝ сп҃се , и҆́хъ же прїѧ́тъ , со ст҃ы́ми пᲂко́й , ꙗ҆́кѡ чл҃кᲂлю́бецъ . и҆ ны́нѣ , боⷢ҇ . Мл҃твами ро́ждьшїѧ тѧ̀ хрⷭ҇тѐ , мч҃нкъ твᲂи́хъ и҆ а҆пⷭ҇лъ , и҆ прᲂро́къ и҆ ст҃лей , прпⷣбныхъ и҆ пра́ведныхъ и҆ всѣ́хъ ст҃ы́хъ , ᲂу҆со́пшїѧ рабы̀ свᲂѧ̀ пᲂко́й .

На стихо́внѣ , стихѣ́ры . гла́съ , ѕ҃ . поⷣ , всѐ ᲂу҆пᲂва́нїе . И҆мѣ́ѧи непᲂстижи́мᲂе ,꙳ є҆́же к̾ на́мъ млрⷭ҇дїе ,꙳ и҆ и҆сто́чникъ не и҆стᲂща́емыи ,꙳ бжⷭ҇твеныѧ бл҃гᲂсти ,꙳ мнᲂгᲂми́лᲂстиве ,꙳ к̾ тебѣ̀ влⷣко преста́вльшїѧсѧ ,꙳ в̾ землѝ живы́хъ вселѝ ,꙳ в̾се́лѣхъ любе́зныхъ и҆ вжелѣ́нныхъ ,꙳ лю́бᲂвь да́рꙋѧ ,꙳ вы́нꙋ пребыва́ющꙋю .꙳ ты́ бо за всѣ́хъ и҆злїѧ̀ кро́вь свᲂю̀ хрⷭ҇тѐ ,꙳ и҆ живᲂно́снᲂю цѣно́ю ми́ръ и҆скꙋпи́лъ є҆сѝ .

сти́хъ : бл҃же́ни ꙗ҆́же и҆збра̀ ,꙳ и҆ прїѧ́тъ ѧ҆̀ гдⷭ҇ь . Оу҆мерщве́нїе претерпѣ́лъ є҆сѝ ,꙳ живᲂтво́рнᲂю во́лею ,꙳ и҆ жи́знь и҆стᲂчи́лъ є҆сѝ ,꙳ и҆ пи́щꙋ приснᲂсꙋ́щнꙋю вѣ́рнымъ да́лъ є҆сѝ ,꙳ є҆ѧ́же и҆ ны́нѣ да́рꙋй ,꙳ ᲂу҆со́пшимъ в̾ наде́жи вᲂскрⷭ҇нїѧ .꙳ си́хъ сᲂгрѣше́нїѧ ꙳ всѧ̀ прᲂстѝ бл҃гᲂстїю сѝ .꙳ ꙗ҆́кѡ є҆ди́нъ без̾грѣ́шенъ ,꙳ є҆ди́нъ бл҃гъ и҆ чл҃кᲂлю́бецъ .꙳ да всегда̀ пᲂе́тсѧ и҆́мѧ твᲂѐ ст҃о́е хрⷭ҇тѐ ,꙳ и҆ спаса́еми сла́вимъ чл҃кᲂлю́бїе твᲂѐ .

сти́хъ : дш҃а и҆́хъ ,꙳ во бл҃ги́хъ вᲂдвᲂрѧ́тсѧ . Живы́ми ѡ҆блада́юща ,꙳ живᲂнача́льнᲂю вла́стїю ,꙳ и҆ ме́ртвыми влады́чествꙋюща ,꙳ тебѐ хрⷭ҇тѐ ви́дѧще мо́лимъ ꙳ вѣ́рныѧ рабы̀ свᲂѧ̀ ,꙳ к̾ тебѣ̀ є҆ди́нᲂмꙋ бл҃гᲂда́телю ѿше́дшїѧ ,꙳ са́мъ пᲂко́й со и҆збра́нными си чл҃кᲂлю́бче ,꙳ въ мѣ́стѣхъ пᲂко́йныхъ во ст҃ы́хъ свѣ́тлᲂсти .꙳ вᲂли́телю млⷭ҇ти , є҆си́ бо ,꙳ и҆ спаса́еши ꙗ҆́кѡ бг҃ъ ,꙳ ꙗ҆́же по ѻ҆́бразꙋ свᲂемꙋ̀ со́здалъ є҆сѝ ,꙳ є҆ди́не мнᲂгᲂмлⷭ҇тиве .

сла́ва . гла́съ , ѕ҃ . Нача́тᲂкъ ми и҆ сᲂста́въ зиж ди́тельнᲂе твᲂѐ бы́сть пᲂвелѣ́нїе . вᲂсхᲂтѣ́въ бо ѿ неви́димагѡ , и҆ ви́димагѡ мѧ̀ жи́ва сᲂста́ вити є҆стества̀ , ѿ земли́ ми тѣ́ло сᲂста́вивъ , да́лъ же ми є҆сѝ дш҃ꙋ бжⷭ҇твенымъ си и҆ живо твᲂрѧ́щимъ дᲂхнᲂве́нїемъ . тѣ́мже сп҃се рабы̀ твᲂѧ̀ , в̾ странѣ̀ живꙋ́щихъ , и҆ в̾ се́лѣхъ пра́вед ныхъ пᲂко́й . и҆ ны́нѣ , боⷢ҇ . гла́съ , и҃ . Ты̀ є҆сѝ бг҃ъ на́шъ , и҆́же всѧ̀ мꙋ́дрᲂстїю сᲂдѣва́ѧ и҆ сᲂверша́ѧ . прᲂро́ки пᲂсла́лъ є҆сѝ хрⷭ҇тѐ прᲂрещѝ твᲂѐ при ше́ствїе , и҆ а҆пⷭ҇лы прᲂпᲂвѣ́дати твᲂѧ̀ вели́чїѧ . и҆ ѻ҆́ви ᲂу҆́бѡ прᲂреко́ша твᲂѐ прише́ствїе , сі́и же кр҃ще́нїемъ прᲂсвѣти́ша ꙗ҆зы́ки , мꙋ́ченицы же прїѧ́ша ꙗ҆́же жела́хꙋ . и҆ мо́лѧтъ тѧ ли́цы ѻ҆бᲂи́хъ , с̾ ро́ждьшею тѧ хрⷭ҇тѐ , пᲂко́й бж҃е дш҃и ꙗ҆́же прїѧ́тъ , и҆ на́съ спᲂдо́би црⷭ҇твїю твᲂемꙋ̀ , распѧ́тїе претерпѣ́выи менѐ ра́ди ѡ҆сꙋже́нагѡ , и҆зба́вителю мо́й бж҃е .

На литꙋргі́и , бл҃же́нна , на и҃ . ѿ кано́на , пѣ́снь , г҃ , и҆ ѕ҃ . прᲂки́менъ , ѱл҃о́мъ дв҃дᲂвъ . ди́венъ бг҃ъ во ст҃ы́хъ свᲂи́хъ , бг҃ъ і҆и҃левъ . сти́хъ : въ цр҃квахъ бл҃гᲂслᲂви́те бг҃а гдⷭ҇а , ѿ и҆сто́чникъ і҆и҃левъ . дрꙋгі́и , дш҃а и҆́хъ во бл҃ги́хъ вᲂдвᲂрѧ́тсѧ . а҆пⷭ҇лъ , въ дѣѧ́нїихъ . заⷱ҇ , н҃а . и҆ дрꙋгі́и , къ кᲂри́нѳѡмъ . заⷱ҇ , рѯ҃г . а҆ллилꙋ́їѧ . вᲂзва́ша пра́веднїи , и҆ гдⷭ҇ь ᲂу҆слы́ша и҆́хъ .= сти́хъ : мно́ги ско́рби пра́веднымъ , и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь . =сти́хъ : бл҃же́ни ꙗ҆́же и҆збра̀ и҆ прїѧ́тъ и҆́хъ гдⷭ҇ь , па́мѧть и҆́хъ ѿ́ рᲂда и҆ в̾ ро́дъ . є҆ѵⷢ҇а́лїе , ѿ і҆ѡа́нна . заⷱ҇ , ѯ҃з . и҆ дрꙋго́е , ѿ і҆ѡа́нна . зача́ло , к҃а . прича́стенъ , ра́дꙋйтесѧ пра́веднїи ѡ҆́ гдⷭ҇ѣ . дрꙋгі́и , бл҃же́ни ꙗ҆́же и҆збра̀ и҆ прїѧ́тъ ѧ҆̀ гдⷭ҇ь , па́мѧть и҆́хъ в̾ ро́дъ и҆ ро́дъ .